NÁO VÂ -(Completed) Ziaktu: Becky Rafa Renthlei [-B®®] Rhapsody (Thuhmahruai) "Min rin loh avanga rinawm lo ka ni lo va, min rin êm vanga rinawm chawp lah ka ni hek lo. Ka hmangaihna che hian rinawmna a keng tel zâwk asin." A ṭawng dam thlap leh ril rûih, thinrim awkâ ni miah si lo chu chhân ngaihna ka hre dêr lo. Ni e, ani ang 'mipa rinawm' ti-a insawi chhên lo; a ṭawngkam hman chhuah dik thlup lawi si hi ka ring ngam mai tur a ni dâwn lo'm ni. #### "Vanlalthlamuanpui, tun hi rawn haw hun a ni em ni?" Inchhung ka luh ruala ka pasal aw vîn tûk ri ka hre hmasa ber a. "Kan hna a laklawh deuh alawm le." Ka aw a ring hauh lo na-in a khûr deuh tihtih a, "I hna chhuanlam hian vawi engzat nge i lo hâw tlai tawh?" Tihpaha ka sam a rawn phih rualin ka pai nawk nawk a. Ṭawngkam khat lek ka chhâk chhuak leh a nih vaih chuan kut min thlâk zui dawn tih ka hre reng; chuvangin ṭîk pawh ka ti ngam tawh dêr lo. A thinrim âng thâwm c