CHAN LOH KHAN [A Becky Rafa Stories]

CHÀN LOH KHÁN

Ziaktu: Becky Rafa Renthlei

-B®®

Shadow of the life

SAWI HAWNNA

A bialpa kumhlun leh a hmangaih ni bawk lakah nau a pâi a, innei mai tawh turah vantlâng pawhin an ngai vek. Mahse, a fa pâina pa chu nuthlawi nalh leh chhe lo zetin a rawn luhkhung ta tlat mai! Tun hma aṭanga lo inkawp ru tawh anni awm e.

A bialpa nu leh pa te lamin nuthlawi chu an mo atân an duh lo nain a mipain a hnar phal ta si lova sâwn a pawm dawn ta. 

An khuaah sawi sep an kâi nasa mai si a, nun bul ṭan ṭha turin a ṭhiannu nen Aizawlah in luah turin an kal ve ta ràwih a. Chuta a mipa tawn thar chuan a naupai chhung zawngin a ngaihsakin a duat em em a, rin ngam mipa a ni dawn nge dawn lo?

Engtin tak ni zel ang maw?

-B®®

Kum 28 na ka hmang ve ṭan tihah ka bialpa nen kan chesual palh ta hlauh mai le. Ngaihzawng nei lovin kum 26 lai kha ka awm ve a, ka neih hmasak ber, Zosanga nen chuan kan induhin kum khat teh meuh kan inzui hnuah ka râi ta. 

Ka râi tih a hriat tirh khân a lâwm a, a rûkin incheck up turin min hruai thlap. 

Damdawi leh in entîrna man vel pawh ama'n a tum vek a, "Lungngai rêng rêng suh, ka fa tih fahrah ka tum miah lo a nia," tiin min kuah hlu hlu a, ka hahdam huai huai thei nia.

Zan tin a rawn lêng a, ka chhungte'n eng mah an la hre lo. Zosanga mi â a ni lo bawk a, fiamthu titak deuhvin inneih a duh tawh thu ka nu leh pa bulah a sawi a, "Kum naupang zawk zawk a ni tawh lo a, a neitu turin a inhuam te chuan," awlsam têin ka pa'n a ti. 

Ka naupaiin thla thum hmêl a hmuh ni chuan ka nunah thil danglam a lo thleng ta tlat mai. Ka fa paina pa, Zosanga chu nuthlawi tlawngáwlin a luhkhung ta a, an inngaihzawn lai ka hre lo a, min kawp tih pawh ka hre hek lo. Ka zak lutuk chu awmngaihna ka hre lo mai ni lovin ka bîng chûk chûk a ni ber.

"Nunu, min ngaidam rawh aw," tia whatsapp aṭanga min rawn biakna chu chhân enah pawh ka en lo. Ka ten hluah hluah a, kâr hmasa lawkah pawh incheck up turin min hruai a, min ngaihsak ber niawm takin a khawsa vel a, tunah ti hian nuthlawiin a luh khung ngam a nia, ka haw ngawih ngawih. 

Zosanga nu leh pa, a farnu te erawh chu an thinrim em em a, "Nangmah kan duh zawk che, he nu hi mo atan kan duh lo," an rawn ti a, atu te pawhin kan inneih mai an ring vek a, ka nu leh pa, ka unau te zak hmel ka hmuh hian ka na ru vawng vawng. 

He tih lai hian ṭhian kawm ngeih em em mai, ka unaunu ang hiala ka en Mpi ka nei a, ani chuan min khawngaih fâl hle. 

"Nunu, lungngai rêng rêng suh, fa pakhat te zawng Pathian zarah i pawm tlei ve em em ang," Zosanga a ngei so bawrh bawrh. "Vawikhat mah be tawh miah suh, tenawm lutuk," a ti hmarh hmarh a, chumi zan, nuthlawiin a luhkhung zan chuan min rawn riahpui ta kha a ni a.

Kei erawh ka ṭap tlaivar deuh thaw, Zosanga hi kei aiin kum thumin a upa a, primary zirtirtu a ni bawk. Kei erawh chu online shopping ka tih bâkah ka ṭhiannu Mpi nen hian pheikhawk second hand bale kan inhawn ṭâwm ṭhin a, mahni mamawh a lo tum ve hrim hrim pawh kha nuam kan ti.

Kei hi Ruatsangkimi ka ni a, 'Nunu' tiin min ko tlângpui, û mipa pahnih ka nei a, hmeichhe awmchhun ka ni, ka nu leh pa-in min la dampui bawk. 

Zosanga chanchin an hriatin an thinrim hle a, ka naupai an hriat tirh pawh khân an zak lutuk tlat; mahse, ṭawngkam ngeiawm leh ngaihthlâk hrehawm min chhâkchhuah khum ngai miah lo.

Kan chanchin chu kan khuaah a thang chak kher mai a, min diriam tu leh min hmusit tâwk lah an bo hek lo. 

Min khawngaih tu leh min lainat tu pawh an bâng bik lo va, khua ka hawi ngam lo va, ka chhungrila zahna chuan thih min châk tîr a, dam thlâkhlelhna ka nei lo hial. 

Zosanga nupui lah chu a ṭawngthei hrep lehnghal a, "A fa tak tak pawh a ni lovang, keimah nen kan inkawpna a rei tawh a, Nunui te chu a lerh ru ve e," tih te kha min sawi duh dan a ni. Ṭawng chhuah châk ve mah ila ka kâ hi thunun tu awm ang maiin a chih tlat. 

A mipa chhungte lamin min duhin kan inneih remti mah se a neitu tur berin luhkhung a tâwk ta miau si a, eng mah sawi theih ka nei lo. Biak tlang theih pawhin a awm tawh lo a, a fa aia a thlan zawk nuthlawi Dinsangi nen chuan a thla thar lawkah an insawi rem nghal ta nghe nghe a. 

Kei erawh raipuar chungin zahna ka hmachhawn a, ka ṭhiannu Mpi awm lo phei se chuan ka tân khawvel hi eng mah lo mai a ni. 

Ani'n eng kimah min fuih a, kan inah min rawn awmpui tawp a, kan hna ngai second hand pheikhawk bawk chu kan buaipui dun leh ta a.

Zan khat chu ka nu nen ṭhenawm dawra kan awm laiin Dinsangi a rawn lût hlawl mai! 

A hmêl hi chiang kuang tak pawhin ka la hmu lo va, tun hi hmai chhana ka vawikhat hmuhna a nih ka ring. Kum 35 bâwr vel niin kan upa ber nen an inrual a, a hmelṭhain a ngo suah lehnghala fa chuam pakhat a pawm ve. 

Ṭhenkhat inti hre deuh ho chuan Zosanga fa tho an ti a; mahse, thu chiang eng mah ka hre bîk lo. 

"Ruatsang, Zosanga tih buai tumna rilru te kha i lo pu ang e, i nau pai hi ka fa a ni lo a tia, a fâ ni lo na na naah chuan a inrawlh ka rem ti dawn lo," tiin dawra ṭhu ve te hmai zah map lo hian min ṭawngkhum a nih chu! 

"Ê, lo lungngai duh suh, ani tel lo hian Pathian zarah kan pawm tlei ve em em ang, kha leh chen zan tin khêl lova kan ina chuangkâi a ni a, ka fanu laka a awm dan pawh ka hre chiang ve thawkhat alawm, a rinawm loh man kan tuar dawn hleinem, ama'n a lawm tuar dawn?" Tiin ka nu'n ka thlavang a hauh ve ta a.

"I fanu hur herh zâr in zo dawn a nih hmel," tia Dinsangi a ṭawng leh chuan ka nu a che phat a, a bânah ka va chelh hman.

"Nu, lo kal rawh, hnial tlâk a nih loh kha.." ka ti sap a. Dawr nghâktunu u Mahrili pawhin, "Nu Pui, kalsan rawh u, aia upa zahna châng a hre lo êm mai," tiin Dinsangi tukverh bula ding chu a melh rân a, a ngei hmêl khawp mai.

Kan khuaah sawi sep kan kâi nasa si a, ka nau neih hma Aizawla awm turin ka chhungte'n thu an ti tlu ta a, chhungte belh tur kan nei mumal lo va, Mpi nen in luah dun kan tum ve mauh mai. 

Ani lah chu a phûr mai mai khawp a, "I nautê hi kan inṭâwm tur a nih hi, nu pahnih a nei a ni mai," a tih chuan ka nuih a za hle.

A pa te lamin min rawn ngaihsak lo a, Aizawla in luah kan tum thu pawh Mpi chhungte leh ka chhungte bâkin an hre lo. 

Zosanga te nupa khawlai lêng hmuh tur an awm fo va, min bum chiang bawka a hmêl ka hmuh ringawt pawh hian ka luak a chhuak. A hmuh phâka awm tumna ka nei lo, a tidik lo tu zawk ni lo mah ila khawlâi lên ka tân a nuam lo a, kohhranin min thunun zân phei chuan ka muhil miah lo.

Aizawl kan kal hma zanah Zosangliana te chhungkaw palâi hmêl kan hmu ta a, a fa ka pâi mêk chu an fa anih loh thuin an rawn ṭang ṭha leh a, a lo pian hunah pawh a pa hmingah Zosangliana dah anrem tih loh thu chiang takin min rawn hrilh ta! Ka zahna khan Van a tawng hial awm e.

Mahse, engkim, thudik hrechiangtu Pathian a awm a, ṭawngkam khat mah ka chhâk chhuak ve lo. Ka pa erawh a lawm lo em em a. 

"Ê, chuti na na na chu kan ziak lo tawp ang, kan fanu hi kan hrechiang a, kan ring bawk, in fapa a lo kawp erawh a thiltih sual lian ber a ni ta ve ang," a ti hmiah.

Tichuan, a tûkah Mpi nen Aizawl panin kan kal ve ta a, kan in luah tur Assam type tê fel khar chu thla hmasa lam khan Mpi nutei'n min lo biak sak tawh a, a luah man chêng 4000 a ni thung. 

Mualpho, zahna tawng mah ila beidawnga rilru tih hnual erawh ka tum tawh miah lo. Pathian zarah kan sum khawlsa leh kan chhungte puihnain hmalam pan ka tum ve tlat a, ka ṭhiani pawhin ṭhahnem a ngai viau. 

Ka naupai pawh thlaruk a pum tawh a, ka hriselna a zia viau. Kan ṭhian dun hian tumah kan ngai bik lo, theih tawpin kan phâk tawk ang ang hna kan thawk a, harsa bakberhin kan awm hek lo, ka incheck up zauh zauh reng bawk a, kan chhungte puih pawh kan ngai ta bik lo.

Fanu mal ka ni a, BA ka zawh hnuah zir zawm lovin online shopping tih velah ka in hnamhnawih kual a, private school-ah thla ruk vel ka inhlawh lâwp lâwp bawk a, nu leh pa dîl buai lovin ka mamawh hi chu ka intum ve mai.

Zan khat chu inlêng kan nei ve mial! Mpi ṭhiante an ni a, pathum an lokal a, pakhat chu ka hmelhriat a ni lo. A dang pahnih erawh ka hmu fo tawh thung, ka hmelhriat loh bera chu Ramnunmawia niin a ṭawng tlêm bik em em a, a phone kheuhin a ṭhiante titi pawh a ngaihsak ve lo a, ka pum rawn melh zauh pah hian, "Engtikah nge nautê i neih dawn?" Tiin min zâwt khauh.

"December-ah," ka ti a. A bu nghut ringawt.

Mipa tumah biak leh ngaihsak ka nei tawh ngai lo a, ṭhian ang tak ngiala kawm pawh ka hlau zek zek. Min biak thui hlau zetin room-ah ka luhsan ta daih a, Mpi ṭhiante an ni a, ka awm ve reng a ṭul pawh ka hre hran lo.

An lêng rei phian a, ka zun a chhuah êm avangin ka tho chhuak leh ta nge nge.

Ramnunmawia tiam lovin card an lo khêl a, ani erawh a ṭhutna ngaiah ṭhu in phone a lo la hmet char char. Háng lam deuh, mitmeng lian lam hmel pangngai tak a ni a, Mizo mipaah chuan a sâng pâwl a nih loh pawhin a vantlâng a ni pha tal ang.

"Nunu, lo ṭhu ve rih rawh," Mpi in a tih chuan ka mut chhuak chhuanlamin room-ah bawk ka lût leh ta a, Ramnunmawia nui suk lai ka hmu ru reng.

Min nuihzat hmêl a pû!

An men rei tâk êm avangin kei pawh ka lo muhil daih a, an haw lai pawh ka hre ta lo.

A tûka ka harh leh chuan Mpi a lo tho daih tawh a, nizanah a men rei teh reng nen thawh a hai lo teh khiah! 

"Nunu, Ramnuna khan i number min dila ka pe a nia," tiin a lo nui ṭhâ a.

"Mipa ka biak duh loh dan chu i hriat kha," ka ti nghat.

"Ah, chutiang lam a ni lo, an dawr nghâktu tur an duh a, i nau neih hma chu i thawk duh lo em ni? Thla thum vel a ni mai a, kei pawh an dawr pakhat zawk nghâk turin min sawm tho alawm, kan hna te chu zan lamah pawh kan chhunzawm thei tho a.." a tih chuan ka ngawi ta vang vang a.

Ka nau neih nan thla thum pum thuak a la awm a, kan bungraw chah a lo la thlen kim loh bâkah, Second hand man ba te'n min la pe ṭha lutuk lo nen thawh tur a awm chuan tlânchhiat loh ka duh khawp mai.

"I thawh dawn chuan ka thawk ve ang a, dawn loh chuan ka duh bik lo." Ka ti a. 

"A lo biak hunah che i lo sawi dawn nia," a ti awlsam leh mai a. Ramnunmawia chanchin kan sawi zawm ta rih lo.

Zosanga number ka block fâi vek a, a chanchin eng mah hriat zuina ka nei lova ka chhungte nen kan inbiak pawhin an rawn sawi lang ngai lo hrim hrim. 

Ka nau neih dawnah ka nu lo chhoh a tum a, "Indim la, pawisa te chu indam anga i la thawk chhuak dawn chauh alawm, nautê kha a pawimawh hmasaber," tiin min rawn chah lawm lawm.

Khawsak harsa kan ni hran lo a; mahse, 'hausa' tia sawi tur pawh kan ni chuang lo. 

Ka pa hi High School-ah peon a ni a, ka nu erawhin eng mah a thawk lo a, kan upa ber hi Electric department-ah a thawk a, ka û chiah Muanpuia hian PHE ah a nghet lovin a thawk ve thung, nupui an la nei lo ve ve a, kum zâwna piang an ni.

Ka phone a rawn rîk chuan ka ban vat a, number lâwng ringawt! Second hand man bâ tu emaw ber annih ringin ka chhâng ta a.

"Hello..."

"Nunu, keimah Ramnuna.." tia rawn ṭawng chu a âw a zâwi fiah kalh.

"Aw, eng nge ni ta?" Ka lo ti a.

"Kan dawrah chuan i lo thawk duh ang em? Thla hnih emaw thla thum vel a ni mai," a ti nghal tawp a.

"En teh, ṭha chu ka ti lutuka mahse, dawr bungrua pêka sem ang chi te a nih chuan ka thei dawn lo sa, ka rit ve tawh sia," tiin ṭha tak hian ka chhâng a.

"Ah, chutiang lam a ni lo, ka nu leh pa incheck up turin Vellore-ah an kal dawna ka pa a cancer tih i hriat tho ka ring, an châm chen tur a hriat si lohva pawisa lo dawngtu tur mi rinawm kan mamawh vang zawk a nia," a ti leh a.

"Nia, ka thawh awm tâwk a nih chuan ka hreh chuang lova, dâr eng zata kal tur nge tih leh eng hunah nge kan bân ang?" Tia ka zawh chuan, "Zing dar kua aṭanga tlai lam dar ruk vel thleng a ni mai," a ti ta a.

Hlawh chungchâng pawh a sawi tlang nghal a, "Vawiin hi Inrinni a ni a, kârleh Thawhṭan aṭanga i lo ṭan nghal theih chuan a lawmawm ngawt ang, Mpi pawh kan dawr pakhat zawkah a ṭhu ve dawn tho a, in lo kal rual thei ang chu," ti leh zung zungin phone a dah ta a.

Ka mimal thil engmah min zâwt lo a, râipuar ka ni tih a hriat ve vek avangin thil harsa lutuk min thawh tir loh ka ring ve ringawt. 

Hlawh pawh a chhe hran lo a, pasal ka neih leh neih loh pawh min zâwt chuang lo, Mpi hnen aṭanga a hria te a nih ngawt loh chuan sawi chhuah ka tum lêm lo. Ka ṭhiani pawhin a sawi chhuak kherin ka ring lo bawk.

Zosangan min phatsan dan kha sawi chhuah tlâk pawh va ni suh. Mipa ka rinna a chhe zo va, nau ti tla tur khawpa rilru chhia ka nih loh avangin ka mualphona pal darh turin tun hun ka thleng ta a ni a, tû mipa mah hian min bum nawn tawh lo ang. Chu chu ka intiamna a ni.

Ramnunmawia hmêl kha ka mitthlâah a rawn lang iar iar a, 'hmelṭha' tia sawi hluak tur a ni hran lova a thutak mah mah, kei aiin kum 7 velin a upat ka ring. 

Mpi min hrilh dan chuan nau hmeichhia pakhat leh mipa pakhat a nei a, a pa chuap cancer a ni tih an hriat chhuah aṭangin an dawr lamah a insawrbing ve chauh niawm tak a ni. 

Wholesale dawr lian tak tak pahnih leh Thawmhnaw dawr an nei bawk a, a nau hmeichhiain a enkawl a, amah tak hi chu first class contractor a ni. Kan in luaha a lo kal ve ṭum pawh khan pa ṭawng tam a ni lo tih a hriat reng a, phone a khawih nasa mah mah ka ti.

Thawhṭan a lo thleng a, an dawr awmna ka hriat loh avangin Mpi nen City bus-ah chuangin ka thawhna tur hmunah min kal pui ta a, ani chuan an dawr awmna leh an in awmna te pawh a hre vek. Khawi aṭanga inhria nge annih ka hre hran lo a, ka ṭhiannu rin chhanin ka kal ve tawp.

"I lo thleng tawh maw?" Tia min lo betu chu tlangval la naupang deuh a ni a, a nui sâng lehnghal a, "Umn.." tiin ka nuih lêt ve var var a. 

Wholesale dawr lian pangngai a ni dawn emaw ka tia, a teuh lo! Engkim an zuar emaw tih mai turin bungrua a tam em em a, ka ṭhutna tur min kawh hmuh fel chauh a, thil lei tur an tam bawk nen inhrilh fiahna hman pawh a awm tawh lo, Calculator lian min rawn chhawp a, ka thawk ṭan nghal a ni ringawt.

"A hahthlâk hran lova mahse; pawisa chhût vel kha a ninawm a nia," Ramnunmawia rawn luh lai pawh ka hre lova min lo biak thut chuan ka phu zawk.

"Eng lo, ka ti ve thei mai ang," ka ti zawi sap a. 

Ṭhut hmunah ni mah se pawisa kír vel tihsual ka hlau ru tawp. Cctv a awm tho a, tlêm chuan ka thlâ a muang deuh, keimah tiam lovin pali chhawr lai annei a, ka sana bun lai ka en chuan chawhnu dâr hnih a lo ri dêr tawh. 

"Nunu, hrehawm i tih chuan sawi hreh lo la aw, Sunday bâk chawlh kan nei lo a nia," tiin ngun deuh hian min en a.

"Ka hria alawm, tunkâr ka'n thawk chhin anga ka tlin dawn leh dawn loh a hriat mai ang," tiin ka nui sak a, "In check up i ngaih pawhin sawi hreh lo la, damloh leh harsatna pawh sawi zel tur aw," a ti dam leh thlup.

Min dâwrtu an tam bawk si a, rei pawh kan inbe zui ta lo, a lo luh lâi ka hre lo ang bawkin a chhuah lai pawh ka hre ta chuang lo.

"Biaka, Ramnuna a lo kal na nge?" Hmeichhe aw fiah fel tak ri ka hriat chuan rang takin ka dâk chhuak vat a.

Hmeichhe tê lam deuh hmai fâi vang hi dawr chhungah a rawn lut a, ka thlen tirha min lo be tu Biaka dinna lamah pheiin a nui var var a, "U Tharte, i rawn nang hman lo chiah, Bawngkawna a hna thawh tur en turin a chhuak leh daih tawh," Biaka'n a ti a.

"Ka call tlang thei miah lo, a lo lêt leh hlauh chuan ka lokal thu hrilh la, zaninah min rawn sâwm hmasa mai rawh se, ati, i lo ti dawn nia," tih pahin min rawn eng ngun ngang mai. Kei pawhin ka lo en ve rân a, a thinchhiat hmel ka lo ti ve ringawt.

"Thawk thar i ni maw?" ka ṭhutna a rawn pan a, "Aw," tiin ka chhâng nghat.

"Hmeichhia hnathawkah ka chhawr duh lo a ti sia, an chhungte i ni nge ni lo?" Tiin min zâwt leh a, "Ni lo ve," tiin a mitah tak ka en a, ka hriat fiah chiah loh eng emaw riau hi hmuin ka inhria. 

Ramnunmawia nau hmeichhia kha a ni emaw ka ti hman kha a nia; mahse, a ni lo tih ka hre chawpchilh.

A bialnu a nih ka ring ta ber zawk. A tlângnêl êm mai.

"Hna i mamawh viau a nih ka ring, râipuar púng chunga i thawh danah,'' min hmusit tih a ṭawng danah a lang reng a, customer an awm ve bawk nen ka zak ru viau. 

Chhâng thui duh lovin ka thil tih lai ka bihsan ta daih a, atu a pawh chu ni se, mi rilru ṭha tak chu a ni lo phawt ang. 

Ṭawng tlêm viau e ti lo hian ka duh lohnaah chuan ka nasa ve riau a, ka mize ṭha lo erawh ka thup bo hneh hlê.

Thartei pawh rei awm lovin a chhuak leh ta a, Biaka'n, "U Nunu, engah mah ngai suh a tih dan ve a nih kha," ei vak lo tih hriat deuh hian a ner zui sak.

Ka ni hmasa ber chu ka tlingtla ve hrâm a, ka ṭhut rei lutuk vangin ka ke a vûng leh tawh. Dâr ruka kan bâng a nih chuan hawnna turah ka buai tlaitin dawn a ang ta riau. Scooty khalh chi ka ni tawh si lo a, ka thawk zawm thei angem tih hriat pawh va ni suh.

Amah Ramnuna pawh a rawn lang nawn ta miah lo a, zan lamah call-a hrilh tlang nghal ka tum ta a. Kal lam chu tih dan dan a awm a, Mpi'n Scooty a nei a, ani chu buaipui a ngai hran lo, a ruala kal a theiha haw lamah kei aiin a bâng tlâi zawk si a, a buaithlâk ta riau.

Ni e, hnathawh duhin ṭhahnem ngâi ru viau mah ila, ka dinhmun hian a zir rih lo a ni e. 

Chutia ka inngaihtuah lâi tak chuan Mpi a rawn haw a, Ramnunmawia pa a boral thut tih a rawn sawi ta a.

"Nunu, engtin nge ni ang, dawrah i la awm ka ring a nia, tu mahin an hrilh ve lo che em ni?" tihpahin a pheikhawk bun lâi phelh mawlh mawlh pah hian a ti a.

"Ramnuna bâkin ka number an nei hleinem, ama'n min hrilh loh te chuan tuin nge min hrilh ang a?" Ka lo ti a.

"Â, eng pawh ni se, chaw ei ila insiam ang, kan lan ve loh chuan a mawi dâwn miah lo a nia," tiin a che zui nghal sawk sawk a.

Dik tak chuan ka kal châk hlawl lo. Atu amah hriat ka nei lo a, chu bâkah nilêngin dawrah ka awm tawh avangin ka chau takzet. 

Nula pangngai Mpi te anga tlawngâwl ka ni tawh lo a, ka pum lah a puar lian ve viau tawh nen puipunnaa kal pawh ka zuam chiah lo.

Ka inthlâk ve sawk sawk a, Mpi ka pui ve ta a, "Scooty ah ka chuang hreh deuh tawh si a, ka hna hi rei ka thawh theih pawh ka ring lo," ka ti a.

"Kal lamah Bus-in kal mah ila dâr ruk thleng kan thawk a nih chuan hawnna turah ka buai fo dawn a, thiltih chi-ah pawh ka ngai lo," ka tih zawm leh a.

"I lungngai hma thei siah, tih dan a awm mai ang, nikhat i kal ve dêk dêk a, i beidawn nghal mai te'n," nui hak hak chung hian min chhâng a.

Vawiina lokal Thartei chungchang ka sawi chuan Ramnuna ngaihzawng a nih thu leh kum khat vêl an inzui tawh tih a sawi a, ka rin dan a dik chiah. Kha nu inti vei zet kha ka ngainat zâwng a ni lo a, Ramnunmawia lakah a intitatu viau tih a lang reng mai.

A pa Vellore-a kal pui tur a nih laia a boral ta mai hi ka khawngaih a; tuarpuina thu va thawn ve pawh ka duh rualin ka zak deuh tlat. Ka nihna ka hriat chian êm avangin leh a hnuaia hnathawk, a chhawr thar mai mai ka ni a, ka be hmasa ngam teuh lo mai.

Zan lamah ruang tlaivarpui tur a nih vángin Mpi'n kal a rawt a, chu erawh ka hnial ta.

"En teh, kal chu a ṭha ka ti a; mahse, ka châu êm a ni, Scooty ken leh i tum awm bawk si, in ka lo nghâk zâwk ang e, naktuk a ruang ni-ah ka kal ve zâwk mai ang aw," ka tih chuan min hrethiam tak hian, "Nia, lo mu hahdam la, thil kal tawh ngaihtuah buai duh miah suh ang che," a tih ṭhin dan pangngaiin a ti leh thlap.

Zosanga vanga ka zahna kha a hre chiang ve a, ka inngaihtuah ngut ngut loh nan min titipui char char ṭhin. Ka tân ṭhian leh unau a ni kawp a, ka chhungte'n min hmangaih tluk zetin min hmangaih tih ka hria.

Zân dâr riat velah chaw kan ei ve luklak a, ani erawh Ramnuna te inah tlaivar turin a kal ta a. Ka phone charge lai a rawn rîk chuan ka phu dâwrh! Ka chhungte tih loh be tu ka nei ngai mang lova ka han en chuan Ramnuna lek!

"Nunu, i rawn lang ve dawn em? Chanchin pawh ka rawn hrilh hman ta lo che a," ati zâwi sup a. Min hrilh ka phût lova nikhat tê chauh an dawra ka thawh avang khan min ngaihsak viau nachhan tur pawh ka hre hran lo.

Ka kal dawn loh thu leh naktuk lama kal ka tum thu ka sawi chuan a ngâwi ta vang vang a, chutah, "Nia, i tân chuan hmelhriat loh pakhat thî kha a ni ringawt dawn a, ka tân chuan ka hmangaih ka pa a ni tlat si a," tiin phone a off zui daih.

A thil han sawi dan chu le(h)

Khumah muhil thei lovin ka let kual seka vawiina ka ṭhut rei vang kha nge ka kê a kham ut ut. Zan dar 10 a ri dêk dêk chauh a ni a, kan kawngkharpui an rawn kik ta dawt dawt a, ka hawi phâwk hrâ. Mpi chu a ni lo phawt!

Ani chuan kawngkhar kik lovin a lo thlen hunah min lo call leh mai ang a, nidanga a tih ṭhin dan pawh a ni. 

Kawngkhar lah chu an la kik char char a, in chhungah ka awm tih an hria a ni phawt ang a, atu chu ni maw? Thin phu dap dap chung hian ka tho chhuak a, ka hawn hma loh chuan thâwm bengchheng siam a tum a nih hmel.

A la hma bawka hlauhthawnna em em nei lovin kawngkhar kalhna chu ka hawng ta rak a. Zâwi tê hian ka hawng riai riai a, pawn lama lo ding chu ka rin loh deuh an ni!

Vawiina lo kal Ramnuna bialnu Thartei leh mipa tâwi deuh sa ṭha lam pang anni a, nui sâng chung hian min en a, "Nunu, mak i va ti awm ve?" Tiin ka sâwmna pawh nghâk lo hian kan in luahah chuan an rawn lût nghal a, engtin nge helai hmunah ka awm tih an hriat theih? 

"Ruata, hei hi amah chu a nia, Ruatsangkimi a nih hi, i hmingpui," Tiin Thartei chu a nui lui hak a, "Eng nge in duh teh tlat, in lo kal tlâi ang reng bawk si a," ṭhutna kawh hmuh pahin ka'n ti khawmâwi ve bawk a, ka chhungrila nuam lo tihna inmûng mêk chu thunun ka duh kher mai.

"Eng duh hran lo e, Ramnuna hian a ngaihven viau che tih ka lo hria a.." tiin ngei hmel zet hian min melh râwm râwm a, vawiinah amah nen kan inhmu ve chauh a. Tin, Ramnunmawia nen pawh vawi tam kan la inhmuh loh bâkah kan inbe ngai pawh a ni bawk si lo, mak ka ti telh telh.

"Tharte, i hre sual a nih chu, Ramnuna nen hian kan inbe ngai lo, min ngaihven lo tih ka chiang bawk, an dawra ka thawh nachhan erawh chu nau nei mai tawh tur ka nih vangin inhlawhna ka duha ka ṭhiannu nen min siamsak a ni mai, a bâk engmah a awm lo," tiin ka lo sawi fiah ve zung zung a.

"Chu tak chu alawm ka duh loh, Ruata, i tih tur ṭan rawh le, ka bialpa nunah hian hmeichhe dang an inrawlh a rem lo a, raipuar i ni emaw eng mi pawh ni rawh, ka dim phah dawn lo che," a ti chang ta fal mai le.

A sawi zawh rualin a lo hruai pa chu a mitmei nghal a, ani lah chuan nui ṭhû chung hian min rawn pan a, a hmêl ka'n en chian deuh phei chuan a tenawm thlâwt, a mit veilam a kalh a, a hâ nise a bâl em em bawk a, ka chungah eng nge tih an tum hre mah suh ila ka âu chhuak thei ṭhak lo. Ka dinna ngaiah ka ding reng ringawt. 

Thartei lah chuan Ruata nen min en tawn sek hnuah, "Ramnunmawia'n a ngaihsak tawh miah lohna tur chea tih dan kan hria a lawm," a ti ta a.

Ka hlau lo ka tih chuan dâwt ka sawi tihna. Ka chhungril a khûr ru zaih zaih a, ka pum dawmin ka naute ka ngaihtuah nghal.

"Thari, i pawi eng nge ka sawi?" Thâm chhâlha ka tih chuan a hmui a ti pawrh a, "Ramnunmawia lakah inhnamhnawih suh ka tih chu, i chanchin kimchang ka hre vek a nia," tia Thari a ṭawng mawlh mawlh lai chuan Ruata'n min rawn hnaih a, ka bân puamah manin na zet hian min hmer a, a hmui rêp leh ro hulh chuan min fawh a tum tih ka hre mai.

"Kal rawh, min kalsan rawh u," ka áw a zâwi kher mai. Ring taka ṭê rawng rawng ka duh vei nen ka hrawk a tâwt mup a, áw chhuak tur alawi ka nei lo.

Chutah, Ruata chuan ka tukkhum samah pawt sawkin, "Ka ṭhiannu te inkâr i tih buai man a nih hi," tih pahin a hmui hian min rawn nawr tâwk tâwk a, ka va ten mai mai tak. Ka rilru chhungril a rûma ka ṭap lo chauh.

Chumi hnu chuan engtin nge min tih zui ka hre ta miah lo, hnunglam aṭanga Thari'n ka hmui a rawn hup kha ka hriat theih hnuhnung ber a ni ta. 

Ka harh leh chuan ka khumah ngîl ât hian ka lo mu a, ka lû a nat bâkah ka pum a na rîai rîai bawk. Khua ala var lo deuh a nih ka ring a, ka thil tawn râpthlâk zet kha ngaihtuah chhuakin ka khûr nghâl dar dar a, ka luak a chhuak ut ut.

Engvanga Thari te khan kha tia min ti ngawt nge annih ka hre lo nain a bul berah chuan Ramnunmawia vang a ni tih ka hai lo.

Khum aṭanga ṭhu chhuakin ka hawi kual a, kan in luah zîm têah chuan eng thil danglam mah hmuh tur a awm lova bungrua leh thawmhnaw pawh a ngai ang vekin ala awm! Chu mai bâkah kawngkâ pawh a inkhâr ṭha thlap a, ka lukham sîra lehkha phêk lo indelh bet reng chu ka hmu ta a.

"Ramnunmawia dawra i thawh hi bansan ang che, amah hnaihah pawh i awm tur a ni lo, chuti a nih loh chuan tûn aia nasa khan a nia kan chêt tawh dawn, tu hnenah pawh i sawi chhuak tih kan hriat vaih chuan nang leh i fa kha nungdamin in chhuak hauh lovang." Tih hawrawppui hian a lo inziak a. 

Vawi hnih vawi thum ka chhiar chhuah hnuah ka pum puar âl chu ka chûl a, ka thin a rim; mahse, tuna ka din hmunah hi chuan ngawih tlat bâk tih theih ka nei lo.

Kha pa, Ruata hmêlchhe zet te kha ngaihtuah leh pawh ka duh tawh lo e a, a hrim hrimah Ramnunmawia ka ngaizawnga alaka inhnamhnawih pawh ka ni lo a, khatia min han ti ringawt mai kha ka lawm lo nasa. Mahse, naupai lâi ka nih chu thu hran, ka mikhualna hmun a ni a, hmelhriat sawi tur ka nei bawk si lo. 

Châu tak hian khumah ka ṭhu thla hnak a, police hnena report ka tum deuh kha a ni a; mahse, thil tihchi-ah ka ngai leh ta lo, finfiahna eng thil mah ka nei si lo a, sum leh pâi tih tham ka nei bawk lo; ka ṭhiannu takngial pawh ka hrilh hre ngam dawn ta lo a nih hi. A hriat phawt chuan hmalâk a tum ngei dawna a rilru ka ti hrehawm tam mai mai.

Mpi lo haw lâi pawhin ka tho chhuak lo a, ka lû a na tluk tluk a, khawsikin min man deuh nge ka chhungril a khûr ru dar dar reng mai.

"E he, eirawng pawh i bâwl nange?" Tiin ka khum bulah a rawn ṭhu a, ka nuam lo hmêl a hmuhin, "Tikhan lo mu hahdam rawh, keiman kan bâwl ang e," a ti leh zung zung a.

Ramnunmawia te unau a khawngaih thu te, a pa tâna anneih zawng zawng sên an huam laia hetia a boral ta thut pawi a tihzia a sawi mawlh mawlh a, vawiina vûi tur a ni a, nizan kha chuan kal ve ngei ka tum; mahse, ka thil tawnin a zir loh êm avangin kal thei din hmunah pawh ka ding ta lo. 

Ka kal theih loh tur thu Mpi ka hrilh chuan min hrethiam tak hian, "Mi an tam dawn si a, i kal leh kal loh pawh an hre kher nang, tikhan lo mu hahdam la, dawr pawh an hawng rih dawn chuang lo," a ti leh mai a. 

Nizanah a tlaivar chung pawhin mut chhuak hmêl a pu hran lova naute thawmhnaw tur second hand a thin ho a su a, ka tân engmah tih hreh a nei ngai lo hi amah ka ngainatna chhan pakhat a ni.

A lo haw chauh nain mitthi in lama kal turin a insiam leh ta a, nizan ka thil tawn khan keimah chauhva awm min ti châk lo zo va, tumah ka hrilh thei bawk si lo, tunhmaa ka mize pangngai ang kha chu la ni ila Thari te ang mai mai ka hlau teuh lo. Mahse, ka pum chhunga nautê hian ka rilru put hmang min thlâksak zo tawh a, rilru na tak chung pawha tawrh dam dan ka zir a ngai ta zâwk si a.

Mpi chhuah hnuah kawngkhar chhunglamah ka kalh leh thlap a, 'Tu nge annih' tih ka hriat hma loh chuan atu amah hawnsak ka tum tawh lo. Aizawl pawh hi a him tawh lo a, invêng râna awm a ngai tawh.

Ka taksa a nuam lo deuh nen khumah ka tlu zâl leha chaw tih tham ka ei lo. Ka lo muhil a ni ngei ang, ka phone riin min tiharh a, Ramnunmawia  lo ni a!

Sana ka en nghal vat a, tlâi lam dar li a lo ri dêr tawh nia! Nizanah ka mu ṭha lo êma ka lo muhil tlang daih chu niin. 

"Hello," ka âw a lâwi rât mai.

"Kawngkhar hi i rawn hawng dawn nge dawn lo?" Lungawi loh hmel takin a rawn ti ta a. Phone a off zui hmiah bawk!

A pa an vûi zo chauh a, kan inah eng nge tih tur a neih tih hre mah suh ila kawngkhar hawng turin ka tho chhuak ve ta tho a, Mpi a lo la haw ve miah lo. 

"Lo lût rawh," kawngkhar ka hawn rualin ka ti sap a, "Eng vanga kawngka hawng duh lo nge i nih? Khatiang zât kik pawha hriat loh der tlat," tiin a rawn lût ve nghal a.

"Nizanah ka mu ṭha lo deuhva ka lo muhil daih alawm le," inthiam lo taka ka tih chuan ngun zet hian min rawn thlêk a, ka sam hnawk nuai te chu chûlmâm hman tawh bîk hek lo, ka lan dan pawr tur zia ngaihtuahin ka zak ru chem chem.

"Vawiinah kan hnathawk te an rawn lang kim vek a, nangmah chiah i lang lo, nikhat chauh i lo la kal a, hetiang hunah te chuan i lo lan ka beisei ve asin," a ti a, a sawi zawng pawhin a lâwm lo tih a hriat hliah hliah.

"Nia, rawn kal tum ka ni a, mahse, ka nuamsam lo deuh a lawm le, min hrethiam rawh.." inthiam lo taka ka tih chuan ngaihdan nih loh hmel takin a ner sawk a, mut hmu lo tih hriat tak hian a mit a sen rûm bawk.

"Nunu, i dinhmun ka hria a, thawk thar i ni tih ka hre bawk, i thawhpui te'n thlalâk dâwnah an zawng che a, i lokal leh kal loh ka ngaipawimawh hran lo; mahse, midang mitmei vên ve tho tur," ti lehin tukverh bulah ava ding a, ngun taka thil ngaihtuah hmel a pu.

"Ka tihpalh takzet.." ka ti leh ringawt a, tun hi an dawra ka thawh chhunzawm theih loh tur thu sawina hun remchâng tak a ni. 

Ni khat lek ka kal chung pawhin a bialnu hmuh mawh ka ni nghal a, bâkah haw dan tur chungchângah ka buai tho tho dawna ka hriat avangin sawi tlang law law ka tum ta a.

"Ramnun, min duhsak zia ka hria a, ka lawm lutuk; mahse, ka thawk zawm theiin ka ring lo, a buai..." 

"Eng a?" Ka sawi zawh hma hmain a rawn ti a, a dinna tukverh bul aṭanga kal sawnin ka ṭhutna a rawn pan phei a, "Kan dawra thawh chu a hrehawm viau a ni maw, i duh miau loh te chuan ka tilui thei lo che, nau nei mai tur i ni a, pawisa i mamawh tâkah ka ti mai a nia," a ti a.

"Ka hria alawm, hrehawm ka tih vanga bânsan tum ka ni lo a, Scooty-a chuan reng ka thei si lo a, haw lam hi a buaithlâk dawn ém a ni. Mpi rualin a haw theih reng dawn si lova," ka tih chuan min en vang vang a. 

Nizan chungchâng kha hrilh ka tum teuh lo. A bialnu min vauna kha a satliah lo a, Ramnunmawia hnaiha awm lo tura min hrilhna kha nam liam mai chi ninghal lo chuan.

Amah ka hlauh em em vang ni lovin Aizawlah ka la mikhual a, nau nei mai tawh tur ka ni bawk. Thla thum pawh tling lo an dawra ka thawh vanga kei leh ka fain kan tawrh ai chuan ngawih chuha bân mai ka thlang zawk.

"Tunkâr lo awm hahdam la, dawr kan la hawng rih dawn chuang lo bawka inngaihtuah ṭhat nân lo hmang ang che, i hawna tur erawh ngaihtuah ka lo tum ang," a tih chuan ka hawi phâwk ngei mai.

'Aw le' tiin min pawmpui mai ka ring deuh a nia!

"Rei tak ka thawk thei dawn chuang lova min duhsaknaah ka lawm lutuk; mahse, min hrethiam la, nilênga khatia ṭhut te kha tlin ka inring lo, midang ka âi awh tur zawng mai rawh," ka ti leh a.

"Aw le, ni rawh se," ti hmukin a tho vut a, a chhuak nghâl daih! Ka koh zui pawhin min chhân chu sawi loh, vawikhat pawh a lo hawi lêt duh lo. Car-ah lûtin a tlân zui nghâl a ni deuh mai.

Nia, ani tân pawh a thinrim thlâk ve viau chuan ka ring, min duhsak vanga hna min pe a ni a, ka dem lutuk bik lo. A bialnu lah khân keia râipuar min la thîk ve tumhrang bawk nen Ramnunmawia hian min ngaizawng lul lovang, a thîkthu chhiatthlâk ve mah mah.

Mpi'n min lo call a, ei rawngbawlnaa a awm ve thu leh chaw eia nghah a ngaih loh thu a rawn sawi a, kei mah tê chauhvin ka awm leh ta. 

Ka nu nen rei fê kan inbia a, "Mambawih, Dinsangi a râi ve tawh a, a hmâi a uang khawp mai, i awmna chin tu hnenah mah kan sawi si lova Zosanga farnu a lo kala min rawn zâwt a," tiin min hrilh.

Zosanga farnu Sangpuii hi a fel ber a, kan inrual vêl mai thei. An fâ a ni tih an hrechiang tih ka hria; mahse, Zosanga berin 'ka fa a ni lo' tia tlâi khawhnua a ṭan ṭhat leh tâkah khan min be tawh ngai lova a rûk chuan an ngaihven ka ring rêng a ni. 

Ka nu hnena, "An biak che chuan ṭha takin chhâng la, nangma'n be hmasa miah suh ang che, nautê ṭha taka ka nei a nih chuan a pa hmingah pawh Zosangliana ka dah dawn lo, engtikah mah ka dah ngai lovang," ka tinawn leh a. 

"In enkawl ṭha la, i nun uluk ang che, Dinsangi tezawng a hriselna a pan ve a, tuna a naupai pawh a insawisel reng mai, in lam pang rawn ngaihtuah lo la, pawisa i mamawh pawhin sawi hreh suh aw, kan khua hi chu mi sawi neuh neuh an peih si a, tunah pawh pasal ûm anga lo sawi tâwk che pawh an awm a nia," a tih leh phei chuan ka sa zak.

Ka ban phâkah lungawina leh lawmna hmuh tur a awm miah lo niberin a lang.

Rei ngial ka nu nen kan inbiak hnuah Mpi a lo haw tâk avangin phone kan dah ve hrâm.

"Vawiinah hnathawka an chhawr zawng zawng te'n thlâ lâkpui ve tur antia, i awm ta si lova an zawng che a, Ramnuna hnenah i nawmsam loh thu sawiin ka phatmar sak che," Mpi'n a ti a.

Ramnunmawia lo kal thu leh kan inbiak dan ka hrilh chuan, "I ti ve mah mah a nih chu, a rilru hrehawm lâi te a ni ve a, nghah rih deuh tur a nia," ngaihdan ni vak lo hian a ti ve a, ka chhâng thui duh ta lo.

Thil dangah pakâiin ka nu nena kan inbiakna ka hrilh thuak thuak a, "Thu dik lo hi chu a tlo ngai lo, pasal ûm lo na na na chu lan chhuah hun ala awm tho ang, thil sawi an peih sia, kan khuaa haw leh pawh hi ka châk lo e a," a ti leh nang nang a, ani hi chu a butut ve a, a ngaihdan a nih tawh loh hi chuan a ri hluai zel.

Ramnunmawia pa boral aṭangin kâr hnih a liam tawh a, an dawrah pawh ka kal zawm ta lo. An inah a pa râla kal ve duh viau mah ila, hmannia min kalsan aṭang khan vawikhat mah min biak tawh loh bâkah a Dp ka hmu tawh miah lo a, min block a nih loh pawhin ka number a delete a nih ka ring.

A laka inhnamhnawih loh law law hi ka tân a him a ni mai. Pathian zarah kan nghei bik lovang, ka chhungte'n pawisa min lo thawn dawn avangin Sumo counter lamah ka kal a, kan khuaah bank a awm lo va, kan khaw ṭhenawm pan zel a ngaih vangin Sumo-ah an lo thawn mai zel.

Ka naupaiin thlasarih hmel a hmu dêt dêt tawh a, a hma aiin ka inzo lo sawt bawk. Mpi erawhin a hna a chawlhsan ve lo a, keiin in lamah Second hand theih ang angin ka buaipui ve bawk a, kan tâl ve nawk nawk a ni ber.

Counter kawta kan khaw Sumo a rawn din chuan driver biak tumin ka va ding hnai ve a, Sumo aṭanga lo chhuak te ka hmuh chuan ka tawlh sawn dat a!

Zosanga te nupa chuan min rawn hmu ve chiah bawk a, ka pum puar lian tawh tak chu an en ngun hle a, Dinsangi erawh a chauh hmel êm avangin min en ngun vak lo. Ka hmuh hnuhnun ber âi khan a taksa a chêr a, naupai a haw hle a nih ka ring, a ngo ṭhin teh rêng nen a thü chap a, a mitkhur a tla dâk mai.

"Nunu..." tia min kohna hre lo derin driver ka biaksan ta a, ka nu te thil min lo thawn min hlânthlâk sak lai te chuan min en rengtu an awm tih ka hre ve vek. Mahse, vawikhat pawh ka hawi lêt chhin lo.

Ka zahawmna min tihbawrhbânsaktu mipa hi hnaih emaw biak leh tumna ka nei lo a, kei aia a thlan, a fa aia mi fa enkawl duh zawktu mipa hi eng atan mah ka ti bik lo. Ka hmangaihna kha huatnaah a chang zo va, khawtlâng hmuhsit leh sawi sep ka kâi phah bawk a, ngaidamtu thinglung put tumna ka nei miah lo.

Dinsangi pawhin min rawn en chîk ve ta deuh a, naupai ka ngeihin ka tî a sen siah a, ka thâu ta deuh bawk nen makti hmel takin min en deuh hâ. Ngeiawm deuhva a ṭawng ka rin nen engtin mah min ti lo teh tlat nia.

Ka tih tur ka tifel ta bawka Taxi chângin ka ding sawn ta a, Zosanga te dinna aṭanga pên sawm vel a nih ka ring, ka inkhâi bâwr bawk si nen ka bula Car pakhat lo ding chu ka en vat a, driver seat-a ṭhu chu tu dang ni lovin Ramnunmawia a ni. 

"Nunu, lo chuang rawh.." tiin min rawn ko a, hun dang nise ka chuan dawn loh nen; mahse, tun hun a ni miau a, he mite nupa hian min thlîr ve reng bawk si a, ka hnar phal ta bîk lo.

Car-a ka luh dawn laia Dinsangi meng phar âwk chu ka hmu hman reng.

Ramnunmawia ka hmuh avanga ka lâwm ber ṭum a ni hial awm e. 

Ani lah chuan min be lêm lo hian car a khalh mawp mawp a, kan in luah pan lova kan tlân tlang tâkah chuan, "Khawiah nge min hruai dâwn?" Ka ti chhuak hliai a.

"Kan inah, kan in min rawn hmuhpui ve ang," ti hniam ruihin a nui suk nia maw le.

"Ih, ka hman lo, min lo hrethiam la..." ka tih chuan, "Nia, ka hrethiam alawm, i lokal duh lo tih hi, mahse, i lokal ngei a ngai tlat.." ti supin min melh zauh duh chauh.

"Ramnunmawi..." 

"Eih, ka hming hi nalh i ti viau tih ka lo hre lo a.." tiin a nui ruh ruh a.

"Helaiah hian ka lo chhuk mai ang, ding lawk teh," tiin a steering vawn lohna lam a kut chu ka va khawih a. Mak ti niawm tak hian min rawn en a, "Kan inah kan kal ang, min hnial lo la.." a bâk sawi zawm tawh lovin a ngawi nghal hmak, ka ngei ru kher mai.

He pa hian min duh ka ring lo a, hnathawk tur a duh vangin min be ṭha ve mai mai niin ka hria.

Hnial buai duh tawh lovin ka ṭhu ngawi ve ta reng a.

Ramnuna te in kan thlen chuan Car chhungah ka la ṭhu deuh ngar a, ka va han chhuk hreh ngawih ngawih tak.

"Tu vak mah inah an awm lo, lo kal rawh..." tiin ka kiu-ah a rawn dawm a, ka ṭang deuh ṭung.

"Eng nge kan tih dawn?" Ka ti a.

"Thil sawipui lawk tur che ka nei, i tâna ṭha lo tur eng thil mah ka ngaihtuah lo a nia." A ti a.

Hnial hnial mah ila sâwt dawn hek lo, kan inzui lût ta nge nge a.

Ka rin phâkbâkin an hausa a ni mai. Ka hawikual ruai a, ka bânah a la vawn tlat avangin ka kiangah a ding ve reng bawk. Dik tak chuan sawi tur ka haihchham vek. 

Banga a pa thlalâk an târ lian ṭha tak chu ka thlîr deuh vang vang a, Ramnuna nen inang tak an ni! Pafa an ni tih a hriat hliah hliah.

"Nunu, ka room-ah chho lawk teh ang," tiin ka hnial hman hma chuan min kalpui nghal a, an nula te niawm tak pahnihin mak tih hmêl taka min enna chu engah mah ngai lo niawm tak hian min chhoh tlangpui zel a, keia pawh chuan hnialna eng ṭawngkam mah ka chhâk chhuak bîk hek lo.

A pindan zau hek hawka kan inzui luh chuan min vawnna a thlah ta chauh a.

"Ṭhu hahdam phawt rawh," a ti a. Khum sîra Sofa inhûng hnai ber chu min kawhhmuh nghal a, ani erawh a ding reng thung.

"Eng atan nge min biak i duh a, a va pawimawh awm em em ve?"  Tiin ka zawt ta a.

"Hahdam phawt la.." tiin a sam a tuai puat a, chutah ngun leh chiang zâwka min enin mûk taka thil ngaihtuah hmêl a pu.

"Ka hahdam tawh..." ka lo ti thuai thuai a, ka ṭhutna bul áwlah rawn ṭhu thlain hma lam ngun tak hian a en a, a âw a thian kharh bawk.

"Nunu, eng emaw sawipui che ka duh a, ka sawi zawh hma chuan eng zawhna mah min lo zawt lo la, chhânna pawh min pe nghal suh ang che." A ti leh a. A ngaihna ka hre ta vak lo, eng thil nge min sawipui dawn tih rin chhin ngaihna pawh ka hriat si loh.

Second sawmhnih vêl ngawi renga kan awm hnuah ti hian a rawn ṭawng chhuak ta a.

"Tuna ka nu hi ka nu tak tak min hringtu a ni lo a, ka pa fa bîk ka ni. Ka unau dangte nen pawh kan kum a inthlau rêng bawk a, ka pa a han boral chiah hian ro chungchângah ka nu a buai ṭan ta nghal a, he in leh lo hi ka nu hmingin eng tik laiin nge a lo awm hman tih ka hre lo. Eng mah in leh lo-ah chanvo ka nei lo. Mahse, kan dâwr pahnih leh Bank-a kan chhungkaw sum hmun thuma ṭhena hmun hnih hi ka pain ka chanpualah a dah a, Bank danga a dah erawh chu ka naute pahnih chan a ni thung." Tiin a ngawi dat a, engmah ka lo sawi ve lo.

"Tichuan, a thih a ṭanga kâr hnih a liam aṭang hian ka nuin rilru hran puin min chuhpui a tum ta a, tunah chhungkaw boruak a buai mêk a, ka naute pahnih erawh hi chuan engmah an sawi ve lo. Zemabawkah keima pualin in ka nei tho a, he in leh lo hi îtna ka nei hran lova; mahse, ka seilenna leh ka pa din a ni a, ka thâ leh sum leh pâi ka hmangral hnem bawk," a ti leh a.

"Chu chu ni ta se, eng nge kei min hrilh chiam nachhan?" Tiin ka lo zâwt hmanhmawh a.

"A rang lama nupui leh fâ ka neih a ngai a ni." A ti ta a. Ka mengphâwk nasa ngei mai.

"Chuti a nih chuan nei mai ta che..." ka lo ti ve nghal zat a.

"Chu tak chu ka buaina a ni ta a ni, hmangaih ka nei lo a, nupui tur ngat phei chu ngaihtuah pawh ka la ngaihtuah chhin ngai lo." A sawi zawh rualin a ding hluai a, kei nen inzawmna tur áwm eng thil mah ka ngaihtuah chhuah thiam loh avangin ka ngawi reng.

"Ka pa kha ka zaha ka ngaisâng bawk a, amah vanga tun hun hi thleng thei ka ni tih ka hria, tuna ka nu hian ka pa damloh chhungin ngaihzawng a nei ngat ngat a, chu chu ka pa pawh khan hriain a nat zual phah ta rêng a ni a, ka nu bialpa chu Hmingchungnunga niin ka pa thawhpui ṭhin tho a ni nghe nghe. Ka pa thurochhiah tidanglama he in leh lo a hminga dah vektu ka nu hi hremna pêk ka duh. Mahse, chumi ti tur chuan nupui ka neih a ngai a, ka nupui chu râipuar sa, ka fâ pai sa a nih a ngai a ni." Thaw huai chungin a ti ta a. 

Raipuar sa, nupuia neih han duh tâk chu thil mak a ni.

Chumi hnu chuan file sen chhah vak lo hi a rawn lek chhuak a, ka bulah lo ṭhu lehin a keu ta a. "En rawh le, chiang deuhvin chhiar la thil awmzia chu i manin ka ring," tiin envelope chhunga lehkha inthlep chu min pe ta a.

"Ka fapa, Ramnunmawia aia hlu ka tân tumah an awm lo. Kei chu thi mai tur Cancer hrik ei mêk ka ni a, khawvelah rei ka châm dawn tawh si lo a, chuvangin ka thih aṭanga thla thum a ral hmain nupui a neih ngei a ngai a ni. A nupui chu tupawh ni rawh se, ka fapain a thlan chu ka pawmpui zel ang. " Tih leh thudang eng eng emaw a inziak tlar dal a, ka chhiar chhuak vek tho.

"Chuan..." ka ti ta sap a.

"Ka nupui ni rawh. I ṭhiannu kha engkim ka hrilh fiah tawh a, i chanchin pawh hriat hmaih pakhat mah ka nei lo a nia, vawiina i chhungte thil lo thawn tur che leh i fa paina pa te nupa rawn kal tur thu pawh ka hre vek. Tihpalh thil thua khalai hmuna lo awm ringawt kha ka ni lo," a ti ta hmiah hmiah a. 

"Nang, nang...hi..." ṭawng pawh ṭawng ṭha hlei thei lo hian ka phar hliai a, ka bânah a lo dawm vat.

"Ni e, in ina ka lokal hmasak ber zan aṭang khan i chanchin ka chhui vek tawh. Ka pa lehkha hnutchhiah hi en chiang la, a thih dawn hnaiha a ziah ni lovin thla nga kalta a mi a nih kha, ka nunah tu hmeichhia mah an awm lo. Zahawmna leh i fa hian pa koh ve tur a neih i duh chuan min nei rawh." Zawi thâwp sata a ṭawng leh pawh chuan ka hawi â hû!

"Tenawm pa..." thinrim zetin ka ti chhuak hlawl a, ka thâwk a buai vek dawn alawm maw le. Ruahmanna nei sa thlapin kei hi min biaa an dawra thawk tura min duhna chhan leh a bialnu ngei Thari pawhin khatia min rawn bitum chat dan te kha ka ngaihtuah kâi a, eng emaw tak an rinhlelh turin a lo sawi chhuak tihna a ni mai.

"Ramnunmawi, inhlawhfa chawp ni mah ila, kei leh ka fa hian kan nei nguar ang che." Tih pahin a room chhuahsan tumin ka pên pâwk a, ka bânah nghet zetin a rawn man a, "Thinrim suh, zahawmna leh sum leh pâi ka pe ang che, ka pa in leh lo ngei ka chan leh theihna turin min pui rawh," a ti thâm ṭuak.

"A teuh lo, a teuh lo lutuk..." ka ti khur dar dar a, zah tlâk ni lo mah ila, min zah lohna turin a lakah eng thil mah tih ka nei lo. "Min thlah rawh, min thlah loh chuan ka ṭê vak a ni mai," tiin ka vau ve kha kha a. Min kuah nghet tulh tulh.

"Khawvel a nih hi, khawvela i awm chhunga i phuba lâk theihna awlsam ber leh Zosangliana i tih nat theihna tur kawng awlsam ber chu tuna ka thusawi zawh chiah kha a ni." A sawi zawh rualin a rawn kûn hniam a, ka mitah chiang takin min en bawk.

"Nang mi tenawm, ka fa hi sâwn pawh nise ka pawisa lo, i duhâm avanga kei min neih tum i nih chuan i tisual chhiava a nih chu.." tia ka chhân chuan ka hmuiah a rawn hup a, nghet fê hian a kut veilamin ka kâwngah a kuah rún lehnghal.

"Inbengdai rawh.." tih chiah a sawi. 

"Ka inbengdai thei lo, ka alh dawn..." a kut a lâk sawn ruala ka ṭawng chhuah chuan a nui suk a, "A awlsam ka ring lo rêng a ni, tunah chhânna dawn ka tum lo, inngaihtuah nan ni thum hun ka pe ang che," tiin ka biang sa hut hut chu a rawn tawk fu thuak a, thil dang sawi nawn tawh lovin a room kan chhuahsan ta a.

Ka chhungte thil min lo thawn kha a car ah a la awm vek a, inhnuai ṭhutkhawmna kan thlen thlâk ruala aw fiak ṭhak ri ka hriat chuan ka pên táwp chat.

Nu thau lam, inchei nasa zet hian mitmeng kawlh hrâ hian min rawn en a, Ramnuna pawh a bâng chuang lo, a fa hrawn chu huatna mitmeng nen a melh râm râm a, chutah chîk lutuk tak maiin min en leh ta a. Ka ngainat zâwng ninghal lo chuan.

"Tu nge i nih?" Kâwng dawm meuhin min han zawh chu le.

"Ruatsangkimi.." ka ti ve hmak.

"Ramnun, ka awm loh lâiin henu hian kan inah eng nge tih tur a neih?" A ti chang fal a.

"He nu i tih hi ka nupui la nimai tur a nih hi, Nunu-i," Ramnuna aw chu a ring fahran lo. Mahse, a nuhrawn tân erawh a ring viau a ni ang, "Eng maw, eng maw i sawi?" Ti ṭhatin a vîn ngei mai.

"Ka nupui ni mai tur a nih hi, lo buai suh, ka pa thusawi hnuhnung ber kha i la hriat chuan thla thum ral hmain nupui ka neih a ngai tih i hria alawm, ani ngei hi ka nupui tur chu a ni," tia a sawi zawh rualin ka kâwngah intitatu takin a rawn kuah a, ṭawng ve ngaihna pawh ka hre lo. Che lovin ka lo ding ve ngar ngar ringawt.

"Duhâm pa, eng nge ka tih theih lo en ang che," tiin ka pum puar âl chu a melh vang vang a, mak ati tih hai rual a ni lo.

'Kan nupui tur' tiin sawi mah se, ka fa a pâi mêk tih thu erawh kan Ramnunmawia hian a sawi chhuak bîk ṭhak lo' a fa zu ni miau hek lo.

An in kan chhuahsan fel chiaha min vawnna ka thingthla nghal vat a. A nuhrawn nen an boruak tur pawh hrilh hranpa ngai lovin ka hre thiam nghal a, hmanni lawkah a pain a boralsan a, tunah hetiang buaina hi an nei leh si a, a khawngaihthlâk ang reng. 

Eng ang pawhin hausain duh duh nei mah se Hremhmun tênauah an chêng a ni ringawt.

"I hmuh ang kha kan boruak chu a ni a, ngun takin lo inngaihtuah rawh aw, a chin chhuakin eng mah ka la sawi lo a, mipat hmeichhiatna a tel lovang, a hmingin ka nupui i ni ang a, i fa hian ka hming a chhawm bawk ang a, i zirna i zawm duh emaw, sumdawnna i khawih duh a nih pawhin ka pui ang che, ka thlazar hnuaiah i awm ang a; he in hi ka neih lêt veleh i zalên thung dawn nia." A ti duah a, rum takin ka melh ringawt.

A car-a ka chuan hnuah pawh engmah ka sawi tawh lo. Inremna siampui ka tum lo a, rethei tê mah ni ila, Contract ang zawnga pasal neih hi ka mumangah pawh ka la hmu chhin lo. Ka fa nena kan ei tur chu Pathian zarah ka dam anga ka thawk chhuak ve ngei ang.

Kan in luah kan thleng a, ka bungrua inchhungah min dah luhsak leh thlap. 

"Nunu... ngun takin ngaihtuah la, khawvela kan awm chhung hi chuan kan nawmsakna kan ngaihtuah a ngai ve a nia, ka sâwmna che kha thil satliah a ni lo tih ka hria, zahawmna hi a pawimawh a, chumi nei tur chuan ka pui ang che. Nangin min pui bawk anga chu tê chauh chu ka ngenna che a ni e," dam thluamin a ti leh a.

"Theihnghilh rawh, inremsiamna neih âi chuan kan khuaah zahna hmachhawn turin ka haw leh zâwk ang e," ka ti ve hmak. 

A koki a sân âwk a, "Ni thum ral hnuah i chhânna ka rawn ngaihven leh ang, tunah chuan eng thil pawh sawi mah la, ka beng hian ri a hre thei lo." Tia a sawi zawh rualin a chhuak zui nghal a, ka dinna ngaiah ka ding reng ringawt. Mpi a lo la haw lo a, ka ṭhiannu hnenah engkim sawi tawh ang khân a insawi a, Mpi lahin engmah min hrilh dêr si lo. Dâwt bâk va ni suh. 

A tîr aṭang rêng khan tum neisain min hnaih tih ka hre thiam tawh a, kei, raipuar fa nei lek lek tawh dâwr nghâk tura min sâwm deuh tlat te kha thil mak tak a ni. Mpi lahin min duhsak awm em emin ka thawh ngei theih nan hma a la bawk a, an lo ṭang dun tihna a mai em? 

Mpi lo haw phawt se engkim a chiang vek mai ang. 

Chau zet hian khumah ka ṭhu hnawk a, Zosanga te nupa ka la hmu zui bawk nen ka chau hluah hluah.

Eng pawh ni se, Ramnunmawia thusawi kha ka bengkawrawng chhungah a awm nget nget a, ka hmabâk thui tak a hril tel tih erawh ka hria. Ngun zawka ngaihtuah ka tum ang nge tum lovang? Chunglam thu thu ni teh se...

Zan dâr sarih velah Mpi a rawn haw ve chauh a, a tih dan ṭhin pangngai angin a ri leh hluai tawh a. 

"I nu te thil lo thawn che chu i lam maw?" Tiin, chawhmeh leh Serthlum vel ka dahkhawm chu a melh zauh a.

"Umn..ka rin aiin i lo haw hma!" Ka ti a.

"Haw hma loh hi..." tih pahin ka hmel ngui bâr chu a hmu a ni chêk ang, "Ramnuna nen in inbe ta em ni?" Tiin pehhêl eih lo hian min zâwt a, kan inhmuh thu leh a thil sawi zawng zawng te kha ka hrilh nghal vek a, ka awkâa lawm lohna lo ri chhuak pawh chu a hrethiam vekin ka ring.

"I chân loh khânah malsawmna i dawng ka ti kei chuan, Ramnuna hian a duh che a, tunhmaa Zosanga nen in inkawp lai daih tawh khan a ngaihven che, khapa hlir kha i buaipuia ka hrilh duh lo che a nih kha" a lo ti sam êt.

"Engtin nge min hriat?" tiin ka lo zawt vat a, ka awih vak loh vanga zawt ka ni.

"Kan khuaah side drain an rawn siam ṭum khan a hmu che a, ngaihzawng nei lai i nih vang leh mipa dangin i rilru an la pêng dawn lo tih ka hriat avangin ka sawi lang lo a, Zosanga kha chuan Ramnuna'n a duh che tih hi a hre vek, i nuṭapa pawhin a hria," a ti leh zel. Mak ka lo ti nasa mai.

"I tân kawng a inhawng tih pawm hmiah rawh, engtikah mah Zosanga hian i fa hi a pawm dawn lo a, tuna i râi lai ngei leh a lo pian chhuah hma hian Ramnuna nei turin ka duh che, i chhiatna duhtu ka ni lo a, i tana ṭha chauh lo chu engmah ka sawi ngai lo. Nunu, i lakah rilru chhia ka pu lo a, i hmakhua ngaitu ka ni..." dam thlapa tiin min en vang vang a, "I fain pa koh tur a neih theih nan leh nangmah duh ngawih ngawihtu hi tithlawn suh, i hmangaih aiin nangmah hmangaihtu che a hlu zawk," a ti ta a.

Nithum hun min pêk thu leh ka lo inngaihtuah tur thuin ka chhâng sap a, inngaihtuah ka mamawh rêng a ni.

'Ramnunmawia' a hming leh a hmêl ka ngaihtuah a, ka thaw chhuak hawk ringawt. 

Zosanga fa ni si mipa dang han neih daih kha thil dik niin ka hre thei lo. A pian tawh hnu chu nise tihdan dan a la awm a, kan khuaah sawisep titamtu ka ni leh ringawt dawn. Â...ka ngaihtuah hah peih rih lo.

Hun tiam nithum a ral ta.

Ramnuna a rawn lang ta ngei a, Mpi ka thutlûkna ka hrilh tawh thung a, ka nu leh pa, ka chhungkuate pawh engkim hrilhin min pawmpui thlap a, ka pa phei chuan, "Pathianin i tâna a ruat a ni ngei ang, ka tû lo la piang tur fahrah hi chunglamin a phal lo a ni ang e.." a lo ti daih.

Ka rilru kaptu ber Thari chungchâng pawh kha Ramnuna bulah sawi vek ka tum ta a.

"Le, Nunu...engtin nge ni dawn ta?" Tia min zawh chuan Thari te lehkha min hnutchhiah kha phawrh chhuakin Ramnuna kutah ka hmehbel châwt châwt a, "Eng thil nge?" Tia min zawh chuan, "Chhiar phawt rawh.." ka lo ti a.

A hmela thinrimna lang chhuak chung hian, "Engmah sawi lovin hei chen i ngawi thei hi i mak lutuk..." tihpahin a ding hluai a, lehkha chu thlep ṭhain a kekawr ipteah a ak zui daih bawk.

Khami zana thil thleng zawng zawng kha chipchiar takin ka hrilh fai vek a, a thinrim ngei mai.

"Keiman ka chingfel ang, englai mahin ani kha ka duh ngai lo ve..." ti hmukin min be zui tawh lo hian a chhuak nulh a, ka thutlûkna pawh ka hrilh hman ta lo. Thari te kha han chingfel phawt mai teh se.

Ramnunmawia rawn kal aṭang khân kâr a liam leh tawh a, vawikhat mah min rawn be zui lo. A rilru a thlâk leh ta a nih ka ring ta ber, Mpi nen pawh kan sawi nawn tawh lo a, keilahin zawh hmasak ka duh bîk si lo a, ka ngawi vel ta mai mai.

Inrinni zan a ni a, Mpi hnathawk a lo haw tlai dawn avangin keimah chauhin zanriah ka ei a, ka nu nen rei vak lo kan inbia a, Zosanga nupui Dinsangi kha Bp sâng vanga a tlûk thu leh Aizawl an rawn panpui tih vel a sawi a. An fa pakhatna tur ani hian a pâi ve mêk bawk.

Kawngkhar kiktu an awm avangin lo lut turin ka hrilh a, chaw ei dawhkan pawh ka la thawhsan lo. Ka rin loh deuhin Ramnuna a lo ni a, tun ang huna a lo lang nawlh chu mak ka lo ti hle.

"Rawn tho chhuak duh suh, eikham law law rawh..." tiin thawh tuma ka ding tawh chu a kutin ṭhu leh tur hian min ti a, "Ka puar tawh a, lo ei ve zawk ta che," tia ka sâwmna chu hnarin a ril a ṭâm loh thu a sawi liam puat a, thleng ka sengfel vel lai pawhin ngun takin min en tih ka hre ru kar.

"Nunu, eng nge i thutlûkna ni ta?" Tihpahin ka bulah a rawn kal a, "Thari te kha engtin nge ni zawk ta?" tia ka zawh lêt chuan, "Anni chu ka tifel tawh e, Ruata kha chuan ngaihdam min dil nasa a, Thari tihtir a nih thu leh nupui fanau nei a nih vanga hremna pe lo hrâm turin min ngen a, ziaka a intiamkam hnuah ka thlah zalen." A ti ta a.

"Thari erawh chu Court lamah a inlan a la ngai ve rih ang," a ti duh chauh. Eng zawhna mah ka zâwt lêt lo. Ka tan anni kha hlauh tur an awm lo tih min hrilhnaah ka ngai a, Ramnunmawia nge nge keini âi thlâwt chuan thil a ti theiin a rintlâk tih ka hriat phah.

Chumi hnu chuan inneih a rawtna ka pawmpui thu leh engkimah mawhphurhna a lâk ngam chuan atan ka awm zêl ang tih ka hrilh ve ta a, ka chhungte a biak vek thu pawh a sawi a, "Nunu, nupui satliah ni tur atan ka sâwm lo che a, damchhunga a nuam leh hrehawmah pawh i tana awm zêl turin ka intiam thei a nia, tuna duh chawp che ka ni lova, engkim i hriat vek tawh kha..." dam thlupin a ti a, ka lo zak chem chem, hetiang thu mipa hnen aṭanga hriat leh hi ngaia neih chi pawh va ni suh.

"Zosanga fa hi i fa atan i pawm thei tak tak ang maw!?" Tiin rinhlelhna mitmengin ka en a.

"Kha mi tenawmpa i lo duh thawt thawt kha chu ka haw ngawt mai che," a'n tiah.

"I chhia..." ka lo ti hlak a.

"A nia lawm le, inkhuaa contract kan thawh ṭum khan ka hmu che a, ka duh che tih phat buai ka tum lo. Mahse, kha mihring tan khan i inpe pumhlum lutuka ka ngawi ta a nih kha, tuna ka hun ṭha neih hi bawhpelh ka tum miah lo a nia, nangmah ka duh che a nih chuan i pum chhunga nautê pawh ka duh tel vek tur a ni." Thutak zeta tiin ka bulah a rawn insawn hnai a, a kut khinghniha ka biangah khuapin, "Ruatsângkimi zûn hi a chakin a zâm thui zêk a nih hi..." tihpaha rawn kun hniamin ka hmuiah a rawn fâwp ta a. Ka lo insangmar nghal at.

Reilotê tak tak chauh a nia min fawh ni.

"Tunah min duh nghal chûk chûk lo mah la, i chân loh khanah kei Ramnunmawia hi ka chhuak zel anga min la hmangaih chhawm mai ang," inringtawk taka tiin min kuah ta hlu hlu a, a taksa lumna pawh ka tem pha hial.

"Kan la hria ang chu..." ka ti sap ringawt.

Hemi zan aṭang hian inngaizawng pangngai angin kan awm chho ta a, a thleng rang lutuka ka mumang a ni lo tih hriat nan ka insik leh vak zel. Ramnuna hi ka duhin ka hmangaih em tih âimah chuan min duhna leh ka tana a inhuamna leh inpêkna te, ka hmakhua thlira ka fa lo la piang tur a pa duh loh hian 'Pa' koh tur a neih ve theih nana rilru siama pawm ta ka ni. Ka thinlung hian Ramnunmawia hi misual a ni lo tih min hrilh si a.

Ka buaipui hah ngai miah lovin ka chhungte nen inneih dan tur an rêl fel vek a, ka nau neih hma ngeia engkim peih hman an duh tih a sawi.

Ka pum a puar tawh si a, tlân kohin kan inko ta a, "Nautê a lo leikan deuh hunah leh min thununna an phelh hunah mawihnai deuh zâwkin kan la inkutsuih ṭha dawn nia," tiin Ramnuna hian min hrilh a, ka chhâng hran lo.

An inpuiah ka lâwilut ve ta a, a nuhrawn hmachhawn ka huphurh viau a; mahse, ka pasal lo ni ta hian min thlamuanin chhel tak leh huaisen taka awm turin min fuih a, "Ka pa khan i hmel hmu ve se a pawm thlap ang che, Nunu, he i pum chhunga naute pa hi ka ni tih theihnghilh ngai suh," dam duama tiin a room lamah min hruai lut ta a.

Kan khaw lamah erawh sawisep ka hlawh leh hlê tih ka hria a, "Zosanga kha a puh mai mai a ni, a fa pa diktak chu a hriat mai alawm, ka rin a ang lo ngei mai," tia min sawi tâwk lah an bo lo. Ka chhungkuate erawh chuan engah mah ngai lo tur leh huaisen takin engkim an palin an hmachhawn thei tih min hrilh thung.

Ramnuna nuhrawn ka nu lo ni ta pawhin kâr hnih pum ka awm ve aṭangin a Sakei zia a chhuah ṭan a, kan inbe ṭha hleithei lo. Amaherawhchu, ka pasalin min uap hneh êma a duh angin sual a chhuah hleithei bik lova Ramnuna hi a hlau tih ka hai bîk lo. Ani lahin min vil hneh nasa mai si a, a inthlahrunawm lek lek...

Inrinlâwkna pawh nei hauh lo leh chawlchilh zetin pasal ka nei rum rum a, tute tân pawh hriatthiam a har ve khawpin ka ring. Mahse, ka haider luih a ngai a, hmeichhe tan chuan kan hmangaih hluah hluah aiin min hmangaihtu an hlu zâwk tih kha ka ṭan chhan a ni deuh ber mai.

Thlaruk hnuah.

Pathian khawngaihnain fanu duhawm tak mai ka nei tawh a, vawiin hian thlali a tling ve chiah a, a pa Ramnunmawian a hming atan Lalrohlui a sa a, 'Hlute' tia koh tur a ti nghe nghe.

Ka nau neih hma khan vawikhat mah nupa nun min hmanpui lo a, a insûm thei hle. Kei ngei pawhin mak ka ti a, khum khatah mu dun mahila, infawh aia thui a kal ngai miah lo. Ka beisei aia ṭhain min enkawl ti ila ka sawi sual lovang.

A nuhrawn lak aṭang pawhin eng harsatna mah ka tâwk lova an inkhapdai hneh hle. 

"Nunu, tunah chuan nupa tak tak anga kan awm a hun ve tain ka hria, ka hmangaih che tih pawh i hria tiraw?" Tia Ramnuna'n min zawh chuan ka lo bu nghat nghat a, ka mutna lamah a rawn tawlh phei a, "Ka nupui hi sex hmanpui tumna ka nei lo a, hmangaihna erawh chenpui che ka duh..." tia a sawi zawh rualin dimte hian ka hmuiah min fawp a, hnial tumna ka nei lo. Ka pasal, ka mawi lohna min hliahkhuhtu leh min dawmkângtu tân hian engmah ui rêng ka nei bik lo. Duhthawh takin ka lo fawp lêt ve ta zawk a.

Kan inneih aṭanga a vawikhat nan hmangaihna kan chendun ve ta. Ka pasal âwm nghengin ka chhing ta chial a...

Ka phone ri bengchheng zet chuan ka mutui lai min tiharh a, ka pain vawi thum zet min lo call chu niin!

"Pa..." tia ka koh rualin, "Phone i va chhang thei lo ve, Dinsangi a boral a nia," a rawn ti ta mai. Ka meng kâwka Ramnuna muhil tui lai ka sawi pah nawk nawk a.

Ka pa vêk chuan, "A nau neih hnu kha a Bp a chiang hleithei lo a, natna neuh neuh a nei bawk nen tukin dar 5 vel khan a boral..." a ti leh a.

Zosanga nupui a thi a nih chu. Khawvel han mak zia hi,  keini aiin naute an nei hnuhnung zawka hmeichhia ve tho ni tain ka hria. Zosangliana vanduai ka ti hle a, ka khawngaih angreng.

Ka pa nen kan inbiak zawh hnuah Ramnuna pawh chanchin ka hrilh zung zung a, min en vang vang chung hian, "chân loh khânah engkim hi a nih tur angin a thleng ve ṭhin tho asin," ati sup a, a sawi awmzia pawh ka hriat siloh.

Ka kal ve duh em tih min zawt leh a, ka duh loh thuin ka lo chhâng a, min phatsana a fa thlauhthlatu inchhung hi rah leh tumna ka nei lo. Ka sual vang nilovin a hunlaia zahna leh mualphona ka tawrh nasatzia ngaihtuah khan ka inlan ve a ṭul lo. An tan ka thi tawh. Zosanga erawh chu ka khawngaih ru ve tho. 

"I kal duh chuan ka hruai thei reng che a nia," ka pasalin a la tihram a, "An tan mitthi ka ni a, mitthi tawh an kal thei em ni?" Tia ka lo chhân chuan a nui ruh ruh a, "I luhlul zia hre lo ila chuan i fiamthuah ka ngai ang," a ti a, "Ramnunmawi..." ka lo ti hlak a, kan naute a ṭah tâk avangin chulam chu ka ngaihven san ta rih a.

Dinsangi thih aṭanga thlakhat a ral hnu khan kan fanu a pi leh pu ten an hmuh châk êm avangin zanhnih riakin kan kal a, inpuiah kan la awm ta reng a, ka nu (Ramnuna nuhrawn) erawh chu inah a awn ngai mang lo, a bialpa nen khawiah nge an khawsak ka hriatpui lo a, a châng chângin a lo haw zeuh zeuh chauh a ni. A fate pahnih hian an zahpui hle a, vawi tam khakin zilh mah se engah vak a ngai lo.

Ka pasal hian a khak ngai miah lo thung a, a naute pahnih erawh chu a ngaihsakin a duat em em lawi si.

Kan khua kan thleng a, ka chhungten min lo lawm hle a, a bîk takin kan fanu an lawm zual. A pa Ramnunmawia a ni miau a, a intitatu hle bawk.

Zosanga te râl ve tura min tih chuan ka duh lo fithla ṭhak a, min nawrlui ta lo.

Kan inkawtah ka fanu puain ka teikual a, Zosanga farnu ka hmu nawlh, ka nau puak chu chîk zet hian a en a, "A nî te lam min chhun dawn a nih hi..." a ti pek a, ka huat tâwk a tling viau.

"Nia, Aizawla a nî a chhun an ti zel...nangni nilovin..." ka lo ti ve sak a, nuam lo a tih hmel viau.

Chutia kan indinchilh lai tak chuan ka pasal a lo chhuak a, "Nunu...chaw ei an siam a nia," tiin min rawn ko a, Zosanga farnu pawh a kal sawn rang khawp mai, inthiam lo hmel a pu tih hai rual a ni lo.

Hun reilote chhungin ka nun dan leh ka khawsak dan a inthlâk dâwrh a, nuthlawi fa pakhat pawm tur kha pasal ka nei ngawt a, a mak ve ngawt mai.

Kan khuaah zanhnih chiah kan riah dawn avangin chhungte kan tlawh kual a, ka pasal fel an tih thu leh puitling an tihzia min hrilh sap sap a, ka thinlung takin ka lawm hle.

Ramnuna'n bawihtei a pawm a, a hnungah puakpuan nen ka zui a, min tâwk zawnga lokal chu tudang nilovin Zosangliana a ni. A chêr lutuka ka hai ṭhelh alawm mawle!

"Nunu..." tia min koh chuan ka ding dat a, Ramnuna zawkin polite tak hian, "Zosang, in chanchin te kan lo hria a, a pawi tak tak a ni," tiin dam thlap hian a bia a, Zosanga chuan keini nupa en lovin bawihtei a en chîk hle, kanpain a biakna pawh chu a chhâng lawk lo a, a hnu feah muang ban charh hian, "Rawn dâk lut ve ula, naute hi ka lo pawm ve thei ang em?" A ti sup a.

Rang zet hian, "Khawih hlek suh," ka lo tihmanhmawh pek a, ka pasalin min rawn mitmei vat a, amah zawk chuan, "Kan hmanhmawh deuha kan kal zawk ang e," ṭhatea tiin min kâi a, min pensawn pui ta a, "Tihpalh Nunu... min ngaidam rawh u..." tia Zosangliana inthiarfihlim ta chu rum zetin ka'n melh hrâm kha.

Ramnuna a nui ruh ruh a, "I kum ang chiah hian i la nau deuh a ni tiraw, huatna rilru kha paih tawh rawh, a fanu a ni lova ka fa alawm, a inthiam loh ve êm kha..." a ti a, ka ngawi reng.

Aizawl pana kan lêt leh thlengin ka mood a off vek a,  kei min phatsana thihna hmangin a nupui a ṭhen thung a, Zosanga zak leh inthiam lo hmel kha ka lainat viau lo. Ka sual vena lam tak a ni.

"Chhungkua kan din tawh a, i nunhlui leh ani khan i thinrimna kaitho tawh suh se, i pasal Ramnunmawia tan hian rinawm em em la a tawk, ka hmangaih ang chea min hmangaih theih nan eng nge ka tih ang?" Tiin khuma kan awm tawh hnuah min kuah a, nui var var chung hian, "I nihna ang ang khan hmangaih i ni e..." ka lo ti a.

Ka chala pen kawrh pahin, "Ruatsangkim...thutakin min chhâng rawh.." a ti a, nui chung hian, "Chân loh khâna chhuak ṭhin pasal ka nei a, ka chân fuh hunah che chuan ka hmangaihzia che hi i la hre chhawm ve mai ang," ka tih chuan ka khabea dawmin, "Hmangaih awlsam nu..." a ti leh sup a.

"Hmangaih loh theih loh pa..." tia lo chhâng lêt vatin keimah zawkin ka fawp hmasa ta a, thaw hawk chunga min lehthal zuiin a nupui ka ni tih a nemnghet leh dawn ta nge nge e.

Ka Ramnunmawia tel lo hi chuan ka kim ta lo. Ka pasal a ni si a, thihna chauh lo chuan min ṭhen suh se.

"Bawihtei nau tur siam nan a la hma si a, ka ta ni chhunzawm zel mai rawh le..." tiin min kuah ta hle hle a.

Ni e, duhthusâmna khawvelah ka duhthu ngeiin pasal ka nei rum rum a, tawn sabawp tia sawi atan ka phal lo a, ka tana khuanu ruat hi ka chân loh lamah a lo lang ta si a, ka pasal tana inpumpek hi ka tihmâkmawh  a ni. A kiangah ka thlâ a muang si a.

B+>[BeckirafARenthleI]<+®