KA BEST FRIEND KHA

     

   

KA BEST FRIEND KHA...

  Ziaktu: Becky Rafa Renthlei  [-B®®]   

Thawhțan tlailamah chuan zana țhalai inkhawmah ka tel ve hman loh hlauvin ka phi chung a. Group zaiah ka tel ve dawn avangin ka zam ve viau, zai thiam lem lo tih takah țhiante zarah ka lo phun ve mai mai zel chung pawh hian min tel tir ve zel tho nia!

"In awm em?" Kawngkhar inhawng ri ka hre zawm zat a. Malsawmzuala leh bawk! He pa ninawm dan em em hi chu(h). Vawiinah ringawt pawh vawi li a lo kal tawh! Ka țhian kawm ve ber a ni a, kan țhenawm in thumnaah an awm a, kei aiin kum hnihin a naupang zawk, zû in zeuh zeuh a ching hle bawk a, bike a neih ve avang hian nula lam hian an be țha ve fu zel, a hmelchhe lem lo bawk nen.

"Lokal tawh suh, inbual la, zanah inkhawm turin ka lo sawm ang che," ka tih chuan a nui suk ringawt a.

"I bula ka țhut dawn chuan ka inkhawm ang," tiin filter-a tui chu a inthlit nghal zat nia.

"I țhu dawn nia i duh phawt chuan, kan zai laiin thla min lak sak ve ngei angai ang."

"Umn, ka lo tum ang, min lo sawm rawh aw," inla fel zet chuan min chhang ve mai a. Amah hi a sual hran lo a, ka chhungte pawh hian an ngaina ve viau chuan ka hria.

"Mate, ka phei rih mai ang," tiin ka chhânna pawh nghak lo chuan a chhuak zui daih a.

Inkhawm dar a rik meuh chuan ka inpeih at at tawh khawp mai, Mala sawm tur chuan ka chhuak ve ta a, an verandah-ah lo dingin a lo la insiam awzawng lo!

"Ka inkhawm leh dawn lo ania," min hmuh rual chuan a'n ti nghal ringawt a.

"Phakar suh, i thawmhnaw thlâk la ka lo nghak ang che," tiin inchhungah luhpui ka tum a.

"Ka inkhawm dawn lo tak tak, nula kan rim dawn veng dangah a nia, min kalsan mai rawh"

"Malsawmzual, i châk lo khawp ang," tih hmak pahin ka kal san ta a, dar ri a tawp tawh a, min ti khawtlai vek..

Inkhawm kan ban chuan zan dar kua a ri tawh a, ka phone charge lai chu lain ka mu daih a, rei pawh ka la mu hman lo. Ka nu chuan min ko vak vak a, "Mate, lo phei teh i țhianpa Mala a accident a nia," hlauthawng âw zet hian a rawn ti a.

"Maw!" tih leh thawh ka rual a, ka va'n awih lo tak! Ka nu te TV enna bulah chuan ka va ding a.

"Han sawi chiang deuh teh, amahin em ni?" ka ti a.

"Ni lo, Ruati nen an nia thu chiang ka la hre bik lo, insiam la damdawiinah an kalpui tawh a, va kal ve rawh," ka nu pawh chu tho chhuak ve nghalin "Mala te inlamah i pa nen kan phei dawn a, hmanhmawh deuh rawh," tiin min tur nghal chhên a.

Ka inthlak sawk sawka pawnah chuan ka chhuak ve ta a, Mala te inkawtah chuan motor a ding nual a ka tlan phei ve ta hlawk hlawk a. YMA hruaitute an lo awm kim deuh vek tawh nghe nghe a, Mala nen kan inkawm țhin tih an hriat deuh vek avangin min lo en hu hlawm lehnghal!

"Mate, kan rualin damdawiinah chuan kal ve mai la," lo titu Siama chu ka en vat a. Ani hi Mala kawm țhin ve tho a ni.

"Umn, a rem te chuan."

"Kal ang u," tiin Siama, kei leh Zuali chu kan chhuak ta a, Siama car chuan civil hospital lam panin chak fê-in kan tlan chhuak a.

Hospital kan thlen chuan casualty kawtah mi an lo pungkhawm țeuh tawh a. An accident-na hmun hi kan veng nen a in hlat deuh hlek a, a hmu hmasa tute'n damdawiinah an hruai nghal niawm tak a ni.

Casualty-ah kan inzui lût țhâm țhâm a, Mala awmna room min kawhhmuhna lamah chuan rilru tâwt țeuh chungin ka pen lut ta a. Ka thil hmuh chuan min ti hamhaih hle mai! Malsawzuala chu a lo thi fel der tawh! Inlamah khan min hrilh chiang duh lo mai mai a lo ni..!

Khumah puan tawngchham zet hian an lo khuh a, zawimuanga pan hnaiin a hmel chu ka thlir ta tlawk tlawk a, ka hrilh a hai ngei mai!

Țah loh pawh tum ila ka thei chuang lo ang ka lainat lutuk ringawt. Insum hauh lovin ka țap chhuak ta phawng a, midang ngaihdan tur reng reng ka dâwn tawh lo va. Keimah tih loh chu țap ve dang pawh an awm lo, chanchin hre châk a pungkhawm satliah kha an nia, keini hi a lam hnai thleng hmasa pawl kan ni.

A hmai chu a khem deuh nial a, a khabe a duk ruih bawk, a phone chu a mutna bul locker-ah chuan an lo dah a. A puan sin chuan a ke a khuh zo meuh lo a, kelawngin a awma a ke zungțang vel chu a pilh deuh nual bawk, a bak chu lang theiah pem a neih awm pawh ka hre lo.

"Kuri, Ruati ka'n va en ve lawk ange tikhan lo awm rawh midang pawh an lo thleng thuai ang, a țha vak bik lo va a ngaihtuahawm an ti deuh tlat," tiin Siama chuan min bia a. Ka țawngchhuak thei lo ka lu ka bu nghat ringawt.

Ruati hi kan veng tleirawlah chuan chhe lo ve pawl tak a ni a, engtia Mala nen hian inzui ve ngawt nge an nih ka hre miah lova, an inkawm ngai paw'n ka hre hek lo, mak ka ti ru viau a ni!

Mala kha chuan veng dangah nula kan rim dawn a ti awlsam mai a, Ruati nen hian an kal dun tihna em maw ni le..?

YMA hruaitute an lo thleng ta bawk a, postmortem an ti dawn lo tih ka hriat chuan ka lo thaw huai mai, a chhan pawh zu rim a la nam deuh thet thet a, A zuruiin chak zetin bike a khalh tih ka hre mai. Fapa mal a nih vangin leh a khawsak phung hrechiangtu a pa hian postmortem chu a duh kherin ka ring lo.

YMA president chuan ro a rel zung zung a, Mala ruang chu 'Morgue van' ah an dah lut a, Ruati kha a dinhmun a țha lo viau bawk nen damdawiinah țhenkhat chu an la awm dawn a, kei, Siama leh Pa Zauva (Mala pa) te chu Morgue van-ah kan chuang anga, Siama car erawh a nauvin damdawiinah a kawl rih dawn niawm tak a ni.

Kan veng hi a lian lem lo bawk a, chhiatni țhatni-ah hian țhalai kan indaih lo viau zel, zanin pawh hian damdawiina kal hi hmun hnihah kan ințhen a, a tam zawk chuan Ruati an menpui thung dawn a ni. Mala ruang erawh chu inlam panpui tawh tur a ni thova atam zawk țhalai damdawiina kal lo an awm tho bawk nen ruang zui hawtu tih tham kan awm lo.

'Morgue van' hnungah Mala ruang bulah chuan ka țhu a, Siama chu ka hma chiah seat-ah a țhu thung. A pa erawh chu kan bulah țhu lovin driver bulah a țhu daih a, a rilru na hmel ka hmuh khan hrehawm ka lo ti ngawih ngawih, mipa mah nise a fapa neih chhun a ni a, fa dang an nei bawk si lo.  Țap lovin ala insum thei zel chu a nia a fakawm thlâwt!

Ruang hi 'stretcher' ah an dah avangin kawng chhe deuh lai kan tlân chuan a tawlh leh hlek hlek țhin a, țhianpa ruang mah nise hmuh a nuam lem lo khawp mai.

"Mate, Mala lu kha chelh daih la i hreh loh chuan a insawh dawt dawt kha a lainat awm tlat." Siama chuan a rawn ti ta a, a dik viau!

"Chelh hreh chhan tur a awm hleinem, a nachang ka lo hre lo a ni," ka ti țha mai a, ka țhutna chu siamremin ka țhianpa lu chu ka chawikâng ta tehreng a nih kha!

Ka thlah leh rang kher mai! Ka malchungah Mala lu chu ka nghat chawrh a.

"Engatinge a!?" Siama chuan ka chêtdan chu mak a tih hmel hle a.

"Ka... ka thlah palh a nih kha" ka ti sap a, ka tha a khur ru dar dar mai. Khatia a lu ka chawikan khan a ri ruk a, a tukkhum lama chawi ka nih vangin a nghâwng ka zuk khawih kha vun chiahin a tuam a, a nghawng ruh a tliak vek...!

Mak tak maiin ka awm a nuam lo a, hlau anga lan ka duh bawk si lo. A biang vawt thler leh dâng lap chuan min râp ru riau nia! Siama lah chuan a phone min bihsan leh daih tawh, ka best friend a ni a, hlau tur ka ni miah lo. Engtin mi ti pawh a ni lo a ka inthiam lo ru ta viau lawi si!

'Ka rual khan inkhawm ve ta mai la chuan hetiang hi chu a thleng lo ang mawle Malsawmzual...' Ka țap hleithei tawh lo. Țap chiam chi ka ni lo ve deuh bawk nen; damdawiin kan thlen tirh a ka rik hluai bak kha chu a reh hmiah.

Ruang an hlanthlâk lai chuan Mala nu (Faki) chu a țap rawih rawih a, țhalai lo awmte pawh an inhnit ve tliar tliar hlawm a, amah hi țawngtam lo mahse mi pawi a sawi lem lo va lainattu a nei ngah phianin ka ring. Bakah, țhalai thi hi chu a dan a dang ve deuh atin ni.

Kei erawh chu rilru nuam lo zet hian ka awm a, lang theia pem nei si lo kha a ring ruh a tliak daih kha mak ka ti deuh! Helmet a khum tho bawk si a. An accident lai hmutu an awm chiah lo nâ in a inti hre deuh ho chuan an tlanchak hle tih an sawi tel zel thung a ni.

Ruang pawh zui lut ve ta lo chuan inthlak turin kan inah ka phei ta daih a, tlaivarpui tur a ni a, a nu khan min țah khum vak ka hlau deuh, ka țah a chhuak ve tehchiam tawh si lo a, Mala hmel ka hmuh khan ka tirilah hian nuam lo tihna riau zuk awm tlat a!

Ka room-ah lutin khumah chuan ka țhu deuh vang vang a, a hma aimah chuan hlauhna ka nei nasa telh telh mai! Ka hawina lam apiangah a hmel dâng lap kha ka mithlaah a lang zel a, tho thutin ka inthlak sawk sawk a, hmanhmawh zetin ka tlan chhuak leh ta a.

Ruang bula țhut pawh chu ka huphurh ru riau tawh a, mahse, hmundanga țhut chu ka inthiam chiah bawk si lo. Ka awmdan hrehawm ru zet chu tuma'n min hriatpui ve lem lo chu a ni phawt a...

Zinglam dar hnih a rik chuan ruang bulah ka la țhu ve rân a, YMA information-a thupuang ri chuan ka kawchhung a nghawr dawt mai! Ruati pawh a boral ve chiah tih an rawn puang a, ṭhalai țhu ve ho chu an hawi phâwk hru hlawm a, keipawh ka bâng bik chuang lo.

Mala hmel ka en chuan a hnar ațangin thil tuiril deuh hi a rawn chhuak a, hruk sak tumin a lu bula lapua chu ka ban a, mahse, ka rilru ka thlâk leh thut a ka kut chu ka la kir nghal vat. Ka khawih hreh tlat a nih chu(h)

Nula leh tlangval chu hmun hnihah ruang tlaivarpui tur chuan kan ințhen ta a, kan section leh Vanapa section te chuan Mala kan tlaivarpui anga section dang pahnihin Ruati an tlaivarpui thung dawn a ni.

Ka bula țhu Siama chu ka kheuh zeuhva "Ruati khan a englai nge a sawh ve i hria em?" Zawitê-in ka zawt a.

"Internal bleeding tih chiah ka hria, pawnlam lang theiah pem a nei lo. Mala pawh hian thihpui tham khawp langsarah chuan a nei lo tiraw?" a lo ti a.

"Umn..." tih chiahin ka chhang a, a ringruh tliak vel kha chu sawi pawh ka tum lo. A vun vawt raih ka khawih laia ri ruk kha ngaihtuah pawh ka duh tawh lo e a...

"Mate, i awmdan hi a dik miah lo," Siama chuan a ti leh a.

"Dik loh pawh ka hre lo, min țhâwng êm a, ka pangngai lo deuh mai chauh a ni," ka ti ve tlat a. Diktak chuan ka awm a nuam hlawl lo, ka tirilah hian eng emaw ni hian min țham er er reng a, ka sawithiam chiah si lo!

"In inkawm nasa si a i hlauh chu ka ring chiah lo."

"Hlau hran nâng, inkhawm ang ka tia a duh lo va, ka kalsan hnuah ti hian a ni zawm nghal ta mai si a, a hrilhhai thlak khawp mai," ka ti sap a.

"Ruati nen hian an inkawp ve tihna em ni, i hriatpui em? Keichu engmah min hrilh lo," a ti a.

"Engmah ka hre bik lo, nula kan rim dawn tih chiah a sawi."

"Zan zana Ruati hruaia a chhuak hi ka ngaih a țha vak lo, ngaihzawng a neih loh na a rei tawha nangtal chuan i hriatpui ka ring deuh a," a ti leh a.

"Hriatpui bik nâng, tunlai chu a lo kal renga engmah a sawi ngai lo. A nawi em em a ani mai."

"A nih chu an lo inzui ve deuh te pawh ani ang, kan hriat lohvin!" a ti ta a. Ka chhâng tawh lem lo.

Khawvar dawn hnaihah chuan khual khuaa an chhungte an rawn thlen țan avangin keipawh ka tho chhuak ve a, awm reng pawh ka duh viau rualin khawsik tur ang mai hian ka awm a, reilote mut hahdam ka mamawh a ni.

Darkar hnih vel chiah ka mu hman tihah ka nuin min kai tho lehnghal a, 'kuangchunga pangpar khawi turin an ring che' a ti a. Pawi tawp nang! Tun bak hi engthilmah ka țhianpa hi ka tihsak thei dawn tawh lova ka tih ve theih chhun chu tih hram ka duh a lawm. Ruangbula țhut reng ai chuan ka la thlâng fê zawk.

Pastorin vuina hunserh a hman zawh chuan thlahna hla atan 'Pathian angchhung thianghlimah chuan thihna fate an chawl ang' tih hla an sa a. Kuang an chhin dawn lai phei chuan țap thawm a ri chuah chuah a, ka âwm tâwt up up chu tih reh tumin thawk ka la hak a, min en rengtu awm tlat hian hriatna ka nei a, a ruk deuh chuan ka hawi kual a, mahse, tumah chutiang ka hmu leh bawk si lo. Ka ngaihtuahna mai mai a nih ka ring ta zawk a...!

Thlanmualah ka țhiannu Maneihi nen puan dum inzawnin Mala ruang chu kan zui ve hnak hnak a. Ka țap thei lo lutuk hi hrehawm ka ti tawh zawk, an chhungte țap thiam fê fê leh chham zuah zuah ri ka hriatte chuan ka ni nghulh thei nia! Sawi tur leh chham tur chu ka ngah ve viau, mahse, ka hrawk chu hnawhtu awm ang maiin a tâwt up a, ka ngawi ngal mai.

"Tunah tuar lo angin lang mah la nakinah chuan hei ai hian hrehawm i la ti dawn a nia." Maneihi chuan a ti sap a.

Țhiani lah hi 'tunah tuar rih lo mah la' te a'ntiah..!

"Tuar dan pawh ka hre lo, ka mumang ni tlata hriatna ka nei, damlo tur ang hian ka tiril hi a khur deuh der der reng mai," ka tih chuan min hriatthiam hmel tak hian ka kut chu a vuan a.

Ni e, a sawi dik chiah ka la awih hlei thei lo a ni ber mai!

"Damdawi in inthlen khan a lo chatthla tawh em ni?" tiin min zawt leh a.

"Umn, a hmunah a thi nghal an ti a, mahse, damdawi inah an hruai ta tho niawm tak a ni "

"Țhalai inkhawm zan khera chhuah reng reng i sawm ve îk lo mi."

"Sawm e, a duh lo alawm Ruati nen berkher an chhuak bawk si a, a mualphothlak em mai," ka ti leh a.

"Nia, in inkawm nasa sia a thi tih ka hriat khan ka rilruah i lang hmasa ber."

Thlanmual kan thlen tâkah chuan kan ngawi dun ta a.

Pastorin țawngțaina a neih zawh chuan a nawlpui chu an haw zo tawh a. Nu Faki țap nasa lutuk chu a khawng titih ta a, an buaipui deuh laih laih a, tih vak dan ka thiam ve si lo a, ka lo en ve reng ringawt. Nu tana a nat dan tur hi ka hrethiam pha lo zawk 'Vanram a kai ang em?' tih ka ngaihtuah chhuak thut!

Zan lamah pawh țhalai kal kan țha khawp mai, zan hmasa lam kan tlaivar avangin kan bâng hma deuh a. Nu Faki te chuan riak turin min sawm tlat a, ka nu ka dil chuan a lo phal ve mai a, Mala kawm ve ber ka nih bakah ințhenawm hnai kan ni bawka an phal loh ka ring lem lo.

Mala room kha an țhiat lova, tahchuan   a cousin hmeiche hote nen kan riak dawn a ni. Midang an awm ve bawka ka ngaih a ngam zân mai, chhunlam ai kha chuan ka rilru pawh a zia deuh reng reng e.

Inriak an awm ve nual a, mahni mut hmunah phone an khawih sup sup a, zanrei a thawh dâwn pawhin meng tawk an la awm thoin ka ring! Ka phone a, țhiana nen kan thlalâk chu ka en kuala ka ngai veng veng mai.

Room chhung a zau bawk a, chhuatah paruk an mu a, khumah pahnih kan mu thung. Ka taksa a chau ve deuh a ni ang reiloteah ka muhil ta thuai a.

Ka mutui lai chu ka harh hlawl mai, ka sana bun lai chu ka en a, zinglam dar thum a pel tawh puan pawh pakhatmah ka lo sin awzawng lo. Khum mawng lamah ka lo tlawhthla vek chu niin! Ka ngaihtuahnaah Mala bawk chu a lo lut leh a, a fb password ka hre tho a, a account-ah luh ka tum ta a.

A wall-a amah uina thu an post chu ka chhiar thla zel a, ka lung hi a awi thei thlâwt lo. Inbox-ah chuan lutin kan inbiakna a delete loh ho kha paihsak ka tum a ni. Ka thil hmuh chu leh...!

'Aruati September girl' an inbiakna chu a lo tlar thla dal a, inngaihzawnna lam thu engmah a awm lo. Ka chhiar thla zel a mak tih deuh ka nei 'Ruati a rai' mahse, Mala chhânna ațang chuan naute pa chu amah a ni lo tih ka hre thei thuai a, mahse, tunge ni ta ang? Nizan pawh khan he thil vang hi a nih dawn hi an lo chhuah dun ni! Min hrilh a tum miah lo chu mak ka ti ve deuh va! Engkim a chhia a țha kan inhrilh tawn țhin kha a nia....

Ka ngaihtuahna kal thui lutuk chuan ka mutchhuak a tireh vek a, dimtê a thovin sitting room lam chu ka pan a, tlangval ho mu tlar țhap chu kalpelin pawnah ka chhuak ta a, hlauhna châng pawh ka hre lo. Ruati lah a thi ve tho bawk si a, midang hria an awm angem? tih ringawt ka ngaihtuah a...

Tih ber tur pawh hre chuang lovin Mala te kawtah chuan ka ding deuh vang vang a. Kan in lam ka hawi phei chuan verandah-a mi tu emaw țhu niawm tak hi ka hmu a, chiangtak erawh chuan ka hmu thei bik lo.

Chutih lai tak chuan vai Truck lian zet mai hi rawn tlanin a 'rod' phurh chu a hnûk ri hruah hruah a, lo hnai zelin a head light chuan kan veranda chu chiang takin a rawn chhun ta a...

Mi țhu niawm tak ka hmuh pawh kha a chhun chiang kher mai! Chiang takin ka hmu thei ta! A kut veilam chuan phone kengin ka en reng chu hria niawm tak hian a lo hawi chhuak ve chiah a, Lalpa leh! Malsawmzuala ngei a ni. A accident laia a thawmhnaw hâk chiah kha a ha a, kelawngin a awm bawk.

Ka mitvai a nih hlau zetin ka mit chu ka khap fak fak a, Truck a tlanliam hnu chuan street light engin a chhun deuh ruau ruau hnuaiah chuan ka lam panin a rawn phei ta a. Tlanchhiat ka duh, mahse, ka ke chu ka chêt thei ta hauh lo mai!

A lo hnai zel a Malsawmzuala ngei kha a ni. Kei hian ka hmusual lo tawp mai...!

Mahni țhianpa te hlauva tlanchhiat chu ka duh bik teuh lo, tlanchhe dawn tehreng pawh ni ila ka thei kher lo ang. A lo hnai zela keipawh chesawn lovin ka dinna ngaiah ka ding ran a.

Vawilehkhata current a rawn thim thut chuan ka țe tuarh mai! Malsawmzuala pawh chu ka hmu ta miah lo a, rang fahran hian inchhungah chuan ka tlan lut ta a. Ka thin a phu dawt dawt a ka tukkhum hik deuh chem chem avang chuan zuitu ka nei tih ka hrethiam mai!

Inriak ho mu tlar dul lam chu ngaihtuah chiang hlei lovin ka pal phei bawrh bawrh a, inchhungah hi chuan inverter a eng ve chang chang a; mahse, hlauhna ka neih nasat êm avangin inriak ho chu kaihthawh nachang ka hre lo.

A sir bera mu u Zuia chu arawn țhu chhuak hlawl a, mak min tih hmel zet hian pháwk zetin min en a!

"Mate, engtizia nge?" Min hlauh hmel deuh hian a ti a.

Ka chhâng lawk lo, ka la țim ru er er thei nia! Ka hmel landan tur pawh ka hrethiam mai. Hlauh nei hmel hi chu tuma'n an hai bik lo, u Zuia lah mi â ni hek lo le. A bulah chuan min pawt țhu a, vêng lian lo tih takah nula tlangval kan in nelin kan inpawh viau a, min thlamuan tum zet hian ka samah chuan a chûl ta a.

"Le, sawi rawh le," țawng ring ngam chiah bik lo hian a ti sap a. Ka sawi duh dawn lo tih ka inhria, ka best friend mualpho theihna tur a ni a; Bakah ka lo hmu sual palh ve theih tho a, thawchhuak deuh hap chung hian, "Ka muhil thei lo a pawnah ka chhuak a current a thim thut bawk nen ka hlau deuh lawm le!" ka ti ta ringawt a.

"Hmuh i nei miah lo maw!?" Min ringhlel zetin a ti leh a.

"Nei lo e, ka țha tawh e," ti sapin ka tho chhuak a current pawh a rawn awm zui ve ta nghal a. U Zuia pawh ngaihsak tawh lem lo chuan Mala room-ah chuan ka lut ta daih a.

Midang ho mutui lutuk chu mak ka ti! 'Kei hian thil ni lo pui pui ka ngaihtuah a ni' khumah chuan ka mu leh a. Ka kawchhung tawt up up chu tih reh dan awm se ka ti hle mai, hlau ru deuh chung chung chuan maimitchhingin ka țawngțai ta a.

Thawm ri nak nak chuan min ti harh a, sana ka enin zinglam dar ruk a lo ri der tawh! Ka țawngțai zawh khan ka lo muhil leh anih dawn hi...

Vawiin hi thlan nghah ni a nih vangin thingpui lumna lamah ka tel ve angai dawn tih ka hria a ka tho vat a. Keini khuaah hi chuan thlan hi an la hung vek zel a ni.

"Nizan i mutui vak lo ni maw?" Mala cousin pakhat chuan min zawt a.

"Mut a har ve êm a ni, ka mut țhanna a ni bawk si lo a" ka ti țha mai a.

"Zung turin ka tho a i lo awm si lova, ka ngaihtuah deuh che maw le, i țhianpa ber a ni bawk nen ngaih a ngam chiah lo deuh a," a ti leh a. Ngaih ngam lohna tur hriat nei niawm tak a !  A țawngdan chu min ringhlel a ang riau...!

"Engmah chutiang a awm lo, pawnah reilotê ka awm zawk a, ka mu leh daih," ka ti liam puat a.

Chutih lai chuan Mala nu chu ring lutuk hian a țap leh a, 'Ka fapa, tho teh a anglo emai' a ti rawih rawih a. Ka lo hrehawm ve leh ngut ngut tawh, a nu leh pa mawlh hi an khawngaihthlak!

Chumi nileng chuan thingpui lumin hun ka hmang a, nizan chungchang kha tumah hrilh ka tum lo. Ka sawi ngam lo a ni ber zawk ang chu...

Tlai lamah Mala nu chuan chaw eitura min tih ve tlat avangin in lamah eirawng kan bawl a.

Mikhualho in an ei lai chuan a tlai tawh hle a, khua a thim lek lek tawh.

"Mate, thlanah Chempui kan theihnghilha i țhian tu emaw sawm la min va tlawmngaih sak dawn em ni?" Mala nu chuan a rawn ti heu mai!

"Pawi chuang hleinem ka nau ka sawm phei mai ang."

"Midang ho hian hmun hnawk hi chu lo thian mai rawh se, tirh mai tur an vang em mai, mikhual deuh vek an ni si a chaw eiah ka lo nghak ang che," a ti a. A dik chiah, kei lo chu mikhual deuh hlir an ni a, tirh tur an vang ve em a ni. Ka nau mipa ka sawm mai anniang chu, keimah chuan kal ka tum lo bur.

"Thlân vüng chungah khan Chempui chu ka dah aw," zuk ti hrâm a!

"Aw le," Ka va'n hreh tak, Bawihpuia sawm tur chuan kan in lam panin ka chhuak ta a.

Bawihpuia hi kum 16 a ni ve tawh a, kan naupang ber a ni. Thlan kalpuia ka sawm chuan a duh lo deuh dawn a, mahse, ka pa in  'va kal pui rawh' atih deuh tlat avang chuan hnial ngam lovin min zui ta a, khua a thim țan tawh.

"Âte, an ti ho e nangmah kher an tir che a," a ti nuah nuah a. Chhân enah ka en lo. Țhianpa thlân kan thlen chuan chempui chu kan zawng a, a nu khan thlan vüngah ati mai si a kan hmu zo ta awzawng lo. Hmundang han enkual chiam turin a thim deuh ruau tawh bawk si a kan hmuh pawh ka ring chiah tawh lo, a sawina hmunah a awm miau loh te chuan!

Thlanglam thingkung chu vawilehkhatah a ri tuar a, Sava dum lian zet hi a rawn thlâwk chhuak phurha kan phu nasa ngei mai..! Bawihpuia chu rang fê hian ka bulah arawn ding nghal a.

Van lam ka hawi a, chhûm dum chhah mep mup hi kan dinna zawnah chuan  a rawn awm tup tup a. Ka chesawn thei der lo nia.

"Âte, haw ang," ka nau chuan hlau tih hriat deuh hian a ti a. Ka kutah a chelh tlat a, sava kan hmuh kha Mala thlan hungna banah chuan a fu a, a hawi ang hruk hruk lehnghala, ka hmulthi a ding er er thei mawle!

Sava chu ka en renga Bawihpuia lah  a chesawn ngam țhak lo. Sava dum hlurh hawi na lam ka en chuan Mala nu chempui sawi chu thlân hungna ban pakhatah chuan a lo insat bur vâ a. Mak ka ti kher mai! Kan thlen tirh khan kan hmu miah si lova! Tunah lem kan hmu awlsam leh hle si! Ka ngaih hi a țha thei tawh hlawl lo. Chempui chu lain ka nau chu "Tlân ang," tihpahin ka phih dawrh a chak mangkhengin thlanmual chu kan tlansan ta a.

Kan veng thlanmual hi a hnai viau a, Motor kawngpui ațang pawhin a hmuh theih a ni. Kawngpui kan chhuah chhoh chuan ka khur nasa hle tih ka hre chauhva, ka nau paw'n a hlau ngang a ni ang a dâng lap mai! Thaw huai chungin kan in lam pan chuan kan inkai phei ta hnak hnak a.

"Bawihpui, tumah hrilh suh aw," ka ti sap a.

"Umn, mahse, Ka nu leh pa chauh hrilh ila."

"Engmah hrilh tur a awm loh kha, tumah pawh kan hmu lova kan hlauh vang mai mai nia," ka ti tlat a.

"Ni tho mai, sava kan hmu tih teh ngawt chu," tiin a nui deuh hak a.

"Dáwih lutuk hi chu a hrehawm mipa ve si i dawih e," ka ti ve zaih a. Nizan ka thil hmuh nen keimah zawk hi ka dik lo reng si a!

In kan thlen chuan Bawihpuia chu kan inah a lut a, kei erawh Mala te inah ka tlang thung a, chaw pawh ka la ei lo. Zaninah țhiana te inah hian ka riak dawn tawh lo chiang khawp mai. Eng ang pawhin min sawm mah se ka riak dawn tawh lo bur.

Mala nu chuan chaw eiah min lo la nghak reng a, engmah ka sawi chhuak lo. Sawi mahila tuma'n min awih sak chuang lovang, mahni țhiante thlâ hmu anga insawi kha min dem ve viau thei tlat a ni.

Țhalai zan ala ni a, kal pawh ka tum lo. Chaw eikham veleh ka haw nghal daih a, ka hlauh vang em em pawh ni lo in ka room-a awm hahdam vang vang ka châk ber tawh a ni.

Khumah chuan ka țhu deuh vang vang a, Ruati fa paina pa hi tunge ni ta ang!? Mala inhnamhnawih phâkna tur leh a nunna hialin a tawrh phahna hi hriat chhuah ka tum ngei tur a ni. A har viau ang tih chu ka hria a, mahse, theihtawpin a rukin ka zawng ve țang țang mai aniang chu...

Reife chu mengin whatsapp group ah ka nawi ve char char a, dar sawmpakhat arik chuan khum bula tui bottle ka inchhawp chu ka in a, light ka off ta a, êngah ka muhil țha thei tlat lova a hrehawm țhin khawp mai.

Thawm ri ruk hian ka mutui lai chu min tiharh hlawl a, eng nge tih hriat tumin ka țhu chhuak vat a. Light on tuma ka ban chiah chu ka phu zawk mai! Kut vawt thlarh hian ka banrekah manin ka hmui a rawn hup nghal a. A rim chu mak danglam tak a ni, zu rim leh perfume rim a inpawlh chûk a, Mala ka hrechhuak nghal zawk mai. Hlauhna leh râpna hian ka khat a, ka au chhuak thei bawk si lo; ka ke chu ka leng vak vak a, min thlah ta riai riai ni hian ka hria!

Light chu amahin a rawn in on thut a, chutia rawn eng ta phut chu mengțha hleithei lovin ka khap zui sak sak a.

Pindan chhung chu ka melhkual nghal vat, tumah ka hmu lo. Ka țhianpa hian min tihnat duh ka ring lo a, eng emaw min hrilh tur a nei ani zawk lo maw! Ka ngaihtuahna thar a vang chuan ka hlauhna chu a nêp ta deuh sawt nia.

'Mala' Ka ti sep a. Thawm a reh vung vung mai, a aia ring zawkin 'Malsawmzual' ka tih leh chuan bathroom lam chu a ri deuh dat dat a.

Thawmdim tak hian khum ațang chuan tho chhuakin bathroom lam chu ka pan phei a.

Kawngkhar chu dimthei ang berinin ka hawng riai riai a, room chhung êng deuh ruai chuan bathroom chhung chu a chhun pha a, mahse chiang takin engmah ka hmu thei lo thung. Light on tum chuan ka ban da da a, kawngkhar bul maiah switch a awm tih ka hria, ka ke dinglam ka pên lut hman tawh tihah kut vawt zet hian ka biang chu a rawn chûl a nih chu! Ka hlau lutuk chu ka țe țhawt mai..! Engmah ka hre zui tawh lo.

Ka harh leh chuan ka khumah ka lo mu fel thlap a, tumah ka chhungte hmuhtur an awm lo. Engtin nge khumah hian ka lo mut leh ngawt theih!? Ka kawchhung tawt up up chu tih reh tumin ka thaw hawk a.

Room chhung chu a reh tlawk tlawk a, ka chhungte thawm hriat tur eih a awm lo. Tukverh parda chu thli chuan a chhem phe hlep hlep tih ka hmuh chuan rang fahranin ka tho chhuak a. Ka mut dawn khan ka check vek, engtin nge a lo inhawn theih? Zawhna hlirin ka khat tawh...!

Parda chu keuvin tukverh khar tum chuan ka ban a. ka room verandah-a lo țhu chu tudang a ni lo, Malsawmzuala bawk a ni. "Mala," zawitê in ka ko a, chhânna a awm lo, ka chhuak ngam bîk bawk si lo, va'n buaithlak tak!

Chutih lai tak chuan kan țhenawm Rama te ui chu nasa fê hian kan in lam hawiin a rawn bauh ta tuar tuar a. Ka phu zawk mai! Rang lutukin tukverh chu ka khar țhuai a, ka nu leh pa te pindan lam panin ka tlan ta chawn chawn a.

'Malsawmzuala thlâ hi a hrâng a nih hi' tih ringawt ka ngaihtuah. Kei hmeichhia ve mai tan chuan ngawih bo pui chi niin ka hre tawh lo. Ka sawi vek a ngai a ni, min tibuai reng dawn a hriatna zuk nei tlat a..

"Mate..." ka phu nasa lutuk! Ka nu chu phâwk zetin ka en a.

"I va tho hma ve," min ti a, ka chhâng lo.

"Nâ i nei a mi, khatia i awm a!?"

"Umn..Aw...er..." sawi mai tur ka hre miau lo alawm.

"Lalțhazual, mi â ang maia awm kha bansan teh, thil awmzia sawi ta che," ka nu chuan vin zetin a ti a.

Țhutthlengah chuan ka țhu thla hnawk a, engtin nge ka sawi ang? Bul țan dan tur ka hre mai lo.

Ka bulah ka nu chu rawn țhu ve in, "Malsawma i hmu tiraw?" a ti ta a. Ka lu bu nghatin, ka nu chu ka kuah ta a.

Duat taka ka samah chûlin, "Ka hria alawm, hlau reng reng suh engtinmah a ti lo ang che, i țhianpa a nia lawm." Tiin min țawng thlamuan a, ka thaw huai mai...

"Khawvar hunah an inah kal turin ka duh che, i nu Faki'n pek tur che eng emaw a nei a nia."

"Eng?" Ka hlau leh țan der tawh.

"Ka hre bik lo, nizana pêk tum che kha a nia, i kal ta si lo a." A ti leh mai a.

Eng chu nge maw ni dawn le..!? Ka kal hreh nghal em em ringawt nia!

Ka nu nen chuan khawvar thlengin kan țhu ta a, thil thlen dan pawh kimchang takin ka hrilh ve bawk a. 'Khawiahmah sawi chhuak suh' min ti ta nghe nge a ni. 'I țhianpa mualpho ai chuan ngawih kha a finthlak zawk, a nu leh pa rilru tihnat  belhchhah a hlauhawm' a ti bawk.

Zing dar sarih velah, Mala te inah ka nu nen chuan kan kal ta a. Nu Faki chuan 'envelope' hi min pe a, an la hawn loh thu a sawi, ka hming a inziah vang leh a inchar thlap avangin an hawng hreh tih a sawi bawk.

Eng lampang nge inziak ang tih ngaihdan ka nei hauh lo.

Kan ina kan lêt leh hnu chuan ka room ka pan nghal hmak a, Malsawmzuala lehkha hnutchhiah chu chhiar thuai thuai ka châk tawh hle a, huphurh rûkna riau ka nei tel tho bawk.

Ka khumah chuan țhuin envelope chu ka hawng ta a. Ka țhianpa kut ziak tlar thla dal chu ka chhiar țan ta a..

Mate, (Lalțhazuali)

          He lehkha i hmuh meuh chuan i best friend hi, he khawvelah hian ka awm tawh lo ang. Ka tan englai pawhin i awm reng țhin a, he ka thuziak i chhiar chhuah hunah hian min dem loh hram ka beisei.

Ka nun dan hrechiangtu leh thu țha min hrilhtu i ni a, ka tan i hlu takzet tih ka'n sawi tel hrâm ange. Ka nu leh pa te fa neihchhun ka ni a, dam hi ka la thlahlel ve a sin. Mahse, ka chunga thil lo thleng hi hriatthiam har ka ti a, vawi tamtak hrilh che ka tum țhin; mahse ka ngam ngang lo a ni e.

Zankhat chu ka roomah Ruati a rawn lut hlawl mai a, nau a pai tih chu ka hre tak na in, tunge a pa tih ka hre lova; vawikhat ka zawt a, min hrilh duh lo kha a nia. Ka zawt nawn tawh lo.

Mate, Ruati fa paina pa ka'n hriat meuh chuan ka tliak hnâwp a ni ber mai. Ka ring thei lova ka awih hek lo, mahse, thudik a sawi tih Ruati hmel ka en khan ka hre thei tlat a ni. A fa paina pa chu maw...Min hringtu ka pa ngei hi a ni e! Ka bing chûk chûk a, zah lutuk avang hian thih theih chu nise, min hrilh zan khan ka thi nghalin ka ring.

Khami zan ațang khan hlim ni hmel ka hmu tawh ngai lo a, nasa takin zû ka in a nih kha. Mate, ka hrilh loh che avangin min dem suh aw, ka ngam ngang lo a ni. Ka nu hmel ka hmuh apiang hian, ka pa ka huatna a zual țhin asin, ka pa nen pawh kan inkâr ațha thei tawh lo.

A tawp berah chuan i țhianpa hian khaw êng ka hmu ngam tawh lova, ngai tak chung che in ka kal dawn ta a nih hi...!

He lehkha i chhiar hun tur hi ka sawi thei lo. Mahse, i chhiar ngei a nih chuan zan dar riatah ka thlânah i lo kal dawn nia. Ka țhian ka hmangaih che.

                                       I best friend

                                     Malsawmzuala.

Ka chhiar zawh chuan ka țhianpa ka khawngaih lutuk avang chuan ka țap ta tlawk tlawk a. 'Mala, i thlânah chuan ka rawn kal ngei ang' ka ti chhuak sap a.

                     A TAWP TA

©<++++[BeckirafARenthleI]++++>®