SOLOMOS BRIDE Chapter-4

SOLOMOS BRIDE

by Becky Rafa Renthlei

Chapter-4

24th December Solomos Apartment.

Christmas tree lian leh sángzet living room-a inhûng chu thlirin Briena nen hlimtakin kan nui var var reng a. A nalh viau bawk. Hetiang mai mai buaipui hian hun ka khawhral ang tih ka ngaihtuah pha ngai miah lo. Briena bulah hi chuan thil thar engemaw ka zir belh zel zawng a nih hi. Natalie ngaihtuahna hun pawh ka nei leh ta lo.

"Christmas bazar tawpna na ber a ni tawh a, kan chhuak ve dawn lawm ni?" Engmah ka leisak miah lova, tihsak tumna pawh ka nei lo kha a nia. Mahse, ka rilru puthmang a inthlák daih!

"Dazel, hnial che chu ka hreh viau náin min hrethiam la, inchhungah chétna tur a awm neuh neuh a, ka lo kal ve lo mai ang."

"Min hnial chu a ni ber alawm, Joanna awm loh chhungin midang kan ruai thei thova."

"Ni lo ve, ka ti thei alawm, zan thum chiah hetah i awm tawh dawn a, midang lâk leh kha a buaithlâk."

"Kan pahniha chhuahdun i hreh chuan sawi țha ve mai la," lungawi vak lo a ka tih chuan a ner sak a. A tarmit phén ațangin min melh leh kar tawh.

"I hriat kha..nimin nilêng ka chhuak tawh a, nangmahin kal mai rawh."

"Christmas Eve hmandun pawh i hreh riau ang a?"

"Hreh lo e, i hmeinu bula hman i duh zawk lo maw?" Min ti lêt khauh a. Natalie nen kan inkâr kha a hre ve lo tak a lawm le.

"Khalam kha chu theihngilh rawh, ka nupui phuahchawp bulah ngei hian hman ka tum e." thinrim ru taka tiin ka inher vut a, kan room lam ka pan ta daih a. Hrep tak hian. 'I hmeinu' tih teivet! a thîk ka ring chiah bawk si lo.

Insiam peih vek a ka chhuk thlák chuan Briena chu a la buai hle a. Step tawpah dingin a chezia ka thlir ta reng a. Pangpar khawina darthlalang veka siam, dawhkan chungah chuan a lo hûng mek a. A bulah rose par rawng chi hrang hrang khawitur bucket ah a lo inchhawp bawk. Hmeichhiain ka inchhungah pangpar an khawi ta chu a nia! Ka mumang te pawh a ang dawn dawn alawm le.

"Ka kal a nia," Ka be miah lovang ka ti kha a nia, ka lo theihghilh leh daih. Ka sawi zo vek tawh si.

"Ok..bye.." Pangpar lam bawk min ngaihven san leh ta daih a. A sam a thur deuh chhap a. A biang sen țán chuan a ti lang naupang lehzual, Sawti chung sawn a inla puitling ve em em a. Ka nuih a za deuh tlat! Ka farnu niawm zawk tak a ni. Huh! Ka farnu...

Min ngaihsak loh ém vang chuan lungawi lo ru țeuhvin ka chhuahsan ta nge nge a.

Briena Pov*

Christmas tree min cheipui lai khan ka mitsirin ka melh ru zeuh zeuh a, a nuamti hmel khan minti hlim hle. A chhip sam buk lam lek lek buai deuh niai chuan a tilang sexy hle a. A hnar ngul sang vah leh a khabe ruhkual invuah nghet charh te hian mipa a nih zia a tilang chiang hle. Jumper dum a ha a, a kiu thlenga a kawr bán pawt tawmin a vun buang deuh kharh ka hmuh chuan Australian a ni tih a hriat hle.

Dazel Solomos tluk a mipa chhe lo hi an váng viau ang. Actor niawm tak a ni. 'Min en reng lo khan i hna thawk ve la..' min tih khan ka zak ru viau a, mahse, hriattir ka tum lo.

Nilengin aparment chhunga room țhenkhat kan luh tamna tura ngaih chu ka chei vek a, ka chau viau tawh. Mikhual pindan leh choka, study room tih loh chu duhthusamin ka chei tawh a. A tawp nan kan bedroom-ah pangpar ka khawi leh ta a. Room dang ka cheidan ang lo deuha special in chei ka duh tlat.

Silver rawng bucket chhungah champagne bottle hnih leh ice cube box ka dah bawk a. Ka romantic viau lo náin zanin chauh chu ka theihtawpa țhain inbuatsaih ka tum. Hmanzan khan chips kha a ei ve châk tih a sawi a, ka phal lo kha a nia. Korean soystick chips new pack ka lei ho chu bucket bulah a lendan indawtin ka rem țhap a. Wine glass pahnih ka chhawp tel bawk.

Ka inpeih ta. Intihfai chiah ka hmabak tawh. Ka sam fai takin ka su a, bathtub ah rei fe ka inchiah leh te te a, diktak chuan Dazel vanga inbuatsaih hluai hi ka tum a ni lova. Newyork a pan hma a christmas hlim taka hman ka duh ve vang a ni. Tun bák hi kan hmang dun tawh lo maithei a, kan hma hun kan hre der si lo. Min ngaina hran lova, kei pawh hian midang a nei tih hrereng chung hian alakah ka intátlut ang tih ka hlau ve tho.

Dressing table hmaah țhuin ka sam sei tak chu a tlêt sar thlengin ka khuih dalh dalh a. Make up tlem ka hmang bawk a, mascara ka inhnawih laitakin ka phone a lo ri thut. Ka phu nasa ngang mai, Huiz, ka mit hnawih a pherh vek!

"Brie," Ka nu áw dam thlap ka hriat chuan ka hahdam sawng sawng mai.

"Brie, bawihte, i present kan lo hmu a, kan lawm khawp mai. I pa pawh a țha e, ka fanu ka ngai takzet che." áw chuai raih hian a rawn ti a. Ka hnuk a ulh mai dawn alawm le..

"Keipaw'n ka ngai che u, Dazel nu leh pa pawh present ka thawn thova, engmah an rawn sawi lem hlei lova." Ka tih chuan, "I ti țha lutuk, lawmthu sawina phût kher mahta che." a ti dam thlap a.

"Dazel chuan a duat che em?"

"Duat e, zanin pawh hun nuam tak kan hman ka beisei."

"A țhat chu, i pa vang anih rualin i hmakhua kan ngai tel tho tih i hre dawn nia." Ka pa nen rei vak lo kan inbiak leh hnu chuan phone kan dah ta a.

Ka mit hnawih pherh vek vangin hmai ka phih țha leh te te a. Uluk fahranin a bul țang chuan ka hnawih leh ta a.

Ka inthlak zawh vek hnuah inhnuai lam panin ka chhuk ta a.

Living room 7:00 Pm

Ka rin aia ka rei ták avangin Briena lakah ka inthlahrung hle a, zanin bik atan a inbuatsaih nasa ve sia tih lunghnur ka duh miah lo.

Living room ka luh chuan engkim peih diamin a awm tawh a, Briena hmel ka la hmu lo. A inbual a nih ka ring.

"I inbual hmasa dawn em Dazel?" Tih pah chuan min rawn melh zeuh a. A thawmhnaw inbel ka hmuh chuan ka mengphar deuh! Ka luh tirh khan ka hmu lova, study room bulah a lo ding reng chu niin!

"Shower ka nei zuai ang." Ti liam puatin ka kal pel a. Chuti anih loh chuan ka inthunun thei lo palh ang tih ka hlau, he zan hi hlimtaka hman ka duh ve tho a. Tisa thil taka Briena hnaih tum hi a țha ber lo.

A thawmhnaw hák sexy zet nen hian hmuh ka inbeisei lo mai nilovin hetiang ha duh turah ka ngai ngai lo. Chiffon senduk nghawng zau lam hret hain a hnung lam a ruak káng a. A pianhmang a lang chiang hle bawk. Tarmit bun lo phei se chuan ka hai mai dawn alawm! 'Inthlâk leh rawh' tih mai ka duh a. Mahse, ka insûm ta zawk.

Zan tluana min thlêm a tum reuh emaw ni!? Chu lah chu ka ring chiah bawk si lo. Briena Larson kalsan thuai hi ka tan a finthlâk ber. Ka duh aiin kan inpawh mah mah.

Kan room chhunga ka luh chuan mak tiin ka hawikual ruai a. Romantic scene ang vel alawm le..Henu hian rem a hre reuh zêk! Pindan lum deuh ham ham chuan zauthauna min siam țan der! Pangpar khawi pawh a thiam hle mai. Ka hriat loh engzata tam amahah hian la awm ang maw?

Briena kawr rawng ang levis kamis hain, dinner jacket dum leh cotton jeans dum ka inbel a. Vawiin lamah present tur ka lei sak bawk. A hnen ațanga thilpek dawn ka inbeisei lova, kei erawh chuan pek ngei ka duh thung.

Rei awm lovin room chu ka chhuahsan ta a. Sofa-a Briena lo țhu chu ka hmuh chuan nui sukin ka pan phei ve ta a.

"A hun nen a inhmeh reih rawih hle mai, Mrs.Solomos. I lo buai hle ang tih ka hre mai e." Ka tih chuan mitmeng nung sarh hian min melh a.

"Dinner ka order a, a lo thlen hmain intur kan dawm dawn em niang?" ti sapin champagne chu a melh zauh a. Hawng rawh min tihnaah ka ngai ve hmiah.

"Dinner ei hmain ruih phalsak i ni lo a nia," tiin ka fiam pah zauh a. Za zet hian a nui ta hak hak a, a nui hmel ngainatawm tak chu ka vawikhat hmuhna a ni. A duhawm hle bawk.

Intur no kan dawm lai chuan tree-a khai tur ka lei belh chu ka hrechhuak zawk a. Christmas tree hring dap mai cheina vel tur dahna bawm chu ka la chhuak ta a.

Briena chuan thingkung chu a en vang vang a. "Ka thawnhnaw hâk nen hi chuan ka pui thei dawn tawh miah lo che a nia," chal chuar nâng hian a ti a.

"Keimahin ka ti mai niang chu..vawiin lam i che hah bawka ka awl ang che." tiin light vel ka fit țan ta a.

"A țhat chu, thing chu chei vat vat la..ka nghakhlel tawh em mai!" Ti sapin a no a intur chu a tlâk vei pap a.

"I tarmit kha zanin chauh chu i bun lo thei angem?" Tia ka zawh chuan a phelh ve mai bawk.

A hnu darkar chanve chhung vel chu ka buai ta char char a, engvanga Briena hlimna siamsak tum tlat nge maw ka nih le..! Ka inhrethiam tawh bik lo.

"Dazel, duhtawk tawh la, a mawi takzet!" A tih chuan inthunun hman lovin a hmuiah ka fawhsak zauhva.

"Hey, Dazel enge i hriat a?" Sen ap ap chunga a tih chuan, "Khatia tih kha ka châkna a rei tawh lutuk." Ka ti ve mai. Zêp țulna a awm lo ka châk tlat sia.

"Oh..engmah pawh i la in ve lo, lokal rawh ka thlitsak ang che," tiin Sofa hnai berah chuan min țhuttir ta a.

Whisky min thlitsak ve ngei a, ani erawh chuan champagne a in thung a, ri hluai lo mahila nuam ka ti ru veng veng nia!

A thil in chuan a hneh ta deuh aniang a țawng barh barh a, a doctor tarmit lian pawh a vuah leh ta lo. A mitmeng paw râm phi deuh chiai ka hmuh chuan mak takin ka danglam țan der. Min hmuh hlau ru zetin ka bawp ka khawkherh ta ringawt a.

Pindan chhung chu a'n en kual leh te te a, "A mawi vel vek mai," hlim zet hian a ti sarh sarh a. "Dazel, helai hmuna ka awm ve ringawt hi a mak ti raw!? Kan pahnih tan hian zan danglam tak a ni. Ka nu leh pa kiangah lo hian ka hmang ang tih ka lo ngaihtuah ngai miah lova."

"Kei pawh nupui neiin ka hmang ang tih ka ring bik miah lo." Ti ve in whisky ka tlâk pap a. Hun dang chu ni se, hmeichhe țhian nen kan party leh ngei anga. Zanin zawng a dan a dang ta a ni e.

Kan dinner tur a rawn thlen tâkah chuan hlimtakin kan kil dun ta a. Eitur siam thiam lo tih takah thil tuihnai leh hrisel a hre chat chat khawp mai. Sangha hi ka ei ngai lem lova, ka plate-a mi pawh pakhatmah ka la khawih lo.

"Sangha i ei duh nange?" Tia min zawh chuan, "A ruh nei chi hi ka ngaina lem lova," ka ti țha ve mai a.

"Khawi ka lo thén sak ang che," tih pahin ka plate chu a ban nghal a, hnehsawh zetin a thian ta malh malh a. A then fai hmasak apiang min pe zel a, min ngaihsakna chuan ka thinlung a tawk zar mai.

Ka thil ei lai ngaihsak lo lêkin ka lo melh leh veng veng zel. Hmeichhe dang anga inchei parh ve ni se a hmel țhat dan tur hi..tih vel mai mai ka lo ngaihtuah pek a! Contract hmanga innei kan ni tih pawh ka theihnghilh thei mai dawn. Kan eina vel kan sengfel dun leh vek a, chumi hnu chuan dining hall kan chhuahsan ta a.

"Tunah chuan i present tur la turin kan pindan ah ka'n kal lawk ange." Ka tih chuan a nuih seih a, "Kal ka duh rilrukna chiah a nih chu," tiin min zui ve nghal a.

"Brie, ka rei dawn hleinem min lo nghak la.."

"Dazel, ka fiamthu lo a nia thil lâk tur ka nei ve tho alawm."

"Yes," Ka nuih a za hle a, ka kalsan dawn emaw a ti niin ka hria.

Room-ah kan inzui lut ta a.

"Min nuih a law, Dazel Solomos?" A ti nghauh a. Lawm loh hmel zet hian a tûm deuh hmak bawk.

"Teuh lo," Ka nui suk.

"Dazel Solomos, i..."

"Eng nge ni?" lo ti vatin ka mit ko ka san âk a.

"Engmah," a ti leh hmak a. A awmdan naupangchhia zet avang chuan ka nuih a za tulh tulh, khumah chuan a țhu vei tharh a. Ka wardrobe chhunga box pathum ka dah chu ka la chhuak ta a.

Briena chuan phâwk hra hian min en a, "Eng thil tehchiam nge maw ni le?" A ti hau a.

"Hawng la i hre mai ang," tiin present tur chu ka pe ta a. Ka thilpek chu a duh ka beisei hle ringawt.

Bawm chu tîm deuh dai hian a hawng ta a. Perfume a hman fo țhin ang leh chocolates bawm lian tawk, kawrfual leh silk scarf chu a phawrh chhuak ta a.

"A mawi kher mai," a âw chu a thâm deuh țiak a. Lawm tih hriat tak hian a nui ta var var a. "Ka lawm e, ka lawm lutuk tlat," tia rawn dingin ka hmuiah a fawp ta zauh a.

"Hmeichhe duhzawng ka hre tam lo va, ka present ve pawhin ka secretary te kaltlangin ka ti mai țhin, nang erawh chu keimah ngeiin ka leisak che a nih kha," Ka ti ta a. A dik chiah bawk, Natalie tak ngial pawh engmah ka lei sak ngai lo.

"Oh..ka lawm tih bâk sawi tur ka hre lo, mipa thilpek min pe hmasa bertu i ni. Tunah i hun a thleng ve e." Tiin dressing table drawer chu a hawng rak rak a. Box tetaktê a rawn phawrh ta a.

 A chhunga a dah tur awm ang ka hrethiam miah lo. A tê reuh bawk si!

"Kha le..i duh emaw duh lo emaw, min pawmsak ve ngei ka beisei." A hnen ațang hian thilpek ka beisei lo kha a nia. Nimin lamah a lei fel diam a nih hmel, phût lêt neiin ka pe lova. A hma ațang daih tawhin min pêk a tum tihna a nia, ka beisei loh dan bawkin thil a thleng leh ta.

Box chu a kut ațang chuan ka lâksak ta a. "I hawn hmain champagne no khat ve ve in leh phawt ang." A ti leh rih, a zâm deuh a ni chiang mai!

Pindana ka luh khan champagne bucket chu ka hmu miah lova, a bula chips vel inrem țhât ka hmuh phei chuan ka nui lo thei lo. Henu hian min tih hlim tumin a thâ a seng ve hle tih ka hre mai! Min duh deuh emawni! Chu erawh ka ring chiah si lo.

Intur kan dawm zawh chuan, "Hawng tawh rawh le," a ti ta sap a. Box pawna inziak ka hmuh chuan za lutukin ka nui hawk. Engtin nge hetiang thil hi a lo hriattheih le..?

'SOLOMOS GOLD SON' tih rangkachak rawnga inziak chu ka zût a. Ka nu leh pa in company board chairman nihna min pek țum khan hetiang chiah hian an rawn ziak a ni. Briena hian a hriat ka ring miah lo kha a nia! A lo hre ru reng si!

Box ka hawna a chhunga thil awm ka hmuh chuan ka hrilhhai angreng hle a. Ka thilpek nena khaikhin phei chuan min pe țha lutuk mah mah a ni. Ka lawm hle bawk. Engkim a phâk tawka țha ngaihtuah mi a ni tih ka hre thar ta bawk. Japan siam ngat gold sana min pe hi ka thinlung takin ka lawm a, min pek duhna rilru chhut thiam sak lo mahila, rilru țhatak a ni ngei ang tih ka ring. A chhan pawh, nimina a chhuah khan kan inhnial deuh kha a nia, Natalie vangin; chuti chung chuan ka ta tur liau liauvin hetiang thil hi a lei tho a nia! Ka tluk lo hle mai.

"Brie, ka lawm e, min buntir hreh loh chuan," a hmaah ka bán ka dah phei a, sana chu ka pe nghal bawk. Hetiang leina chang a hria hi thuhran ni se, mipa duhzawng a hre hle tihna a ni.

"Min bunsak avangin ka lawm e, ala hma sia, khawpui an cheimawi hi kan fang ve dawn em niang?" Inthlahrung áw deuhva a tih chuan ka pawmpui rang teh a nia. Ngaihtuah chhuahna cháng pawh ka hre tawp náng!

"I car thar kan keng dawn tihna mi?" Ka tih chuan a nui var var a. "Ka khalhah i chuan duh dawn te chuan.." tiin min melh zauh a. "Ka thawmhnaw ka thlâk chhungin pawn lamah min nghak la.." zak hmel a pu ve ngei.

"Ka hmuh vek tawh kha.."

"Chupawh nise...chhuak ve mai la.." tiin room kawngkhar lam pan chuan min nam dat dat a. Ka chhuahsan ve ta tho. A tih theih thlâwt loh, a duh loh zawngah hi chuan min hlau der bawk si lo.

Apartment kan chhuahsan chuan zan darkua a ri tawh a, Briena chuan car khalhin passenger seat-ah ka țhu ve ngial a, hei pawh thil thar leh bawk. Hmeichhe lu zo veh vawh chu a ni chiang alawm, ka hriat tirh a chut ka tih tehreng nen chumi letling hlauh chu a lo ni sia.

Ka thil hriatchhuah thar chu..mi reng reng an nungchang leh mizia hre hmasa hawt lova ngaihdan lo siam zung zung hi a fuh ber lo tih hi a ni. Briena pawh a hmel landan chu engpawh nise, amah ka lo rindan nena inpersan zet nungchang nei a lo ni reng sia!

Hnehsawh takin car chu a khalh a, ka nu leh pa remruat angin zungbun kan inbuntir ta lo kha a nia. Newyork ka pansan dawn a nih phei chuan buntir ngei duhna rilru ka pu ta.

"Brie, inneih zungbun bun hi enge i ngaihdan?" Min chhan dan tur ka hre châk kher mai.

"Maw?" Ka zawhna chu mak a tih hmel hle a.

"Inneih zungbun bun i hreh em?"

"Chi náng, zungbun ka bun te chuan miin pasal ka nei tih an hre vek dawn a, zawhna chhan tur ka ngah awm emai."

"Hre dawn e, i pasal hming i sawi mai aniang chu.." ka la ti țalh a.

"Media lam hriat kan duh loh kha, tin, vantlang hmaah ka pasal i ni tih kan puangzar thei lo bawk." A ti fel át a. Nimin mai kha chuan hetiang thil hian min tibuai lo a sin le...kei hi ka â tak tak a ni ngei ang.

"A țha e, theihnghilh daih rawh, ka zawt satliah mai mai che a nih kha," ka ti ta ringawt a.

Hmun hrang hrang kan fangkual a, Melabu hospital kawt chu an chei nasa lehzual a, Briena chuan thlalâk a rawt deuh tlat a vangin vawi engemawzat thla kan la ta nghe nghe a.

"Mr...In nupa khan in inhmeh lutuk tlat," Tleirawl lo ding ve zinga pakhat chuan a rawn ti ta a. Ka lo nui suk.

"Kan lawm e..baby..." tiin ka wallet a pawisa chu ka pe ta a. Briena zak sen deuh ap ap chu enin ka lamah ka pawt hnai a, a hmuiah ka fawhsak ta a.

Chulaia tleirawl ho chuan kut an beng dar dar a. "Mr.Solomos..kan hria che a nia," an tih chuan Briena chuan rangzeta ka bánah vuanin car lam panin  min tlanpui ta hlawk hlawk a. Lo hnial nachang pawh ka hre lo.

Car chhunga kan țhut luh hnu chuan, "Min hrechhuak ta." A ti sap a. Hlauthawng hmel a pu bawk.

"Eng maw an hriatchhuah?"

"Oh..hre lo der vel teh suh. Nupa kan ni tih maw le.."

"Kei min hre mah se, nang an hre ve chuang lo che a," tiin ka hnem vat a.

"Chu pawh ni se..."

"I hlauthawng lutuk a nih kha, hre mah se enge pawi? Ka nupui i ni miau a lawm." Ka ti ta a. Ni e, Briena hi ka nupui a ni. Engmahin tun dinhmunah a thlâk danglam thei lo.

"Hah...i nupui lem!"

"Lem tel lova ka nupui i ni, Pastor hmaa inneihna thutiam chham aiin, Dan hmaa inneih hi ințhen a harsa zawk tih hre tur khawp a puitling i ni tawh. Theihnghilh miah suh." Ka ti chhum hmak a.

"A lo nih tak chu..Solomos!" Ti ve hmakin chak fe hian car chu a tlantir ta a.  "Khalh muang deuh rawh.."

"Ka thu thu.." a ti leh tlat tawh.

"I pasal thusawi hi zawm ve la..Mrs.Solomos."

"Huh! Ka pasal, " ti sap pah a, a break chu rapin car chîk tuar khawp chuan kan ding dawt a. Seat belt hreng nghet viau lo phei ila chuan kan insawh na phian ang.

"Engemaw i hriat le?" Insum hman lovin ka ti tuarh a.

"Engmah, Solomos ka ni lo Briena ka ni, Briena tawp." Tiin zám map lo hian min melh kar a. "I duh chuan i khalh ve thei tawh ang," ti hmakin car kawngkhar chu a hawng a, a chhuak ta a. Driver seat-ah ka insawn ve hmak.

Car chu hêlin passenger seat-ah chuan a țhu ve ta thung a. Biak huphurh awm khawp hian a tûm deuh bâr a. A eng ber khan nge maw ti thinrim ni!

Car tukverhah chuan dâkin pawnlam a thlir ta daih a. Ka be zawm ta bik lo, a thinrim lai hi chuan ngawihsan mai hi a finthlák zawk. Chuti a nih loh chuan min hlau reuh mang si lova, zanin kan boruak hi tihchhiat belh ka duh hauh lo.

Garage-a car ka hun fel hnu pawh chuan Briena chu a la che chuang lo va. "Brie," ka kohna a hre lo a ni ngei ang a che miah lo. Car ațanga chhuakin a țhutna lam hawn ka tum chuan tui deuhin a lo muhil nia maw le..

Dimtein ka țhut remtir te te a, chutah car kawngkhar chu hawngin ka pawm chhuak ta a. Remote hmanga ka lock vek hnuah apartment lam pan chuan ka pawm chho ta a.

Kan room-ah luh tlangpuiin khumah dimtein ka nghat a. A boot bun ka phelhsak lai chuan a rûm deuh țiah țiah a. A harh dawn emaw tiin ka ngaicháng leh te te phawt, a harh tâk siloh avang chuan a thawmhnaw inbel chu hlih sakin mutkawr ka haktir thlap hnu chuan ka thaw huai mai.

A thawmhnaw ka phelh lai khan ka lo țang țung thei nia! A taksa mâm han ka hmuh laia danglam loh hrâm tum ka nia. Eng ka ang chuang lo chu a ni e. A hnute nalh zet hi mipa tan hnar theih loh khawpa itawm a ni bawk.

Tarmit bun tawh lo tur hian ka hmin ngei tur a ni. A sam rawng pawh thlâktir ta ila, pitar ang maia inthuam lo hian a landan ka hmu châk ngawt mai.

'Briena ka thluak i ti buai țan der tawh a nia' ti chhuak sapin ka thawmhnaw ka hlip ve ta a. A taksa ka hmuh vanga ka mipatna lo tho thunun turin tui vawt a inbual ka mamawh.

Bathroom ațanga ka chhuah chuan khum tlangah țhuin no a lo dawm diam tawh a. A mu nghet lo hle a ni ngei ang! Zû in țhang si lo ah chuan a dawm tam mah mah tawh tlat!

"Ka thawmhnaw min thlâksak a..." ner sak chunga a tih chuan ka dar ka san âk a.

"Min kai tho mai lova.." sehchilh deuh nakin a ti leh a. "Nia, ka ko che a i harh tâk loh vang khan ka duh danin ka che ve mai a ni."

"Ok..zanin chu rui hle teh ang," a ti ham ham a.

"A țul tam lovang, tuna i ken lai kha in zo la, a bâk chu in a rem tawh lo." Nelawm vak lova ka tih chuan nui lui sakin, "Min dan tum chhin chiah la.." meng chiai chungin a ti ta a. Chhan mai dan tur ka hre leh ta lo, a lungawina tur hian han awm phawt teh se..!

Cupboard a white wine chu lain a inthlit leh nghal zat a, champagne mai pawh a duh tâwk lo. A aia strong in a la tum ta deuh deuh a...

"Mahni chauhva in chu a nuam duh awm lo emai, min thlit kêp ve law law la.."

"I insum rei thei ka ti reng a ni." A la ti zuiah..

Min khei ru deuh a țawng dan lah hi a thiam phian a, huat dawn a huat tham nimang si lo hian a țawng leh fak zel!

Kan inrem theihna tur a nih phawt chuan zanin chu rui deuhvin in dun law law ila a ni mai. Engmah pawisak ka nei ta bik lo..

A nuam phian maithei a sin..

Dated: 26 December 2017

©<++++[BeckirafARenthleI]++++>®