SOLOMOS BRIDE Chapter-3

SOLOMOS BRIDE

by.Becky Rafa Renthlei

Chapter-3

Dazel Apartment Plus Sm: Living Room.

Ka inchhungah ka girlfriend-in ka nupui hmuh laiin min fawp a nia! Briena hi engtik laiin nge ka nupui tia ka lo sawi tâk?

Natie chuan min fawp tawn tawn a, nuam tihna pakhatmah ka nei lo. Briena tehreng pawh hi inthiarfihlim ve mai tur a nia. Natie'n a hmui a láksawn hnu chuan, "Dazel, henu hi tinge a awm ve reng a? I apartment enkawltu ka tih dawn chuan Joanna kha niin ka hre sia!" In la no zet hian a țawng țálh țálh.

"Nang nu kha tinge i la țhut ve reng hun thawl kan mamawh tih i hriatthiam ka ring." Briena lam hawi chuan a ti hmak a.

"Sawm loh mikhual ka lawm tehchiam lo." Briena țawngdan mai mai chu(h).

"Khangláng che chuan i la naupan hmel tehreng nen i zam lo reuh hle mai. Darling tunge henu hi? Nichin ațangin ka zawhna i la chhang miah lo." Ka lam rawn hawi pah chuan a ti leh a.

"Ka.." sawidan tur ka hre mai lo.

"I boyfriend nen khan lo sawidun rawh u, tunge ka nih i hre duh takzet a nih chuan.." Natalie nen rum zet hian min melh a, inchung panin a chho ta daih a. A khawsazia ngéng ngalh hi Natalie te ang 'kei ka ni' in ti ve tan chuan ngeiawm tak tur a ni. Mahse, ka nuih a za tlat thung. A pasal angah hian min la ngai thei tlat lo chu a nia! A awm ve tho ve.

Briena kal hnu chuan Natalie chu a la tum bár a. "Dazel, khanu kha tunge? Tinge engmah i sawi duh miah lova, kei min thlauhthlain ani kha kawp i tum a ni lo maw?" A ti leh a.

"Chutiang lam a ni lo. Briena Larson a nih kha. Hun engemawti chhung chu ka inah hian a chéng ve rih dawn a.."

"Eng maw i sawi? Hetah a chéng dawn maw? I tan enge a nih?" Vin zeta a tih chuan sawi mai dan tur ka hre lo.

"Eng lo a nia, Company lama thawk tur a nih kha, Mr.Larson-a fanu a nia, ka inah hian a awm rih anga, kei erawh chu Christmas zawh lamah Newyork ka pan tawh dawn a, karkhat chauh kan chengdun dawn alawm. I tan venthawn tur a awm lo." Ka ti ta ringawt a. Hetia ka tih mai loh chuan nupui ka nei tih hi Media lamin an hriat kan duh lo kha a nia! A hunah chuan ka nu leh pa in an puangzar mai ang.

"Hmun dangah insawntir mai la, chendun kher enge a țulna?" A la ti zel a.

"Hriatthiam tum rawh, a rei dawn lo. Nang tluk tur che hian a nalh tawk lo tih i hmu a ni lawm ni? Khatiang hmeichhia ka duh i ring ém lo'ng chu!"

"Ok..A țha alawm, i rualin Newyork ka pan ve dawn tihna a nimaw?"

"Loh theih nang, i kal tel ve ngei ang." Ka tih chuan a nui ta var var a. Henu hi chu a chhe lo thlâwt, hmeichhe tamtak min duhtute zingah ani chauh hian min hîp a ni. Tisa thil takin kan inrem hle bawk. A thikthu chhe lutuk erawh hi chu khak deuh a ngai, mipa ka nia inzawmna nghet neih hi ka la tum chhin ngai lo. Tunah loh theihlohna vangin nupui tuihnai lo zet ka neih angai a, Briena vang hian Natie ka thlauhthlák a țulna ka hre hran lo.

"Intur kan dawm dawn em niang?" A lo bu nghat ka hmuh chuan vodka la turin ka thawhsan ta a. A duh ber kha a ni tlat a.

"Khanu kha ka ngainat zawng a ni lo. A inthuam dan te kha Middle East lam mi niawm tak a ni." Natie chuan a la ti hmarh hmarh a.

"A thawmhnaw ngainat zawng a ni tihna aniang chu.."

"A hlawh a tam vak lo a ni ngei ang! Retheih hi chuan duh anga țha thawmhnaw leina tur sum a harsa duh a nia!" Briena hnuaichhiah zeta a tih chuan ka ner sawk. Ani aiin a hausa fé tih hrilh ka tum miah lo, ka nupui a nih mai bákah World wool company lar tak neitu fanu a ni tih a hriat loh hi tun dinhmun atan chuan a him rih tlat.

"A ni chungchang kha sawi tawh lo teh ang, ka kham tlat!" Ka tih chuan nui sáng hian min ngheng hnai țalh țalh a. A hmui sen hlar mai chuan min rawn fawp ta a. Hnar ka tum eih lo.

Duhthawh zetin kan infawp tawn tawn a, hmanhmawh zeta kan thawmhnaw inbel chu hlipin, sofa dûp zetah chuan kan tlu dun ta a.

A taksa mám han mai ka zut chuan Briena vun a tluk lo tih ka hre nghal. Ani kha ngaihtuah hun pawh a ni lo, Natie chu chunglamah țangin a tihtur a hai lo kher mai, duhthawh taka a chet hnu chuan ka chungah a bawk zawi ta thlarh a. A zei thláwt! A hma kha chuan hmangaihna chendun tiin kan mutdun hian ka lo ngaihtuah țhin kha a nia. Zanina kan chetdan erawh hi chu tisa chák hrikthlakna satliah a ni berin ka hria. Briena ka mutpui laia nawmna vawrtawp ka thlen ang kha ka thleng lo tih ka pha thei lo ang. Khanu hrep kha! Ka ngaihtuahna a luah rei mah mah.! Chhing sawkin Natie chu ka kuah ta a.

Thawm bengchheng zet hian minti harh hlawl a. Ka ring kham ut ut chu ka hre hmasa ber. Zawimuanga ka men chhuah chuan sofa-ah ruak ngalngatin Natalie nen kan lo la mudun a. Sana ka en vat a, zinglam dar sarih a pel tawh.

Briena kha...!Tun thleng thleng a mu tur kan ni lo.

Ka tho chhuak vat a, Natalie pawh ka kaitho ve nghal bawk a. Choka kawngka ațang chuan Briena chu a rawn pen chhuak ta a. Lalpa leh..min hmu vek tihna nimaw!?

A sam chu sáng takah a țawn a, Jump suit sen țial hain running shoe a bun bawk a. Exer la zo chiah hmel a pu, a biang sen deuh țán ațang chuan a la hahdam lo tih a hriat mai. Min rawn melh zawk a, a ner zui sak bawk.

"Nangnu kha min en reng loin i hna thawk rawh." Natalie chuan a ti fak a.

"En reng in duh loh chuan living room sofa lovah khan mudun ula ti nia!" An inchháng tawk khawp mai. Briena sawi hi a dik chiah, helaia kan lo muhil hi kan thiam loh a ni.

"Nangnu hi i chák dawn lo khawp mai!" tihpahin Natalie chuan thawmhnaw ha mumal lovin Briena lam chu a pan ta a. Lo dan ka tumna kut chu a vai sawn lawp a. "Company staff pakhat ve maiin khatiang khan min țawngkhum ngam amaw?" A ti khur dar dar a. Ani pawh hi kawlh ve fia fia tak a ni. Briena'n engtin nge atih lêt ve hmuh ka châk tlat pek a nih chu.

"Company staff maw! Miss, i hresual deuh a ni lo maw, sawm lohvin mipa inah i kal a, chutah ualau takin inla mudun zui a, Mr.Solomos hian kha i taksa kha nalh a ti viau a nih pawhin kei chuan ka ti ve lem lo. I hnute te kha i lo hnawh puar belh țhin a nimaw! Thlaláka a landan leh tuna a landan a dang tlat!" Tiin a nui lui hak a.

"Oh...nang mi tenawm!" Tia inhup chungin Natalie chu ka lam panin a rawn lét leh a. Sofa-a a thawmhnaw hnawk nuai chu a inbel ta mawlh mawlh a. Nui chhuak lo turin ka insum nasat a ngai viau. Model a ni a, a hnute a te viau tak alawm, thlalâka a landan leh a taka a pianhmang inpersan zet hi Briena hian a lo hmu thiam a nih ngei dawn hi.. Henu tak hi chu aw...!

"Dazel, i hmeinu kha i lo zilh deuh thei angem? Thawmhnaw ha lova midang hmachhawn mai mai rual a ni tawh lo tih i hrilh ngei ka beisei!" Tia inher hmakin inchungah a chho ta a.

"Vawiinah chhuahtir ang che, i chhuahtir lo a nih chuan kan inhmu tawh lovang " Natalie thinrim insawh nghawng nghawng chu thlêm tumna ka nei lo. Ka chhuahtir theilo tia insawifiah pawh ka tum chuang lova.

"I thu thu a ni e, inhmuh tawh loh i duh chuan sawi theih ka nei lo a nia."

"Dazel, khanu kha i țan zawk tihna mi? Min țawngkhum dan i hriat vek kha."

"I va inrawlh hmasa tih ila hre ve rengin ka ring, i inpeih chuan pawn thlengin ka thlah ang che."

"A lo nih tak chu..thlah ka ngai lovang, khanu nen khan inzawmna innei chiang a ni, ka la hre khawp ang." Tiin a bag chu ala tau sawk a, a chhuak nghal hmak bawk. Dim lo zeta kawngka a khar hnu chuan ka thaw huai mai.

Briena țawngkam kha ngaihtuah lehin ka nui hawk a. Tumah hlauh a nei lo reuh emawni! Tupawh mai hi a cho ár reng a, midangin an ti hmasa a nih loh chuan a ngawi thei viau lawi bawk si.

Breakfast room-ah lutin eitur ka siam ta daih a. Tun țum chu ka siam kêp ve ngei a ngai tawh ang. Nizanah a tarmit ka rah chhiatsak bawk nen; thupha chawina angreng deuh te pawh a ngai ve ang chu..min pháwk chiang ngang bawk sia, ka nu leh pa beng a thleng anih vaih chuan a fuh viau lo.

Pen thawm ka hriat chuan ka lehhawi vat a. Inchei peih sa diama Briena lo ding chu ka nuih suk a. Kawrfual a khup khuh lo hlek a ha a, a sam a chhipah a vial tawm vek bawk. A darah a kawr rawng ang chiah bag a bát leh tawp a. A landan simple zet chuan mit a ti hahdam hliah hliah.

"Breakfast ka peih țêp," ka tih chuan a dar a san âk a.

"Ka lawm e, ka ei tawh tlat."

"Engtikah?"

"I hmeinu nen in mutthilh hlan khan ka lo ei diam tawh. Min siam sak ve leh dawn lo tih ka hriat vang te pawh a ni mahna," ngeiawm takin a nui sak a.

"Ka siam sak dawn lo che tih ka sawi lo."

"Oh..Mr.Solomos, nimin lam kha chuan i sawi chian khawp kha maw! Inhnial nan hun ka nei lo, ka chhuak dawn tih rawn hrilh che ka tum mai a nia."

"Chhuah kher eng nge a țulna?" Ka la ti țalh a. A sawi kha a dik chiah, nimin lamah khan breakfast ka siamsak ve dawn loh thu ka sawi tak kha maw le.."

"Ka tarmit i rahchhiat ták kha siamtir ka tum, Lorna min present ka tih tawh kha. He apartment hi i ta a ni maithei, mahse, i hmei te'n an duh duha min țawngkhum dawn a nih chuan ka paidam mai mai dawn lo tih lo hria la, tin, zalen taka ka awm thei dawn lo a nih chuan engvangin nge Melbourn-ah ka haw mai lohvang?" A ti ta hmak hmak a.

"Ngawi hmak rawh. Hmeichhe țawngtam zet ka ngaina lo a nia." Ka hlauh ang chiahin thil a kal dawn tlat! Melbourn-ah a lêt vaih chuan ka nu leh pa an lawm lo khawp ang le.. A luhlul reuh sia ka dan ngei a ngai.

"Hmeichhe țawngtam ka ni hauh lo. I nupui ka ni a, kan contract ah khan kan chenna hmunah hmeichhe dang i mutpuiin i khawi thei tih inziak a awm lova, chuvangin ka ngawih reng a țulna a awm lo." Hmak mai a! Min vau ve khangláng emawni.

"Nizan thil ang kha a thleng nawn tawh lovang, ka tiam a che."

"Chuti tur chu a ni reng a ni. I duh duh kawp thei turin i zalen a, chulam chu sawisel tumna ka nei lo che. Amaherawhchu, he apartment chhungah hi chuan khatiang thil kha i thlentir tawh tur a ni lo. Min palzam emaw min runluih anih chuan ka sawi ang khan ka awm ngei ang. Pasal ka mamawh lo tih i hriat kha." A ti ta a.

"Ok..A thleng tawh lovang, Newyork lamah ka insawn thuai dawn a, Christmas thlen nan nihnih chiah a awm tawh a, chumi chhung chauh chu inrem takin awm tum teh ang." Ka ti ve ta a.

Awle, a țha e, ka kal a nia."

"Min nghak lawk la ka hruai ang che."

"A ngai lo ve, niminah car thar ka lei alawm. I girlfriend ringawt i ngaihtuah a, garage enna chang i hre lo pawh ka dem lo che." Tia nui lui sakin min chhuahsan ta a.

Ngeiawm chikimi nge nge, țawngkam pawh a thiam phian e, mipa zawk kan hawi lawl lawl mai chu a nia!  Common lovi, Kawlhteii, hming chi hrang tamtak ka phuah sak țeuh hman. Kum sawmhnih erh awrh a nia, khawvel a hmachhawn ngam salh salh khawp mai.

Hmeichhe țhenkhat chu nise, sum khawhrala nawmsip bawlin an hun an hmang ang. Ani erawh chuan a nihna ang angin khawvel hi a hmachhawn ngam mai a ni. A nunah mipa tih vel hian hmun an chang lem lo khawp a nih hmel. Tum bulfûk tak a nei ngeiin ka ring a, a chanchin chhuichian hi ka tih hmasak ber tur a ni. A phone number ka la nei ta lo fo! A nu va biain ka zawt mai dawn nge?

Vawikhat chauh kan mudun a, chu lah chu ka ngaihtuah fo lehnghal! Hrep tak hian..ka nunah ani ang hian hmun an chang tur a ni lo. Eng car nge a lo lei thawt thawt le..Pali lai ka nei a, hman ve mai awm tak! 'Seperate girl' Hah!

Briena khan enge a ei kha? Corn flakes leh bawnghnute, cream a mix tak alawm le..ka ei ve dawn khawp mai. Fridge chu hawngin ka mamawh tur ka lachhuak a, hetiang thil hi ka ei chák ve ta chu a nia! Awihawm loh zawk hian a...!

North Sidney Warringah shopping Mall 104; 11:00 Am

Briena pov*
Warringah Mall ground floor-ah ka tarmit siamtir turin ka dah a, christmas a hnai tawh viau náin ka tan chuan engtihna mah ni ve hian ka hre lova. Kum dang chu nise, kan chhungkuain hlimtakin hun kan hmang leh anga, kumin ah ve thung chuan ka pasal lem zet nen nu leh pa hmuh phák lovah ka hmang dawn chu a ni sia. Ka țah a chhuak zawk.

Dazel Solomos hi haw viau thei ka ni lo tih ka hria, amah vangin kan company a him phahna lai a awm ve a. A tan chuan ka țha tawk lo tih ka inpawm thlap. A hmeinu chhe lo zet ka hmuh phei kha chuan ka inhmu tê chem chem mai! A nungchang ngainatawm loh zet leh chapo tak kha nei lo phei se chuan Natalie Stone tluka hmelțha ka hre lo. Wool worth fashion model a ni bawk. Chuti a nih chuan Wool worth leh Larson company kan inzawm tawh avangin kan company hnuaiah a thawk tihna anih chu... Dazel girlfriend kumhlun. News paper-ah an lang chuai chuai țhin a, khawi hmunah mah ka hai lovang.

Contract anga kan mutdun hnu khan ka thawl huai thei nia! Dazel min khawihna kha mak takin ka taksa hian a dawngsawng țha hle a. Inthunun tumin ka bei nasa viau bawk. Tawn hriat ka la neih miau loh avang leh mipa ka fawh hmasak ber leh mutpui awmchhun a ni. Kum sawmhnih ni ve tawh mahila mipa lam hawi hian ka mit ka lèn ngai lo.

Dazel tan erawh chuan a hmasaber ka ni lo tih ka hria a. Diktak chuan a hmelțhain a hausa a, nula tam tak átchilh rawn a ni. Kei ngei pawh hian kum sawmparuk ka nih lai khan ka lo buaipui hrep tawh kha a nia. Company inremsiamna hmanga kan innei dawn tih ka hriat khan ka phur ru hle tih ka pha miah lo. Pasal neih ka duh ta viau tihna nilovin, Dazel kianga ka awm thei tur kha ka lawm viau. Mahse..

A mize nelawm fahran lo te, chapo leh induh zet te hian amah ka lo dream țhin ang nungchang pakhatmah a pu lova, chu ai chuan huatna rilru min puttir ta zawk hlauh! Contract anga kan kal dawn anih chuan nau pai vat kha a fuh ber. Vawikhat chauh mutdun hian a rai theih tho tih ka hre ve tlat. Mutdun leh ka duh tawh bau lo.

Natalie nen saruaka an mudun ka hmuh khan ka ná zawk a. Mahse, dem thei ka ni lo, kan inremnaah midang inneihsan a theih vek kan ti miau va. Ka enliam mai angai ta a nih kha. 'Ka girlfriend ka thlah thut thei bik lo' a ti thlap tawh tlat alawm.

Newyork-a, a awm chhungin theihtawp chhuahin ka lo inbuatsaih ve thung dawn a ni. Company-ah hian board director ni phák tura thiamna nei ka ni tih hi ka hmuhtir ngei ang. Tuna min hriat dan Briena Larson țhing leh mawl, engmah thiam neilo emaw atih hi tunge ka nih chiah ka la hmuhtir ngei ang. Car khalh pawh thiam lo turah min ngai a, ka ni teuh si lova. Wool company kalphung leh fashion design thlengin ka thiam tih a hriat huna a hmel awmdan tur hriat ka chák tawh kher mai. Ka thil ngaihtuah avang chuan ka nui sak a.

"Mahni a nui vur vur rual lek i la ni maw?" Glass house manager niawmtak chuan nui sáng hian min bia a.

"Hah..umn..i siam zo dawn tawh em?" Ka tih chuan ka lam hawiin tarmit a rawn lek vá a. A zo der a nih hmel!

"Siam a har hleinem Miss, thildang mamawh i la nei em?" Polite takin min zawt leh a, kei ai chuan a upa hretin ka ring a nelawm hmel viau.

"Er..eng lo, contact lens transparent in nei em?"

"Tunah chuan nei lo e, kum tawp chawlh hmangin an haw vek a; kan hnathawkte an rawn let hunah kan nei ang. I mamawh réng a ni. Kha i mit rawng mawizet thup bo tura tarmit i bun tlat hi mak ka ti reng a ni." a ti deuh duah a.

"Pair thum ka order thei angem?"

"Lutuk tlat, i hming leh phone number dah la, a lo thlen hunah ka lo hrilh ang che, karkhat hnuah aw.."

"Ok,"  Ka tarmit bun chhan hi ka nu leh pa bákin an hre lo. High school ka kal laiin computer ka átchilh bur a, ka khawih nasat lutuk nalamah ka mitin a zo leh silova, lu ná  ka nei fo țhin. Luhlul chhuahin ka khawih lui ngang ngang a, zai hial ka táwk ta kha a nia. Ka mit veilam hi nikum hmasa khan an zai tawh a, chuvangin tarmit tel lo hi chuan ka awm ngai ta meuh lo. Ka nin deuh chángin lens ka vuah mai a, ka best friend Lorna khan Italy an pém dawnin tuna ka bun lai hi min present a ni. Ka roh hle bawk.

A man te kan inpék fel hnu chuan glass house chu ka chhuahsan ta a.

Warringah Mall-ah nilengin ka bazar a, eitur leh Christmas tree, a cheina tur nen ka lei tel nghal vek. Hetiang tal ka tih loh chuan ka â thei takngial dawn alawm.

Ka nu leh pa, Dazel nu leh pa tiamin an thil tur ka lei tel bawk a. Ka thawn fel nghal vek, min phût ka ring chiah lo náa ka tih sak ve ta thova. Dazel tân Japan siam gold sana ka lei tel a, a man a to far far khawp mai! Mahse, min puih inhuama a nupui ka nih manah a phu ve chuan ka hria. Box tereuhteah khungin ka tuamtir thlap a. Sum a ngah viau tih ka hre thova mahse, a bun duh emaw, duh lo emaw ka pe tho ang.

Tlailam dar nga a rik meuh chuan pangpar zawrhna dawr ațangin ka chhuak ve chiah. Kan room leh living room-ah pangpar khawi ka tum bawk.

Lunch takngial pawh ka ei lova. Coffee leh burger pakhat ka ei bâk engmah ka ei lo. Dinner min siam kep lo leh ngei anga, a nih loh paw'n Natalie nen pawn lamah an chhuak daihin ka ring. French food leh kaikuang hem hmin, champagne bottle hnih ka lei haw a, Zú ka ngaina hauh lo náa hman zana sherry ka in khan a tih theih ve riau kha maw!

Apartment Plus 6:30 Pm

Briena lo haw hun nghakin ka vei chhén a, a chhuahna a rei tawh tehreng nen tun thleng thlenga tihtur eng nge a neih chen chen ni. Dinner ei tura hruaichhuah ka tum tih ka hrilh lâwk bawk si lo.

Kawt a car ri ka hriat chuan ngaihtuah chiang mang lovin ka chhuak ve ngawt a. Lexus RX  var sar rawn tlan lût chu ka hmu ta a. Tun ang hunah inleng neih ka inbeisei miah lo. Tumah leng tura sawm ka nei lova, Briena țhiante ti dawn ila helaiah hmelhriat a neih ka ring si lo. Car nalh fahran ka garage kawt a ding chu ka thlir reng a.

Car ațanga Briena rawn pen chhuak ka hmuh chuan thâwk ka la hawk. A che rang hle mai henu tereuh hi, Australia a car chhuak thar ber a lo lei hman a nia. Chupawh number bel thlapin, Lexus car nei zo tur khawpa hausa kha anni miau va. Nupuia ka neih Briena țhing zet leh chut deuh kha hmuhtur a váng telh telh. Inthlâk hlawk lo mah se hmeichhe dangin an neih ve loh zahawm rûkna riau a nei tlat a ni.

"Hi, Dazel, min lo pui teh," min ko lang lang a. Ka lam hawiin a bán a rawn vai zauh bawk . Step-ah pen thla páwk pâwkin a bul ka thlen chuan Christmas tree vuah chawp ngai chi min kawhhmuh vat a. "Tirh mai tur an awm silova, min puih ka ngai ang."

Car ațang chuan box paruk zet inchhungah ka thiar lut tawh a. Eng em em nge maw a lei ni!

"Dazel, box pakhat chiah a awm tawh, a dang hi chu ka rawn keng mai ang. Car hi ka'n dah lut lawk ange."

Box pakhat chawi chungin ka kalsan ta a. Ka rin loh dan deuh hian a khawsa ve ziah! Nikhatah hetianga tam lei hian a bazar thei a nia. Ka hmeichhe hriat ho te kha chuan bazar pui an nei zel a, chubakah anmahniin engmah an keng ngai lo. Midang an ruai mai țhin. Briena erawh chuan tumah hruai lovin engkim amahin a buaipui vek a nia!

Apartment chhuatah a thil lei chu a awm dul a.

"Insiam la dinner eiin kan chhuak dawn nia." Ka tih chuan a mengphar âk a. "Ka lo haw ve chauh a, chhuah ka peih tawh teuh lo."

"Insiam phawt mai rawh restaurant hnaite kalna tur ka hria alawm."

"Pawi ka ti khawp mai, ka chau lutuk tawh, hetah kan ei thei mai lo'm ni?" Tûm bâr hian a ti a. Ka khawngaih ta deuh. "I siam dawn te chuan.." ka tih veleh a nui leh ta var var a.

"Ok, shower ka nei zuai anga min lo nghak la.."

"Umn, rei suh aw ka ril ațam viau a nia." ka tih chuan bu nghatin kan room pan chhohna step-ah chuan a tlan chho ta a.

A chángin che naupangchhia viau țhin mah se, puitlin riauna pawh a nei tel tho. A lo chhuk hmain intur dawm ila a zia ang chu. Brandy no hnih ngawt ka in tawh, a lo chhuk har phian!

"Intur min dawm san vel a.." A thâwm ka hre miah lo. Mahni a inngaihtuah ka ching țan tlat a zia viau lo.

"I duh ve ka ring lo zawk a.."

"Hmn.."

"Eng nge? Zû lam ka ngaina lo i tih kha," tiin dawhkanah no ka dah a. "Eitur lam ngaihtuah teh ang," Dining room lamah chuan ka kai phei ta a.

"Lawk aw.." tiin parcel lian vak lo dawhkan a mi chu a la leh te te a, dining table ah chuan nghatin a hawng rak rak a. Eitur hlirin a khat vek!

"Nang hi..."

"Yes, dinner min siam kép ka ring lova ka inhmakhua a nih kha," a ti sap a.

"Phakar reuh lutuk!"

"A la dai lovang, kan ei nghal thei ania."

French food leh kaikuang chu a tui kher mai, eitur tuihnai pawh a thlang thiam zêk. Inbe lem lovin kan ei ta mawlh mawlh a.

"Tree saw min cheipui peih angem?" a tih chuan ka nui hawk a.

"Maw!" 

"Christmas tree saw min cheipui ve la.." a ti nawn leh a. Kan ei ruahna vel a thian pah mawlh mawlh a.

"Brie,"

"Dazel," kan țawng rual dun țhawt a.

"I peih loh chuan ka tilui chuang lova.."

"Ka peih lo ka tia mi?"

"Min chhâng har em alawm."

"C'mon, Brie, inhnial lovin i ti vat zawk teh ang." Ka tih chuan ka bânah vuanin living room lam chu min panpui ta a. Ama duhthu ngeia min tawh hmasak berna a ni. Ani lah chu chutiang ngaihtuah hmel pawh a pu lo.

Hetia nelawm taka a awm reng chuan kei hian ka duh mai dawnin ka hria! Nge? Ka lo duh țan der tawh zawk!?

End of chapter-3
Dated: 25th december 2017

©<++++[BeckirafARenthleI]++++>®