SOLOMOS BRIDE Chapter-1

SOLOMOS BRIDE

Ziaktu: Becky Rafa Renthlei

Prologue:

Sidney International Airport-ah ka awm leh ta reng mai! Ka nupui phuahchawp zet kha ka zawng ruai a, a tarmit vuah lianpui phen aṭanga min melh leh zuk zuk tur ka mitthlâah a lang uar uar a. Airport Main gate aṭanga hmeichhe pakhat inkhaithli thlarh mai leh confi hmel zet; dâk váha lo phei ka hmuh chuan ka mit láksawn nachang reng reng ka hre lo.

Ka dinna bul a rawn thleng a, a mitmeng pâwl phât chuan chiang zet hian min en a. "Dazel, ka rawn tlai lo tih ka hre mai!" Àw thâm deuh sapa a tih chuan ka meng buai deuh nak a.

Ka nupui thlaruk kalta a ka neih áw ngei kha a ni. Engtin nge hetianga nalh leh mi híp tur hian alo inthlák danglam ták? Lalpa leh! Ka nupui zei lo leh chincháng hre lo zet kha hetiang hian a inthlák danglam thei ang tih ka ngaihtuah ngai lo! Tuna ka hmaa ding hi chu model tamtak aia nalh a ni a, min hîp zar mai.

Ka nupui Briena Larson Solomos kha a ni ngei si!


Chapter-1

Ka nun hmandan tura ka lo ruahman láwk ve zawng zawng pawh tunah chuan tihchhiatin a awm ta. Briena Larson vanga ka tlangvalna ka hlauh ta leh inneihna hmanga phuar beh ka ni hi ka la pawmzam thei meuh lo chu a ni e.

Ka nu leh pa te ruahmanna zawm lo thei lovin ka awm a ngai a, Larson Wool Industry leh Solomos Wool worth company inzawmtir an duh vangin an fa neihchhun ve ve min inneihtir ringawt hi a fair hlawl lo. Ka nupui tur hmel ka hmuh ni kha ka theihnghilh thei tawh pawhin ka ring lo.

Billionaire fanu mal ni ve siin a nun hmandan class lo zet chu ka ngainep hle tih ka pha lo mai ang. A sam buang ro hmel zet chu a tukkhumah a vial tawm tawp a. Tarmit power tam hmel zet leh chhah tup a bun chuan a biang a awhkhat deuhthaw tih theih a ni. A sang reuh phian a, feet 5'8 vel lai chu a nih ka ring. Mahse, a chér mah mah tih a thawmhnaw inbel lian hlup chuan a tilang chiang hle bawk. Ka khaikhawmnaah chuan nula class lo zet a ni tih hi a ni mai; kum sawmhnih lek a la ni zuiah!

Dinner ei tura kan țhut vek hnu chuan muangchang hian a room ațangin a rawn chhuak a. Ka nu leh pa leh Mr.Larson te nupa chu thawhsana tlanchhuah daih ka chák kher mai! Chu erawh ka pa vang chauhvin ka ti ta ém lo.

"Briena, kan nghak reng che, Dazel nen khan țhu dun mai rawh u." Ka pa chuan a ti nghal zung zung a. Henu bulah hian ka țhu anga maw? Teuh lo mai!

"Ka pa, puitling kan ni tawh a, țhu dun kher lo pawhin in thusawi tur chu kan ngaithla thei reng alawm," Briena rum zeta en pah chuan ka ti hmuk a.

"Mr.Solomos, ka țhutna tur chu ka thu thu a ni mai, lo buai duh suh." A la naupan tehlul nen henu tereuh hi a chapo ve hle a nih dawn hi. A hmel te lah hi a; Ka ngainat zawng pawh a ni hrep lo.

"Kan hriat țheuh angin Solomos leh Larson Wool Company hi kan fate vang hian a inzawm tawh dawn a. Fa mal in nih ve ve avangin in nu leh pa te hian kan sumdawnna zauh zel kan duh avang leh company dangin min beihrawn rengna ti tawp tur hian he kan thil ruahman hi intih hlawhtlin ngei ka beisei." Ka pa chuan a ti dap dap a.

"Mahse, ka pa..."

"Brie, bawihte ka sawi vek tawh kha," Mr.Larson chuan a fanu țawng zel tur chu a lo khap hmiah a. A pa chu rum takin a melh lét ve khai a, chu chuan a hmel landan hmuh a ti hrehawm zual. A hnarngul sang vah leh tê lam deuh chu nalh reuh phian mah se, a hmel hian min híp hlawl lo a ni. Tehtawp mai a!

"A țha alawm, heta țhut ve reng hi ka tan a țulna ka hre lo ve." Ti hmakin chu nu têreuh chuan dinner pawh ei tum lem lovin a lo chhuahna pindan a pan leh ta daih a. Ka nu leh pa vangin ka țhu lui hram hram a, ani ve kha chuan aia upa zahna pawh a nei lem lo a nih dawn kha.

"Dazel, ka fanu kha i hriatthiam hram ka beisei, kum sawmhnih a tling awrh chauh a, pasal a nei dawn tih a hriatna hian a țhâwng ve deuh rih a ni e." Mr.Larson chuan a ti dam thlap a. A nupui leh ka nu erawhin engmah an sawi ve lem lo.

"Briena room-ah khan va lut la, in duhdan te va sawi dun rawh u." Tih pahin ka pa chuan wine a lem khawlh a. Lawm lo hmel a pu hran lo.

"In duhdan khan ruahmanna siam ula, ka duhdan chu i hriat kha nupui neih hi ka la duh lo." Ti hmukin ka tho chhuak daih a, hrilhhai hmel taka min entu ka nu chu melh leh zawkin pawnah ka chhuak ta a.

**

Kei hi Dazel Solomos ka ni a. Solomos wool worth company neitu te fa neihchhun ka ni. Kum sawmthum pahnih ka pum chiah a, feet 6'2 a sang ka ni. Ka pa thlazar hnuaiah awmin min kaihruai țha hle a. Company enkawl tur hian min ringtawk tawh hle bawk a ni.

Ka nuin nupui nei thuai turin min nawr reng a. Min nawr țhin lai khan ka lo ngaihsak lem lo mai pawh a, tunah hmeichhe mawl hmel zet leh changkang lo zet ka neih a ngai dawn ta chu a nia. Hetiang hi a thleng ang tih hria ila chu Natalie kha ka nei mai tur a nia. Ka hmeichhe kawp langsar ber zinga mi a ni a, a nalh hle bawk.

Tun dinhmunah hi chuan ka nu leh pa ka haw hlur a ni mai! Melbourn-ah kan cheng a. Jimmy Larson fanu nupui a ka neih chuan wool worth company chairman ka ni thei dawn tih ka pa in a sawi ní ațang khan ka nun hi a zalen ta hlawl lo. Nupuia ka neih kher a țûlna lah ka hre hek lo a, a fapa neihchhun ka nih ang ngeiin company hi ka rochun mai tur a ni dawn lawm ni. Khanu kha lo piang lo tawp se a țha tur a nia!

Ani kha ka biak ngei a ngai. Inchhungah chuan lutin ka nu leh pa te lam pawh ngaihven lem lo chuan Briena room ka pan nghal a. Kawngkhar ka kik rualin vin fe hian, "Tu nge?" A lo ti hlur a.

"Keimah..." tih pahin kawngkhar chu ka nem hawng ta a.

Khumah țhu thluang diai chung hian laptop a lo khawih mawlh mawlh a. Min melh zawk ringawt; a laptop bawk chu min bihsan leh daih nia. Min be châk vak bik lo a nih hmel! "I nu leh pa thuzawma min neih chu i tum em ni?" Ka  tih chuan a túm hmak a. Min chháng duh eih lo. A luhlul hmel reuh hle mai, ka nei chák bik der si lo a.

"Kan pahnih hian țangrualin engahnge kan nu leh pa te chu kan hnial mai loh ang?" Nelawmna tel hauh lo hian ka ti leh a.

"Enteh, Mr.Solomos, ka nu leh pa hian min hmangaih viau asin, pasal nei tura min ti anih chuan ka nei mai tur a ni. Mahse, nang kher i lo ni hi chu pawi ka ti khawp mai; kei chuan inneihna hi tlanchhiatsan ka tum miah lo." A ti chang fak a. A áw chu rin aiin a thám mawi phian!

"Chuti min neih chu i hnial lo tihna a ni maw!?"

"Hnial hran lo e, pasal nei turin ka la naupang tih chu ka hria mahse, hei hi lo hre ta la i rilru a danglam phah mahna..." tiin a thaw hak a. "Ka pa hian Lung lam natna a vei a, a fa neihchhun ka ni a, company leh engkim kan in leh lo ram te, share holder ten min neihsak mai a hlauthawng a, chuvanga i pa nen inremsiamna nei an ni tih ka hria a sin."

Ka thu hriat chu mak ka ti hle a, Jimmy Larson hian chhan leh vang awm lovin a fanu naupangte hi pasal a neihtir hauh lovang tih lo hre tur ka nia sin le.

"I pa leh ka pa an ințhian țha hle tih i hre ve thoin ka ring a..." a ti leh sap a. Min la en chuang lo.

"Ka hria alawm, ka nu leh pa hi hnial ka duh bik lo va, mahse, nupui nei tur hian ka la inpeih lo a ni. Chubákah nang kher lehnghal!" Ka tih chuan a ner sak a.

"Oh..ka hria e, Mr.Solomos, i girlfriend nalh tak tak te ang kha ka ni hauh lo tih ka pawm thlap. I duh lo chung nawrluih che hi ka tum a ni lo a, pasal neih hi ka chák ring bik suh. Kan company hmelhriat loh kuta dah ai chuan tiin an thu ka zawm mai a ni."

"Kan innei a nih chuan chéndun ka duh dawn hauh lo tih lo hre ta la..." ka tih chuan ngaipawimawh lo fe hian a laptop chu a khup thak a, a tarmit chhah zet phen ațang chuan min melh kiau reuh va, ran doctor te pawh a ang dawn dawn alawm. "Chulamah chuan buaina a awm lovang!" A ti vei hmak a.

"I chiang maw? Nang ang class lo lutuk hi ka nupui ni turin ka duh lo che." Ka ti khawl a. Thu pehhél hi ka thiam zawng a ni lem lo bawk. "Pasal atan ka ît bik lo che, i chapo mah mah lo maw?" A ti ve sak a.

"I nu leh pa, ka chhungte vang chauhvin he inneihna hi ka pawm ang. Inneihna ropui beisei lo la..a hming chauhva ka nupui nih i duh chuan hnialna ka nei ta bik lo e..hmeichhe pamham, ka sum chauh duhtute hnar nan i țangkai phianin ka ring."

"Chuti a nih chuan kan inrem ni rawh se, i duh ang chuan ka awm ang; mipa dang ka kawp pawh i phal tihna a ni maw?" Ngeiawm tak hian a nui sak a. A ha var rual țhap chu a nalh vei phian a.

"Ka girlfriend ka thlah thut thei bik lova, chuti anih chuan mipa dang i kawp pawh phalsak a ni e. Mahse arûk thei ang berin ni rawh se. Media lam hriattheih turin i in pholang tur a ni lo" Ka tih khum sak a. Henu hian khawia mipa mah kha a chhái thlu nguar ang! Amah duh tur khawpa mipa mawl an tam vakin ka ring lo. A sum leh pai chauh duhtu anni te a nih ngawt loh chuan..mihausa fanu kha a nimiau va.

"Nangpawh media lam hriatah ualau takin i girldfriend i pholang tur a ni bik lo." A ti ve leh kher a. Ngeiawm chikimi a ni ringawt! Kei min el tur hi chuan a hniam mah mah. A thusawi zawm tumna ka nei miah lo.

"A țha e, Sidney ah i awm anga, kei Newyork-ah, chu erawh chu kan pahnih thurûk ni rawh se. Kan nu leh pa te'n kan chéngdun lo tih an hriat kher hi a țul miah lo a nia." Ka ti ta a.

"Sidney-ah company main building a awm a, nang Newyork lam daihah i awm chuan company engtin nge i enkawl theih ang." A ti khauh a.

"Ka awm lo tih hre tur chu nang leh kan michhawrte chauh an ni ang, Newyork-a kan company ka țhutchilh dawn alawm, Sidney-ah chuan ka thachhang dawltu a awm thung ang. Buaina tur engmah a awm lo."

"Ok..ka lawm e, ka tibuai hauh lovang che. Wool worth company ah staff pakhat angin ka thawk ve mai dawn nia." Nui sak chung hian a ti leh a. Engkim hi cho hliah hliah hmel a pu a, ala naupan tehreng nen mak chu ka ti deuh!

Inneihna mawlmang thei ang ber buatsaih turin kan nu leh pa te kan nawr ve tawh mai niang chu..

Inlungrual ber niawm fahran hian Briena room chu kan chhuahsan ta a. Sitting room-ah coffee no dawmin an lo țhu a. Min hmuh veleh ka pa chuan, "Ka fapa eng ruahmanna nge in siam ták?" A ti vat a. Jimmy Larson natna hi ka pa hian min hrilh hauh lo. Țul a ti lo a ni ngei ang!

"Inneih chu kan remti ta e, mahse, holam thei ang berin kan duh a. Register office ah ni mai se tih hi kan duhdan a ni. Media lam hriattir kher pawh țul kan ti lo a. A ni lawm ni Brie?" Tiin Briena chu ka siai zauh va. A lo man rang khawp mai, nui sak chung hian a bu ve ta nghat nghat a.

Henu chimawm zet hi hriatthiam a har reuh ngawt mai.

"A țha e, in duhdan kan zahsak ve thung ang che u. In tan a harsat dan tur pawh kan hrethiam a nia, a rang thei ang berin innei ula..Sidney-ah in kal vat a ngai a nia!" Ka pa chuan a ti zung zung a. Briena lo thaw hawk ri chu ka hre pha reng. A hming chauhin ka nupui a ni dawn a, ka la zalen thei tho alawm..kumkhuain kan chéngdun lo turah ngai ang.

"Dazel, ka fanu hi țha taka i enkawl ka beisei tlat dawn a nia." Mrs.Larson chuan a ti ve sap a. Enkawl maw? Huh...a fanu nen a kan inremsiamna hi hria se chuan an lawm lo khawp ang le.

"Awle, tehreng mai, ka kutah engkim dah rawh, company kalphung pawh ka theihtawkin ka lo zirtir dawn nia." Ka ti ve ngial a. Briena lo nui hak chu ka melh vat a. A hawisawn rang kher mai!

"Naktukah in mamawh tur lamkhawmin bazar ula, mokawr fual tih vel in mamawh loh hmel bawk nen, naktipah court-ah innei nghal mai rawh u." Ka pa bawk chuan a ti leh a. An hmanhmawh dan em em hi a lutuk hrat! Jimmy Larson erawh engmah sawi lovin a ngawi ngul a. A hmel tak ránah chuan engnge a ngaihtuahnaah awm tih pawh ka ring thiam lo!

"Mahse..." Briena chuan hamhaih hmel takin a ti sap a. A sawizawm leh lem hlei lova.

"Brie, bazar dun te chu ka chák lutuk alawm," Ka tih chuan a mengphar ák a. Min rinhlelh theihna tur hian awm ka tum lo a ni tawp mai. Rei vaklo lemchan angai tih ka hria chupawh Sidney kan thlen hma zawng chauh..

"Ok..Dazel..min lo lam mai dawn nia," a ti fel át a. Thil a man chak mah mah! A fing phian a nih dawn hi...A hmel leh taksa-in min hîp lo mah se, a thluak a hmantlák tal a; țha ve reng reng e.

Chumi hnu chuan kan chénna hmun panin Larson Villa chu kan chhuahsan ta a. Nupui hual nei ka ni ta, mokawr hák a ngén tlat lo kha ka lawm a ni. A sáng ropui si a, a cher bawk nen eng thawmhnaw mah a inhmeh paw'n ka ring hrep lo.

Briena Larson Pov*

Ka pa dinhmun hian zir ík se chuan pasal neih hi ka duh miah lo. Lung țhalo a nei tih ka hriat khan ka buai chiai țhak lo a. Ka nu zawk hi manganthlak khawpin a tálbuai kha a nia! Kei leh zel hi chuan thluak fîm hman ka ngai a ni.

Kan sumdawnna enkawl hautakzia ka hre ve kar a. Larson Wool Company board director zinga mi ten share an nei thliah thluah a. Ka pa natna hi an hrechhuak a nih vaih chuan buaina liantham kan táwk ngei dawn tih pawh ka hria. Company kalphung leh sales chungchang pawh ka pháktawkin ka zir ve a. Fanu mal ka nih mai bákah ka la naupan ém avangin engmah thiam lo turah min ngai a. Ka ni teuh si lo.

Ka pa Jimmy leh ka nu Gene Larson te duhdan angin ka inthup fai vek a. Mi lo hmuh atan chuan nula chut leh ningkhawng hre lo ang mai ka ni. Ka incheidan thlengin rual ka pawl meuh lo chu a nia. Sumdawnna chungchanga ka hriattur pawimawh leh sum chetvel dan pawh ka kum phu lovin ka hre hnem. Ka nu erawh hi chuan a tuipui hlawl lo, chuvangin vantlang leh company staff te ngaihdanah chuan engmah thiam nei lo angin ka lang mai a ni.

Pawnlamah ka chhuak tlem em em a. Boyfriend takngial pawh ka nei lo, keimah hian ka zir lo ve hrim hrim bawk a. Oliver Solomos (Wool worth company neitu) leh ka pa in business inthlunzawmna hmanrua atana an fate inneihtir tura ruahmanna an siam tih ka hriat khan ka mangang hle a. Company enkawl turin ka la naupang si, ka pa pawh a rilru a hah hle a nih kha. A fanu pasal atana a thlan chu a țhianpa Oliver Solomos fapa Dazel Solomos a ni.

Dazel Solomos chanchin chhuiin nithum chhung laptop ka khawih char char a. Ka thil hriatchhuah chuan min ti lawm fahran lo. Dressing table drawer-a Dazel profile ka print out chu la chhuakin ka bih leh ta vang vang a.

'Solomos Gold son'(Dazel); kum sawmthum pahnih, feet 6'2, Original hair colour black, eye colour dark brown. A in ziak thla dul a, nula lamah pawh a tla na hle tih media lam report inziahna chu ka chhiar thla leh a. A hmel hi chu a țha chiang alawm. A pian nalh zet leh inkhaithli zuih chuan ka tháwk a ti danglam nghal thei nia! Mipa ka hmuh tawh zawng zawngah a țha lawr lak. Mahse, a chapo mah mah.

Dinner kan kil ho dawn tih ka hriat khan ka zám hle a. Thlalak aiin atakah a țha lehzual tih ka hre bawk, kei ang hi engtin nge nupuiah min neih duh tehlul ang. Kan khawvel hman a hrang daih a ni. A tan chuan kum sawm pahnih zetin ka naupang a, chutah a lo kawp țhin te nen in anna pakhatmah kan nei hek lo.

Dazel Solomos hi neih ka duh réng em? A hmelțhatna leh a pianphungin min híp nghal tih hi ka pha thei bik lo. Mahse, a hmela min nuihsawhna lang te, mi hnuaihnung ber nimai awma min enna te khan min ti ná tlat. Ka pa natna vanga innei tur nimahila 'Chona' a ni. A nuam dangdai dawn viau e...

'Min lo en reng rawh, ka inthlák danglam thei ve chiang khawp mai' ti chhuak sapin ka paper ken chu ka pawtsawm vek a, dustbin-ah ka paih ta daih a.

A girlfriend te lehpel țhak khawpin ania ka chét dawn ni. Ka nui sak a.

A tuk zinga ka harh chuan a tlai tawh hle a, kan bazar dawn tak kha maw le.

Engmah lei tur mamawh ka nei hauh lova, Dazel lo thlen hma ngei a inpeih ka ngai. Ka inthlák ta sawk sawk a.

Darthlalang hma a ka lo din reng lai chuan ka room kawngkhar chu an rawn kik dat dat a. Hlauthawng ru zet hian ka tarmit chu bunin kawngkhar lam pan chuan ka kal hlawk hlawk a.

Ka nu leh pa anni lo phawt tih ka hre thei tlat a ni. A chhan pawh ka tho tlai deuh a nih paw'n min tibuai ngai lo, kawngkhar kik tura rin pakhat chiah ka nei.

Dazel chu kawngkhar biang ngheng chuan a lo ding a, ka hmel a hmuh ruala a ner deuh sawk chu ka hmu hman hram. Min hmusit hmel leh ngainep hmel ka hmuh chuan ka nuih a za ta tlat a. Chhia hi min ti ve thláwt hian ka hria! Ka nui chhuak hak nghe nghe!

"Thil nuihzat thlak ka sawi em ni?" A ti hmuk a.

"Sawi lo, ka...." Dazel hnung lama thil awm ka hmuh chuan ka țawng tawp chawt a. "Helmet nen maw!" ka ti hliai a.

"Ni e," tiin hnunglama a kut dah chu a rawn pharh chhuak a, "Khawi zawk nge i khum duh le..?"

Helmet pahnih a rawn lekchhuah chu ka lo en hau mai a, "Ka...ka chuang ngai awzawng lo."

"I tum chhin tawh reng reng em?"

"Tum chhin náng."

"Chuti anih chuan i vawikhat chuanna tur a ni mai alawm!"

"Car-in kan kal thei mai lovem ni?" ka la ti ve țáng țáng a. "Miss Larson tihmawh viau lo teh." Dawhtheihna tlachham tih hriat tak hian min melh run a.

"Engmah pawh ka la ei hleinem," ka ti ve zel a. "Huh! Chhuanlam siam reng suh, i ei chhungin pawn lamah ka lo awm ang." Tiin a inher vut a, a kal nghal daih nia!

"Bawihte, Dazel thu ang khan awm phawt rawh, bike khalh thiam tak a nia lawm," ka nu chuan a ti dam thlap a. Bawnghnute lum leh toast min rawn chhawp sak a. Breakfast ah chuan thildang vak ka ei ngai lo.

"Nu..ka chuang ngai lo tih i hriat kha.."

"Ka hria e, ka hria e, hlauthawng mahta che." Ka hlau tho tho min tlûkpui ta se, hah... ka zak viau ang.

Pawna ka chhuah veleh Dazel bike hûnna chu ka pan nghal a, min lo en reng lehnghal. "Hmanhmawh ve deuh la maw le.." A ti nghut a. Min khak fek fek reng mai a, ka zaidamna hian a tlin lo lek lek zel.

Ka chháng buai peih vel lo. Bike-ah chuan a chuang a, hreh zetin a hnungah ka lawn ve ta hrám; helmet ka khum vei thlap bawk nen ka inhmeh lo hú hian ka hria!

Chak zetin min tlanchhuahpui ta a. Ka hlau lutuk! Min runluih ni hialin ka hre mah zawk. Loh theih lohvin a kawngah ka kuah ta ringawt a, 'tlan muang deuh rawh' ka tih tuar chuan hre lo ang hmakin zu awmthei a maw le..ngeiawm lutuk!

Dawr chi hrang hrang intlar țhup naah chuan min dinpui ta a. Inchhung bungraw zawrhna dawr te, thei tharlám zawrhna te, engkim an zawrh pawlhna hmun chu darthlalang bang phen ațang chuan ka bih dák dák a. Dazel chuan máwl min tih hmel tak hian, "Khatia bih dék dék lo khan lut ta mai che, țhing lutuk." A ti hmuk a

"Keimahin ka lut duh awzawng lo."

"A chép ropui si, ka lut peih hleinem."

"A nih chuan keimah a luh ka tum silova, kan haw thei tihna a nih chu.." ka ti ve hmak.

"Chimawm nu..lokal rawh," tiin ka banrekah chuan a rawn vuan a, dawr chhungah min hruai lut ta a. A hmel dur deuh khup chu ka en duh lo ve tlat. A thinrim pawhin a hmelțha tho.

Dawr nghaktu chuan nupa kan ni ngeia ngaiin min rawn pan a, "Puih theihna che u ka nei em?" a rawn ti thuai a.

"Ka țhiannu mamawh tur hi lo enpui ta che," ti supin dawr chu a chhuahsan ta daih a. Zui chhuak ve mai lo turin ka insum nasa viau. Mahse, inthunun hram hramin inneihna a hák tur kawr awmna lam chu ka pan ta zawk a.

Mokawr fual ka ha dawn lo bawk a, maksak zetin ka inchei hial dawn emawni! Cream rawng suit țhui nalh fahran ka ha chhin ta a, ka táwk chiah lehnghal! A dang pawh enzui tawh lovin chu kawr chu ka la nghal tawp a. a rem tur pheikhawk ka nei sa bawk nen, ka bag ah chuan ka thun ta hmak a. A man ka pék fel vek hnuah pawh Dazel chu a lo la lang ta lo fo.

Pawna ei leh intur zawrhna dawr kawtah chuan ka lo nghak ta ngawt a. A rawn lét meuh chuan minute sawm dâwn ka lo ding hman tawh. Ka thinrim țûn bawk nen en pawh ka en peih lo.

"Min lo nghak rei em? I duh i lei kim maw?" Ka hmalam chauh chu ka en ngar a, ka chháng awm lo emai.

"Titau lo mai teh Miss Larson, ka chhuahpui duh ringawt che pawh hi lawm hle la a ni mai." Ngeiawm zet hian a ti a.

"Ka lawm e," ti-el tak hian ka ti ve hmak a. A lo nui hawk thung. Mahse, nuihza tak tak a nui nilovin min nuihsawhna zawk a ni.

"Mihausa fanu ka hriat ah chuan i la chut ber, thawmhnaw nalh lei tur i hriat pawh ka ring hrep lo ve."

"Kan haw dawn em niang?" Tiin thildang ka sawi ta daih a. Ka lo chhuahpui ta kher kher hi ka inchhir tawh takzet. Ka thawmhnaw neihsa kha naktukah chuan inbel mai ila a țha reng sia, hepa nungchang hi ka ngaithei dawn tlat lo.

"Hi, Dazel dear..." Hmeichhe áw tliang nalh fahranin a rawn tih chuan ka hawi sawn vat.

"Natalie, hmuh che ka in beisei miah lo!" Dazel áw dam thlap ka hriat chuan mak ka ti ru viau! Kei min biakin hetiang hian a ti ve ngai hauh lo.

Chunu hmel en tuma ka inher tur chiah chu Dazel chuan min pawt sawk a, rang zeta inherin min kuai her tel nawk bawk. "Darling...henu hi tunge?" Chunu chuan a la ti hrám a.

"Natie, zanah kan inhmu dawn nia, tunah chuan kan kal phawt angai..ka zawhte khawi thar tur hian haw a ngen a..." Dazel țawngkam kher chuan ka thin a khei zak mai! Ka tál ve phat a.

"Lokal thuai mai rawh," Sehchilh nawk nawk a tih pahin min kai dawr dawr mai a, kan tlán hi a ni hrim mai.

"Engthil nge maw i hriat le..?" Ka ti țhawt a.

"Helai hmun ațang hian kal bo thuai zawk teh ang." Tiin bike húnna bulah chuan min dinpui ta țáwk a. Helmet chu min khumtir sawk sawkin, bike ah chuan a lawn zui vat a; hawi lêt ka tum lai takin, "Hmanhmawh rawh," a ti vin țhak a. Ka hawi lét ngam ta lo, chak fe a min tlanpui pawh chuan hlau angin ka lang duh tawh bik țhak náng...

Kan tlan chak bawk si a, tháwk pawh ka thaw țha ngam lo. A tawpah phei chuan a hnungah beiin ka maimitchhing ta tawp a.

"Briena Larson, ka hnungah khan mutthilh tum țhak suh," tia min nghawk sawk chuan ka phu zawk a.

"Mr.Solomos, vawikhatmah i rual hian ka chhuak tawh lovang tih hre rawh."

"Oh..Ka duhthusam chiah a nih chu," ngeiawm tak hian a ner suk a. Ka tarmit bun chu rawn phelhin a vuah chhin a, chutah ring zet hian a nui ta vak a.

"Eng nge?" Vin zeta ka tih chuan a aia ringin a nui lui leh kher a.

"I tarmit power chu leh..ka hmu phîr vek che. Hetiang a chhah teptup bun lo hian zangkhai deuh emaw, lens tal vuah mai la..Lalpa, ka nuipui tur i ni tih hi ka awih thei hlawl lo a ni e, ka rilru ka thlák hma hian innei vat ila a țha ang. I hmel hmuh reng hi ka peih lo e." A ti ta hrep a.

Kan inneih chuan hmun hrangah kan chéng dawn tak a lawm le, mahse, a țawngkam hman kher chuan ka thin tertek a kaitho nghal zak mai. Ka tarmit a ken chu rang zeta chhuhsakin, a inrin hman hma chuan a bánah ka seh sak ta vak a. A rum nghut ri ka hriat rual chuan hmanhmawh fe in kan in lam pan chuan ka tlan ta chiam a.

Min umzui lo a ni ngei ang! Ka pindan ka thlen ruala bike tlanchhuak ri ka hriat chu amah a ni tih ka ring thiam mai!

Engvanga seh ngawt nge maw ka nih le..? Â...min țawngkhum dan kha a ngeiawm ve ém a ni. Hmn..a thiamloh a nia lawm le, min hmusit turin kei aia a sán bik vakna ka hre lo e a. Hmelțhain nalh hle mah se, a nungchang khan min hîp chai lo...

Kan inneih hunah chuan Briena Larson diktak ka hmuhtir ang maw le..

Melbourn 14 Dec. Solomos Penthouse:

Ka room-ah chuan ka vei tawn chhen a, Briena Larson min sehna hnu val kulh ka hmuh apiang hian ka thinrimna a tho leh țhin. Khanu máwl leh țhing zet kha ka nupuiah ka nei thei lovang! Natalie khan a hmel a hmu hman em? Ka hre lo.

Ka pa rei fe ka sawipui hnuah pawh a rilru ka sawhsawn thei ngang lo chu a nia. A fapa hlimna aiin a țhianpa a ngaipawimawh zawk hi ka pai dam thei lo chu a ni e.

Dar 11:15 Am a ni tawh a, Briena chimawmi te chhungkua an la rawn thleng lo fo. Court chhungah inneih kan tum zet na a, ka nu leh pa in an duh leh ta lo. Kan penthouse-ah kan innei dawn ta a ni.

Ka suit hák thim lam chuan ka hmel nelawmna tel miah lo chu a tilang chiang lehzual a. Ka hlim lo mai nilovin ka táwt up up a ni ber mai. Study room zau zetah chuan ka nu leh pa, kan company lawyer leh Larson company lawyer te nen kan țhu țhap tawh a.

Contract sign-na tur paper ka hmuh rualin chu pindan chhuahsan tum chuan ka ding uaih a. Kawngka a rawn pen lût ka hmuh chuan thinrim zet hian ka țhu thla leh hnawk.

Jimmy Larson te nupa leh Briena rawn lut chu mit khap eih lo hian ka lo melh ngur a. Cream rawng suit a hák chuan a tilang chêr lehzual a, a taksa dawldáng leh pan thlarh chuan min híp mawlh lo. A sam buang khawro zet kha a chhipah a vial tawm vek a, tlem chuan hmuh a nuam ta deuh. A tarmit pawh a la bun vá thova, make up tlem a zawng a hmang ve a ni ngei ang! Heti khawpa sum ngah si fashion lama a buai tlat lo hi thil mak tak a ni.

A khup hnuailam khuhtu awm lo chu a nalh reuh phian a. Amah hi asáng viau bawk nen inchei deuhin emaw, intuai hnûm deuh se chuan a nalh riauvin ka ring. Ka thil ngaihtuah mai mai chu..(h) a hun lo lutuk!

Hunserh angreng kan hman zawh chuan kan lawyer-in contract paper chu a chhiar chhuak ta a.

"He dan hi inzawm ngei tur a ni. Ka chhiar chhuak vek anga, chumi hnuah in sign dawn nia...

1. Khum khatah mudunin nupa nun in hmang ngei tur a ni.

2. Solomos & Larson company rochun tu tur fapa in neih hma chuan in ințhen tur a ni lo. Ințhen rawt hmasatu zawk chuan company ah chanvo(share) a nei lovang.

3. Kum hnih chhunga fa in nei thei ta lo anih chuan contract hi tihdanglam theih a ni ang. Hei hi a pawimawh zual a ni a, a bák chu nangmahni'n in chhiar zawm tawh dawn nia." Tiin paper pakhat ve ve Briena nen chuan min pe a. Kei chuan ka chhiar chhuak vek tawh, Briena hmel dánglap ațang chuan kei ang thovin a huphurh ve a ni tih ka hre mai!

Kan nu leh pa te hian an ti mah mah a ni. Henu mutpui hi ka chák hlawl lo. Kan boruak țang ru at chu hre lo ang hmiahin lawyer chu a țawng mawlh mawlh a. Hming kan sign zawh chuan Jimmy Larson chu a thawchhuak hawk a. A lo țang ru ve hle a nih ka ring.

Briena tan chuan a pa vang a he inneihna hi remti a ni a. Kei ve thung chuan company tán leh ka nu leh pa tan ka ti ve thung a ni. Min hringtu kan nu leh pa te rilru tihnat kan hreh ve ve na hi henu nena kan inanna awmchhun a ni a. A bák zawngah engmah in anna kan nei lo, ka khawvel zautak leh ani khawvel siamchawp zimte hi engtin nge a inan tehreng ang ni!

Buaipui tur țul ang ang kan tihfel hnu chuan nupa kan ni ta. Media lam hriattir kan tum lova, thurûk a ni rih tlat! Company elpui tamtak kan nei a; chung ho hriat kher chu țûl kan ti lo kha a nia.

"Dazel, i nupui nen hian sidney lam in pan mai angai tawh ang. Honeymoon inhmang pah nghal thei tihna a nih chu.. Christmas a hnai tawh a, rawn haw lo law law ula tih hi kan ruahman dan a nia, in mizia leh nungchang inzir tawnna hun țhatak a nih ngei ka beisei." Ka pa chuan a ti ta a.

"Tunah kal nghal turin min duh tihna mi?" Ka tih chuan Mrs.Larson chu a lo bu nghat a. A fanu hi a lainat takzet tih a mittui tling pam ațang chuan ka hrethei mai! Chu chuan tlemin ka rilru a hneh ve ta deuh a. Tun dinhmunah pasal nei turin a fanu hi a phal hauh lo tih hrethiam turin ka fing ve táwk.

Briena chu a ngawi reng a. Hnuailam bihin a heh a pet fan fan tih ka hmuh chuan ka lainat ve deuh. Ka â thei takngial dawn, ka pa tehhrep pawh hi a. Honeymoon maw? Teuhlo mai!

Zinkawng thuitak zawh dun ka peih miah lo, chuvangin ka private jet-in Sidney chu kan pan dawn ta a ni. Briena paw'n min hnial lem lo, a ngawi ngal a biak pawh ka tum bik lem hlei lova.

Thawmhnaw leh bungrua engmah kan keng lo a, ka apartment-ah kan chéngdun dawn tih ka hriatna hian min ti țim ur ur thei nia. Ka mutpui ngei chu a ngai sia, ințhen vat kan duh chuan fá neih thuai thuai angai! Eng dan nge maw an siam le...?

North Sidney Australia; Solomos Apartment Plus Sm. At 3:00pm

"Briena, housekeeper chawlh hmanga a haw lai a nia, dinner i lo buatsaih thiam angem?" Ka tih chuan maktih hmel tak hian min en hau a.

"No, ka thiam lo. I duh chuan pawn lamah i eichhuak thei ang, min ngaihtuah duh suh." Mar pát hian a ti a. Ve lutuk hian a! A bulah hian ka awm peih bik awzáwng lo.

"Umn..chuti a nih chuan ka chhuahsan ang che. I lo inbuaipui ve mai dawn nia," tiin bedroom-ah ka luhsan ta daih a.

Shower ka nei zuai a, țhat chhuah pawh ka tum der vel peih lo, ho emai! Kan chhungte'n min hmu pha lo bawk 'Bar' ah kal daih ila nimai lawm.

Insiam peih vek a living room ka thlen thlak chuan Briena ka hmu mai lova, khawiah nge maw a lo kal hman ni!

"Briena," Vawihnih lai ka koh hnuah pawh a thawm hriattur a awm țhak lo. Huh! Ka ngaihven hluah a țulna pawh ka hre hrep lo ve.

Garage ațanga car ka khalhchhuah lai chuan pangpar bulah min hnungchhawn zawnga Briena lo ding chu ka hmu ta a. Car thawm a hriat ve ngei chu ka ring a, a lo hawi duh țhak lo! Mi mak tak chu a ni. Sum hmansen loh a nei a, hlim hmel a pu chuang der bawk si lo. Jimmy Larson fanu ve meuh si a khawsak dan mawlmang zet hian min ti hrilhhai letling zawk!

Chak fe hian ka tlan chhuahsan ta daih a. Contract-a inziak ang khan zanin hian ka mutpui chu angai ngei dawn sia, kei ang hian a huphurh ve tho chu ka ring. Mipa ka nih ang ngeiin ka hming ka sign hnan tawh a nih chuan tlanchhiat erawh ka tum lo. A nuam emaw nuam lo emaw ka tih ngei chu angai ang.

Hmeichhe tuihnang pai leh mipa lawmzawng a che phur thiam tak chu a ni lo tawp ang.

End of Chapter-1

Words: 5923
Page   : 17 (A4)

Dated: 23rd December 2017


©<++++[BeckirafARenthleI]+++®