THEIHNGHILH KA DUH

THEIHNGHILH KA DUH
  Ziaktu: Becky Rafa Renthlei[-B®®]



Kan eichawp dawr nghaktu ber ka ni a, nula tih takah hmelțha puak lo mahila ka nghah ve hi chuan in lêng ka nei ve thei riau țhin. He mi zan pawh hian dawr khat tlatin an țhu leh tawh.

Kuhva ro leh hring kan hralh tam êm avangin inlengte pawhin kuhva rah thelin, a ro rah an chep sap sap hlawm a, Top up thun alo ngai ve sek nen indaih loh ana kher mai.

Tlangval deuh vek anni bawk a, fiamthu an thawha an nui deuh ham ham reng a, kei pawh buai chung chungin an fiamthu thawhah chuan ka lo nui ve tak uar uar kha a nia.

Zan dar riat velah kan inchhak lawka u Parteii pasal (Rina) chu rui deuh hian dawrah a lo lut ve leh nawlh bawk a. Ani hian min fiam peih ang renga fiamthu pawh a duh viau, a nupui hi amah aia upa daih a ni a, kan inah hian arawn chuangkai tam ve khawp mai, kan nel em em a, zû in țhin mah se mi pawi erawh a sawi lo khawp a nia.

A lo lut pawh ka in lengte thusawi hre ve chuang lo in a rawn nui ve vak vak ringawt a! Kuhva ro ₹10 man leh Capstan bawm khat leiin rei pawh awm lo hian a chhuak zui nghal daih a. Zan dangah a țhut rei theih tehreng nen mak ka ti deuh viau!

Kan in leng zinga naupang ber Bawihpuia chuan an class kal chungchang vel sawiin an miss chhe lo deuh chanchin chu a țhiante phur fe hian a hrilh zuah zuah a. Țawngkamte lah chu a thiam hrep leh nghal! An țhian ho chuan an nui deuh ham ham reng a, chutih lai chuan ka nau mipa hi hmanhmawh zetin arawn tlan lut a 'u Rina a thi' arawn ti chiah chu kan hawi phawk hru mai!

Kei lah chuan a fiamthu emaw tiin a hnungah ka bêng a, 'ûanna chi a ni lo a nia mawl viau suh' ka ti a. Midangho pawh chuan an awih loh thu an lo sawi sap sap bawk a.

Awih lo pawh ni ila a awm reng, nichin lawkah a lo kal a, kuhva pawh a rawn lei a, a haw ațangin darkar khat pawh aliam tawp lo nâng, tuma'n ka nau thu sawi chu kan awih lo.

"Au Mam ka ti tak tak, an inhnuaiah a inawkhlum" a la ti tak deuh deuh a.

Mak kan ti tlâng vek, dâwt sawina chi anih loh avangin ka inleng tlangval ho chu an tho phak phak a, kal chhoh tumin an ding uai hlawm a.

Nula ka nih ve tho avangin 'min lo nghak r'u ka lo chho ve dawn' tihpahin dawr khar tur chuan pawnah ka chhuak a, ka inkalh fel chhungin ațhen chu an chho hman tawh, Bawihpuia leh Joela'n min nghak a, ka thin a phu zawih zawih mai.

Kan inah alo chuangkai tam ka tih tawh kha...

Ka hlau chu a nichiah lo; mahse, rilru a  nuam viau lo a ni, engtik laiin nge alo inawhhlum hman? A haw chhohna kha ala rei em em bawk si lo, ka nauin min lo hrilh lai khan dar kua ala ri lo deuh chuan ka hria, a mak hle mai tih bak chu sawi tur pawh ka hre der lo.

Kei, Bawihpuia leh Joela nen kan chho ve ta a, mi an lo pungkhawm tam viau tawh. U Rina te hian a Nu leh Pa te inhnuai an luah a, a zau ang reng viau, an inkawtah mi an lo awm țeuh a, ka țhiante rual chuan luh ve ka tum ngawt pek anih kha! YMA President Pu Sangkima chuan "Hmeichhia chu luh kan phal lo, police an rawn thleng țep a eng mah khawih danglam theih pawh ala ni lo, hmeichhia hrim hrim chu tumah kan la luhtir lo" a ti hmuk hmuk a.

Ka va'n ngei tak! Kei lah hi mitthi awm se anruang hmu lo a ka awm chuan ka ngaih a țha lo tlat zel, inâwkhlum anih vang nge u Rina pawh chu ka hmu chak zek zek mai a, mawnga hawlh ang mai ka ni. Joela'n
"Chho rih mai rawh, ka'n lut ve lawk ange" a tih phei chuan hmuh ka châk telh telh, a zia lo thei țhin.

Mahse, an phal lo chung luh luih kha thil mawi anih lem loh avangin inchung panin step-ah chuan ka chho ve a, kawtzawlah nulaho pawh an lo ding țhup a, enchâk fe fe chu an awm ve tho ang! mizo hi chu kan hâwkdâk ropui si.

Ka țhiannu Kuri ka hmu hlauha abulah ka va phei ve a, YMA bench-ah chuan kan țhu dun a, Police lam lah chu an lo thleng har zêk lehnghal.

"Mate, U Rina hi 'tinge tianga a awm le, a mak e, rui ve țhin tho mah se inawhhlum êm chu atih duh ka ring lo asin maw le." Zawitein arawn ti sap a, keipawh ka ngaih dan chiah tho ania, ka sawilang ve ta lem lo mai pawh a...

Thil pakhat ka ngaihtuah chhuah tãk chu, a inkhai lai hi ka hmu lo a nih chuan ka ngaihtuah leh ngut ngut dawn tih ka hria, Kuri hi enpuiah sawm ta ila...

U Rina te kawmthlangah hian vawk in a awm a, Rinfeli te vawk in a ni. Chumi bul ațang chuan hmuh dan awm dawn tlat hian ka hria a, ka phûr teh a nia.

"Kuri, Rina inawkhlum lai zuk en ang."

"An phal loh kha YMA in,"

"Phal lo mah se a rukin enna ka hria min lo zui rawh" ka ti țalh a.

"Mate, i ti rapthlak lutuk ka ngam teuh lo mai!" maktih hmel zetin min la melh zui.
"I duh loh leh keimahin ka en anga a nimai lawm," tih pahin ka tho chhuak nghal a.

Rinfeli te inlamah chuan ka phei ta, an vawk in panin ka chhuk a, a thim bawk sia ka phone ti engin ka chhuklui zel a, thaw huai chungin ka thlengthla ve mai. Vawkin bul ațang chuan ka hawi chho a, chiangkuangin engmah ka hmu thei awzawng lo. Eng ati teh reng nge ni ka en châk tulh tulh a, țawng thawm pawh ka hre pha vek, 'thih leh thih' tih rilru puin ka kekawr ka thlep chhing sauh sauhva vawk in chungah chuan ka'n lawn tehreng anih kha! Ka ding ngil chiah chu ka phu nasa lutuk!!

An inchhûnga inawkhlum emaw ka tih kha a lo ni awzawng lo, verandah-ah a lo inkhai reng anih chu maw le!

Ka hmuchiang kher asin. Ka melh hnai angreng khawp mai, kan dawra alo kal laia a thawmhnaw hak ngai kha ala ha a. Thli athaw deuh bawk nen a chhem thên deuh lehnghal a, a mit chuan min melh rû a, a lêi lah chu vei zawngin a seh tut bawk, a hmel duk ruih chu ka ráp lutuk.!

A hmel râpawm dan chu(h) rang mangkhengin vawk in chung ațang chuan ka chhuka phone light pawh hmang tawh lo in ka tlan chho zui nghal a.

Rinfeli te in kawt ka chhuak chho tur chiah chu ka hnungah min pawttu an awm chiang mai! Rang lutukin ka hawi lêt vat a, Rina chuan hnai setsawtah min lo melh kur mai nia! Rak țhawt pahin ka theihtawp a chak hian ka tlân ta tehreng a nih kha...

Ti em em hian ka tlan chak tih ka lo hre lo reng reng, Bawihpuia'n min lo pawt ding a  'tinge a, i haw dawn a mi i va hmanhmawh ve' a ti zui, thaw halh halh pahin ka awmna lai kan enchiang a mitthi in bul zunin panna kawngpui ka lo thleng reng tawh lo niin! Mak tih hmel deuh hian min lo en țhap zui a, ka zak ve chem chem mai. Nula a pumpa baklênga han tlânchiam chu zia lo ka ti viau a ni. Bawihpuia chuan ka chhanna ala nghak reng tih ka hre thut a.

"Nia, inah chhuk ka tum a," ka ti ta ringawt a.

"Kan chhuk rual dawn nia, ka zawng nasa lutuk che, luh an phal si lova i haw daih emaw ka ti hman lawm," a tih hnu chuan kan in lam panin kan chhuk ta a, eng mah ka sawi ngam teuh lo, min zawt zui tawh bik lem chuang lo.

Kan inah lutin thingpui kan in a, tlaivar a ngai dawn bawk si, rilru a nuam lo duh hle mai, ka hlau lutuk khan ka ngaihruat mai mai anih te ka ring deuh a, Bawihpuia lah hian min en leh vung vung zela ngaih ațha fahran lo.

Ka room-a ka lut te chu ka ngaih a ngam thei hlawl lo, ka tiril hi a khur dar dar reng reng a, Rina hmel kha ka mitthlaah alang zel leh nghal. A hmel nunna nei tawh lo tih hriat fahrana dâ luap te, a mitmeng kur leh a lêi seh tut kha a rawn lang zel mai, ka lo en ta kher kher kha aw....

Bawihpuia nen mitthi in lam pan chuan kan chho leh a, Police pawh an lo thleng fel a, an la thla tawh niawm tak a ni.

Keini pawh inchhungah lutin țhuthmun kan rem ve a, tumah țap an awm lo reng reng, a nupui pawh a țap chuang lo. A thih dan hian min țhâwng hlawm ém a, ka hawikuala mi reng reng chu zawitê tê-in an phun sep sep a, a ruang an en dik mek vangin khumah an la rawn mut lem lo. Kan țhutna ațang chuan khum chu chiang takin a hmuh theih a, chuvanga thlang chat ka ni reng bawk a, hmuh chian kha ka la tum ve tlat.

"In dawra kuhva a lei pawh pakhat chiah a ei, ala ak vek i kuhva khawr a pai dawn anih kha" Joela'n ala rawn ti zui, rum zetin ka melh vak ringawt a, a nuam viau lo.

Țawngri mur mur a reh tak țhupah chuan ka hawi chhuak a, a ruang chu khumah an rawn dah a, puan a antuamna chuan a khuh zo țha meuh lo, a kephah chiang takin ka hmu, ala bal em em zui a(h), rei en duh lo in ka hawi sawn ta daih a.

A nupui pawh a țap chhuak ve ta. An fate hi hostel-ah an awm a an la rawn thleng lo a ni. A hrehawm duh ngawtin ka ring. U Rina hi pa hmelchhe lem lo tak a ni a, kum 33 chauh ala ni. Ka rin aiin ala naupang, zû a in ve avang hian alang upa zawk mai mai a ni.

A ruang chu ka melh leh zeuh zeuh țhin a, a hmui an khuh tel tlat avangin a mit leh a hnar chiah a lang a, engvanga mahni nunna la ta mai nge anih hriat a har khawp mai, eng mah thuziak hnutchhiah anei bawk si lo, an țhenawmte leh a nu leh pa tak ngial paw'n hriatthiam har an ti khawp mai, an nupa an inhau khât viau an ti leh zel bawk si. Țhenkhat chuan a rui lungpuamin a ti anih ang ring ber. Chu mi ni lo chu puh tur avang ve êm a ni.

Ka sana bun lai ka en chuan zing lam dar hnih a lo ri reng tawh a, mutchhuakin min zem chiai chiai a, intih harh tumin pawnah ka chhuak ta a.

Kuri leh a țhianpa pawhin min lo zui ve nghal a, ka lawm rilru hle mai. Mahni chauha chhuah kha ka huphurh viau a, mahse;hlau anga lan ka duh dêr lo.

Rei fê pawnah kan ding a, zun in lam ațang chuan min en rengtu awm tlata hriatna ka nei a, ngam leh ngam lo chuan ka va hawi phei a, zun in bul theihai kungah chuan u Rina chu ahmaa ka hmuh dan ang chiah khan alo inkhai leh reng chu niin! Min lo melh kur a nih chu maw le! A inthên lep lep lehnghal a, ka țawngchhuak thei lo, ka kutin ka kâwk a Kuri leh a țhianpa Sangpuia pawhin ka kawhna lam chu an en ve nghal a, ka hlau lutuk chu vawilehkhatah ka khur chiam a eng mah ka hre zui tawh lo.

Ka harh leh hmasak ber chuan ka bulah Kuri, sangpuia, Joela leh ka nu leh pain min lo țhut hual a, ka harh hun an lo nghak țhap mai. Darkar khat vel chu eng mah hre lo in ka lo awm anih hmel.

Zawitê in tui ka lam a, min rawn pe nghal vat a, ka nu in "Mate eng ati nge khatia i awm a, tlaivar tum ve loh mai tur, i țhiante i ti mangang lutuk" atih chuan ngawi rengin Kuri ka va melh a, a lo nui țhaw lehnghal! Ka ngei zia chu(h)

Eng mah kha an hmu ve lo a nih ka ring ta ber a, hmu ve se nuihna tur awm hian ka hre lo, mak ka ti rilru viau a, hmu se chuan an sawi chhuak em em ang. Chuvangin ka sawi ri duh bik lo.

" I Bp a hniam lutuk a, tlaivar ve chi pawh i ni lo i zâwr si.." min lo titu Sangpuia chu ka melh vat a.

Mahni chauha awm ka hreh avangin Kuri chu chho tawh lo turin ka ti a, midangho chuan min chhohsan a, ka nu leh pa pawh an chho zui ve nghal daih bawk.

"Mate, min ti hamhaih tawp, tikhan eng ati nge mi â ang maia i awm a, zun in lam i kâwk vû bawk sia" mâwl min tih hmel zetin a ti a.

Eng mah an hmu ve lo tawp tih ka hrethiam mai, ka hrilh tawp mai dawn emaw ni aw. Rilru abuai nuai, a dawih ve ropui sia zanah chuan a hrilh chi țhak lo ang. Nidangah hrilh ka tum ta zawk a.

Hemi zan ațang hian vawikhat mah u Rina te inah ka kal leh tawh lo, hmuh leh hi ka hlau tak zet. Keimah phei chuan khawiah mah ka kal duh lo tawp a, kal chhuah ve a ngaih pawhin tu emaw ka hruai zel thin. Tuma bulah ka la sawi ngam ta chuang lo..

Kum tam fe a ral ta, ka theihnghilh thei meuh lo. Ka mitthlâ-ah hian a lo lang fo mai...Mahse, mit lâwnga hmuhtheih chuan a lo inlâr ngai tawh lo.

Theihnghilh ka duh a ni..

©<++++[BeckirafARenthleI]++++>®