UNKNOWN MAN

UNKNOWN MAN

         by.Becky Rafa Renthlei

                   Chapter-25

Drawing room-ah duhthawh zetin kan infawp ngar ngar a. A bák thlen chákna in ka khat, mahse naute vang hian ka tîm leh deuh. Tihtawp vat a ngai a ni.

Hrehzetin ka inla hrang ta hram a. Dominic hmel phelh phang ka hmuh chuan ka nuih a za ru hle a, min nawr lui ngam chiah lo niin ka hria.

"Kiara,"

"Umn..dinner buatsaih kan ngaih kha, ka inbual chhungin i lo buaipui mai dawn em niang?" Pawisawi lo hmel takin ka ti ta daih a.

"Dinner tehhrep pawh chu a, eitur ringawt i ngaihtuah hi ka hrethiam thei lo, i thau belh mang bawk si lova!" a ti hluk a. Ka nui ringawt, a țhutna chair ațang chuan lo thovin, ka darah min kuah a..kan room thleng min hruai ta a.

"Engvangin nge kan inbual dun mai lohvang?"

"Ni lo e, ka lo inbual hmasa anga ka rei lovang." Min chhán hma chuan bathroom-ah ka lut ta daih a. Kan Inbual rual anih chuan thil thleng tur ka hre mai! Tun dinhmunah chuan a țha ber lo.

Țhutkhawmna pindan ka thlen thlak ve meuh chuan a tlai ruih tawh a. Pindana nu valai angreng tak a rawn luh chuan Dominic chuan țhu turin a lo hrilh vat a. Tunge tih ka hre ve bawk si lova, ka hrilhhai angreng viau!

Chu nu lam hawi chuan mi pahnih eitur buatsaih turin a hrilh ta a. Chunu chuan makti hmel pawh a pu lem lo.

Kan pahnih chauhva kan awm hnu chuan, "Dinner siam lam chu ka peih leh ta lo mai, nang pawhin i siam ka remti chuang lo..Chinese food siam tur ka ruai a nih kha.." A lo ti sam ét a.

"A ngai kher chuang lova," tiin a bulah chuan ka țhu thla ve a.

"Eisiam turin ka nei lo che..Kiara, hmangaihna min chenpui hi i tum tawh miah lovem ni?" A thusawi inpersan lutuk vang chuan ka nui hak a.

"Hmangaihna chenpui duh lo che ah min ngai deuh em ni? Kan boruakin a zir loh vang mai mai alawm."  A lunghnur hmel ka hmuh chuan țha takin ka chhang a.

"Zing ka thawh hlima ka bula i hmel ka hmuh thuai theih loh chuan ka buai vek zel! Kiara ka thlahlel takzet che a ni."

Thin phu dap dapin a thusawi chu ka ngaithla a. "Chu chu ka duhdan chiah a ni ve tho, mahse min thawhsan zel a nih kha "

"Huhh..ka bula mut i hreh em kha..min riah chhuahsan i tum ut ut reng a, ka dang hram hram zawk che a." Sawi fuh inti zet hian a nui deuh a.

"Khangte kha chu a dang daih alawm..Tu emawni bula riah kha i thlang ta zawk a!" Chimawm zetin ka ti a.

"Nang tereuh hi...ka sawi tum tak pawh ka sawi zawh hmain min lo chhang zel a." Tiin zahzelah ka sam chu a zût a. "I sam kawi hi i inhmeh ka ti, hmeichhe sam ngil siau kawp țhin khan, nupuiah a opposite chiah ka nei ta a nia.." a ti leh daih a.

"Chu..min iai țan deuh elaw!?" Titau deuh titih a ka țawng chuan, "Ngai kawi kher lo la...Sam ngil nei ai chuan nangmah hi ka duh fé che. Ka damchhunga ka bula awm reng turin ka duh che a ni, Kiara.." Thutak zet hian a ti ta a.

"Oh..Dominic ka..."  ka thaw chhuak nghal ham ham a, ka hmangaih thu ka va'n sawi chhuak teuh ve le.. A țawngkam dam thlup hian ka duh loh thleng thleng min sawitir dawn alawm le...

"Ka hmeichhe lo kawp tawhte lakah chuan i dang hlak a ni. Kan inneih ni a i hmelțhat zia kha..hetah ngei hian inneih țhat leh ka duh hial mai.." uar fahran hian a ti leh a. A hmeichhe lo kawp tawhte lakah chuan ka danglam a ni tih ka ringhlel ngai lo. Mahse inneih țhat leh lam reng reng chu ka ngaihtuah miah lo thung.

"Party zawh lamah kan sawi țha dawn nia, ka pa kan hriattir ve phawt ang chu.."

"Ka pa rilru hi engtin nge awlsam taka i hneh theih chu le...?" tiin min kuah nghal thlap a. Ka nghawngah chuan a hmai phumin, "I kianga awm reng ka duh," tih sap pahin ka hmai vel chu a fawp lawr dan dan a. Ka ir ah te chuan fawp thla zelin ka hmuiah a rawn fawp ta a.

"Dinner ka peih tawh e, Mr....Oh," kawngka bula ding eisiamtu chuan hmuh thiang lo hmu palh ang maiin a țawng bah nawk a. "A pawi ka ti lutuk..ka...lo hre lo a.." nuam ti lo hmel taka a rawn tih chuan ka inla hrang vat a.

Pangai taka chhang tur chuan Dominic chu a inthunun nasa mai a, "Minute nga hnu ah kan lo kal ang, Mrs.Maxwell." A ti ta a.

"Awle, Sir..." rangtakin a kalsawn nghal vat a.

"Dominic, kan kal nghal ngei chu a ngai ang!" tiin ka ngheng hnai țalh țalh a. "Ok...kan ei poh a niang chu.." tiin min kai tho ta nghal a.

Mrs.Maxwell thilsiam chu a tui hle a, ka  ei nual mai! A tawp nan kaikuang kan chu ka hmawm leh hram a, ka lem fel hnu lawk chuan ka pum a rawn let but but a, ka luak dawn ta mai.."Dominic, bathroom ah..." Ka sawi zo hman tawh lo. Bathroom lam pan chuan hmui hup chungin ka tlan ta chawn chawn a. Ka hnungah hmanhmawh zetin Dominic chuan min rawn zui a.

Bathroom-ah chuan ka luak ta bawrh bawrh a. Ka luak chhung zawng chuan ka hnungah Dominic chuan a lo chul hauh hauhva.

Ka thil ei ho chu ka luak chhuak leh vek a, ka tháwl huai mai!

"Kiara, engtizia teh thut nge?" Min pawm nawlh a, Sofa-ah chuan min nghat thla ta a. "Mrs.Maxwell, tehhrep chu a..." a ti hmuk a.

"Khawngaihin, eisiamtu chu hau lul suh. Keima dik loh a nih kha..kaikuang ka ngeih lo tih ka lo theihnghilh atin ni.."

"Chupawh ni se..." a la ti hram a, hlauthawnna mitmenga min en chuan nuam ka ti lo. Kaikuang ka ngeih loh vang a ni lo...ka naupai vang zawk a nih ka ring a..

"Doctor ka ko dawn em niang?" A ti hmuk a.

"Oh..aih..angai lo..ka zia tawh alawm..biscuit leh bawnghnute min lo lák sak la.."

"Chu chauh chu maw..in check up phawt la, chumi hnu ah i ei chauh dawn nia."

"A ngai lo ka tih chu.." ka duh aiin ka vin mah mah. Maktih hmel takin min en a. "I tana țha tur ka ngaihtuah vang zawk a nia," dam thlap hian a ti leh a.

"Ka țha alawm.." tih paha tho chhuakin choka lam chu ka pan a. "Enge tih i tum?"

"Eitur dang ka zawng leh dawn mawle..ka pum a ruak vek alawm," ka ti hmak a. Dominic phun hluk ri chu ngai pawimawh duh lovin chokaah chuan ka lut leh ta a. Min rawn zui ve zel tho.

Mrs.Maxwell chuan dawhkan a lo tifel mek a, min lo hmuh chuan, "Pawi ka ti lutuk..Kaikuang i ngeih lo tih ka lo hre lova!" Inthiam lo tak hian a ti sap a.

"A ho lutuk, inthiam lo duh suh! Chu ai chuan eitur dang ka duh leh zawk."

"Awle, ka lo chhawp sak ang che lo țhu rawh." tiin dining chair chu min pawh chhuah sak a.

"I duh chuan i haw thei tawh ang, ka nupui hi chu ka lo buaipui ve tawh ange!" Eisiamtu lam hawiin Dominic chuan a ti ta a. A ngei ringawt anih hmel! He pa tak hi chu...

"Awle..Sir.." inthlahrun hmeltakin Mrs.Maxwell chu a chhuak ta a.

"Khatia tih kha a țul ber lo e," Dominic lam hawi chuan ka ti hmak a. A ngaihdan a nih loh hian a ti leh hmuk hmuk țhin a.

"Kan mamawh tawh hleinem, a thilsiam i ei ve atana ka it ber pawh i ei hleithei lo a nia!" Tiin bawnghnute leh chocolate biscuit chu min rawn chhawp a. "Keima lam dik loh vang ka tih kha mawle..theihnghilh tawh rawh."

"Yes, nirawh se, i țan ve em em a!" a la ti țalh a. Ka nuih tawp.

"Engtik nge Gavin te chu an lo thlen ang le?" Tiin ka zawt zui daih a.

"Gavin te nge? Talinda te?" Dominic hmel chu a inthlak daih a.

"Oh..an pahnihin..engemaw i hriat le..Dominic, thil ho mai maiah inhnial ka duh miah lo a nia!" Buiscuit țhial hmarh hmarh pah chuan lungawi vak lo hian ka ti a.

"Kiara, atawp nan..ka unaupa hi hnaih suh..abák ka sawi tawh lohvang! Ka pa pawh, Gavin pawh, kei aia ngaihsak i neih hi ka duh lo.." ti hmukin choka ațang chuan a chhuak daih a. Va'n naupangchhia thei tak!

Ka duh tawka thil ka ei hnu chuan muangchangin choka chu ka chhuahsan ve ta a.

Dominic Pov*

Ka nupui hi mi mak tak a ni. Suzy țawng ngeiawm tak tak a hriat khan a rawn țawngchhuah ve ka ring ania! Chutianga ti ta lo chuan hmel danglam miah lovin kan inbe lai kha a lo thlir veng veng thei nia! Amy a haw hlur leh bawk sia! Ka hrethiam tehhrep lo ve a!

Ka nu leh pa lem ziah nachang hre khawpin a fing tawk a. Ka pa lah chuan aduat uchuak mah mah..ka ngaithei lo lek lek țhin. Han sawisel ngawt dawn ila an pahnih hian an luhlul dun ropui si! Engahmah min ngai mang reuh si lova..ka thluak a tibuai vek!

Amy hnena kan inneih chhan ka sawifiahna kha a lo hria a, a hmalama ka sawi a hre leh si lo.. 'Ka duhin ka hmangaih a, inneih nghal ka duh. Mahse amah Kiara'n a duh loh avangin kan innei lova, a nu leh pa thil hriat sual vang liau liauva nei thei chauh ka ni' tiin ka hrilh kha a nia..a tawp lam chauh a lo hre hman kha zialo ka ti khawp mai! Ka rin ang chiahin ka insawifiahna pawh a ngaithla leh duh lo a..ka nupui luhlul lutuk hi chu aw....

Gavin kan inah arawn chén ve ták si ah chuan ka talbuai leh vek a. Diktak chuan kan inang ropui si a, a hmaa thilthleng ang kha a thleng leh ang tih hlauhnain ka khat tawh...Kan hmel leh pianphung inang lutuk vang hian tunhma pawhin buaina kan tawk fo tawh a, Gavin lah chuan ka lem a chan ațang khan sam dum ngawt a pu lui ta lehnghal a! A original sam pu leh tura ka hrilh angai dawn a ni.

Talinda ka ngainat ém vang pawh nilovin, ka nupui leh ka nau inbe tam lutuk tur ven nan ka chah mai a ni. Kiara lah hian ka nau hi a ngain phian a, á...ka rilru hi a dik lo zo vek tawh.

Zanin dinner kan neih laia Kiara awmdan kha a țha miah lo. Eitur a duh ta lutuk hi ka hrethiam lo bawk..Hmeichhe dangte angin mawi loh hlauvin a phi ve chung lova, hei tak hi ka ngainatna chhan pakhat a ni. A nihna ang ang hian alang chhuak hmiah hmiah a...Amy i'n a ben khan ka lo țang lutuk a, khanu kha kut ka thlak lo chauh. Australian merger tihfel lai a neih hi inchhuan phah nan a hmang ziah lehnghal a..kan zo țep tawh a, ka be țha lui hram hram a ni...ka hne lutuk tawh..Amy Raymond hi..

Kiara'n a ben ve khan ka lo nui ru var var a. Ka nupui hi a duh lohna ah chuan nasa ve tak a ni tih ka hriat phah. Kan inhmuh hmasak ber zanah pawh khan min sual lét ngam ngat kha a nia! Ka saruak lem a ziak ang tih mawlh ka hlau! Artist thiam tak a ni a..a nihna ang takin a ziak lang thei tlat!  Drawing room pawh tlawh ru ve zauh zauh tawh ila a țha ang!

Tunah tak hian enge a tih ang aw! Choka ațang khan ka chhuak daih sia, ka thimrim vanga chhuak chu ka ni chiah lo na a..kei aiin kha eisiamtu kha a țan zawkin ka hre leh tlat pek a..ka lawm viau lo..

'No' Ka chhuahsan ațangin minute sawmhnih aliam tawh a, a la rawn chho miah lo..tun thleng thlengin engthilmah a ei tawh lo tawp ang!

Rangtakin inhnuai lamah ka chhuk thla ta a. Ka thil hmuh avang chuan ka ding chawt..Sitting room chhuatah chuan cushion dahin a țhu thluang diai a. TV chu uluk em em in a lo en a nih chu..a thil en lai chauh chu ngaihsakin mit a khap eih lo...a landan cute zet chu a inhre der si lova...!

'Fifty shades darker' film sexy zet leh hmuhnawm deuh kha uluk em em hian a lo en ve ngial a..a inhmeh thlawt lo..

Dimtein ka pan phei țhám țhám a, a hnunglam ațanga a mit ka hup sak chuan a țé deuh țhat a..

"Min thlah teh Dominic, i rim ațang khan ka hre vek che.." a ti deuh hmak a. "Ka nupui film en duh zawng chu leh.." Ka fiam chák tlat.

"A changtupa khi ka duh tawp..min lo tibuai miah suh..Lalpa lehh.. Christian Grey(Jamie Dornan) chhiat loh zia khi.." a la ti zui ahh..

"Huhh..A hur emai.." tih pahin ahnungah chuan țhuin ka kuah thán a. "Hur kher lo...Director te an ruahman angin a che mai a ni..dinner eipui atan min han sawm mai se la..."

Ka lo thik leh ringawt tawh...ka pa leh Jamie Dornan hi an inhre chiang a! Kan car chhuak thar la hmasa ber tu a ni ziah..a birthday party ah a sawm a nih vaih chuan Kiara hian a bepawp hrim hrim ang..Ka thlen tir dawn lo hrim hrim...

"Jamie Dornan..huhh.." ka nui pah kher a. Kiara huat tawk a tling ve em em a, min rawn nghawk sawk..a kutthlak lah hi a ná phian a.

"I en peih loh chuan han mu rawh." a ti deuh hmak a. "Talinda te kan nghak chhuak law law ang chu.." Ka tih chuan sana a melh zauhva..A țhiannu hi a ngaina hle a..Unaunu ang chiahin a en tak kha mawle...a mut san phal awm lo emai!

An inkár buai chhan lah kha kan unau vang a nia! Nuam lo ka ti viau!

"An lo thleng dawn tawh angem?" Tih sap pahin min rawn ngheng țalh țalh a. A taksa lum hiamin min nghen chuan ka danglam leh țan der..!

"Tunah dar sawm a ri tawh a, sawmpakhat bawr velah chuan an lo thleng theiin ka ring!?"

"Ok..kan lo nghah ngei chu a ngaih hmel..Chuan țawng tawh lovin ka film en lai khi min en zawh tir phawt la.."

"Umn..En ta poh che..intur i duh em?"

"Coke..ka duh e..chuan popcorn pawh.." min chhang rang mah mah..

"Wife..cinema hall a ni lo a nia..Popcorn kher chu a harsa ang.."

"Min leisak mai la..." ka lo sawi ta kher kher a ni. Ka tih sak leh ngei a ngai dawn e..Joshu hi a mu tawh angem aw..?

"Ka chhuah daih chuan nangmahin i awm dawn asin.."

"Ni bawk si..Elina awm bawk silo..ka ei chák asin le.." ati nai nai a.

"Ok..Joshu emaw hnathawk dang ka va leitir ange.." tia, thawhsanin cottage lam pan chuan ka kalsan ta a.

A film en kha ka ngaihtuah leh a, ka nui chhuak hawk. Ka nupui hi chuan min ti phu reng mai dawn a nih hi..! Suzy pawhin model emaw a ti hial kha a nia, hmeichhe țhenkhat chu nise, artist anihna ringawt pawh hi chapo pui tham a nia. Ani ve chuan an hriatchhuah hlau takin hming dang a in vuah țáwk țáwk a. Ka nu kha la dam se..hetiang hmeichhia mahni lu zo veh vawh, midang rinchhan lo mo a nei hi a lawm viau ngei ang! Ka pa ang hian!

Joshu chu popcorn lei tura ka hrilh chuan mak a ti hle tih ka hria. Nui țha chung hian a kal ta nghal a.

Ka hnathawk zingah chuan ka ngaina ber bawk.

Inchhunga ka va luh leh chuan Kiara chu a țhut dan ngai chiahin alo la țhu a. Chips alo ei leh hmarh hmarh tawh..a hmui bulah chuan a kai liam a. Kum 22 a ni tih pawh hi ka awih lo lek lek țhin..a chang hi chuan...

"I duh ve em?" tiin a thil ken chu a rawn lek zauh a. Ka lo bu liam satliah ve ringawt..a țhutna bulah chuan țhu thla ve in a thil eina, a hmui bula kai chu ka fawhfai sak zauh a..."Min tibuai leh țan dawn a mi!?" Meng de sar chung hian a ti a.

"Tehnang..honey, zo thuai se ka ti.."

"Chuti nih chuan lo ngawi mai mai rawh," tiin a thil en ah bawk chuan rilru a pe leh daih tawh..Keipawh laptop phawrh chhuakin ka hna ka khawih ve ta a.

Joshu rawn lut chuan kan lo ngawi reng a hmuh chuan a áw a thian kharh a. Popcorn leh eitur dang emawzat a rawn khai bawr lûk bawk. Ka mitmeiin Kiara pe turin ka hrilh a..

"Kiara, ma'am, kha le.."

"Oh, Josh, nangmaw?" ti hliaiin a nui var var a.

"Umn..ka kal leh nghal mai ang," tiin Kiara chu a nuih suk a. Ani pawh chuan bu nghat chungin eitur lam chu a ngaihven san ta a. Ka lam hnai ho zawng zawng hian ka nupui hi an ngaina chu a nih tawh ber hi...

Ka laptop ka bih ve tak na a, Kiara chu ka melh leh zauh zauh țhin. Kan nupa chauh hian awm ila a nawm phian dawn hi..

Sawmpakhat rik nan minute sawmpanga ala awm tihah chuan a thil en chu a tawp ve ta țáwk a.

Ka bulah chuan rawn țhuin ka laptop chu a bih zauh a. "I car aia țha kha ka siam tir dawn!" Ka tih chuan a nui nasa ngang mai! "I ta chu ka ta..." chimawm takin ati zui zat a.

"Chuti BMW saw ka ta tihna a ni maw!"

"Ni e, mawle...kan ta...Chuan kan in, kan khum, kan room," a ti deuh duah a. Nuam ka lo ti viau. 'Kan' tih țawngkam hian nupa kan nihna a ti nghet sawtin ka hria..!

Pawn lama car thawm kan hriat chuan kan tho rual țhawt a. Kiara darah chuan kuahin pawnlam chu ka panpui ta a. Ka nau leh Talinda hmuhah nupa inngeih tak kan ni tih lantir ka tum.

Verandah ah chuan Gavin te chu ka lo nghahpui ta a. Car ațanga Talinda rawn chhuak a hmuh meuh chuan alam panin a tlan thla ta daih a..an țhiandun hlim hmel hmuh hi alo nuam ber a ni. Ka chah sual lo ve.

Țhutkhawmna pindanah Kiara leh Talinda chu an țawng mawlh mawlh a, Gavin nen ngawirengin kan en tawp! Sawitur an ngah dan em em chu...Mak kan ti dun a ni ber..

"Bro, whisky kan dawm dun dawn em niang?"

Ka chhan hman hmain Kiara chuan ,
"Whisky maw?" a lo ti vat a. "Umn..min tllit sak hreh loh chuan.." Gavin chuan a lo chhang a.

"Tui pawlh nge pawlh loh..Husband?" Nui sang hian min rawn en a. "Khawngaihin, tui pawlh ka lo in ange, Gavin khan tui pawlh loh in thung se.."

Intur siam mawlh mawlh pahin Kiara chuan Talinda țawng chu a chhang pah zel a.

"Zanin chu Talinda nen kan mudun thei angem?" Intur min pek pah chuan min zawt a.

"Teuhlo..."

"Teuhlo.." Gavin nen kan ti rual dun țhawt a. Hmeichhe pahnih te in melh ralh chu ka hmu reng!

"Zanin chauh te chu.." Kiara chuan a la ti hram a. Ka phal teuh lo..ka rilru ang chiah a pu ve tih hriat tak hian Gavin chuan min siai zauhva..."Hun tamtak in la hmang dun dawn chauh alawm, ka nupui tellova mut tumna ka nei lo." Ka ti deuh nghut a..whisky chu tlák papin.."Zan a rei tawh..lo inbuaipui ve tawh mai rawh u.." tiin Kiara chu ka kai sawn pui nghal daih a. Hetia kan awm khawm reng chuan kan tlaivar thei takngial dawn alawm..

"Ok...Dominic sawi kha a dik chiah..ka chau khawp mai Kiara, mut hahdam ka duh..Gavin a awm tho bawka, min ngaihtuah suh," Talinda chuan a ti ta hlauhva. Upa zawk nge nge...rem a hre țhin e..Talinda sawi avang chauh chuan Kiara chuan min zui ve ta a.

Lungawi chiah lo niawm tak hian a tûm deuh bár a. Hetiang hmel a put hian a hmelțhat zia a inhre der si lo..fawh nawk nawk ka chák kher mai! Ani lah chuan ngawirengin bathroom-ah min luhsan hmak a. Ka tih lungawi angai ngei ang!

Khumah reife ka ghak a, a lo chhuak lawk lo lehnghal..tui herh haw ri ka hre pha vek a. Inbual pawh nise zawh a hun tawh lutuk..a thinrim lah hi a nasa ve sia..ka pawh duh lawk lova..mahse a rei ták ém avang chuan bathroom lam pan chuan ka phei a..

"Kiara,"

"Kiara, honey..enge i tih em em a! I dam lo mai anga sin.." Min chháng chuang țhak lo. Bathroom kawnghar chu ka sawi ta dawt dawt a, hlauhthawnna mak tak ka nei nghal bawk. A tawpah arawn hawng ve ta hrám a..

Ka thin a rim hman deuh kha ania, mahse a hmel pawr phang leh chauh hmel zet ka hmuh chuan ka kuah vat a. Min rinchhan titih deuh chuan khum lam kan pan a..a awmdan hian ka ngaih a ti țha hlawl lo.. khumah chuan dimte in ka muttir a..a thawmhnaw ka phelhsak chuan min hnial miah lo..

Nidang chu nise a duh lo viauvin ka ring! Engemaw tak harsatna a nei a ni..mutkawr ka háktir hnu chuan puan ka sintir leh thlap a. A țawng miah bawk silova, a bula ka inthawlh ve chuan min lo kuah vat.

Ama duhthu ngei hian min kuah khát ve khawp mai! Nuam ka lo ti hman leh pek viau! Hetia min ngai awm tak leh min mamawhna a tih lan hian nuam ka ti țhin. Mahse, zanin a chauh hmel dan em em hi a țha lo..tlaiah khan a luak vak a. Nichin pawh khan a luak leh a ni ngei ang!

Ka lo ngaihthah lutuk deuh a ni. Ka inthiam ta lo tawp!

"Honey," min chhan loh avangin a hmel en tumin ka kuai dák deuh a. A lo muhil der tawh..ka áwmah beiin a muhil a nia..ka awih thei lo zawk!

Naktuk chu a duh emaw, duh lo emaw in check up turin ka hruai ngei ang!?

Ka nupui damlohna chu ka damlohna a ni....A hmuiah chuan ka fawp a, a vawt thler lehnghala ka kuah ta hle hle a..Ka hmangaih thláwt a ni....

©<++++[BeckirafARenthleI]++++>®