UNKNOWN MAN

UNKNOWN MAN

         by.Becky Rafa Renthlei

                   Chapter-26

Ka țhanharh chuan zinglam dar sarih a ri tawh a, ka bula ka nupui mu thaw sák sák ri ka hriat chuan ka ngaih a țha veng veng. A hmel dáng lek lek hi engvang nge niang aw!? Vawiin lam chu incheck up turin ka hruai ngei dawn a ni. Ka thawhsan kha a duh lo viau na a, a harh veleh eitur a duh leh nghal thovang!

Elina awm lo chu a hrilhhai thlak angreng! Talinda leh Gavin pawh hi an va reh ve mawle... Choka ah lutin bawnghnute ka ti lum a, Orange juice a duh viau țhin bawk alawm le..Tray ah ka nupui duhzawng chu ka rem sawk sawk a. Kan room lamah ka chhoh pui leh ta a.

Kiara tui taka mu ka hmuh chuan ka kaitho phal lo lek lek..a bula va mut ve leh mai ka duh deuh rum rum hman a. A puansin chu a kawng thlengin a lo dah thla a. A mutkawr chhana a áwmbawr lang deuh ruai chu ka hawisan hlei thei lo..A pian a nalh mai bakah a vun mám țha zet hi mipa duhthusam a ni. A bawp sei thlarh chu a khal țha reuh hle a..a kuttin leh ketin englai pawh a var sar țhin hi hmuh a nuam phian bawk..ka hmeichhe mutpui tawh ho te ang lo takin hmangaihna chendun kawngah pawh hma asawn chak hle...

A rum țiah țiah ri avang chuan ka thil ngaihtuah lai ațangin ka harh zawk a. Khumah ka țhu thla nghat vat, a chal sam hui kian sak pahin, "Good morning wife," ka tih chuan nui var var chungin, "Morning husband, ka ril a țám," a ti zui zat a. Ka rin dan vel chiah..ná nei hmel pawh a pu leh tawh lem lo..khum ațang chuan thovin ka biangah min fawp zauhva. Bathroom-ah a lut ta a.

Kiara rawn chhuah hnu chuan khumah țhuin tray chu a malchungah a dah a. Ka ken chhoh ho zawng zawng a ei fai leh vek tih ka hmuh chuan ka nuih a za hle a, "A dang i duh belh em?"

"Duh lo ve, mahse nakin lawkah chuan ka duh leh thovang!" a la ti hram a. "Company ah i kal dawn lo em ni?" Min zawh leh ka ring reng a.

"In check up turin ka hruai phawt ang che. Chumi hnuah ka kal chauh ang," ka tih chuan ngaihdan nih loh hmel zet hian a tûm deuh hmak a.

"Dominic, incheck up ka ngailo ka tih kha," a ti deuh hmak a.

"Min hnial suh nizana i awm dan kha a țha miah lo tih ka hria, khawngaihin min hnial suh.."

"Ka țha ka tih chu mawle, hmeichhiate chuan khatiang khan kan awm fo alawm."

"Engnge in entir pawh chu i hreh viau le." Ka duh aiin ka vin mah mah. Min hnial reng hian ka thin a tirim deuh tlat! Amah ka ngaihtuah vang a nia..engmah hi a hre thiam duh lo.

"A țha e, kan in entir dawn nia," ti hmakin pindan chu a chhuahsan a, kawngkhar chu ring zet hian a khar ri bur bawk a. Tunlai a mize inthlak lutuk hi ka hrethiam lo..Talinda ka zawt tawp mai dawn em niang?

Inbualin ka thawmhnaw ka thlak vek a. Office ah kal a ngai thova, a duh ngang lo a nih leh incheck up lam chu ti lo mai ang! Ka nawrluih chuan a thinrim leh emaw anianga..kan inkar țha sa a ti buai leh vek ang!

Breakfast room ah Gavin leh Talinda chu in haw lo zet hian an lo awm dun a. He mite pahnih hi an induh ve tak tak nge? An awmdan hi ka hrethiam tehhrep lo ve a..Kiara hmel hmuh tur a awm lova..drawing room ah a awm leh pek a niang! Chulam pan chuan ka phei ta a. Kawngka a inkhar phui chiah lo deuh a, Kiara țawng thawm ka hriat chuan va pawh mai lovin kawngkhar chu zimte hian ka hawn belh a...

"Dominic hian incheck up turin min nawr reng a, engtin nge ka tih dawn?" Tunge maw a biak le..ka chungchang te an sawi bawk si. Leh lama mi țawng chu ngaithla tih hriat tak hian a ngawi deuh vang vang a. "Ka luak zeuh zeuh a, a hun hma hian a hria ang tih ka hlau alawm, hrilh hun tur a i sawi kha kan nghak thleng thei dawn lo ang riau. Vawiinah incheck up turin min hruai a tum a, kan kal a nih phawt chuan naute chungchang hi a hre ngei dawn a..."

Engthu nge ka hriat hi..? Kiara hian nau apai a ka lákah a zep amaw!? Lalpa lehh..engtin nge a theih zawk? Tunge a naupai chungchang hi hre ve? A pasalin ka hre lova, tunge a biak? Ka fa a ni lo tih na em niang? Zawhna hlirin ka khat a.. Ka thinrim lutuk hi ka puakkeh takngial dawn!

An thusawi pawh ngaithla zawm tawh lovin, dim baksak lo hian kawngkhar ka chhuih ri bur a. Ka kal nghal nal nal bawk.

Kiara chuan ka thawm a hria a ni ngei ang? Min ko zui lawm lawm a, a hmel pawh ka hmu peih mai mai lo..kan inrem theih nan ka inphah hniam ve a, tun țum chu ka thiam loh a ni ta lo e. Midang fa pai reng chungin kei hi min nei amaw? A ni thei lo..Kan mutdun hmasak ber khan ala thianghlim tlat a ni. Chuti a nih chuan ka unaupa fa a ni ngei ang? Kha zanah khan an lo chesual ngei a nih hi...

Ka thinrim êm avang chuan inchhung a awm pawh ka peih lo. Company lam pan chuan chak fê in ka inkhalh chhuak ta a.

Hna pawh ka thawk thei chuang lo. Ka nupui a rai a, min hrilh lo...chu ringawt chu ka rilru ah a awm. Kiara'n vawi engemawzat min lo call a, Gavin leh Talinda paw'n min call tho. A tawpah phei chuan ka switch off ta daih a.

Penthouse-a haw pawh ka chák lo kher mai. Mahse Kiara biak ngei hi ka nupui a nihna angin ka tihtur a ni. Ka pa birthday thlen nan ni thum chauh a awm tawh a, lunghnur taka ka pa siam  ka duh lohvang chauhvin ka insum rih ang! Chumi hnu ah ka nun ațangin ka kaltir ngei tawh dawn a ni. Ka hmangaih êm avangin hrehawm chu ka ti ngei anga..ka hmangaih anga min hmangaih ve siloh chuan awmzia a awm chuang lo..

Zan dar riat velah ka haw ve chauhva. Talinda leh Gavin chuan dinner an lo kil a. Kiara hmuh tur a awm leh ta lo. Kan room-ah ka tlan chho nghal vat a. Ka lut lai min lo hmuh chuan a rawn ding chhuak a. "Dominic," ka hre lo der hmak.

"Dominic, ka sawifiah thei..."

"Insawifiah ngai lovin ka hre vek alawm, nau i pai a..mahse ka hre ve lo."

"Ka sawifiah thei ka ti reng alawm," a ti dam thlap a. "Engtinnge i tih theih zawk le..Kiara, kan nupa inkarah hian tunge tlazep tih chu ka hre thuai ang." Ka ti hmuk a.

"Ka thusawi i ngaithla dawn nge? I ngaihdan kha i kal tlang pui dawn!?" a tih chuan rum zetin ka melh a. Pawisawilo mitmeng niawm taka min melh te chuan ka haw hlur tawh.

"Ka fa a ni em? Nge, Gavin zawk?"

"A ni tih chu i hria alawm.." ala thinrim chuang lo.

"Ka hre lo, ka hre hauh lo..phone i hmang lai kha lo hre lo phei ila chuan tunah pawh ka la hre chuang lovang! Min bum duh suh.." ka ti tuarh a. A mitmenga zámna lang hauh lo hian min en lêt kal a. "Hrilh che chu ka tum reng alawm, mahse a hun ka la ti rih lo mai a ni." Chang fak hian a ti ve ta a.

"A țha e, min hrilh ngai lovin ka hre ta alawm, ka pa party buaisaih hi zo se..min chhuahsan ang che. Amy te kha i lo thîk kawi vel a, nangmah i lo dik loh vang a nih hi..." Ka ti ta hmiah a. A mengphawk deuh hra a..maktih hmel fahran hian min en bawk.

"Dominic, a tawpnan ka insawifiahna hi i ngaithla dawn nge dawn lo?"

"Oh..Pathian hmingin..min vau ve lo mai rawh Kiara, Amy kha chuan ka sum a duh ngei mai! Mahse nang angin mi bum a ching kher lo." Ka tih chuan ná a ti hle tih a mitmeng rawn alh deuh phát ațang chuan ka hre mai!

"A țha e, ka pa party siam thleng ka nghah a țulna ka hre bik lo ve." Thinrim insum taka tiin room chu a chhuahsan ta a. Ka zui thla ve nghal ta tho a. Țhutkhawmna pindana Talinda țhu chu Drawing room ah a pawt lut dawr dawr a, a țhiannu hrilhhai hmel ka hmuh chuan ka nuih a za lek lek.

"Bro, enge in buaina? Kiara hian dinner ei turin a nghak reng che a."

"He thilah hian lo inrawlh ve suh Gavin," ka ti hmuk a. Drawing room ah luh ve ka tum chuan chhung lamah an la inkalh hnan zui ah.., hrep tak hian!Kawngkhar chu ka chhuih leh bur a.  An rawn hawn phah lem hlei lova..

Darkar hnih lai an inkhung tawh, engemaw an tih em em ni? Gavin lah chu a phi sek. A bulah chuan țhuin whisky no thum ngawt ka in tawh a!

Drawing room kawngkhar a rawn inhawn chuan ka ding vat a. Kiara ngawt ka melh, Talinda chuan min huat hmel takin min melh a. Kiara hmel landan chu..țap hrep hmel a pu bawk..an pahnih hian an ințan hle tih ka hre tho a, mahse Talinda'n min huat ve ngawt nachhan tur ka hre lo. Duh leh a țhiannu hi hua se..dik lo zawk chu amah a nia.

Nizan te khan kan hlim em em a, hlimna puar pawleng mai a lo ni si! Tunah zet chuan ka khawvel a lo kehchhe zo ta a, engtianga siamțhat leh tur nge tih pawh ka hre tawh hek lo.

Gavin lam hawi chuan Kiara chu a nui hak a, nuihza tak tak erawh a ni lo.

"Hlim taka nuih theihna tur ila hria chu ka lawm ngawt mai!" hmusitna áw hian ka ti lui ngat a.

Kiara chu a rawn inher vat a. Min hmachhawn zawngin ading a, zám hauh lo leh mitmeng rum angreng tak hian min melh nghek phawt a. "Eng nge i duh..ka nuih avang hian i lo na viau em ni?" ngeiawm zet hian min chhang a.

"Thusawi dun," tiin ka ner sawk a. "Engthildang nge ni ang?" Tiin a lam ka pan phei chhak chhak a. Min hlau hmel a pu chuang lo.

"Sawidun duh lo tu kha tunge..Dominic Malakian!" Min cho ár reuh. A thinrim laia a landan te hlei hlei hi a țha sia, ka thil ngaihtuah mai mai chu le..hun lo lutuk.

"Tunah ka duh thung alawm," tiin dim vak lo hian kan room lamah chuan ka kai chho dawr dawr a. A țang ve nasa viau a, tháah min hneh miau hek lo le..Kan khumah chuan ka nem țhu hnawk a. A țe țhat..

"Nau ka pai tih i hriat kha, min dim lo viau suh."

"Tunge a pa?"

"Tu vak nge ni se i tih? Nangmah Dominic Dron Malakian kha mawle.."

"Dawt min hrilh chai suh," ka ti hrawk a.

"Dawt a ni tlat silova, a pawi ka ti khawp mai!" a ti deuh hmak a. Ka fa a nih chu ka ring ve tho..mahse engvangin nge ka lakah a zep kher nachhan? Fa ka áwt tih hre chung reng lehnghalin!

"A tirte ațangin min bum char char a, infiam nan min hmang a ni!"

"A bul ațangin kan țan leh zel dawn a nimaw!?" A hmaa ka lo tih dan ang chiah chuan a țawng chhuak kher a. Ngeiawm thiam ve a nia!

"A tawk e, mu tawh rawh," ka ti ta ringawt a, min hnial dang zel bawk si..

"Ka mut lohvin ka țhu reng peih hleinem!" A la ti hram a. Bathroom-ah ka luhsan ta daih a. Kiara bulah hi chuan ka thinrim rei thei miah lo.

Bathroom ah reife ka awm a, pindan a ka let leh chuan alo mu fel diam tawh. Min hnungchhawn zawngin a mu ngát a. Ka ngaihbel vang nge a thau deuh riauvin ka hria! Intur dawmsan ka tum zet na a, ka țhulh leh ta zawk a..a mutthilh lai hian duhtawkin ka kuah thei alawm. A bulah chuan ka mu ve ta zawk a.

A pumah chuan dimtein ka chûl sak a, ka fa a pai hi ka lawm rualin min hrilh loh avang khan ka thinrim bawk si..He nu tereuh hian ka thluak a tibuai vek!

Zinglam dar hnihah ka harh hlawl a. Kiara a mu tawh miah lo..Ka ngaihtuahna a buai leh nghal vek! Bathroom ka en phawt a, a awm lo. Inhnuai lamah ka tlan thla leh a, a reh țhiap bawk si..Drawing room pawh pawn lamah a inkalh thlap...Khawiah nge maw a kal le...!

Garage chahbi ka la a, pawnlamah ka chhuak ta a. A car a awm miah lo..beidawng zetin inchhungah ka lut leh a. Gavin leh Talinda'n an hre mial maithei tih ngaihdan ka nei leh thut a. Chumi hmain ka phone phawt ang!

Switch off a inti tlat bawk sia, ka mangang lutuk chuan ka nau chu ka kai tho ta ringawt a. Phak zetin an rawn tho chhuak a. Thil awmzia ka hrilh chuan kei aiin an bo hmel mah zawk!?

Talinda phei chu a mangang nghal hle a, Seattle-ah hmelhriat a neih kan hriatpui der bawk si lova. A țhiannu takngial pawh hrilh hre lovin khawiah tehhrep nge maw a kal ang le..Lalpa..Ka nupui venghim hram rawh..

A insawifiahna kha lo ngaithla tal ila țha tur a nia..

Kiara Pov*

Dominic min tih dan kha ka ngaizam mai mai dawn lo. Party zawhah chhuak turin min ti a maw! Insawifiah ka tum pawhin a ngaithla duh lova, naute chungchang ka pa nen kan sawidun tih hria se a lawm ber tur a ni reng sia!

Kan hrilh nghal lohna chhan pawh a pa vang a nia! Ka hmangaih ang hian min hmangaih se chuan min ngaithla em em ang. Ka lemziak ber ka zo tawh a. Khatia Dominic nen kan inhnial hrep hnu khan Talinda engkim ka hrilhfiah a, min lawmpui rualin Dominic ka hrilh nghal lo kha min dem ve tho..Mahse..a hun lai khan Amy a awm ve a..ka inthiam ve tlat!

Khuma min kuah ran chunga Dominic muhil hmel chu ka thlir vang vang a. Dimte a thawhsanin pindan chu ka chhuahsan a. Pan mai tur ka hre lo..Hetia inngeih chuang silova inkhat a chendun reng hi a țulna ka hre lo ve..

George khan ka duh hun hunah a in a kal tur khan min ti tak alawm le..kan buainaah hian a tel ve thova, ka pan phawt mai ang! Dominic pa chenna panin ka thawmhnaw pawh keng chuang lovin ka car thar chuan ka tlan chhuak ta a. Darkar khat lai tlan a ngai a, motor veivák a tlem lai a ni hlauh a, a zia phian!

Ka pa'n min lo hmuh chuan a lawm hle a. Ka kal chhan ka sawi hma hmain, amah zawk chuan a hre vek tih a lo sawi hmiah a. A fapa mangangin vawitam a lo va phone a ni awm e..

"I pan tur dik tak i rawn pan a ni, Kiara, beidawngin ka siam ngai hauh lovang che.' tiin min kuah hlu hlu a. Ka nu leh pa tak tak nilo ah chuan min hmangaih tu ber a ni. Ka țah chhuak chu insûm ka tum viau na a, ka thei ta lo.

Chhuak zetin ka țap ta a. Ka bán hma chu ka hnungah chulin, "I duh chen chen țap rawh..ka fapa hi i hmangaih tih ka hria alawm.." a ti sup a. Meng phelh phang chunga ka en chuan a nui suk a. "Mak i va ti awm ve, hmangaihna hrethiam turin ka upa tawk tawh alawm," tia min kuahin ka pindan turah min hruai ta a.

Zep lovah chuan ka thla amuang nghal siai siai mai!. Midangin nél lo mahse ka tan chuan pa nih a tling khawp mai!

Khumah min țhuttir a. Ka rilru lákpen tum tih hriat tak hian a birthday programme an duan láwk te chu min hrilh a. Sawmna hi ama lam ațanga ruahman tur a ni a, Amy kha buaipui turin a tih tak kha mawle...

"Pa, sawmna in sem chhuak vek tawh em?" ka ti sap a.

"Sem tawh e, enge ni ta?" dam thlup hian a ti a.

"Pakhat  sawm ve duh ka nei a," ka tih chuan, "Zawhna chang che ka lo hre lo a ni..ka fanu in a ngaihpawimawh  em em chu tunge niang aw..!"  a nui pah suk a.

"Christian Grey..Oh..Jamie Dornan mawle.." Ka tih chuan mitmeng buai deuh nak hian min en a. "In in hria em ni?"

"Hre hran lo ve.. ka ngaisang em a, a takah hmuh ka chák," zak deuh tak hian ka ti a. Naupangchhia min tih hmel tak hian, "Hmm..Mr.Dornan chu ka hria alawm..ka kutah dah rawh..keiman ka lo hrilh dawn nia, secretary kaltlang ni lovin." A ti ta a.

"Maw! Jamie, i hria maw!" mawl hmel zetin ka ti hliai a.

"Hria e..kan company luxury new car, la hmasa bertu a ni ziah alawm..lunngai suh i pasal rilru i hriat theih nan Mr.Dornan ngei hi kan hmang dawn nia.." A ti awl sam ét a.

A va'n nuam tak..ka rilru natna theihnghilhin ka nui ta hak hak a.

"Ka fanu, nalh thei ang bera i lan theihna turin, țang nasa ang che." tiin ka darah a béng thak thak a. "Ka fapa rilru hneh ngei tum la..chumi tur chuan duhsakna ka hlan a che." Tiin min chhuahsan ta a.

Ka phone ka on chuan missed call tamtak a awm, Dominic min call na phei chu vawi 32 lai a ni. Ka call back nguar ang.. A fa anih te a'n ring lo kual vel a..ve lutuk a..!

Party zanah a hre khawp ang..Khawvelin tunge ka nih an hriat hun tur chu...

©<++++[BeckirafARenthleI]++++>®