KEIMAH 'RAFA'

KEIMAH 'RAFA'

Becky Rafa Renthlei

Damdawi in khumah mu leh mal nei lova ka talkual sek lai chuan, nachhawkna sâng ber pawhin ka natna a chhawk thei meuh lo chu a ni e.

Doctor leh nurse-in theih tawp tak meuhvin ka natna tih dam tumin ṭan an la a. He natna, ka nuna tel tura ka duh ngai hauh loh; mahse, min ei chhe mêktu vang hian eng tia rei nge kal thei lova ka awm dawn tih Pathian chauhvin a hria ang chu.

Mihringte beisei loh hnua che ṭhin chung lama mi meuh pawh dem a awl rum rum alawm le. Chuti chung chung pawh chuan ka natna in min hneh ang tih hlauvin hma lam pan dan tur ka ngaihtuah kual chiam chiam a, a sawt viau lo.

Damdawi inah thlahnih pum ṭhak beiseina nen ka hun hmangin, hmasawnna erawh hmuh tur a awm si lo. Ka vanglai ka hmang ve dawn chauh a, zan khat thilthu leka ka nun dan inthlak ta dawrh chu, hriat thiam tum țhin mah ila a harsa lam hret a ni.

Ka dam țhat laia ka tih țhin dan ang thovin story fb-ah thawnthu chhiar tur zawngin ka mit ka len leh ruai ruai a.

Natna khum aṭanga mi thawnthu ziah lo chhiar kual chauh hi ka tih theih tawk a ni miau va, ka lu leh bân a che thei lawi si a, nikhua ka hre kur bawk nen tihtur dang awm thlawt hek lo le, ka chhiar tawh hnu pawh 'ka nâ tlem tal min chhâwk mial mahna' tiin ka bih leh ta nge nge a.

Nachhawknain min chhawk chhung chu thawnthu chhiar nan hun ka khawh ral a ni deuh ber mai. Mahse, tu thu ziakin nge daih seng teh reng ang ni, ka hmuh theih ang ang chu kâr lovah ka chhiar zo ta vek a, tun hmaa ka chhiar tawh ho nen lam a bul aṭanga ka chhiar nawn leh ngat ngat hnuah ka hmuh theih chin chu a zo ta.

Thla thum hnuah damdawi in kan chhuahsan ve ta a, dam țha a chhuak ka la ni lo cheu. Zawi muanga in lama inenkawl turin doctor thurawn kan zawm mai chauh a ni. Treatment thar teh vak lâk belh tur a awm lo a, ka dam leh dam loh chu Pathian thu thu a ni tih kha a hun laia ka inhnemna awm chhun chu a ni deuh mai.

Pathianah chauh damna a awm tih hrechiangtu ka ni bawk a. Mihring tihtheih chin leh kan phâk tawk chu kan ti zo tawh a, ka hma hunah erawh beisei tur a vâng ta hlein ka hria a, ka beidawn ruk ngawih ngawih châng a tam ta mai, chutih lai chuan a ni; ka nuna thil danglam tak lo thleng chu!

Kan in lamah inenkawlin kum khat teh meuh pâwn pawh ka chhuak ta lo, țhian ka kawm ngai lo va, ka nun khawhar ru tak chu a tih reh dan ka hre der si lo. Mi harhvang leh hlimthei tak ni ṭhin kha ka nun a nguai zo va, midang pawh theih lohvin ka inkharkhip tlat ta mai!

Han ṭawngṭai ve țhin mah ila vawilehkhatah chhânna ka dawng chuang hek lo. Pathian lakah vui ngam tur ka ni lova, min dintu leh min siamtu a ni a, ka tana ṭha tur zawk a ni ang tiin ka pawm thiam ve ṭan ta a. Ka hahdam huai thei nia.

Ka natna in min kiansan meuh lova, zankhat chu ka ning lutuk leh beidawng lutuk hian story fb ah bawk min hruai lut leh ta a. Ka chhiar hnu mah ni se muhil thei miau hek lo le, ka en kual leh ta thuak thuak a, website-a pawn lam mi thuziak dahkhawmna ka hmu ta hlauh mai le! Rang mangkhengin ka chhiar ta a, chu pa thuziak chhiar khan ka tlaivar ta țhak a nih chu!

Chuti maia chhiar zawh chi ziazâng ni nghal lo chuan, nitin ka chhiar ta tluk tluk a, writer thiam tak a ni a, tun hmain a thuziak ka lo la hmu ngai lem lo va, chutia ka hmuh fuh tâkah chuan chin tawk nei lêk lovin ka bur chawt a, ka rilru pik leh natna min tlakbuaktu pawh kha ka theihnghilh ṭhelh nia!

Ka incheck up a hun leh chuan nidang angin ka ngui ta hauh lova, ka chhungte'n min hruai lai pawh chuan kha pa story ringawt khan ka rilru a luah a, min lo admit leh ta si! Ka thinrim zia kha. Damdawi inah duh angin phone khawih țhat theih hek loh ka thil chhiar lai a laklawh si a, zanah a rukin puan hnuaiah ka chhiar ru hrâm hrâm zel.

"Rafa, nizan khan i meng rei riauvin ka hria, i ke a na leh em ni?" Ka khum bula mu ve Biaki'n a tih chuan ka nui kar kar a.

"Na lo ve, story ka chhiar a," tih pahin ka phone ka lek lang zauh a.

"Eng story?" A ngaihna hriat loh hmel zeta a tih chuan, "Story fb a mi a nia, TKL" tia ka chhan chuan a bo hmel tulh tulh lehnghal.

'TKL' thawnthu chu damdawi in khuma mu ve dangho ka'n hrilh chiam ta a nih kha. A ziaktupain a tihtawp danah ka lung a awi thei ta ngang lo va, biakpawh dan ka zawng ta a, a harsa phian.

Facebook ațangin ka zawng ta ngat ngat a, a hming ang ringawt pawh an tam êm avangin tu ziah ber nge tih ka hre thei ta lawk lo va, a hming ang zawng zawng kha ka'n inbox ve țhuai a nih kha,"Mission ziaktu kha i ni em?" Tiin mi pali vel chu ka va zawt hman a, 'Mission' story hi kha pa ziah zingah khan ngaihnawm dangdai fâl ka tih ber a ni.

Ka beidawn tawh lamah a neitupa ka hmu chhuak ta hlauh mai le, ka lawm dan kha pui tak a ni.

A ziaktu dik tak ka hriat tâkah chuan ka thawveng huai mai. Ka biakpawh theihna tur number te ka dil hnuah leh a story dang ka chhiar theihna turte ka zawt nghal a, polite takin min hrilh thlap a, ama group bikah min add ve ta a, damdawi ina ka țhiante pawh hrilh vein kan hun awl leh remchang apiangah ka chhiarsak ve țhin ta kha a ni a.

Ka nat dan hi a lehlamah chuan a zia ang reng a, ka vannei phian! Ka kawng achin chunglam hi dam țha pangngai ang mai ka ni a, ka ke lam erawh ka hmang thei lo thung. Chuvangin damlo dangte ang lo takin ka duh tawkin a nâ a chhuah loh lai chuan phone ka khawih theiin ka țawng peih ve reng bawk a, a zia riau.

He pa story ka chhiar ațang hian ziah ka châk ve em em ta mai a. Mahse, ka thiam ka ring si lo. Ka țhiante lah chuan 'ziak ve chhin rawh i thiam ve mai thei asin' tiin min fuih phur nasa ta mai a, ka ngai thu tak lem hlei lo a.

Ka naupan lai chuan milem chhepui pui leh thawnthu fahrah tê tê te chu ka ziak ve țhin a. Tin, ka tleirawl laiin short story pahnih khat ka ziak ve bawk. Ka țhiante bâkin an chhiar paw'n ka hre ta lo.

"Damdawi in i chhuahsan hunah ziak ve ngei ngei rawh aw," Biaki nui var var chu lei ka chhuahkhum zauh a. Ani hian ka tuipui ve zia min hriatpui a, ka ziah thiam zuk ring tlat pek a!

"Ka ziak ve a nih phawt chuan inchhiar theih turin ka rawn ti ngei ngei ang," fiamthuin ka chhang ve ta tho a. Dik tak chuan kei, dam țha lo lehnghal hian ka ziah peih ka rin loh mai bâkah chutiang tur êm chuan ka inring tawk hek lo, ziaktu ni lova chhiartu nih kha ka duhtawk rih a ni ber mai.

"I lo ziak ta a nih chuan i țhiante damdawi in khuma mu te hi min hre ve reng țhin dawn nia, nang pawh mi thawnthu i chhiar vangin i natna i pawmzam thei a, khatiang chiah khan damlo dangte chhiar theih turin inbuatsaih ve rawh." Tia min thlahtu ka khum bula mu Maengi chu ka en deuh vang vang a, ani hi natna khirhkhan tak tuar ve mêk a ni a, hlim takin kha pa story kha a chhiar ve țhin a ni.

Chumi hnu kar hnihnaah chuan in lamah kan inla chhuak leh ta a, ka ke erawh ka hmang thei ta chuang lova,  ka room hi ka khawvel a ni a, Pathian hnenah pawh, "Eng dinhmunah pawh ding ila lawm zel nun min neih tir rawh," tiin ka țawngțai fo țhin a, abâk inghahna tur leh beisei ka nei hek lo.

Mihringte tihtheih loh titheitu Pathian nung kan nei a, mite anga piangthar țha hluah ni lo mah ila, ka beidawng ngai ta lo. Ka natna hian Pathianah beiseina thar min siam zawk a lo ni.

Damdawi in lama ka țhiante nen pawh kan inbe ve fova, thawnthu lamah kan tawp leh nge nge țhin. Keimah vang hian an chhiar hrât ve phah vekin ka hre nghe nghe.

Chutia natna khuma mu reng ta leh țhian pawh kawm ngai ta lo chu ka thluak ka hmang rim em em a, kil tin kil tang ațangin story ziah ve dan tur ka dap kual char char a, ka țhiante tâna ziah ve kha ka tum ruh tlat a ni.

Ka writer ngaihsan em em pa nen pawh khan a khât mawi tawkin kan inbe ve zauh zauh a, Pathian leh ka chhungte tih lohah chuan min fuihtu țha ber a ni ta a, thuziak mi tih takah țawngkam dam thlap leh fel fai thlarha min fuih hi chuan beiseina thar ka nei nasa sauh țhin bawk.

Khua a var a, ka natna bawkin min delh rit leh țhin, dam ka thlakhlelh loh châng a tam a, khumah ceiling melhin mit khap miah lova rei fê awm te ka ching bawk. Chung hunah chuan ka thawnthu chhiar țhin kha ka ngaihtuah kual chiam a, chhiartu ni reng lo hian ziaktu nih ve theih ka châk em em țhin a ni.

Zan a lo ni leh a, natna avang bawkin ka muhil thei leh si lo. Hetiang hun a lo thlen apiang hian mahni inkhawngaihnain ka khat a, lungngaih loh tum eng ang mah ila mihring ka nih miau avangin ka nun a chau leh țhin a, țawngțaiin ka nun hlim taka natna khum ațanga ka hman ve theihna turin ka dil fo țhin.

Chutia rilru khawhar leh baihvai taka ka awm lai chuan story fb, story writing competition a awm dawn tih ka hre ta a, a tir chuan eng teh ualah ka ngai hran lo; A chhan chu ka tel vena turah ka ngai lo va, mi thuziak chhiar kha ka tan hahdamna chikhatah ka ngaih deuh vangin, 'a thar chhiar tur a awm leh dawn tihna a nimai' ka lo ti rilru mai mai zawk a.

Mi story ka chhiar kual zut zut lai chuan damdawi ina ka chhar thar ka țhiannu khan min rawn call ve hlawl mai a, "Rafa, competition-ah khan tel ve rawh," nui uar uar chunga min lo biak chuan, "A chi loh lutuk ka zak e a," tiin ka chhang liam satliah a.

"Ho lutuk, pakhat tal ziak ve la, damlo ho pualin," a tih leh chuan, "Ka lo tum dawn nia," tiin kan inthlah ve ta tho a..

Chumi zanah chuan ngun deuhvin ka ngaihtuah ta a, natna khuma mu tam takin a ngaihnawm emaw ngaihnawm loh pawh ni se intih thawven nana chhiar tur kan duh țhin zia kha ka ngaihtuah a, ziah ve ngei ka tum ta a ni.

Eng lam nge ka ziah ang? Tih kha ka rilru luahtu ber a ni a, ka thluak a chawl meuh lo chu a ni e. Tlaivar deuhthaw a ka ngaituah hnuah ka tuina ber M&B story ziah chu ka ti tlu ve ta a, chu lam hawi chuan ka thluak ka hmang țan ta.

Chapter khatna ka'n ziak țana ziah a har țalh țalh khawp mai, ka ti hleithei der lo! Mi story ka chhiarte ka ngaihtuah kual thul, ka beidawng nghal titih der!

Ka rilruin ka țawngțai ta ringawt a, eng lam hawi pawh ni se Pathian hnena hlan hi ka tih tur a ni, a tê tham viau nâa ziak thei tura thluak min petu chu amah tho a ni tiin ka ngaihtuah lo thei lo.

Chumi hnu chuan uluk leh chîk zawkin thawnthu ka ngaihtuah ta a, hmanlaia M&B ka chhiar tawh a bu bo ta daih kha ka ngaihtuah chhuak a, ngaihnawm ka ti hle nghe nghe a ni, chumi behchhan chuan ziah ka tum ta a, a bu hmuh tur awm tawh miau hek lo î, a story kalphung ka la hriatchhun leh ka thluak țang kawpin ka ziak ve ta rawih kha a nia.

Tichuan tluang takin competition atana ka inbuatsaihna thawnthu chu ka ziak zo ve ta a. Hetih lai hian ka natna kha rawn zualin nachhawkna nen ka țangkawp takmeuh meuh a ni.

Țawngțaina chhang țhintu kan neih tlat avangin ka natna tam zawk theihnghilha ka ziah țum lah a tam! Nuamti takin ka type mial mial mai a ni.

Mahni inrintawkna ka neih lo êm avangin proof reading min neihsak turin ka writer ngaihsan deuh pa kha ka be ve ta rawih a, a ni'n ka din hmun min hriat thiampuiin țhahnem ngai takin min hrilh ta koh koh a, ka tan malsawmna a ni ringawt mai! Ani min puihna azarah ka peih fel ve ta ap mai le.

"I ziah dan kalphung hi ka ngaina hran lo va; mahse, a țha thawkhat viau e, țan mar i ngai bawk," tia min hrilh chuan ka lawm ve viau.

Ka post ṭan hma hian kan webmaster pawh vawi hnih vawi thum ka va be ve a, a ni'n dawhthei takin post dan tur chungchang te pawh min hrilhfiah a, a fakawm ka ti hle a ni. Mi 'talent' inthup hai chhuahna kawnga hma latu ber a ni a, hetianga story competition siam nachang a hria leh story fb group changtlung tak hi chhawr ṭangkai pawl ka ni ngeiin ka ring bawk a, a chungah pawh ka lawm hle a ni.

Competition huang chhungah ka lut ve ta ngei a, ka rin phâk bakin min hlutsak tih ka hriat phei chuan ka lawm ru veng veng nia.

Ka kein kal thei lo mahila Pathian tih lohvah chuan ka natna min chhawktu ber leh hlim taka hma lam min pan tirtu chu, ka thawnthu ziah hi a ni. Reader fel tak tak ka tawng chho zel bawk a, anni'n thu țha tak tak hmangin min fuih ve reng bawk nen natna khuma mu mah ni ila, ka nun a hlim ru viau thung!

Competition ka fight chhung zawng hian mak tak maiin khaih lak nei miah lovin zan sawmpakua zet ka post a, ka natnain min dâl hek lo. Injection leh eng emaw neuh neuh chu awm ve bawk mah se min tibuaitu em em a awm miah lo nia maw le!

Ka beisei loh takin leh ka phu vang ni hauh lovin lawmman pakhatna ka'n la zui ta a, damdawi ina ka țhiante kha kei aiin an lawm zawk emaw tih tur a ni a, mi ngaihah eng teh ual ni lo mah se keini dam țha ve lo leh damdawi ina awm ve reng reng tan chuan a aia lawmna tur kha avâng ve viau a ni.

A chhan chu an tan story ka ziak ve thei dawn tih ka inhre tawh tlat a, natna leh lungngaihna, beidawnna kârah pawh lawmna tur tlêm tê kan la hmu ve thei tal a, Pathian min țanpuina ka ti lo thei lo a ni.

Kan nunah eng harsatna pawh thleng thei a ni a, natna khirhkhan tak pawh kan tâwk thei. Mahse, he'ng kan natna te hi inawpbeh tir mai lovin, Pathian hnenah kan kawng tur min kawhhmawh tura kan dil fo hi a pawimawh hle tih ka hriat chhuah belh bawk a ni.

'Nangni thawkrim leh phurrit phur zawng zawng te u, lo kal ula keima'n ka chawlhtir ang che u' titu kha ala pangngai reng a, ani hnena in tûkluh hi kan thlarau leh taksa damna a lo ni reng zawk alawm le!

Eng dinhmunah pawh ding ila, lawm zel nun neih leh beidawng mai lova amah rinchhana kan kal phawt chuan hlawhtlinna a awm tih ka hriat phah bawk.

Tunah chuan ziaktu dangte tlukin thiam ve lo mah ila, keimah anga natna tawk ve leh beidawng ten an chhiar ve theih tura ka ziak thei ringawt pawh hi vannei ka inti a, ka lawmna ber a ni fo țhin.

Ka story min chhiarsaka min hlutsak tute in zavaia chungah Pathian hmingin lawmthu ka sawi takmeuh meuh a ni.

Eng harsatna nge i chungah thleng tih ka hre hauh lo nâ a, beidawng lova min siamtu leh min dintu rinchhana kal hi a lo him ber mai. Engkim neitu leh hre fai vektu hian i mamawh engkim a nei tih theihnghilh ngai suh ang che.

"I awm dan tur chu Lalpa chungah nghat la; Amah chu ring la, aman a ti vek ang,"

Damlo te leh damlo awmpuitu te tana damlo vêkin ka ziak thei hi ka lawmna tizualtu a

ni...

Damdawi ina ka ṭhiante leh damlo khuma mu, ka thawnrhu ziah chhiara ngaithlatute zawng zawng Lalpan vêngin awmpui zel che u rawh se.


©<++++[BeckirafARenthleI]++++>®