CHAN LOH KHAN [A Becky Rafa Stories]

MY BIRTHDAY GIFT

Becky Rafa Renthlei.

"Din, Bawihteii ka siam chhungin lo inbual la," Ka pasal khuma Coc khela bawkkhup lam hawi chuan ka nûr nâng a. Kum thum pum țhak kan innei ve tawh a, kei aiin a upa zâwk tak nâa naupangchhia deuhva chêt chang a ngah khawp mai.

"Umn, lawk aw," tihpahin a phone bawk chu a buaipui zui leh zat a, ka nui ve tawp. Amah hi hmelchhia ti a sawi tur a ni hauh lova, a țha uchuak hek lo; a cool ruih thung.

A bula kan fanu naupang zawk Christy mu chu a rawn nui chhuak ve hak hak a, a pa nen hian khumah tihian an in awm ve mai zel a, a tlei ve viau bawk.

Kei erawh Angel-i buaipuiin zing ațang khan ka la buai char char a, dik tak chuan kan fa hmasaber a ni a, kan duat lutukna lamah hian a pangchang vek tawhin ka hria. Tú hmuh hmasak ber a lo ni bawk nen engkimah a filawr fai vek a, a nau Christy nen hi chuan inthlau tak an ni.

Vawiin hi ka birthday a nih vangin ka pasalin min lawmsak ve ngei a duh a, kan chhungkuatêin kan chhuak ve dawn a ni.

Kei hi Lalneihsangi ka ni a, 'Maneih' tia koh ka hlawh ber. Min hringtu ka nu erawh chuan 'Mate' tiin min ko daih a, 'Mate' ti a min ko an awm chuan ka nu ka hrechhuak ve ziah!

Angel-i ka buaipui zawh hnu chuan a nau zawk Christy bual tumin bathroom-ah ka lut a, khawi hmunah pawh chhuak dawn ila ka fate ka hruai dawn a nih phawt chuan anmahni ka siam peih hmasa vek țhin. Chumi hnuah muangmarin keimah ka inbuaipui ve chauhva, ka fate pahnih hi a hmasaah ka dah zel țhin bawk.

Kan fate hi an fel riauva, mi fate tluk mah suh se, kan nupa mitah chuan an mawiin an hmelțha ber ka ti ve tlat tho a nia, hah! Ka rila rah ka hrin kha anni miauva..

"Duhtak, Christy kha chu a pi te bualtir mai la, kan tlai lutuk ange.. " Dina, bathroom-ah rawn dâkin nau bualna tur ka lo siam mawlh mawlh lai chu min thlir vung vung a.

Naupang han tih vel a thiam khuchûk lo nâin a fate pahnih erawh a duat viau. Nestogen hnè ve ve annih vang hian zan mutnaah an khirh deuh țhin a, apa hian phunnawi miah lovin mutchhuak chung chunga a buaipui châng lah a tam. Ka pasal nge nge țawng duah lo mah se ka thlamuanpui ve viau a nia.

"Ah..ka bual thei alawm, nangmah kha fai lutukin lo inbual la anih chu.." ka nui sâng a, Christy ka buallai chuan khawdang hawi miah lovin min en deuh reng a.

"Nû tak tak i ni ve ta, kum 28 i tlinna champha hi kan chhungkaw bil chauhva hlimtaka hman i phu a ni." Zawi supa atih chuan ka melh chho hâ a, engvanga rawn sawi ngawt nge a nih tih erawh ka hrethiam chiah lo.

Nitin office kalin min chhuahsan ziah a, keiin inlamah a țul țul thawkin ka fate pahnih ka buaipui bawk a, dik tak chuan ka hah țhin. Mahse, 'mo' ka ni a, ka tihturah ngaiin phunnawi lovin ka thawh theih ang tawk hi chu î he lova thawh mawp mawp kha ka tih theih tawk a nia, ka vui lem lo.

Christy thawmhnaw ka thlâk lai chuan a pa pawh inbual turin bathroom-ah nui suk suk chung hian a lut ve ta a. Kan nufa inbuaipui lai kha ngawirengin min thlir tih ka mitsirin ka hmu reng. Tukin chu kan boruak pawh a hahdam raih mai! Kan inhau reng tihna phei chu a ni lo.

Naupang pahnihte chu khumah awmtirin dressing table hmaah ka țhu a, Angel-i hi a fel ru riauva a nau thlaruk mi lek hi a awm thei phian! Khumah toys khálin an nui ve ar ar a, ka pasal leh ka fate hi ka tan chuan hlu hleuh hleuh tak an ni.

"Duhtak, inhnawih nasa lutuk lo la," ka pasal inbual zo chu ka hnungah rawn dingin darthlalanga ka hmel lo lang chu a thlir ve reng a.

"Hah! I tan vek alawm ka inchei," ka fiam lêt ve zauh va. Engang pawhin inhnawih nasain inchei mah ila, a uchuak chin erawh ka thliar thiam ve tawk chuan ka hria, chutiang chiahin ka pasal pawhin a hrethiam bawk.

Veng dang ațanga mo ka nih vang nge ka inchei dan chungchangah mi an sawi peih riauva, chu erawh ka helh châng a tam ve mai, ka sawi chhuak ngai zen zen lova, ngawirengin ka tih țhin dan ka țhulh duh chuang der lo. Nu nih vanga țawp taka awm hi ka ngaithei der lo, keimah kha ka ni miau va.

"Ka tan i inchei chiah maw!?" Dina nui tut tut chu ka chhiatkhum zauhva, "Nangpawh ka tan a ni lawmni i inchei?" Ti a ka zawh lêt chuan a lu a bu nghauh nghauh a. Ka pasal a ni na vang vangin ka chhuang ve êm..

Ka mit ka hnawih hlarh hlarh lai chuan, "I birthday present-ah eng nge i duh le, ka phâktawka țha pek ve ngei che hi ka duh," Dina hmel thutak rân chu ka en a. He pa hi eng nge maw a hriat  le? A thutak ru riau..ve lutuk a!

"Enteh..chutiangah i rilru tibuai duh suh," ka ti ringawt a.

"Tihbuai lam a ni lo, kum thum pum hlum min enkawlin i phâk ang tawkin min ngaihsak a, kei hian thil liantham leh sawitlâk i hriatreng tur chi tihsak ve ngei che ka duh.." ala ti hrâm a.

"Awle, ka sawi anga min tihsak loh vaih.." tia a nghawngah ka kuah chuan maktiin a mengphar âwk a!

"Umn..sawi rawh le."

"Ka pasal niin ka tan rinawm takin awm la, kan fate pahnih leh lo la piangtur thlengin pa țhatak niturin ka duh che a ni. Kum 28 hmalam zawng kha theihnghilh vek lo mah ila, vawiin ka piancham lo thlengah hian kan nupaa bul țan țhat leh ka duh, i thei angem?" Thutak zeta ka zawh chuan a rilru a khawih deuh nge a ngawi vang vang a.

Min chhâng dawn tawh lo emaw tiin ka kuahna chu ka phelh a, inlak hran tumin ka che deuh hrat a, ka kawngah rawn vuanin, ka mitah chiang takin min en kalh a, "I thil min dil chu ka rin loh lam daih a ni, i tân hun ka nei tam lo tih pawh ka hria a, min ngaidam ang che, kan inneihna hi ngaiah ka lo nei deuh atin ni!" A mittui a tling deuh tlata ka hriat chu le..?

"Eng thilpek mah ka duh belh lo, fanu pahnih țha tak tak min pe a, Pathian hmaa kan thutiam kha hei aia nasa hian chhawm nung ila chu chauh chu a ni i laka ka duh chu.." ka ti leh sap a.

Chutah zawng insum thei lovin amah si chêtin min kuah a, "Ka dam chhungin i tan leh ka fate tan chauh ka nung tawh ang, i diknaah chuan i lam ka țang zel bawk anga, ka chhungkua chu nang leh kan fate pahnih hi an ni." A sawi zawh chuan duhthawh takin ka hmuiah a rawn fawp vang vang a, ka chhungril a hlim veng veng nia.

Nupui ka nihna angin ka pasal lakah gift mawi leh țha siamchawp, pawisa a lei ngai, ral leh mai tur dawn ai chuan tuna ka dawn hi ka tân a hlu fê zawk.

Pathian hmaa kan thutiam 'I hrisel leh bawrhsawm pawhin, i pachhiat leh hausak pawhin kumkhuaa ka nupui ni turin ka tiam tlat e' Pathian leh min țawiawmtu mipui te hriata kan thuchham kha ka bengah chiangtakin a rawn ri nawn awn awn a, ka mittui a tling pap thei maw le.

"Â nu, Christy a ril ațâm a nia, engtikah nge kan chhuah dawn?" Angel-i țawng lang lang ri ka hriat chuan kan inlahrang dun vat a, inthurual ang maiin khuma kan fate pahnih awmna lam chu inkai rialin kan pan ta a.

Ka piancham thilpek a ka dawn zingah ka pasalin tuna a sawi zawh chiah tluka ka thinlung tawk thei thil kha ka la tawng lo. Ka hmangaih ang chiahin ani pawhin min hmangaih tih ka hriatna hian min ti lawm ru veng veng a ni.

Chumi hnu chuan hlim leh engthawl takin Elite hotel lam panin kan chhungkuain kan inphur chhuak ta a.

Nupa hi kârah fate an awm tawh chuan inngaihthah a awl riauva, mahse, eng hun pawh nise kan tuaithar leh fo țhin hian chhungkua leh keimahni ngei pawh kan hlim zawk a lo ni...

Dated: 17th February 2018

©<++++[BeckirafARenthleI]++++>®