ENCHANTE LOVE SORENO
(Quieres Casarte Conmigo?
Becky Rafa Renthlei
Chapter-19
City Hospital
Los Angeles(LA)
California
Friday 2:00Am
Jerome Evans
"Mr.Evans, engmah ngaihṭhat lohna tur a awm lo a nia, i nupui hi a thâw a hah mai a ni, hei chu naupai eng emaw zat ten an nei fo ṭhin a, amaherawh chu a 'heart rate' ala sâng riau mai a, oxygen kan pe mêk e," Doctor-in min thlamuan tum taka a tih chuan ka thla a muang chuang lo.
"Ka lawm e, Anna, a naupai a ṭha em?"
"I nupui dinhmun a zirin kan zai nghal chûk chûk mai thei bawk a, hetiang dinhmuna a pai tlang a nih chuan a tân pawh hlauhawmna chen a awm thei a, thlasarih te chu zai dawn rau rau chuan a fuh ber, thlariat a tlin erawh chuan naute a 'no' leh tawh si a.." tiin coffee thlitsa chu min pe a, a thusawi chu ka beng rawngah a luh pawh ka hre lova, ka thluak a buai mup.
"Tunah zinglam dar hnih a ri tawh ania, darkar thum lai helai hmunah hian kan awm tawh a, zai ngai a nih leh nih loh i hrechiang thei lo a maw!?"
"A heart rate a sâng ka tih chu Mr.Evans, nangmah ngeiin i duh chuan va hmu rawh mahse, minute nga bak awm a rem lo ang," Dr.Anna nen ka nupui an dahna pindan chu kan pan ta a.
Amelia chu khumah a lo mu bâm a, a maimitchhing tlat a, a mitmeng pawh ka hmu thei lo, a hnarah oxygen an pêk avangin a hmai pumpui pawh a lang kim hek lo. Hetianga a awm chhan hi mi duham lutuk Ramon Salia leh Eliaz Sanchez vang a ni, a tawp thleng turin ka inbuatsaih dawn nge, ka nupui dinhmun ziaawm hun ka nghak dawn!?
Amelia kut vawt ngiai chu ka hûm vang vang a, chak taka awm duh mi a ni a, zanin te khan hruaichhuak lovin Penthouse-ah lo awm mai mai ila hetiang dinhmun tehhrep hi kan tawng lo tur. Thil sâwt tawh lo ngaihtuah vak vak chu duh lo vin ka lu ka thing a, a biangah dimtê a fawpin ka chhuahsan ta a. Ka en rei thei ngang lo chu a ni e.
Ka engkim, ka hlimna leh lâwmna, min nuihtirtu leh min tithinrim ṭhintu, ka hausakna it ve miah lova, keimah chauh min ngaihven ṭhintu leh ama hlimna tur pawh ngaihtuah hmasa lova a nu leh pa venghimtu, mahni invêng thei khawpa luhlul leh kawlhrâwng Amelia kha khumah he khawvel eng hmu miah lo ang mai leh a pum chhunga naute pawh hrechang lêk lo ang maia chak lovin a mu a nia! Ka lung a awi thei hlawl lo.
Joe an dahna cabin-ah ka lut leh a, Ignacio chu khum bulah lo ṭhuin a indawm kun lap a, ka thâwm hriain a rawn dâk chhuak ta a. A mit sen râm aṭang chuan a ṭap a nih loh tal pawhin a thinrim hle tihna a ni ngei ang. Joe, Sam leh Ignacio hi unau ang maia in en anni a, an induhsak hle bawk.
"Jefe..!"
"Mateo, hahdam tum rawh, Sam ka be pawp tawh a, tunah LA panin a rawn thlâwk mêk, kan hmeichhe pahnih te erawh chu kârkhat chauh training hmabâk an nei tawh a, awm tluantling law law rawh se," khum bula chair chu pawt hnaiin ka ṭhu ve nghal a, Joe dar dinglama silaimu tâng an phawrh chhuak tawh a, hliam dang a nei lem lo.
"Jefe, engtia hmalâk nge i tum, Ariana Gonzalez puihna ka ngen mai dawn em ni ang."
"Ni rih lo e, Joe leh ka nupui dinhmun a ziaawm hma chuan eng inbeihna mah awmtir ka tum lo." Tiin Joe hmel dâng lap leh a hmui duk deuh chu ka melh vang vang a, ka nuna mi pawimawh pahnihte hliam tawrhtirtu hi ka chhuah tawp lovang, ka sum zawng zawng pawh khawhral ngai mah se a tawp thlengin ka bei dawn a ni.
"Ariana chuan min pui hreh hauh lovang, mahse, 'World Tour' neilai a ni a, dinhmun hlauhawmah a ding thiang lo a ni, a fans te an khawngaihthlâk lutuk ang," ka tih chuan Ignacio chu a bu nghat nghat a. Ariana Gonzalez hi ka bestfriend kumhlun a ni a, 'Shadow of the life' band-a an vocalist a ni. A lâr hle bawk. Mafia boss Mr.Templeton-a fapa neihchhun a ni tih ka'n sawi lang tel hrâm ange..
"Madam leh Joe ka lo awmpui anga, reilote mut hahchawlh tum la," Ignacio a ṭawng mawlh mawlh lai chuan ka bodyguard dangte an lo thlen belh a, ka nupui pindan pawnlamah pahnih duty tura ka hrilh hnuah, hospital lobby panin Ignacio nen kan inzui chhuak leh ta.
Ruahmanna felfai zawk kan siam angai a, heti ringawt chuan Ramon Salia hian a sual chhuahin a inluling tulh tulh bawk si, Los Angeles Metron lamah report kan theh lut tawh a, an chhui ṭan mêk a ni. A hma khan report tumna ka nei lova, ka Estates chauh neih a tum lai kha chuan ka ngawi mai ṭhin; tunah erawh ka ram mai nilo ka nupui thlenga min chuh ta hi kei, 'MJS Company chairman Jerome Evans' hian ka palzam thei tawh lo a ni. A tlâwmthlâk lutuk ka ti ve deuh ta.
"Sir, i nupuiin nau a vei tlat mai!" Hmanhmawh lutukin nurse pakhatin min lo hrilh a, Ignacio-a makti hmel ang tho hi ka landan anih ve tho ka ring! A nau neih thla pawh va ni suh!
"Eng thil nge i sawi, tunah thlasarih chauh a nia..." ka ṭawng zawm leh hmain, "Jefe, inbengdai rawh thil awm thei a nia lawm," tiin Ignacio chu arawn inrawlh vat a, corridor reh ruihah chuan ka aw kha aring viau a nih ka ring, mihring awmchhun te chuan kan awmna lam an rawn hawi a.
"Min lo zui rawh u," hmanhmawh taka nurse kal chu Ignacio nen kan zui a, Joe erawh a muhil rih tho a, midangin lo awmpui phawt mai teh se.
Amelia pumna tâl vel ka hmuh chuan ka chhungril engtin emawni a awm, ka kut pahnih chu hûmin ka lo ṭang ve nasâ! Amah lah chu oxygen pêk ala ngai bawk nen hmuh a hrehawm kher mai, darthlalang phen aṭanga en mai kan ni a, a chhungah luh theih hek lo le..
'Operation theatre of Pregnant' tih intâr kulhna a, Amelia an nawr luh lai chuan Ignacio-an ka kutah nghet zetin a vuan a, eng thu mah a chhâkchhuak lova, a mitmenga min thlamuan a tumna erawh chu ka chhiar thiam ve mai.
'Lalpa ka nupui venghim rawh' tih chiah hi ka sawi theih tawk a ni.
Ani thawhah lehnghal, chutah zai ala ngai zui dawn a nia, a dinhmun a ṭhalo tih hrilh hranpa ngai miah lovin ka hrethiam vek a, Amelia tellova nun hmang tura ka indah chhin ringawt pawhin ka khawvel a tawp ve mai dawna hriatna ka nei.
"Jefe, lungngai lutuk mahta che, engkim a pangngai leh vek mai ang," Mateo ṭawng zawi sup chu ngaihthlâk a hahdam ngawt mai, unau pianpui ka nei lova, ka nu nise kum riat ka nih laiin a boral tawh bawk. Ka pa Juan Evans tân theihtawp chhuahin hna ka thawk ṭhin a, ka pa hmangaihna bâk ka dawng ngai hek lo. Hmeichhia ka lo kawp tawh ho pawh ka sum leh pai it anni tlangpui a, Amelia ka tawn aṭang chiaha ka nundan inthlâk danglam ta hi keipawhin mak ka ti fo ṭhin.
Ka phone phawrh chhuakin Ignacio ka pe a, "Ka pa call la, Felipe Lopez pawh chanchin kimchang i hrilh dawn nia," tiin Hospital pawnlam chu ka thlirsan ta daih a, ka kawchhung tâwt phui muk leh ṭangmar at hi Amelia dinhmun a ṭhat hma chuan reh thei dawn lo.
'Amel, i thi tur a nilo, ka hmangaih thu che pawh ka la hrilh lo che a nia' ka ngaihtuahna bing mup tihreh tum chuan chunglam ka melh kâwk a, Ramon Salia leh a ṭhuihhruaite hi ka that chimit vek a nih loh chuan 'Jerome Evans' ka ni lo tihna a ni ang.
"Jefe, Sam an a be duh che.." Ignacio-an phone min rawn pe a.
"Sam, eng nge ni ta!?" Ka aw ṭial zawi ruih chuan keima aw anna reng a nei lo.
"Jefe, darkar thum hnuah ka rawn thleng dawn a, hospital-ah ka lo tlang dawn nge, ruahmanna thar siam i nei em?" Lehlam aṭanga Sam aw fiah fai zet chu a ngaihthlak a hrehawm loh khawp mai.
"Thlawhnaah khan muthilh tum la, helam i lo thlen hunah chuan chawlh hahdamna hun i nei lo maithei a nia, hospital i lo pan nghal angai ang." Ka tih chuan "Yes, in enkawl ṭha rawh aw.."
Sam nen kan inbiak zawh hnuah Joe awmna pindan panin kan phei leh ta a, ka nupui an zai chhung hian ka â hman takngial dawnin ka hria! Sana ka bik sek a, hun lah chu a kal muang ropui si!
"Jefe, Joe a harh a nia," Ignacio chu ani leh ni lo angin a phûl hlut a, nurse ko turin a tlânchhuak zui a, Joe pawh tun aṭang chuan ka bodyguard ang nitawh lovin ka unaupa angin ka en tawh ang, chutiang bawkin Ignacio leh Sam pawh..
Ka hmelma te bei tur hian bodyguard aiin ka unau tharte nen ṭanrual a awl zawk ngei ang.
"Jefe..!" Joe min ko ri ka hriat chuan ka panhnai vat a.
"Joe, chhel takin aw.."
"Jefe, pawi ka ti lutuk, ka invêng hman ta ngang lo a ni," harsa tih hmel zeta a ṭawng chuan a kutah vuanin, "Ṭawng tum rih suh, i dam ngei angai ania O'Hara," Tihpahin a kut chu nghet takin ka hûm a, thei leh thei lova a ṭhen sak sak chu ka lainat kher mai.
Silaimu pahnih dawng tura chak tâwk Joe O'Hara hi ka ngaisâng tih ka pha buai lo mai ang.
"Ka nupui an zai mêk a, inpahnih hian ka nun a mi pawimawh ve ve inni tih theinghilh ngai suh," ka tih chuan a mittui a khap per sak.
"Ma'am chu a ṭha maw!"
"Ṭha lo, a dinhmun a ṭha hauh lo," diktakin ka chhang a, Joe hmela thinrimna lo lang chu ka hmu reng, a pi tân hian thih pawh a huam hial ang tih ka hria a ni.
After 3 hours
City Hospital
5:00Am
Saturday.
Sam leh Ignacio chu inkuah rialin Joe pindanah an lo lut a, Amelia erawh an la zai zo lo fo! Doctor sawidanah oxygen pêk lai a ni a, hmanhmawh theih a nilo tiin nichin mai khan min rawn hrilh a, thisen unit hnih an pe mêk bawk.
Mipa ka nih ang ngeiin ka buai phili chung lova, kan chunga roreltuin kan awmdan tur chu a rel fel mai ang tih hi ka innghahna neihchhun a ni.
Ka hmangaih min lâk bo sak tur khawpa nunrawng lah a nih ka ring hek lo.
"Jefe..!" Sam chuan min kuah thuak a, chau hmel pawh a pu eih lo nia, Sam nge nge a ṭha ṭhin a nia!
"Tluang taka i rawn thleng thei chu a lawmawm kher mai," tihpahin ka kianga ṭhutna awl chu ka kawhhmuh a, Joe hmai bulah kun hniamin, "I bialnu tân dam ngei a ngai a nia, chuti lo zawng nangmah thehthal thei tur khawpin training a dawng ṭha a nia," Sam fiamthu thawhah chuan Joe chu a nui vei suk a, Christy nge Jacinta zawk tih pawh ka hriatpui ve lem hlei lova..
"Ka thusawi tur hi ngun takin ngaithla ang che u, tun bâk sawi nawn ka tum lo a nia," ka tih chuan min en ṭhap a.
"Yes, Jefe.." anti rual dial!
"Tun aṭang hian nangni pathum hi ka hnuaia thawk ni tawh lovin, ka unaupa angin ka en tawh dawn che u a, nangni pawhin chutianga min en theih chuan a lawmawm khawp ang." Ka sawi zawh ruala an makti hmel chu hundang nise ka nui nghekin ka ring.
"Mahse, Jefe.." Ignacio an atih chuan, "Jefe, tih erawh nangni aia ka upat avangin in hmang zui thei ang, ka hminga min ko duh zawk a nih pawhin hnialna ka nei lo ania," ka tih chuan a naupang ber Sam chu a nui huk nia.
"Eng nge!?" Sam melh paha ka tih chuan, "Jerome tiin nge kan koh dawn che 'Mouri' tiin," fiamthu titak deuhva tiin a la nui ṭhu a, Amelia minti hrechhuak zawk nia.
An pathuma hlim hmel ka hmuh hian ka thutlûknaah ka inchhir ngai lovang tih ka hria a ni.
Sam chu thil thlen dan leh kan boruak vel Ignacio an kimchang takin a hrilh a, Joe nen ngun takin kan lo ngaithla thung. Ka nupui chungchâng a hrilh lai a, a hmel chang rût chu hmuh a nuam viau lo. A dar pharh hlai ṭha zet chu a sawi nak a, tualthah duh mai hmel a pu hial alawm le!
Joe awmna pindan kawngkhar a rawn rik rualin kan hawi nghal ṭhap a, nurse têreuhtê hi nui sângin a rawn lut ta.
"Mr.Evans, i nupui an zai zo tawh a, kan rawn dah chhuak ṭêp, chuan nau.." a sawi zawh hma hmain Sam chuan, "Naute a ṭha em? Mipa nge hmeichhia..?" alo ti hmanhmawh a nurse pawh a nui tawp!
"Mipa 2kg leh 100gram a ni e, naute en nân minute thum hun in nei," atih chuan kan ding rual suau a, Joe pawh thawh ve tumin a insehruh nasâ! Mahse, a tân tih chi rual a nih loh avangin lungawilo zetin lukham a delh riai riai a, ka khawngaih angreng.
Naute hmel ka hmuh ruala ka hlimna ang hi engtikahmah ka nei leh tawh pawhin ka ring lo, a mitmeng buang thak chu ka neih ve loh a ni. Amelia mitmeng chiah chiah ani a chhun ni, a vun no chek thisen kai niai chu tenna pakhatmah ka nei lova, a sam dum hlap erawh chu ka sam nen a inang tih ka hre mai.
"Hey, naute, min hmuh tawh kha aw.." ka tih chuan Ignacio leh Sam chuan ka â emaw anti ani ngei ang min en hau a, min hmuhdan kha ka hrilh dawn teuh lo, ka nupui nen chiaha kan hriat tur thurûk a ni.
"Jefe...!" Sam chu a nui suk suk a.
"Eng nge? A pa ka nia kan inhmu fo alawm," ka tih chuan Ignacio chu za lutukin a nui a, fiamthu ka thawh khât ve bawk êm a ni.
'Ka fapa' ka ngaihtuah zawng ringawt pawh hian lawm lohvin ka nui leh zêl! Amelia pawh ngaihtuahawm lutuk a ni lo tih kan hre leh zêl nen kan boruak hap a dang ta zar mai. Hmeichhia kha ka lo dil ve tlut tlut a, chuzawng kan Pathianin a remti lo a ni ange. Engkima lawm thiam hi a pawimawh ber.
Mahse, kan inneihna erawh a derthâwng ta tihna a nia, contract a tawp dawn tih ka thinlung hian a hria a ni. Chu chuan ka chhungril ati ngui sawt a, mah se ka nupui rilru hneh turin ka la dam tal alawm le.
"Sam, a thlâ kha lâksak la Joe i hmuh ve dawn nia," ka tih chuan nui sûngin a phone ah lai a phawrh ta a.
Amelia an rawn nawrchhuah lai chuan 'lobby' ah coffee kan lo in mêk a, kan hmuh an la phal ta lo fo! Thawhah a nih miau avangin chîmbuai an remti dawn lo tih hriatsa a ni a, naute pawh an 'up' tawh a, ala harh tlat loh avangin Amelia'n ala hmu bik lo.
"Jefe, i pa a rawn thleng ṭep, Penthouse lam aṭangin information kan dawng chiah e," Tiin Sam chuan coffee noruak chu dustbin-ah a vawm lut a, Joe pawh naute thlalâk an entir tawh a, a nui var var reng mai. Kâr hnih pum ṭhak up rih a ngai tih an sawi chuan ka hnual nghal rawih rawih nia.
"Jefe, madam lo harh hmain intifai ve zawk la, i lang pawr teh mai a nia, ka hruai ang che," Ignacio an atih chuan ka pawmpui viau, darkar thum hnuah damdawi hnathawh a reh chauh dawn a, doctor sawidan hi a dik a nih chuan ka haw hman zân tihna a nia.
"Yah, a ṭha e, shower neih ve zuai chu a pawi lo khawp ang, Sam, Joe kha i lo vil ṭha dawn nia.." tiin Ignacio nen hospital kan chhuahsan ta a.
Ka nupui kalsan ka hreh viau rualin tihtheih engmah ka nei lova, a lo harh hun a ka hmel hmuh a hrehawm loh nân leh nalh thei ang bera lan kha a pawimawh hmasa tlat!
Contract tawp lo tura hmâ la hmasa zâwktu tur chu keimah ka ni.
Saturday
Afternoon
City Hospital
Amelia Evans.
Ka hrawk thip hlur leh ka pum kham ṭhûm avang chuan ka mumang ram nuam tak chu chhuahsanin ka bula ṭawng thawm chu ka hre vuai vuai a, mit ka men hma hauhvin tu âw nge tih hrilh hranpa ka ngai hauh lo.
Ka pasal leh a pa Juans Evans inbe thawm a ni.
"Spain-ah kan thukru rih mai dawn em ni ang, amah nen inbia ula Hotel Enchante tluka ṭha a awm lovang," Juan Evans aw thûm bul bul chu ngun lehzuala hre thei turin beng ka chhi kar a. An thusawi awmzia hre mah suh ila buaina ala reh lo tih ka hrethiam ve mai.
"Amelia rawn harh phawt se, ka lo sawipui dawn nia, ka nupui leh ka fapa himna hi ka ngaipawimawh hmasa ber," Jerome-a ṭawngdan aṭang chuan kei hian fâ ka nei tawh tihna a ni chiang mai! Mahse, ka neih ala hun miah si lo! Ka chungah engthil nge thleng ta? Ka thâwkdan dik loh avanga hospital pan tura ka hrilh lai kha ka la hre ngei mai a, a bâk engmah hriat ka nei reng reng lo!
Mak ve! Ka thi tihna em ni, ngawiteh, mumang ramah ka la chêng em ni zawk, ka lo suangtuah ṭhin Vanram kawtchhuahah kha chuan ka awm lo chiang a...Jaja! Ka â deuh em mawni le!? Hremhmun lamah pawh ka kal chuang miah bawk si lo.
"Ka fapa, inbuatsaihna ṭha zawk nen Ramon Salia hi kan hmachhawn a ngai dawn a nia, detective pahnih chhawr belh leh la, engzata tam nge ṭhuihhruai an neih tih i hriat hmasak a ngai dawn a nia, chu'ng zingah chuan nula pawh an awm ngeiin ka ring a, hmanrua tur ngaihven tel ang che." Juan Evans an atih leh tâkah chuan kei hi ka thi lova, minung ramah ka lêt leh chiah zawk tihna a ni.
"Tui.." ka aw chu leh! Amelia aw a va'n ang lo deuh ve le..
"Duhtak, i harh em?" Ka ṭawng ri a zawi hle chung pawhin Jerome an a hre pha a nia! Ka meng chhuak ta riai riai a, ka khum bula ka pasal ding leh Juan nui suk chu ka hmu hmasa ber.
"Tui ka duh," ka tih leh chuan rang takin min lâksak a, "Âng rawh le, vawikhatah tam tak in phalsak i la ni lo a nia," tihpahin Jerome chuan ka kâ-ah tui a rawn far hlek a, ka lei pawh a tihnâwng tham lo. Ka hmui tep chap chap chung a ka ân leh chuan a hma aia tam zawkin a rawn chhung lut a, a phal tlêm ve hle mai! Tui mai mai pawh a ui ṭung tawh mai zawng a nih hi...
"Ka fanu, nâ i nei em?" Min en vang vang paha Juan Evans an atih chuan ka nui lui sak a, a hmel dam thlup leh thuneih hmel taka a hawi vel ka hmuh hian Jerome-a nen inang ka ti viau.
"Neih em em pawh ka hre lo," tiin ka chhâng sap a, "Ka chhuahsan ang che u, Joe ka'n tlawh ve lawk ange," tiin a tho a, Jerome an kawngkhar thleng a thlah hnuah khum bulah rawn ṭhu thlain, "Ka lawm e aw, fapa min pek avangin.." ati sup a, ka hmui ro zetah chuan dimtê-in a rawn fawp ta a.
"Maw! Fapa maw!?" Min thlah ruala ka zawh chuan a nui suk a, "Aw ni e, fapa i nei a ni."
"Ka hmu thei angem?"
"Ka hrelo le, a tê lutuka thla kim lova piang a ni bawk nen kârhnih chhung up tur a nia, Amel, i mit rawng ang chiah kha a pu ve asin," atih chuan ka en châk zual sauh nia.
"Tunah ka en duh," ti a thawh mai ka tum chuan ka pum a na nghal zawk mai!
"Tinge, ka pum.."
"Shh..i fapa hi zai chhuah alawm, indim hle i ngai a nia, khatia i chêt phut chuan a ṭhuina a peh mai ang," dam thluama tiin ka kawr hâk chu dimtê hian a hlim ta a, ka pum an zaina plaster-a inbel phui ka hmuh rual chuan ka thawchhuak nghal hap.
"Engmah ka hre ve miah lo hi mak ka ti!" Zawi sapin ka ti a.
"Nikhaw hrelovin i awm char char alawm, Amel ka mangan zia kha i hrethiam phâk ngai lovang," ka samah chûlin ka biang leh mit a chûl kual dan dan a, a mitmeng dam ruih leh ngilneihnaa khat hi ava'n thlamuanthlâk si êm.
"Doctor ka koh chhungin nangmahin i lo awm hreh em?" Min ngaihtuah tih hriat taka min zawh chuan 'aih' tih nan lu ka thing mât mât a.
"Ok..." tih leh kawngka lam pan a rual a, a taksa nalh zuih leh inkhaithli thlurh pawh ala pangngai reng e.
'Nu' diktak ka ni ve ta, fanu ka nei dawn emaw tiin ka lo phur ve viau kha a nia, fapa ka duh lo tihna nilovin fapa ka nei a nih chuan kan inneihna a tawp dawn tih ka hriat vang zawk a ni. Jerome-a leh ka fâ tello hian ka awm thei dawn em ni!? Teuh lo mai, ka awm thei chatuan lovang!
Ka pum an zaina chu ka chûl a, ka taksa a chhinchhiahna min siamsaktu ka fapa tel lo hian khawi hmunah mah ka kal dawn lo bur, beih lêt angai a nih pawhin thih ṭhak thlengin le..
'Amelia intichak rawh' tiin ka infuih ru sauh sauh ta a.
Jerome-a ruala doctor leh nurse pahnih an lo luh chuan ka lo nui sâng a.
"Mrs.Evans, i ṭhat hmel viau mai," doctor-in min check chhung chuan nurse kuta naute awm chu ka lo thlir veng veng a, a têt hmel hle tak mai a..!
"Tun ṭum chu dam ṭha varin i chhuak dawn nia, test eng emaw neih leh ala ngai dawn a, i fapa nen in chhuak rual dawn nia," doctor Anna ṭawng pawh ka ngaithla mumal lo.
Naute hmel ka hmuh chuan ka mittui a tling pam mai, a hmelṭha teh vur lova, a sam dum hlap leh a mithmul buk lam deuh chu a inhmeh reuh hle a, Jerome-a fapa tih a hriat hliah hliah, American mipa te nungchang ang hi a pu ve anih vaih chuan ka hrem nasa ngawt ang. Jaja! Awihawm loh lutuk! Kei hian duat chikimin ka duat dawn tih ka hria, ka fâ, ka rila rah kha a ni tlat a.
"A hmelṭha i ti em?" Jerome an min zawh chuan dar san âkin, "Hmelṭha ti a sawi tur chu a ni hauh lo, a hmelchhe chuang hek lo, tu emawni a ang!" Tiin ka nui var var a.
"Tunge a chhun a.." lungawi vak lova atih chuan, "Ele, Mourizo Soreno mawle,"
"Lopez leh!" Khumah rawn ṭhu thla ve in nurse pahnih ding reng chu a melh a, "Min lo chhuahsan lawk ula.." ati sup a.
"Mahse, Sir, naute kha.."
"A hunah in rawn la dawn nia, kan fapa alawm, atâna ṭha lo tur kan tilui duh hauh lovang," ti a achhân chuan an inmelh zawk a, room chu an chhuahsan ve mai!
"Awmtir ve mai mai tur che a nia," ka ti sap a.
"Sawi tur ka nei alawm khang ho hriat ve kher kha angai lo a.." a ti deuh hmuk a. Naute chu a bân sei thlurh chuan a kuah ve ngial a, a'n zei loh dan em em hi!
"Sawi la.."
"Karhnih chhungin venhimna uluk tak hnuaiah hospital-ah i awm rih anga, kan buaina kha i la hriatreng chuan nang leh kan fapa hi in him dawn miah lo, kei ka awm emaw ka lo thi palh thei bawk, tunhma ang kha i ni thei dawn tawh lo tih i hriat ka duh a ni, a chhan chu pakhat i nih lai kha chuan i inveng thei ngei mai, mahse, kan fapa hi venhim tel i duh ngei dawn a, bodyguard pawh i neih a ngai tawh dawn a nia.." atih chuan chhân mai dan tur ka hre lo.
"Jerome, i sawi awmzia hi..!"
"Hlauthawng suh, tunah chuan i kiangah ka awm alawm, ka theih chhung chu venhim zel che pawh ka tum, nichin khan ka sawi hmaih a, Joe pawh an kâp hliam a, tunah hospital-ah hian a awm ve mêk bawk."
"Maw! Joe an kâp maw!?"
"Yah..ngaihtuahawm chu a ni tawh lo, mahse, kan zavai hian fimkhur kan ngai vek tih sawi ka tum mai a nia, damdawi in kan chhuahsan rualin Spain-ah ka dah dawn che nia," tiin a fapa hmel chu ngun takin a en a. Tuna a khawsazia hi a mak tlat!
"Police hnenah report tawh mai rawh," ka tih chuan a bu nghut a, "An chhui mêk, Amel tih hlauhthawn che ka tum lo a nia," tiin ka mitah min en vang vang a, a mitmeng thim khap leh ril ruih chu ka hawisan thei bik lo.
Naute a rawn ṭap ta tlârh tlârh a, a mit chu lasawnin, "Ka dah phei tawh ang aw, duh aiin ka lo pawm rei deuh a ni, " a fapa ṭap chu a sawi hliau hliau a, ani lah a ṭap uar tulh tulh!
Nurse duty chuan ka fapa chu a rawn la ta a, a hnungah Jerome-an a zui ve bawk a, ka rin aiin naute a ngaina dawn tlat! Kei chu pawm ve min phalsak rih loh avangin châk eng ang mahila ka pawm buai ta lo. A lehpek awmzel tur ka duh loh vang a ni pakhat bawk.
Ramon Salia hian engvanga Jerome hi haw em em nge a nih ka la hre thei chuang lo, min ngaizawng pawhin ka hre chuang lova, a hma paw'n a kiangah nileng hun ka khawhral a, vawikhat pawh min tawk lo. Ka pasal nen hian thildangah inhuatna an nei zawk a ni lo maw!?
Mayla Ansell kha Ramon-a nupui hlui a ni a, Jerome nen an inkawp tih a hre ve vek tho si. Kei hian hriatsual ka nei nge? Joe lehzel an kâp hliam a, engmah hi ka hrethiam teh nuai lo.
"Eng nge i ngaihtuah vung vung a," Jerome-a lo luh lai ka hre miah lo!
"Er..engvak mah.."
"I fapa chu i ngai lo riauvin ka hria,"
"Ngai tehreng e, nakinah phei chuan a pa aiin min ngaina ngei ngei ang," fiamthu deuhva ka chhân chuan a kiai suk a.
"A hming phuah turin i nu leh pa an lokal dawn a nia,"
"Tak tak maw.." ka pa ka huat rualin ka nu zawk erawh ka hmu châk hle thung.
"Ka Private Jet ka tir mek alawm, i tan hian engpawh tih ka huam tih vawi engzat nge ka sawi dawn," thutak zeta atih chuan, "Vawi za.." tiin ka nui hak a.
"I nat deuh leh kan hlauthâwng a, i dam deuh leh i chimawm leh si.."
"Min duh tho a ni lawm ni?" Pawisawi lo ber ang maia ka ṭawng chu nui suk chunga min en in, "Duh mai nilovin KA HMANGAIH CHE," zawi leh fiah faka tiin lehlam a hawi nghut a, a thusawi leh a hmel landan a inrem hlawl lo.
"Jerome...?"
"Ka sawi ang chiah kha i laka ka rilru puthmang a ni e," nghet charha atih chuan ka hamhaih zawk zamah..!
"I ti tak tak lo tiraw!?"
"Tun angrênga thutak lai hi ka la nei lo zâwk, min ring rawh, i tân engpawh ka huam tih ka sawi lovem ni? Nangmah vangin kum eng emaw zat ka lo zuah tawh ka sam pawh ka mêt a, a chhan chu Mafia pawl emaw min tihna kha ka nihna ani tlat si lova, Mourizo Soreno ang nilova, Jerome Evans ka nihna ngei hmang hian i nunah ka lo lût a ni." a ti deuh duah a, sawi ve tur pakhatmah ka'n hriat loh chu le..!
"Chuan..?"
"Min hmangaih rawh ti a ngen tlat che ka tum lo, amaherawh chu ka nupui ni reng la, he contract hi tunah chuan kalpui ka duh tawh lo, ka fapa tân leh ka tâna i awm phawt chuan tlâkchham i nei ngai lovang," a sawizawh rualin ka kut a rawn vuan a, "Amel, ka thinlung zawng zawngin ka hmangaih che," tiin ka kut chu lakângin a hmui hnawm chap chu a sîktir ta a...!
"Keipaw'n ka hmangaih che," ka tih chuan a mengphar âwk a, awih thei lo hmel a pu bawk.
"Ka sawi vanga sawilang i nih chuan nakin lawkah i inchhir dawn a nia," ati sup a.
"Enteh, Jerome, min bum ni a ka hriat lai zawng zawnga i bula ka chen chhan kha engvang nge ni a i rin?"
"Amel...!"
"A ṭha e, a hma ang bawk khan sawia a fiah lo anih chuan practical-in ka lantir leh dawn em ni ang?" Cho zeta ka chhânna avang chuan a rawn kun hniam a, ka hmuiah a rawn fawp ta chat nia.
"Ma'am...!"
Sam leh Ignacio lo nui ṭhû ka hmuh chuan ka inlahrang vat a.
"Kan lo luh hun a fuh viau lo.." Sam chu a la nui ṭhâ reng a, ka zak lek lek.
"Eng nge ni ta!?" Jerome an atih chuan Sam leh Ignacio chu an inmelh ralh a, "Jefe, Ma'am kan hmu châk ve tawh alawm, a pindanah hian darkar khat dâwn i awm tawh a nia," tihpahin Sam chu ka bulah a rawn kal phei a.
"A dik chiah, zaninah khum pakhat kan dah belhtir ngei angai dawn a ni." Tiin Ignacio chu khuma ṭhu turin ka hui a, a lokal ve mai. A hma khan ka ngaina lo tih a inhriat vang nge min hnaih lutuk ngai lova, tunah chuan min duhsak zia leh min ngaihsakzia ka hre tawh a, ka ngaina phian!
"Ignacio, eng emaw min tihsak thei angem?" Ka tih chuan 'Aw' tih nan a bu nghat a. A ṭawngtam lo ve hrim hrim tih erawh ka hre ve tawh.
"Penthouse hnunglam leh Estates-ah thing tamtak phun tur hnathawk lo ruai ta che," nui miah lova ka sawi vang nge min en hau a, Jerome pawh a bâng chuang lo.
"Duhtak, chutiang te chu.." Jerome an atih chuan ka la nui duh chuang miah lova, ka fiam hlek châk tlat.
"Ka fapa hi thingkung sâng tak takah a lâwn thei rih dawn lova, kum a tlin ruala a lawn phâkna tur in lo buatsaih ang chu ka ti deuh.." ka sawi zawh rual rualin Sam chu insum thei lovin a nui huk a, ka nuih vaih chuan ka pum a na leh dawn tih ka hriat avangin ka pum ka'n dawm hmasa leh tê tê a, a zia viau lo.
"I dam ṭha leh ta tih hriat tluka nuam hi a awm chuang lo ve," Jerome chu a nui vei suk a, intitatû deuh taka min kuah chuan ka melh râm râm a, a hrelo der hmiah.
"Sam, Joe kan va ngaihven tawh dawn em ni ang," Ignacio chu dingchhuakin kawngkhar lam a pan a, Sam a siai zauh lai ka hmu reng.
"Duhtak, nangpawh chawl hahdam tawh rawh le," Jerome chu ka mutna khumah a rawn lâwn ve a, ka hnial lo ve chiang asin.
After 2 Weeks
City Hospital
"Jacinta, Luis kha pawm rawh le," Jerome an car khalh lovin Mateo Ignacio an khalh dawn a, ka nu in kan fapa hming atana a phuah hi a mawi dangdai ve chiang êm.. 'Luis Soreno Evans' tiin a phuah ngial a, Soreno a telh kher nachhan chu Jerome-a nu hming a nih vang a ni.
Vawiin hi hospital kan chhuahsan ni a ni a, Jerome-a Porsche car(Turbo 9112) leh ka Volvo car an rawn keng a, Joe pawh kan rualin a chhuak ve ta law law a, niminpiah khan a chhuak thei tawh tho tak nâin min nghak ta a ni.
Ka nu leh pa Spain-ah an haw tawh a, keini pawh nithum hnuah kan kal ve dawn a ni. Kan him zawk nâna ka pasal ruahman a ni a, Jacinta, Christy leh Sam ten min zui thung ang.
Hospital kawta kan awm laiin Jerome-a phone a ri chhên a, kan buai bawk nen a pick hman lawk lova, a âwl ber ka nih vangin a kekawr hâk lai ipte chu zenin ka phawrh chhuak a, ka nu a ni.
"Hello.."
"Phone kha i pasal pe chhawng rawh," aw thüm ṭêng zet ka hriat chuan ka phu zawk a, phone ka thlauh lo chauh!
"Khaw'nge ka nu...!?"
"Mrs.Evans, i nu leh pa chu hremhmun lamah kan thawn liam tawh.." a sawi zawh rualin phone chu ka thlauh ri bawl a, chhar leh turin chakna ka nei lo.
"Ma'am...!" Ignacio an min lo hmu a ni ngei ang, ka bulah a rawn ding a, leia phone tla chu kâwkin ka ṭhingṭhi nghal hnawk, kha pa khan dâwt a sawi lo tih ka thinlung hian a hre tlat alawm.
"Jefe.." Ignacio an Jerome-a a koh rualin min pawt tho ta nghal a, Jacinta tih loh chu car aṭangin an rawn chhuak a, Jerome chuan min rawn panin Ignacio-a phone ken lai chu a lâksak a, a hmel rum ta sawt leh a mitmeng dur khup chu hlauhawm tak a ni..
Chutia kan buai laitak chuan..
"Jefe, Ma'am..." Jacinta chu car tukverhah rawn dâkin a bân a rawn phar ṭâwk ṭâwk a, ka Volvo car-a chuang te chu Jacinta leh ka fapa Luis chauh anni. Ka car tlanliam ka hmuh rualin umzui ka tum a, thâ ka nei lo.
Ka car kha Ignacio-a khalh tur a ni a, tunge khalh chhuak ta!? Ka fapa leh Jacinta an kidnap tih ka hrethiam nghal mai, ka kut chu nghet taka hûmin ka heh ka pet ruh a, ka mittui a far fap.
Jerome-a chu Vanlam hawiin a au chiam a, inhnêm tur chuang kan awm lo. Chutah harh chhuak thut ang maiin Jerome chu a Porsche car-ah lutin chak lutuk hian a tlânchhuak ta a, tumahin an au ding zo lo...
Kan tâwpna tur hi a chhia mai nilovin thih vekna tur khawpa buaina liantham a ni ta...
End of Chapter-19
©<++++[BeckirafARenthleI]++++®
(Quieres Casarte Conmigo?
Becky Rafa Renthlei
Chapter-19
City Hospital
Los Angeles(LA)
California
Friday 2:00Am
Jerome Evans
"Mr.Evans, engmah ngaihṭhat lohna tur a awm lo a nia, i nupui hi a thâw a hah mai a ni, hei chu naupai eng emaw zat ten an nei fo ṭhin a, amaherawh chu a 'heart rate' ala sâng riau mai a, oxygen kan pe mêk e," Doctor-in min thlamuan tum taka a tih chuan ka thla a muang chuang lo.
"Ka lawm e, Anna, a naupai a ṭha em?"
"I nupui dinhmun a zirin kan zai nghal chûk chûk mai thei bawk a, hetiang dinhmuna a pai tlang a nih chuan a tân pawh hlauhawmna chen a awm thei a, thlasarih te chu zai dawn rau rau chuan a fuh ber, thlariat a tlin erawh chuan naute a 'no' leh tawh si a.." tiin coffee thlitsa chu min pe a, a thusawi chu ka beng rawngah a luh pawh ka hre lova, ka thluak a buai mup.
"Tunah zinglam dar hnih a ri tawh ania, darkar thum lai helai hmunah hian kan awm tawh a, zai ngai a nih leh nih loh i hrechiang thei lo a maw!?"
"A heart rate a sâng ka tih chu Mr.Evans, nangmah ngeiin i duh chuan va hmu rawh mahse, minute nga bak awm a rem lo ang," Dr.Anna nen ka nupui an dahna pindan chu kan pan ta a.
Amelia chu khumah a lo mu bâm a, a maimitchhing tlat a, a mitmeng pawh ka hmu thei lo, a hnarah oxygen an pêk avangin a hmai pumpui pawh a lang kim hek lo. Hetianga a awm chhan hi mi duham lutuk Ramon Salia leh Eliaz Sanchez vang a ni, a tawp thleng turin ka inbuatsaih dawn nge, ka nupui dinhmun ziaawm hun ka nghak dawn!?
Amelia kut vawt ngiai chu ka hûm vang vang a, chak taka awm duh mi a ni a, zanin te khan hruaichhuak lovin Penthouse-ah lo awm mai mai ila hetiang dinhmun tehhrep hi kan tawng lo tur. Thil sâwt tawh lo ngaihtuah vak vak chu duh lo vin ka lu ka thing a, a biangah dimtê a fawpin ka chhuahsan ta a. Ka en rei thei ngang lo chu a ni e.
Ka engkim, ka hlimna leh lâwmna, min nuihtirtu leh min tithinrim ṭhintu, ka hausakna it ve miah lova, keimah chauh min ngaihven ṭhintu leh ama hlimna tur pawh ngaihtuah hmasa lova a nu leh pa venghimtu, mahni invêng thei khawpa luhlul leh kawlhrâwng Amelia kha khumah he khawvel eng hmu miah lo ang mai leh a pum chhunga naute pawh hrechang lêk lo ang maia chak lovin a mu a nia! Ka lung a awi thei hlawl lo.
Joe an dahna cabin-ah ka lut leh a, Ignacio chu khum bulah lo ṭhuin a indawm kun lap a, ka thâwm hriain a rawn dâk chhuak ta a. A mit sen râm aṭang chuan a ṭap a nih loh tal pawhin a thinrim hle tihna a ni ngei ang. Joe, Sam leh Ignacio hi unau ang maia in en anni a, an induhsak hle bawk.
"Jefe..!"
"Mateo, hahdam tum rawh, Sam ka be pawp tawh a, tunah LA panin a rawn thlâwk mêk, kan hmeichhe pahnih te erawh chu kârkhat chauh training hmabâk an nei tawh a, awm tluantling law law rawh se," khum bula chair chu pawt hnaiin ka ṭhu ve nghal a, Joe dar dinglama silaimu tâng an phawrh chhuak tawh a, hliam dang a nei lem lo.
"Jefe, engtia hmalâk nge i tum, Ariana Gonzalez puihna ka ngen mai dawn em ni ang."
"Ni rih lo e, Joe leh ka nupui dinhmun a ziaawm hma chuan eng inbeihna mah awmtir ka tum lo." Tiin Joe hmel dâng lap leh a hmui duk deuh chu ka melh vang vang a, ka nuna mi pawimawh pahnihte hliam tawrhtirtu hi ka chhuah tawp lovang, ka sum zawng zawng pawh khawhral ngai mah se a tawp thlengin ka bei dawn a ni.
"Ariana chuan min pui hreh hauh lovang, mahse, 'World Tour' neilai a ni a, dinhmun hlauhawmah a ding thiang lo a ni, a fans te an khawngaihthlâk lutuk ang," ka tih chuan Ignacio chu a bu nghat nghat a. Ariana Gonzalez hi ka bestfriend kumhlun a ni a, 'Shadow of the life' band-a an vocalist a ni. A lâr hle bawk. Mafia boss Mr.Templeton-a fapa neihchhun a ni tih ka'n sawi lang tel hrâm ange..
"Madam leh Joe ka lo awmpui anga, reilote mut hahchawlh tum la," Ignacio a ṭawng mawlh mawlh lai chuan ka bodyguard dangte an lo thlen belh a, ka nupui pindan pawnlamah pahnih duty tura ka hrilh hnuah, hospital lobby panin Ignacio nen kan inzui chhuak leh ta.
Ruahmanna felfai zawk kan siam angai a, heti ringawt chuan Ramon Salia hian a sual chhuahin a inluling tulh tulh bawk si, Los Angeles Metron lamah report kan theh lut tawh a, an chhui ṭan mêk a ni. A hma khan report tumna ka nei lova, ka Estates chauh neih a tum lai kha chuan ka ngawi mai ṭhin; tunah erawh ka ram mai nilo ka nupui thlenga min chuh ta hi kei, 'MJS Company chairman Jerome Evans' hian ka palzam thei tawh lo a ni. A tlâwmthlâk lutuk ka ti ve deuh ta.
"Sir, i nupuiin nau a vei tlat mai!" Hmanhmawh lutukin nurse pakhatin min lo hrilh a, Ignacio-a makti hmel ang tho hi ka landan anih ve tho ka ring! A nau neih thla pawh va ni suh!
"Eng thil nge i sawi, tunah thlasarih chauh a nia..." ka ṭawng zawm leh hmain, "Jefe, inbengdai rawh thil awm thei a nia lawm," tiin Ignacio chu arawn inrawlh vat a, corridor reh ruihah chuan ka aw kha aring viau a nih ka ring, mihring awmchhun te chuan kan awmna lam an rawn hawi a.
"Min lo zui rawh u," hmanhmawh taka nurse kal chu Ignacio nen kan zui a, Joe erawh a muhil rih tho a, midangin lo awmpui phawt mai teh se.
Amelia pumna tâl vel ka hmuh chuan ka chhungril engtin emawni a awm, ka kut pahnih chu hûmin ka lo ṭang ve nasâ! Amah lah chu oxygen pêk ala ngai bawk nen hmuh a hrehawm kher mai, darthlalang phen aṭanga en mai kan ni a, a chhungah luh theih hek lo le..
'Operation theatre of Pregnant' tih intâr kulhna a, Amelia an nawr luh lai chuan Ignacio-an ka kutah nghet zetin a vuan a, eng thu mah a chhâkchhuak lova, a mitmenga min thlamuan a tumna erawh chu ka chhiar thiam ve mai.
'Lalpa ka nupui venghim rawh' tih chiah hi ka sawi theih tawk a ni.
Ani thawhah lehnghal, chutah zai ala ngai zui dawn a nia, a dinhmun a ṭhalo tih hrilh hranpa ngai miah lovin ka hrethiam vek a, Amelia tellova nun hmang tura ka indah chhin ringawt pawhin ka khawvel a tawp ve mai dawna hriatna ka nei.
"Jefe, lungngai lutuk mahta che, engkim a pangngai leh vek mai ang," Mateo ṭawng zawi sup chu ngaihthlâk a hahdam ngawt mai, unau pianpui ka nei lova, ka nu nise kum riat ka nih laiin a boral tawh bawk. Ka pa Juan Evans tân theihtawp chhuahin hna ka thawk ṭhin a, ka pa hmangaihna bâk ka dawng ngai hek lo. Hmeichhia ka lo kawp tawh ho pawh ka sum leh pai it anni tlangpui a, Amelia ka tawn aṭang chiaha ka nundan inthlâk danglam ta hi keipawhin mak ka ti fo ṭhin.
Ka phone phawrh chhuakin Ignacio ka pe a, "Ka pa call la, Felipe Lopez pawh chanchin kimchang i hrilh dawn nia," tiin Hospital pawnlam chu ka thlirsan ta daih a, ka kawchhung tâwt phui muk leh ṭangmar at hi Amelia dinhmun a ṭhat hma chuan reh thei dawn lo.
'Amel, i thi tur a nilo, ka hmangaih thu che pawh ka la hrilh lo che a nia' ka ngaihtuahna bing mup tihreh tum chuan chunglam ka melh kâwk a, Ramon Salia leh a ṭhuihhruaite hi ka that chimit vek a nih loh chuan 'Jerome Evans' ka ni lo tihna a ni ang.
"Jefe, Sam an a be duh che.." Ignacio-an phone min rawn pe a.
"Sam, eng nge ni ta!?" Ka aw ṭial zawi ruih chuan keima aw anna reng a nei lo.
"Jefe, darkar thum hnuah ka rawn thleng dawn a, hospital-ah ka lo tlang dawn nge, ruahmanna thar siam i nei em?" Lehlam aṭanga Sam aw fiah fai zet chu a ngaihthlak a hrehawm loh khawp mai.
"Thlawhnaah khan muthilh tum la, helam i lo thlen hunah chuan chawlh hahdamna hun i nei lo maithei a nia, hospital i lo pan nghal angai ang." Ka tih chuan "Yes, in enkawl ṭha rawh aw.."
Sam nen kan inbiak zawh hnuah Joe awmna pindan panin kan phei leh ta a, ka nupui an zai chhung hian ka â hman takngial dawnin ka hria! Sana ka bik sek a, hun lah chu a kal muang ropui si!
"Jefe, Joe a harh a nia," Ignacio chu ani leh ni lo angin a phûl hlut a, nurse ko turin a tlânchhuak zui a, Joe pawh tun aṭang chuan ka bodyguard ang nitawh lovin ka unaupa angin ka en tawh ang, chutiang bawkin Ignacio leh Sam pawh..
Ka hmelma te bei tur hian bodyguard aiin ka unau tharte nen ṭanrual a awl zawk ngei ang.
"Jefe..!" Joe min ko ri ka hriat chuan ka panhnai vat a.
"Joe, chhel takin aw.."
"Jefe, pawi ka ti lutuk, ka invêng hman ta ngang lo a ni," harsa tih hmel zeta a ṭawng chuan a kutah vuanin, "Ṭawng tum rih suh, i dam ngei angai ania O'Hara," Tihpahin a kut chu nghet takin ka hûm a, thei leh thei lova a ṭhen sak sak chu ka lainat kher mai.
Silaimu pahnih dawng tura chak tâwk Joe O'Hara hi ka ngaisâng tih ka pha buai lo mai ang.
"Ka nupui an zai mêk a, inpahnih hian ka nun a mi pawimawh ve ve inni tih theinghilh ngai suh," ka tih chuan a mittui a khap per sak.
"Ma'am chu a ṭha maw!"
"Ṭha lo, a dinhmun a ṭha hauh lo," diktakin ka chhang a, Joe hmela thinrimna lo lang chu ka hmu reng, a pi tân hian thih pawh a huam hial ang tih ka hria a ni.
After 3 hours
City Hospital
5:00Am
Saturday.
Sam leh Ignacio chu inkuah rialin Joe pindanah an lo lut a, Amelia erawh an la zai zo lo fo! Doctor sawidanah oxygen pêk lai a ni a, hmanhmawh theih a nilo tiin nichin mai khan min rawn hrilh a, thisen unit hnih an pe mêk bawk.
Mipa ka nih ang ngeiin ka buai phili chung lova, kan chunga roreltuin kan awmdan tur chu a rel fel mai ang tih hi ka innghahna neihchhun a ni.
Ka hmangaih min lâk bo sak tur khawpa nunrawng lah a nih ka ring hek lo.
"Jefe..!" Sam chuan min kuah thuak a, chau hmel pawh a pu eih lo nia, Sam nge nge a ṭha ṭhin a nia!
"Tluang taka i rawn thleng thei chu a lawmawm kher mai," tihpahin ka kianga ṭhutna awl chu ka kawhhmuh a, Joe hmai bulah kun hniamin, "I bialnu tân dam ngei a ngai a nia, chuti lo zawng nangmah thehthal thei tur khawpin training a dawng ṭha a nia," Sam fiamthu thawhah chuan Joe chu a nui vei suk a, Christy nge Jacinta zawk tih pawh ka hriatpui ve lem hlei lova..
"Ka thusawi tur hi ngun takin ngaithla ang che u, tun bâk sawi nawn ka tum lo a nia," ka tih chuan min en ṭhap a.
"Yes, Jefe.." anti rual dial!
"Tun aṭang hian nangni pathum hi ka hnuaia thawk ni tawh lovin, ka unaupa angin ka en tawh dawn che u a, nangni pawhin chutianga min en theih chuan a lawmawm khawp ang." Ka sawi zawh ruala an makti hmel chu hundang nise ka nui nghekin ka ring.
"Mahse, Jefe.." Ignacio an atih chuan, "Jefe, tih erawh nangni aia ka upat avangin in hmang zui thei ang, ka hminga min ko duh zawk a nih pawhin hnialna ka nei lo ania," ka tih chuan a naupang ber Sam chu a nui huk nia.
"Eng nge!?" Sam melh paha ka tih chuan, "Jerome tiin nge kan koh dawn che 'Mouri' tiin," fiamthu titak deuhva tiin a la nui ṭhu a, Amelia minti hrechhuak zawk nia.
An pathuma hlim hmel ka hmuh hian ka thutlûknaah ka inchhir ngai lovang tih ka hria a ni.
Sam chu thil thlen dan leh kan boruak vel Ignacio an kimchang takin a hrilh a, Joe nen ngun takin kan lo ngaithla thung. Ka nupui chungchâng a hrilh lai a, a hmel chang rût chu hmuh a nuam viau lo. A dar pharh hlai ṭha zet chu a sawi nak a, tualthah duh mai hmel a pu hial alawm le!
Joe awmna pindan kawngkhar a rawn rik rualin kan hawi nghal ṭhap a, nurse têreuhtê hi nui sângin a rawn lut ta.
"Mr.Evans, i nupui an zai zo tawh a, kan rawn dah chhuak ṭêp, chuan nau.." a sawi zawh hma hmain Sam chuan, "Naute a ṭha em? Mipa nge hmeichhia..?" alo ti hmanhmawh a nurse pawh a nui tawp!
"Mipa 2kg leh 100gram a ni e, naute en nân minute thum hun in nei," atih chuan kan ding rual suau a, Joe pawh thawh ve tumin a insehruh nasâ! Mahse, a tân tih chi rual a nih loh avangin lungawilo zetin lukham a delh riai riai a, ka khawngaih angreng.
Naute hmel ka hmuh ruala ka hlimna ang hi engtikahmah ka nei leh tawh pawhin ka ring lo, a mitmeng buang thak chu ka neih ve loh a ni. Amelia mitmeng chiah chiah ani a chhun ni, a vun no chek thisen kai niai chu tenna pakhatmah ka nei lova, a sam dum hlap erawh chu ka sam nen a inang tih ka hre mai.
"Hey, naute, min hmuh tawh kha aw.." ka tih chuan Ignacio leh Sam chuan ka â emaw anti ani ngei ang min en hau a, min hmuhdan kha ka hrilh dawn teuh lo, ka nupui nen chiaha kan hriat tur thurûk a ni.
"Jefe...!" Sam chu a nui suk suk a.
"Eng nge? A pa ka nia kan inhmu fo alawm," ka tih chuan Ignacio chu za lutukin a nui a, fiamthu ka thawh khât ve bawk êm a ni.
'Ka fapa' ka ngaihtuah zawng ringawt pawh hian lawm lohvin ka nui leh zêl! Amelia pawh ngaihtuahawm lutuk a ni lo tih kan hre leh zêl nen kan boruak hap a dang ta zar mai. Hmeichhia kha ka lo dil ve tlut tlut a, chuzawng kan Pathianin a remti lo a ni ange. Engkima lawm thiam hi a pawimawh ber.
Mahse, kan inneihna erawh a derthâwng ta tihna a nia, contract a tawp dawn tih ka thinlung hian a hria a ni. Chu chuan ka chhungril ati ngui sawt a, mah se ka nupui rilru hneh turin ka la dam tal alawm le.
"Sam, a thlâ kha lâksak la Joe i hmuh ve dawn nia," ka tih chuan nui sûngin a phone ah lai a phawrh ta a.
Amelia an rawn nawrchhuah lai chuan 'lobby' ah coffee kan lo in mêk a, kan hmuh an la phal ta lo fo! Thawhah a nih miau avangin chîmbuai an remti dawn lo tih hriatsa a ni a, naute pawh an 'up' tawh a, ala harh tlat loh avangin Amelia'n ala hmu bik lo.
"Jefe, i pa a rawn thleng ṭep, Penthouse lam aṭangin information kan dawng chiah e," Tiin Sam chuan coffee noruak chu dustbin-ah a vawm lut a, Joe pawh naute thlalâk an entir tawh a, a nui var var reng mai. Kâr hnih pum ṭhak up rih a ngai tih an sawi chuan ka hnual nghal rawih rawih nia.
"Jefe, madam lo harh hmain intifai ve zawk la, i lang pawr teh mai a nia, ka hruai ang che," Ignacio an atih chuan ka pawmpui viau, darkar thum hnuah damdawi hnathawh a reh chauh dawn a, doctor sawidan hi a dik a nih chuan ka haw hman zân tihna a nia.
"Yah, a ṭha e, shower neih ve zuai chu a pawi lo khawp ang, Sam, Joe kha i lo vil ṭha dawn nia.." tiin Ignacio nen hospital kan chhuahsan ta a.
Ka nupui kalsan ka hreh viau rualin tihtheih engmah ka nei lova, a lo harh hun a ka hmel hmuh a hrehawm loh nân leh nalh thei ang bera lan kha a pawimawh hmasa tlat!
Contract tawp lo tura hmâ la hmasa zâwktu tur chu keimah ka ni.
Saturday
Afternoon
City Hospital
Amelia Evans.
Ka hrawk thip hlur leh ka pum kham ṭhûm avang chuan ka mumang ram nuam tak chu chhuahsanin ka bula ṭawng thawm chu ka hre vuai vuai a, mit ka men hma hauhvin tu âw nge tih hrilh hranpa ka ngai hauh lo.
Ka pasal leh a pa Juans Evans inbe thawm a ni.
"Spain-ah kan thukru rih mai dawn em ni ang, amah nen inbia ula Hotel Enchante tluka ṭha a awm lovang," Juan Evans aw thûm bul bul chu ngun lehzuala hre thei turin beng ka chhi kar a. An thusawi awmzia hre mah suh ila buaina ala reh lo tih ka hrethiam ve mai.
"Amelia rawn harh phawt se, ka lo sawipui dawn nia, ka nupui leh ka fapa himna hi ka ngaipawimawh hmasa ber," Jerome-a ṭawngdan aṭang chuan kei hian fâ ka nei tawh tihna a ni chiang mai! Mahse, ka neih ala hun miah si lo! Ka chungah engthil nge thleng ta? Ka thâwkdan dik loh avanga hospital pan tura ka hrilh lai kha ka la hre ngei mai a, a bâk engmah hriat ka nei reng reng lo!
Mak ve! Ka thi tihna em ni, ngawiteh, mumang ramah ka la chêng em ni zawk, ka lo suangtuah ṭhin Vanram kawtchhuahah kha chuan ka awm lo chiang a...Jaja! Ka â deuh em mawni le!? Hremhmun lamah pawh ka kal chuang miah bawk si lo.
"Ka fapa, inbuatsaihna ṭha zawk nen Ramon Salia hi kan hmachhawn a ngai dawn a nia, detective pahnih chhawr belh leh la, engzata tam nge ṭhuihhruai an neih tih i hriat hmasak a ngai dawn a nia, chu'ng zingah chuan nula pawh an awm ngeiin ka ring a, hmanrua tur ngaihven tel ang che." Juan Evans an atih leh tâkah chuan kei hi ka thi lova, minung ramah ka lêt leh chiah zawk tihna a ni.
"Tui.." ka aw chu leh! Amelia aw a va'n ang lo deuh ve le..
"Duhtak, i harh em?" Ka ṭawng ri a zawi hle chung pawhin Jerome an a hre pha a nia! Ka meng chhuak ta riai riai a, ka khum bula ka pasal ding leh Juan nui suk chu ka hmu hmasa ber.
"Tui ka duh," ka tih leh chuan rang takin min lâksak a, "Âng rawh le, vawikhatah tam tak in phalsak i la ni lo a nia," tihpahin Jerome chuan ka kâ-ah tui a rawn far hlek a, ka lei pawh a tihnâwng tham lo. Ka hmui tep chap chap chung a ka ân leh chuan a hma aia tam zawkin a rawn chhung lut a, a phal tlêm ve hle mai! Tui mai mai pawh a ui ṭung tawh mai zawng a nih hi...
"Ka fanu, nâ i nei em?" Min en vang vang paha Juan Evans an atih chuan ka nui lui sak a, a hmel dam thlup leh thuneih hmel taka a hawi vel ka hmuh hian Jerome-a nen inang ka ti viau.
"Neih em em pawh ka hre lo," tiin ka chhâng sap a, "Ka chhuahsan ang che u, Joe ka'n tlawh ve lawk ange," tiin a tho a, Jerome an kawngkhar thleng a thlah hnuah khum bulah rawn ṭhu thlain, "Ka lawm e aw, fapa min pek avangin.." ati sup a, ka hmui ro zetah chuan dimtê-in a rawn fawp ta a.
"Maw! Fapa maw!?" Min thlah ruala ka zawh chuan a nui suk a, "Aw ni e, fapa i nei a ni."
"Ka hmu thei angem?"
"Ka hrelo le, a tê lutuka thla kim lova piang a ni bawk nen kârhnih chhung up tur a nia, Amel, i mit rawng ang chiah kha a pu ve asin," atih chuan ka en châk zual sauh nia.
"Tunah ka en duh," ti a thawh mai ka tum chuan ka pum a na nghal zawk mai!
"Tinge, ka pum.."
"Shh..i fapa hi zai chhuah alawm, indim hle i ngai a nia, khatia i chêt phut chuan a ṭhuina a peh mai ang," dam thluama tiin ka kawr hâk chu dimtê hian a hlim ta a, ka pum an zaina plaster-a inbel phui ka hmuh rual chuan ka thawchhuak nghal hap.
"Engmah ka hre ve miah lo hi mak ka ti!" Zawi sapin ka ti a.
"Nikhaw hrelovin i awm char char alawm, Amel ka mangan zia kha i hrethiam phâk ngai lovang," ka samah chûlin ka biang leh mit a chûl kual dan dan a, a mitmeng dam ruih leh ngilneihnaa khat hi ava'n thlamuanthlâk si êm.
"Doctor ka koh chhungin nangmahin i lo awm hreh em?" Min ngaihtuah tih hriat taka min zawh chuan 'aih' tih nan lu ka thing mât mât a.
"Ok..." tih leh kawngka lam pan a rual a, a taksa nalh zuih leh inkhaithli thlurh pawh ala pangngai reng e.
'Nu' diktak ka ni ve ta, fanu ka nei dawn emaw tiin ka lo phur ve viau kha a nia, fapa ka duh lo tihna nilovin fapa ka nei a nih chuan kan inneihna a tawp dawn tih ka hriat vang zawk a ni. Jerome-a leh ka fâ tello hian ka awm thei dawn em ni!? Teuh lo mai, ka awm thei chatuan lovang!
Ka pum an zaina chu ka chûl a, ka taksa a chhinchhiahna min siamsaktu ka fapa tel lo hian khawi hmunah mah ka kal dawn lo bur, beih lêt angai a nih pawhin thih ṭhak thlengin le..
'Amelia intichak rawh' tiin ka infuih ru sauh sauh ta a.
Jerome-a ruala doctor leh nurse pahnih an lo luh chuan ka lo nui sâng a.
"Mrs.Evans, i ṭhat hmel viau mai," doctor-in min check chhung chuan nurse kuta naute awm chu ka lo thlir veng veng a, a têt hmel hle tak mai a..!
"Tun ṭum chu dam ṭha varin i chhuak dawn nia, test eng emaw neih leh ala ngai dawn a, i fapa nen in chhuak rual dawn nia," doctor Anna ṭawng pawh ka ngaithla mumal lo.
Naute hmel ka hmuh chuan ka mittui a tling pam mai, a hmelṭha teh vur lova, a sam dum hlap leh a mithmul buk lam deuh chu a inhmeh reuh hle a, Jerome-a fapa tih a hriat hliah hliah, American mipa te nungchang ang hi a pu ve anih vaih chuan ka hrem nasa ngawt ang. Jaja! Awihawm loh lutuk! Kei hian duat chikimin ka duat dawn tih ka hria, ka fâ, ka rila rah kha a ni tlat a.
"A hmelṭha i ti em?" Jerome an min zawh chuan dar san âkin, "Hmelṭha ti a sawi tur chu a ni hauh lo, a hmelchhe chuang hek lo, tu emawni a ang!" Tiin ka nui var var a.
"Tunge a chhun a.." lungawi vak lova atih chuan, "Ele, Mourizo Soreno mawle,"
"Lopez leh!" Khumah rawn ṭhu thla ve in nurse pahnih ding reng chu a melh a, "Min lo chhuahsan lawk ula.." ati sup a.
"Mahse, Sir, naute kha.."
"A hunah in rawn la dawn nia, kan fapa alawm, atâna ṭha lo tur kan tilui duh hauh lovang," ti a achhân chuan an inmelh zawk a, room chu an chhuahsan ve mai!
"Awmtir ve mai mai tur che a nia," ka ti sap a.
"Sawi tur ka nei alawm khang ho hriat ve kher kha angai lo a.." a ti deuh hmuk a. Naute chu a bân sei thlurh chuan a kuah ve ngial a, a'n zei loh dan em em hi!
"Sawi la.."
"Karhnih chhungin venhimna uluk tak hnuaiah hospital-ah i awm rih anga, kan buaina kha i la hriatreng chuan nang leh kan fapa hi in him dawn miah lo, kei ka awm emaw ka lo thi palh thei bawk, tunhma ang kha i ni thei dawn tawh lo tih i hriat ka duh a ni, a chhan chu pakhat i nih lai kha chuan i inveng thei ngei mai, mahse, kan fapa hi venhim tel i duh ngei dawn a, bodyguard pawh i neih a ngai tawh dawn a nia.." atih chuan chhân mai dan tur ka hre lo.
"Jerome, i sawi awmzia hi..!"
"Hlauthawng suh, tunah chuan i kiangah ka awm alawm, ka theih chhung chu venhim zel che pawh ka tum, nichin khan ka sawi hmaih a, Joe pawh an kâp hliam a, tunah hospital-ah hian a awm ve mêk bawk."
"Maw! Joe an kâp maw!?"
"Yah..ngaihtuahawm chu a ni tawh lo, mahse, kan zavai hian fimkhur kan ngai vek tih sawi ka tum mai a nia, damdawi in kan chhuahsan rualin Spain-ah ka dah dawn che nia," tiin a fapa hmel chu ngun takin a en a. Tuna a khawsazia hi a mak tlat!
"Police hnenah report tawh mai rawh," ka tih chuan a bu nghut a, "An chhui mêk, Amel tih hlauhthawn che ka tum lo a nia," tiin ka mitah min en vang vang a, a mitmeng thim khap leh ril ruih chu ka hawisan thei bik lo.
Naute a rawn ṭap ta tlârh tlârh a, a mit chu lasawnin, "Ka dah phei tawh ang aw, duh aiin ka lo pawm rei deuh a ni, " a fapa ṭap chu a sawi hliau hliau a, ani lah a ṭap uar tulh tulh!
Nurse duty chuan ka fapa chu a rawn la ta a, a hnungah Jerome-an a zui ve bawk a, ka rin aiin naute a ngaina dawn tlat! Kei chu pawm ve min phalsak rih loh avangin châk eng ang mahila ka pawm buai ta lo. A lehpek awmzel tur ka duh loh vang a ni pakhat bawk.
Ramon Salia hian engvanga Jerome hi haw em em nge a nih ka la hre thei chuang lo, min ngaizawng pawhin ka hre chuang lova, a hma paw'n a kiangah nileng hun ka khawhral a, vawikhat pawh min tawk lo. Ka pasal nen hian thildangah inhuatna an nei zawk a ni lo maw!?
Mayla Ansell kha Ramon-a nupui hlui a ni a, Jerome nen an inkawp tih a hre ve vek tho si. Kei hian hriatsual ka nei nge? Joe lehzel an kâp hliam a, engmah hi ka hrethiam teh nuai lo.
"Eng nge i ngaihtuah vung vung a," Jerome-a lo luh lai ka hre miah lo!
"Er..engvak mah.."
"I fapa chu i ngai lo riauvin ka hria,"
"Ngai tehreng e, nakinah phei chuan a pa aiin min ngaina ngei ngei ang," fiamthu deuhva ka chhân chuan a kiai suk a.
"A hming phuah turin i nu leh pa an lokal dawn a nia,"
"Tak tak maw.." ka pa ka huat rualin ka nu zawk erawh ka hmu châk hle thung.
"Ka Private Jet ka tir mek alawm, i tan hian engpawh tih ka huam tih vawi engzat nge ka sawi dawn," thutak zeta atih chuan, "Vawi za.." tiin ka nui hak a.
"I nat deuh leh kan hlauthâwng a, i dam deuh leh i chimawm leh si.."
"Min duh tho a ni lawm ni?" Pawisawi lo ber ang maia ka ṭawng chu nui suk chunga min en in, "Duh mai nilovin KA HMANGAIH CHE," zawi leh fiah faka tiin lehlam a hawi nghut a, a thusawi leh a hmel landan a inrem hlawl lo.
"Jerome...?"
"Ka sawi ang chiah kha i laka ka rilru puthmang a ni e," nghet charha atih chuan ka hamhaih zawk zamah..!
"I ti tak tak lo tiraw!?"
"Tun angrênga thutak lai hi ka la nei lo zâwk, min ring rawh, i tân engpawh ka huam tih ka sawi lovem ni? Nangmah vangin kum eng emaw zat ka lo zuah tawh ka sam pawh ka mêt a, a chhan chu Mafia pawl emaw min tihna kha ka nihna ani tlat si lova, Mourizo Soreno ang nilova, Jerome Evans ka nihna ngei hmang hian i nunah ka lo lût a ni." a ti deuh duah a, sawi ve tur pakhatmah ka'n hriat loh chu le..!
"Chuan..?"
"Min hmangaih rawh ti a ngen tlat che ka tum lo, amaherawh chu ka nupui ni reng la, he contract hi tunah chuan kalpui ka duh tawh lo, ka fapa tân leh ka tâna i awm phawt chuan tlâkchham i nei ngai lovang," a sawizawh rualin ka kut a rawn vuan a, "Amel, ka thinlung zawng zawngin ka hmangaih che," tiin ka kut chu lakângin a hmui hnawm chap chu a sîktir ta a...!
"Keipaw'n ka hmangaih che," ka tih chuan a mengphar âwk a, awih thei lo hmel a pu bawk.
"Ka sawi vanga sawilang i nih chuan nakin lawkah i inchhir dawn a nia," ati sup a.
"Enteh, Jerome, min bum ni a ka hriat lai zawng zawnga i bula ka chen chhan kha engvang nge ni a i rin?"
"Amel...!"
"A ṭha e, a hma ang bawk khan sawia a fiah lo anih chuan practical-in ka lantir leh dawn em ni ang?" Cho zeta ka chhânna avang chuan a rawn kun hniam a, ka hmuiah a rawn fawp ta chat nia.
"Ma'am...!"
Sam leh Ignacio lo nui ṭhû ka hmuh chuan ka inlahrang vat a.
"Kan lo luh hun a fuh viau lo.." Sam chu a la nui ṭhâ reng a, ka zak lek lek.
"Eng nge ni ta!?" Jerome an atih chuan Sam leh Ignacio chu an inmelh ralh a, "Jefe, Ma'am kan hmu châk ve tawh alawm, a pindanah hian darkar khat dâwn i awm tawh a nia," tihpahin Sam chu ka bulah a rawn kal phei a.
"A dik chiah, zaninah khum pakhat kan dah belhtir ngei angai dawn a ni." Tiin Ignacio chu khuma ṭhu turin ka hui a, a lokal ve mai. A hma khan ka ngaina lo tih a inhriat vang nge min hnaih lutuk ngai lova, tunah chuan min duhsak zia leh min ngaihsakzia ka hre tawh a, ka ngaina phian!
"Ignacio, eng emaw min tihsak thei angem?" Ka tih chuan 'Aw' tih nan a bu nghat a. A ṭawngtam lo ve hrim hrim tih erawh ka hre ve tawh.
"Penthouse hnunglam leh Estates-ah thing tamtak phun tur hnathawk lo ruai ta che," nui miah lova ka sawi vang nge min en hau a, Jerome pawh a bâng chuang lo.
"Duhtak, chutiang te chu.." Jerome an atih chuan ka la nui duh chuang miah lova, ka fiam hlek châk tlat.
"Ka fapa hi thingkung sâng tak takah a lâwn thei rih dawn lova, kum a tlin ruala a lawn phâkna tur in lo buatsaih ang chu ka ti deuh.." ka sawi zawh rual rualin Sam chu insum thei lovin a nui huk a, ka nuih vaih chuan ka pum a na leh dawn tih ka hriat avangin ka pum ka'n dawm hmasa leh tê tê a, a zia viau lo.
"I dam ṭha leh ta tih hriat tluka nuam hi a awm chuang lo ve," Jerome chu a nui vei suk a, intitatû deuh taka min kuah chuan ka melh râm râm a, a hrelo der hmiah.
"Sam, Joe kan va ngaihven tawh dawn em ni ang," Ignacio chu dingchhuakin kawngkhar lam a pan a, Sam a siai zauh lai ka hmu reng.
"Duhtak, nangpawh chawl hahdam tawh rawh le," Jerome chu ka mutna khumah a rawn lâwn ve a, ka hnial lo ve chiang asin.
After 2 Weeks
City Hospital
"Jacinta, Luis kha pawm rawh le," Jerome an car khalh lovin Mateo Ignacio an khalh dawn a, ka nu in kan fapa hming atana a phuah hi a mawi dangdai ve chiang êm.. 'Luis Soreno Evans' tiin a phuah ngial a, Soreno a telh kher nachhan chu Jerome-a nu hming a nih vang a ni.
Vawiin hi hospital kan chhuahsan ni a ni a, Jerome-a Porsche car(Turbo 9112) leh ka Volvo car an rawn keng a, Joe pawh kan rualin a chhuak ve ta law law a, niminpiah khan a chhuak thei tawh tho tak nâin min nghak ta a ni.
Ka nu leh pa Spain-ah an haw tawh a, keini pawh nithum hnuah kan kal ve dawn a ni. Kan him zawk nâna ka pasal ruahman a ni a, Jacinta, Christy leh Sam ten min zui thung ang.
Hospital kawta kan awm laiin Jerome-a phone a ri chhên a, kan buai bawk nen a pick hman lawk lova, a âwl ber ka nih vangin a kekawr hâk lai ipte chu zenin ka phawrh chhuak a, ka nu a ni.
"Hello.."
"Phone kha i pasal pe chhawng rawh," aw thüm ṭêng zet ka hriat chuan ka phu zawk a, phone ka thlauh lo chauh!
"Khaw'nge ka nu...!?"
"Mrs.Evans, i nu leh pa chu hremhmun lamah kan thawn liam tawh.." a sawi zawh rualin phone chu ka thlauh ri bawl a, chhar leh turin chakna ka nei lo.
"Ma'am...!" Ignacio an min lo hmu a ni ngei ang, ka bulah a rawn ding a, leia phone tla chu kâwkin ka ṭhingṭhi nghal hnawk, kha pa khan dâwt a sawi lo tih ka thinlung hian a hre tlat alawm.
"Jefe.." Ignacio an Jerome-a a koh rualin min pawt tho ta nghal a, Jacinta tih loh chu car aṭangin an rawn chhuak a, Jerome chuan min rawn panin Ignacio-a phone ken lai chu a lâksak a, a hmel rum ta sawt leh a mitmeng dur khup chu hlauhawm tak a ni..
Chutia kan buai laitak chuan..
"Jefe, Ma'am..." Jacinta chu car tukverhah rawn dâkin a bân a rawn phar ṭâwk ṭâwk a, ka Volvo car-a chuang te chu Jacinta leh ka fapa Luis chauh anni. Ka car tlanliam ka hmuh rualin umzui ka tum a, thâ ka nei lo.
Ka car kha Ignacio-a khalh tur a ni a, tunge khalh chhuak ta!? Ka fapa leh Jacinta an kidnap tih ka hrethiam nghal mai, ka kut chu nghet taka hûmin ka heh ka pet ruh a, ka mittui a far fap.
Jerome-a chu Vanlam hawiin a au chiam a, inhnêm tur chuang kan awm lo. Chutah harh chhuak thut ang maiin Jerome chu a Porsche car-ah lutin chak lutuk hian a tlânchhuak ta a, tumahin an au ding zo lo...
Kan tâwpna tur hi a chhia mai nilovin thih vekna tur khawpa buaina liantham a ni ta...
End of Chapter-19
©<++++[BeckirafARenthleI]++++®
A tawp dan hi ka duh hlawl lo.... Tumah thih tir lo hràm teh.... 😧😓😥😓
ReplyDelete