KA DAM ANG (NÅÕM)

KA DAM ANG (NÅÕM)

Ziaktu: Becky Rafa Renthlei

B®®

Khua a vawt hlê a, ruah a sûr deuh cherh cherh bawk nen tun lâi hri lêng vanga inkháwm a theih tâk si lovah chuan ṭhalai hruaitute inhmuhkhâwm a ngai a, Ruatsangi pawh peih lo zetin a insiam ve a.

A rawngbâwlpui, a ṭhiante'n an rawn sâwm dawn avanga la tâwi khawmuang mai mai a ni.

Ruatsangi hi unau pathum zinga hmeichhe awm chhun niin, a chhungte'n an duat khu chûk pawh hi thil awm lo a ni miah lo. Mahse, fanu duat sual theih loh an tih ang chi kha a ni ve a, ama tâwkah nula lu zo veh vawh, hmel fai vang a ni ve.

A ṭhiante pahnih Maawmi leh Nunringa nen an inhmuhkhâwmna tur lam panin an inzui chhuak ve ta ráwih a; vêng chung Helipad awmna bula pu Duhkima in lam panin an kal a, Maawmi nen Nihliap inzawnin Nunringa amahin a kal hrang thung. 

Maawmi hi chu 'a ṭhian ṭha' tia sawi tur ni chiah lo mah se kohhran khata awm niin thingtlâng lam aṭanga lo awm a ni a; kâr thar mai hian an khuaah a haw tawh dawn a, Lalnunringa ve thung hi chu tun hma aṭanga a lo káwm tawh, thu chhia a ṭha a hrilh ngam ve ber a ni a, a ngaina viau.

Current a awm lo bawk nen phone flash-light on-in, hmanhmawh zet hian an kal hlawk hlawk a. Helipad bul, sipai Chân kahna hmun an thleng ta maw tihah kawng nâl lutuk avangin awihpangah Ruatsangi chu a tawlh thla ta hlauh mai le! 

"Awi ka nu!" Tih pahin Chân kahna bul âwih tlánah chuan a tleng thla ta a, a ṭhian pahnihte ṭê ri pawh a la hre pha; Maawmi'n a puan bih laia man tumin a chelh fu thuak tak na a, a man hman ta lo. A thim êm avangin a awmna lai leh khawi hmunah nge a tawlh thlen tih pawh a hre thei dér lo

"Ruatsang, Ruati..."tia an ko ri te chu a hre pha vuai vuai a; mahse, a chhânna an hre pha lo a ni ngei ang, a ṭhiante chuan an la ko zui tuar tuar a.

Ruah lah a tla tam tulh tulh a, a tlûkna hmun aṭanga din chhuah tumin a'n insangmar ve tak naa awmzia a awm eih lo. A khûp ruh a na ngut ngut a, ding chhuak turin thâ a lawi a nei hek lo. A ṭhiante mangang âu aw kha chu a hria; mahse, a àw ri an hre pha ve tawh si lova hlauthâwng zet hian a hawi kual ruai a, ruah malin hnah a far rîk bâk thawm danglam hriat tur a awm lo.

"Lalpa, min ṭanpui rawh," tiin rilru ṭawngṭaina a nei mawlh mawlh a, a phone ken lai kha a thlauh daih bawk si. 

Chu tia mangang taka a awm lâi chuan a hnung lamah thâwm a rawn awm a, a ṭhiante annih ringin zâwitê hian "Nunring, Maawm," tiin a ko a, chhânna erawh a dawng lo.

Chu tah bân tha chak tak leh hmul thuap hian a rawn pawm káng nawlh a, kawng chin hre sa ang maiin a kalpui ta bawrh bawrh a, a taksa rim tui lo tak te chu hîp duh lo mah se hip loh theih ninghal lo chuan.

A tawlh thlâkna kha a thui tham viau a, eng tin nge nikhua a la hriat theih zawk! 

Thil mak tak a ni.

"Min chhan r'u," tiin a aw neih tâwpin a âu vak vak a, chu pa chuan a hmuia rawn hup pah hian, "Chup"'a ti thûm dût ringawt, vâi a ni tih a ring thiam ta mai. A chhungrilah hlauhna namên lo a rawn lût a, sipai camp bulah a lum thla tih hrilh hranpa ngai lovin a hre thiam ta.

Current tal awm se chuan a ṭhiante khân an zawn hmuh nghâl mai a ring a; sipai camp hi an vêng chhunga awm a ni a, Assam Rifles anni nghe nghe.

A lumna a thui tham viau a ni ang, helipad bul kawngpui aṭangin camp bul hnai thleng rak a lum tihna a nia! Hliampui tuar lova a la awm hi thil mak tak chu a ni.

Vanneih thlâk takin a khûp tih loh chu na em em sawi tur a nei lova a hrawk erawh hnawhtu awm ang maiin a ping ṭup; a puan bih lai kha a inphelh ta bawk si a, a hnuaia a hâk, kekawrbul tâwitê chu a inbel chhun a ni deuh tlawng. A kawr hâk lâi a ṭet miah lo thung.

Ruatsangi hlau leh thlabâr chuan váipa âwmah chûmin, "Min thlah vat rawh," a ti lawm lawm a, chu vai lah chuan thlah chu sawi loh, an camp chhungah pawm lutin a nui huk huk a, Sikh palian tak tak pathum an lo awm a, mak tih hmêl takin an ṭhianpa nula rawn pawm luh chu an en hû hlawm!

Anmahni ṭawngin eng emaw an sawi suap suap a, a engah mah a hrethiam bawk si lo. Amah pawmtupa chuan khum sâng ér úrah a mut tîr a, thawh chhuah a tum apiangin na zet zet hian a nem mu leh zel. "Ka tlân thut dawn em maw ni," tiin a ngaihtuah rauh rauh a; mahse, a khûp nâ avang chuan khawi mah a tlân thleng hmanin a ring bawk si lo.

"Lalpa, min ṭanpui rawh," tiin a phun chhuak leh sap a.

A ṭhiante khân YMA an pun tawh ngeiin a ring, a nih loh pawhin amah zawng turin an lo thawh chhuah a ring tawh. 

He lai hmunah hian eng tin nge an tih dawn hre mah suh se a thâ a khûr ru der dera a lung pawh a phú pangngai thei hlek lo.

Hlauhnain a thâuvah manin a hawi kual hrek hrek a, theih tawpa lo beih lêt dán tur a dap ve nasa. Hmanraw hnaivai chuh tur a awm em tih nen lam a ngaihtuah thleng vek.

Sipai pali te chuan zû an in a, amah an ngaihsak hran lova an ṭawngin an ri leh bawrh bawrh a, khum thawhsan tuma a ṭhut chhuah lâi tak chuan amah pawm lût tu pa khâ a rawn nui ṭhâw a. 

Tenawm rawng a kâi deuh.

"Min kal tîr rawh u," tia a ngenna chu an hre thiam nge hre thiam lo pawh a hre tawh bîk chuang lo va; ît hmel zeta an melhna chu a ten ngawih ngawih. Kekawrbul nen chauhva awm a ni bawk nen a malpui lang huai te chu an melh ang zuk zuk a, a ten takzet.

Chu tah, an zînga pa lian ber chu a ṭhut hmun aṭanga lo ding chhuakin Ruatsangi mutna khum lam a rawn pan a, a mitmeng hur hmel tak te a kut phah hrawl leh lian tak te chu râp ru tak hian a en tlawk tlawk a. Âu chhuah tumin a kâ a âng hman ṭâwk! A hmuiah chu pa chuan rawn hupin a taksa rihna hmang chuan a delh bet zui ta a. 

A ṭhiante rûi phûr nui ri huah huah te chuan a luak a ti chhuak ut ut. A din hmun tur sawi ngai lovin a hre thiam nghal a; a tha neih tâwpa a ṭang kawh chung pawhin chu'ng sipai koham leh tenawm zet te chu a hneh ta ngang lo. 

A kâah zû an tulh lui a, lem duh lova a hmui a chîp tlat chung pawin an la hmet âng lui ṭâlh a, an thâ a chak nasa mai si, zû an in luih tîr a ni ber mai. A nghâwng leh âwmbâwr vel pawh a huh phung tawh. Zu rim a nam huama a hrawk a thîp hlura a sama nghet zeta an ṭhâm na te chu nâ a ti ru hle.

He tih lai hian mak tak maiin Ruati hi a ṭap miah lova chhel takin a tha neih tâwpin a lo ṭang lêt ve a ni. Sipai pakhat a tlawh rîk chawrh chuan an thinrimna a ti zual sauh a ni ngei ang; a biangah hawi sawk khawpin a rawn bêng ta a, chuti chung pawh chuan tlâwm duh lovin a la tâl nasa ngang mai. A thâ neih tawpin mu leh mal pawh nei lo hian a tâl but but a, chuti mai chuan an thunun thei bik lo.

Mahse, hmeichhe âwmnêm leh chak lo zâwk na na na chutia an sawisak rawn tâkah chuan a zal chu a ni dér. Sipai paliin an tisa châkna hrithlâa an pawngsual rawn zawh meuh chuan Ruatsangi chu che leh tur a awm ta lo. 

Chhuatah kawmawl pakhatin an khuh tawp a, an zinga phûr fâl deuh te chuan a âwmbâwr lang huai te chu an la khawihsak chhunzawm hrâm a, ani erawh mittui luang ngiai ngiai chungin chhuat chârah a mu hlâwm reng thung.

A taksa khawi lâi mai pawh chu a na sup sup a, nula fel; kohhran leh khawtlâng ina an chhuan em em 'Hero' ni ṭhin kha, Assam rifles nawm chenna 'Zero' a lo ni ta.

Khawvar dâwn hnaihah a zun chhuakin a ti harh a, tho kâng tur pawhin thâ a lawi a nei hek lo. Thei leh thei lo hian a lu rit lûk chu a her rem hret hret a; a mutna piah chiaha sipai zu rûi let reng te chu thah a châk ngawih ngawih. Mahse, a ngaihtuahna tihlawhtling turin a taksain a phatsan si.

Khawvel hi atan eng mah lo mai a ni a, ṭap tur pawhin awrâwl chhuak tur a nei hek lo. A vanduaina tawh dan râpthlâk tak hi a mumangah pawh a la hmu chhin eih lo.

A chunga thil thleng ngaihtuah neuh neuh chung chuan a maimitchhing leh ta a. Zun a cheh ta tih a inhriat lai chuan a thinlung na lutuk chu a puak keh mai ang tih hlauhawm khawp a ni.

An zu pêk chuan chawp leh chilhin a mut a ti chhuak nghâl a, a harh leh meuh chuan a kut leh ke an lo phuar vek tawh; a hmui an plaster vek bawk a, banga sana lian intâr a enin zan dar kua a lo ri dêr tawh! Zing kâra a muhil kha tunah a harh chauh tihna. Ruatsangi dinhmun hi ngaihtuah thui ngam chi pawh a ni lo.

YMA Information-a âu ri pawh a hre ruai ruai thei a, amah zawn hna an ṭan mêk tih a hre thiam mai. Ruah lahin bân zâi a rêl dêr si lo a, a khawvel a zîm teh e.

A chhungte mangan dân tur erawh ngaihtuah pawh a ngaihtuah chhin ngam lo, ṭahin awmzia a nei dêr si lova le(h)

A taksa a sil ṭhûm a, a pum ruak lutuk leh a hrawk thîp hlur te chu tawrh a har ṭan khawp mai. An khuaa Assam rifles lo awm kher kher hi a tân thil pawi tâwpkhâwk a ni ta.

He tia sipaiin an hrên chhung hian chin tâwk awm lovin an pawngsual zan tin a, eng tin nge sipai dangte leh an hotute hian an hriat loh theih tih hi Ruatsangi zawhna lian tak a ni.

Nikhua a hria a, mit a meng a, a thluak erawh a chawmawlh vek thung. That law law se a tân a zia mai tur; an zinga palian ber khan tui a rawn tulh bawrh bawrh a, an chawhmeh eng tên tûn leh chaw ṭhing an rawn chhawp ve te lah chu ei tlâk pawh va ni suh. Ei loh a tum zet naa a ril ṭâm lutuk vangin a hnar phal ta bîk lo.

"Ei rawh," mizo ṭawng pai deuh naka rawn titu chu a nui ṭhú a; a mitkhur thûk düka nunrawnna leh hurna mitmeng lo lang chhuak chu a huain a ten hluah hluah. Chil a chhâk ṭhawt a, chu sipai pa thinrim hmêl dur khuih chu hlauhna chhete mah a nei bîk lo.

An camp chhungah hian anmahni pali bâk midang tumah an rawn kal ve pawhin a hre lo. Khawtlângin an zawng reng a, a awmna lai 'an la hre fuh maithei asin' tih chu a innghahna neih chhun a ni tawp.

A chêt sual aṭanga ni sarih a liam meuh chuan beidawngin a indawm kun tlawk tlawk a, heng sipai sualte hian chhunah chuan phuar hlawmin pakhat tê têin an inven chhâwk zel. A taksa bâl leh ṭawp zet pawh engah vak an ngai lo a ni ang, an thil tih ṭhin an bânsan chuang lo. Kawmawl pakhat nen chhuat lawngah a mu hlawm reng a, inthiar tura a kal dawn erawh chuan an zui bik lo. 

Nikhatah vawi li an pawngsual ziah a, tlan chhuak ngam turah an ngai lo te pawh a ni mahna.

An camp kan ti taknaa quarter a ang zâwk mah. A bang brick-in a inrem phui mup a, tukverh pathum lian vak lo a awm bawk a, a chhuat erawh cement plaster a ni thung. 

Sikh pali lian tak tak an chêng a, khum pawh pali tho a awm. Ruatsangi erawh an khum leh khum inkâr âwl chhuatah an mut hlawm tawp a, tui an pe ṭha a, chaw erawh nikhatah vawikhat chauh an pe. Tlân chhuak thei dinhmunah a ding lo a nih ber chu.

An khua hian amah an zawnna hun pawh an ti tâwp ta a. Mizo dánah ni sarih a liam tawh a, a thi nge dam tih hre lo mah se thi anga vûi a ni ta.

Sipai camp an rawn luh chhuah lo nge chhanchhuahin ala awm tlat si lo. 

He tih lai hian Ruatsangi chhungte lam erawh an ṭap bâng hlei thei lo a; an fanu chhuan vawr, keh thei dawma an dawm chin hriat lohva a'n bo ta ringawt chu tawrh thiam har an ti ngei mai.

Maawmi leh Nunringa lah biak ṭawng theihin an awm lo. Rilru nat luat vangin an indawm kun tlawk tlawk a. Maawmi phei chu an khaw lamah a nu damloh vangin an rawn chaha a haw ta nghe nghe.

Thil mak deuh mai chu Ruatsangi lumna lâi kha an veng chhung a ni a. Mahse, theih tawpa an zawng chung pawhin hnuhma eng mah hmuh tur zuk awm miah lo a! 

Ṭhenkhat phei chuan Maawmi leh Nunringa an ringhlel titih a; Dem ru tâwk an tam mai. Police lam lû a hai a, chhui zui dan tur a vâng viau. 

Khawtlângin an zawn tawh loh hnu hian Nunringa rilru dam lo leh hrehawm ti lutuk chuan a rûkin Ruatsangi chêt sualna hmun kha a thlithlai zan tin a, a hmeichhe duh rûk em em, a duh thu a hrilh hmaa a bo ta daih chu a ngai thiam thei ngang lo a ni ber.

Zan khat chu a mut hmunah ngun zawkin Ruatsangi bo zan kha a ngaihtuah kîr a, chutia mûk taka chunglam a melh reng lai chuan, "U Nunring, chhan ka ngai," Ruatsangi âw fiah takin a hre ta tlat. 

Rang lutuk tak maia inperh thovin a ṭhu chhuak hlawl.

A sana bun lai a bih vat a, zîng lam dâr thum a ri tawh a, eng nge a tih ber dawn pawh hre lovin an vêng Helipad lam panin torch-light nen a chhuak máwl ve tawp.

Ni e, a tana Ruatsângin hlutzia hi tumahin an hre lo atin ni.

Khua a vâr dêt dêt a, helipad pang awih laia phûl hring dup ruahin a nan huh hlap kâra mihring mu niawm tak a hmuh chu en chian tumin a pan hnai ta a. 

Zan lamah ruah a sûr nasa thei si a, a awmna lai pawh a huh vek tho. Mihring mu niawm tak a hmuhna lai pang pèrah chuan a lâwn chho ta a. 

A thil hmuh chu leh!

A hmangaih Ruatsangi chu saruak ngalngatin phùl ṭo pik tak kârah nikhua pawh hre lovin a lo mu hlâwm reng! A taksa hmun tin a duk thliah thluah a; amah hrechiangtu tân lo phei chuan Ruatsangi anna reng a nei lova a hmai a vûng duk chur bawk a, a malpui kâr leh a cháwn velah thisen luanna hnu a ṭial ruai bawk. 

He lai hmunah hian zankhuain a awm lo tih leh khawvar hmain helaiah hian tuin emaw an rawn dah tih hrilh hranpa ngai lovin Nunringa hian a hrethiam mai. Zankhuaa awm chu ni se a sam leh a taksa a huh zawr vek tur a ni a; mahse, chutiang chu a ni hauh si lo.

Eng emaw chen hamhaih zeta a din hnuah a phone phawrh chhuakin Ruatsangi pa a call ta a. A kamis hâk phelhin a hmangaih saruak nikhaw hre lova let reng chu a khuh ta a.

Ruatsangi pa ve thung chuan a nupui kai thovin thil awmzia a hrilh a, an car nen helipad lam an pan ta a. Kawng lakah eng zawhna mah an inzâwt lo.

An fanu thi anga an ngaih an hmu lêt leh tur hi an lâwm a ni ber mai.

Nunringa awmna bul an thlen chhoh chuan Ruatsangi nu,(Pi Ropuii) chu insûm zo lovin a ṭap chhuak ta a, a pa Zolian erawh mipa a ni a, a insum thei viau. 

Vantlâng hmuh hlau tak chungin Car-ah Nunringa'n a pawm lut a, Ruatsangi pawh a rawn harh ṭan ta. A mitmeng a â ruai a, hlauh nei tih hriat fahran hian a phu leh zawk zawk zel, a lainatawm takzet.

Nunringa leh pu Zoliana te chhungkuain ngun zawka thil an ngaihtuah hnuah an fanu an hmuh dan dik tak chu zêp ṭhaa an hriat avangin tuma hnena sawi lo turin thu an titlu ta a, a chhan pawh pawngsual hrep a ni tih an hriat vang a ni. 

An khua angah chuan thu a darh chak si a, an fanu hmakhua an ngaih vanga ti an ni tih erawh a hriat theih. 

Ṭanfung ṭha tak tur leh vantlangin a lo lêt leh chungchângah zawhna tam tak an nei dâwn tih an hresa vek a, chumi avang chuan chhânna mumal tak an neih ngei na turin ruahmanna an siam thung.

Police lam leh YMA lama hruaitute erawh thil awmdan an hrilh hre ta a, a rûka chhuizuina hna thawk turin an be diam bawk. A nawlpui hriatah erawh chuan amaha lo haw leh tawp angin an sawi ta a. Tuin nge awih ang?

Amah an hmuh aṭangin ni thum a liam tawha a mitmeng pawh a harh ṭha viau; mahse, biak ṭawng theihin a awm lo a, eng zawhna mah a chhâng ngai lo a, thil erawh a ei ṭha ve viau. Nunringa'n a vil deuh chawt a, vantlâng zawhna pawh chhân a har ang reng. 

An fanu thi anga an ngaih tawh nungdama la awm hi a nu leh pa tân erawh chuan a lawmawm êm a, mi sawina mai mai an ngai thutak tehchiam lo a ni mahna. Nimahsela, Ruatsangi nuṭa te pahnih erawh an dam ve mawlh lo. 

An farnu chunga nunrawng taka chêt la tu hi nungdama chhuah an tum hauh lo. A rûkin helipad bul vel an thlithlai reng a, Assam Rifle awmna camp pawh vawi hnih vawi thum an luh chhuaha eng mah hriat belh tur an hmu ngang si lo, an beidawng titih.

Ruatsangi pawh a zia chho viau a, a hmêl hmai pawh hmuh tlâkin a awm ṭan. Mahse, a ṭawng ngai rêng rêng lo a, thlakhat a vei leh meuh chuan nau a pâi tih hriat chhuah a ni ta.

Assam rifle nawmchenna rah a rawn lang a, in lamah nurse an ruai a, Duatpuiin a enkawl deuh tawp, a râi a ni tih an hriat aṭang hian Nunringa a rawn lang ngai ta miah lo a; thlakhat chhung kha chhun zan zawmin a rawn vil ṭhin a nia. A rilruah eng tak awm ang maw.

Police lamin zawhna chi tin rêng zawt mah se Ruatsângin vawikhat pawh a kâ a âng lo hi a beidawnthlâk ngawih ngawih.

Zankhat chu pu Zoliana zung turin zan dâr 11 velah a tho a, Ruatsangi enkawltu Duatpuii a awm tho avangin an nupa an inthlah dul ve deuh kha a ni a, bathroom kawngkhar chhung lamah a lo inkalh tlat.

'Midang lut an awm ve a ni ang e' tiin a nghâk deuh vang vang a; rei ngial a nghah hnuah pawh an bathroom aṭang chuan tumah an rawn chhuak lo. A ri deuh rawk rawk ringawt a, a ngaih a ṭha thei ta hauh lo mai.

A fanu pindanah a va lût leh tê tê a, a hlauhthawn ang ngeiin Ruatsangi khum a lo ruak huai a, Duatpuii tui takin a muhil thung. Bathroom-a awm kha a fanu ngei a nih a ring ta tlat a, hlauthawnna namên lo a nei nghal.

Rang takin bathroom lamah a lêt leh a, "Ruati, Bawihi..." tiin a ko vak vak a. Chhângtu an awm lo. A thâwmah a chhungte pawh an rawn tho chhuak ve ṭak ṭak a, nasa taka an ko chung pawhin kawngkhar a rawn hawng duh tlat si lova a fapa upa zawk Rinkima nen kawngkhar an tichhe ta ringawt a.

An bathroom chunglama bungraw dahna an siam chartîn inkham pheiah chuan an fanu duat lai a lo inkhâi reng tih an va hmu ta a, a meng kalh rû a, a mar erawh a la awm tlat! 

An theihtawpin nurse Duatpuii te nen an buaipui hnuah a rawn harh ta a.

"Ka nu, ka pa, min kal tîr rawh u, pawngsual hnu dam leh nih âi chuan thih ka thlang zawk e," tiin a lo haw aṭanga a vawikhat nan a rawn ṭawng chhuak ve ta a.

"Bawihi..." a fanu kuah chungin pi Ropuii a ṭap chhuak hawk. 

"Khawvel hi kan khualzinna ram a ni a, kan châm hlen dawn lo; Bawihi, hringnun hmachhawn tur hian i chak a ngai a, tuna i kawng thlan hi chuan Vanramah a hruai lût dawn lo che a nia, ngun takin ngaihtuah rawh, chhungkua nangmah hmangaihtu che i nei a, inti pachang la, kan ṭang tlâng dawn alawm," pa berin hnukulh ṭeuhin a lo ti ve bawk a.

"Ka pa, a harsa a ni, ka tuar thei tawh lo," mittui luang ngiai ngiai chunga Ruati'n a tih chuan a nuṭa te pahnih an na ngawih ngawih. An farnu natna thlentu hremna pe thei lova an awm hi nêp an inti ngawih ngawih bawk.

Hemi zan aṭang hian Ruatsangi an vêng uluk zual a, Nunringa pawh thil awm dan an va hrilh ve vek a, a rawn lang ve leh ta. A hmangaih kha a ni miau a, a ensan thei ngang bîk lo.

Lalnunringa te chhungkaw lam erawh chu an lâwm fahran lo. An fapa naupang berin mi mitmei veng hauh lova Ruatsangi a buaipui hi an thâ a na ru hle a, a ni lah tak a. 

Tlangval tlawmngai, tlawntlai ṭha leh mahni tâwka lu zo tak kha a ni a, ei zawnna chungchângah pawh an veng middle school zirtîrtu a ni nghe nghe. Ngaihzawng lamah a lerh lo hle a, kohhranah a phâk tawka inhmang ve ṭâng ṭâng a ni. 

'Ruatsangi nen an inngaizawng' tia lo sawi tâwk an awm bawk a, tuna a naupai pawh hi Nunringa fa a nih an ring fur. Kohhrana inhmang ve ve annih vangin an thiltih dik loh thup nan hetianga lemchang anga puh tâwk te pawh an awm nawk. Hei vang hi a ni mahna Nunringa te chhungkaw lam hian pu Zoliana te hi an 'chu e kha' vak lo.

Mahse, mi â ni lo ta na na na chuan mi chhiat tawh boruak sarhu laia ṭawng lo cheh kha an duh lo a, an ngawi mai zawk a ni. An fapa lah an khap thei bau si lo.

He ti ang thuartham vel a nih lai hian Ruati naupai pawhin thla sarih hmêl a hmu ve ta a, mak deuh mai chu Duatpuiin 'titla mai rawh, i tân phurrit a la ni dawn a, tumahin an dem lo ang che' tia thurawn a pek pawhin zuk duh ṭhak lo a.

"Ka vanduai ta sa sa, naute pawisawi lo nunna tih chhiat hi ka ngaingam lo," tiin a chhâng daih.

Nunringa pawhin a chhungte rilru hmin zân lo hmuh kânin Ruatsangi a la buaipui ta cheu a, police leh YMA hmalâkna erawh chuan hmasawnna teh chiam a nei lo. Assam Rifle ringhlel mah se finfiahna an nei tlat si lo a, thil tih a harsa khawp mai, an Commandant an biak pawhin awmzia a nei chuang lo, Ruatsangi lahin chipchiarin eng mah a sawi duh si lo a, chêt lâk a harsa ve khawp ang.

Tûk khat chu Ruati pum a nâa a vial ngawlh ngawlh a ni ber e. Duatpuii leh a û Rinkima'n damdawi in hnai berah an hruai a, emergency-in an lo zai ta nghe nghe a, thil mak a thleng tlat.

Ruatsangi naupai an zai chhuah chu zuk dum vek a! Meihawl suih tlâwn ang maiin a dum muk tlat a, rei pawh a dam ta lo, dârkâr khat leh tlêm a thâw ve a, doctor leh nurse te mak tih a tling a, Ruati pawh an hmuh tîr duh lo a. Tin, amah ala harh chhuak hlei thei lo bawka pu Zoliana te chhungin an kawmthlang huanah an phûm ta ringawt kha a ni a. 

He tia Ruati'n zai a tawh hnu hian a nun phungin ngai a awh ve tawh ang chu tih nâk laiin, a teuh lo, biak ṭawng theih hian a awm lo reng reng; a ngawi renga mûk deuha thil ngaihtuah hmel a pu reng.

Amah hmangaiha thlahthlam lo tu Nunringa pawh a beidawng lek lek tawh a, a chhungte'n ni se an hau zantin ve bawk si. A hmangaih chan chhe lutuk ta hi Pathian a dem ngam si lo, rilru hrehawm rêng rêngin a hun a hmang chho ve mek bawk.

Kha tia Ruatin nau a pâi chhoh vel lai khan a zia riau a, ṭawng fo lo mah se eng emaw thil pangngai rawn sawi ve zauh hi chu a chîng ṭhin. Mahse, tunah chuan kha ti ang kha beisei tur pakhat mah a awm lo mai ni lovin mi â kan tih nen danglamna a awm vak tawh lo. 

Ṭhenkhat chuan an dâwi â a nih te an ring a, thil inti hre deuh phei chuan a â der anga ngaia lo sawi tâwk te pawh an awm nawk bawk.

Thu belhchian tlâk sawi tur hre hlawm hek lo.

December thla an chuang kaia tlai khat Nunringa school bâng chu Ruatsangi te inah a pêng kawi a, tun hma ang em em kha chuan a kal tam tawh lova mi mitmei a vén vang a ni pakhat.

A khumah fel fai âtin a lo ṭhu a, eng emaw a lo ziak a, tun hmaa a hmel ṭhat ṭhin nen tisen nung eih hmuh tur awm lovin a dâng lap a, a mit khur a tla dâk bawk.

"Nuna, i dam maw?" Tia a lo biak chuan a hamhaih lek lek.

"Dam e, i zia em?" Tiin khumah a ṭhu thla ve nghal a, Ruatsangin a lo be ve ringawt pawh hi a lawm tâwk a tling viau.

"Ka ṭha e, hmalam pana ke ka pên a ngai a, bul ṭan dan tur ka hre lo," a ti sap a.

"I ti tak tak em?" Awih ngam chiah lo hian a zawt a. 

"Ti tak tak e, hetia ka awm reng te chuan eng tikah mah min tina tute hi hremna ka pe thei dawn si lova chuvangin nunphung pangngai ka zawh ṭan a hun tawh." A ti leh a.

"A ṭha e, i hmaah ka awm zel ang, i tân ka awm reng a ni tih theihnghilh ngai suh ang che," Tih pahin Ruatsangi a va kuah a, "Ka hmangaih che asin, eng din hmunah pawh ding la, ka hmangaih fo ang che," a sawi zawh rualin a hmangaih chalah a fâwp vang vang a, Ruatsângi hmela hlimna rawn lang chu a hmuh hmaih bik lo.

He mi ni aṭang hian Ruatsangi nun a inthlâk danglam ta viau a, thla riat teh meuh pâwn chhuak tawh lo kha a rawn chhuak ve ta. Mi mit a chungah a fu ṭhup tih hre reng chungin a hre lo der a, a ṭhenin hmusit taka lo ṭawng khum tâwk an awm bawk.

Mahse, Ruatsangi a ni miau a, a tana khuanu ruat paldarh tur hian a rilru a sâwrbing ve tlat tawh. Hlauva kimki reng tura lo ngai an awm chuan an tisual chhiava a ni.

A pain phone thar a leisaka kum 24 mi Lalruatsangi dik tak, mahni lu zo veh vawh nih leh ngei tumin ṭan a la mêk.

Amah enkawltu Duatpuii nen thawmhnaw tih tlâk deuh lei turin bazarah an chhuak a, Assam Rifles camp awmna hmun an tlân pelh dawna Ruati hmel thim khap leh thinrim mitmeng alh phât chu Duatpuiin a hmu ru reng. Eng mah a sawi chhuak lo naa Ruati nuṭa Rinkima hrilh hriat ngei a tum thung.

An duh zâwng te an lei zawh hnuin bazar pui lamah kein an chho a, Ruati hi mi ṭawngtam a ni lo ve rêng rêng a, Duati a ṭawng mawlh mawlh lai chuan Ruatsangi pên lai a táwp chawt. 

Mit khat miah lo hian an hmaa sipai pakhat uniform râng ruk in bel chu rum mangkhéngin a melh a, chu pa pawh chuan mak tih hmel takin a rawn en ve bawk. 

"Lokal rawh, kal ang..." tia Duati'n a bâna a kheuh chuan, "A hmêl saw chhinchhiah rawh le, ka kal hmasa ang a, a rûkin a thlâ lo la ang che aw," zawi sap hian a ti ta a. 

Tichuan eng mah thleng lo ang hmiahin Ruatsangi a kal nalh a, a sawi ang chiahin Duatpuiin chu sipai palian zet thlâ chu a la ve mawlh mawlh bawk. 

Zanriah an kîl laiin Duatin sawi chhuah a tum ûk a; mahse, Ruatin a lo khap avangin eng mah a sawi ta rih lo. Eng tia hmalâk nge a tum tih Pathian chauhvin a hriatpui a ni mahna.

Nun phung pangngai a zawh chho a, tual lîm lo mah se a hma anga tawm chawt lovin thil ṭûlah chuan a chhuak ve zauh zauh tawh a, a chhungte pawhin a hma ang em em kha chuan an vêng rún tawh lo a; a thil tawn zawh chhuah an tum a piangin thiam tak hian a pehhêl zel.

Nunringa class la zo office-a a va lêt leh chuan a phone-ah Ruatsangi missed call vawi li zet a lo awm tawh a, silent ah a lo dah daih chu niin.

Rang takin a call back nghal a.

"Nuna, lo inring rawh le, police hmelhriat i neih chuan lo hrilh lâwk la, zanin dâr riat bâwr velah Assam rifle camp bulah kan kal ang," a rawn ti ta mai.

"En teh Ruat, i rilru tur ka hrethiama mahse, an rawn tibuai che a nih loh chuan va inbarh luh ṭâlh kha thil ṭha a ni lo, finfiahna i nei bawk lo a," tiin a lo hnial a.

"Ka tân tun aia hun ṭha a awm lo, ruahmanna fel fai tak ka nei a, ka u Rinkima leh Aumama ka lo hrilh fiah ve bawk ang," a la ti tak deuh deuh.

Kha tia sikh pa thlâ an lâk rûk kha Duati'n Assam rifle canteen nghâktu hnenah a thlalâk en tîrin a phone number a lo dil a, zanina inhmu tur hian a lo va be fel diam a nih chu. 

Assam rifle vai hur zet zet, hmeichhe râwp fe fe te tan chuan Duati tawktar hi hnial chi va ni suh. 

Boruak a vawt hle a, zán tir aṭangin Ruatsangi a helhhawlh viau. Duatpuii pawh thawmhnaw lum lam inbelin a insiam mawlh mawlh a, an thil tih tum hi thil namai a nih loh avangin huphurh awm tak a ni.

Phubâ leh hremna pêk ngei tumtu Ruatsangi pawh a zâm ru hle a; mahse, tun aia hun ṭha dang hi hmu leh theia a inrin tawh loh avangin remchâng a chuh vat, a huaisenna zawng zawng sâwmkhâwm tak meuh meuhin a nia risk a lâk ve tho.

Zân dar sarih a ri a, Helipad lam panin Duati nen an chhuak ta a, hetih lâi vêk hian Nunringa leh Rinpuia te unau pawh Assam rifle Chân kahna hmunah an lo biru diam tawh bawk.

Thil danglam thleng eih lovin Helipad an thleng chhova kha sikh pa, amah pawngsualtu leh kha mi zâna tel ve tho zu tulh lui tu kha Chân kahna bul in tetak tê kawtah an lo awm a, Ruatsangi te ṭhian dun lo kal chu kutin an lo hûi zauh zauh a.

Ruatsangin Duati a hrilh ru zauh a, "Kal hmasa la, i hnungah ka lo kal ang, rinhlelh kan kâi loh nân i hlim hmel lan tîr rawh," a ti a. Duati pawhin hrethiam takin chu Vai hur pahnih lam hawi chuan a nui lui vei ngial.

An awmna hmun an thleng a, an lo rin lâwk ang ngeiin chu Vai pahnih chu an koham hle, Duati zawk chuan sipai pa chu a'n nuih tlawn vel a, sâp ṭawng nâl takin a be deuh ngat bawk, anni pahnih lah chuan phûr fahran hian an zu ûm an phawrh a, in te chhungah chuan an inkuah lût ta hlawm a, Ruatsangin erawh a thil lo tawn tawh avangin nuih luih a harsat viau. Mahse, hremna pe tura kal a nih ang ngeiin bânsan tumna chhete eih a nei lo thung.

Nunringa te pathum ve thung chuan in tê chu an pan hnai zel a, sipai pahnihin zû an thlit lai te chuan kut an lo hûm ruh ngar ngar. An thâwm pawh a ṭha ta viau a, sipai pakhat zâwkin Ruatsangi fawh tumin a chelh bet a, ani duh lo ṭang tâl vel chu a ngaihna hre lo zetin a ṭhianpa chuan a en hû a, lemchang an ni tih hre hek lo.

Amah pâwngsual hmasa bertu hmaiah na zeta Ruatsangin a ben rual chiahin Duatin amah kuah tupa kapah a lo tlawh sak ve bawk a, anmahni ṭawnga an râk nawk nawk lai chuan Ruatsangin zu bottle chuhin a ben pa lu ah a vaw leh ta a. Sipai pahnih thinrim inhrosa ri chu râpthlâk tak a ni.

Duati a râk tuar tuar a, chu veleh pâwn lama lo chângtu pathum te chuan an rawn luh chilh ta a, Nunringa hmela thinurna nasa tak rawn lang chhuak leh Rinkima hmel ṭo háw tur ang maia dur khup sipai pahnihin an hmuh meuh chuan chêt an la ngam teuh lo. Kil khatah an ding zum reng ringawt.

An lo ruahman lâwk tawh angin police constable pathum leh inspector Hmangaiha an rawn thleng ve ta bawk a, Vâi hur pahnihin hand cuff an bun meuh chuan Ruatsangi pawh a nui ve thei ta.

Assam Rifles hmingchhiatna chuan zoram a tuam a, pâwngsual case mai piah lamah tualthah tum thu buai chu'ng sipai pali te chuan an awrh bawk a, dân hnuaiah an awm ta.

Amah thlawpa ṭan tlattu a chhungkua leh Duatpuii, Nunringa te lakah lawmthu sawi sên loh a bâ.

Sipai hurherh leh nunrâwng zet, a hmangaih Ruatsangi hliamtu te erawh Nunringa'n kut a thlâk ve hrâm kha.

Ruatsangi inpuanna Tv-a an live meuh chuan amah lo diriama lo hmusittu te hlei hlei khân Assam rifle an hua a, lainattu, khawngaihtu leh ṭantu a ngah letling phian.

Lalnunringa nu leh pa meuh pawhin an fapa tân an iai ta lo. A huaisennaah an fak a, an ngaisânga chaw eiah an sâwm nghe nghe.

Ruatsangi tumruhna leh chhelna hian mite thinglungah thu a sawi nasa êm êm a, Pathian a ṭih tlatna rah a lo lang chhuak a ni ber. Kha tia nunphung pangngai zawh lova mi â ang maia a awm lai pawh khan amah dintu leh siamtu hian a lo kalsan rêng reng lo. Huaisenna râlthuam famkimin a thuam a, a hmâ a lo hruai zêl zawk a ni tih a chanchin ziaka a dah chhiar tute chuan an hre vek.

A tawh sual tawh aṭanga kumkhat leh a chanve a ral meuh chuan amah hmangaiha vuan tlattu Lalnunringa nen 'Tiam tlat e' an ti ve thei ta.

Pawngsual hnu mah ni se, hmangaihna dik chuan a ngaidamin a pawm thei a, lainatna leh khawngaihnain hmun sâng tak a chang bawk.

"Ruat, i kiangah ka ding zel ang," tia lo tiamtu Lalnunringa âwma bei chungin nun bul a ṭan ṭha ve dâwn ta chu a nia.

'Khawvelah hian a nuama te an nuam kumkhua lova hrehawm tuarte pawhin an tuar kum tluan bik hek lo. Beiseina neia chhel taka tuar ṭâng ṭângtute tan hlawhtlinna a awm fo ṭhin.'

B®®

B+>[BeckirafARenthleI]<+®®