KA THLAH LO'NG CHE (B®®)

KA THLAH LO'NG CHE

Ziaktu: Becky Rafa Renthlei(B®®)

KAMKEUNA

A hmêl ṭha uchuak hauh si lo; mahse, 'Pa' ru riau si chuan ka mit a la kher mai. Vawi tam whatsapp leh call hmangin inbe ṭhin mah ila a takah ka la hmuh miau loh avangin ka lái deuh hû a! 

"Hey.." Sawi tur ka'n haihchham tlat pek chu (h)!

"Ka hming i hriat kha." Tiin a nui nghâl suk a, lehlam hawisan daih atân chuan ka ui deuh.

"Kan inbiak ṭhin lai khân sawi tur i hriat tehreng nen min hmuh rualin an thlâwkbo zo ta em ni?" A nui zui leh suk a.

Ni e, ani nen hian kum khat dâwn kan lo inbe ve tawh a, sakhmel erawh inhmuh ni a awm thei lo khâ a ni a; mahse, tunah zawng a tak ram dai thleng turin kan inhmu ve ta hlawl mai le!

Paradise panna kawng kan zawh dun dâwn nge, mumang chhâwngthumna mang ang mai ka ni zawk ang tih tu nge hria!?

Episode-1

Thlanmual panin muangchâng hian scooty ka khalh phei a, kawngchhak aṭanga leiṭhîl rawn tla huk chu ka rin loh lam daih a nih vângin Scooty ka control hman ta lo! A ke hnunglam a inpaih dâwrh rualin ka tlu ta a.

Ka hriat leh hmasak ber pawh ka khûp na lutuk leh ka kheimit bâwr vêl na ut ut te, ka biang veilam sa hut hut chu a ni mai! Thawh tumin ka'n meng chhuak a; mahse, a teuh lo! Scooty-in min delh bâkah ka ke chu tihchêt chi ninghal lo chuan!

"U Sp, a na em? Ka lo pui ang che aw." Thlanmual bul mai a awm Ruatsaka'n min rawn ngaihven nghâl a, "I ṭha em?" Tia min zawhna chu chhân pawh ka chhâng thei lo! Scooty a hûn ṭhat hnuah min pawm thawh tum hian a rawn kûn hniam a, ka zak hnuai ve veah dâwmin min kaihthawh mai a tum a, ka ṭê chhuak ṭhat.

Ka ke pahnih ka rap ngam dêr lo nia maw le!

"Ruata, min pawm zo ang em?" 

"Zo tehreng mai," tihpahin min pawm nawlh a, an inah min luhpui ta a.

"I hmai pawh a vûng a nih kha! Ê, i mitah thi a tling lehnghal damdawi inah kal ang." Hlauhthawn hmêl takin a ti a.

"Lawk aw.." ka phone dapin ka phawrh chhuak nghâl a, "Ka chhungte min biaksak la min lo hruai turin hrilh rawh aw." Ka hlauthâwng aw chu a ri chhuak chang chang chauh a ni.

Ka ke pahnih chu rah ngam miah lovin a na ut ut a, pem langsar eng mah ka nei lêm lo! ka hmai vûng chuan ka mit a rawn thleng chho tawh tih hriat tak hian ka khawhmuh dân a fiah ta vak lo bawk!

Ruatsaka'n ka chhungte a call lai chuan ka kâwng a chin chunglamah nâ ka neih leh neih loh ka indap that that a, ka ke leh ka hmai tih loh eng mah nâ a awmin ka hre lo.

"U Sp, an lokal nghâl dawn i pa leh i nau," phone min pe lêt nghâl a, "Ka lawm lutuk aw, Ruata, awm lo la chuan ka tâlbuai viau ang," tiin ka ke veilam ka en pah zauh a.

Kei hi ka insanmar viau loh chuan ka dik dâwn miah lo. Ka kap bâwr vel lum deuh pap ka hre zui zat a, ka'n en nâk chuan zun ka lo cheh reng nia! "Lalpa, ka duh thei lo!" Tihpah a ka chêt rualin ka ke a rawn na leh zawk zawk a, nikhua ka hre lo dâwn titih dêr mai! Ka lu rit lûk leh ka hriatna tlêm telh telh te chu ka mang hriat rêi ruai chauh tawh a..

#Dârkâr 6 hnuah

"Hospital in chhuahsan hun tur ka sawi thei lo, rinaiin a insawh na riau a, a Kal (Kidney) hi a sawh deuh bawk a, a Khûp ruh leh a Kheimit ruh auh hi chu thlahnih khat hnuah a zia ve mai turah ka ngai a, Pathian thu thu a ni." Doctor aw fiah fak ka hriat chuan ka accident dân khâ ka hrechhuak chawpchilh nghâl a; tunah damdawi inah ka awm tih pawh hrilh hranpa ka ngai hek lo.

"Aizawl lamah min refer mai dawn em ni ang?" Ka pa aw a ni.

"Ka pu, engpawh nise Aizawl panpui tur chuan a ngaihtuahawm deuh ka ti, thisen unit hnih kan pe tawh chung pawhin a harh ṭha mang lo a nia, motor-a phurh chi a ni rih lo."

An inbe thâwm chuan ka chhungril a luh ngut ngut thei alawm le.

Ka nu thlân a kal tumin ka chhuak kha a ni a, hetiang hian tawhsual ka tâwk ang tih ka hresa dêr si lo. Inchhirin awmzia a nei lova ka taksa natna leh ka rilru natna a inchen thuak awm mang e.

Ka pa leh doctor inbiakna zawng zawng tepawh hre awmin ka awm duh lova nachhawkna a min rawn jection lai pawh chuan ka meng chhuak duh eih lo.

"Mate, i harh em?" Ka pa'n ka samah a rawn chûl hliau hliau a, ka mittui a hnai kuar thei nia. Zawimuanga meng chhuak chung hian, "Pa, ka tihpalh aw.." ka ti sap a.

"I thiam loh a ni hleinem, lungngai reng reng suh i dam leh vat mai ang." 

Ka zun siak tur a nurse a lokal tâk avangin ka pa a inthiarfihlim a, ka zun chhuak ka hre ta miah lo hi mak ka ti a ka hlauthawng bawk! Nurse-in min buaipui lai pawh chuan ka zah êm avangin ka meng chhuak lo hrim hrim, min zâr hliah ve bawk mah se ward-ah kan awm si a, min lo hmu palh an awm ang tih ka hlau ru tlat. 

"Sp, hahdam tum rawh aw, i ke a dam hunah i pangngai leh vek mai ang," tiin min ṭawng thlamuan a, ka beisei takzet. Ka Khûp ruh leh Kheimit ruh a auh tih ka hre tawh a, ka Kal(Kidney) pawh 'a chiang lo' tiin an sawi tel tak alawm le.

'Lalpa, min dam tir hrâm rawh' tiin rilru ṭawngṭaina ka nei mial mial a, ka thluak a fîm vek a, ka harh kur tho si.

Kei hi Rinsangpuii ka ni a, unau pianpui mipa pakhat neiin ka nu hian kum li liamta khân min boralsan tawh a, ka pa Lalbiakdika hovin kan khawsa a, a hmingin hlawh chhetê ka nei ve a, ka nau Ramdinsanga erawh chuan MA a zir mêk.

Ka pa hi Hindi teacher a ni a, a pension ve lek lek tawh bawk. Revenue lamah ka thawk a, mite ang a hausa khu chûk ni lo mah ila Pathian zarah khawsak harsa kan ni lêm lo.

Kum thum chhung teh meuh ngaihzawng nghet ka nei a, inhau châng leh intih thinrim a vawihnih khat inṭhen zauh kan nei tih loh chu Lalvenpuia nen hian tun thlengin kan la inzui ve chu a ni a; inneih lam a âwn deuh tawh avângin palâi hmêl hmuh kan beisei lai a ni; ka chanchin a hriat hunah eng tin tak min ti leh ang maw?

"Mate, chaw eiin ka haw zawk ang a, nangmahin i lo awm hreh em?" Ka pa'n a tih chuan ka hreh loh thu leh Venpuia ka chanchin lo hrilh turin ka chah nghâl a.

"Ka hrilh tawh a, a lokal mai ang." Tiin min chhuahsan ta a.

Serkawn hospital-ah ka mu ve rân a, min enthuak tân chuan na nei hmêl pawh ka pu hran lo ; mahse, tû hriatpui si loh hian ka taksa a na ut ut a, nachhawknain min chhâwk tluantling thei meuh lo chu a ni e.

Motor-a phurh ngam loh khawp a hliam nasa ka neih awm ka hre si lova ka ngaihtuahna a kal thui angreng. Ka hmai a vûng tih ka hre leh tawp a, ka mit veilam phei chu a meng mang lo a chhâ a ni e. Dârthlalang a in en ka châk viau rualin thâ a lawi pawh ka neih si loh.

Ka pa rilru hah turzia ka chhût phei chuan hrehawm ka ti hluah hluah bawk. A fanu a duat leh a hmangaih em em kha ka ni a, doctor lah khân tlang takin ka dinhmun a la sawi khum zui lehnghal a ka haw deuh reuh.

Khumah che miah lovin ka mu a, ka ke pahnih an tuam khawng ût bawk nen chêt chhuah a harsa ve hrim hrim a ni e.

"Mate, i harh em?" Ka bialpa Vena aw ka hriat chuan ka meng chhuak a, a rimtui hman rim ka hriat ṭhan zet chuan ka hnar a verh zar.

"I lo thleng tawh elaw!?"

"Ka tlai mah mah, ka thusawi zâwm ṭhin nila hetiang hian i awm lovang maw le." Tihpahin ka kut a rawn vuan a.

"Min hau hmasak ka ring leh rêng a," ka kut a vawnna ka hûm lêt sak a.

"I nu thlanah kal sek tawh suh ka ti a, i hlawhchhuah chu hei hi a ni ta rêng a ni." A lawm lo tih a ṭawng dan aṭangin ka man thiam ve mai.

"Ka nu a ni a, ani lo nû ka nei hleinem,"

"Ka hria ka hria; mahse, thlâna i kal chhên vang khân a lo tho leh dâwn hleinem," 

"Venpui, khatiang zâwnga ka nu chungchâng sawi kher a ngai lo ang aw, i nu i la chân ve lova i hrethiam pha lo a ni kha." Min vawnna pawt phelhin lehlam ka hawisan daih a, min duat hliau hliau beisei lo mah ila ngeiawm taka min ṭawngkhum kher hi ka ngaithei bîk lo.

"Mate, ka tihpalh, ei châk i nei em? E he! I hmêl lan dan a nuihzat thlâk hlê mai." Za lutuk hian a nui zui a, a mizia ka hriat chian avangin ka ngai haw lem lo.

"Min nuihzat kher suh aw.." 

"Zaninah ka riahpui dâwn che nia, darkâr khat hnuah cabin a âwl dâwn a kan insawn dawn nia." Ṭha têin a ti ve leh mai a, ward-a awm pawh ka hreh chuang lo nain ka pa ruahmanna a ni a, ka sawinawi ta lêm lo.

Venpuia hi Horticulture-ah a thawk a, farnu pahnih leh û mipa inhrang chang tawh a nei a, a pa hi 1st class contractor a ni. An chhungte nen pawh kan inpawh thawkhat a, an inah vawihnih chaw ka ei ve tawh nghe nghe.

"Mate, i dam vat loh chuan palâi tirh kan tlai vek ang e." Cabin-ah kan insawn tawh a, ka pa leh ka nau Mama an rawn thleng tawh bawk nen ka thawveng huai. Venpuia pawh ka chhâng duh tingtang tawh lo va.

Mama'n min en vang vang hnuah, "Mate, ka riahpui thei tho che a nia." A ti ta a.

Venpuia nen ringawt a awm ai chuan ka nau riak mah se pawi ka ti lo daih zâwk, unau nge nge eng emaw a lo thlen palh pawhin a inthlarunawm lo deuh ang.

Venpuia duh lo chung kan tîr haw lui ta a, kan hawtîr fuh viau bawk. Zan laiah ka ke leh ka tâi bâwr vel a rawn nâ a, thî ka nei zui leh bawk nen kan tlaivar ṭhak a ni mai. Ka period hun a ni lova ka chhunglamah hian eng emaw fel lo chu a awm a ni.

Ka nauvin a ṭûl ṭûl min buaipui vek a, dik tak chuan mipa leh hmeichhia kan ni a, ka zak ru viau nain tihngaihna awm hek lo le.

Kârhnih dâwn hospital-ah ka awm tawh a, ka ṭhiante leh ka thawhpuite'n min rawn kan âwl lo a; ka lu lam a harh kur a, a bâk che thei a lawi zuk awm lova 'I zia chho zel mai ang' tia min kan tute'n ṭawngkam ṭha a min thlah pawhin ka nuih a za vak tawh lo, ka hna pawh chawlh lâk pangngaiin ka la zawm ta bawk a, Venpuia pawh office bân a piangin a rawn lawr sek a, min ngaihven vut vut viau.

Inrinni chawhnu a ni a, cabin-a ka khumah mu in whatsapp aṭanga min lo betu ka ṭhiante ka reply a, Venpuia leh hmeichhe pakhat lo lût ka hmuh chuan ka meng phar nasâ! Nidangah chuan a lokal tur thu a sawi lâwk thlap ṭhin kha a nia, min surprise chiang kher mai!

"Mate, i ṭha em?" Tih pahin a rawn nui lût var var a, a kianga ding hmeichhiain a kuta a vawnna chu ka hmuh hmaih miah lo! 

"Ṭha e, ka ṭha reng, i lokal dawn tih i sawi lova!?"

"Nia, Apuii nen hian kan rawn tum chawp chûk chûk alawm le; Apui, hei hi ka ṭhiannu Sp-i a nih hi," 

"Ka hria alawm," chu nu chu a naupan hmel viau emaw ka tia; mahse, chuti lutuka naupangchhia a nih loh hmel.

"Apui, lo ṭhu rawh u, inva fel ve." Ṭha takin ka be sawt sawt a, chîk zetin min en tih hre mah ila ka ûksâk lêm lo.

Venpuia'n 'Apuii' atih hi a sawi lan ngai ka la hre miah lova a ṭhiante leh an chhungkhat te hi chu ka hriatsak ve nual tawh bawk.

"I ṭhiannu chu khawia mi nge ka va hmu ngai lo ve?" Ka ti ve deuh ngat a.

Min melh deuh kâwk chung hian, "Hnahthial ami a nih hi, a lo zin zuai a."

"A nih chu," a bâk eng mah ka sawi zui tawh lo, Apuii pawh a ngawireng a, nidanga Venpuia lokal ṭum leh tûna kan boruak hi a dân a dang daih! Sawi fak tur hre lo mah ila ngaihṭhat loh rûkna riau ka nei tlat pek nia!

"Mate, kan chhuk mai ang, zanah ka lo be dawn che nia," a ti ta vat rêng a, mi hmuh laiin intitatû takin a lang ṭhin khâ a nia, vawiin zet chu 'a ṭhian ve mai mai' ang lekah min chhuahin ka hria.

Hospital chaw vek ka ei a buaipui lutuk ka ngai hran lo; Ka pa office kal a ngaih vângin Mama nen kan awm tlangpui. Zanah dârkua thleng pawh a Venpuia'n min rawn biak tâk silohah chuan lungawi chiah lo hian ka call ta a.

Vawihnih zet a 'ring' ral hnuah 'Tun chiah ka call tawh ang' ti rilru chungin ka call nawn leh ta a, min rawn chhângtu chu ka rin loh lam daih! Hmeichhe aw a ni.

"Khaw'nge Vena?"

"A inbual lawk a, lukham hnuaiah phone a dah daih a ka lo hre lo a ni." Ti a min lo chhân chuan ka sa ve zak.

"Tu nge ka biak?"

"Apuii.." 

"A ni maw! Apui, keimah Sp-i ka nia, Vena te inah eng nge i tih a?"

"An inah nilovin ka thlennaah a lokal alawm, Elite hotel-ah," a nui ri hak chu ka run kher mai.

"Min rawn be turin lo hrilh ta che," ṭha tak a tiin phone ka dah ta a, ka ngaihtuahna a kal thui angreng. Vawikhat mah Venpuia hian midang min la kawpsan ngai lova kan inhau châng pawhin midang vang nilovin ka thinchhe lutuk min zilh vang a ni tlangpui. Eng mah thuchiang hre hmasa hawt lova thinrim ka duh lo bawk nen whatsapp lam aṭang pawhin ka be zui hran lo.

Mahse, hotel-a inbual ngai khawp khawp chu ngaihtuah tham tak a ni. Mi â ber tân lo chuan a lang sa ruâk. Mi â lah ka ni dêr si lo.

Zankhua a min lo biak loh mai bâkah a tûk Pathianni nilêng pawhin min rawn be ta chuang lova ka thinlung a rinhlelhna rawn lian tulh tulh chu thunun a harsa ṭalh tawh.

#Nithum hnuah

Ka ke an cherna phelh a nih hma loh chuan treatment dang tehvak lâk tur a awm lo a; tin, ka kal (Kidney) lam pawh injection la tawh lovin a mûm ka ei ta bawk nen hospital-a awm reng kha thil ṭûl ber ni a ka hriat loh avangin ka accident aṭanga a kâr thumnaah chiah hospital kan chhuahsan ta a, ka zun erawh an la siak reng thova ka ke ka hmang thei rih chuang lo bawk nen a zia phian.

Hospital kan chhuahsan zanah pawh in lêng neuh neuh kan nei tak nain Venpuia a rawn lang miah lo va! Hmanni a biak ka tum bâk kha vawikhat mah ka be tawh lova min be bik hek lo! A na zawk leh ngaihsak ngai zawk ka ni chung pawh a min ngaihven lo a nih chuan sawi tur ka nei bik hleinem.

Ka hna zawm thei ka ni lo a, ka room-ah ka tawm tlawk tlawk a ni deuh ber. Harsatna leh natna kan chunga a lo thlen hian min hmangaih tak taktute an hriat chauh dâwn a nih hmel.

Kan veradah ah thingpui in in ka ṭhu a, ka duhna hmun a piangah ka kal theih tâk lovah chuan ka nauin min pawmchhuak a, nula tê chhe zawk zawk ka ni hauh lo, 5'6 ka tling ṭhelh a, 'thâu' ti a sawi tur ka ni lo a 'chêr' chhia pawh ka ni chuang lo keima tâwkah ka inphut ve viau.

Tlailam dâr thum a ri tawh a, kan inkawt a Venpuia Bike RS 200 rawn inhûng dat chu en pawh ka en peih lo. Hmeichhia phur lo se chuan ka be ve mahna.

"Mate, ka rawn lang thei lawk lova.." a nui sâng a, inthiam lo hmêl a pu bawk.

"Nia, i buai a nih kha, khaw'nge in kal dâwn?

"Hei, Apuii hi a chhungte'n thil an lo thawn a ka va lam pui lawk ka lo pêng haw ang." Ka biangah a rawn tawk zauhva min nuihtlawnna chu eng tehchiamah ka ngai hek lo.

"Tak tak, kan rawn pêng ang," tinawn lehin an tlân chhuak zui nghâl a, khanu nen khân ka ringhlel tulh tulh.

Zanriah ei hunah ka room kawngkhar a rawn inhawng a, Helmet khum chunga Venpuia leh Apuii lo inzui lût chu ka khum aṭangin ka melh hrâ a, dârkar hnih aia rei an thang tih ka lo chhinchhiah khiau.

"Te, kan rei deuhva.." khum bul chair-ah rawn ṭhuin Apuii a ding thung a.

"I helmet kha hlîp teh.." ka ti sap a.

"A tlai tawh em mai, rei kan awm dawn chuang lova phelh kher a ngai lêm em ni?" A che duh chuang map lo. Apuii hmêl ka en a, ruih nei tih hriat taka a meng sen râm leh phelh phang chu ka hai lo nasâ.

"Lalvenpui, i helmet phelh la min lo thâwkkhum teh." Nelawm hauh lova ka tih tâkah chuan muangchâng leh hreh hmel takin a phelh ta a.

"Lo kûn la, min lo thâwk khum rawh." 

"Sp, eng nge maw i hriat le?" Apuii a lo inrawlh ve a, "Lo ṭawng reng reng suh, Vena lawm ka biak."

Lalvenpuia rawn kûn hniam chu uluk zetin ka lo hnîm ta a, Zu rim a nam ham ham! 

"Zu i in a ni maw? In pahnihin in in em ni? Tia zawh kher che ka tum lo a nia," ka puansin lai pawt chhovin, "I mize inthlâk thut hi ka hriatthiam beisei hlek suh." Tih pahin Apuii ka melh a, "I chhungte chuan Zû an lo thawn che tihna em ni, an thil rawn thawn che in va lam chu in rawn in dûn ta a." 

"Sp, i rin dan sawi vak vak ringawt lo la," Vena lo ṭawng chu rum taka melh chung hian, "Sawi sual ka nei em ni? Ka thinlung hian a hria alawm, min chhuahsan tawh rawh u." Ka ti hmiah.

"Thinrim kher a ṭul lovang." Tih nghut pahin Apuii bânah a vuan a, "Vena, i duh dan dan a min palzût tum rêng rêng suh,"

"I duh duh dânin min puh bîk suh." Dîm vak lo hian kawngka a rawn nam khar a, min chhuahsan ta a.

Vawikhat mah zû a in ka la hre ngai lova kan inkâr a ṭhat loh deuh pawhin ruih theih thil lam a ti ngai hek lo. Tuna a nungchang ka hmuh khâ ka lawmzawng a ni lo mai nilovin ka ngaina hek lo.

Palâi hial rawn tirh tum siin hmeichhe dang Hotel-ah a va hmu a, 'engtin nge an awm' tih hre sî sê lo mah ila ka ngawih bopui dâwn hauh lo.

Inṭhen ka duh lova; mahse, hetiang dinhmun a ka din lai a hmeichhe dang a rawn hruai ringawt pawh hi lâwm lohna tham a ni tawh.

Zân dar sawmpakhat thlengin phone ka khâl kual a, number pakhat aṭang a ka pic dawn chuan ka chhungril a khawih che dat mai le!

Venpuia leh Apuii thlalâk a ni a, vawiina an thawmhnaw inbel chiah kha inbelin room pakhata an infâwp lâi thlalâk a ni!

Min rawn thawntu number chu ka hriat ngai a ni lo a, ka reply bawk hek lo. Ni e, inneih tum ut ut tawh mah ila min phatsan a hmeichhe dang pantu mipa hi ka thlah ngei a ṭûl dâwn anih hmel.

Ka chhungkua leh ka dinhmun ka enin ka zak hliah hliah a, mipa ka rin leh ka innghahna ka engkimin min phatsan hi 'Ka na lo' ka tih chuan dâwt ka sawi tihna. Ka na ngawih ngawih a dam ṭha pangngai ni ila chuan ka tuar dan pawh a zia deuh tur; mahse, mî min hmusitna tizual tur leh kha leh chen kan lo inzui tawhna zawng zawng thaichhiata a awm tur hi ka ngai ngam hlawl lo a ni.

Muhil thei lovin ka let kual sek a, ka taksa na ut ut te ai chuan ka chhungril natna hi a thûk fê zâwk. 

Kan inhualna zungbun Silver kual simple zet chu ka tuai hauh hauh a, a insawifiahna ngaithla miah lovin ka ngawihsan ang nge, inṭhenna a sawi hun ka nghâk zâwk dâwn?

Lalvenpuia te ang mihausa fapa 'nungchang ṭha si' ti a an fak viau ṭhin leh ka lo chhuan rûk ve em em mipa hi mitkhap kâr lekin a inthlâk ta dâwrh chu a ni a, ka nat hma te khân lo hre hmasa ila ṭha tur a ni a; mahse, tunah chuan engtikah nge ka dam dâwn tih pawh a hriat si loh.

Mittui far fap chung hian blanket-in ka inkhuh vek a, chhuak zet hian ka ṭap ta hlawp hlawp a, kei hi mipa vângin ka ṭap ta chu a nia, ka nu boral a ka ṭah bâk kha vawikhat mah ka ṭap nawn tawh lo, reingial ka ṭah hnuah insût faih faih chung hian ka puansin lai ka hlim a; sana ka en chuan zinglam dâr hnih a ri tawh.

'Lalvenpui, i thutiamah i ding dâwn lo maw?' tiin ka phun sap a...

B+>[BeckirafARenthleI]<+®®

2.KA THLAH LO'NG CHE

Becky Rafa Renthlei

Episode-2

Lunglei

13th August

Vena leh Apuii pic min lo thawntu number chu ka save nghâl hmiah a, tu nge a nih tih hriat tuma call ka tum hran lo. A chhan chu kan inkâr a hrechiang hlê tihna a ni a; ka hmâ ngaitu a nih ka ring miah lo! A lo ni a nih pawhin min chhâng duh a ka rin loh vang a ni pakhat bawk.

Vawikhat mah Lalvenpuia'n min rawn be chhunzawm tawh lo a, lokal chu sawi loh a reh hmiah mai a ni. Ka rilru na eng ang mah se biak hmasak ka tum bîk lo.

"Mate, Vena nen in inkâr a ṭha vak nange?" Ka pa awm loh hlânin Mama ka pindan-ah a rawn lût a, ani hi a ṭawngtam tehchiam lo a, tlangval ve ta na na nâ chuan engkim a man thiam tepawh a ni mahna.

"Nia, eng mah sawi ve tur ka nei lo." Tiin Vena nen kan inkâr leh kan inbiak loh dan thlengin ka sawi ta vek a, "Thlah hmiah ang che, tenawm lutuk" ti nghutin ka pindanah a vei tawn sek a, "Thlakhat bâk chawlh i la si lova i âi kal dan kan dap dawn nia, patea ka lo hrilh ang." A ti ta a.

"A ṭha alawm, i kal theih chuan, Mam, ka rilru a nâ a ka zak bawk," ka insût hraih a, "An chanchin kimchang hriat ka lo tum dawn nia, ani lo pawh mipa an tam lutuk, chuan Scooty hi hralh daih ang aw,"

"Hralh lo ang, ka nu min leisak hnuhnung ber a nih kha." 

"I mamawh tawh hleinem, Mate, tlang takin ka hrilh ang che puitling i ni tawh a, i ke hi dam pawh nise i 'Kal' hi Shillong-ah check ṭhat a ngai dawn a, hlauhthawnawm a ni lo turah ngai ang." Tlang taka min hrilh chuan ka mittui a hnâm sawk.

"Ka Kal(Kidney) ah problem a awm tih sawi i tum a ni maw!?" 

"Umn.. Chu chiah chu, ka pa'n a hrilh hreh che a; mahse, lungngai lo la Pathian kutah inkawltir a him ber, Lalvena tih vel ai chuan i dam phawt a pawimawh a nia." Mama'n min chhuahsan hnuah muangchângin khum lu lamah ka tawlh chho a, ka phone bawk ka khâl leh ta a.

Whatsapp group pakhatah ka ṭhiannuin min add ve a, annawi hlawm ngei mai, fiamthu nuihzatthlâk tak tak an rawn post-te chu chhiarin ka lo nui ve var var ṭhin a, ka rilru natna a chhâwk ta phian.

'LS Zela' tia indah pa phei chu a uang fâl a, Smiley ka dah ringawt tepawh rawn like-in min fiam zauh zauh a ching ṭhin. Anmahni ang a active ka nih loh bâkah mithar ang deuh ka nihna chen a awm a, eng fiamthu mah ka thawh ve ngai lova; mahse, ka luh tamna ber a ni ziah tho.

Ka nunah mipa tumah sengluh tumna ka nei tawh lova Vena ka huatna hi nitin a zual deuh deuh nimaiin ka hria. Zankhat chu ka pindanah Venpuia nu ka pain a rawn luh pui hlawl a!

"Sp, kan rawn lang lawk thei lova min hrethiam a ni ang chu, i ṭhianpa lah a nikhualo tulh tulh a, a chanchin i hriat vek tho ka ring a," inthiam lo tih hriat takin khumah a rawn ṭhu a, ka pa erawh a chhuak nghâl daih.

"Nu Mawi, eng mah sawi ve tur ka hre lo, tihian Vena nen kan inkâr chu a tâwpah ka ngai hmiah a kei ti hi ka ni tawh a, palâi tirh tih vel kha chu theihnghilh tawh zawk ang u." 

"Ni e, a neitu tur berin tihian midang a kawp daih si a, Vena khawsazia hian tun ṭum chu min ti lawm lo khawp mai, Apuii pawh ka kamkhat nghe nghe a." 

"Ni e, Pathian remruat tepawh a ni mahna," tih chiah ka sawi.

Nu Mawii nen dârkua thleng rak kan inkâwm a, a fapa tân a min iai loh thu leh ''I dam veleh ro hran rêl kan tum dawn nia' tia a sawi chu ka pawmpui teh chiam tawh lo. 'A rinawm lo hmasa zawk ka ni lova, a thutiam bawhchhetu pawh a mah a ni bawk a, hnunglam hawikir ka tum lo.' Tiin ka chhâng hmiah.

Min hawsan hnuah ka phone bawk ka en leh ta a, Private msg pakhat ka hmuh chuan rang zet hian ka hawng nghâl a, 'Zanin chu group-ah i rawn nui lo va' tih tê chiah! Kan common group en nghâlin amah bawk kha.

'Nuihna tur a awm em ni? Ka lo nui nghâl' tia ka reply chuan rang zet hian, 'Tak takin lo lût duh suh tihian inbe zâwk ang' a rawn ti leh a.

'LS Zela' tia indah pa nen chuan thu ho tê tê leh fiamthu deuh deuh a inbiain zinglam darkhat ka'n meng thleng zak nia.

#Thlaruk hnuah

Ka khûp ruh leh Kheimit ruh nâ pawh azia tawh a, ka duh duhin ka kê ka hmang thei ta. Mahse, thil pawi ta ber chu ka zunchhuak ka hre lova Aizawl leh Lunglei hospital kan pan theih ang angah incheck up-in hmasâwnna tehchiam hmuh tur a awm lo a, Shillong-ah pawh vawihnih kan incheck up tawh bawk a, treatment te han la ve ṭhin bawk mah ila awmzia a nei lêm lo a ang khawp mai.

'Kidney transplant' a ngai tih khâ kan thu dawn hnuhnun ber a ni a, chu lah chu ka ngam teuh si lo.

'Mate, i damna tur a nih chuan eng pawh kan huam a nia, Pathian zarah eng êm a thleng lovang' tia ka pa'n min nawr ngar ngar pawhin ka duh eih lo. A hlauhvin ka hlau hlur mai a ni.

Ka hna pawh thawk zawm thei ka nih tâk loh avangin ka Patea leh kan pû puihna zârah ka nauvin a thawk ta a, khawi mah chhuak ngam lovin kan in hi ka khawvel a ni hrim mai. A chhan chu ka zun siak reng a ngai a, pâwna chhuahpui chi ninghâl lo chuan.

Lalvena leh Apuii anla inkawp ve zel tih tlangkam aṭangin ka lo hre ve a, kan inṭhen chhan an zawha a chhânna khân ka thinlung a tina vawng vawng thei. 'Dam chhunga damlo enkawl reng ringawt chu tu nge peih ang, innei tawh ni ila chuan a zia deuh tur a nia, kan innei hman lo khâ Pathian min venna a ni' tih vêl ka hriat zan phei chuan ka ṭap tlaivar ṭhak.

Mahse, ka ṭhian ka engkim leh min fuih rengtu Lawmsangzela ka nei tawh a, inngaizawng lo mah ila kan inbe nasa ṭhin khawp mai. Ka natna zawng zawng hre fai vektu leh min hnêmtu a ni a, a chanchin kimchang eng mah hriat ka nei lo; mahse, ka tân ani tluka ṭhianṭha leh min ngaihven tu mah an awm ka hre hek lo.

'Hey, vawiinah thil i ei ṭha em?' tûktin leh tlaitin min zawhna pawh ngâiah ka nei tawh a, ka chanchin leh hmâ ka sâwn dan engkim ka report thlap thlap ṭhin. Ani hi uang peih ta rêng rêng a ni a, fiamthu holam tak tak sawi tur a hriat bâkah a hunawl neih zawng zawng ka tân a hmang vek tih theih deuhthaw a ni.

'Sp' tiin min ko ngai miah lova 'Rinsangpui' tiin min ko deuh kher zel! Ani pawh koh duat teh vak dan ka thiam bik lo a, 'Lawmsang' tih kha a ni leh tawp.

Venpuia chanchin leh kan inkâr zawng zawng pawh ka hrilh fai vek a, 'Mipa a ni lo a nih chu' tih bâk eng mah zuk sawi miah lo va!

Whatsapp mai bâkah facebook thlengin kan in ûmzui a, Aizawl ami tih bâk a chanchin ka hre lova min hrilh ngai bawk hek lo. A nu leh pa a unaute chungchâng ka zawh pawhin thiam taka pehhêlin thil dang min sawipui daih zel! Mahse, ngaihzawng ang a inen kan ni tlat lova chuti lutuk chuan ka dîlchhût bik lo.

Kohhran leh khawtlângah a phâk tâwkin a inhmang ve ṭhin tihte chu ka hriat chhun a ni mai.

'Rinsangpui, zîngah tho hma la, exer la rawh' whatsapp aṭangin zinglam dar nga velah msg a rawn thawn leh heu tawh mai! Min hmu pha lo mah se thuawih ber ang ziazângin ka zâwm vei thlap zêl.

'Lawmsang, keimah ringawt exer la turin min ti bik suh, mipa dulkiar ka duh eih lo' 

'Min duh mah la min chang lo hrim hrim, exer lâk ka ngai lo nasâ, six pack ka nei' min chhânna tur a hre zung zung a, vawikhat tê pawh ka rilru natna turin ṭawngkam a chhâkchhuak ngai miah lo bawk.

Zankhat chu Mama ṭhianteho kan inah chaw an eikhâwm a, 'Eirawng kan bâwl vek ang' an tih vânga remti chauh ka ni. Mipa pali leh hmeichhe pahnih anni a, ka pindanah rawn lûtin eitur eng emawzât min rawn ken a, "Sp, kan bulah lo ṭhu phei ve rawh," tia min rawn be hmasa bertu chu a fel hmel reuh hle a, min enchîk viau bawk.

"Inthlahrung miah lovin awm bawrh bawrh u la min vengthâwng suh u." Ka mut dan siamremin an vai chuan ka en kim vek a, ka hmelhriat pakhat mah zu awm lo va!

"A ngai lo lokal ve rawh," ka inrin hmain chupa bawk chuan min pawh thawh tumin ka kutah a rawn vuan a, 'Ka duh lo ka tih chu..' ring fahrana ka vin tâk vak avang chuan min thlah rang kher mai. "Tihpalh lutuk, khatia tawm reng kha i nin deuh ka rin vâng a nia," dam thlapa tiin min chhuahsan ta a, ka inthiam viau lo. Mahse, zun siakna nena mi zinga ṭhut ka hreh êm a ni.

Ka nun dan ninawm leh pik zet chuan min tihhrehawm châng a tam khawp mai, Pathian hnenah damna ka dîl tawh ngai lo va ka hmabâk êng awm lo zet chuan ka ngaihtuahna a titâwi turh ka ti lo thei lo.

'Mood off kan awm em? Vawiin nilêngin min bîkbo san vêl a'' Lawmsanga'n min rawn biak chuan ka nui var var a, a sawi ang deuh tak tak hian vawiin nilêngin ka la be miah lo.

"Kan inah chaw an eikhawm a.."

"Tute nge, thîk tur an awm loh chuan bialnu tûr tal an awm ang a," fiamthu bawkin a rawn ti leh a, a aw dam ruih leh nghet charh hi hriat a nuam ngawih ngawih.

"I duhzâwng an awm lo ang, Mama ṭhiante annia." 

"Anih i duhzâwng ka ni em?" Tihian zei deuh; mahse, chhân har ru riau a kawihher dan a thiam viau bawk.

"I duhzawng ka nih chuan.."

"Rinsangpui, inla zei viau suh." Rei ngial kan inbiak hnuah nui bâwk bâwk chungin phone ka dah ta a. Mama te ṭhianho paw'n chaw an ei mêk tih an thâwm aṭangin ka hre mai.

Ni e, ani nen kan inbiak hi chuan ka nâ ka theihnghilh ṭum lah a tam a, ka hlawh hi Mama nen zât leh zâtin kan insem ṭhin a, ka mamawh leh duh ang hi chu ka lei ve mai zel ka pa tibuai miah lo vin.

Kumkhat dâwn pâwn ka chhuak tawh lova ni êng hmu khât leh ka phâk ang tâwka intuai fâi hlarh reng ka ni bawk a, ka damloh hnu hian hmuh ka nuam sawt. Venpuia vânga ka zahna leh mualphona a ni têlin a reh chho telh telh a, phone hi ka ṭhian neihchhun leh ka ṭhian kawmngeih ber ka hnaih theihna a nih vângin ka khawih zêl mai ta lâwng.

Aizawl

Kârthum hnuah

Lawmsangzela

Ṭhian ang a min entu, hmaichhan a ka la hmuh hauh loh Rinsangpuii ringawt ngaihtuaha ka thluak a vir chhên lai chuan a pic min lo thawn ka en lâwr diat diat a, a hmêl dâng lap; mahse fiah ru riau si te hi hmuh hlân ka nghâkhlel takzet. Ṭhian ṭha angin min en tih ka hria a keipawhin ka fiamkual nasa hlê ṭhin bawk. Mahse, eng emaw lai aṭang khân ka rilru a inthlâk ta hlauh kha a nia!

Kei hi Lawmsangzela ka ni a, 5'11 a sâng niin ka taksa inphut nâna Gym kal ziah ṭhin ka ni. Rinsangpuii ka fiam ṭhin dan ang deuhvin exer lâk ka ngai thutak hlê a, ka pa Lalfakhlua sumdawnna enkawlpui hi ka hna ber a ni.

Unau pahnih chauh kan ni a, ka u Zosangmawia erawh a hna vângin kan hnenah a awm lova ka nu Lalmuanpuii a pension hnaih tawh avangin Lawngtlai lam a kan inah ka pa nen an awm a, Aizawlah ka pute kiangah ka khawsa mêk a ni. 

"Lawmsang, min lo call i tum miah nange?" Rinsangpuii'n whatsapp aṭanga min lo biakna ka hmuh chuan ka nui nghâl suk a. Nikhatah vawithum aia tam inbiak chângte pawh kan nei maw le!

A taksaah harsatna a nei tih ka hria a, engkim min hrilh ṭhin avangin ka lainat viau bawk. Nula hmelṭha tak hetia pâwn pawh chhuak hleithei lova a awm hi ka khawngaih a ni ber mai.

"Ka lo call dâwn chiah che a," tia ka chhânna chu rang zet hian a en a, 'I daw keh a nih chu' a ṭawngkam hman te lah hi a mak thei!

Ka chhungte chanchin vawikhat tê mah ka la hrilh lo a, a chhan chu râlkhat aṭanga inbia kan ni a, 'insawithei' min tih tepawh ka hlau deuh reuh.

A bialpa, a pasal hual Lavenpuia chanchin min hrilh zân khân chhinkhat tê mah ka chhing lo a; khatiang mipa khâ an awm thei dawn em ni? Chuvangin ani hi eng din hmunah pawh ding se kalsan ka tum lova Aizawl lokal an tum hnai tih a sawi phei chuan hmuh hlân ka nghâkhlel viau.

Ka ngaihzâwng a ni lova ani paw'n chutianga min en ka hre hran lo; mahse, ka hmu châk zek zek.

Rinsangpuii dam leh theihna tur a puih hi ka inhuam ve em em tawp mai a ni. 

Ka hmuh hunah engtin nge ka awm ang tih ngaihtuah ringawt hian vawi tam a 'dp' leh status ka en âwl lova ka ngaizawng ta nge tih pawh ka hriat si loh..

B+>[BeckirafARenthleI]<+®®

KA THLAH LO'NG CHE

Becky Rafa Renthlei

Episode-3

Rinsangpuii

Aizawl pan turin kan inbuatsaih ta a, hun dang chu nise ka hreh leh ngawih ngawih viau ang; mahse, tun ṭum kan kal tur zet chu naupangchhe zin châk ang maiin ka phu sek a.

'Mate, ka pa a kal tel dâwn sia Dinmawii chu sâwm lo mai ang aw' a sam uluk zetin a siam mawlh mawlh a, Mama bialnu Dinmawii hian min ngaihtuah em em a kan ṭangkaipui takzet, Faith hospital-ah nurse a ni a, a viâk a ṭha zak zak khawp mai.

"I duh chuan hruai tel rawh ka pa'n engtin ati chuang lovang che," ka tih chuan nui chung hian, "Min dîp palh ang" a'n ti ve ngei a(h)

Vawiin hi Nilaini a ni a, Aizawl-ah incheck up-a kal tur kan ni a, Lawmsanga pawh ka hrilh thlap. 'In thlen chin apiang lo sawi zêl rawh aw' a ti nghe nghe. Lungleiah vawikhat tê mah a la kal lova kan thlen chin hrilh tehreng pawh ni ila a hre awm tawp si lo va.

Sumo-a chuang chi ka nih loh avangin ka pa car (i10) in kan chhungkuain kan kal ta a. Thenzawl kan thlen veleh Lawmsanga ka call nghal a, 'Thenzawl in lo thlen tawh chuan kawng zâtve thuak a nih tawh chu, ka lo google char char,' nie, hetiang mipa eng mah ka ni tawh lo chung leh ataka min la hmu miah lo chung a min ngaihsak em emtu hi ka tân a hlu hlê a ni.

'Mate, tu nge i biak ṭhin hi?" Ka pa'n min zawh chuan lâi zetin ka nui a, kum 27 ni ve tawh mah ila ka pa kiangah kher hi chuan ka inla puitling hleithei lo.

"Pa, zâwt duh suh a sawi awm lo em mai," ka nauvin min chhân khalh a, ka ngawi hmiah. Ka ngaihzawng a nih tlat loh avangin an kiangah pawh Lawmsanga hi ka be fova 'Tu nge?' Tiin min zâwt kîlkêlh lo.

A dp leh a thlalâk min lo thawn pathum vel kha ka hmuh chhun a ni mai a, 'A hmelṭha e' tia sawi tur a ni hran lêm lo bawk. A pianphung leh a sân zawng pawh rin dan ka nei thiam chiah lo a, a kum zât phei chu ka hre lo hrim hrim. 'Lawmsangzela ka ṭhianpa Aizawla mi' tih a ni deuh tawp.

Ka zun siakna hi phâwi se chuan dam ṭha pangngai ang mai ka ni dâwn asin le; Pathian lakah vui ngam tur ka ni lova lungawi taka ka natna pawm thiam zir ila ka hahdam a ni mai. Chuti anih rualin kohhran leh ka pa'n min ṭawngṭaipuinate vawilehkhatah a chhânna hmu vek lo mah ila nitin lungngai lutuk lovin ka awm theih phah tih ka hria.

Lawmsangzela hi Pathianin min pêkah ka ngai hmiah a, Venpuia vânga ka natna leh zahna zawng zawngte pawh min chhâwk zangkhai ka ti lo thei lo. Lalvenpuia ang mipa khá nitin ₹1000 hlawhin ngaizawng leh dawn ila ka duh eih lo. Amah ka huatna a nasa firfiak êm!

#Dârkar 7 hnuah 

"02 aṭanga 01 rawn thlen meuh chuan kan be chang ta lo che a nih hmel." Ka inbual zawh vek hnuah whatsapp ka bih leh hmanhmawh a, dam ṭha pangngaite ang a che zung zung thei ka nih loh avangin ka thlen hnuah muangmarin ka inbual ta kha a nia.

"Khati kher kha chuan min ti suh aw," tia ka chhân hnu lawkah min lo call ta a.

"Rinsangpui induh nu, zaninah kan inhmu dâwn em?" A aw fiah fel fak hi hriat a nuam thei a nia.

"Zanin chuan a chiloh, naktukah hospital-a inhmuh tum zawk ila.."

"Hus! I tlânchhe ṭan elaw? Min hmuh hunah min ngaizawng dawn em?" A nui hawk a. "Teuh lo, bialpa dulkiar ka duh teuh lo," 

"Model tluk mah suh ila min star lo atâkah," a fiamthu mah nise ka nuih aza lutuk lo. Ka hmuh tum dan chuan tâwi lampang chêr deuh a nih ka ring ve ringawt a.

"Min hmuh hunah tlânchhiat i tum vaih, min hai lo bawk la," ka nui tak uar uar a. "Thlalâk a ka hmuh ṭhin mitmeng fiah kâk Rinsangpuii kha khawi hmunah mah ka hai lovang e." Inringtawk zeta a ṭawng chuan ka nui hak a.

"Ok, kan kal dawnah chanchin ka lo hrilh ang che," kan inbiak zawh hnuah whatsapp aṭangin kan in mangṭha leh tê tê a, kan awm dunna group-a mite'n min dem fiam laih laih ṭhin avangin kan active dun lutuk tawh lo bawk.

Kan zin chau deuh bawk nen ka muhil ta thuai a, khawvar rualin ka harh leh chauh.

"Vawiinah tu emawni ka hmu dâwn a ka helhhawlh," Lawmsanga bawk.

"I lokal thei tak tak ang maw? A harsat chuan ka tilui miah lo che a nia." Ka ti ve a. "Tihluih ngai chi ka ni lo, ka lokal tawp ang," a'n chimawm mai mai khawp a!

In entir tur mah ni ila ka inchei uluk ve viau a; Mama'n nui suk suk chung a, "I zun sek loh nan tui intlêm deuh mai rawh aw," a tih chuan ka run kher mai. "Ramdinsang, min nuih reng reng suh, ka inpawm tir lo ṭhah mai ang che."

"Min pawm chhâwktu tur vawiinah kan hmu dawn a ni awm a.."

"I chhe keh a nih chu, ka ṭhianpa ka tih tih kha.."

"Ṭhianpa hi bialpa anni duh châwk a nia, uluk lutukin ka lo en ang a, Lalvena ang a nih loh hrâm ka beisei." Zuk ti kher a.

"Lalvena hming rawn sawi ri reng reng suh." Ka duh aiin ka la vín nasa lo mah mah.

"Apuii nen an inkawp tawh lo a," 

"Ramdinsang, i kâ chîp hmiah rawh," ka thinrim leh takngial dawnin a hria a ni ang, "I hriat duh tâkah ka sawi ve mai mai a nih kha, ani kha chu kan inchhunga lokal atân pawh ka duh hleinem, hetia amah ngaihven miah lova i awm thei hi ka ngaisang khawp mai che." Tiin min chhuahsan ta a.

Venpuia hi a hmelchhe miah lova a hleitling hle bawk, an chhungkua an awm thei a, ngaizawngtu a ngah viau ṭhin kha a ni a, kei nen kan inkawp lai pawh khân min hawtu an awm neuh neuh ṭhin; mahse, rinawm takin kum thum tehmeuh kan inzui ve a, chawp lehchilha min phatsan ta hi ka ngaithiam hlawl lo. Pathian hnenah amah ka theihnghilh theih nân ka ṭawngṭai fo ṭhin a, chû ka ṭawngṭaina chu chhânin a awm ta a ni ber.

Hospital-ah incheck up turin ka nau nen kan kal ta a, ka pa erawh office lam dawr a ngaih vângin a kal hrang a, pathum chauh kan ni bawk a, kan inhau khât khawp mai.

"I kal hi a vûng nasa hle a, a lâwng bawk a, pipe vuah reng a nih vângin nihnih thum tal chu damdawi inah awm ve phawt rawh aw," doctor-in a tih chuan ka huphurh ngei mai. Mahse, ka hnial hreh ve si a, helai thleng thleng kan kal ve tawh a, an thû zawm mai loh chu tihtheih dang awm hek lo le.

Chumi hnu chuan treatment thar ka lâk tur nen min admit ve leh ta nge nge a, Mama'n min riahpui a tum chuan, 'A ngai lovang, a hma ang a kal thei lo ka ni tawh chuang lova zinglamah lokal hma zawk mai rawh ka ti ta a.'

Tunah chawhnu dar thum a ri tawh a, damdawi in khumah ka mu leh ta zân mai! Lawmsangzela call-in min admit thu leh kan awmna ward ka hrilh ve nghal a, 'Hospital kawtah ka awm tawh' zuk ti mauh a! 

Kan inbuaipui chhung a rei deuh avangin kan awm dan zawng zawng ka hrilh vek ta lo kha a ni a, min lo nghâk reng tawh nge a lo thleng ve chiah tih pawh ka hriat si loh!

Ka awmna ward kawngka a mipa lo dâk lût ka hmuh chuan ka thaw chhuak halh a, a hmel hai chi ziazâng ni nghal lo chuan! Amah ngei a ni.

Min rawn zawng tih hriat tak hian khum awm tlar dul chu a melh lâwr diat diat a, ka awmna hi Bed No.7 a ni a, min lo hmu nghâl mai bik lo. A thawmhnaw inbel 'Maroon colour' shirt leh Jeans paw duk raih chu a inhmeh hlê a; a ke lam erawh ka hmu pha lova amah a ni tih hre tho mah ila ka hmuh tum dan nen a inpersan lutuka ka thaw ṭha thei dawn lo alawm le.

A hmêl ṭha uchuak hauh si lo; mahse, 'Pa' ru riau si chuan ka mit a la kher mai. Vawi tam whatsapp leh call hmangin inbe ṭhin mah ila a takah ka la hmuh miau loh avangin ka lái deuh hû a! 

"Hey.." tiin ka kutin ka hûi pah zauh a, sawi tur ka'n haihchham tlat pek chu (h)!

"Ka hming i hriat kha." Tiin a nui nghâl suk a, lehlam hawisan daih atân chuan ka ui deuh.

"Kan inbiak ṭhin lai khân sawi tur i hriat tehreng nen min hmuh rualin an thlâwkbo zo ta em ni?" A nui zui leh suk a.

Ni e, ani nen hian kum khat dâwn kan lo inbe ve tawh a, sakhmel erawh inhmuh ni a awm thei lo khâ a ni a; mahse, tunah zawng a tak ram dai thleng turin kan inhmu ve ta hlawl mai le!

"Eng lo..ih..ka la sawi dâwn chauh," a vawikhat nân ka lai lutuk a ka dang te a âwk vek!

"Rinsangpui, keimah Lawmsangzela," ti deuh ngatin a kut ka vawn theih nân a rawn phar chhuak a, a sana bun lawk lam deuh chu ka lo melh hman hrâm.

"Rinsangpui tiin min ko lawl lawl suh, Lawmsangzel," ka pangngai ve deuh ta, ka khum bul a 'bench' tâwitê chu pawt chhuakin a ṭhu zui nghâl a.

"Anih leh ka Rinsangpui," kiai suk chung hian ka mitah tak min en a, "I ṭha em? Tih ka zâwt lo mai ang che, ṭha ni la an admit awm si lo che a," a ti leh a.

"Ka ṭha lo lo.." 

"I ṭha lo lo maw!?" Ka chhîp aṭanga ka ke lêr thlengin zuk en chhuak dap a! Chutah, "Ka hmuh tum dan ai che in i ṭha daih?" Ti supin a rawn kûn hnai a, "Min hmuh dan eng nge le, mipa thâu chu ka ni lo phawt a.. i duh chi nge ka nih ka duh chi i ni zâwk?" Fiamthu a sawi ni mah se chhân dan tur ka haihchham dêr!

"Pathian zarah kan inhmu ta chu a ni a, i beisei ka pha lo a ni ang maw, i ngawih tlat danah!?" Thutak zawk a tiin a sana bun lai a bih zauh a.

"Aih chutiang a ni lo..ih.." sawi zawm duh lovin ka ngawi zui daih a.

"Ih..leh a dangte..tihna em ni? Ka hmu thei che hi ka lawm, i nau khawiah nge?" Tih pahin a hawi kual a.

"Ka eitur a la lawk dawn a.."

"Tu nge riahpui dawn che?" 

"Riahpui ka ngai lovang ka ṭha alawm,"

"Ang lo lutuk, ka riahpui hreh miah lo che a nia, i duh phawt chuan," 

"Tak tak, ka ṭha lutuk a nia, Mama paw'n min riahpui a tum a ka duh lo alawm," lo inbe tam tawh na na nâ chu nichin aiin ka zia ta deuh. A lo luh lai khân eng mah a ken awm ka hre si lova, eitur chi hrang hrang min lo ken ṭeuh chu niin! "Rinsangpui, min la kawm duh zêl ka beisei a nia, inhmuh tâk avanga inbiak duh loh tih vel kha ka duh dawn miah lo." A nui tawh miah lo a, a mitmeng fin hmel tak leh zahawm ru riau si chuan khawdang hawi lêk lovin min en reng bawk si nen hnuailam bih pah hian, "Nang mah zawkin min biak duh loh vaih," ka ti sap a.

"A ang lo lutuk, kan inhmuh hmâ a ka lo sawi fo tawh ṭhin, min thlauhthla tawp a nih loh chuan..tiin ka sawi lovem ni." A kut lum thar thar chuan ka kut rawn vuanin, "I dam ṭha emaw dam ṭha lo emaw ka ngaih dan che leh ka hmuh dan che a pangngai reng." A ti ta a.

Lawmsangzela hi ka rin ang a ni dâwn lo tawp mai. Fiamthu duh tak leh ngainatawm tak a nih rualin mipa invawng fel khap, a thilsawi tawh ti mai mai lo chi a nih hmel. A ṭawngkam chhuak reng reng a nghet charh a, a taksa inkhaithli thlarhte a sam dum hlap leh a engkim mai hi ka rin loh leh ka hmuh tum loh ang hlir a ni a; ka invên viau loh chuan kei hian ṭhian nih mai ka duh tâwk lovang tih pawh ka hlauhlel lo ve.

Mama lo thlen hma zawng min awmpui char char a, "In châm chhungin rawn hmuh ziah che ka tum dawn nia, min kawm duh chuan.." tih pahin a tho chhuak ta a, Mama a lo thleng ta bawk nen inhmelhriattirna ka nei zung zung a, "Matei i lo kawm hlim ṭhin a kan lawm viau a nia Ls." Ramdinsanga inla polite vel chu ka ei lo nasâ.

Naktuka lokal leh intiam chungin min chhuahsan ta a, inkan hun chhûng chauh awm an phal si a, min chhuahsan chiah chu ka ruak huai huaiin ka hria. 

Aizawl

Lawmsangzela

8:00pm

Bedroom

Zan dangah chuan online games khêlin eng vak mah ka ngaihtuah ngai lo kha a ni a, zanin zet chu games khelh chu sawi loh ka thluak sawrbingin damdawi in khuma mu Rinsangpuii ringawt ka'n ngaihtuah chu le! Kum hial kan inbe tling tawh a, hmêl inhmu lo chung pawhin tikhawp khân ka ngaihven a nia; natna khuma a mu ka hmuh meuh chuan amah lainatna leh khawngaihna ka nei nasa zual sauh.

A hmêl fiah kâk leh a hnar ngul tê fel rân te, min hmuh ruala a lâi hmel zawng zawng te nen lam khan ka mitthla tlut tlut mai alawm le. Damlo tih hriat miah lova hlim hmel a pu reng thei te kha ka ngaihsan zawng tak a ni. Kei aiin kumkhata a upat loh chuan a naupang zâwkin ka ring bawk.

Whatsapp aṭanga kan inbiak tawhna ka la kawl ang ang ka en lêt ngial pawhin ngaihzawng ang a inbiakna pakhat tê mah hmuh tur a awm lova ka fiam châng pawhin thiam tak hian thudangah a pakai daih zel.

"02 nula ka hmu leh châk," tih ka va thawn leh hrâm pek a.

"01 tlangval ka hmu leh châk fê." A rawn reply rang ngei mai. 

"Ka lokal dawn em ni?" 

"Khawi vengah nge in awm?

"Hnaitêah.." tih chiahin ka chhâng a.

"Zanah chuan lo luh a harsa awm em mai, naktukah hma tâwkah i lokal dawn nia." 

"Nilênga ka awm i phal loh chuan ka lokal lovang," engtin nge min chhân ang tih ka hriat châk vanga sawi kher ka ni.

"I peih phawt chuan i awm dawn nia, ka pa pawh a lokal dawn a.."

"I pa hnenah khân ka bialpa thar turin min lo awmpui dawn tih lo sawi rawh aw.."

"Lawmsangzel, i chhe keh," Smiley a rawn dah tuar a, ka nui suk.

"I chhe lo tho alawm, tak takin lokal ka tum a nia, min lo welcome ṭha hlê ang che." 

"Yes boss.." 

Kan inkârah inṭhian ṭhatna bâk awm lo mah se ni reilotê kalta aṭang khân ka ngaih dan a dang daih a, a taka ka'n hmuh chiah phei kha chuan 'engtin nge Lalvenpuia khân a kalsan phal le' ka ti rilru hial. 

Hmeichhe dang neih ve loh amahah hian 'Riau' a awm tlat a, chu chu ka hmuh dan a ni. Ho viau angin lang mah se ka ngei zâwng turin vawikhat mah ṭawngkam a nei ngai lova, "Exer la rawh" ka tih ṭhin pawh a zâwm ṭha tih ka hre mai. A taksa a inphut nalh ru riau a, a vun no sar leh a kuttin fai ṭhah te kha ka duhzawng tak a ni bawk. Tin, a hmelṭha.

Rinsangpuii hi ka duh ṭan tih phat buai ka tum lo a, min ngaih dan tur hre ve chiah lo mah ila ka sawi chhuak ngei ang, mipa ka nih angin kan inhmuh ve chhunah hian ka sawi ngei angai. Bâkah Lalvena vânga mipa zawng zawng deuhthaw a huatna hi ṭhiahsak ngei ka tum bawk.

Ka û Zosangmawia lah chuan min rawn dem zuk zuk zel a, status-ah a thlalâk dahin 'Inhmuh ka châk tawh' tih vawikhat ka lo dah kha a lo hmu fuh pek a, min fiam nân a hmang zui hlauh.

Ka nu'n min rawn kamkhat nghe nghe, 'Duata, phone te hi i khawih tam lutuk a, râlkhat aṭanga ngaihzawng neih te zawng thil awlâi a ni lo a nia' a rawn ti ve ringawt.

Ka nu'n a hriat chuan ka pain a hre ve tho dawn tih ka hre nghal vek. Strick nupa mai sia e..

Rinsangpuii hi han dam hlauh se, thil pakhat hriat chhuah zawk ka nei ta a, ka phûr nasâ. 

Tunah hian Frederick-a rawngbawlna Temple-ah neih mêk a ni a, hruai ve ta ila..

Ka thinlungah 'Pathian beisei rawh' tih ringawt a rawn awm nghâl nia! Mi tamtakin an dampui tawh a, ani pawh hian a dampui ve mial maithei asin. Phur lutuk hian phone ka ban leh nghal a, ka call hmiah.

Mahse, vawili a ring ral ṭhak hnuah pawh a pick ta si lova damdawi inah a awm bawk nen ka call nawn ta lo.

A taksa damna ka duhpui rualin a rilru zawng zawng a Pathian beiseina a neih hi ka duhsakpui em em a ni. 

Damdawi in an chhuahsan veleh hruai ve ka rilrûk ta a, min hnial ka ring tho nain ka sawi ve hrim hrim ang. 

A hmêl mitthla chungin ka chhing ta riai riai a.

B+>[BeckirafARenthleI]<+®®

KA THLAH LO'NG CHE

Becky Rafa Renthlei

Episode-4

Lawmsangzela

9:00Am

Ka zirlai ka zawh hnuah ka pa workshop ka enkawlpui a, 'Duata, nang tal hi chu police ni ve la ka tih tehlul nen i ûksâk duh dêr lo a' ka pa'n a tih ṭhin lai khân eng teh ualah ka ngai lo kha a ni a; mahse, ka inchhir ve lek lek tawh, ka nu a'n pension dâwn meuh chuan ka ui leh hnuhnuh viau.

Hospital panin hma fêah in ka chhuahsan a, car pawh ka keng ta chuang lo. Rinsangpuii hmuh ka châk zek zek tawh a, a kianga awm reng ka duh hial; mahse, a rilru ka hriatsak tlat loh avangin enthlâk rih a ngai ka ti deuh.

Inkan hun pelh hma chiahin ka thleng chho hman hrâm a, phûr ru zet hian a awmna ward lam ka pan sauh sauh a; mahse, eng nge ka hmuh hi!? Rinsangpuii khum a lo ruak hiau a, a nau pawh a awm miah lo! An khum bul chiaha mu te ka zawh chuan, 'Nizanah a pum a na vak a, thi hlîrin a zung bawk a, nikhua a hriat loh avangin ICU ah an sawn' ka lungphu rang ta sauh chu thunun tumin thâwk ka la hawk a.

Engtin nge a nih theih? Nimin te kha chuan a ṭha hle si a, nizanah pawh whatsapp aṭangin kan inbe tho! Vawili ngawt ka call khân a la thei miah lo a khalai vel khân an buai tawh tihna ni ngei ang.

Hmanhmawh lutukin ICU lam ka pan leh ta a.

"I lo thleng tawh maw!?" Sp-i nauin min lo be vat a, a kianga indawm kun renga ṭhu chu a pa a nih ka ring ve ringawt.

'Ka rawn thleng chiah, eng mah ka lo hre ve lova..' inthiam lo zeta ka tih chuan, "Kan buai philî lutuka chanchin lo hrilh nachâng che kan lo hre lo a ni, hei hi ka pa a nia; pa, Ls-a, Matei ṭhianpa a nih hi," a ti nghal zung zung a.

"Ê, i va tiṭha ve aw, i ṭhiannu hi hmuh tlâk a awm meuh lo chu a ni e." A pa mitmeng dul raih ka hmuh chuan ka khawngaih khawp mai.

"Mama, i û awmnaah va hruai lût la.." 

Pakhat chauh luh an phal avangin Rinsangpuii hmu turin ka lût ta a, mask ka vuah vek bawk a, ICU luhna bula kawrfual hâk tura an dah chu ka ha nghâl bawk a, ka lungphu a la dik hleithei lo.

Ni lo, hetiang hmêl pu chunga hmuh hi ka duh rêng rêng lo asin. Thisen hlauh hnem tih hriat tak hian a dâng bel a, zankhat thilthu leka a lan dan inthlâk ta dawrh chu ka ngaithiam hlawl lo.

"Hey, Rinsangpui," a biangah dimtêin ka chûlsak a, tûn hi a kut ni lo a taksa ka tawhna hmasaber a ni. A mit a meng lova a thâw a zâwi hlê bawk! "Sp, ka ṭawng i hria em?" A biangah bawk ka chûlsak leh a, ka rilru puthmang ka hrilh hmaa min kalsan ang tih hlauhnain ka khat a, Phone call hmang a kan inbiak ṭhin laia a nui ri te, a aw fiah ṭha tak te kha ka bengah a rawn ri nawn sek a, "Min kalsan suh aw'' mipa mah ni ila ka mittui a far lo chauh!

A natna tawrh dan engkim hmuin hre vek lo mah ila Lalvena'n a phatsan dan te, natna tuar chunga hlim taka min biak laite ka ngaihtuah phei chuan ka lainat lutuk hi ka puakkeh thei dawnin ka hria, Bethel Ministry rawngbawlna hmun Temple-a hruai ka lo rilrûk kha a ni a, 'Lalpa, a nunna hi khawngaihtakin zuahsak hrâm rawh' ka rilruin ka ṭawngṭai nghâl a.

Rei awm an phal loh avangin hreh zet hian ka chhuahsan ta a.

A pa leh a nauin min lo dawngsawng vat a, hlim hmel min la hmuh zel thei te hi an fakawm chhungkua ka ti takzet.

"Matei tân hi chuan dam hi a châkawm loh asin; mahse, a tel lovin kan awm thei dawn si lo, hahdam taka châwl turin duh mah ila kan ngaingam lo a ni ber e." Pa ber ṭawngkam chhuaka beidawnna rawn lang chu hai theih a ni lo.

"Ka pa, a thim zawngin ngaihtuah mah ta che, Pathian zarah eng êm a ti lo ang, Kidney transplant chu a duh emaw duh lo emaw kan tih tho a ngaih hmel, heti ringawt chuan a dik dawn lo a nia." Ramdinsanga'n a ti ve bawk a. An rilru hah turzia ka hriatpui pha vein ka hria.

Nilêngin ICU kawtah ka ṭhu ve ta a, a rawn harh hma chuan hawsan ka tum lo bur. A nau leh a pa nen pawh kan inbe bawrh bawrh a, haw turin min ti sek a; mahse, hawsan ka tum lohzia leh a theih chin chin awm ve ka duh tih ka sawi chuan min nawr ta bik lo. 

Ka pi leh pu te hnenah Damdawi ina ka riah tur thu ka hrilh chuan 'Tu nge awm a?' Anti hû a, thudik tak ka hrilh vek. Ngaihzawng sawi tham ka nei lo a ka phâk tawkah kohhran leh khawtlangah ka inhmang ve a, mite ang a piangthar ṭha hluah angin lang lo mah ila nunkawng ṭha lo lam ka zawh ngai lo. 

Ramdinsanga chaw eia a haw hlânin a pa nen kan awm a, "Lawmsang, kum engzat nge i nih?" Tiin min zawt a, patling ni lo se chuan ka chhâng lo ang maw le.

"28 ka pum ve chiah," 

"Nu leh pa i la nei em? Eng nge an thawh ṭhin, nangin eng nge i thawh deuh ber?" Zawhna a va'n ngah tak.

Kan chhungkaw chanchin leh ka hnathawh ka hrilh chuan, "Eng kawng pawh zawh dawn u la Pathian ṭih hi a pawimawh ber, Matei te unau pawh nu nei tawh lo anni a, enkawl dan ka thiam lo fo ṭhin; mahse, Pathian engkimtithei kutah ka inkawltir tlat a, eng dinhmunah pawh ding se Pathian remruat tiin ka pawm thiam vek." A ti ta a.

Ka lo rin ang ngeiin Rinsangpuii te chhungkua hi Pathian ṭih mi anni. Fa pahnih chauh neiin a nupuiin thihsan tawh mah se innghahna tur dik takah a innnghat tlat a, chuvangin a fanu a hmangaih em em hi a lâksak ka ring ta miah lo. Kan la thi ṭheuh dawn tak nain tunah mai chuan a thih rin lohna lian tak ka nei ve tlat.

#Nihnih hnuah

Inbual leh chaw ei tura ka haw zawk tih loh chu damdawi inah ka awm deuh char char a, ka pi leh pu pawhin min khap lêm lo. Rinsangpui vângin Pathian ka auh tam phah a, a dam leh ngei ka beiseipui tlat nia!

Vawiin hian ICU aṭangin an la chhuak dawn a, helama tih theih a awm tawh meuh lo, amah a harh tawh a, mahse hmasawnna erawh hmuh tur a tlêm hlê. A Kal thlâk a nih loh chuan tuna a awm dan ang bâk beisei leh chuan tur a awm lo viau a Pathian thu thu a ni ta.

"Hey, i chhungte'n an ngaihtuah ang che haw tawh rawh." Zawitêin a rawn phun sap a. Ka rin ai daihin a meng harh a, an lokal ni kha pha chiah lo mah se zia tak a ni.

"Chhungte ka nei lo, nangmah hi i nimai," ka tih chuan nui san san chung hian, "I hah tawh ngawt ang, ka ṭha tawh a nia," 

"Ka hah leh châk"

"Chhe hlê suh," tiin thei leh thei lo hian min rawn ban a, "Min khawih hi i châk sia, ka duh bawk si lo." Tih pahin a kut ka vawn sak a.

"Lawmsangzel, ka dam ṭhat hunah i châk lovang."

"Ka châk maithei asin, dam ṭha thuai thuai la thil sawipui che ka duh," thutak zâwkin ka ti ta a.

"Tikhân sawi la, tumah an awm loh hi.." Cabin chhungah kan pahnih chiahin kan awm tak alawm le.

"Ka la sawi dawn rih lo.."

"I sawi loh chuan min lo kan ka phal tawh miah lovang," tiin lehlam a hawi deuh hmak a. 

"Ngaihzawng i nei em?" Tia ka zawh chuan maktih hmel deuh hian min en a! "Maw!?"

"Ngaihzawng i nei em? Keimah ni lo mipa dang biak i nei em?" 

"A ang lo lutuk, tu nge bia se min tih?" 

"Ka hre chuang nâng, nangte chu i luck a, mihrang hrang pawh i lo be ve thei tho a tu nge hria!?" 

"Lawmsang, chhe deuh deuhin min puh kher suh, nangmah bâk biak ka nei lo rêng rêng," tiin a tûm bâr a.

"A ṭhat chu, nidangah kan sawizawm ang." Tih pahin a sam hnawk niaih chu ka chûl mâm sak a.

"Aih, eng nge sawi i tum chiah," ka mitah min en ngar a, ka duh thu hrilh nghâl rum rum ka tum kha a nia; mahse, a dinhmunin a zir rih lo deuhva ka hriat vângin ka ṭhulh leh.

"Eng mah, nidangah kan sawi ṭha dawn nia,"

"A Lawmsangzela thlâk em mai, i bialnu rawn hruai la ka lo hêk teh ang che." 

"Bialnu ka nei lo e a, min duh la ka nei a ni mai." 

"I chhe keh, fiamthu hun pawh a ni lo."

"Fiamthu ka sawi lo aw Rinsangpui, bialnu nei ila helaiah hian ka awm reng lovang." Ka ti nghut a.

"Ṭang na ve sia e, tak takin min hawsan tawh la, Mama te an lo thleng ṭêp ang." Tiin phone a bih zauh a.

"Min va ning awm ve a, nia ka rawn lawr ve sek sia ka ninawm ta viau a ni mahna.." nichin aṭanga haw tura min nawr sek avangin ka lung a awi vak lo.

"Naa, chutiang lam a ni hleinem, i chhungte'n an lo ngaihtuah ve tawh ang che tih ka hlau a." Nuam lo tih hmel takin a meng khup lap a.

"Ka chhungte chu ka chingfel thei, i kianga awm turin min duh nge duh lo." Ka tilui ve ngat a.

"Duh te chu duh e; mahse.."

"A ṭha e, i duh tak tak lo a nih kha, ka haw ang e.." tih pahin ka tho hluai a.

"Thinchhe e.." a ti leh sap a.

"Nia, min ning em emtu bula awm rengte chu ka duh bik hleinem, lo dam zel ang che." Min chhânna pawh nghâk tawh lo hian ka chhuak ta a.

Dik tak chuan ka thinrim tak tak teuh lo, a rilru tihhrehawm ka tum pawh a ni lo a, ka duh ngawih ngawih laiin a ṭhian satliah leka min ngai hi nâ ka ti ve deuh, min ngaipawimawh tak tak a nih chuan a rawn ti hmasa em em ang, a rilru en chhin nân hrim hrim pawh titau ang a ka lan a ṭûl tlat.

In ka thlenin ka piin chanchin min lo zâwt a, "I nu be ngei ngei ang che, a lawm lo teh a nia,' a ti a.

Ka nu hi chu ka pa aiin a khirh fê, ka biak loh chuan Lawngtlaia awm turin min rawn hruai duh leh mai ang, ka awm peih teuh si lo. 

Hreh zetin ka call ta a.

"Duata, tu nge damdawi inah i riahpui?" Dam thlap leh zawi fiah takin min zâwt a.

"Ka ṭhiannu.." 

"Kan hmuh phâk lova i awm vâng khân i duh duh tih tum suh, i pi leh pute awmpui tura awm i nih kha."

"Nu, zanhnih chiah alawm ka riah a serious deuh a.."

"Chhungte a nei lo em ni? I eng nge a nih a?" Hriat a tum leh ta vek e.

Rinsangpuii chanchin kimchang ka hrilh ta vek a, min hau hrep ka rin tehreng nen, 'A tuarchhel hle mai, kan lo ṭawngṭaipui ve dawn nia, kha lama an awm chhung te chuan buaipui ve mah la a pawi hleinem,' ka nu nge nge, thil a a man thiam ṭhin e. Ka û bialnu an duhpui hlur ringawt a, kei min ngaihthah lutuka ka'n che ve tak tak ang e.

Zanriah eikhamah pawh Rinsangpuii'n min la rawn be miah lo nia! A duh duhin phone a khawih thei tih ka hre ve vek bawk sia, ka be hmasa duh rih si lo.

Darkua a ri ta. A la reh vang vang a, ka insûm thei tawh ngang loin whatsapp aṭangin ka be leh ta nge nge a.

# Min be peih lo nge, i zia lo leh deuh nge, i titau?

#Lawmsangzel thinchhe pa.

Min reply rang mah mah.

#Ka thin a chhe kher lo, tu nge riahpui dawn che? 

#Keimahin ka awm, Mama a chau ve lutuk a, ka pa chawhnu khân Lungleiah a haw a..

#I va sawi har ve ka lokal dawn.

#Luh an phal tawh lo ang.

#An phal awm em mai, ka lokal nghal.

Min reply hun nghâk lovin ka insiam nghâl sawk sawk a, bike nen ka tlân chhuak leh ta a.

Natna khirhkhân tuar pawh nise a kianga awm bâk duh ka nei lo.

Rinsangpuii

9:30

Hospital

Ka pate thawhpui nu Zodini a boral thut avangin ka pa a haw ta kha a ni a, Mama'n min riahpui a tum chuan ka lo hnial a, 'Ngaihtuahawm ka ni tawh hleinem zanin chauh châwl hahdam la Lawmsanga riak turin ka lo sawm dawn nia.' Tiin ka hrilh a, sawm ka tum tehreng nen a titau ta daih sia ka rilru a hrehawm viau.

Ka dinhmun dik tak ka hrechiang tawh a, ngaihzawng nei chi ka nih loh mai bakah ka ngaihtuah tawh ngai lo hrim hrim. Lawmsangzela hlutzia ka hrechiang telh telh a, ani ang te chuan dam ṭha pawh ni ila min duh tak tak dawn lo tih ka hrechiang. Ka inthlahrun êm avanga haw tura ti mai chauh ka ni a, a thinrim ka ring pha lo hrim hrim.

Nihnih hnuah hospital kan chhuahsan dawn a, Phâiah min refer tih pawh ka hre vek tawh. Mahse, ka kal dawn chuang lo, a nih nih niturin kan in lama tawrh ka thlang zawk a, rilru ka siamfel vek tawh bawk.

Cabin kawngkhar a rawn inhawn chuan ka dâk chhuak vat a, Lawmsanga a rawn kal tak tak nia!

"Eng ati nge i lokal a?" 

"Engvangin nge ka lokal loh ang a, min ning viau mah la ka lokal duh a nimai," lungawi lo tih hriat deuh hian min chhâng hmuk a.

"Thinrim leh ta." Ka tih chuan, "Lungleia i awm lai kha chuan i engkim ka ni ṭhin; tunah hian i eng nge ka nih?".

"E, Lawmsangzela.."

"Rinsangpui, i eng nge ka nih? I khawhar hnêmtu mai mai a tân chauh em ni min lo biak ṭhin a.." Ka mutna bulah rawn dingin chiang zet hian min en a.

"Lawmsang, inhnial ka peih lo a nia.." ka ti sap a.

"Thudik min hrilh rêng ta che." 

"Ka ṭhian, ka engkim i ni?" Zawi sapa ka tih chuan, "Kei chuan ka duh che. Ṭhian nih ka duhtawk tawh lo." Thutak zetin a ti ta a.

"Eng maw i sawi?" Mak ka tih êm avangin ka zawt nawn leh ngat a.

"Ka sawi chu i hriat kha, eng ang pawhin awm la ka duh che, i dam emaw damlo emaw ka tân eng mah danglamna a awm lo." Tiin khumah a rawn ṭhu a.

"Ka dinhmun i hriat vek kha duh chi ka ni lo a ngaihzawng nei thei ka ni hek lo." Ka thinrim lo chauh tawh. Hepa hi eng nge maw a hriat ni!

"I dinhmun ka hriat vang rêng khan ka duh che alawm, i damlohna zawng zawng hriain kha leh chen kha ka bia che a ni lo em ni? Min hnar nân i natna kha chhuanlamah hman tum reng reng suh." A ti leh hmuk hmuk a.

"I â tawh a nih hi.." ka tih chuan rawn kûn hniamin ka hmuiah a rawn fâwp zauh a, "Ka â nimai rawh se, Rinsangpui, min duh loh chuan tlang takin sawi la ka hrethiam zawk ang." Hawisawn tumin ka lû ka her chiah tihah, "Keimah hrim hrim hi min duh lo a nih chuan thuhran nise i natna vanga min hnar tum i nih erawh chuan ka pawm dawn miah lo a nia." Ti nawn lehin min en reng nia maw le.

"Chutiang a ni lo, i ngaih ang ngawta awlsam a ni lo bawk." Dik tak chuan min kalsan ka hlau a; mahse, ngaihzawng nei thei dinhmunah dingin ka inhre si lo.

"A awlsam dan a awm reng alawm, min duh nge duh lo?" Min nawr sek sek tâkah chuan ka ngawireng a, chhânna pêk ka tum lo hrim hrim.

Rei ngial kan ngawih hnuah, "Ka hrethiam e, ṭhian nih i duhtawk a nih chuan ka nawrluih theih i ni hleinem; i duh thlanna a pawimawh ber a, i laka ka rilru erawh hre ve hrim hrim ang che." Ti nawn leh ngatin a chhuak ta a.

Koh din pawh ka tum lo. Ka rilru a buai vek a, kei hian ṭhian angin ka en tawh bik lo tih ka inhre reng a; mahse, ti hi ka ni bawk si. A vawikhat nân dam châkna ka nei a, Lawmsangzela nen hlim taka inkawm te ka châk ve asin, beisei tur ka neih tlemzia ka hriatchhuah phah bawk.

Kei nen inngaizawng ta ila a rilru tinatu mai ka ni dawn si. Ka mittui far fap chu ka kut hnunglamin ka hru tâwk a, ka natna avang hian vawikhat pawh ka la beidawng ngai lo kha a nia.

Dam châkna; mahse, dam inbeisei lohna sualin min bei mêk a ni. Chutah chhuak zet hian ka ṭap ta phawng a, ka kâ romol-a hupin ka ṭap uar sauh va.

He ka natna vang hian Lalvenpuia'n min kalsan tawh a, ka hna, nuam ka tih em em ka chân tawh bawk a, tunah Lawmsangzela ka engkima ka lo ngaih min tihlimtu ber pawh ka natna vang bawkin hnar a ngai leh a, mahni inkhawngaihna hlirin ka khat a ni ber mai.

"Sp...!?"

"Sp, i ṭap elaw!?" Lawmsanga aw ka hriat chuan ka mittui kâr aṭangin a hmêl tak rân leh min lainatna mitmenga min entu chu ka en lêt ve a.

"I rilru natna tur ka sawi a nih chuan min ngaidam rawh aw, ka tihpalh.." Chhân pawh ka chhâng thei lo..Chutah dimtêa ka khabeah vuanin, "Eng dinhmunah pawh ding la, ka phatsan dawn hleinem che, i natna vânga min hnar i ni tih ka hria asin, min ring rawh, ka thutiamah ka ding ang, mihringte tihtheih loh titheitu Pathian nung kan nei tih i theihnghilh ta em ni?" Zawi supin a ti ta.

"Lawmsang...!?"

"Chu chu ka hming a ni reng a ni, Lawmsangzela hian damna ka pe thei lo che; mahse, Pathianin kan pahnih tân kawng a hawng em em ang, damlo dangte ang a biak theih loh pawh i ni lo a, engkim kan ti dunin kan sawi dun thei vek tho a, lungngaih lutuk tur a ni lo." Tia min hnemna chu engtikah mah ka theihnghilh tawh ngaiin ka ring lo.

Nie, beisei tur dik tak ka beisei loh ṭhin avang hian ka na leh ṭhin. Ka taksa damna lam chauh ka lo thlir ṭhin atin ni.

"Rinsangpui, ka ṭhian ni reng rawh i ti a nih pawhin ka hnial lo, mahse, kan inhmuh ni aṭang khân kei hian ka duh tawh che a, mipa ka nih ang ngeiin ka rilru puthmang hrilh hriat che hi ka tihtur a ni." Nghet charh leh inringtawk tih hriat zeta a ṭawng chhuak chuan thutiam a keng tel tlat.

"Hun min pe la.." ka ti ve ta sap a.

"Tehreng mai, i natna inhnehtir suh la, i nun a tel tura i duh ngai loh natna nen a duhtu che keimah Lawmsangzela ka awm tih theihnghilh ngai bawk suh ang che." 

"I ṭhu duh em?" Tiin min zawt teh daih a.

"Umn.." ka puansin theh hlimin ka zunsiakna bag a dah rem leh tê tê a, amah pawh khumah rawn lâwn vein ka nghen theih tur hian a ṭhu ta a, "Nurse an lokal pawhin, a kâwng a kham deuhva, ka ti mai ang," tiin zuk nui suk a.

"I phakar e a.." ka nghawk salh a.

"I dam ṭha lo chung pawh hian i kut i thawh ve sek zel a, i dam hun a huphurhawm ka ti.." ka kâwngah kuahin puan kan insin ṭawm thlap. Ka zak ru viau nâ a, a nuam ka ti phian!

"Damdawi in aṭanga i chhuah hunah Temple-ah ka inkhawmpui dawn che a nia, min hnial miah suh, taksa damna mai bâkah i thinglung hi Pathianin a duh tel a nia." Tiin ka chhipah a khabe a rawn nghat a, "Ka kal thei dawn em ni?" Ka tih chuan, "Ka hruai dawn che alawm.." 

Nurse lo lût chuan "Khumah awmpuitu mut ve kan phal lo ania, extra bed a awm tho hi.." a rawn ti a.

"Ka mu dawn hleinem, a ṭhu ve châk a ka pui mai a ni," zu ti tak tak a! 

"Ok, Sp i ṭha em? Awmpuitu i nei ṭha bawk a i dam sawt sawt mai ang," a nui kar kar a, ka lâi nasâ..

Nurse chhuah hnuah, "Lawmsangzel, chhuk tawh rawh," tih pahin tawlhsawn ka tum a, "Min hrethiam ve la, ka muhil dawn pawh nihlei lo.." a awmsawn duh ṭhak nâng.

Ni e, ani nen kan nih chuan engkim ka paltlang thei ngei ang.

B+>[BeckirafARenthleI]<+®®

KA THLAH LO'NG CHE

Becky Rafa Renthlei

Episode-5

Rinsangpuii

Ka harh apiangin Lawmsangzela a lo meng ve hman ziah a, zinglam dar thum a ri tawh a, tûn hi vawili ka harhna a ni tawh! A mutna lam ka va en chuan uluk zet hian games a lo khêl a, puan pawh a sin chuang lo. Ngawirengin ka thlir vang vang a.

A sam dum hlap chu a fai hmel hle a, a hnar ngul invuah fuh zet te a hmai erawh a mâm lutuk bik lo a bawl ve deuhvin ka hria. A hâng hran lo a ngo teh hluak pawh a ni hek lo, heti khawp a min ngaihsaktu hi ka thlahlel lo thei bik lo chu a ni e.

"Hey, min en reng lo khân muthilh tum rawh," kiai suk chung hian min rawn be thut a, ka hawisawn hman tawh si lo nen zâm zetin ka hmui ka pet zauh a.

"Muhil zawk rawh, i chau lutuk ang." 

"I bula mut i phal chuan ka muhil ang a, i phal loh chuan ka chau zankhua mai ang." fiamthua tiin a rawn ṭhu chhuak a phone a charge zui nghal a, "Mut dun an phal loh khâ," ka ti sap a.

"An phalna ka lâk kher a ngai hleinem, min hau awm lo em mai." Tih pahin ka mutna lamah a rawn phei ta a. Phone call hmanga kan inbiak ṭhin lai kha chuan a ho ve hlein ka hre sia; ka rin aiin a puitling daih. Fiamthu han sawi zauh châng nei mah se a zawng a zain a ri hluai kher lo.

"Lawmsang, kum engzat nge i nih tawh?" Ka tih chuan nui suk chung hian, "Nang aiin ka upa zawk," ka puansin keuvin a rawn inthawlh ve ringawt nia.

"Tho vat rawh, a chiloh lutuk.." namsawn ka tum chuan, "Engtin mah ka ti lo ang che, tihian ka mu ringawt dawn alawm, damlo awmpuite chu an hrethiam ve awm em mai," a ti leh tlat!

"An hrethiam pawh a ni mahna keima'n ka hrethiam lo alawm," Venflon an vuah lohna lam ka bânin ka nghawk salh a.

"Rinsangpui, min cho viau suh ka fâwp hrep mai ang che." 

"A ve ringawt a che.."

"Ve ka ni lo, keimah i Lawmsangzela, 02 aṭanga i rawn biak ṭhin kha.." ka inrin hman hmain ka hmuiah a rawn fâwp ta a, ka lo ṭang ve bawk nen duh ang thâl chuan min fâwp ṭha thei bik hek suh, thawhuai chung hian, "Khatia i ṭan deuh ṭung khan a nuam dangdai.." a la ti hrâm. Min fawh nawn tum tawh chuan lo hian, "Ka duh che a, min hnar tumin phe phê mah la ka umzui zel ang che." Nghet charhin a ti ta a.

'Kan ingaizawng ta e' tih sawi fak tur awm lo mah se kan thinlung erawh a inpawh ta. Khawvar rak thlengin kan titi dun a, thingpui sem an lo luh hma deuhva min thawhsan chuan ka ui ru ang reng.

"Thingpui in ve ang aw, chumi zawhah ka haw zuai ang." A hmai a phih nghal a, a chezia hrim hrimah a inringtawk em em a, hmân aṭanga lo inhresa tawh leh inhmu fo tawh kan ang zâwk mah.

Chuti lutuka buaipui ngai ka ni tawh lêm lo bawk a, nurse-in ka zun teh paha min paihsak chuan, "Hei, thi pawh a awm mang tawh hleinem, achangtupa hian riahpui reng che se la a ṭha ang," tia min fiam chuan ka nui hak a, "Ka riahpui hian a dam sawt sawt dawn tih hria ila chuan a zâwnin ka riak zak zak tur a nia, kan Rinsangpuii hian a duh leh pek tawp nâng," Lawmsanga nui ṭhâ chu ka melh rum vei ngial a, a nui nasa zual sauh.

Mama'n a lokal mêk tih a rawn sawi ta bawk nen min hawsan ve ta a, "Min lo ngai lutuk lo la, ka lokal leh veleh ka rawn duat leh ang che" tih paha a nui suk hmel kha ka ngainat zawng tak.

Naktuk hian Hospital kan chhuahsan tawh dâwn a, Kidney transplant ti turin rilru ka siam mêk, sum tamtak sên a ngaih dawn avangin ka inthlahrung ru viau a, 'Mate, i damna tur a nih phawt chuan kan neih zawng zawng chân vek mah ila pawi kan ti rêng rêng lo, khawvel thil ral leh mai tur anni a nunna a hlu ber.' Ka pa ṭawngkam dam thlap kha ngaihthlâk a va nuam si êm!

Cabin-ah ka nau nen kan awm a, Frederick-a rawngbawlna chungchâng sawia a ṭawng mawlh mawlh lai chuan Lawmsanga a rawn lût leh hlawl tawh. Hnathawh a nei lo nge, a mimal nun ka hriatsak thui lo hlê a, nu leh pa a nei tawh lo zawk nge pawh ka hriat si loh!

"Ramdin, i û hi Temple-ah kan hruai ve dâwn em ni ang?" Kan thusawi lai hresa ang hrimin a rawn ti lût a. 

"A duh phawt chuan hruai a ṭha ang; mahse, khawpui chhunga motor khalh ka hreh deuh," Mama'n a tih chuan "Keima'n ka khalh mai dawn nia, naktuk zan chu tum ve chhin phawt ila zan hnih chiah hun a awm tawh a." An pahnih inbiaknaah chuan ka inrawlh lo hrim hrim.

Lawmsanga a awm hi chuan Mama hian a ring tawp a ni ber. An inkawm thei phian a, ruihtheih thilin a tihbuai loh mipa ka hnaiha an awm thei hi ka lawm tawk viau. 

Mama pawh ka nau mah nise min enkawlna kawngah leh inchhungkhura a mawhphurhna a hlen chungchangah sawiselna tur ka hre hauh lo va, MA vâl a ni ve tawh a, nupui neih lam a âwn miah lo hi mak ka ti deuh ṭhin a bialnu Dinmawii nen pawh hunawlah an inbe chamchî a, Lawmsangzela leh ka nau style hi a inang ru riau bawk.

"Mate, i ṭhianpa a awm thova bazar lamah ka teithla ve lawk ang aw." Mama ka chhân hmain, "Lo ngaihtuah duh suh, zanah pawh ka riak thei a nia, min hawsan hunah te chuan awmpui pawh duh ve mah ila a theih awm si lova a hun lai hian ka âm ve duh a nia." Lawmsanga'n a lo chhâng duah a, "I lo awm hlauhva min chhâwk zangkhai hle a ni." Mama pawh a lawm tak tak tih ka hre reng.

Kan pahnih chauhva kan awm hnu chuan ka ngawi reng a, "Sp, ka awm ve i duh loh chuan sawi ṭha mai la.." ka eitur Apple a zai mawlh mawlh a, "Ka duh lo tih ka sawi loh hi.." 

"Min biak hmasak hi thih hreh hian i hreh a, kan inhmuh hma kha chuan min ngainain engkim min hrilh ṭhin kha a ni a, tunah chuan i mizia a dang daih." Nichin lawka a fiamthu hmel kha hmuh tur a awm tawh miah lo.

"I ngaih dan a dik lo a nih kha, a hma a ka rilru ang chiah ka la pu reng." Ka ti sap a.

"A nih chuan min duh lovin ṭhian ang thovin em ni min la en?" A ti ta khauh mai le.

"I ngai kâwi zel a duh lo che ni ila tlang takin ka sawi ang min hriat kha; mahse, ka dinhmun hi en la ka hlauthawng a ni." Dik takin ka chhâng ve hmiah.

"I natna vânga thlah tur che ni ila ka thlah daih tawh ang che, tun thlenga ka la pan zel nachhan che hi engvang nge ni a i rin? Ka duh che a, eng dinhmunah pawh ding la phatsan che ka tum lo. Tunah innei nghal ang tihna lam a ni lo a nia." Khumah ṭhuin ka kut a vuan a, "Dik tak chuan min hlat i châk hmel ka ti ṭhin, nangmahah rilru tamtak ka lo sêng tawh a chuti mai chuan kalsan che hi ka thei lo." A thutak hle a, tun hi kan inkâr thu a sawi thui ve ber ṭum a ni ngei ang.

"Nat nawn leh ka duh tawh lova ka nihna ang ang a min pawm thei a nih chuan min kalsan hmasa te a nih loh bawk chuan ka kalsan bik lo ang che." Ka sawi chhuak ve ta nge nge alawm. 

"Ka lawm e, i tân ka awm reng ang." Min fawh tuma a rawn kun hniam chuan ka lo thlesawn a, "Rinsangpui, vawikhat chiah.." ka mitah tak min en chuan ka lâi kher mai. 

Mipat hmeichhiatna lamah ka la fihlim thlap, Lalvenpuia khân vawi eng emawzat chu a tum ve ṭhin; mahse, Pathian zarah ka inveng ve zel a, min nawrlui ta bik lo kha a nia, infawh ringawt te chu a pawi dawn em ni, a hma pawhin kan infawp fo alawm le.

Lawmsangzela rawn kûn hniam leh chu ka hnar ta bik lo. 

Dam thlapa min fawhna chuan ka chhungril a fan raih raih thei nia. Ka lo chhâng lêt ve tih a hriat chuan min fawp uar zual sauhva, "Sp, Pathian chakna rinchhanin hmalam pan kan tum dawn nia. Bâng lova ṭawngṭai ṭhintute hian a malsawmna an chang mai ṭhin," ka rin loh deuhvin a ti chhuak ta a.

"Lawmsang, englo.."

"I natna ang kha ka tuar kher lo a ni maithei; mahse, ka beidawnpui reng reng lo che a nia, beidawnna hi chak lohna leh sual hnathawh chikhat a ni a, i taksa damna ai khân i thinlung damna Pathian aṭanga beiseina thar i neih a pawimawh zawk." Ka kut vuan chunga a thilsawi chuan min hneh kher mai.

"Awm lo la chuan ka natna hian min hneh tawh ngei ang, Pathian min pêk liau liau i ni.." Ka ti ve ta a.

"Naktuk zanah chuan inkhawm ve kan tum dawn nia, taksa damna ringawt beisei lo la ka tih kha theihnghilh miah suh ang che." 

Chumi hnu chuan Restaurant ami eitur a zuk la a, kan ei dun ta a, min duat khu chûk hran lo na a, min ngaihsak viau thung. 

Zan lamah pawh Mama nen min riahpui a, games khêlin an tui phian, ka nunah 'mipa ka seng lût tawh lovang' ka lo ti ve a, Lawmsangzela a lo lan meuh chuan ka thutiam ka bawhchhe rawk rawk mai alawm le.

Inrinni Zan

6:00 Pm

Hospital kan chhuahsan tawh a, Mama'n car khalh a huphurh deuh avangin Lawmsanga rualin kan kal ta a, hepa hian eng nge maw a thawh chiah le!? An chhungkaw chanchin sawipui a duh eih bawk si lova î20 car a rawn keng a, hmanzan khan helmet a rawn keng lût tih ka hmu bawk a, ka lo rin dan ang a mipa tlahlang mai mai a nih loh hmel.

"Rinsangpui, thâwk la vak la, ngun deuhvin thusawi ngaithla ang che." Nui chunga min biak chuan ka melh râm râm a.

Suit dum body fit inbelin a sam pawh a siam uluk kher mai. Biak in kawng zawh chawp hmel a pu lo va a nun en hrim hrim hian innghahna tlâk mipa a ni. Kan inhmu tam telh telh a, ka ngaisâng telh telh.

Frederick-a thusawi lai chu ngun takin a en a, Mama paw'n khawdang a hawi meuh lo. Keimah ber zawk hian Pathian aṭanga dam ka lo tum loh zia leh mihring lam aṭang chauhvin ka lo thlir ṭhin tih ka inhrechhuak a, he ka natna hi vûi nun nei chungin ka lo tuar ṭhin zawk a lo ni.

Damna chang a mi an phêt suau suau lai te chuan eng mah ka taksaah danglamna a awm hran lo. Mahse, Pathian aṭang chuan eng natna pawh tuarin tâwk ila lungawi taka pawm dan erawh a thusawi aṭangin ka man thiam ve ta.

Mihringah ka lo innghat lutuk a, beisei tur dik tak ka lo beisei ngai loh avangin tûn thleng hian hahchawlhna tak tak nei lovin ka lo awm ṭhin tihte thlengin ka ngaihtuah phah bawk.

"Sp, i chau em?" Inkhawm kan bâng tawh a, Lawmsanga pawh ngaihven lo hian ka rilru ngaihtuahna ka lo kâwm ngat ngat chu niin!

"Chau lo ve, nang zawk."

"Chau lo ve a, naktuk zanah chuan hma deuh hlekah kal kan tum tawh dawn nia." 

Ka nutei te in kan thlen tâk avangin Mama'n car aṭanga min pawm chhuah a tum chuan, "Ramdin, ka pawm ve hun a ni tawh." Hnial theih miah loh hian ka ṭhutna lamah a rawn kal a, zo zeta min pawmin inchhungah min luhpui ta a. Ka kal thei tho tak nâ a, ka zun siakna hian kal vel a tih harsat avangin min pawm mai zel.

"I zun siakna kha ka lo phelh ang chu." Mama inthlâk hlânin Lawmsanga ka bulah rawn ṭhu phei a.

"Engvangin nge i phelh ngawt ang a?" Ka tih chuan, "I lo dam daih tawh pawh a ni thei a tunge hria?" 

"Fiamthuna chi a ni lo a nia," ka ti nghat a.

"Ka fiamthu lo a nia, khatia i vuah reng te chuan eng mah a hriat theih dawn hleinem," a la tih zel avang chuan ka thin tertek a chhuak thut.

"Lawmsangzel, ka zun chhuak hre lo khawpa mi mâwlah min ngai em ni? Ka dam a nih chuan ka hre hmasaber ang chu i duh duh sawi ringawt suh." Ka duh aiin ka vîn mah mah.

"I va'n thinchhe tak," tiin a tho hluai a, "Zaidam i zir tel a ngai a nia, hlek hluk mai." Ka chhânna pawh nghâk lo hian a chhuak zui hmak a, ka inthiam leh si lo.

"Lawmsang..." umzui tumin ka tho chhuak a, ka che deuh phut bawk nen ka zun siakna bag ka thlauhin ka pal phei nawk a! Ka serh aṭanga rawn lum chhuak puat chu ka hre rang kher mai.

"Mama.." 

Ka nau hmanhmawh lutukin a rawn chhuak a, Lawmsanga erawh a rawn lang ta lo!

"Mama, engtin nge kan tih ang, ka vuah thiam tawh hleinem.." ka ṭap lo chauh tawh a, tunah zan dar sawm a ri tawh a, Casualty-ah kan tlanchho a nih ngawt loh chuan keini unau tân pipe vuah ve ngawt chi ninghal lo chuan..

"Engtin nge maw i tih thlawn reng reng le?" Min vîn hauh lo náa lungawi aw erawh a ni lo.

Chhân pawh ka chhâng tawh lo, ngawireng hian room-ah ka lût ta a, ka nutei te nupa thawmhnaw lain an zin a, an inah kan awm rih ta kha a nia.

"Mate, kawngka lo hawng teh." Ka nauvin vawithum ngawt kawngkhar a rawn sawi tawh a ka hawng duh ṭhak lo. Mahni inbuaipui thei lo khawpa ka awm hi hrehawm ka tih châng a tam a, pianpui hmeichhia tal nei ila chuan a zia deuh tur; mipa leh hmeichhia zawng a buaithlâkna chin a awm leh ṭhin.

Khumah ṭhuin ka melh ngai ka melh ngar ngar a, ṭawngṭai pawh ka ṭawngṭai thei lo.

"Mate, ka tihpalh lo hawng teh.." Mama mangang aw hre mah ila ka la che duh chuang lo. A beidawng ta a ni ang a reh ta vang vang a, zun siakna vuah tawh lo chuan ka mu ta a, nula pumpa hetia damchhung hun han hman ringawt dawn mai chu(h).

Lawmsangzela'n min rawn be ta miah lo a, call chu sawi loh whatsapp aṭang takngial pawhin min rawn be lo! Ka lo ti mah mah deuh em maw ni le.

Hetia ka nat hnu hian ka thin a chhe zual a, eng emaw hlekah ka vîn hlar zel tih ka hria; mahse, ka sim thei lo a chhâ chu a ni e, bengchheng pawh ka ngaihthei eih lo.

"Tihpalh lutuk." Tih tê chiah whatsapp aṭangin ka thawn a, chhânna ka hmu lo, rilru hrehawm zet hian ka mu meng kar a, Mama nise a reh hmiah bawk.

Khawvar dâwn hnaihah ka tâi bâwr vel a rawn nâ a, zun chhuak ang tlata inhriatna ka neih chu le! Rang lutuka tho chhuakin Toilet ka pan ta nghal a. Ka ṭhu fel chiah tihah ka zung ta hlawl mai le! 

Kumkhat leh thla sarih zun siakna hmang ngar ngar tu kha keimahin ka zung thei ta! Ka muttui rawn far fap chu dan tumna pawh ka nei lo a, thawh chhuah mai nachâng pawh ka hre hek lo. Lâwm avanga ṭap chungin ka inhnît ta faih faih a.

'Lalpa ka lawm e' a bâk sawi tur ka hre lo a, beiseina nung neitu tân beisei tur dik tak pana inkawltir hi a him ber tih ka hriat chhuah phah ta bawk.

Mama kaithovin ka hrilh hmasa dawn nge ka pa zâwk, â Lawmsangzela ka phone zawk dawn em ni ang? Tih hmasak ber tur hre lo hian ka vei sek a, khum bula tui bottle chu banin ka in zo nghâl vek a, vawithum tal ka zun chhin phawt loh chuan tumah ka hrilh duh leh lo.

Rinsangpuii hian nunphung pangngai ka zawh ve dawn ta a va ang ve...

A rûka nui ver ver chungin khua ka nghâk var ta law law a....

B+>[BeckirafARenthleI]<+®®

KA THLAH LO'NG CHE

Becky Rafa Renthlei

Episode-6

Lawmsangzela

Nizan tehreng kha chu(h)!

Rinsangpuii han thinchhiat em em zia kha! Fiamthu leh thutak pawh thliarhrang hleithei lo khawpin a awm tawh a nia, hmeichhia zawkin min vín vak khân ka mipa rilru a rawn chhuak zawk. Eng sawi set set lovin ka chhuahsan ta kha a nia, min ko ri pawh ka hrereng; mahse, ka lêt duh ta lo. Ka kalbosan hlen dâwn tihna a ni lova inngaihtuah harh ve teh se.

'Ka tihpalh' a msg min rawn thawn chu ka chhâng ang nge chhâng lovang tih ka ngaihtuah fê hnuah chhân loh ṭha zawka ka hriat vângin ka ngawihsan ta a. A titau rei nget nget leh ang chu.

Kan inhmuh hma aṭang tawhin a thinchhe ve hlê tih ka hre tawh a, a natna vângah ka puhsak deuh kha a ni a; mahse, insiam ṭha se ka duh êm avangin ka rilru lo pui tih lan a ṭûl leh ṭhin.

Ka hawsan hnu lawkah Ramdinsanga'n whatsapp aṭangin min rawn bia a, a û awm dan kimchang min rawn hrilh vek tawh bawk, a luhlul reuh bawk si a tihngaihna a vâng ve duh ngawtin ka ring ṭhin. Amah hmangaiha duhsaktu tân lo chuan dawhtheih reng pawh thil harsa niin ka ring.

Gym-ah kalin ka insawizawi leh tê tê a, ka hna ṭhulh ṭhaka ka buaipui Rinsangpuii hian nun a tibuai ve teh e; mahse, ka duh tlat si a, 'A nuamah pawh, a hrehawmah pawh' tiin thûtiam chham lo mah ila a hnena thusawitu Lawmsangzela tho kha ka la ni tlat sia ka phatsan thiang lo bur.

Nilêngin ka be lova min rawn be bîk hek lo. A tlâwm zawkah ka ṭan a ngai leh dâwn nge nge a nih hi.

Ka inbual zawh vek hnuah ka call ta chauh a, tlailam dar thum a ri tawh.

"Aw sawi rawh.." a rawn ti hmak a.

"Thinchhiat lohna damdawi ka rawn thawn che kha i hmu em?" Ka tih chuan, "Ka ei tawh a, a thawk ṭha lo khawp mai," ka rin loh deuhvin min lo fiam lêt zat a.

"Chuti a nih chuan a siam chhuaktu keimah ka lokal a ngai a nih chu.."

"A siamchhuaktu khân ei hmasa zet la a zia lo maw!?" A nui ta hak hak a, min vin leh hrep ka rin tehreng nen a aw a zangkhai vah a, Ramdina'n nizana a awm dan a sawi nen inpersan tak a ni. Zan lamah inkhawm leh kan tum kha a nia, zanin chu a nau pawm tir ka tum tawh lo hrim hrim a keima'n buaipui vek ka duh.

A nutei te in ka thlen chuan Randinsanga insiam peih apin a lo ṭhu tawh a, Sp ka hmu lo.

"Lo ṭhu rawh a insiam mêk," tiin ṭhutna min kawhhmuh a, "Nizan khân engtin nge i tih tâk?" Tia ka zawh chuan, "Vawiin nilêngin kan inhmu lo, ka bazar san daih, Matei hi chu ka û mah ni se buaithlâk tih châng ka nei, a lung a lian si, a luhlul bawk si.." a ti sup a.

"Chaw pawh a ei miah nange?"

"Ka hre lo, nizana a inkhung aṭang khân ka hmu tawh bik lo va; mahse, ka pa nen an inbia a, naktuk hian haw phei kan tum deuh."

"A ang lo lutuk, rei lotê la châmpui ve rih rawh," min hawsan tur ang a ka ngaihtuah chhin ringawt paw'n zuk hreh nghal em em a!

"Tak takin ama thu thu a nimai," a ti leh lawi a.

"A zun siakna chu invuah ṭhattîr ta lo em ni?" Nizana a sawi dan khân a inphawi vek a ti bawk sia, engtin nge a awm ang tih ka lo ngaihtuah ve mai mai.

"A duh lo alawm, ka sawi chu, a kal theih hma kha chu nise thuhran a nia tunah chuan a inbuaipui thei tawh a ni mahna," nuam lo tih hmel takin pâwnlam a thlir zui a, "Mate, hmanhmawh ve la, Lawmsanga a lo thleng tawh." A ti lâwng lâwng a.

Room aṭanga Rinsangpuii lo chhuak kan hmuh chuan Ramdina nen kan mengphar nasâ!

Uluk takin a inchei thlap a, amah a lian zuai zuai bawk nen inhmeh tak a ni. A zun siakna hmuh tur a awm lova a hmêl hlimna avanga êng sar chuan a ti lang hmelṭha takzet.

"Mate..."

"Rinsangpui.." Ramdina nen kan ṭawng chhuak rual ṭhawt nia.

"Surprise..." nui var var chungin a nau a kuah hmasa a, 'Lalpa'n thil ropui tak min tihsak a ni' Ramdina mittui tling pum chu ka hmuh hmaih lo, kei pawh lawm avangin ka nui suk a, eng thil mak nge thleng tih ka zawh hmain ka lam a rawn pan ve ta a, "Lawmsangzel," eng mah sawi zawm lovin min rawn kuah ve ta a, a hnuk a ulh tih ka hria, a hnunga bêng thak thak chung hian, "I natin i ṭap a, i damin ṭah leh i tum bawk sia.."

"I chhe keh..." a nui hmel hi ava ṭha si êm! Chhungril aṭanga hlimna rawn lang chhuak te, a mitmenga lawmthu min hrilhna chu ka hmu thiam vek bawk.

"Kan kal hmain lawm thusawi ṭawngṭaina ka neih ngei a ngai." Tiin a ding auh a, a nau nen kan bu nghat nghat.

A ṭawngṭai dan fel thlap chuan chhungril a tawk che pha thei a lawm le. 'I hman atân ka inpe e' a tih lai phei chuan kut ka lo hûm ruh ve viau. Pathian beiseitu tân engtikah mah beidawnna a thleng ngai lovang tih ka hriat phah bawk.

Nizana kan inkhawm laiin dam nghal lo mah se hmun tina awm kan Pathian engkim tithei hian kan duhnate amah kan belh tlatnate hriain khawi kipah pawh awm ila min kalsan ngai hek lo. Amah rinchhana kal ṭhinte leh tuar hrâm hrâm tute tân kawng a inhawng reng bawk.

Rinsangpuii nunpumpui hmuhsakin hre kîlkêlh lo mah ila, Pathian beiseina a neih chinah a hnathawh kan hmu mai a ni. Frederick-a kaltlangin damna a chang ka ti lo thei lo va, 'a taksa nâ a dam ta vek e' tiin sawi lo mah ila a zun siakna hman a ngai ta lo ringawt pawh hi thil lawmawm tak a ni.

"Keimahah awm reng rawh u, keipawh nangmahniah ka awm reng ang' (Johana 15:4) Amaha awm duh tlat mi, hnar ngai lotu hian Rinsangpuii natna hi a hria a, a hun a tihah a rawngbâwltu kaltlangin damna a pe mai a ni, "Mate, ka pa a va han lawm dawn êm!" Ramdinsanga mittui a far kauh a. Keipawh ka bâng chuang lo.

"Tin, ka hmingin engpawh in dil apiang chu ka ti zel ang, Pa chu Fapa avanga chawimawia a awm theih nan. Nangnin ka hmingin eng pawh mi dil chuan, chu chu ka ti zel ang." (Johana 14:13-14) Kan dîlna tlâwmte min ngaihthlaksaktu Pathian rawngbâwl hi kan tih mâkmawh a ni. Ka nu leh pa hrilh hlân ka lo nghâkhlel ve ringawt nia! Anglo lutuk.

"In ṭhu reng dawn nge kan kal dawn?'' Rinsangpuii phur lutuk tawh chuan a ti sek a.

"Kan kal lo ngam nâng, pawm che tumin Gym-ah ka lokal ve ṭâwk ṭâwk a, ho sihsah ta hlê mai." Fiamthua ka tih chuan an nuih a za viau. "Min pawm lo phawt mai la kan lawm em em e.." chimawm mai sia e.

Ka car-ah ka kiangah ngei a ṭhu ve ta. Temple pana kan tlân lai chuan a hmel ka va en leh zawk zel a, "Lawmsangzel, keimah tho ka la nih hi lo hawi sek suh.."

"Ka lo hawi lo tawp ang, i chhe ver vur em mai." Ka malah a rawn chûm dat a, Randina paw'n tu emaw ni phone-ah a be kawngtluan a, a û chanchin a sawi tui khawp mai.

Nie, damna neitu pan nachâng hre hre lova kan vah bo hian tûma'n an tuar lova keimahni tho kan na leh ṭhin.

Inkhawm chhung zawngin thusawi kan ngaithla uluk bawk a, Ramdina'n damna chang zingah a û hming a thehlût ve bawk a, thil pakhat ka lo ngaihtuah chhuak zawk a, Lalvenpuia khân Rinsangpuii'n damna a chang tih hre ta se engtin nge a tih ang le!

Ka ngaihzawng, ka ṭhian leh ka engkim Rinsangpuii hian a chang fai vek a; mahse, number one erawh a hauh thei bik lo. Inngaihzawnna chungchângah pawh hian number one-ah 'Isua Krista' dah tlat hi a pawimawh ber a ni tih ka hriat phah bawk.

Frederick Lalrindika rawngbawlna kaltlang a damna changtu hi Rinsangpuii chauh a ni lo a, kei ngei pawh hian a taka ka hmuh vângin ka hlâwkpui hlê bawk.

Inkhawm bânah tâwi khawmuang miah lovin kan haw nghâl a, a kianga awm hlan ka nghâkhlel takzet min hawsan hun tur phei chu ka ngaihtuah duh ṭhak nâng.

"Lawmsang, ka mutsan ang che u aw. Tu emaw biak ka ngai ve tawh a.." Ramdina a nui ṭhâ a, "Dinmawii tih vel bâk a ni tawp nang, Pathian zarah nurse kan mamawh dawn ta lo. Mama chance a chhe leh ta.." An unauva an infiam chu nui suk sukin ka lo ngaithla a, "Zan reiah phone call hman sek a ngai tawh lo turah ngai ang aw..Mate.." Tihpahin Ramdina room-ah a lût ta a.

"Naktukah em em chuan haw lo mai la.." ka tinghal tawp.

"Min duat viau dawn chuan ka haw lo ang a, min duat dawn loh chuan.." min nghêng rialin ṭhu ve teh tlat!

"A Rinsangpuii thlâk e, ka duat lutuk che a awm ngaihna i hre tawh lo a nih hi.."

"Ave lutuka che, thinchhe si..titau hma si.." a la ti zâwk za mah a.

"Naktuk tlaiah kan inah chaw lo ei rawh aw, i nau Mama pawh a ṭhiante nen an dine out dawn a, ka hrilh vek tawh." Ka tih chuan "Ka zak e a," a ti leh tlat maw le.

"Eng mah zahthlâk a awm lo, ka pi leh pu, kan nula chu zawng chu kan ni mai."

"Khaw'nge i nu leh pa.." ngaih ṭhat loh hmel zeta min en chuan "Lawngtlaiah, a bâk chu chaw i lo ei hunah ka hrilh ṭha ang che," ka ti ta a. Ka chhungte chanchin vawikhat mah ka la sawi chhuak hauh lova min zawh pawhin ka pehhêl zel zawk ṭhin.

"Tunah sawi ve mai la.."

"Mipain thil sawi duh loh kan neih chuan inzawh sek loh tur.." ka ti hmuk a.

"A lo nih tak chu, ka zâwt tawh nguar ang che." A ti ve nghat a, han thinrim ve deuh dâwn ila amah zawk hian min thinrim khum letling hlauh zela a va buaithlak tak.

A titau leh reng dâwn a ka hriat vângin ka kuah vat a, "Remchângah ka la hrilh ang che, a hmanhmawh thlâk loh êm mai, min ring la min duh bur rawh.." tih pahin a biangah ka fâwp zauh a.

"Ka chanchin ka hrilh vek lai chein min hrilh ṭha ve duh lova ka lawm lo." Tawlhsawn a tum chuan ka kuah nghet sauh thung. "Ka la hrilh vek ang che, chaw i lo ei ang a engkim i hre vek dawn alawm, ka duat.." tlawn leh ta nge nge e.

"Tikhân min ko eih suh, Lawmsangzel..." a tûm bâr a, "Phunchiar mang e, a nih leh ka duat Rinsangpui.."

"Min runluih hi chu nuam i ti teh e. Thingpui ka lum ang che aw.." a ti daih a.

"Lum ve tak teh, engtikah mah kan in dawn lo a nih hi ka lo ti hman tawh a.."

"I chhe keh e, ṭawngthei siah.." choka lam panin a kal a, hnunglam aṭangin ka nuih char char, eng mah zêp ṭît ṭêt nei lova a sawi phawng phawng ṭhin te hi ka lâwm tlat. Ka nuin hmu se a ngaina ngawt ang.

Rinsangpuii zawng a'n dam ṭhat meuh chuan kan chang lo ang tih hlauhawm fia fia tak a ni.

Thawhṭanni

2:30

Lawmsangzela In

"Bawiha, i ṭhiannu chu engtikah nge a lokal dawn?" Ka pi a phûr nasâ, kei hian nula chaw eiah ka la sawm ngai miah lova a chanchin ka lo hrilh zing ve bawk nen an hmu châk khawp mai. A dam leh dan thlengin ka sawi vek tawh a, ka pu phei chuan 'Hmeichhe tuarchhel tak a nih chu' a ti nghe nghe.

'Pi, ka han hruai ang e, zawhna zâwt ṭeuh suh u aw.." ka'n ti sa nghal ringawt a. A chhan pawh nunphung pangngai a zawh lohna a rei tawh a, mi zingah a awm tam lo bawk nen a nin ka lo hlau sa em em tawp. Hetiang hian ka duh ang tih pawh ka ring pha ngai lo; mahse, tunah chuan a tel lova awm ka huphurh ngawih ngawih.

Ka han sawm chuan a lo insiam peih diam tawh a, a thawmhnaw hâk a inhmeh leh pek hle, kekawr dum a taksa phuar ṭang a ha a, kawr dum a ha leh tawp a, Jacket uk khak inbelin boot dum a bun a, hetianga a inchei hi ka vawikhat hmuhna! Ka en nawn sek nia!

"Hey, bazarah min hruai ve zuai la, mamawh lam lawk tur ka nei a."

"Ka hming i hriat kha aw, tikhan min ko mawl tawp tawh suh," ka tih chuan, "Lawmbawih, Lszel..." a nui nghâl char char a, ka va ngei mai mai tak.

Bazar chhungah inkâi rialin kan tei dun ta a, a zualpui kan lei zawh hnuah kan in lam panin kan tlân chhuak ta a, ka pi leh pu te lo lêng chhuak hlauh se ka ti mang e.

Darkar chanve hnuah

Rinsangpuii

Dam ṭha angin lang mah ila ka tâi bâwr vel a na deuh reng a, nachhawkna nen ka ṭangkawp a ni deuh ber. Lawmsanga te in kan thlen chuan ka thaw chhuak halh a, an in chhawng li zeta sângah chuan ka lût ngam dawn em maw ni. Garage-ah car a dah lut nghâl a, ka hmuh theih ang ang ka lo thlêk chiam chiam thung.

"Kan thleng ta. Hei hi kan inpui a nih hi, ka pi leh pu, ka pa pa te in a ni a, ka pa chauh fâ annei a.." a sawi zawh hma hmain "Khawnge i pa te chu.." ka lo ti hmanhmawh a.

"Ka nu nen Lawngtlaiah an awm, ka nu a la pension si lova a awmpui.." a ti sup a.

"I nu chuan eng hna nge a thawh a? Â zawh tur che ka ngah lutuk.." ka ti sap a.

"Police, ka nu Lalmuanpuii chu Police a ni e.." chhuan hmel taka a nu hming a sawi chu hai theih a ni lo.

"Maw!? Ih.Police maw..!" Awi! Ka duh thei lo.

"Tikhân ti vak suh, a seh lovang che." A nui zui suk suk a. An in zau leh nuam zetah chuan min hruai lût ta a.

Car pahnih leh Bike pakhat ka hmu a, a pa'n eng nge a thawh tih te, a mah hian eng hna nge a thawh tih thlenga hriat vek ka duh.

Kan dinhmun nen ka khaikhin phei chuan tê chem chemin ka inhria a, ka hrehawm titih ringawt.

Ni e, Lawmsangzela hi ka bialpa a nih tâk si ah chuan a chanchin kimchang ka hriat ve ngei a ngai ang chu...

Din hmun inthlau lutuk te chu a ṭha dawn em ni? A nu Police a nih phei chuan..â ka ngaihtuah thui duh lo e a...

B+>[BeckirafARenthleI]<+®®

KA THLAH LO'NG CHE

Becky Rafa Renthlei

Episode-7

Rinsangpuii

Kan chaw ei chhung zawngin a pi leh pu te'n zawhna min zawt chipchiar ngei mai. Chhân loh chi ni hek lo, kan chhungkaw chanchin leh ka nat dan zawng zawng ka sawi kim hman vek.

"Pasal neih lam te hi..." tia a pu in min zawh chuan, "Ka hmanhmawh lo" ka ti ringawt a.

'Pu, duhtawk tawh la, i zâwt hnem tawh e,' Lawmsanga'n ti lo phei se chuan chaw ka ei hman nâng.

"Sp, ka room-ah Album kan en dawn nia lokal rawh," chaw eikham hnuah Lawmsang'n a tih chuan ka hreh ru deuh viau a; mahse, a pi leh pu te zawhna chhân reng ka peih si lo nen ka zui lût ta nge nge a.

A room zau ṭha hekhawk chu a nuam kher mai. Khum lian angreng tak chuan ka mit a la hmasaber a, Lawmsanga te chhungkaw inrelbawl dan tur pawh ka hrethiam uar.

Khum bul chair-a ṭhut ka tum chuan ka kutah vuanin, "Khumah ṭhu zawk ang, chair-ah ka leng ve hleinem,'' a ti deuh kher.

"Naa, ṭhut tlân a ngai em em chuang em ni?"

"Rinsangpui, min hlau chu a ni êm lo maw, engtin mah ka ti lovang chu vawikhat 'zeuh' a ni mai," a nui zui suk a, khumah innghêng riala ṭhuin Album kan en dun ta a.

An naupan lai thlalâk a nu leh pa inneih thlalâkte a vaiin ka enchhuak dap. A nu mawlh mai hi ka tum loh danin ka hmu a hmelṭha hlê a, a pian a dik viau bawk Lalmuanpuii a ti em ni kha? A pa erawh Lawmsangzela hmel nen a inang deuh a, a û mipa pawh a chhe lo khawp mai.

"I nu hi police a ni tiraw?" Tia ka zawh chuan, "Ni e, ka nu hna vang alawm Lawngtlaiah an awm tlat, ka pa workshop a awm bawk a."

An chhungkaw chanchin min hrilh pahin ka kâwngah min rawn kuah a, ka lo ṭang leh deuh ṭung tawh mipa ka hnaih lohna a rei tawh a, nuam ka ti chiah lo.

"Lawmsang, min kuah kher lo khân ṭhu ṭha ve mai rawh." Ka ti nghat a.

"Kuah ringawt pawh i duh lo a nia, ka kuah phâka i awm ta hi ka lawm tehlul nen.." a ṭawng dam thlap nâ a a lawm chiah lo tih ka man thiam ve mai.

"Englo..."

"Eng mah chhuanlam siam a ngai hran hleinem i thinlung takin min pawh lo tepawh a ni mahna.." tukverh lam panin a kal phei a, a taksa inkhaithli thlurh chuan min hnungchhawn zawngin a ding a, "Ka hmuh hma hauh a ṭang che leh i âw ringawt ka hriat lai te khân ka ngaihtuahnaah i awm reng ṭhin asin." A ti sup a.

"Enteh, thinrima lâk kher tur a ni lo a nia, lokal la lo ṭhu rawh,"

"Ka lo ṭhut chuan ka kuah i duh tawh dâwn tihna em ni?" Min en chuang hauh lo va. "Chhe keh e, titau rual pawh i ni lo.."

"Ka titau hleinem, kan inhmuhfâl hmasakber ṭum a ni a, min hawsan hunah chuan kuah tum che mah ila a theih dawn hleinem," tiin a rawn ṭhu thla leh ta a. A sawi dik angreng, kan inhmuh theih hun tlêmtêah hian engkim sawifel a ṭha viau a ni.

"Lawmsang, khawngaihin hun min pe rawh, ka duh loh vang che ni lovin hetia i room-a tawm reng hi thilmawi a ni miah lo a nia." Thawh tumin ka ding uaih a, ka kutah vuanin, "Min ring rawh engtin mah ka ti lo ang che." A malchungah min pawt ṭhu ta a, "A tidamtu che Pathian pawi sawi ka duh bik lova; mahse, ka ngai dawn êm che a ni," ka nghâwngah a hmai phûmin min thâwkkhum lum thar thar a, mipat hmeichhiatna lamah ka hlau a ni hran lo. Mahse, ngauhzawng ang a kan in enna a la rei lo êm a ka íp ve deuh atin ni.

"Min ring la, keipawhin ka ring ang che, khawi hmunah pawh awm mah ila kan inbiain kan inhmu reng thei lo, chuti ni mah se kan rinawm ve ve chuan eng harsatna mah kan tâwk ngai lovang." Dam thlapa ka chhân zawh rualin amah en turin min kuaiher a, ka mitah tak min en chung hian, "A chhe ber dinhmun i din lai pawha vuan tlattu che Lawmsangzela hian ka rilru ka la sawhsawn eih lo tih min hriatsak dawn nia." Dam thlap a min fawhna chu ka hnar phal bik teuh lo. Ka lo chhâng lêt ve mial mial a, a kut erawh hmun dangah dahsawn lo turin a inthun hlê tih ka hriatsak thung.

Rei ngial kan infawh hnuah a mitmeng phelh phang chuan ngun zetin min en a, "Ka thîkthu a chhia a nia, mipa nangmah hnaih tumtu che an awm apiangin min rawn hrechhuak zel ang che." A ti tlang hmiah.

"Ka thîkthu a chhe hran lo, mahse ka ngaihdan a nih loh chuan a tawp erawh ka thleng ngam.." ka ti ve a.

"Ok, an lo ngaihtuah tawh ang che, engtik niah emaw chuan haw leh ngai lo turin kan la awm dun ngei ka beisei hunin a la hril ang chu.." min pawt tho zui nghâl a, ding chunga min kuah leh tê tê hnuah, "Rinsangpui, ka duat, ka duat ni chhunzawm zel ang che." A ti leh sup a.

"Ka duat i ni ve duh em?" Ka tih chuan a nui hawk a, "Duh em? La tih chauh te chu a..!"

"I duh lo em ni?"

"Duh e, i hun kal tawh a mite aia nasa khân min duat rawh.." fiamthu ang a sawi nimah se a ti tak tak tih ka hrethiam tho.

A pi leh pu te kan mangṭha hnuah ka nî te in lam panin kan inphur chhuak a, a hnathawh chungchang chipchiar takin min hrilh ta thlap a, hunawl a neih loh zia leh ka kal avanga workshop a tlawh ngai loh thu a sawi chuan nuam ka ti viau lo.

Rálkhat aṭanga ka lo thlir dan aiin a nun a belhchian tlâkin a rintlâk tih ka hre bawk. Lawmsangzela thlah lo tur gian rilru nghet tak ka pu bur tawh.

Car khalh chunga min melh zawk chung hian, "Min hawsan tawh mai dawn si a ka huphurh khawp mai, indim la chaw ei ṭha ang che i chêr mah mah.." a ti deuh duah a, ka nui ringawt.

Kei pawhin ka hawsan hreh ve tho; mahse, haw loh theih loh a ni si a, ngai viau mah ila hreh ang taka lan ka tum lo.

Kan hmuh phâk a inti rinawm chawp ai chuan kan hmuh loh pawh a rinawm tlat mipa hi ka ngaisang zawk a, chutiang mi chu Lawmsangzela hi a ni em tih kan la hria ang chu...

B+>[BeckirafARenthleI]<+®®

8.KA THLAH LO'NG CHE

Becky Rafa Renthlei

Episode-8

Lawmsangzela

Karkhat hnuah

Rinsangpuii pawh 02 lamah dam takin a awm tih ka hre tawh a, eng ati tehreng nge maw ni a damloh lai kha chuan rinhlelhna ka nei ngai miah lo! Mahse, nunphung pangngai a zawh hnu aṭang hian ka ngaihtuah zual sauh va rinhlelhna tur ka hmu pawh ninghal lo chuan!

"Ls, ka lo zin leh thut mai thei.." whatsapp aṭanga min rawn biakna ka hmuh rualin ka khi suk a.

"In haw chiah si a eng nge i lo tih leh dawn? I ṭha maw!?"

"Ṭha e, ka nau zawk ka lokalpui ve thung a ngai a, a dam a ṭha lutuk lo.."

Ramdinsanga dam ṭhat loh thu leh Aizawl lama incheck up-a an lokal tur thu a sawi chuan damlohna mah nise ka lawm ru veng veng. Rinsangpuii hi ka tân a hlu a, amaha hian hmeichhe dangte neih ve loh eng emaw ka hmu miau alawm.

"In lokal dawn chuan min lo hrilh rang rawh aw.." ka tih chuan rang zet hian, "Hrilh dawn chiang e, number one-ah." A rawn ti zârh zârh a.

Whatsapp aṭanga inbiak mai duhtawk lovin ka call leh ta nge nge a. A hna pawh thlathar aṭangin a zawm tawh dawn a, kei erawh sawrkarah hna nghet nei lo mah ila ka nu leh pa zarah ngaihtuahawm ka ni lova Lawngtlai a kan workshop leh Aizawl a mi hi ka kuta awm tur a ni bawk. Ka û Zosangmawia'n hna nghet a nei thung a, a naupang zawk ka nih angin nu leh pa enkawl tur ka nih hmel.

"Lalvenpuia'n a lo la be ngai che em?" Zawt thut ka ni bawk nen min chhâng lawk lova chutah, "Hman zanah a lo leng a ka be lo," a ti sap a.

"I nunah inrawlh theihna ka nei lo; mahse, ani kher kha chu hnaih suh ang che." Ka thinrim lek lek nia.

"Enteh Lawmsang, ka be lo hrim hrim, ka pa nen an titi a ka mutsan daih." Awih chiah lo mah ila ka hmuh phâk a nih loh avangin rinhlelh viau kha ka duh lem lo.

"Biak loh tawp tur a ni lo na a, biak chintawk i thiam erawh a ngai a nia, i laka a rilru kha theihnghilh ngai miah suh." Tlang takin ka hrilh a, khatiang mipa nep lutuk kha ka haw hlur thei nia.

"Ka be dawn lo ka tih mawlh mawlh chu," a ni leh ni lo angin a vín reuh zêk a, "A ṭhat chu.."

"Nangmahah rilru ka pe a mipa pakhat ka tân a tâwk.." Zawi sap leh fiah taka a ṭawng chu ka bengah a ri ring kher mai.

"Kan la hria ang chu, i whatsapp list lo screenshot ang che," ka la ti zui hrâm.

Dik tak chuan ka thinlung hian thil eng emaw dik lo awm ang a hriatna a nei tlat a, eng nge a nih ka hre si lo. Ka naupan lai pawhin thil felhlel deuh ka nuna lo thleng tur a awm hian mak deuhin hriat lâwk theihna riau ka nei ṭhin. Rinsangpuii hi ka duh êm avang leh midang tan ka phal lo tih ka hriat chian êm avangin alakah pawh ka strick ṭhak.

"Ti kher kher ve siah.." a ti ri pawh ka hrereng. Ka nunah hmeichhiain hmun an chang tam lo; mahse, whatsapp leh fb tih velah erawh biak ka nei zauh zauh ṭhin. Ani nen kan inkawp fel hnu hian ka thlah hlauh a, tumah biak nei lovin ka fair viau.

"I laka ka rilru puthmang i hriat kha, kan awmna hmun inang lo mah se kan rinawm tawn phawt chuan inṭhenna a awm ngai lovang." Nghet charh a ka ṭawng chhuah rualin a thaw chhuak hak a, "Hmaichhana sawi dunah kan khêk ang." Zuk ti tlat a.

Kan inbiak zawh meuh chuan zan dar 11 a ri tawh a, zinga ka thawh rualin Rinsangpuii ka hrechhuak hmasa ber a, ka mut dawnah pawh chuti tho. Kan inbe tam em em a, 'Ka hna ka zawm hunah tun ang hian kan inbe thei dawn lo a nia' tia a sawi lâwk te chu ka lo huphurh ngawih ngawih.

Ka nu leh pa paw'n kan chanchin min zawt zauh zauh ṭhin a, a hmel hmuh ve an châk thu pawh an sawi lang nghe nghe.

Mu tur a ka insiam laiin ka kawm ve ṭhin Lianpuii'n msg min rawn thawn a, ani nen hian thu ho tê tê sawiin Ck lam rawngkaia inbiak ve zeuh châng pawh kan nei. A chhe lo viau bawk, ngaihzawng tak tak tura inbia kan nih ngai loh avangin ka ngai thutak hran lo.

Rinsangpuii muthilh hnuah ka la meng reng a, Lianpuii'n ka û chanchin min rawn zawt leh bawk nen zinglam darkhat thleng zak ka'n han inbiak chu le.

##

Niminah Rinsangpuii tepawh Aizawl an lo thleng tawh a, tlai lamah incheck up turin an kal nghal a, an haw har deuh avangin ka lêng ta lo khâ a nia mumal tak pawhin kan la inbe lo.

"Vawiin chawhnuah hunawl ka nei a i hman chuan kan inbe lawk dawn em ni ang"? Tia min lo biak chuan ka lo 'Aw' rang ngei mai. Nihnih thum vel chu kan inbe mumal tawh lo va ka hmu châk viau.

"Kan workshop-ah lokal mai la ka lo hmuak ang che," Tiin kan awmna lai ka hrilh nghal bawk a, min hnial ka rin tehreng nen 'Ka lokal dawn nia' a ti ve teh tlat!

Min pan duhna rilru hial a pu ve ta chu a nia a rûkin ka nui suk suk lawi si. Hmeichhe dang ang a nih loh avangin tihdan thiam erawh a ngai tih ka hria, vawikhat fawh ringawt pawh thil harsa a nia!

Dar hnih vela min lo call chuan a lo thlen tawh thu a rawn sawi heu a, ka rin ai daihin a lo thleng hma!

"Hey, min lo hmuak ve chu le(h)" Workshop kawtah dingin ka chhuak chiah chu min lo nuih var var a, a va'n hmelṭha reuh tak.

"I lo chhuah dawnah sawi la chuan ka lo inring tur a nia.."

"Naa, ka ngaidam ang che."

Inchhunga kan inzui luh hnuah a phone en ka dil a min pe ṭha ve mai bawk. A password ka hriat loh avangin min hrilh leh phawt a, eng nge hmuh ka inbeisei pawh ka hre bik lo, en châkna rilru ka pu tlat nia maw le!

A whatsapp chat ka'n en chiah chu thinrimna namên lo hian ka so chhuak bulh a ni ber. Mipa dang nen an inbiakna ka hmu hmasaber a, hetiang vang hi a lo ngei ang ka ngaih a ṭhat theih miah loh! Lalvenpuia nen an inchhân dan pawh ka chhiar kim dap e.

"Rinsangpui, mipa dang be reng chung hian engtin nge ṭha tak a pawisawi lo niawma i lan theih?" Sâwi nawk nawk ka duh hial mai ka ti.

"Inngaihzawnna lam engmah a awm loh kha chhiar chiang ve la.." a ti sap a, thinrim ang pawhin a lang duh eih lo nia.

"Nie, Lunglei leh Aizawl aṭang chuan phone kan incheck sak reng thei dawn si lova kei lo mipa dang duh zawk i nei a nih chuan ka tibuai lo ang che." Ka ti hmiah.

"A va mak hmak hmak ve le.."

"Mak em ni? Engkimah ka ring che a, Lalvena phei hi chu i biak duh pawh ka lo ring tawh lo khâ a nia.. i dam meuh chuan i awm mai mai lo khawp mai."

"Lawmsangzel," ti ṭhatin ka phone kenlai min chhuhsak a tum a, ka phal bik si lo. Rei ngial kan inchuh hnuah thinrim zet hian, "I duh duha i puh kual tur atan a lokal ka ni lo. Min ring lo a nih chuan i rin zâwng chu nei mai rawh," ti nghatin a phone ka kenlai chu min chhuhsakin a kal chhuak ta a.

Umzui tumna ka nei lo, hmeichhia zawk mahin an ngam chuan engvangin nge ka theih loh bik ang le.

Vawikhat pawh hawikir lova a kal ta chu tukverh aṭangin ka thlir reng a, kan awmna hmun a inang lova khatiang a phone a ṭanga ka han hmu kha ka dam hlawl lo, ka check a ring pha lo te pawh a ni mahna.

Rinsangpuii thinrim hmêl kha nasa tîktêk tak a ni!

Workshop-ah pawh awm nileng peih lovin mechanic ho hnenah ka haw hma tur thu sawiin ka chhuak zui ta daih a, ka pi damdawi lei a ngaih avangin Hospital road panin ka tlân phei a, Rinsangpuii amaha kal vâwk vâwk ka hmuh chuan ka khawngaih leh deuh.

"Hey.." traffic jam-a ka tân laiin ka ko a, min en zawk a lehlam min hawisan hmak.

A ṭha a lawm, ka ngaihven hûrh bik awm lo em mai. Amah ka duh a ka chân phal lo tih ka inhria; mahse, mipa dang be reng chunga kei min bia hi chuti maia ngaihzam ka tum lo hrim hrim, ka pa fapa ka nih chhung hi chuan mipa nêp ber thawmhnaw inbel ka tum eih nâng.

Damdawi vel ka lei zawh vek hnuah ka haw ta daih a, Rinsangpuii biak hmasak tumna ka nei lo a, a lokal ka nghahhlelh tehreng nen ka beisei loh dan lutukin kan awm ta si a!

"Lawmsangzel, thil hrechiang hmasa lovin thutlukna i siam dawn maw?" A Whatsapp msg ka hmuh chuan chhân loh ka tum ûk a; mahse, sawifel law law ṭha a ka hriat avangin, "Kha bâk bâk a chiang a awm em ni?"

"Mipa ka biak apiang i haw zel dawn a nih chuan kan inrem thei lo chu a ni mai a; mahse, i hriat chian hunah inchhir suh ang che."

"Khatiang zawng kha chuan min ti lo mai rawh, kei aia i duh chu pan la pakhatah i lungawi lo a nih chuan ka kiang thei lutuk a nia.." Tia ka chhânna chu a run deuh nge min rawn call ta a.

"I mak ka ti, puitling ka ni tawh a nula ka ni bawk, min ngaihventu leh min duh der ve tu an awm ve bawk ang chu; mahse keima'n ka duh ve loh chuan a englai chu nge i huat? Nangpawh betu i nei ve tho ang, ka thîkthu a chhe over lo va bâkah ka ring tâwk che a chuvangin i phone pawh ka ensak lo che a, nang ve en zîktluak mang si lova thinrim ringawt kha i ti mah mah.." thawchham dâwna a ṭawng chu ka ngaithla reng a.

A sawi dik mai thei, kei hian ka lo ti lutuk deuh em ni? Biak ka nei ve thova inngaihzawnna lam em em ni lo mah se ka dik famkim chuang lo.

"A ṭha alawm, tun aṭang chuan keimah ni lo mipa dang be tawh lo la kan inrem a ni mai." Ka ti nghut a, "Ka be lo rêng, naktukah i chhiar chiang dawn nia, ka sawifiah thei alawm." A rawn ti dam ta thlap a.

"In inah tunge awm?" Tia ka zawh chuan, "Keimahin.." a ti a.

"Ka lo kal nghal.."

Rinsangpuii nî te nen hian kan inhlat vak lo va amah chauhva a awm lai a nih chuan bawhpelh ka tum lo.

##

"Thinchhepa.." min hmuh rual rualin a lo ti nghâl a.

"I thinchhe fê, call hmanga kan inbiak ṭhin lai kha chuan i zaidam thlap thlap nen tunah chuan Keite i ni ringawt tawh.."

"A ve a che, rawn inla smart ve em em a, kan inhrechiang tulh tulh a kan inbakkaih ṭan chu a ni deuh der.." nui sâng chunga a ṭawng lai chu mitkhap miah lovin ka lo en thung. Dârkar reilote kal ta a thinrim hmel a put kha hmuh tur awm lovin a hlim leh viau lawi si!

A ní te dawrah an awm thu leh Ramdinsanga a ṭhiante ina chaw ei a tum tih a sawi chuan ka lo thaw huai huai.

"Sp, diktak chuan midang tân ka phal lo che, nichin khân ka lo ti lutuk deuh a ni maithei.." A koki-ah vuanin ka lamah ka pawt hnai a, "Nia, keipawh ka thinchhe lutuk ṭhin a ni, i lungawina a nih dawn tumah ka be lo mai tur alawm, min ring la ka ring bawk che," a ti leh mai a. Henu hi chu a danglam thlâwt!

Dimtêa ka fawhna chu ihê lovin min chhâng lêt a, nula nalh leh hleitling tak a ni a, 'mipa ka ni' inti ve tân chuan insum a har ṭalh mai. A âwmbawr kawh lah ka deh rualin a thaw hak a, "A bâk duh belhna i neih dawn loh chuan ka dang lovang che; mahse, inthunun ang che," ka hmakhua ngaia sawi nge a nih ama tân tih pawh ka hriat si loh.

A taksa nêl thep leh a hmui lum ham ham te, a biang sen ṭân te chu nidanga ka la hmuh leh hriat ngai loh thil a ni a, kan ina chaw a rawn ei zan pawh khân tiang hmel hi a pu lo. Fawp mawlh mawlh chunga a taksa ka chûl lâwr dan dan lai chuan ka tukkhum samah a ṭhâm deuh nak a, "Duhtawk la.." a aw ri hre mah ila a bâk duh belhna ka nei miau si.

A kekawr hâk chhunga ka kut ka dah luh chuan a ṭang nghal ṭeuh a, "Engtin mah ka ti lo ang che," ka ti tak nâ a, ka thusawi chu boruakah a thâmral nghal a ni mai, tisa châknain ka khat a, ka hnuailamin nunna thar a nei bawk.

"Lawmsangzel.."

"Sp, vawikhat chiah..."

"Khatiang rilru pu suh, kei chuan duhthlanna fel tak siamin ka thlang tawh che a, Pathian pawi kan sawi chu thuhran, i rawngbawlna leh i nihna zawng zawng kha thaichhiatin a awm dawn a, tunah lang chhuak lo mah se thup hlen theih a ni dawn lo, insûm la hahdam rawh.." Fiak faka a ṭawng ri chuan ka chhungril a tawk che pha tlat.

Mahse, ka inthunun mai thei bîk si lo.

"Mawh," tih pahin nghet zet hian ka nghâwngah a rawn kuah a, a kut leh lamin ka hnung a chûl hauh hauh bawk a, "Hahdam tum la, fîm takin ngaihtuah rawh, hetiang ti hmasa lo hian a inrem theih a nia.." a ti sap sap a.

Vawi tam thâwk ka lâk sek sek hnuah ka ziaawm ta, amaha eng emaw awm tlata ka lo hriat ṭhin kha tuna mi ngei hi a ni.

"I thinrim lo tiraw.." tiin min la zâwt zawk a nia.

"Thinrim lo ve.."

"Ka duh loh vang che a ni lova, min dintu leh min siamtu pawi sawina a ni a, kan inhmangaiha kan induh phawt chuan a remruatna hnuaiah hlim takin kan la ti dun ang tih ka ring tlat." Ka nghâwngah a hmai a phûm zui daih a, kei Pathian rawngbawl tia kohhrana phâk tâwka inhmang ti ve hi ka va tenawm em!

"Midang lakah min kalsanovang tiraw..?" Tia ka zawh chuan nui hak chung hian, "Ka kal peih teuh lo, ka Lawmsangzela chauh lo chu.."

"Rinsangpui nui suh..."

"Naa, ka nuih lo che a nia, i naupangchhia thei e.." ka mitah tak min enin, "Min thlah hmasa a nih loh chuan thlah che ka tum lo, chu chu ring hmiah rawh.." thutak zetin a ti ta a.

Ka hmangaiha ka duh takzet a nih chuan ka tichhe phal dawn em ni? Ni lo ve, a sawi ang hian Pathianin rem atih chuan kan tán kawng a hawng em em ang. Rinsangpuii nge nge ka tluk lo mai ni lovin rinngam hmeichhia a ni.

Chumi hnu chuan inpawh takin kan titi dun a, a puitlinzia leh a rilru zau zia pawh ka hriat belh deuh deuh, kei Lawmsangzela hian ka thlah thei dawn lo tawp tih ka hrechiang tawh ngei mai.

Natna ina a hneh theih loh leh Pathian beisei chunga hringnun hmachhawntu Rinsangpuii tân hian rinawm ka bâ a ni.

B+>[BeckirafARenthleI]<+®®

9.KA THLAH LO'NG CHE

Becky Rafa Renthlei

Episode-9

Rinsangpuii

Aizawlah kârkhat kan châm tawh a, Lawmsangzela nen kan inhmu ṭha thei lutuk lo, Ramdinsanga pawh a ziaawm chho ṭan tawh a, naktuk hian min hawsan hmasa ang a; kei erawh ka hna thilah châm khawmuan a ngaih vângin ka la awm thung ang.

Inngaihzawnna nghet kan neih tâk chinah hian kan inbe khât hlauh nia! Ka ringhlel chhin ngai lova ani erawh chuan ' 'mipa dang nen in inbia em?' Tih vawi tam min zawt ṭhin. Ka chhânna pawh a ngai hlir a ni zel bawk.

Vawiin hian a ṭhiannu min hmuhpui a tum a ka hnial lêm lo. "Sp, i lokal dawn chuan min lo hrilh hmasa rawh aw.." a msg ka reply nghal a, "Ka inbual phawt ang a ka lokal ang."

Hmanhmawh hauh lova ka inbual hnuah uluk takin ka insiam malh malh a, awmna hmun inang lo ta na na nâ chu kan inhmu zen zen thei si lo a rei ve deuh lenchhuah tumin ka insiam a ni ber.

A ṭhiannu te in kawtah min lo nghâk a, ka phone lâwk vek tawh bawk. Lawmsangzela kiangah hi chuan ka thlâ a muang a, him bîk riauva inhriatna ka nei ṭhin a thîkthu a chhe deuh mai pawh a..

"I lokal hma leh sia.." nui suk chung hian ka dârah a vuan a, a rim fai sar chuan ka hnar a verh zar thei nia.

"Nia, hun thawl ṭha neih ve chhunah ka rawn âm deuh.." a ṭhiannu Feli te inah min luhpui ta a, ani hi Lawmsangzela bestfriend niawm tak a ni a, a hming ang chiahin a felin a polite viau. Min lo be nghal bawrh bawrh a, ka tlângnel ve mai bawk.

"Sp, i phone min lo pe lawk," Lawmsanga'n a tih chuan îhe lovin ka pe ve mai a, a phone check sak tumna rilru hi ka la pu chhin ngai lo; mahse, engin nge min mawlh tehreng ni, "I phone ka lo en ve thung ang," ka tih chuan min pe ṭha ve mai a, "Ka phone i check ziah a ka en ve dâwn.." password a dah loh avangin ka en a nghal a.

Whatsapp chat ka en chuan ka rin loh deuh thil ka hmu ta tlat mai! Hmeichhe pakhat nen an inbiakna chuan ka mit a la ta deuh tlat a, an inbiakna ka chhiar chhuah meuh chuan ka chhungrila thinrimna rawn irh chhuak tur chu thunun theih ni bik hek suh, "Lawmsang, henu hi tunge?" Ka nuih a za lo khawp mai.

"Eng nge i en kher a," tia phone min chhuhsak a tum chuan ka phal bik si lo. Rei ngial ka inchuh hnuah a ṭhiannu a awm bawk nen min dil lui ngam ta lo va, "Sp.."

"A va mak ve, ka lo kal dawn thlengin hmeichhe dang i bia a nia.." ka ti sap a, thinrima ri hluai mi ka nih loh avangin rum zet hian ka melh a.

"Englo, khâ chu.." tih pahin a phone a rawn ban leh a.

"I rinawm loh avang hian ka rinawm lo ve kher lo a nia," a phone pêk paha tiin ka ding hluai a, "Ani kha be chhunzawm rawh, ka kalsan ang che." Ka ti hmiah.

"Rinsangpui, ka insawifiahna i ngaithla dawn lo em ni?" Ka bânah a rawn vuan a.

"Insawifiah leh chuan a ngaiin ka hre lo engkim ka hmuin ka chhiar vek a, ka lawm lo bawk, puitling ve ve kan ni a thil hrethiam lo rual lah ka ni hek lo, midang i lo biak ṭhin vang a nih hi ka phone i check ziah! Nangmah ang ka ni ve kher lo tih i hre tawh ang chu.." Feli paw'n kan boruak hrethiamin a inthiarfihlim a.

"Sp, ka sawifiah thei.." a ti nghut a, thinrim a tum deuh em mawni. A dik lo zawk a thinrim ngam a nih chuan ka dik avangin ka hlau eih lo.

"Midang bia a Ck kual vel chu keimah ni lovin Lawmsangzela a ni, ka kiang ang e, hmeichhe pakhata lungawi ve lo mipa ka ngaisang lo." Ka bag lain chhuah nghâl ka tum a, a lo phal lo nasâ. "Khatiangin min kalsan ngawt thei lovang, ani kha ka duh lo, nangmah alawm ka duh che.. "

"Ani bulah pawh tuna i sawi ang tho kha i sawiin ka ring, ka kal zawk ang e..tikhân kan inṭhen ni rawh se." Ka thinrim êm avangin thutawp ka siam zui ta nghal a.

"Khawngaihin min ngaidam rawh ani ka biak dan kha chu.." insawifiah eng ang mah se an inchhán dan ka hmuh miau avangin ka lungawi thei ngang lo. "Vawikhat chance min pe la.." a tih chuan ka pên lai tawp chatin a mitah tak ka en a, "Ka lo ring ve ṭhin che asin.." a bâk eng mah ka sawi tawh lo.

"Ka hria, ka tihpalh takzet a ni.. Thinrim tawh suh ka be leh tawb lovang.."

"Enteh, Lawmsang, kan inzui hmâa thilthleng chu nise ka hrethiam mahna; mahse, tun lawk 15 minutes liam taa i chhânna engtin nge ni dawn?"

"Ka tihpalh liau liau a ni, nizanah ka û chungchang min zawt a kan inbe chhunzawm chauh alawm.." a la ti nia.

Chumi hnu chuan rei ngial min thlêm hnuah leh be leh ngai tawh lo tura a intiam tâk avangin ka thinrim ta bik lo. Ka lungawi nghal tihna a ni lova innhial ka peih loh vang zawk a ni.

Amah lo mipa dang duh ka nei lova ngaihdam min dil a nih chuan ka ngaidam mai tur a ni. "Lawmsang, tun ṭum chauh ka ngaidam ang che, a lehpek a awm a ka hmu leh a nih chuan kan inkâr a tawp tawh ang." Ka ti ta hmak a.

"Tehreng mai, i rilru tihnat ka duh lo, ani nen khân kan inngaizawng lova min rawn biak tâkah chuan ka lo uang mai mai a nih kha, khawngaihin thinrim suh." Dam thluama a ṭawng lai chuan ka ngawi ngal a, sawi mai dan tur ka hre bik lo.

"Nidangah chuan hmuh nawn ka duh tawh lo a nia aw.." ka sawi zawh rualin ka kut nghet zet hian a vuan a, ''KA THLAH LOVANG CHE hmeichhe dang vang phei chuan thlah che ka tum lo. Rinsangpui, ka hmangaih che, ka nunah midangin hmun an chang lo chu chu theihnghilh ngai suh." A lamah min kuah hnai ruaka tû mitmei mah veng lo hian min rawn fawp ta a.

Min hmangaih thu a vawikhat sawi chhuahna a ni a, ka chhungril thlengin a fan raih raih thei nia!

"Keipawhin ka hmangaih che; ka natna tura i awm loh hrâm ka beisei." Min fawh kâr lakah ka ti ve sap sap a.

Feli te sofa-ah inkuah riala kan ṭhut dun lai chuan, "Min hawsan tawh lo la ka ti.." a hmelah a ti tak tak tih lo chhiar thiam ve mai.

"Ka hawsan i duh loh chuan leh i kianga awm ve reng tura min duh chuan hma i la thei alawm," ka nghêng hnai ṭalh ṭalh a, a sam tuai puat chung hian, "Ka chhungte ka lo be dawn nia, tu tân mah ka ka phal lo che a ka tâ i nih hun ka nghâk hlel..."

"Naa, ka phênah midang i lo be ru leh zeuh ang e.." tia ka fiam chuan, "Ka thlah lo'ng che, ti a tiamtu Lawmsangzela hi ka thutiama ding ngam lo tur khawp a mipa nêp ka ni lo. Natna khuma mu engtik lai maha ka kalsan phal loh Rinsangpuii kha i la ni reng." Ka mit en chunga a thusawi chu ka theihnghilh theih ka ring tawh lo.

"Ka tâna i rinawm a, kan rinawm dun chuan inṭhenna a awm lovang, Pathian hmaah thu tiam dun rih lo mah ila rilru nghet tak kan put ve ve a ngai, thihna chauh lo chuan min ṭhen suh se," ka ti ve ta a.

Vawi tam infâwp sek sek mah ila kan inkham thei chuang lo ang, chaw ei tura chhuak ka nih loh avangin khua a thim tawh bawk nen hâw ka rawt ta a.

Nidanga kan inhmuh nen a boruak a dang ta zar mai. Lawmsangzela thu min tiam ka hriat chhuah a piang hian ka nui nawn fovin ka ring ṭhin.

B+>[BeckirafARenthleI]<+®®

A laklawh ta tlat....

10.KA THLAH LO'NG CHE

Becky Rafa Renthlei

Episode-10(Last)

Lawmsangzela

Ka nu leh pa te biain Lungleiah zin ve ngei ka tum a, Rinsangpuii ruala kal ka duh viau rualin sawi sep sep kai a awl bawk nen karkhat hnu a zin phei ka tum rilru ve deuh.

Ramdinsanga pawh a haw phei tawh a, office-a dawrna velah pawh ka zui ve zel a, nula bright tak a nih bâkah a hmelṭhain a lian ṭha zuai zuai bawk a, biak ṭhat a hlawh viau.

"Aizawlah lo zin tam lo la a ṭha ang," tia ka fiam chuan a nui ṭha duh miah lo a, "Min hmu peih lo a nih te chuan ka lo hmu malêk ang che." A ti deuh hmak.

"Hey, ka sawi awmzia chu helama i awm chuan ngaizawngtu i ngah dawn tlat, ka chang lo ang che tih ka hlau.."

"Chhe keh suh, nang angin be sektu pawh kan neih ve loh hi.." Ka whatsapp a check ṭums a thil hmuh kha a sawilang leh zauh zel. Ka dik loh zawk a vangin ka chhâng thui duh lêm lo.

Ka nu hnenah nupuia neih ka duh tih ka sawi chuan, "I û neih khalh lovang a hmanhmawh thlâk loh," zu ti tlat a. Mahse, a dikna chen a awm bawk. Ka û Zozangmawia hian nupui neih a tum ve deuh tawh a, pa Zirsanga te fanu nen kum khat chuang an inzui tawh a, ka nu pension veleh inneih an tumin ka hria, chhungkua hmun hran hran a awm darh kha thil ṭha ber a nih loh avangin kan chhungkaw kima kan awm theih hunah an ti ta khâ a nia.

Rinsangpuii paw'n tun thut thuta pasal neih a la tum loh thu min hrilh ve bawk. "Lawmsang, ka pa leh ka nau kalsan hi ka la hreh rih a, min hrethiam hrâm rawh." Tiin min ngen ve a, hmanhmawh ru viau mah ila nu leh pa thuzawm hi thil ṭha a ni tih ka hriat a vangin ka nawr lui lo.

A taksa pawh a dam ṭha tawh a, insawiselna em em a nei hran lo bawk nen thlathar aṭangin a hna ngai Revenue-ah a thawk zawm leh dawn a, ka nupui a nih hunah chuan a hna hi thawhzawm tir ka tum lo. Ka nupui chu ka châwm zo ngei tur a ni.

Inhualna zungbun pêk ka tum chuan a duh miah lo a, "Kan thinlung a inzawm tawh a, inrintawnna chiah kan mamawh, rinawmna nen.." ka mitah tak en chunga a thusawi kha ka hrechhuak fo ṭhin.

A pa hnenah kan chungchâng a hrilh vek tawh a, ka nu leh pa hmuhtir hlân ka nghakhlel viau. A bikin ka nu nen an inngaina dawn tih ka hresa bawk.

A haw ni tur a lo thlen chuan Zarkawtah thlah turin ka chhuak phei a, huphurh tak têin ka huphurh thei nia. A natna vangte leh mi rilru nghet tak a nih vangin Pathianah a innghat em em a, chêt sualna tur hun remchang tam tak kan nei chung pawhin, "A hun hma chuan insum rawh, Pathian khawngaihna changin mi pangngai ka ni leh a, a pawi sawi ka duh lo, ka duh loh vang che a ni lo tih min hriatsak hrâm dawn nia." A tih ṭum te khan ka va ngaisang si êm.

Pathian beisei tlattu Rinsangpuii hian ka nunah hmun pawimawh a chang a, a sawi ang chiahin Pathian tel lova inngaihzawnna hian hlimna aiin lungngaihna ruamah min hruai lut thei tih ka ka hriat fiah phah bawk.

"Lawmsang ka ngai ngawt ang che, kan thlen chin a piang ka lo hrilh dawn che nia, min lo ngaichâng rawh aw.." tih pahin ka kutah eng emaw a rawn hmehbel a, a intuam tlat avangin eng nge a nih ka hre thei mai lo.

Sumo chhunga a luh dawn chuan, "Whatsapp chat screenshot ngai suh se aw.." tiin a nui var var a, "Tu emaw lakah khân lo fimkhur ang che.."

Inngaiin inthlahlel teh mah ila a pa in awmna a nih tlat loh avangin kan invai liam leh ta nge nge e.

Muangchângin ka kal chhat chhat a, kan inbiaktirh laia a natna avanga a beidawng aw te, Lalvenpuia vanga a ṭap ri ka hriat lai te khân ka hmangaih ang tih ngaihna reng reng ka hre pha lo. Mahse, vawiin niah chuan ka nuna hmeichhe pawimawh ber a ni ta si. A thil min pêk kha ka la hûm reng a, footpath-ah dingin ka hawng ta a. Sana nalh zet ka hmuh chuan ka thaw chhuak hawk nia.

Kei hian eng thil mah pêk nachang ka hre pek lo; "Darzât i en apiangin Pathian hmaa 'tiam tlat e' kan tih hun tur nitin kan hnaih zel tih i lo hre dawn nia," tih lehkhathem a inziak ka hmuh chuan ka nui suk suk a ka lungleng zual sauh.

In ka thlen hnu daihah min rawn call a, "Hey, ṭawngṭaina hmun kan thleng tawh a, ṭawngṭaisakngaii hian ṭawngṭaisakngaia kha ka lo chham tel dawn che a nia.." a nui zui hak hak a, a hlim hmel ka mitthlaah a rawn lang nghal.

"Aw le, ka lo ti ve nghal.." tia ka chhân chuan, "Ka lawm e, bye.."

Khatiang hmeichhia kha a ni miau a, "Ka thlah lo'ng che" tia phun sup chungin workshop kal turin ka insiam ve ta a.

Kan nunah harsatna kan tâwk thei, kan nuna tel tura kan duh hauh loh natna pawh kan tuar thei bawk. Rinsangpuii ang a chhel taka tuara Pathian beisei tlattu kan nih chuan a malsawmna chhiarsen loh leh a hausakna ren rual loh hi vûrin kan awm ngei ang.

Tunah innei thei rih lo mah ila a remruatna hnuaiah engtik niah emaw chuan pumkhat kan la ni ngei ang.

"Ka hmangaih che a, engtikah mah ka thlah lo ang che." Tia tiam nawn lehin car-ah ka lut ta a.

B+>[BeckirafARenthleI]<+®®

NOTE: He story hi long story tura ka buatsaih a ni lova a nihna takah chuan ka next story tur RAPSAGYAN FAMILY-a lang tel turte anni a, tunah hian tawp angin lang mah se a chunga ka sawi tâk story-ah khian an lang nawn leh dawn a ni. An chanchin kimchang zawk ziah lan hmasak a ngaih vangin tihian ka rawn post hmasa ta zawk a.

RAPSAGYAN FAMILY NEXT

A changtute: 1. Rafael Remruattluanga of Rapsagy

2. Zosangmawia of Segundo anni a, Lawmsangzela te pawh an lang tel bawk.

Min chhiarsaktute zawng zawng chungah lawmthu ka sawi e.

B®®