SEGUNDO (B®®)

SEGUNDO|BRR

Ziaktu: Becky Rafa Renthlei [B®®]

RHAPSODY

"Khawi kipah pawh awm la, ka zawng hmu zêl tho ang che, kan ram zimtê-ah hian i hmêl ang 'common' lo zet khâ ka hai ngai lovang tih hre mai rawh," ka kianga hmeichhe ṭhû chu rum zetin ka melh a.

"Min zawng turin ka ngen lo che a, min umzui rawh pawh ka tih si loh!" Tia rawn dâk chhuakin zâm map lo hian ka mitah tak min en lêt kalh a, a hmêl ṭha tak leh nungsar hi alawm ka muthmuna ka lo suangtuah fo ṭhin leh ka theihnghilh theih miah lo chu!

Ka nu leh pa fapa mal neih chhun hian he hmeichhia hi ka âtchilh thawthâng chu a nia, amah nei tur hian eng ruahmanna ṭha uchuak nge ka siam tâk ang?

Sum leh pâi-in a nunah hmun an chang lo mai nilovin eng teh ûal-ah zuk ngai hauh lova...!

Chapter-1

Lengpui Airport

Hmanhmawh hauh lovin ka pên chhak chhak a, min lo hmuaktu tur car 'khaw'nge a awm?' tia hawikualin mipui zi nuaih nuaih lam chu ka thlîr a.

Tunah chuan ka ram ngeiah awmhmun ka bêngbel ve tawh dâwn chu a nia, ka nu leh pa, min ngai a min thlahlel em em tute kiangah thlamuang takin ka awm ve tawh turah ngai ang.

Kan company car-in min lo hruai dâwn a, khawiah nge maw driver hian motor a dah daih ni!?

Ka hawikual ngial pawhin ka hmu chuang lo reng reng! Kan office lam ka phone ta ringawt a!

"Airport ka rawn thleng tawh a, tunge in rawn tirh?" Ka tinghal tawp a, hmanhmawh lo mah ila helaia tâmtâl reng ka peih îkhaw lo mai.

"Sir, nichinah kan rawn tîr daih tawh alawm, khawilai emaw-ah khan a awm ang, a lo thlengthla tawh tih report kan dawng diam asin!" Tia min rawn chhân chuan ka'n hawizau leh deuh a, main gate piah chiaha kan company car lo ding chu ka hmu ta a, atu apawh nise vawikhat tal ka hau ngei ang, min hmuaktu tur a ni a, a mawhphurhna a hlen zo lo deuh a nih hmel!

Ka Air Bag leh Trolley Suitcase nen car lo dinna lam chu ka pan ta a, kan mi chhawr pangngai a ni lo nge min rawn chhâwk tumna pawh a nei der lo, car chhungah a ṭhû tih ka hmu pha tawh a, steering a bawh avangin a hmêl ka hmu thei chiah lo mai pawh a!

"Hey.." Chhunglamah car a lock tlat zui a(h)!

Vawithum ngawt car kawngkhar ka ben hnuah a rawn hawng ta hrâm a, a lo muhil a ni ngei ang, a mitmeng phak chap leh sen râm chu a nuai chat chat a. Hmeichhia lek niin!

Mipa tirhchhuah tur kan nei remchâng lo nge, henu hian kal a chuh tlat tih pawh ka hriat si loh!

"Hey, engvanga rawn bengchheng vak nge maw i nih le?" Vîn fê-a tiin min melh râm râm a, ami hmuah ka ni tih a hre lo a ni ngei ang.

"Ka bengchhen lohvin car i lock daih sia lawm.." thinrim ka tum tehreng nen ṭhatê-in ka chhâng teh tlat!

"I chuanna tur i hai a ni ang, Taxi a nih loh hi.." tih pahin a ṭhu ṭha sauhva, ka bungrua car pawnlama ka dah chu a melh zui daih nia!

"Ka hai lo tlat, ka bungrua hi i dah lût dawn nge tihian kan awm reng dâwn?"

"Mi mâwl ka ni lo a nia, ka mi nghah ala rawn thleng lo, i duh chuan kan pu lo thlen hunah nangmah ngeiin bia la, chuan ve i dîl dâwn nia.." ala ti tak deuh deuhva, a hmêl ngun taka ka en chuan ka hmuh hnu a ni lo tih ka hre mai. Thawk thar a nih loh pawhin 'Oil' chahtute zinga mi a ni ngei ang.

"In pu te chu motor dangin an hruai daih tawh a, keimah zâwk chuang tura tih ka ni.." ka tih chuan awih loh hmel fê hian a ner nâng a, chutah, "Lo chuang ta poh che; mahse, dâwt i sawi vaih chuan i châk lovang," tiin car aṭang chuan a chhuak a, a hnunglam kawngkhar hawngin ka bungrua min dah luhsak ta a.

A Kamis hâk hmalama a hming inbel ka hmuh chuan ka nui suk a, 'Zomuankimi' hrilh hranpa ka ngai miah lo.

Car chhunga ka ṭhut luh hnu-ah hnehsawh zeta steering vuanin min tlân chhuahpui ta a. Min biak lûmlâm a tum hmel loh khawp mai! Biak ka tum bik dêr lo.

Kawng chhe deuh laiah pawh a tlân dîm tehchiam lova kan insawh leh nawk zel maw le!

"Kan office-ah i tlang hmasa dâwn nge, i chênna hmunah ka dah dâwn che?" Min en chuang miah lova tiin kawng lam chauh a en ngar a, a sam dum sei angreng tak chu hraw pui pui hian a phiar a, tarmit a vuah ta bawk nen a landan a dang hlauh!

"Kan khuaah ka hâw tlang dâwn," ka tisup a.

"In khua a thlahtu tur che ka ni lo a nia, ka hna chu Airport aṭanga hruai chauh che khâ a ni mai." Ti hmakin min rawn en zauh a, a âwka chhuak reng reng a felfai thlarh a, ala upa tehchiamin ka ring lo.

"In office-ah kan lût hmasa dâwn nia, chuta ṭang chuan i hnâ tur i hriatchian ka ring." Ka ti ve hmiah.

Kei hi Lalfakhlua ka ni a, Delhi Hyundai Service Center-a training chhuak chauh ka ni a, ka tân hna zawn buai ngai lovin Mizoramah ka hnâ tur a awmsa diam tawh a ni. Kan khua (Ka pa hnathawhna) ah ka nu leh pa an la awm avangin Aizawla châm khawmuan ka tum lo va, arang thei ang bera haw phawt hi ka ruahman dan chu a nia, ka pa an transfer mai tawh dâwn avangin ka tel lo chuan an tân thiltih a buaithlâk deuh atin ni.

Ka nu leh pa fa neihchhun ka ni a, unau pianpui ka nei lo erawh ka vûi ru viau ṭhin khâ a nia, ka nu fa bîk Zorinpuii kan hnêna a awm lai kha chuan nuam ka ti ve ṭhin; mahse, tunah chuan Account &Treasury Lungleiah a thawk tawh a, kan inhmu ngai meuh lo, pasal neiin fanu pakhat a nei tawh a, remchangah ka la tlawh ve ang chu.

Ka pa hnathawhna hmunah hian kum ruk lai kan awm tawh a, Delhi-ah M.Com ka zir chhuah hnu-in Hyundai motor company hnuaiah training kum hnih zet ka nei leh a, ka hâw khât angreng viau! Sawrkâr hnathawh tur avâng tawh si a, thiamthil eng emaw tal neih ka duh vângin Mechanic line thlengin ka zir tel bawk a, ka nu leh pa hahdam taka enkawl thei tura rilru puitling put a ngai miau alawm.

Zû erawh in zeuh zeuh ka chîng a, ruih chhiat châng ka nei fo! Mahse, ka nu leh pa hmuh phâkah ka in ngai meuh lo.

Ka driver Zomuankimi chu a ṭawng mawh hlê a, kan hnathawhna angah hian hmeichhe tân hmun a awm lo tih theih deuhthaw a ni a, henu hi engtin nge a lo awm ve ngawt dan hriat phâk pawh va ni suh!

Bâwngkawn kan thlen chuan 'CK Hyundai' tih intâr kulhna hmun min panpui nghâl a, "I hming pawh ka hre mang si lo va, kan pu hruai lo va nangmah ka phur ta daih che hi min hauh loh hrâm ka beisei.." ti sapin, parking area-ah a tlân lûta a vawikhatna a ni lo tih ka hre ve mai.

"Lungngai suh, ka hriat sual loh chuan kan khua thlengin ka driver-ah i ṭan duh hmel.." Car kawngkhar hawngin ka chhuak zui nghal a, min chhânna pawh ka hre fumfe tawh lo.

"Ka bungrua khâ lachhuak duh suh aw.." tiin ka au zui hrâm a, a lo la chhuak fel diam tawh nia! Ka thusawi hre hmêl a pu lova car nghêngin a ding âwn deuh ṭai a, min zui lût lo hlauh.

A chhawng chung zawkah ka chho tlang nghal a, min hrechiang tur vak an awm loh vang a nia, a chhan chu Delhi lamah ka awm tam zâwk a, ka hming hre mah se ka hmêl erawh an hre vakin ka ring lo.

"Fk, i lo thleng dêr elaw?" Kan pu-in min lo be nghâl a.

"Sir, eng ati nge hmeichhiain min lo hruai a?" Ka zawhna avang chuan a nui huk a, "Zomuankimi i sawina a nih hmêl, midangho khawpâwnah kan tîr chhuak vek a, ani chiah khâ tirh tur awmchhun a nih vâng a nia, i ngaina mang nange?"

"Ngainat loh pawh a awm chuang lo, mak ka ti deuh mai a nia!"

"Tikhân in khuaah chuan tlang ula, kâr hnih hnuah i rawn zawm mai dawn nia," tiin intercom a hmet zui zat a, coffee min chahsak ta a.

"Zomuankimi hi ka hruai zêl dâwn tihna em ni?"

"Hruai mai rawh, a nghet tura kan lâk a ni lova, i hnuaiah training nei nghal rawh se, Engine oil kan chah hmâ chuan hetah hnâ a nei chuang lova i duh dânin i lo kaihruai mai dâwn nia, englo! In inah thleng mai se a pawi angem?" Ati leh a.

Hna thil a nih chuan a pawina em em tur ka hre lova, hmeichhia berkher han hruai hâwn chu ka hreh ru deuh! Mahse, training pêk ngai a nih chuan tihdan a awm turah ka ngai.

"Eng mah harsatna a awm pawh ka hre lo, mipa hruai ai chuan azia deuh mahna.." ka ti ve ta a.

Kan pu room aṭanga ka chhuah hnu chuan Car thleng thar list ka lakhawm zuai zuai a, tuna ka thawhnaah hian Asst Manager ka ni tih kan sawilang law law ang e.

Company hnuaia hnathawh hi ka tum ber a ni a, chumi tura training ṭha leh ngat khâ ka nia, a thiam pawh ka thiam narawh e. India rama a ṭha thlan Top 10-a lang pha ve ngat ka nia.

Hmeichhia thawktu an awm tam lo khawp mai, Zomuankimi hi eng titiha awm ve ngawt nge tih ka la ngaihtuah reng a, kan pu te chhung leh khat a ni nge ni lo pawh ka hrechuang hlei lova, kawngtluana min phurtu atân chuan ka iai ru deuh!

Car hûnna ka thlenin a lo la ding reng a, company form kamis pâwldâng leh kekawr dum a inbel tawp a, a sâng angreng phian! Tarmit power tam hmel zet a bun a, hmeichhe intuai hleuh hleuh chû a nih loh hmel viau!

"Kan khua thleng i kal dâwn tih i hria ang chu maw!?" A kiangah dingin ngun zet hian ka en a.

"In khaw awmna te sawi ve la, engtik thleng nge kan awm ang?"

"Kârhnih hnuah ka hnâ ka zawm dâwn a, chumi hma chuan training pêk i ni ang, kan inah, ka kiangah tihna a nih chu.." ka ti deuh salh a.

'Ka duh lo' tia min chhân ka beisei vâng a ni.

"A ṭhat chu, thiam bel hman turin theihtawp ka chhuah dâwn nia," ati awlsam êt nia!

"Thawmhnaw lampangte lâk ngai i nei em? I chênna hmuna pênkawi i duh chuan.."

"Aih, chutiang eng mah tihtur ka nei lo, ka mamawh tur chu car-ah hian a awm.." atih chuan mak ka tiru viau a, eng hmeichhia nge maw a nih le!?

"Anih chuan kal ang le.." front seat-ah ka ṭhu nghâl a, ani driver seat-ah a ṭhu thung.

Aizawl kan chhuahsanin tlailam dâr thum ari tawh a, Sialsûkah chaw ei a ngai dâwn a, ka hmeichhe hruai hi eng ang mize pû nge tih ka hriat ngei a ṭûl a ni.

Thawmhnaw hâkthlâk mamawh lo khawpa inla 'pa' nge a nih a, a landan phêna hmeichhe ṭenghneng tak tihte pawh hriat a châkawm alawm le.

A lo berah kum 26 atling tawhin ka ring a, mi khuaa kârhnih zet châm thei tur chu hmeichhe tlahlang a ni ngei ang, bâkah hna thil mah ni se a hman uchuak mah mah! Farnu nei ve ta ila hetianga zin kawi mai mai ka phal dâwn teuh lo. Zomuankimi hian chhungte a nei lo nge ni anga hriat pawh ka hriat si loh!

"Engtin nge ka koh dâwn che? 'Sir' tiin em ni ang?" Aizawl kan pêlh hnu fê-ah a rawn ṭawng ve teh tlat a!

"Hnathawhna hmunah chuan 'Sir' tia koh tur ka ni a, ka hming erawh Lalfakhlua a ni." Ka ti deuh kher.

"Ok, 'Mk tiin emaw Mamuan' ti pawhin min ko thei ang chu," ati ve sap a. Rinai tak chuan a polite phian!

"Kan hnenah i awm rih angai dawn a, motor parts list zawng zawng i vawn vek angai a nia, he hna hi i thawk duh tak taka hlawhtlin i tum a nih chuan taima hlê ang che." Ka tih chuan a bu nghat a, motor khalh thiam tak a ni ngei ang, driver tam tak aiin a confi daih zâwk!

A mimal nun zawh chian châkna rilru ka pu deuh thut nia!

"Engvanga he hna hi thawk nge i nih, hmeichhe dang thawk ve an awm lo tih i hre lo nge?"

"Hmeichhe dang thawh ang apiang thawh vek tur, tih a awm chuang em ni?" Tia min chhân chuan ka run angreng.

"A ṭha e, i hna a nia sawisel sak che ka tum lo, mipa kianga hmeichhe awmchhun i ni bawk a, i fimkhur hlê loh chuan a hun hmâin i form kamis khâ i tâwt mai ang, tunah body fit i inbel a, nakin lawkah a hma puar i mamawh palh ange.." ngeiawm lam lek lek a ka ṭawng chu engah mah ngai lo tih hriat zet hian a hmui a kum phât a, chutah, "Ka nunah inrawlh tum suh, i driver ka nih ang hian hmeichhe menin meng lo la, a ṭha a ni mai," zuk ti hmak a!

"Hmeichhe menin ka meng lova, hmeichhe bulah ka ṭhu zâwk a nih hi.."

"Ka bula i ṭhut duh loh chuan a hnung seat a âwl duai a nia, kan hotute chu nuamsa deuhvin chuang se tih hi kan duh dan a nia," tiin a nui sak a. A ṭawngkam hman uchuak hauh si lo; mahse, mi tâi ru rân chu ka man thiam ve reng.

"In hotute i duhsak awm hle mai, nge duhsak zâwng deuh te i nei zâwk?" Ka tilui leh ngat a.

"Mihringte chuan duhsak zâwng kan nei ṭheuh alawm, mihring i ni ve tho sia, nangpawhin i nei ve ngei ang chu," tih pahin eng emawni a hmawm pah zauh a, a kuttin fai ṭhah leh var sar chuan ka mit ala angreng.

"I ṭawngtheih phian dâwn hi, Showroom-a ṭhu tur atân ka hual che.."

"A va lawmawm dâwn ve; mahse, ka thawk reng dâwn hleinem reilote chhûng atâna lâk ka nia.." ngaihtuah mûk hmêl takin a chal a chuar nâng a, ka phone a rawn rîk tâkah chuan chhâng tawh lovin chulam chu ka ngaihven san ta a.

Ka pa'n min lo call leh ta.

Ka thlen chin leh eng hunah nge kan thlen theih ang tih min rawn zâwt a, zinglam dâr thum velah a ni ang tih leh min lo nghâk lo tura ka hrilh hnu-ah phone ka dah ta a. An fa neihchhun ka nih vâng hian min ngaihtuah em em a, nupui nei tura min nawr châng lah a tam, 'keimah ka inchâwm theih hma chuan nupui neih ka tum rih lo' tiin ka chhâng mai ṭhin.

"Sir, nupui i nei tawh em?" Zomuankimi min zawhna avang chuan ka phu deuh zawk a.

"Eng atân nge i tih a?"

"Eng atân vak mah, in inah ka thlen ve chuan innu-in min lo melh rum vak ang tih ka hlau deuh," a nui zui hak hak a.

"An lo melh rum ta che a nih leh a tihdan i dap ve mai dâwn nia, pasal i nei tawh zâwk em?" Ka zâwt lêt hlauh a.

"Nei teh nâng, ka hmu zo lo.." ati tâwi tak a.

"I duhtui lutuk a ni ang.."

"Duhtui ve ang chu.." ati ṭha leh mai a, hmêlchhe zawk zawk chu a ni lem lo. Amahah hian hmeichhê chhinchhiahna alang tlêm ve êm a ni! A âwmbâwr a kawh ṭha viau a, a hmaiah make-up hmuh tur a awm bawk si lo! Nû hnêp ang chi khâ a ni lo ve hrim hrim a, bâkah form ala inbel ṭut a, tarmit chhah lutuk nen phei chuan a ngaihzawn awm hlawl loh.

Hna chungchang leh thildang dang kan sawi kâi a, a thluak a ṭhat hmel khawp mai. Mahse, ka hnuaia thawk a nih ang ngeiin biak dan chintâwk erawh ka neih a ṭûl.

Sialsûkah chaw ei turin kan ding ta a, zân dâr sarih a ri tawh a, Zomuankimi pawh a pawr fap mai! Kei erawh ka harh tulh tulh a, mahni In lam pan tur ka ni tawh bawk nen ka phûr sarh thei nia!

Chaw kan ei chhungin a ṭawng mang lova a ei tam lo kher mai!

"Khatiang zât lek i ei chuan i chak ṭha dâwn miah lo a nia, kan hnâ hi 'out going' a tam a in thawkrim viau dawn a nia, workshop lamah phei chuan chawlh a awm miah lo tih theih a ni." Ka tih chuan, "Workshop lamah ka awm ve angai dâwn em ni?" Ati sap a.

"Ngai ang, office-ah chuan a thiamsa deuh chauh an ṭhu ṭhin a, engkim i thiam vek hunah ila ṭhu ve mahna.."

"Thiam vek ka tum chu a nia.."

"A ṭhat chu," a bâk kan inbe leh tawh lo. Chaw ei man pêksak ka tum pawhin a duh miah lo va, min hnar fithla ṭhak!

Amah bawkin car-a khalh leh ta a, Sialsûk kan pelh hnu lawkah, "Sir, ka pum a nuam tlat lo, reilote kan ding lawk thei angem?" Inthlahrun hmêl takin min rawn en a.

Ding tura ka hrilh rualin a ding chat a, ka biak leh hma hmain car aṭang chuan a chhuk zui nghâl a.

Kawngsirah a ṭhu sawp niaiha a luak zui bawrh bawrh tih a thâwm aṭang chuan ka hre mai!

"Hey, Mk..Mamuan..i ṭha em?" Tui bottle nen a bulah ka ṭhu hniam a, zuk luak ngat ngat a!

A luak zo ta a ni ang, tui chu rawn banin a hmai a phih nawk nawk a, "A zia lo hle mai.." ati sap a.

"Châwl hahdam rawh, hmanhmawhna chhan tur a awm hleinem," tia kaihthawh ka tum chuan a duh lo a, amaha rawn ding chhuakin a pai zui nawk a, a duh emaw duh lo pawh nise min nghêng nghâl rawk rawk a, nghet zetin ka lo vuan thung.

"Ka pum...." a zawi nghal vek a, vuan nghet hlê lo ila chuan lei chârah a tlu ṭhuaiin ka ring.

"Mamuan, Zomuan..Zomuankim.." ko pahin ka sâwi sateh nâa a meng tawh lo reng reng!

Engtin nge ka tih dâwn? Ṭawngṭai dâwn lahin chham mai tur ka hre teuh lo mai! Â..min va han tibuai tak!

Hmanhmawh lutukin car-ah ka pawm lût a, Thenzâwl damdawi in thlen nân 30Km chuang tlân ala ngai bawk si. A tui in bâng la awmchhun chuan a chhîp aṭangin ka'n leih teh ngawt a, a bâk tihngaihna hlawl ka hre lo.

A kawr a huh vek a, zawitê tê-a athaw rî bâk hriat tur a awm lo. Kei Lalfakhlua hi doctor ka nih loh avang leh hmeichhe pakhat nen chauhva zinkawng ka zawh vâng hian ka inchhîr rum rum nia! Eng emaw lo tâwk palh ila ka hmingchhiat dan tur leh mualpho dan tur thlengin ka chhût kim hman dap maw le!

A rawn rûm chhuak dat a, car hnung seat-ah ṭhuin ka malchungah a lû ka nghat a, phone hmang tur pawhin a ngaihna hlawl a awm lo, eng signal mah awm miau hek lo le! Khaw kârkawng thim leh reh ruihah Zomuankimi vawiina ka tawn chawp chauh nen kan awm dun ta chu a nia.

Mumang chhe ber dawttu mang ang mai ka ni. Lirthei rawn tlân chhun lah chuan min ûksâk dêr lo va, a chhan pawh mipa leh hmeichhia hmun reh lai taka awm dun te chu ngaih dan chin an nei zel nihmiang, min tlânpêl ang fua fua a, ṭhenkhat erawhin min enchîk deuh a, car chhung ka ti êng vek bawk si nen ka biak hmâin min liamsan zêl!

Minute eng emaw zât ngawirengin ka awm a, a khât tâwkin ka ko leh zauh zêl a, a hnungah hian muttîrin ka tlânpui mai dâwn em ni ang? Â chuzawng thil tihchi ninghal lo chuan..

"Zomuan, i harh em?" A rawn rûm leh dat zêl a, a chal a sa vur tih ka hriat chuan a khua asik tih hrilh ngai lo vin ka hre ve mai. Dimtê-a a lû dah thlain a kamis hâk ka phelh sak ta a, thawmhnaw huh inbel reng chi pawh a ni lo.

Car hnunga ka Bag chu hawngin ka shirt pakhat leh Muffler ka phawrh chhuak ta a, thawmhnaw lum lam eng mah ka keng bawk si lo, Towel ka phawrh tel nghâl bawk a, a thawmhnaw inthlahrung ru taka ka phelhsak lai chuan ka lungphû a rang sauh thei nia!

Bra dum pan lam deuh a hâ a, chupawh a huh tel tho avangin ka phelh sak ta law law a, a vun ngo phiai leh a hnute kawh lah chu ka rin phâk bâkin zuk nalh a! Hmeichhe hnutê ka hmuh tawhah chuan a mawi ber hialin ka ring.

Ka thil ngaihtuah mai mai chu a! Rang zetin ka shirt ka hâktir nghâl a, amah a zawi vek bawk si nen thil awl âi a ni hauh lo. A thawmhnaw ka thlâk fel ta bawk a, ka thâwl huai mai.

"Ka pum a nâ.." zawitê hian arawn ti sap a, a pumah ka kut nghatin zawi tê tê hian ka chûlsak ta a, ka car a nih loh avangin first aid box-ah nachhawkna eng mah hmuh tur a awm lo a, bandage leh Dettol, etc..kan mamawh loh hlir a awm.

"I zia deuh em?" Kûn hniamin a beng bulah ka zâwt sup a, fiah vak lo hian a rawn meng chhuak riai riai a, ka va'n lawm tak.

"I harh tiraw?"

"Umn.."

"Nâ ila nei em? I khawi lai nge nâ?" Tia ka zawh leh chuan ṭhutchhuah tumin a rawn che chhuak ta a, ka lo pui vat thung.

"Sir, engtin nge ka awm a?" A rawn ti heu mai le!

A awm dan vêl ka hrilh chuan a inthlahrun hmel hle a, eng mah phei chu a sawi lo. Chutah, "Ka zia tawh e, kan kal leh tawh dâwn em ni ang?" Ati sap a.

"Tikhân lo ṭhu rawh, keiman ka'n khalh ve tawh ang e," tiin driver seat-ah ka insawn san ta a. A thawmhnaw lam a la sawi ri miah lo va, ngawireng hian ka chezia min en reng tih 'front mirror' aṭangin ka hmu reng tho.

Kan tlânchhuah leh hnu reifê chhung chu a maimitchhing char char a, a hmui a pet leh deuh fan fan ṭhin; mahse, thidang khawpa a awm leh a nih loh chuan chawlhpui ka tum lo a, Thenzawl thlenpui thuai thuaia damdawi ei a mamawh ber.

"Ka kawr hi..?" A rawn ti ta hliai a, chhân pawh ka chhâng lo.

"Hey, ka thawmhnaw hi engtizia nge?" A aia ringa a rawn tih leh tâkah chuan hnunglam ka hawi zauh a, ka kawr a inbel chu maktih hmêl zet hian a pawt a pawt a, ka nuih aza deuh.

"I hmuh ang khân ka thlâksak che maw le.."

"Nang, nang pa hi..."

"Nang pa ni lo vin, 'Sir' tih tur aw.." ka sawi zo hman chiah ka lû ah min rawn kuk fawk nia!

"Hey, nangmah anga thidang hman ka ni lo tih hre rawh.." ka ti nghut a.

"I lo thidang ta a nih chuan Aizawlah ka lêtsan ang che.." ti ve hmakin pâwnlam a thlîr daih a, a harh loh hlauva ka buai tehreng nen min la kuk ngam a nia.

"Ka thawmhnaw i lo phelh ve ngawt nachhan tur ka hre lo," a rawn ti ṭha leh a.

"Phelh lo ila chuan khawsik tlun hluah hluah chungin i la awm ang chu maw le, ka phelhsak peih che khâ lawm hlê zawk mai teh,"

"A mak lutuk ka lawm miah lo," ati leh tlat a, nichina a pumna hmel ang kha hmuh tur awm tawh lovin a ngêng leh ngalh tawh.

"Ka phelhsak lai che khân ka maimitchhing ka tih chuan dâwt ka sawi tihna, i engkim ka hmu vek," ka ti lui ve ngat a, a ngawi nghâl hmiah.

Nie, ka hmu vek rêng alawm, inchei parh hûrh lo mah se taksa nalh tak a nei tih ka hmu-in ka hria a, inla 'pa' bawn buru pawh ni se emaw inla nú zêm lo pawh nise a taksa erawh hmeichhia dik tak a ni.

Hmeichhiaah pawh a nalh fâl nalh ang chu le!

"Pu Lalfakhlu, i hnuaia hnathawk ni mah ila i duh duha ka thawmhnaw i lo phelh ngawtna chhan tur a awm lo a nia, motor khalha zân thilthu-a ka zui che avang hian min zuam ngawt suh, a chhan chu tuna i thiltih hi ka pawmzam mai mai lovang.." ati ta hmak a.

"Zomuankim, ka zuam vâng che ni lovin i kawr a huh avang leh khawsika i awm vângin i thawmhnaw khâ ka phelh mai a ni! Ka hnuaia thawk i ni a, ka ruala zin i ni bawk tih theihnghilh reng reng suh, i inbel duh lo a nih chuan tunah khân hlîp vek rawh; ka kawr kha mihrang daih hâktir ka phal bik awzawng lo.." Ka ti ve hmiah.

Maktih hmel deuhva min en hnuah, a kawr huh car seat hnunga ka dah chu la-in ka thawmhnaw a inbel chu a hlîp ta a!

"Ka ta chauh inbel tura zirtir ka ni," ti sapin ka hmuh lai ngei chuan a inthlâk ta a, hmeichhe mak tak a ni ngei e.

Kan company-a arawn thawh ve ngawt dan te leh zinkawng thui tak zawh tura hmeichhe dangte tih ve ngai miah loh thil ati vek te hi thil dangdai tak chu a ni sa hrim hrim!

Eng hmeichhia nge a nih hrechiang turin ka hnenah kârhnih a awm dâwn alawm, chîk leh uluk zâwka a chanchin chhui chian tumna ka nei rilru ta a.

Zomuankimi hrechiang tur hian hun rei ka mamawh hauh lovang..

Tûn maia a awmdan te kha thil nihphung a ni thei dâwn em ni? Natna khirh zet te hi a lo vei ru zâwk nge ni ang!?

Ngaihventu leh ngaihsaktu awm lo ang maia hetia a awm hi ka ngaih tiṭha lo tu a ni. Phone vawikhat mah ala hmang lo mai ni lovin tumah rawn betu pawh an awm lo.

Hmeichhia a ni a, nula a ni bawk a, chhungte tân ngaihtuah a nat dâwn teh lul nen..!

Ngun zâwkin ka la chhuichhuak vek ang maw le..

B<++++[BeckirafARenthleI]++++>RR

SEGUNDO|BRR

Becky Rafa Renthlei

Chapter-2

Lalfakhlua

Thenzawl kan thlenin zân dâr10 ari tawh a, Sialsûk leh Thenzawl inkârah vawikhat tê mah Zomuankimi nen kan inbe leh tawh lo! A hnung seat-ah a ṭhu ngawi ngal a, dik tak chuan amah ka hmuh dan sawi fak tur hre si lo hian engtin emaw tak mi hîpna riau zuk nei tlat a!

Ka tum loh deuh hian hnunglam ka hawi leh zuk zuk zêl a, ani lah chu ka awm ve tih hre lo ang hmiah hian a maimitchhing daih lehnghal! A uniform huh khâ a inbel leh thlap tawh a, car hnung ka hawn khân zin bag têreuhtê pakhat chu ka hmu tlatin ka hria, eng thawmhnaw mah a leng tawp nâng.

"Zomuan, i muhil em ni?" Car tidingin Thenzawl damdawi dawrah a mamawh lam sak ka tum deuh a.

"Harh e, eng nge ni ta Sir?"

"Nachhawkna ei theih loh emaw huat zâwng i nei em?"

"Eng mah a ngai lo a nia, kan chaw ei vâng kha a ni ang, ka pum ngeih loh zawng ka ei palh a nih ka ring," tia ṭhu ṭha-in rawn chhuk a tum lêm hlei lo va, "Inthlahrung duh suh, ka hnuaia thawkte ngaihsak lo khawpa mipa nikhua lo ka ni hleinem," tih pahin damdawi dawrah ka luhsan ta a, luak danna leh nachhâwkna 'strip' khat ve ve leiin ka lêt leh ta a.

Nula hawiher zau tak a nih ka ring ve ngawt a, kei ai chuan ala naupang fê zawk bawkin ka ring.

M.Com ka zir chhuah hnu-ah kum hnih tehmeuh Hyundai-ah ka thawk a, khawvel a changkan ang zelin lirthei chhuak thar a tam zel bawk nen kan pu-in a thachhang dâwl thei khawpa min rin avangin Delhi lamah ka liamthla ta khâ a nia. Ka hlawh pawh a tlêm chhe hauh lo va, 'out going charge' ka nei ve bawk a, 'tlangval hausa' tia sawi tur ni lo mah ila ka mamawh erawh ka intum zar zar thung.

Aizawla kan inpui pawh ka nî fanu in a enkawl a, ka nu leh pa an phei zauh zauh ṭhin, nula lamah erawh ka tla na ve phian a! Zirsangliana ka ṭhian ṭha ber ka engkim ni ṭhin, ka ruih chhiat châng pawha min hliahkhuh tlattu-in nupui a neih meuh chuan tlangval nih reng pawh ka châk ta lo!

Aizawlah awmhmun an bêngbel tawh a, Mafeli ṭhiannu Maneihi nen rei vak lo kan inkawp ve khâ a nia, a nungchang dam thlap leh fel lutuk kha phû lo ka intih bâkah Delhi-a chhuk a ngaih leh tâk avangin kan inbe zawm lo tawp, vety lam zawng ka type a ni lo tepawh a ni mahna.

Ngaihzawng nghet ka nei hleithei lo va, a chhan ber pawh awm hmun nghet ka la neih loh vang a ni. Tunah pawh tû hmeichhia mah ka nunah an awm lo va kan pu fanu Ruatdiki hian min beisei deuh tih ka hria; mahse, hmeichhe khawsak sâng firfiak lutuk hi chu ka tei thei hlawl lo.

"Sir, in khua kan thleng dâwn tawh em?" Zomuani'n min biak chuan hnunglam ka hawi leh ta nge nge a.

"Motor khalh laiin hawi sek lo tura zirtir i ni lovem ni?" Nui hak chunga a rawn tih leh tâkah chuan ka nui vei suk a. Henu hian 'Sir, sir' tichung reng hian min control a tum deuh em maw ni!?

"Kan khua thlen nân darkâr khat bâk tlân angai tawh lo a nia, lo ṭhu thla rawh le, pahnih chauh kan chuang a, kan inthurual loh hmel tlat." Tiin kawngsir zau laiah car ka tiding a.

"Hnunglamah mit i nei bîk si lo va ka lo ṭhu thla poh a ni ang chu.." tih pahin a lo insawn ve ta a, nichina thawmhnaw vânga a lungawi lo hmêl khâ hmuh tur a awm tawh lo. Tarmit a vuah râ reng erawh hmuh a ninawm lam hret.

"Zomuankim, nang nen kârhnih chhûng deuhthaw kan inhrawn dâwn a, tuna i ṭawngkam hman ang te kha ka ngainat zawng a ni miah lo a nia," ka ti deuh hmuk a.

"Chuti maia thlâk theih ni bîk hek suh, nang pawh ka boss i ni tak nâ a ka nêl em em bik lo che," ala ti hrâm nia!

"Ka nu leh pa'n zawhna an zâwt che a nih chuan mawi hnai takin i chhâng dâwn nia, tuna i ṭawngkam kha fek fek ang hi chu an ngaina bîk kherin ka ring lo."

"Aw le, sir, no hliâk hliâka ṭawng ka thiam lo a; mahse, i nu leh pa lungawina tur khawp erawh chhâk chhuah ka lo tum dâwn nia.." dam thlapin ati ang lawi a!

"Chhungte i la nei em?" Ka tum loh deuhvin ka'n zawh chu le!

"Nei ve e.."

"Tunah khaw'nge an awm a..?"

"En teh, ka mimal nun lam sawi kai ka peih lo, Zomuankimi ka ni mai," ati hmak a, 'min zah lo' ti ngawt dâwn ila a ni chiah mang si lo va ka ngawi zui ta rauh rauh a.

Kan khua kan thleng ta hlawl mai le! Kan in luah Assam type lian angreng tak chu a êng kulh a, min lo la nghâk tihna a ni ngei ang!

"Bawiha, i va tlâi angreng ve?" Ka nu'n a lo ti nghâl var a, ka hnunga Zomuani rawn kal ve chu a hmu chawpchilh nge, a mengphar nasâ!

"Hei, khawilam khual nge a..?" Ati zui zat a.

"Ka lo hâwn ve ṭhuai, nupui nei turin min duh bawk a, ka rawn hruai haw ta mai," ka nui duh miah lo va ka pa leh kan nula an hawi phâwk ngang mai.

"Lalfakhlu, thil awihawm deuh sawi ta che maw le, lo lût rawh Nubawih," ka nu nge nge a polite ṭhin a nia. Zomuankimi pawh 'Nubawih' a'n ti ngei ah!

"Eng nge maw i awih loh ngawt le, ka rawn hruai hâwng ve tawp a nih hi, Zomuankimi a nia, Mamuan..â in duh danin ko hmiah r'u," ka tih chuan ka pa a nui vur vur a, chutah, "Dâwt i sawi thiam lo em mai, Hyundai badge a kawr hmâa inbel kha ka hmuh hmaih miah lo a nia,"

Zomuankimi erawh a ngawi reng a, ka nu leh pa nen inhmelhriattîrna ka neih zawh hnu-ah a room tur an kawh hmuh a, a damsam loh thu thlengin ka nu ka hrilh tlang nghâl vek a, kan nula Siami'n chaw ei min siamsak a tum chuan 'Kan ei tawh' ka ti liam puat a, thingpui ka duh thu ka hrilh zui nghal a.

"Bawiha, nupui i rawn nei tak tak emaw ka lo ti hman a nia," ka nu'n atih chuan ka nuih a za hlê a, kum 30 ka chuang ve tawh a, ka naupang chhe zawk zawk tawh miah lo.

"Kan la nei ve ang chû, i hmanhmawh lutuk a nih kha.."

"Ti khân iti zel a, i pa nen tu hmêl hmuh hlân kan nghâkhlel ve asin,"

Siami leh Zomuani an mu tawh a, khua avâr titih tawh bawk nen kan chhungkaw bilin kan meng tlang ta law law a, Zomuani chungchâng min sawipui ngial an tum nâ a, anni aia ka hriat tam bikna a awm miau loh avangin thildang ka sawipui lui zel thung.

"Zirsanga te chhungkua nen in inbe ngai em?" Ka pa'n min zawh chuan, "Be ṭhin e, eng ati nge?"

"Mafeli'n nau a pâi leh a, kâr hmasa khân Lunglei aṭangin an rawn chho a min lo tlawh kawi a, a puar lian angreng tawh khawp mai," ati leh a.

Ni e, Zirsanga te nupa ang hian awm ve dâwn ila chuan nupui ka nei peih reng. Mafeli ang hmeichhia ka tawn ve hunah ka la nei ang chu.

Rafaela thlalâk ka phone-ah eng emaw zât ka kawl a, a duhawmin a hmelṭha hle bawk, Aizawla ka lêt leh hunah tlawh ngei ka tum ruh hlê a, a pa ṭhianpa Lalfaka khâ ka ni tlat a, an inneih ni te kha nuam ka ti teh a nia, Maneihi nen min sawirem zîktluak ta lo erawh an lawm lo nupa khawp mai. Mahse, mihring inkawp awm mi an awm miau alawm.

Exer la tura ka chhuah dawn chuan Zomuani hruai ve ka rilrûk ta a, mikhual room hran kan neih ve pawh kan nula-in a hmang daih si a, ka room ka kian ta kha a nia, ṭhutthlengah ka mu tawh mai ang.

"Hey, tho rawh le, exer kan la dawn nia.." Blanket-in a inkhuh vek a, ka khuma nula mu hmasa ber a ni.

"Ka peih lo.." a puansin keuvin a rawn meng a, kan inmelh hnai ngei mai.

"Peih loh a sawi theih loh, nâ i nei a nih loh chuan min lo zui rawh," ka ti nghut a.

"Naa, Sir, ka chau asin.."

"Sir thupêk chu exer lâk, le, tho phawt rawh lem.." tiin a puansin ka pawt hlim rawk a, Hus! Underpant leh Bra nen chiah a lo mu chu niin!

"Lakfakhlu, ih..i zak lo lutuk.." a biang a sen ṭâwn ṭâwn a, a mit a khap fak fak bawk, kei lah chuan 'Sin ṭhattir' tum ta lo chuan ka din ngaiin ka ding reng a, ka hamhaih ve êm a ni. Ka hming puma min kohna pawh ka sawisel bîk lo.

"I mâwl a mi? Khawi?" Tih pahin ka Blanket ken lai min rawn phihthlâksak a, a thinrim hmel kher mai.

"Tihpalh, inthlâk la chokaah ka lo nghâk ang che.." rang zetin ka chhuak ta a.

Kei hi ka dik miah lo!

Zomuankimi taksa invuah dik thlap leh a sam dum sei angreng tak lukhama inchap darh niaih te, a bawp sei leh mâm hmel zet te kha ka mitthlaah a rawn lang nghal zut zut a, zingkâr kârah ka ri phat mai dâwn alawm le.

Hmeichhe pahnih chu ka chêtsualpui ve tawh a; mahse, ka nunah engteh ual an ni lo. Û huh! Thil hlui pui pui ngaihtuah chhuah ai chuan tui in nghek ila ka ziapui mahna..

"Ka inpeih e," Jump suit dum inbel thlapa Zomuani rawn kal chu ka en reng a, Tarmit vuah lo hian a hmelṭha daih zawk! Make-up a hmang miah lo tih a hmai fai sar aṭang chuan ka hre thei mai, a hnar a têreuh hlê a, a kim ve biai lawi si.

"Workshop-a thawh dâwn vânga exer lâk chu leh.." a sawi zo chiah, "Awi! Ka nu.." tih pahin chhuata ka pa ṭhutphah hniam dah a pal a, min rawn su sawk nia! Ka taksa bet thlapin ka lo kuah chaih a, a lungphû rang ta zaih zaih pawh ka hre pha reng.

"I kalna tur en ve la.." tiin ka la kuah reng a, rang lutuka inlahrang pah hian, "Kalna tur en lo an awm ngai em ni?" A chhuak tau nghat a, ka nui suk.

A thinchhe reuh hlê mai. A hnungah ka zui ve nghal a, ka nu nuihza hmêl ka hmuh chuan ka nui ve tawp.

"Min lo nghâk rawh.." ka ṭawng hre lo ang hmiah hian a kal ngauh ngauh a, kan khuaah hian a vawikhat kalna a ni a, kawng chin hre ber ang hrimin zuk awm a!

"Fk, engtikah nge i lo hâw a?" Kan ṭhenawm pa'n min lo biak chuan ka ding leh rih a, kan thlen hun vêl ka hrilh hnu-ah Zomuani ka ûm leh ta a, a lo kal thui fê tawh.

"Ding tawh teh, i kalna lamah khân eng mah hmuh tur a awm lo, field lamah chhuk ang," tiin a bânah ka vawn sak a, a lo ṭang ṭung nia, a mood a fuh lo thlâwt a ni ang min melh no tehchiam lo.

"Vawikhat mah tukin ang khân ka puansin rawn hlîm ringawt tawh suh ang che, ka duh miah lo a nia," ati hmak a.

"Tihpalh tih ka sawi lo em ni?"

"Sawi mah la min hmu vek tho alawm, 'tihpalh' tuktin i rawn tih tho si chuan awmzia a awm hleinem," ati leh a, chhân ngaihna ka hre dêr lo.

"Lokal phawt teh.." ka ti ta ringawt a, eng mah a sawi zui tawh bik lo.

Kan veng field vawithum ka hêl kual pui hnu-ah in lam panin kan inzui chho leh ta a, ka biak chuan a rûl tâwk lek lekin min chhâng a, a tûm bûr reng bawk nen ka awm a nuam lo vek! Tukina ka va kaihthawh dan kha thil mawi pawh va ni suh.

Tûkṭhuan kan ei laiin ka nu'n a be char char a, a chanchin a zâwt chipchiar leh viau!

"Nubawih, unau pianpui i nei em?" Tia a zawh chuan min rawn melh zauh a, ka hre lo der tlat thung.

"Aw, phirpui ka nei a, Lawngtlaiah a awm.." ati sap a, a nu a boral tawh tih a sawi chuan ka phu zawk a, hei vang chiah hi a nih hi a chanchin sawi a duh lo em em! A phirpui leh a pa Lawngtlaiah an awm a nih chuan amahin a awm nge, mî inah a awm zâwk tih pawh ka hriat si loh.

Ka nu leh pa Lungleiah lângin an kal dawn a, ka pa pension thil vel buaipui angaih vâng a nia, chaw eikhamah muangchang lo vin an chhuak ta a, Zomuankimi hi ṭawngtam lo mah se ka nu hian a ngaina riauin ka hria! Ka pa erawhin eng mah a sawi ve lem lo.

"Dârkâr thum chhungin hei hi hriat bel hman tum ang che," Computer aṭanga ka print chhuah 'Motor parts list' chu Zomuani kutah ka pe a, phêk thum khat ṭhap a ni.

"Aw le, Sir," a nui tâwi tak a, huphurh hmel deuh hian zu keu sek a.

"I thiam hman chuan i thluak a ṭha hlê tihna a ni ang, thiam hman loh erawh chuan ka thawmhnaw min nawhsak thung ang,"

"Nâwt lo turin ka zir ngei ang," ati sap a.

"A ṭha alawm, thiam filawr i nih loh chuan kan company-ah i tân hmun a awm lo." Min chhân leh hmâin ka chhuahsan ta a.

Ka room-ah lo chuan inkhung fâlna tur awm hek lo, TV ka en san ta a, ani ka room-ah a awm thung a, Siami'n Washing machine-ah thawmhnaw a su mêk a, 'Zomuani'n sûk tur a nei em?' Tih zâwt tura ka tirh chuan 'Ka su ve thei' tiin a lo chhâng a ni awm e.

Dârkâr khat pawh aliam hma hmain ka phî sek a, va tihbuai êm chu ka hreh ve deuh si! Ka TV en pawh a tui nek lo e a, games ka khêl thûl, thingpui hâng ka lam sek a, Siami pawh a nui tawp.

"I zo dâwn tawh em?" A tâwp a tâwpah ka va pawh ta nge nge a, "Dârkâr thum ala ral lo," tia min rawn chhan chuan ka thinrim hlur tawh.

"Duh tâwk la, thingpui lo in rawh," ka tih leh chuan, "Sir, min ko chhên lo vin i hunbi tuk tal khâ ka'n zir ve ang e.." min chhâng dam thlap a, ka dang dêr.

Hmeichhe tum ruh tak chu a ni ngei ang, nge ka bula a awm peih loh vâng zawk?

Zomuankimi

12:30 Pm

Ka boss thar Lakfakhlua mize mak deuh hi ka ngainat zâwng a ni em em lo. Misual ani tihna ni lo vin kei, mipa ngaina miah lo hian han dawnsawn dân tur ka thiam chhin eih lo.

An chhungkaw boruak zangkhai zet te hian min tihahdam ru riau lawi si a, ka tleirawl laia chhungkaw kima kan awm ve lai min ti ngaiin ka lung a lêng hlê mai, tunah chuan mahni chauhvin ka khawsa ta chu a nia, nun zahawm ka neih ve theih nân theihtâwp chhuahin ka thawhrim a ngai ta.

Kei hi Zomuankimi ka ni a, Lawngtlaia piang leh seilian ka ni a. Ka phirpui Lalmuanpuii nen chauh unau kan ni a, kum nga liamta khân ka nu'n min boralsan tawh a, ka pa nise Chuap TB avangin khum betin a na reng a, ka û Muanpuii nen tunah Lawngtlaiah an khawsa a, ka hlawh tlêmtê ka khâwl ve ngar ngar hi ka pa enkawl nâna ka tih a ni.

Chhungkaw khawsak harsa uchuak kan ni lo va, ka û hlawh pawh a tam ve tawh a; mahse, ka pa enkawlna tur sum a hautak êm avangin an phal lo chung Aizawlah hnathawh tur ka zawng ve ta khâ a nia, hmeichhe tam tak thawh duh loh leh thawh enah pawh an en loh Motor company-ah a nghet lo va lâk ka ni ve hlauh hi vannei ka inti hlê.

Ka û in pasal a chhia a ṭha a hmu ve hlauh a nih chuan a hlawh kan chang dâwn si lo va keimah tal inchâwm thei tura ka ṭan mar angai hle tih ka hre ve khiau a ni. BA ka zo tawh a, a bâk zirzawm ngaihna a awm tâk loh avangin tihian hna zawngin ka tei ve nawk nawk a, tuna ka thawhna hi ka tuipui riau lehnghal a, hmeichhe tân chance a ṭha phian bawk. Kan boss Lalfakhlua hnuaia training ka la thei a nih ngat chuan tûn ai hian hmâ ka sâwn ngeiin ka ring.

Kan tleirawl chhuah aṭanga motor khalh thiam tawh kan ni a, ka pa Car Maruti 800 pawh kan unauvin kan sawp chhe ṭhak thei a nia, hmeichhia mah ni ila kan unau hian mipa tam tak aiin lirthei khalh kan hnehsawh viau! Hyundai-a ka luh theihna chhan pawh motor khalh ka thiam vang leh Computer ka thiam êm vâng a ni a, motor parts erawh chi hrang hrang atam si a, ka hre séng meuh lo.

Ka nunah mipa sawi tur tehchiam an awm lo va ka û nen kan inan êm avangin a bialpa te hian min hai fo khâ a nia, ka in luahah pawh rawn lût nawlh an awm ṭhin. Û police ka nei miau alawm.

Kei aia sâng ṭha leh piannalh zâwk, eng lai pawha police uniform mar et awt inbel áh reng mai Lalmuanpuii hi ka chhuang êm asin, Aizawla min rawn tlawh ṭumin kan bazar dun ve alawm, a hmelhriat ṭhenkhatin min ko sual nawk nawk a, bazar lûn laiah kan nui tak uar uar a, a zia viau lo.

Ka nihna leh ka mimal nun midang hriat ka duh tehchiam loh avangin ka inkharkhip tlat a, ka pa leh ka û bâk ka tâna pawimawh an awm lo bur.

"Zomuan, dârkâr thum aliam tawh a nia," Fakhlua'n min rawn ko leh ta. Ka sana bun lâi ka bih chuan dâwt a sawi lo ve teh tlat!

"Ka lo chhuak dâwn.." tiin paper nen kawngka lam ka pan a, mipa dawhtheihna tlachham tak a ni!

Ka hmuh tirh phat aṭangin ka mit ala nghâl pang a; mahse, mipa hrim hrim lâka inhnamhnawih ka duh loh avangin ka rilru ka thunun mai zâwk a ni.

Sitting room-ah a lo ṭhu kur a, chîk em emin min la en zui a(h..) kan boss chu ni lo se ka vawm fawk duh ang maw le!

"I thiam kim loh chuan thawmhnaw nawh angai dâwn tih i hria maw?" Tiin ṭhutna tur min kawhhmuh a, tawnzau vâr leh Boxer ṭial chiah thawmhnaw inbel a nei, kei ve ka uniform spare bâk thawmhnaw dang ka keng dêr si lo va hrehawm ka ti ru deuh! Mahse, ka chênna hmun hriattir ka duh loh vang a ni pakhat a, chuti lo zawng a lerh hmel ropui si a, min rawn tlawh sek palh ang.

"Zomuankim, ka sawi i hria em?" Ka hmingpuma min koh chuan ka phu zawk a, ka ngaihtuahna ka lo kâwm char char chu niin!

"Yes, Sir.."

"Kan in a i awm chhung hi chuan 'Sir' tiin min ko tawh suh, ka hming i hriat kha," ati sup a.

"Yes, Sir.." ka sawi zo hman chiah a pen ken lai chuan ka chalah min vaw keuh a, ka va ngei mai mai tak.

"Nikhatna aṭangin thusawi i ngaihsak lo a nia, eng Manager hna mah i kâi pha lovang," ngeiawm zeta tiin a ṭhen sak a, melh rum ka châk kher mai; mahse, ka boss a ni tlat sia ka insûm leh ta zâwk a.

"Manager ka ni ang pawh ka tih si loh.."

"Ṭawng lo khân ka zawhna min chhâng ang che.." ati nghut a.

"Maw! Ṭawng lovin i zawhna ka chhâng ang maw!?" Ka tih chuan rum zet hian min melh a, "Mark 20 tal i hmuh phâk loh chuan training ka pe lovang che," ti hmukin zawhna min zâwt ṭan ta a.

Motor parts chi hrang hrang a awmna lai leh a hming, a rawng leh a hnuailama invuah zawng zawng min zâwt ta a nih chu. 'Lalpa, ka hriatpawlh vek' chhân theih alawi ka nei ta mang si lova ka chhân ve chhun pawh 'a dik lo' tiin a ner sawk sawk a, ka hah hluah hluah, hriatpawlh a awl êm a ni.

"Zomuankimi zero mark..." Tih pahin a paper ken lai chu ka lamah a rawn vawm pheia a ṭhutna aṭanga tho chhuakin, "Zanin tlâiah i hâwna tur Sumo châng ang che," ati hmiah.

"Sir..."

"Ka hming chu Lalfakhlua a ni, hei hi kan in a ni bawk." Ti leh nghutin pâwnah a chhuak zui daih a, thinrim viau mah ila ka thiam loh a ni tlat si hian ka thin tertek a kaitho lo mai mai a ni.

Keimah Zomuankimi dik tak kha chu e, kawlh fia fia tak mai khâ a nia, kan boss kiangah erawh zia thup angai. Hah! Ka hâw awm lo chiang e, karhnih chhung a hnena awm turin min hrilh tawh a, dârkâr 10 pawh ka la awm tling hleinem maw le.

Ka ṭhutna ngaiah ka ṭhu reng a, ka thiam loh dan em em kha a zahthlâk ngawih ngawih ka ti. Mahse, ka beidawng dâwn lo reng reng, min vawmna paper chu chharin a room lamah ka lût leh ta a, kilkhata an nula Siamtei lo nui ka hmuh leh lek phei chuan ka sa phat phat thei nia!

"Zomuan, insiam la Sumo châng rawh," Fakhlua a rawn lût a, a ṭawngkam chhum hmuk hi 'pa' ka'n tih riau chu le!

"Ka haw dawn lo, zaninah thiam hman vek ka lo tum dâwn nia," ṭha tê-in ka chhâng a, thinrim insûm thei lo khawpa mâwl ka ni lo tlat.

"Ka sawi ang chuan ti mai rawh," ti leh supin ka bânah a rawn vuan a, "I luhna line hi a dik lo, mipa tih ang apiang thiam tum vek hmeichhia ni mah la i kawng a ping mah mah," min pawt thovin amah hnaih fê-in ka ding ta a.

"Vawikhat chiah chance min pe leh la.." a mitah ka en kalh a, a mitmeng dum fiah kâk leh a hnar ngul sâng vah te hi inhmeh thar ta riauva ka hriat chu le!

"Chance vawikhat leh vawikhat fawh, i duh thlang rawh le?" Chiang lutukin min en lêt a, ka zâm rum rum thei nia.

"Aih, ka duh lo..." inlâkhran tumin ka che deuh hrat a.

"A nih chuan, i hâw thei e, chuan man tur i nei lo a nih pawhin ka pe ang che.." min nam sawn paha tiin vawikhat pawh min ennawn tawh lo hian a chhuak leh ta a.

'Chance vawikhat leh Vawikhat fawh' tenawm thlâk lutuk mai! 'Lalfakhlua mi lerh' ka pasal chu nise nikhatah chaw vawikhat chauh ka eitir ang, min fawp duh a maw! Teuh lo, vawikhat fawha lungawi mai mai tur mipa ninghal lo chuan..!

A bâk zel duh tur chi mipa a ni, ka zahawmna chu keimahah hian a awm a, 'Lalpa chungnungber, ka hâwna tur Sumo awmtir lo hrâm rawh' tia ka ṭawngṭai ngei angai dâwn e.

B<++++[BeckirafARenthleI]++++>RR

SEGUNDO|BRR

Becky Rafa Renthlei

Chapter-3

Zomuankimi

Thawmhnaw hâkthlâk engteh chiam mah ka neih loh avangin ka bag tereuhtê pawh chuan luahkhattu a nei lo va! Fakhlua thusawi zawm tumna ka nei miah lo, Sumo-a chuang tur anga ka indah chhin ringawt pawhin ka luak a chhuak ut ut thei nia!

Insiam áwm ang takin room-ah ka tawm ngar ngar a, chawhnu dâr hnih a rîk pawh chuan eng mah ei lo vin khumah ka la ṭhu ngat ngat a, min rawn koh hun ka nghâk a ni ber mai.

Vawikhat chance min pêk leh a infawhtîr ringawt lah ka duh dêr si lo! Naa, 'Vawikhat fawh ringawt te chu a na awm chai si lo va' ka ti leh thûl, misual tak a ni.

"Zomuan, i inpeih tawh em?" Room-ah a rawn lût a, a hmel tûm hmuk chuan ati lang nelawm loh zual.

"Ka hâw dawn lo, training pangngai ka zawh hma chuan ka chhuak ngawt thei lo hrim hrim," ka ti sap a.

"I hnâ hi a nghet lo tih i hria ang chu maw, train tlâk loh khawpa thluak thâwl i nei tih hre tel bawk la, khatiang paper pathum khat lek pawh i thiam hman lo a nih chuan a aia tam zir tur leh hriat tur a awm tih hre ta che," zawi sup leh fiah faka a ṭawng chu ngawirengin ka ngaithla a.

"Paper khat tê chauh khâ ka zir rih anga ka thiam hunah a dang ka zir leh mai dawn alawm."

"I Bag nen min rawn zui rawh, ka hnuaia thawk chuan ka thû a zâwm tur a ni. Wholesale dâwr nghak la, ₹99 tih velin âu âu mai rawh.." min hmusit hmel zeta tiin ka bânah a vuan a, min pawt deuh nawk zui, ka thin a thawk ve ta.

"Lalfakhlu, eng mipa pawh ni la, ka boss i ni emaw atu apawh ni rawh, i mi tih dan hi a lutuk lam hret a ni," min vawnna ka thingthla sawk a, chak lutuk hian a room ka chhuahsan ta a.

"Zomuankim..! Zomuan..!"

Min ko eng ang mah se ka lêt awm lo êm mai! Mahse, ka hâw dâwn tihna pawh a ni chuang lo.

An in chhuahsanin vung fê hian kê-in ka kal ta a, khawilam nge pan tur pawh ka hriat loh avangin kawngpui dung ka zawh mawp mawp a, an khawdung a sei hrep hlehnghal! Motor veivâk hmuh tur a awm bawk si lo nen ka thinrim lutuk chu ka thaw chhuak leh halh ṭhin a, mipa sual theihtawp ka lo zui reng niin!

A nu leh pa an fel tehreng nen ani ve kha 'Setana sâwn' ani ringawt!

Thui fê ka kal hnu-ah an khaw dâi ka thleng ta hlawl a, private car min tlânpêl an awm zeuh zeuh a, ka thinrim lutuk khân phar nachang ka hre lo rêng rêng! Kei pawh hi Lalfakhlua sawi ang deuh khân ka thluak a thâwl zo tawh a nih dâwn hi.

"Zomuankim, min ti hah lutuk.." Fakhlua a rawn lang hlawl a, a thlan hluam bawk!

"Ka tihah lo ang che, kei chu mi mai mai ka nia, i hnuaia thawk tlâk lo, hâwna tur motor pawh nei lo, Zomuankimi ka nih hi.." ka sawi zâwngin ka ner sak sak a.

"Sumo châng rawh ka tia nilawm ni?"

"Ka thu thu a ni, duh leh Vâi Truck-ah pawh ka chuang anga, JCB pawh nise i lo buaina tur a awm lo, helai hi chu in In a ni tawh lo a nia," tihpahin ka bul vêl ka enkual ngial a, rum lutuka min melh chung hian, "I lei khâ hlep ṭhen ila a ṭha ang, tuna bahlah miah lo va i ṭawng zawt zawt ang khân i zir tur khâ vawngbel ni la company 'chhuanvâwr' i ni mai," ati duah a.

"Chhuanchhîp, Chhuanvâwr, chhuantawlawl, eng pawh ni teh se i hnuaia thawh ai chuan City Bus conductor nih ka thlang zawk.."

Za lutuk hian a nui ta a, ngun fê a min en lehin, "I nasa ê, i nasa lutuk.." kâwng dawm meuhin a nui leh a, ka vawm bur nâng a!

"I hre dik a nih chu, min kalsan thei tawh ang," tih pahin ka hawisawn hmak a, a nui nasa zual sauh.

"Lokal teh, helaia âu vak vak kher a ngai lo, mî-in mak an ti ang che," tiin min rawn vawn a tum a, ka lo duh lo nasâ.

"Min khawih rêng rêng suh, ka hâw i duh bawk a, ka hâw em em ang.."

"Thinrim tawh teh suh, kan sawi ṭha dawn nia, i hâw duh a nih pawhin kê ringawt chuan khawi mah i thleng lovang," ka hnial hman hmâin ka bânah nghet zetin a vuan a, min kalpui zui nghâl hmiah!

Ka game-ah ka khalh lût tih a inhre dêr si lo va! Yaar! Min ûmpha har ka tirêng a ni.

Mi mâwl ber tân lo chuan kê-a inhawtir chi ninghal lo chuan! Lalfakhlua hi mi mâwl ni hek lo, min ûmzui dâwn tih ka hre ve kar.

Mihring veivâk hmuh tur an awm zauh zauh tawh a, hmanhmawh zeta min pênpui pâwk pâwk avangin kan mi tawh apiangte chuan min en duh hlê!

"Fk, khawilam nula nge?" Mi pakhat hian a rawn zâwt a.

"Kan nu thar anih hi..." tiin zuk chhâng pek a! Kan mi tawh apiangin an zâwt zel tih theih deuhthaw a ni a, ani ang te chu an khuaah a lâr ang tih hriatsa reng reng, a nupui rûk anga min sawi tâk zel avangin ka tân ṭawng leh chi a ni tawh bik si lo! Min hruai tura a lokal leh manah ka ngaidam hrâm mai ang.

An in kan thlenin Siami a lo nui ṭhâ a, "U Fak, i pa-te an lo hâw chho dawn lo aw, an thil buaipui kha an peihfel hman lo va, u Zorini te inah an riak dâwn a nia, i phone i keng si lo va ka lo chhâng ve tawp." Ati a.

A nu leh pa an awm loh phei chuan ava hrehawn duh dâwn ve.

Siami thingpui lum tura hrilhin a room-ah min hruaitlang nghal a, ka hnial chhin eih lo, a hnuaiah ngei hian thiamna ka paw chhuak tur a ni dawn lo'm ni? Mithiam, mechanic line leh North East-a motor company changtlung bera Asst Manager Lalfakhlua ani miau alawm.

"Bazar kal turin insiam ang che, i thawmhnaw inbel khân petrol leh diesel rim min hriatchhuahtîr.." ati deuh nghut a. Nuam ka ti chiah lo, uniform inbel reng ringawt te chu a zahthlâk ve deuh.

"Bazar kal mai na tura hnaivai a awm em ni?"

"Awm e, inthunpuar la kan kal dawn nia," ati awlsam mai a, pawisa ka lo keng ve hlauh chu a tihzia ngei mai, tam phei chu a ni lo a, thawmhnaw man to lem lo hâk hnih vêl leh underwear leh bra tihvel lei pawh ka pawiti tehchiam bik lo.

Pakora leh Alu chop, Siami rawn chhawp chu ka ei fai vek nia! Ka zak duh tingtang tawh lo e a, ka ril a ṭâm ve êm a ni.

"Zomuan, i chhungte i chanchin i hrilh dâwn lo em ni?" Fakhlua'n min zawh thut chuan ka hâwi phâwk hrâ a.

"Ih, hrilh ang; mahse.." chîk takin min en reng a, phone ka nei tawh lo tih sawi chi pawh va ni suh. A hmâ chuan ka nei ngei a; ka û in 'athar ka lei ang che' atih vângin nimin khân siamtîr turin ka dah daih!

"Ka phone aṭang hian be rawh, an ngaihtuah ang che," ati dam ta thlup a, hnial ka tum ûk a, ka ṭhulh leh daih.

A phone changkâng zet min pêk chu la-in, ka û ka call ta a, ka chungchâng leh ka awmna ka hrilh thuak thuak a, 'I phone tur ka lo thawn ang che' atih chuan, "Aizawla ka lêt leh hunah zâwk le.." ka ti a.

"Khawi, i û kha ka lo be ve teh ang," Fakhlua hmuiphun chu hmu reng mah ila ka hai der lui tlat a, ka off zui daih.

"Zomuankim, i chhûngte ka biak i va hlau awm ve.." ati hmuk a.

"Ka hmingpumin min ko tawh suh," ka thingpui in na no ka seng nghal a, "I hmingpuma ko thei tur che-in i chung zâwk zel ka ni, i boss ka ni a, nang aiin ka upa zâwk bawk," ngeiawm lam lek leka ṭawng a thiam dawn riau mai.

Chhâng buai duh tawh lo vin pawnlam ka pansan ta a. Min rawn zui leh dawn tho tih ka hria te pawh a ni mahna.

A nu leh pa'n an car pangngai an keng a, company car kan ken bâkah car dang pakhat an la nei a, ala thar viau bawk, Elantra(Hyundai) kan company car chhuak thar ber ala ni zui! Ka va'n khalh châk fia fia ve le.

"A neitupa chauhvin a khalh dawn a," ka ngaihtuahna hria ang hrima a rawn ṭawng chhuah chuan amah ka en hâ a, "Engtika i lâk nge?"

"Thla hmasa khân 15% discount a ni a, Mizoram lamah offer kan dawn rih dâwn loh avangin Loan-in ka la ve alawm," dam thlapin min chhâng teh tlat.

Car thar chuan Bazar lamah kan inphur thla ta a, a chuan a nuam dangdai khawp mai, ama'n a khalh a, a hnehsawh hle.

Khawpui angin eng teh vak lei tur a awm lo va, thawmhnaw man to phei chu lei tur a awm mang lo, "I duhzawng en rawh le, tun ṭum chu ka lo pe dawn nia inthlahrung suh," ati vei thlup a, a uikawm hmel nen ka rin loh dan daiha athil phal phian chu!

Kekawr pahnih leh Towel, underwear leh bra set thum, T-shirt tihvel ka thlang a, "Tikhan lo en rawh aw, inhnuai lamah ka zu chhuk lawk ang e," tiin min kalsan ta a.

An ina ka châm chhung daih tur chang chang chauh ka thlang a, thawmhnaw te zawng ka ngah ve lutuk tlat; mahse, ka hnathawhnaah hian form hâk angaih avangin lei belh ṭeuh kha ka duh tehchiam lo. Incheina hun a vâng em mai.

Darkâr chanve liam hnu-ah pawh alo la lêt lo va mî dâwra awm reng ka tân a nawm loh avangin pawisa ka pêk fel hnu-ah dawr ka chhuahsan ta ringawt a, khawiah chiah nge a kal tih ka hre bawk si lo nen car hûnna bulah ka lo nghâk ta a.

Minute sawm dâwn ka ding tawh tihah a rawn lang hlawl a, kan awmna ala inhlat deuh avangin ngun zet hian ka lo thlir ta a.

A sâng ṭha hle a, a sam dum hlap leh a bek sam kâwng deuh te chu inhmeh ka ti ta riau, a ngo hran lo va 'hâng' tia sawi tur a ni leh miah si lo. A taksa a fit ṭhat hmelin a inkhaithli zuih a, ka lo enchîk lo mai mai zâwk a ni. Tuna a car thar te hi a 'ta' bik niawm takin zuk inhmeh thlup a, a siamchhuaktute zingah tel lo mah se hna thiam tak a ni a, a ngaihtuahawm hlawl loh.

Mahse, duh ai chuan a lerh hmel ka ti. Mipa ṭawng tam zawk zawk a ni lo tih chu ka hre sa tawh a, ka tlângnel theihna turin min be lui zawk ni maiin ka hria; a induh tâwk thawkhatin ka ring bawk a, ṭawngkam ngeiawm deuh leh mí chaldelh ru riauva ṭawng dan a thiam phian bawk, kei aiin kum 6 ngawtin a upa lehnghal!

"Min lo nghâk rei em?" Ka bulah rawn dingin a nui suk a, ka lâi titih ringawt, a hmâ kha chuan mipa a nihna angin ka en lo khâ a nia, kei hi rilru dik lo ka pu deuh em maw ni!?

"Rei ve reng," car kawngkhar hawngin a ṭhu lût hmasa a, a kâwng aṭanga a thil pâi a phawrh chuan ka ner sak! Whisky ûm khat dashboard-ah a dah lût a, ka hmu tih a hre lo nge engah mah a ngai lem lo.

Zû a in ṭhin ang tih ka lo ngaihtuah thleng miah lo va, dik tak chuan a inhmeh hlawl lo, car chhunga ka ṭhut luh ve tâkah chuan zu rim ka hre nghâl a, nichina a bo vang vang khan a in nghâl a nih ka ring.

"Zomuan, Beer i in duh em? I thawmhnaw man i lo pe vek a, nakinah ka dahkhah sak dawn che nia," ti supin kan tlânchhuak ta a, a khalh chak kher mai, kan kal lamah a tlân dîm em em a, tunah lêm kan thlâwk lo chauh.

"Ka in ngai lo," tia ka chhân chuan min rawn en zawk a, "Kei chuan zû ka in ṭhin, ramthima ringlo mite vei-na nun ka la neih miau loh avangin bansan ka tum lo," zuk ti mauh a.

"I nun a nia, i thu thu alawm, kei chuan in tumna ka nei lo," ka ti ve hmiah a.

"A ṭha, hmeichhia chu hmeichhia anga awm mai tur," garage-ah a tlân lût nghal a, a nu leh pa awm lo chu a hriat kher mai! Nge, an hriat laiin a in fo zawk tih pawh ka hriat si loh.

Inchhunga kan luh hnu-ah, "Ka room-ah ka'n awm ve lawk ange aw, i duh chuan inbual rawh.." tiin min kalsan nghal hmak a, in belh a tum tih hrilh hranpa ka ngai bik lo.

Inthlâkna tur leh ka mamawh la-a ka va luh zawk pawhin min be tawh miah lo va, a room tukverh bulah dingin no a lo dawm dêr tawh!

Uluk fê-in ka inbual ta a, bathroom-ah ka inthlâk nghal vek bawk a, a room a la chhuahsan loh palh tâkin tih thu-ah ka invêng lâwk a ni ber.

After 1 hours

Siami'n chaw ei tura min lo koh lai chuan motor part list kha ka lo la bih a, an nula nen hian kan inbe tam lo khawp mai, Fakhlua hian a duat hmel viau lehnghal! Nula tê lam deuh ngo veng a ni a, a hmelchhe hran lo.

"U Zomuan, u Faka lo ko la.." chaw ei siam mawlh mawlh paha atih chuan ka kal ve mai a.

A room chhung chu leh! Zu rim a nam rum rum a, khumah a bawkhup zawnga mu-in a bân a phar duai a, a muhil nge a chatthla tih ka hre bik lo.

"Fakhlu, Faka.." Tia ka koh nawn sek pawhin a rawn che îkhaw lo nia!

Sâwi paha ka koh leh pawhin a harh ta si lo va tihngaihna ka hre teuh lo, mahni dose hre lo khawpa in te chu a âtthlâk mah mah. Mahse, a duhthu a nia ka lo sawi ve tur a awm lo mai pawh a..

"Ka ko harh zo lo," tiin dawhkan ka kîl ve nghal a, "Zû a in leh a ni ang," Siami'n alo tisam êt maw le!

"A in hrât riau elaw!?

"Aw, a in ve zauh zauh, a lo harh hunah ei ve mai rawh se," ati leh mai a.

Eng eng emaw sawi pahin kan titi a, chaw kan ei rei ngang mai, a neitu awm hek lo, kan duh ang thâlin kan ei chu a ni ber a, thlengsil ka chuh tlat avangin Siami remti lo chung ka sil lui ta a, nuam ati viau.

Lalfakhlua a rawn thawh tâk si loh ah chuan ka zirlai bawk ka chhunzawm leh ta a, thiam ka tum êm! Siami'n TV a en thung a, min kawm a châk tih ka hria; mahse, ka thil zirlai min tibuai hreh ve deuh a nih ka ring.

"U Zomuan, u Faka'n a ko che.."

Hmanhmawh zetin Fakhlua room lam ka pan a, khumah a lo ṭhu bûr a, a mitmeng phî chiai aṭang chuan ala harh chiang lo tih ka hre mai.

"I ṭha em?" Tia ka zawh chuan, "Ka ṭha em? Tih min zâwt a maw! Ka ṭha mah mah.." ati deuh chhak a.

"I ṭhat chuan chaw ei la.."

"Ka nupui rûk kiangah ka mu thei angem?"

"Awi! I harh hlawl lo," tih paha kalsan ka tum chuan, "Zomuankim, ka nupuiah i ṭang duh em, ka duat viau ang che," ati sup a, a rûi ṭawng mah ni se ngaihtuahna ati thui angreng.

"Muhil leh rawh, nge, i inbelh leh dâwn?" Ka ti lui ngat a, a rûi hmêl hi engtin emaw tak a dam thlup nia! A mitmeng fiah kâk ṭhin khâ a phî chiai a, a ṭawng erawh a sehchilh deuh, a hnuaia thawk nilo ila chuan ka be nasa viau ang; rui eng ang mah se ka boss a ni tlat a.

"Siami kha hrilh la chaw ka lo ei ange," atih chuan min biak leh hlau zet hian ka chhuahsan ta a.

Chaw a ei hlânin a room-ah mu turin ka lut ta a, nizanah ka riah tawh tho avangin ka mu leh turah ka ngai hmiah.

##

Ka pang kham lutuk leh ka bân mu churh churh avang chuan ka harh hlawl a, min khan chial chunga ka kianga mu ka hmu phut chu ka ṭê chhuak teuh kher mai.

Ka bân dinglam Lalfakhlua'n a delh bet lek niin! A mutna tur a hai chiang!

"Hey, tho teh.." a lû-ah ka sâwi nawk nawk a, a che eih lo nia.

Ka bân a kham ut ut tawh a, min delhtu hi a rit ve em atin ni.

Vawi eng emaw zât ka koh pawhin 'ṭîk' pawh zu ti lo va! Ka inlet thei mai bik si lo, namsawn tumin ṭan ka khawh teh nâa awmzia a awm lo kher mai!

"Zomuan, engtin mah ka tih loh che hi, i kianga mut ka châk ve alawm," Fakhlua ṭawng fel thlap chu ka hresual emaw ka ti hial!

"Tho rang mai rawh," insaseng tumin ka che sek a, phun sup chung hian, "Ka khum a nia, pahnih mut nân a zau ṭha bawk, i chêt leh vaih chuan.."

A sawi zawh hma hma-in, "Tho rawh, i khumah i mu duh anih leh ṭhutthlengah ka mu mai ang,"

"Ala chê ka ti!?" Vawilehkhatah inlet thawkin a taksa zawng zawng chuan min delh ta a, ka thaw chhuak hap.

"Lalfakhlu, i tenawm lutuk.."

"Eng maw i sawi? Ka tenawm lo a niang, zankhua deuhthawin i kiangah ka mu a, engtin mah ka ti lo che, inṭawngkam hman fimkhur rawh.."

"Tho rang mai teh.."

"Luhlul si, ṭawng peih bawk si.." tiin min melh vang vang a, rui hmêl a pu tawh lo.

"I tho chhuak dawn lo a nih chuan ka âu vak ang," a bâk tih dan tur mai ka hre tawh lo.

"Âu chiam chiam mah la Siami mutui lai te zawng chuti maiin a harh lovang, ṭha deuhvin awm la, engtin mah ka ti lo ang che, i kiangah ka mu ringawt dâwn alawm," tiin ka kâwngah min kuah ṭha leh ngat a, a taksa lumna ka tem pha ta tlat! Ka chhungrila amah thlâkhlelhna lo lang ṭan chu thunun tumin ka ngawi vang vang a, ani paw'n eng mah a sawi bik lo.

Chutah, ka inrin hman hma hian ka hmuiah a rawn fâwp ta a, ka hamhaih bâkah ka rin loh dan a nih vangin atih ang ang chuan ka dawh mâwl tawp nia!

Hepa hian eng nge ahriat tehreng ni, dam leh duat deuhva min fawhna chuan ka chhungril ber a tawk che pha tlat.

Eng ang mipa nge a nih hrechiang lo mah ila a mize dangdai leh pa ru riau hi ka rilrem ṭan em maw ni?

'No' Ka boss in min fâwp a nia, chupawh a room-ah, a khumah ngei lehnghal, a rui thiltih nge ni a, min duh ta tihna, ka hriatchhuah ngei angai...

Amah hlata awm thei lo tura zûn ngah mipa a ni thei mai em?

B<++++[BeckirafARenthleI]++++>RR

SEGUNDO|BRR

Becky Rafa Renthlei

Chapter-4

Lalfakhlua

Zû ka in apianga chaw ka ei thei lo ziah hi thil mak tak a ni! Ka tum lâwk ni miah lo vin vawiin tlai khân Whisky ka lam tehngawt a, 'zu heh' tia sawi tur ni lo mah ila ka in thei pangngai ve reng, Zirsanga nen kan inkawm tak tak lai phei kha chuan a chhungte'n 'Lalfaka kâwm tawh suh' an ti hial a nih kha!

Ṭhutthlengah ka mut peih ngang loh avangin Zomuani muthilh hnu-in khumah ka insawn ta kha a nia, engtin mah tih ka tum hran lo; ṭhutphah tawngchham zeta mut ai chuan tiin a kiangah ka inthawlh ve ta a, a taksa rim fai sar leh lum ham ham ka nghen rual khân ka danglam titih dêr maw le! Mahse, inngaihzawnna eng mah kan neih loh bâkah hmeichhe inring lo lai khawih kher hi ka rilrem zâwng a ni lo.

Bra leh underwear nen chauhva a mu ṭhin hi a chîn ṭhan a nih chuan sim vat angai tihna, mutkawr pangngai a keng lo tih ka hriat avangin ka khak duh lem lo pawh a.

Ka rui a reh vek tawh a, in belh tumna pawh ka nei tawh lêm chuang lo, Zomuani rawn harh lai pawh ka hre reng a, ari leh chûl dawna ka hriat avangin ka che duh miah lo va, ka ring dik chiah.

Min sâwi hrep paha min koh chuan thâwm ka chhuah duh miah lo a, a thinchhe ropui si, min hnial dan tur a haihchham ngai reuh mang si lo nen haider hmiah hi a finthlâk ber.

Châwl duh map lo va min koh tâk sekah chuan muthilh der reng thû awm suh, ka chhâng ve ta nge nge a.

"Lalfakhlu, i tenawm em mai!" Min melh râ a, a thophang hmêl tarmit bun lova ka hmuh tâkah chuan a chhe lo thlâwt! A hmui fawh châkawm taka sen siah leh a thinrim mitmeng kawlh hrâ hi sexy ka'n tih tlat chu le.

Vawikhat tal fawp lo chuan chhuah ka tum miah lo, abâk erawh hunin a hril ang chu, a taksa delhbeta uar lutuka ka fawhna chu min chhâng lo mai ni lo vin a hmui a chîp hmiah a, a meng kar lehnghal!

"Zomuan, vawikhat chiah.." ka sawi zawh rualin ka hmaiah min bêng ṭhuai a, ka hawi sawk thei nia, "Nang mutpui tur che hian he hna hi ka thawk lo va, ka zui hek lo che, nu ka nei lo pawh a ni thei; mahse, i nawm i mâka min fawh ngawt theihna dan a awm lo.." a ṭawng ring hran miah lo a, a thinrim hlê tih ka hre mai.

"Chutiang sawi kual duah a ngai lo.." tiin khum sîr lamah ka inlet phei a, ani a kil tâwpah bang nghêng hian a ṭhu a, a puansin lai ka leh pui vek avangin Bra leh Underwear nen chauh a ṭhu tawm chaih a, a kûn daih bawk.

"Zomuan.." ka inthiam loh êm avangin a thinrimna tihreh sak tumin ka ko ta a, min chhân chu sawi loh a ṭhut ngaiin a ṭhu reng a, en pawh min en lo.

"Ka tihpalh takzet, mu leh rawh.."

"Mu zâwk rawh, i khum alawm.." min en chuang miah lo hian khum aṭanga chhukin a thawmhnaw a inbel sawk sawk a, nuam lo ka va ti si êm! Tû hmeichhia mah ka ngaihzawng ni lo ka fâwp ngawt ngai lo va henu hi eng ati nge maw ni ka vei tâk riau chhan pawh ka hre lo.

"Khawngaihin thinrim tawh suh, a thleng nawn tawh lovang.." ka ti sup a.

"I hnuaia thawk ka ni a, zinkawng thui tak zawhin i kiangah training nei tura kal ka ni, ka lan dan a zahawm loh pawh a ni thei e; mahse, zu rui satliahin an duh duha min fawh ngawt theih ka ni lo tih lo hria ang che, i khumah khan mu la, keipawh ka hâwna tur Motor ka châng ang e.." ati hmiah mai le.

"I ngaih dan a dik lo a nih kha, kei hian ka duh che.." ka tum loh deuhvin ka sawi chhuak phawng a, 'Ka sawi sual' tih chi ninghal lo chuan..

Mak tih hmêl deuhvin min en hâ a, chutah, "I ruih vâng a nih kha, min duh ngawtna chhan tur ka hriat si loh.." zuk ti tlat a.

"A chhan a awm kher angai hleinem 'ka duh che' ka tih chuan ka duh che a ni mai,"

"Kan la hria ang chu.." ti liam puatin ka room a chhuahsan ta a, umzui ka tum ûk a; mahse, min be ṭha duh chuang dâwna ka hriat loh avangin ka ṭhulh leh ta zawk a.

Zinglam dâr li a pêl awrh chauh a, a chhuak lo turah ngai ang.

Choka lamah ari leh rak rak ṭhin a, eng nge atih ang tih ringawt ngaihtuahin ka mu meng reng a, hmeichhe pakhat chu a tling ve hrim hrimin ka hria, ka driver-ah ṭangin a car khalhah ka chuang a, mipa tamtak aia lâktlâk zawk a ni.

A hnathawh hrim hrim pawh hi a nghet lo ni mah se hmeichhe zingah a hmasaber a nih ka ring, a khawsak phung leh a nundan ka hmuh phâk chin ka ngaihtuah lêt hian ka ngaisâng thar ta riau nia! Zomuankimi hi Ramthima ring lo mite aiin ka vei zâwk dâwn ava nih hmel ve!

Khawvar rualin ka tho chhuak ta nge nge a, sitting room-ah a zirlai khâ a lo bih ngar ngar a, thiam tumna rilru a pu ringawt pawh hi ka lâwm zâwng tak a ni.

"Thingpui i in tawh em?" Tia ka zawh chuan a phu zawk a. "In lo e, zingkarah eng mah ka ei ngai lo,"

"Ka in dâwna ka lo siamkêp ang che, i tân min hlauh angai lovang," ka ti sup a.

"Ka in duh lo, ka lo siam zâwk ang che," nichina a thinrim hmêl khâ hmuh tur a awm tawh miah lo a, thinchhiain bak hlar mah se a inthunun thei riau lawi si.

Bathroom-a ka luhsan ta a.

Ka pa an transfer dawn avang hian inchhung singsak a ngai ṭan tawh a, Zomuani'n a zirlai zir se Siami nen a khawih theih ang ang lo buaipui ta ila tih ka rilrûk deuh a, nupui neih ve châkna rilru ka pu hial mai.

"Fk, mo thar thingpui lum kan rawn in dâwn a.." kan ṭhenawm chiah pu Dika te nupa an lo luh chuan ka nuih aza hlê a, ka fiamthu khâ tak tak emaw anti a ni chiang mai. Zomuani lah chuan an sawi hre lo ang maiin thingpui a rawn siam kêp leh ta nghâl a! Zia lo ka ti deuh.

"Engtikah nge in insawirem dâwn, i pa an sawn chhuah hmâ hian han innei hman ula a ṭhat nen," Pu Dika'n ala ti tak deuh deuh a!

''Ka fiamthu a nih kha, ka thawhpui Zomuani a nih hi.." tia ka chhân chuan an awih loh hmel kher mai.

"Tihian inzêp leh tlat zel a, innu chu a lian ṭha zuai zuai hle mai, nang ai chuan a naupang daih ang tiraw!?" A sawi zawh rualin Zomuani ka va melh a, a zah hmel kher mai, nuam ka tiru phian mai ka ti.

"Naupang zawk e, ka thawhnaah hian a thawk ve a.." insawifiah ka tum tawh teuh lo.

"Thingpui pawh a siam tui khawp mai, i nu hi a khawngaihthlâk tawh a, nupui i nei har ka tirêng a ni," eng eng emaw a sawikual a, Zomuani a fiam zuk zuk reng bawk nen ani pawh a nui a nui ve mai.

Pu Dika te chhuah hnu-ah Siamin, "U Fak, innei daih r'u.." tih paha Zomuani a kheuh zeuh chu ka hmu reng.

"Min duh se chuan ka nei hreh miah lo a nia," fiamthu titak deuhva ka chhânna chuan Zomuankimi ati tûm hmuk.

Ka sawi ve apiang hi huatah a châng bik em maw ni!

Siami nen eirawng an bâwl a, tihtur nei em em nei si lo hian ka va inlan sek a, a kianga awm zêl ka châk thar ta riau, min benna khâ thinrim enah pawh ka en lo va ka thiam loh a ni miau alawm; mahse, a thleng leh a nih chuan hremna ka pe lêt thung ang.

"Zomuan, ka car thar hi i khalh ve châk em?" Min ngaihsak miah lo va Siami nen an ṭawng char char avangin ka ngaithei dêr lo, 'min duh ngawih ngawih se' tih rilru ka'n put chu le. An chhungkaw dinhmun ka chhût lo va amah hrim hrim hian min hîp êm a ni! Ka hnuaia thawk a ni chung pawhin min tlawn hûrh lo va, hei vangte pawh hi a ni mahna.

"A neitu chauhin a khalh thiang a ni lawm ni?" Tia min chhân chuan fiam ka châk thut a, "A neitu i nih theih lohna chhan tur a awm miah lo, tihian awm tlang nghal la, kan innei a ni mai." Nui duh miah lo a tiin ngun zetin ka en bawk a.

"Pasal zu in mi ka nei peih lo, bâkah neih tumna rilru ka la pu chhin lo hrim hrim," a nui sâng a, chhungril aṭanga nui a ni lo tih pawh ka hria.

"Put chhin kher angai hleinem, nei tawp la i nei a ni mai.."

"Ka la nei ve ang chu, hna nghet ka neih hunah.." ati sap a.

'Min duh lo' lutuk hi ka ngei deuh, hmeichhe ṭhenkhat lêmin min pâk huam a, Delhi-a mizo hmeichhe awm ve te pawh chhe lo tak tak min duhtu ka tawng nual a nia, henu hian ka englai hi nge a huat bîk ni!

Tûkṭhuan kan ei laiin ka pa'n min lo call a, a thusawi chuan min ṭhâwng kher mai. 'Nizanah i nu pum a nâ a, kan rawn hrilh duh lo che a nih kha, hei tunah pu Dawnga clinic-ah kan awm mêk a, a pumpui lam a chiang lo a ni awm e, biopsy an la dawn a,' ka ṭêk deuh sawkin ka hria.

'Ka lo chhuk dâwn em?" Ka tih chuan 'I u Zorini'n min buaipui thei tho va inlamah lo awm mai rawh kan hâw chin tur kan hre lo," a rawn ti ta a.

Ka nu hi tunhma aṭang tawha Pumpui ulcer nei a ni a, a insawisel ve leh zauh ṭhin. Zomuani leh Siami erawh eng mah ka hrilh ve lo va, bâkah ka nu leh pa an lo hâw rih dawn lo tih ka sawi chuan Zomuani'n min hlau leh palh ang.

Nilêngin ka room ka chingfel a, a khât tâwkin Zomuani a zirlai ka zâwt leh zauh zel bawk a, a hre thei hlawl lo, a sawi pawlh leh nuai ṭhin a; mahse, ka hau ta lo, 'Uluk deuhvin zir la i thiam em em ang' ka ti dam thlup a, innghirngho reng ka peih chiah lo a ni.

Zan lamah Rinzuala leh Dawngkima an lo lêng a, Rinzuala leh Zomuani inbiak vêl dan chuan ka mit ati kham riau nia! Kei min biak dan nen a inang hauh lo, Rinzuala'n thingpui lum tura atirh chuan ka lo inrawlh vat a, "In rawn lêng ve dêk dêk a, thingpui inti nghâl a, Siami tîr rawh u.." ka tih nghut a.

"Fk, Mamuani hi min lo tihpui teh.." ka beng bulah min rawn hrilhru sur sur a, ka nuih aza miah lo. Rinzuala hi 'ka ṭhian' tia chhâl ngam khawpa inkawmngeih kan ni lo va, Dawngkima nen erawh chuan kan inkâwm ve fo ṭhin.

"Ama bulah sawi la," tia ka chhân chuan a nui huk a, "A inhmuam ûp hmel em mai," ati leh a. Zomuani hmel ka va en chuan a ngaih a ṭhat hmel vak loh.

Zu chungchâng vel sawiin kan titi chhunzawm ta a, "I zirlai chhunzawm i duh chuan ka room-ah i zir mai dawn nia," Zomuani hnena ka tih chuan a lâwm hmel kher mai, nui var var chung hian, ka inlêngte hnenah chhuanlam a siam a, a lût bo ta a. Ka duhdan a zâwm ve tlat!

"Fk, vengthlangah zuk kal ila.." Dawngkima'n min sâwmna chu ka phûr zawng tak a ni, Siami hnenah kan chhuah lawk tur thu leh Zomuani lo chhuahsan lo turin ka hrilh a, vengthlangah zu in turin kan inphur chhuak ta a, nizana ka inbâng kha ka la nei reng; mahse, ka sawi lang duh lem lo.

A sen chi zuar ve ṭhin Lawmkimi inah dar sawmpakhat thleng zak kan meng ta a, ka in ve nual nâa ka rui chhe lo teh tlat!

Rinzuala leh Dawngkima ka thlah hnuah ka haw ve chauh a, sitting room ṭhutthlenga Zomuani lo muhil bâm ka hmuh chuan ka inthiam lo leh pek, 'Ka khumah mu rawh' tiin ka lo hrilh lo atin ni.

A muhil tui hle a, a âwmah paper khâ a pawmbet a, a lan dan khawngaih thlâla zet chu ka en reng a, dimtêa pawmin ka room ah ka luhpui ta a, khumah nghatin puan ka sintîr vei thlap a, tiṭha ka inti kher mai, a harh chuan loh avangin whisky ka inbâng kha phawrhin ka in leh ta a, ka nun khawhar ru ta riau leh mal ngawih ngawih a inhriatna ka nei tlat hi a chhan ka hre lo. Ruih chhum hmawk tumin no hnih ka inbelh leh ta a.

Min ko vak vak ri chu hla tak aṭanga lo chhuak nimai hian ka hria a, men chhuah tumin ka mitvun ka chêt a, a sak ṭalh nia!

"U Fakhlu, Faka..." Zomuani aw a ni. Peih lo zetin ka meng chhuak ta a, ka thil hmuh avang chuan ka harh chiang ngei mai, Zomuani natuar kun ngawih ngawih chunga sitting room chhuata lo awm ka hmuh chuan ka mutna ṭhutthleng aṭangin ka chhuk hlawl a.

"Hey, engtizia nge..?" A bulah ka ṭhingṭhi thla a, a thlan deuh hliam bawk nen thidang mai tur hmêl a pu lehnghal! Siami ka ko tuar tuar a, "Doctor ko turin a kal.." thei leh thei lo hian min rawn chhâng a.

Min kaitho zo lo vin an pahnihin an lo inbuaipui tihna a nia, nêp ka inti kher mai. Doctor Hruaia bâk kan khuaah koh tur an awm lo va Car-in han hruai dâwn pawh ni ila amah kalsan ngam a ni si lo.

Ka pawm nawlh a, ka khumah ka muttir ta a, ka dah ang angin a mu hlâwm tawp a, a hmâa a pum nata ka zûtsak ang khân ka'n ti ve bawk a, awmzia a awm loh hmel kher mai.

"Fk, ka û phone rawh, ka tlin dawn lo tlatin ka hria.." a aw thâm chhalh chuan miti hlauthawng zual sauh.

"Engtin mah i awm dawn hleinem, doctor a lo thleng ṭêp ang," a nâ a rawn chhuak leh tih hriat fahran hian a kun leh ngawih ngawih a, ka lainat kher mai, tih vak ngaihna ka hre lo nen a samah ka chûl ringawt a, a û phone dâwn pawh ni ila a number ka nei lo hrim hrim, amah lah zawh tlâk a ni si lo.

Dr Hruaia leh Siami an lo luh lai chuan a thidang lo chauh tawh a, a hmingpumin ka ko mawlh mawlh ringawt tawh mai.

"Fk, a rang lamin damdawi inah hruai mai rawh u, a rilphîr lam a nih hi, nachhawkna-in ka jection anga in thlengthla hman tho ang," ati nghal zung zung a, Zomuani'n nikhua a hre mumal tawh lo, thlaphâng eng ang mah ila tihngaihna awm hek suh, Hruaia'n a jection chhungin car ka la chhuak a, ka nu leh pa chanchin hrilh turin Siami ka hrilh bawk a, kan buai phili a ni ber mai.

Lungleia phurhthlâk angai dawn tihna a nia, Hruaia chu 'min kalpui thei mai angem' tia ka zawh chuan damlo enkawl lai a neih thu a sawi ve bawk si! Siami nen kal kan tum ta a, kan In pawh kan kalh hmiah mai ang.

Siami'n kan mamawh tur zualpui a khung khâwm a, Hruaia nen Car hnung seat-ah Zomuani kan muttir a, a harh tawh lo hrim hrim, ka chhungril tâwt ṭûn leh ping up chu tihreh tumin thâwk ka la hawk a, a chhe ber thleng tur anga ka indah chhin hian a dik thei lo.

Ka hnathawk a nih vang ni lo vin amahah hian eng emaw ngainatawm riauna a awm tlat a! Kei hian ka duh tih ka pha lo, a damna tur leh a himna tura insenso pawh ka huam thui hlê.

Ka car thar zawk kengin Serkawn Hospital panin kan tlân chhuak ta a, "Fk, muangchan chi a ni lo a nia" Hruaia'n atih phei chuan ngaih ṭhat lohna thûk tak ka nei hmiah.

Siami'n a khât tâwkin a ko reng a, kawng lakah vawikhat mah kan ding lo, nachhawkna-in a chhâwk nge a harh miah lo a, ka chhungrilah hrehawm tihna hlirin ka khat.

Zû ka lo in kher bawk nen ka inthiam lohna a nasa zual sauhva, na tuara a awm laiin koh harh theiha ka awm lo kha demawm ka inti ngawih ngawih.

Serkawn Hospital kan thlenin zinglam dar sarih a pêl tawh a, doctor Ramzauva'n a en nghal zung zung a, a thisen test ngai leh a ṭûl dang ka buaipui thung.

A rilphîr a puakkeh lo chauh tih leh zai nghâl angai a tih phei chuan ka bîng chum chum nimaiin ka hria, a chhungte pakhat tê mah koh tur ka hre si lo, Aizawla kan pu ka va phone ta ringawt a.

"Zomuankimi file lo check tir la, a chhungte biakpawh theihna number a dah em?" Tiin a chanchin kimchang ka hrilh ta a, ka mawhphurhna a nih rualin kan company thila zin ang a nia, kan buaipui ngei tur a ni.

Hman zana a û a call-na number kha ka zawng ngial a, ka hmu mai si lo, â ka hre lo hrim hrim.

A chhungte number pawh a dah miah lo tih min rawn hrilh chuan ka thinrim hlur tawh a, zai tura an nawrluh lai pawhin kei leh Siami chauh kan awm nia! Eng ang hmeichhia chiah nge maw a nih le!?

Chhungte a nei lo a nih ka ring ta ber a, karhnih tehmeuh zin tur siin phone a keng miah lo te hi thil mak tak a ni. Tunah thi chhâwngin a awm a, amah hmangaihtu leh lainattu tumah an awm lo, kei chauh lo chu..

Nie, enkawltu nei lo pawh nise Zomuankimi hi ka mawhphurhnaah ngaiin a tâwp thlengin ka buaipui khawp ang, a duh emaw duh lo emaw ka enkawlna hnuaiah awmin a ṭûl a nih chuan nupuiah pawh ka nei mai tur a ni, ka thinlungin ṭha atih chu atak takah pawh thilṭha a ni ngei ang.

Ka hmeichhe tawn chawp leh ka hnuaia thawk hmeichhia hi nun zahawm leh mí zahkai a nih theihna tura puitu tur chu keimah Lalfakhlua chauh a ni.

Zomuankimi rilru hneh hi thil awlsam a ni dawn hauh lo; mahse, bei chhin loh ai chuan beidawng tur tal pawhin ka tum chhin dawn lovem ni?

B<++++[BeckirafARenthleI]++++>RR

SEGUNDO|BRR

Becky Rafa Renthlei

Chapter-5

Lalfakhlua

Inzaina room aṭanga Zomuani an lo nawr chhuah meuh chuan dârkar tam fê a liam hmanin ka hre hial! Siami pawh tih tur ber hre lovin a vei sek a, ka nu biopsy an lâk rih avangin min ṭâwiâwm turin an lokal hman bik lo.

Doctor Ramzaua'n 'Kan zai ṭha e, rawn tlai hlek ula chuan kan in chhan hman lo maithei a ni' tia ka dârah a ben thák thák chuan ka hahdam huai huai thei nia!

Cabin lamah kan awm duh thu sawiin an dah lût fel ta a, a senso lam pawh ka inhuam thui viau a ni, Siami pawh a buai zak zak khawp mai a mipa ta na nâ na chuan tih tur ka hre ve lo reng reng! Khuma Zomuanin muhil chu ka melh leh zauh ṭhin a, nurse te'n a harh har dawn lo tih sawi mah se hmuh hrehawm ka ti.

"U Fak, inhnawhpuar ve lawk la, u Zomuani ka lo awmpui ang," thil ei lam ka lo ngaihtuah miah lo a, Siami ngaihtuah lêk lovin Zomuani hlirin ka ngaihtuahna a luah avângin ka inthiam chiah lo.

"Ka lo awmpui zâwk ang e," ka wallet aṭanga pawisa phawrhin Siami ka pe a, kan hnenah kum li lai awm tawh a ni bawk a min nêl viau. Min chhuahsan hnuah Zomuani mutna bulah ka ṭhuthla ve ta a, a hmêl dâng lap leh nunna nei lo ni âwm taka chhîng chialte chuan amah lainat lo thei lovin min siam a ni.

'A na lutuk' zawitêa a ṭawng sap ri ka hriat chuan rang lutukin ka en vat a, a la harh chiang chuang lo. Nurse pahnih an lo luh lai pawhin a kutah ka vuan rân a, khawdang ka hawisan thei meuh lo chu a ni e.

"Nachhâwknain ka jection dâwn a nia chuti lo chu a lo harh hunah nâ a ti lutuk palh ang," nurse senior zâwkin dîm miah lo hian a kuai let a, "Min dîm ve deuh ula..." Zomuani ṭawng ka hriat chuan nurse chu ka melh hrâwk a.

"Midangte paw'n zai an tâwk ṭheuh alawm, a na ve bawk ang chu." Nurse ṭawng dan chuan ka thin a khei zak mai.

"I ṭawngkam hman kha fimkhur rawh aw, i chhung leh khat a ni lo pawh a ni maithei; mahse, lainattu a nei ve tho a nia." Ka ti nghut a.

"Ka pu, tuarzuau deuh hi chu kan dimdawih tehchiam lo," a tih leh lek phei chuan ka insûm theihnain a tlin lo teuh kher mai, "A tuarchhel nge a zuau viau tih i hre ngawt em ni? Dîm thei ang ber khân jection mai rawh," ka sawi zawh rualin min rawn melh deuh hrâ a, rum mangkhengin ka lo melh lêt thung.

"Ka pu, tihpalh.." inthlahrun hmêl taka a tih tâkah chuan ka bu nghut a, nurse te hi fel leh polite tak tak an awm rualin ṭhenkhat erawh an inluling mah mah ṭhin. Mahse, damlo tuarzuau lutuk erawh an tân pawh enkawl a hahthlâk ve khawp ang. Mî eng emaw zât natna in ang lo tak tak awmkhawm anni a, Serkawnah tak hi chuan damlo an care phian lawi si! Keipawh hi ka ri leh phut zel, Zomuankimi vang vek.

"Sir..." Zomuani a rawn meng ve ta a, a chauh hmel kher mai! A mitmenga zawhna tam tak rawn lang ka hmuhin, "Hahdam rawh, i rilphîr an paih a, Serkawn hospital-ah kan awm a," dam thluamin ka hrilh ta a.

"Ka û i hrilh em?" A ti leh sap a.

"Hrilh lo, a number ka hre si lo va.." ka tih chuan a ngawi ta rauh rauh a, a mit a chhîng leh daih.

Biak zui ka tum ta bik lo a, châwl hahdam se nakinah a harh hunah duhtâwkin ka la bia ang chu.

Siami'n eitur min rawn hawn ve a, ka ril a ṭâm deuh nen a lo hawn ang ang ka ei zo vek! Kan inah tumah an awm loh avangin ka nu leh pa ka phone a, biopsy result nghah a ngaih thu leh min rawn tlawh ang tih a sawi chuan ka thawveng huai.

Nilêngin damdawi in cabin-ah ka tâp a, dâr thum dâwnah ka nu leh pa an lo thlen chuan hâkthlâk eng mah ka neih loh avangin thawmhnaw lei turin ka chhuak ve ta a, ka nu leh pa awm chhûng chuha ka chhuah mai loh chuan tihngaihna awm hek lo.

Venglaiah car-in ka tlân thla zuai a, thawmhnaw dâwrah kekawr bul pakhat leh shirt ka lei a, ka û (ka nu fa bik) Zorini te inah ka inbual leh tê tê kha a nia, Zomuani vang hian ka nun phung a khaihlak titih dêr chu a nia.

Inbual lova awm reng zawng nizan lama ka thil in rim kha a tui tehchiam lo.

Serkawn pana ka tlân chhoh laiin ka phone a rawn ri ta a, number lâwng ringawt a ni! Car ka khalh laklawh avang leh dinna tur hmun remchang ka hmuh mai loh avangin ka pick duh ta lo law law a.

Vawi sarih zet min rawn call nia! Parking Area-ah ka indah fel chiah tihin number ngai bawk chuan min rawn call leh ta a, atu chu nge ni vak vak ni!

"Hello.."

"Fakhlua em ni?" Hmeichhe aw hniam raihin min rawn zâwt a.

"Aw ni e, puih theihna che ka nei em?" Polite takin ka chhâng a, kan hnathawhna angah hi chuan car lei duh leh Loan-a la duhin min rawn biak ṭhin vangin polite a pawimawh hlê.

"Zomuani i bulah a awm hnai em? Min lo biaktir la chu chu min puih theihna tur a ni e," tiin a nui zui hak a, a aw a eng emaw riau lo ri chhuak chu ka man rang kher mai, min nuihsawh a nih loh pawhin inla polite chawpah min ngai deuh em maw ni!?

"Tu nge âw..?" Amah ka hriat miau loh avangin damdawi inah a awm tih ka sawi tlang hreh ve deuh a ni.

"Amah kha min lo biak tir la tu nge ka nih a hre mai dawn alawm, nang mah ni lovin amah khâ a nia ka biak duh," zuk ti kher a!

"Be lo phawt mai rawh aw, hmelhriat loh ka bekual duah hman lo, ka bul hnaihah amah a awm lo lehzel bawk nen.." tih pahin phone ka off hmiah a. Hmeichhe nghal fe fe hi an tam mai si a biakzui tlâka polite lah a nih loh hmel ropui si.

A rawn call nawn leh chiam pawhin ka chhâng duh îkhaw tawh lo, Zomuani lah phone hmang thei tur a la ni rih chuang lo va nui suk chung hian hospital lam ka pan ta a.

Zomuani pawh a lo harh tawh a, nichina a chau hmel zualpui kha reh tawhin hmuh a nuam ta deuh.

"Bawiha, in lam kan ngaihtuah deuh si a engtin nge ni ang?" Cabin ka luh rual rualin ka pa'n a lo ti nghal a.

"Zomuani ka lo awmpui ang a in pathum khân hâw chho mai rawh u, Siambawih, ka thawmhnaw hâkthlâk tur leh towel naktukah min lo thawn rawh aw," ka ti ta a.

"Nia, awmpui rih angaih hmel si a, keni nupa lah kan lâktlâk mang si lo nen Nubawih, Bawiha nen lo awm phawt mai rawh u," ka nu'n ati ve bawk a.

"Ka harh ṭha tawh tho a, awmpui ka ngai lovang cabin-ah min dah duh mai mai a ni, ka zia mai ang," Inthlahrung taka Zomuani ṭawng chu ka nu leh pa'n an bengkhawn lém lo.

"Bawiha'n awm tura a duh che chuan a kutah innghat hmiah rawh," ka nu bawkin a ti leh a, kan damlo-i pawh a ṭawng zawm ta lo.

Ka nu leh pa te hâw hnu-ah kan pahnih tê chauhvin kan awm a, a la chau ve bawk nen ka be tuitam vak lova TV a awm tho a kan thlir dun mai mai a, nichina amah biak tumtu khâ 'tu nge' tih zawh ka duh viau nâa ka sawi lang ta lo.

"Fk, eng tin chiah nge ka awm?" A ti sap a.

Nizana a awmdan leh damdawi in kan panpui dan chipchiar taka ka hrilh chuan min en deuh ngar a, hrehawm ti hmêl a pû!

"In lo buai âwm hle mai, ka û ka bia ang a Lawngtlaiah kan haw mai ang," a ti ta a.

"Tunah hâw thei i nih loh kha, zanin leh naktuk thleng i zun an la siak dawn a, i û be mah la ka remtihna lo chuan in hâw chuang lovang, i hna thila zin i ni a, ka mawhphurhna i ni." Ka ti hmiah.

"Cabin awmna man te hi pêk a ngai dawn a, tunah eng mah ka nei hleinem"

"I pêk a ngai lovang, ka thu awih la ka sawi ang zelin awm bawk la i mamawh engkim pêk i ni ang, ṭawng tawh lovin muthilh tum rawh." Ka tih chuan min chhân tumin a âng zuau a; ka kut phar hluai chung hian, "Ṭawng tawh suh le, i chau lutuk ang," ka ṭhutna aṭanga tho chhuakin pâwn lamah ka chhuak ta a.

Zomuani hi hmeichhe mak tak niin ka hria, Lawngtlai khua a ni tih leh a nu a boral tawh tih bâk a chanchin pakhat mah hriat ka nei lo va, ka duh tih phat buai pawh ka tum hek lo. Nakinah hmaichhanah ngei hrilh ka tum ruh hlê.

Corridor leh hospital kawtah ka vei sek a, a kianga ka awm chuan min biak phêt a tum a, tun dinhmun atân chuan ṭawng ṭawng kha a tan a ṭha rih lo.

Nichina min rawn betu bawk khân min lo call leh ta a.

"Zomuani khawiah nge a awm?" Ka pick rual rualin zuk ti nghal a!

"Zomuani ka vêng lo."

"Lalfakhlu eng manger pawh ni la, ka nau khâ min biak tîr loh chuan i rin aiin ka nasa ang," fiah fak leh inringtâwk zeta rawn ṭawng chu Zomuani û lek niin!

"Tunah chuan a biak theih rih loh." Ka ti nghut a.

"Eng nge a biak theih lohna chhan sawi ta che, ka rawn chhui chhuah kher a ngai zâwk em ni? Min hrilh loh chuan tun aṭanga dârkar thum liam hmain ka rawn hre tho ang," ati hmak hmak a, hmeichhe nasa tak leh dawhtheihna tlachham tak a ni.

"I duh chuan rawn chhui sawmkua rawh, Lawngtlai leh Lunglei te chu a inhnaih êm mai.." ka ti ve tlat a, hmeichhiain min han vau khanglân chu le. A ve lutuk a!

"A ṭha e, dârkar thum hnu-ah ka rawn bia ang che." Ka chhân hmain phone a off ve daih.

Eng ang unau nge maw an nih le! Zomuani pawh a nasa reuh tih tawh nâk laia a û phei chu Sakeibaknei a ni ringawt!

Cabin-a ka luh leh lai chuan Zomuani a lo meng kar a, ngun taka thil ngaihtuah hmêl a pû.

"Nâ i nei em? Ei châk te..?" Tia ka biak chuan a lû a thing nar nar a, chaw ei an la phal loh avangin tuiril lam chauh a ei thei a.

"Fk, engtik thleng nge ka awm a ngaih ang?" Tia min zawh chuan, "A chamah chauh i chhuak thei dâwn a,"

"A va rei âwm ve, kan chawi hnem ngawt ang," a ti leh a.

"Kha lamah khân i rilru tibuai tawh suh, ka ngaihtuah vek dawn a lawm, ka nupui rûk thar i nia," tia ka fiam chuan a nui sak a, hundang chu nise min chhâng leh hrepin ka ring.

"Ka lawm e, min buaipui lo la chuan.." sawi zawm lovin a ngawi ta reng a, a lungchhe deuh a nih hmel! A khumah ṭhuin a samah ka chûl sak a, "Damna tluka hlû eng mah khawvelah hian a awm lo, pawisa te chu kan dam anga kan thawkchhuak leh mai dawn a lawm," ka rilru dik takin ka chhâng ta a.

"Ka lawm e, ka rûl leh vek ang che," tiin ka kutah a rawn vuan a, a vawikhat nân ka kut a chelh ve ta!

"Zomuankim, ka duh che tih i hria tiraw?" Ka ti sup a.

"I sawi hma chuan hre lo e," min vawnna a kut lâksawn a tum chuan ka chelh nghet sauh a.

"Kei hian ka duh che, sawikual duah ka thiam lo, ka duh che ka tih chuan ka duh che a ni tawp mai,"

"Ih..Thildang sawi ang.." lehlam hawi a tum chuan a ner sak a, an zaina lai kha a nâ a ni maithei.

"Chêt tum rih suh, a ṭhuina i ti peh hlauh ang e, i chhânna ka nghâk dâwn a nia, tlangval puitling ka ni tawh a, nupui neih hun tawh ka ni bawk, tlang taka sawi hi ka mizia a ni." A kut ka hûm nghet sauh a, tâlchhuah a tum bik lo.

Rei fê kan ngawih hnuah, "Nang leh kei te zawng kan dinhmun a inthlau êm mai.." ati ta a.

"Dinhmunah buai a ngai lo,"

"Ka buai si alawm, â sawi tawh lo ang," a tih chuan ka la duhtâwk awzâwng lo.

"Min duh rawh tiin ka nawrlui lo ang che, keimaha innghah i duh erawh chuan min hrilh dawn nia," a mitah tak ka en a, min duhna ni âwm tak lo lang chhuak chu ka hmusual lo tih ka hria.

Muangchânga kûn hniamin a hmuiah ka fâwp ta a, min chhâng lo nâa a ṭang bik miah lo. Zomuankimi hi ka duh ngawih ngawih nia!

Chumi hnu chuan kan boruak a dang ta daih, a chângin min muthilhsan a, a rawn men a pianga min hmuh chuan a nui sak zel a, cabin-a chaw an rawn dah luh lai pawhin a samah ka chûlsak hliau hliau a, ṭawng duah lo mah ila kan inkâr boruak a zângkhai zaih tawh.

"Chaw ei la," a tih chuan ka nui suk a, "I ei ve thei dawn si lo va ka khawngaih deuh che.."

"I puar chuan ka puar a ni mai," zuk ti ve ngei a! Ṭawngkam thlum leh kikâwi duah sawi lo mah se a chêtziaa min duhna lang chhuak hian min ti lâwm daih zâwk, hmeichhe dang anga sawi kûr lûk mi khâ a ni lo tlat alawm.

"Damdawi in kan chhuahsan veleh kan khuaah ka hâw ang aw.." a rawn ti teh daih a. Ni e, ka hnuaia thawk a ni a, chawlh pe theitu pawh ka ni ngei alawm.

"Ka la sawi mai thei rih lo, han dam fel phawt la kan ngaihtuah dawn nia," ka ti mai a.

"Ka thil zir tur khâ Siami lo thawn teltîr la.."

"Theihnghilh rawh, hahdam i mamawh ber."

"Kârkhat han awm dawn chu leh! a va ninawm duh dâwn ve," ati leh a.

"I kiangah ka awm zel dawn a lâwm, ka buaipui vek ang che tih ka sawi tawh kha.." min chhân tâk miah loh avang chuan ka ve en a, a lo muhil daih! Ka ko harh duh ta lo va.

Cabin-ah Khum pakhat chauh an dah avangin ṭhutthleng tawngchham tâwkah ka mut angai leh dawn chu a nia, Millionaire ni lo mah ila ka duhthu ava sâm si lo êm! Zomuani bulah mu dâwn ila zai hlim a nih vângin thiltih chi ninghal lo chuan.

Dârkar thum liam hnuah Zomuani û chuan min rawn call leh ta tak tak a, a nau hriat laia biak ka duh loh avangin cabin pâwnah ka inthiarfihlim a.

"Lalfakhlu, ka nau khâ engtin nge i tih? Hospital-a awm ngai khawp khawp a i lo siam le," chhum hmaka tiin a khuh deuh kharh a, a nau damdawi in awm chhanah min puh vêl a maw!?

"En teh, i hresual a nih chu, nang uisathiamah i nau damdawi in awmna chhan chhui chhuak leh ang che, ngaihtuahawm a ni lo tih erawh i lo hre ve mai mai dawn nia," ka ti salh a.

"Khawvar hmâin i hmel rawn hmuh hman ka tum ang, Jail bang i zût ang nge, police tiang mûm i hmachhawn dâwn ka hriat lâwk loh avangin i lo inring dawn nia," a ṭawng na salh salh ngei mai, Zomuani û hi hmeichhe eng emaw tak a ni ngei ang.

He mite unau mizia hi a common lo mai ni lo vin hmeichhe narân neih ve miah loh mi hneh theihna riau leh chaldelhna an nei tlat.

Inhmu ila a ni mai a lawm, thu dik a hriat hunah tuna min ṭawngkhum dan kha ala inchhir ngei ka beisei.

Sakeibakneii hmu tura inrin ka ngai a ngai a nih chu...

B<++++[BeckirafARenthleI]++++>RR

SEGUNDO|BRR

Becky Rafa Renthlei

Chapter-6

Lalfakhlua

Kârhnih chawlh ka nei a, Zomuani training pêk tur ber a damloh tâk si-ah chuan ka thawhna lamah report kimchang theh lût pahin kan pu ka va bia a, 'Hna thila zin a ni a, kan mawhphurh a nihna chen a awm ve alawm, a ṭûl ang lo buaipui la nakinah kan siamrem dâwn nia' a ti deuh thlap a.

Zan dâr kua a ri tawh a, nachhâwkna vawihnih bâk a la lova rinai takin a ziaawm phian mai! A zun an siaksak avangin paih a ngaih hun a piangah ka paihsak zêl a, ka nupui pawh ni lo leh ka thisen zawm ni miah lo heti khawpa ka buaipui ta mai hi mak ka inti!

"Zo.." a mut dan nawm loh hmel zet chu siamremsak tumin ka ko a, rawn meng diar diar chung hian, "Toilet-ah min hruai mai dâwn em ni ang," a ti sap a.

Dimtêa pawm thawh ka tum chuan, "Min chelh la keimahin ka kal thei ang," zuk ti tlat a.

"A chi loh, ka pawm mai ang che, i zia deuh hunah duh tâwkin i kal leh dâwn a lawm," min hnial hman hmâa pawm kâng nawlhin Toilet-ah ka luhpui ta a. A zun siakna bag a keng thung a, ka rin ai daihin a zâng!

"Pâwnah min lo nghak la ka rawn ko dâwn che nia," a hmâi sen ṭâwn ṭâwn aṭang chuan a zak hlê tih ka hriatsak thei mai; "Eng mah zahthlâk a awm lo a nia, natnate hi kan duh thû a ni lo a, na chung chunga chêt luih tum ai chuan rinchhan tlâk mipa ka ni ngei tih fiah nân keimahah innghat hmiah rawh," Tiin ka chhuahsan ta a.

Zû ka in ṭhin ngei mai; mahse, mipa nêp leh mî natna hrethiam lo tur khawpa tlawktlaw ka ni bîk lo, nu leh pa thlazar hnuaia nuamsa taka awm thei Lalfakhlua hian damlo enkawl thiam mah suh ila thiam loh neih erawh ka tum miah lo thung, keimah inháivéng thei khawpa mipa tumruh ka ni lovem ni!?

Cabin khum hi pahnih mut nân a zîm deuh si a, nupa ni ila chuan a mut dun theih mai ang a; mahse, chutiang ni hek lo, ṭhutthleng hniam zeta mut leh a ngai nge nge dâwn e.

"Fk, ka inpeih a nia," Min rawn koh chuan rang zetin ka tho nghâl a, damlo ka buaipui ṭhang lo bawk nen ka khawr deuh ṭût nia! Commode (European type) ah ka ṭhuttîr dân ngai ngai hian a la ṭhu a, a bânah Venflon an la vuah a, drip kal lai a zawh tawh avangin nurse-in min phâwisak ta kha a nia.

"I kekawr hi ka lo pawtchho mai dâwn em ni?" Zun bag ken a ngai nen amah chuan a ti thei dâwn lo tih a lang reng.

"Ih, maimitchhîng la," a sawi zawh rualin ka nui hawk a, "Ka hmu pha teuh lo, khatiang hmun kilkhâwr lutuk en si se turin ka kûn peih lo," ka tih chuan a nui ta a, "Awi, nangmah vâng!" Commode-ah bawk a ṭhu thla leh a, an zaina lâi a hup ta vang vang a.

"A na em ni?" Ka aw-a amah ngaihtuahna lo ri chhuak chu a hrethiam a ni teh chêk ang, ka mitah min enin, "Ka nuih zâwngin a na zêl," a ti a.

"Nui lo mai rawh, nuih hi a hrisel an ti tak nâa i hrisel loh vânga damdawi in awm i ni lawi sia nui malêk rawh," ka sawi zâwngin ka nui lo chauh. Amah lah chu a nuih a za tulh tulh em maw ni!

"Ṭawng tawh miah suh, i ho si.."

A kekawr hâk ka pawhchhohsak lai chuan ka nghâwng zâwnah a thaw lum ham ham a, kei erawh a duh ang ngeiin ka dâk váh thung.

Toilet aṭanga kan inpawm chhuah hnu lawkah nurse a rawn lût a, "Innu bulah mut kan phal rih lo a nia, naktuk zan aṭang chauhvin aw.." a nui sâng a, Zomuani hi ka nupui emaw a ti chiang!

"Mut ka lo tum deuh a nia i lo sawi kher a.." tia ka chhân chuan kan damlovi'n ka hnungah a sik a, ka nuih aza hlê.

Nurse in drip a rawn zawm leh ta a, "A zawh dâwn hnaihah min lo ko mai rawh aw, zanin chu i mut hmel loh.." fiamthu a duh hmel reuh kher mai, nui var var chunga min chhuahsan hnuah, "Kan nu a ni lo ti ve mai ta che." Zomuani'n a ti a.

"Ka pasal a ni lo, lo ti ve mai la.."

"Chhe hlê suh, Faka.."

"Min û tawh rawh, Faka, Fk, Fakhlu tia min ko tur chuan ila naupang mah mah," a sam thur hiang chûlmâm pahah ka tih chuan min en deuh vang vang a, chutah, "Sir tia ka koh nghal loh che.."

"Zomuankim, 'aw le' tia min chhân hi eng ati nge i hreh em em mai le! Damlo che thei lo i ni chung pawh hian i kawlh hrâ reng mai a; mahse, ka duh che.."

"Min duh tak tak em?" Tia min zawh lêt chuan, "Duh chu duh, duh loh chu duh loh," kûn hniamin a chalah ka fawhsak zauh a, a nui ta sak a.

Muhil tura ka nawr sek avang leh a damdawi eiin a chhâwk tâk avangin a muhil ve ta nge nge a, ka khua a har ru kher mai! Ni rei lo te chhung chauh inhria ni mah ila hmân aṭang tawha inhresa ang maiin ka nunah hmun a chang nghal hi thil mak tak a ni!

A Drip khai lai a zawh hmâ chuan muthilhsan chi ni hek lo, ka phone-ah games ka khelhsan ta a, ka nu leh pa'n in an thleng tawh a, Zomuani duat hlê turin min chah ngun hlê a, unau pianpui dang ka neih loh avangin ka nu leh pa hian keh thei dawm takmeuhvin min dawm a, Delhi-a ka chhuk dâwn pawh khân, "I tân hnathawh hah angai lo, rilru i neih chuan ka pension hunah i eizawnna tur kan dap dâwn nia," ka pa'n a ti ṭâwk ṭâwk a, min thlâkhlelh vang a ni tih hre mah ila keima thawhchhuah ngeia inchâwm ka tum ve tlat tih ka sawi avangin min hnial ta lo.

U Zorini'n pasal a neih hnu khân an khawhar a zual a, nupui nei turin min nawr fo ṭhin; mahse, ka tum ram ka la thleng lo mai ni lo vin nupui tur hmeichhia ka duh zâwng tak ka la tawng lo te pawh a ni mahna.

Kan pu fanu Ruatdiki nen kârkhat vel kan inkawp ve hman a, a nun dan sâng lutuk leh huau huau lâwm lutuk a ni tih ka hriat khân ka ngaina lo, hmeichhia min pâk huamtu ai chuan a hun leh a hmun hria zahawm taka nung mi hian ka mit an la fê zâwk.

Zomuani pawh hi ka hnuaia thawk a ni nâa a mize ngêng ngalh leh a boss ka ni chung pawha min tlawn tum miah lova induh larh a nihna hi amah ka duhna chhan pakhat a ni.

Khawvar dâwn hnaihah drip khâi a zo chiah a, nurse sawi ang deuh tak tak khân ka tlaivar chiang kher mai! Zomuani erawh vawikhat mah a harh miah lova a lawmawm lamah ngai ang.

Data ka on rualin whatsapp tone a ri ṭak ṭak a, tihtur dang awm hek suh, a indawt dân a ka en diat diat chuan Zirsangliana min rawn biakna ka hmu teh tlat a!

#Lalfak zuheh, nautê kan nei leh ṭêp tawh a nia, min rawn tlawh rawh. Ka chhiar zo chiah ka nui suk a, 'Zuheh' tia min koh fiamna hi a la rei hauh lo, an inneihni khân Maneihi phal lo chung no hnih ka in pek a, Mafelin min en hrek hrek tih ka hre tho nâa in châkna sualin min hneh ta zâwk kha a nia.

# I va phâwi rang ve le, keiin fa chu sawi loh nupui ṭhen leh tur tal pawh ka la hmu îk lo a nia. Tiin ka reply a.

Min la rawn chhâng nia.

"Pawisa ringawt ngaihtuah lo khân nupui tihtlâk deuh dap ve tawh rawh.

# Innu ang tarmit vuah râ kha ka chhar thar a nia.

#Tak tak em ni, khawi a pic? Rang lutuka min chhânna ka hmuh chuan Zomuani khuma a mu lai thlâ ka va lâksak leh tê tê a, tarmit a vuah lo nâa a lang ṭha daih zawk.

#Eu! Damdawi hlâwm lian elaw! Chhe lo deuh ve?

Kimchang takin Zomuani chanchin ka hrilh ta a, min phurpui hlê, 'Aizawl in lo phei veleh chaw lo ei ngei ngei ang che u, i car thar ang kha kan duh ve' a ti ta a.

'Elantra' ka car thar ang Zirsanga'n a duh ve tih ka hriat chuan ka khi suk a, nupui la nei lo se chuan ka'n nawi dun tur a nia ho sihsah ngei mai.

Annu car 'Santro new model' pawh kha kan company tho a ni a, down payment Mafeli'n a rawn buaipui tak nâin Engine oil leh Break oil vel pawh ka neih sa Zirsanga bûr hnih ka pe ta kha a nia, ka ṭhianpa te tân hian ka inhuam thui hle bawk. Rafaela ball boot leh Jumper suit Delhi aṭanga ka hawnsak pawh ka la pe lo a, Duati erawh Aizawlah ka leisak mai ang.

Khawvar thleng rak Zirsanga nen kan inbiak hnuah ka zin veleh ka tlawh tur thu sawiin ka intiam deuh thlap! A farnu Arini'n nau a pâi ve a, an lawmzia hahîpa a rawn sawi chuan ka thinlung takin ka lawmpui.

Zomuani a rawn harh tâk avangin kan inbe chhunzawm ta lo va.

"Fk, ka zun a chhuak lutuk.." a hám zui bâi bâi a, zun siakna an la vuah reng chunga 'Ka zun a chhuak' a ti tlat chu mak ka ti hle mai!

"Eng ati nge pipe an vuah tho sia!"

"Ka hrethiam tawh bik lo, ka tâi a puar ûl mai!" Ati leh sap a, ka hrethiam ta hauh lo, nurse duty ko turin ka chhuahsan ta a, a pipe vuah ka ensak te chuan a chî nâng le! Hus!

"A lo in block deuh hman a nih hi.." nurse-in a drain sak lai chuan pâwnah ka lo awm a, an zai vang nge Zomuani zâwiawi raih chu a ngainatawm letling phian! Kan inkâr ṭang ru at ṭhin khâ hmuh tur a awm tawh lova a unaunu pawh a lam tawh bîk lo, keimaha a innghah ngam phawt chuan ka ti beidawng ngai lovang.

"Fakhlu, hospital kawtah kan awm tawh a nia lo chhuk rawh," whatsapp aṭanga min rawn betu chu Zomuani û Sakeibaknei kha zuk ni reng a!

#Min hmu duh chuan min rawn pan mai rawh se. Tiin ka reply a, min chhâng tawh lo.

Lawngtlai aṭanga a rawn kal a nih ngat chuan nizana kan inbiak zawh khân a rawn chhuak nghâl tihna a ni a, a nau a ngaihtuah hlê tihna nge, kei min rawn diriam tur tih pawh ka hriat si loh!

Cabin chhungah ka lût leh ta a, Zomuani hmêl dam raih leh dâng bal ka hmuh chuan a û chungchang hrilh ka hreh leh deuhva min hmu turin a lokal thuai tawh dâwn tho a, a nih nih ni mai teh ang.

"Fk, i duh chuan min hâwsan tawh la, nurse duty an fel tho a i chau lutuk ang."

"Chau lo e, ka nupui rûk bula hun hman ka châk rih e.." ka nui suk suk a, hetia ka fiam a piang hian a lâi titih ringawt zêl, a kum naupanna a lang leh zauh ṭhin bawk. A langah ka ngaihven hûrh lo nâin ka ngaihsak hlê a ni tih chêtziaa ka lantîr hi a tâwk rih viau a ni.

"A inthlahrunawm êm a lawm, i pa an transfer dâwn bawk nen tihtur in ngah âwm si a ka ti khawlhkham vek che u.." a ti nang nang a. Ka nu biopsy an la tih ka la hrilh lo mah mah! In lam ngaihven lêk lovin amah ringawt ka buaipui tih hre phei se chuan min fâwp nawk nawk duh ang chu maw le.

"Inthlahrunna tur a awm lo, le, khatiang lam sawi awih tawh loh aw.." ka tih chuan a bula ṭhu turin min hûi zauh a, ka pan rang teh a nia.

"Min ngaihsakna leh min enkawlna zawng zawngah lawmthu ka sawi e, in khua kan panna kawngah ni se ka tibuai char char che a, i driver ni siin nangma'n i khalh a ngai a.." a châwl dat a, sawi zawm leh a tum lâi takin Cabin kawngkhar a rawn inhawng ta a.

"Lalfakhlu, Zomuani ka be duh tih ka sawiin ka hria.." ka hmingpuma min kotu lam hawi tura ka inher chu ka meng deuh kâwkin ka hria.

Kawngkhar bula hmeichhe ding chu mizo hmeichhiaah chuan sâng fia fia tak a ni! Zomuani pawh sâng ka ti tawh a nia a û phei chuan min chen thuakin ka ring! Kekawr dum a taksa rem zaiha ṭhui a hâ a, a chungah kamis body fit pawduk raih a inbel bawk a; a sam tâwi mât chu a fai hmel sar sar khawp mai, a ngo hlê a, a mit a hnawih dum mah mah, ka va hmu kim hman si êm.

"Hei, i hmu tawh a lawm, a ṭha e, a ni lawm ni Mate.." Zomuani lam hawiin ka tilui deuh kher a.

"Ah, Mâm, Fk-a nen in inhria elaw!? Ati hau a.

"Hre eih lo, i ṭha em? Hepa hian eng mah a hrilh na che nge?" Zomuani u chuan a ti hmak a.

"Tikhân lo inkâwm ula ka chhuahsan ang che u," ka tih chuan 'Mâm' tia a koh nu chuan chiang kêk kâwka min melh chung hian, "Chhuak lo ve a, ka nau damdawi ina a awm chhanah hian telvena i nei ngei ang," phone-a a ṭawngkam aiin a takah phei chuan a nelawm lo leh zual.

"Nei ve e, kan in aṭangin damdawi in thleng hian ka phurthla a, a bâk chu i nau hian a hrilh fiah thei ang che," ka ti nghut a, hmêlah inang viau mah se an ṭawngkam erawh Lei leh Van hlauh a ni.

"Mate, a sawi hi a dik em?" A nau bulah kalin nichina min huatna mitmeng khâ a pu tawh miah lova Zomuani kutah vawnsakin a beng bulah eng emawni a hrilhru sap a, ka huat zâwng tak.

Hna sâng leh zahawm tak chû a thawk lo tawp ang, kum thû-ah nise kei aiin a naupang daih a, aia upa zahna a tlachham thawkhat tih a hriat mai, ka sual a chhuak leh tlat pek nia.

"I nau hi ka hnuaia thawk a nih bâkah amah enkawl hi ka bat a ni a, a dam veleh kan innei dâwn tih lo hria ang che, râlkhat aṭanga i rawn ngaihsakna khâ ka mamawh vak lo." Chiang fek fawka ka ṭawng chhuah chuan anpahnihin an mengphâwk ngang mai!

"Hey, i duh duh sawi ringawt suh.." tiin min melh tür khai nia! Zomuani erawh a ngawi ngal a, hei tak hi a finna a nirêng a ni. A û nen kan boruak a kip a kâwiin a hre ve lova ngawih a chuh tih ka man thiam vek.

"Ka duh duh sawi thei tura zalên ka ni,"

"Duhtâwk teh u, Fk, hei hi ka û ka phirpui Lalmuanpuii a nih hi, Mâm, ani hi Lalfakhlua ka boss a ni e," tia Zomuani a lo inrawlh chuan Lalmuanpuii chu a ner sak a, an hmêl aṭang ringawt chuan thliar hran theih pawh an niin ka hre lo; mahse, sam tâwi zawk hi Lalmuanpuii tiin ka chhinchhiah thei ang chu.

"I thawhna pa hi a polite lo viau a nih dawn hi, i chanchin sawi tumna a nei lo mai ni lo vin ṭawngkam mawi pawh a hre lo," min ti lêt erh nia! Zâm lo deuh ve, ka nupui chu nise zantin hlap er ka duh ang.

"In inbia tih pawh ka hriat ve si loh.." Zomuani'n a tih sap chuan, "Min rawn call lai khân nikhua i hre lo a ka hrilh duh ta lo che a nih kha, bâkah lokal a tum tho a i hrilhfiahah ka khêk," tih pahin ka chhuak zui ta daih a.

Khanu kiangah khân minute rei lo tê ka awm leh a nih chuan kan inchhâng lawk mai ang, hmeichhia khin khin te chu a pa lo êm mai.

Hospital corridor-ah ka vei tawn sek a, phir inang tak anni! Lalmuanpuii a sâng zawk a, a kawlh hmel hlê bawk a, Zomuani pawh ka hriat tirh khân nasa ka ti a nia a û phei chu a nasa mah mah ang. Nu an nei tawh lo nâa an unau hian hmeichhe lu zo veh vawh chu anni ngei mai.

Ka phone lâk chhuah tuma ka kekawr ipte ka zen chuan ka ak hauh lo, cabin-ah ka theihnghilh tihna, la turin ka va kal leh ta a, an unauvin eng nge an sawi tih hriat te pawh a châkawm ve a lawm le!

"Mâm, engtin mah min ti lo, i ring chhe lutuk a nih kha!" Zomuani aw a ni, lût ta mai lo chuan kawngkhar zimtêa inhawng zâwnah chuan ka ding ta a.

"Ka ring chhia a ni lo, mipa tumah i hnaih ngai lova an mizia i hre tak tak lo, biak che ka tum pawhin ngeiawm tak takin min chhâng a ka lawm miah lo a nia," Lalmuanpuii aw chang fak chu ka ngei kher mai.

"Eng pawh nise hâw thei ka ni lo a, bâkah amân min duh phawt te chuan hnial ka tum lo"

"A duh che nge, a ît che, tih pawh i hria em ni? Inneih tezawng kha pa khân a duh âwm lo em mai â â suh.." a ti leh a.

"Ka duh ve miau si a lâwm, min duh lo se min buaipui tawp nâng, an chhungkaw dinhmun ka hrilh vek che kha, misual a ni lo.." Zomuani'n min ṭan tlatna chuan min ti nui suk suk a, ka thlang sual dawn miah lo, 'hmangaihna hi a awm tak tak em?' tih fiah tur tal pawhin nupuiah ka nei dâwn khawp mai.

"I thu thu le, a nei duh tak tak che chuan mak ka ti viau ang' a ti leh salh a.

"Inneih lam ka sawi lo, mipa rintlâk tak a ni, a hna chungchâng tiam miah lo pawh hian min enkawlna leh min duhsakna ang hi tû mipa mah hian an ti ve duhin ka ring lo, damdawi ina in awmpui leh lek phei chu.."

"A ṭha a lawm, ka pa ka lo hrilh ve dâwn nia, kei erawh chuan i boss hi ka ngaina lêm lo a nia." Min rêl nasa lutuk dâwna ka hriat avangin ka pên lût ve ta a, an thusawi pakhat mah hre lo ang hmiahin ka awm hmiah.

"Fk, Mami awm lai hian intifai ve la, châw ei tawh rawh aw.." tiin min lo be nghal vat a, 'damdawi in chaw ka ei peih lo' tih ka tum ûk a; mahse, mawi lo deuhva ka hriat avangin ka ngawi leh ta zawk a.

"Nia, ka û te hnenah ka zuk chhuk ve lawk ang e, Muanpui i nau hi i lo awmpui hman ang tiraw?" Dam thlapin ka bia a.

"Hman e, i duh chuan hawsan rawh, kan lo inbuaipui ve tawh mai ang, kan lawm e.." a ti tak nâa lâwm hmêl a pu chai si lo.

"Ka duh hunah ka hâw ang, i nau hi ka kuta awm a ni a, i duh chuan i awmpui ve ka phalsak ang che, â nang ang mi kherhkhiap lutukin damlo i awmpui chuan a nâ zual vek ang a ka buai tam mai mai." Ka ti deuh kher a.

"A nih vel tak chu Pu Fakhlu.." tiin a nui lui sak a, chhâng tawh lovin Zomuani chalah ka fâwp lui leh kher a, ka chhuahsan ta a.

Siami'n ka thawmhnaw a lo thawn châng pahin Serkawnah ka la awm khawmuang a, Zomuani ei theih tur âwm chi ka lei nual bawk. A û inchei danah kha chuan harsa zawk zawk annih loh hmel a; mahse, khanu ve kha mahni dinhmun hre miah lo mihring te pawh a ni mahna.

After 2 hours

"Bawiha, ka nu thî-in a luak chiam a nikhaw hre lovin a awm anih chu.." ka inbual zo bathroom aṭanga ka chhuak chiah u Zorini'n min lo hrilh nghâl a!

"Maw!?"

"Inthlâk la, Zorama ka biak chhungin car lo la chhuak ang che," a phî nghal chung nia! Ka pa ka call hmasa ta a, 'I awm si lo a, driver kan la mai, damdawi in kan rawn panpui dâwn a rawn chho duh suh u..' a tih chuan ka bîng deuh mup.

Ka û leh a pasal Zorama nen damdawi in panin kan tlân chho ta a, anni nupa hian kawng lakah an lo hmuak dâwn a, kei erawh doctor be pahin Zomuani chanchin hrilh ka tum ve thung a, kan buai chiai ngei mai.

Biopsy result kha karkhat hnu a chhuak chauh tur a ni a, ka nu dinhmun a ṭha nge ṭha lo tih tal hre thei ila ṭha tur.

Hospital ka thlenin zîng lam dâr 11 a ri tawh a, Zomuani room dawt chiah cabin ka hauh nghâl a, an dinhmun hre chiah rih lo mah ila nakina buai chûk aiah ka inhmakhua sa a ni ber mai.

Ka nu chanchin Zomuani ka hrilh chuan hrehawm a tih hmel khawp mai, a û pawh a la awm reng a, ṭawngkam khat mahin ka be lo.

"Mami a lo awm hman hlauh chu a tihzia hle mai, buaipui em em ka ngai lova min ngaihtuah reng reng suh," a ti ta.

"Fakhlu, i in ei puar hman maw?" Lalmuanpuiin min be ve teh khiah a, ka chhâng lo nâng a, ka be châk hlawl lo.

"Fk, Mami'n a biak che hi.." Zomuani vâng chauhvin ka chhâng ve ta a.

An unaua an awm tlân phei chuan hresa lo tân hai loh chi ninghal lo chuan! An inang ve êm a ni.

Mihring kan nih chhung hian natna te hrehawmnate kan nuna thleng tura kan duh hauh loh a lo thleng zut zut mai si a, ka nu pawh a dam ṭha reng emaw tih laiin ti hi a ni leh thut si a, kan chhungkua kan tlêm bawk nen a hrilhhai thlâk ang reng.

A tu te mah kan inbe tawh lo a, ka whatsapp tone a rîk chhên avangin ka en a, number hriat loh bawk! A dp-ah eng mah a dah lo a, tu nge tih ka hre thei lo.

# I chhe lo thlâwt.. tih tê hi a lo awm a. Rilru buai lai lai a..

Ka chhâng lêm chuang lo. Mahse, ka call chhin ta a, Zomuani lukhamah a rawn ri chhuak daih! Ka off rualin a tâwp leh chaih a, ka call leh ngat.

Zomuani lah chu eng mah hre lo ang maiin a maimitchhing daih a, a û lah chuan ama phone a kheuh ngar ngar a, a ngaihsak dêr lo, Zomuani lukham ka va en sak ta a. Phone thar hlak a lo awm a, whatsapp ka checksak chuan amah Zomuani lek lo niin!

Phone thar a lo nei tawh tih ka hre mai a, Lalmuanpuii a awm mai mai lo tih a hriat hlê mai, keima'n leisak ka tum rilru deuh khâ a nia, min chêt khalh hman.

"Hey,..." Zomuani chu muhil ang chiahin a awm a; mahse, ka thinlung hian a harh tih zuk hre tlat a.

"Muhil der chu kaihthawh an harsa.." ka tih chuan a la che duh chuang ṭhak lo nia!

"A muthilh a pianga kaihthawh i tum zêl chuan a hahdam thei nâng," Lalmuanpuii bawk a lo inrawlh leh ta.

"Ka thinlungin a hriat hmasak hi a dik viau ṭhin," tih pahin Zomuani beng bulah, "Chhe lo min tih avanga i muhil dêr zêl dawn a nih chuan, chhiat loh ka duh lo.." ka ti sup a.

Rawn meng chhuakin a nui ta a.

"Lalfakhlua ka'n bum theih loh chu le.." ti sapin a nui ta var var a, Sakeibakneii a tûm hmak thung.

Lalmuanpuii ngaihsak lo lêkin Zomuani nen a phone thar kan khawih a, ka nu te an lo thleng tawh tih ka û in a rawn sawi tâkah chuan Cabin ka chhuahsan ta a.

Ka nu in eng êm a ti lo turah ngai ila Zomuani dam veleh nupuia neih ka duhthu ka hrilh ngei ang.

Zirsanga kan chanchin hrilh tuma ka call chuan Mafeli'n min lo chhâng a, 'Lungngai reng reng suh, kan lo ṭawngṭaipui dâwn nia' tia min ṭawng thlamuanna chuan nupui neih min ti châk sauh.

Ka natna leh ka lunngaihna ka hlimna leh lâwmna min ṭawmpuitu tur nupui ka mamawh rêng a ni.

B<++++[BeckirafARenthleI]++++>RR

7.SEGUNDO|BRR

Becky Rafa Renthlei

Chapter-7

Lalfakhlua

Ka nu 'Stretch'-a an rawn zãwn ka hmuh chuan ka nghilh deuh dup thei nia! Pathian zarah kan chhungkua hian natna khirhkhân kan la tuar lo tlâng a, a hrilhhai thlâk ang reng.

"Fk, thisen unit hnih pêk a ngai dâwn a engtin nge ni ang, blood bank-ah a milpui a awm rih lo va," kan mâkpa hmanhmawh zetin a vei thuak thuak a, a va han buaithlâk lehzel tak!

Ka nu blood group hi B+ a ni a, kei leh ka pa'n kan mil lo phawt! U Zorini pawh B+ a ni tho tak nâin tun dinhmunah chuan unit khat bâk a pe thei dawn lova zawn belh angai dâwn hrim hrim.

Zorama nen blood bank-ah kan chhuk leh tê tê a, Venglai-ah an chhûng hnaivai kan zawng dawn nge eng tia tihtur nge tih ka hre mai lo, kan khuaah chuan an awm ngei ang a; mahse, an lo chhuk chhûng nen a rei duh dâwn bawk si.

Zorama'n thil ṭûl a lo buaipui chhungin Zomuani awmna Cabin-ah ka lût a, chanchin hrilh ve hrim hrim ṭha a ka hriat vâng a ni.

"Ka nu thisen pêk a ngai a, a blood group milpui damdawi inah a awm remchang lo nen a buaithlâk khawp mai," a khum bulah ka ṭhu ve a.

"Fk, kan tibuai tam êm mai che, ka û a awm tho nen min rawn ngaihven duh rih suh," tiin ka nu blood group min zâwt a, ka hrilh tâkah chuan, "Mâm, i mil reng a lâwm i pe thei mai lâwm ni, min buaipui nasa bawk si," Sakeibakneii hnenah a ti ta a.

"Ok, ka fit te chuan pêk ka hreh hleinem," zuk ti teh tlat a!

Chumi hnu chuan Zomuani lo awmpui turin nurse pakhat ka bia a, Lalmuanpuii nen kan inzui thla ta a, min be lo mai ni lo vin min en lo hrim hrim! Mahse, ka nu thisen pêk a tum miau a, a mah ka ngéina tih lan kher ṭûlin ka hre lêm lo.

"Ka fit chuan ka pe ang a, fit loh chuan tihngaihna a awm lo a ni mai," Blood test-naah kan lut tawh a, a kal te rêng rêng hi a zangkhâi váh nia maw le! Min en duh hlawm hlê lehnghal a, a âwm ve reng.

Feet nga leh inches sawm ka ni a, Lalmuanpuii hi ka rin dânin 5'6 emaw 7 emaw a ni ang, min chen lo nâa a pian dik thlarh hian a ti lang sâng zual.

"Nia, i fit loh te chuan pe chi i ni hleinem, pêk duhna rilru i pu hrim hrim pawh hi kan lâwm viau a nia.."

"Kan lâwm tih lêmah i lâwm chiah em maw ni, ka nau i lo buaipui nasa bawka kan lawmthu sawinaah i ngai mai dâwn nia," a bân ding lam nurse hmâah a dawh dâ a, a thisen test tur an lâk lai pawhin a phu chhin eih lo.

"Hey, Miss," Wheelchair-a ṭhu mi pakhat hian Muanpuii chu a rawn vai lauh lauh a. "Famkim, i zia em? Nakinah ka lo tlawh dâwn che nia," nui sânga a chhân lêtna chu tider a ni hauh lo, a hlim hmel tak tak a, ka bulah lêm, nuih chu sawi loh 'û Tûmi' a ni ringawt!

Nula lepchiah tak a nih loh chuan a fit lohna chhan tur awm nghâl lo chuan! A hrisel hmel ropui si.

Ka rin ang chiahin a in fit a, unit khat ka nu a pe ve dâwn a, ka thinlung takin ka lâwm, Zomuani vâng a nihna chen a awm a, ka û in unit khat a pe dâwn bawk a ngaihtuah buai ngai lovin kan fel dêr.

"Bawiha, i ṭhiannu chu Zomuani û em ni?" Ka nu awmna Cabin-ah kan awmkhâwm ṭaih a, ka û te nupa leh Lunglei lama kan hnaivaite pawh an awm nual.

Ka pa lam hawiin, "A nih hi, a nau rawn kanin a lo kal ve tak nâa kan chhawr ṭangkai ringawt mai si a, 'Muanpui' tiin ko mai rawh u.." ka tih chuan Lalmuanpuii a ner sak a, ka thusawi engkim mai hi a ngai haw vek ni berin ka hria.

"Muanpui, engtik thleng nge i awm theih ang?"

"Zaninah ka lêt leh nghal a ngai dawn a, in lamah ka pa ringawt a awm sia ka ngaihtuah deuh, Matei hi ka hruai haw mai dawn em maw ni?" Ka pa zawhna ṭha takin a chhâng leh lawi si!

"Ekhai! Hruai haw chi ninghal lo chuan, tihian awm dam rih rawh se, in inphur khaw lo vek ang,"

"Inbuai ve nen Lawngtlai hospital-ah kan insawn mai ang ka lo ti deuh a," a ti leh a. Ka ngaih dan a pêl leh ta.

"En teh Muanpui, a tuartu kan nih ve loh chuan sawi a awlsam viau a nia i nau i ngaihtuah tih kan hre tho a; mahse, zai hlim a nih bâkah ka hnena awm a ni a ka lo buaipui zui mai ang," ka ti hmiah a.

Min chhâng miah lo! Ka chhungte awm ve vâng a nih ka ring a, phakar lutuk! Nakin lawkah a Sakeizia a lang leh tho ang.

Ka nu a rawn harh tâk avangin Zomuani room lamah ka insawn phei a, ka û te nupa leh ka pa an awm tho bawk a, chuti lutuka ngaihven ngâiah ka dah lêm lo.

After 4days

Zomuani pawhin ziaawm lam a pan zêl a, ka nu te niminah an chhuak thung a, kan khua thleng ka han dah hnu-ah ka lêt leh ta kha a ni a, zunthlum leh Bp sâng a lo neih ve avângin treatment pawh in lama chhunzawm mai tura tih kan ni. Naktuk hian Zomuani pawh a chhuak thei dâwn a, a tihzia viau!

"Fk, kan khuaah ka hâw mai ang," vawi eng emaw zât Lawngtlaia hâw a ngên tawh a, ka remti si lo.

"Inthlahrunna tur pakhat mah a awm lo, kan inah châwl hah dam la chumi hnuah kan chungchâng kan sawi dûn ang."

"Ah, eng mah sawi tur a awm hran hleinem.." a ti sap a.

"Nupui nei rual ka ni tawh ka tih kha, ngaihzawng neia lerh kual mai mai hman lah ka ni hek lo, ka nu leh pa an upa chho zel a ka inbenbel a hun tawh a lâwm, inkawp rei leh rei lovah ka buai hek lo, pasal a tâna min duh chuan inneih hmiah ka duh." Tlang hrêk hrâwkin ka sawi ta a.

"Ka chhungte ka lo be ve dâwn nia," a bâk sawizawm tur a hre lo.

Lalmuanpuii thusawi vâng hrim hrim pawh khân mipa rintlâk leh inghahna tlâk ka ni tih ka târ lang dawn lovem ni? Ani hmeichhe chapo satliah khân khawia pasal mah a hmu zo nguar ang.

Zankhat pawh riak khawtlâi lovin Lawngtlai a pan lehnghal a, ka nu thisen petu a ni ve bawk nen damdawi in kawt thleng ka thlah ve ta kha a nia, mak ka tih deuh chu Police Gypsy-ah driver-in a lo nghâk thlap a, min be tuitam lo khawp mai.

Amah police ti dâwn ila ka ring chiah bawk si lo a, a khalhtu kha a bialpa te pawh a ni mahna, Zomuani zawh ka tum ûk a; mahse, ngaihven hûrh ang a lan ka duh loh avangin ka zâwt ta lo.

Cabin-ah Zomuani nen kan pahnih chauhvin kan awm leh ta rak rak a, chips leh soup tihvel bâk ei theih a lawi pawh a nei lo. Kan awm tlâng tam tulh tulh a, a tîra a mize ngêng ang kha hmuh tur a tlêm telh telh bawk a, ka sawi ang a piang thuawih deuhvin zuk zâwm zel a!

Toilet-a a kal dâwnah erawh ka hruai a duh tawh miah lova ka nawr lui thei ṭhak lo! A duh hunah nu zêmin awm dan a thiam a, a thin buluk erawh a nasa ve thawkhat tih ka hre tawh tlat.

"Fk, i nu leh pa te'n inneih an remti ngawt dâwn em ni? Hna mumal sawi tlâk ka la nei si lova.." Khum lu lam kan kam kâng a, a hnung zâwkah kei ka ṭhu a, min nghêng rial thung.

"Phal e a, ka nupui turah duh an thlanna chhan tur a awm hleinem, misual tak annih ngawt loh chuan a neitu tur ka thû ber, kan khuaah hian neih hman ngei ka duh bawk a nia," ka tih chuan, "A va han chawpchilh rem rem ve, ka dam hman lovang," a ti hliai a.

"I la thi lo chu a nia lâwm, eng mah lungkham tur a awm lo, ka remruatnaah innghat la, engkim ka kutah dah hmiah rawh, in chhungkaw chanchin min hrilh teh le.."

Min chhâng dâwn tawh lo emaw ka tih hnuah muang ban chap hian a sawi ta a, a pa natna khumah a mu reng tih a sawi chuan mak ka ti lo thei lo. A pa enkawl nâna sum thawhchhuah angaih thû thlengin a sawi ta a.

"Tuna i hna hi i thawk zawm dâwn nia, i hlawh erawh i duh ang ngeiin i pa enkawl nân hmang la theihtâwp ka chhuahpui ang che." A mittui tling pam ka hmuh chuan ka kuah ta vang vang a, damlo a nih chu thuhran; ka hun liam tawhah hmeichhia ka lo mutpui tawh a, Zomuani hi ka ît lo a ni bik lo; mahse, ka nupui a nih hmâa khawihchhiat duhna rilru ka pu miah lo hi mak ka in ti!

'Ka hmangaih che' tia a rilru damna tur sawi ve theih ka duh rualin, a enga mah sawi tur ka hre lova ani paw'n a sawi bîk hek lo! Kan induh tawna chu chuan inneihna min hruai thleng dâwn a ni mai.

"Ka hna hi ka zawm leh thei tak tak ang maw?"

"I duh phawt chuan lê; mahse, a driver ang zâwnga awm chu ka duh miah lo a nia, kan pu ka lo be ve ang e.." ka ti ta a.

Zân a rei ta deuh bawk nen ṭhutthlenga mut a phal tlat loh a, a bulah ka mu ve ta a, a inbual theih loh avangin a inthlahrung hlê tih a sawi chuan, "Ka lo bual ang che, ka maimitchhing tlat ang," tia ka insawi khalh chuan a nui kar kar a, "A kil thim laiin sual lamah a hruai pêng palh ang che," a thil sawi leh a hmêl inrem lo lutuk chu ka nuih lehchhâwnga zanreiah thil ho mai mai sawiin kan men tâk hrep chu.

Khawvar dâwnah ka zun chhuakin min tiharh a, Zomuani thaw sâk sâk leh min kuah chialtu chu thawhsan ka ui kher mai.

Kârkhat erh awrh chauh ka hriat hi nupuia neih ka tum chu a nia, ka thlan sual leh keima tân vek a nia risk a sâng ang reng. Mahse, a mizia ka enin nupuia ka nei tawp a nih loh chuan midang tân ka phal chiah si lo.

Damdawi in chhuahsanin kan khaw lam ka panpui ta a, nupa ni rih lo mah ila engti maw zâwng tak hian kan inrem riau! Ka hmeichhe lo kawp tawhte nen inanna pakhat tê mah an nei lova a danglam zar mai.

Ka û ka phone lâwk vek tawh a, Zomuani thawmhnaw tur leh pheikhawk, slipper a rawn lei sak a, amah hrilh lêm lovin car-ah ka dahsak vek tawh bawk.

"Ka che ṭha ve thei dâwn si lo va a inthlahrunawm ngawih ngawih," front seat-ah ṭhûin min melh zauh a.

"A bul aṭang bawka ṭan ṭhat leh te chu a, Siami a awm a lâwm, a ṭûl ta a nih leh midang awmpui tur kan zawn belh dawn nia, sawi nawn ngai lovin ka room ka kian hmiah bawk ang che.."

"Eh, inphal zâu sâwt ang reng, ka hrilh tawh che ang khân zu in mi pasala neih ka tum lo a nia, i sim thei dâwn em ni?" A ti ta khauh mai le.

"Ka in tawh lovang, tia intiamkam ka tum miah lo a nia; mahse, in loh erawh ka tum ang," ka ti sup a.

"Tûn aṭanga i ṭan nghâl a nih loh chuan i sim thei dâwn miah lo chuvangin ka enchhin ve phawt ang che," Zomuani dik tak mahni inringtâwk em em mai kha a lo lang ṭan ta.

"In leh ta ila engtin nge min tih ang?"

"Kan innei lovang, inneih hmâ aṭanga ka sawi lâwk a nia i tilui a nih chuan engah mah min ngai lo tihna a ni dâwn a, chu chu ka duh loh zâwng tak a ni." Tlang takin a ti hmiah a, ka va ngaisâng si êm!

Ka nihna leh ka hna hian a lakah effect tehchiam a nei lo tih ka hriat phah ta bawk a, sum ûm vânga min neih tum lah a ni hek lo, chu chuan min ti lâwm a ni.

Kawng lakah insawiselna em em teh vak a neih hran loh avangin kan châwl khawmuang lo hrim hrim a, kan in kan thlen dâwnah meuh chuan zâm tih hriat taka min melh chung hian, "Kan chungchâng i sawi dâwn pawhin ka awm loh laiin aw.." zuk ti hrâm a!

Ka nu leh pa'n an lo dawngsawng ṭha hlê a, nupuiah neih ka duh tih ka sawi châk zek zek nia; mahse, a awm laia sawi a duh loh avangin ka insûm ta zâwk a.

"Bawiha, Zomuani khân chawlh hahdam a duh lo'm ni, inzai te hi tih mai mai a ni hleinem," ka pa'n a tih chuan ka rilrem zâwng tak a ni.

Ka nu erawhin kan pahnih chuan chîk zetin min en ru reng tih ka hria, Zomuani paw'n a hre ve thovin ka ring.

Ka room-ah kan inhruai lût ta a, damdawi in kan chhuahsan aṭanga ka lo châk em em tihna hun remchâng a awm ta.

Khumah ka mut fel tîr thlap a, chutah duhthawh leh uar tak hian ka fâwp ta a, min chhâng lêt ve tih ka hriat rualin a âwmbâwr kawh lah chu dimtê hian a kawr chhanah ka khawihsak ta a, ka dik lo ṭan ringawt nia!

"Tâwk rawh se, i dâi chin a thui poh leh luh thûk zêl i duh ang," a hmui lasawnin ka mitah tak min en kalh a, "Inneih hmâa sex hmang lo tura zirtîr ka ni.." a tih chuan ka awih chiah lo.

"An zirtîr che chu i zâwm ṭha em tih hriat ava châkawm ve?"

"Châkna hi sual hlâwm lian a nia," a nui duh miah reuh lo a, ka nghâwnga min kuahna a la thlah chuang hek lo, mipa ka ni a ka fawh reng chuan a sawi ang deuhvin a aia thui kal duhna ka nei mai dâwna ka inlahrang ta zâwk a.

Intih zahawm tum chawp ni lovin amah hrim hrim hi kei aia naupang ni mah se zahawm rûkna riau a nei tlat a ni.

"A hun hmâa ri chhuak pawp lo turin fimkhur ang che," a la ti zui a(h)

"Zomuankim, min thlêm sângsawm mah la ka insûm thei e.." ka tih chuan ka chal sam a pawt zeuh a, chutah, "Thlêm suh ei, i mumangah takngial pawh ka rawn inlan lovang," a nui nghal var var a, tuna a lan dan ang hi a lâwm ka ngainatna chhan. Min hnial ṭâwng ṭâwng ni miah si lo hian hnial theih miah lova ṭawng dan a thiam tlat lawi si.

A room ka chhuahsan rual rualin ka nu leh pa room-ah ka lût nghâl a, "Mo kan nei hnâi dâwn riauva hriatna ka nei!" Ka nu in a lo tinghal thei nia!

"In duh leh duh loh a ni mai," khumah ka ṭhu thla a, ka pa a nui vur vur thung.

"Bawiha, Zomuani hi iaina pakhat mah kan nei lo a nia, ka hmuh tirh pawh khân ka lo hual ru deuh khâ a nia, i ṭang nasa ang reng nen ka sawi thui duh lo a nih kha," ka nu'n a ti fel ât nia!

"In remtih chuan a rang thei ang bera neih ka duh a nia, Aizawla inneih ai chuan kan khuaah hian neih hman ka duh," ka tih chuan ka pa a bu nghauh nghauh va.

"Amah a inhuam phawt te chuan palâi kan tîr thei reng a lâwm, Lawngtlaiah chhûngte kan nei em aw.." a ti leh rih a.

"Nei lo pawh ni ila a buaithlâk loh, amah han ziaawm deuh se kan sawi ṭha dâwn nia," nui suk suk chunga ka nu leh pa room ka chhuahsan chuan Siami a lo nui vei ṭhâ a, "Khi reng suh, in lo luh lai khân in hmêlah engkim a hriat vek," tiin min fiam ve deuh ngei maw le.

"I châk ve vâng, Zirsanga i chang ta mang si lova a dang ka dap sak ang che," tiin ka fiam lêt ve a, lei chhuah zauh pah hian, "Zirsanga te inṭhen hun ka nghâk dâwn," zuk ti pek a!

Siami hian ṭhianpa Zirsânga khâ a star em em a, an inneih ni te khân 'ka ṭap ru' a ti nia maw le.

Zirsangliana zawng a hmelṭha a, nula lamah a tla na phian! Kan pahniha kan inzui chhuah tawh chuan ngaihtuahawm tak kan ni! Ani pawh kan chanchin hrilh hmasak ngai tur a ni a, ani bâk he khawvelah hian dinpui tur ṭhianṭha ka nei lo.

Dân angin nupui nei lo mah se an nupa nun awhawm zet ang hi sawi tur ka hre tam lo khawp mai; kei rawh ka fel vâng ni hauh lovin Biak in hawng ngeiin ka neih hmel a, ka ngaihtuah thui tulh tulha ka châk telh telh nia maw le.

Zomuankimi hi kan company in min hruai turin rawn tîr lo se chuan tuna kan din hmun hi ka thleng pha hauh lovang.

Mahni inchâwm tura ka beih ṭâlh ṭâlhna rah chuan a ṭha lam kawng min zawhtîr ngei dawn e, Company-ah hian lût lo ila chuan Zomuani nen kan intawng tawp nâng.

'Lalfakhlua'n nupui a nei dâwn' tia an sawi hunah ka nupui tur an thlîr ngei dâwn a, ka thawhpui nula, lian ṭha zehzuah leh rilru tluang purh mai Zomuankimi ka zahpui miah lo.

Mi hausa fanu duatsual te ai chuan nu leh pa hmangaihna châng hria leh mahni inhaiveng thei hi ka thlang fê zâwk.

Chhungrila phûr ru sarh chung hian nupuia ka thlan Zomuankimi ka khuma muhil mêk chu ka thlîr ta vang vang a.

B<++++[BeckirafARenthleI]++++>RR

SEGUNDO|BRR

Becky Rafa Renthlei

Chapter-8

Zomuankimi

Fakhlua te ina ka awmna pawh kâr a tling thawthâng tawh a, min duat mai piahlamah eng mah ka tih ve an phal lo bawk nen inthlahrung ru deuhvin ka awm a; min zaina pawh a dam tawh viau bawk.

'Zo, i zirlai kha thiam hman vek tum rawh aw, kan inneih hnuah i la thawk zawm dâwn a nih chuan thiam lo deuh ka chhawr duh lo a nia,' Faka nui suk suk chu khum aṭangin ka lo thlir reng a, a room ka luah tlat avangin ṭhutthlengah a riak deuh chawta zia lo ka ti viau.

"Ka thiam lutuk chuan min tluk leh si lo ang tih ka hlau deuh,"

"Kum hnih chhûng rim taka ka lo zir khâ karhnih khat leka thiam vek chi ninghal lo chuan a! Mahse, i pasal thiamna i chhawr ṭangkai chuan Asst. Manager-ah i kâi nghal a ni mai, nilo! Zantin a chung lama i ṭan ngat phei chuan ka chungah direct-in Manger i ni nghâl..!" Min fiam a hrât hle a, a châng phei chuan ka lâi chhe hle ṭhin.

"A chung lama ṭan dan pawh ka thiam si loh.." tia ka chhân chuan a nui vei suk a, chutah, "Ka zirtîr ang che, a huna zak lo thei hmeichhia ka duh a nia,"

"Tunah ka zir thei ang em?"

"Û huh! Zomuankim, i biru leh chûk mai ang," a dinna hmun aṭanga lo kal pheiin khumah a rawn ṭhu ve a, ka thil zirna paper lekkâng pah hian, "Ka nupui turin 'Suspention Arm, Breakpad'etc..tihvel a zir ta chu a nia, dangdái hle mai.."

"Khatiang ka zir lohvin A,B,C em ni ka zir ang a.." ka lû-a rawn tuk keuh pah hian, "Ok, i champion, tikhán lo zir chhunzawm la motor ka'n sil lawk ang e.." ka hmui tawk zauh chung hian a chhuak ta a.

Nitina inhmu leh inbe reng ta na nâ na chu ka ngaisâng tulh tulh! A nu leh pa a hmangaihzia ka hrechiang telh telh bawk a, zanin hian ka bula lo riah rûk a tum tih a sawi chuan ka nuih aza hlê a, mipat hmeichhiatna lam hawiin min awmpui a tum ngai lo tih ka chiang ve tlat!

Ka pa leh ka û pawh Lalfakhlua a nu leh pa te'n an be tawh a, a tîrah inneih an phal lo deuh dâwn a; mahse ka pa in, 'I duhthlanna a pawimawh ber, i û a la awm thova i hmakhua ka ngaihtuahin nei mah la pawi ka ti lo' a ti deuh thlap.

Ka û chu hna nghet nei a ni a, pasal nei lo pawh nise amah a inchâwm zo vang vang tawh a, kei mah ber hi min ngaihtuah tih a sawi nghê nghê.

Ka û hnathawh hi Fakhlua ka la hrilh miah lova an inmil tehchiam lo bawk! Min zâwt lêm lo bawk nen u Muanpuii chungchâng ka sawi lang khât khawp mai. Phone thar ka nei ve ta bawk a, zanrei lamah Fakhlua nen whatsapp aṭangin kan inbe zuk zuk a, zanin hian inchâwiah min cho tlat pek nia!

Zanriah kan kîl pawhin Fakhlua bulah ka ṭhu mai zêl a, nupa kan la ni lo bawka a nu leh pa mitmei a vêng thiam khawp mai!

"Nubawih, i pa chuan palai tirh a remti em?" Faka nu'n min zâwt a, "Remti e; mahse, lo hâw phawt rawh min ti a.." tia ka chhan chuan, "Kârlehah kan pahnihin kan kal dâwn nia, i pa pawh ka hmu ve duh a lâwm," Faka bawkin a tih leh a.

A pa remruat angin Fakhlua'n ka pa a hmuh ve ngei theih nân kan khuaah kan kal dun dâwn a, ka hna lamah chawlh min pe zui dâwn bawk nen nuam ka ti veng veng.

Kan khuaa ka awm laiin palai an rawn tîr ang a, a mipa lam duhdan anga rîk deuh thuai thuai khâ an duh a ni.

Zânah pawh Fakhlua a lêng chhuak ngai miah lova a ṭhiante erawh an lawr zut ve tho; mahse, engkimah a hmasa ber dinhmun min hauhtîr zar zar a, ka phû lo tih inhre mah ila ka hnar phal chuang lo.

"Hey, i zirlai a vaiin ka zâwt che ang a i thiam vek chuan thil ṭha deuh ka pe ang che, i thiam kim lo a nih erawh chuan zantin helaia i awm chhung hian vawikhat tal min fâwp hmasa zêl ang," a ti ta a, thiambel ka inti bawk nen ka cho âr nia!

"Lutuk tlat!"

"I ṭhutna sawn rawh le," tih pahin min kai tho zui nghal a, inchâwi tih vâng maiin a strick kher mai! A room-ah chair pakhat a rawn dah lût a, chutah chuan amah zu ṭhu deuh tharh a!

"Khawiah nge ka ṭhut ve dâwn?" Tia ka zawh chuan, "I ding rih ang," a nui duh miah lova a hmâah min din tîrin a duh duh lai min zâwt ta a, a tîr chuan ka chhâng dik zar zar a, thiam min tih hmel khawp mai. A tâwp lam pathum, Metallic rawng chi hrang hrang min zawh chuan ka sawi thei tawh hauh lo! 'Neon Green(Vaki Rawng) chiah ka hria a, ka ngaihtuah ngial pawhin Silver rawng an ṭhen dan khâ ka hre thei ta reng reng lo mai.

"I ti ṭha thawkhat e; mahse, ka lo sawi lâwk tawh angin zantin i hna thar erawh i tih zêl a ngai tawh ang," a mal chungah min pawt ṭhuin ka mitah min en vang vang a, "Vawikhat mai ni lo, vawihnih vawithum min fâwp mah la hnialna ka nei miah lo a nia," tiin fawh rem zet hian a hmui a dawh a.

'Thutiam chu thutiam a ni' dimtê hian a hmuiah ka fawp dê dê a, a lo duhthawh ngang mai! Uar leh chintâwk nei lêk lova kan infawh hnuah,"Ka nupui i nih hunah chuan.." khum lam melh zauh chung hian, "Sawtah sâwn a tâwp kan khâr tawh dâwn nia," min la kuah reng chung hian ka chhîpah a khabe a nghat a, Lalfakhlua hi 'ka thlamuanpui lo' ka tih chuan dâwt ka sawi tihna a ni.

A nu pawhin insawiselna lutuk a nei hran lo bawk a, kan boruak a hahdam viau, a enga mah hmâin min fanu chei nghâl ngawt pek nia!

Dâr riat velah Fakhlua an rawn ko a, Vengchhak lamah Car chhia a awm a, damlo phur annih vângin an mangangin an rawn ko tawp a ni âwm e.

"Zo, min lo nghâk reng rawh aw, ka lo riah dâwn kha.." a chhuah hmain ka beng bulah min hrilh sup a, zanin hi lo mut a tum zân kha a nih vângin nghah chhuah ngei ka tum.

"I lo hâw har chuan room kawngkhar ka kalh ang," Verandah thleng ka thlah a, amah kotupa chuan nupa emaw min ti nge, "Ka pi, a siam ṭhat theih chuan keimah ngeiin ka lo thlah dâwn nia," a ti a, Fakhlua nen inmelhin kan nui tawp.

Min kalsan a huphurh hmel hle a; mahse, 'ka lo nghâk reng ang che' ka tih thlap avangin kê-in an chho ta a, vawiinah car a silfai veka a keng phal lo te pawh a ni mahna.

A nu leh pa bulah ṭhu-in TV kan en a, Fakhlua naupan lai te leh a college kal lai te a nu-in a sawi siam siam a, an fapa an hmangaihzia leh an chhuanzia pawh ka hrethei mai.

Ni e, zû a in zeuh zeuh ṭhin kha a nia, rilru puitling pu pha chin nu leh pa châwmhlawm nih tum lo mipa hian nupuia min neih a duh chu a ni sia ka mumang chhâwng thumna a nih loh hrâm ka beisei.

A phone a ken loh avangin ka lo kawlsak a, eng mah ka mit tikham leh min khei deuh pawh hmuh tur a awm lo, min ring ngama min kawltîr a nih ang ngeiin lukhamah ka dah ve mai a, a nu leh pa an mu tawh tho nen ṭhut reng ka peih bîk loh avangin ka room-ah ka lo nghâk ta a.

A phone a rawn rîk chuan rangzetin ka en nghal a, 'Zirsanga of Zuheh' tih ka hmuh chuan ka nuih a za kher mai, pick loh ka tum zet nâa ka chhâng leh ta zâwk a.

"Hello..."

"Lalfaka a awm nange?" Mipa awki hniam chhak hian a rawn ti ta a.

"Awm lo, motor siam turin an lo kova a la rawn lêt lo va.."

"A nih chu, tu nge ka biak aw..Siami em ni?" a polite ang reng phian!

"Zomuani ka nia, an mikhual.."

"Â hah! Lalfaka bialnu thar zuk nireng che a, an inah i awm a ṭhianpa pawhin min theinghilh zo tawh a nih ber hi, i ṭha em?"

"Aw, ka zia ve tawh viau, Zirsanga of Zuheh tiin a save deuh thlap a nia," ka tih chuan, "Fak zuheha mai mai chuh.." a nui ta hawk hawk a, a ngainatawm ang reng!

"A lo hâw hunah ka lo hrilh dawn nia, a lo thleng ṭêp tawh ang,"

"In inneih hunah a kianga ka din loh chuan ka vûi hlê dâwn a nia, Zomuan, helama in rawn kal remchan chuan chaw lo ei ang che u aw.." dam thlupin a ti leh a.

"Teh reng mai.." kan inbiak zawh hnuah a phone charge sakin games ka khêl mai mai a, sawmpakhat a rîk pawha a lo lêt tâk si loh ah chuan ka tho chhuak leh ta nge nge a.

Ka û hnen aṭanga whatsapp msg ka dawn chu ka open nghâl a.

#Pasal neih hial i tum ta chu a nia ka huphurh lâwk! Tih tê chauh a lo awm a.

#Kan inhmu thei dâwn tho a lâwm, i lo zin ve ang chu..

#Teuh lo, inpa kha ka ngaina lo. A bul aṭang bawkin a rawn ṭan ṭha leh ta.

U Muanpuii hian eng ati nge Fakhlua hi a huat tlat tih pawh ka hrethiam lo, nimin aṭang tawhin 'Ani lo mipa i hmuh dâwn tehreng nen khapa kher kher' a ti deuh sek reng nia.

#I rin aiin a fel daih ang. Tiin Fakhlua thlavâng ka hauhsak ve ngar ngar a, a mizia a hriat chian hunah a la ngaina ve êm em in ka ring.

Dâr sâwmpahnih a ri tawh a, a la rawn kîr lo cheu! 'Ka nghâk ang che' ka lo tive tawh bawk si a, mut chhuak chung chungin ṭhutthlengah ka mu ta a.

Lalfakhlua

1:00 AM

Rin ai daiha kan siam ṭhat har tâk avangin min thlahthlâk meuh chuan zinglam dârkhat a ri tawh a, Zomuani'n min nghâk dâwn tih ka hriat avangin ka inthlahrung ru viau tawh. Chanchin hrilh hre turin phone ka keng lo tingtang bawk si a, ka thinrim ṭûn tawh nia.

Sitting room- ṭhutthlenga Zomuani lo muhil bâm ka hmuh chuan ka lainat ang reng! A âwmah a phone dahin a chhîng chial a, a hmêl dawldâng deuh khâ a zia chho ve tawh deuh nen a lang hmelṭha thlâwt.

Dimtêa pawmin ka room lamah ka sawn phei ta a, a kum zât ka ngaihtuahin a, rualpui te'n an pha lo hlê a, kan khua angah phei hi chuan tluk tûr an vâng viau a ni.

Khuma ka mut fel tîr thlap hnuah a kiangah ka inthawlh ve ta a, a rim fai sar leh a taksa mâm han ka deh apiang hian phûrna eng emaw ni hian min zem chiai chiai zêl nia!

"Zo.." vawihnih a beng bul sêtah ka ko va, muhil se ka duh rualin ka khua a har ru tlat lawi si.

A rawn rûm ṭiah ṭiah a, inlet thakin ka kâwngah a kut veilam a rawn nghat a, a la harh chuang ṭhak lo!

Tiharh duh lovin muthilh ka tum ta zâwk a, ka lo chhîng sek a ni ngei ang, Zomuani phone riin min tiharh a, zinglam dâr thumah tu nge rawn call? Amah lah chuan a hre ṭhak lo lehnghal a, 'Muanpuii sis' tih a ni. Lalmuansakei'n tûn ang hunah eng a tân nge a tih ni!

"Hello.."

"Fakhlu, ka nau phone pe rawh," chhe hler hlur mang e.

"A muhil, sawi mai rawh.."

"A kiangah khân i mu tih sawi hlek suh ang che," zuk ti leh a!

"Ka mu tlat sia, dâwt sawi ka tum lo, a muhil tui hlê bawk, tûn ang huna i lo call danah thil pawimawh a awm turah ka ngai,"

"Englo, ka pa a ṭha vak lova Lawngtlai hospital-ah kan in dah lût chiah," a ti ve ta a.

"Lokal turin min duh deuh nge, engtin nge...?"

"In theih chuan a rang lamin lokal ta mai che u, Matei kha a dam deuh zâwngin i hrilh dâwn nia aw.." a ni leh ni lo angin a awki a dul hnak a, a pa a ṭha lo hlê a ni ang tih hrilh hranpa ka ngai bîk lo.

Hreh ru deuhvin Zomuani ka kaitho ta a, a pa chungchang sawi lang lovin Lawngtlaiah kal a ngai tih ka hrilh chuan ka fiamthu emaw a ti a ni ngei ang, 'Infiam nân chuan a la zîng deuh lo maw!?' Tiin ka nghâwngah min kuah a, rei lo te fawp thuakin, "Le, insiam rawh le, sawlamah thawmhnaw i nei tho a, eng vak mah keng duh suh, ka nu leh pa kan kaitho ang e,"

"I ti tak tak em ni?" A ti hâ a. Thildang min zâwt miah lo.

"Mate, insiam rawh, kan tlânchak vak ngam âwm si lova chhuah hma a ṭha," ka nu leh pa room-ah lûtin chanchin kimchang ka hrilh a, Zomuani kan kal chhan ka hrilh tel lo tih ka sawi chuan ka pa in, "A pawi lo, duh leh an khua in thlen dâwn hnaihah i hrilh mai dâwn nia.." a ti chuar chuar a.

Minute 15 hnuah kan insiam peih dêr! Dâwr inhawng a la awm ka rin loh avangin eitur eng emaw Zomuani tân ka pâisak a, tui pawh leichawp ai chuan tiin bottle thum ngawt ka pai bawk.

Ka pa'n ṭawngṭaina tâwitê a nei a, kan tlân chhuak ta a, ka car thar bawk kan keng leh ta a, Zomuani tân hahdama a thlen theihna tur ka ngaihtuah ber a ni.

Whatsapp aṭangin Lalmuanpuii kan chhuah thu ka hrilh a, min chhânna erawh ka hmu hman ta lo.

"Fk, eng maw kan tih ber dâwn?" Sethlun kan thleng tawh a, kâwnah dâwr inhawng a lo awm teh tlat nia! Zînglam dâr nga pawh a la ri lo a an inhawng hmâ fia fia ngei mai.

"Keimahni hna lam thil a nia, i pa tlawh a remchâng nen nizanah ka hrilh lâwk duh lo che a nih kha.." ka ti liam puat a.

"Chuvang a ni maw ka bula riah i lo sawi chhên, ka lawm lutuk, ka û in mak a ti ngawt ang," a la ti tak deuh deuh a..

"Dâwr inhawng a awm a, lei duh i nei em?" Tia ka zawh chuan, "Nei maithei en ve lawk ila.."

Sethlun kâwna dâwr inhawng awmchhun Top up leh nepnawi an zawrhna kawtah chuan kan ding ta a. Eng eng emaw a lei nual a, chutih lai chuan Lalmuanpuii msg ka lo en thung a, 'Ka pa a hniam hret hret a in lo thleng hman lo palh ang e' tih ka hmuh chuan ka rilru a nuam thei tawh lo.

Ṭawngṭai inkhawm dâr a ri ve chiah bawka Sethlun kan Chhuahsan ta a.

Ṭawipui 'S' ah chaw eiin kan ding zawk a, a bâk kan châwl tawh lo hrim hrim.

Zomuani lah eng mah hre ve hek lo a titi siam siam a, steering ka vawn lohna ka kut veilamin a kut ka hûmsak leh zauh ṭhin a, a hlimna tichhia a a pa chungchâng hrilh ka hreh kher mai.

"Fk, i ṭhianpa Zira khân nizanah a lo call a kan inbe hrep.." a nui var var a.

"Eng nge a sawi?"

"Lalfak zuheha'n in inneih hunah min dinpui loh chuan a châk lovang a ti,"

Zirsangliana mai mai chu! Zomuani hriat laia chutia min koh kher chimawm lutuk.

"Pathian zara kan innei thei a nih chuan ani lo dinpui tur ka nei lo.." ka ti sup a.

"A fel ngawt ang, a aw a sexy râp.." min melh zauh paha a tih chuan, "Zomuankim lerh suh," ka tih nghut a, ka nuih aza deuh.

Ka phone a ri ta a, Lalmuanpuii bâk a ni lo tih ka hre thei tlat!

"Fakhlu, khawilai nge in lo thlen tawh, ka pa'n Matei a lam sek a nia," a ṭah a chhuah hmêl hlê a, Zomuani melh zauh pahin, "Kan lo thleng har tawh lovang," ka ti sup a.

"Aw le, ka pa ka lo hrilh dâwn nia," tiin phone a dah ta a.

"Mate, i û a nia, i pa a nuam lo deuhva damdawi inah i û in a kalpui a ni âwm e.." ka ti ta a.

"Eng maw!?" Eng ati nge ka u chuan nangmah a lo call daih che a!?" Mak a tih hmel hle a.

"Signal i nei lo a ni ang, a tlang thei lo va.." ka ti dam thlup thung.

Zomuankimi pa a boral a nih chuan kan inneihna tur duan lâwk a sukuk zo vek dâwn tihna a nia.

Zomuani hmel hlim reh ta riai riai ka hmuhin hrehawm ka ti ang reng, "Eng êm a ti lovang, bâkah i û a awm a lâwm," ka ti tak nâin ngaihṭhat thlâk erawh a ni si lo.

A hma aia chaka speed la-in ka tlân deuh par par tawh a, ka nupui tur lungngai hmêl hmuh ai chuan he khawvela pa a neih chhun damlai hmêl hmuh tîr ngei hi ka tih mâk mawh a ni.

B<++++[BeckirafARenthleI]++++>RR

9&10 SEGUNDO

Becky Rafa Renthlei

Chapter 9&10

Christian Hospital

Lawngtlai Vengpui

Lalfakhlua

Zomuani hlauthâwng lutuk chuan steering ka vawn lohna ka kut veilam a vuan rân a, theihtâwp chhuaha hna a lo thawh ve chhan a pa a chân a nih chuan a kehchhe hneh khawpin ka ring.

"Mate, hlauthawng suh, natna te hi kan thu a ni lova eng mah ni lo mah ila ka nu leh pa'n min ṭawngṭaisak ṭhin vâng te pawh a ni mahna, ka nu khatia a awm thut pawh khân ka chiái teh chiam lo asin! Nang pawh chak taka i awm a ngai a nia," tia ka hnemna chuan eng tak ang ang maw.

Anmahni in lama kal hmasa lovin damdawi in kan pan ding nghal a, Lalmuanpuii pawh a thlaphâng ve ngang a nih ka ring min rawn call sek nia!

Damdawi in khuma Zomuani pa mu ka hmuh meuh chuan beiseiawm a ni lo tih ka hrethiam nghal mai a! Oxygen an lo pe mêk a, Muanpuii a pa kut vuan chunga lo ṭhu ngui lap ka hmuh chuan ka lainat ang reng.

"Mate, in lo thleng tawh maw.." a ṭhutna aṭanga rawn ding chhuakin a nau a lo be nghâl a, kei erawh min be lêm lo.

"Engtin nge ka pa hi a awm a, min va hrilh har ve?"

"Hrilhna hman a awm lo a lâwm," ti sapin, "Pa, Matei te an lo thleng tawh a nia," a pa bengbulah a hrilh sap a, thei leh thei lova Zomuani pa rawn meng chhuak chuan ka mitah tak min enin, a kutin min hûi ta a.

"Faka, kei chu heti mai hi ka ni a.." Sawizawm thei lovin thâw a'n la leh hlek a, chutah, "Ka fanute pahnih hi i kutah ka dah a nia, rei ka tlin dâwn tawh lo..." ṭawng tumin a âng leh zuau a; mahse, a ngawi leh ta daih a.

"Û, Aizawl lamah kan inphur phei mai dawn em ni ang?" Zomuani mitmenga manganna lo lang chhuak chu hmuh hmaih chi ninghal lo chuan! A kiangah dingin a dârah ka kuah ta a, Muanpuii erawh û zâwk a ni bawka a nau tân hmuh hrehawmin a lang leh tawh lo.

Zomuani hi ka nupui ni êm lo mah se a lakah rilru ka pe bawk a, a pa awm lo pawh ni se ka kalsan kherin ka ring lo, a mahin a zir ngang lo a nih chuan thuhran a nia.

An unauva a pa kianga an ṭhut hlânin doctor chingchâng zâwt turin ka chhuak ta a.

"A dinhmun a ṭha teh chiam lova Aizawlah inphur phei pawh ni u la kawng lakah inbuai tho ka ring, chuvangin a chhiat pawhin hetah chhia se a ṭhat pawhin hetah tho ṭha rawh se, Pathian thu thu a ni." Tia min chhânna chuan beiseiawm a nih lohzia a târlang chiang hlê.

Damdawi in awmna bill leh a tihfel ngai zualpui lo tifel vek turin ka hrilh a, chumi hnu chuan ward-ah ka lût leh ta a, Cabin vela insawnin awmzia a nei tehchiam lo bawk nen Male Medical ward-a khum awm tlar dul chu ka melh phei a, Zomuani pa tih loh chu serious em em an awm pawh ka hre lêm lo.

"Faka.." Zomuani pa'n min ko leh a, a fanu pahnihte hmuh laia ka kut vuanin, "Keimah awm lo mah ila inneih khâ lokal tlangpui rawh u aw.." a khuh deuh kharh a, "Ka thutiamah ka ding ngei ang.." tia ka chhânna chuan a hmêl a ti hahdam sawng sawng thei nia!

"Pa, khatiang lam ngaihtuah suh, kan ngaihtuahawm lo a nia," Zomuani'n a lo tive bawk a, kan boruak uap ru zet chu a hahthlâk kher mai.

Minute sawmpanga dan zelah a thâwk a buai chho a, oxygen pawh an pe sâng khawp mai! TB a nih vángin a thâw a hah hlê a, ṭawng chu sawi loh hniam lam a pan zel ni berin ka hria. A serious deuh bawk nen pathumin kan awmpui pawhin min khak lêm hlei lo va!

Lalmuanpui ṭhiante ni âwm tak mipa pahnih police uniform inbel an lokal ve tâk avangin pâwn lamah ka inthiarfihlimsan ta a, Zomuani erawh a pa kiangah ṭhu-in pawh hran chi a ni lo. An zai vêl vâng khan duhthusamin a la infit lo hlê tih ka hriat vángin ka ngaihtuah ru viau.

Hospital bathlar vela teikual pahin ka nu leh pa chanchin ka hrilh a, 'Puitling takin a ṭûl apiang buaipui rawh aw, an unau an khawngaihthlâk em mai,' ka nu in a ti nghe nghe.

"Fakhlu, ka pa awm dan a dik miah lo.." Muanpuii'n min rawn koh chuan rang lutukin ward-ah ka tlân lût a, nurse pakhatin a Bp check sakin pakhat dangin a âwmah a lo nem bawk a, Zomuani'n a pa a ko mawlh mawlh lai ka hmuh chuan a bulah ka ding ve a, tih theih ka nei tlêm hle mai.

"Pa, i tel lovin engtin nge kan awm ang?" Lalmuanpuii lungchhe hmêl leh Zomuani ṭap râwih râwih ri chuan a pa a boral tih hrilh hranpa ka ngai lo. Chêt mai nachang ka hre hauh lo va! Ni e, nu an nei tawh lova an mahni uap lumtu leh a dam theih nâna theihtâwp chhuahtu a fate pahnih hi an khawngaihthlâk êm a ni.

"A nâ hi a na ve êm a, a bp a hniam bawk nen kan chhan thei ta ngang lo a ni e," doctor thusawi pawh chu ka hre mumal lova Zomuani nise a ṭap nasa si a, an in lam inbuatsaih tura hrilh tur pawhin in nghâktu an awm chuang bawk si lo!

Zomuani a ṭah râwih râwih láiin Muanpui ve thung chu a inhnît hlap hlap a, ka âwm nghengin an an unauvin ka kuah ta a, rei lo te chhung mah nise mawhphurhna ka kova tla hlenchhuah ngei tumin rilru ka siam hman vek.

Lawngtlaia ka thawhpui ṭhenkhat te phone kualin leh eng eng emaw ngaihtuah a ngaih vangin ka buai hle a, police department lam an rawn thleng bawk a, Zomuani pa hi police a ni em tih pawh ka hriat si loh! An chhungkaw chanchin ka hriat tlêmzia ka ngaihtuah zui rauh rauh a.

Ambulance-ah a ruang an phur a, Zomuani te unau ka phur thung a, sawi tur a vâng kher mai! An chhung leh khat te pawh an rawn thleng nual bawk a, atu amah ka hre ve dêr si lo.

Zomuani te in kan thlen chuan mi an lo zi nuk nuk tawh a, Assam type lian ang reng tak niin an kawtkai pawh a nuam hlê! Nichin deuh khân chahbi midang an hawntîr tawh a, a theih ang ang an lo chingfel tawh bawk.

"Pa, in kan thleng tawh a nia.." Zomuani bawk a ṭap leh a, an chhungte dang in lama lo awm te thâwm a ṭha bawk nen a ri chuah chuah a ni ber mai.

Lalmuanpuii a ṭap tawh lova a hnâr sen hlar leh a mit bûi châkte chuan a insûm nasat turzia ka hrethiam mai. An unau chauhva a pa ruang an zui lût lai chu en ava hrehawm si êm! Mi rêng rêngin min en duh ang reng viau a, hmelhriat alawi ka nei lo.

After 3 hours.

Zinglam dârthum a ri tawh a, tlaivarpui a nih vangin ṭhalai zai ṭhap ṭhap kârah anni unau pawh a pa ruang kîlin an ṭap fap fap a, chhungkaw rethei berh anni hauh lo! An in chhúng pawh a felfaiin a thianghlim sar a, room pahnih ṭhiah ve loh annei a chutah chuan an bungraw ṭha deuhho an dah kháwm a, kei ber hi awm dan tur ka hre lo, ruang kîl ve reng dâwn ila an chhungte an lo thlenbelh zêl avangin ṭhutna kan indaih lova ka insaseng deuh sek mai.

Mâkpa ni lo mah ila min mâkpa chei deuh roh chuan ka hria! Mahni tâl tâlin ka tâl chu a ni ber e.

"Fakhlu, Matei hi a inzaina ala rei si lova room âwlah i lo awmpui rih mai dâwn em ni ang?" Muanpuii ka bulah a lokal a, ani hi zawng Sakeibaknei ang khâ a ni miau a, a nau ang em emin a ṭap ve lêm lo.

"Nangma'n châwl hahdam turin hrilh la.."

"Ka hrilh a lâwm; mahse, ka thû a zawm duh tlat lo! Lo inbuaipui teh u.." a ti sap a.

Henu tak hi chu! Ṭawngkam nêm leh ngaihthlâk hahdama thil sawi tum reng reng lo mai! Ka chhân hman hmâin min a la kalsawnsan daih zui a(h).

Mi rêng rêngin 'Faka, Fk, Mafak,' tia min koh laiin Lalmuanpuii kei aia nau daih hian 'Fakhlu' tiin min ko lawl lawl a, zâm lo lutuk.

Zirsanga chanchin ka hrilh ve tawh a, kan inneiha ka ṭhian dinpui tur a nih váng ni lovin ka ṭhianpa ka engkim a nih vâng zawka lokal a tum tih a sawi chuan ka lâwm kher mai! Tlailam dâr thum khân Aizawl a rawn chhuahsan tawh a, tluang taka a lo tlân thei a nih chuan ruang a rawn nang hman dâwn e, ka mal lutuk tawh bik lo ang chu..

"Mate, i taksa a chau lutuk ang rei lo tê mu hahdam lawk rawh.." Zomuani bengbulah ka hrilh ru sup a. A ṭap tawh lo nâa a hmêl ngui nghiaiah hian a chau tih a lang reng.

"Ka duh lo, ka pa kiangah ka awm duh.." tiin a insût leh faih a. "I awm dawn a lawm i taksa a chauh chuan naktuk vuina hunserh i bantlang thei lo palh ang e.."

Min en deuh vang vang hnuah a rawn dingchhuak ta a, a pai deuh dat chu ka lo chelh hman. A inzaina a la rei lo nen indim a la ngai ve viau a, a pasal tur ka nihna angin mi mitmei vêng hauh lo hian ka pawm kâng nawlh a, Muanpuii min kawhmuhna pindan lamah ka luhpui ta a, min en hrek hrek tute chu ka haider hmiah.

"Min kalsan suh aw.." khumah muttîrin chhuahsan leh mai ka tum a; mahse, a thusawi vâng chuan khum lam panin ka lêt leh ta zâwk a.

"Khawiah mah ka kalsan lovang che, i pa hnêna ka lo tiam tawh kha tih hlawhtlin ka tum a nia," a hmuiah ka fawhsak zauh a, innghahna ngam mipa leh rintlâk mipa ka nihna lantîr nân tun hun hi a pawimawh hlê.

"Min ngaihsaknaah ka lawm e, ka lawm takzet," lungchhe zetin a ṭap leh ta a, a hmâa ka hmeichhe hriat Zomuankimi khâ anna pakhat mah a nei tawh lo! Hmeichhe dawrâwm tak angin a lang tawh zâwk.

"Nang ka ngaihsak lohvin tu nge ka ngaihsak chuan ang, i pa awm tawh lo mah se ka kiangah awmin ka enkawl dâwn che u a lâwm," nghet charha ka ṭawng chhuak chu keima aw pawh a ang lo.

"Fk, ka lawm e.." ka âwmah hmai phûmin a thaw chhuak hak a, room kawngkhar bula Lalmuanpuii lo ding reng ka hmuh tâk avangin Zomuani chu ka kuah nghet sauh thung. Henu ka ngaina lo lutuk leh ka haw hlur hi a chhan pawh ka hre bik lo.

"Fakhlu, Matei ka lo awmpui ang a, kuang siamna lamah hei hi min han dahsak lawk dawn em ni ang," tiin Lace var sar hi a rawn lek lang a, "Aw le, tikhan in pahnihin chawlh hahdam hun innei a ni mai, a kal tawh chu a kal tawh a ni a, a la dama te erawh kan pawimawh a nia. "

"Mahni chanah a tlâk loh chuan sawi a awlsam viau a nia," ti nghatin Lace puan chu min hmehbel chawt chawt a, Zonuani lam hawi pah hian, "Mate, ka lo chhuk leh vat ang." Tiin Lalmuanpuii vawikhat tê pawh melh lo hian ka chhuak ta a.

Khua a vâr ṭan êk êk tawh a, kuang pawh an lo siam peih vek tawh a, Lace puan ka dah chhoh chu kuang chhung thuahna a tâna hman tur a ni a, ka pêk hnuah in lam panin ka lêt leh ta a. Motor a tam ngei mai!

"Bawiha, i pa nen lokal kan tum a; mahse, ka nuam lo leh deuh nen kan ṭhulh leh ta mai," ka nu'n min rawn bia a, "Lokal chi innih loh kha ka awm a lawm, Zirsanga a lokal a.."

Zirsanga a awm chuan an thlâ a muang ve deuhva ka rin vang a ni. A tlangval lai ang kha ni tawh lovin a puitlinzia leh pá dik tak dinhmun a luahzia an hrechiang tlat a lâwm.

Zingkarah chhungkaw thlalâkna hun an hmang a, an chhungkaw member ni lo mah ila Zomuani'n min koh tel ve zêl avangin ka lânna tur awm angah chuan ka lang ve sek. Tin, innei mai tur kan ni tih pawh an lo hre fur hlawm a, min en dan a dang ta deuh bawk.

'Tlangval hmelṭha' tia sawi tur ni lo mah ila ka taksa a infit bâkah mizo mipaah chuan a sâng pâwl ka ni ve a, nula lamin min en duh viau. Kan company lam aṭang pawhin pahnih thum an lokal ve bawk a, chuti lutuk chuan Zomuani pawh a mal lutuk bik lo e.

Vui hun hmain Zirsanga a lo thleng a, a rawn induang nalh leh pek khawp mai!

"Hey, i thawmhnaw inbel tur ka lo ken kêp che," tiin a hâk ang chiah Kamis dum leh Cotton jeans dum min pe a, hepa hian azia a la thlâk tak tak lo, nui suk chung hian Zomuani room-ah kan inzui lût ta a.

"In inneihna tur a sukuk vek dâwn a nih hi.." a ti sup a.

"Teuh lo.." tiin a pa thu min chah kha ka hrilh ve ta a, hahdam huai hmêl a pû.

"Rafaela'n min ngen nasa lutuka ka rawn ṭhulh leh ṭêp a ni." A tih chuan, "I rawn kal thei hi ka lawm hle a nia, keimah chauh chuan ka mal em mai," ka ti ve a.

Zirsanga hi kei aiin a hniam hlek a, kan pianphung erawh a inang viau! Thawmhnaw inang kan inbel phei chuan min ko sual nawk nawk mah se an demawm miah loh.

Zomuani te unau nen inhmelhriattîrna ka neih hman loh avangin min han hmu dûn chu an mengphâwk hlê a; ruang bulah ṭhutna a awm tawh lo bawk nen pâwn lamah kan ṭhu ta zâwk a; ṭhianpa nge nge hmelhriat biak tur a nei nual.

Chhungkaw aiawha thusawina nei turin Lalmuanpuii a rawn ding chhuak mauh mai le!

A pa damloh chungchang leh an unauva an buaipui dan te, leh Zomuani'n pasal neih a tum laia hetiang an tâwk hi pawi a tih thu a sawilang zauh bawk a, 'Ka pa thuchah hnuhnung ber hi keini unau chuan kan ngai pawimawh hlê a, amah ka pa awm tawh lo mah se a duh dan ang ngeiin ka nau hian pasal a nei dâwn a ni, nakinah sawi sep sep te thil awm thei a ni a, chuvangin han sawi lan ve hrim hrim ka duh deuh a..' tia a sawi chuan mipui an thûm deuh hak a. Kei erawhin mak ka ti viau thung.

Lalmuanpuii ṭawngkam fel thlap leh dam raih hi ka vawikhat hriatna a ni a, a pa hi a sûn lo a ni lo, a hunah a inti pachang mai a ni tih ka hrethiam vek. A hmâa ka lo ngaih dan kha tlêmin ka sawhsawn deuh bawk. A nau pasal a tân min ît lem lo khân ka hria a; mahse, chutiang ni lova vantlang hriat meuhva a sawilang ta mai hian a finzia a târlangin ka hria. A chhan chu fahrah dinhmunah an ding tawh a, mi sawi sep sep an kai lohna turin a intlawhkhalh lâwk diam tihna a ni.

"Innu tur ai chuan tuna thusawi mêk saw a tihtlâk zâwk hmel.." Zirsanga'n a ti sup a.

"Teuh lo, Sakeibaknei a nih saw, ka hriattirh aṭanga a ṭawngkam ngaihthlâk a nawm ber ṭum a la ni hial ang.."

"An inang mai sia nang hi i lo luhsual deuh reng ang tih chu ka hlau," ka beng bulah a ti leh a, ka nuih aza deuh, a lehlamah chuan Zomuani pa ka vawikhat hmuhna chauh a nia, a thi ta hi han tuar chiam ka ni lêm lo. Kan ṭhian duna kan awm tawh chuan 'Mi ho' kha kan ni tlat a!

Mahse, vuina hunserh hman laia nui vur vur tur khawpa mâwl erawh kan ni miah lo.

Thlalâkna hun an hman laia ka thil hriat chuan minti hamhaih ngei mai. Lalmuanpuii mi mai mai emaw ka tih kha Lawngtlai police belhnih kâi zuk ni reng a!

A thawhpuite'n a pa kuang thlâ an lâkpui vânga hre ve mai mai chauh ka ni a, Zomuani pawhin eng mah a sawi lo hi ka dem ru deuh.

"Police ni âwm reng a ni, a pianphung dik zaih leh a ṭawngkam felfai thlarhte, mahni pa te ruang chunga nula thusawi thei chu hmeichhe eng emaw tak a nih ka ring rêng a ni." Zirsanga'n a ti sup a, annu nen a lo tehkhin tepawh a ni mahna.

Zomuani thawhpui te'n thlâ lâkpui tur an tih chuan company lam aṭanga mi pathum lokal te leh Lawngtlaia kan Agent awmsa te nen kan lâkpui ve ta a, Zirsanga pawh 'Lokal ve hmiah rawh' ka tih vângin kan zîngah a tel ve ta a. Zomuankimi'n hnathawh a nei tih an hre lo nge min en duh hlawm viau lehnghal.

An unau hian ngaihtuahawm an lo ni hauh lo mai! Muanpuii hlawh ringawt pawh an eisêng awm si lova in leh lo nghetsa an la nei tel cheu a nia! Kan police nu khâ a inluling ka tirêng a ni.

"Fk, zanin bâk ka riak thei dâwn lova min hrethiam mai a ni ang chu.." Zirsanga nen Thlanmual aṭangin kan haw chho a, Zomuani te unau erawh min ngaihsak thei dinhmuna ding annih loh avangin an kal hrang daih a, ka vûi lêm lo.

"Keipawh in lam ngaihtuah a nâ a, ka nu a ṭha vak bîk lo nen ka hawsan tho anngai dâwn a, a hranin ka kal leh mai ang ka hna zawm a hun tawh bawk a.." ka tih chuan, "Inneih chu engtikah nge i ruahman deuh?"

"Ka hrethiam rih lo, anmahni unau be ve phawt ila a hriat mai ang, tuna sawi chi ninghal lo chuan.." ka ti mai a.

"Nghâk deuh mah la a pawi miah lo a nia, miin an dem lutuk ang," a tih chuan dik ka ti angreng. Chuti chûk chûka hmanhmawh theih a ni lova amah Zomuani ber pawh duhthusáma a la ṭhat tâwk loh avangin Zirsanga thusawi ka pawmpui viau.

In kan thlenin mî an tam vak tawh lova Muanpuii thawhpui tlêm azâwng leh nu leh pa an la awm nial a, Zomuani ber pawh ka hmu leh si lo!

"Khaw'nge i nau chu?" Lalmuanpuii ka zawh chuan a ngawi deuh reng a, chutah, "Ka hre miah lo nichin deuh khân room-ah a lût a.." a ti ṭha mai a.

Zirsanga nen inhmelhriattîrna te ka neih hnuah Zomuani awmna room ka pan ve ta a; zâwitéa phun sap ri leh mipa aw thûm deuh ka hriat chuan lût mai lovin kawngkhar bulah ka ding khawmuang ta a.

"I dinhmun ka hrethiam lutuk; mahse, i û in vawiinah tikhân mipui hmâah a sawi si a.." mipa bawk a ṭawng leh a!

"Ka û sawi ang kha thil awm dan a ni e, pasal ka nei dâwn" Zomuani chhânna avang chuan ka nui suk a; mahse, room-ah hian tu mipa nge awm tih hriat erawh ka tum bur. Kawngkhar kik eih lovin ka lût ta a, Zomuani khumah lo ṭhûin amah hnaihzet hian mipa a lo ṭhu bawk a ka ngaih dan a pêl teuh kher mai.

"Fk...!" Min hmu thut chu mak a tih hmel hle a, "Zawn hmuh i har hle mai, inva sawi mûk awm ve, ka ṭhianpa hmelhriattîr ka tum deuh che a.." ka ti nghut a.

"Hei, Hmingthanga nen kan lo titi laklawh deuhva lo ṭhu rawh," tiin a ṭhutna bul a bêng thak thak a, mipa lo awm ve chu en pawh ka en lo, mi lusûn lai lai a khatiang thu lo sawipui te chu an chhungte a nih ka ring hauh lo.

"A nih chu, inbe chhunzawm rawh u, Zirsanga ka rawn kalsan a ka va ngaihven ang e.." Tia chhuah ka tum chuan, "I bula lo awm ve kha Zirsanga ka biak kha maw..!" A rawn ding chhuak a, "Aw ni e," lâwm chiah lo mah ila ka tilang lêm lo.

Nichin lawkah a pa kan thlahliam a kei min ngaihsak lova mipa dang a lo ṭhutpui leh lawi si hi ka chhungril a lâwm viau hran lo. Mahse, tun hi tih lan hun a ni lo mai chauh a ni.

"Ka va chhuak ang e.." Hmingthanga a tih pa chu a tho nulh a, min en zuk hnuah a kal zui ta a! A hmêl aṭangin eng ang mipa nge a nih tih ka hre mai thei lo.

"Fk.."

"Umn.."

"Hmingthanga lo awm ve kha i thinrim loh hrâm ka beisei," a ti sap a.

"Thinrimna chhan tur a awm lo nâin keini ṭhiandun min ngaihsak aia thilpawimawh sawi tur innei a nih hmel.." min chhân hman hma chuan ka chhuahsan hmiah a, dam thlup e ti lo hian ka duh lohnaah ka lung a lian hlê tih Zomuankimi hian a hre lo tepawh a ni mahna.

Min ko ri hre tho mah ila haider luiin Zirsanga lo ṭhutna lam ka pan ta daih a, Lalmuanpuii nen khunkhân tak hian an lo titi a, an inkawmngeih hmel riau!

"In laklawh loh chuan petrol la in kan va kal lawk dawn em ni?" Zirsanga hnenah ka ti a.

"Pawi nâng, ka rawn inthun full bik hleinem," Muanpuii lam hawiin, "In lêng lo chiauau tur i nei tho a, kan lova teibo ang e.." Zuk ti pek a!

Lawngtlaiah hian ka kal khât khawp a, Petrol pump awmna chiah ka hriat loh avangin mî kan zâwt chawp leh tê tê a, ṭhiana nen kan inkhalh chhuak ta a.

"Lungawi lohna i nei em ni?" Pump kan thleng tawh a, petrol dawh an tam deuh avangin kan la nghâk a, "Zomuani a lâwm le.." tiin nichin chungchâng kha ka hrilh ve ta a.

"In la inhrechiang bawk si lo nen chîk hle ang che, vawikhat tihsual a pawi a nia, Nutei ka hrechiang emaw ka lo tih ṭhin pawhin tikhân min bum duh a nia, fimkhur hlê rawh, nang phei chu hna ṭha tak neisa i ni lehnghal a.." a ti ta a.

"A dik khawp mai.." tih chiah ka sawi.

Petrol kan lâk zawh hnuah Restaurant-ah kan inhnawhpuar leh tê tê a, kan zu in ṭhin lai kha chu nise kan zawng leh chûk ang chu..

Zomuani te ina kan lêt leh chuan chaw an lo ei mêk a, Muanpuii zâwkin min lo be sawt sawt a, Zomuani ka hmu lehpek lo!

"Matei chu a chau deuhva a muhilin ka hria, chaw ei ve nghal r'u aw, ṭhalai zân a ni a inpeih hmâ kan duh deuh maw le.." tiin kan chaw ei tur min siamsak zung zung a, a polite thar ta riau hi engvang nge hriat pawh va ni suh.

Kan lo inhnawhpuar hman nen kan ei tlêm dun kher mai!

Zomuani mutna lamah thawmhnaw thlâk turin Zirsanga nen kan lût a, amah a lo awm awzâwng lo, mut chu sawi loh a khum pawh siamfel sa diamin a awm a, khawiah nge a kal tih rin chhin ngaihna ka hre lo hrim hrim.

"Innu tur chu a che dangdai thei dâwn riau mai," inthlâk paha Zirsanga thusawi ka bengkhawn tehchiam lo. Zomuankimi hian ngaihzawng dang a lo nei em mawni dâwn le!?

Â, chuzawng ka ring chiah si lo, zanin chu a pa ruang thlâk zân ni mah se inbiak ngei kan ngai, ka rin ang a lo nih loh chuan kei Lalfakhlua hi ka ngawi mai mai hauh lovang, eng ang mipa nge ka nih a hrechiang thawkhat chuan ka hria.

Lungawi lo ru deuh chung hian ka thawmhnaw ka thlâk ve ta a.

Phir unaute hi ka lo la hrechiang lo hlê tih ka inhriatchhuah phah bawk a, Lalmuanpuii nise police a ni a, Zomuankimi pawh hian eng emaw hna a nei ngeiin ka ring..

B<++++[BeckirafARenthleI]++++>RR

SEGUNDO

Becky Rafa Renthlei

Chapter-11

Lalfakhlua

Zomuani ber a awm tâk si loh-ah chuan lungawi chiah lo hian a pindanah ka vei sek a, Zirsanga lah chuan, "I ngaihtuah lutuk a nih kha ke a nei a, a kalsawn veah ngai rawh," a ti liam puat a, eng tehchiamah a ngaih loh hmel kher mai.

Muanpuii awmna lamah minute sâwm dâwn kan ṭhut hnuin ka ngaih a ṭha ngang lova pâwnah tei chhuakin ka call ta ringawt a, a 'ring' ral ṭhak ṭhak nia!

Zomuankimi hi rinhlelhna tur ka nei miah lova nichina a mipa biak Hmingthanga a chhân danah khân ka tân huat tur em em a awm hran lêm lo; mahse, mipa dang hnaiah a awm khâ ka rilrem zâwng zuk ni hauh lo va! Ṭhalai lokal khâwm an awm nual hnuah pawh a hmêl hmuh tur a awm tâk loh avângin Muanpuii ka va zâwt ta a.

"Room-a a lût lai ka hmu reng a, inlêng kan nei nen ka lo enzui hleinem" tiin inchhung a melh kual ruai a, chutah, "Fakhlu, ka pa thlânah a kal a ni lo maw, chhuak thei ka ni si lova i va en mai dawn em ni ang?" A nau a ngaihtuahzia a mitmengah a lang reng.

Zirsanga ka kalna tur chin hrilhin, 'Nang chu lo awm la ka âi lo awh rawh..' min chhân hman hmâin ka chhuak nghâl hmiah.

An thlanmual a hla deuh bawk nen car ka keng a, ngaihtuah chhuahna châng rêng rêng ka'n hriat miah loh chu le! Mahse, nichin maiah kha chuan ka sa ve deuh zak hman khâ a nia.

Zomuani pa thlân ka thlenin zân dâr sarih a pêl tawh a, Lalmuanpuii khân a lo sawi dik chiah! Zomuani, a nu thlânlung nghênga lo ṭhu chu ka hmu ta a.

"Hey, Mate.." ka ṭawng hre âwm hmel a pu miah lo! A thim bawk nen a bulah ka ṭhu thla ve ta a.

"Helai hmunah hian vawi tam kal mah la i nu leh pa an lokal dâwn lo, i lung a lênga i kal duh a nih chuan min hrilh la khaw ên hunah ka hruai mai dâwn che a lâwm," tiin ka kuah ta a.

Pâwn khawvawta awm a ni bawk a, a taksa a hit thlar mai.

"Fk..."

"Lokal rawh i hâw teh ang," ka tih chuan, "Ka pa kalsana hnathawh tur ka lo zawng ta hi ka inchhir ngawih ngawih, a kianga awmna hun ka neih tlêm phah ta a nih hi.." a ti sap a.

"Khatiang zâwngin ngaihtuah mah ta che, i pa tâna theihtawp chhuah i tumna a ni tih tupawhin an hre vek a, tunah hrehawm tiin indawm kun reng la awmzia a awm lo," a bânah vuanin ka kai tho a, in lam ka panpui ta a.

Car-a kan ṭhut hnuah pawh a ṭawng miah lova nichina ka chhân dan teh hmuk kha zia lo ka ti leh deuh. A naupang zâwk a ni a; kei, a puitling zâwk leh a mipa in ka dawh loh chuan kan inrem thei dâwn lo tihna.

An in kan thlen chuan ṭhalai kal khâwm an lo la zâi ṭhap ṭhap a, mi mit la kher lova inchhunga luh dan a vâng riau.

"Car-ah kan awm rih mai dawn em ni?" Tia ka zawh chuan a bu nghat nghat a, a hmêl dul hnak leh ngui nghiai hi hmuh a hrehawm.

Car-ah kan ṭhu lût leh ta a.

"Inneih chu i la duh tho em ni?" Tia min zawh thut chuan ka hamhaih deuh dâwn a; mahse, inngaihtuah fîm leh vatin, "Inneih lohna chhan tur eng nge awm, i pa thu min chah kha chuti maia zûk leh ka tum lo."

"A nih chuan ka û nen inbe rawh u aw.." a kut zum sâl leh fai sar chu ka hûm sak a, "I nunah mipa dang an awm em?" Fiah fakin ka zâwt ta a.

"Teuh lo mai, nichina lokal Hmingthanga khân min ngaizâwng ṭhin a; mahse, tunah chuan ngaihzawng nghet a nei tawh." A ti sap a.

"A la beisei leh che em ni?"

"Beisei lo ve, a thuphungin min zâwt mai mai a nih kha."

"A ṭhat chu, ka rin ngam ang chiah che hian min ring ve la ka duh a ni."

"Ka ring che a lâwm," zak hmêl a pu deuh a, ka sawipui hun fuh chiah lo mah se ka hriat duh erawh ka hrefiahin ka hria.

"Nang leh kei hian thutiam kan chham thei lo a nih pawhin midang chhampui duhna rilru pu leh tur chuan ka nghah fê a ngaiin ka ring," tihpahin a hmui hnâwng chap chu ka fawhsak ta a, "Car-a infawh te zawng thil mawi ninghal lo chuan," nui sak chungin a inla hrang vat a, nawr luih ka tum bîk lo.

Ṭhalai an rawn ṭîn a, keini pawh inchhung lamah kan inzui lût ve ta bawk a, Zomuani leh Lalmuanpuii chauh he in lianpuia an awm tur anga ka ngaihtuah hian ka khawngaih riau.

Zirsanga nen room pakhat kan inṭâwm a, Mafeli nen an inbiak chhungin Muanpuii ka lo be ve thung a, "Rei châm thei ka nih loh avangin engtin nge ni ang, Zomuani hian a hna a chawlhsan duh chiah ka ring si lo va!" In riak awm lohna pindana kan awm laiin ka sawi chhuak ta a.

"Nia, engkim kan sawifel a ngaiin ka hria, inneih chu i duh takmeuh a maw!?" A ni leh ni lo angin zuk ṭawng dam thlap a.

"Duh e, nang chu ngaihtuahawm i ni lova i pa dam laia sawi tawh kan nih avang leh amah lo hmeichhe dang neih ka tum miau si lo va vantlâng mitmei kan veng lutuk thei dâwn lo a nih hi.." ka ti tlang hmiah a.

"Ni e, a dik khawp mai, palai tirh hun tur awm ang chu i hriatthiam ka ring a, a hmâa ka lo sawi tawh ang khân ka nau hi ka hmangaih a, ka kiangah awm se tih ka duh rualin mihring hmalam hun a hriat tlat si lova rei rial lova inneih mai khâ ṭhain ka hria." A ti ta a.

"Ka haw phawt ang a, ka nu leh pa ka lo sawipui dawn nia, kan khuaah kan awm rei tawh dawn lo lehnghal a.." ka tih chuan a meng phâwk deuh hrâ a. Chutah, "Khawiah nge in awm dâwn?"

"Aizawl-a kan inpui lamah kan awm tawh ang, duh leh Zomuani pawh training ka pe chhunzawm dawn nia.."

"Ni e, ṭha i tih ang khâ ka pawmpui vek che a nia, kei aiin i enkawl thiamin i dawhthei ang tih pawh ka hria a, a rang lamin chanchin min lo hrilh dâwn nia," a ti vei thlap nia.

Muanpuii nen kan inbiak zawhah Zomuani ka va hmu leh zawk a, "Naktukah Zirsanga hâw a tum sia rawn hmu ve zawk la,"

"Eng ati nge a va hmanhmawh ve," khum aṭanga tho chhuakin ka kâwngah a rawn kuah a, "A fapa a ngai deuh a ni mai thei," ka ti mai a.

"Fapa a nei tawh maw!?"

"Nei e, fanu pawh a nei a lawm, Zirsanga tezawng patling dik tak a ni tawh," kan room lam kan pan ta a, Zirsanga'n phone a lo la hmang nia maw le!

Kan lût min hmuh rualin, "Hei, ṭhiana pawh annu nen an rawn inzui lût a ka dah rih mai ang," tiin a nui suk a, Mafeli bâk a be leh chuang lovang.

Zirsanga'n Zomuani a fiam zûrh zûrh a, 'Nupui neih a tum ve chu a nia, Delhi lama a X te i ngam dâwn em ni?" Tih vel mai mai te kha a ṭawng duh dan a nia, ngeiawm ṭha ve asin.

In riak an awm avangin kan mengrei lutuk lova Zomuani pawh vawiinah a pa vûiliam chauh mah se midang hmuh lai chuan a hmêl hmuh hrehawm a tilang bik lo.

##

Zirsanga'n min hawsanna pawh nihnih a liam leh tawh a, keipawh châm reng thei ka nih loh avangin Zomuani te unauin min ui chung chungin ka hawsan rih dâwn ta chu a nia, 'Ka hna zawm a hun tawh bawk nen inneihna tura inbuatsaih angai bawk si a ka haw phawt zâwk mai ang,' ka tih chuan min hnial ta bik lo.

An chhungte leh ṭhenrual ṭhate chuan min hre ve deuh vek tawh a, Zomuani vannei an tih thu an sawi sap sap pawh ka hre reng. Mahse, ka vannei letling zâwk tih an hriat loh vâng a ni.

"Fk, chanchin min rawn hrilh zêl rawh aw," Zomuani hmêla min thlâkhlelhna lo lang ka hmuhin ka hâw tur ṭhulh leh mai ka duh rum rum a; mahse, ka pa'n, 'I tel lo chuan ruahmanna kan siam thei lo a nia' a tih ve si avangin ṭhulh chi ni tawh hek lo, inngai tak chungin ka tlanliamsan ta kha nia.

Kawngtluanin an unau chungchâng ka ngaihtuah char char a, unau mipa pianpui an nei lo nen ka khawngaih ru viau. Zomuani nen tluangtêa kan innei nei thei a nih chuan Lalmuanpuii pawh ka chhungkua a ni tawh dâwn tihna a nia kan inrem ve deuh mahna.

Kan khuaah zankhat ka riak a, Aizawl panin ka tlân leh ta a, nihnih laia ka tlai tawh avangin a zia lo chu ka ti deuh. Zomuani nen pawh kan inbe ngun malh malh khawp mai.

'Mami'n a hna a zawm leh tawha keimah chauhvin ka awm ṭhin bawk nen a khawhar thlâk khawp mai.' A ti ve nang nang zel a; mahse, anni unau zawng rinai takin an chhel phian zel e.

Kan inpui aṭangin office ka kal a, motor rawng kah tur kan ngah thei si a, nilêng tak meuh meuhvin hna ka thawk a ni ber mai. Thlatharah palai tirh kan tum tih Muanpuii ka hrilh chuan, "A hautak lo thei ang bera tih kan tum dawn nia," a ti a, ka chhâng thui duh vak lo, a chhan chu kan khuaa innei tur kan ni a, anni tân insenso angai dâwn lova ka pa fapa mal ka nih ang ngeiin keini erawh chuan a pui thei ang bera tih kan tum tih sawi lan kher kha ṭul ka ti hran lo.

Thil ṭûl buaipui ngáiah pawh Zomuani aiin Muanpuii nen kan sawi dun tam zâwk a, a nau a hmangaihzia leh a inhuam thuizia ka hriat belh deuh deuh bawk. Lawngtlai leh kan khaw inkâr a hlat tham deuh avangin thuam chhawm chungchângah kan inhnial deuh hlek a, an unauva an ṭan dun meuh chuan ka hnial hneh lo a ni ber e.

'Vawikhat pasal neih ve mana thuam chhawm loh te chu a..' anti deuh tlat nia!

An inah inneih lawmna programme siam an tum hran lo va, a pa farnute pahnih leh a nu nuṭâ pakhat bâk man eitîr pawh an tum lo, a pa boralna a la rei lo a boruak siam zâwnga tih deuh hup an duh lo tih an sawi chuan ka pawmpui thlap.

Mizo dânah chuan inneih a fuh chiah lo! 'In khata lût leh chhuak' an awm hian a 'malsawm lo' tihte kha a ni ṭhin a; mahse, Zomuani pa thuchah hnuhnung leh kan phahniha induh tawnna tihhlawhtlin kan tum miau avangin kan ngaihtuah thui lutuk lo kha a nia.

Nî a ral ve zung zung a, palai tirh hun a hnai telh telh a, Muanpui'n, 'Fakhlu, ka nau i kutah ka hlân dâwn a, mipa rilru puitling china ka ngaih i nih avangin i lakah rinna ka nghat a nia, a dik lohnaah hauvin zilh la, chuti a nih rual chuan inṭhen leh mai mai te kha ka duh dâwn lo a nia, kan dinhmun hria a nei i ni tih thehnghilh ngai suh ang che.' A ti thlap.

Ka ngaih dan chiah a rawn sawi chhuak a, nu leh pa hrawn tur nei a ni a, a kum a la nau ang reng bawk nen keimah pawhin ka zir hlê a ngai tih ka hre ve kar. Zomuankimi hi a lan dan leh a nungchang ka hmuh phâk chinah chuan hrawn hrehawm a ni hauhvin ka ring lo a; mahse, hmeichhia hi zawng an inthup thei êm a eng mah sawi lâwk theih pawh ninghal lo chuan.

A hna chungchâng pawh kan pu ka sawipui diam tawh a, Falkland-a kan workshop lamah training pahin thlahnih a awm ang a, heta training kan tih hian 'mechanic line' ni lo vin motor parts lût leh chhuak computer-a dah luh leh 'oil' chah lam a chang dâwn a ni. Thawk lo pawh nise kan harsa dâwn lo; mahse, mihring chin hriat a nih tlat loh avangin zankhat mit chhin ka lo tâwk palh a nih pawhin kan company hian a thiamsa na nâ na chu an la mai dâwn a, ka ai a awh thei dâwn tih ka hriat vang a ni pakhat.

"Faka, kan suit inbel tur khâ kan nupain kan tum dâwn a nia, inhnial ka peih lo.' Zirsanga'n a rawn ti bur bawk a, hnial ka tum buai ta bik lo.

Company lam pawh an phûr hlê a, huau huau an tawng khât ve êm atin ni. Kan pu fanu Ruatdiki erawhin min be ngai meuh tawh lo mai ni lo-in hmêl hlim min hmuh thei lo a chhâ chu a ni e!

Ka nu leh pa an lawm fâl ngei mai, kan phâk tâwkin kan inbuatsaih nasa hlê a, kan in luah erawh kan 'extend' tîr duh ta lo, Aizawl lamah kan awm phei thuai dâwn thova mikhual pindan hran awm tawh lovin ka room nen kan zawm vek a, kan inhnawh leng thei turah ka ngai deuh. Siami erawh inhnuai lamah a insawn thla thung ang a, amah lah chu a la lâwm zaw mah leh nghal!

Zomuankimi pawh vawiin hian Aizawl lamah a rawn phei dâwn a, a hmâ khân in luah lai a lo nei reng a lâwm le! A pa sûn hlim ni mah se an theihnghilh ta tihna ni lo vin a pa thu hnuhnung zah takin an zâwm mai a ni!

"Fk, Mc kawtah min lo hmuak mai lâ.." tia min lo phone chuan ka phûr teh a nia! Kan inhmuh lohna a rei deuh tawh a, fawh nawk nawk ka châk tih phat buai ka tum lova mipa ka ni tlat a lâwm. Zû ka in tawh ngai lova Zirsanga mahin a nghei theih chuan Lalfakhlua hian ka nghei theih loh nachhan tur ka hriat si loh.

Ka ṭhiana te pawh an phûr nupa hlê a, an chhungkuaa min ṭâwiáwm an tum nasâ. An upa ber Zosangpuii te chhungkua leh Kenedy-a te chhûng kan khuaah an awm nghet bawk a, thlenna turah an buai eih lo bawk.

Zomuani hmuak tura office ka chhuahsan meuh chuan tlailam dâr nga a ri tawh a, Muanpuii'n chawlh a neih rih loh avângin amah chauhvin a lokal ta kha a nia.

"Fk, Ṭhuampui kan lo thleng tawh aw.." Whatsapp aṭangin a thlen chin min rawn hrilh a, ka rin ai chuan an rawn tlân chak!

#Mc kawtah ka awm tawh a, kan inah chaw ei turin kan tlang hmasa dâwn nge i in luahah min mikhual dâwn? Tiin ka reply a.

#Ka in luahah chuan eirawng bâwl chawp vek a ngai dâwn asin, i peih em ni?

#Nu zâwkin i bâwl ang chu le.. ka tih chuan Emoji léi chhuah lâi lem a rawn thawn tlurh nia! Hmaichhana sawi chu ni ila a zak leh pek ngawt ang.

Sumo a ṭanga Zomuani rawn chhuk chu Aizawl khawpuia nula tam tak inti nalh satliah aiin ka duh fê, min hmuh rualin a nui nghâl var var a, hmuh ava hahdam si êm!

"Hey, k'u Fak, ka bag te hi min khâisak ve bawk la.."

"Zomuankim, min ko el tawh suh," ka nui zui suk a, min û tawh rawh ka tih aṭang khân 'U Fak, k'u Fak' ti hian phone aṭangin min ko fiam ṭhin a, chimawm ru ve tlat.

A in luah kan pan lai chuan traffic jam-ah kan tâng zeuh zeuh a, fiam ka châk thar deuh thut nia!

'Mate, ka fâwp châk tawh che..' tiin ka melh zauh a.

"Tenawm uluk lo mai teh," zuk ti a, ka nuih aza kher mai.

"Tunah i ṭang na ve em em a, ka nupui i nih hunah chuan 'Fk, vawikhat leh chiah' i ti lovang tih tu nge sawi thei?"

"Awi! Lalfakhlu, ka ti nguar ang," tiin ka malah a rawn hmer vak a, "Kan la hria ang chu, thâwm hriat phâk lohnaah min ko sekin ka ring," ka ti leh a, a lâi leh ringawt tawh maw le.

"Ka hming hi nalh ti viau suh, Zomuankim.."

"Lalfakhlua of Hyundai company.." a nui deuh sak a, a hmuia ka hming a lam rîk hian 'Lalfakhlua' ni bîk hliah hliah a ka'n inhriat chu le.

A in luah zau fahran lo; mahse, felfai thlap chu hmuh a hahdam hle mai.

"Ka lo riak dâwn?" Ka sawi zawh rualin a nui hak a, "Lo riak rawh, chhuata i mut peih phawt chuan.." tiin a chhuat zimtê chu a kâwk a, "I kiangah ka mu dâwn khawp mai, kan inah pawh ka lo riak ru fova i phal reng kha.."

Min chhân hmâa ka phone a rîk tâk avangin ka pick ta zawk a.

Mafeli lek niin!

"Fk, innu a lokal tih ka hria a, naktuk tlaiah chaw lo ei rawh u aw, Rafaela paw'n a lam reng che a nia." A rawn ti a.

"Nia, kan nu ka lo râwn ve chhin dâwn nia, a hun neih dan tur ka la zâwt miah lo va.."

"Ok, min lo hrilh rang rawh aw, Zirsanga a lo la haw lova vawiin bungraw lo thlen ni a nia, lo call mai teh a ti a.."

"Yes, nakin deuhah ka lo hrilh leh dâwn che nia.." kan inbiak tâwp hnuah Zomuanin, "Eng nge kan nu i tih kher a?" Tiin min chhuahchhal a.

"Kannu i ni a lâwm, kanpa tih i duh em ni?" Ka tih chuan min melh no lo khawp mai; mahse, a thinrim tak tak lo tih ka hre tho.

"Eirawng lo bâwl mai lâ, ka inbual hmasa duh sia.."

"Zomuankim leh! Min va phût deuh ve.."

"Naa, phût a nih loh chu, tuna i lo bâwl ṭan loh chuan kan ei tlâi lutuk ang inbual ngei ka duh bawk si." A ti leh mai a.

Zirsanga te'n chaw eia min sâwm thu ka hrilh ta a, min hnial miah lovin 'Aw le' a ti vei thlap.

A zin chau ve bawk nen a inbual chhhungin kan ei tur ka siam ta nge nge a, ka hnuaia thawk ṭhin a nihna khâ hmuh tur awm tawh lovin atâna mipa awmchhun Lalfakhlua, a ngaihzawng angin min en thiam tlat!

Naktuk tlaiah Zirsanga te ina chaw ei kan tum ta a, Mafeli aiin Zomuani a nau daih a; mahse, an innêl ve thei maiin ka ring.

Zomuankimi ka nupui a nih hun tur suangtuah chungin ka nui leh suk suk zel nia!

B<++++[BeckirafARenthleI]++++>RR

SEGUNDO

Becky Rafa Renthlei

Chapter-12

Lalfakhlua

Zomuani in luahah eirawng ka bâwl ve ta chu a nia, siam mai tur ka hriat loh avangin an in piah chiaha dâwrah ka va kal ngawt a, lei tur pawh ka hriat si loh. Arsa pickle leh meat ball ka lei ve ta ringawt kha a nia!

Kan kawppuite azirin nungchang hi a lo thlâk theih khawp mai.

Zomuani bathroom-ah a zâi rât rât a, enghelh nei miah lo ni áwm taka a awm hian a hmêl hmuh a nuam viau. Towel-a lu tuam ṭât chunga a lo chhuak lai chu uluk fahran hian ka lo en ta a.

A hmai fai sar leh a mit eng mah hnawih lova fiah kâk te, a bathrobe-ina a khuh chin bâk a cháwn leh keṭhiah no zet te chu nalh kan tih thar riau pek chu le!

"Fk, min en reng kher lo lá.." ka chawhmeh siam ve chhun a hawng lâwr dan dan a, "Ka en loh che-in tu nge ka en chuan ang a, min en ve la a nimai a lâwm zum dûk lo khân," tia ka chhân chuan, "Eng lai pawhin ka mitthlâah ka hmu reng zel che, face to face aiin ka suangtuahnaah hian i hmelṭha fê zawk," tih pahin ka bulah a rawn ding ta a.

"Inthlâk rawh le, ka ril a ṭâm ṭan a nia, hetia min hnaiha i awm reng chuan i intuamna kha second thum lek chhungin chhuatah a tla lovang tih tu nge sawi thei?"

"Keima'n maw le!" Chimawm zeta meng ralh chung hian min hnaih lehzual sawt a, "A hun hmâa che chhuak lo tura insum thei mipa i ni nge ni lo finfiah ka châk e a," zuk ti mauh a.

"Kal mai teh Zomuankim," ka ti tak nâa a kâwngah kuahin min si chêt hian ka lamah ka pawt hnai a, khawdang hawisawn miah lova ka en tâkah chuan, "I ril a ṭâm a ni lawm ni, ka inthlâk chhungin chaw ei lo siam ta che."

"Hey, nangnu hi min tirhna tur i hre ṭan riau mai," kûn hniamin min chhân tuma a âng chiah chu a hmuiah ka fawhsak ta a, a hmui hnâwng chap leh a ka chhung sa ham ham chuan ka hnuai lam zu control daih a!

Ka fawhna uar taka min chhân lêt ve tâkah chuan mipa ka nihzia a rawn lang ṭan ta! A bathrobe hâk chhungah ka kut dah lûtin a âwmbâwr khuhtu awm miah lo chu ka khawih ta a, a thaw chhuak halh tho nain min dang chhin miah lo! A taksa dang pawh ka chûl lâwr dan dan a, a vun mâm han nêl thep hi zantina ka kuah phâkah a awm tawh dâwn chu a ni si a, ka nghâkhlel tawh kher mai.

"Fk, tâwk rawh se," a mitmenga duh tâwk tura min hrilhna chu ka zâwm lo tawp nâng a, ka hnuailam pawh thununtu awm lovin Zomuani taksa a si rân a, ka inlahrang hreh ru ngei mai. A hmui bul sêtah, "Kan innei tawh dâwn thova zanin chu a hmahruai ṭan mai ka duh.." ka aw a zawi kher mai! A chhan chu tisa châkna sualin min ṭham vêl mêk vang a ni.

"No, i nghâk ta sa sa a tâwp thlengin le, rei a ni tawh lovang," tia min nem sawn chuan ka lunghnur ang reng.

"A ṭha e, kan inneih zânah erawh dan theih ka ni tawh lovang," ti vein ka kuah na ka thlah riai riai a, nui var var chung hian,"Lutuk, i peih loh thleng thlengin a nia ka ngen dawn ni," nui var var chung hian room-ah min luhsan ta a.

Chaw kan eiin zân dâr kua a ri tawh a, ka chawhmeh siam tuiti hmêl taka a ei chuan ka nui ru suk suk a, ani hian eirawngbawl a thiam viau a, kan inah khân Siami a pui ve zauh zauh ṭhin kha a nia, kei erawhin ka bâwl khât khawp mai.

"Naktuk hian office-ah kan inreport zuai ang a, tlâi lamah Zirsanga te inah chaw kan ei dawn nia." Ka tih chuan, "Ka zak deuh, mí ina chaw ei hi ngaiah ka nei thei hlawl lo," tih pahin a tho chhuak a, "An fel lutuk, Mafelin nau a pai lehnghal a Zirsanga pawh biak a nuam teh a nia.."

"Ok, intifai ve rawh le, office-ah awm rei angaih loh chuan ka thawmhnaw tur min enpui ve la," a ti sap a.

"Zirsanga te nupa kan sawm dâwn nia, pahnih ngawt ai chuan a nuam deuh ang chu.."

Zomuanin hmun a tih fel chhungin ka lo intifai thung a, zanin hian a kiangah riah ka tum bur.

Khuma kan mut meuh chuan zân dâr 11 a pel tawh a, Muanpuii nen rei vak lo an inbe leh tê tê a, a rawn ngaihtuah khawp mai, "I lungawi zân na tur thlang ang che" a rawn ti a ni áwm e.

Zomuani muhil thaw sâk sâk chu ka thlir reng a, a hlawh a la tlêm ang reng si a, bazarna tur pêk ka tum kha a nia a lo duh îkhaw lo mai. 'Ka û in min pêk belh a, bâkah ka khâwlsa pawh a hman theih reng, eng mah min pêk tum suh," a ti deuh tlat a, ka thlêm ngial pawhin a rilru a sawhsawn duh dêr lo.

Khum khatah kan mu ve tak nain hmeichhiat mipatna lam ka ngaihtuah duh lo lui tlat a, dan anga innei tur kan nih vângin Zomuani thusawi ka zâwm lo thei lo. Nula thianghlim angin lang mah se ka awih lutuk bik lova a chhan pawh nula chhe lo tak a ni a, tûn thlenga la thianghlim thu awm hek suh.

Ka taksa kuah chial chunga mu Zomuankimi thianghlim leh thianghlim loh chu kan inneih zânah a lang turah ngai ang, kei ni lo mipa dang a lo mutpui tawh a nih chuan ka ngawi mai mai hauh lovang, hmeichhia inla virgin em em; mahse finfiah dâwl hauh si lo zîngah pawh a tel ve thei tlat.

##

Ka harh leh chuan a lo tlâi tawh hle a, kei mah chauhvin ka lo mu tawh bawk! Nizan khân a khât tâwka infawh zauh zauh bâk eng mah kan ti lova ka inchhuan phah sawt nia! Vawiin hian office lamah inreport ngei ngei kan ngai a, Workshop lamah Zomuani hna tur en fel a ngai bawk a tunah zawm rih lo mah se nakina a buai lutuk loh nan a zir tur ka lo duan lawk sak dâwn a ni.

Ka intihfai vek hnuah a eirawngbawl ka va fin ve ta a, kei tehngawt ai chuan siam tur a hre fê a rimtui hlawm hlê leh nghal a!

"I lo tho ve hrâm maw! Kaih thawh i har kher mai.." tiin thingpui ka duh leh duh loh min zâwt nghal a, 'Zingah ka in ngai lo' tia ka chhân chuan mak a tih hmel kher mai.

"Chaw ei i peih tawh chuan ei nghâl ila office tlai a chi miah loh, kan inah thawmhnaw thlâk ka la duh bawk sia.."

"Naa, i va'n lerh tak, tikhan kal ve mai la," nimin aṭanga ka inbel tawh ka thawmhnaw chu a thlêk zauh a.

"Min zahpui leh si lo'ng maw! Ka nupui tur nalh leh uluk fahrana a induan laia kei ka lo ṭawp riau si chuan thilmawi va ni suh.."

Chaw kan ei chhungin kan ṭawng mang lo, chaw eikham veleh ka pa ka va bia a, 'palâi tirh nawn a ngai tawh lo, chawlh ka neih veleh a hun leh nî kan ruat dawn nia.." tiin Muanpui'n ka pa te a lo bia a ni áwm e.

A pa boralna la rei lo mah se bahlah miah lovin a unaunu tâna a tih theih tawk tur a buaipui char char a, a fel letling phian! Kei nen pawh inngeih khu chûk lo mah ila kan inbe thei ve viau tawh a. Police a ni bawk a, a ṭawngkam erawh a kha leh fak ṭhin!

'Mami'n bazarna tur min pe lui ṭâlh a, ka khâwl ve pawh hman a ngai dâwn ta lo a nih hi..' insiam mial mial chunga Zomuani thusawi chu khuma ṭhu chungin ka lo ngaihthla a, phír nisi ah chuan an mize inpersan lutuk hi thil mak a ni! An hmêl erawh a inang em em a, sam tâwi leh sam sei khâ râlkhat aṭanga ka thliar theih dan ber a ni! Mahse, mahni bialnu zawk na nâ na chu a aw leh ṭawngkamah ka hai bik tawh lo. Zirsanga sawi dan tâkah, 'Muanpuii hi chu i type a ni lo, a fing fel mah mah..' a tih kha a dik hlê in ka hria.

Kan In pana kan tlan laiin Zomuani a titi phei siam siam a, a thawmhnaw inbel simple zet hi a inhmeh riau lawi si! Ka ngaihzawng hlui te thawmhnaw man tam tak tak inbel hnathawh mumal nei si lo ho ai khân ka ngaisâng daih zâwk.

"In inah tu nge lo awm ang?" Kan in kan thleng tawh a, car ka hûn ṭhat laia min zâwt a ni.

"Ka cousin-in min enkawl sak ṭhina tunah tak chuan class a kalin ka ring."

"Midang an lo awm nual ang tih ka hlau deuh a lâwm le, sawi tur a vâng thei si," inchhungah kan lut tawh a, a hawikual nasa ngei mai. "Zo, i inluah kha tiruak rang ila helamah rawn insawn mai ta che, chawlh kan lâk tak tak hmain a zualpui tal tifel ila.."

"Nia, bungraw zualpui pack a ngai tawh hrim hrim a, hlawhfa pakhat min zawnsak la kan inbuaipui thei maiin ka ring," a tih chuan, "Kan Helper pathum vel kan hruai phei dawn nia, zaninah Zirsanga te ina chaw ei kan tum si chuan chawhnu lamah phei ta mai ila.."

"Office i chhuahsan thei dâwn em ni?"

"Thei ang, nangpawh ka nupui tur i ni tih an hre vek tawh a, ka sawi kêp ang che.." ka inthlâk chhungin in leh a vêl lo enkual rawh ka tih zawm zat a, kei erawh ka room ah ka lut ta a.

Kan in hi Chhâwngthum a ni a, a hnuai ber garage a tân kan hmang a, a chung chiah hi ka nu leh pa room bâkah choka leh TV dah nâna kan hman a ni, sitting room zau vak lo kan dah tel bawk; a chung berah ka room a awm thung a, fapa mal ka nih avang leh nupui a chhia a ṭha la nei tura min ngaih vângin a zau ṭha hek hawk hle a, duh chuan mahni pawhin a inbâwl hran theih bawk.

Zomuani ka nupui a tâna ka thlang hi ka inchhir loh hrâm ka beisei, ka kum ngaihtuah chuan ka duh naupang mah mah emaw tih mai tur a ni a. Mahse, a pa thi tur khân an unauvin ka kutah a dah hmiah a, keimaha rinna nghat ngamtu hi tih beidawn tumna ka nei lo.

"Fk, i rei lutuk kan tlai dâwn a nia," Zomuani ka room-ah a rawn dâk ve a, "Awi awi, nangmah chauhvin hetah hian i awm a nia.."

"Eng nge, rei ka awm dâwn tawh hleinem, i awm ve hunah chuan duhtâwkin i sapatâl dâwn nia," khum bula sofa pakhat inhûngah chuan a ṭhu vei tharh a, nuam ati tih a hmêlah a lang reng.

"I nu leh pa khawiah nge an mut ve a?"

"Inhnuaiah khân an room a awm a lâwm, keini pawh duh chuan inhnuaiah kan riak thei thova room pahnih zau vak lo a awm, pakhat khu mikhual pindan a nia, pakhat zâwk khu ka pindan atana an siam tho a nih khu, a hma chuan ka riak ṭhin a, in chung kan sak zawm tâkah hian ka insawn mai mai alawm," tiin ka hrilhfiah a.

"Eng pawh nise, kal tawh ang 9:30Am a ri dâwn a nia.." a ti sap a.

A dik reng, kei chu boss ka ni a, ani erawh MR ang chauh a ni si a kan dinhmun a inang lova tlâi vak chi a ni lo.

Showroom lamah kan tlang hmasa ta a, Zirsanga ta tur Elantra car stock sa kan nei em tih en hmasak a ngai a, showroom-ah hian Ruatdiki leh Nunsiama an ṭhu ṭhin a, ka hman chângin ka ṭhu ve zauh zauh bawk.

"Hey, inva tlai ve?" Nunsiama a lo nui vur vur a, ani hi ka hnuai chiaha awm niin tlangval sâng ṭha tak leh vai hmêl pu deuh a ni a, nula lam hian an star thei riau. Ruatdiki erawh nu tê lam deuh fel ât chi a ni a, a vun a ngo mah mah emaw tih mai tur a ni a, a hmelṭha hlê bawk.

"Nia, kan buai deuh a lâwm le.." ka ti liam puat a, "Innu tur chu kan company-ah a lo thawk ve reng a ni maw! Ka vawikhat hmuhna.." Ruatdiki a nui sâng a, Zomuani a en uluk hlê bawk.

"A thawhna a la rei lutuk lo, Zomuankimi a nih hi.." hrilh bîk pawh nei lovin inhmel hriattirna ka nei a, Nunsiama'n a en uluk ngang mai, showroom-a ṭhu ṭhinte hi Zomuani mithar deuh reuh tân chuan hriat chi ninghal lo chuan an va kal ngai lêm lo atin ni.

Chumi hnu chuan Car thleng thar list leh kan hralh chhuahzât te, Loan-a latu te zawng zawng list computer-a awm sa chu Zomuani a tih dan tur ka hrilh vek a, ka nupui tur a nihna hi hnathawhnaah chuan tihlan vak ka tum lo, thiam tum taka a zir hi ka duh ber a ni.

"Mate, ka enpui reng hman dawn lo che a, tikhân lo ti char char phawt la, kan pu ka han hmu lawk ang e," ka tih chuan a bu nghat nghat a, ngaihtuahawm a ni êm lo'ng chu lekkha zirsâng na nâ na chuan a kal hmang a man vat turah ka ngai.

Kan pu hmu tura ka kal chhan pawh ka kutah engkim dah mah se Zomuani sawi kêp zel a ngai ve a, chawlh pawh ka dîl kêp a ngai leh dawn tho tihna a nia, a leh lamah chuan Ruatdiki tih loh a mah chiah hmeichhia a nia kan ṭangkaipui phianin ka ring.

"Fk, innu nen hmun khata thawh kha a ṭha ber, workshop lamah mechanic training pêk a ngai thova innu pawh a line tur chu i kutah a awm a nia, kan Lalruatdiki hi a rintlâk mang si lova Zomuani i train thei ngat a nih chuan kan ṭangkaipui riau ang, sâp ṭawng a thiam bâkah tuna a hna chelh lai pawh a thiam fû reuh a nia," a tih chuan ka nui suk nia!

"Vawiin chawhnuah a in luah singsak fel a ngai dâwn a.."

"Ê! Inbuaipui rawh u, helper hruai tel bawk u la, thil pakhat ka sawi duh chu Mahindra company-in ṭan an la thar hlê tih a, hlawh tam zâwka rawn sawm che pawh an tum tih thâwmte ka lo hria a, i duhthlanna a nih rualin min chhuahsan loh ka beisei a nia." A ti ta a.

Ni e, kei hian ka lo hre diam tawh, Mahindra motor company-in min rawn be tawh a; mahse, ka lo hnial ta kha a nia, ka hnial tih kan pu hrilh hriat kher ka tum lêm lo.

"Lungngai suh, Hyundai hi ka tuina ber a ni a, chuti maia chhuahsan ka tum hleinem.." tiin ka chhâng ta zâwk a.

Chawlh lâk dan tur leh kan inneih ni-ah showroom leh workshop pawh khâr vek a ni ang tih a sawi chuan, 'A ngai lo' ka ti zet a; mahse, a tihluih deuh tlat avangin 'Aw le' ka ti ve ta a.

Inhnuai lama ka chhuk leh chuan a reh deuh ṭhiap a, customer pali nga vel Nunsiama'n a lo buaipui a, Zomuani bula Ruatdiki lo ding ka hmuh chuan chulam pan chuan ka phei ta a, min hnungchhawn zâwnga ṭhu annih vângin min hmu lêm lo.

"I dinhmun leh i nihna hi hre ve rawh Fakhlua hi phûin i inhria em ni?" Ruatdiki ṭawng zawi sap chu ka hre hman chiah. Engtin nge Zomuani'n a chhân tih ka hriat duh avangin ka ding khawmuang ta a.

"Phû tihah chuan ka phu hauh lo; mahse, nula tlangval kan ni a, a duhzawng mi ka ni tih leh ani pawhin min duh a ni tih hriat hi a tâwk viau a ni, kan phû ang zel nei dâwn ila nangpawh hian pasal i hmu zo kher lovang.." tia a chhanna chuan Ruatdiki thin a khei deuh nge, "I zâm lo ka ti, engtin nge kan company-ah hian i thawh ve theih le, ka theinghilh zât pawh i hre awm si lova.."

"Hre lo tawp ang; mahse, thiam tumin ka zir mêk a ni, zir lova thiam chi ninghal lo chuan.." an inchhâng tâwk ang reng!

"I thiam hun ka lo thlir dâwn nia," tiin a beng bulah eng emaw a sawi zauh a, ka hre pha chiah lo.

"I pasal êm a ni hlei nem, nunhlui chu a liam vek tawh.." tia Zomuani chhânna chuan Ruatdiki sawi áwm ang ka rin hriat mai. Henu hian kan inkâra buaina thlen a tum a nih vaih chuan an company hi ka kuta innghat a ni tih ka hmuhtîr hreh miah lo.

Ruatdiki kal sawnin min han hmu phut chu a meng phar âwk a, hun dang chu nise polite takin ka be ngei ang,a ṭawng dan kha ka run deuh avangin en pawh en lo hian ka pêl hmak a, Zomuani hi office-ah chuan 'ka duat hliau hliau lovang' tih rilru ka pu deuh kha a nia; mahse, Ruatdiki hmuh laia a thlavâng hauh hi ka tih tur dik tak a ni.

"Mate, hriatthiam loh i nei em?" A dârah ka'n kuah ngei a.

"Teh náng, ka thiam mah mah.." tiin a zi mar ar ar a, min hmu chu a lâwm tih a mitmengah a lang reng.

"Ruatdiki khân eng nge a sawi?"

"Â, eng vak mah.." a ti sap a, a sawi duhin ka ring lo rêng a(h).

A koki a kuah chunga office kan chhuahsan lai chu Ruatdikin min en duh hlê. A meng no lêm lo khawp mai.

Falkland-a kan workshop-ah kan chhuk leh phawt a, Helper pahnih min pui turin kan hruai tel ta a. Zomuani in luah chinfel chhung rei dawn lo mah se Zirsanga te ina chaw ei tur kan la nih avangin muan lutuk khâ a chî bik loh.

Bungrua a ngah lutuk lêm lo bawk a, dârkar hnih pawh tling lovah kan inkhung fel hman vek a, a thawmhnaw pawimawh zual leh Laptop tih vel erawh kan ina ken phei turin car-ah ka dah fel sa vek a, thlâ ala ral chiah lo nen in luah man erawh pe rih lo turin ka ti a, Lawngtlaia thawn turho pawh kan siamfel sa vek a, driver pakhat tîrin a va dah dawn a ni.

After 3 hours.

"Â, ka huphurh e, a tu amah ka nêl si lova ei loh mai ka duh.." Zirsanga te in pana kan tlân laiin Zomuani'n a ti nang nang a.

"Ka ṭhiante chu i ṭhiante anni a, i ṭhiante pawh ka ṭhianteah ka ngai hmiah ang, bâkah chutianga hreh viau tur a ni lo, anni nupa hi ka tân an hlu viau a nia.." ka tih chuan eng mah a sawi tawh lo nain a hmelah a hreh hlê tih a lang reng.

Zirsanga te in kan thlen rualin Duati ka hmu hmasa ber a, "Â pa, âpa Fk-a te an lokal a nia," tiin a pa a ko âl âl a, a nu hmêl ai chuan Arini hmel a chhun zâwk! Arini kha nula ngo leh hmelṭha vang a ni a, Duati hian a chhûn zel a nih chuan a la hmel ṭha viau ang.

"Duati, khaw'nge Rafaela?" An nula in eirawng a lo la bâwl a, Mafeli pawh ka hmuh si loh!

"Ânu nen an inbual.." tia min chhan chuan Zomuani lam ka hawi a, "Hei hi Zirsanga te fa upa ber Duati a nih hi, Duati ânu Zomuani hi chibai rawh le.." nui var var chunga an inchibai lai chuan Zirsanga room aṭangin a rawn chhuak ve chiah a.

"Nupaa inbual tlân deuh kher hi sim teh u, innu pawh a rai leh tawh a nia.." Ka tih chuan a nui suk a, "Tite kha chuan min ti lo mai teh aw, in chhang a zing ngawtin ka ring, Zomuan inpa hi a englo riau a nia," zuk ti leh pek a.

"Keini te zawng kan fair êm!" Ka ti a.

"Fair chiah em mawni, nizan in riak dun leh nghal a, ka ringhlel ru riau che u.." Zirsangliana kha a ni tlat a, min fiam leh vak vak hmain thudanga pakai pui a ngai. A car thar tur chanchin vel ka sawi pui ta a

Mafeli leh Rafaela an lo inzui chhuak ta bawk a, Zomuani a la hmuh ve loh avangin inhmel hriattîrna ka nei zung zung a, Mafeli dul pawh a puar lian ang reng tawh viau! A hmêl erawh a no sur a, hmuh a nuam ang reng.

Rafaela erawh a pa hmêl hlauh, a vun rawng pawh chuti bawk. "Mafel, Rafaela hian Vikings hairstyle a put loh hrâm ka beisei," Rafaela ka pawm nghal a, ani ang fapa hi neih ve ka châk kher mai. A hmel ṭhat chu thuhran, naupang tê e ti lo hian a 'pa' ru zêk a, a pa pawhin a chhuang rêng a ni.

Naupang inkhawmpui hnuhnung berah Duati'n châng a sawi a, Rafaela erawh a la nau deuhva chanvo a nei ve lo tih Zirsanga'n min hrilh nghe nghe.

Zomuani leh Mafeli pawh mokawr design enin computer hmâah an ṭhu a, 'Kawrfual var hâk ka châk nen 'Rafa' pa hian a phal mang si lova..' Mafeli'n a tih chuan Zirsanga a nui ruh ruh a, 'Kan inneihni a i inbel kha i mawipui ber sawi sawi tawh teh suh.." a ti hluk a.

"Ka sawi lo thei lo, min ngaidam la vawikhat chauh ka sawi leh ang aw, pasal ka neih leh hunah chuan maw Zomuan kawrfual var sar ka inbel ve tawh ang," Tih paha Zomuani a kheuh ru zeuh chu ka hmu reng.

"A Remruatfeli thlâk êm mai.." Zirsanga'n a ti leh a. He mite nupa style hi a lâwm hmuhnawm chu..

Mafeli'n Zomuani inchhung a fanpui a, an dâwr an tih len belh bâkah Mafeli General Manger a ni bawk a, an khawsak a ziaawm viau, Pick up pakhat dâwr bungraw lâkna annei a, Santro car leh Bike pakhat annei bawk.

Tin, Mafeli hi fanu mal a lo ni bawk nen Lungleiah in hmun a pa in a pe Assam type-in an sa zo tawh a, mi in an luah mêk tiin Zirsanga'n min hrilh.

Rafaela ball boot ka hawn chu a lâwm ngang mai a, mipa fa nge nge Duati ai chuan ka ngaina deuh! Duati thil tur ka lei hman ta si lova ₹1000 ka pe ta ringawt a, "Âpa Fk, ka lawm e, ka khâwlbâwmah ka thlâk ang aw.." zuk ti vei reuh a!

Kan zu in ṭhin lai hun kha sawiin kan nui leh ṭhin a, "Nutei khâ Zirsanga hian a ngai deuh tlatin ka hria.." Mafeli leh Zomuani'n min rawn fin leh tawh a.

"Hmingsanga i ngaih vang a nih chu.." ṭhianpa lah hi a ngawi duh mang si lova nuih anti za thei a nia.

"In kawr duhzâwng in hmu thei em?" Tia ka zawh chuan, "U Mafeli hian a thlang a, a mawi khawp mai, naktukah a hmunah min enpui dâwn a nih chu.." Zomuanin a ti sap a.

Rafaela leh Duatin chaw an ei hmasa a, an nula pawh a fel that that khawp mai.

"Nupui te duat thiam tur a nia, sum ringawt te kha i lo ngaihvensan ang e, Zomuan inpa hian a duat loh che chuan min lo hrilh zêl dawn nia," Zirsangliana a nui duh ṭhak si lova ka va ngei mai mai tak.

Kan khuaa inneih kan tum chu tifuh min tih thu leh kal thuai thuai an châk thu an sawi ve ve a, "Nutei hmuh a inbeisei a ni ang tuemaw chu a phûr fâl.." Mafeli'n a ti leh pek a, an pa a nui duh ṭhak lo!

Sitting room-a kan ṭhut laiin Mianpui'n a nau a rawn call a, Balcony lama be tura Zomuani a chhuah hlânin, "Faka, innu chu a fel hmel kher mai, a hmelṭha bawk si duat hlê ang che," Mafelin a ti ta a.

"A phirpui hmu la chuan i hai hial maithei a ni.."

"Maw! Ka va'n hmu châk e, a thlalâk i nei em?" A ti leh a, Zomuani pa thih laia thlâna kan lâk kha ka phone ah a la awm a chu chu ka entir ta a.

"Awi! Anva inang ve le, innu aiin ala sâng elaw!?"

"Sâng e, police ngat a nih kha.."

"Innu ka duh zâwk, a hmelṭha zâwk bawk." A ti leh hliai a, Muanpuii nen kan inmil loh dan vel ka sawi chuan a nuih a za hle, "Zirsanga duh chi a nih chu.." An pa a kâp leh zauh a, ani lah chuan, "Remruatfel, i duh duh sawi phawng phawng zel suh, fâ pathum i nei tawh a, bialnu, bialpa tih vel tezawng sawi ngam tur kan ni tawh lo.." tia nui suk suk chungin an nula chu chaw ei siam turin a hrilh ta a.

An nupa an felin an inngeih bawk a, Zomuani pawh a tlângnêl ta thuai a, Duati hian a'n ngaisâng mai mai khawp a, a zui deuh chhen nen chaw kan eikham hnuah pawh, 'Ânu Zomuani sam ka phiar dawn,' a ti deuh ngei!

Rafaela leh a pa pawh an inpawm leh hlü hlü tawh a, pa-in fapa duat bawk, fapa lahin a pa a ngaisang bawk a, an in awm deuh reng chu a ni e.

'Naktukah Mc-ah inhmuh kan tum dawn nia, tûn bâk hun thâwl innei âwm bik si lova' kan hâw dawna an nupaa min thlah laiin ka ti a, 'Ni e, ṭhianpa berin nupui i nei dâwn sia kan hnial ngam nâng..' kan tlânliam hma an nupain min thlîr zui a, tunah chuan pa dik tak dinhmun a luah tawh a, Zirsanga pawh a patling ruih tawh! Nakin lawkah chuan a dinhmun ang a ka la din ve hun a awm ngei turah ngai ila..

Kan in lamah kan tlang nghal a, Zomuani pawh a hlim ve hle tih ka hria, a chhan pawh Mafeli biak a nuamin a zau a, Zomuani a naupang zâwk tak nain an inkawm thei phian kha a nia.

Naktuka min bazarpui an remti pawh hi kan lâwm viau, Mafeli a rit ve deuh tawh a, Duati leh Rafaela an la awm tel cheu nen an tiṭha takzet.

Zomuani car seat nghênga muhil ka hmuh chuan kawngsir remchangah seat belt ka hrên ṭhattîr a, ka kai tho duh ta lo.

Hrehawm tuar tura nupuia neih ka tum lova chhungkaw hlim tak ani nêna din hi ka tum ber a ni.

'Zomuankim, i hlimna hi ka duh ber a ni tih theihnghilh ngai suh' ti supin a hmuiah ka fâwp ta zauh...

B<++++[BeckirafARenthleI]++++>RR

Chapter-13

Zomuankimi

Fakhlua te in kan thlen chuan a cousin pawh a lo awm tawh a, kan inrual vêlin ka ring. "Au Fak, in awm tho chuan kan inah ka riak chho ve ang aw, assignment tih tur ka ngah si a," a lo ti nghál a.

"Aw le, naktuk pawh i duh chuan awm tlang la, hei hi Zomuani, ka nupui tur chu a nia, in inrual velin ka ring a; mahse, û tho rawh," tiin a nui suk a.

"I ho êm mai.." ka lo tih hlak chuan, "A û nupui chu naupang tê pawh nise a û ve mai tur a lâwm," tiin a nau lam a hawi leh a, "Mami, i u Zomuani tur a nih hi aw.."

"Yes, ka hria ka hria, chuan thlalâk aiin a takah a hmel ṭha fê zâwk," a tih chuan ka zak ru deuh, Fakhlua hian ka thlalâk a lo entîr tihna a nia!

A nau chhuah hnuah sitting room-ah kan ṭhu a, "Thingpui hâng min lumsak peih an awm em le?" Tiin min melh zauh a, nizanah leh tukinah ka tîr zuah zuah sia ka hnial hreh deuh.

"Kan inneih hunah chuan thingpui hâng in awih tawh loh.."

"Û huh! I ti mah mah," tiin a nui suk a, kitchen cabinet an hman avangin chêt a awlsam zaih mai, kan inah khân siam ve kan rilrûk khâ a nia; mahse, ka pa damdawiah kan insêng nasa lutuka kan tlin ta lo mai pawh a.

Fakhlua pa hlawh hi an eisêng hauhvin ka ring lo a, a mahin hlawh tam tham tak a nei tawh bawk a, an chhungkua an tlêm si, khawsak harsa anni lo tih a lang reng.

"Kan inneih hunah chuan zîng thawhhma a ngai dawn a, nitin office kala chhuah a ngaih dâwn avangin insanmar a ngai viau ang," a ti a.

"Ka tho tlâi ngai vak lo ka dam îk chuan; mahse, a tho tlai zawk zawkin khum siam ziah tur ti ila.."

"Hah! Ti chiah ila kan ina i lo awm lai pawhin min thawhkhalh ngai mang lo chu a nih kha.."

"Naa kha lai hunah te chuan ka dam ṭha hlei nem.."

"Ok, zanin pawh ka bulah mu leh rawh aw, naktukah bazar kan ngai dawn sia mut mai pawh a pawi lo," a thingpui inna no min pe a, Fakhlua hi ka hrechiang telh telh a, a puitlin zia leh tlangval fel tak a ni tih ka hriat belh sauh bawk.

Chumi hnu chuan ka thawmhnaw vel a room ah min khai chhohsak a, a bula mut pawh ka hnial duh bik lo, engtin mah min ti dawn lo tih ka chiang ve tlat.

Ka u Muanpuii pawhin chawlh a la fel tawh a, bialpa ve deuh reuh a neih thu a sawi chuan ka lo phûr ve em em a, ani hian ka hriattirh tê aṭangin ngaihzawng a nei ngai hauh lova Police uniform nawh mar em em inbel khâ a nuam tih zâwng ber zuk ni miau a!

After 7 Hours.

Fakhlua car-in Zirsanga te nupa nen kan bazar ho ta a, ka lo rin ang chiah! Mafeli chuan thil mawi leh ṭha a hre em em a, ka mokawr hâk tur pawh min thlan fel sak thlap a, ka chhawm tur puan leh ka mamawh tur a hre kher mai. Kan mipa te pahnih ve thung chuan car lam hlir an sawi a, Elantra kan company car pawh Zirsanga hmingin an book nghal bawk a, naupang an ngaihtuah deuh bawk nen chawhnu lamah min ṭínsan ta a.

Nilênga teivah ka taksain a tlin loh deuh avangin tlailam dar thum velah kan haw ve ta a, ka inlei hnem phian! Fakhlua'n pawisa min pêk phêt a tum a; mahse, ka la duh ta lo. U Muanpuiin Singhnih min lo thawn a, ka khawlsa nen ka indaih ve mai.

Zanah pawh a bulah ka mu leh ta a, thil sawiin titi duah lo mah se nupa awm dan tur leh indawh tawn a ngaihzia te, eng emaw hleka tlân tum rikngawt loh tur tih thlengin min hrilh vek a! Nu leh pa min zilhtu tur ka neih tawh loh avangin ka lâwm hle a ni. Pasal neih hi thil awlâi a ni lo tih te, a nuam ringawt beisei tur a nih loh zia leh a nu leh pa pawh zah thiam turin min hrilh tel bawk.

'I dik a ka thu i zawm bawk chuan i lamah ka ṭang zel ang' tia min hrilh chu ka thinlung phêkah ka ziak hmiah.

Aizawla châm reng thei ka nih loh avangin Zirtawpni-ah Lawngtlai panin ka haw ve ta a, "Mate, phurritah eng mah la lo ula, i û pawh kan chhungkaw zinga mi ang chiahin kan en tih i hre dawn nia' kan chuanna Sumo a tlânliam thlengin min thlir zui tih ka hria.

Lawngtlai ka thlen hnuah pawh chanchin kan inhrilh zêl a, keiin chawlh la mah ila ani tân chawlh lâk a la hun loh avangin nitin office a kal ziah a, ka zirtur min rawn thawn hnem thei khawp mai!

After 1 month

Wedding day.

Lawngtlaiah man hlanna 'programme' a hming tê chauhvin kan buatsaih ve a, ka man eitu kan chhûng hnaivai leh ka nu leh pa unaute, kan ṭhenrual ṭha mí tlêmtê chauh chawhlui kan buatsaihsak ve a.

"Zomuan, i û amah chauhva a awm tur hi ka khawngaih deuh, a duh chuan Aizawl lama transfer dan kan ngaihtuah thei reng a nia," Fakhlua pa in a ti chuar chuar a; mahse, u Muanpuiin ka nu leh pa sûlhnu kalsan a duh teuh lo. "Kan hotuten min sawn a nih loh chuan dîl kher a ngai lo ve" a ti deuh tlat.

Kan inneih ni tur a hnai telh telh a, ka nu leh pa kan ngaihna a zual tulh tulh si. Biak ina min kâi lûttu tur nuṭa pianpui ka neih loh avangin ka patea fapa Rohlupuia'n min kai lût dawn a, Fakhlua te inbuatsaih dan eng mah kan hriatpui lem lo.

"In chhungte inneihna a kal duh zawng zawng kha tumah bâng awm lovin kal vek rawh se, motor kan hire belh dawn nia," Fk-an a tih chuan ka lawm kher mai.

Keini unau, hmeichhe pahnih ringawt tan chuan thil zawng zawng ngaihtuah kim a har phian a, ṭhian dinpui tur pawh a hran ngaihtuah buai lovin ka û a ding dâwn a ni.

Man hlannaah Zirsanga leh Fakhlua an lokal tel ve a, nula hovin an en duh hlê, "In pa tur chu a chhe lo kher mai," Ka ni fanu Mawimawi'n min hrilhru sap a, "Kha kha a nimai, amah ang hi an khuaah ka lo zawnpui ve ang che.." ka tih chuan a nui uar uar nia.

"Mate, ka pa thlânah i kal lawk ang hmiang tumah hruai lovin aw.." ka û in a tih chuan mak ka ti deuh a, Faka leh Zira kalsan daih ka inthlahrung ru deuh. Mahse, ka hnial duh ta chuang lo va.

"Fk, tikhan lo awm u la ka u nen thlanah kal lawk kan tum a.." an ṭhutna bulah dingin ka va hrilh vei thlap a.

"Kalpui inngai lo em ni?"

"Aih, kan pahnihin kan kal mai ang, kan rei pawh ka ring lo." Ngaih dan nih hmel vak lova min en chu haiderin kan chhuahsan ta a, chaw kan eikham vek tawh a, man pawh min hlân fel diam tawh bawk.

Naktuk zîngah an khaw lam panin kan chhuak dâwn a, dik tak chuan ka huphurh viau, tam tak kalna chî-ah pawh ka ngai lova, 'Thlenna tur a buaithlâk mai mai, kan ti hautak' ka û in a ti nghe nghe.

Thlânah kan unauvin kan ṭhu a, ka pa mitmu pawh a keh hma hma a pasal neih ka tum hi ka inthiam hlawl lo; mahse, ama duh dan zâwm lo thei lovin a thih dâwn dârkarah thu min hnutchhiah lawi si a, ka u hian hlawh nei lo phei se chuan kan retheih dan tur ngaihtuah ngam pawh a ni lo.

"Mate, he khawvelah hian nang lo chu unau leh thisen zawm ka nei lo tih hria la, pasal nei suh intih ngawt theih ni hek lo, i hrehawm châng leh i lungngaih châng pawhin Pathian kutah inkawltîr zêl ang che, i û hian râlkhat aṭangin ka rawn ngaihven sek thei lo che a nih pawhin chhel taka awm i tum dawn nia," u Muanpuiin ka kutah a vuan rân a, a mittui far fap fap ka hmuhin chhuak em em hian ka ṭap ta a.

Mite chu annu leh pate thlazar hnuaiah mâwi takin pasal an nei a, kei ve zawng mipa chu sawi loh ka phirpui hmeichhia nen chauhva khawvel min hmachhawntîr hi fair lo ka ti thar leh hnuhnawh a ni.

"Rilru ti pakhauh la, nang mah hmangaihtu pasal ṭha tak i nei dâwn a lâwm, nakinah kan dam ang a, ka hná aṭanga ka kaisan hunte pawh a la awmin ka ring, mawihnai taka ka pa thlanlung phun kan tum dawn nia, Lalfakhlua hi misual a ni lova, a thû zawmin a nu leh pa zah ang che.." a hmâa Fk-a thusawi ka hrechhuak zawk.

"In enkawl ṭha hlê ang che, an khuaah chuan hetiang sawina hun a awm ka ring lova tunah pawh kan in lamah sawina hun ṭha ka melh ngial pawhin ka hmu lo chu a nia, 'Nu, pa, Matei hi keimah chauhvin em ni min thlahliamtîr in tum..?' Vawilehkhatah u Muanpuii a ṭap chhuak ta phawng a, awrâwl chhuah meuhva a ṭap lai vawikhat mah ka la hmu lo mai ni lo vin ka la hre ngai lo hrim hrim!

"Ka pa, a ang lo hi ka ti êm mai, Matei te inneih ni tur pawh i sawi lâwk tawh kha.." Tiin a ṭap leh ta a, ka mittui dan rual lohva far zawih zawih chu hrûk tumna pawh ka nei lo, ka û hian hlim hmêl pu mah se ka kalsan tur hi a lo huphurh takmeuh tih ka hrethiam chiah! Fakhlua neih duh mah ila ka û dinhmun tur lam ka lo chhût rêng rêng lo a lo ni.

Kan unauva kan ṭah tlawk tlawk lai chuan, "A tâwk tawh e, i pa khân inhlim a duh a nia.." Zirsanga aw thâwp sat leh Fakhlua inkuangkuah thâna lo ding reng te chu ka hmu ta a.

"Muanpui, i nau a hrilhhai lutuk ang, i hâw tawh ang u," tiin Zirsanga'n ka û a kuah tho a, Fakhlua'n min kuah bawk a, thlânah kan lo awm rei lutuk chu lo niin!

"Khawvel hi kan kumhlunna tur a ni lova kan la thi ṭheuh dâwn, chumi a nih rual erawh chuan a la dama te hi kan pawimawhin dam chhung khawsak ngaihtuah a ngai ve tho si a, Muanpui, i nau hi ka theihtâwpa ṭhaa enkawl ka intiam e.." Fakhlua aw hniam chhak leh fiah fak chuan min thlamuan ngawih ngawih.

Kan in kan thlen pawhin ka nî teho an la ri laih laih a, ka û erawh a pindanah a lût tlang nghal a, a rilru tur ka ngaihtuahin ka khawngaih, he kan inchhûngah hian sûlhnu chhui reng rengin a hun a hmang dâwn chu a ni si a, pasal neih châkna thinlung ka pu hleithei ta meuh lo. Mahse, engkim kan tifel vek tawh si!

Faka te ṭhiandun Hotel-ah an thleng a, in lêng an ṭîn ta bawk nen keini unau pawh ka chhawm tur buaipuiin zân dâr 12 thleng rawk kan meng a, nichina kan boruak ang erawh a thleng nawn leh tawh lo.

Khawvar ruala chhuak turin kan inpeih ta a, mi 22 vêl zên zâwnin min zui dâwn a ni. An tam lo naa kan chhung leh khat an kim viau.

Sumo pahnih leh Fakhlua te car pahnih a awm a, Zirsanga'n car a keng bawk a, kan chuang nuam tawk viau. Fakhlua te car pakhat zâwk khalhtu erawh ka hmelhriat a ni lo.

An khua kan thlenin min lo hmuaktu an ri nuaih nuaih a, an inah ruaiṭheh tênau an siam a ni ringawt!

Kan thlenna tur in pahnih an lo ruahman sa vek a, Quarter ruak pahnihah kan inhnawh khâwm ta a, tû mitmei mah vên ngai awm hek lo, a nuam kan ti letling phian.

Ei leh in tur erawh Fakhlua te inah min buatsaihsak vek a, kan thlennaah inbâwl hran an phal teuh lo. Thingpui leh eng i lo fahran pawh an in lamah zuk buatsaih vek a!

"I pasal tur hi mi pangngai tak a ni, i vanneihzia innhria la a thu awih hlê ang che," ka pa te unau zinga upa ber ka nîin a tih chuan ka nui ringawt.

Zan lamah u Mafeli te nufa an lo lêng a, Aizawl aṭanga an lo hruai Beautician pahnih nen inhmelhriattîrna min nei a, a ma sum leh pâi sênga a hire a ni. Ka û nen an inhmu chiah chu annui bâwk bâwk a, "Awi! Zomuani emaw ka ti dâwn che a lâwm le," Mafeli a nui var var a, ka û pawh chuti tho.

U Muanpuiin sam lem a vuah dâwn a, ka sam ang chen vêl niin a kâwi chiat a, a inhmeh viau, ama sam pangngai te zawng Biak ina luhpui ngam loh khawpa tâwi kha a nia! Hei pawh Mafeli idea tho a nia, kan hmêl a inan êm avangin boruak siam nân a ti a ni.

"Zomuan, ka chei châk tawh che u.." A nula rawn hruai pakhat zâwkin a ti ve bawk a, kan hlim tlâng ang reng. Fakhlua te rei lo tê an rawn lang ve zawk a, Mafelin a chhuahtîr daih!

11:00Am

Zirsangliana

Biak in chhunga mipui ṭhu khat hmur leh tuallâia mihring lû awm fur chu ka enkual thuak thuak a! Ni e, Faka meuhvin nupui a nei dâwn ta chu a nia, ka lawmpui hlê a ni. Mafeli nen kan inneih khân kan pûk lâwk avangin Biak in kan thleng zo ta lo khâ a nia.

Kan inneihni-ah mipui an tam ka tih teh reng nen vawiin zet chu ṭhianpa tluk loh rim a nam ngei mai! Mahse, a ṭhian a kianga ding tura min thlang hi ka va lâwm si êm!

A hnathawhna leh a mahin a zir a ṭhian a ngah viau tih ka hria; mahse, eng lai pawha ka harsatna min ngaihthlâksaktu leh ka engkim ni ṭhin hian min theihnghilh hek lo; kei chu Mafeli ka tawn vanga nunchang inthlâk chauh ka ni a, Faka erawh nula lamah pawh sawi kâiin a awm ngai lo! A mah a palianin a pian a nalh zuai a, hmuzo lo nisi lovah chuan mipa lerh lo tak a ni. Zomuankimi hi a vanneih loh a tâkah...

A nupui thlan chungchângah pawh thiam ka ti hlê a, Zomuankimi hi nula chhe lo a nih mai bâkah a nungchang dam thlup hi ka ngainat zâwng a ni a, ka nupui leh ka fate pawhin an ngaina tih ka hria, an dinhmun te hrethiamin Mafelin a ngaihsak hlê a, a phirpui Muanpuii pawh a sual chuang lo naa Police a nihna a hriat leh zauh zêl!

Keyboard muang raiha khap a rîk rualin monu a rawn lût ta, Faka ka va melh zauh a, maktiin a mengphar âwk a ni ber mai! Zomuankimi kawrfual vâr sar simple zet inbela lo lût chu a nalh êm a ni! A 'Veil' khim chuan lei a hrût dalh dalh a, a sam dum hlap ṭhin khâ a chhipah a vingvial chho láh a, 'Tiara' simple tak a khim bawk, a hmai no zet chu make-up an bel tam lo tih hriat zet hian a sen ṭân ṭân a, ka en uluk mah mah!

Kan ṭhutna bul a lo thlen chuan Faka'n a lo kâi ta a, Muanpuii ṭhianah a hmang bawk a, an thawmhnaw hâk rawng inang phei se chuan ka hai chiang ngawt ang.

Pastor-in inneihna thutiam a chhamtîr lai chuan mipa zâwk na nâ na chuan a chham ring khawp mai! Zomuani chhâm ri erawh a zawi hlê a, a kum a la nau deuh nen ka hrethiam ve reng.

Kan inneih ni tepawh min hriatchhuahtîr e a.

Mafeli te ṭhutna lam ka va hawi a, mopa chhungte ṭhutna lama ṭhu lovin monu chhûngte ṭhutna zâwkah ka fate pahnih nen zuk ṭhu daih a! A va han buaithlâk ṭhin tak. 'Insawn leh rawh u' tih chi ninghal lo chuan.

Thuchham an zawh hnuah zungbun inbuntirna hun an hmang leh a, ka coat hâk ipte zenin Pastor Bible ken inkeusa kârah chuan ka dahsak ta a.

Muanpuii hian min chen thuak a, Zomuani erawh tlêmin a hniam hret, inkhawm programme a zova inkhawm zawng zawng bâkah khawtlâng huapin ruai an buatsaih bawk.

Fapa mal nge nge, Lalfakhlua leh Zomuankimi te inneih zawng kan khuaah hian a khûm tur an vâng pharh ang.

'Pathianin a zawm tawh chu mihringin ṭhen suh se'

##

Zomuankimi

"Mate, i chau em?" Ka û ka kiangah lokalin ka sam vêla an spray-na kâi liam chu min thensak a.

"Ka biang a kham lutuk.." thlalâkna hun ninawm zet kan zo chiah a, Fakhlua te vuaváng an tam si a, hun a duh rei ngei mai.

"Kei pawh ka châwn a na vek," tiin a kawrfual senno hâk a châwi chhîng a, vawikhat mah kawrfual a inbel lai ka la hmu miah lo! Mahse, a inhmeh em em tho.

"Mopa lamin min koh sual nawk nawk a nia, ka nui hnang dâwn!?" Tiin a nui leh a, ka nu leh pa ngai viau mah ila kan sawi lang lo ve ve.

"Tlâiah thawmhnaw inang chiah inbel ila, Fk-a kan tihder dawn nia," ka tih chuan a nui nasa sauhva, "Chi loh lutuk, min hrehrang vek thovang.."

"Kan test dawn nia.." tih pahin Fakhlua leh Zirsanga lo phei chu ka en a, ka pasala ka thlan tâk leh damchhûng a tâna thu ka tiampui Lalfakhlua, suit dum ṭhui nalh zet inbela lokal chu ka va hmu hmelṭha kher êm!

A taksa inkhaithli thlarh leh a sam dum hlap te, a mitmeng hlimna avanga de sarte chuan a tilang hmelṭha zual a, nichin lawka ka buntîr a kut veilama zungbun chuan ka mit a la nghâl chat. 'A tá ka ni tih leh ka tá a ni' tih a tilang chiang tlat a lawm.

"Hey, nangni pahnih kha min rêl s'u," tiin kan bulah a rawn ding a, a rim fai sar leh a rimtui hman rim chuan ka hnâr a verh zar mai.

"Kan rêl peih lo che u," tiin u Muanpuiin a chhâng a, company lama kan thawhpui pawh ka hmu nual! Chûng zinga langsar ber chu Ruatdiki!

"Fk, innu chu a chhe lo kher mai, nei fuh che a inti cher cher ang chu.." tih pahin ngun zet hian min thlêk a.

"Nia, a nei fuh khawp mai, lawmpuina i hlân dâwn nge, i rawn ti el dâwn?" Ka û ṭawng dam thlap chuan Ruatdiki hmêl lan dan ati danglam dâwrh nia!

"Zomuani nau nge i nih a û zâwk!?" Tiin a la zâwt cheu a.

"Inneih hunserhah khân i awm ve ngeiin ka hria a, Pastor-in a sawi chian viau kha..thusawi ngaithla lova i hawi zuk zuk khâ ka hmu reng che a nia," U Muanpuii a nui zui hak a, Zirsangliana pawh a nuihzat hmel hlê.

Ruatdiki kal tau nghawng nghawng chu ka en reng a, kei a tân lo ṭawng ve a mawi lova kan pu fanu a ni tlat a, ka û nge nge a tiṭha ṭhin e.

Fakhlua'n ka bânah vuanin car dahna lamah min hruai ta a, Ruatdiki pawh ka hmu zui ta lo.

Ni e, pasal ka nei fuh tiin min sawi châmchî a, hunin a la hril ang chu.. 'Nupui i nei fuh hlê mai' tia Fakhlua an tih ve theih nân ka ṭang mar sauh dâwn lo vem ni!?

B<++++[BeckirafARenthleI]++++>RR

14.SEGUNDO

Becky Rafa Renthlei

Chapter-14

Zomuankimi

A nâwlpuiin ruai an kîl fel tawh a, keini erawh inchhungah kan eina tur an siam hrang a, sa leh thlai chi hrang hrang an siam hnem kher mai! 'Vegetarian' ka ni ti thut ila an hawi hâi teh ang chu.

Min chibai deuh sek hlawm a, Fakhlua cousin fate an nuihzatthlâk ang reng! "Nu Zomuani pahnih kan nei' an ti deuh chhên a, u Muanpuii pawh a nui ṭhâ reng mai!

"Zomuan, i lo eipuar ngam lo vêl ang e,' Zirsanga'n min fiam zuk zuk reng a, "Zanina in kalna tur ramah chuan i û ta tur lo zawng ve ang che u' a tih chuan a sawi awmzia ka man lawk lo a; mahse, Fakhlua'n, "Zirsanglian, sawi âwm leh awm loh hre ve teh," a tih tâkah chuan ka man thiam chiah.

Nupa nun kan hman huna kan fan tur ram a sawina ni ngei tur a ni. Ka û lah chu a nui duh ta miah lo a, luck lo anti deuh nge an fiam sual viau! Mahse, Zirsanga zawng mi pangngai a ni a, "Muanpui, Faka te ang hi chu nei duh reng reng suh, an khirh duh hrep a nia," a ti leh daih nia!

Chaw kan eikham veleh room-ah ka û nen kan lût ta a.

Kekawr dum taksa rem zaih inang chiah leh kamis sen duk bofy fit kan ha a, a sam lem khâ a la vuah ve rân bawk.

"Mate, min biak loh chuan ṭawng miah loh tur aw.." tih pahin a hairstyle ang thei ber turin ka sam pawh min siamsak ve nghâl a.

"Eng ati maw!?"

"Inpa te ṭhiandun hian min hre hrang nge hre hrang lo hriat i duh a ni lawm ni; mahse, ka sâng zawk sia.." a ti leh a.

"Chutiang an en chîk awm lo em mai.." tih pahin ka hmui ka hnawih sen hlar a, Mafelin a tih dan tur a hre leh mai ang.

Kan room-ah Duati a rawn lût ve a, "Ih, Ânu..." kan unauva min hmu dun chiah chu sawi tur a haihchham vek!

"Duati, i nu hnenah, 'Ânu Zomuani'n lokal lawk teh a ti' va ti rawh leh, " Min entawn chhên hnuah bu nghat chungin a chhuak zui ve ta a.

Mafeli lo lût chu a khî ṭhâ a, "Awi! Ka duh thei lo, Zomuani zâwk pawh ka hriat si loh!"

"Mafel, ka û hi a sâng zâwk sia engtin nge kan tih ang?"

"Khalamah buaina a awm lo, in hmêl an hmu ang a sán leh sán loh chu khawi lamah an hâwi phâwk teh ang chu..!"

Mafelin ruahmanna a siam zung zung a, Present hawnna hun kan hman dâwn avangin boruak tih 'hot' nâna a ruahman a ni.

"Minute khat chhûnga Zomuani dik tak Fakhlua pa-in a hriat dik nalh chuan lawmman kan pe ang a, a hriat loh chuan zanin hian a pasal bulah mu lovin an unauva mut dun kan phalsak ang," Mafeli ṭawng ri room aṭangin kan hre pha vek a, ka û nuih aza ngei mai.

"Le, lo chhuak r'u lem, Zomuankimi leh second Zomuani kha in inring maw!?" In lêng eng emaw zât lo awm te chu an reh ta diak a, "Mate," tiin ka û in ka kutah a rawn vuan a, room aṭangin kan chhuak ta a.

Present inrem dulna bulah Fakhlua leh Zirsanga an lo ṭhu a, ka'n chhuak chiah chu thâwm a ṭha hak hak ngei mai! U Muanpuii kut nghet zetin ka hûma fiamthu mah nise ka zak ru chem chem.

Fakhlua pa lam hawiin, "I monu dik tak zawk chu hei hi pe rawh le," a kutah Apple lianzet a hmehbel sak a, Faka pa pawh a lâi deuh ṭûtin ka hria. A nu pawh pawh a lo ṭang ve nasâ.

"Zomuan," tiin kan unaua kan dinna lamah a rawn kal a, uluk lutuka min thlêk chiam hnuah u Muanpuii Apple a pe ta a, ka nuih aza bawk si, min hriatchhuah ka hlau bawk nen ka îp ṭâng ṭâng a ni ber mai.

"Fk, i pa thlan hi i pawmpui em?" Mafeli bawkin a ti leh a, Fakhlua nui suk chunga lo ding chhuakin kan bulah a rawn pên phei ta a, ka û Apple ken a lâksaka a lamah kuah hnaiin fawh tum niâwm tak hian a kûn hniam ta a, "Awi! Lalfakhlu, ka duh teuh lo.." u Muanpuii ṭawng ri chuan kan zavaiin min ti nui vek. Chutah, "Mate, nang tal chuan min fâwp duh ang tiraw," tiin Apple ka kutah a rawn dah a, a hmuiin ka hmui a rawn si zeuh a ni mai.

"Zomuankim, min bum ngai lovang, ka thinlung hian a hria che," ka bengbulah a rawn phun sup a.

"Lalfak, i phakar lutuk.." Mafeli a ner nânga ka u lah a lo lâi chhe em em bawk si! In lêng te nise an thâwm a ṭha ham ham bawk, hlim takin present kan hawng ta a, kan dawng hnem bawk a hawn chhúng a rei duh phian.

Fakhlua nu leh pa'n Lawngtlai aṭanga lokalte pual liau liauvin Ui talh an tum bawk a. 'Naktukah tuma'n min hawsan loh kan beisei a nia, inhmuh zen zen te a har a, kan fanu Zomuani thlah tura lokal zawng zawngte chaw ei vek turin kan sâwm che u a nia, Uisa ei thei lo in awm pawhin a dang kan ngaihtuah mai ang,' a ti thlap.

Ka chhungteho pawhin an remti tlâng a ni ang, sawibuai tu mah an awm lo! Kan mutna tur Zirsanga leh ka û in min siamsak a, ka lâi viau. Kan thiltih tur a chiang ve êm atin ni.

Inlêng an haw rêm tawh a, Mafeli te chhungkua leh ka û pâwn thlengin kan thlah a, "Lalfakhlu, min han fâwp nâ la chuan i châk lovang' tiin ka û a la phun nang nang nia!

"Ka fâwp peih teuh lo che, ka Zomuani pawh ninghal lo che chuan.." Faka nui suk suk chu Mafelin a ko hrang ta a.

"Mate, zingah te khân thawhtlai miah lo tur a nia, i nungchang azirin kei thleng pawh min nghawng thei a nia," min ngai tih hriat tak hian ka kut a vuan leh a, an thlenna quarter pana an kal liam thlengin ka thlîr zui ta a.

"Lût ang le, i chau lutuk ang.." Fakhlua'n ka koki-a min kuah chuan ka phu zawk a, mal ngawih ngawiha inhriatna ka nei tlat hi a chhan pawh ka hre bik lo.

A nu leh pa pawh an mu nghal a ni ngei ang! Tu mah hmuh tur an awm tawh lova kan nupa room pana kan kal lai te chuan ka zak ru sa ngawih ngawih.

"Mate, inbual tawh lo mai rawh aw, i duh chuan insil zuai la zân a rei mai dâwn," a thawmhnaw inbel hlîp mawlh mawlh paha Faka ṭawng lai chuan Towel nen bathroom ka pan daih a.

Ka lû su lovin rang lutuk hian ka inbual ta a, ka thâw a sa ru phat phat thei nia! Kan inkawp chhung a rei lo si, a dik tak chuan ka zak lâwk sa a ni.

"Hey, zan khuain bathroom-ah inkhung i tum em ni?" Pâwn lam aṭanga ka pasalin min lo biak chuan towel-in ka intuam sawk sawk a.

"Ka lo chhuak, min lo tur sek teh suh.."

"Zaninah hian tlânchhiatna kawng a inhawng miah lo a nia.." a nui chhuak hawk a, chutah ka kâwnga kuahin, "Kan ṭan hma leh kan inpawh hmâ a ni mai," tiin khum lamah min pheipui ta a; a thawmhnaw inbel a hlîp vek tawh a, tawnzau leh boxer chiah a ha tawh.

Khum zau tak kan mutna tura inphah duai chungah min ṭhuttirin ka towel bih lai min phelhsak ta a, underwear leh bra nen chauh ka awm ta.

"Mutkawr hâk tum buai duh suh, a chhan chu i mamawh dâwn si lo va.."

"Ih englo..."

"Zomuankim, i pasal ka ni tawh a, chumai ni lovin he i taksa hi kan inhmuh hmasak ber ní, ka car-a kan khaw lam kan pan ni khân ka lo hmu fai vek tawh tih i theihnghilh elaw..!?"

"Ka hmingpumin min ko ziah tawh suh.." ka ti hmak a.

"I hming hi a nalh a lâwm, kei lo chuan an koh ve che ka phal miah lo a nia, i hmingpuma ko tu che an awm chuan min hrilh zêl rawh aw.." a la ti tak deuh deuh a!

"Lutuk tlat.." a mitmenga min duatna lo lang ka hmuh chuan ka inthlahdul ve ta riai riai a.

Mutkawr inbel a phal ta si lo va underwear leh bra nen khumah ka lâwn ve ta a, Fakhlua pawh muangcháng hauh lo hian a rawn lâwn ve bawk a; a hmâa ka khuma a lo mut rûk ang ngawt kha chu a ni thei ta lo, a taksa lum ham ham nghêngin min kuah chial a, chutah thil hrechhuak thut ang mai hian, "Mate, nupa nuna kan bul ṭanna turah hian lawmthu sawi ṭawngṭaina kan nei ang chu tiraw..?" Tiin a ṭhu chhuak a, keipawh rang zet hian ka ṭhu ve bawk a.

Fakhlua puitlinzia leh zû in ve ṭhinin keimah avanga a sim ta hlauh hi ka lawmna tizualtu a ni. "Hmanhmawh hauh lovin aw.." a ṭawngṭai zawh hnuah dimtê hian ka hmuiah a rawn fâwp ta a.

A taksa rim faisar leh a mitmeng de sar te chuan engtin emaw tak min hîp riau nia, 'ka duh hluah hluah' tiin sawi thei lo mah ila mipa dik tak a nihzia leh a mawhphurhna hlen chhuah tum tlat mi a ni tih ka hre chiang tulh tulh.

Duhthawh taka min fawhna chu uar theihtâwpin ka lo chhâng lêt ve a, a hmui lum ham ham te, tisa châkna avanga a meng phî chiai te chu hundang nise ka ngei ngawt ang; mahse, ka pasal a ni tawh tlat a, kohhran leh Pathian hriatpuina thlapa ka neih a ni bawk a 'thiang lo' a awm ta lo.

"Ka hmangaih che" tiin min hrilh lo nâa a chezia engkimah lungawi lohna ka nei lo. Min duatin min ngaihsak hliah hliah êm mai. "Mate, i inpeih em?" Min fawh kârlakah ka bengbulah a rawn phun sup a, "Aw" tih nân lû ka lo bu nghat a hmuhin ka taksa chhungah a rawn lût ta a!

"Zomuan!?"

Ni e, kei hi nula thianghlim ka ni miau a lâwm! Ka pasal hmêla mak tihna leh lâwmna inpawlh ni âwm tak lo lang ka hmuh chuan nula thianghlim chinchâng hre lo ka ni hi ka zak ta hauh lo.

"Zomuankim, ka awih thei lo!" A nui suk a, a thiltih lai a châwl hmiah bawk, "Awih lo mah la i hriat ang khâ ka ni mai, ka tâna mipa hmasa ber i ni.." zak chung chung hian a nghâwngah kuahin ṭawng leh tura a âng chiah chu a hmuiah ka fâwp ta a.

Ka taksa ná leh ka thianghlimna ka hlauh tâk avanga ka lungphu la pangngai chiah lo te chu tihkian tumin uar lutukin ka fâwp tân tân a, a huna zak lo thei hmeichhia Zomunkimi khâ ka ni tih lantirna hun a ni. Kan taksa a inzawm leh tâkah chuan a hma ang ngawt kha chu a ni ta lo! Zirsanga sawi kan fan tur ram chu ka thleng pha ve dêt dêtin ka hria, Fakhlua hnung thlan dap ka chûl riak riak a, phurnain min zem ve ṭan ta.

Nupa te inkâr chauhva hman tur kan zawh meuh chuan mitmeng dam raiha min melhtu Lalfakhlua ta ka nihzia ka inhrechiang zual sauh.

"Mate, muthilh tum rawh," a âwmah min kuah hlê hlê a, ava thlamuanthlâk si êm!

Nupa nun hmanna kawngah experience ka nei tam lo hlê a, ka pasal tilâwm tur hian ṭan mar ka ngai nasa hle mai. Zanin hi hmangaihna kan chendun tâwpna tur a ni lova kan la ṭan dâwn chauh! Ani mipa hrisel leh in fit em em hi ka tih lawm tur 'Number one' a ni.

Lalfakhlua

5:30Am

Ka nupui kiangah ka mu ve ta chu a nia, a hmêl dam thlap leh a sam lukhama inchap darh niaih te chuan a ti lang naupang zual a, kei aiin kum rukin a naupang zawk tak nâa a puitling ru phian.

Tun aṭanga chhungkaw kalphung a zir ṭan loh chuan a tân a ṭha dâwn lo tih ka hriatsa avangin zingah pawh thawh tlai phal a ni lo. 'Ka duat lo' tihna nilovin a hmâkhua ka ngaih váng a ni. Nu leh pa nei tawh lo a ni a eng emaw chenah rilru no-na chin a neih ngei pawh ka ring. A chau viau ang tih hre mah ila damlohna a nih lem loh chuan Siami eirawngbawlpui ve vek se a ṭhain ka hria.

Nula thianghlim dik tak nupuia ka nei hi ka inchhuang em em a, Dân ang a nei ve siin rilru dam lo zet hian ka awm ang tih khâ ka hlauh ber a ni.

"Mate, tho dâwn rawh le.." a hmui bul chêtah ka ṭawng sup a, a mu nghet vak lo nge rawn meng diar diar chung hian min melh a.

"Dâr engzat nge?"

"A la hma lutuk; mahse, thawhtlai chi a ni lo a nia, intiharh rawh le.." muthilh tuma a maitmitchhin leh tâkah chuan a lû-ah ka sawi dat dat a.

"Rei lo tê chiah.."

"A theih loh, ka thawhpui ang che, mikhual an la awm ṭeuh a chubâkah mothar tûka thawh hai chu a mawi lo.."

"Naa, strick ve.." tiin a rawn zi mar ṭalh ṭalh a, thawmhnaw inbel a nei lo tih a theihnghilh nge a âwmbâwr lang te chu a ngaipawimawh tehchiam lo! Kei erawh ka ṭäng leh at tawh! A vawikhatna ni lo se chuan nizanah khân Vanram kawtchhuah ka fan nawntîr ngei ang; mahse, a taksa a na dâwn tih ka hriat lâwk avangin ka insûm ve nasâ.

Zomuani nen kan thawh chhuahin Siami chauh a lo awm a, ka nu leh pa an la tho lo a ni ngei ang! Inneih boruak vêlah an buai ve bawk a an mu âm deuh te pawh a ni mahna.

Eirawngbawl a ngai chuang lo bawk a, Siamin thingpui min siamsak a tum chuan, 'Zomuanin min siam rawh se' ka ti deuh kher! Fapa mal ka ni a, ka nu leh pa enkawltu tur ka ni bawk a, chutiang bawkin ka nupui pawhin he inchhungkhur hi a tâ ang a a en thiam phawt chuan a tlângnêlin neitu chan a chang mai dâwn a ni.

Ka nu leh pa an lo thawh chhuah pawhin, 'Nu, pa, thingpui in duh em?' a ti ve thlap a, a zak tih a hmêlah lang mah se zak angin a lang duh bik miah lo.

Ka nu-in 'Nubawih' tiin a ko hlen hmiah a, ka pa erawh chuan 'Zomuan' tiin a ko ve mai. Lawngtlai lam mikhual kan la ngah deuh bawk a, kan nupaa hunthâwl neih chu sawi loh min chîm hut hut reng ringawt mai a ni. Zirsanga fapa Rafaela'n min zui deuh chawt a, ka fapa a ni hauh lo nâa ka fa en deuh tlat nia!

"Ânu Zomuani pakhat zâwk khawiah nge..?" Vawithum ngawt min zâwt tawh a, Muanpuii a sawina nge amah Zomuani a sawina tih pawh ka hriat si loh.

Tlai lamah Ui pahnih kan talh a, mikhual lokal la châm zawng zawngte tân chaw ei kan buatsaih leh ta a, Zomuani te unau pawh an inzui nilêng zak a ni deuh ber; Mafeli pum a nawm loh deuh avangin chaw eikham veleh Zirsanga te chhungkua an haw vat a, mikhual dang te pawh an thlenin panin an haw nial tawh bawk.

"Muanpui, naktukah i haw tawh dawn sia, i nau nen riak dun rawh u.." ka tih chuan mak a tih hmel hle a, an unau hi inang viau mah se ka nupui nge nge ka hre hrang nalh thei tawh. A sam lem khâ a vuah tawh bîk lo a mi dang pawhin an thliar hrang ve thei ta.

"Ah..angai chuang hleinem.." Tia Muanpuiin min chhân chuan, "Keini te chu kan dam ang a kan la mu zantin dâwn alâwm zanin chu kan inah lo riak rawh.." ka tih deuh tlat avangin min hnial ta lo.

Zomuani lah a'n lâwm mai mai khawp a, ka nuih aza ru deuh. Pasalte kianga mut thlahlel ngawih ngawih hmêl a pu lo a, a nihna ang anga lang chhuak ṭhin mi khâ a ni miau a lâwm.

After 1 week

Nunphung pangngai kan zawh chho ṭan bek bek a, naktuk hian Aizawlah kan hna zawm turin kan nu nen kan kal dâwn a, ka nu leh pa'n min ngai lâwk a ni ber mai.

"Mama, Nubawihi hian hna a thawh kher a ṭûl em maw ni le!?" Zanriah kan kan kîl laiin ka nu'n a ti a.

"Ṭûl e, kan hmalam hun a hriat loh a zankhat mitchhin tawh palh pawha a buai lutuk loh nân ka ti a ni, a kum a la nau a hmabâk a êng a lâwm.." ka tih chuan, "Ni e, a dik chiah, nu leh pa in kan dampui reng dawn lo che u a, a tu ve ve pawh ngaihtuahawm lova in awm hi a ṭha ber." Ka pa'n a ti ve bawk.

A mah Zomuani ber phei chu a ngawireng a, kan chhungkuaah a lo tlângnêl tawh sa bawk nen ka nu hian a ngaina em em a, fanu a nei lo bawka duat tîk têk tak a ni.

Kan ruahman dan chuan kan nupain Aizawlah kan phei hmasa ang a, ka pa transfer thil vel a fel veleh anmahni hruai turin kan lêt leh dâwn a ni. Siami pawh hruaizel kan tum a, tunah rih chuan ka nu leh pa kiangah a awm leh rih ang a, inpuia kan awmkhawm hunah a rawn tel ve zêl dawn a ni.

"Zo, i muhil elaw?" Kan nupa khumah kan mu tawh a, tunlai chu hmangaihna kan chêndun zawh hian biak pawh biak hman lohvin zuk muhil daih zêl a!

"Muhil lo e.." ka lam hawiin a rawn inlet thak a. Ka lo kuah chial thung, a û nen anriah dun zan tih lovah kha chuan zantin hmangaihna kan chên ziah a, a thiam chak par par khawp mai! Hus! Inzir mi tak nupui ka lo nei hlauh hi ka vanneihna a ni, min chhâwk zangkhai thei miau a lâwm.

A kut lum thar thara min chûl kual rengna hian ka hnuailamah nunna zu siam vat zêl a! "Zanin chu ka ṭan ve ang aw.." ka beng bulah a phun sap a, zan dangah chuan ka ṭan hmasa ziah ṭhin kha a nia!

"Umn..." ka phûr nghâl sarh thei nia!

Chutah, a hmui hnâwng chapa min rawn fâwpin ka nghâwng leh khabe vêl a biangin a nâwk nâ nâ a, a kut pawhin a 'position' tur a hre dik thlap. "Zanin hi eng nge i hriat a?" Tia ka zawh chuan, "Ka boss tân thiamthil ka show dâwn maw le.." fiamthu mah nise ka lâwm ru veng veng, experience a neih loh zia hrechiangtu ka ni a, a tum chhin ringawt pawh hi ka lâwm tâwk.

Duhthawh leh uar taka min fawh rualin a che ṭan ta a, ka nuih aza deuh, amah ka nuihzat tihna ni lovin uar taka a'n ṭang mar vel hi a lâwmawm dan a theuneu lo khawp mai.

Thlan hliam chunga bawk zar chung hian, "Exer lâk ṭhat ka mamawh, ka infit viau lo.." tiin a nui sak a, "A fit zawk ka chêt a ngai a nih chu.."

Inkuah rial chunga muthilh kan tum meuh chuan zinglam darkhat a ri tawh nia!

Karhmasa lam kha chuan a lunglêng lutuk khâ zanthum vel a muhil ṭha lo khâ a nia, a û in a hawsan zanah pawh a ṭap ru tlatin ka hria! Hmun dangah in awmsan fo mah se pasal neih meuh chu a dân a dang deuh te pawh a ni mahna.

Muanpuii nen kan inbe zeuh zeuh a, a hna a zawm tawh a, a nau a rawn be lutuk lo! 'A lung a lêng mai mai' a ti deuh tlat.

A pa thlânlung phunsak ngei ka tum a, tunah vut vut chuan a la hma ka tih deuh avangin ka sawilang lêm lo. Mafeli nau neih a hnai tawh si a Zirsanga pawh a reh zui hmiah a, chhungkaw pa ber a lo ni ve bawk nen ka dem lém lo.

Ruatdiki'n whatsapp aṭanga min biak zeuh zeuh a chîng a, hna chungchâng a rawn sawi mai bâkah Zomuani chanchin min zâwt ziah bawk! A mizia ka hrechianga chhânna mumal ka pe duh dêr lo nia.

Invenna kan hman loh ve ve avangin Pathian zarah fâ kan nei thei turah ngai ila a inzaina a la rei lutuk lo nâin hlauhthawnawm erawh a ni lo, "Mama, tû neih hlân ka nghâkhlel a nia," ka nu'n a ti sek a, kâr tam pawh kan la innei lo a nia a ti ve deuh mah mah; mahse, ka ngawi mai zêl.

"Hey, chaw kan ei dâwn a nia.." ka lo chhîng sek a ni ngei ang Zomuani'n min kaihthawh chuan zinglam darriat a pêl tawh a, chaw eikham chhuak tur kan ni tih ka hre chawpchilh.

"Lo siam u la ka lo tho nghâl."

"Vat vat, ka pa in ṭawngṭaina hun a hmang dawn chutia siam ngawt chi a ni lo.." tih pahin ka puansin a rawn thehhlim a, ruak veka ka mu chu mak a tih hmel kher mai! "Hey, eng ati nge, khaw'nge i boxer?"

"Nizanah ka ha chiang..." tiin ka mutna bul vel ka enkual chiam a, ka hmu miah lo!

"I ha lo chû a nih kha.." puan min sintîr leh nghal a. Min zawnpui ngial pawhin kan hmu zo lo hrim hrim!

Vawilehkhatah Zomuani a nui khêk ta vak vak a, "Eng nge?" Phâwk lutuka ka melh chuan a puan chhehchhawl bih lái keuvin a nui leh a, ka thil hmuh chu le (h)..!

Ka boxer a lo inbel ât nia maw le!

Za lutukin ka nui ve ta a, engtin nge a hriat loh theih? A thawhtlai hlau lutukin ngaihtuah miah lovin a ha a nih ka ring ta ber a, "Hmuh ngaihna a awm lo, phelh vat rawh.." ka tih chuan mittui tla phungin a nui leh tê tê a.

"Mama, eng nge ni ta vak vak? Kan nghâk reng che u a nia.." ka nu'n min la ko zui! Rang lutukin ka boxer a hâk chu a hlíp sawk sawk a, "Lo tho nghâl ang che.." tih pahin ka lamah a rawn theh phei a, a chhuak zui nghal hmiah!

Ka pa ṭawngṭai tura a din hnuah pawh Zomuani nuihza a la reh thei si lo va ka mal a hmer leh ngat ngat zel. Kan ṭawngṭai zawhah ka nu'n a zâwt ta ngei a, "Ih, Fk-a englo.." sawi pawh a sawi ṭha hlei thei lova ka chhunzawm sak ta a.

Kan vaiin kan nui vek. "In va â dun mai mai tak e aw.." ka pa pawh a nui suk suk nia!

Aizawl panin kan chhuak ta a, ka nu leh pa'n Zomuani pawisa an pe a, kei erawh pêk ngaiah min dah lo tepawh a ni mahna! Ka vui chuang lo, a chhan chu ka nupui lâwmna hi ka lâwmna chu a nimai, amah pe lovin keimah min pe ta se Zomuani hmela lawmna hi ka hmu kher lo maithei asin; an fapa nupui hi an ringtâwk hlê a ni tih a târ lang tlat alâwm.

"Kha, pawisa hi kawl zawk rawh," tia min pêk a tum chuan, "Nang mah an pe che a tikhan kawl hmiah rawh kan hmang dun dawn lo tihna a ni hleinem.."

"Min pe tam si.." a ti sap a.

"Ka nu leh pa i zah thiama an thu i awih chuan kha aia tam pawh an la pe ang che.." tiin a biangah ka fawhsak zauh a, "Hey, i car khalh chauh ngaihven rawh.." a ti vei hmak.

Thenzawlah thingpui kan in zuai a, 'Ka lo khalh chhâwk ve tawh ang che' a tih deuh tlat avangin driver seat ka kian ta a, kei aiin a khalh thiam lohna ka hre bik lo, 'confi' rem rem tak a ni!

"Mate, Aizawla kan inah chuan awmpui kan nei rih dâwn si lova i hah viau ang.." tiin steering a vawn lohna a kut veilam inneih zungbun a bunna chu ka hûmsak a, "A pawi hlei nem nang i awm chuan ka ti thei ve vek ang," a ti ve ngei ah..

Duh chuan ka nî fate awmpui tur an awm reng; mahse, engkim nû mawhphurhna zawng zawng hrekim dap se ka tih vangin tumah min awmpui turin ka sawm duh ta lo khâ a nia.

Kan in kan thlenin tumah min lo hmuaktu pawh an awm lem lo a, Zomuanin Aizawl thleng car a khalh tlang parh nia maw le! Chhâwk ka tum pawhin, 'I driver Zomuankimi ka nih hi..' a ti deuh kher a, a mah lah a nui duh reuh mang si lova ka nawr lui ta lo. A mize dangdai deuh deuh hi ka ngaina ru riau.

"Chawhmeh leiin ka chhuak ang a lo inbual rawh aw." Ka tih chuan, "Lo inbual zawk rawh, pawisa pawh i neih ve loh kha keima'n ka va lei ang,"

"Min pe la.." ka ti fiamthu a.

"Aih, lo inbual rawh.."

Eng emaw lei tur bîk riau a nei a nih ringin ka inbualsan ta a.

Ka nunah hmeichhe tam an lang lo; Zomuankimi ang phei hi chu vawikhat mah ka la tawng lo hrim hrim, a mize ngêng ngalh ṭhin khâ hmuh tur a awm tawh lova ka sawi ang apiang zâwm diak diak lo mah se min zahder ve viau. Company-ah pawh a hotu ka ni ve a, ka hnuaia thawk a ni bawk, 'mi hmuh laia intih hluak hluak ka duh lo' tia ka hrilh ṭum khân a nui ṭha duh miah lova; mahse, lungawi lo hmêl erawh a pu zui lem lo.

Nupa nun dik tak kan ṭan chho mêk a, kan hma hunah eng nge awm dâwn tih hre lo mah ila Zomuankimi tâna rinawm taka awm hi ka tih tur dik tak a ni.

Ka nu leh pa ka biak zawh hnuah Muanpuii ka phone ve bawk a, Aizawl kan thleng tawh tih leh Zomuani pawh a ṭhat thu ka report thlap a, a û hian a ngaihtuah hlê tih ka hriat vangin a khât tâwkin ka be zêl ṭhin.

Nu leh pa an nei tawh lova Muanpuiin pasal a neih hmâ hi chuan an unau enkawl leh ngaihsak hi ka mawhphurhna a ni. Hlawh nei mah se mipa uaptu a neih loh avangin a ngaihtuahawm ka ti deuh ṭhin.

"Hey, ka lo thleng tawh a nia." Zomuani inkhai bâwr lâkin a rawn lût a, "Inbual rawh le, zanin tlai chu eirawng ka bâwl chhâwk ang che," ka tih chuan ka bulah rawn dingin, "Ka thluak i man chiah, i bazar chuan eirawng ka bâwl a ngai dawn sia, chuvangin bazar ka chuh ta mai.." zuk ti a!

"Phakar reuh mang e.." manbeh hman lohvin a inthiarfihlim nal nal a, tumah chimbuaitu awm lova zalen kan ni bawka kan boruak a zâng haih mai.

Ka upa zâwk tak nâa amah ang mai hian ka ti ve leh hluai zel!

Ka nupui hming chu 'Zomuankimi' tiin sawi chhên mah ila ka inthiam ve chiang, ka nunphung min thlâksak hlauhtu hmeichhia a ni tlat alawm...

'Zomuankim ka ti hrehawm ngai lovang che' tiin ka phun chhuak sup a....

B<++++[BeckirafARenthleI]++++>®®

SEGUNDO

Becky Rafa Renthlei

Chapter-15

Lalfakhlua

After 7 Months

Kan nupain Hyundai company-ah kan thawk ve ta tlauh tlauh a, 'Nupa hlim ber' tia sawi tur ni lo mah ila kan inhau ngai lo lêm lo! A chhan chu ka nupui hi hau ngaiin a awm tlat lo alawm; mahse, a naupai tirh vel khân a thinchhe lutuka ka dawhtheihna hian a tlin lo teuh fia fia ngei mai.

"Mama, dawh hrâm hrâm rawh ala naupan bâkah hetiangte chu raino hrî chikhat a nia enliam mai mai la ti nia," ka nu in a tih avangin ka ngawi tawp zel. A naupaiin thlasarih hmêl a hmu tawh a, kan inneihna pawh thlakua zet a ni tawh.

"Naute kan neih hunah chuan ka hna ka zawm thei tawh dawn si lo va ka khua a har lâwk' a ti deuh reng a, Workhop lamah ani a ṭhu a, kei showroom-nen ka kartawn thung a ka indaih lo thei khawp mai.

"Sir, i nupui kan bâwl a.." kan Head mechanic Singh-a a nui vur vur a, "Engtin nge in bâwl a?"

"A lo thawh ṭantirh khân motor parts hming a hre viau a, a invuahna lai hre hek lo, kan tihderh deuh reng mai," a tih chuan ka nui ve tawp. Khami hnu aṭang khan zîng tin kan car-a motor parts invuahna lai leh a hming dik tak ka hrilh ta a, a thiam chak khawp mai!

Tunah chuan motor parts lût leh chhuak engkim a kutah kan dah vek tawh a, Ruatdiki aia a lâktlâk lohna ka hre bik tawh lo.

Raipuar âl chungin Falkland-a kan workshop-ah a tei ve zak zak a, amah a nulian roh si a, a infit ve zak zak khawp mai.

"Sir, vawiin hian innu kan hruai ve dawn em maw ni estimate siamnaah," ka hnuai chiaha thawk Hriata'n min lo call a, Chaltlangah î10 insû an awm avangin a hmunah en a ngai dâwn a, Zomuani hruai ve an tum tihna.

"In duh leh hruai ula, workshop-ah tlang lovin ksn office thleng in rawn thlah dâwn nia," ka ti kha a nia.

Muanpuii paw'n a nau a rawn ngaihtuah lutuk tawh lova kan inbe khât khawp mai, ka nu leh pa te nen kan inawm fin vek tawh a, ka nupui an duat lutuk hi ka chuang lek lek fo nia.

"Fk, estimate siamnaah kal ve i phal maw?" Zomuani'n min lo biak chuan, "Phal e, fimkhur rawh aw, hriat loh i neih leh min lo zâwt dawn nia," a nui hak hak a, "Ka thiam mah mah.." a mize pangngai mi hlim thei tak a nihna hi a duhawmna pakhat a ni.

Kan inneih aṭanga thlahnihnaah nau a pâi ve chiah a, a period loh hmasak ber ṭum chuan kan philî nasa a nia, pregnancy test kit hman dan a hre lo pek a, ka nu kan zawhin, "Kan hun laiin khatiang kan hmang lo, doctor-ah kal rawh u," a lo ti bawk si.

"Fk, a inziak hi chhiar ve mai la, ka sawi dik tih ka chiang ê.." uluk lutuka kan chhiar hnuah a intest ve hrâm. "Office kal tawh lo mai rawh," ka tihin a duh mang si lova nitin kan chhuak rual a, kan haw dun leh ziah bawk a nupa rau rauah pawh kan inzui tam fâl khawp.

"Faka, innu hian a kherh nasa viau lo che maw!?" Ruatdiki hian a khât tâwkin min zâwt zauh zauh a, "Min kherh zât ang êm kha chu a pha lo deuh!" Tia ka chhânna chuan a ngawihtîr hmiah.

Kan nupa room-ah kan la riak a, naute kan neih hunah erawh chuan inhnuaiah ka nu leh pa te hmuh phâkah kan riak dâwn niâwm tak a ni. Zomuani duh dan a ni tlat a hnial lêm lo, ka nu'n a ṭan mai sia e, a châng chuan ka run deuh ṭhin.

Office-ah Loan-a car la tur an lokal a, pafa anni nge pawh ka hriat si loh!

"Sir, i20 thar ber price list kan va hre duh ve?" Nula ngo vir vir sam kir deuh chiat hi ka dawhkan bulah a rawn ding a. Price list pêk pahin ṭhutna ka kawhhmuh nghâl a.

"Down payment ₹50000 ka dah ang a, naktuk lamah ka rawn buaipui chhunzawm ang," a purse aṭangin pawisa a rawn phawrh a, ziah fel ngai leh quatation card ka pek lai chuan kan inneih zungbun ka kut veilama ka bun chu a en duh hlê! A hmelṭha reuh phian a, min enchîk mah mah bawk.

"Mr Lalfakhlu, Delhi-ah i awm mial em?" Tia min zawh chuan ka nui suk a. "Miss ka awm lo chu a nih hi, min hmuh ang hian hetah Aizawlah ka awm.."

"Si, i awm ṭhin em? Ka tihna zâwk.." a ti sap a, a nuih dan vêlah hian 'Riau' awm tlata ka hriat chu le.

"Awm ṭhin e; mahse, ka awm lohna a rei leh tawh."

"A nih chu.." eng mah phei chu a sawi zawm lêm hlei lo va!

Car thar 'Metallic black' la turin kan inbefel ta a.

A hming chu Vanlalthlamuanpuii a ni. 'Muanpui' tiin a rawn kalpui pain a ko ri ka hria a, Zomuani û ka'n hriatchhuah zawk chu le!

Min chhuahsan hnu chuan ka hna lam ka buaipui leh ta a, Zomuani Chaltlâng kal pawh a tlei deuh nge min la rawn call miah lo.

Tlailam dâr thum a rîk hnuah pawh an la rawn hâw lo cheu a, workshop lam hi dâr ngaah an bânga keini erawh kan bân a hun ṭêp thung.

"Sir..." hmanhmawh lutukin Lalzawma a rawn lût a, a hmêl dâng deuh lup leh a hlauthawng hmel chu hai theih ninghal lo chuan..

"Sir, Singh-a te an accident chuan.." a sawi zawh hma hmain ka ṭhutna aṭangin ka ding chhuak zawk a, ka thluak a vir nghâl zawk. Lalzawma hi kan painter a ni a, workshop aṭanga rawn tlân chho a ni.

"Sawi chiang ta che maw le.." Ka duh aiin ka vîn. Inchung aṭangin kan pu a rawn tlân thla bawk a, kei tih loh chuan chanchin an lo hre vek zawk a ni.

"Sir, a hmunah kan kal ve si lova eng mah kimchanga sawi tur ka hre lo, Singh-a te Sumo nen an insû tih bâk hriat kan nei lo," a ti leh a. Ni lo, Zomuani a chuang ve ngei ang, ka thâw a sak nghâl ṭalh mai.

Chumi hnu chuan tumah hrilh nawn kan ngai lo, Showroom aṭangin kan tlânchhuak vek a, ka car-ah kan pu a chuang a, Ruatdiki leh Lalzawma an inphur bawk a, Zomuani phone a in switch off hmiah! Chanchin chiangkuang eng mah kan la hriat loh avangin ka chhungte pawh ka la be pawp lova Zomuani bâk ka ngaihtuahnaah a awm lo hrim hrim.

Chaltlâng dawrkawnah mî an lo pungkhawm ṭeuh a, chulam chu kan pan ve ta a, motor estimate siamnaah hian Singh-a, Zomuani leh Duhkima an kal a, engtin nge an chêtsual theih?

Mipui pungkhawm kârah kan inhnawh lût ve a, Sumo driver thî hnuang leh Singh-a mit vûng chur ka hmu hmasaber a Zomuani ka la hmu lo.

"Khaw'nge ka nupui?" Ka âw a dam lo khawp mai.

"Sir..inchhungah.." tiin kan piah chiaha dâwr lam a kâwk a, Police lo thlen hun an nghah avangin atu amah an la kalsawn lo niâwm tak a ni.

"Ruatdik, Singh-a kha lo buaipui u la police lo thlen hmain a hliam kha buaipui rawh u.." Zomuani awmna ni-a a sawi lam ka pansan ta a.

Nu pahnih leh tlangval la naupang deuh pakhat hian an lo buaipui a, ṭhutthlengah an lo muttir a.

"Mate, i ṭha em?" Ka aw a hriat rualin a rawn mengchhuak a, "I lo thleng tawh maw.." a hnâr aṭangin thi a chhuak nge, a hmui leh hnâr vel a sen liam a hlauthawng hmêl a pu bawk.

"Nâ i nei em?" A bulah ṭhu thlain a taksa ka en lâwr dan dan a, a langah chuan pem nei hmêl a pu lo. "Ka pum a nuam chiah lo," tia ṭhutchhuah a tum chuan ka lo pui vat a, damdawi inah hruai nachâng an hre lo hi mak ka ti! Nge, min lo nghâk zâwk tih pawh ka hriat si loh.

Midang mitmei vêng hauh lovin ka pawm nawlh a, "Ka pi in lo buaipuia kan lawm lutuk damdawi inah ka'n hruai ang e," ina lo awm zinga puitlin hmel ber hnenah tiin pawn lam ka panpui ta a, "Ka pu, min lo nghâk rawh ka lokalpui ang che.." an tlangvalin atih chuan ka hnial duh ta bik lo.

Ka car dahna thleng zakin ka pawm phei ta a, kan pu in min lo hmuh chuan min ngaihtuah hmel hle mai, "Faka, helam chu rawn ngaihtuah suh, hospital pan phawt mai rawh u," a ti ta a.

"Kal suh," pawh min ti se, tun hunah kher hi chuan a thû ka zâwm hauh lovang. Durtlang hospital panin kan tlân ta nghal a, nichina tlangval pawh kha kan rualin a lokal ve zel a, Marina a ni.

"Mate, i pum a la nâ em?" Car ka khalh chak vak ngam si lo va Marina nen a hnungah an ṭhu a, ka rilru a nuam mang lo tlat.

"Ka pum a na tulh tulh.." tiin a thaw chhuak leh hliai ṭhin a, a nau neih ala hun der si lo. Tunah thlasarihna a hmang ṭan chauh a, thil ni lo lo ka ngaihtuah kual chiam chiam a ka zâm ru takzet, chau chhia angin lang lo mah se a kawchhung lam an check fel hmâ chuan ka ngaih a ṭha thei lo.

Hospital kan thlenin Marina'n engkim a buaipui zung zung a, keini nupa kan lo inbuaipui thung.

Doctor-in Zomuani a check lai chuan ka nu leh pa chanchin ka hrilh ve nghâl a, an lokal tur thû leh Muanpuii hrilh ve nghâl turin min ti a, ni dâwn tak. Mahse, Zomuani chanchin chiangkuang ka hriat hma loh chuan biak ka tum rih lo.

After 45 minutes

Doctor-in min koh chuan rang lutukin ka tho chhuak a, "Faka, innu a lo nireng a, a taksa hmun dangah hliam a nei hran lova; mahse, emergency-a zai nghâl a ngai,"

"Eng ati maw..mahse.."

"Englo a nia, a naupai awm dan a dik lo, tunah doctor dangin an en meka minute thum hnuah kan inko khawm anga zai nghâl a ngai.."

"Chiang deuh hlekin min hrilh thei angem?" Zawi supa ka zawh chuan, "In naute awm dan hi a hlauhthawnawm ang reng." Tiin tlang takin min hrilh ta a.

Ka thâw a sa phat phatin ka hria, kan incheck up hnuhnunber khân a fual deuh tih chu an sawi ngei a; mahse, chutianga hlauhthawnawm a ni lo tih an sawi.

Singh-a te lam pawh ka ngaihtuah thei tawh lova Lalmuanpuii a rang lamin ka call ta nghal a.

"Lalfakhlu, khawvelah ani lo khâ tumah ka nei lo tih i hriat kha.." a rawn ti chang fal a, ka dem hauh lo, kei hi a demawm ber chu ka ni. Estimate siamnaah ka lokaltir ta kha ka thiam loh a ni.

'A hlauhthawnawm angreng' tia doctor thusawi chu ka bengah a rawn ri tlut tlut a, Zomuani hi ka chân a nih vaih chuan ka chhe vek a ni mai.

Nilo, a theih loh...

B<++++[BeckirafARenthleI]++++>RR

SEGUNDO

Becky Rafa Renthlei

Chapter-16

Lalfakhlua

Ka nu leh pate lo thlen hmâin inzaina room-ah Zomuani an dah lût hman a, ka nu erawh chanchin kimchang ka hrilh lo.

"Mate, tuar hrâm hrâm rawh aw, ṭha takin naute hmêl kan hmuh ngei ka beisei," Inzaina room-a an nawr luh hmain ka be hman hrâm a, a mitmeng dul raih leh a hlauthâwng hmel te, a natuar hmel zawng zawng khân ka ngaih a ti ṭha hlawl lo.

Sawi nawn ngai lovin a dinhmun a ṭha tâwk lo tih ka hrethiam vek, minute nga chung leka zai tura an buatsaih chûk chûkna khân mi mâwl ber tân pawh hai theih ninghal lo chuan..!

Nurse pakhat hmanhmawh zeta lo chhuak chu ka pa in a lo ko ding hrâm a, kei erawh ka awmna ngaiah ka awm thei lo a ni ber e.

"Ka pu, tunah chuan eng mah ka sawi thei lo," a ti sap a.

"A dinhmun a ṭha em?" Tia ka pa zawhna chu chhân mai dan tur a hre lo nge a ngawi deuh vang vang a, chutah, "Thisen unit thum pêk a ngai dâwn a, blood bank lamah lâk angai.." kan be thui hman ta lo.

"Mama, i nî te ka phone chhungin Muanpuii lo be ve rawh, ka ngaih a ṭha miah lo a nia.." Ka pa meuh a rawn ṭawng chhuah leh lek phei chuan awm ngaihna ka hre hlawl lo, dârkar chanve vel a liam tawh a nia eng mah chanchin tharlâm kan la hre lo chu a nia, mipa mah ni ila ka 'chiai ru lo' ka tih chuan dâwt ka sawi tihna..

Muanpuii ka call a, a tlang thei rêng rêng lo! A whatsapp-na zawka ka call pawhin a ngai tho. Hûi! Manganna thuahhnih a ni ringawt. Message ka hnutchhiah ta tho va.

"Mama, an lo va dah chhuak har ve le.." ka nu pawh a ṭhu tlawk tlawk a, midang tumah lokal an awm lo, Aizawlah chhûngte nei tho mah ila ka nî te bâk hnaivai lutuk kan nei hran lova kan pu ka biak chuan 'Singh-a thiam loh a ni lova, Sumo driver zâwk a rui' a tih phei chuan ka sa zak mai.

'Rawn kal kan tum ang e, i pi pawh ka hrilh tawh kha' a ti ta a.

Hospital corridor-ah ka vei chhên a, awm ngaihna hriat a har hlê mai.

Dârkâr tam a ral hnuah doctor a rawn chhuak ta hlawl a, ka nî te an rawn thleng chiah bawk.

"Naute kan zai chhuak a, mipa a ni e, oxygen pêk a ngai a, boruak a khawpkham loh bâkah a chau deuh..."

"A nu eng nge a an?" Ka lo ti hmanhmawh a.

"Faka, Pathian thu thu a ni e, eng mah sawi lâwk theih a ni lo.." ka tliak hnâwp a ni ber mai. Tunlaiah doctor hian thû an khuh vak tawh ngai lo, a nihna ang râwt râwtin sawi lo mah se beiseiawm lo pui beiseiawmin an sawi ngai lo tih ka hre ve tlat.

Zomuani an rawn nawr chhuah lai chuan ka thaw ṭha thei lo hialin ka hria, ka nu a insût faih faih a, oxygen an pêk bâkah thisen an pe tel bawk a, a hmêl dawldâng leh a mit chhîngchial ka hmuh hian ka lung a awi hlawl lo.

"Mama, eng emaw tal han ti teh, naute hmel lah hmuh an phal si lo.." ka nu a ṭap ta a, a ring hran lo nâa ka chhungril erawh a nghawr na kher mai. Eng nge ka tih ang, engtin nge ka tih bîk ang? Rilru ṭawngṭaina vawi engzat nge ka neih hman pawh ka hre tawh lo.

Kan chhûng hnaivai an lo thlengkim thawkhat tawh a, kan pu te chhungkua pawh an rawn kim ṭhap. Singh-a erawh Civil hospital-ah an admit a, Duha'n eng mah nâ a nei lo. Ka nupuiin a tuar ber tih ka hriat hian ka inthiam lohna a nasa tulh tulh.

ICU -ah an dah avangin duh duhin an hmu thei lova, "Hei hi inbel la, rei lo te va hmu zawk rawh," nurse senior-in min koh chuan 'mask' ka vuah sawk sawk a ka lût ve ta a.

Zomuani a rawn meng ṭâwk ṭâwk a, thâwk harsa a tih hmêl kher mai! Biak an phal loh avangin a kutah ka hûm vang vang a, a mimeng a dik lo tih hrilh hranpa ngai lovin ka hmu ve vek. A chhe ber thleng thei dinhmunah kan ding tih pawh ka hre tlang nghâl bawk.

Rei awm an phal loh avangin ka chhuak leh ta a, minute rei lo tê tê ṭheuh en min phalsak a, ka nu leh pa ka nî te'n an en bawk.

Tunah zân dar sawmpakhat a ri tawh a, coffee in tur min rawn lâksak pawh vawikhat mah ka tem chhin lo. Fapa nei mah ila a nu a awm chuan si loh chuan eng nge ṭangkai. Sumo driver kha sawisak hrep duhna thinlung ka pu hial mai ka ti.

Tu mah inhawsan tur chuang kan awm loh avangin kan ṭhu ṭhap a, Ruatdiki pawh a ngui ve nghiai mai, Zomuani hi thîk teh mah se natna khuma a awm meuh chuan a lainat ve tepawh a ni mahna..

"Faka.." Zinglam darkhatah doctor-in min rawn ko ta a.

"A pawi ka ti khawp mai, i duh chuan i hmu thei ang, a naupai dân kha 'Hand Pro-lapse' a ni a, kan inchhan thei ta lo a ni." (Hand prolapse hi naupai dan hlauhawm ber te zinga mi a ni a, vanneih hlê loh chuan inchhan mai mai theih loh tluk deuhthaw a ni. BRR) Doctor thusawi tâwp lam ka hre mumal ta lo. Ka khawhmuh a thim riai riai a, ka pa'n min chelh lo se chuan ka tlu chiang viau ang.

Ṭap thâwm leh mihring vei suau suau te chu ka mang hriat rei ruai a, ka nupui hmêl hmu turin ICU ah ka lût leh ta a.

Nichin lawka oxygen pipe leh thisen an pêkna te, drip hrui te pawh an lo phawi fel mêk a, awih loh chi a ni tawh lo. Ka ṭah a chhuak lova ka tâwt up up zâwk a ni. Damdawi in puana a hmêl dâng lap an khuh dâwn meuh chuan Lalfakhlua hian ka phal awzâwng lo! Ka phal lo hrim hrim..

"Zomuankim.." ka aw a láwi rût a, min chhângtu an awm lo.

"Ka pu, intipang rawh damlo na tak tak dahna hmun a ni a, a ṭhente hi chuan nikhua an la hre vek a, an phâwklêk palh ang," dam thlapa a rawn tih chuan ka nupui kut ka vawnna chu ka thlah ta riai riai a.

ICU kawtah ka nu kuahin ka ding a, an ṭap ri te chuan ka beng a khâwk rum rum thei nia, Zomuankimi vânga ṭap ni lo se ka va ti êm..

"Mama, Nubawih.." ka nu a ṭap râwih râwih a, ka pa mit sen râm te chu ka hmuh hmaih hek lo. Ka mittui ka khapper sak sak a ni ber mai.

Ka fapa hmuh an la phal ta chuang lova kan pu leh Ruatdiki, Marina'n engkim an buaipui a, tu mah ka be lova min be hek lo. Sawi tur ka hre tlat lo alâwm, ka nupui dawmhlum thei lo tu hi eng ang pasal nge maw ka nih le?

"Faka.." Doctor in min koh chuan mi â ang maiin ka hawi hû a, "Nautê hi kârhnih tal up a ngai dâwn a, theihtawp kan chhuah a nia, a nu kan chhan hman lo erawh pawi ka ti a ni.." pawi ti tak tak hmêl a pu bawk.

Ka fapa ka hmu lo a, a nu dam lai hmêl ka hmu hek lo. Lalfakhlua'n nupui ka sûn a nih chu..

Zomuankimi ruang an rawn nawr chhuah lai chuan ka nî te leh ka nu, ka cousin te an ṭap chuah chuah a, damdawi in chhung ṭap riin a luahkhat a ni ber. Kei erawh mumang chhâwng eng emaw zata awm ang mai ka ni.

Ṭhianpa Zirsangliana hmêl ka hmuh meuh chuan ka insûm zo ta lo..

Zirsangliana

1:25 Am

Lalfaka pa'n Zomuani chanchin min rawn hrilh laiin kan lo mu tawh a, Mafeli'n kal ve a tum deuh khâ a nia; mahse, naute kalsan tham a la nih loh avangin tihngaihna awm hek lo. Fanu thar kan neih nî a Zomuani hlim hmêl mitthla chungin Durtlâng hospital ka pan ta kha a nia.

'Zomuani a thî' ka ngaihtuah thui duh lo, Faka ka ngaihthah êm avangin ka speed a sâng fia fia khawp mai. Traffic jam a awm tawh lova ka thleng hma viau.

Nurse vei suau suau karah Zomuani ruang an lo nawrchhuah lai ka va nang hman chiah a, Lalfakhlua hmêl ka hmu ngam dâwn em ni? An nupa inkâr hriatpuitu ka ni a, ka ṭhianpa hnem dân tur ka hre mawlh lo.

"Zirsang.." hnuk ulh tih hriat lutuka ka kuta a rawn vawnna chu nghet fê-in ka lo chelh a, a nat dan tur ka hrethiam ve phâkin ka hria.

"Faka, intipachang rawh aw.." a bâk sawi tur pakhat tê mah ka hre lova Ambulance-a Zomuani ruang phurh an tum chuan ka phal teuh lo, keimah ngei hian ka phur dâwn a ni.

Mitthi dahna hmunah rei lo tê an dah zawk a, ṭawngṭaina hun an hmang zuai a, Lalfaka mi â ang maia ngawi ngul chu biak ka tum lo, a dinhmunah hian ding ve ta ila ka tihdan tur tho a ni.

"Ṭhianpa, ka car-tharah pawh i nupui a la chuang êm hlei nem maw le, keimah ngei hian ka phur dawn a ni" ka tih chuan tumahin min hnial lo.

Lalfakhlua te nupa-ina min buaipui sak 'Elantra' car-ah ngei chuan Zomuankimi ruang ka phur ta a, a hnung seat kan kuai thlep vek a, Fakhlua malchungah a lû dahin an nupa in ka phur ta a, a front seat-ah a nu a ṭhu thung.

Zomuankimi unaunu an la betlang thei lo fo hi mak ka tiru hlê a; mahse, ka sawi lang lem lo.

Ruang zuitu an tam ngei mai, Hyundai company car zawng zawng an fuankhâwm ti ila ka sawisual hauh lovang, vawikhat mah Lalfakhlua a la ṭap chhuak lova a nu erawh a ṭap kawngtluan thung.

An fapa thar pawh lâkchhuah theih dinhmunah a ding si lova ka ṭhianpa chan hi a na êm a ni.

An in kan thlenin mipui an lo phe suau suau tawh a, ruang phur ka ni bawk a, min lo ngai châng ṭhap bawk.

"Hey, Mate..in kan thleng tawh a nia, Zomuankim...tho ta che maw le.." Lalfakhlua awki thâm ṭuak leh ṭap aw chuan ka mittui a ko chhuak ta nge nge nge e.

"Nubawih, ka duh lo, a ang lo lutuk..."

Faka pa'n annu a rawn kuah chhuak a, Fakhlua erawhin a nupui biang leh a biang sîktîrin a che map lo.

"Ṭhianpa, intiharh rawh le.."

Lalfaka mit sen râm leh a hmêl pawr fap te, a nupui kut chelh tlat chunga a kal laite chuan mi thinlung a tawk pha tlat alawm, nupa inngeih leh inzui tam anni a, an thawhpuite ṭap lo abar an awm lo.

"Zomuankim.." tih bâk Lalfaka kâ aṭanga ri chhuak tur zuk awm hauh lova, mî hmuh loh theih ang berin ka mittui ka hru fap fap a..

Ruang an zâwn luh dâwn lai taka Police motor rawn ding dat chuan ruang zâwntute pawh ati khaihlak deuh a! Lalfaka erawh chuan a en lêm lo.

Gypsy var chhung aṭanga Lalmuanpuii mitmeng thîp râm leh ṭahchhuak insûm hmêl ka hmuh chuan ka thaw huai a, a phirpui leh a neihchhun thihna hian a nghawng na khawp ang le..

"Mate...min lo hmuak dâwn nange...!?" Muanpuii aw chuan Lalfaka pên lai a ti ding chat thei nia!

"Muanpui.." tia phun supin a nupui phirpui chu a pan ta a..

B<++++[BeckirafARenthleI]++++>RR

Ka mittui an far fap chu le...

SEGUNDO

Becky Rafa Renthlei

Chapter-17

Lalfakhlua

Lalmuanpuiin min han hmu chiah chu a ṭap chhuak hawk a, ani hmeichhiaah pawh tumruh leh inluling, ṭap ve mai mai ngai lo kha ''Mate, ka phal lo, keimah chiaha min hnutchhiah hi ka ngaithiam lo..'' ka ngaithla zui ngam tawh lo; ka beng hupin ka thaw chhuak hráwih hráwih a; ''Lalfakhlu, engtin nge awm se min tih, ka venghim ang tiin min tiam a ni lawm ni?" Ka kamis hâk nghâwngah a vuan a, a ṭap tlawk tlawk a ni ber mai.

Sawi tur ka hre lova ka hrawk bâwk kal ralh ralh khawpin chil ka lem dawk dawk a, mí mit kan chungah a fu ṭhup tih hre mah ila ka pawisa zo tawh lo.

Kan nupa room inchunga mi zâwka dah a rem loh avángin Zomuani ruang chu inhnuaia kan room-ah an zalh ta a. Kan sitting room-a kan inneih thlalâk lianpui in târ te chu en pawh ka en duh lo.

"Zomuan," Mafeli a rawn ṭap lût a, Zirsanga'n a lo dawngsawng vat a, Duati leh Rafaela pawh an lokal ve bawk, Duati hmêl ka hmuh phei chuan ka insûm thei lo a chhâ chu a ni e, Zomuanin a duat hliah hliah êm asin.

Mipui pungkhawmin Muanpuii leh ka nupui ruang an melh tawn sek te chu ka thinrimna tibelhchhahtu zuk ni tlat a!

A chhan chu Muanpuii hian a sam a lo zuah ve tawh a, kan inhmuh loh kâr thla eng emaw zât chhung khân a lo sei ve deuh tawh a, ka nupui nen inang tak anni. A phirpui tih hre lo a tam zâwk anni ang tih hriatsa a ni a, thil mak hmu ah an inngai te pawh a ni mahna.

Khua a vâr lek lek tawh a, Lawngtlai lama a nî te leh an chhûngkhat lainâte an lo thlen belh zêl a, ka mize pangngai kha chu nise polite takin ka lo welcome ngei ang; mahse, ka nun ruak huai leh buaichuar nuk hian polite lam a ngaihtuah lova mikhualho pawh ka pa in a lo dawngsawng deuh zêl.

"Faka, inphih harh rawh le.." Zirsanga ka bulah a rawn kal a, an nautê kalsanin Mafeli pawh a rawn lang ve kha a nia, a hmêl hmuh ka hreh hluah hluah.

"Ṭhianpa, thih ve mai ka duh.." ka aw a ri chhuak chang chang chauh a ni.

"Khatiang zawngin ngaihtuah mahta che, khawvel hi kan khualzinna ram a ni a, kan châm hlen dawn lo, nang awm lo leh zêl ta la, i nu leh pa, nang mah hmangaihtu leh i hmangaihte, i fapate kha ngaihtuah rawh, intipachang la, Pathianin engkim a ti thei tih i hriat kha.." ka dârah a kuah a, a hmêl dul ruih hian min lainatzia a tarlang hlê.

Ruang bulah vawi li vawi nga ka va tei a, ka ṭhu hlê hlê thei lo, kan fapa hmêl hmu miah lo leh kâ pawh chhâwn lova Zomuankimi thihna hian phuba lâk duhna thinlung min puttir a, khâ Sumo driver kha ka that lovang tih tunge sawi thei? Ka kawchhung so bulh bulh tireh tur hian eng finna leh thiamna mah hian damdawi an siam chhuak lo a ni chêk ang.

'Thihna, ka nupui thihna hian ka nunah nghawng a la nei dâwn chauh a ni'

'Mate, Zomuankim, ka nu ka pa.. Matei a lokal hi in lo hmuak em?" Lalmuanpuii meuh pawh an lo thlen aṭangin a ṭap tluan zak. A mit bûi châk te a hmui ro halh leh a sam thur siangte chu a lainatawm ngawih ngawih a, kei chuan nu leh pa ka la nei tal a, ani erawhin he khawvelah thisenzawmpui dik tak pakhat mah a nei tawh lo..

A pa thu min chah ka tihlawhtling lo hi ka thiam loh liau liau a ni. Zomuankimi ka venghim zo lova Lalmuanpuii rilru na takin ka siam bawk a, thih ve daih ka va châk êm!

Zingkar a Zomuani kawr hâk an thlâksak dawn chuan Muanpuii ka bulah a rawn kal a, "Faka, eng nge inbel se i tih, i duh ber thlang rawh.." a ṭap tawh lova min ngaihtuah hmêl a pu mah zâwk.

"Ka hre lo.."

"In nupa room-ah i han kal ang hmiang thawmhnaw mawihnai tak inbel turin ka duh a nia.." a ti sap a.

Ṭhalai kalkhawm hovin min en duh hlê lehnghal!

Muanpuii nen kan nupa room-a kan chho tur Zirsanga'n min lo hmu a, min lo zui ve bawk a. Mafeli erawh Zomuani ruang chungah duhtâwka a ṭah hnuin an fanu a ngaihtuah deuh avang leh Rafaela mut a chhuah avangin an lo va hâw hmasa ta kha a nia, Zirsangan min mitmei ru reng tih ka hria a, mualpho taka ka awm hlauvin min vêng a ni deuh ber.

Kan nupa khum ka hmuh rualin ka mitthlaah ka nupui hlim hmêl a lo lang a, ka insûm thei tawh ngang lo, awrâwl chhuah meuhvin ka ṭap ta a....

**

Lalmuanpuii

7:20 Am

"Zira, khawngaihin damdawi in lamah min kalsak lawk thei ang em? Naute hmêl hmuh an phal lo tih ka hre tho a; mahse, doctor emaw nurse tepawh dîl la an fapa thlâ tal lo lâktîr ta che, Fakhlua hi a â thei takngial mai ang," tiin Zirsangliana ka ngen ta ringawt a.

"Tehreng mai, a fapa hmel a hmuh chuan chakna thar a neih phah mial maithei asin," tiin Faka pawh be tawh chuang lo hian a chhuak vut a, ṭhianṭha nih a tlin zak zak khawp mai.

An nupa room-ah kan la awm a, Fakhlua an nupa khumah bawkkhupin a ṭap khür ngat ngat a, hnem dan ka thiam lo, kei pawh eng teh ual ka ni bîk lova ka nau kawr inkhai dul te a make up leh a bungrua ka hmuh ringawt pawhin ka mittui a tla zel a nia, ka hmangaih leh he khawvela ka neih chhun chân mah ila a fapa min la hnutchhiah tal a, engtin nge a pa ringawt hian a enkawl ang?

Chutia ka indawm kun reng lai chuan Fakhlua a rawn tho chhuak hlawl a, a mit sen rûm leh thinrim hmêl ka hmuhin ka ngaih a ṭha miah lo! Min en miah lo hian a melh ngai a melh tlawk tlawk phawt a, chutah, "Ka chhuah hauh lovang.." ti supin kawngkhar lam a pan ta a.

"Faka, lo ding teh..." rang lutukin ka ûmzui nghâl a, inhnuai panna step tâwp ber dawttu a lo thleng hman tawh!

"Lo ding teh khawngaihin.." min rawn melh zawk a, a ding ve mai bawk.

"Lo chho leh teh.." a dinna lai ka thleng thla tawh a, a bânah vuana inchung lam pan chhohpui ka tum chuan, "A nih nih ni ngam ila a ṭha ber, mî nupa pawt ṭhentu hi ka ngaidam dawn lo.." a ti hmiah!

"Ni lo ve, lokal phawt teh.." tiin ka thá neih tâwpin ka pawt a, a mitmengah hian eng mah pawisak a nei lo tih ka man thiam tlat.

An nupa room-ah kan inhruai lût thei hrâm.

Mipa rilru tluang purh leh dam thluam ṭhin kha a thin a rim meuh chuan a hlauhawm ngei mai, a ṭap tawh lova a lungchhe zualpui a reh tawh bawk a; mahse, thinrimnain a thlâk thung.

"Muanpui, min dang duh suh, Pathian hmâa ka thutiampui tinatu hian hrem a phû a ni," tiin pindan chhungah a vei nghut nghut a.

Ka mize pangngaiah chuan ka thlêm hauh lovang, unau inhmangaihna leh nupa inhmangaihna chu a hrang hlak tih ka thliar ve thiam tlat a, tûna ka bengdai lo a nih chuan thil chhe zâwk leh duhawm loh zâwk thleng mai thei dinhmunah kan ding tlat.

"Ka hrethiam lutuk che, i natna ang kha ṭâwmpui pha chiah lo che mah ila he khawvela ka neihchhun ka chân a ni tih tal min hriatsak hrâm rawh, chuvangin in fapa vâng tal pawh hian inbengdai hrâm lâ," tiin a kutah ka vawnsak ta a.

"Sumo driver zurui lehnghal khân kan chhungkaw nun min tihchhiatsak a ni.." ti leh supin a kut ka vawn lohna lampang a hûm ruh ngat ngat a, a thaw hawk hawk rite chu ngaihthlak a nuam fahran lo.

"I chêt chhuah ngai lovin ka nau thihna thlentu hi hremna pêk ngei ka tum a nia, Police ka ni tih i theihnghilh ta em ni?" Chiang fek fawka ka tih chuan min en vang vang a, eng mah sawi tawh lo hian Zomuani thawmhnaw dahna wardrobe hawngin a hâk tur kawr a rawn dah chhuak ta a.

Naute thawmhnaw leh puan te pawh an lo lei nual tawh a, chungho zawng zawng chu drawer-ah a hnawh lût tawp tawp a, a hmel chang fak leh thim ruih hi ka hriat ṭhin Lalfakhlua nelawm leh dam thluam khâ a ni tawh lo. Mihrang hlauh a ni ka hmuh ni!

Inhnuai lamah ngawirengin kan inzui thla ta a, Zomuani thawmhnaw pawh Faka nen vek kan thlâk a, a ṭhenin tûkṭhuan an lo ei a, Faka nu erawh a ṭap char charin ka hria, a fanu dik tak anga a en leh a duat khâ a nia, ka dem hauh lo.

"Mâm, ka nu-in kan zin dáwnah pawisa min pe a, Fk-a a pe ve miah lo.." nui hak hak chunga min rawn hrilh laite kha ka bengah a ri nawn tlut tlutin ka hria.

"Faka, biak leh lawk che ka duh.." Fakhlua ruang bula a nupui hmêl thlir ngawih ngawihtu chu a bengbulah ka hrilh sap a.

"Tikhân sawi mai rawh.."

"Lawngtlai lamah a ruang hi kan la mai dawn em ni, ka nu leh pa thlân awmna a ni si a.." ka tih chuan rum lutukin min melh a, "A teuh lo lutuk, ka nupui a ni a, ka hmuh phâk loh a an phûm ka phal i ring a maw!?" Zawi sup hian min chhâng a, a phal ring lo mah ila sawi lan ve hrim hrim ka duh vâng a ni.

Ka thusawi a ngai haw deuh nge, Zomuani kut a vuan ngar ngar a, a mittui far leh fap chu ka hmu reng, kei erawh ka ṭap lutuk ta lo! Ka ṭap thei lo a ni ber mai, nizan khân ka inbunruak vek nimaiin ka hria a; mahse, ka chhungril ping up up erawh tihreh dan ka hre lo.

Vûina hunserhah Fakhlua pa'n chhungkaw aiawha thusawina a nei a, Zomuani accident tawh dan leh an fapa hospital-ah tunah hian a awm mêk tih te, a famo ni lovin an fanu an hrin ang maia an hmangaih thu leh chhungkaw tihlimtu ber a ni tih a sawi lai chuan a hnuk a ulh ṭeuh a, midang inhnît tluar tluar rite chu ngaihthlâk nuam zawk zawk a ni hek lo.

Kuang an chhin dâwn meuh chuan kei, Lalmuanpuii Police rilru khauh leh a huna insûm thei hmeichhia kha ka insum zo leh ta lo. Ka nau ka phirpui ka taksa khing lehlam leh chhûlkhata ka awm dun pui khawvel awmchhunga hmu leh ngai tawh lo tura han thlah meuh zawng ka ngaithiam îkhaw lo mai! Intihpachan tum teh mah ila mihring rilru na theia siam ka ni miau si a, ka puakkeh ta.

"Mate, Zomuankim, Zomuankim, ka phal lo.." Tû mitmei mah vêng lovin kuang chhunga ka nau hmêl dâng lap chu ka bih leh ta a, "A ni thei lo, ka duh lo.." Min rawn kuahtu an awm tih ka hria; mahse, ka thlah phal lo..

"Zomuan, i û in a koh che hi maw le, tho teh, tho rawh.." Fakhlua aw a ni, a mittui sûr zung zung te chu ka hmu phe ruai a, nikhua ka hre ta lo..

**

Zirsangliana.

Hospital-ah duh aia rei ka awm tâk avangin vûina hun ka nang lo ang tih mawlh ka hlau a, naute thlalâk ka dîl ngial pawhin an phal hlawl lo.

"Khawiah mah kan tichhuak dawn hleinem, a nu a awm tawh lova a pa rilru na lutuk a chhâwk mial tâkah tiin kan dil mai che u a ni" ka ṭawng a dam vak tawh lo. Sister chuan min khawngaih ve ngang a ni ang, "Dânah chuan phal a ni lo a; mahse, i ṭhianpa kha a khawngaihthlak em mai," tiin ka phone min dil a, Fakhlua te fapa thlâ min laksak hrâm kha a nia.

Hmanhmawh lutuka ka tlân thlâk lai te chuan Lalfaka bâk ka ngaihtuah lo, ka nupui fanaute ngaihven hman lo lêkin Zomuani thihna hian min nghawng a ni.

An in lian leh zau hek hawkah chuan mipui an khat hmur a, ṭap thâwm a châwl mang lo tih theih a ni.

Kuang an chhin dâwn laia Muanpuii leh Faka ṭap ri chuan ka thinlung chhung a nghawr nghing pha tlat. Remruatfeli angah ka chan phei chuan ka â thei mai dâwna hriatna ka nei hial!

"Mate, i pasal leh i fapa hi i khawngaih lo vem ni, mawh..min chhâng rawh..i û hi ka va mal dâwn ve le.." Muanpuii aw chhâng ṭiak ri te chuan ka mittui a ko lo thei lo.

Ka ṭhianpa hmêl thim ruih leh dul hnak te, an inneih zungbun a tuaisek lai te chu ka hmuh hmaih lo, a nâ dawn êm asin.

Kuang an chhin fel tawh a, Zomuani thawhpuite zinga mipaho pawh helper leh mechanic thlengin an ṭap fai vek! Hei hian an ngaina hlê a ni tih a tilang.

Thlalâkna hun an hmang mêk a, Mafeli pawh kan fanu hma lama awrh chungin mî verandah ah a awm ve nâw nâw a, a lokal theih ka ring lo khâ a nia! Duati leh Rafaela erawh kan nulain a lo awmpui thung.

Fakhlua nu leh pa an lainatawm khawp mai, tu hmêl an hmu ve ta chêng a, an lâwm dawn nen Zomuani an duatzia hrechiangtu ka ni a ka khawngaih viau.

Thlanmual lamah kan ṭhiandunin kan inzui hnak hnak a, Muanpuii a ṭap kawngtluan a, a aw a chau raih raih tawh hlê!

Thihna te hi tû ta bîk mah a ni lova khawvela kan awm chhung hian natna leh lungngaihna, thihna hial pawh kan la tâwk ṭheuh dawn chu a ni si a, kan hmangaihte hmu leh tur hian kan nun kan fimkhur a va ngai si êm.

Lalfakhlua hian a nupui thihna hi a ṭha lam kawng zawh phah nân a hmang dawn nge, a nun chhiatpui nân a hmang dâwn hriat va ni suh. Lalmuanpuii pawh chuti tho..

He khawvel hi kan khualzinna ram a ni a, kan châm hlen dawn lo. Ka ṭhianpa fuih tur hian ka tling tâwk lo; mahse, ka tum tur a ni, an fapa vâng tal pawha nunkawng dik a zawh a ngai...

Lalmuanpuii paw'n fuihtu leh hnêmtu a mamawh ngawih ngawih a, ka nupa hian theihtawp kan chhuah ala dâwn chauh a ni...

B<++++[BeckirafARenthleI]++++>RR

SEGUNDO

Becky Rafa Renthlei

Chapter-18

Lalneihkimi(Faka nu)

Kan fanu Nubawihi (Zomuani) kan thlah liam aṭangin ni thum lâi a liam leh tawh a, kan inchhûng ruak ta huai leh hnîm ruih te hi engtikah nge a reh ang? A unaunu Muanpuii hmeichhe ṭawngtam lo leh khauh deuh far hian min awmpui rih lo se chuan awm ngaihna ka hre mawlhin ka ring lo.

Ni e, Zomuani kha ka hmuh tirhtê aṭangin ka ngaina nghâl a, ka fapa nupui a tân iaina pakhat mah ka nei lo. Hetia vanduaina a tawh tâkah hian ka Bp te a sân phahin ka hria, ka ninghulh reng mai!

"Nu-i, Mama kha kaitho la, hospital lamah kan tupa i han tlawh teh ang u," kan pa'n a tih chuan Zomuani te nupa pindan ka pan nghâl a, inriak pahnih thum bâk an awm mang tawh lova mikhual tlêm azâwng erawh an la awm.

An room ka lut chu ka phu zawk mai! Ka fapa Lalfakhlua keh thei dawma ka dawm ṭhin leh ka duat em em kha khumah pawh mu lovin ṭhutthlengah a lo mu a, a hmêl pawr fap leh a khabe hmul meh loh ṭo far te, a mitkhur tla dâk te ka hmuhin ka lainat takzet.

"Mama, tho la nautê i han tlawh ang u hmiang.." a lû-ah ka sawi nak nak a.

"Ka pa nen han kal rawh u, hmuh an phal leh chuang lovang.."

"An phal loh pawhin a chanchin tal kan ngaihven ang chu le.." kaihthawh luih ngial ka tum pawhin a duh teuh lo.

Beidawng zetin inhnuaiah ka chhuk leh ta a, kan nupaa hospital kan pan laiin kan pa'n, "Nautê hi ngaichâng ila a ṭhat chhoh zêl chuan min enkawlpuitu tur kan mamawh dâwn a, keini upa lam kan ni tawh nen Muanpuii berâwn ila a ṭha ang," a ti chhuak hlawl a.

Ka ngaih dan chiah. Mama kuta dah tur chuan thil tihchi a ni lova hnute hnêk leh engkim buaipui turin kan upa tawh bawk si, kan tlin ngût dâwn em maw ni?

Doctor-in 'a ngaihtuahawm tawh loh a nia kârthum em em nghah a ngai lovang kârleh tâwp lamah in la chhuak dâwn nia a pian ṭo a ṭha a, accident vel vang khan a nu pumah a shock deuh chauh a ni' atih chuan kan thaw huai huai mai alâwm le.

A hmêl a hmuh theih chuang lo bawk a, rei pawh awm lovin kan hâw leh ta a. A hming kan la phuah lo nâa Muanpuii phuahah kan khêk deuh.

Inriak te pawh tukin lamah an lo in pu chhuak tawh hlawm a, kan chhungkua bâkah Muanpuii leh a cousin mipa deuh chauh an awm tawh a, theih nise Zomuani û hi chelh mai ka duh.

A nau thihna hian a nghawng viauin ka ring a, lungawi lo hmêl erawh min hmuh hran lo, Siami nen eirawng an lo bâwla Nubawihi ai khân a la nulian zâwk mah! An hmêl inang lutuk hian minti hrehawm leh ṭhin, keini upa lam tân chuan koh sual pawh hlauhawm tak a ni.

"Muanpui, kan hnênah awm ve reng thei la kan ti hlê mai," ka tih chuan, "Nie tiraw, ka hna leh kan in ngaihtuah a ngai ve si a, naktuk hian hâw phei ka lo tum deuh a.."

"A chî loh lutuk, i awm loh chuan kan khua a har dâwn êm asin."

"Ka haw phawt ang a, chawlh lâkbelhin kârlehah lo zin ka tum dâwn nia Bawihtea ka hmu ve châk a.." lehlam a hawi zui daih a, a ṭap chhuak lo nâin a lung a chhia tih ka hre mai.

Zomuani nen an mizia a inpersan ang reng! Muanpuii hi chu nu zêm mi a ni lo va, a hawiher reng reng a zâng vah bawk. Zomuani ang a nui uar uar chi a ni lêm lo bawk. A hmêl erawh a ṭha zâwk em maw ni!? A sam hi sei deuh hnâp se a inhmeh ngawt ang.

Tûkṭhuan kan kîl laiin Mama a tho tharh a, chaw mumal a ei lo lutuk leh a ngawi ngul hian nû rilru a tawk che pha tlat.

"Faka, tlêmtal ei luih tum rawh, khatia i awm khân sâwtna a awm lo a nia, ka nauin rawn hmu ta che se a lâwm dawn miah lo a nia," Muanpuiin a ti khauh a.

"Min hmu emaw hmu lo emaw ka thû thû a ni.."

"Ni e, i thû a lâwm, puitling i ni tawha a chhia leh a ṭha thliar thiam rual i ni bawk." A chaw eina thlêng sengin Muanpuii a tho hmak a, a lamah ka ṭang tlat, "Mama, Muanpuii sawi khâ a dik a nia, fapa enkawl tur i nei tih hria la, khatia i awm vâng khân Nubawihi a lo tho leh dawn lo, inti chak rawh.."

"A tâwk, ngawi tawh rawh u.." thinrim tih hriat lutuk hian an nupa room lamah a tlân chhova kan ngawi nghâl ṭhap.

"Nu Kim, a duh ang ang a a awm loh nân theihtâwpin fuih rawh u aw, a nun a chhe vek ang e, vawiin hian Sumo driver khâ biak ka tum a, Faka erawh eng mah in hrilh loh ka beisei.." a ti leh ta a.

Keini ai chuan Zomuani phirpui Lalmuanpuii hian kan fapa hi a enkawl thiamin a fuih thiam zâwka ka'n rin tlat chu le. A hmai zah ve deuh bawk ang a..

Lalfakhlua

10:00Am.

Zomuankimi tello hian ka hringnun ka hmang dâwn ta chu a ni a, ka fapa hian ka nunah hmun a chang lo, a nu tel lovin entin nge ka enkawl theih tehlul ang ni!? Ka thaw chhuak hawk hawk a, zû ka in leh nghek zâwk dâwn em maw ni?

Muanpuii hi ka ngaina ngai lo, Zomuani û a nih vang leh chhungkuaa kan insiam tawh avangin ka tilang lo mai zâwk a ni. Nichina a ṭawng dan te kha ka ngei kher mai!

Kan room-ah ka vei kual sek a, kumkhat êm pawh inneih hmâa nupui han sûn chu Pathian pawh hi a ti mah mah deuh lo maw!? Mahse, vûi ngam tur ka ni si lo.

Motor tinung thâwm ka hriat avangin tukverhah ka dâk a, kan kawta Police Gypsy chu tu emawni hian a ti nung hlarh hlarh a, driver seat-a ṭhu erawh ka hmu thei lo thung. Chutia ka en reng lai chuan driver ṭhutna lam kawngkhar a rawn inhawng a, a khalhtu a lo chhuak ta a.

Lalmuanpuii lek! Vawikhat mah police uniform a inbel lâi ka la hmu hauh lova mit khap sak sak chung hian uluk zetin a chezia chu ka thlir ta a.

A sam sen uk kharh chu sâng takah a ṭâwn a, uniform 'khaki' rawng dak thlarh leh nawh mar ṭhat tih hriat ngawih ngawih a hâk chu a inhmeh hliah hliah a, 'Spect' a vuah rân bawk a, a kawnghren sen uk hnûm hlarh pawh ka hmu pha hial! Amah a nulianin a inkhaithli thlarh nen ka hawisawn san thei meuh lo.

Tun angah a uniform nen khawiah nge kal a tum? Kulikawn police station-ah in report a tum te pawh a ni mahna hriat va ni suh.

Motor a hrufai thuak thuak a, kan room lam a rawn hawi chhoh tâkah chuan ka en tih a hriat kher ka duh loh vangin ka biru zuk a, min hmu hman êm lo'ng chu..

A tlânliam tur ka hmu hman ṭâwk a ni.

Kan company lamin vawiin hian min rawn râl dâwn a, kohhran leh YMA pawhin zaninah râlna hun an hmang dâwn bawk a, Zomuani thihnain a nghawng phâk zawng zawng hi kiang thuai thuai se ka ti. A boruak rit lutuk hi ka kham hliah hliah.

Ka fapa thlalâk Zirsanga min entîr kha ka mitthla rauh rauh a, kei hian pâ dinhmun dik tak ka la chelh dâwn chauh a ni. Zomuankimi thihna thlentîrtu Sumo driver hmêl kha ka la hmu lova a nu leh pa erawh chuan ngaihdam min rawn dîlin an ṭap zawih zawih khâ a nia, ngaihdamna thû ka la chhâkchhuak lo. Kha sumo khalhtu kha police lamin an kawl tih ka hrechhuak thut a! No, Lalmuanpuii kha chumi hmunah chuan kal a tum chiang.

Mahse, in chhuahsan thei ka ni lo tun aṭanga rei lo têah min râltu tur an lo thleng thuai dâwn a, chhuahsan chi ninghal lo chuan.

Inbual harh tumin bathroom lam ka pan ta a, ka hawina lam apiangah Zomuankimi hmêl leh a sûlhnu ka hmu zel si a, insûm a har teh e.

A thawmhnaw leh a bungrua engkim tuma khawih danglam ka phal lova a tooth brush thleng pawhin ka thehthang phal lo hrim hrim.

Ka thawhpuite hmêl ka hmu hreh hluah hluah a, ka hna pawh bânsan ka duh rum rum tawh! Mahse, vawilehkhata thu tlûkna siam thut ṭhin mipa ka nih loh avangin inngaihtuah leh rih erawh ka tum.

24 september

5:00 Am

"Bawiha, tho ve la, Muanpuii a haw tawh dawn a nia.." ka nu'n min rawn sawi nawk nawk a, nizanah chaw ka ei loh avangin Muanpuii hmêl ka la hmu lo mai ni lovin a haw dâwn tih pawh ka hriat si loh.

"Tunah maw.."

"Aw ni e, an insiam peih vek tawh a i thlah ve loh te'n" a ti leh a.

Rang lutuka tho chhuakin hmai ka phih puata inhnuai lamah ka chhuk ve ta a.

"Faka, i lo tho duh kher a.." Muanpuiin min lo be hmasa teh tlat!

"I haw tur thu i sawi si lova.." dem awkâ deuha ka tih chuan, "Biak theihin i awm hleinem.." a ti ve hmak.

"I duh chuan sawina hun a awmin ka hria," ka ner pah nûng a, "Ṭha takin inenkawl rawh aw, nu, pa ka kal ang e, ka thlen hunah chanchin ka lo hrilh dâwn che u nia,"

"Muanpui.." ka nu a ṭap leh rih. Zomuani nen an inang mai sia e, ka nu leh pa tân pawh a hrehawm duh khawp ang.

"Chawlh ka la phawt ang a, Bawihtêa hruaichhuak turin ka lokal leh ang," ṭah insûm taka a ṭawng chhuak chu a ri chang chang a, sitting room-a kan nupa thlalâk intâr chu a tâwp nân ti niâwm tak hian mittui tling kalh chunga melh lehin, 'Mate..' a bâk sawi zawm tur hre lo hian a ngawi vang vang a, hrehawm ka va ti si êm.

"Kan kal ang e.." vawikhat pawh hawikir leh tawh lovin pâwn lam a pan ta a, ka sawi aia ril hian a rilru natna a thûk tih ka hria, a mal ngawih ngawih êm asin.

Nimina a kalna pawh ka zâwt ta lo khâ a nia, ka inthiam lo ru kher mai, a mipa zâwkin ngaihsak tur ka nih laiin ka lo ti lutuk deuh a ni. Company-lamin min râl lai khân a rawn thleng a, biakna hun a awm loh avangin ka lo ngaihsak lutuk lem lo.

Ruatdiki'n a en duh ngang mai! Police a ni chu thuhran, Zomuani nen an inang lulai êm a, tupawh mai hian an en duh hlawm nimaiin ka hria. Mahse, an mize inpersan lutuk erawh an hre ve lo mai pawh a..

Lawngtlai thlenga inkhalh phei tur chuan ka ngaihtuah ru viau, 'Muanpui, driver ka nei reng alawm hruai ta mai che," motor bulah kan ding tawh a, ani driver seat-ah a ṭhu thung.

"A ngai lo ang; hei, Hlutea hian a khalh thiam thova kan inchhâwk mai ang.." a ti deuh tlat. Ka pa pawhin a ngaihtuah deuh nge, "In thlen chin min lo hrilh zêl rawh aw.." tiin a chah ve a.

Zomuankimi awm lo mah se Muanpuii tal a awm chuan ka nu leh pa an thlâ a muang tih ka hria, kei mah ber hian eng ati nge maw ni ka mil hlawl lo.

Muanpuii te tlânliam thlengin pâwnah ka ding a, a hmâ aiin ka nun a ruak leh zual sawta ka hriat chu le!

"Mama, inchhung te pawh singsa ve ṭan i la, inchungah mu tawh rih lo mai rawh," ka nu'n a ti a, ka chhâng lêm lo.

Nitin ka fapa chanchin tharlâm hre turin ka nu leh pa an kal ziah a, kei erawh vawikhat mah ka la kal lo. Ka nupui thihna hmun damdawi in khi hmuh ka châk hlawl lo a ni ber.

Naute hming kan la phuah ta lova Muanpuii kutah an hmehbel deuhvin ka hriaa inrawlh ka tum hran lo.

Inlêng an tlêm telh telh a, ka lung a lêng tulh tulh thung si. Thlanmual lamah zingtin leh tlaitin ka kal ziah a, mipa ka ni nâa ṭah rûk châng ka ngah mai. Siami takngial pawhin, "In chhunga awm pawh nuam ka ti tawh lo, Zomuani ka ngai.." tiin a ṭap chhuak hlawl a, ka nu a inhnît leh ṭan tawh.

Ka chhungte hmuh laiin ka ṭap ngai tawh lova ka ṭawng tlêmin min biak loh phei chuan ka ngawi deuh reng. Ka nun hi hremhmun tênau a ni ringawt, han ṭawngṭai ve ṭhin mah ila ka thâwl huai chuang hek lo.

Muanpuii pawh Lawngtlaiah a awm leh vang vang tawh a, vawikhat mah min rawn be lova ka nu leh pa erawh nitin a be ziah a, anni pawhin an be deuh ziah bawk.

Ka hma hun ka hre lo nâin nupui neih duhna rilru ka pu pha tawh lo, fapa enkawl tur ka nei tawh lehnghal a, ka hnâ bansan hian ka ṭûlpui dawn nge min enkawpui tur ka zawng zâwk dawn? Â, eng mah ka ngaihtuah thiam tawh lo e a.

Kan nupa khumah ka mu a, tlailam dâr thum a ri dêk dêk chauh a ni, nî lah a rei si, engkim hi ka kham kham hluah hluah a, Zirsanga te inah vawikhat chaw eiin ka kal a, a bâk khawi hmunah mah ka chhuak ngai lo.

Ka phone a rawn rîk chuan ka ngaihsak duh lawk lova vawi thum ngawt a rîk tâkah chuan ka pick ve ṭâwk.

"Faka, naktuk hian rawn phei ka tum a, nautê mamawh tur eng eng nge ka rawn lei dâwn?" Muanpuiin a rawn ti ta a.

A ni maw! Naktuk hi ka fapa kan hruaichhuah hun khâ a ni tawh tak alawm le.

"Eng mah lo lei duh suh.."

"Lalfakhlu, eng nge i hriat a!?" A aw a nelawm loh kher mai.

"Naute puan leh thawmhnaw te chu kan lei ve nual tawh a, a dang eng nge la ngai?"

"A ṭhat chu, ka lo thlen hunah a ni mai, motor ka rawn keng dâwn lova counter-ah min lo hmuak tur in awm ang em?" A ti leh a.

"Awm ang, i lo thlen hunah min lo hrilh dâwn nia,"

"Hah! Ka lo thlenah ka hrilh chawp chauh ang che maw? Min hruai peih loh leh Taxi ka la mai ang," zuk ti hmak a.

"I thû thû le.." ka ti ve hmiah.

Ani nen hi chuan Ui leh Kêl thlunpawlh ang vêl khâ kan nia, puitling kan nih avangin kan tilang sek lo mai pawh a.

Ama'n phone min la dah khum zui a, Zomuani û ni lo se chuan ka hmeichhe biak loh tur 'number one' a ni ngei ang.

Hmeichhiaah pawh police leh nghal! Eng ang pawha uniform nawhkhawng inbel mah se ka hlau chuang lova eng atân mah ka ti hek lo, Lalmuanpuii a nih chhûng hi chuan...

B<++++[BeckirafARenthleI]++++>RR

SEGUNDO

Becky Rafa Renthlei

Chapter-19

Lalmuanpuii

Nunphung pangngai zawh tumin ka insawrbing mêk a, Aizawl thlen nân dârkar tlêmtê chauh tlân a ngai ta. Ka nau thihna hi ka tuar em em a; mahse, thil sâwt tawh lo ngaihtuaha indawm kun reng mi ka ni lo. A fapa nghâkhlel taka a lo thlîr leh duat taka ei ṭha tinreng nêna ṭan a lo lâk chhan erawh ka kutah awm turin ka dah hmiah a, Lalfakhlua ka chhuhsak dâwn tihna ni lovin enkawl hi ka bat leh tih mâkmawh a ni.

#Khawilai nge in lo thlen tawh? Whatsapp aṭanga Fakhlua min lo biakna ka hmu ve chiah a, he mihring hi a rûk tak chuan ka ngaithei miah lo; mahse, ka nau a enkawl dan leh a duat thu-ah erawh chuan demna tur pakhat tê mah ka hre lawi si lo.

#Min lo hmuak duh suh, in in awmna ka hre lo pawh a ni hlei nem; nge, in insawn thut zâwk dawn? Ka chhân dan ngeiawm tak avang chuan ka nui pát pát a, hepa hian ê, ka lakah ṭhat a chhuah lo ve sih sah êm mai! Naute hi ka tlânbopui nghâl loh! Hus! Ang lo lutuk.

#Chimawm nu, ka hmuak châk bîk lo che.

Min chhâng tâwi tek tawk khawp mai.

Mc kawtah Sumo a ding dat a, 'min hmuaktu an awm dawn lo bawk a' tiin teikual hmasak ka tum ta a. Naktukah Bawihtêa kan hruai chhuak dâwn a, a thawmhnaw hâk tur leh oil eng ilo lamkhawm tur ka nei nual.

Zomuani awm lo mah se 'nu nei lo' a ni tih hriat hauh loh tura enkawlna ṭha pêk ka tum bur, hnute hnêk tur a nei dâwn si lova tiin 'Nestogen' case khat ka la bawk a, kei hian naute enkawl ka thiam îkhaw lo va! Mahse, thiam lo ang a lan ka duh dêr lo.

Ka phone a rawn rîk chuan ka inleikim thawkhat chuan ka hria.

"Hello.."

"Lalmuanpui, kan inah i thleng dâwn nge, i awmna chin sawina châng hre ve rawh" Fakhlua aw nelawm loh zetin min lo chhâng a.

"Eng nge maw i rawn thinrim ngawt le, in inah lo khaw'nge thleng se min tih a, min mikhual peih lo a nih chuan sawi tlang mai rawh.." a hmâa Fakhlua ka hriat ṭhin fiamthu duh leh nui suk suk reng khâ anna a nei tawh lova ka nêl hranpa lo nâin tunhma kha chuan ka nau thlazar hnuaiah kan inbe ṭha der vel ni berin ka hria.

"Ngawi hmiah la, lo hâw rang mai rawh, ka nupui awm tawh lo mah se ka enkawlna hnuaia awm tur i ni tih theihnghilh miah suh." Phone a'n off hmak a. Fakhlua dik tak ka hmu ṭan zawk pawh a ni mahna! Engtin nge Matei khân a lo duh theih le!?

After 2 hours

Faka nu leh pain min lo dawngsawng ṭha hlê a, ka thil hawnsak tepawh an lâwm thiam ang reng, nu leh pa polite tak nei siin fapa 'boring' deuh zuk nei tlat a! A mah pawh hmuh tur awm nghâl lo chuan!

Chhungkaw ṭawngṭaina kan neih naah pa berin tihian a sawi ta a.

"Kan fanu Zomuani boralna a la rei lo viau a kan zavaiin kan tuar tlâng vek tih ka hria a, insawi tur chuang kan awm lo; chuti a nih rualin hun liam tawh theihnghilh thei lo mah ila amah vâng tal pawh khân hmalam pana kê pên ṭheuh tum ta ila, a bîkin Mama leh Muanpuii pawh in dinhmun kan hrethiam a nia; naute enkawl hi thil namai a ni lo bawk nen keini kan upa chho hret hret a, nakina miin min dem lêt lehna tur thil eng mah tih loh hrâm a ṭha. Mama, i fapa hi i hmangaih tluk zetin kan hmangaih tih hrereng ang che, chuan naktukah kan hruai hâw tawh dâwn a, tumah hlim lo hmêl pu lo turin ka ngen bawk a che u, kan fanu Zomuani hian 'hlim takin awm se' tih hi min duhpui ka ring tlat.." tia a sawi chu ka pawmpui hlê.

Matei tâna ka tih theih tâwk chu a thlânlung phun leh a fapa hmangaih taka enkawlsak hi a nimai.

"Muanpui, khawi room-ah nge i mut ang?" Chaw eikhamah Pa Rosanga'n min zâwt nulh a.

"Kan nupa room-ah mu rawh se, inhnuai room hi ka luah dawn." Lalfaka'n zuk ti leh tlat a.

"Mama, a anglo lutuk, inchungah amah chauhva dah te chu a, nang mah in room pangngaiah mu la Muanpuii inhnuaiah mu rawh se." A nu bawkin a ti leh a.

"In chungah pawh ka mu hreh chuang lo a nia," tiin ka lo inrawlh vat a.

"Police a nia, inchung inhnuai tih vela buai rual lek a ni tawh hleinem, ka nupui û a nih angin room nuam ber chang rawh se.." Lalfaka'n min tiel nge, an nupa pindana riah hrim hrim a duh lo zâwk tih pawh ka hre chuang lo e a.

Zan lamah pawh Matei vanga lungngai hmel leh hmuh hrehawmin tumah kan lang tawh lo, puitling ṭhiau kan ni a, an inneih thlalâk erawh a awmna ngaiah an la târ reng a rilru a nuam fahran lem lo.

Thlathum chawlh ka la tawp a, Pathian zârah ka dam a ṭha riauva office chawlh ka nei mang lo, Mateiin a hlawh a lo khâwl ve ngar ngar Fakhlua'n min pêk chuan ka insûm zo lo teuh kher mai.

Min chhuahsan rualin chhuak em em hian ka inhnît hlawp hlawp a, an nupa khumah ṭhuin kiltin ka melh kuala lungawi har ka ti a ni.

Sumo driver kha vawikhat tal kutthlak ve ka châk nen a hmel hmuh min phalsak ṭâwk a, police ni tho mah ila duh duhin ka lût chhuak thei bik lo va. Court-ah erawh a insawifiah a ngai ve khawpin ka ring, ngaidam mah ila dânin a ngaidam miau lova rûi chunga motor khalh a ni tlat a.

Khawvelah hian keimah chiah ka awm ta, thî pawh ni ila tunge ka ruang hlâwm ta ang? Zomuani zawng a vannei letling zâwk ka ti! A pasal leh a û in mawihnai takin kan la thlah liam tal a, kei ve hi...ka ngaihtuah thui ngam lo.

'Mate, i fapa hi ka neihchhun a ni tawh asin, ka nu leh pa te nen min lo thlir ve a nih chuan vawikhat chauh in hmêl hmuh leh ka châk a ni.' Ka phun chhuak sap a.

"Khatiang zâwngin ngaihtuah tawh rêng rêng suh," Fakhlua a chhuak daih tawh emaw ka tih kha khum bulah a rawn ding a, min hua angin lang fo mah se min lainat ru ve tho tih ka hria.

"Chhuak rawh, ka mu dâwn.." ka kut hnunglamin ka mittui ka hru tâwk a, a mah pawh ka en chuang lo.

"I rilru tur ka hrethiam a nia, kei pawh hê pindana ka riah duh lohna chhan chu a sûlhnu ka hmuh tam vang a ni, khawih danglam ka phal chuang si lo," tiin a indawm kun ve leh ta a.

"Faka, ngun takin ngaihtuah la, chawlh ka lâk chhung hian i hna zawm ang che, in hnenah ka awm reng thei dawn lova Bawihtea a dam ang a thlathum a tlin chuan ka hna zawm a hun chiah bawk ang a ka kalsan a la ngai dawn.." ka ṭah a chhuak leh ut ut tawh a, thaw halh chung hian, "Chhuak rih phawt teh.." ka ti leh ta a.

Keimahni pahnih inmil lo mah ila Matei vânga kan lungchhiat erawh chuan kan inhnêm tawn leh tlat lawi si.

"I pa hnena ka lo tiam tawh angin nang pawh ka enkawl ang che, i hnâ bansan rawh ka ti lo; mahse, pasal i nei duh emaw engkim ka hriatpuina thlap a ni tur a ni." Tiin min chhuahsan ta a.

##

Lalfakhlua

"Motor pakhatah kan leng tho ang," ka nu a phî buai leh chung tawh.

"Muanpuii nen kan inphur ang a, Siami kha hruai tel ve rawh u, mahni chauhva ina awm bîk te chu.." ka ti deuh tlat.

A hlauh vâng ni lovin kan in a lian ve ang reng si a, mahni tê chauhva awm kha thil nuam a ni dâwn lo tih ka hriatsak vâng zâwk a ni.

'Elantra' car- kan nupaa kan lo inphurh nitin naah chuan Zomuani chuang tur a awm ve ta lo. A lunghnûr zâwnga ngaihtuah thui duh lovin steering nghet zet hian ka vuan a, tukin zing ka thawh hlim khân Muanpuii tukverh bula ding kha Zomuani emaw ka'n ti thut pek a nih kha! Kei hi ka fimkhur hlê loh chuan ka la chesual thuaiin ka ring.

Nurse duty leh doctor-in min lo chiauau ṭha kher mai! Muanpuii an hmuh ruala an makti hmêl mawlh mai chu! Hun dang nise ka'n nuih nasat dâwn nen!

An enzui vawng vawng zel a, keiin hrehawm ka lo ti thung. Zawhna mitmeng an pu ṭheuh a, ka chhâng lêm hlei lo va.

Kâr hmasa maia mitthi ruang kan lâkchhuah leh tuna a mah ang lutuk mai an hmâa ding hi an tân pawh hriatthiam a har fû-in ka ring.

"Faka, thlahnih a tlin hmâ chuan pâwn lamah in pawm thawlêng lo hrâm hrâm dâwn nia," doctor-in min chah lawm lawm a, ka fapa hmêl ka hmuh meuh chuan ka chhugril ber a rûm vawng vawng a ni ber mai. He khawvel êng a lo hmu ve a; mahse, 'Ka nu' tia koh tur a nei lo hi pawmthiam har ka va ti si êm!

Ka nu nise a ṭah a chhuah hmel hle a, nizan lamah ka pain a lo sawi lâwk tawh bawk nen thinlung tâwt ru ṭûnin kan awm tlâng a ni ber e.

Lalmuanpuiin ka fapa hming a tân 'Zosangmawia' a phuah mauh mai a, a phuah chhan sawi tur mumal a hre lawi si lo. Ka rin aiin a lian daih a, 3kg a tling thawthâng nia maw le!

"Keima'n ka pawm dâwn," Muanpuiin a ti hmasa ber a, ka nu a nui hak. Ani lo pawm tur dang awm nghal lo chuan.

Zomuani mitthla chhin duh eih lovin hospital kan chhuahsan ta a, ka motor-ah Muanpuii leh ka fapa an ṭhu a, ka pa pawh a nui suk suk reng mai. Zomuani awm lo mah se a nu û hian a hmangaihin a duat dâwn tih kan hre vek a lâwm, keimah ber zawk hian ka lâwm thiam chai si lo.

"Faka, flash-ah khân tuiso lo thun teh aw.." In kan thlen hnu rei lo têah Muanpuiin min tîr zui zat a, a hmâa kan boruak ṭha lo ang kha a reh hmiah. Kan nautê an rawn en liam liam a, ṭhenkhatin 'a pa a chhûn an ti a, a ṭhenin a nu' lungngaihna kârah pawh Zosangmawia vâng hian hlimna tlêmtê kan la tem ve tal alawm le. A la dama te hi kan pawimawh hle tih ka hriat phah.

Zirsanga te chhuangkua an lokal bawk a, kan ri laih laih reng mai, kan nupa room-ah Muanpuiin a riahpui dawn a, kei ka âwl hlauh thung.

Muanpuii hriat lohvin ka nu'n min ko hrang ta a.

"Mama, a mah ringawt chuan ka ngaihtuah êm mai, riahpui ve mai rawh, zâna thawh ngai leh hnute siam a ngai ang a, a khawngaihthlâk.." a ti ta a.

"Nia, ṭhutthleng a awm thova ka riak hreh chuang lo," ka ti ṭha ve mai bawk.

Kan nupa room pawh loh theih lohvin kan sîksawi kual ta a, sofa pakhat kan dah luh belh a, doctor-in awm thawlêntîr an phal loh avangin sitting room lamah pawh pawm kan awih miah lo.

Chhungkaw chaw eikhawm ka pa'n buatsaih a tum deuhva Muanpuii nen kan duh lo fithla hmiah, kan duh lohna zâwn erawh a inang kher lo mai thei.

"Hey, Bawiha hi a zung leh tawh," Muanpuii a nui kar kar a, nichin deuh lawk khân a zun huh kan thlâk zo chiah khâ a nia, eng ati em em nge maw ni!

"Tih dan ka hria.." a ti hliai a, lukham pathum nghen theihin a siam a, a ṭhu mu ta a, a sîrah ka fapa a muttîr thung a, Sofa-ah ṭhuin an chezia ka en reng.

"Zosangmawia tia han phuah kher!?" Ka tih chuan min en chuang lo hian, "Zosangmawii tih chi a nia mi!?" A nui sak a, ka nui ve tawp. Zomuani ang lo takin a ri hluai lêm lo, a nuih pawhin a hmui ti chëin a kiai sak ringawt a hmeichhe mak dangdai ve tak niin ka hria.

Keimahni pahnih hi 'khuanu tuahrem loh' kan ni tepawh a ni mahna, kan intâi ru rân a; mahse, Zosangmawia vâng hian kan inrem der chu a nih ber tawh hi a.

"Bawihtê, thawnthu chhiarsak tur che ka hre lo e a, englo in ti mai ang," ka fapa a be mawlh mawlh a, a ṭê hlek a piangin a khuhna a keu hman ziah bawk.

"Thawnthu ngaithla tham pawh a la nih loh kha.."

"A ngaithla tham pawh ka tih si loh.."

"Ti âwm taka i sawi si.."

"Awi! Fakhlu nang mah pawh ka be lo che mu rawh.." phone min bihsan daih a, ka nuih aza deuh!

Games a khêl nge whatsapp ah mi biak a nei zâwk! A nui leh hak zel a, ka phone khawihsan ka'n tum ngial a rilru ka pe thei chai lo.

"Awi, hnutê i va'n duh zing reuh ve â.." a hnutê tur a siam a, ka rin ai takin a khawzei phian! Bawiha a malchungah a pawm a, hnutê a hnêktîr lai ka ṭhuthmun a ṭanga ka hmuh chian theih loh avangin ka va pawh ve ta nge nge a. Ni e, ka fapa hian min chhûn deuh chuan ka hria.

"Fakhlu, i bih hnai lutuk.." min khak hi a châk zek zek nimaiin ka hria.

"I va'n phun peih tak.." Naute pakhat ringawtah pawh kan innghirngho a nia, Zomuani lam pawh kan ngaihtuah hman lo, ka fapa buaipuiin kan inkhak fek fek a, upa ve riau turah ka'n dah ngawt a, a âtthlak lutuk! A nau nen an inrual reng tak a lâwm le! A chhuak hmasa zâwk a nih vângin a upa tihna mai chauh a ni.

Ka nu leh pa an rawn chho ve bawk a, Muanpuii chezia hmuhnawm an ti ngang mai, kan awm ve tih hre lo ang hmiah hian a be mawlh mawlh a, 'Sâp hming puttir che ka duh teh reng nen phuah mai tur ka hre si lova leh..' tih vel mai maiin a ṭawng a, ka pa a nui a nui mai.

A mizia ka hrechiang lo nge, police inla 'hâi' zet ang a ka lo ngaih ṭhinna kha hmuh tur a awm lova T-shirt fual lian lampang leh leggins a inbel tawp a, a sam a vial chho vek bawk a, make up chhetê mah a hmang lo! A fai sar nia!

'Muanpui, in mut theih loh chuan min kai tho hreh s'u aw.." ka nu'n a ti ve ngei.

"Zaninah ka riahpui chhin ang a, a harsat viau dawn chuan in riahpui ve ang," fiamthu deuhva tiin a nui a, ka nu leh pa an chhukthlâk meuh chuan zân dâr sâwm a ri tawh.

Hetia kan awm tlân dial dial hi chuan ka nupui ka ngaihna pawh a nêp deuh a; mahse, keimaha ka awm hian a hrehawm êm a ni.

Lalmuanpuii leh naute an muhil tawh a, ka mut a chhuak hlawl lo nen balcony-ah chhuakin Vân lam ka thlir chho vang vang a, 'Zomuankim, min hmu em? I hmangaihte pahnih kan khumah an mu ania' tiin ka phun chhuak sup a, kan nupa hlimlai nî a rei lo lulai lutuk hi ka ngaithiam hlawl lo.

Nunphung pangngai zawha office ka kal hun tur mawlh a nia ka huphurh ni! Nitin kan kan kal dunna hmun hmuh leh ka hreh ngawih ngawih a, harsa ti chung chung leh peih lo chung chung a, a hmakhua ngáia a zir ve ṭâuh ṭâuhna hmun workshop phei chu ka tlawh hreh em em tawh a; mahse, mipa nêp ber ang a indawm kun reng erawh ka tum a ni lo.

Bawiha a ṭap ṭhat ṭhat a, Muanpuii a awm tho avangin ka lût duh lawk lova a ṭah rei tâk deuh avangin ka lût ta a. Muanpuii a la harh awzâwng lo!

Ka thiam ang ang a Nestogen chu siamin pêk ka'n tum ve rawk a. Ka khawr ṭût bawk nen a ṭap uar sauh sauh a ka buai philî a ni ber e.

"Hey, min kai tho ta mai che." Lalmuanpuii a rawn ṭhu chhuak a, a meng phak chap nia!

"Kai tho hman che ka ni lo.."

"A nih tak chu, khawi.." tih pahin feeding bottle min chhuhsak a, a kutah tlêm fartîrin awi! "A sa lutuk! Engtin nge a hnêk ngam ang?"

"Nge, i muthilh daih ni!?"

Ngawi hmak hian a dang a siam ṭhat sak leh vek a, chutah Bawiha ka pawm lai chu min lâksakin, "Ka tih dan ngun deuhvin en rawh training pêk i ngai," a ti hmak a. Ka nuih a za lo.

"I training bîk tihna maw!?" Ka nui suk a.

"Ka inchhiarzau thung a lâwm.." zing lam dâr khatah kan in chapchar leh ṭan dâwn e.

"Ka lo inchhiar zau ve dawn nia.." tih pahin ka mutna lam ka pan a, a fâ hrin a ni hauh lo chung pawhin buaipuiawma a awm loh nan a lo inhmakhua ve tihna!

A tih dan ngai bawkin Bawiha a be leh mawlh mawlh a, 'I pa hian 'engine oil' thun chiah a thiam a ni ang,' a tih chuan ka run ang reng. Mahse, ka chhâng lêm lo.

Mut chhuakin min zem chiai chiai a, ka mut ṭhat lohna a rei tawh bawk nen ka chhîng ta riai riai a.

##

"Faka, ka 'walk' duh sia Bawiha hi i lo awmpui dâwn em ni ang?" Muanpuiin min kaihthawh chuan zinglam dar nga a pêl tawh a.

"Maw! Exer lâk lâk a ngai a mi?"

"Ngai e, tho phawt mai teh.." Peih lo zet hian ka ṭhu chhuak a, a lo insiam peih ap tawh nia, a tlaivâr a nih ka ring.

Jump suit dum inbelin Sneakers vâr a bun a, police a nih tak kha maw le! A inla fêkfawn ve sia (h).

Bawiha a mutui hlê a, Muanpuii chhuah hnuah ka fapa hmêl ngun takin ka en ta a. A sam dum hlap te, a hnâr ngûl fel ât te chuan Zomuankimi min hriatchhuahtîr lo thei lo. Fapa min hnutchhiah hi ka lâwmna leh lâwm lohna a inchen reng, a chhan chu nû tel lova ṭhanglian tur a tân chuan ka lainat êm a ni.

Ka nu in thingpui min rawn pêk laiin khumah ka mu ve a, Muanpuii rim a nâm châk a ka'n hriat chu le!

"Mama, nizan in mu ṭha em?" Tih pahin a tupa a rawn thlêk dâk dâk a.

"Kei chu ka mu ṭha ve pah reng, Muanpuii a tlaivâr a ni ang,"

"Ehe! I menpui ve nange?"

"Dâr khat thleng ka meng a, a bâk ka harh tawh lo," ka tih chuan, "Muanpuii chu a chau ngawt ang, duh leh vawiin lamah mu hahdam se ka lo chhâwk ang e," a ti ta a.

Hetianga zantin tlaivar deuhthaw a ngaih chuan ava chauh thlâk dâwn ve le; mahse, ka fapa rangkachak tân hian engkim ka huam tur a ni dâwn lo'm ni?

'Zosangmawi ka fapa, i pa hian engtikah mah ka thlahthlam hauh lovang che, i nu Zomuankimi vang pawh khân hlim taka awm hi i phû a ni'

Tui taka ka fapa muhil hmêl chu ka thlir ning mawlh lo. Muanpuii hian min enkawlpui a nih ngat chuan a nu a ni lo tih a hre hauh lovang.

'Lalfakhlu hun liam tawh avanga intihrehawm mai lovin i fapa tân theihtawp chhuah rawh' tiin ka infuih sauh sauh tur a ni lovem ni?

B<++++[BeckirafARenthleI]++++>RR

NOTE: Comment lamah 'A changtunu i ti thi daih a, ka chhiartui tawh lo' tih angreng te ka lo hmu a, kan insawifiah lawk ang e.

Story ka ziahin a prologue ka rawn dah hmasa ber zel a, prologue êm pawh ala lan hmâin a changtunu tur in lo neisa bawk sia, ka story chhiar ṭhang chuan Zomuankimi character ang hi a changtunu dik tak an ni ngai lo.

Story common lo hi ka ngaina a, chutiang tur chuan uluk takin ka duang ve ṭhin, Segundo story hian tum mumal tak a nei bawk. Min chhiarsaktute chungah lawmthu ka sawi nawn leh e.

20.SEGUNDO

Becky Rafa Renthlei

Chapter-20

Lalfakhlua

Kan in chhung pawhin ngai a awh leh ṭan ta. Ka fapa thlakhat a tling tawh a, a nu theihnghilh lo mah ila mahni intihrehawm khawpin ka ngaihtuah duh tawh lova thlânah erawh kâr khatah vawihnih ka kal ziah thung.

Lalmuanpuii nen kan inkârah inremna aiin innghirnghona a tam tulh tulh a, chhûngte hmuh phâk leh hriat phâk si lovah kan inbakkaih zeuh zeuh châng a tam mai. A chhan ber chu ka fapa vâng a ni.

Kan room-ah kan la riakho vek a, a ngaitêin sofa-ah ka la mu bawk a; Muanpuii te nufa khumah muin ka awm ve tih hre lo ang maia min ngaihsak lohna hian ka thin a ti rim lek lek ṭhin.

"Bawihtê, i hming ang common lo lutuk hi mipa chhe lo tâwkin pû se ka bêm nghal ang," a sawi zâwngin amah a nui kar kar nia maw le!

"Muanpui, a muthilh tawh chuan be chhên lovin muhil rawh." Eng ati nge a ṭawng ve a piang hi ka huat tâk mai lê! Inrem taka awm tur kan nih lâia hetia ka awm tlat hi a chhan ka hre bîk lo.

"A la muhil hlei nem ka inbual chhungin lo awmpui rawh aw," khum aṭanga thovin bathrobe a ban zui zat a, kan rualin chaw a rawn ei meuh lo, ka fapa kianga a tâp chawt a, thingpui, chaw leh a mamawh tur kan dah chho hmiah hmiah a, a chângin ka nu'n a chhâwk zauh zauh bawk; mahse, a khawzei lo bawk nen Muanpuii kan papêk a ni deuh ber.

A inbual chhungin khumah ka lawnkai ve a, a la muhil lo tak tak tak nia! Ṭap miah lo hian a meng ve a, ka chhawnchhaih thiam lo lutuk hi hrehawm ka ti. Muanpuii phone a rawn rík chuan rang zetin ka lo chhân sak a.

Number lâwng ringawt!

"Hello..."

"Miss Muanpuii ka lo be lawk thei ang em?" Mipa aw thûm lam deuh hian min rawn chhâng a, "A inbual lawk a, eng nge ni ta ka lo hrilh chhâwng thei tho va.."

"E, vawiin chawhnu dâr khatah Kulikawn police station-ah emergency meeting koh a ni a, chawlh la lâi a ni tho tak nâin a case bawhzui lawk tur a awm a min lo hrilh sak mai rawh aw.."

"Aw le, teh reng mai.." phone ka dah rualin ka fapa a ṭê ṭhat ṭhat a, a zung nge zung lo ka en ve ngial a, a lo huh tlang deuh vek!

Ka thiam ang angin a zun huh ka thlâk ve a, ka tuam thiam lo nasâ! Ka thlâk zawh hnu lawkah a ṭap ta a, a uar em em mai lehnghal nen ka kawchhung a fan vek, ka fapa a ṭah hian engtin emaw tak ka awm zêl nia.

Hnutê ka pêk pawhin a bâng duh lo mai ni lo vin a hne duh ṭhak lo! Muanpuii inbual ka va ko ta ringawt a, hmanhmawh lutuka rawn chhuakin min kal pêl fua a, police tih takah a ri deuh phat phat zel.

"Faka, tu nge nichina lo call tu kha?" Bawiha hnute a pe nghal a, a bathrobe nen a la awm reng a, a hmanhmawh lutuk vang nge a a intuam uluk lo khawp mai.

Nichina lo call tu sawi ang thlapin ka hrilh chhâwng a, "Naa, ka form khawiah nge ka dah kha le, khawngaihin inhnuai room-ah min lo ensak mai, i naute tuam dan hi 'Tumtelek' a ang." A la ti zui a(h).

"Hetah i thawmhnaw dah chho vek rawh, inthlâk tura inhnuai pan ziah hi thil buaithlâk tak a ni," ka awm ve váng nge a thawmhnaw a thlâk dâwn rêng rêngin inhnuai room a hmang ziah a, Siami nen thiar chhoh sak ila a ṭha ang.

Chumi hnu chuan a suitcase leh Air bag inchungah kan sawn chhohsak ta a, a sawinawi bik lo. Bawiha khumah muttirin a form a la chhuak a, Istiri-in a nawt ta a, a chezia reng reng a dik thlarh mai.

"Ka inthlâk dâwn min lo chhuahsan lawk lâ.."

"Tikhan inthlâk rawh ka en dâwn che pawh nihlei lo.."

"Fakhlu, khirh viau teh suh, tunah pawh i mit khân kawngkhar lam melh lovin keimah a ni min melh ni!" A tûm deuh hmak.

Sawi buai thui lovin Veranda lamah ka tei phei ta a, a taksa ka hmu peihin a ring rêng rêng em maw ni! A ve lutuk hian a!

Tukṭhuan kan eikham tawh a, Muanpuiin chhuah a tum avangin ka nu nen Bawiha kan awmpui dâwn a, eng ati teh reng nge maw ni ka nu nen chauhva awmpui chu ka huphurh ru riau.

"Muanpui, i kal hmâin hnute lo pe leh lawk la.." a form a inbel vek tawh a, dik tak chuan a inhmeh thlâwt!

Zomuani pawh kha a inchei tak tak chuan chhe lo fia fia tak a ni. A û erawh vawikhat mah a inchei lai ka la hmu lova hmânni-a râlkhat aṭanga a form inbel lai leh tûn hi ka hmuh chhun a ni mai. Thawmhnaw pangngai tak nen ka la hmu lo hrim hrim! Kan inneih hma kha chuan Zomuani hlîr ka ngaihven avangin amah ka lo chîk tehchiam hek lo.

"Aw le, lo hâw hma ka tum dâwn nia, i car ka lo keng thei ang em?" Tia min zawh pahin naute hnute tur a siam rak rak a, ka rin phâkbâkin ka fapa a ngaihsak.

"Awi! I va'n sual reuh tak," a ti hliai a, khumah ka fapa mutin a form kekawr Bawiha zunkhum na lai chu a tuai nawk nawk a, ka nui huk.

"Muanpui kal ngei ngei a ngai em ni?"

"Ngai e, ka form kekawr spare kha khawngaihin min lo nawhsak leh mai, a zun huh ka lo thlâk ang," tiin min tîr zui zat nia.

"Lalmuanpuii tak hi chu(h) khawi, lo la rawh..'' Hun dang nise ka tihsak dâwn loh nen min tirh hian mak deuhvin ka zâwm leh thlup zel! Ka fapa a duat êm vang te pawh a ni mahna.

Police uniform ka nâwt ve ta chu a nia, ang lo lutuk! Mahse, naute zun huh thlâk a tuam leh ai chuan ka zei fê.

"Hei âw.." tiin a kekawr chu ka khaisak a.

Khum aṭanga a rawn ding chhuak chiah chu a ṭhuthla leh rang kher mai. Under wear bâk inbel hek lo, a chungah a form kamis a ha a, nichin khan a hrechang tawh lo a ni ngei ang.

"Lalfakhlu min hmu em?" A biang a sen ṭâwn ṭâwn a, a mit a khap zak zak bawk.

"Aih hmu lo.." ka nui zui suk a.

"Ih..min hmu, min hmu chiang lutuk.." tih pahin Bawiha blanket pakhat chuan a inkhuh ṭha sawk sawk a, ka nuih a za ngei mai.

"Ka hmu lo che ka tih mawlh mawlh chu, hmu che pawh ni ila eng nge pawi vak a..?"

"I va'n zak thei lo tak.." min la ti zâwk mah nia!

"Eng nge, under wear dum i hâ tih mai loh chu a dang hmuh tur a awm em ni?" Ka sawi zawh rualin a boot a rawn thlâwk phei fua a ka lo thle sawn hman chiah.

"Min vawm fuh ang a sin," za lutukin ka nui a, tûn hnaia ka nuihzat ber ṭum a ni hialin ka ring. A kekawr ka khaisak chu lâin bathroom lamah a lût hmak a, en pawh min en tawh lo, nula ve uaih tawh si, a lâi hmelhmang khân ka nuih a za.

Zomuani aimah khân mipa a ngaihsak lo zâwk a, a hna leh a pa bâk a ngaihsak lo tih ka hre ve bawk. A chanchin hre tam lo mah ila sawikâiin a awm ngaiin lo hrim hrim, a nu zêm lem lo bawk nen a nelawm loh lek lek ṭhin.

Bathroom aṭanga a lo chhuah lai chuan Bawiha ka lo pawm a, hnâi tâwka bih chung hian, "Thuawih deuhvin lo awm rawh aw, â nu hian thil tê tê ka lo hawn ang che," tiin a biangah a chuk zeuh a, 'Â nu' tih thumal pathum lek khân ka thinlung a nghawr dat.

"I car chahbi khaw'nge?" Bawiha a biak dan leh kei min biak dan chu inpersan tak a ni. 'Jail tâng' biakin a nia min biak!

"Inhnuaiah ka khâi a, i duh chuan ka thlah ang che, ka nu in Bawiha a lo awmpui ang a.."

"A ngai lovang, i nu ringawt chu ka ring ngam lo.."

"Kei pawh eng teh ual ka ni chuang hlei nem."

"Thlah ka ngai lo ka tih chu, i car pawh himdam takin ka lo thlen em em ang," tia ner sak chung hian inla confi zetin a chhuak ta a. Ka chhâng zui tawh lo.

Tukverh aṭangin a car lachhuak lâi ka thlîr reng a, Elantra zâwk a keng dâwn emaw ka tia ka pa car a hmang daih! A sam nî in a chhun tlêtsar te chu a nalh reuh riau a, khu ai khuan zuah sei deuh phei se chuan a mawipui ngawt ang..Û huh! Lalmuanpuii sam buaipui hman pawh ka nih si loh.

Chak zeta a tlân chhuah rualin a bân ding lam a rawn phar zeuh a, ka en reng tih a hrechiang!

Ka nu'n bawiha a bual laiin TV lei turin ka chhuak ve ta a, kan room-ah hian a hma khân kan dah ṭhin a, Zomuanin a ngaihthei tlat lova inhnuaiah kan dah thla ta kha a nia; he pindanah hian ka la riak dâwn a nih chuan rilru la pêng tur eng emaw kan kawl a ngai ṭan tlat, an nufa hian min ngaihsak aiin min ngaihsak lohna a tam zâwk.

Tlailam dar thum velah ka haw chauh a, Zomuani ṭhian ṭhenkhatte an lo lêng a, nautê an rawn en niâwm tak a ni.

Muanpuii a lo la hâw lova TV ka fit fel vek hnuah pawh ala rawn thleng lo cheu! Ka fapa a tlei duh tawh meuh lova ka nu nen kan in awih chhâwk ngial pawhin kan beidawng! Thinur ru ṭûn chunga call ka tum chuan, 'Mama, hna thila chhuak a ni a, phone rih suh, keini aimahin a ngaihtuah zâwk ang tih hre ta che.." a tih chuan ka phone lui ta bik lo.

Dârkar chanve vel hnuah Zosangmawia a muhil ve chauh a, Muanpuii tel lova kan awm hun a la thleng dâwn a engtin nge kan tih tâk ang? Ka pa ruahmanna siamtîr ka tum ta a, amah Lalmuanpuii hi Aizawl lama transfer dan tur dap ta ila, chuti lo chuan kan tân tihngaihna a awm lo.

Ka pa ko chhovin ka sawipui ta a.

"Mama, amah nen sawi dun ula a lo duh ve chuan hmalâk pawh pawi ka ti lo; mahse, a duh lo ve thei tho a nia, a lehlamah a nau pasal i ni a, kan hnena chên ve reng a duh chiah ka ring lo deuh." A ti ta a.

"Amah kan hrilh dâwn hlei nem ngawirenga kan chêt loh chuan min hnial leh tho ang."

"Eng pawh nise, kan ngaihtuah ṭha dâwn nia, ani kutah lo chuan kan tupa hi kan dah ngam mang si lova.." a ti chuar chuar a.

Ni e, Muanpuii tluka hmangaihtu ka fapa hian a nei dawn lo, Zomuani lamah ka rilru ka sêng hah duh tawh lova ka ngai lo tihna ni lo vin awmzia a awm tawh miau si lova ka fapa hma hun leh hlim taka chhungkua kan awm dial dial theihna hi a pawimawh ber.

"Bawihte, min lo ngai em?" Muanpuii lo lût chuan min melh eih lo hian ka fapa a be nghâl a. A thawmhnaw pawh ala thlâk lo, chîk deuhva ka en phei chuan chau hliah hliah hmêl a pu a, zanah naute hnute siamin vawihnih vawithum thawh a ngai a mutmû a tuah ṭha lo êm a ni.

"Inthlâk phawt la.."

"Lawks aw, rei lo tê kan pawm lawk.." a pheikhawk phelhin uniform nen khumah zuk lâwn leh ringawt a!

"Inthlâk phawt la, chumi hnuah i pawm dawn nia, Thâna rim i nam!"

"Lalfakhlu, ngawi mai mai teh, naktuk aṭang chuan i hna zawm tawh la a ṭha ang.."

"Ka thû thû.."

"I thu thu a nih leh a ṭha a nih chu.." a ngawi hmasa duh ngai lo rêng rêng nia maw le!

"I va han rei em em, i rawn haw hma ve chu leh.."

"Ka thu thu, duh leh ka haw hma ang a, duh leh hma lo ang a.." a ti leh deuh kher a, ka chhâng zui tawh lo. TV ka fit thar ve pawh chu a hmu lo nge eng mah a sawi lêm lo a, a hmuh hun hunah sawi teh se, a phunnâwi êm lo'ng chu.

"Inthlâk ka duh a..."

"Tikhân inthlâk la a nimai alawm.."

"Chhuak ve mai teh," min melh deuh ngar a, ka hre lo der tlat thung.

"Kan room a nia, duh leh ka chhuak ang a duh leh ka mû ang a.."

"A tâwk.." ka sawi zawh hmâ hmaa min lo ṭawng hnanin a kut a phar zauh a, eng nge a tih dâwn pawh ka hre mai mai lo e a.

Chutah a thawmhnaw inbel lai chu muangchâng hian a hlîp ta a, hawisawn ka tum deuh ûk a, ka ṭhulh leh!

A kamis hâklai a phelh a, a âwmbawr kawh lah leh a vun ngo sar te chu a lang chiang kher mai, a bra hâkin a khuh phâk loh a hnute phîr te chu a nalh ru zêk a, min en miah lova ngawirengin a inphelh hmiah hmiah nia!

Ni lo, kei mah zawk ka dik dâwn tlat lo, khuh kharh chung hian Veranda lamah ka inthiar fihlim ta ringawt a, thawmhnaw inbel lova a awm phei chuan a pian dik zia ka hmu chiang lehzual. Tisa chuangtlâi hmuh tur a tam lo khawp mai, a kekawr hâk a la phelh lo mah mah zâwk a; mahse, tukin khân tihpalh thilthu takmeuhvin a hnuai lam ka hmu thuak!

Mipa hrisel ṭha tak ka nihzia a rawn lang mai dawn alawm le. Â Lalmuanpuii nen kher kher hi chuan 'Ramropui' kan thleng nguar ang, ka nupui û a nih bâkah kan in 'chu e kha' lo ve chiang e.

A sawi ang khân ka hna ka zawm hma leh ka tân vek a ni a, a sawi dikin ka hria.

Zomuani thawmhnaw ṭhenkhat kan dahṭha ta a, 'Faka, hetia hmuh reng theiha a awm hian rilru a nuam lo' Muanpuiin a tih vânga dahsawn kan ni. A Pheikhawk leh Make up te pawh store room thianfaiin chutah chuan kan dah lût ta vek a, kan room pawh a thâwl huai mai. Inlêng neuh neuh leh naute rawn en an awm ve nuk a, zawhna a tam mai mai.

"TV dah nachang i lo hria a.." khumah Bawiha hnute pêin a ṭhu âwn diai a, 'Shavdhan India' en a rawt tlat pek.

"A muhil thei lo zâwk zâwk enah ka ti a nih khi.." tiin sofa-ah ka mu zâl a, dik tak chuan khuma mut ve ka châk tawh; mahse, a rem ṭeuhvin ka hre si lova khum ka dah belh mai dawn nge, 'Lalpa min veng rawh' tiin an kiangah ka mu ve zâwk dâwn!?

"Ka en zing zâwk dawn tihna a nih chu, remote control ka inchhawp thei," zuk ti a! Naupang sawi âwm lek a ni.

"Û huh! Ka meng rei zâwk ziah.."

"Fakhlu, daw reng teh suh, nizanah pawh i hnâr zankhua ṭhak.." tiin Bawiha a mut a, remote control TV hmaa ka dah chu a va la nalh a, lukhumah zuk thukru daih a..!

"Ok, tikhân kawl mai rawh.." ka ti ve ta nge nge a.

After 3 hours

Zînglam dar thum a rîk chuan ka zun chhuakin min tiharh a, peih lo zet hian ka tho chhuak a, TV pawh a la in off lo maw le!

Zosangmawia a tâl ṭet ṭet a, ka ngaihsak duh lem lo. 'A ṭah loh chuan ngaihven sek duh lêm suh' ka nu'n a tih vâng pakhat a nia.

Ka zun zawh hnuah uar mangkhengin a rawn ṭap chhuak ta a, Muanpuii zu harh ṭhak lova!

Vawiin lamah a chhuak sia a chau deuh a nih ringin tihharh hlau zet hian Bawiha ka buaipui ta a, a hma ang êm a zei lo chu ka ni tawh bîk lo. Hnutê siamsakin ka pe thlap a, khum kil sêtah Muanpuii a mu a, khumah hian mu ve ta pawh ni ila kan indek pha dâwn teuh lo. Ka fapa kianga dârkar khat lek mut tumin khumah ka lâwn ve ta a, ka rila rah ka fa a ni miau a, amah kuah chunga mut ka châk ve ta deuh a ni e.

##

"Lalfakhlu, eng nge i hriat a!? Muanpuii aw vin ṭhak ri chuan ka muhil tui lai min tiharh a.

"Tho rang rawh, i harh tih ka hria," tiin min sawi leh nawk nawk a, ka men chhuah ruala ka hmuh hmasak ber chu Muanpuii thinrim hmel dur khap a ni!

"Rei lo tê chiah.."

"A teuh lo, a teuh lo lutuk.." ka malpuiah min sik a, ka phu zawk.

"Lalmuanpui, eng nge i hriat a, ka khum a nih hi, ka room a ni bawk.." Ka tum loh deuhvin ka ṭawng chhuak ta.

"A lo ni maw! I khumah chuan mu nilêng rawh; mahse, vawithum ka chhiar a i kut hi i lasawn lo a nih chuan.." a sawi zawh hmaa ka kut dahna ka'n en chuan Muanpuii kâwngah nghet zetin ka lo kuah a, ani pawh ala tho reng reng lo! A âwmah ka lû ka dah vângin min lo sâwi hrep a nih hmel! Rang lutukin ka ṭhu chhuak ta a.

"I khum, i room.." thinrim mitmeng tür khaia min melhin bathroom-ah a lût ta a.

Nuam ka ti chiah lo, ka sawi zo vek tawh bawk si a, bâkah a mah kuah chungin ka ka lo mu lehnghal!

Ka chhûngte'n min rawn hmu hman phei se chuan insawifiah ka ngai nasa ngawt ang. Ni lo, Muanpuii thlengin an hmu nikhualo zo vek dâwn..

Ka fapa muhil lai en vang vang chung hian, 'I nu awm se chuan khatianga ka ṭawng kha a ngai lo tur' tiin ka phun sup a.

Zomuani boral hnu aṭang hian ka thin a chhe zo vek a, eng emaw hlekah ka ṭeu hlur zel bawk!

Muanpuii rawn chhuak leh chuan ngawirenga min kalpelin kan room aṭangin a chhuak ta a, Bawiha vawikhat pawh a rawn en lo chu ka chhungril a na ve det.

Kan pafa chauhvin zîng dar nga velah kan in âwi hliau hliau a, Muanpuii a la rawn lêt ta lo. A walk a nih ka ring ve ringawt a.

Hmeichhe luhlul tak a ni a, ka ṭawngkhum dan a rawn sawi chhuah leh ngat danah khân chuti maia a lungawi ka ring miah lo...

Rilru nuam lo zetin khumah bawk ka mu leh ta a...

B<++++[BeckirafARenthleI]++++>RR

SEGUNDO

Becky Rafa Renthlei

Chapter-21

Lalmuanpuii

Ka âwm zâwna min delhtu awm ang tlata ka hriat avangin ka harh hlawl a, a lum nasa mai sia ê, keimaha mu lum ṭha hleithei lo kha tukin hi engvanga thlan hluam nge maw ka ni lê!?

Mit ka men ruala ka hmuh hmasak ber chu Fakhlua lû a ni. Ka hnute zâwn a biangin a lo sîktîr thlap a, 'Chung Pathian' tia phun sapin nemsawn ka tum a, a che eih lo nia! Chu mai a la ni cheu! Ka kâwngah nghet fahran hian a kuah a, ka lungphû a dik lo nghâl vekin ka hria!

"Hey.." theihpatâwpa sâwi harh ka tum pawhin harh chu sawi loh a che map lo hrim hrim.

Ka nau nen kan inan êm avangin min hai a nih ka ring deuh a; mahse, chupawh thil nithei a ni lo. A chhan chu tûnlai a awm dan leh min melh dan hian ka ngaih a ti ṭha hlawl lo. Min ngaizâwng ka tihna ni lovin min haw lutuk hmêl a put reng vang a ni.

A mize zâwi ruih leh ti deuh fek fek ṭhin hi ka ngainat zâwng a ni lova amah a palen bâkah hmeichhe duhthusâma hlawh nei leh 'pa' deuh hrâk kan tih ang chi kha a nia, dik tak chuan nelawm deuh phei se chuan ka nau aiawhtu tur a hmu leh vatin ka ring. Hetiang zawnga ka ngaihtuah a piang lah hian ka na ru ziah leh nghal!

"Hei hi ka room a ni a, ka khum a ni bawk." Lalfakhlua min ṭawngkhum dan kha paidam harsa ka ti.

Ka hnâ ṭhulh ṭhakin a fapa buaipuiin hun ka khawhral a, ka nau fâ a ni tehmeuh mai; mahse, hetianga min tih fak fak chuan Lalmuanpuii thin tertek hi a chhuak lovang tih tu nge sawi thei! A ve mai mai chuan.. ka ngaizâwng der hrep dáwn em maw ni.

Thui fê ka 'walk' hnuah in lam panin ka haw leh ta a, tukin chu runluih ve hrim hrim teh ang. Bawiha ka duat loh vang a ni lova a pa hian ka ṭangkaizia hre ve rawh se.

"Khaw'nge i kal a?" Inchhung a ka luh rualin Faka nu'n min lo zâwt a.

"A, ka tei chhuak ve mai mai exer lâk pahin.."

"Mama'n vawihnih a rawn lam tawh che a, i kalna chin kan hre si lo va," a ti leh mai a.

"Eng atân nge min koh le, ka han en chhin ang e.." tih pahin inchung room panin ka tlân chho nghal a, zinglam dar riat a ri ṭêp.

Lalfakhlua'n a fapa a lo bual a nih chu, boxer leh tawnzau chiah a inbel a, ṭhutphah hniamah ṭhuin an awmna lai zawng zawng deuhthaw a huh pûr bawk a, ka ngaih dan a ni lo nasâ, tunah bual hun pawh a ni lo hrim hrim.

Ka thâwm a hria nge a rawn dâk chhuak a, min nuih suk nia!

"I awm loh hunah ka tih vek tur a nih hmel sia practical-in ka lo zir.." tiin Zosangmawi ngawi kar chu chhaihin, "Â nu thin kan tirima tukin chu ka bual che a ngaih phah," zuk ti kher a.

"In inbuaipui theih tho chuan zanin chu Mafeli te inah ka va riak teh ang," ka tih chuan rang fahran hian, "A ang lo lutuk, nizanah ka lo mu miah lo a nia, ka ring a kham deuh bawk nen tukinah ka rawn mu ve chauh alâwm," tiin a insawifiah ta a.

"Kha lam kha ka buaina a ni lo, i sawi angin ka tel lova in awm a ngaih hun a la thleng dâwn, chumi huna inbuai loh nân zanin chu ka'n inla thawveng ang e, vawiin pawh 'Vishal' ah thil leia chhuah ka ngai," ka deuh hmak a.

"Ka hruai ang che, ka enkawlna hnuaiah i awm tih ka sawi tawh khân ka hria," Bawiha puana tuamin ka hnial hman hma chuan min rawn pe zui hmiah a, 'Ka pawm hman lo' tih chi ninghal lo chuan!

Chuta ṭang chuan Fakhlua'n min tîr char char a, a nu hnenah Bawiha lo awmpui tur leh pindan singsak kan duh tih a sawi a, an nupa pindan hmanni lawka kan tihfel chu kan khawih zawm leh ta a, Zomuani thawmhnaw kan dah ṭhat bâng zawng leh a thil hrim hrim pakhat mah hmuh tur awm lovin room hranah a dah fai vek a, a wardrobe-a kamis leh a thawmhnawho zawng zawng pawh ka nau wardrobe-ah a sawn vek bawk si a, a nuam viau lo.

"I thawmhnaw leh i uniform te kha ka wardrobe-ah sâwn dah rawh," a ti hmuk a.

"Eng vângin?"

"Ka sawi ang chuan ti mai rawh, i pa thusawi tâwp ber kha kei chuan tihhlawhtlin ka tum a nia, sawi nawn kher ngai suh se," a ti leh hmiah.

Ka chêt chhuah lawk loh avangin ama'n ka thawmhnaw zawng zawng a sawn leh vek a, under wear leh bra chenin drawer-ah min dah luh sak vek bawk a, eng nge maw a hriat thut ni!?

"Ka inbual chhungin chaw lo zuk ei la, ka ei dawn lo a nia, chuan chhuak turin insiam ang che," ka hmuh lai rengin a boxer inbel lai a pawtphelh a lehlam ka hawi daih.

Bathroom-a a luh hnuah pawh khumah ka la ṭhu reng a nitin a mize inthlâk thar ziah hi a chhan pawh ka hre mai mai lo e a.

"Muanpui, chaw ei kan peih a nia.." Faka nu'n min lo koh chuan muangchângin inhnuai lamah ka chhukthla ve ta a, he inah hian thlakhat aia tam ka chêng tawh a, min duatin min ngaihsak em em a; mahse, an fapa nungchang inthlâk thut thut avang hian ka awm a nuam lo tulh tulh thung si.

"Vawiina inchhuah dawn chuan Siami nen Bawiha kan lo awm dawn nia, lo ngaihtuah reng reng suh u," nu berin a ti a, Fakhlua hian a lo hrilh lâwk nge ka hriat bîk si loh.

"Chhuah pawh ka lo tum chiah hleinem.."

"Muanpui, i inthlahrung a nih kha, i in ang chiahin ngai la, nikhat na nâ na chu kan lo inbuaipui thei lutuk tlat!" Pa Rosanga'n a lo tih ve lehzel avangin ka ngawi ta rauh rauh a.

Fakhlua a rawn chhukthla ve tawh a, shirt dum leh Jeans dum a taksa rem zaih inbelin a sam pawh a siam uluk hlê tih a hriat mai! Matei boral hnu aṭang hian a intuai mâm ṭha lo hlê a, tukin thleng kha chuan a hmuihmul leh khabe hmul pawh a la zuah kha a nia tunah erawh chuan a inmêt fai vang a, ka hmu hmelṭha riau pek nia!

"Muanpui, insiam rawh le.." min en chuang miah lo hian a fapa a buaipui zui daih a, a nu leh pa awm laia inhnial ka duh loh avangin ngawireng hian inchungah ka chho ta zâwk a.

Thawmhnaw dum lam a inbel tak khaw maw le, shirt hring duk leh jeans dum ka inbel tawp a, ka hmai ka chei laiin room-ah Bawiha a rawn pawm lût a, "I mamawh lei tur ziak chhuak rawh aw.." a ti sup a.

"Chutianga ziah chhuah tham em em lei tur ka nei lo.." ka ti hmak a.

"Bawiha hian Nestogen a nei tam tawh lova a mamawh tur ang kha han en zuai zuai teh," Hus! Lalfakhlua hian min nupui cheibawl ringawt nia maw le!

"Bawiha hi kan hruai ve dâwn em ni?" A tih chuan, "Awihawm loh lutuk, hruai chi a nia mi?" Ka duh aiin ka vîn mah mah.

"Lalmuanpui thinawrh, 'Hruai lovang' ti ṭha ve mai ta che," tiin min melh kâwk a, rum zeta melh lêt bâk tihtheih ka nei lo.

"Bawiha, fel deuhvin âpi te bulah lo awm rawh aw," tiin a fapa a be ve ngei!

Chhuak tura ka inpeih vek hnuah ka purse la tura ka ding chhuak chiah chu, "I kekawr hâk kha thlâk leh rawh, a tight lutuk," Fakhlua'n a ti chhuak sup a, "Enteh, min sawisel reng lo khan kal vat zâwk ang," ka tih chuan a dinna ngaiah a ding ngur nia!

"Khatiang inbel chunga chhuah tum reng reng.."

"Min kalpui duh loh leh a hran ve vein kal ila a nimai," ka ti ve hmak a.

"Ka sawi chu zâwm mai rawh, nge, keima'n ka thlâksak dâwn che," tiin ka lamah a rawn phei a, min khawih dawn emaw tia ka lo tawlhsawn chuan a nui hawk a, ka wardrobe hawngin kekawr a va zawng nia maw le. Nghal ve asin.

"Kha, hei hi ha rawh," tih pahin cotton jeans dum tho a rawn theh phei a, ka la che châng duh chuang lo.

"A ṭha e, i kekawr kha ka phelh hreh miah lo a nia, ka nupui unaunuin thawmhnaw zahpuiawm a inbel ai chuan ka thlâksak mai ang," khum bulah rawn pheiin zahzêla Bawiha ka pawm chu khumah a rawn mut a, "I inbel dawn nge kei..." sawi zawm duh lo hian min melh a, a hmêl tûm hmak leh a mitmeng thîp râm chu ka en rei duh lo.

"A nih chuan Bawiha hi pawm la inhnuaiah lo zuk chhukpui rawh ka lo inthlâk ang," ka ti ve ta nge nge a.

An chhuahfel vek hnuah muangchângin ka kekawr ka thlâk ve ta chauh a, Lalfakhlua hi mipa satliah emaw ka lo ti ṭhin a, nitina han chêndun tâkah chuan mipaah pawh 'Pa' tak a ni tih ka hrechiang tulh tulh! Palzam mai mai theih loh tura mipa induhtâwk a ni.

##

Bawngkawn ATM bulah car a tiding a, pawisa eng emaw zât a la chhuak ta a, ka malchungah rawn theh thlain, "Bawiha nen in mamawh lei nân hmang ang che u.." a ti sup a.

"Ka nei ve bawk," ka tih chuan nelawm loh zeta min melh chung hian, "I nei emaw nei lo emaw kan ina i chên chhung hian i mamawh ka tum ang, min hnial tawh suh," a sawi zawh rualin chak fê hian a tlânchhuak nghal a, a pawisa min pêk pawh chu a ngaihven tawh lo hrim hrim!

Vishal-ah kan pahnihin kan teikual dun ta a, Bawiha thil tur kan lei tam ber a, kei pawhin eng eng emaw ka lei ve nual, Thermo flash pahnih ka lei chu eng atan nge tih min zâwt a, 'Bawiha kan lênchhuahpui hunah kan mamawh ang' ka tih chuan nui suk chung hian 'Puakpuan lei tel law law ila' a ti ta a.

Kan duhzawng kan leikim thawkhat tawh a, kan hâw mai dâwn emaw la tih laiin Mc-ah min tlangpui leh ta a, "I kekawr tur en ang' a ti leh ta tlat a.

"Thawmhnaw lei ka ngai lo, nitin form ka inbel a, ka mamawh tam hleinem," tiin ka hnial ve ṭâng ṭâng a, engah teh vak a ngai lo nge Mc-ah min luh chhohpui ta tho tho va, darkâr khat dâwn hnuah bâwr zetin Mc kan chhuahsan ve thei ṭâwk.

Kekawr pahnih leh kawrlum pakhat min leisak a, "I kekawr tur pakhat tal ka thlansak ve ang che' ka tih chuan min hnial miah lo, Levis jeans pawduk leh Jockey boxer pahnih ka thlan sak a, aman erawh a mahin a pe thung.

Restaurant-ah min chawlhpui a tum ngial nâa ka duh ta lo.

Ka phone a rik chuan rangzetin ka pick a, "U Muanpui, Bawiha a ṭap bâng thei lo in lo haw dâwn tawh em?" Siamin min lo biak chuan Fakhlua ka hrilh chhâwng ve leh a, a hmanhmawh khawp mai.

In kan thlenin kan thil lei pawh Faka lo buaipui tura hrilhin inchungah ka tlânchho nghâl a, a lo la ṭap nia maw le! "Khawi, ka lo pawm ang," tih leh Siami kut aṭanga lâk ka rual a, "Hnute pawh ka pe reng a, a ṭap bâng thei lo reng reng," inthiam loh hmêl taka a tih chuan ka chhâng lem lo. Naupang dang ang a ni lova dik tak chuan ka ngaihtuah êm a ni.

Rei ngial ka awih hnuah a bâng ve ṭâwk a, a lâi a thlawn tawh a a dam fel vek tawh bawk. Ka thawmhnaw pawh thlâk lovin ka hmalamah ka awrh a, tûn hi kan vawikhat awrh ve na a nia, nidangah chuan kan pawm mai zel.

"Muanpui, inthlâk la ka lo chhâwk ang che," Faka rawn luh lai pawhin chhuatah ka lo la vei ngat ngat a, "A muhil ṭêp," tih chiahin ka chhâng a, Bawiha vâng hian Lawngtlaia hâw ka hreh phah vek.

Zanriah ei hun thleng zakin ka paw ta a, Fakhlua'n ka chaw tur a rawn dah a, min duat thar ta riau! Nelawm lutukin awm hran lo mah se kan inkâr a ziaawm deuh chuan ka hria.

"Mr Fakhlu, ka rawn lût ve ringawt," zan dâr sarih a ri tawh a, tûn ang huna hmeichhe pakhat lokal chu mak ka ti ang reng.

"Ehe! Thlamuani tehtlat chu!" Fakhlua zawkin a lo chhâwn vat a, hmeichhe tê lam deuh leh hmelṭha vang mai a ni a, a thawmhnaw inbel duh dan a ṭang pawhin an rethei zawk zawk lovang tih ka rin hriat mai.

"I pa in inchungah chho mai rawh a tia ka lo chho ta ngawt a nih hi.." tiin chîk zet hian min en a, ka ei lo nghâl ringawt!

"A pawi chuang hleinem eng nge ni teh tlat!?"

"Office i kal ngai si lova nimin khân in chhiat tawh thu ka lo hre ve chiah a.." tiin pindan chhung a melhkual a, "A pawi la ti lutuk, i fapa chu en ve i phal em?" Tiin Bawiha en tumin min rawn pan a, 'zân zâna naute en tum' ka awih chiah lo.

"En rawh, en rawh, Muanpui, Thlamuani a nih hi, kan company car thar ber latu a nia," Fakhlua'n a tih chuan ka rin dan a dik tih ka hre mai.

Awm ve reng nuam ka tih loh avângin chhuanlam siam chungin ka chhuahsan ta a, Bawiha pawh ka la paw ta zêl a, ka nau boralna thlathum êm pawh a la tlin hmain hmeichhe inlêng a nei nghâl a nia, ngaihtuahawm deuh ve.

Inhnuaiah rei fê ka awm tawh a, Bawiha muhil pawh a rawn harh leh tawh a, a zun avangin a thlâkna tur puan inchungah a awm daih si a, hreh zet chungin ka chho leh ta nge nge a.

Room kawngkhar a lo in khar ṭhap a, nichin khân ka khâr miah lo. Kik lem lovin ka lût tlang hmiah a, Fakhlua leh Thlamuani inhnaih fê a lo ṭhu dun ka hmuh chuan ka ner sak a, ka hmu lo der zui hmiah.

"Muanpui, i duh chuan mutpui tawh rawh, inhnuaiah kan chhuk dâwn chiah," Fakhlua'n min be vat a, 'I thû lo' tia chhân ka châk zek zek. Mahse thil mawi a nih loh avangin ka insûm ta zawk a.

Thlamuani a ṭawng zat zat a, "Innu û chu a zuan a zân hmel khawp mai" a tih chuan ka va melh zawk a, min lo en ve chiah bawk. Ka hresual a nih loh chuan min ei vak hmel bîk loh!

An pahniha min chhuahsan laiin Bawiha hnute ka pe a, dik tak chuan ka chhungril hi engtin emaw tak zu awm tlat a!

Fakhlua hian ngaihzawng a nei a nih chuan kei hi ka na dâwn chiang! A chhan sawi fak tur ka hre chiah lo nâin ka thinlung erawh ka thunun a ngai ṭan tih ka hria.

Mipa, ngaihzawng tia sawi tham ka nei lo a, ka nunah ka hna leh ka chhungkua aia pawimawh ka dah ngai hek lo. Fakhlua hi ka duh tihna a ni lova mahse, zanina hmeichhe lokal nen khân an inhnimhnai a nih vaih chuan Bawiha hi ka la khawp ang, a ṭûl a nih leh ka hnâ aṭanga pension ka dîl mai ang.

A chhan chu nuhrawn hrawn tir ka tum lo bur. Tunah nupui a nei dawn tihna a ni lova; mahse, nupui a neih hun hun chu Bawiha ka lâk hun a ni mai.

Lungawi chiah lo chung hian mu turin ka insiam ve ta a.

B<++++[BeckirafARenthleI]++++>RR

SEGUNDO

Becky Rafa Renthlei

Chapter-22

Lalfakhlua

Ka nupui thih cham thla hnihna a lo thleng ve ta reng mai! 'Ka lung a lêng lo' ka tih chuan dâwt ka sawi tihna. Zomuani ka ngai takzet a; Zosangmawia min hnutchhiah tal a ka khawhar pawh a ziaawm ta deuh.

Ka rin loh deuhvin Vanlalthlamuanpuiin min ngaihsak khu chûk a, ngaihzawng neih tumna rilru ka pu lo mai ni lo vin ka ngaihsak eih lo; mahse, ka nun ruak lutuk hnawhkhattu tur ka mamawh si.

Ka hna ka ṭan tawh a, workshop-a ka kal hmasak ber ni khân awm ngaihna rêng rêng ka hre lo khâ a nia, Zomuani hlimthlâin min hualvel a ni ber mai; mahse, hun kal tawh siam ṭhat theih si lova intih hrehawm ai chuan ka tûn hun hi a pawimawh ber tih ka hrethiam ve tawh.

Hyundai company-in ₹20000 in Zomuani an rawn râl a, a hnâ khâ a nghet lo a nih vangin zângna dawmna nipah fâwmin car thar 30% discount min pe a, Muanpuii puala lâk ka rilrûk deuh. Ani hian car a neih loh bâkah an office Gypsy a kawl kha a nia a rem teh ṭeuh lo khawp mai.

"Muanpui, sum khâwlsa i nei em?" Hreh ru takin ka zâwt ta tawp a.

"Eng atân?"

"I nau pualin car offer kan dawng a, 30%discount a nia i duh em?" Ka tih chuan a ngawi ta rauh rauh a, rei fê hnuah, "Eng car nge, engzat nge sum fai ngai ang?"

"Grand i10 a ni a, nuai hnih leh singnga vêl i tum theih chuan a bâk ka ngaihtuah pui ang che." Ka ti ta a.

Nuai nga aṭanga inṭan a ni a, discount a nih vângin chu ai chuan a la tlâwm thei fê dâwn a, ka ît pui ve deuh a ni.

"Loan la lo chuan ka thei lovang," a ti a.

"Ok, lo buaipui rawh aw, kan company lamah ka lo report dâwn nia."

Nitin office kalin ka chhuak ziah a, a chângin kan bâng hmâa a chang chuan zan dar sarih kan thlen châng pawh a awm tho mai.

Muanpuii chawlh lâk a zo ṭêp tawh a, kârthum vêl bâk kan hnena awmna hun a nei tawh lo, a awm loh hun tur ka huphurh êm avangin police-a an hotu ka hmelhriat chu kan dinhmun te hrilhin Muanpuii transfer ka dil sak ta a, he thil hi keima thû a ti ka ni. Ka nu leh pa takngial pawh ka hrilh lova Muanpuii bulah a thâwi pawhin ka sawi ri hek lo.

Ka rilru a dik lo nge pawh ka hre bîk lo, Muanpuii te nufa muhil lâi ka hmuh hian engtin emaw ka chhungril hi kim ta riauva hriatna ka nei a, dik tak chuan a mize ngêng tak phênah hian 'nû riau' a awm tlat lawi si. Zomuani û a nih vâng hian nau ena en ka tum deuh ṭhîn kha a nia, a dik thei tlat lo!

Zantin ka hmuh phâkah a mu ziah a, a taksa a enkawl dan engkim hmutu ka ni a, Zomuani neih ve loh 'Bîk' nihna a ngah mai. Vawikhat mah nau a la enkawl ngai miah lova; mahse, ka fapa a enkawl danah sawinâwi tur ka hre hauh lo.

Tunah pawh zân dâr sawm a ri tawh a, anni nufa chu an muhil leh diam tawh a, kei mah ber hian mut ka harsat tlat hi ka manganna a ni.

Muanpuiin thâwm a rawn nei a, ka en tih a hriat ka duh loh avângin ka muhil der hmiah. Ka mutna sofa aṭang hian ka hmu pha vek a, rawn ṭhu chhuakin a mutkawr a hlîp a, min rawn en lo hrim hrim!

Chutah a kekawr hâklai a hlip leh ta zêl si a, a tho â nge mak ka tiru viau!

"Eng ati nge ka thak sep sep le?" A phun sap ri ka hriat chuan rang lutukin ka ṭhu chhuak a, "Muanpui, buaina i nei em ni?" A hmêl ka'n en chiang chu a lo vual tût a, a bân leh a malpui te pawh a vual nasa kher mai!

"Faka min lo en suh," inkhuh leh tumin puan a ban a, "Bawiha khân a kai ve ang e, lo chhuk teh.." tih pahin a mutna lam ka pan nghal a.

"Hey, min en suh ka tih chu.."

"Enteh Muanpui, khatiang eng atân mah ka ti lo, eng ati nge i va vual nasa em em ve?"

"Ka hre bîk lo, ka inbual dâwn.." ti hmakin khum aṭang chuan a rawn chhuk a, zak hmêl a pu bîk tawh lo, zahna hun pawh va ni suh.

"Ka thak nasa lutuka ka khua a sik dâwn takngialin ka hria," a bengkâwm vel a sen hlar bawk a, ka ngaihtuah ve deuh.

"Inbual rawh i mutna ka lo check dâwn nia," a taksa lang huai pawh pawisa zo tawh lo hian bathroom-ah a tlân lût a ni hrim mai.

Bawiha dimtê-in sofa-ah ka sawn a, kan khum ka check ta a, phêngphehlep râwp pakhat a lo awm chu niin! Bawiha'n a kâi lo hlauh chu a tihzia hlê mai.

Muanpuii a lo chhuak har phian a, ka mut a chhuak ve deuh bawk nen ka fapa kuah chungin ka lo muhil daih nia.

Ka harh leh chuan pangti lum ham ham ka hre hmasaber a, ka mumang zâwk nge? Min kuah chunga Muanpuii muhil thaw sâk sâk ka hmuh chuan ka mengphar nasâ! Ka harh chiang ngei mai.

Hmânni lawkah tihpalh thilthû takmeuhvin a bulah ka mu a, eng emaw chen min biak duh loh phah nân a hmang a, tûnah lêm min kuah chial chungin a mu leh lawi si a, a ngaihna ka hre ta lo!

Ngawireng leh tihharh hlau zetin a muhil hmêl chu ka thlîr ta vang vang a. A nihna dik takah chuan kâi tho nghâl tur ka ni a, tûna kan mut dan hi thil mawi tak zawng a ni lo chiang a lâwm; mahse, eng ati teh reng nge ni min kuah chunga a mut hian nuam ka ti riau pek nia!

Bawiha tui takin a muhil a, hetia kan pathuma kan mut hian a kim chiah. Ni lo, ka thil ngaihtuah dan a dik lo, Muanpuii hi ka ngaizâwng tur a ni lo bur. Ka chhungrilin a dik lo tih a hria a, ka taksa erawh a che chuang map lo nia!

A hmêl faisar leh a sam te, a hnâr ngûl tê fel rân leh a vun ngo zet te chu ka enkual dan dan a, kum 26 a tling tawh a, Zomuani aiin a lo hmelṭha zâwk tak tak a nih hi, phir anni nâa nitin an inan lohna ka hmu tam telh telh! Hmêlah pawh inang viau angin lang mah se Muanpuii hmêl a fiahfai daih zâwk.

"Ka lû a na lutuk.." a rawn phun chhuak leh sap a. Ka muhil der dâwn nge, awm dan tur pawh ka hriat si loh.

"Faka, ka lû a nâ.." a kiangah ka mû tih a hre vek! Muhil der lovin min kuahna a bân chu ka dah sawn sak a, "Muanpui, i harh em?" Meng sen râm chunga min melhin, "Ka harhna a rei tawh," Zuk ti thên a.

"Damdawi min lo ngaihven sak teh, ka lû hi a puakkeh dâwnin ka hria," a sawi zo hman chiah ka fapa a rawn ṭê ve nghal a, a tû zâwk nge ka ngaihven hmasak dâwn.

"Bawiha kha ngaihven hmasa rawh," ka ngaihtuahna hria ang hrima tiin ṭhutchhuah a tum ngawt a, a ner sak! Ani hi zân a mu ṭha mang si lova a dam lo ang tih ka hlau zek zek.

Ka fapa zun huh thlâkin hnute ka pe leh tê tê a, khua pawh a la vâr awzâwng lo!

Muanpuii damdawi eitur zawngin inhnuaiah ka chhukthla ta a, kan room-ah eng damdawi mah kan kawl loh vâng a nia.

Paracetamol nen kan room-a ka chhoh leh chuan an nufain an lo inpawm a.

"Kha, hei hi ei rawh a zia mai ang,"

"Ka khua a sik deuh tak takin ka hria," tiin ka damdawi pêk chu a hmawm nghal a, han tih vak dan pawh ka hre lo.

"Muthilh tum leh lâ a la hma asin," ka tih chuan, "Muhil zâwk rawh, kan bulah i mu leh dâwn em?" A ti ta a.

"Ka mut nge i duh mut loh?"

"Faka, sual viau suh.." tiin hnuai lam a bih daih a, a zak tih ka hre mai.

"Nizan ka inbual zo khâ vawt ka ti lutuka ka rawn kuah che a nih kha.." a tih chuan ka nui chhuak ṭêp. Lalmuanpuiin insawifiah a'n tum ve ngei a nia.

"I duh chuan min kuah leh thei ang, eng mah pawi a awm hlei nem," ka sawi zawh rualin keima'n ka kuah ta a, min hnial ka rin teh reng nen engtin mah min ti lo!

A sawi ang deuh tak takin a khua a sik tih ka hre mai. Tihdan vak ka hriat loh avangin puan ka sinbelh tir a, ka taksa si chêtin ka kuah ta a.

Zomuani unaunu a nih vânga ka hnaih theih loh nachhan tur ka hre lo, a lakah rilru sual ka pû lo ang chiahin a ni pawhin a pu bîk lo tawp ang.

A muthilh hnu thlengin ka kuah ta a, kei hian ka duh ṭan a ni mai lo maw! Nge, a nau nen an inan vâng hian ka ngaina zâwk.

Engtik laiin nge ka muthilh pawh ka hre bik lo, ka harh leh chuan Muanpuiin Bawiha a lo bual mêk a, an thâwm pawh ka hre lo hrim hrim!

Zanin tlaiah hian workshop lamin Ui talhin chaw an eikhâwm dâwn a, kei pawh chaw ei ve turin min rawn sâwm a; Muanpuii eng mah ka hrilh lêm lo.

Ka nu'n 'Ei lo mai rawh' a tih deuh avâng khân ei ka tum chiah lo a, bâkah hetiang huau huau lamah hian ka la tel peih tehchiam lo.

After 7 hours.

Lalmuanpuii

Bawiha nen khumah kan mu a, zân dâr riat a ri chiah. Lalfakhlua a lo la haw miah lova workshop-ah chaw an ei dâwn tih a nu a rawn hrilh kha a chanchin ka hriat hnuhnun ber a ni mai.

Nizan a kianga ka mu ve ringawt kha ka la inthiam thei lo. Mahse, a taksa lum ham ham leh a mipa rim faisar khâ ka hnârah zuk châm reng a!

Ka nau pasal a ni a, ka tih loh tawp tur ka ti a ni. Nitin inhmu leh room khata riak tlâng kan ni a, min ngaihven hûrh lo mah se a hmâa min en ang ngawt kha chuan min en tawh bik lo tih ka hre ve kar. A lakah rilrû pêk tumna ka nei lova; mahse, a kiangah ka chêng reng a nih chuan ka la duh dâwnin ka hre tlat! A chhan chu ngaihzawnawm taka awm dan a thiam ru tlat.

Ka whatsapp tone a rík chuan ka en duh lawk lova tunlai chu phone pawh ka khawih ṭha hman meuh lo chu a ni e.

Fakhlua missed call ka hmuh chuan ka call back ve nghâl vat a, a fapa a ngaihtuah zia ka hria a, chanchin min rawn zawh a tum a ni mahna.

"Hello..!"

Hmeichhe âw ka hriat chuan ka off teuh kher mai; mahse, ka ti ve ta sa sa an thawhpuite pawh a lo ni ve mai thei a.

"Faka ka lo be lawk dâwn em ni ang?"

"Nichina lo call tu kha keimah zawk ka nia, Thlamuani.." a rawn ti ta a.

"Eng nge ni ta, khaw'nge Faka?" Ka tih chuan ngeiawm zet hian a nui hak a.

"A in hnem deuh hlek a, lo hâw chi a ni lova a office-ah kan awm,"

"Maw!"

"Ka sawi ang khâ a nimai, a nu leh pa hnenah hrilh dan i lo thiam mai dawn nia," a ti leh kher a. Ka sa ve phat.

"Kei min lo call lo hian a nu leh pa be rawh, a phone-ah khân an number a awm a lâwm.." ka ti ve hmiah.

"Ok, ka lo hrilh dâwn nia ngaihtuah lutuk suh ka awm a lâwm.." tiin phone a dah zui hmak nia!

Ve khanglânga, Thlamuani hi ka rinzâwng a ni miah lo. Lalfakhlua teh reng pawh zû in kher a ngai em maw ni.

Ka chhungril ti deuh phat chu thunun tumin thâwk ka la halh a, nikhua lo lutuk! Tunah dâr sawm a pêl awrh chauhva ka zuk hruai dâwn nge, khanu kutah khân ka awmtir dâwn?

Bawiha muhil lai melh zauhvin, 'I pa hi a nikhua lo viau a nih chuan ka hnenah i awm ang' ka ti ta sap a..

B<++++[BeckirafARenthleI]++++>RR

SEGUNDO

Becky Rafa Renthlei

Chapter-23

Lalmuanpuii

Zan dâr sawm a ri dâwn tawh a ka ngaih a ṭha thei tlat lo nia! Thlamuani khân pawisak a neih loh hmel nasa mai si a, Fakhlua mualpho êrh te hian a lo awm ang tih ka hlau ru viau.

Inhnuaiah ka chhukthla vat a, a nu leh pa an lo mu tawh a Siami'n TV a lo en thung.

"Siam, Bawiha lo awmpui rawh aw, Faka ka zu hruai lawk ang e," ka tih chuan a ngaihna hriat loh hmel deuhvin min en hâ a, "A pate hriat ka duh chiah lova lo hâw thuai ka tum dawn nia," ti lehin kan room-ah ka chhohpui dâwr dâwr a, thiltih dan engkim a thiam vek a, bâkah Bawiha pawh a zun leh hnutê a hnêk bâk buaipui ngai lutuk a ni tawh lêm lo bawk nen a harh leh hmâa thlen hman ka inring deuh.

Chumi hnu chuan pa Rosanga car la chhuakin Fakhlua office lam panin chak mangkheng hian ka tlân chhuak ta a. Traffic jam-a awm tawh lova Bawngkawn ka thleng hma fia fia khawp mai.

Dik tak chuan nupui ṭhen hlim a ni a, a lung a lêngin hrehawm a ti ang tih pawh ka hria; mahse, rûi nâwia hmeichhe awmpui kher khâ tûn dinhmunah chuan a mualpho thlâk ka ti ve deuh a tin ni! Thinrim ru ṭûnin an office step-ah ka chho ta a.

Vâi pahnih duty hnenah Faka office awmna ka zâwt a, mak tih hmel taka min en chu hai derin Faka room lam ka pan ta a. Ka thiltih dan hi a ṭha ber em ka hre lo nâ a; mahse, hetia ka tih mai loh chuan Zomuani boralna a la rei lo bawk nen sawi sep sep a kâi hma lutuk ang.

Hmeichhe nui har har ri ka hre pha tawh a, kawngkhar kik buai lova pawt hawng rawpin ka pên lût hmiah.

Office zau hek hawka sofa inhûngah Fakhlua a lo mu a, a ke lamah Thlamuani a ṭhu thung! Min hmu thut chu mak a ti deuh nge, a meng buai nak nia.

"I lokal ka ring pha miah lo.." a ti sap a.

"I ring sual tihna a nih chu.." Fakhlua a meng miah lova nichinah Thlamuani nui ri ka hre bawk si a ka bo deuh.

''I nau pasal hi mahni in zât tur hre lo khawp a nih ka lo ring miah lo va.." tiin Faka ke a zût deuh kher a, a pheikhawk pawh a lo phelhsak diam a, a chezia ngeiawm ru zet hian ka police rilru a chawk tho lek lek.

Thlamuani pawh chhâng tawh lo hian Fakhlua a lû-ah sâwiin, 'Tho rawh, hâw ang' a rûm ṭuah ṭuah ringawt a, "Muanpui, ka kiangah riak se eng nge a pawi viau em ni? Nupui nei lâi pawh nihlei lo, i inrawlh tam mah mah lo maw..!?"

"Ka hruai hâw leh hâw loh turah lo buai suh, tûn ang hun a mipa zu rûi kianga i la awm danah hmeichhe.." ka sawi zawh hmâin Fakhlua a rawn meng chhuak a, rum zeta min melh pah hian, "Hetah eng nge i tih?" A ti nghut nia!

"Ka rawn hruai dâwn che.."

"Faka, innu û hian a ngaihtuah deuh che a ni ang, helai thleng thlengin a rawn zawng che a nia," Thlamuani lo ṭawng ve zawt zawt chu police tiang mûma hlap er ka châk kher mai.

"Muanpui, min hawsan rawh.." Faka ṭawng chu ka hresual emaw ka ti hial!

"Zawn ngai khawpa mipa nêp ka ni lo, ka duh hunah ka lo hâw mai ang," tia a ṭawng leh chuan ka thin a rim kher mai; mahse, hmeichhe ri hluai mi ka ni lova ngawi reng hian a pindan ka chhuahsan ta a. Ka zak tih piahlamah ka zak.

Thlamuani hmêla min nuihsawhna lo lang kha paidam harsa ka ti, Lalfakhlua chu a duh dan danin awm teh se, ka mualpho dâwn pawh nihlei lo. Hus! A nupui thihna a la rei loh nen hmeichhe dang a melh leh nghal a nia, zahpuiawm lutuk.

In ka thlenin zân dâr sawmpakhat a pêl tawh a, ka thin ala rim ru ṭûn thei maw le. Bawiha pawh Siamin hnute a lo pe a, "U Faka chu khaw'nge?

"Ka lo hawsan, a duh duhin awm rawh se," ka ti nghat a.

"A la rui viau em ni a?"

"Rui ê maw le, hmanzana hmeichhe lokal nen khân an lo awm a, kan inbakkaih lo chauh!" Ka tih chuan, "Ngaihven duh tawh miah suh, a fapa i enkawlsaka lâwm nachang hre si lo, tunah zû in hun pawh a ni lo," ka thlavang hauh zeta Siami a ṭawng chuan ka lung a chhe lek lek.

Lungawi loh châng nei ve pawh ni ila khawiah mah thlenna tur ka nei si lo.

Zosangmawia hi fahrah dinhmunah a ding ta mai chu a ni si a, Zomuani kha 'pasal lo neihtîr lêk loh tur' tihte'n ka ngaihtuah a; eng mah awmzia a nei tawh hek lo.

Zankhuain chhînkhat tê mah ka chhing lova khawvar dâwn hnaih a Lalfakhlua lo haw lai pawhin ka la meng kar! Mahse, ka muhil der tlat thung.

Dimtê hian a rawn lût ṭhâm ṭhâm a, rui chhe lutuk hmêl a pu miah lo! Bawiha a rawn bih dûk dûk lâite chuan thâwk pawh ka thaw ṭha ngam lo va, he mihring ka huat dan hi namai lo tak a ni. Ka rual khân haw ve mai se ṭha tur a nia, khatiang hmeichhe bula min ti thangtlâwm lo khân..

A inbual phar phar ri te pawh ka ngaithla reng a, ka nau thihna leh Bawiha vang liau liauvin thlathum tâl tawp chawlh ka lâk phah a nia, ka thinrimna hi chuti mai mai a bengdaih ka tum awzâwng lo.

Bathroom aṭanga a rawn chhuah chuan khumah lo mut zuk tum ringawt a! A ve lutuk a! Lalfakhlua hi a rawn mu dâwn a nih chuan Lalmuanpuii ka tho thung ang.

A kil lamah a rawn mu fel ât a, kei rang zet hian ka ṭhu chhuak vat a, "Ka rawn tiharh che em ni?" A ṭawng zawi sup chu ka hre lo der hmiah.

"Muanpui, i thin a rim chuan min hau hrep mai rawh.." tiin khum ka thawhsan tur chu ka bânah min chelh ta a.

"Fakhlu, i kut hi lasawn rawh.." ka aw a ring hran lo nâa ka lungawi lo tih erawh a hriat vek tho ka ring.

"Tikhân hahdam takin mu rawh, engtin mah ka ti dâwn hleinem che.."

"Ka lawm em em e, i khumah mu la, sofa-ah ka mu ang e," min vawnna thing deuh sawkin ka tho chhuak ta a, "Keimah ka mu sawn mai ang, rawn mu leh rawh.." a ti sup a.

"I khum, i in, i room, i fapa, tikhân inbuaipui ang che u.." ka blanket sinlâi nen sofa-ah ka inkhuh nghâl hmiah a, eng ang pawhin min be mah se ka chhâng tawh nguar ang.

"I thil han sawi duh dan chu leh.." tia a phun thâwm hre mah ila mitthi ang chiahin biak ṭawng theiha awm ka tum eih lo. A lak aṭangin ka thider a nih zâwk mah chu..ka thil ngaihtuah avâng chuan Blanket hnuaiah ka nui sak a, 'Thlamuani' tih vêl, ho sih sah êm mai.

Chumi tûk aṭang chuan Lalfakhlua nen kan inbe lo mai ni lovin kan inmelh chhin lo hrim hrim, ka tihtur chin Bawiha ka enkawl a, min biak a tum bîk lova ka be hek lo, kan inpehhêl zak zak a ni ber mai.

Zîngah exer lâin a chhuak ziah a, a lo hâw hmain chaw ka lo eifel diam a, Siami eirawngbâwl hma turin ka hrilh hmiah. Nilêngin office a kal a, zanah nise a lo haw hma tawh ngai lo! A fapa erawh a ngaihsakin a chhaih ve ziah a, chutih hunah chuan ka inthiarfihlim hmiah hmiah zêl.

Zanin hi Aizawla ka awm tâwpna ber tur a ni a, Bawiha vâng hian ka haw hreh hreh ngawih ngawih a, Lalfaka hian ka hâw dâwn tih a hre lo nge eng mah min zâwt lova sawi chhuah ka tum bîk lo. A office kal hlânin ka thawmhnaw zualpui ka pack fel vek tawh a, a nu leh pa'n châm rih tura min ngenna chu 'Aw' tia chhân ka duh viau; mahse, hna nei ka ni a, ka zawm a hun tawh miau si atin ni.

Zân dar sawm velah a rawn haw chauhva a mitmeng aṭangin a rui tih ka hai lo. Bawiha hnutê ka pêk laklawh avanga muhil lo ka ni a, a lo thlen hmaa muthilh hman ka duh teh reng nen.

"Bawiha, i nu Muanpuii chuan min haw kumkhua dâwn a nih hmel.." sehchilh naka tiin a fapa biang a rawn tawk zauh a. Whisky rim a nam hum hum bawk nen a kut ka vaisawn sak lo chauh.

"Zosangmawi, ka sawi i hria tiraw, Lalmuanpuii hian min hua tih i hria em?" A ti leh a, a mitmenga rilru natna niâwm tak lo lang chhuak chu ka hmu hman vuai! Mahse, en reng ka duh loh avangin leh lam ka hawisan daih a.

A thawmhnaw a hlih lâi te chuan a pai leh nawk zêl a, hetiang êm êma a rui lai hi ka vawikhat hmuhna! Hmanzan aṭang khan a rui deuh ziah a; mahse, buaipuiawmin a awm lêm lova ka ngaihsak bawk lo.

Boxer nen sofa-ah a let thla tawp a, Bawiha nen chauhva an awm tur ka ngaihtuah phei chuan thinrimnain ka khat a, mipa nêp ber ang ziazânga hetia a khawsa ta mai hi ka lung a awi hlawl lo. Chutih rualin ka pasal a ni lova ka bialpa a ni hek lo, ka nau pasal a ni a, ani a thih tawh si chuan eng inzawmna mah kan nei lo tih ka hre chhuak uar uar.

Rei lo te hnuah a hnâr zui nghâl hmiah a, ka va'n ngei mai mai tak! Khawvar dâwn hnaihah thovin inhnuaiah ka chhukthla a, Siami ka kaitho ve bawk a, dimtêin ka thawmhnaw min thiarthlâk pui a, a ṭah a chhuah hmel hlê. Ani hian min ngaina tih ka hria a; Lalfaka nen kan inbiak loh chhan pawh ka hrilh vek.

A nu leh pa pawh kaitho lovin nimin lama taxi driver ka biak sa chu ka call ta a, minute sawmpanga hnuah a lo thlen tur thu sawiin kan inbiakna ka titâwp a.

"Siam, Bawiha hi lo ngaihven hlê ang che, ka chawlh lâk a zo tawh si a, ka phone number i neih tho kha chanchin hriat ve zêl ka duh a nia," inhnuaia thingpui kan in dun laiin ka chah thlap.

"I awm loh chuan a va'n hrehawm dâwn tak, i bulah ka lo awm ve daih ang a.." a tih chuan ka nui ringawt a, Fakhlua hetia a awm zêl a nih chuan Siami hi ka la mamawh dâwn chauh.

Inchungah Bawiha ka han hmu leh zuai a, a pi leh pûte ngaih dan lâk vak ka tum lo, an tupa an duat viau rualin upa lam an ni a, an ngaihsak thiam lutuk lo, a enkawl tur leh buaipuitu tur ber chu Faka leh Siami anni.

A tâwp nân ka fapa ka rila rah ang maia ka hmangaih thlathum tâl tap ka lo kuaha ka lo enkawl Zosangmawia eng mah hre thiam ve lova muhil chu ka thlêk leh vang vang a, ka mittui a hnâi kuar thei nia. Mahse, rilru no taka ṭah erawh ka tum miah lo, ka nauvin a hmangaih leh a duh em em Lalfakhlua sofa-a muhil chu ka en leh a, he pindanah hian engtikah mah ka riak leh tawhin ka ring lova, anmahni ka huat vâng pawh ni chuang lovin mihrang, chhungkaw hrang aṭanga kal ka ni a, Bawiha a leikân deuh hnu phei chuan chuti tehchiamin min rawn ngaihsak ka ring lo.

"Ka fapa, ka hrin ni lo mah la i tân ka awm reng ang, nang lo chhungkua ka nei lo a nia" a biangah fâwp zauhvin room chu ka chhuahsan ta a.

Ka lung a lêng dâwn tih ka hresa vek; mahse, tawrhchhel a ngai a, ka hna ka bânsan ngawt thei si lo.

After 7 hours

Lawngtlai

Kan in, chhungkaw kima kan lo chên tawh ṭhinna hmun ka thleng chu 'ka ṭap lovang' ka lo ti ve kha a nia, a teuh lo! Luah lumtu awm lova ṭhing ṭhiapte chuan ka ṭahna a ti tam ting a ni mai. Banga kan chhungkaw thlalâk thlirin ka ding reng a, he khawvelah hian kei aia mal an awm dâwn em ni?

Siamin a khât tâwkin chanchin min hrilh reng a, Fakhlua nu leh pa'n min hauhna pawh âwm ka ti ve reng. An hriat loh laia ka hâw chu an ngaihdan a ni lo hlê a, pa Rosanga phei chu a lawm lo lehzual.

'Mama lung a awi lo khawp mai' a tih chuan 'Keipawh a lakah khân ka lung a âwi bik lo' tiin ka chhâng ve hmiah kha a nia. Duh leh min ngei mai mai rawh se.

Nitin office-ah ka kal leh tlauh tlauh tawh a, Lawngtlaiah kârhnih lâi ka awm leh tawh a, 'U Muanpui, awmpui dang an lâkbelh tawh a, Bawiha chu keimah hlîrin ka buaipui a, lo ngaihtuah reng reng suh chuan Thlamuani a lo lêng ṭhin,' Tia Siami'n min rawn hrilh ni chuan ka awm a nuam lo nilêng ṭhak!

Fakhlua'n vawikhat mah min la be lova Thlamuani a nei tawh a min theihnghilh tepawh a ni mahna..

'Faka te pafa chu rawn ngaihtuah vak duh suh, ka lo enkawl ang' Whatsapp aṭanga min rawn betu chu tudang ni lovin Thlamuani a ni.

Kan office-a ka awm laia min lo thawn a ni a, ka number nei tur hian Fakhlua te chhungkua bâk mawhphurhna nei an awm lo! Siamin a pe dawn lo tih ka chiang ngam sak.

#'A ṭhat chu, i enkawl theih chuan ka thawveng huai mai' tiin ka chhâng ve hmiah.

Myanmar lam aṭanga damdawi rawn tawlh ru ṭhin hmeichhia rinhlelh chungchângah FIR rawn lût a awm a, ka case a nih loh avangin ka lo ûksâk lem hlei lova..

"Muanpui, a hmêlte hi i lo hmu tawh mial lo maw?" Kan thawhpui pain a tih chuan ngaihsak lutuk lo hian a lehkha ken chu ka ensak a, a kâra thlalâk inzep tel fiah vak lo chuan ka mit a la ta riau!

Uluk zâwka ka bih chian chuan Vanlalthlamuanpuii nen khân in ang riauva hriatna ka neih tlat chu le!

"Sanga, he thlalâk hi ka lo kawl lawk ang aw.." ka tih chuan phûr fê hian, "I hriat vaih chuan ka promotion san ang che," tiin a nui var var a, henu thlalâk hi ngun zâwka ka chhui a ngai tlat! Thlamuani a lo nih vaih chuan ka chhuah lo tawp ang.

Ni e, kha nu incheina uar zet leh company car thar Loan tel miah lova mahnia la thei ngat kha amah ani lovang tih tunge sawi thei!?

'Lalmuanpui, game khelh a ngai' tiin ka infuih sap a...

Police ka ni tih a la hriat loh phei chuan ka chhui lût nalh viau ang, a lo ni lo a nih tâk leh ka chawibelh dâwn pawh nihlei lo..

Nui sak chungin ka purse-ah thlalâk chu ka thun hmak a, Lalfakhlua te pafa tân pawh hlauhthawmawm a ni ve thei tlat a ni..

B<++++[BeckirafARenthleI]++++>RR

SEGUNDO

Becky Rafa Renthlei

Chapter-24

Lalfakhlua

Lalmuanpuii rilru lian lutuk leh tihmawh lutuk kha mak ka ti lo thei lo. Engtin nge min hrilh miah lova min hawsan ngawt theih tih hi ka la ngaihtuah reng.

Ka lo rin dan chuan 'Bawiha hi ka lo kawl mai ang' a tih te ka lo beisei ve a, ka enkawl peih loh vâng ni lovin a hmangaiha a duat êm vâng khan a kalsan ka ring pha lo hrim hrim. Mahse, ka lo ring sual chiang kher mai, Zomuani nen an mizia inang turah ka lo dah ngawt a, a teuh lo nasâ!

A hâw tûk khân Siami ka hau hrep a, 'Min kaitho ve ta mai che, a rûk a râla thlah kher a ngai hleinem' ka tih chuan min chhâng lo hrim hrim, ka nu leh pa'n an hau bawk a, 'Mama, tumah hrilh lova a hâw dânah a lung a awi lo a ni chiang ang, a rilru natna turin i lo awm a ni lo maw!" Ka nu'n a ti nghe nghe.

Ka thiam lo tih ka hria a, hmânzana zû ka inhmasak ber zan khan a lung a awi tawh lova; mahse, engtin nge ka tih bîk ang a, nitin Lalmuanpuii nen kan inhrawn a, amah ka duhna tih lan a rem si lo. A ni'n min ngaihsak loh laiin ka vei bur a, ka nupui phirpui ka ngaizâwng ta hi tû thiam loh mah a ni lo, keimah ka dik lo a ni.

Min rawn hruai a tum zân pawh khân rui chhia ka ni hauh lova alak aṭanga tâl hran ka tumna lamah Thlamuani kha ka be ta vêl a nia, ngaihzawng neih ka la tum lo hrim hrim; mahse, ka nun khawhar lutuk tih reh nân Thlamuani nena inkawp mai pawh ka hnial hran lo. A chhan chu min duatin min ngaihsak a, Lalmuanpuii nen hi chuan engtikah mah kan inrem lovang keiin duh mah ila amah hian min duh dâwn lo tih ka hre tlang sa vek. A nau pasal ka nih chu thuhran mipa a ngaihsak hlawl lo.

Police uniform nawh mar em em inbel a duhtâwk der!

Be châk viau mah ila amahin min be hmasa a nih loh chuan ka be duh bik lo. Mahni inhrem ka ni ringawt! Zantin an nufaa an mudun lai ka mitthlâah a lo lang ziah a, duhdah taka a awm lai te, confi zeta car a khalh laite leh a chaw ei lai, a chezia engkim ka mitthla a ni deuh ber.

Siami nen an inbe ṭhin tih ka hria a, Thlamuani lo lêng turin ka sâwm lui kher a, Siamin Lalmuanpuii a hrilh dâwn tih ka hrechiang ê.

Zanah pawh kan pafain kan inbuaipui ve thei vek tawh a, nula pakhat kan lâkbelh khân inchhung a enkawl a, Siamin Bawiha a buaipui thung. Ka nu leh pa'n Muanpuii an fak khu chûk reng hi ka ngaithla hnê ngawih ngawih. An ngaih ang hian ani'n a rawn ngaihven teh hûrh si lova ka kamkhat hial kha a nia.

Tunah chuan nunphung pangngai dik tak kan zawh chho leh tawh a, zû in zeuh zeuh ka chîng ta a, chu pawh Lalmuanpuii vâng bawk. Zankhat ka rui nawi deuhvin Zirsanga bulah ka lo va âng chiam a ni âwm e, 'Zû i ina i hlim dâwn a nih chuan ka dâl hauh lovang che, i nupui û hi i duh tih ka hria a nia, engah nge a bulah i sawi mai loh, mî tih loh dan a ni bîk hleinem' a tih chuan ka ngaihtuahna a ti thui ang reng.

Thlakhat tawp kan inbe tawh lova ka nu leh pa hnenah ka rilru dik tak ka hrilh ta nge nge a.

'Kan ring dik chiah a nih chu, ka sawi sual fê a nih loh chuan ani pawh khan a duh che in ka hria' ka pa'n a lo ti thên nia.

'In ngaihdan mai mai a ni lo maw?' Ka tih pawhin, "Teuh lo, mit kan nei a, beng kan nei bawk, i ruih ṭhinte hi kan hre lo emaw i ti a mi? Nangmah hmangaiha duhsaktu apiang che in i zu in an hua ang, Muanpuii lungawi lohna chhan pawh kha eng dang a ni lo, amah ngaihsak lova office vêla i awm kual mai mai kha a hua a nih kha.." Ka pa bawkin a ti leh a.

Reifê kan sawi dun hnuah Siami leh Bawiha hruaia Lawngtlaia zin kan tum ta a.

"Mama, in innei dâwn tihna a ni lova i nupui û a nih vângin fimkhur hlê ang che; tin, mi sâwi turin awm tum lo la, Pathianin rem a tiha in induh tawn chuan kawng ala hawn sak em em ang che, hmanhmawh chûk suh," tia ka pa thu min chah chu vawn reng ka tum.

Ni e, vantlâng hriat kher loh pawhin engkim a sawi vek theih a, Bawiha hi a ngaihtuahawm ber chu a ni. Muanpuii kutah lo chuan ka dah ngam dâwn lo tih ka chiang sak.

Lawngtlaia kan zin tur thû pawh sawi lâwk ka phal lova Siami takngial pawhin eng mah a sawi bîk lo.

Thlamuani pawh a zin ve a; mahse, khawi hmunah nge a awm tih ka lo zâwt miah lo. Henu hian eng chiah nge a thawh ang aw tiin ka ngaihtuah fova, Company car 'Grand i10' pawh Muanpuii hmingin ka book diam tawh a, Loan tur a nih avangin a hmanhnawh theih vak loh.

Kawngtluanin Bawiha a muhil tihtheih deuhthaw a ni. Vawithum chiah a harh a, Siamin a buaipui vek a keiin car ka khalh thung.

Min hmuh hunah mak ati teh ang chu..

Lawngtlai kan thlenin zan dar ruk a ri chiah a, Muanpuii te in lovah thlen ka tum lo hrim hrim, ka nupui Zomuani te in khâ a la ni tlat a, a boral hnua ka vawikhat kal lehna a ni. Ka lung a lêng thar em em a, thil ni lo ni lo ngaihtuah a awl kher mai.

Kawngkhar a lo inkalh bur tih ka hmuhin mak ka ti deuhva!

'Siamte, Muanpuii han call chhin teh," ka tih chuan phûr zetin a call ta nghâl a. An biak mawlh mawlh laiin Gypsy a rawn tlân lût ve chiah a, a lo haw ta tihna. Ka chhungril su deuh dap dap chu thunun tum mah ila a harsa lam hret a ni e.

Motor aṭanga a rawn chhuak chu chîk zetin ka lo en a, a form ha lovin Jeans pawduk mar ṭang a ha thung a, kawrlum lian lam deuh a hâk chu a inhmeh phian! A sam a lo ti dum vek tawh a, a hmêl a tla deuh kiam a, khawngaihthlâ a la ang reng.

"Eng nge i lo tih dâwn?" Min lâwm huam turin ka beisei hran lo; mahse, heti em ema nelawm lohva min biak hi chu ka beisei loh thil a ni.

"Lalmuanpuii hmu turin kan lokal, tû vak nge kan lo kal chhan ang a.." car aṭanga chhuakin Siami ka signal zauh a, ani pawh a lo chhuak ve nghâl a, Bawiha a pua a, Muanpuiin Siami a hmuh chuan makti hmêl a pu hran miah lo nia!

"Min hai a ni ang, i hriat ṭhin Lalmuanpuii kha ka ni tawh lo, min rawn zawng tiin dâwt sawi duh suh," ti hmakin Bawiha a ngaihven daih a, ka va ngei mai mai tak.

"Lût phawt ila.." Siamin a ti ta hlauh zâwk a.

In chhung fai sar leh hnûm hlarh chuan a che duhdah lo tih a ti lang chiang hle in ka hria. Min ngaihsak ṭhak lo hian ka fapa ngawr ngawr zuk buaipui a!

"Siam, inbual la, Bawiha ka lo pawm ang," a bâk eng vak a sawi lo.

"Muanpui, min la haw reng em ni a?" Zawi supa ka tih chuan, "Muanpui, Muanpui min ti chhên suh, i tân chuan mihrang hlak ka ni, min hre ngai lo anga i lang thei lo a nih pawhin mikhual zakzum tak angin awm mai rawh," a ti leh fak a. Chutah, "Min ngaihven niawm tak te khân lang rêng rêng suh, a chhan chu min ngaihven lova i eng mah ka ni lo," a ti leh hmiah.

Ka chhungrilin sawi tura min nawr chu hun lo hlê mah se ka sawi chhuak ta nge nge a.

"Khawi kipah pawh awm la, ka zawng hmu zêl tho ang che, kan ram zimtê-ah hian i hmêl ang 'common' lo zet khâ ka hai ngai hek lovang, a rûka tlanbo tih vêl kha tum buai duh suh, ka sawi hi hre reng ang che, ka eng mah i ni lo tih ka sawi lâi ka hre hek lo," ka kianga hmeichhe ṭhû chu rum zetin ka melh a. Min ṭawngkhum dan hian nelawm taka ṭawng min ti hreh zual.

"Min zawng turin ka ngen lo che a, min umzui rawh pawh ka tih si loh!" Tia rawn dâk chhuakin zâm map lo hian ka mitah tak min en lêt kalh a, a hmêl ṭha tak leh nungsar hi alawm ka muthmuna ka lo suangtuah fo ṭhin leh ka theihnghilh theih miah lo chu! Zomuankimi tih lam a ni tawh lo.

Ka nu leh pa fapa mal neih chhun hian he hmeichhia hi ka âtchilh thawthâng tawh chu a nia, amah nei tur hian eng ruahmanna ṭha uchuak nge ka siam tâk ang?

Zomuani awm lo mah se a hmêl ang pû ka hmuh phâkah a awm reng a, a mawi emaw mawi lo pawh nise ka chhuah dâwn reng reng lo. Eng anga mipa ngaihsak lo pawh ni rawh sek sek, kei Lalfakhlua hian a thinlung ka neih hmâ loh chuan ka bei ṭâng ṭâng zêl ang.

Ani ang luhlul leh thin tertek nei hmeichhia thunun tur hian ka insiam rem a ṭûl a nih pawhin engvangin nge ka theih lohvang.

Sum leh pâi-in a nunah hmun an chang lo mai nilovin eng teh ûal-ah a ngai hauh lo tih ka hre vek bawk a, pawisa ina a lei theih loh hmeichhia hi ka mamawh reng a ni.

Zomuankimi theihngilh loh ka duh chuan a phirpui kawp hi thil finthlâk a ni.

"I kâ a kua a i ṭawng mai mai a nih kha nge, zû i rawn in leh zâwk?" A la ti nia maw le.

"Helai hmun hi police station ni lovin thlakhat chuang min be duh lova titau Lalmuanpuii leh ka nupui boral ta Zomuankimi te in a ni a, i kianga ṭhu hi misual dâwp tur ni lovin Zosangmawia pa, Lalfakhlua Hyundai Company Asst Manger ka ni bawk." Ka tih chuan a ngawi hmiah!

"Zû ka in avang khân ka in kumkhua dâwn tihna a ni hek lo, a rûk a ka fapa leh kei min kalsantu hi ka zawn lohva ka umzui loh i lo ring a nih chuan min la hrechiang tâwk lo a nih chu.."

"Lalfakhlu, i ṭawng tam mah mah.."

"Ṭawng tam hun a awm a, ṭawng tlêm hun a awm bawk, chutiang zêlin mitthi tawh ngaia ṭah hun a awm a, nunphung pangngai zawh hun a awm bawk, i nau khâ ka thinlungah a thi dâwn lo; mahse, a awm tawh miau si loh chuan a rila rah hmagaihpuitu Lalmuanpuii hi ka chhuah che inbeisei suh.." ka ti hmiah hmiah a, mit khap fak fak chunga min melhin, "I va han zâm lo tak!" A ti nghat a.

"I pa thu hnuhnungah khân 'ka fate i kutah ka dah a nia, lo enkawl ang che' tih a nih kha, chu chu tih hlawhtlin ngei ka tum.." ka tih leh chuan Bawiha pawmin a tho nalh a, room-ah min luhsan daih.

Mahse, ka sawi duh zawng zawng deuhthaw ka sawi kim hman vek a ka thâwl huai mai.

A duh apiangin min dem se, kumkhat a ni emaw kum thum pawh ni rawh se, Lalmuanpuii nghah a ngaih chhûng chu ka nghâk mai ang.

'Segundo' tiin ka phun chhuak sup a.

B<++++[BeckirafARenthleI]++++>RR

SEGUNDO

Becky Rafa Renthlei

Chapter-25

Lalfakhlua

Muanpuii'n 'eirawng ka bâwl hman lo' a tih deuh tlat avângin Siami nen kan bâwl a, henu han chimawm dan em em hi a!

Ka fapa nen khumah an awm a, Zosangmawia thla li a pum tawh a a chhaih ve theih ṭan tawh bawk nen Lalmuanpuii paw'n a tih dan pangngaiin a be leh chiam chiam a, 'Zosangmawia of Lalfakhlua fapa, i pa ang hi ni lovin keimah min chhun daih la police inspector han ni mai la..' tih vel mai mai!

Chaw kan eikhamin zân dar 9 a pêl tawh a, "Faka, khawiah nge i mut ang, room pahnih chiah ka nei si a, Matei nen kan inṭâwm ṭhinah khân ka mu a, Siami hi ka pa room-ah mu ta mai se, nang ṭhutthlengah.."

"A teuh lo, Zomuani khumah ka mu dâwn, Bawiha pawh ka kiangah a mu ve ang." Ka ti nghut a.

Nulat tlangvalna lam hawi zâwnga sawi ka ni lova kan inah pawh kan pathumin kan mu reng a tûna taka mut hran ka tum teuh lo.

"I duh duh sawi ringawt zêl suh," ti hmakin Siami mutna tur room a enpui daih a, kei aia kan nula a ngaihsak dâwn a nih chuan naktukah ka thawn hâw ang. Lalmuanpuii rilru hneh hi thil awlsam a ni miah dawn lo tih ka hria a, Lawngtlai-a ka châm chhung hian a rilru hneh hman vek ka tum.

Ka sawi ang chiahin a inbual hlânin Bawiha nen khumah kan lo mut khalh tharh a, duh leh thinrim mai mai rawh se, Zirsanga sawi dân takah, "Min duh ve tak tak a nih chuan an thinrim rei thei lo" tih 'policy' kha 'apply' ve chhin dâwn teh ang.

"Faka, i muhil miah lo tih ka hria a nia," a inbualzo a rawn chhuak tawh a, khum bulah kâwng dawm âl chunga dingin kan pafa mû min en ngar nia!

"Ka muhil pawh ka tih si loh! Inbiak kan ngai a nia, Siami hriat ve i duh a nih loh chuan i room hi thil sawi nân a rem ber!"

"Nang nen sawi dun tur eng thil mah kan nei lo.." Cabinet-a Blanket leh bedsheet phawrhin min chhuahsan zuk tum lui tlat a!

"A ṭha e, khumah i mu duh lo a nih chuan i mutna a piangah kan lo mu ve zêl ang," tiin ka tho chhuak a, sitting room ṭhutphah pahnih ka her rem sauh sauh a, mutna ka siam ve hmiah.

"Lalfakhlu, eng nge i hriat a, naupang mutna chi pawh a nih loh hi.."

"Naupangin mutna an nei hran em ni, a nu emaw a pa emaw kiangah an mu ve mai ang,"

"I chhe zeh zuah.."

"Ṭha min tih loh vâng a lâwm tunah pawh kan la inhnial."

"Lalfakhlu.."

"Min û rawh.."

Chumi hnu chuan a ngâi ngam ta ngang lo a ni ang, a tlâwm ta nge nge e! Ve teh tlatin..!

Muanpuii khumah kan mu tlar ṭhap a, feet li khum a nih avangin kan chêp lek lek. Kan mut ṭantirhah Bawiha a lâiah a muttîr deuh kher a; mahse, zinglam dar hnih vêlah a sîrah ka sawn a Muanpuii kuah chungin ka mu leh ta.

A harh hunah a sa leh tîk têk ang chu; mahse, chu'ng zawng zawng huam chuan ka tilui ve tlat bawk si.

Kei hian ka nupui phirpui luhlul zet hi ka buaipui khu chûk ang tih hre nghâl lo chuan!

"Hey, Faka.." ka rin dan a dik chiah Lalmuanpuii a rawn harh rualin min nghawk nghal sawk a, a na phian leh nghal!

"Eng nge? Min dîm ve deuh rawh.." Thinrim ru viau mah ila zaidam ka zir a ngai tlat bawk si. Kan duh kan neih theih nân te chuan tlâwmzâwk chan kan chan a ngai chu a nih si hi.

"Eng ati nge min tihbuai reng le?" A ṭhu chhuak hlawl a, thâwm a dim mang lo bawk nen Bawiha a harh ta a. "I fapa kha buaipui rawh," zuk ti a!

"I fapa i fapa ti bîk lo la, i fapa a la ni ve thuai dâwn tho.."

"Awi awi! Ka thidang leh nâng a, i han zah loh dan em em hi.." Bawiha hnute tur a siam zui nghal a, a thinchhe vak khân ka hre si lova Lawngtlai a'n thlen meuh chuan induh thiam ve ngâk ngâk tak a ni.

Siamin eirawng a bâwl a, kei erawh Muanpuii pa thlânah ka kal thung. A pa leh Zomuani thlânlung phun dan tur ruahman chhin ka tum vâng a ni a, tûnah vut vut phun dâwn rih lo mah ila ka zin chhên thei lo bawk nen a thlâ te ka la ta zâwk a.

In ka thlenin office kalin a lo chhuak daih tawh a, chaw eiah pawh min nghâk lo.

"Siamte, vawiin i hâw phei mai dâwn em ni ang?" Ka tih chuan mak tih hmêl deuhvin min en a, chutah, "Engtin nge haw lamah in rawn inbuaipui ang a?"

"I zei lo lutuk," tiin ka nui suk a, "Muanpuii ka lo hruaiphei dâwn alawm, i awm ve chuan chhuanlamah a hmang zêl che a, ka ruala a lo phei ve duh lo a nih leh ka lo chah leh mai ang che." Ka tih chuan a nui ta hak hak a.

"Zomuani ai chuan u Muanpuii hi i duh zâwkin ka hria, â in induh tawn chiang.." a nui zui vak vak a, tupawh mai hian kan induh tawnah an ngai zel chu a nia Muanpuii hian min duh ve tihna em mawni le!?

Sumo counter thleng Siami thlah a ngaih avangin nuamti chiah lo hian Muanpuii te office-ah Bawiha ka dah râwih a, a ngaih dan a nih loh hmel nasâ!

"Faka, a ang lo lutuk êm mai, police station-ah naupang an hruai ngai em ni?" A meng no lo khawp mai.

"Ka lo lam leh dâwn alawm Siami thlah a ngai a.."

"Khawiah nge a kal dâwn a?"

"Kan duh duh sawi tura zalên kan nih theih nân ka thawn hâw dawn maw le" a beng bulah ka hrilh sup a, min chhân tuma a âng zuau chu khapin, "Inhnialna hmun a ni lo, i fapa kha ngaihven la a tâwk." Min chhân hman hmâin an office ka chhuahsan ta daih a.

Zomuani ang a dimdâwih leh duat hliau hliau ngai chi a ni ve lova nawrluih deuh ngai hmeichhia a ni tih ka man thiam ve tlat tawh.

An thawhpuite lah khân ka fapa an pawm liam liam a, amah Muanpuii tak phei chuan a pawm hman meuh lo!

Nupui nei leh turin rilru ka la siam hran lo, bâkah ka nupui thihna a la rei lo êm a, ka lung a lêng ru ngawih ngawih tih hi zêp buai ka tum hek lo. Muanpuii erawh nula mahni inenkawl zo a ni a, kei lo pawh duhtu a nei dâwn tih hriatsa a ni. Chuvângin muangchân ka tum lo mai ni lovin chhuah ka tum lo bur. Kan inkawp nghet a nih chuan eng emaw chen kan inthup thei dâwn bawk a, mî chân loh khânah ka nei hmiah mai dâwn a ni.

Nitin a office kal lam leh hâw lam ka thlah ziah a, a tîr chuan a duh lo hrim hrim! Mahse, tlâwm duh lohva tûang ka tihchhah luih tlat avangin nithum lâi ka hruai ve ta. Bawiha awmtu tur an awm loh avangin ka kutah a awm tawp a, kal lamah Muanpuiin a pawm a, hâw lamah a buaithlâk duh khawp mai, a hnung seat-a naute mutna tur ka siamtîrah amahin a mu ve a ka lainat deuh; mahse, an office a hnâi êm a ka ngaipawimawh duh ta lêm lo.

Lawngtlaiah ni li lâi kan châm tawh a, office a kal hlânin in lamah ka fapa nen kan in awm tlauh tlauh chu a nia.

"Eng ati nge thâwt lâwk awm miah lova min transfer rîkngawt le?" Muanpuii office bâng a rawn âng lût a ni hrim mai.

Ka dîlna chhânin a awm ta, a rûkin ka nui suk a, Kulikawn lamah an sawn ta chu a nia eng vangin nge ka nuih loh teh lul ang ni!?

"Fakhlu, i nui elaw!?" Ka lo nui chhuak chu niin!

"Nui ve bawk ang chu, min tlânchhiatsan i tum poh leh min hnaihah i awm dâwn si, Zosangmawia leh a pa hian kan mamawh che tih Pathianin min hriatpui a lâwm," ka ti tlang hmiah a.

"In sawitel ve zêl suh, Bawiha hi min pe la nupui dang nei rawh, i duh leh Thlamuani te kha nei la.."

"Thlamuani maw!?"

"Aw, Vanlalthlamuanpuii kha nei rawh.."

"Muanpui, ka fapa hian nuhrawn a hrawn dâwn a nih chuan a nu phirpui bâk a nei lovang, i duh chuan tlânchhe ta che; i hmangaihna dawng pha lo tura Zosangmawia hi i dah phal a nih chuan ka rawn inrawlh tawh lovang.." Transfer lehkha chu dawhkanah thehthlain ka fapa ka pawm a pâwnah ka chhuak ta a.

Ni e, a tân pawh kei pathlâwi lehnghal, chu pawh a nau pasal engtin nge min duh tehreng ang ni? Beiseina tamtak nen Lawngtlai panin ka kal ve a, 'Ka beidawng lovang' ti ṭhin mah ila mihring ka nih miau avângin ka zak ru chem chem. Zanin la la hian Aizawl pan ila ka tifuh ber ang.

Ka fapa pawmin Muanpuii te kawtah ka la ding reng a, 'Zomuankim in inah ka awm tih i hria em? I pasal leh i fapa hi min han en la, i û laka ka rilru put dan hi sual a nih chuan dâltû rawn siam rawh, mawh..' ka thinlung pik ṭup tireh tur hian eng nge ka tih ang. Zû ka in leh mai dâwn em ni?

Zosangmawia a rawn ṭê ṭhat ṭhat a, ka harh zawk! Nupui nei lo khân lo awm ṭha hle hle ila fahrah ka siam lo mai tur.

Thutlûkna felfai ka siam meuh chuan tlailam dâr thum a ri tawh a, vawiin hi Zirtawpni a ni a, Siami ka hawtîr tawh bawk si. Eng pawh nise zaninah chuan ka hâw lo phawt ang a, Aizawl thlenga min thlahtu tur ka zawn a ngai dâwn ta a ni. Driver fel deuh hlek emaw Lawngtlaia ka thawhpui tu emaw tal biak pawh ka tum ta a...

After 2 hours

Lalmuanpuii

Kan hotute lam ka biak hnuah pawh min transfer ngawtna chhan ka la hrethei chuang lo nia! Mahse, ka thawhpui pakhatin 'I nu leh pa an awm tawh si lova i nau a boral bawk nen kum hnih thum vel Aizawl lamah awm harh ve se an ti che pawh a ni mahna' a tih khân a dik hmel fû.

Fakhlua te pafa inpawm chhuak chu an rawn luh tâk lawk loh avangin tukverh aṭangin ka thlîr ru dêk dêk a, min hnungchhawn zawnga dingin Zosangmawia a pawm a, a taksa inphut zet te chu hmuh hmaih a har kher mai.

Ka en reng tih hria niâwm taka a rawn inher tâkah chuan ka kalsawn ta daih a. Ka rilru puthmang pawh hi ka hrethiam tawh lo. Zomuani phatsan ang tlata inhriatna ka nei a, Fakhlua sawi ang deuhvin kei lovin Zosangmawia an enkawl tur anga ka ngaihtuah chhin ringawt pawh hian ka na vawng vawng thei.

Thlamuani ka ngaihtuah leh lek phei chuan Faka fapa hi nuamsaa a siam ka ring hek lo.

An pafaa an rawn lût chu ka lo en reng a, ngawirengin room-ah a fapa nen an lût tlang a, an rawn chhuah lawk loh avangi ka va lût ve ta a. Khumah Bawiha muttirin an thawmhnaw a lo thleh ṭhat ho chu Air bag-ah a dah lût zêl a, min la be ta chuang lo.

"Faka, eng nge i tih a?" Ka be hmasa ta nge nge a.

Min melh zawk a, min chhâng miah lo!

"Ka biak che hi..."

"I hmuh ang hi a ni mai.." a ti nghut a, biak zui ngam loh khawpin a hmêl a dur!

"Tunah hâw i tum em ni?" Tia ka zawh chuan, "Min va ning awm ve a, i hnena kan lokal hi ka tisual a ni, zaninah hotel-ah kan insawn ang a naktukah kan haw ang." A ti hmuk hmuk a.

"Lalfakhlu.."

"Sawi dik loh ka nei em ni? I bialpa te lo lênna te pawh kan dâl ve ang a sin."

Chhâng duh lovin Bawiha pawm ka tum a, "Pawm pawm duh lêm suh, i enkawl zui theih dâwn loh chuan nikhua a hriat hunah kan tân a buaithlâk mai mai, fapa pakhat enkawl zo lo tur khawp mipa nêp ka ni lo." A ti hmiah hmiah a.

Zosangmawia ama'n pawmin room aṭang chuan a chhuak leh daih a, nuam lo ka ti ta riau!

Kei hian ka lo ti lutuk ta deuh em ni? Chak fêa car tlânchhuak thâwm ka hriat phei chuan hrehawm ka tiru viau!

'Mate, rilru siam thiam a va har ve le, i pasal leh i fapa hi ka enkawl mai dawn em ni?'

Lalfakhlua hi ka duh lo a ni lova ka nau pasal a nih vângin ka rilru ka thunun mai chauh a ni.

Zanriah ei hun thlenga an lo hâw tâk siloh avangin ka phone ta ringawt a! A ring ral ṭhak ṭhak nia maw le.

Tunah dâr nga a ri tawh a, thlasik khua a nih vângin a tlâi ruih tawh.

Rilru nuam lo zet hian kan in kawtah ka vei chhên a, a khât tâwkin ka call sek bawk.

Faka aimah chuan Bawiha ka ngaihtuah zâwk a, hepa ngaihtuahna tâwi ta lutuk hi a mak ka ti.

Chutia ka vei sek lai chuan an rawn tlân lût ta hlawl a, ka thaw huai thei nia! Mahse, hmeichhe pakhat a rawn chuang tel ve a, ka hmuh âwm pawh ka la hre lo.

Lalfakhlua a zawng a hmel, a pian a hna engkimin a zira hmeichhia a mah duhtu a hmu fer fur ang chu..

"Chaw ka ei dâwn lo a nia.." Tiin min kalpel fua a, a hnunga hmeichhia a lo hruai khân Bawiha a rawn pawm thung a, mak deuhvin ka chhungril a na veng veng.

Ka rilru puthmang ka thup reng a nih chuan an pafa hian ka chân mai ang tih pawh ka hlau hlel lo ve..

'Lalmuanpui inti paukhauh la Fakhlua hi engkim hrilh tlang vek rawh' tiin ka infuih ngial a..

B<++[BeckirafARenthleI]+>RR

26.SEGUNDO

Becky Rafa Renthlei

Chapter-26

Lalmuanpuii

"Faka, khawiah nge in kal dawn?" Air bag ak uaih chungin ka hmaah a ding a, a hmel chang rât leh tûm hmuk te, a mitmeng dul ruih leh rilru natna nei niâwm taka a awm lai ka hmuh hian ka inthiam ta lo tawp mai.

"Ka sawi tawh kha, mamawh kan nih lohna hmunah hian awm reng ka tum lo. Bawlhhlawh ka ni bîk hleinem," A hmeichhe lo hruai lam hawiin, "Kimkim, Flash-a tuilum khâ paih vek la car-ah Bawiha lo ṭhutpui rawh.." a ti nghut a.

Chunu chuan thuawih hmel deuh hian Bawiha a pua a car lam panin an chhuak ta a.

"I ti lutuk deuh lo maw! Eirawng ka bawlkêp vek che asin," ka tih chuan min melh zawk a, "Kan nunah inrawlh i duh lo bawk a, engkim chiang taka ka hrilh vek hnuah che i rilru i thlâk thei lo a nih chuan he inah hian awm chhan tur kan nei tawh lo. Zomuani awm tawh lo mah se ka fapa enkawl tura ka thlanin min hnial tlat te chuan kan chhuah mai loh nâkah."

"Faka, ih..englo.." sawi ṭan dan tur ka hriat loh avangin ka ṭawng bah nak a.

"Ka hria a lâwm min duh lo tih hi.." a bâk eng mah sawi tawh lovin kawngkhar lam a pan ta a, tûna ka chelh lo a nih chuan he mipa rilru sak leh luhlul zet hi engtikah mah ka nei lêt lehin ka ring tawh lo. "Fakhlu, kal teh rih suh." Ka ṭawng a hre pha lo nge, a chhuak lui ta tho a.

"Lalfakhlu, min kalsan suh.." kawngkaah dingin zah pawh dâwn lo hian ka ko ta a. A ding chat a; mahse, a lo hawi kîr lo!

"Faka, Bawiha nen min kalsan lovang tiraw?" Muangchânga rawn inherin ka mitah chiang zet hian min en a, "I rilru i thlâk leh lovang maw!?" Min ring ngam chiah lo niâwm taka a tih chuan, "I rinawmna min hmuhtîrin mipa nghet tak i ni tih i tih lan chhung chuan ka thlah lovang che," ka ti ta sap a.

A nui suk lai hmêl hi alawm amah ti Lalfakhlua-tu chu!

"Lokal rawh le.." tiin ka kutah a rawn vuan a, a car hûnna lam min panpui ta a. Hundang chu nise min khawih ringawt pawh hian ka ṭeu leh hlar ang; mahse, ka mipa thlan hian min thlah a tum lo a nih chuan engvangin nge ka kut ka lâksawn bik lêm ang le.

"Kimkim, ka thlah ang che aw, i chungah ka lawm e.." nichina a hmeichhe rawn hruai kha a bia a, chunu lah chu za deuh hian a nui a, "Nautê ka lâwm thiam si lova ka lo mangang tawp." A la ti zui a(h).

"Eng nge thil awmzia?" An pahnihin an nui sâng a, "Mutna a sawi chi, Kimkimi kan va thlah lawk dawn em ni ang?" Tiin min râwn a, ka hnial ta bîk lo.

Tunlai khawvelah hi chuan 'âwm ang lo' pawh hi a awm thei tawh lo. Thla li liamtaah khân ka nau leh Faka nupa hlim tak anni a, thla ngana turah tuma hriatpui lohvin ka phirpui pasal nen kan inrem titih chu a nia, min dem duh tân chuan ka demawm ang; mahse, 'Fahrah' siam lova awm theih dan kawng inhawng hi ka bawhzui lo thei lo. Amah Lalfakhlua ka duh ngawt ngawr chu thuhran ka thisen zawmpui neihchhun midang kuta hlan ai chuan mualpho pherh hrep dâwn mah ila ka pawiti zo ta lo.

Ka chhungkua ka vênhim tluka thil pawimawh he khawvelah hian a awm lo. Tin, ka pa thuchah hnunhnung ber tihhlawhtlinna a ni dâwn bawk a, a duh duh chuan min dem teh se.

Kan zân mu pawh a boruak a dang ta daih mai. Bawiha a sîr berah a mu a, a dawtah kei, a kil berah Fakhlua a mu a, a nihdan tur dik tak a ni ta; mahse, a mah nen kan lo sawi dun tawh angin mî hmuh leh hriatah erawh inthup rih kan tum thung.

"Muanpui, i rilru tur ka hrethiam a nia i inpeih hmâ chu ka nghâk thei che a nia," ka kâwngah kuahin ka hnungah a bei thlap a, a awkî hniam deuh chhak leh nghet charh hian min va thlamuan si êm!

A lam hawia min kawihher rualin a hmui hnâwng chap chuan min rawn fâwp ta a, ka ṭang deuh ṭung chu a lo hre reng kher mai, "A bâk pelh ka tum lo min ring rawh," a ti sup a, "Ih.." ṭawng tuma ka âng zuau chu a hmuiin a rawn chhilh hmiah a min fawhna dam raih chuan ka chhûngril a fan raih raih thei nia.

"Aizawlah thawhṭanah kan phei ang a, kan in aṭangin i hna i zawm dawn nia," hnial chi hauh loh hian a ti ta a.

"Helamah tihfel tur ka la nei nual asin.."

"Ok, karkhat chhunga i inchinfel hman chuan ka nghâk ang che, i tel lova Aizawl phei ka tum miah lo a nia.."

"Hman turah ka inngai.." ka tih chuan, "Police hna hi bansan la ka duh khawp mai, ka châwm thei che." A ti a.

"Bansan love a, ka nih tum dik tak ka la thleng lo, chuvangin ka hnaah chuan inrawlh duh suh," ka ti ve hmiah.

Zankhuain a taksa ngheng chialin ka mu ta a, ka nuna mipa ka tawn hmasak ber a ni a, pathlawi zûnah ka uai dâwn tih pawh ka hriat si loh.

Kimkimi kha ka ngaihtuah chhuak thut a, 'I rilru en chhin nân ka ruai a nih kha' zu ti mauh a. Ka inhriatchian ang bawkin Lalfakhlua hian min hrechiang tih a lang reng mai.

"Hey, tho tawh rawh.." Ka beng bulah a rawn ti sup a, zinglam dar nga chauh ala ni!

"Naa, ka muhil chiahin ka hre ve sia.."

"A teuh lo lutuk, zankhuain i harh lo hrim hrim, Bawiha vawihnih hnutê ka siamsak tawh a nia.." khum bula Lalfakhlua insiam peih diamin a lo ding tawh nia!

"Khawiah nge i kal dawn?"

"Inrinni a nih hi ka bazar dawn maw le, Bawiha nen lo awm ula ka lo haw har lovang." Ka biangah a tawk zauh a, a fapa muhil lai melh lehin, "I hrin a ni lo tih a hriat loh theihna turin ṭang nasa rawh," a ti ta a.

Fakhlua chhuah hnuah pawh ka la mu reng a, Bawiha hmêl hian Zomuani anna a nei tehchiam lo! A pa hlauh a ni a chhun!

Khum thawhsan ka tum chuan lukhama Faka phone dah a rawn ri ta a, a ken theihnghilh tihna!

Chhân loh ka tum zet a; mahse, thil pawimawh a awm tâkah tiin ka lo chhânsak ta thova.

Thlamuani aw hi ka hai ngai lovang.

"Faka, Lawngtlaiah i la awm em?" A rawn ti a.

"Faka ka ni lo, Muanpuii.."

"Eu..Kan Lalinpezovi chu leh.."

"Faka a awm lo tlat, chah duh i nei em ni?" Ka aw a nêm fahran lo.

"Lawngtlaiah ka awm tih lo sawi la a tâwk a ni mai," tiin a off zui hmiah a, polite lo ve chiang asin! Thlamuani niâwm rêng a ni.

Rang lutukin khum ka thawhsan a, Thlamuani hi ka chhui lâi mêk a ni a lawm le. Helai hmuna a awm chhan hi ka hriat ngei a ngai.

Ka call ṭha leh ta a.

"Aw sawi rawh.." a rawn ti tawp a.

"Faka i hmuh duh chuan kan inah lokal la, vawiinah ka awm dâwn hleinem.." ka tih chuan, "Eng vangin maw!?" A ti hâ a.

"In inkawm duh tâkah, min vengthawng reng reng suh Bawiha pawh ka hruai dâwn a, Faka hian hlim a phû a ni." Ka ti vei ngial a.

Chumi hnu chuan ṭhatêin kan inbe thei ta! Kan in awmna lai ka hrilh chian hnuah phone ka dah ta a, a mobile number ka nei tawh a, a car number ka hriat a ngai bawk. Chumai bâkah a thlalâk ka mamawh tel bawk a, ka phur kher mai.

Bawiha paw chungin eirawng ka bâwl a, a hma ang khan a mu ṭha duh tawh bik lo nen ka buai ve phian.

Fakhlua lo haw lai pawhin chawhmeh ka la siam zo lova Thlamuani lo lên tur thu kha engtin nge ka hrilh ang.

"I lova haw hma ve..?" Ka'n ti hmasa phawt a!

"Min ngai lo ve chiang asin, hmeichhe dang chu nise 'I lo haw har lutuka' an ti ang," tiin a nui hawk a. Ka lâi ringawt nia!

A thil lei vel pawh amahin a remfel vek a, chhungkaw pangngai kan ang ve tawp.

"Vawiinah Thlamuani a lokal dâwn a, police ka ni tih i hrilh loh ka beisei.." ka tih chuan a hmel a nelawm ta chiah lo.

"A rawn call em ni?"

"Aw, lo lêng turin ka sâwm a nia, chuan ka sawi ang hi min lo tihsak theih chuan ka lawm viau ang."

"Muanpui, i inrawlh lohna turah i inrawlh deuh lo maw!?" A ti chang fak a.

"Khawngaihin, ka sawi ngaithla phawt rawh, a car number leh a thlalâk ka mamawh a, chuan a chênna hmun diktak te, khawi khawchhuak nge a nih tih thlengin ka hre duh.." ka tih chuan a thinrim hmel kher mai.

"I kuang lo i nawr palh ang e, police ni mah la duh duh an ringhlel ngawt ngai lo.."

"Ka sawi zawng khi min tihsak la a tâwk a nimai, keimah ka awm ve chuan a sawi duh dâwn si lova Bawiha nen ka nî te kan tlawh ang a in lo awm dawn nia," thinrim duh miah lovin ka tizung zung a, a ngawi hmiah! 'Aw' pawh a ti lova 'Aih' pawh a ti hek lo.

Kan chaw ei chhung zawngin a ṭawng ta miah lova thinrim hmêl erawh a pu hran lo.

"Thlamuani nen min hmehbel i tum leh ta deuh em ni?" Thlêng ka sil laiin min zâwt ta khauh a.

"Chutiang lam a ni lo, nakinah ka la hrilhfiah ang che."

"A ṭha e, ka ring ang che, inrintawnna a pawimawh hmasa ber a lâwm,"a ti vei thlup nia!

Dâr sawm velah kan kawtah car a rawn ding dat a, room tukverh aṭangin ka lo thlir reng a, Thlamuani a rawn inchei nalh leh pek hlê. A thawmhnaw inbel man hi ka thlakhat ei deuhthaw a ni ang chu maw le.

"Khaw'nge Muanpuii chu?" A rawn ti lût ham ham a.

"A nî te inah Bawiha lenpui a tumin ka hria lo ṭhu rawh." Faka'n a lo chhâng a.

"Muanpuii hi chuan a duh chiah lo che chu a nih hi a.." a nui ar ar a, boruak a ngam sarh sarh khawp mai.

Room aṭanga ka chhuah ve chuan min enchîk hlê a nelawm taka lan ka tum lui ve tlat!

"I lo thleng tawh maw, tikhan lo inkawm rawh u, Faka ka signal zauh a," naupaw chungin ka chhuak ta a. Lalfakhlua ner suk ka hmu hman reng.

Vanlalthlamuanpuii tih leh Hmingliani Myanmar aṭanga ruihhlo tawlh ru ṭhin kha mi inang annih vaih chuan kei hian ka chhuah lo mai ni lovin Central Jail-ah ka thawn liam khawp ang.

After 3 hours

Kan in ka thlenin chawhnu lam a ni tawh a, Thlamuani car a lo awm tawh lova ka thawveng huai!

"Phone tlang theihin awm ve ta che," Faka a lo thinrim hlur a, ka phone switch off-in ka keng lo hrim hrim.

"Chance ka pe ve chu u a.." ka nui sak a.

"Lalmuanpui, chimawm zâwnga awm a hun lo." Tiin min rawn pan a, a fapa muhil lâi bihzawkin, "Nang nen fâ kan nei a nih chuan Bawiha hi i duat tho ang em?" Zu han ti a!

"Ka tuklawlh ang che, sawi âwm leh âwm loh hre ve rawh aw.." ka ti hmak a.

"Tuk lah lo ve Muanthinawrh.." a nui suk suk a ka va ngei mai mai tak.

Zomuani a ngaihsaka a duat ang hûrh kha chuan min duat ve lêm lo. Eirawngbawl engkim min pui vek a, tunah tak phei chuan a insu ve ngei! Ka hrechiang tulh tulh a, ka ngaisâng telh telh. A chhan chu eng mah thawh hreh leh tih hreh a nei lova Thlamuani thlalâk leh a awmna, a chênna hmun dik tak min hrilh phei chuan lâwmin ka nui var var thei nia.

Ka thawhpuite pawhin an hre ve nual tawh a, min chhaih ngai lo hrim hrim! Zomuani pasal khâ a nih miau avangin min ringhlel lo tepawh a ni mahna.

Kârkhat chhungin a zualpui ka inpeih fel hman tawh a, November ni 10 ah ka hna thar ka zawm dawn a, Kulikawn lamah ka awm ve dawn ta. Mahni a in luah ka tum deuh kha a nia Faka'n a phal lo bur.

"Nangnena inhnaih taka awm ka duh.." Ka khumah kan mu a a dân pangngaiin min kuah leh tawh. Min fawh zauh zauh bâk engtin min lêm lova a kianga ka awm pawhin ka inthlahdul ve thei viau.

"Kan awm dun reng hi.."

"Hetiang ni lo hian awm dun tak tak.." a sawi tum ka hriat avangin ka nui ta hak hak a.

"Pathian min pêk i ni angem le!?" Tia ka zawhna chu min chhâng lawk lova chutah, "A pêk kher che i duh chuan min duh bur rawh, keiin ka duh ang che a min duh lêt ve chuan Pathian pêk kan ni tawn ve ve tihna,"

"I phakar.." ka ti taknaa a nih duh hmel.

'Thingpui hâng lum rawh' min tih deuh tlat avangin ka va tho chhuak a, kawngkhar an rawn kik ve chiah bawk! Inlêng ka nei khât ve sia tu tak ni maw!?

Kawngkhar ka hawn ruala ka mi hmuh chu ka luhtîr lo ṭêp a ni. Thlamuani a rawn nui lût sâng a, zu rim a nam that that bawk.

"In makpa ka lo rîm dâwn?" A tih chuan ka nui lui ngial a, "Lo lêng rawh ka'n ko ang e.."

"A ngai lo, keimah ka va lût mai ang," ka chhânna pawh ngaichâng lo hian ka room-ah a lût pawp a, ka ngei kher mai.

Va lût ve mai lovin thingpui ka lum hmasa ta a, an inhnial thâwm ka hriat tâk avangin thingpui châwi chungin ka va pawh ve ta a.

"Zu rim nam chungin ka fapa pawm tum reng reng suh.." Lalfakhlua thinrim hmêl chu hlauhawm tak a ni.

"Fakhlu, khatiang te chuan min ti lo mai teh zû in ve ngai lo ang maia i ṭawng le!?" Thlamuani'n a ti a.

"Ka duh leh ka in ang a duh leh ka in lovang a, rui chungin min rawn hmuh tum tawh suh."

"Tenawmpa leh, i nupui û i ngaizâwng tih hi ka sawipuan nghâl loh.."

"Duhtâwk rawh u.." tiin ka inrawlh ta vat a.

"Thlamuan chhuak rawh.." Fakhlua'n a ti leh a. A thinrim hmêl hmuh a nuam lo kher mai.

"Ka chhuak awm lo em mai, Lalmuanpuii nen hian intenawm dun khawp mai i nau accident te kha in ruahman a ni lo maw!?" A sawi zawh rualin a biang a ri sawk a, engtik laiin nge kut ka thawh hman ka hre lo.

"E e ê, kut min thlâk ngam a maw!?" Tih pahin min rawn bêng ve ṭhuai a, ka hawi sawk thei maw le. Fakhlua rawn inrawlh a tum chuan, "Faka, mipa inrawlhna chi a ni lo, Bawiha kha lo pawm rawh.." Ka ti a, ka thingpui no ken chhuat a tla keh rum chu ka melh zawk a.

"Lalmuanpuii leh Lalfakhlua inngaizawng hi ka hriat loh in ring em ni? Mahni nau pasal ngaihzawn chîng." A nui ṭhâw a, a mitmeng sen râm te ruih nei tih hriat lutuka a meng phi chiai te chu sawp hrep ka châk takzet.

"I duh duh sawina hun ka pe ang che, chumi zawhah i chhuak dawn nia," ka inbengdai leh deuh tawh a, ka aw a chang fal fal khawp mai.

"Inpahnih hian ka timualpho dâwn khawp mai che u.." Ka inrin hman hmain a dinna bula tui bottle chu banin min rawn vawm ta a.

"Muanpui.." Fakhlua aw ka hre hman hlauh a min vawm fuh ta lo.

Ka inchhungah hmeichhe zurui lehnghalin kut min thlâk ngam a maw!?

"I châk dâwn lo khawp mai," tiin Thlamuanin over coat nghâwngah ka ṭhâm a, "I duh tâwkin minti mualpho rawh, ka mualphona 100 a nih chuan nanga mualphona tur chu 200 a ni ang," Dîm baksak lo hian room aṭangin ka pawt chhuak ta a, "Uihurnu, min thlah rawh, Hmingliani hi tunge ka nih i la hre mai ang.." A ti ta zauh mai le!

'Hmingliani of Myanmar' rang lutukin ka vawnna ka thlah a, "Tunge i nih hre tur hian hun rei ka mamawh tawh lovang,'' ti sapin pâwnah ka nawr chhuak ta a. A thinrim âng rite chu râpthlâk tak a ni!

A car chhungah lûtin chak zet hian a tlân chhuak ta a. Rûi lo se chuan tikhân a awm chai dawn si lova zû hi chuan nunphung leh mizia a thlâk thei teh e.

Lalfaka rawn inrawlh a tum khân lo dang lo ila chuan kut an inthlâk hialin ka ring. Boruak ṭha lo leh mualphona nasa zâwk a thlenpalh ka hlauh avangin ka dang hrâm kha a nia, a hnek châk zek zek tih ka hmu reng.

Buaina chinfel te, mi buaina leh an harsatna chinfel thlengin ka hna a ni a, khatiang hunah khân police rilru dik tak a lang ṭhin; uniform inbel ngat ila chuan ka thehphar ve khawp ang le; mahse, ka in, ka zahawmna leh ka hma hun tih chhiat ka duh loh avângin ka insum mai a ni.

"Lalmuanpui, vawiina i thiltih nghawng a nih kha," Fakhlua room aṭangin a rawn chhuak a, a thinrim hlê tih hrilh hranpa ka ngai hauh lo.

"Ka tihpalh,"

"Kan chungchâng leh Zomuani thihna chungchânga mualphona a thleng a nih vaih chuan.." sawizawm duh lovin kawngkhar lam a pan a, rum deuhva min melh lehin, "I luhlul lutuk leh i thû i duh lutuk vanga kan mualpho a nih chuan a sawhkhâwk i tuar khawp ang." Pâwnah chhuakin kawngka a rawn khâr ṭhuai a, ka phuzawk nia maw le.

Ni e, ka thiam lohna chen pawh a awm tho! Mahse, ka mi chhui lâi nihna dik tak ka hrechhuak tawh a, ka tifuh phian zawk!

Ka bialpa thar Lalfakhlua tilungawi leh tur hian eng 'Tactic' nge ka hman tâk ang?..

B<++[BeckirafARenthleI]+>RR

SEGUNDO

Becky Rafa Renthlei

Chapter-27

Lalmuanpuii

Fakhlua chhuak a rawn kîr leh meuh chuan zân dar sawm a pêl tawh a, khawiah nge a kal ka hre bîk lo. Thlamuani chhuah hnu lawk khân thinur ṭeuhvin a chhuak ve ta kha a nia!

"Muanpui, Thlamuani hi engvanga ringhlel nge i nih?" Thinrim insûm taka a ṭawng chu ka hai miah lo.

"Ringhlel tih lêmah eng mah sawi fak tur ka nei lo."

"I inah nangmah ngeiin lokal turin i sâwm a, kan nunah buaina a thlen chû thuhran, Zomuani thih dan chungchâng thlenga a rawn sawi kâi khâ ka lawm lo." Ti nghutin min ngei hmel zet hian room-ah a lût a, biak zawm mai dan tur ka hre lo.

A thinrim hmêl ka hmuh khât êm avangin nuam ka ti lo hlê bawk.

Khumah pawh mu duh lovin a puansin lâi nen ṭhutthlengah a insawn daih a, Bawiha erawh khumah a muttir thung.

"Faka, lo mu chho lâ.." inthlahrung dâkin a mutna bulah ka va ding a.

En pawh min en lo hian a phone a khawih mawlh mawlh a, ka va'n ngei tak!

"Eng nge keima chungah i thinrim rîkngawt a!?"

"I mutnaah va mu rawh, inbiak ka peih rih lo.." a phone dahin a inlukhûp daih a, ka thinin a tuar leh ta pek lo.

"A châng leh ka khuma mut loh hlauvin i thinrim a, tunah lêm i mu duh lo leh a, a ṭha e; i duhna hmun a piangah mu la ti nia," room-ah lûtin kawngkhar ka khar hmak a, a upat ve tawh tehreng nen a'n titau kual vêl a, ṭhing lutuk.

Khumah muhil thei lovin ka inlet sek a, ka nau fapa leh a pasal enkawl tur hian ka tling meuh pawhin ka hre lo. Zomuani khân engtin nge a dawhtheih zâwk le!

Ka lo chhîng sek a ni ngei ang khawvar dâwn hnaihah Bawiha ṭap riin min tiharh a! Hus! Min kuah chial chunga Lalfakhlua muhil hmêl ka hmu hmasaber!

A mutna a nawm loh vânga rawn insawn a ni lo tih ka hrethiam ve vek. A bân dimtêa dahsawn sakin Bawiha hnutê tur ka siamsak a, a harh miah lo nia maw le!

##

Kan office-ah tihfel ngai ang zawng zawng kan tifel vek a, ka dawhkan pawh a ruak hiau tawh a, ka lung a lêng ru angreng. Min thlah nân chaw eikhâwm an siam a, vawiin hi ka kal tâwpna ber tur nî a ni tawh a, Fakhlua te pafa-in in an nghâk a, ka ngaihtuah ang reng.

Kan inkâr boruak pawh a nuam chho ṭan viau tawh a, a chângin kan inhnial a, engkim kan tidunin rinai tak chuan kan inngeih ta phian! A nu leh pa'n a khât tâwkin chanchin min rawn zâwt leh zauh zêl a, Bawiha an ngaih tawh thu an sawi chamchî bawk.

Aizawl pana kan kal tur ni a lo thlen chuan huphurh taktêin ka huphurh thei nia! Kan in luah lumtu awm lova a awm tur ka ngaihtuah ringawt pawh hian hrehawm ka ti a.

"I thawmhnaw chauh keng rawh, a bâk chu keima'n ka ngaihtuah ang," Faka'n kan in chahbi a kawl hmak a, ka tlânbosan dâwn pawh nihlei lo.

Ka hna ka zawm nî-ah min hruai thlap a, nitin min ngaihsakzia ka hre thar deuh deuh bawk.

Keimaha inhnuai room luah ka tum chuan a phal îkhaw lo mai, "A duh duhin min sawi rawh se, ka nuna rawn inrawlh tura thunei phâ chu ka nu leh pa bâk an awm lo," a ti hmiah.

Kan dân pangngaiin tûnhmâa an nupa room-ah kan awm ho leh ta dial dial a, nuam loh tihns pawh ka nei hran lêm lo.

Nitin office kala kan chhuah ziah avangin Siami kutah Bawiha kan dah tlângpuia a theih ang angin a pî pawhin a lo pui bawk a, ka car thar tur a lo thleng ta bawk nen ka chhungte ka sûn hnu-a ka hlim ve ber ṭum a ni hialin ka ring.

"Police uniform nen, car thar nena i chhuak tur chu ngaihtuah i na dâwn mang e," Faka khumah ṭhuin a nui suk suk reng reng a, tukkin hi eng nge a hriat ni! Ka insiam chhûngin min la thlîr ngat ngat nia maw le.

"A ve lutuk a che, nang kha office vêlah engtin nge i tâl kual ka hre bîk em ni?" Kawnghren ka hreng ṭha mawlh mawlh a, "Ka fair ve chiang e, pakhata rinawm bur chi ka nia," tih paha rawn din chhuakin, "Mipa dang lakah ka chân che a nih chuan.." dimtêa ka khabeah dawmin ka mitah tak min en a, "Hmeichhe mamawh ngawih ngawih ka ni hran lo; mahse, nang maha hian ka duhzâwng a kim vek," a sawi zawh rualin ka hmuiah a rawn fâwp ta a.

Fakhlua tluka mipa insûmthei hi an tam vakin ka ring lo. Zanah nise innghêng rialin kan mu dun a, min fawh bâk engtin mah min tih a tum ngai lo va a bulah hian thlamuang takin ka muhil thei tlat a ni.

Duhthawh taka reingial min fawh hnuah min thlah ta ṭâwk a, "Muanpui, sunday hi nau hlan hun a ni a, i nau boral vêl avang khân Bawiha duhaiin kan hlân hat ta sia min dinpui thei angem?" A hmêl a dul deuh ruih a, a huphurh tih ka hre thiam lutuk tlat.

"Maw!"

"Min dinpui mai rawh, a duh duh chuan min sawisêl se, hetia kan inkawp chhona nih chuan hriat hun an la nei dâwn thova.." a ti leh a.

"A chiloh lutuk.."

"Khawngaihin, keimah chauhva Bawiha dinpui ai chuan kan hlân lo mai ang," thinrim ang a lang miah si lo hian min chhuahsan nulh a, ka ngaihtuahna a kal thui ang reng.

Kei ka lo din ve rîkngawt chuan sawisep kan kâi thuai dâwn a, chu chu ka duh si lo. Mahse, Zosangmawia thla nga a tling dâwn tawh a hlan loh chi niin ka hre chuang bawk si lo, a va han khirh tak!

Nilêngin ka ngaihtuahnaah a awm reng a, a ṭha ber hriat a va har si êm!

"Mama, Muanpuii tel kher a ngai hleinem, miin i dinhmun an hre vek thova eng mah hreh nachhan tur a awm lo," zanriah ei laiin a nu'n a ti ta a. An ngaih dan a ni bîk vak lovin ka hria.

"Keimaha nau hlan ka tum lo.." zawi supa tiin a thlêng nen a tho zui nghâl a, "Nangmah ringawt inngaihtuah lovin Muanpuii dinhmun chhût ve rawh.." Pa Rosanga a rawn inrawlh ve ta bawk a, kan boruak a nuam chiah lo.

"Lalmuanpuii ka ngaihtuah vang alawm le min dinpui se ka tih, nakin lawkah ka nupui a la ni thuai dâwn alawm," Fakhlua'n pâwr zeta a tih chuan a nu leh pa an ngawi hmak a, hepa hian eng nge a hriat tâk le!

"A dik em Muanpui, Mama nen inneih in tum em ni?" Pa ber aw a dam ta vak lo.

"Englo..ih.." inneih lam kan la sawi ngai miah si lova chhân mai dan tur ka hre lo.

"Ka rin dan vêl chiah a ni, nangmah bâk i inngaihtuah lova i nu leh pa pawh i ngaihtuah ta lo a nih hi.." a pa bawkin a ti leh ta a. Nuam lo ka lo ti ve ngawih ngawih a, ka inrawlh ngam chiah bawk si lo! Faka hi an duat em em a, kehthei dawmin an dawm takmeuh tih ka hria. Mahse, nupa kan ni lova Biak ina nau va hlan dun kha thilmawi a ni miah lo tih an hrethiam ve vek.

"Ka ngaihtuah lohna che u ka hre lo.." ngawi duh lova a la chhân takzêl avangin a pa thinin a tuar ta lo. "Lalfakhlu, thilmawi leh ṭha chu i nu leh pa hian kan hria, i nupui thihna a la rei lova nupa niâwm ziazânga lo awm kha kan tân a zahthlak tih te chhût ve rawh, Muanpuii tân pawh a zahthlâk tho.." Tuma'n chaw kan bâr zawm tawh lo. Fakhlua thinrimin kawngka a khar ṭhuai a, a chhuak zui daih bawk.

Siami nen ngawirengin hmun kan tifela tumah kan ṭawng tawh lo! Fakhlua mize inthlâk thut thut hi ka a chhan pawh ka hre hek lo.

Bawiha nen khumah kan mu a, rilru hrehawmna hlîrin ka khat a ni ber mai.

Zing khawvar thlengin Faka a rawn hâw ta lova ngaihtuah ru viau mah ila biak erawh ka tum lo.

"Muanpui, nizanah Mama a lo hâw em?" Kan room-ah a nu a rawn lût a.

"Aih haw lo.."

"In inbia em?"

"Be lo.." a rûl tâwk chiahin ka chhâng zêl a, "Ka call-a a la thei miah lova biak han tum ve chhin teh."

"A duha chhuak a nia, min be duh nise min lo call daih tawh ang, biak hmasak ka tum lo," ka ti tlang hmiah, kei hi chu thil zêp leh thukhuh nei vak lova sawi pawp mi ka nia, ka rilru dik tak ka sawi bawk.

Ngaih dan nih loh hmel zeta Faka nu chhuak chu ka ngaipawimawh duh bik lo. An fapa a nia an zilhin an hau thei a lâwm, keia lo inrawlh ve sekna tur awm nghâl lo chuan.

Nilêngin a chanchin hriat ka nei lova office-ah pawh rilru nuamin ka awm thei lo nâa biak erawh ka la tum chuang lo.

"Miss Muanpui Falkland lamah kan kal a ngai tlat.." kan thawhpui constable pakhatin min lo koh chuan rangzetin ka ding chhuak a, "Eng thilah nge?"

"Ka la hre chiah lo, proxyvon an man a ni âwm e.."

Gypsy pakhatah kan inhnawh khawm a, Falkland lam panin kan tlânchhuak ta a.

Falkland kan thlenin Faka te workshop bulah Gypsy a ding ta dat mai le!

Hnathawk ho hian tuemawni an lo kîl tuau a, an kârah ka va inzep lût ve ta a, ka thil hmuh hi ka awih thei lo!

Workshop kawtah Thlamuani ruih hmêl zetin a lo ding a, Fakhlua pawh ka hmu tel! Rûi hmêl erawh a pu lo.

"Muanpui.." tiin a phun sup a.

Pan hnâiin thil awmzia ka zâwt ta a.

"Ka car-ah proxyvon an man a lâwm le.."

"Eng a?"

"Tukinah ka car-ah proxyvon an man a, min report tu pawh Thlamuani a nia," a ti leh a. Ka thin a sa phat mai.

"I ta ni lo pui an manna chhan tur ka hre lo, i lo kawl miau te chuan.." ka ti hmiah.

"Min ring miah nange?" Ka mitah tak min en a, a rilru a hah hmêl kher mai.

"Nizan zankhuain i lo hâw lova i awmna chin ka hre hek lo, vawiinah pawh i chanchin i rawn sawi leh chuang lova Faka, ka chhan thei lovang che tih ka hlau khawp mai, Thlamuani nen ininkawp a nih ngat chuan Jail bang i zût lovang tih pawh ka sawi thei lo.."

Chumi hnu chuan an pahnihin Gypsy hnungah constable pahnihin an ṭhutpui ta a, keiin Faka car ka khalh thung.

Ka zak ngawih ngawih a, Faka hian a rûkin damdawi a lo tive reng em ni ang, chu erawh nitheiin ka hre si lo! Thlamuani puh ngawt dâwn ila kuta manna kan nei hek lo. Ka thluak a buai takzet.

In lam phone-in a nu leh pa Kulikawn police station-a lokal nghal turin ka hrilh a, thuchiang eng mah a la awm lo bawk nen a kimchangin eng mah ka hrilh lo.

Station kan thlen hnuah midangin an lo buaipui ta a, Thlamuani a la ruih êm avangin eng mah zawh tlâk a ni lo va Faka pû (Company manager) pawh a rawn kal ve a, a thinrim hmel khawp mai.

Lalfakhlua hian eng pawi nge a khawih tâk mai le!?

Thlamuani nen an intiamrual a nih vaih chuan a pawi thui khawp ang le.

Lock up-a an dah hnuah pawh Faka hmu turin ka dâk chhin lo hrim hrim a, thil tisualtu chu ka chhungte anni emaw ka pasal, ka hnâivai pawh nise police hotu lal pawh ni ila ka chhan thei dawn lo tih ka hre vek.

A chhan chu 'Dân bawhchhia' anni tlat a lâwm.

Faka nu a ṭap pûr a, demna mitmenga min en pawh ka hmu reng, a pa erawh a dân pangngaiin a confi viau.

"Ka fapa nupui tur a tân nang hi ka duh hauh lo che, Zomuani nena tehkhin phei chuan engtihna mah i ni lo." Faka nu'n min ṭawngkhum dan chu pâidam mai mai chi a ni miah lo. Engvanga min rawn dem ve ngawt nge a nih!Mahse, ka nau a la fak tal a lâwm le.

Zawhna chi hrang hrang an zâwt a, Thlamuani nen an khung hrang bawk a, Faka chhânna chuan ka thin a ti sa phat phat thei nia!

"Nizanah car-ah ka riak a, ka ruih deuh avangin eng mah ka hre lo.." tia a chhânna chu ziakin an record nghauh nghauh a, nizana a chhuah tauh khân zû a in tihna!

He mihring ngaihtuahna tâwi lutuk hian min tibuai vek.

Fakhlua zawhna an zâwt zo tawh a, zanin chu lock up-ah a riah ve ngei a ngai dâwn e. Thlamuani rûi hi reh se zawhna an zâwt leh ang a, chuta ṭang chuan engkim a chiang turah ngai ang.

Thlamuani hi keimah ngeiin ka dâwp dâwn khawp mai. Ka hriat duh ka hriat hmâ chuan na lua awm lovin kut ka thlâk lovang tih tunge sawi thei?

Lawngtlai lama a case khawihtu ka ṭhianpa kha call-in a record neih sa min lo thawn turin ka hrilh ta a.

Kan nunah a rawn inrawlh nasa bawk a, a nihna dik tak hâi lan a hun tawh viau e.

Bâr kâr aṭangin Faka ka va bih zuai a, ka mitah chiang taka min enin 'min ring rawh' tiin a phun sup a.

Ni e, ka nau pasal leh Zosangmawia pa hi damdawi zuar tur khawpa mipa nêp a ni lo tih ka thinlung hian a hria a ni.

Thlamuani ruahmanna vek tih ka man thiam tawh a, zanin dar sawm hma ngei hian ka hlal er dâwn khawp mai..

Faka nu thinrim hmel leh a pa rilruna hmel ka hmuh hian ka thin a rim thar riau.

"Pa Ro, lungngai reng reng suh, ka kutah engkim dah rawh.." tiin a dârah ka bêng thak thak a, "Muanpui, theihtawp chhuah rawh aw.." tih bâk a sawi lo.

A nupui erawh a chhuak tau nghat nia. A ve lutuka...

B<++[BeckirafARenthleI]+>RR

SEGUNDO

Becky Rafa Renthlei

Chapter-28

Lalmuanpuii

Police station-ah ka la awm reng a, Fakhlua pawh Lock up-ah a la awm bawk a, zân dâr kua a rîk chuan Siami'n min lo call a, "Bawiha chu rawn ngaihtuah rêng rêng suh, keima'n ka lo buaipui vek ang," a tih chuan ka hahdam huai huai a lâwm le.

"A theih hrâm chuan a pi kha buaipui tîr loh i tum dawn nia, a ṭûl a nih leh ka lo hâw mai ang,"

"A ngai teuh lo, u Faka buaipui phawt rawh, ka pi a rawn âng chiam a! Muanpui, indang daih rawh.." ka rin dan vêl chiah. Mahse, Zosangmawia enkawl ka intiam tawh a, Lalfakhlua nu vâng mai mai a hnual ka tum teuh lo.

"Ka lo hâw hunah kan sawi ṭha dâwn nia.."

Kan inbiak zawh hnûin Sir Sanga'n min rawn ko ta a.

"Muanpui, Thlamuani a biak tlâk tawh e, lo inring rawh," a nui sâng a, ani hi ka nêl ve ber leh ka kawm tam ber a ni. Tlangvâl sâng lam leh chêr deuh a ni a, ani tluka police uniform inhmeh mipaah ka la hmu lo, a hmel fai vang leh a sam phir deuh te hi a inhmeh riau.

"Aw le, na lua awm lova hlap turin min duh em?" Fiamthu deuhva ka tih chuan, "A record neih kan en hian a chung a pik riau ang, a inpuan hmâ chu kan inchhâwk liam liam ang chu." A ti ta a.

Mipa chu mipain an dâwp a, hmeichhia pawh chuti tho. Zaninah hian hmeichhe awmchhun ka ni hlauh hi ka vanneihna a ni ta. Thlamuani tân vanduaina.

Fakhlua ka hmu zawk a, kan pû hnenah a chanchin engkim ka hrilh vek a, bâkah an lo hre khawp mai, a hnathawhin a lo zir mai bâkah police-ah record eng mah a nei lova chuti tehchiama ngaihtuah zui tur a awm lêm lo. Thlamuani a inpuan hma leh Fakhlua a fihlîm hmâ a nimai.

Vanlalthlamuanpuii an dahna hmunah Sangzuala'n min hruai lût ta a, min hmuh ruala a makti hmêl chu pui tak a ni.

"Nang nang, Ui hurnu.." zu ṭhing rim a nam hum hum a, a hmêl ṭha tak ṭhin te kha tenawm lamah a kal tawh zâwk.

"Mak i va ti âwm ve Hminglian," ka tih leh lek phei chuan min sawp hrep châk hmêl a pû.

"Lalmuanpui, i châk lovang," zâm miah lovin a la ti nia!

"I ṭawng tam mah mah lo maw ka pi? Khatiangin Police be rêng rêng suh.." Sangzuala'n a ti chang fak a.

"Ka bialpa min chuhpuitu Lalmuanpuii hi ka hlauh i ring em ni?" Ngeiawm zeta a nui lâi chu bêng sawk lo turin ka insûm nasâ.

"Sanga, a kâ hi a kaw ve khawp a, a tih pin dan ka hria alâwm," tiin Thlamuani hnaih tâwkah ka va ding chilh ta a.

Ka chhîp aṭanga ka kelêr thlengin zuk en chhuak dap a! "I police uniform phuahchawp kha eng atân mah ka ti lo." Tih pahin a ner sawk a, henu hian zû mai ni lo damdawi a ei têl a nih ka ring rum.

"Thlamuani hi in medical ta em?" Tia Sanga ka zawh chuan, "Zû bâkah proxyvon a bâr tel bawk." A ti ta a, ka ring dik chiah.

"Lawngtlaia ka ina i lokal hma aṭang daih tawh khân ka ringhlel che tih hria la, ṭha taka i inpuan chuan kut i tuar lovang, chuti nilova i zêp a nih chuan i taksa khâ tûn anga himdam a ni dâwn tawh lo tih hria ang che." Hun danga midang ka dâwp ṭhin laia ka tih ang thovin ka aw a dam thlap a; mahse, ngainatawm erawh a ni leh miah si lo.

"Ve khanglâng che chuan kut min thlâkna chhan tur chu sawi ta che, Fakhlua nen kan thawk dun nge dun lo pawh i hria em ni?"

"In thawk dun a nih leh inpahnihin Jail-ah i lût ang a ti nia! Chuan kut thlâk theihna dân che ka nei bawk." Tiin dim vak lo hian a lû-ah tiangin ka nawr deuh sawk a, a la nui ṭhâw nia maw le!

Sangzuala'n, "Muanpui, i hun a in ṭan e.." a tih chuan kâwng dawm meuhvin Thlamuani ka en a, a mitmenga hlauhna leh zâmna rawn lang dawt zut chu ka hmuh hmaih lo.

"Kut thlâk kher che ka châk lo. Nizana Fakhlua car-a damdawi kha tû ta nge?" Tiin ka zâwt ta a.

"Ka hre lo, a mah zâwt ta che.."

"Thlamuan tû ta nge, engtin nge Faka nen in inhmuh theih?"

"A mah zâwt rawh.." a la ti ṭâng ṭâng maw le!

Ka thinin a tuar ta bîk lo. Police tiang mûm hnûm hlarh, hun danga ka lo hman fo ṭhin chuan a hnungah vawithum ka'n hlap a nih kha. A ṭê ṭhat a, a er ngâng ngâng bawk.

"Lalmuanpui, tenawm mihur..etc" a ṭawngkam a chhe bawk nen sawi chhâwn tlâk pawh a ni lo. A aia nâin a ke, a bân leh a hnungah ka'n hlap tak tak mai chu(h). "Duh tâwk rawh, khawngaihin.." a ṭap pûr tawh.

"Tu damdawi nge, i tâ ni na nâ na engvangin nge Lalfakhlua tuartîr phêt i tum?" Vawikhat dang ka hlap leh a, a er zawk thei nia.

"Muanpui, min ngaidam rawh..khawngaihin..ka sawi dâwn.." a ti bah nawk nawk a, Sangzuala ka mitmei vat a, note book nen a lo inring thlap tawh a, Thlamuani ṭap ṭawng zuah zuah thusawi chu a lo ziak par par a, henu hi mi namai lo tak a ni.

Fakhlua a duh vâng leh an inkâra inrawlha min hriat avanga a thinrimin nizan khân a car-ah proxyvon a lo dah a nih chu! Tenawm lutuk.

"Muanpui, Faka'n thiam lohna a nei lo, nizanah keima'n ka bum a nih kha, ka motor chhiat chhuanlamin ka va phone a, a awmna hmun min hrilh a, a lo ruih deuh avangin a car dashboard-ah ka dah ta kha a nia.." a sawi zawng pawhin a ṭah a chhuah hmêl viau.

"I thil tih pawizia hi i la tawng baw dâwn chauh alâwm.." Thlamuani inpuanna zawng zawng Myanmar aṭanga a rawn ken dan te, a supply list zawng zawng te nen lam kan hriat meuh chuan zîng dâr thum a ri tawh a, ka chau hnawk thei nia.

"Muanpui, i ṭhianpa nen hâw phei tawh rawh u le.." Kan pu-in a ti ta a, Faka pawh an rawn hruai chhuak nghâl a, "Pu Fak, a zia lo hle mai min hrethiam a ni ang chu, Muanpuii'n Lawngtlai lamah a lo chhuizau hmasa hlauhva i fihlim hma ta a nih kha, Thlamuani hming tak hi Lalhmingliani a ni a, nakin zêlah pawh i fimkhur ngei ka beisei."

Station kawt thleng min thlah a, Sangzuala'n, "Hey, Miss, Thingpui i show thei naktukah, i hlap a nat hmel ropui si.." a tih chuan ka nui ta hak hak a. "Lutuk tlat, naktukah inhmuh kan tum dawn nia.." tiin kan inmangṭha ta a.

"I car-ah chuang la, kei ka car-ah.." Fakhlua hnena ka tih chuan min rawn din hnaih a.

"Pawi ka ti lutuk, ka tihpalh takzet.." a ti sup a.

"Kal mai teh.." biak châkna ka nei lo hrim hrim.

"Muanpui, ka thusawi.."

"Faka, ka chau a nia, zanin hian nang mah vângin ka duty tih hre rawh.." min chhânna pawh ngaichâng lo hian car-ah ka luhsan hmiah. Ka chau tak tak bawk.

An in ka thlenin kawngkhar a lo inkalh lo hlauhva dimtêa hawngin inchhungah ka lût ta a, sitting room-ah Faka nu a lo ṭhu reng chu niin!

Ka thâwm hriain a rawn dâk a, a ṭap a nih hmel!

"Khaw'nge Mama?" A ti nghat a.

"Ka hnungah a rawn tlân.."

"Muanpui, vawiina ka ṭawngkhum dan che kha.." inthlahrun hmel takin a ti ta a.

"Sawi âwm leh âwm loh hre rual chu i nia lâwm, heta ka awm ve reng hi a ṭûlna ka hre lo." Tih pahin inchungah ka chhohsan ta a.

Thil rêng rêng a nihna ang ang a sawi tlang pawp hi ka mizia a ni a, bâkah thil zêp hni hne loh hi police ka nihnain a ken tel a ni bawk.

Khumah Siami leh Bawiha tui takin an lo muhil a, ka thawmhnaw hlîpin bathroom-ah ka lût tlang tê tê a, khua avâr dâwn hnâi tawh a mutna hman a awm tawh lo hrim hrim.

Ka taksa a chauvin ka zawi hnak a, dik tak chuan Fakhlua chezia hi huat ka duh; mahse, ṭha takin thil awmzia sawipui ila tûna a nun dan hi chu ṭha ka ti lo. A insiam ṭha thei dawn lo a nih chuan kalsan mai hi thil finthlâk a ni.

A duh hun hunah zû a rawn in ringawt a, rûi buaiin awm lo mah se hetiang mipa hi ka kawppui a tân ka duh lo bur.

Ka inbual zo room-a ka luh chuan sofa-ah a lo ṭhu a, ngun taka thil ngaihtuah hmêl a pû! Siami ka hmu tawh miah lova Faka hian a kai tho nge tih pawh ka hriat si loh!

"Muanpui, inbia ang,"

"Tûnah chuan ka chau rih, chuan minti mualpho khawp mai." Ka ti hmak a.

"Ka hria a lâwm, ka insawifiahna ngaihthlâk i tum lovem ni?"

"Insawifiah ngâi mipa hi ka ngaisâng lem lo, thlathar aṭangin in ka luah hrang ang, Bawiha pawh keima'n ka enkawl mai ang.." khumah ka lâwn a, Zosangmawia thla nga mi lek enkawl hi engvangin nge ka huphurh lêm ang lê.

"Ka fapa hi bungrua a ni lo, a nu û i nih vâng khân enkawl theihna dân i nei miah lo a nia," a ṭawng ring hran lo nâa a lâwm lo awkâ chu ka hai bîk lo.

"I duh hunah i riak bova, nizan i mualpho zia kha in en lêt rawh, i fapa a ni tehmeuh mai; mahse, amah ngaihsak lova khatiang nun i neih dâwn chuan kei hian kawppui a tân ka duh lo che, a ṭûl a nih chuan court pawh kan thleng mai ang, Zosangmawia ka enkawl theihna tur a nih chuan.." tiin a mitah tak ka en a.

"Nizan vâng ringawta thinrim i ni lo, ka nû ṭawngkhum dan che kha i ngâi hua a nih kha.." a ti ta a.

A sawi dik chiah. Châwmhlawm ka ni lova ka phâk tâwkin an chhungkaw hna ṭûl ṭûl ka khawih bawk. An tupa pawh ka awm chuan ka kutah an dah hlâwm tawp a, nitin office ka kal chung pawhin ka thlahthlam hek lo, chuti chunga a nu min tih dan kha ka pawmzam âwm lo em mai.

"In luah tur ka zawng ve phawt ang, nizana an man chungchângah che khân mawhphurhna ka nei em ni? Thinrim titau chunga chhuak lah ka ni hek lo, i ruih kâwi mai mai chhung khân i fapa hnutê hnek tur siamin mutmu ka tuah lo tih te pawh i hre tawp nâng.."

"Muanpui, khawngaihin min ngaidam rawh ka nu pawh ka lo bia ang e.." a ti sup a.

"Lalfakhlu, ka rin i ang lo hlê a ni, i nupui boral avângin theihtawp chhuaha i fapa i ngaihsak ka rin tehlul nen eng emaw hlekah titauvin zu in i tum a, i manganna leh i rilru hahna chhâwk zangkhaitu tur chu i nu leh pa anni lova kei pawh ka ni hek lo. Pathian, nangmah dintu leh siamtu che khâ a ni tih i theihnghilh ta em ni?" Duhthawh lutuka ka ṭawngna lamah ka thâw a chham dâwnin ka hria.

"Ka tihpalh lutuk ka tiam a che, vawikhat mah zû ka in tawh lovang, ka inbual ve zuai ang a lo chhuak suh aw, kan sawizawm leh dâwn nia.." tih pahin towel a la a, bathroom-ah a lût zui ta a.

Ka nu leh pa, ka nau Zomuani thihna te, ka nuna thilthleng engkim hi mihring aṭanga tawrh zawh rual a ni lo; mahse, 'Pathianin kan ṭhatna turin engkim a thawk ṭhin' tih kha ka thinlunga ka vawn reng vâng zâwkin beiseina nen ka nun ka hmang ve ṭhin kha a nia, mite ang a piangthar ṭha hluah ni lo mah ila Pathian vâng chauhva beidawnna khur a ta chhuak thei ka ni tih Lalfakhlua hian a hriat ve a ngai a ni.

Ka mizia erawh a khauh far a, nu leh pa âi awhtu ka nih miau avangin ka kum phû lovin ka puitling bawk. Fakhlua nu min ṭawngkhum dan te kha a sawi zawh rual ruala chhân ve ka châk asin. Fahrah ka nih vânga min hmusit ni tlata hriatna ka nei a, nâ ka ti.

Pathian zarah hna chhete ka nei a, in leh lo nghetsa ka nei bawk a, an fapa lo pawh pasal tur te chu ka hmu ve lutuk; mahse, ka thisen zawmpui Zosangmawia vângin ka insûm hram hram kha a nia, boruak ṭha lo kan neih hmaa indan hi a fuh ta in ka hria.

"Rei lo tê muhil ila.." Faka inbualzo a lo chhuak tawh a, towel chiah vengin khumah a rawn ṭhu a.

"Ka hnaah kal a ngai alâwm, nangpawh ka rualin i lokal a ngai a nia," ka ti sap a.

"Eng nge ka tih ve dâwn?"

"Thlamuani pawh i rawn hmu ve ang chu, an court hmain nangma chungchâng bikah sawi duh i nei lâw'm ni! A puhna che kha i ngaidam dawn nge?" Ka tih chuan a ngawi rauh rauh a, chutah, "Engtin nge ti ila ṭha ang?" Tiin min râwn ta a.

"I nu leh pa te nen sawiho rawh u, engah mah inrawlh ka tum tawh lo."

"Min ngaidam rawh ka tih khâ, ka thiam loh a ni, ka nu leh pa ka zah lo tihna ni lovin an thû ang diak diaka awm rual ka ni tawh hleinem," ka kutah a rawn vuan a, "I tel lova awm ka duh lo, ka duh hlawl lo, vawikhat chiah hun min pe leh rawh," a ti ta a.

"Fapa i nei a, hna ṭha tak i nei a, nu leh pa nang mah hmangaihtu che i nei bawk, kei hi min han en ve teh! I neih ang eng mah nei ve lo hian ka hringnun ka hmang mêk asin," ka ṭah a chhuak titih nia!

"Hlim taka Lawngtlai kan chhuahsan nî te kha i la hre ve a nih chuan nizan hmasa a rawn hâw lova in ina min hnutchhiah ringawt te kha ka tân a nawm i ring em? Min ngaihsaktu tur bera ka ngaih che i ni.."

"Ka hrethiam alâwm, min ring rawh.." hrehawm a tih ve hmêl hle a, Bawiha a rawn harh tâk avangin ka ngaihven san ta a.

Tukṭhuan kan ei laiin vawikhat mah ka ṭawng lo, Faka nu hmêl ka hmuh hian ka thin arim dâwn zêl a, min hmusit tih ka hriat vâng te pawh a ni mah na.

"Muanpui, i va ei tlêm ve?" Pa Rosanga'n a tih chuan, "Ka ril a ṭâm lutuk lova.." ka ti sap a.

"Ka nu, inbiak a ngai a nia," Fakhlua pawh a tho chhuak ve nghâl a, tûn hi thil sawi hun a ni.

"Pa Ro, rem intih chuan in luah tur ka zawng ve mai dâwn em maw ni?"

"Maw!" Fakhlua a meng rum sawt a, chiang deuhva min en chung hian, "Khawi hmunah pawh awm la ka zui zêl ang che, hun min pe rawh tih ka sawi lovem ni? Ka dik lo tih ka hria; mahse, ka dinhmunah hian ding ve-in mahni chanah dah chhin la i hrethiam mai ang," a ti nghut a.

"Chutiang lam a ni lo, ka nau a awm tawh lova hetia ka lo awm ve ngawt hi thil fel ber pawh a ni lo.." Tih pahin a nu ka melh kher a, a meng khup lap nia!

"A nih chuan indang chhin ta che eng nge ka tih dâwn i lo en dâwn nia, ka duh chu ka duh a ni mai." A nu leh pa awm lai rengin zu han ti a!

Chumi hnu chuan eng mah sawi tawh lovin inchungah ka chhohsan ta a, in dang ta ila Faka a lokal chhên emaw a ni ang a kan mualpho thui tulh tulh mai lovang maw!?

Inbe lêm lovin kan office thleng zakin kan inphur phei ta a, a ngawi ngul a, car ken ve ka tum pawhin a phal lo.

"Miss Muanpui, nizana ka sawi kha aw.." Sangzuala'n min lo nuih var var a, Faka hmel nelawm loh zet chu hmu ang pawhin a lang lo.

"Teh reng mai, restaurant kal duhna deuh bîk i nei em ni?" Ka tih chuan ka dârah vuanin, "Chiah maw, hmun dangah min chhuahpui dâwn chuan kalna tur ka hria.."

"Hun âwl kan neih dan a zir a nimai," Tiin Faka kan pu room-a a lût lai chu ka melh zauh a.

"I bialpa kha a lâwm lo chiang, ka run luih a nih kha." A la ti tak deuh deuhva.

Darkâr chanve dâwn hnuah Faka a rawn chhuak a.

"Muanpui, nizanah i hah sia in pu in chawlh a pe che a ni chu.." tiin intitatu deuh hian min kuah a, amah a lianin a sâng si a, a inchei nalh thlurh bawk nen kan thawhpui hmeichhe dang awm ve te chuan an en duh hlê a, nizana lock up-a awm kha a ni tih hriat pawh va va hre hlawm suh.

"Sanga, ka treat leh dâwn lo che a nih hmel," ka nui var var a, "Nidangah a ni mai zanin chu ka lo lêng maithei a nia.." a tih chuan, "Kal ang le," Faka'n ka kutah chelhin min chhuah nghâl hmiah a, hepa hi eng nge a hriat le?

"Office kal nawmna riau te, mahni a in luah hran châkna rilru i put chhan chu a hriat mai a lâwm," car kawngkhar min hawnsakin min nawr lût a ni hrim mai.

"Mí ina awm reng ai te chuan châk ve e.."

Min chhâng tawh lo hian chak zetin a tlânchhuak ta a.

Lalfakhlua hian thikthu a lo nei ve chiang mai. Sangzuala lah a chimawm thiam si a, an inmil lo tawp ang le!

"Mipa i mamawh a nih chuan ka awm tih i hriat kha, kei lo midang neih tumna rilru i lo pu ngawt ang e, i pa thusawi i bawhchhia tihna a ni mai.." zawi supa tiin min melh zawk a.

Lalfakhlua mize mak deuh deuh leh pa ru riaute, mahni inrintawkna ngah tak mipa a nihna ang te hi Sangzuala neih ve loh thil a ni.

In lamah min tlangpui zuai a, "Lo chhuk duh suh ka rawn lêt leh nghâl dâwn," tiin car a lock nghâl hmiah!

Minute nga hnu vêlah a fapa pawmin a rawn chhuak a, puakpuan leh bag pakhat a rawn khâi bawk a, car chhunga rawn lûtin, "In hualna zungbun kan en ang, tunah innei dawn lo mah ila i kuta zungbun khân kei leh Zosangmawia ta i nihzia a târlang deuh ang chu," Bawiha ka malchungah a rawn dah a, "Â nu hi amahin kan teichhuahtîr khât viau tawh ang.." a nui zui suk a, ka run ang reng.

Police uniform nen min chhuahpui a tum a nia, chupawh a fapa nen lehnghâl!

Lalfakhlua em em hi eng nge maw a hriat thar ni!

Zarkawt lama min tlanpui tâkah chuan Bawiha ka ngaihven san ta a, eng ang pawhin kalsan tum mah ila a theih dâwn loh hmel riau.

Ka chak lohna ber a fapa hmanruaah a hmang tlat mai si a, thluak ve tak a ni.

B<++[BeckirafARenthleI]+>RR

SEGUNDO

Becky Rafa Renthlei

Chapter-29

Lalfakhlua

Lalmuanpuii leh ka fapa nen Zarkawt lamah kan tlân phei mêk a, kan inbe em em lo!

Hmân zan ka che ṭhing lutuk kha ka inthiam thei hlawl lo va ka nu leh pa laka titau ka ni a, Muanpuii ngaih dan tur lam ka lo ngaihtuah tel miah loh khâ ka tihsual liau liau a ni.

Khatia ka chhuak ta kha workshop lamah ka tlang thla nghâl a, kan pûin intur dawmpuiah min sâwm teh tlat a, lungawi loh tawhsa nâk laiin kan lem dun ta a lawm le. Zomuani te chuanna car sutu, Sumo driver pawh Jail-ah a awm thû te a lo sawi luâma duh aiin ka lem hnem ta deuh bawk nen car-ah ka mu hahdam a, Thlamuani lokal lai ka hre vuai vuai chauh.

A bâk zawng chu police lo thlen leh Muanpuii thinrim hmel dur khap kha a nimai.

"Faka, zungbun siamtîr kher a ngai em maw ni le?" Muanpuii'n min biak chuan ka ngaihtuahna aṭangin ka harh zawk a, zungbun inbuntîr hi inzui nghehna leh inneih nghehna a ni hauh lo nâin mipa leh hmeichhia inngaizâwngte leh nupa min phuar nghettu-ah ka ngai ve tlat.

"Ngai teh reng mai, police Sangzuala tih angrengin an koh chhên loh nân che i bun ang chû." Ka ti kher a.

"Sangzuala maw!?" A ti hâ a.

"Ni e, Sangzuala êk bathlar sâng satliah leh ngo hluak khâ i ngaina riauvin ka hria,"

"Lalfakhlu, khatia ṭawng kher a ngai lovang," ti hmakin tukverhah a dâk zui daih, ka hmingpum hian min ko ang lawl lawl a, mî hmuh laiin ka fâwp hrep nâng a.

Zomuani nen inneih zungbun kan chhertîrnaah khân a û zâwk ka hruai ta! Rangkachak kual sîntê simple zet chuan ka mit a la hlê a; mahse, Muanpuii'n a duh leh tlat lo.

"Silver chher chawptîr ang," tiin dâwr nghâktu chu a chher man a zawt nghâl a.

"Muanpui, chher chawp kher a ngai lo an neihsaah hian kan duhzâwng thlang mai ang, tûna bun nghal ka duh.." ka tih chuan a ner sak a, "Naupang chhia pawh i nih loh kha, bun ve rau rauah common deuh ka duh lo.."

Chumi hnu chuan kan police 'thinchhiain' thû kan zawm leh ta nge nge e, a bun turah 'Fk' tih kan chhuttîr a, ka bun turah 'Mp' tih kan chhuttîr ve thung.

Zosangmawia diaper leh kawr hâk tur te Nestogen leh ama thil tur kan lei leh a, Zirsanga'n min lo call ve mial!?

"Ṭhianpa, zanin tlaiah chaw lo ei rawh u, innu hmuh a khât a lâwm," tiin min fiam zuk a.

"Kan nu thu thu a nimai, tunlai chu ka score ṭha viau lo.." Lalmuanpuii'n min lo melh ralh a, 'Kan nu' tih kha a a paiṭawih leh dawn lo chiang!

"Nia, i chanchin ka lo hria a sawi tur a tam, min lo hrilh rang ang che u," kan inbiak zawh rualin, "Kan nu tih kher a ngai em ni?" Hah! Ka va ring dik chai chai ve le! Muanpuii a tûm hmak a.

"Kan nu i nia lâwm, Pathian hmáah thutiam chham lo mah ila ka thinlungah thutiam nghet deuh ka chham diam tawh," nui duh miah lova ka tih chuan, "A Lalfakhlua thlâk êm mai," zuk ti a!

Zirsangliana te ina chaw ei a duh leh duh loh ka zawh chuan phûr zet hian, 'I nu tiger-i tlânbosanna remchâng a nih chuan duh mai ang' a ti ta a.

Ka nu kha ka ngei ve khawp mai. Muanpuii thiam loh a ni lova police station, a hnathawhna hmuna khatia ṭawngkhum kha thilmawi ni nghâl lo chuan ka ṭan eih lo. Ni dang zêlah pawh Muanpuii dikna a nih phawt chuan ka nu a ni emaw ka pa pawh nise ka zah vak dâwn tawh lo. Zomuani anga ti dêm dêm a ni lo tih an hriat a hun tawh.

Uniform nena bazar chhunga a teikual chu an en duh hlê a, Zosangmawia ka pawm thung a, thil manto a thlang kher lo, a mamawh aia tam eng thil mah a lei bawk hek lo.

Tuna a car hman lai hi Loan-a a lâk a nih vângin thlatin rulh a ngai a, chuti teh luain pawisa a nei vakin ka ring lova. Keiin tlêm azawng ka belh bawk a, Zomuani pawisa khâwl ka pêk kha a la hmang miah lo bawk.

Mipui an tam bawk nen bazar kan chhuahsan thuai a, thawmhnaw a uar lo hlê tih ka hre daih tawh a, ei leh in erawh a duhtui ang reng viau! Nitin a khawsak phung leh a mizia zirchian deuh deuh ka tum ta a, keipawh amah vânga Jail bang zût lo mai ka ni.

Thlamuani a hlap zân khân Lalmuanpuii hi ka rin ang a nih lohzia leh a dawhtheih zia ka hrechhuak chiah. An thâwm ka hre pha ve vek a, Thlamuani ṭawng zuah zuah lai te khan kut ka lo hûm ruh ngat ngat a, Muanpuii aw dam thlap khauh deuh far erawh chuan min hneh rû riau.

Vawikhat mah zu in tawh lo turin ka intiam phah hial a nia! Zomuani pawh khân zû a ngaithei ṭhak lo; hemite unau hi ka tâna Pathian min pêkah ka ngai nghet hmiah a, chhuah ka tum lo hrim hrim, theih phei se chuan nupuia neih rum rum ka duh hial! 'Ka hmangaih che' tia hmeichhe bula sawi kûr dup chi mipa ka ni lova ka duhah erawh ka chiang thung.

"Faka, inah lêt kher lovin Zirsanga te in pan nghâl ila.." restaurant aṭangin kan chhuak chiah a.

"I thawmhnaw i thlâk duh lo em ni?"

"Duh hran lo ve in ina haw saw ka châk fahran lo tun dinhmunah hi chuan.." ti sapin ka fapa hnute a pe a, ka hriatthiampui khawp mai.

"Ka nu hi hrethiamin dawh hrâm hrâm la ka ti khawp mai, i diknaah chuan i lamah ka ṭang zêl ang," ka ti ta a.

"I remtih chuan in luah hrang ila Bawiha leh Siami ka kawl ang a, i duh hun hunah i lokal thei tho a.."

"A teuh lo mai, ka kiangah, ka hnenah i awm ang, kan inkâr chu thuhran nise ka enkawlna hnuaia awm tur i ni, khatiang lam kha rawn sawi chhuak tawh suh aw.."

Zirsanga te in panin kan tlân leh ta a, an fanu pawh ka hmuh lohna a rei deuh tawh a, Zomuani boral hma chiaha nei khâ annia Zosangmawia nen kumkhat chhuak anni. Thlakhat vêl chauhvin an inthlau bawk.

"Awi! Form nen engtizia nge?" Mafeli'n ka fapa a pawm nghâl a, Duati leh Rafaela school kal an la bâng lo tih a sawi nghâl a Rafaela ka hmuh châk tehreng nen.

Zirsanga'n Muanpuii a fiam zuk zuk a, "A ruih leh chuan lock up-ah khung hmiah hmiah ang che, mâwl ṭeh ṭuh lutuk mai," a tih ri ka hriat chuan Zirsanga ka melh rum ngial a, a nui huk nia!

Chhungkaw pangngai dik tak anni tawh a, an phuisui viau bawk. Arini te nupa vawiin tlaiah an lo thleng dâwn a, an fapa check up a ngai niâwm tak a ni, kan inhmuh lohna a rei viau tawh.

Muanpuii leh Mafelin eirawng an bâwl a, Mafeli thawmhnaw a hâk hawh chu a inhmeh reuh phian! An nula pakhat zâwkin Zosangmawia a paw muhil a, kei leh Zirsanga'n a motor kan check thung.

"Faka, innu lung hi phun vat la, a rang lamin nupui nei rawh, i fapa in nikhua a hre chho zel ang a bâkah nupa nilova in khata chêndun reng hi thil mawi a ni lo a, Zomuani thihna pawh thlaruk a tling mai dâwn a, kumkhat hnuah lungphun hmiah la a pawina a awm miah lo a nia.." a tih chuan ka pawmpui hmiah.

"Kei chuan ka duh reng, Muanpuii ka vêngthâwng deuhva lehlamah a nau a ni a, rei pawh riala lova inneih vut vut kha zia lo ka ti maw le."

"A dik reng, amah nen sawi dun ula a pa leh Zomuani lung phun rual ta ula a zia phian ang," a tih leh a.

"Ni e, ka lo sawi dawn nia kumin han ral se boruak te pawh a dang mahna.."

##

Rafaela leh Duati an lo haw tawh a, mipa fa nge nge Rafaela'n min lo panin, "A pa Fak, in workshop-ah min hruai ve tawh la.." a rawn ti lâng lâng a, Zosangmawia aia ka duat loh na a tlêm khawp ang.

Duati'n engkim a hrethiam ve vek tawh a, Muanpuii a en leh dauh dauh zêl a, Zomuani nen an hmêl a inang ka tih tawh kha, naupang tân chuan hriatthiam a har ngawtin ka ring.

Arini te nupa chaw eia kan nghah laiin Zirsanga te inah Muanpuii a inbual hmiah a, Mafeli nen an pumrua a intiat viau; mahse, Muanpuii a inkhaithli nalh zâwk.

"Awi! Faka, inva ngaihawm em em ve," Lalrinpuii rawn lût chu a bengchheng leh hlê.

"Nangni deuh!" Mafeli nau Bawiha leh Arini innei ve ringawt hi thil awihawm pawh va ni suh.

Muanpuii nen inhmelhriattîrna mumal deuh zâwka ka neihtîr hnu chuan ka ri luai luai a, Zosangmawia leh Zirsangate fanu kan mut tlântîr a, Duati leh Rafaela'n an inbih chhâwk reng nia!

Zomuani awm tawh lo mah se Muanpuii'n a âi a awh zo hlê, a ṭawng duh vak lo emaw ka tia Mafeli leh Arini kiangah chuan a ri ve bawrh bawrh a, Thlamuani chungchâng leh min tihvel dan a sawi lai chuan, 'Kei chu ni ila ka nasa viau ang,' Remruatfeli'n a ti ta a. Zirsanga a nui suk suk duh chauh.

"A tih hmingchhiat manah che pawisa tlêm tal phût rawh a nih loh paw'n Muanpuii hlaptîr leh rawh," Zirsanga tak hi chu aw..

Hlim taka zanriah kan kîl hnuah Bawiha kan ngaihtuah deuh avangin dâr riat vêlah kan haw ta a, Muanpuii paw'n nuam a ti viauin ka hria.

"Naupang in chhuahpui rei mah mah.." in chhung kan lût chiah ka nu a lo ṭawng nghâl a.

"Rei vak em ni?" Ka ti sup a.

"Nilênga chhuahpui tawh hnuah hmundangah chaw in la eikualpui a nia," a ti leh hmak hmak a, "Ka fapa a nia a tâna ṭha lo tur chu ka hre ve bawk, thil tesep tê tê sawi chhên hi a ṭha lo a nia ka nu.." Tiin Muanpuii inchunga chho turin ka mitmei a,a ṭawng lo hrim hrim!

"Mama, in awm dan hi ka lawm miah lo a nia.."

"A eng chu nge i hmuh mawh em em le? Muanpuii tân pawh a hrehawm i ring lovem ni, amah hian min duh huam lo tih hria la, dik tak chuan Zosangmawia buaipui ringawt pawh hi thil hautak tak a ni, a hnaah a kal a ngai a, zanah nise a mu ṭha hek lo, chuti chung chuan phun ânna i zawng reng mai," ka ti ve deuh ngat a.

"Siami'n a enkawl thei reng alawm.." a tih chuan ka thin a sa ve deuh phat a.

"Ka enkawl thei tih chu khawi lamah, Siami'n a enkawl thei i la ti a nia, a nu ang tluka hmangangaih theitu chu Muanpuii chauh a ni, i ngaithei dawn lo a nih leh Zosangmawia hi kawl rawh se, a bâk chu i hrethiam tawh mai em?" Ka nu mah nise ka thin a tirim viau.

Remchangah ka pa ka la sawipui ang.

"Kawl se, engtin nge a enkawl chuan ang a?" Tiin ei loh hmêl zet hian a ner sawk a.

"Engvangin nge a enkawl theih loh ang, a pa leh a nau châwmna daih hlawh a nei a, chu mai bâkah kei ka awm alâwm, a ni i ngaithei dawn lo a nih chuan kei.." ka sawi zawh hmâin Muanpuii a rawn lang hlawl a, ka ṭawng tâwp chawt.

"Faka, duhtawk rawh.." a ti sap a, Zosangmawia a pua a, room-ah a chho leh ta a, a ṭah a chhuah hmêl hlê bawk.

Ka thin arim ut ut a, ka nu rum deuhva melhin Zomuani ka zui chho ta a, kan ṭawng kha engzât tak hria ang maw!

A malzia leh a dinhmun hrechiangtu ka ni a, ka nu ka haw kher mai. Amah Muanpuii a sual pawh a ni lova engvanga ngaithei lo thar ta viau nge a nih ka la zâwt khawp ang.

"Muanpui.." room-ah nau a lo âwi a, Bawihah a ṭap uar ang reng!

"Eng ati nge a..?" Tia ka zawh chuan, "Ka hre chiah bik lo mut a kham lo a niang," a ti mai a.

"Khawi ka lo puak chhawk ang che i chau lutuk ang,"

"In luah tur min lo zawnpui la ka indang mai ang," tiin Bawiha min rawn hlân chhâwng a, "Khatiang sawi a hun lo."

"Faka, in chhungkaw inkâr tihchhiat ka duh lo, a ṭûl a nih chuan ka hreh hlei nem.."

Ka chhâng buai duh tawh lo.

Amah nen inhau lo mah ila ka nu vângin kan boruak a nuam lo vek.

Mut hmunah erawh min kuah chial a, "Muanpui, i rilru ka tihnatnaah min ngai dam rawh aw, kei leh Zosangmawia hian kan phatsan ngai lovang che,'' a sam chûl paha ka tih chuan a rawn ṭap chhuak ta phawng a, mah ka ti hlê.

"Lê, i duh tawkin ṭap rawh, ka thiam loh a ni, i duh chuan in luah tur ka zawng dawn nia, Bawiha ka hmangaih loh vâng a ni lova i neihchhun a nihzia ka hria a nia, i nau lung ka phun ang a, Pathian hriatpuinain thihnain min ṭhen hma loh chuan tiin thû kan la tiam ve ngei ang," ka ṭawng dam thlup leh nghet charh chuan Muanpuii ṭap pawh a ti bâng hmiah.

"Bawiha ka kawl i phal tak tak maw!?

"Phal e, i car loan pawh hi rûlh ngai lovin kan vawmhlum dawn nia, rinawm taka min nghâk a nih phawt chuan Lafakhlua hian ka tibeidawng ngai lovang che," kûn hniamin a hmuiah ka fâwp ta vang a, a âwmbawr ruh ṭâlh leh kawh vah chu a vawikhat nân ka chûl dan dan a, mipa thisen lum nei ka ni a, ka phûr nghâl sarh thei nia!

"Faka..." a tâi bâwr vela ka kut dah chu dahsawnin, "Duhtawk rawh le.." a ti ta a, ui ru tak chungin ka thaw chhuak hawk a, a hmuiah bawk ka bûr leh ta a.

Muanpuii ka hmangaih tih ka inhre chiah! A chhan chu kei ang experience nei tawh leh nupui hial nei tawh hian tisa thilah thlêm ila min hnar hauhvin ka ring lo. Mahse, mak takin khawihchhiat duhna rilru ka pu phal lova Zomuani kha ka hmangaih em ka hre lo, a bulah pawh ka sawi miah lo kha a nia, Muanpuii ka en dan leh Zomuani ka en dan a hrang hlauh.

Lalfakhlua hian hmeichhe hmangaih a nei a nih chu, chatuan daih êm ni lo mah se khawvela ka hmeichhe hmangaih awm chhun niturin Lalmuanpuii lakah rinawm ka tum bur...

B<++[BeckirafARenthleI]+>RR

SEGUNDO

Becky Rafa Renthlei

Chapter-30

Lalfakhlua

After 3 weeks

Ka nu leh Muanpuii inkâr a ṭhat loh êm avangin kan chhungkaw boruak a nuam lo hlê a, ka pa lah chu eng mah hre lo ang maiin a ngawi deuh tlat si a, leh lamah ka nu min hringtu a ni a, Muanpuii ka hmeichhe hmangaih a ni thung.

Zosangmawia pawh ka nu leh pa phal lo chungin Muanpuii'n a indan pui ta a, kâr khat lai an awm hrang tawh a, zantin ka lêng ziah a, Siami pawh an hruai tel ve a, Muanpuii office hlânin a lo awm ṭhin a ni.

Ka pain a tupa a ngai êm em a, ka nu erawh lunglêng ang pawhin zuk awm duh miah lova, hmeichhia hi an lo mak ka ti. Thlamuani avanga police-in min lâk khân Muanpuii a puh ringawt a, amah vânga chhuak thei chauh ka ni tih a ngaihtuah duh leh si lo! Khami zânah khan hmeichhe duty Muanpuii ni lo awm ta se Thlamuani kha a inpuang hma hauh lovang.

"Lalfak, i fapa midang kutah i dah a nia eng fapa nge ka lo hrin chhuah lê?" Tukkhat ka nu a âng leh a, Muanpuii in dan hnuah hi chuan ka chhâng ngai mang lo.

"Midang kutah ni lovin a nu phirpui bulah a awm a ka ngaihtuah lo bawk." Ka ti hmiah a.

"Fahrahah pawh fahrah leh lutuk hi chuan awm dan mawi an hre mawh khawp mai, hmeichhe police eng atân mah ka ti lo." A ti leh kher a.

"Ka nu, i mak la ti, i upa telh telh a, i sual telh telhin ka hria, a duh vânga fahrah a ni bik em ni? Zing ṭawngṭai inkhawm kal tlut tlut a mî awm ṭha hle hle lai mil tlat loh leh mi rêl bansan chuan loh hi eng Piantharna nge ni ngai.." ka chaw thleng hnâwl rawpin ka tho zui ta a.

"Lalfakhlu, i nu hi min va zah lo ve.."

"Mama, i nu khatiangin ṭawngkhum tawh miah suh, nangmah enkawl seiliantu che i nu leh pa aia i thlan zawk chu i pan thei ang," ka pa'n a tih chuan ka ding chawt a.

"Nangni aiin ka thlang zâwk lo; mahse, ka hmangaiha in mil thei dawn lo a nih chuan ka chhuak ang e, ka nupui a ni lova ka nupui û a ni, a pa thih hmâa a thu hnuhnung tihhlawhtlingtu tur chu in fapa hi ka ni asin."

"Kal rawh kal rawh.." ka nu bawkin a ti leh a, mak ka ti thlâwt.

"In pawi a sawi pawh nihlei lo, kei leh ka fapa thleng thlengin min hmu mawh a nia, fahrah a nih vânga duh lo leh ngaithei lo innih chuan fa sûn innih theih lohna bik tur a awm lo a nia, Zomuani insûn tawh a, in la harh thei lo chu a ni sia.."

Min chhânna pawh nghâk tawh lovin ka room-ah ka tlanchho nghâl a, ka nu leh pa mize inthlâk ta thut hi ka hrethiam nek lo ve.

Ka thawmhnaw ka hmuh hmasak ang ang ka thun mawp mawp a, inhnuaia ka chhuk leh chuan ka nu chauh a lo awm tawh a, "Ka lokir leh tawh lovang, min mamawh lo êm a nih hi.." ka ti deuh kher a, ka nu a ngawi reng.

Ka pa hian Muanpuii a duat viau a, engtik lai khân nge a rilru a lo thlâk hman? Ka nu bâk fuihtu an awm lo tih ka chiang ngam sak.

Muanpuii inluah zîmtê ka thlenin a lo reh ṭhiap a.

"Muanpui.." min chhângtu an awm lova a reh tlawk tlawk!

Dimtêa kawngkhar hawngin ka lût ta a, an nufain khumah an lo muhil a, vawiin hi inrini a ni tak a lâwm le.

An kiangah ngawirengin ka mu ve ta a, fapa mal indang te hi ka lo dem viau ṭhin a; mahse, ka dem ta hauh lo, kan nu leh pa te'n an zir miau loh leh kan hmangaihte min hmangaihpui ve si loh chuan kan awm hran mai loh nâkah.

Diktak chuan Muanpuii hi misual tak chu nise ka nu leh pa lam ka ṭang ngei ang. Mahse, kan chhungkua min chhawmdawl mai bâkah an buaipui hah ngai miah lovin ka fapa min enkawl saka lâwmna châng an hre hlawl lo.

"Faka engtizia nge?" Muanpuii a rawn harh a, ka thawmhnaw dahna bag leh Trolley suitcase chu mak tih hmel takin a en a.

"Ka rawn awm ve dawn, Muanpui kan awm dan hi a khirh tulh tulh mai.." tiin ka nu leh pa min tihdan tlângpui ka hrilh thuak thuak a, "A nimaw, nupa kan ni bawk si lova kan va mualpho dawn ve le.." a rilru a hah hmel kher mai.

"A nih nih kan ni tawh mai dawn nia, i ngam em?" Ka tih chuan a thaw halh a, "Ka kianga i awm chhung chuan eng pawh ka huam," tiin min rawn kuah hmasa ve teh tlat nia.

"Tihian chhungkaw pangngai angin kan khawsa dâwn nia, kan duh emaw duh lo pawh ni ila tupaw'n min sawi sep sep dâwn chung zawng zawng chu paltlang vek a ngai dâwn a nia,"

"Ka hria alâwm.." a ti sap a.

Siami bazar a lo hâw a thil awm dan kan hrilh ve a, a thinrim ngang mai, "U Fak, a hma aṭang daih tawhin i nu hi chu ka ngei tawh.." a lo ti ve a, kei hian eng mah ka lo hre lo zawk a ni.

"Zomuani kha a â êm a an duh duhin an chawkkawi thei a, Muanpuii hi chutiang a ni ve si lova a ngaithei lo tih ka hria alâwm," a ti lehzel nia!

Zanah pawh ka room nuam tak leh changkâng zetah ka mu tawh lova Muanpuii khum siam thartîr feet nga khumah kan pathumin kan mu tlar dal a, Siami erawh a ṭhiannu te inah riah min dîl a, a kal ta kha a nia, ani hi sangli hlawha kan chhawr a ni.

"Faka, i rilru a nâ em?" Ka âwmah hmai phumin a rawn ṭawng sap a.

"Na ve e; mahse, chhungkaw din a bulṭan ṭhat ka ngai alâwm," a biang leh a hmui ka chûlkual dan dan a, a vun mâm han te, a hmel nungsarte hi kumkhuaa chân hlen tur atan ka phal lo.

"Ka car hi hralhna tur zawng ila scooty kan la daih dawn nia, a hautak mai mai.." A inthlahrung tih ka hria a ka khawngaih reuh.

"Lungngai mahta che, i pa leh i nau lung chu kan phun thei em em ang, tihian inneih ṭhat angai tawh chuang lova sum kan save a nimai," ka nui hawk a, min hnial ka rin teh reng nen a nui ve ta mai mai a.

Ka rilru puthmang pawh a dang ta, Zosangmawia a muthilh leh hnuah Muanpuii'n min kuah chial a, duhthawh taka ka fawhna chu min chhâng uar kher mai. "Ka nupui tak tak i ni duh em?" Kan inhualna zungbun a bun chu ka khawihsak nauh nauh a, 'Aih' tia min chhâng a nih teh chuan...

"Duh e, duh lo pawh ni ila kan awm danin zir tawh hek lo.. " a la ti zui hrâm a.

Chutah hmanhmawh hauh lo hian a thawmhnaw inbel ka phelhsak ta a, a biang sen awp awp aṭang chuan a zak hlê tih ka man thiam ve mai.

"Faka...''

"Umm.."

Ka thawmhnaw ka phelh lai chuan a hawisawn daih a, Lalmuanpuii hian mipa a la mutpui ngai lo tih ka hre thiam mai.

A hmuiah ka fâwp a, a zah ka hlauh vângin light pawh ka off hmiah! Mahse, sitting room êng a rawn lût riai riai a, thim lutuk erawh a ni lo.

A tisa mâm han leh a pangti lum thar thar ka nghen rualin mipa ka nihzia a rawn lang ṭan ta, fâwp pah reng chungin a âwmbawr leh a hmeichhiatna hnâwng chapte chu ka chûl dan dan a, nula thianghlim a la nih chuan eng ang pawhin dîm mah ila a nat dâwn tho avangin ka insiamrem ta a.

"Muanpui.." dîm thei ang bera a taksa a ka luh rualin a phu zawk a, a mengphar âwk thei nia, ka rin ang chiahin a tâna mipa hmasaber ka ni!

"Fakhlu.." tiin a phun sap a, nghet zeta min kuahna chuan ka thâwk a ti sak ṭalh thei nia, chhunzawm lova ka chawlh deuh vang vang hnuah a hmuiah bawk fawp lehin ka chhunzawm leh ta a, nawmna vawrtawp ka thlen ruala a ṭê ṭhat ri chuan ka mipa rilru a tawk zar thei maw le.

"Segundo..., Segundo.." ka phun sup a, ka hnungzâng thîp ṭhak chu Lalmuanpuii min hamna tih ka hre mai.

Ni e, Zomuankimi phirpui hi ka tân chuan pahnihna a ni. Pahnihna ni mah se ka hmangaih zâwk miau a, ka nunah a pahnihna hian a tâwp min kharpui dâwn ta chu a nia, ka bulṭanna a nauvin min boralsan mah se a û a chhûlkhat kualpui hian 'Segundo' a hauh zâwk tlat si a, eng dinhmunah pawh ding se ka thlah phal ngai lovang.

"Lalfakhlu a na si..." henu hi chu sawi âwm leh âwm loh pawh a hre lo. Mahse, amah ti Lalmuanpuii tu a ni ve tlat.

"Tawrhna a hmasak hian nawmna in a zui châwk a nia," ka nui suk a.

"A nuam har âwm e.." zuk ti a!

"Zinglam dar thum vêlah chuan, 'Faka mawh..' tiin min ngên chûk mai ang." Ka tih chuan min chûm awk nia!

"Ti kha chuan Zosangmawia nau tur siam rêng rêngin hun kan khawhral tawh ang," a kut zunglaia a zungbun bun chu phelhsakin a awmna tur dik tak ah ka dah ta a, "Kei Lalfakhlua hian nang Lalmuanpuii hi ka nupui i ni tih ka puang e," ka nui duh miah lova ani lah chuan thutak em em hian a lo la ngaithla zui a, ka nui chhuak teuh kher mai.

Zosangmawia tui taka muhil chu enin, "Ka fapa, mut hun i thlang thiam kher mai, rawn harh la chuan â nu a zak viau ang," ka tih chuan, "Lalfakhlu, ṭawng ṭawng suh.." tiin a tho chhuak ta a, a hnung lam aṭangin ka nuih suk suk. A chhan chu inla puitling viau e ti lo hian a naupanna a lang leh zauh ṭhin.

Zomuankimi aiawhtu ah Lalmuanpuii hi ka hmang a ni lova amah Lalmuanpuii hrim hrim hi ka hmangaih vang a ni.

Thingpui ka duh leh duh loh min lo zâwt teh tlat a, zinglam dar hnih velah Buiscuit leh thingpui kan la in zak zak chu a nia! Kan awm dan fuh chiah lo mah se kei chuan ka nupuiah ka pawm hmiah a, chutiang rilru chu a put ve ngei ka beisei bawk.

"Muanpui, kan ṭan rual phawt chuan ka nu leh pa puihna tel miah lovin i pa leh Zomuani lung kan phun thei em em ang, ka chhungte aṭang hian eng mah beisei ka nei lova keimahni kan inhaikuak a ngai tih i hrereng dawn nia.." ka tih chuan a bu ve nghat nghat a.

Kan pahnihin hlawh kan nei a, in luah man leh ei leh in bâkah Bawiha ngaihtuah a ngai a, Siami hlawh pêk a ngai dawn bawk. Harsa lutuk chu ka ni lo ang a, lungphun tur meuh chuan inkhâwl deuh hlek kan ngai dawn tihna.

Nupa angin kan khawsa chhunzawm ta a, office kan kal bâk khawiah mah kan chhuak ngai lova ka nu leh pa'n vawikhat mah min rawn be hek lo! 'Ka rilru a na lo' ka tih chuan dâwt muhlûm a ni, ka na ngawih ngawih a; mahse, Muanpuii leh ka fapa vang tal pawhin theihtawp ka chhuah tur a ni dawn lo'm ni.

Mi min sawi sep sepna pawh kan hre ve zel a, tûang kan tichhah a ni ber mai. Muanpuii phei chu office-ah an lo kâp zeuh zeuh a, rilru na taka lo hâw ṭum te pawh a nei bawk. Mahse, kan pahnih inkâr tinghettu a ni zêl zâwk si.

Zirsanga te nupa chaw eiah kan sâwm a, min fuih nasa ve khawp mai. Kan awm dan an hmuhin min lainat a, 'I nu leh pa chu an ti mah mah a ni, an inlamlêt hmâ kîr suh ang che' min ti hial!

Zosangmawia pawh thlaruk a tlinin Vaccine lâk a ngai a, Muanpuii'n chawlh a la a, a hruai thlap, kan chên dun dan dik lo mah se ka thlansual lohzia ka hrechiang tulh tulh bawk.

Lalmuanpuii ka hmangaihna hian rilru puitling min pûttir sauhva ka hna pawh ka thawkrim khawp mai, ka mawhphurhna hlenchhuak zo lo mipa nih ka tum lo bur.

Lalfakhlua hi mite entawn tlâk ni lo mah ila ka nupui fanau tân pa ṭha tak nih ka tum dâwn lovem ni?....

B<++[BeckirafARenthleI]+>RR

Note: 'SEGUNDO' tih hi Portuguese ṭawng aṭanga ka lâk a ni a, 'Pahnihna i ni; but I love you.." tihna tluk a ni e.(BRR)

Spanish erawh chuan Pahnihna tih a ni tawp thung.

Second|Segundo...(English Version)

SEGUNDO

Becky Rafa Renthlei

Chapter-31

Lalfakhlua

Nunphung pangngai zawh ṭanin chhungkua angin kan khawsa ve nawk nawk a, Zosangmawia thlakua a tling tawh a, ṭawng thiam lo mah se a râk nasa ve thei khawp mai! Muanpuii'n a duat em em a bâkah ka fapa mah nise a hmel ṭha ka ti hlê.

'Faka, Rafaela têt lái aiin a duhawm daih! Keini Duati kha thlakim lova piang a ni a, kan buaipui teh reng nen Zosangmawia hi a hrisel phian a in vannei takzet' an lo lên ṭumin a ti nghe nghe.

Lawngtlaiah sunday hmangin kan zin a, Muanpuii in luahtu awm lova dah reng kha thil fel a nih loh avangin kan thawhpui Rinliana'n ₹3000 in a luah ta a, bungrua eng tehchiam a nei lo bawk a, a tihzia viau.

Ka nu leh pa te nen boruak ṭha kan la nei lova rilru na mah se tlâwm hmasak ka tum lo, a chhan chu ka nu dik lohzia ka hrechiang tulh tulh a, Muanpuii mî hnêna a lo sawi dan pawh ngaihthlâk a nuam lêm lo khawp mai.

"Kan Lalfakhlua hi a ti â vek tawh a nih ber hi, a nau fa chhuahlamah hmangin tihian duat ber ang hrimin a lang vêl a, Muanpuii zawng a fing êm mai," tih vel te kha a ṭawng duh dân a nia! Muanpuii erawhin vawikhat mah ka nu leh pa chungchâng a sawi lang lo.

"Faka, hetia awm dun reng hi thil fel lo a ni a, Matei lung phun rih lo mah la a hmingin kan inkutsuih ve mai dawn em ni?" Khumah kan mu a, Muanpuii thilsawi chuan ka rilru ati kal ding khawp mai.

A nihna takah chuan nupa angin kan khawsa a kan mualphovin mî sawi sep sep kan hlawh nitin a, a nih nih ni ngam tura man inhlan mai ṭha viauin ka hre ve ta.

Mahse, tu nge Muanpuii man dawng ta ang?

Rei ngial kan sawi dun hnuah Zirsangliana te nupa bawk kan pun leh ta a, anni'n remruatna fel tak an neih thiam ka ring tlat. Kan duh dan te ka sawipui chuan ṭha a lo ti hle a, Lawngtlaia Muanpuii nî te hnenah palâi turin a tlân ta nghâl a.

Ka nupui lung phun hmasa lovin a û nupuiah ka nei ta chu a nia, Muanpuii nen kan mualpho dan a inchen reng!

"Hey, Zosangmawia hi chaw lo pe teh Siami a nuam lo a.." Muanpuii office kal tur hmanhmawh ve bawk si chu a phî chung a, kei erawh vawiin chawhnu-ah meeting kan neih dâwn avangin ka kal hma a ngai hran lo hlauh va.

"Ka thlah dawn che nia, walker-ah lo ṭhuttîr rawh," bathroom aṭanga ka va chhân chuan a nui hak a, "Bathroom-ah phone keng lût tawh suh ka tih kha i rei thei si.." a la ti nang nang nia.

Kan inluah a zîm si a, kan chêp lam hret a ni e, a dang luah mai tur kan hmu rih bawk si lo nen a hrehawm ang reng khawp mai. Nu leh pa thlazar hnuaia nuamsa taka awm ṭhin kha ka fapa leh ka hmeichhe hmangaih vângin zankhat thil thû lekah ka nun dan a inthlâk dawrh chu a ni si a. Ka nu leh pa thu zâwm lova company-a ka lo training chhuak te hi ka lawm hnuhnawh ta khawp mai.

Muanpuii office thleng ka va thlah a, ka rin loh deuhvin Thlamuani ka hmu hlawl!

Min en ṭha ngam miah lova Muanpuii rum deuh deuhvin a melh teh ngawt nia! Vawikhat tal ṭawng chhuah ve hrim hrim ka duh avangin ka va dinchilh ta a, vawiin hi an court ni tur a nih avangin Jail aṭangin an lo hruai chho niâwm tak a ni.

"Thlamuan, ka duhsak teh reng che nen ka chunga i thil tih duh dan a mak hle mai," ka tih chuan, "Faka, min ngaidam rawh.." a ti sap a. A hmel ṭha tak ṭhinte kha a chul rap a, a sam ferê zet te chuan a hmel a ti chhe zual.

"Keima hnenah ngaihdam dîl lovin ka nupui Muanpuii hnenah dîl zawk rawh.."

"Maw!? I nupui maw!?" Tih pahin Muanpuii file pawm ṭân chunga vei thuak thuak chu a melh zauh a.

"Aw ni e, kan innei tawh a lawm.."

"Lalmuanpuii hnena ngaihdam dil ai chuan Jail-ah ka tâng nawn leh zâwk ang e." Zuk ti a!

"A nih chuan, min puh chhiat man leh min tih hmingchhiat man i châwi ve ngei a ngai ang chu.." ti nghutin ka kalsan ta a.

A hma kha chuan a nih tur a ni zo vek tawh a, tiin ngawih mai ka tum khâ a nia, ka rilru ka thlâk hlauh! A mah vanga kan chhungkua pawh inhmu khaw lo zo kan ni a ka ngawi mai mai tawh hauh lovang.

##

Zirsanga te puihnain Lawngtlaiah kan inkutsuih ṭha ve ta a, Muanpuii pa farnu te leh an chhûngte tlem tê, Zirsanga te nupa ṭhianah kan hmang a, ka thawhpui pahnih khat te chauh hriatpuitu kan nei a, Pastor a ni leh mai.

Ka chhungte lam tumah ka sawm lova kan in ka chhuahsan aṭang khân ka nî te pawhin min rawn be ngai tawh lo, ka nu'n an rilru a lo hmin vek a nih ka ring.

"Nang Lalfakhlua hian Lalmuanpuii hi a nuamah pawh a hrehawmah pawh a retheih pawhin a pachhiat pawhin damchhunga enkawl turin i intiam thei em?" Pastor-in min zawh lai chuan Zomuani nena kan chham lai ka hrechhuak zawk.

"Aw, tiam thei e.." ka aw a ring hran lo khawp mai.

Thuchham kan zawh hnuah zungbun kan inbuntir leh ta a.

"Tunah hian nupa diktak inni tih ka puang e," nupa pawmpuina certificate min hlân nghâl bawk a; Lawngtlaia Muanpuii lo lâwina kohhranah min lâwm lûtin min thunun zui nghal a, a zahthlâk ang reng.

Engkimah Zirsanga leh Mafeli'n min buaipui fai vek a, ka ṭhianpa nih a va tlin si êm! Ka nu leh pa ka ngaihtuah chhuak a, hrehawm ka ti! An tel lovin an fapa hian nupui pahnihna tur ka nei ta chu a nia, rilru a nuam lo ru reuh reuh thei maw le! Mahse, keimah Lalfakhlua ka nih chhung hi chuan rilru ka ti pâukhauh zêl ang.

Hna nei ṭheuh kan nih avangin Lawngtlaiah châm rei thei kan ni lova kan inneih tûkah Aizawl panin kan chhuak leh ta a.

Siami a fel bawk a, Zosangmawia pawh kan ngaihtuah lutuk ta lo.

Zomuani thlânah Muanpuii nen kan kal ṭumin, 'Mate, ka tidik lo a nih chuan min ngaidam rawh aw, fahrah nun temve tur hian i fapa hi ka dah phal lova he khawvelah hian i pasal leh i fapa chauh hi ka neihchhun anni,' tia a ṭah fap fap chuan ka rilru a khawih khawp mai.

Zomuani kha ka enkawl rei lova duat pawh ka duat ṭha hman lo a nih kha! Mahse, Zomuani hmangaih em em a û erawh ka duatin ka thlahthlam ngai lovang, miin 'Fahrah' tia an hmusit dâwn a nih chuan kei, a pasal hi a hmâah ka ding zel ang. Ka chhungkaw neihchhun anni.

Ka nu pawhin fahrah a nih vânga hmusit a ni a, chuvangin a tlâwm hmasa lo a nih chuan ka ngaidam dawn rêng rêng lo a ni tawp mai.

##

Krismas leh kum thar kan hmang zo tawh a, Zosangmawia kumkhat a tling ve lek lek tawh bawk a, a lawmawmin min tihlimtu ber a ni. Official-in a nu hmingah Lalmuanpuii dah ka tum a, Muanpui'n a lo phal lo nasa mai. Kan inhau ve ta.

"Zosangmawia nu nih pawh chu i va hreh awm ve a!?" Ka ti nghut a.

"Faka, i hrethiam lo a nih kha, a nu dik tak chu kei ni lovin Matei a ni a, ka enkawl avang hian a nu hming dik tak ka put kher a ngai lo, Matei fapa alâwm.." tiin min chhâng a.

"Chû, i fapaah pawh i lo ngai na nge a?" Thinrim insûm zetin ka ti leh a.

"Ka fapaah ka ngai a ka enkawl chu a nia lawm, ngun takin ngaihtuah la, tunah engmah a la hretham lova a nu ah min ngai hmiah; mahse, Pathian zara a lo ṭhanglian zêl a nih chuan a nu tak ka ni lo tih a la hre em em ang, a chhan chu keiniin zêp mah ila lo hrilh châk et et mi rilru kâwi an awm leh dâwn lo ngai reng rawh ka thusawi dikzia i la hre mai ang," a ti duah a.

"Mî-ah ka buai lo, chutia a nu hminga i hming dah i duh loh chuan kan dah lo tawp ang, kan dah miah lovang," ka ti hmuk a.

Min chhâng tawh lovin room-ah a lût daih a, ka va pawh mai duh bik lo.

Zanriah ei dâwnah ngawirengin Bawiha chaw a pe hmasa a, min be lo mai ni lovin min en lo hrim hrim!

Ka lo ngaih dan chuan a nu hmingah Lalmuanpuii dahin a lo len hunah pawh buaina kan nei lo turah ka ngai deuh kha a nia, Zomuani hming dah a duh leh tlat hi ka hrethiam lo.

Ka rilru a na ve bawk nen Zirsanga te inah ka lênsan ta daih a.

"Faka, innu chuan a sawi dik chiah a nih chu, a nau fa hrin a ni a, a thlahthlam miah lovang, unau pahnih chauh anni a, Zomuani hming luah lân a duh lo tepawh a ni thei asin, mî hi an ṭawngthei khawp a, Muanpuii hming dah ta la, a nu tak tak a ni lo tih a hriat chhuah hunah i sawifiah fê a ngai dâwn asin, Zomuani hminga i dah chuan lo hrechhuak ta pawh nise Muanpuii hminga thlâk a har hlei nem; i fapa duhthlannaah a innghat mai dâwn a lawm." Zirsangliana'n a lo ti ve bawk a, ka mal ṭan leh ta.

'Chaw ei rawh' tia min sâwmna erawh chu ka hnial ta a.

Muanpuii nen kan chêndunna pawh thlathum a tling ve tawh a, nau a la pai miah lo! Invênna a hmang nge ka hre miah lova kei chuan ka hmang îkhaw lo.

Kan inluaha ka lêt lehin zân dâr sarih a pel chauhva chaw eiah min lo la nghâk maithei.

Siami chauh ka hmuh avangin, "Khaw'nge an kal a?" Tiin ka zawt nghâl a.

"I nu in min lo call a, lo phei teh se a ti a nih kha, chaw pawh a la ei lo." A tih chuan mak ka ti viau! Keimah min be lova Siami an rawn biak daih dânah thil fel lo a awm chiang.

Hmanhmawh lutukin car ka la chhuak a, Bawiha nen an kal a nih si chuan taxi a hmang a ni ngei ang!

##

"Ani lo hi khawvelah fa ka nei lo tih i hre lovem ni? Min chhuhsak tih i inhria em?" Ka nu awkî fiak ṭhak ka hre hmasaber a!

"Zomuani boral hlimah pawh fâ anga kan en che avangin kan hnenah i awm a, a ni lo zâwnga Mama rilru i lo kherh hi ka awih thei lo," a tih leh chuan kawngkhar pawt hawng rawpin ka pên lût ve ta a.

"Ka nu duh tâwk rawh.." Muanpuii'n Bawiha a pua a, a hmêl dur khap te, thinrim tih hriat deuh hian a heh a pet fan fan a, engtin nge chhâng miah lova a la insûm theih zawk lê!

"Mama, i nu leh pa hriat lohva nupui i nei hi kan lâwm lo hle a ni, i zirna leh tûn dinhmun i thlen theihna chhan hi tû vãng nge?" A âw a khûr dar dar a, a thinrim hlê tih ka hre mai.

Ka chhâng ang nge chhâng lovang tia ka inngaihtuah lai chuan Lalmuanpuii a lo ṭawng ve ta a.

"Ka thiam loh a ni, inchhungkaw tikehdarhtu nih ai chuan ka lo inthiarfihlîm ang e, nu leh pa leh unau ka nei lova min hmusit tih ka hria, Pathian zârah eng êm ka ti bîk nâng.." Zosangmawia a puak lai chu ṭhutthlengah a muttir a, ka lam rawn hawiin, "Nu leh pa, nang mah hmangaih em emtu che i nei a, ka hmangaihna aia nasa zawk che in an hmangaih che tih ka hria a nia.." puakpuan Bawiha sintîrin kawngkhar lam a pan ta a.

Lalmuanpuii'n min hmangaih thû a sawi lâi chuan ka lo phu zawk a, ani hnen aṭanga hriat ka inbeisei miah lo!

"Ka nu, hlim takin kan chêngho thei lovem ni?" Ka kawchhung a so bulh bulh a, ka nu sawi pawh a dik ve tho, kehthei dawm leh duat taka min enkawl lai te ka mitthlâah a lo lang zut zut a, chutih rualin Muanpuii ka hmangaihin ka nupuia ka neih zawh chauh a ni bawk si.

"Mama, ani nena chendun ka thei lovang tih ka hlau khawp mai, kan chhungkaw mualphona thlentu a nih hi," a tih leh chuan duh ka thlanfel a ngai tih ka hria.

"Engtin êm nge a tih mualpho che a? Sawi rawh, kum upa lam i ni tawh a, rilru kâwi put tlat hi a ṭha ber lo a nia, Bawiha pawh i ngaihtuah ve îk nange? Khaw'nge ka pa?" Ka tih zawm zat a.

"I pa nen kan sawi dun vek tawh, Zomuani leh a kaihnawih lam hi chu hnaih kan tum tawh lo.." chapo taka a ṭawng chu Muanpuii tân hriat a nuam lo khawp ang.

Ka rin dan a dik chiah! Lalmuanpuii chhuak tur kawngka bula ding tawh chu rawn inherin rum zet hian ka nu a melh a, "Kan chhungkua nen inkaihhnawih i duh loh chuan Zosangmawia hi ka nau Zomuani fa hrin a ni a ka lâk ngei a ngai a nih chu.." tiin Bawiha a paw nawlh a, ka nu a lo ter at thung.

"A nu a thi tawh a, a pa in a enkawl tur a ni, pi leh pu a la nei bawk." Tia chuh tumin a rawn ban ve bawk a, ka inrawlh a hun chiah, "Ka nu min enkawlna zawng zawngah lawmthu ka sawi e, ka pa nen hian pawh ṭhen tum tlat che ila i duh dâwn bik em ni, nupui vawithum neih ka tum lo, vawihnih a tâwk e.." Ka ti ta a.

'Segundo Lalmuanpuii' thlah lo tur hian Pathian hmaah thu ka tiam tawh tlat! 'Pathianin a zawm tawh chu mihringin ṭhen suh se' tih a nih kha.

"Muanpui, lokal rawh le, a harh chhuah theih nâna ṭawngṭaipui tlut tlut bâk tihtheih kan nei lo," ka ṭawng dan ngeiawm zet chuan ka nuih a ti za deuh! Zosangmawia ka pawm a, Muanpuii kâiin a vawihnih nân kan inpui ka chhuahsan leh ta.

Ka nu ngawi renga ding chu en pawh ka en tawh lova, chhungkua ka din tawh a, harsatna leh manganna an tâwk a nih chuan ka nu leh pa annih angin thlahthlam ka tum lo. Mahse, chênho erawh a rem ngang lo a ni e.

Ka pa hlawh a tam a, an nuamsa lutuk hian chapona khurah a hruai lût a nih ber hi. Mahni aia hniam hmusit tur hian eng anni lo asin lê!

"Muanpui..."

Min rawn en zawk a, "Umn" tih bâkin min chhâng lo.

"Eng dinhmunah pawh ding la, ka thlahthlam lovang che,"

"Ka lawm e Faka, i nu leh i pa i hmangaihzia ka hria a ka khawngaih zâwk che, tlâwm a ngaih pawhin i tân ka tlâwm hreh lo tih min hriatsak rawh aw.." a mittui far tur dan kîr tumin mit a khap fak fak a, ka nu ka huatna a zual sauh thung.

"Tlâwm lo ve a, Pathian zârah kan dam ang a anni tel lo pawhin kan la ding chhuak em em ang," tiin ka hnêm ve a.

In kan thlenin atu mah mahin chaw ei kan tum lova kan rilru a hrehawm dun a ni ber mai. Siami'n thingpui leh biscuit a rawn dah chuan kan inhnawh puar ta vêl mai mai a.

Tunah chuan a tâwp kan thleng ta tak takin ka hria, ka pa biak ka tum deuh kha a nia; mahse, ka ṭhulh fel hmiah.

"Hey, i muhil thei na nge?" Muanpuii che sek in min ti harh a, a rilru tur ka hriatthiampui khawp mai.

"Hring nun hi a hahthlâk ka ti, nang leh Bawiha hi awm lo ula chuan.." min kuahin ka âwmah hmâi a phûm a, ka lo kuah lêt thuai bawk.

"Muanpui, min hmangaih em?"

"Hmangaih lo che ila pathlawi ka neih duh i ring em ni?" Tiin a nui ta a, "Deuh kher che chuan, keipawhin ka hmangaih che, ka nupui pahnihna ni mah la ka hmangaih hmasak ber i ni.." ka sawi chhuak ve ta nge nge e.

Zalên tak leh tûma dîp dâl loh a hmangaihna kan chendun zawh meuh chuan ka nupui biang a sen hlar a, a mitmenga min hmangaihna lo lang chhuak pawh ka chhiar thiam ve ta, nu leh pa uap loh ni mah ila kan nupa kan ṭan tlân phawt chuan chhungkaw awhawm tak kan din thei ngei ang.

"My lovely wife Segundo.." ka sawi zawh rualin a nui hak hak a, "I Lalalmuanpuii of Segundo nih reng ka duh.." tiin ka mipatna inpeih leh at tawh chu a tawk zauh a, atîra kan mutdun ang ngawt kha chu a ni ta lo!

Ka nupuia ka thlan hi thlah leh ngai tawh lo turin a vawihnih nân âm takin Vanram kawtchhuah ka fanpui leh ta a, 'Angel te'n nautê hmelṭha firfiak min present ngei theih nân ka uar hlê bawk.' Hah! Ang lo lutuk..

Ani nen chhungkaw nghet tak kan din theih nân a pasal Lalfakhlua hi ka pawimawh hle a ni...

Muhil tura kan inpeih meuh chuan zînglam dâr thum a ri tawh a, sawiselna kârah pawh invuan tlat turin ṭan kan la thar tur a ni dâwn lo'm ni?

B<++[BeckirafARenthleI]+>RR

32.SEGUNDO

Becky Rafa Renthlei

Chapter-32

Lalfakhlua

Kan in luah kan sawn ve ta hrâm a, Muanpuii'n tuna kan luah lai hi a sawisel zing angreng si a, kâr hmasa khân in mal ding lai luah tur kan hmu hlauh a kan vannei phian.

Ka nu leh pate nen kan 'in chu e kha' tawh lo hrim hrim a, Zirsangliana te chhungkua nen erawh kan inpawhin chaw kan eikhawm zeuh zeuh. An fanu Duati erawh a pu Lungleia mite kiangah school kalin a awm phei tawh a, a ngaihawm ang reng.

Rafaela pawh a felin kan nupa min tihlim a, zan hnih a lo riak ve bawk a, ka fapa Zosangmawia û ah ka ngai nghet hmiah.

Company thillah Delhi zin ka ngai a Muanpuii ka kalsan hreh takzet! Zosangmawia thlatharah kumkhat a tling dâwn a lawm kan duh rualin a nu thihcham a nih tel avangin lawm loh kan tum ta zâwk a, engtikah mah ka fapa birthday hi kan lawm pawh ka ring lo, Muanpuii nau chu ni lo se thuhran a nia; mahse, kan nupa tân kan lunglênna tizualtu a ni zel si.

"Fk, eng thawmhnaw nge i ken dawn?" Muanpuii khumah a ṭhu a, keimah vângin chawhma office kal loh a tum leh ringawt tawh! Lêngpuiah amah ngeiin min thlah liam a duh leh tlat a, ka hnial ta lo.

"Engvak mah ken ka ngai lovang, i duh duh dah rawh.." ka tiliam puat a, kan inneih hnu hian vawikhat mah ka la zinsan miah lova Zomuani kha vawithum vel ka zinsan thung.

"Chanchin min lo hrilh nachang i hre dawn nia aw.." tiin ka thawmhnaw a khung malh malh a, a hmêl a dâng riauva ka'n hriat tlat chu le!

"Ka nu te'n an lo call leh hlauh a nih chuan va kal reng reng suh ang che," tiin ka chah lâwk diam a, ka awm loh denchhenin an lo ṭim leh hrep ka hlau a ni ber mai.

"Ka kal peih teuh lo, min hawtu huat ve kher hi thil ṭha a ni lova; mahse, i nu hi chu e a nasa ve mah mah.."

"Ka hria a lâwm, ka lo haw hunah min lo hmuak ang em?' Tia ka zawh chuan, "Ka sawi thei rih lo, chanchin kan inhrilh zêl dawn nia," a ti ta a.

Lêngpui airport-ah kan chhungkuain kan teikual a, helai hmun hi Zomuani ka hmuh hmasak berna a ni tih Muanpuii ka hrilh chuan "Matei'n min hrilh vek a lâwm," tiin min chhâng a, ka flight a la hun loh avangin thlâ te kan la leh rih ta kha a nia.

Siami'n nuam a ti fâl ber! Ani hi kan chhungkaw member-ah kan chhiartel a ni ber tawh a, a bulah engkim kan sawi ngam vek bawk. A hmelṭha reuh phian lehnghál a, inlêng pawh a nei ve zauh zauh nia!

Tûna ka zinna turah hian hlâwkna têl tur a awm ve nual dâwn a, company car Mizorama kan lâk luh tur Projector hmanga hrilhfiahtu tur ka ni a, ka hlawh nualin ka ring.

Muanpuii car kan hralh tawh a, a loan lâk pawh kan vawmhlum diam tawh a, Scooty lâksak ka tum tehreng nen Mafeli'n, "Nau a la pai si lova lâksak duh rih suh," a tih avangin ka la leh ta lo.

Ka nupui leh ka fapa te tlânliam tur chu ka vai lauh lauh a, ka lung a lêng titih ringawt maw le!

Delhi pawh kumkhat zet ka tlawh tawh lova ka kianga ṭhu hmeichhia ka hmuh meuh chuan ka ner sawk.

Ruatdiki lek niin! A kal ve dawn tih ka hre miah lova Zomuani boral hnu hian kan inbe ngai mang lo! Bâkah office a rawn kal khât viau bawk.

"Nupui i lo nei leh dêr tawh a, i che rang kher mai." A tih chuan, "Engtin nge i hriat?" Ka ti sup a.

"Ka pa'n min hrilh maw le, i lo thei khawp mai," a ti leh a.

"Ka fapa nu tur ka hmu rang ta deuhva," fiamthuin ka chhâng kual ta vel mai mai a, a ngawi hmak. Henu hi ka duhzawng mi a ni ngai lo hrim hrim.

Tû hmeichhia mah hi Muanpuii aia thlan ka nei tawh lo mai ni lovin ka ûksâk tawh lo.

After 3days

Lalmuanpuii

Fakhlua a awm loh meuh chuan muthilh a har ṭalh mai alâwm le.

Dân khatnaa mawi taka pasal neih ve ka lo inbeisei laiin ka tum loh lutukin heti hi ka ni ta si a, ka nî te lakah pawh ka inthlahrung ru viau! Mahse, ka rin aiin min lawmpui thiam a, Zosangmawia tâna ṭha ber tur a nih thu min hrilh chuan ka thawveng huai.

Faka nen kan inbe hman meuh lova ka hman hun leh a hunawl neih a in nang hleithei lo nen zanreiah kan inbe hman ṭâwk!

"Ka nupui ka ngai tawh.." whatsapp aṭanga min rawn biak chuan ka lâi ringawt nia.

"Ka pasal ka ngai fê.." tia ka reply chuan min rawn video call nghal zat a, zanreiah kan nui kur kur mai a lâwm le.

Lalfakhlua tluka puitling leh dawhtheihna ngah mipa hi an tam lo viau ang, nupa kan nih hnu hian zânah ka mutui thei hle a, Bawiha pawh amah vekin a buaipui a, min kâi tho ngai lo hrim hrim.

Ka nau fa a nih vâng pawh ni lovin Zosangmawia hi a hmelṭha hlê a, a nu leh pa hmêl a chhunkawp a ni ber. A duhawmin a tlei reuh bawk a, Pathian zarah dam loh lutuk a nei lêm lo bawk nen kan hahpui em em lo.

Office ka thlenin ka ṭhiannu Ramthansangi'n, "Muanpui, Lawngtlai lamah an dah lêt leh mai thei che tih thâwm ka lo hria a.." tiin min lo nuih var var a, kei hian eng mah ka va hre si lo ve.

"Ehe! Eng mah pawh ka hriat si loh!"

"Sawipuitu i nei ṭha a ni maithei a ni," a tih chuan ka bo tulh tulh!

"Ramte, i sawi awmzia ka hre miah lo," tiin ka zawt ta nge nge a, tu hnenah mah transfer min sawipui turin ka ngen lo hrim hrim.

"Tuna Kulikawn station-a an lo sawn nachhan che pawh inpa in a hmâ aṭangin a lo dîl tawh a ni âwm e, i nau boral hlim khân in dinhmun te sawiin a fapa enkawl tur midang an awm loh thu nen transfer a dilsak che a lâwm," a tih chuan mak ka tiin ka thinrim kher mai.

Chumi hnu lawkah kan pu in a room-ah min ko lût ta a, engkim zawhfiah vek ka tum.

"Muanpui, Lawngtlaiah in leh lo i nei tiraw?" Tiin min zâwt hmasa tê tê a.

"Aw nei e, Sir.."

"Helamah mi in luahin in khawsa nâw nâw tih ka lo hria a, Lawngtlai lamah indaih loh a na si a, i awm phei leh mai dawn em ni? Transfer order siam kher lovin i duh chuan kan dah thei che a nia,"

"Tunge, min rawn dîlsak rêng rênga ava ti lawmawm ve?" Ka ti ve zaih a.

"Aw, inpa pa Pu Rosanga'n kan inah min rawn hmu a lâwm, in dinhmun a sawi a sawlamah indaih lo an sawi reng bawk nen a ṭha dâwn riauvin ka hria a.." a ti ta a.

"Aw le Sir, in thu thu a nimai, a khawiah ve ve pawh awm ila ka hna hi nuam ka tiin ka insawn hreh chuang lo."

"A ṭhat chu, kârleha phei hman turin kan lo buatsaih dâwn nia.." a ti ta mai!

Office ka chhuahsan rualin thâwk ka la hap a, a hmaa min transfer na chhan kha Fakhlua dil a ni a, tunah a pa in a rûkin kan pu a lo va be leh a nia ka thinrim et et a, ka rilru a na bawk.

Ka hna chungchâng thlenga an lo inrawlh hi chuti maia paidam chi ninghal lo chuan..

Lawngtlaiah ka awm hreh a ni lova an duh duha chawhkawi tur ka ni bîk em ni?

Fakhlua'n hetah hnâ a nei a, a hlawh a tam bawk, kan nupa min lâkhran an tumnaah ka ngai nghet hmiah a, ka lawm lo khawp mai.

An ina va kal hial ka duh a; mahse, thil tih rum rum ka duh loh avangin ka inbengdai ta zawk a.

Ka thinrim êm avangin Faka lo haw tur pawh ka hmuak duh ta lo. A ṭûl a nih leh kan inṭhen hmiah ang a a nimai. Tih tak êmah chuan nau ka la pai lova Bawiha pawh buaipuiawm a ni tawh hek lo, chuvangin an chhungkua nena kan inzawmna hi chhu chat law law ila a ni mai! Lalfakhlua teh reng pawh a rûka transfer lo dil kher kher!

Lawngtlaia order ka hmuh tirh khân amah a awm ve reng a ṭawngkam khat mahin eng mah a sawi lo a nih kha!

A fapa a enkawl peih loh vangin hmanruaah min hmang mai mai a ni. A ve lutuk a!

Siami engkim ka hrilh ve vek a, min thinrimpui ngang mai. "U Faka pawh chu a va ti ang lo ve, a hunlaiin sawi lo mah se in innei tawh a engkim hrilh vek awm che' a ti nghe nghe.

Zan dar sarih velah ka thinrim ka inbengdaih theih hlawl loh avangin ka thawmhnaw ka thlâk sawk sawk a, Fakhlua nu leh pa hmuh ngei tumin rilru ka siam ta a.

"Siami, Bawiha lo awmpui rawh aw, ka lung a awi thei ngang lo, i u Faka awm loh hlân hian kan va inchapchâr law law ang e." Ka ti ta a.

Chak lutuka car ka khalh laite chuan ka inpet ruh fan fan a, an châwm leh an enkawl seilen ka ni lova hetiang em em a min hmusittu hi kei police rilru butut nei hian ka ngawihpui thei lo a chhâ chu a ni e.

An kawngkhar ka kik rualin nu berin min lo chhâwn a, a aw nêm hlâwi te hi ka ten hluah hluah tawh. Pâwnlama 'Angel' awká nei, chhunglama Rûl zia pu si hi dîm baksak lova hlap awk a nia ka duh ni! Nu leh pa ka neih loh vâng te unau pianpui dang ka neih loh vânga min hmusittute hi ka enliam tawh tawp lovang.

"Khaw'nge pa Rosanga?" Ka ti nghâl tawp a.

"A awm eng atân nge i tih?" Min ei loh hmêl zetin a ner nâwng a, pitar sual tak a ni.

"Ko rawh, ka be duh a nia.." ṭhut pawh ka ṭhu duh lova ani pawhin 'ṭhu rawh' min ti bik hek lo.

"Kan inchhungah i duh duhin i rawn lût ngam a nia, min han biak dan te lah hi nu leh pa nei lo ṭawng dan niâwm a ni." Tiin an pa a ko zui a, ka nu leh pa rual daih ni lo se chuan ka bêng khawp ang.

Nu leh pa hi kan lei Pathian te anni a, aia upa zah tura min hrilh fotu ka pa thusawi hre rengin ka insum nasâ. Ka mihring rilru hi chuan a cho et et asin lê!

"Muanpui eng nge ni ta?" Pa Rova a rawn chhuak a, eng mah hre lo ang hmiahin zuk lang thiam a!

"Ka hna chungchângah i lo inrawlh tih ka hria a, ka lawm lo.." ka ti tlang hmiah.

"Awihawm loh lutuk, ka inrawlh chu sawi loh i lakah hian eng mah duh leh beisei kan nei lova ka tupa leh ka fapa hlatsan la i tân a ṭha ang."

Ka phone ka kut hnunglama ka thuhruk chu an hmu lo nge ka hmet zauh a, Voice record ka mamawh tlat avangin ka set sa thlap kha a nia.

"A nih chuan Lawngtlaia min transfer turin i dîl lo tak tak maw, kan pu i be miah lo maw!?" Police in misual zawhna kan zawh laia ka ṭawng dan chiahin a ni ka ṭawng chhuah. A nelawm loh khawp ang.

"Teuh lo mai, in pu ka la hmu lo, kan inchhunga i duh duh min lo zâwt tur hian kan eng mah i ni lova chhuak tawh rawh.." a ti hmuk a. A nupui erawh a lo ngawi ve teh tlat!

"Ka chhuak dawn alâwm, thil tisualtu man lohvin ka chhuah bik lovang, ka phalna la hmasa miah lova ka hnathawhna hmun sawn tura in lo dîl ve ngawt te, tun lawkah i dâwtsawi man te khan i zahna khua a tisei ve khawpin ka ring, chuan nangni ang nu leh pa neih ai chuan hetia ka fahrah hi ka lâwm ta, a chhan chu in hmâ in lo sial êm a ni." Zah pah miah lovin ka ṭawng hmiah hmiah a.

"I zak lo hlê mai, eng mah tih tur i nei lo he inah hian, chhuak rang mai teh, ka fapa nun aṭangin chhuak bawk la.." thinrim hmai sen ṭûna a ṭawng chu ka hlau chhete eih lo.

"Vawiinah kan pu in transfer min dilsaktu hming nen lam min hrilh vek a, nang lo Rosanga an awm si lova tunge dâwt sawi zâwk kan hre dawn alawm," tih pahin nichina ka voice record kha ka hmet chhuak a, a nuih a za lo khawp mai.

"Lalmuanpui, tenawm nu.." kut min thlâk mai duh hmêl a pu a, a nupui pawh a ter at mai.

"Tenawm chu kei nilovin in pahnih zawk khan a nia, ngaihdam min dîl a nih erawh chuan ka ngaidam mial maithei che u, police chuan kan dikna hai lante, mi dik lo te hremna pêk leh chhuichhuah hi kan hna a ni, Lalmuanpuii hi police ka ni tlat sia.." tih pahin min chhânna pawh ngaichâng tawh lo hian ka chhuak hmiah a.

Thinrimna kârah ka nui phei var var a, Faka nen inṭhen te kha ka ngaihtuah deuh thut thut hman kha a nia; mahse, a nu leh pa vâng hian ka thlah hauh lovang, min hmangaihtu tih hrehawm kher hi thil ṭul ber ninghal lo chuan..

Kan in ka thlenin Faka ka hmu thut a, a chauh hmel kher mai.

"Ka nu leh pa hmu lo tur khan ka hrilh che in ka hria.." a ti nghut a.

"Hmuh a ngai alawm, i lo thlenna a rei tawh em?" Tiin thudangah pakai ka tum a.

"Muanpui, ka thusawi eng atan mah ti lova ka nu leh pa i lo va hmu hi ka lawm lo khawp mai.." Ti lehin room-ah a lût hmak a, hepa pawh hi a, thil hrechiang hmasa lova thinrim rîkngawt a chîng lutuk hi simtîr a ngai.

Zanin hian engkim sawi tlang vek ila a nih nih nihlawm teh ang u.

Lalfakhlua pawh chhuahchhâl ka ngai hrim hrim, ka hna chungchânga a lo inrawlh thu-ah a bâng bik lova a fapa enkawl tura min nei nge a nih keimah Lalmuanpuii hi min hmangaih tak tak vang tih hriat chhuah ngei tumin game ka'n khêl ve ang e.

A va nuam dâwn êm! Min hmangaihtu tak tak chu a hriat mai ang chu..

B<++[BeckirafARenthleI]+>RR

Segundo story chu zaninah tihtawp ka tum zet a, group lamah ṭan a na deuh sia, Fakhlua nu Hremhmuna thawn liam em chu tiin naktuk zanah Epilogue nen khâr fel kan tum zâwk dawn nia.

Min chhiarsaktute chungah lawmthu ka sawi nawn leh e...

BRR

BRR

SEGUNDO

Becky Rafa Renthlei

Chapter-33

Lalfakhlua

Ka awm loh hlâna Muanpuii'n ka nu leh pa a lo hmu hi ka lâwm lo khawp mai! Ka zinsan dâwnah ka chah diam a, ka thusawi eng atân mah a ti lova ka haw reuh riau.

A thil tur ka hawnsak pawh pe ta mai lo chuan Bawiha ka pawm hmasa tê tê a, ka zin hâw min hmuak tur pawhin a rawn kal duh lo tih ka hriat hian ka chhungril a na ru deuh.

"Ka nu leh pa hmu tura i kal na chhan sawi rawh le?" Sitting room-ah Siami'n inlêng a neih avangin kan nupa pindanah kan awm a.

"Faka, tûn ṭum chu ka lungawi lo khawp mai, i chungah pawh ka lâwm chuang lo." Ti nghatin min melh râm râm a, nidanga a thinrim dan 'style' nen a inang tlat lo! Eng nge keima chungah thinrimna tur a neih pawh ka hriat si loh!

"Eng nge? I lungawi lohna tur thil tih ka nei em ni?" Ka duh aiin ka pâwr.

"Zomuani thih hlima min transfer khân mak ka ti hlê a nih kha! Ka hriatpuina tel miah lova ka hna chungchânga i lo inrawlh hi ka lâwm lo," Eheu! Ka rin loh lam daih a ni. Ka inthiam lo nghâl ringawt a, a hmâin hrilh ka tum ṭhin a, ka lo mangnghilh atin ni.

"Kha chu.." ka ti dêk dêk a, vîn hauh si lo; mahse, ngeiawm rawngkâi deuh hian, "Kan pu in min hrilh vek, i fapa nangmaha enkawl i zuam lo tih thlengin ka hre vek tawh, min bum lovang," a sawi zâwng pawhin a thinrim hlê tih ka hria.

"Muanpui, ka fapa vâng chauhva nei che ah min ngai em ni? Ka thusawi hi âwih rawh, transfer chungchângah kha chuan ka thiam lo tehmeuh mai; mahse, ka hmangaih che, min ring rawh.."

"Nangma chungchâng bîkah chuan hun liam tawh a ni a hriat reng ka tum lo; mahse, i pain Lawngtlaia min awmtîr leh tuma transfer a lo dîl kher hi chuti maia pawnzam ka tum lo a nia, kan inṭhen an duh bawk a, kan inṭhen mai a ni ang chu.."

"Eng a? Eng maw i sawi?" Mak ka tih êm avangin ka zâwt nawn sek sek a! Min hmangaihtu ni a ka hriat ka nu leh pa kalsana ka thlan hian min ṭhen a duh a maw!

"I nu leh pa min tih dan zozai hi ê, enliam mai mai chi ninghal lo chuan! Min châwm pawh a ni lova ka hâk tur silhfen an lei chu sawi loh an tupa thawmhnaw leh hnute hnêk tur leina pawh chêngkhat mah min pe lo.." a thinrim âng ri ka vawikhat hriatna a ni a, ka ngawi tawp.

"Nu leh pa te hi kan lei Pathian anni a, an thû zâwmin min ṭhen mai rawh, nangmah hringtute nena inbakkaih reng hi ka peih tawh lo, ka ngawi a ka ngawi zêl a, ka hna ka tuina em em leh ka inchâwmna thlenga inrawlh an tum hi chu ka ngaih dan a pêl tawh," a ti zui leh a.

"Ka pa chu a inrawlh tih i hrechiang maw?"

"Kan puin vawiinah min ko a lâwm, tranfer nih sek te hi thil zahthlâk tak a ni ve asin, a hmâa i lo tih tawh kha chu thuhran nise tûna i pa a lo inrawlh leh kher hi chu e..." sawi zawm tawh lo hian a ding hluai a, chhuatah kut hnungsuihin a vei chhên a, hundang chu nise ka nui ngei ang! Mahse, a thinrim inhrîk thlâkna a nih vângin ka nui ta lo.

"Ka pa ka biak a ngai a nih chu.."

"Biak biak a ngai lo, kha hei hi ngaithla rawh dâwt muhlûm a sawi vâng hian ka ngaidam duh lo maithei a nia vawiinah kan pu ka bia ang a a ṭûl a nih chuan inchapchâr rawh se." tiin a phone-a ka pa nen an inbiakna chu min ngaihthlâktîr ta a.

Thinrim lutuk avângin ka insehruh ṭeuh a, ka pa ṭawngkam kha Muanpuii tân pawh paidam mai mai a har ngawt ang.

"Inṭhen lam kha chu theihnghilh ang che, Pathian hmâa ka thutiam kha a vawihnihna a ni a, 'thihnain min ṭhen hma loh zawng' ka ti lovem ni? I thî pawh a ni lova sût leh mai mai tur atân i kut vuanin thû ka chham hek lo, inpu chu kan pahnihin kan bia ang a, arang lamin Lawngtlai kan pan dâwn nia.." ka tih chuan maktih hmel takin min en a, chutah, "I hna hi engtin nge ni ang?" A ti sap a.

"Ka bâng dâwn, ka kumkhaw eizawnna tur a ni hleinem, Muanpui, ka ti tak tak ka kalsan dawn lo che."

"Hus! Anglo lutuk i hnâ bânsan turin ka phût lo che."

"Ka sum khawlsa tlém azawng hian bul ṭanin Lawngtlaiah workshop ka din dâwn alawm, company lam puihna ka dîl bawk ang a, anni te chuan huang tihzauh an duh reng tih hre ta che." Ka rilru dik tak a ni ka sawi, ka nu leh pa rilru ka en hian engtikah mah ka nupui hi min pawmpui dâwnin ka hre lova keiin ṭhen ka tum bîk si lo.

Kan nupa pawh ṭhen phêt min tum a, harsat manganna an tâwk a nih chuan ka ngaihsak ang; mahse, an kianga ka chên kher hi thil ṭûl ber niin ka hre ta lo a ni.

Chumi hnu chuan kan inkâr kan sawifel ta. "Faka ka lawm e, thihnain min ṭhen hma loh zawng ka thlah bik hauh lovang che," tiin min rawn kuah a, a hmui lum hiama ka chalah fâwpin, "A pahnihna ni mah ila ka vûi miah lo a nia, pakhatna hauhtu khâ ka phirpui ka thisenzawm a ni tlat a, kan unauvin number one leh two kan ni mai," a nui ta hak hak a, Lalmuanpuii zawng mi hriatthiamna ngah tak hmeichhia a ni rêng a ni.

##

Muanpuii transfer-na tur engkim peih a ni tawh a, nithum hnuah Lawngtlai panin kan chhuak dâwn ta chu a nia, ka nu leh pa eng mah ka hrilh lo mai ni lovin ka nî te pawh ka hrilh bîk lo. Ka hna bansan ka tum tih a hriatin kan pû a lawm lo hle a, "Faka, i tello te chuan eng kan ni dâwn lo asin, ruahmanna dang siam ang," tiin min thlêm ta a.

"Eng ruahmanna maw?"

"Lawngtlaia workshop hawnna turah a capital ka tum ang a, manager-in i awm ang a ka rawn vil ve thei dâwn lo bawk nen bul ka ṭanpui ang che Delhi zin ngai leh Loan la tur ho erawh i buaipui thung ang a," a tih chuan, "Ni lo ve, mahni kut kê a din ngei ka duh vâng zawk a ni e, min hrethiam rawh," tiin kan inchhâng ta kha a nia.

Nu leh pa pawh ṭhen theih hmangaihna neih ai chuan nu leh pa leh ka nupui fanau thlahthlam chuang lova keimaha bul ṭan ka tum tur a ni.

Lawngtlaiah in luah hran ngai lovin Muanpuii inah kan awm ta a, a hmaa lo luahtu pawh kan hrilh lâwk diam avangin a lo inla chhuak fel thlap tawh bawk.

"Faka, workshop din i tum si chuan GP kan pûk mai dâwn em ni ang?" Ka nupui nen thingpui hâng in in sitting room-ah kan ṭhu a.

"Ka hrethiam rih lo engzât nge ka mamawh dâwn hriat a ni rih lo va.."

"Ruahmanna ka lo siam dawn nia," a tih chuan ka sawi thui vak lem lo.

After 3 months

Neihkimi (Fakhlua nu)

Ka Bp sâng leh zunthlumin min tlâkbuak leh avangin dam ni hmêl ka hmu meuh lova ka fapa ka ngai ngawih ngawih.

"Rova, Mama te kha han be chhin teh," inthlahrung ru taka ka tih chuan, "Aizawlah an awm tawh lo Lawngtlaiah an pan daih tawh." Tiin min chhâng hmuk a.

Khatia Muanpuii thinrim zeta a lokal hnu khân kan nupa kan inhau hrep a; 'Nu-i, i ti mah mah a ni Muanpuii hi police a nih vânga huat tlat hi thil nih phung a ni lo, lock up-a a tânna chhan pawh kan fapa thiam loh a ni a midang puh tlat hi thil âtthlâk tak a ni." Tia min hau ṭum khan ka ṭang nasa viau kha a nia.

"Lawngtlaiah pawh awm se be ve hrim hrim rawh," ka tih leh chuan a phone min rawn pein, "I duh chuan be rawh, Mama rilru kan tina êm a biak pawh ka duh lo." Ka mutnaah rawn kalin min call sak ta a, vawi thum a 'ring' ral ṭhak!

Ka ka fapa neihchhun lunglian zet, nu leh pa hmangaih em emtu leh ka tupa ka chân a ni hrim mai. Ka tih dik loh man ka têl mêk a, Muanpuii phei chu ka be ngam lo hrim hrim.

Beidawng leh rilru na zetin phone ka dah thla riai riai a, Setana duhdan ka lo dah lal lutuka chapona avangin ka fate rilru natna ka siam man ka tuar a nih ber hi, mittui luang ngiai chunga rilru ṭawngṭaina neiin, 'Lalpa, Mama te nupa hi ka hnenah rawn hruaikîr hrâm rawh, pâwn lam lan mawi duh vâng maia i rawng ka lo bâwl ṭhinna te nangmah phatsana sual duh dan ka lo zawm ṭhinna zawng zawngah khawngaih takin min ngaidam ang che.'

Ka thâwl huaiin ka hria a, awmpui eng anga tam pawh nei ila ka fate tluka min hmangaihtu ka nei lo tih ka lo hrechhuak har lutuk a ni.

Ka taksá na lutuk ni lo mah se nu rilru chhungril ber hian ka fapa a ngai a ni. Muanpuii hlim hmel leh Zosangmawia a fapa hrin ni miah lo duat taka a âwi laite kha ka mitthlaah a lo lang a; kei, mahni hrin ngei enhrangtu hi ka lo va sual êm!

"Rova, Lawngtlaiah zin ve ang," tiin kan pa ngawirenga ding chu ka bia a.

"Zin thei i ni hleinem kawng a thui si i chauh phah vek ang."

"Helicopter in kal ila, kan sum te hi kan fate tân lo chuan eng mah lo mai a ni."

"A ṭha e, i inngaihtuah harh theia ka lawm.." a bâk eng mah sawi lovin a chhuak zui ta a.

Ka pasal hian a fapa a hmangaih tih ka hria; mahse, a nupuiin kawng ṭha lo lam ka zawhpui tlat a rilru nuamin a awm ngai lo. Ka fapa Fakhlua hian a nu leh pa min thlahthlam duh tur khawpa rilru chhia a put ka ring lova anmahni hmuh ngei tumin leh tlâwm a ngaih pawha tlâwm ngam turin Lawngtlai pan kan rilrûk ta a.

Lalfakhlua & Lalmuanpuii

Lawngtlai

"Muanpui, ka lo haw hma thei lo maithei a nia, eirawngbawl tih loh chu thil dang eng mah lo buaipui suh aw, Bawiha pawh paw tawh rih suh.." Muanpuii'n nau a pâi tih ka hriat ni khân kei aia lâwm an awm hauhvin ka ring lo.

Bawiha kumkhat leh thlahnih a tling tawh a, ṭawng a zir ṭan mêk nen kan nui nasa thei ṭhin khawp mai.

Muanpuii'n GP a pûk leh ta a, ka khawlsa nen Hyundai workshop kan din ve ta a, Delhi leh Lawngtlai ka kartawn zak zak a ni ber mai! A hah pawh ka hah rêng a; mahse, ka chhungkua châwmna tur thawhchhuah ngei ka tum ruh tlat.

"I lo haw tlâi tâk leh chaw eiah kan lo nghâk lo ang che, chuan Bawiha thil rawn hawn tawh suh a zawngchhang," khumah thawmhnaw thlepin balbâwm nen a inchhawp a, a chefel thlup thlup si a Lalmuanpuii niâwm rêng a ni.

"Ani kan hawn lovin tu fâ nge ka hawnsak chuan ang a," ka nui suk suk a, police tih takah a strick ru viau a, thil ho tê tê ang a ka ngaih te hi a enliam ve ngai vak lo.

A office kal tur erawh uniform nawh khawng at lo inbel duh hek lo. A spare nen lam ka nawh a ngai ve fo mai.

Workshop pana ka kal laiin ka phone a ri chhên a, motor khalh paha phone hman hi ka rilrem zawng zuk ni hauh lova!

Ka pa missed call ka hmuh chuan call back ka tum lêm lova a pawimawh ta viau a nih leh min rawn call em em ang.

Chhungkaw pa dinhmun ka luah chho mêk a, Zomuani leh a pa lung pawh kum tâwp lamah kan phun theiin ka ring a, Aizawla inluah man chawia awm ai chuan heta awm hi kan tân a ṭha daih zawk, pawisa khawl a remchâng phian.

Zirsanga te chhungkua nen kan inbe âwl lova an fanu têber pawh a hmelṭha hle tih a thlalak min lo thawn aṭangin ka hre mai, 'Zosangmawia bialnu tur a nih kha' tia ka va fiam chuan 'Faka nawi viau suh aw..' tiin a nui hawk a, 'Ka fiamthu lo a nia, kan fate kan inthlunzawmtir theih chuan chhungkua kan nimai' fiamthu deuhva ti lehin min chhânna chuan ka nuih a ti za bâng lo.

'I fapa englo mai mai atân ka fanu ka phal lo e a' zuk tia maw le. Zirsangliana nge nge fiamthu a la duh tluang zêl e.

Muanpuii'n nau a pai ve ta bawk a ka phûr rualin Zomuani ka ngaihtuah lo thei lo, accident palh leh mawlh ka hlau tawh a, car pahnih kan nei tawh lo bawk a keimah hlîrin office-ah ka hruai ṭhin a, a hâw lam erawh ka hruai hman loh avangin Taxi kan be sa thung.

Kohhranin min thununa pawh an hlîp tawh a, kan chhungkuain kan inkhawm ve zak zak a, Pathian min venna leh nupui ṭha tak min pêk avangin ka theihtâwpa a rawng bâwl tlat hi ka tihturah ka ngai hmiah.

Muanpuii nen kan bul ṭanna fuh chiah lo mah se Pathian hnenah ngaihdam dilin a tâwp ṭha taka khâr erawh kan nupa tum ber a ni ta.

Kan hun liam tawha kan tihsual te avanga indawm kun mai lovin ka chhungkua ka nupui fanaute Krista hnena hruai thlengtu nih tum tlat tum chungin thutlûkna felfai Lalfakhlua hian ka siam tawh tlat.

B<++[BeckirafARenthleI]+>RR

SEGUNDO

Becky Rafa Renthlei

Chapter-34

Segundo family

Workshop-ah nilêngin kan tâlbuai a ka nupui hnenah ka hâw tlai tur thu ka sawi lâwk hlauh chu ava tihzia êm! Head mechanic pakhat chiah kan la nei rih a, keiin ka pui bawk a, helper erawh pali an awm thung, vawiinah ringawt pawh engine oil thlâk sên loh kan nei a Pathian malsawmna ka dawn liau liau a ni.

Mite ang a hausa thûr ni lo mah ila ka nupui hlawh leh ka thawhchhuah hian harsa lutuk lovin kan awm thei a, Muanpuii paw'n rinaiin ṭhahnem a ngai daih. Thil ṭûl lovah sum a hmang zen zen lova thawmhnaw pawh a uar lem lo. Mahse, a lei chhunah erawh a duhthawh viau!

Bawiha a la hautak lutuk lo bawk a, Siami hlawh kan pêk bâk hi chu sum hlâwm pêk chhuah kan nei lutuk lo bawk. Rethei lutuka min siam lo te hi Pathian hnenah lawmthû ka sawi fo ṭhin. Zomuani ang lo takin Muanpuii hi chu a danglam bîk a, a tih tawh loh ah chuan a lung a lian hlê. A thinrim zen zen lova a ṭawng tam lutuk lo bawk.

Zân dar sarih vêlah in ka thleng chauh a, ka nu leh pa'n sum hmansên loh nei mah se ka awt bik lo. Engkima lungawi dan zirzêla taimâk chauh hian hlawhtlinna a awm tih hrechiangtu ka ni bawk.

"Bawiha, min lo hmuak dâwn nange?" Veranda aṭangin ka fapa ka kova ka haw tlai chuan an nufain min lo hmuak ziah.

Tuma'n min chhân tâk si lohah chuan kawngkhar hawngin ka lût ta a, kan sitting room sofa-a lo ṭhu te ka hmuhin ka pên tawp chat!

Ka nu leh pa inthlahrun hmêl taka lo ṭhu chu mit khap miah lovin ka en ta a.

"Mama, i lo haw tawh maw!?" Inchhungah Muanpuii hmêl ka hmu miah lova anni hian an lo khak leh hrep em maw ni!?

"In lokal a ni maw?" Ka nu leh pa annih tlat avangin ṭawngkam mawi lova biak kher thil ṭûl a ni lova bâkah a Pathian thû lo ka ti ve deuh.

"Nia, lo sawilâwk tumin kan lo call che a i chhâng thei lova!" Ka pa'n a ti dam thlup nia!

"Khaw'nge Muanpuii te?" Tia ka zawh chuan, "Faka a lo la hâw lova tikhân lo nghâk mai rawh u tiin Bawiha nen an chhuak," ka nu'n zuai raihin a ti ta a.

Ni e, ka nupui tân pawh ka nu leh pa hi an ngeiawm ve êm a ka dem hran lo.

"Ka'n inthlâk lawk ang e, tikhân lo ṭhu rawh u," tiin room-ah ka luhsan ta a. Dik tak chuan keipawh hian ka lâwm tehchiam lo; mahse, min hringtu nu leh pa na nâ na chu eng emaw chenah lainatna ka nei lo thei lova chutih rualin an lokal chhan eng mah an sawi rih si lova nêlawm tak awm ka tum hran lo. Muanpuii pawh ka phone duh tingtang ta lo va.

Room aṭanga ka chhuah hnu pawhin ngawirengin chaw ei ka siam a, ka eisan hmiah. Muanpuii te hi an khawsak a harsa hran lova bungrua engkim leichawp ngai lovin an nei deuh vek bawk! Ka nu'n inchhung vêl a melhkual ngial a, a faiin a hnûm hlarh vek bawk nen a lo hmuhsit ang ngawt kha a ni lo tih a hrechhuak tepawh a ni mahna.

"Mama, i eikham tawh chuan thil sawipui lawk duh che kan nei a nia," ka pa bawkin a ti leh a.

Sitting room-ah kan pathumin kan ṭhu ṭhap a, "In nupa chunga kan chêt dan a mawi lovin nu leh pa nih kan tling lo takzet a ni," ati chuar chuar a, ka ngawi reng.

"Mama, innu pawh lo hrilh la, a chunga ka chêt dan kha ka inthiam lo mai ni lovin ka zak a, nang chu kan fapa, kan hrin i ni a min hmangaih tih pawh kan hria; mahse, i nupui rilru kan tihnatna hi keini chuan kan thâwidam thei maiin ka ring lo khawngaihin lo hrilhfiah la kan inchhirin pawi kan ti takzet a ni." Ka nu'n ṭap ṭeuhvin a ti ta a.

"Ni e, kan rilru a na lo ka tih chuan dâwt ka sawi tihna, kan na hlê a ni; ka nu leh pa innih miau vangin kei chuan ka ngaidam thei che u a Muanpuii erawh inhriat kha a thinlung hneh tur hian nangmahni ngeiin hmâ inlâk ve a ngai ang, na taka insiam lai khân kei min râwn lova in duh dan danin in kal miah miah a, ka nupui hi a diknaah chuan a lam ka ṭang zel dâwn." Ka ti hmiah hmiah.

"Kan hrethiam a lâwm, amah pawh ko haw ve la sawitlâng ila ṭhain ka hria.." a sawi zawh rualin Muanpuii leh Bawiha an rawn inpaw lût a, tumah min en lovin kan nupa room-ah a lût tlang nghâl hmiah.

Ka nupui rilru na hi chuti maia dam chi niin ka hre lo bawk.

Room-a ka va luh ve chuan khumah a lo ṭhu a min melh zawk ringawt!

"I lung a awi lo ang tih chu ka hria a vawikhat chauh ka nu leh pa thusawi tur hi ngaithla la chuta i lung a dam thei ngang lo a nih chuan ka nawr lui lovang che," a bulah ṭhuin a dârah ka vuan a, "An duh duha chawhkâwi theih ka ni hleinem, nu leh pa nei lo ka ni a, min hmusittu hi chuti maia ngaih dam ka tum lo, hetah an riak duh a nih chuan riak se ka nî te inah kan riak mai ang," a ti ta mauh mai le!

"Vawikhat chauh, a bâk chu ka ngen lovang che," a mitah chiang takin ka en a, min en lêt ve bawk.

"Faka, Zomuani leh a kaihnawih hrim hrimah inrawlh a duh lo tih an sawi tawh a lâwm.."

"Ka hria e, ka nu pawh a inchhir rêng a ni."

"Bul kan ṭan ve dâwn chauhva min pawh ṭhen an tum leh tho vang.." a ti hmak a.

"Ni lo ve ṭha takin sawiho ila chhungkua hetia awm te hi thil ṭha a ni lo, chuvangin inbiain i sawitlâng ang u i lamah ka ṭang tlat tih i hriat kha.." ka thlêm ngial hnuah min zui chhuak ve ta hrâm.

Kan nupain kan ṭhu dûn a, ka nu leh pa kan ep chiahah an ṭhu bawk.

"Muanpui, min ngaidam rawh tia ngên ngam tur che kan ni lo; mahse, i laka kan awm dan mawi lo zawng zawngah khân Pathian hmingin ngaihdam kan dil takmeuh a che, ka fapa tûn dinhmuna a din theihna chhan te chhungkua i pêk avang te hian lawmthu ka sawi lo thei lo." Ka nu meuhin ngaihdam a dîl a nia!

Mihring chapo leh induh tâwk tak ni ṭhin kha a tlâwm ve ta.

"Nu leh pa nei lova awm ka la thlang fan.." Lalmuanpuii phun sap ri chuan ka chhungril a nghawr dat thei maw le.

"Khawngaihin min ngaidam ula kan hnenah in lokir duh lo a nih pawhin kan dem lo che u; mahse, nangni nupa leh kan tupa lo chu khawvelah eng mah kan tâna hlû a awm thei tawh chuang lo." Ka pa'n a ti ve a.

Ka inrawlh duh lo hrim hrim kei chuan ka thinlung takin ka ngaidam thei; mahse, ka nupui erawhin ka rilru ang a pu kherin ka ring lo.

"Chhungkua kan ni a, tlâwmzawk an awm loh chuan inrem a har ṭhin; nu leh pa koh tur ka nei ta che u hi ka lâwm hlê a ni." Muanpuii ṭawng chu ka hresual emaw ka ti hial a, ka nu leh pa mittui far zauh pawh ka hmu hman.

"Kan lawm e Muanpui! Mama, nupui i lo thlangsual rêng rêng lo a nih hi.." ka pa mittui far ka hmuh meuh chuan ka hnuk a ulh ve lek lek!

Muanpuii hi thilsawi duah mi a ni lova tûna a thilsawi khâ kan vai atân erawh inremna thlentu a ni si.

Chumi hnu chuan ka nu'n ṭawngṭaina a hmang a, ka pa'n hman a tum zet nâa ka nu in a chuh deuh tlat! Pathian hmâa ngaihdam dilna nen a ṭawngṭai zawh meuh chuan kei takngial pawh ka mittui a far fap mai.

Mihring hi ṭhat leh ṭhata inlâwm thei reng kan ni a, chapona leh 'thei ve ni' a kan inhriatna hian chhungkua ati kehdarh fo ṭhin a ni. Nimahsela, Pathian aṭanga inchhirna leh simna thinlung tak tak pû a kan mihring puite chungah ngei pawh kan tlâwm ngam hian a ngaihdamna kan changin chhungkuaah, famo leh nu leh pa inkâr thlengin inremna a lo awm thei reng zu nia!

Chumi hnu chuan Muanpuii naupai chungchângte sawiin hlim takin kan titi tlâng ta a. An hnenah erawh tûn dinhmunah chuan kan chêng thei dawn rih lo tih thlengin ka sawi a, "In duh chuan lo awm ve rih ula Pathian zara naute ka nei thei a nih chuan inpui lamah kan lo insawn dawn nia" Muanpuii'n a ti ve bawk a, ka va hlim si êm..

Chhungkaw kehdarh awm fo nachhan hi eng dang vâng a lo ni lo Pathian tel lo va chhungkua kan din ṭhin vâng a lo ni.

Tumah ṭha famkim kan awm lova kan fel lohna leh kan tihdik lohna inhmuh kân saka, a ṭha lai kan inhmuhsak hian inremna leh inlungrualna a lo awm mai ṭhin a ni. Ka nupui Lalmuanpuii rilru hel tak ṭhin pawh a thinlung tui ang a tinêmtu chu tlâwm taka ka nu leh pa'n Pathian aṭanga ngaihdam an dîl vâng a ni.

'Chhânna nêmin thinur a ti kiang ṭhin a, ṭawng huatthlala erawh chuan thinur a chawk tho ṭhin.' (Thufingte 15:1)

TLIPNA

"Nubawih, tuar hrâm hrâm rawh aw.." Muanpuii pumna vial ngalh ngalh chu ka nu in a kâwng a zût sak a, ka pa nen erawh chuan luh ve min phalsak loh avangin tukverh aṭanga thlîr bâk tihtheih kan nei lo.

Khatia kan inrem hnu khân kârkhat lâi kan hnenah an châm ve a, in lam an ngaihtuah deuh avang leh Muanpuii nau neih huna lokal intiam chungin kan inṭhen ta kha a nia.

"Ka nu, ka pa, lo zin leh vat rawh u aw, Bawiha a pi te bye bye rawh le," an tlânliam dâwna ka nupui ṭawngkam kha ngaihthlâk ava nuam si êm.

Keini lam zin thei dinhmunah kan ding tawh lova hna nei ve ve kan ni bawk nen phone-a kan inbiak bâk tih vak ngaihna a rih awm lêm lo. Pawisa min rawn thawn an tum pawhin kan duh lo tlat a, ka nu leh pa ro luahtu tur chu keimah Lalfakhlua tho ka nih avângin an dam lai hi chuan kan thawhchhuah ngei ei ve ila ka ti deuh a ni.

Zomuani leh a pa lung phunna tur erawh ka pain 'ka tum dâwn' a tih tlat avangin kan hnial ta lo. Aizawla Zomuani thlân pawh an siam peih diam tawh a, keini nupain helamah a pa thlân kan siam thung.

"Fapa i nei e.." Dârkar thum hnua naute ṭap ngâk ngâk ri chuan ka lâwmna ava tikim si êm! A nu a ṭhat leh ṭhat loh ka zawh chuan "Kan ṭhui zawh hunah kan rawn dah chhuak ang, a ṭha e,' nurse a nui var var a, ka nu leh pa pawh an lâwm khawp mai.

"Fapa min pêk avangin ka lâwm e," Muanpuii beng bulah ka phun sup a, "Hmeichhia ka duh zâwk asin le.." a nûr nâng a, a va han â mai mai tak! Mahse, a kum nen a la in âwm tâwk lek.

"Lungngai suh, i pasal hian i peih loh thleng thleng ka la siamsak dâwn che nia.."

"Fakhlu leh.." a nui var var a, ka nu leh pa an awm ve sia kan ṭawng ring ṭha vak ngam lo.

Bawiha a lâwm ngang mai, a nau hmêl hmuh tumin a khuhna a hawng sek a, a pu in dâwrah a hruai phah ta ringawt.

Cabin-ah kârkhat tling lo deuh kan awm hnuah hlim takin damdawi in kan chhuahsan ve ta a, Siami lah chuan, "Awi, hmeichhia ka lo ring ve a.." a ti hliai a, ka nui suk suk ringawt.

"Mama, in workshop hi midang enkawltîr ula kan hnenah lo awm tawh mai rawh u.." ka nu in a tih chuan, Muanpuii hna hi engtin nge ni ang?"

"I pa in transfer dîl leh mai rawh se.." a sawi zawh rualin kan nui vek. Ka pa pawh a nui vur vur a, Muanpuii melh zauh pah hian, "Voice record chu in mamawh tawh lovang," a la ti zui a(h) kan nu pawh lâi zetin a nui hak nia.

Zirsanga te chhungkua naute enin an lokal pek a, kan chhangchhe ngei mai.

Duati erawh Lunglei lamah a la awm ngar ngar a, Rafaela a inti upa deuh ber, Zosangmawia nen an inzui kâwi reng a, Shavdhan India an lo en lâiin ka va lût thut a, "A nu Muanpuii tâ ang," tia police uniform inbel min kawhhmuh chuan ka va nui nasa mai mai tak.

"Faka, infapa hian kan fanu a lo 'chu e kha' palh vaih chuan.." Zosangmawia leh Zirsanga te fanu chhuata ṭhu ka melh zauh a, an hmelṭha dûn tih ka zêp peih lo. Ṭhianpa fanu hi a cute êm a ni.

"Min chhun chuan makpa ṭha deuh i nei dâwn tih hre ta che.." tiin ka chhâng a, "Sawi âwm leh âwm lo hre teh u," Mafeli a nui duh mang dêr lo nia.

Zirsanga te chhungkua an haw hnuah leh ka nu leh pa'n min hawsan hnu chuan kan chhungkaw bil tê chauhvin kan awm leh ta a, Muanpuii pawh a ṭha chak viau.

"Faka, ka nu leh pate kan fin hi a hun tawhin ka hria upa lam anni tawh a an khawngaihthlâk.." khumah kan mu tlar dal a, Muanpuii thilsawi hi ka rilrem zâwng tak a ni.

"Kan company lam aṭanga workshop enkawltu tur an lo thlen hunah ruahmanna kan siam dâwn nia."

"I nupui ka ni hi ka lâwm.." a rawn ti teh thut a.

"I pasal ka ni thei hi ka lâwm fê my wife Segundo.." a hmuiah ka fâwp ta a.

"Hey, Bawiha men laiin tiang tih kha chîng suh." Ti hlakin a hawisawn hmak.

Ka nupui segundo Lalmuanpuii hi ka tawng lovang tih ka hlau. Ka hmangaih hmasakber leh ka nupui pahnihna hian ka khawvel a tifamkim si a ni.

A nau Zomuani boral tawh mah se 'Pathianin kan ṭhatna turin engkim a thawk ṭhin' tih ziak ang khân kan chhungkaw tân leh ka fapa pahnihte tâna nu ṭhatak a ni ngeiin ka ring bawk.

Police pasal ka nih avangin form erawh ka nâwt zing leh tlauh tlauh dâwn mang e, Siami nawhsak a duh tlat si lova.

Ka nupui kuah chial chunga muhilh ka tum meuh chuan zinglam darkhat a pêl tawh a, kan fapa naupang zâwk hming atana a pu in a phuah Lawmsangzela pawh a nu hnute hne chungin a mutui viau e...

'Lalpa chhungkua ṭhatak min pêk avangin ka lawm e' tia phun sup chungin ka chhîng ve ta a.

"Pathianin a zawm tawh chu mihringin ṭhen suh se" tih hi kan nupa leh kan chhungkaw thuvawn a lo ni ta.

A TAWP TA

NOTE: Segundo story min chhiarsaktu comment leh like min petu te zawng zawng chungah lawmthu ka sawi takmeuh a, in duhthu a sâm lo a nih pawhin famkim lo ka nihna hi min hriatsak theih chuan ka lâwm viau ang.

Ka story min chhiarsaktute a tlângpuiin mi hriatthiamna ngah leh dawhthei tak inni hi ka lawmna tizualtu a ni. Tlêma rilru natna tur hmuh zeuh châng awm mah se a tam zâwk hi min back up tute inni a, public post a nih angin fakna hlir a dawn theih lova sawiselna pawh a awm tur a ni dâwn lo'm ni? Tih hi ka ngaih dan pakhat a ni.

Ka birthday 24 september pualin a story hi ka rawn advertised a, chapter 34 zet awmin a tâwp kan khâr thei hi a lawmawm hlêin ka hria, in zarah hian ziaktu ka ni ve chauh a nia, in zavaia chungah lawmthu ka sawi takmeuh e.

Tin, a thawnthu hming hriat tuma lo google in awm tih ka hria a, hei hi hmasawnna ṭha tak a ni a, a thawnthu awmzia hriat tumna rilru in pu te hi a hlû ka ti êm asin.

Ka next story tur erawh Mizoramah ka awm hman tawh dawn loh avangin kan dam a nih chuan Italy ah inhmuh kan tum dawn nia.

THANK YOU ALL.. BRR

B<++[BeckirafARenthleI]+>RR