5.NAOM [Mizo Love Story] -B®®

5.NAOM [Mizo Love Story]

Ziaktu: Becky Rafa Renthlei
B®®

Shadow of the life

A hmui hnâwng chapa min fawh hun hi ka nghâkhlel tih ka pha thei dawn em ni? A tukkhumah vuanin ka lo chhâng let ve zel a, a kut pawh a awm mai mai lo, ka kawr hâk chhanah ka âwmbâwr a rawn khawih a, lo dang turin thâ ka nei lo. Kawr chhan mah ni se a nuam dangdai tho.

"Sangzual...'

"Yes..."

"Duh tâwk la..." ka kawr hâk hlima kut lawnga min tawh chuan a kut ka lo man bet a, "Ka la ui rih," zuk ti mauh a.

Ni e, mipa thisen lum leh fit zek zawk tân chuan he tia kan awm reng zawngin insûm a harsat tulh tulh ang.

'Ka hmangaih' em ka hre lo. Mahse, ka duh tih hi ka pawm thlap tawh.

B®® 300621

Duh thawh leh uar taka min fawh rengna chuan ka chhungril fanin ka thin a phu rang sauh a.

A kut lum thur thura ka taksa lâwng chu chûl ruaiin, a mal khauh ṭang chuan min chep bet tlat a, tâl chhuah tumin chêt la mah ila awmzia a nei tam lo khawp mai.

Min fawhna thlahin a mitmeng tisa châkna avanga thim deuh raih chuan min chhuk melh a, "Nám, ka ta i nih a ngai," zawi supa tiin min pawt tho nghal a.

"Sangzual, ka duh lo..." tiin a kawrah ka lo pawt ṭâwk ṭâwk a.

"Kan induh tawn ve ve tih kan hria alawm, mipa dangin ka 'ta' tia an sawi che ka duh lo, ka ta chauh ni turin ka duh che," ti nghutin ka Kurta hâk chu min hlihsak a tum a, puan fân thei chi a nih loh vang leh ka lo chêt ve sek avang chuan chuti maiin a hlip thei bik ṭhak náng.

"Hetiang vai chheho thawmhnaw hi ka ngaina lo," ti hlukin a phih chho pawp a, a ri nghal ṭhawt.

"Liansangzual eng nge i hriat a!? Ka ti vin ṭhak a.

"I kawr hâk mar lutuk hi ka phelh thawl dawn maw le, nunna pakhat chauh i nei ve tho a, thaw chhama i thih hmain ka chhanchhuak dawn che a nih hi, lawm hle rawh, engtia ha peih nge maw i nih zawk le!" nui suk chunga tiin ka nghawnga ka kawr invêt tawm chu min hlihsak ta a.

"Kal sawn rawh, ka room lamah ka phei dawn," thinrim hmai sen ṭeuha ka tih chuan, "Aih, ka phal lo," tih leh min kuah a rual nghal a, ka che ve phat.

"I sual, i sual ber, hetiang tih i duh vang hian a ni maw inchungah kan pahnih chauha awm i tih kher, tenawm lutuk," âng hlawk hlawk chungin khum aṭanga chhuk ka tum a, "I duh duh khan ngai mai rawh, i kal dawn chuang lo," tih pahin min pawt lêt nawk a, ka thinrim tak zet.

"I duh dan danin i awm dawn bîk lo," tia kûn hniamin min vawnna a bân dinglamah chuan ka seh sak ta a, a che duh eih lo.

"A aia nâ pawhin seh leh rawh, ka thih phah lo ang, khatiang te lek sek chaw ei ti tui tâwk a nih kha," ngai holam zetin a ti leh tlat.

Luhlul si, sual bawk si.

"Khawngaihin hetiang chuan awm suh," tiin, ka ṭap lo chauh tawh a.

"Ṭha deuhvin awm la, eng tin mah ka ti tawh lo ang che, lokal rawh le, helai thleng thleng i lokal tawh a, i rilru tih nat ka tum lo," ti leh lawi siin ka ke pahnih khumah a hlâng chho a, amah pawh a rawn lawn ve nghal bawk a, "Nàm, i natna turin engtin mah ka awm lo ang," ti nawn lehin min kuah ta hlu hlu a, sawi ber tur pawh ka hriat si loh.

Chu mi hnu chuan ngawi rengin khumah kan mu a, min khawih chhunzawm tawh bik lo.

Khum kil lama rizai inthlep chu banin, "Muthilh tum rawh, naktuk zingah thawh hma a ngai a nia," a ti sup a, a kil lamah kawm zet hian bang lam hawiin ka mu a, ani a sirah a mu thung. Puan min rawn sintir a, "Hahdam rawh, ti hian ka kuah ringawt ang che," tih pahin ka kawngah min kuah zui nghal a, kawr ka ha tawh si lo nen a bân lum thur thur chu ka hre rang kher mai.

Engtin mah ka chhâng let lo a, min kuah ang ang chuan ka awm tawp. A bân pawh ka dah sawn sak chuang lo; a luhlul ropui si a, tih thinrim ka hlau a ni ber.

Rei ngial che lova ka mut hnuah a thâwk dan a danglam tih ka hria a, min kuahna a bân chu zawi tea dah sawn sakin ka mut dan ka siam rem bawk a, light a off si lova room chhung a êng uar. Ka hawi hrek hrek ngam ṭâwk.

Kei ṭang ṭeuhva ka mut laiin ani erawh thlamuang tih hriat deuh hian a muhil a, a hmel lan dan dam thlup te, a hnâr ngul sang deuh leh a hmui hnuai lam chhah lek lek te chu ngun zet hian ka en a, dik tak chuan 'Hmelṭha vût' a ni lo. A pa ru ngawih ngawih a ni mai.

Banga sana intâr ka ena dâr 11 a pêl tawh. A room chhung ka melh kual leh a, kan mutna khum ep chiahah fix wardrobe a awm phei zui a, dawhkan pakhat leh dressing table simple ang reng tak a awm tel a, lehkhabu chi hrang hrang inremna Almirah lian lutuk lo a awm bawk. Inchung ber hi chu an sak zawhna ala rei lo tih kha a sawi a, a thar vûk mai.

Ka mut chhuak a reh vek bawk si, thil chi hrang hrang ka ngaihtuah kual a, tuna kan awmna inchungah hian choka, sitting room, bedroom pahnih leh bathroom pahnih a awm a, ruahmanna fel fai tak siama an sak tih a hriat reng, bungrua a awm lo thung. Sitting room lamah khan Sofa pali leh dawhkan a awm a, chu mi tih loh chu eng bungrua mah hmuh tur a awm lo hrim hrim.

Luah theih turin peih mah se riah nan bâk an hmang lo tih ka hre thiam mai. Inhnuai zawk erawh kha chu a phuisui viau a, inchung aiin a zau fê zawk bawk. An in sak dan aṭang ringawt pawh hian mi rilru nei tak a ni tih ka man thiam ve.

Ka hrawk a ro hulh a, tui in tur ka hmu mai si lo. Sangzuala tih harh ka hlau bawk si, dimtea tho ṭhêm ṭhêmin khum mawng lam aṭangin ka chhuk a, nichina ka kawr inbel kha ka inthawlh sawk sawk a, kawngkhar pawh a lo kalh miah lo chu niin, dim takin ka hawng a, tui in tur zawngin choka lamah ka va phei a, filter takngial pawh a awm si lo.

Inhnuaiah ka chhuk thla ta a, a lo reh ṭhiap.

Tui dehna bula filter ami chu dawhin no thum zet ka in khawlh khawlh a, nakina ka in duh leh tâkah tiin fridge a mi tui bottle khat ka la chhuak bawk a, an mu hma hlawm hle mai, Mimtei room-a la eng kalh thung.

Tui bottle keng chunga ka la din lai chuan Mimtei room kawngkhar a rawn inhawng a, min hmu thut chu mak tih hmel zet hian a ding chawt.

"E he, i muhil thei na nge," tiin ka awmna lamah a rawn phei a.

Tui in tuma chhuk ka nih thu leh mutna sawn thut hian ka muhil thei ṭhin lo tia ka sawi chuan ka bânah a rawn vuan a, "Lokal rawh ka room ah, thil ka en tîr ang che, bengchheng lo la," a ti sap a.

Sangzuala a harh ka hlau ru deuh; mahse, a nau bula sawi chi ni hek lo, tîm deuh chung hian a room-ah kan inzui phei ta a.

"AuMama i bulah a mu tih ka hria a nia, in chesual tihna lam ni lovin nangmahin a mut tîr dawn miah lo che tih ka hre thiam a nia," nui var var chunga a tih chuan ka zak ru chem chem.

"A tih theih hlawl loh, a lo harh hmaa ka chhoh a ngai, ka room-ah mut ve ka duh tawh a, chhung lamah kawngkhar ka kalh mai ang," tia ka chhân chuan nui ring ngam si lo hian a hmui a hup a.

"Eng ang pawhin kalh mah la, i bula mut a tum chuan a ti chhe duh tho ang, a tih tawh hi chu a ti tlut zel, a rilru a chhe lo tih ka hria a, chuvangin ngaih khatah ka ngai mai mai, ka dem miah lo che a nia, ka hmuh dik loh phah bawk lo che," tih pahin khum hnuai a bih a, "En la, u Tlana ka chah a nih hi," tia ṭawng mawlh mawlh pah chuan khum hnuaia a thil dah chu a rawn pawt chhuak a.

Ka rin loh lam daih.

Parcel-ah beer tam zet leh vodka ûm thum vel a lo awm chu niin.

"Ekhai, i in tur maw?" Ka ti hliai a. Mak ka ti deuh.

Nui chung hian, "Hospital-a mi âi ka duty ṭhin lai khan ka meng zâwn thei sia in rûk ka ching a, AuMama'n a hre lo, a hriat chuan min vaw duh mai ang, mahse, beer bâk ka in ngai miah lo thung a nia, vodka hi chu u Tlana'n min pe tel ve mai mai a nih hi," tiin Vodka ûm khat chu a la chhuak a.

"Lucknow-ah kha chuan a lum thei sia beer ka in ru hrât lutuk, AuMama hi chu camp-ah a awm avangin kan in luahah a lo kal zing lutuk thei lo a, u Kimkima chuan ka in ṭhin tih a hria, over deuhva in loh te chuan vunin a ngeih lutuk," a la ti zui.

"Ka chho tawh mai ang, i û a lo harh hmaa ka room-a awm hman ka duh," ka ti a.

"U Naom, Vodka hi in chhin ang, vawikhat mah ka la in ngai bik lo a..." a ti leh a.

"Aih, i û in min hau ang, i in tih a hriat vaih chuan nang pawh i bâng bik dawn miah lo a nia," tiin ka hnial a, ka ti tak tak bawk. Sangzuala hi dam thlup angin lang ṭhin mah se, a tih tawh loh lamah chuan pawisak a nei lo tih ka hre tawh a, ka hlau ru tlat.

"A hre miah lo ang, a hriat chuan ka chhan ang che, min mawh puh vek dawn nia, ka in chhin châk sia, khaw en lai chuan a tih chi bawk si lo, mawh.. u Naom..." a ti leh a, hei pawh a û ang chiaha tih mawh ve tho a nih hi.

"Huis, i â siah..." ka ti tawp. A ruk tak chuan ka in ve châk. Muthilh ka mamawh ngawih ngawih a, ka in chuan ka mut theih phah mai thei asin. Kei mi awlsam hi min thlêm thlu leh dawn e.

Chumi hnu chuan chhung lamah kawngkhar kan kalh a, Mimtei nen Vodka chu kan in ta alawm, Theite rim a nam chêk a, a tui tak tak. In a nuam bawk si, "Ka room-ah lo riak daih rawh, AuMama chu a lo harh tawh chuang lo ang," ngaihsam zetin a ti leh a.

"Ka chho tawh zawk ang e, rei lo te muthilh ka duh, min lo thlah la," ka ti a, min hnial tawh bik lovin, a room aṭang chuan kan inzui chhuak ta a.

Ka lû a hai chhak. Ka ni deuh miai miai a, Mimtei pawh a nih ve tho ka ring, step tawp ber kan thlen chuan Sangzuala lo chhuk tur nen kan intâwk ta a.

"Mim, nang maw?" Tiin ka hnunga kal a nau chu a bia a.

"Umn, tui in turin a lo chhuk a, ka la muhil si lova ka roomah theite kan ei a," a ti a, kei erawh ka ngawi reng.

"Zan lai laia theite ei chu a va mak awm ve, chhuk tawh rawh le,..." tiin a nau a siai sak a.

"U Naom, a nih muttui aw, zingah ka lo kai tho ang che, kan bazar dawn kha," thil sual ti lo ang hmiahin a nui var var a, kei erawh ka chhaw huihin ka hria.

Mimtein min chhuksan hnu chuan ka room lam pana kal ka tum a, "I rei lutuka i room-ah i awm bawk si lo a.." tiin min rawn zui a.

"Muthilh ka duh, min zui zel tawh suh," ka ti nghat a.

"I bulah ka mu ringawt a nih kha, eng tin mah ka tih loh che kha," a ti leh tlat tawh.

"Chu pawh ni se keimaha ka mut loh chuan ka muhil thei lo, i room-ah va mu rawh," tiin kawngkhar bulah ka ding a.

"A nih chuan, ka bula muthilh i zir a ngai dawn a nih chu, ka nupui i ni thuai tawh dawna mahnia mut tum ṭalh a rem tawh dawn si lova tun aṭanga practice a ngai tihna, â.. nang hi chuan ka thil sawi i man thiam ngai lo a, a taka tih deuh kher a ngai ṭhin," tia a sawi zawh rualin room kawngkhar a hawnga min pawt lut ve nghal.

Ka thil in khan ka lu a ti hai chiai chiai a, ka mut a chhuak ruih bawk nen 'eng tin mah min ti bik lo ang' tih rilru pu chungin khumah ka lawn a, "I kawr kha phelh rawh, khatiang thawmhnaw mar lutuk nena mut kha a ṭha lo," tiin ka zin bag a hai nghal a, ka mut kawr pangngai chu rawn phawrh chhuakin, "Kha hei hi inbel rawh, a hrim hrimin i thawmhnaw te hi phawrh chhuak ve ta che, Pâwih zin ang mai," tiin a nui hawk a.

"I sawi peih, lehlam hawi la, ka inthlak ang," ka tih chuan, "Lutuk a che, bra nena i awm lai pawh nichin lawkah ka hmu che alawm le, kha, i mut a chhuak a nih kha che rang mai teh," a ti leh puat a, min hnial tak nain lehlam a hawi ta tho.

Hmanhmawh zetin ka inhlip sawk sawk a, bra ha chungin ka mu ngai miah lo nain Sangzuala bulah kher chuan phelh ka tum lo.

Ka inpeih veleh rizai hnuaiah ka inthawlh nghal a, a rawn hawi ve chiah bawk.

Ka thil in kha a rim a hre lo nge min la hau lo chu a nia, kan in tam vak lo hrim hrim bawk a, khumah a rawn lawn ve a, "Muhil ang, a tlai tawh," ti supin min rawn kuah a, ka ṭawng ngam lo, ka rim a hre palh ang.

A room-a mut ai chuan heta mut hi ka thlang fe. Tu pawhin min hmu se a pan tu ka ni lo tih a la rin theih ve tal alawm.

Ka mut a chhuak lutuk tawh a, min kuahna pawh hnial lovin ka chhîng ta riai riai a.

Ka phu zawka ka harh hlawl!

Ka lo thlan hliam a, ka malpui a mu churh churh bawk! Ka ke chêt ka tuma a rit ngei mai, chu tah min delhtu chu eng dang ni lovin Sangzuala'n a bawp pahnihin min lo khan bet tlat chu niin.

Tih harh hlau takin zawi tê hian a bawp nawr sawn ka tum a, a rawn che ṭuah ṭuah a, "Che reng suh, a ninawm," tiin a phun hluk.

"Min nin leh i mutna sawn rawh, a rit lutuk," tih pahin a malah ka chûm a, "Nang nu tak hi chu..." tia a sawi zawh ruala inlet thutin min bawh titih hian a awm a, a kiuva inbeng khalha min chhuk melh chung hian, "Che reng lo la chuan hetiang thil hi tih a ngai lo tur," rawn kun hniamin ka hmuiah a rawn fawp a, min thlah leh thut.

"I rim a dik lo, Lalmuanpui, in hnuaiah khan eng thil nge in tih?" A ti ta khur khur a.

"Eng mah, i nau nen alawm kan awm, eng thil mah kan ti lo," inthiam chiah lova ka tih chuan, "Tunah chuan a tlai tawha inzawh fiah hun pawh a ni tawh lo, zingah ka hre chhuak tho ang, dâwt i sawi leh sawi loh chu," ka chhân ve hman hmain ka hmuiah bawk a rawn fâwp leh nghal a, a aw kâ dam lo mah se min fawhna erawh a dam thlup thung.

Thaw hawk chung hian ka mut kawr hlimin ka taksa a chûl kual a, lo dan ka tum chuan hneh zeta ka kut chelhin, "Che lo khan mu rawh, zu rim i la nam zui.." tiin ka kut pahnih chung lamah a hmer kawp a, min fawp zui leh nghal zat.

A taksa lian zet chuan min delh run a, 'Ṭîk' pawh ka ti ngam tawh lo, a kut âwl lamin ka kekawr hâk a pawt thlaa a hmui a la sawn hek lo; rilru fîm put tumin mit ka chhîng a, ka thil in vang kha nge ka thluak a nu but.

"Ka nghâk thei tawh lo," thâm ṭuaka tiin a thawmhnaw inbel tawnzau leh boxer a hlip a, saruakin ka hmaah zuk awm a, zâk map lova min en chung hian, "Ka nghâk chatuan thei dawn che em ni, a rei mah mah a ni," ti supin min kuah bet a, dim leh duat fahran hian min chulin min fawp a, kan taksa lâwng a indeh tâkah chuan ka sa chhuak ham hamin ka hria.

Ni e, ka thinlungin a ṭha lo/ a dik lo ti mah se ka taksain min phatsan mêk si a, lo dang turin thâ alawi ka nei hek lo; chu tih a hnêkin uar leh duhthawh takin ka lo chhâng ve mial mial a, ka hma hun tur ngaihtuah âi chuan eng mah pawisak nei lova Seol dái thlen ka huam tlat pek.

Ka chhungrila Sangzuala ka duhna leh mamawhna chuan min hnehin pum khatah kan insiam ta a, ka chhungrila nawmna min siaksak hai der tura eng mah hre thiam lo ka ni hek lo.

Nula thianghlim ni lo mah ila, ka pasal hlui tih lohva ka mipa mutpui hmasa ber chu Liansangzuala a ni ta. Nupaa insiam hmaa mipat hmeichhiatna hman a ṭha lo tih hre reng mah ila, ka zawm ta chuang lo a nih hi.

Ka sira rawn mut thlâk pahin, "Ka ta i ni a, i ni zel bawk ang," hnehtu chan chang inti zeta a ṭawng chuan ka ngawi reng.

"Nám..." ka ngawih reng avang chuan min rawn ko a, "Ṭawng ṭawng lo khan muhil rawh," ka lo ti a.

"Kan thil tih zawh chiah leh i âw kâ a inpha man lo, min duat chhunzawm dawn nge i titau dawn?" Tiin a nui huk a. Ka ngei a nia.

"Titau mah ila awm zia a nei hleinem, a nih tur ang a ni vek tawh.." ka ti sap a.

"A dik chiah, chuvangin kha tia virgin mut lo khan ka kuah phâk, ka duat phâkah rawn mu rawh, ka kianga i mut tam poh leh ka thinlung i pawh ang," nghet charha tiin a kil rêta ka mu chu amah si chêtin min kuah hnai a, "I lerh duh a nih pawhin ka tân chauh ni rawh se, midang tân ni lovin," ka chalah a rawn fawp zauh a, chu mi zawhah a âwmah min kuah bei ta chial a.

Ka ring ngam thlap.

A taksa ka deh apiangin danglamna ka nei fo a, ka hai der ṭhin; a mitmeng fin hmel taka min en vung vung tawh chuan ka lâi ringawt zel kha a nia, kan thiltih dun hi a dik lo tih hre mah ila, Sangzuala a nih tlat avangin ka inchhir lova ka inchhir ngai bawk lo ang, ka duhthlanna ni miau hek le.

Ka harh leh chuan nî a lo chhuak ut tawh a, keimah chiahin ka lo mu tawh. Sana ka ena zinglam dâr riat a ri ṭêp. Eng ati nge min kaih thawh loh le? Bazar kan tum kha maw le.

Rang lutuka tho chhuakin khumah ka ṭhu hlawl a, thawmhnaw pakhat mah ka la inbel lo tih ka hriat chuan, mahnia awm mah ni ila nuam ka ti viau lo.

Towel-in ka intuam sawk sawk a, bathroom-ah ka lut ta a, zingkâra bazar tur khan min ti si a, tunah dâr riat a ri deuh thaw tawh, ka inthiam lo ve det.

Fai sarin inhnuaiah ka chhuk thlaa Mimtein min lo hmuh veleh, "Ka kai tho duh lo che a nih kha, ka thawhna ala rei bik lo," a lo ti sawk sawk a, dawhkanah chaw hmeh siam tur a chhawp chhuak a, "Khawiah nge midang hi.." tia ka zawh chuan, "YMA bench leh bungrua vel hawh turin an kal a, kan tho tlâi vek.." nui ṭha chunga tiin "Kha hei hi lo vel la, bai ka lo siam ang," tiin Alu dahna a rawn nawr phei a.

"Nizan kha, mumang bo ṭhakin ka mu, AuMama'n a hria em?" Tiin min zawt a, "Hre lo a ni ang, eng mah min zâwt lo," tiin dâwt ka hrilh tawp, a hria tih ka sawi chuan rilru nuamin a awm dawn si lo a, ka hrilh duh ta lo law law.

Eirawng kan bawl zo a, Sangzuala te pathum an lo thleng tawh bawk a, naktuk hi lungphun kha a nih tawh avangin vawiinah eng kim peih fel vek a ngai, Tlana leh Kimkima'n pawnah ṭhutthleng an ti fai a, Sangzuala inchhungah rawn lutin, "Chaw ei ang u, in inpeih tawh chuan, chaw eikham aṭang chuan kan buai char char a ngai dawn," a ti a.

Min en a, nui suk chung hian, "Nizana i thil in rûk kha ka hria a nia, mahse ka ngawi rih ang," ka beng bulah tiin a kal sawn nghal daih a, Mimtei'n ngaih ṭha lo tih hriat taka min lo en chuan, koki san âk hian, "Min hau lo ang," ka va ti sap a. A thaw huai.

Chu mi hnu chuan tûkṭhuan kîlin vawiina kan tih tur Sangzuala'n a sawi a, mipa pathum te bâkah a putea fa te, Lawngtlaia an chhungkhat ṭhalai deuh te an rawn thleng bawk a; tihtur a hrilh zung zung hnuah, Mimtei nen bazar turin kan chhuak ve ta a.

"U Naom, nangman kawl rawh," tiin kan bazarna tur pawisa chu ka kutah min pe a, "A ngai lo, kawl zawk rawh," ka tih pawhin a duh der lo, min hnawn lui deuh tlat.

An awmna veng bik tan chawhlui buatsaih an tum kha a ni a, kan in lei hnem hle.

Vawk pahnih an talh dawna a behbawm leh thil dang neuh neuh lei tur a tam bawk si; rinaiin kan rei hrep a, a putea te inah kan pêng kâwi leha min lo chibai sap sap. A putea hian fapa pahnih Sangzuala ang rual vel a nei a, an khawsak a ziaawm viau.

A pa unaute lam an sawi ri miah lo hi mak ka lo ti deuh a. An unaupa lungphun ve meuhah te chuan an hmel hmuh ka inbeisei deuh a nia, Mimtei ka zawt ta nghe nghe a, mitmeng dul raihin tihian a sawi ta a.

"Chhungkaw thil a ni a, sawi hi a nuam miah lo; mi hriat pawh kan duh lo a," tiin a khuh kharh a, kan bazar zo tawha restaurant-ah eitur order-in kan nghak a.

"I tan sawi a nawm loh chuan sawi kher pawh a ngai chuang lo a nia," ka tih chuan, "Nang te chu ka ring ngam che alawm," a ti leh mai a.

"Ka pa te unau hi pathum an ni a, ka pa hi upa ber a ni nghe nghe, a nau chiah mipa chu AuMama awmna ṭhin Lunglei ami kha a ni a, ka nî chu kan vengah hian a awm, fa pali an nei a, an puitling vek tawh bawk, ka nu leh pa zan khat thil thua an boral khan kan baihvai hle a, pâwl sarih ka nih kum a nia, nu leh pa sawrkâr hnathawk kan nei lo a, inhlawh chawp tak meuh meuhin min châwma Mama pawh ka patea te bulah ngawt a nih kha a awm, ka patea nupui hi a hrawn a harsa ve deuh tih ka pa khan a sawi ṭhin," tiin a ngawi dat a.

"Khatia nu leh pa kan neih tâk lohah khan ka pain kan in hmun hralhna leh kan zirna atana sum min khawl sak kha ka patea chuan la chhuak turin au Mama a nawr a, kum 25 a tlin hmaa lâk chhuah theih loh tiin ka nu leh pain an lo dah ve bawk si a, mahse, kan harsatna te sawi chuan eng tin emaw lâk dan chu a awm tiin ka patea khan a la nawr ṭalh. Chu chu au Mama hian duh lovin Assam Regiment an lak dawn khan a intlar ve ta a, chu chu ka nu leh pa thih hnu lawk a ni. Kan Vc te'n kan unau dinhmun hriain hma min lâk pui a, ka putea hian theih tawp min chhuahpui bawk a, auMama'n a lo zir ve bawk nen a tling ve ta hlauh mai a, a kal dawn khan, kan in hi mi luah theih turin kan siam rema Kimkima nen ka putea te kan fin ta a ni. Patea chu ka u chungah a lungawi lo hle a, amah zah lo anga puhin ngaihsak chhunzawm a tum tawh loh thu a sawi ta a, kei chuan thil awm zia ka man ve chiah lo nain tun hnu hian ka hre thiam ve chauh, ka nu leh pa sum min dahsak kha ka patea chuan an inhnuai sak zawm nana hmanga kan unau min awm tir a lo tum a, tuna kan in hmun hi hralh tur leh zât leh zâta insem turin ruahmanna a lo nei a..." zawi sap hian a ti ta a.

Kan eitur chah a rawn thleng a, "A nih leh i patea te chuan i û awm loh lai khan an lo ngaihsak che u em?" Tia ka zawh chuan, "Teuh lo mai, Kimkima a zuk kal pawhin ṭawngkam khat mahin a lo be duh lo a, kei phei chu min hre awm pawhin a awm duh lo," a tih zawm leh a.

"AuMama phei chu an ankhûm hrep a, i hrawk kan châwma nuamsain kan siam chea lawm nachang i hre lo, tih vel ten an ṭawng khum a, an ina a awm laia a retheih zia kan hria, kan dinhmun a chhe êma midang hnena awmna tur a vâng bawk nen ka pa thu hnial ngam lovin a awm ta kha a nia, ka ngei a nia," a ti leh bawrh bawrh a.

"Mahse, kan ina a lo thlen zan khan i patea tlawh turin a kal tho bawk si, ka hre thiam teh nuai lo," ka lo ti a.

"Lungphun kan tum tih a hrilha a sâwm a nih kha, ka pa unaupa a ni a, hrilh hriat hrim hrim kha kan tih tur a nia, ka nî te pawhin patea an ṭan zawka veng khata kan awm chung hian min ngaihsak duh miah lo, an fate pawhin min hmelhriat en lo," a ti leh ta zela mak ka ti ru hle.

"Tunah chuan kum a ral tam tawh a, an rilru te pawh a lo danglam tawh tâkah tia hrilh kha kan ni a, mahse, an lo bengkhawn ṭha duh lo niawm tak a ni. Sipaia a ṭan aṭanga kum thumnaah personal loan lain tuna kan in hi kan ṭhiat a, putea hnenah a duh dan a rawn sawi vek a, pawisa a rawn thawn bawk a, loan a dil hma aṭang tawhin kan zirna senso leh mamawh pawh a rawn tum vek; ka putea'n bul min ṭan sak ta a, an hnenah Kimkima nen kan la awm zui zel bawk a, vawikhatah tam deuh loan alak theih si loh a, chhunzawm lohvin kan dah leh phawt a, a vawihnih nan loan a rawn la leh a, kan chhunzawm leh a, keini pawh kan puitling chho ṭan a, Lucknow-a min hruai ve hma chiah khan ka pa pawisa dah kha a zatve la chhuakin putea a kutah a dah a, kan unau awm ve lo mahila aniin pa chan changin min lo sak chhunzawm sak ta a ni." Tia min hrilh chuan Sangzuala rilru hah theih dan tur ka hre thiamin ka hria.

"Remchangah kan sawi zawm leh dawn nia," tiin restaurant kan chhuahsan ta a.

Taxi-a kan chuan lai te chuan Mimtei thu sawi kha ka ngaihtuah reng a, a patea ka dem hle, a unau fate chu a lo hmangaih ngai miah lo tihna a nia, an sawi dan hmangah rethei zawk zawk annih hmel si lova an ngeiawm tak zet.

Sangzuala nen nizana kan awm dan te kha ka ngaihtuaha ka inthiam chiah lo. Ka khawngaih ru hle bawk.

"Hey, ka thil sawi kha auMama hrilh miah suh, min hlap er a ni mai, chuan zaninah nizana kan tih bâng kha chhunzawm leh ang aw," enghelh nei lo fahran hian a nui kar kar a, ka nui lo thei lo, ala naupan ang chiahin a rilru a thianghlim tih ka hriatsak thung.

"A chi tawh loh, kan tih dawn pawhin mut dawnah chauh, miin an hria ang," ka ti a.

"Ka ngah mai sia e, kan in zo sêng angem aw.." a ti nai nai a. Henu tak hi chu(h). Thu ṭha hrilh tur zawkin a duh dan kan zawmpui tlat hi ka va sual si êm.

In kan thleng a, an lo la buai hle a, a ṭhenin chhuat an nâwt a, Sangzuala leh Tlana'n Silpoulin zarna tur an lo siam bawk a, min hmuh veleh, "Nilengin in bazar dawn emaw kan tia," a lo ti a, thinrim hmel erawh a pu lo.

"Mam, thil in la ei lo ang tiraw?" Tia Mimtein a zawh chuan, "Teh suh ei, buaipui hman kan awm lo, kan nghak tawp che u," a lo ti a.

Restaurant aṭanga kan thil hawnsak chu dining table-a dahin thingpui ka lum a, ka kâwng a kham ut ut. A putea fate pawhin min nêlin min û en ve hmiah.

Tlailamah Vawk la turin Kimkima leh Tlana an kal a, an ṭhiante an sawm belh dawn niawm tak a ni, Sangzuala nen mumalin inbiakna hun pawh kan nei lo a, nizan chungchang sawina hun a awm lo hlauh zawka ka lawm viau. Mahni tlat tlatin kan tlâ a ni deuh ber.

Mimtei'n min zui kâwi reng a, a ṭawng peih reng hi a fakawm, dik tak chuan ka ngaina. Unau hmeichhia ka nei lo a, he tia thil sawi pui tur ka nei hi nuam ka ti hle bawk

Ka nuin min lo call avangin inchungah ka chho zuai a, anni pawh mumalin ka be bik lo; Sangzuala zawkin kan buai thu a lo hrilh hlauh zawk a.

"Bawihi, in va buai awm ve?" A rawn ti a.

Kan buai thu leh ka motor chuangin phone ka khawih peih lo tia chhuanlam ka siam chu a awih a niang, min hau lo teh tlat.

"Fimkhur takin awm la, mi mit tikham zawngin awm lo bawk la, Sangzuala te unau kha i theihtawpin pui ang che," tiin a sawi ngai bawk a rawn sawi leh tawh.

" I u Chhanhima te nupain i zin kha ṭul an ti vak lo a, lungphun zawh veleh haw rawh se, châm kher a ngai lo, an tia," a rawn tih chuan, "In hrang aṭangin ro rêl rawn tum lo mai rawh se, in phalnaa kal ka nia, in phal chin bâk châmbelh ka tum hleinem," ka ti a, "Nia, anni pawh ka hrilh fiah tho, eng eng emaw hi an rawn sawi a, buaithlâk ka tih zawng tak, Dingngheta tukinah a lokal a, i kalna min zawt a, ka sawi lo," a tih chuan ka ner sawk.

"A ṭhat chu, i lo hau hrep lo nia..." tiin ka nui zui hak hak a.

"I â ṭhin em mai, chutianga tih kher tur a ni ngai lo, fimkhur la, chanchin rawn sawina chang hre bawk la," a ti leh zung zung a.

Mikhual an tam dawn em tih vel leh an in a nuam em tih te min zawh hnuah kan inbiakna ka titawp ta a. Ka hawi chhuak chiah chu ka room kawngka biang nghengin Sangzuala a lo ding a, a inkuangkuah thân bawk.

"I lo luh lai ka hre miah lo," ka ti sap a.

"I ṭawng tui êma ka be buai duh lo che a nih kha," tia min rawn panin, "I chau em, nizanah i mu tlem sia," a ti deuh kher.

"I chhia, kiri..." lai zeta ka tih chuan, "Duatna hun che pawh ka nei lo a," ti supin ka khabeah a rawn dawm a, "Duat hliau hliau rual ka nia mi?" Ka lo tih chuan, "Ni e, nizan i hmel ṭhat zia kha," tiin ka hmui a tawk zauh a.

"Kal mai teh, miin min lo hmu ang," tiin inlâk hran ka tum nghal a.

"Min hmu mah se pawi tihna ka nei lo, nizana kan mudun lai te kha min rawn hmu se..." nui ruh ruh chungin a ti a.

"Liansangzual...."

"Vak vak zel a che, khatia i âu te chuan ka pawngsual che emaw tiin an rawn kal khawm ṭuk ṭuk mai ang," a ti duh lek.

"Tak takin, chhuah lawk ka ngai a, hruai che duh viau mah ila, Mimtei nen eirawng lo bawl mai r'u aw, ka putea te leh ka nî te inah ka kal a ngai tlat," tiin min vawnna a thlah a.

"I nî te inah i kal dawn maw?" Tia ka zawh chuan, "Kal dawn e, ka nî a nia lawm," ti chauhvin min chhâng.

A chhuah dawnah ka hmui a fawp zauh a, kiai suk chung hian, "Zaninah a bâk chu ka chhunzawm leh ang," zuk ti kher a.

"I chhe hnap a nih chu..." ka lo ti a.

"Naom..." a ti hluk ringawt.

Ṭawngkam hi ka sumkàr lo ve a, min hau tamna ber a ni bawk, ṭawng tlem viau e ti lo hian ka ngaihdan ni loah chuan ka ṭawng hlawk thei hle, ka sim thei lo a chhâ chu a ni e.

Ka dinna tukverh bul aṭangin bike-a Sangzuala tlân chhuak tur ka hmu zuai.

Mimtei thil min hrilh vang khan amah ka duhna leh khawngaihna a pung sawtin ka hria, a kum ang rualah khan a patea hnial a harsat dan tur kha. Mahse, ani zawng luhlul leh tum ruh ta ngang a ni a, a ngaihtuahawm loh.

Assam Regiment-a ṭang tam tak an awm a, Tlana, a ṭhianpa ngei pawh hian a tluk lo deuh chu a ni e, rilru an inneih hleih em mai.

Inhnuaiah ka chhuka Mimtein chaw a lo chhum dawn chiah a, tlai lam dar li a pel tawh. A zualpui kan zo tawh a, fatu turho zaninah an inhmu khâwm ang a, thingpui lum tur hmeichheho chu Mimtei leh Kimkima'n an sawm tawh thung.

Tlanhlua nen pawh kan inbe mumal tawh bik lo. Tlangval ho tak mai a ni tih fiamthu a duh danah ka hre mai, Mimtei a chhaih zurh zurh reng a, "Pasalah min nei la, ka siam nuam viau ang che," tih vel mai mai kha a ṭawng duh dan a ni a, Mim-i huat tâwk a tling thei viau, an in chhâng fek fek reng mai.

Zanriah eikhamah fatuho an ṭhu khâwm a, Mimtei room ah ka awm a, Sangzuala'n a duh dan vel a sawi lai chu ka ngaithla reng, tlai lam dâr thum leh a chanvea ruai ṭheh hman tur leh dâr khatah hunserh an ṭan dawn tih a sawia ka hre ve chiah.

A putea nen eng kim an ruahman a, dâr 12 aṭanga zaiho tur a ni a, hunserh ṭan tak erawh dâr khat tihna a nih chu, tualchhung bâkah ṭhenrual ṭha hmun dang ami an sawm nual bawk.

"U Naom, eng tikah nge in inneih ang?" Tia Mimtei min zawh chuan chhân mai dan tur ka hre lo.

"I û zawt rawh," ka ti a.

"Chiah aw, nakinah ka zawt ang," a la ti tak deuh deuh nia.

"Pasal neih hi ka châk fahran tawh lo," zawi sapa ka tih chuan min en hâ a. Mak a tih hmel viau.

"A hmaa pasal i neih khan eng vanga inṭhen nge innih? Min hrilh duh em?" A ti a, nuthlawi ka ni tih a hre sa vek tihna.

Dingngheta nen kan inneih dan leh kan inṭhen chhan tawi fel taka ka hrilh chuan, "Ka ten chi, mipa lerh hi ka ngaisâng hlawl lo," a ti hmiah.

"Ngaihzawng i nei ngai em?" Tiin ka zawt a, nui hak hak chung hian a neih loh thu leh a nei dawn a nih chuan a û hrilh hmasak a tum tih a sawi a, ka nui nasa hle.

Naktuka a thawmhnaw inbel tur min hmuh tîr a, "AuMama hi ka Hero a nia, nupui nei lo mah se pawi tihna ka nei miah lo, ngaihzawng a neih awm pawh ka hre ngai lo a; mahse, nangma chungchang min hrilh zan khan Kimkima nen kan khawngaih lutuka kan lo ngei ve ringawt che a," a ti a.

"Eng nge min ngei teh ngawt?" Ka lo ti a

"Pasal i neih san kha kan hua alawm, mahse, a hnuah aman a sawi fiaha kan dem ta lo che, hlim deuhin awm ula ka ti, sipai nupui nih hi ka châk zawng a ni miah lo," a ti leh lawi a.

"Ka châk bik lo..." ka ti sap a.

"Maw! I châk lo maw?" Mak a tih hmel hle.

"Châk nang, ka mumangah pawh nih tumna ka la nei chhin ngai lo; mahse, i û nen kan innei a nih chuan sipai nupui ka ni dawn tihna a nih mai chu," tiin ka nui hak hak a.

"Â, eng pawh ni se, innei tawp rawh u, amah Lucknow-ah awm mah se kan bulah i awm ang a," tiin nizana kan thil in bang kha a rawn phawrh a, "Ka û nupui i nih hunah chuan in a phal dawn der si lo a, tunah in keuh ang, kawngkhar lo va kalh la, ka lo thlî ang," a ti leh tut tut tawh.

"A la hma e, chaw kan ei kham chauh sia," tia ka lo hnial chuan, "Nakinah chuan hun i nei tawh lo ang, hmanhmawh mai rawh," tih leh thawh a rual a, ka nui tawp.

Leh lamah Sangzuala teho an ṭawng bawrh bawrh a, an la titi tui viau. Keini pahnihin thâwm dim zetin Vodka kan in ru dun a, a rim a na vak lo nge Mimtei'n a thlit lai pawhin zu rim ka hre mang lo.

Ka Lawngtlai kal hi sual ka zir a ni ringawt, tumah dem tur an awm lo a, keima duh thlanna vek a ni. Helaia ka châm chhung chauh atan ni rawh se, a bâk chu ka sim hlauh ang.

Tlana'n room kawngkhar a rawn kika Mimtei a ko pah bawk a, hawnsak suh tia hmui phuna ka hrilh chuan, "Kan hawn loh te'n min ringhlel vek ang," a ti bawk si a, ka va hawng ta nge nge e.

"Misual pahnih..." tia hawi kualin a hnar a len kual vel a, ka va ngei mai mai tak.

"Bro in a hriat vaih chuan ka nuamsa dawn miah lo a nia, fimkhur ang che u, chuan khawi ka duh ve," a la ti zui.

Hmanhmawh zetin Mimtein a thlitsak a, "He tah awm reng suh, chhuak leh nghal rawh, ka û in min ringhlel ang," a ti a.

"Ka thu in awih loh chuan ka hrilh ngei ngei ang, naktuka ka thawmhnaw hâk tur min nawhsak rawh u, atu emaw zawk zawk khan," tiin a chhuak ta a.

Tlanhlua chhuah hnuah no hnih ve ve kan in leh a, a thlum lek leka a tui phian. Sangzuala whatsapp aṭangin ka va bia a, "Ka chau lutuk, ka kâwng a kham vek beer kan in dawn," tih ka va thawn a.

"Tu nen.." rang takin a rawn reply vat.

"I nau nen..."

"A ṭûl lo ber ang, kan zo ṭêp a, i room-ah chho rawh, keiman ka pe ang che, ka nau te bula in a ṭul lo." A rawn ti a, insûm hman lovin ka nui hak.

Sangzuala nena kan inbiakna chu Mimtei ka en tîr a, "I va han phakar tak, in ve ka'n dîl chhin ang e aw," tia nui kar kar pah hian a phone a khawih nghal a.

Ka rui deuh tawh tih ka pha lo. Ka awm dan nuam ru zet avang chuan lawm lohvin ka nui leh ringawt zel.

An unauva an inbiakna min hmuh tir chuan insûm zo lovin kan nui dun a, kan nui ring ṭha ngam si lo. Fatuho teh reng pawh chu an va haw har tak, eng em em nge maw an sawi le.

Sangzuala'n a nau whatsapp aṭanga a rawn biakna chu ka chhiar nawn leh a, "Naomi tel lovin ka room-ah chho la, ka lukhamah chahbi a awm ang, kha kha wardrobe hnuai drawer hawnna a ni a, beer pahnih kha la la, a bâk eng mah khawih suh ang che. Tun bâk in inbeisei tawh bawk suh ang che u," tih a ni a, kan va hlim si êm.

Vodka ûm ruak paihna tur ka zawn chhungin in chungah ani a chho thung a, ka nuih a la za reng. A phalna thlapa beer in hi thil finthlâk tak a ni.

Tlana'n thawmhnaw nawh tur a rawn keng phei a, Sangzuala pawhin nawh tur a nei ve ngei ang; mahse, zanin atan chuan ka peih lo, Mimtei'n a nawhsak a, chumi chhungin uluk fahran hian beer ka lo dawm thung.

Can khat kan inzo ṭêp tihah Sangzuala a lo lut ta a, Mimtein Tlana coat a nawt mêk thung.

"AuMâm, i thawmhnaw nawh a ngai ve em?" Inla confi zetin a zawt a.

"Ngai lo e, i nawh zawhah mu ang che, nangni pahnih hi awm tlâng tlâk pawh in ni lo, in sual ru tlat," tiin nelawm vak lo hian min rawn melh a, ka hre lo der tlat thung.

"Hmeichhe tân zu lam kaihhnawih chi reng reng in hi a mawi lo a, a zahawm lo bawk, vawiinah in tâl hah êma ka khawngaih mai mai che u a nih kha, a bâk beisei tawh suh ang che u, i hria maw Mimte... a bikin nang phei chu i la naupang lutuk," a ti kher a.

Mim-i a ngawi reng.

"Nám, rawn chho har suh ang che, ka'n intleuh ve zuai ang e," tiin min chhuahsan ta a.

"Awi awi, ka hlau hman lutuk.." tiin Mimtei a thaw halh a, a ṭawng dan aṭangin a rûi tih hrilh hranpa ka ngai lo.

A thawmhnaw nawh a zo tawh a, khumah ṭhuin kei dressing table hmaah ka ṭhu thung a, ka men dan a dik lo ṭan, dârthlalanga ka hmel lo lang ka hmuh chuan ka nui sak a.

"In zo vat ang, Ṭêkhmuama lo chhuk leh hmain," ka tih chuan Mimtei a nui hak hak a, "Ka hrilh dawn," a la ti zui.

He nau bulah hi chuan ka upa zawk a ni tih ka theihnghilh fo dawn a nih hi, a nun dan ho lam leh hot ru riau si hi ka lawm tlat, nurse a nih hi ka ring lo rum rum zawk.

Ka phone a rawn ri a, Sangzuala.

Ka pick chiah tihah, "Ka lo hruai kher che i phût em ni, lo chho tawh rawh," a rawn ti a.

"Yes, sir.." ka sawi zawh rualin a off nghal hmak.

Mimtei hnenah ka chho dawn tih ka sawi a, "Zanin chauh lo riak ve la, Mama ka dîl ang a," a ti a.

"I duh leh dîl chhin rawh.." ka ti ṭha ve mai.

A phone ta ngei a, engtin nge a rawn chhán ka hre lo.

"I sual ka ti, i sual e, i ta bik pawh a ni lo," tia phone off in lukham bulah a theh sawn daih a, a phal lo tih ka hre mai.

"AuMama hi chu a khirh mah mah..." a ti sap a, a rui lungpuam deuh nge a ṭah a chhuah hmel hle.

Rei lo te hnuah Sangzuala a rawn lut a, "Riah dun a ṭul lo ka tih chuan a ṭul lo a ni mai, nang pawh rawn chho ve nghal mai te che," a ti nghut a, a nau nen kan ngawi dâk.

Ka ṭhutna aṭanga min pawt thoin, "Chho ang, Mimte, nang pawh mu tawh rawh.." a ti leh a.

"AuMam, zanin chiah lo riak ve se..." tiin a dil leh a.

"I fel kha, mu tawh rawh le, zingah in inkawm leh dawn nia," dam deuh zawka tiin Mimtei bulah ava kal a, "Puitling taka awm tur aw, nula i nih tawh kha," tiin a biangah a fawh sak zauh a, Mimtei ka lo khawngaih ve ringawt.

"Sangzual, zanin chiah..eng lo..zanin chauh ka riak ang a.." sehchilh deuh nakin ka lo ti ve a.

"Nanga pawh chu..." tia min pawm nawlhin, "Mim, muttui le, zingah min lo kai tho dawn nia," a nau chhânna pawh nghâk tawh lovin min chhuahpui ta a.

Sangzuala tak hi chu(h) a ngaihna a awm lo, tuman kan nawr lui thei lo a nih ber hi.

A khum zau zeta min mut tîr lai chuan ka meng ṭâwk ṭâwk a ni ber.

"Naom leh.. i rui a nih kha..." a ti hluk ri chu ka mang hriat ruai ruai.

Ni e, ka rui, ka ruih dan hi a la nuam em em zui....

B®®
B+>[BeckirafARenthleI]<+®®