2.NAOM [Mizo Love Story] B®®

2.NAOM

Ziaktu: Becky Rafa Renthlei

B®®

Shadow of the life

He ti em ema a inrin tawk danah hian ka nu leh pa'n an sawi fel tawh emaw ka ti hial. Beisei awmin ka awm pawh a ni lo a, nimin tlaiah kan inhmu ve chauh a, tun hma kha chu sawi lo ta law law ila, tun atan zan khat leh chawhma chauh kan awm dun a, nupuia min neih a tum ruh em em mai hi, a ngaihna ka hre ta lo.

Ka nu te lo haw se zawh chian ngei ngei ka tum.

-B®® 260621

Sangzuala nen kan pahnih chiahin inah kan awm a, a phone a kheuh peih ngar ngar hle. 

Chhun thingpui in tura ka va koh chuan, "I nu leh pa an lokal thei dawn lo a nih pawhin nang tal chu ka beisei che a nia, ka nu leh pa te tana ka tih theih hnuhnungber an lungphun hi ka zawh fel hunah Lucknow-ah ka lêt leh phawt ang a, ngaihzawng dang i nei emaw rinhlelhawma i awm a nih chuan i rin âia nasain a nia chêt ka lâk dawn ni," tiin ka ṭhutna bula chair pakhat chu a pawt chhuak a, ka duh thu pawh ka sawi hma hauhvin min han vau sa a. Liansangzuala tak hi chu(h).

"En teh, khatiang lam hlir kha sawi lo la, nuthlawi ka ni tawha a hmaa ṭhian ṭha tak kan nih ang khan awm zui leh zawk ang, ngaihzawng neih tumna rilru ka pu lo," tia ka chhân chuan, dâr san ak chungin, "Ṭhian atan ka duh lo che a, nupui atan ka duh zawk che," a ti leh tlat.

"Kal mai teh, i tih theih thlâwt loh.." ka ti sap a.

"A dik, a titu tur chu nang ni lovin kei mah zawk a lawm, i hre sual a nih chiah kha, min tih tum lovin ka tih turin awm zawk rawh," tia a sawi zawh rualin za lutuk tih hriat deuh hian a nui hawk hawk a, ka thu sawi kha a lo la kâwi chiang, khatiang rilru pu-a sawi pawh ka ni tawp si lo a.

"Liansangzual, tenawm suh..." ka ti vin hlar a.

"Ka hmingpumin min ko tawh lo tur khân ka hrilh tawh che a," a la nui renga ka thingpui no ken min dah thlâksakin, ka khabe-a rawn chawi kang hlek chung hian, "Nang aiin ka upa zawka min û duh lo a nih pawhin ka hmingpuma min koh hi sim ang che, chu ti lo chu.." tih pahin na zet hian ka hmuiah a rawn fâwpa a al deuh pap. 

A malpuiah ka hmer vak a, nâ ti awm ang pawhin a lang lo. 

Nui suk chung hian, "Ka thu sawi i zawm ṭhat chuan ka duat ang che, i zawm ṭhat loh erawh chuan hremna tê nau i hmu zel ang, zilh loh fâ anga awm fo hi sim la, i nu leh pa rilru ti hah tawh suh, an fanu neih chhun i ni a, an hmangaih teh lul che nen an thu awih ang che," a ti deuh duah a. 

Ka hmui a seh pilh chu a hre lo der nge thingpui no ka kutah a rawn hmeh bel leh nghal zat.

Ngei ru zet hian ka melh râwm râwm a, "A hma zawng zawng pawha lo lang duh si lo, tun ataka min duh leh hmangaih ber niawma rawn insawi leh si; "Pasal ka neih hma te khan lo chhuak la, min duh a ni tih sawi ni la chuan lâwm takin ka pawm ngei ang. Mahse, tunah chuan mipa ka ring thei tawh rih lo, pasal neih hmanhmawhna chhan tur pawh ka nei hek lo, ka râi pawh a ni lo a..." ti nghat nghatin ka room-ah inthlâk turin ka luhsan daih.

Khumah ṭhuin ka kawr hâk lai hlih tuma ka hlîm chho chiah tihah Sangzuala a rawn lang ve nghal zat a, ka shirt hmawrah chelhin a phih chho pawp a, "Hei, eng thil nge i tih?" Hamhaih zeta ka tih chuan, "Nichina i thil sawi kha tih hlawh tlin ka tum maw le,"  ti nghutin bra nena ka ṭhu chu min en vung vung a, ka âwmah kut dah kawkalhin ka inhliah ve tak naa awmzia a awm tlêm khawp mai.

"Kal sawn vat mai rawh..." vin ṭhaka ka tih chuan nui suk chung hian, "Râi sa pawh ka ni lo-a i ti em ni kha, tunah hian kan ti thei alawm," tiin ka tukkhumah a vuan a, a hmêl tak ngul chu a hlauhawm ang reng.

"Sangzua..." tia ka sawi zawh hmaa rawn kûn hniamin min fâwp nghal nawk nawk a, theih tawpa lo dan tumin ṭan ka khawh ve bawka ka hneh lo nasa. A kut vei lamin ka âwmbâwr a rawn khawiha ka îp zawk. 

"Che miah suh," ti supin min bawh tlu a, min fâwp zui leh zat bawk, nichina min fawh dan ang lo takin dam thlap leh thiam zet hian a rawn che a; a kut vei lamin ka âwmbâwr a thlah hek lo. 

Duh thawh zeta a che lai chu tâwp leh thutin, ka mitah chiang deuh hian min en a, "Min duh a, kei pawhin ka duh che, sawi buai tawh miah suh," ti lehin min fâwp nawn leh ngat, ka chhâng lêt lovang tia inthunun ka tum teh reng nen; dam thlap leh ngenngawl zeta min fawha min tawh rengna chuan ka thluak a fan vek; nuam tihna riau ka nei a, uar zet hian ka fâwp let ve ta a, tuna min fawh ang hian tu mipa mahin min la fawp lo, a dik deuh thlup.

Thaw hawk chunga in la hrangin min kuah tho a, "Rài tur che hian minute tam ka mamawh lo, i thu sawi tur fimkhur tawh ang che," tiin ka sam thur bam chu a rawn chûl mâm a, sawi tur hre lovin hnuai lam ka bih tlat a, ka taksa a la pangngai lo, ka biang sa hat hat chu reh se ka ti ngawih ngawih.

"I thawmhnaw thlâk la thu pangngai kan sawi dun thei zawk ang," tia dingin, "Zak duh suh, ka hre chiang che alawm," a ti leh a, "Kal mai teh," tih bâk ka kâ aṭanga chhuak tur a awm lo.

Sangzuala chhuah hnuah hmanhmawh takin ka inthlâk sawk sawk a, ka thâ a khür dar dar; khatianga mipain min fawh lohna kha kum tam a ni ta. Aizawla ka bialpa nen khan rálkhat inngaihzawn ang deuha inkawp kan ni a, sex hman chu sawi loh; hna nei lai a nih vang leh ka û te nupa an strick êm avangin hun thâwl kan nei lem lo. Kan infâwp ve fo thung.

Dingngheta kha ka mipa mutpui hmasak ber a ni a, a hun laiin ka duh hliah hliah bawk a, ka chhungte'n an duh lohna ṭawngkam an chhâk chhuah te khan ka ṭan vet vet a nia, sex kan hman hnu lawkah kan inru zui ta chiah rêng a; mahse, kohhran hriatpuinaa inkutsuihna kan nei lo a, tlân koh angin ka kal ta kha ni a. Ka nu leh pa thu ka awih loh rah chhuah chu nuthlawi nihna dinhmun hi a ni bawk.

"Naom, i va rei ve..." Sangzuala'n min ko dút dút a, eng rilru chiah nge a put hre mah suh ila mipa dik tak a nih zia nichin mai khan ka hria. 

Ngaihzawng a nei nge nei lo pawh ka hre lo a, zawh chhuah tumna pawh ka nei chuang lo. Dik tak chuan amahah hian eng emaw 'riau' mipa dangin an neih ve loh thuneihna a awm tih ka hmu thiam bawk.

In la 'pa' chawp ni lovin a pian phung leh a hmêl, a ṭawngkam chhuak a pa ru tlat. A nghet charh bawk. Ka ngaihtuahna a chikim leh mai mai a nia; ka duh tih ka pha lo; inthlahrunna lian tak ka nei a, ani ang tlangval rilru nei leh tum ruh te hi chu a luck ngei ang. A in vawng fel thlep thlup si.

Min rawn koh leh tâk avangin room ka chhuahsan ve ta a, dâr hnih a ri dêk dêk chauh a ni. Ka nu leh pa teh reng pawh hi an va rei ve maw le.

Common room lamah bawp khawkherha ṭhuin phone a lo khawih a, min hmuh ve leh, "I hriat ṭhin Sangzuala ang kha hmuh tum suh, tuna i hmaa ṭhu hi chu mi thar ka ni tawh a nia, hmânlai anga mahni duh zawng pawh sawi thei lo leh che chhuak ngam loa inthlahrung mipa kha ka ni tawh lo a nia, kum 35 ka ni a, ka kum milin ka khawsa bawk," a lo ti nghal a.

A bula ṭhu lovin a ep chiahah ṭhut hmun remin ka inkuangkuah thân a.

"Ka hriat ṭhin Sangzuala kha ka ngainaa tuna mi hi chu ka ngaina lo," tiin ka chhâng a.

"Min ngaina leh mai ang, â..inngainat hluah a ngai kher lo, kan induh tawn tih hi pawm ve ve ila a fel a ni mai," ngun zeta min en chungin a ti leh a, "Ka duh che maw?" Tia ka zawh chuan mit ko sán zauh chung hian, "Aw, min duh, nakinah phei chuan min ngaiin min la rawn phone sek mai ang," tiin a nui a, "I mumang a nih chu," ka ti a.

"Eng vanga fa nei lo nge i nih?" Tia min zawh thut chuan ka hawihai lutuka chhán lawk nachang pawh ka hre lo.

"Naom..." 

"Ka hria mi, fâ hi duh duha neih theih a ni lo, kan thu pawh a ni bawk lo," ka ti hmak.

"In inneih laiin invenna in hmang reng awm si lova," a ti leh a.

"Khatiang lam ka sawi peih tawh lo, ka nei loa ka nei lo a ni mai, i buaina tur pawh a awm lo, rawn sawi chhuak ṭhak tawh suh," ka ti hlur a.

"A ṭha alawm, nang leh kei hi ti hian kan inkawp tawh tih hria la, mipa dang i nunah seng lût suh ang che, chuti a nih loh chuan a pawi tawh ang, min duh ve a ni tih hre lo tura mipa â ka ni lo a nia, i thinlung khan a pawm ngam lo mai mai a nih kha," a ti hmiah hmiah.

"Ti hian kan inngaizawng tawh tihna maw?" Ka lo ti a.

"Eng thil danglam nge i beisei teh vak a, thil thar i duh viau chuan i room-ah kan kal dawn em ni, chhinchhiahna ka siam che i phût deuh chuan," tiin ka ṭhutna lamah a rawn phei a, "I zak lo siah, i mak ngawih ngawih," ka ti hluai a, nui chunga min enin, "Mizorama ka lo haw châkna chhan ber chu nangmah i ni, a hmaa ka lo haw ngai lohna chhan kha i hre duh tiraw?" A ti a, ka bu nghat ringawt.

"Nu leh pa innghahna tur ka nei lo a, in leh lo nei mah ila ka naute pahnih chawm an ngai bawk a, ka rawn haw fo chuan tuna ka dinhmun hi ka thleng lo ang, sum tam tak khawh ralna a ni a, chhungkaw pangngai, zahpuiawm lo nei tur chuan thawhrimna leh chhelna a ngai tih ka hria, nu leh pa nih kawp a ngaia mahni chauh inngaihtuah thei ka ni lo," tiin a ngawi dat a.

"Sipaia ṭan hi a nawm i ring em ni? A teuh lo, ka nu leh pa âi awh zo lo mah ila khang lai huna ka tih theih awm chhun leh hlawh ka neih ve na tur a nih vanga kal ka ni, class 12 pass ringawt khan eng hna ṭha mah thawh tur a awm nghal mai lo tih i hria ang chu, Regiment-a ka luh tirh te khan mipa mah ni ila mittui nen a ni hun ka hman, ka naute pahnih vanga rilru hah taka ka awm lai khan nangmah ka ngaihtuah chhuak ṭhin che," a ti zâwi ruih a, mak ka ti viau.  

"Kei mah maw?" Ka lo ti sap a.

"Aw ni e, i hlim hmel te, kan inkawm lai te kha ka ngaihtuaha ka duh thu che hrilh hman lova ka kal kha hrehawm ka ti; chanchin inhrilh ngaihna a awm si lo," thaw hawk chungin a tih zawm leh a, "Tum tak tak ni la chuan a theih awm e.." ka la ti hrâm.

"A dik tho mai, mahse, beisei thui tur ka awm lo em a, ka naute ngaihtuah ngai nen rilru thar puin eng mah ka rawn sawi lo a, i chanchin erawh ka ngaihven ru reng tho, pasal i nei tih ka hriat zan phei chuan chhin khat mah ka chhing lo, ka ta lo turah rilru ka tihah tam tih ka hria, Naom..." tiin na tak tuar niawm tak hian ka dârah a rawn hmer a, "Min duh ve tiraw?" A tih chuan rang zet hian, "Aw, mahse..." ka lo ti a.

"Mahse, tih telh suh.." a ti hmuk.

"Mahse..." 

"Lalmuanpuii tak hi chu, mahse, tel lo khan min duh ang che, i hrethiam maw?" tih pahin ka hmuiah a tawk zauh a, "Rinawm la a tawk, a bâk ka beisei lo, thla thum hnuah ka kal leh dawn a, a bâk chu hunin a hril ang," nichina a ṭawng dan nena inpersan deuhvin a khauh leh far tawh.

"Yes, sir.." nui hak hakin ka ti a.

"Kher a che, chimawm lo la, naktuk zingah ka haw dawna kei lo mipa dang biak loh tur, Dingngheta kha i la duh em?" A ti leh daih a, kan inṭhen chhan min zâwt miah lo hi a mak ka ti deuh.

"Duh loh vanga inṭhen kan nia.." Ka ti a.

"Kha pa kha a si them pawhin hnaih tawh lo la ka duh, ani chanchin sawi pawh duh tawk ang," a ti a, a lawm lo tih a lang reng mai.

A nu leh pa thih dan kha chiang zawka zawh ka duh teh reng nen ka ngam ta ngang lo. 

"Ngaihzawng i nei em?" Tia ka zawh chuan, "Nei e" tiin rang zet hian min chhâng a, "Chuti si eng..." tia ka sawi zawh hmain, "Nangmah kha ka ngaihzawng i nih kha, a dang ka mamawh belh lo," nui chungin a tia ka va ngei mai mai tak.

Inngeih zetin eirawng kan bawl dun a, ka nu leh pa an lo haw lai pawhin woofer-ah zai ngaithlain kan záwm vak vak a, a hmaa ka hriat ṭhin hlim hmel kha ka hmuin ka hria, CSD a kan thil lei ho ka rem ṭhat lai chuan ka biangah rawn fawp zeuhin, "Nuthlawi i tih ni hi ka theihnghilh leh ṭhin," a ti a.

"Theihnghilh suh, ka nihna alawm," ka lo ti a.

"A dik thlap, an zei duh an tia i zei em kan la hria ang chu," ka beng bula ti supin a kalsawn nghal a.

Ni e, ani anga min hrechiangtu leh min ngaihvena ka dinhmun zawng zawng hre thiamtu mipa hi an tam lo khawp ang. Ka nu sawi dan takah, ka tana ṭha tur ka hria a nih chuan Liansangzuala tluk an awm lo; kan innei nghal dawn tihna pawh a ni lo a, bul ṭanpui tura rilru siam hi a fin thlâk zawk. He ti reng hian ka awm thei dawn chuang lo tih ka hre ve tho.

Zanriah kan kîl laiin ka pain Sangzuala pension hun tur a zâwt a, ka lo ngaihven ru rân. Amah khan eng mah a sawi lang miah lo a, sipai inkaih hruaina leh dan leh dun vel hriat ka nei lo, an hlawh zât tur pawh ka ring thiam lo a, a mik a mak ka hriat loh avangin Sangzuala chhânna chu ka ngaithla uluk kher mai.

A sawi dan chuan kum thar kum tawp lamah hian chhuah a tum tih a sawi a, a chipchiar chuan a sawi chuang lo. Thu a khuh thiam hle a, zawh belh zui theih miah lohvin thiam deuh hian a pehhêl ni berin ka hria.

A naute pahnih kha Lucknow-ah kum 9 zet a awmpui a, Flat lian vak lo luahin an awm naw naw niawm tak a ni. Personal loan vawi hnih a la a, an in hmun hralhna a pain a dahsak kha hmang ṭhenin tuna an in khi chhâwng thumin an sa zo a, a hnuai ber tih loh chu an ti changtlung hle. Kimkima'n LLB a zir a, Mîmtei'n nurse a training zo lek lek tawh.

Nu leh pa thihsan ni chunga hetiang dinhmun a thlenpui thei hi a hunlaia a retheih turzia ka chhût thiam ve phâk. Tunah nise an lung phùn turin a rawn haw a, nichina a sawi ang deuh khan kum 16 chhungin tun hi Mizorama a vawi hnih rawn hawna a ni. 

A putea a fakawm thlâwt. Sangzuala'n a duhdan te sawiin pawisa a thawna in khi a lo sak pum sak vek a, a rawn haw hmasak khan a naute pahnih an rawn chhuak tel ta bawk tih a sawi. Kum 19 lek a nih laia a tum ruhna leh chhelna kha Pathianin mal a sawm a ni ber.

"Mite anga ropuiin ti ve thei lo mah ila, keimahni veng bîk huap tala ruai siam ve ka duh si a, rinaiin a hautak ang reng, ka nu leh pa tana ka tih theih awm chhunah hian a ṭha ber ka duh ve vek si a, ka naute pahnih pawhin min sawisel deuh a; mahse, ka tum tlang ta tho a nih hi," tiin a chaw thleng nen a tho chhuak a, a ei tam lem lo khawp mai.

"Lokal kan tum ve phawt ang a, kan theih tâk ngang loh leh Mambawihi kan lo tîr dawn nia, i nu Pâri motor rui ṭhin hi a buaithlak a nih hi," ka pain a ti a, eng tik niah nge an phun dawn a sawi bawk si lo a, min rawn hrilh ṭha leh turah ngai ang.

"Nia, mobile phone a awma a inhrilh zung zung theih alawm," Sangzuala'n a tih chuan, "A hun tur min hrilh hma loh chuan rawn kal a buaithlak a nia," ka lo ti a.

"Lutuk, lo buai lo la, tu pawh lokal dawn ula ruahmanna fel fai tak ka rawn nei ang," tiin ṭha deuh hian min chhâng ve mial.

Zanriah ei kham hnuah kan vaiin common room-ah kan ṭhu a, ka lái deuh hû.

"Pa Hruai, nu Pâr, Naomi nena kan chungchangah biak che u ka duh a.." tia ka awm ve reng laia Sangzuala'n a tih chuan ka meng phâwk nasa. Amah ka va melha min en lovin ka nu leh pa a en a, eng nge maw sawi a tum le!

"Nia, i nu Pâri nen kan lo sawi dun tawha Mambawih, i pindanah lo va phei ta che," ka pain a ti a. Ka ngaihdan ni lo lutuk chu ka ner sak, "Ka chungchâng a nih chuan ti khân sawi rawh u," ka ti hmak a.

Sangzuala'n, "I duh leh awm ve la, a pawi hleinem," a ti leh thluam a.

Ka nu leh pain awm ve lo tura mitmei min hmuh avangin hreh zetin ka tho chhuak a, Sangzuala khawsak dan hi a ngeiawm lek lek zel. Mahse, thinrima han tih vak dawnin a mâwi chiah si lo a, an ṭawng ka ngaithla ru náng a. 

Eng tak sawi ang maw?

Ka room-ah thinrim ṭûnin ka vei sek a, Dingngheta nena kan inṭhen lâi khan ka rilru a naa 'mipa tumah ka ring tawh lovang' tia ka insawh nasat nen; Liansangzuala a rawn lang a, ni hnih pawh tling lovah kha ka ngaihdan kha ka sawh sawn ta vek chu a nia, ka â tawh a ni ang. A duh hun hunah min fawp a, a thu thua min tikual chung pawhin ka 'aw' duam duam chu a nih ber hi. 

Dingngheta nen kha ti khawp khan kan inzuiin kan inah a rawn lang tam a, u Chhandama ngaih dan a ni lo viau nghe nghe, "Ngaihzawng chu neih tur, nangni pahnih inzui dan hi chu a over mah mah," tiin min khak nghe nghe a, rei fê ka û ka biak duh loh phah. 

An farnu hi min duata nupui an neih hma phei chuan an hlawh lâk a piangin pawisa min pe ve ziah zel. Eng mah thawh chhuah ka nei ve lo a, MA zir zawm tura min tih pawhin Dingngheta vangin ka ṭhulh ṭhak a, vawi khat lek sex kan hmanga kan inru zawm nghal daih.

A hunlaia Dingngheta hmel ṭhat theih zia leh ka âtchilh si zia kha, a palian vak lo a, ft 5.7' vel a nih ka ring, ngo lam pang fai vang a ni a, a hmelṭhatna a hmang thiam lo kha kan inkâr tichhetu leh kan inṭhen chhan a ni ta.

Tlabungah hna avanga a zin ṭumin tun hmaa a college kalpui ṭhin Ruatkimi nen an lo inkawp leh a, a nupui zawkin a fa ka pai loh laiin kâr thum lek a zuk awmnaah sâwn a thlâk a, sâwn man an rawn ṭhîng ta si, zêp thu awm suh, ngaihdamna thinlung ka pu thei tlat lo. Nu leh pa phal lo chung, ka zirna chhunzawm loh phah nana ka hmanin min rinawm loh san kha nâ hi ka ti ngat ngat lutuk a, a nu leh pa phal lo chungin ka haw ta kha a nia.

Ngaihdam min dîl nasa. Mahse, ka ngaihdam theih ngang loh avangin leh fâ awt ngawih ngawiha ka awm laia khatianga min phatsan kha ngaihdam tumna ka nei lo. A chhungte zawng zawngin min chelh tumin ṭan an khawha min ngainat êm vang pawh ni hran lovin mualpho an hlauh vang a ni ber. 

Khaw dang daiha sâwn thlâk a ni bawka tu vak mahin an hre lo. Nupuiah a nei zui ta chuang lo a, kha khan mi rilru ṭha a ni lo tih a târlang bawk. 

Social media leh phone call-ah ka block fai veka a tîr kha chuan vawi hnih thum a lo kal a, u Chhandama thinurin a kamkhat hnuah a rawn lang ta ngai lo. Fa kan nei hman lo te kha Pathian remruat a ni ang; a hunlai khan na viau mah ila, kum a'n vei meuh chuan ka theihnghilh ta tihna ni lovin ka dam ta viau zawk.

Ani erawh contractor zu heh a ni ringawt tawh. Kan inneih lai pawhin in zeuh zeuh a chînga mahse; zu heh tia sawi tur chu a ni lêm lo, a hmuh phâkah ka awm ngai lo a, kum thum zet chu kan inhmu tawh lo, a thih thawm ka la hre lo a, a la dam turah ngai ang. 

Ka ṭhiannu Seni phei chuan "Hmelṭha ringawt hi an rilru a ṭha kher lo, i nei rei lo hlauha ka lawm," a ti nghe nghe. A chapo ve deuh hleka hei tak hi ka chhungte rilrem zawng a ni tlat lo.

Sangzuala nen an mizia a inpersan lutuk hi mak ka ti. 

Dingngheta a ṭawng duhin a nui peih em em a, a ho ru viau bawk. Chu mi letling chiah chu Sangzuala zia a ni thung, kum thu-ah chuan Sangzuala kum khatin a naupang zawk a; mipa rau rau hi an lo inang lo hle tih ka hriat chhuah phah bawk, khauh deuh fara han ṭawng chhuah leh thuneihna awkâ ang kha Dingngheta hian a nei miah lo a, zahawm ru riau, palzam theih miah lova ṭawng dam thlup ang chi te phei chu ka pasal hlui ban phâkah khan a awm lo hrim hrim. Inthlau tak an ni.

Thil chi hrang hrang ngaihtuah paha dressing table dârthlalang ka nawh laiin ka nu room-ah a rawn lut a.

"Thingpui i duh ve em?" A ti a.

"Duh lo.." 

"I duh loh pawhin lungawi lo anga lan kher kha mi puitling lo zia a nih kha, i tana ṭha lo tur eng thil mah kan sawi lo tih hria la, Sangzuala tan harsatna siam suh ang che," zuk ti leh kher a. 

"Harsatna min siamsak tiin a hrilh che em ni?" ka tih chuan, "Hrilh lo e, i lungawi lo hmel kha ka hai hleinem, i awm laia sawi kher ṭul a tih loh vanga kha tia ṭawng a nih kha, zanin bâk hetah a awm dawn lo a, engkim in sawi fel tawh turah ka ngai," ka chhânna pawh nghâk lovin a chhuak leh nghal a, ka nu tak hi chu a...

Zan dâr riat a ri tawh a, an sawi tur an sawi zo tawh a ni ang, ka room chhuahsan erawh ka tum tawh lo. Chawhnu lamah kan hlim em em a, zaninah ka mood a off leh vek.

"Naom, ka lo lut a nia," Sangzuala âw ka hriat rualin ka ding mar zawt a.

"Zaninah i room kawngkhar kalh suh ang che, ka lo riak dawn a nia," tiin ka khumah a ṭhu a.

"Ka nu leh pa i dîl em ni?"  Ka lo ti salh a.

"Eng a?" Mak tih hmel takin min en a.

"Ka tel lo khan ka nu leh pa biak i duh sia ka bula mut i dîl a niang chu ka ti," ka tih chuan za zet hian a nui a, "I thluakah khan eng nge awm le, ka dîl lo, ka va dîl dawn em ni?" Tiin ka dinna lamah a rawn phei a, ka kâwngah vuanin, "Sawi awm leh awm loh hre rual chu i ni tawh maw le," a ti leh sup a.

"Min khawih kher suh," ka lo ti vín hlar.

"Ka khawih awm che e, chhungkaw thil ka tih fel hunah kan innei ang, ka nghâk rei dawn miah lo che a nia," a la ti zui.

"Sipai nupui nih ka zuam lo.."  ka ti a.

"Contractor nupui nih pawh i tlin chuang lo a, sipai nupui nih i inhmeh zawk ang, ka châwm hneh ngawt ang che," ka biangah chûlin a lamah min pawt hnai a, "Tenawm suh," tia kal sawn tuma ka inher chu nghet zet hian ka kâwngah a kuah a, ka samah a hmai phûmin, a thaw hawk a, "Ka nu te an lokal ang e, awm sawn rawh," tiin insaseng tum hian ka che hret a.

"An lokal lovang, an mu tawh," a ti a.

"Nang pawh va mu rawh, ka mu hma dawn, naktuk zinga i chhuah dawn phei chuan mut hma a ṭha, kal rawh le," dam thlapin ka ti a.

"Phone hman lawk ka ngai a, room kawngkhar kalh suh ang che, ka rawn riak dawn ka tih kha, i kalh lui a nih chuan tukverh aṭang sawn ka lo lut tho ang," tiin ka khum lu lama tukverh chu a kâwk zauh a.

Chhân ka tum lai takin a phone ah lai a rawn ri a, min kuahna thlahin phone a chhâng zui ta a. 

"Aw, naktuk zing chu ka tum dan a nia, ka thlenna thleng rawn inthlah tîr la, ka lo lam hman chein ka ring lo," tiin ka room aṭang chuan a chhuak ta a. Min en tawh lo hrim hrim.

Haw pui tur a nei tihna em maw ni le. Zanriah ei lai khan eng mah a sawi si lo a.

Ka mut kawr inbelin khumah ka lawn a, ka phone a ri ve tlat.

U Chhandama a lo ni a.

"Hello," ka tih rualin, "Mambawih, Sangzuala ka lo be lawk, a phone-ah ka call tlang thei miah lo," a rawn ti a. Phone a hman thu leh nakin deuha call leh turin ka hrilh a, "Sangzuala kha lo duat ang che," a rawn ti a.

A eng chu hre hlawm ni maw! 'Sangzuala' tih vek mai. Ka u in a phone number te a nei lehzel a nia, keiin nizanah ka nei ve chauh a.

"Kan inah a awm tih i hre sa em ni?" Tia ka zawh chuan, "Hre lutuk, hre lutuk, Aizawl a lo thlen khan kan inah a lo riak tih hre ta che, ka hrilh duh lo che a nih kha," nui huk huk chungin a la ti zui.

"I biak duh thu ka lo hrilh dawn nia," tiin kan inbiakna ka ti tawp a.

Thil mak deuh deuh hi ka hriat belh zel a, u Chhandama nen an lo inkawm ṭhin tihna nge, ka nu te zawkin an ina thleng turin an hrilh zawk. Eng pawh nise ka hriat lohvin eng eng emaw chu an sawi ṭeuh ang tih ka hre thiam mai.

Ka room aṭanga chhuakin Sangzuala ka zawnga a mutna room-ah tukkhuma kut suih chung hian a lo mu zangthal duai a, a phone hmang ve chu leh.

Ka thawm a hria a ni ang, rawn mengin min en a, "U Chhandama'n biak che a duha a call tlang thei lo che," ka ti sap a. Tho chhuak chuang lo hian, "Khawi, i phone aṭang khan ka lo bia ang, i peih chuan tui lum in tur min lo siam lawk la, damdawi ei nan," a ti a.

"Nâ, i nei em ni?" Ka phone pe paha ka tih chuan, "Ka pum a nuam lutuk lo deuh," tiin phone chu a la a, u Chhandama number a dial nghal a, kei pawh tui lum siamsak turin choka lamah ka phei nghal bawk.

An inbiak laia awm ve reng kha a nuam lo. An duh duh sawi teh se.

Rice cooker-a tui lum sa chu no khat chiah chiah la chhuakin Sangzuala room lam ka pan a, a  rawn chhuak ve chiah bawk. Zaizirin ka room lama lût turin min ti a, ka kal ve mai bawk a, ka phone min pek pahin ka no ken a la nghal a, damdawi a hmuamsa a ni ang, tui lum chu a in a, khum bula side table-a no a dah hnuah ka room kawngkhar chhunglamah a kalh hmak a, a la ṭawng chuang lo.

"Eng nge i tih a?" Ṭawng ring ngam ṭha chiah lova ka tih chuan, min chhâng lovin ka khumah a lawn a, "Sangzual..." ka ti ringawt a.

"Shh.. bengchheng kher suh, rei lo te mu lawk ang, ka pum a nuam lo," tiin khumah min pawt ṭhu nghal a, ka mu dawn nge mu dawn lo tia ka inngaihtuah lai chuan a bula mu ve turin min kuai thut a, a âwmah ka bawk thlawp. Nghet zeta min kuah nghalin, "Mu hle hle rawh, zanin chauh.." a ti sup a. Engtin mah min khawih lem lo.

Inthiam lo ru deuh hian ka ngawi kar a, a lungphu ri dat dat chu ka ngaithla vang vang a, eng ati nge ka hnial ngam loh tlat zel le.

Min kuahna thlah chuang lovin bed switch a ban a, a off zui daih. Thlanglam veranda êng a rawn lût riai riai a, ṭawng chuang lovin kan mu hle hle. Ka thlâ erawh zuk muang riau lawi a.

Minute nga dawn che lova kan mut hnuah a mut dan siamremin a kilah a tawlh chho hleka sîr zawnga muin ka pumah a bân dinglam a nghat a, "Ka ngai ngawt ang che," zâwitein ka beng bulah a rawn ti a.

"Ka nu leh pa'n an hria ang e, tho rawh," ka ti a.

"Bengchheng lo la, an hre lo a ni mai, eng tikah nge hetiang hian ka kuah leh ang che tih hriat pawh va ni suh, min hnial lo hrâm rawh," dam thlap hian a ti leh a. 

"A nih ṭawng reng suh, i pum a nâ a ni lawm ni?" Ka tih chuan, "Na e, min zût sak la.."

"Kiri.. i zak lo..." min kuahna aṭanga inlâk hran ka tum a, "I chêt sek chuan ka fawp ang che," tiin ka hmai bulah a rawn thaw ham ham a, a rim fai sar leh a after shave hman rim chuan ka hnar a verh zar.

Che ngam tawh hek lo. Ngawi rengin ka mu ta hle hle a, engtin mah min ti bik lo. Min kuah reng tho a, "He tia kuah reng che hi ka duh, muthilh tum la hahdam rawh," tia a sawi zawh rualin ka hmuiah a rawn fawp a, rei erawh a ni lo.

Hahdam taka mut theih ka inrin loh teh reng nen kan tleirâwl lai ngaihtuah chungin ka lo muhil daih chu niin. 

Ka harh leh chuan keimah zawkin Sangzuala ka lo kuah chial a, puan pawh kan lo sin thlap. A hmêl ka hmu fiah thei vak lo nain a mutui a ni ang a thaw sâk sâk a, a hahdam hmel hle.

Ka zun chhuakin min ti harh tih ka hriat chuan dim têin ka bân lâk sawn ka tum a, a rawn che dat a, "Ti khan dah mai mai rawh a la hma lutuk," a rawn ti a, ka phu nasa kher mai.

A lo harh sa reng a nih hmel.

"Ka zun a chhuak a," ka tih chuan, "Ka pawm phei dawn che mi," tiin light a on a, meng ṭha thei lova ka khap sak sak hnuah ka tho chhuak ta a, "I room-ah insawn tawh rawh  khua a var dawn a nia," ka ti sap a.

"Aih," a ti hmuk.

Ka room-ah hian toilet leh bathroom inkawp a awm nghal avangin chu lam pan chuan ka kal a, ani erawh a che chång lo hrim hrim. 

Khuma ka lêt leh pawhin a mut dan ngai rengin a la mu reng a, ceiling lam melhin ngun taka thil ngaihtuah a ang.

"I pum a na leh em ni?" Tiin khumah ka lawn kai a, tho turin eng ang pawhin ti ila, ka nawr lui thei dawn chuang lo tih ka hria.

"Min ngaihtuah em ni?" Ka lam hawiin a ti a.

"Ngaihtuah ang chu," ka inrin hman hmaa ka chhan chuan nui suk chung hian, "Hma kan sâwn deuh a nih chu,'" a ti duh lek.

"I chhia..." tih pahin a hmaa ka mutnaah ka mu leh ta a, light off tuma ka ban ve leh, "Off duh suh, i hmel ka hmu duh alawm," tia inlet thutin ka chungah a rawn pakaia ka inring hman lo reng reng; chutah a rawn kun hniam zui zat a, dam leh duhthawh zet hian min fawp ta a.

A hmui hnâwng chap leh fawh nuam zet hi ka hnar phal teuh lo. Uar takin ka lo chhâng let ve mial mial a, ka mut kawr a hlim chhoh lai te chuan hnial turin chakna ka nei lo, a malah ka lo kherh bet ve chial a, zahnain min kiansan ṭan.

A kut lum thar thara ka âwmbawr a rawn chul chuan ka thaw hak a, ani pawh a thaw bul deuh hak hak a. Thaw chham dawna kan in fawh hnuah meng chiai chung hian min en a, "A tak ram dai thleng lo mah ila ka ta i ni," a ti hniam ruih a.

A la inla hrang chuang lo a, ngun deuha min en reng avangin ka biang a sa vek. "Sipai insûm thei tak ka va ni si êm.." nui suk chunga a tih chuan a chalah ka nam a, "Ngeiawm tel kher suh," ka ti hlak a.

"Tisa inzawmna neih hmasak ai chuan thinlung inzawm hmasak hi a pawimawh zawk," tia inbengkângin min chhuk melh a, ka hmu hmel ṭha sawt. Tisa châkna avanga a mitmeng buai deuh pawh ka hmuh hmai hauh lo. A mipatnain min nêk tih ka hria a, ka feel bawk.

"Ka ta i ni tih hi i thinlung phêka pakhatnaah dah la, pahnihnaah dah bawk la, pathumnaah chuan.... ka ta i ni tih tho hi dah leh rawh," insûm tih hriat deuh hian a nui ruh ruh a.

"I ho, nui suh..." ka ti a, ani aiin ka nuih a za fê, ka insûm mai zawk a ni.

Hmana a mize ngai tlêm ka hmu. 

Khawvar hma zawngin inkuah rialin kan mu a, chhuah hma a tum avangin ka nu leh pa lo thawh hma dâr li leh a chanveah kan tho daih. Kal tura a insiam meuh chuan hrehawm ka ti leh lawi si.

Ka nu leh pa lo thawh laiin thingpui kan lo in a, kan riah dun chungchang hre awmin an lang lo.

Sangzuala ṭha taka biain chanchin inhrilh zel turin an chah bawk a, an mâkpa chei titih ringawt.

A insiam peih vek hnuah doorbell a rawn ri a, a la hma viau sia tu nge maw ni le.

Sangzuala'n kawngkhar a va hawn a, nu tê lam deuh ngo veng mai leh mipa pakhat an rawn lut a, "Kan lo tlai êm lo maw," tia, Sangzuala enin hmeichhia zawk chu a rawn ṭawng a.

"Tlai lo e, ka in peih a ni mai," tia  Sangzuala'n a chhan chuan chu nu chu a nui var var a, a hmel ṭha reuh hle.

"Nám...hei hi kan veng ami Lawmkimi a nih hi, ka rualin a haw ve dawn a," Sangzuala'n a tih chuan ka hnual nghal rawih a.

Kan tleirawl lai khan 'Nám' tiin min ko awlsam mai zela chutiang chiah chuan tunah khan min ko. A hma zawng kha chuan 'Naom' tih hlirin min ko kha a nia.

Lawmkimi leh Sangzuala an haw rual dawn. 

Nizana rawn betu kha a ni chiang mai, engmah ka bulah a sawi lang lova ka run viau. Mahse, mi â ni ta lo chu nui sâng hian ka lo chibai a, ka thinlung a nui lo thung.

Lawmkimi rawn hruaitu mipa a lêt leh hnuah ka nu leh pa ṭawngṭai inkhâwm turin an kal a, kan pathumin kan kawtah kan ding a.

'Haw lo mai rawh' tia chelh ka châk. Mahse, ka ngam hlawl si lo.

Lawngtlai thleng an pahnih chauhvin an kal dawn a nia, thîkna rilru sual ka pu tlat pek. Min hrilh sa chu ni se ka hre thiam thei mai ang a, eng vanga zêp kher nge a nih? 

"Kan kal dawn asin, kan thlen hunah ka lo be dawn che nia," Helmet khum paha a tih chuan, "Fimkhur deuhin aw..hmanhmawh lo ula," ka'n ti khawmawi ve bawk a. 

Sangzuala Bike hnunga ṭhu Lawmkimi erawh a ṭawng lo hrim hrim, ka ngaihbel vang nge min lawm lo riauva hriatna ka nei.

An tlân liam hma ka thlîr reng a, mak deuh maiin ka ṭah a chhuak tlat, ka insûm nasat êm avangin ka hnâr a thîp hlur bawk.

Liansangzuala leh kha nu inkârah khan awm chu a awm a ni. 

Ka hre chiang ngei tur a ni bawk. Chuti ni lo se a zêp tawp náng.

Lungawi lo zetin in chhungah ka lut ta a....

B®®

B+>[BeckirafARenthleI]<+®®