3.NAOM [Mizo Love Story] B®®

3.NAOM

Ziaktu: Becky Rafa Renthlei
B®®
Shadow of the life

Liansangzuala leh kha nu inkârah khan awm chu a awm a ni.

Ka hre chiang ngei tur a ni bawk. Chu ti ni lo se a zêp tawp náng.

Lungawi lo zetin in chhungah ka lut ta a....

B®® 270621

Ka nu leh pa inkhawm an la bâng lo va, keimah chauhvin ka tei rak rak a, khua a har duh ang reng.

U Chhanhima room-ah ka lût a, Sangzuala sulhnu hmuh tur pakhat mah awm lovin engkim a awmna hmunah a awm ṭhap a, mi phawsawlh tak a ni lo tih a hriat mai. A fel fai leh thlup tawh.

Lawngtlaiah zan riakin vawikhat mah ka la kal ngai lo a, ka nî te khuaa ka zin ṭumin kan tlanpel a ni mai, Sangzuala te awmna leh lek phei chu a hriatin ka hre lo hrim hrim.

Ka nu te inkhâwm bâng an rawn lut a, "Mambawih, an kal ta em ni?" Ka nuin a tih chuan an kalna a la rei loh thu leh an thlen huna min biak a tum thu tluangtlam takin ka sawi a.

"Sangzuala hi chu a puitling ngawt mai, haw rualpui tur a nei hlauh a, a tihzia em mai," a la ti zui.

"Amahin a haw dawn emaw ka tia, eng mah a sawi si lo a.." lawm lo deuha ka ṭawng chhuah vang nge ka nuin min rawn en a, "Tu pawh haw pui se kan hnena sawi kher a ngai hleinem, puitling a ni a, engkim sawi zuah zuah a ṭul kher lo." Tiin buhfai a sil a, ka nu hian eng vanga ṭan hlur nge maw a nih le.

"Sawi a har lo êm mai," ka la ti ṭálh.

"In inneih hunah phei chuan a thu thua awm i zir fê a ngai ang, tun anga i awm chuan a dawh rei lo tawp ang che, a duhin a hmangaih êm chea a la en liam mai mai che a nih hi," a la ti tak deuh deuh a.

"Eng a, kan inneih hunah maw?" Mak ti zetin ka zawt a.

"In inkâr hi ka hre lo emaw i tia mi, nizana a lo riah pawh kha kan hre vek. Mipa rilru chhia a nih loh vang leh i chhiatna turin a che dawn lo tih kan hriat avangin kan hai der a nih kha," nui chunga a tih chuan zah luat vangin ka thidang mai dawn alawm le.

"In mâwl siah..." ka ti hak a.

"I mâwl rei tawh zawk, kan rilru turte hi dâwn ve ṭhin la, i u Chhanhima te nupa thla li hnuah an lo lêt dawn a, Lungleiah an transfer tih pawh i hre tawp nang, tun anga i awm ang hian i awm rei thei dawn lo a nia," a ti dap dap a.

A sawi dik lutuk.

U Chhandama nupui ka ngainat angin u Chhanhima nupui inla zet kha ka ngaina miah lo. Fapa naupang zawk a ni a, kan inah an rawn awm dawn tih hrilh hranpa ka ngai hek lo; ka thâw a ipik nghal.

Kan inṭhen hnua innei an ni a, kan hnena thla thum lek an awm chung pawh khan ka nu nen an inmil lutuk lo tih ka man thiam. Mahse, keimah tak hi chu min ti vak lo a; ka ngawih theih vang a ni deuh ber, ka nu hi zirtîrtu strick deuh an tih ang chi kha a ni ve a, hausa lua lo mah ila thil ti thlep thlep chi a ni bawk. U Chhanhima nupui hi chu a fuh vak lo ti ila ka sawi sual lo ang, mi nupate chuan fa neih thuai thuai an duh ṭhin a nia. Ani ve thung chu kum hnih a in dang tawh, hei tak hi ka nu ngaihdan a ni lutuk lo deuh bawk.

Champhaia ka han zin ve ṭum pawh khan rei ka châm ta lo reng a, kan inhau fo tihna ni lovin ka thinlung tak hian ka pawh thei lo, ka û hmaizah vangin ka awm ve mai mai zawk a ni.

Ka nu sawi ang deuh khan kan hnena an lo awm chuan tun anga zalen hian ka awm thei dawn lo a; bâkah mitmei ven tur a tam leh sawt ang. Ka hmakhua min thlîrsak avangin pasal nei leh se min duh tih ka man thiam uar, mâkpa atan Sangzuala an duh bawk.

Lunglei leh Lawngtlai inkár hi chu ti lutuka rei tlân ngai a ni lo a, Sangzuala Bike ang chi phei kha chuan dârkâr tam an tlan lo tawp ang. Kawng lakah an châwl miah lo nge an thlen chin pawh min hrilh lo a, ka ngaihven lovang ti mah ila rilru a luah ngut ngut tho. Phone hmasak erawh ka tum lo thung.

Chawhmaah ka insu a, nawmsam lohna em em ka nei tawh lem lo. Sûk tur kan ngah vak ngai lo nen inchhung enkawl hi ka kuta awm a ni a, huan lamah erawh ka kal ngai miah lo thung.

Sangzuala hlir ngaihtuah chungin chawhnu lamah in ka tifai bawk a, tlai lam dar nga thlengin min la rawn be lo. An accident te a nih ngawt loh chuan thlen loh a hun tawh lo rêng rêng. Ka mood a fuh lo kual vel vek.

Tun hmaa a kal bo khan ngai mah ila ṭhian ṭha inngaih ang kha a ni mai a, tuna min kalsan hi chu a dan a dang daih, ka ngai ru veng veng a, hun rei lo te chhunga kan awm dun dan kha ka ngaihtuah chhuak nghal zel, ka rilruah amah bâk a awm lo a ni tawp.

"A lo be tawh che em?" Zanriah kan ei kham hnuah ka nuin min zâwt a. "Be mai mai lo," ka ti hmak.

"A number i nei reng tho a, be ve mai ta che, nge, a kal dawn khan in lo inti thiam lo leh zâwk?" A ti a.

"Kan thlen hunah ka lo bia ang che atia, an la thleng lo a ni ang chu," tiin phone ka melh pah zauh a, "Min biak hmasak loh chuan biak ka tum lo," ka ti leh hrâm.

"I hahthlâk mang e, chapo lutuk te hi a ṭha lo a nia, i ngaihtuah chuan be mai la, engtin a ti lo tawp ang che," tiin an room-ah min luhsan daih. Ka nu hi chu a ngaihdan a nih loh pawhin a ṭawng chhuak nghal mai zela eng mah zêp ṭît ṭêt a nei ve lem lo. Ka pa erawh pa ṭawngtam a ni ngai lo hrim hrima a zaidamin a bula awm a hahdam daih zawk.

Ka phone a rawn rík chuan rang zetin ka ban nghal a, Sangzuala a ni ta ngei e. Ka thinrimna te kha vawm bo ang diakin a reh chawpchilh a, ka chhâng nghal vat.

"Kan buai lutuka ka rawn call hma thei lo che a.." dam thlupa a rawn ṭawng chuan ka thaw huai huai thei alawm le.

"In thleng tluang maw?"

"Dar 1 vel khan kan thleng, Lawmi kha ka thlah leh a, bike sil ka duh bawk nen ka rawn ti ta lawk lo a nih hi, i thinrim lo tiraw?" A ti a.

"Thinrim lo e, tluang takin in thlenga a lawmawm," ka'n ti ve ngei a. Hau hrep tum kha ka nia, ka ṭhulh leh daih.

"Nám, thil hrilh tur che ka nei a, min hau hrep mah la ka dem miah lo che a nia," a rawn tih chuan ka thin a phu nghal. Lawmkimi nena an chungchang min hrilh a tum a ni ngei ang.

"Eng thil, sawi la..."

"Nupui ka nei tawh,"

"Eng a?"

"Nupui neiin fa pakhat ka nei tawh a, kan khua Lawngtlaiah hian an awm; mahse, ka duh tho che," a ti sup a.

"Liansangzual, dâwt min hrilh suh," vín lutuka ka tih chuan, "I awih nange, kan nu hi ka ṭhen anga ka nei ang che, ka hmangaih hmasa zawk i nia bansan che ka tum lo," a tih leh chuan thinrim lutukin ka thaw halh a, a zah theih loh dan em em hi, kei chu dâwt min hrilh mai mai mah se ka la ngaithiam thei; ka nu leh pa te thlenga dawt a hrilh hi ka ngai thiam thei lo ang.

"Naom.."

"I tenawm dan hi a satliah lo lutuk, ka ten che. Eng anga nuthlawi sawmsarih pawh ni ila mí pa kher hi chu ka kawp lo ang, mí pa kawp tur khawpin mipa ka mamawh hek lo," ka ti tâwn tâwn a. Ka ṭah a chhuak ut ut. Engtin nge a thusawi te kha ka lo awih vek theih le.

"Ka tihpalh a ni, in ina lo thlen tum kha ka ni lo a, mahse, i lo awm tâk si-ah chuan rilru ka thlak leh ta zawk a nih kha, min neih duh phawt chuan kan nu hi ka ṭhen ang," dam ruiha a tih leh phei chuan luak lo turin ka insûm nasa. Ka ten uluk lutuk.

"Vawi khat mah min rawn be tawh suh, i nupui tan khan rinawm la, lerh sim ang che, mipa lerh hi ka huaa mipa rinawm lo ka haw bawk, mipa zawng zawngah ka haw ber che, Dingngheta ai pawhin i tenawm zawk," tiin a au hian ka au a ni ber.

Ka pasal nena kan inṭhen chhan kha a rinawm loh vang a ni a, Liansangzuala nen an inang reng. Hremhmun sipai chi khat tho a nih hi.

"I pasal hlui nen min tehkhin suh, ka nupui hi ka duh vanga nei ka ni lo a nia," ala rawn ti hram.

"Kan duh loh zawng tumahin tun laiah kan nei tawh ngai lo, i duha i nei a ni mai, nuthlawi ka ni; mahse, nang anga tenawmin ka khawsa ve lo tih hria ang che, min rawn be tawh suh," tiin min chhânna pawh nghak lo hian phone ka off daih.

Vawi 12 zet a rawn call leh pawhin ka pick tawh lo hrim hrim a, a vawi hnihna atan bum nawnin ka awm leh ta, ka nu leh pa hmai ka zah lutuk; nizan te khan tlangval ang maiin ala khawsa zui a nia, ka ngaihtuah zawng ringawt pawhin ka pum a dik lo dawnin ka hria, ka luak a chhuak ut ut mai.

Ka nu te ka hrilh ang nge hrilh lo ang tia ka ngaihtuah hnuah hrilh rih loh ka tum ta zawk a. Ka whatsapp tone a ri tluk tluk a, ka en peih lo.

Engtin nge dâwt muhlum lutuk min hrilh theih zawk le. Min duh tih kha chu ka pawm thlap; a mitmeng ka chhiar thiama ka hmu bawk. Eng anga min duh leh hmangaih pawh ni se pawmlai nei kher hi chu eng lai mahin ka rilrem zâwng a ni lo.

Muhil thei lovin ka in let sek a, zing lam dâr thumah pawh mit hnâwng chapin ka la meng. Kan inkawm hun lai zawng zawng te kha ka ngaihtuah kîr a, engtin nge hetiang rilru chhe lutuk hi a put theih.

Vai ramah a awm tam lutuka pawisak a nei tawh lo a nih hi. A nih loh pawhin a lo lerh ru viau tihna a ni ngei ang.

Zing dar sarih velah ka nuin min rawn kai tho a, rei lo tê ka lo chhing ve sek a nih hmel.

"Eng ati nge i call tlang theih loh, Sangzuala'n a be duh che," ka khum bulah a rawn ding a, "Ka be peih lo," ka lo ti hmak.

"Lalmuanpui, rawn tho ang che,"  ti chang fakin ka rizai sin a theh hlim a, "Ka sawi thui tam lo ang, a rawn call leh dawna chhang ngei ngei ang che," tiin khumah a phone a rawn theh thla a, min chhuahsan hmak.

Minute nga hnu velah ka nu phone a rawn ri ta chiah a, Sangzual bawk a ni, la duh lovin ka en reng ringawt a, zah theih lohah pawh hian a chin tâwk a awm ve; min vaw dawn mah se ka be lo ang.

Vawi thum ngawt a rawn call a, ka nu a rawn lut bawk.

"Aw, Sangzual, inbe rawh u, phone kan pe ang e," tiin ka kutah a rawn hmehbel nawk nawk a, "Ka thin i tih rim hma hian be rawh," a ti chang fal.

Phone ka phih thlâk rualin,"Eng nge?" Ring zeta ka ṭawng chuan ka nu a meng kâwk, "Liansangzual, sawi rawh, tun bak ka be dawn lo che a nia," ka ti leh a.

"Eng vangin nge nizanah phone i lâk duh loh, i phone ah ka rawn be dawn che a, i nu kha a phone pe rawh, ka off dawn," a sawi zawh rualin a off nghal hmak a.

Phone chu ka nu pein, "Ka phone ah a rawn call dawn, vil reng pawh ka ngai lo," tih pahin veranda lam ka pan a, min chhâng lo teh tlat.

Sangzuala'n a rawn call nawn leh ta. 'Hello' ka tih rual rualin, "Eng nge thinrimna i neih?" Tiin min la zâwt ngam a nih chu!

"I nupui tan rinawm la, kei hi min tibuai tawh suh, mí pa duh ila tun thleng thlengin ka nuthlawi náng," tiel zetin ka ti a.

"I thluak a thâwl telh telh a, ka duh tulh tulh thung che, nizana ka sawi kha i awih tak tak elaw?" Nui hawk hawk chunga a tih chuan phone ka melh nghek a.

"Eng nge, nupui nei lai duh tura min ngai hi min hmusit ka ti zawk dawn em ni?" Ṭawngkam mawi pawh chhâk chhuah harsa ka ti.

"Nám, i â sia e, khawia nupui mah ka nei lo, ka tider mai mai a nih kha," a rawn ti a, a nuih zat hmel hle.

"Dâwt sawia min bum nawn tum tawh suh, sipai hmeia ṭan ai chuan Dingngheta sakawra ṭan leh ka duh zawk," tiin ka nui lui hak a.

"Lalmuanpui, ka thusawi ngaithla rawh, kei hian ka pian tirh aṭangin nupui chhe te eih ka la nei lo, nizanah ka rawn fiam che a, khatiangin i la thutak dawn tih ka hre lo, sorry Nám, ka ti tak tak, nupui ka nei miah lo a nia," fiah faka a rawn tih leh chuan ka ngawi reng.

"I awih loh leh i nu leh pa, i u Chhandama te kha zawt rawh, ka fiamthu mai mai alawm, nang ka nei lo che a nih chuan ka tlangval hlen ṭhak mai ang," tiin a nui a.

"Ka awih tawh chuang lo, khatiang dâwt sawina chi pawh a ni lo, Lawmkimi kha i hmei a mi?" Ka la ti hrâm.

"Huh! Hmei ka mamawh lo, ka sawi kha awih hmiah rawh, nupui nei lovin kum 35 ka pum ṭep, ka nei a nih chuan nang mah NAOM LALMUANPUII kha i ni ang," inring tawk zeta min chhânna chuan min ti lawm nge lawm lo pawh ka hre tawh lo.

A fiamthu a nih ka ring deuh bawk si, a nih loh ka ring tho bawk si. Liansangzuala han sual dan em em hi chu(h).

"I neih loh leh a ṭha a nih chu, ka hman tawh lo, ka dah dawn.." ka ti nghat a.

"Thinrim tawh suh aw, i Sangzuala hian nupui a hmuh zawh loh vang nilovin nghah lai a neih vang zawkin ala tlangval a nih hi, i thinlung phêka chhin chhiah tura ka hrilh che kha eng nge ni kha?" Tia min zawh chuan, "Eng mah," ka lo ti a.

"I hriatna a chhe hle mai, practical a ngai a nih kha, theory chu i theihnghilh hma tlat, 'â pa' tia min kotu an awm chuan theihnghilh hauh lovin ka ta i nihzia i hre nawn zel ang," zak map lova tiin a nui zui a.

"I zak lo, i zak lo si..." ka ti a, a bâk sawi ber tur pawh ka hre lo.

"Le, ti khan inbiak duh loh lam chu dah ṭha tawh ang aw, thla thar ni 6 ah lungphun chu kan tum ta e, harsatna leh buaina a awm loh chuan lokal in tum dawn nia aw, chhuanlam i neih chuan ka lo hruai tho tho ang che," a ti zung zung a.

"Hunin a hril ang chu," ka ti sap a.

An ruahman dan a sawi leh zuai zuai hnuah phone a dah ve ṭâwk.

A thu sawi apiang ka awih nghal zel mai hi mak ka inti.

"I rilru put hmang ka en chhin a nih kha," a ti duh lek a, "Ka ringngam thlap che, pawm lai nei ka nih lohna hi ka vanneihna a ni e," a ti nghe nghe. Huat ka tum poh leh ka haw thei lo a, "Vawikhat mah khatiang zawngin fiamthu thawh tawh suh," ka tih khan, "Yes maa'm" tiin min chhâng.

Chimawm, sual tel bawk si. 'Lianchukchusangzualhnapa' huis keimahin ka nui nghek.

Ni e, min hre chiang lutuka ka thinrim hma theih zia leh ka lungawi hma zia pawh hre bertu a ni. Ho têah min ti thinrim a, awlsam têin ka lungawina a siam leh nghal zel ṭhin a nih kha. He mi kawngah hi chuan hmâna a zia kha a la paih miah lo thung.

A hunawl a piangah kan inbia a, zingah min kâi tho hma thei fer fer khawp mai.

"Regiment nupui nih dawn chuan hma deuh deuhah thawh tur, a chhan chu zing lamah duty ka nei ṭhin a, ka eitur min siam sak fo a ngaih dâwn avangin tun aṭanga i inzir lâwk a ngai," a ti thûl.

Min hawsan aṭangin nitin zing dâr nga bâwr velah min phone ziah. A tîr chuan ka hai der a; mahse, phone ka pick duh loh apiangin ka nu a tibuai ziah a, aniin min hau phah ziah bawk.

A nu leh pa thlân an siam zo fel tawh a, a thlalâk min rawn thawnin, "I lokal hunah thlâ kan la dun dawn nia, an dam lai khan i hming ringawt an hriaa i hmêl an hmu ve hman ta si lo a.." rilru nat hmel taka a tih chuan ka khawngaih. A nu leh pa, a chhungte bulah ka chanchin engkim a hrilh vek tih te a sawi a, a putea pawhin min hmu châk viau a ni awm e.

Nitin hun awl apianga inbe ta reng chu min biak lohin ka awm thiam lo titih. Anni lam erawh an buai hle a, upa ber a nih angin a kovah eng kim a tla a, a nau te pahnihin pui ve bawk mah se a tawp kharna chu amah tho a ni zel.

Zan khat chu video call-in min rawn bia a, "Ka sam hi chawlh lâk chhung chauh ka zuah ve chhin dawn," a rawn ti a. A lokal lai âi khan tlêmin a sam pawh a lo sei hlek, a chhîp lam buk deuh chu a tuai thur vek a, a bek lam erawh a kâwng tho.

"A putu i ni a, i thu vek, sipai lu meh dan hi ṭhing ka ti," ka'n ti leh pek a.

Nui ruh ruh chung hian, "Min ngaisâng lutuk suh, kei aia inhmeh hi an awm lo a nia, inhmeh min ti lutuka min fak hreh a nih kha," confi zeta min chhânna chu sawi buai theih ka nei lo. A sawi dik, ani aia inhmeh an awm lo.

"I chhe siah..." lái zetin ka ti teh ngawt.

"Hmânah pawh khan min duh tho a, kan la naupan deuh avang khan kan ti lang ngam ngai lo a, tunah chuan experience turu lutuk nei tawh i nihna kha min hmuh tir thuai ka beisei," tiin a nui suk suk.

"Kal mai teh, i ṭawng thei si," ka ti tehngawt a, a bulah hi chuan sawi tur hre lova ngawih rauh rauh châng ka ngah mai.

Ama sawi dan chuan an in chung ber hi ama bil tura an sak a ni a, a hnuai chiah hi Kimkima pual deuh, a hnuai ber an la khâwr pum loh hi Mimtei pual a ni thung a, tunah rih chuan a lai tak, Kimkima puala an dahah hian an awm khâwm vek rih.

"Kan vengah chuan nupui nei tur thanin ka thang vek tawh, mahse, ka nupui tur ka chhungte bâkin an hre lo a nia, i hmêl an hmu châk lutuk tawh," a rawn ti leh tawp.

Inneih hi i sawi ve ziaha kan in ngaihzawnna a la rei si lo," tia ka chhân chuan, "Rei deuh ngaihzawng neiin i inrûk tira in inṭhen leh thuai a, tunah chuan rei lo tê kan inngaihzawng anga chatuan daih thutiam neih kan tum thung ang," thutak zeta a rawn sawi chuan ka thinlung a tawk che dat.

A thil sawi turah a chiang em em ziah a, zawhna zâwt ila confi takin chhânna tur a nei fel fai thlap zel.

Ka lo ngaihdan chuan ka hmuhsit thil ni lo se Assam Regiment-a ṭang hi lehkha thiam lo leh mâwlmang ve tak tak an awm ve nuk a; fel tak tak leh hna thiam lutuk bright zet zet an awm nawk bawk. Kan Liansangzuala zia pawh hi sipai naran zia a ni lo tih a ni têlin ka hre thar.

Kum 35 chauh ni siin a thluak a hmang thiam êm em a, sipaia a luh hnu rei vak lovah personal loan lain tuna an in khi bul a ṭan a, khalai hunah khan a pa sum dah sak kha an la khawih che thei lo; a putea kutah engkim dahin a hlawh kha a zât ve dâwn a naute zirna atan a la thawn bawka loan rulh ngai nen a rethei hle ang tih sawi nawn ngai lovin ka hre thiam ve.

Tunah chuan Arsi bel hnih belin hotute duhsak a hlawh bawk a, ṭawng hrang hrang a thiam nual niawm tak a ni. Class 12 first division-ah a pass a, sipaiah ṭang lovin zir zawm zel ta se eng emaw tak hna zahawm chu a thawh tho ka ring.

Hman zana 'nupui ka nei tawh' tia min rawn fiam ṭuma kan inhau bâk kha inhauhna kan nei tawh lo, thu ho lam leh kan pahnih chungchâng sawi dunin rei zet zet zan lamah kan inbia a, a tlângpuiin chhun lamah kan inbe khât. An ṭûl thei ve bawk êm a ni.

Ka nu thawhpui pa Ramliana a lo lêng a, pension nân kum li vel a la nei a, thisen sâng leh zunthlum a neih vangin school a kal peih vak tawh lo tih sawiin âi kalah min rawn sâwm a, "Ama thu thu a ni mai," tia ka nu leh pain an lo chhân avangin, pa Ramliana hnenah, "Naktuk lamah ka thu tlûkna ka hrilh dawn che nia," tiin ka thlah ta kha a ni a.

Pa Ramliana haw hnuah Sangzuala ka call a, a ngaih dan a thuphungin ka zâwt ve hrim hrim a, "Eng hna mah thawh a ngai lo, ka châwm thei che, nitin school-a i kal te chuan ka tân hun i nei tlêm lutuk ang, khumah a ni emaw ei bár zawn kawngah pawh ni se ka châwm hneh sawh lutuk tlat che," a ti leh hmiah.

"Chutiang ringawt a ni bik lo a, mamawh kan ngah si, tlêm tal lo thawh chhuah ve pawh a ṭha alawm," tia ka chhân chuan, lungawi chiah lo tih hriat deuh hian, "Hna neih i duh te chuan pasal nei thawt thawt lo khan engah nge i zir zawm loh, i kum a over tawh a, a ngheta thawh tur phei chu Vana rah ang a ni i tân chuan, ka thu sawi zawmin mi âi chu kal lo phawt la a ṭha a ni mai, a ṭûl a nih leh i nu leh pa pawh ka be mai ang,'' a ti leh duah.

"A ṭha alawm, pa Ramliana chu ka theih loh thu ka lo hrilh dawn nia," ka ti leh ta nge nge a.

Kan awm tlâng lo chung pawhin thunei tak leh thinrim ni miah si lova thu min pêk hian mak tak maiin hnial ka hreh tlat a; thinrim awkáin vawi khat mah thil a sawi ngai lo. Zawm loh theih loh khauh fur si-a ṭawng dan a thiamin hnial a har fo.

Ni a ral a, kâr a ral a, nitin inbe fo mah ila ka ngai tulh tulh ni berin ka hria. Min ngaihsakin a hunawl apiangah min biak a ṭhulh hek lo. Facebook a khawih ve zauh zauh ṭhin a, regular tak chu a ni lo, kei erawh ka active viau a, ina awm ta reng chu ka hman mai sia, ka hring leh vût zel.

"Duh aiin fb i khawih tam, kan hnaah hian khawih an phal loh avangin a ruka khawih a ngai a, ka luh ve apiangin i lo awm hman ziah," a ti a.

"A ho e, thil sual ka ti pawh nihlei lo," ka ti a.

"A ṭûl ber lo, thlalâk thar lám upload zung zung te kha chîng lo la, zahawm taka awm tur, mi tu pawhina an hmuh theiha inpho lan kher a ṭha lo a nia," tia min khak chuan ka ngaih dan a ni lo kher mai.

"En teh, thil zawng zawngah min control vek tum bik lo la, i khawih ṭhat theih loh avanga kei min hmuh mawh kher a ngai lo," ka tih chuan, ṭha deuh hian, "Ni rawh se, a chin tâwk erawh thliar thiam la aw," a ti lawi si.

Ani hi zawng engtikah mah ka hre chiang thei dawn hian ka hre lo.

Inrinni zîng a ni a, ka nuin bazar tura min tih avangin scooty nen ka chhuak a, ṭûl teah lo chuan ka tei chhuak khât khawp mai. Sangzuala nen kan inkâr a ṭha tih an hriat vang nge ka nu pawhin min khak tlêm deuh.

Bazara chawhmeh ka en kual laiin ka kokiah tu emaw hian min rawn khawih a, ka phu chiang kher mai.

"U Naom i ni em?" Tia min lo biak chuan 'aw' tih nan ka bu nghat a.

Nui var var chung hian "I ang ka ti reng a," tih pahin min chibai tum hian a kut a phar chhuak a, "Kimkima, Sangzuala nau ka nia," tiin min hrilh a, mak ka ti kher mai.

"A ni maw! Eng tin nge min hriat zawk a?" Ka tih chuan, "Ka u in i thlalâk min en tir alawm," nui chungin a ti leh a.

"Kan inhmu-a a lawmawm, i u nen pawh in inang deuh," ka ti ṭha ve mai a, a nau helamah a awm tih Sangzuala'n a sawi miah lo; ka hriat kher a ṭul lo a ti te pawh a ni mahna.

"Lokal rawh thingpui in dun ve reng reng ang," a tih deuh tlat avangin sobji bazar chunga restaurant pakhatah kan inzui lut ta a.

A û angin a sâng ve vak lo a, tawi chhia phei chu a ni chuang lo. An hmaitlâng erawh a inang viau a, tun hi ka vawi khat hmuhna ve tho a ni, a thlalâk tak ngial pawh ka la hmu lo. Tarmit a vuah rá a, a sam erawh a tunlai ang reng. Sangzuala aiin a ngo zawk bawk.

"Lungphunnaah i lo kal ve thei ang tiraw?" Tia min zawh chuan harsatna dang a awm loh chuan kal ve ka tum thu ka hrilh ṭha ve mai a.

"Mimtei'n a hmu châk teh mai che a nia," a ti leh a, a nui reng bawk sia, a bula awm a nuam.

"Pathian zarah kan dam anga kan la inhmu turah ngai ang, helamah i awm te chuan min lo tlawh ve tur a nia," ka ti a.

"Nia, nimin piahah ka lo chhuka bank dawr turin, chawhnu hian haw ka lo tum a, lo tlawh chungchangah che kha chuan ka û hau rawh, a phal lo a..." tiin a khi suk a.

"A va ho tak, kan inah te rawn thlen tur alawm," ka'n ti khawmawi ve bawk a, a biak a nuam, lawyer nge nge a ṭawngkam pawh a fel fai e.

Kimkima car dahna bulah ka la ding a, "Putea car ka lo ken sak a, ka û in a bike a ui tlat pek a nih hi, u Naom, ka kal phawt mai ang," tiin car chhungah a ṭhu lut a, chu tih lai tak chuan, "Muanpui, i dam maw?" Ka dara min vuantu chu en kher lo mah ila tu nge a nih ka hre chiang lutuk tlat.

Zawi muanga inherin Dingngheta nen kan inhmachhawn ta a.

Kimkima hmel ka va ena mak tih hmel deuhin min lo en reng. Mahse, nui sâng chung hian, "Ka kal, i lo zin hunah kan lo hmuak dawn che nia," tiin car a ti nunga a tlan chhuak ta a, side glass aṭanga min rawn melh chu ka hmu reng.

"I bialpa chu ala naupan hmel hle mai," tia ka pasal hlui min biakna chu hriat loh der tumin ka chhâng duh miah lo a.

"Muanpui, hmuh i har kher mai," ti lehin ka kokiah a rawn vuan a, chu chu duh lovin ka tawlh sawn nghal a, "In hmuhna chhan tur kan nei hleinem, ka hmanhmawh deuha ka kal ang e," dam thlapa tiin ka pen sawn nghal a.

"Tun thleng hian ka la nghak reng che tih i hria tiraw, chance min siam leh rawh," tiin ka kut vawn tumin a rawn phar chhuak a, "Dinga, i laka ka rilru ka la sawh sawn lo, nang nena inzawm leh tumna ka nei tawh lo," ti nghatin min chhânna pawh nghâk tawh lo hian ka kal nghal hlawk hlawk a, min um zui nge zui lo hre tur pawhin ka hawi lêt duh ṭhak nang.

Chawhmeh zawrhnaah ka lut ta daih a, eng vanga min rawn be kher nge maw a nih le. Zu a nghei tawh a ni ang, a hmelṭha leh vuah tawh a, a mitmenga hlim lohna lang kha ka hmuh hmaih lo; mahse, ka khawngaih tihna pawh a ni chuang lo, eng mah ni lo mah ila, rilru ka siam fel tawh chuan hawi kîr hnihne hi ka zia a ni lo teh tlat.

Kimkima kal turin min biakna kha ka chhân leh chhân loh pawh ka hre tawh lo; Dingngheta vang vek.

Ka bazar zawh hnuah lungphun ni-a bun tur pheikhawk lei tumin ka vâk kual leh hrep a, dik tak chuan incheina chu ka nei ve nual, kan inneih lai khan ka pasalin min ngaihsaka ka ngah ve lam tak a ni. Kan inṭhen hnuah thil thar ka neih belh em em tawh lo, bazar pawp pawpna tur sum ka nei lo bawk a, ka awm ve naw naw a ni ber.

Petrol lâk kawi ka tum thu ka nu hrilh tuma phone ka zawn chuan ka lo keng awzawng lo. Khumah dahin ka kalsan tih ka hre chhuak leh hnuhnawh a, ka va ngei mai mai tak.

Zing dar 7 vela chhuak kha in ka thlen meuh chuan dâr 10 a ri tawh.

"I rei ngar ngar hle mai, i phone i keng leh pek lo a ni maw?" In chhung ka luh rual rualin ka nu'n a lo ti nghal a, petrol ka lâk thu leh pheikhawk ka zawng rei tih ka hrilh chuan, "Sangzuala'n a lo phone che a, i hman hunah i be dawn nia," a ti a.

Chaw ka ei kham vek hnuah phone ka khawih ve chauh, Sangzuala missed call vawi ruk lai a awm. Nizanah ka bazar dawn tih ka sawi reng sia, eng thil nge maw ni le, ka call nghal a, vawikhat chauh a ring hman tihah, "I phone keng lovin i chhuak a ni maw?" A rawn ti a.

"Aw, ka hmanhmawh lutuk a..."

"

Tu nen nge in kal?" Tia min zawh chuan, "Keimahin, scooty ka keng a," ka ti ṭha mai a.

"Ka nau nen in inhmuh laiin tu nge i bulah mipa awm ve?" Tia min zawh chuan ka chhâng lawk lo. Kimkima khan a û hnenah a sawi tih ka hrethiam mai.

"Eng lo..." ka sawi zawh hmain, "Tu mipa nge awm ve ka tih chu?" Ani leh ni lo angin a vin viau.

"Vak vak a che, ka sawi dawn reng alawm le," tiin Dingngheta chungchang chu ka hrilh ta a. Ka sawi chhung zawngin a ṭawng lo.

"Kha pa hnaihah khan awm lo turin ka hrilh tawh che kha, Naom, ka hmuh phâk lova i awm avang khan zalen viauah inngai suh," a ti hmuk a.

Ka hrilh chian teh reng nen eng nge maw a thinrim nghal ngawt ni.

"Pasal ka neih hma chuan ka zalen a lawm.." tia ka chhân chuan, "A nih chu, khatiang ngaih dan i neih tawh lohna tura hma ka lâk kher a ngai tihna a ni maw?" A ti leh a.

"I buaina a ho lutuk, thîkthu chhiat viau hi a ṭha lo a nia, thîk awm te hi an awm ve ngai," dam thlapin ka ti a.

"Thîk tur dik tak a ni ka thîk, kha pa nena vawi khat lek pawh in inbia tih ka hre leh a nih chuan i rin aiin a pawi tawh ang," ti vin hlukin phone a off daih.

Sangzuala ṭhin hi a.

Ka thiam lohna awm miah lo mah se nuam ka tih loh êm avangin ka call nawn leh a, vawi thum ka call pawhin a chhâng duh eih lo. Sual siah...

Kimkima teh reng pawh lo han hrilh thawt thawt. Ka ngei ang reng; mahse, a û a nia, inngaizawng lai kan ni a, hrilh pawh ni se a thiamawm tho mai.

Nilêngin vawikhat mah Sangzuala'n min rawn be tawh lo a, whatsapp-a ka biakna pawh en vek siin pakhat mah min reply duh lo. Mai mai a!

Hremhmun sipaiah chuan thikthu chhe pâwl tak a nih dawn hi. Hremhmun Regiment dik tak.

Zan dar 10 velah min rawn call ve chauh a, khumah ka mu diam tawh. Thinrim loh hrâm tumin ka pick a.

"Nunna hi pakhat chauh ka nei a, ngaihdamna erawh pasarih ka nei thung, chung zingah chuan zaninah pakhat ka rawn hmang a, paruk chiah ka nei tawh tihna a nih chu," a rawn ti a.

A sawi awmzia pakhat mah ka hriat loh avangin, "Sangzual, thu pangngai rawn sawi rawh," ka ti teh ngawt a.

"Thu pangngai alawm ka sawi, ngaihdamna pasarih ka neih zingah vawiina i pasal hlui nena in inhmu kha ka lawm lo a, mahse, ka duhna che a nasat avang leh ka ta i nih tawh avangin ngaidamtu rilru ka put a ngai tih ka hriaa pasarih zinga pakhat khi hmangin tukin thilah khan ka ngaidam che, a bâk paruk khi hman ngai tawh suh se," a rawn ti ta a.

"I over lutuk, ngaihdam ngaiin ka awm lo, ka thiam lohna pawh a awm lo," ka lo ti a.

"Sawi zui ka peih lo, ka sawi ang khan a hmuh turin awm lo la a ni mai, ka naute rilru hi a na hma teh a nia, ka lakah an thikthu a chhe bawk, fimkhur tawh ang che," a ti teh nek a.

Sawi dan tur ber pawh ka hriat si loh.

"I nu leh pa an lokal thei dawn lo a nih hmel a, rawn hruai tur chein hun ka nei tawh bawk si lo nen ka ṭhianpa Tlana ruala i lokal mai a ngai dawn a, a rawn sawm ang che. I pa nen nichinah kan inbia a.." tiin thil dang a rawn sawi ta a.

"Hmel hriat loh inphurh tîr te chu a.." ka lo ti hlak a.

"Ka ṭhian alawm, ka lo haw rualpui Bazar veng ami kha a nia, Thawhṭan zingah a rawn sawm ang che, ni hnih khat tal hahdam hman turin i lo chho hma dawn tihna a nih chu," tiin a ruahmanna a rawn sawi zung zung a; ngaih dan ni vak lo chungin ka 'aw' liam vel mai mai.

Min rawn hruai turin ka phût hran lem lo a, Sumo-a kal ka tum deuh kha a nia. Mahse, a ṭhianpa a nih tho chuan a ṭha zawk phian ang.

Rei vak lo kan inbiak leh hnuah a nauin a rawn ko ta a, Mimtei niin ka hria.

Karleh Nilaini khi an lungphun hun kha a ni tawh a, Thawhṭanah ka kal dawn tihna a nih chu.

Ka huphurh rualin ka châk tho bawk si. Amah hmuh hlan ka nghâkhlela ka ngai tawh. Ka nu leh pa an kal thei dawn lo tih ka hriatin tlêm chuan ka hnual deuh.

Sangzuala lo lan leh aṭang hian keima duh dan pawhin ka nung tawh lovin ka hria, eng kimah thu min pe fai vek a, a thu pêk erawh a fel fai lawi si.

A hmel pa hrâk ngaihtuah chungin ka chhîng ta riai riai a.

B®®
B+>[BeckirafARenthleI]<+®®