4.NAOM [Mizo Love Story] -B®®

4.NAOM

Ziaktu: Becky Rafa Renthlei
B®®

Shadow of the life

Kâr leh Nilaini khi an lungphun hun kha a ni tawh a, Thawhṭanah ka kal dawn tihna a nih chu.

Ka huphurh rualin ka châk tho bawk si. Amah hmuh hlan ka nghâkhlela ka ngai tawh. Ka nu leh pa an kal thei dawn lo tih ka hriatin tlêm chuan ka hnual deuh.

Sangzuala lo lan leh aṭang hian keima duh dan pawhin ka nung tawh lovin ka hria, eng kimah thu min pe fai vek a, a thu pêk erawh a fel fai lawi si.

A hmel pa hrâk ngaihtuah chungin ka chhîng ta riai riai a.

B®® 280621

Thawhṭan zing ni chhuak a ṭang ṭha at at khawp mai. High school kan kal laia Sangzuala'n 'Ni Sakei' a tih ṭhin kha ka hre chhuak zawk. A patea te hnena awm kha a ni a, an fel vak lo nge ka hre chiah lo nain ke hlîrin a lo kal ṭhin a! Min rawn sâwm ziah ti ila ka sawi sualin ka ring lo.

Keini nu leh pa thlazar hnuaia thlamuang taka kan awm laiin, a ni erawh thung chu nu leh pa hmuh phâk lohah inthlahrung reng rengin hun a hmang ṭhin kha a ni a, lehkha a zir nasa ṭhin hle bawk. Mihring te hi kan duh dan vekin kan awm thei lo a, harsatna tâwka bei hrâm hrâm te zingah Sangzuala hi a tel ve phâkin ka ring.

A ṭhianpa Tlana'n dâr 10 velah min lo lam dawn a, ni li châm tur ka nih avangin thawmhnaw ken tam ṭul viauin ka hre lo. Ka nu leh pain pawisa min pêk bâka ka khâwl tlêm ka keng tel bawk a, diktak chuan kan inneih lai khan tu khaw kha hriat lohvin ka inkhâwl ve nial.

Dingngheta rinawm loh hma zawng kha chuan nupa inngeih tak niin min duat êm êm a, 1st class contractor a ni a, bill buaipui ngai pawh ka kutah a dah nual; min ring tâwk em em bawk. Khatia Tlabunga a chêt chhiat hma lawk pawh khan Retaining wall an siamna bill kha ka account-ah a dah lut vek a, min dîl nawn tawh miah lo. Pêk let tumna pawh ka nei chuang bîk lo a; ka rilru a tih nat manah thiam inti deuhin ka nei hmak.

Kan inneih chhung khan zu a in zeuh zeuh tih loh chu sawiselna ka nei tam bîk lo. Mahse, kawppuite laka rinawm lohna hi ka huaa ka ngaidam thei lo kha mak ka inti fo ṭhin. Mi chhungkuaah pawh a thleng ve tho a, inngaidamin an inrem leh mai. Kei erawh chutiang rilru ka pu thei miah lo kha thil mak tak chu a ni.

Tuna ka scooty hi chu ka nu leh pain min leisak a ni a, a tîrah duh lovin ka hnial chiam a, "A tlawngâwl leh kan tirh ber i ni a, i neih a ngai," an tih deuh tlat avanga nei ta chauh ka ni.

Ka insiam laiin ka nu leh pa an lo lût a, "Mi mit ti kham zawnga awm loh i tum dawn nia, nula pangngai i ni tawh lo a, thil engkimah hming hliau a awl bik a nia, Sangzuala pawh kan hrilh tho a, a hmuh phâk lova len davah te kha a ṭha lo a nia, fimkhur takin han awm ang che," tiin min chah thlap.

"Lungphun ni-ah kekawr te kha i han inbel ṭut ang e, thil mâwi a ni lo a nia, intih zahawm thiam ve tur," ka nuin a ti hrâm.

Kekawr hâk ka lo tum deuh tak tak a, ka nuin sawi lo phei se chuan puan bih tur ken nachang ka hre lo tawp ang. Kei mi awlsam hian..

Tlanhlua a lo thleng a, ka tum loh dan deuhva ka'n hmuh chu le! A sang hle a, a ria thalh mai. Vun ngo lam leh lerh hmel zet a ni a, Sangzuala ang lo takin a hmêl a numú deuhin ka hria.

"Naom, kan chhuah hma loh chuan kan thleng tlai lutuk ang," tiin ka zin bag a khai chhuak nghal a, ka nu leh pain fimkhur turin min chah nawn mawlh mawlh.

Kan in kawta New Santro pâwl fai zet lo ding chu ka chuanna tur tih ka hre mai. Tlana'n, "Kawng siam an awm leh nghala min dan hmaa kan pelh hman a ngai dawn sia, ka rawn chhuak hma a nih hi," tiin min hre sa ang maiin min be bawrh bawrh a, "Chhuah hma tluk a awm hleinem," ka ti a.

Ka nêl zawng te bulah lo hi chuan ka ṭawng tam lem lo khawp a, Tlana pawh ka vawikhat hmuhna chauh a ni a, biak dan tur ka hre mai lo.

Car chhunga ka ṭhut luh chuan zu rim a nam deuh hakin ka hria; ka ngaihbel vang nge.

Whatsapp aṭangin 'kan rawn chhuak dawn chiah' tih Sangzuala ka hrilh a, "Ka lo hmuak ang che u," a rawn ti a.

Ka nu leh pa vai liamin Lawngtlai lam kan pan ta a.

Hrangchal kan thlen hma chuan atu amah kan inbe lo a. Tlana pawh a ngawi reng a, zinglam dâr 10 a pel chauh.

"Sangzuala nen hian in inriatna a rei tawh tiraw?" Min rawn melh zauh chunga min zawh chuan, kan tleirâwl lai aṭanga inhria kan nih thu leh school kan kalho ṭhin tih ka sawi a.

"A fel a nia, ka ṭhianpa hi chu, kan awmna hmunah pawh amah nen bâk kan inkawm ngai lo, kan kum a inrual khat bawk a, engkim kan ti dun a ni mai," a ti a.

"Nia, a puitling khawp mai, kan inkawm ṭhin lai ngaihtuah phei chuan a awihawm loh zawk," ka lo ti ve a.

"I hming hi chu a sawi fo a, Lunglei lam mi ka lo ni bawk nen ka hriat leh hriat loh che min zawt a, ka lo hre si lo che a.." nui var var chunga tiin kawng lam ngun deuh hian a melh a, "Inhriat a har ve alawm, kei phei chu ka chhuak tam si lo a, hmelhriat ka nei tlem khawp mai," ka ti leh mai a.

Thil eng eng emaw min zawtin a ṭawng char char a, Lucknow-a an awm lai vel leh Mizorama chhuah an châk theih ṭhin zia te a sawi luam a, "Kei chu ka haw zing zawk, nupui hmu zo mang si lo hian haw phúr phúrah hian ka ṭang a," tiin a nui pah vur vur a.

Nupui a la nei bik lo tih ka hre chiah.

"Hmuh zawh loh thu a awm hleinem i duh tui lutuk a ni ang chu," tia ka fiam chuan, "A ni ve tho mai, kum thum zet ka bialnu nen khan kan inzui ve a, chawlh lain haw ve ṭhin mah ila, kan haw khât bawk si nen nikuma ka rawn chhuah leh khân min ṭhen daih a, min lo kawp tih ka hre chhuak zui ta bawk a.." a ti a.

"A va zia lo ve aw.." ka ti sap a.

"Chuvang chuan Sangzuala pawh hi fimkhur turin ka hrilh ṭhin a, ani phei chu a naute ngaihtuah an ngai bawk nen a chêt fuh loh ka hlau ṭhin a," a ṭhianpa a duhsak tih a âwkâ aṭangin ka man thiam mai.

"I bialnu chuan pasal a nei tawh mi? Tia ka zawh chuan, "A râi a, an inhruai zui daih, hmeichhia hi an mak ngawt mai," a ti hluk a. Ka thil lo tawn tawh aṭangin a rilru tur ka hre thiamin ka hria.

"Ṭha tâwk i la hmu mai ang," tiin ka nuih var var a, 'Ṭawipui S' kan thlenin Sangzuala'n min rawn call-in kan thlen chin min rawn zâwt a, "Tlana kha nel deuhin be bawrh bawrh rawh," a rawn ti a.

Tlana'n thingpui ka in duh em tia min zawh chuan ka duh loh thuin ka chhâng a, thlen thuai thuai ka duh ber; zun ram thiara kan din laiin beer a rawn phawrh a, "Ka in dawn a nia, i duh ve em?" Tiin min zawt a, "Duh lo e, i duh chuan in rawh."

"Pakhat hi in ve chhin la, i rui lo ang, hmeichhe tan a ṭha," tih pahin ka malchungah 'Can' khat a rawn dah a, in pawh ka tum lem lo.

Ani erawh chuan tui tih hmel takin a in khawlh khawlh a, inchhin ve ka châk ta riau.

"Ka rui lo tak tak ang maw?" Tiin beer ûm chu ka khál ka khál a, "Khatiang i ruih chuan i nêp hle tihna a ni mai," tiin a nui hawk hawk a, can hnih deuh thaw a in tawh.

Hetiang lam hi ka in ngai lo teh tlat a, a lum uap churh bawk nen in ve poh ang hmiang.

Ka rin aiin tui ka ti phian, ka pum a vawt deuh raih raih a, kâr lovah Can khat chu ka in zo mai, kan titi pah bawk a, ka rui lo chuan ka hria.

"I duh zât zât in rawh ka ngah mai," Thingfâl kan thlenin a ti a, ka phur nasa. Tui ka ti miau alawm.

Thingkah kan luh hmain kan châwl hlek a, Tlana'n, "I duh leh lo chhuak la, hawi khawthawng lawk ang," a tih chuan lawm zetin ka chhuak a, ka kamis hâk hlipin ka kâwngah ka hrêng a, a hnuaiah tawnzau ka la inbel tho.

Boruak lum leh ka thil in vang nge ka záng deuh haih.

Ei tur a rawn phawrh a, ka rin aiin a ngaihtuah chikim. Kei mah zawk hian en mah ka pái lo a; ka inthlahrung ru ve det.

Minute sawm dawn kan chawlh hnuah, "Kan kal dawn em ni, inpain a nghâkhlel tawh ang che, kha hei hi in leh rawh," a beer ken lai chu min rawn pe a, nichina min pêk nen a bûr a inang lo.

"Phai khaw lumah chuan beer vawt raih a tui ber, inpa nen duty off apiangin kan in ṭhin," a ti a, ani pawhin a shirt hâk lai hlipin tawnzau nen a awm ve bawk a, a tîr teh ngawt ai chuan kan in pawh tawh zawk.

"Ngaihzawng a nei ve ngai em?" Tia ka zawh chuan nui suk chung hian, "Nangmah lo chu ka hre lo," a'n ti ngei a(h).

Ner nâng chung hian, "Nei pawh ni se, nang chuan min hrilh duh ka ring lo," ka lo ti a.

"Nei mai thei, a nei lo mai thei bawk," a ti vel mai mai. A sawi ṭha duh teuh lo.

A in tur min pêk chu nichina mi ang kha a ni ta hauh lo, a kha deuh tlata hriatna ka nei a, chips ka ei tel chung pawhin ka in tam thei lo; pêk kîr leh ka tum chuan, "In zo rawh, a tui daih zawk kha kha," a ti a, keia pawh chuan ka in leh ta tho. Thlêmsami ka ni ringawt.

"Hei, kan thleng tawh a nia," Tlana'n ka lu-ah a rawn sáwi a, ka lo muhil daih chu niin.

"Kan thlenna a rei tawh em?" Tiin ka ṭhut dan ka siam rem nghal a, ka lu a hai chhalh mai.

"Aih, kan thleng chiah, Sangzuala a lo thleng ṭep ang inti harh rawh le," a ti a.

Min lo hmuak tur ang khan a insawi sia, hmuaktu pawh kan nei ta chuang lo a, an in awmna lai kan hriat loh avangin Lawngtlai AOC petrol pump bulah kan lo ding a, ka muhil rei vak lo tih ka hre thiam mai, ka lu han hai dan em em chu, motor rûi angin ka awm chuang bawk si lo a, a ngaihna ka hre thiam chiah lo.

"Tlan, ka lu a rit lûk mai," thâm chhàlha ka tih chuan, "I beer in vang a nih kha, i muhil zui daih sia lû a rit duh alawm," tiin a nui vur vur a.

"Sangzuala chu i phone tawh em ni?" Ka ti sap a.

"Phone tawh e, a rin aiin kan thleng hma a ni ang, a la rawn chhuak hman lo deuh a," steering bawhin hmalam a en a,  a thil in khan a effect ve vak lo nge a lan dan a pangngai reng.

"A inngaih pawimawh loh thlâk e, kan vawikhat kalna tih a hre ve reng si a," ka ti nghat a, ka ngaihdan a ni lutuk lo, min hmuak hman lo a nih te chuan ṭha taka sawi mai tur a ni a; a nih loh pawhin midang rawn tirh tur zawng mai se.

"Hrethiam rawh, an buai ve êm a, rin aiin kan thleng hma vei nen a lo thleng thuai ang," tia Tlana ṭawng mawlh mawlh lai chuan Sangzuala bike-in a rawn tlân thleng ve chiah.

Helmet a khum lo a, a sam chu thliin a chhêm thur deuh hiang a, nui chunga kan lam rawn panin, "Ka rin aiin in lo thleng hma, Nám, i chau em?" Tiin ka ṭhutna Car kawngkhar a rawn hawng a, Tlana erawh a nui vur vur ringawt.

"Min lo hmuak ve chu leh.." ka ti sap a.

"Sorry, Vawk talh tur kha kan han en a, rinaiin kan thang rei deuh alawm le, bro, Naomi ka phur anga min rawn zui rawh aw," a ti leh a.

"Tihian ka chuang tlang mai ang, tlân hmasa la kan lo zui ang che," ka ti deuh ngat a, min lo hmuah loh vangin ka ngei deuh tlat.

"A ṭûl lo, ka bike-ah chuang rawh, ani te chuan kawng tluanin a rawn phur tawh che a, ka ngai che alawm," ani leh ni lo angin a ṭawng dam thluam. Thu pe âw a tel lo teh mial.

Mahse, ka thil in vang kha nge ka che chàng peih thlâwt lo a, "Ih, tlân hmasa mai rawh, kan lo zui ang che, khawlaia inphurh vâwk vâwk te chu a," tia ka lo hnial chuan, "Bro, hre thiam mai la, i hnungah kan lo zui dawn che nia, a chau deuh a ni ang," tiin Tlana'n min lo pui bawm ve bawk a, ngaih dan ni vak lo tih hriat deuh hian, "Ni rawh se, min zahpui deuh em ni Naom," ti supin, car kawngkhar inhawng sa chu a nam khar a, ka chhâng buai peih ta vel lo.

Chak zeta a tlan chhuak chu kan zui ve ta nghal a. "I chuang ve mai lo a," Tlana'n a ti a.

"Eng lo, ka lû a hai lutuk alawm, ka luak lo chauh," tiin chil ka lem khalh a, "Eng ati nge i sawi loh, ka thil in tîr vang che kha a ni ngei ngei ang," inthiam lo tih hriat zet hian a ṭhen sak a, kan hmaa sipai pa lah chu a tlân muang duh der lo.

A thinrim tih ka hria, bike ngainat loh nâk laia, chauh nen ka chuang peih thlâwt lo a ni e. A mikhual turte kan ni a, min thinrim khum rei lo turah ngai ang.

"A hau che pawhin chhâng duh miah lo la ngawi tlat ang che," tiin min hrilh sa a, "Engah nge min hau ngawt ang, a bike seat a sang si a, ka chuang peih lo a ni ve mai a," ka lo ti a.

"Chutiang ka sawi lo, i thil in kha maw le," nui ṭhâ chungin a ti a, "Ani pawhin a in ṭhin tho chu, ka vawikhat in na a nia, min hre thiam turah ngai ang aw," thiam inchan tîr tum sa zetin ka ti a, "Ni mai zel e," tia nui sukin kan hmaa building kawtah car chu a ti ding ta a.

Sangzuala pawh bike nghenga inkuangkuah chung hian kan lam a rawn hawi a, a tûm hmuk bawk. Tlana nen car aṭanga kan chhuah pawhin min ngaihsak lo hian kan bag chu inchhungah a khai lût a, Tlana'n koki san âk chung hian, "Sipai luhlul thinthawk a chhuak ṭan e," a ti sup.

Kei erawh ka lawm lo takzet zet.

Amah ngai pawimawhin helai thleng thleng kan kal ve a, bike chuan duh loh avanga intihtauh khum kher chu ka run viau.

Inchhungah kan lut a, Kimkima chiah a lo awm a, Mimtei ka hmu ve lo, "In lo thleng tluang maw," polite taka tiin Tlana nen min chibai a, ka ṭawng ve hmain kan tluan thu leh in anneih nawm thu sawiin Tlan'n a lo chhâng vat a, sitting room zau ang reng takah chuan kan paliin kan awm a, in an nei nuam khawp mai.

"Bro, Kimkima room bulah sawn i room tur kan buatsaih a, Kim, lo va hruai ta che, Naomi hi a room turah kan hruai ang e," tia a sawi zawh rualin, "Lokal rawh," tiin inchung chhohna step a pan nghal a, ka zui ve mai.

Inchung chu inhnuai aiin tlêmin a zîm hret na a, a nuam dangdai reuh hle. Min hruai luhna room pawh a nuam viau, a zau hran lo a, khum pakhat leh dawhkan bakah fix wardrobe a awm phei zui a, floor tile a inphah vek bawk.

Ka hmuh tum aiin in leh lo an nei ṭha a, in chung bîkah hian balcony a kual chhuak vek bawk.

"Hei hi i room tur a nia, leh lam saw ka room," a ti hmuk.

"Ang lo lutuk kan pahnih chauhvin inchungah kan awm dawn maw?" Mak ti zetin ka ti a.

"Eng nge, buaina a awm em ni, in hnuai chu a zalena mi hrang hrang an rawn lut reng bawka nuam i ti lo ang," dam deuh zawka tiin ka inrin hman hmain a lamah min pawt hnai thut a, ka lo ṭe ṭhat.

"Sangzual..." tia thaw hakin inlâk hran ka tum a.

Ka hmai bula rawn kûn hniamin, "Eng thil nge Tlana nen in tih, ṭawng leh teh," tiin a mitmeng a chang nghal sawt.

Eng thil nge maw ti tura min ngaih le?

"I sawi awmzia ka hre lo...'' ka ti sap.

Chutah ka hmuiah fâwp thutin min thlah leh nghal a.

"No eng zat nge i in?" Thinrim inseh ruh ṭeuha tiin min thing deuh nawk a.

"I mak, kal sawn rawh..."

"Lalmuanpui, ka zawhna che min chhâng rawh no eng zât nge zu i in?" ati hniam ruih a, kei ka lo hawi â hû thung.

"Lutuka che, zu ka in lo, beer erawh ka in," ka ti a.

"Dâwt min hrilh miah suh, zu rim hlir i nam tih inhre rawh, zu leh beer rim hre hrang lo turah min ngai em ni?" tia a sawi zawh rualin khumah min nem ṭhu hnawk a, zawi tawh nâk laiin ka zawi leh zual.

"Ka chau a nia," ka ti sap a, ka mut a chhuak tak zet.

"Ka zawhna che ṭha takin min chhang la, i châwl hahdam dawn nia," dam deuh zawka tiin ka bulah a rawn ṭhu a.

"Dâwt ka sawi lo, a lum bawk sia, Tlana khan beer min pe ve a, ka in chhin a nih kha, ka vawi khat in na," ka tih chuan, "Laltlanhlua mai mai chu," ti supin, "Ti khan lo châwl hahdam la inhnuaiah ka zuk chhuk ang e, i zia deuh hunah sawi dun tur kan nei," ka chalah fâwp zauhin ka chhânna pawh nghâk lovin a chhuak zui ta a.

Leh lawi si chuan!

Min chhuahsan veleh room kawngkhar chhunglamah kalhin khumah ka ṭhu leh hnawk a, kan thlen khan a la hma riau a, rei lo te mut lawk ka duh. Ka pheikhawk phelhin khumah ka lawn kai a, ka hâk lai nen ka mu thlawrh. Ka luak chhuak kha a reh deuh a, ka lû a na fuk fuk thung.

'I rui lo ang' ti mah se ka awm dan hi zu rui nen danglamna a awm lo ang, ka hai chhulh ni maiin ka hria, rûi chhia tia sawi tur ni lo mah ila ka normal lo tih ka hre ve reng, ka pum ri rawk rawk chu ngai pawimawh duh lovin ka maimitchhing ta a.

Thil ri bur bur chuan ka beng a ti ngawng lo chauh, beng hupa muthilh leh tumin ka in let a, ka hminga min ko ri ka hriat chuan peih lo zetin ka meng chhuak a, ka mutna ka hai ṭhelh.

Pindan chhung a thim ruih a, ceiling var sar ka hmu hmasa ber; "Nám, kawngkhar hi lo hawng teh," Sangzuala aw ka hriat chuan ka ṭhu chhuak hlawl.

Ni tak. An khua Lawngtlaiah ka zin tak a lawm le.

Khum thawhsanin kawngkhar hawng turin ka phei a, khua a thim vek tawh, ka nu leh pa eng mah pawh hrilh lovin ka lo muhil daih a nia, zia lo lutuk.

Kawngkhar ka hawn rualin Sangzuala mangang hmel nen kan inhmachhawn ta ran a.

"Nám, i ṭha em, min tih mangan zia hi..." tihpahin room-ah min nawr lutin light a on a, "Ka lo muhil daih a," inthiam lo deuha ka tih chuan, "Zanriah ei turin Mimtei'n a rawn ko che a, a hlawhchham ṭhak," a tih phei chuan ka zak ru chem chem.

Kan thlen lai khan Mimtei kha a awm ve lo a, eng ang hmelpu nge a nih pawh rin dan ka nei thiam lo.

"Ka tihpalh lutuk, ka chau deuh a ni ang, i chhuah hnu khan ka muhil nghal daih," ka ti a.

"I chauh chu thu hran, i thil in vang a nih kha, vawikhat mah in leh tawh suh ang che aw, Tlana pawh ka hau a," lawm lo tih hriat zet hian a inpet ruh a.

"Eng nge i lo hau ve ngawt, a thiam loh a ni hleinem, min tulh lui pawh nihlei lo," tia ka chhân chuan, "Ka sawi kha awih mai rawh, beer leh whisky a pawlh sak che a, i hre lo a nih kha, zu rim i nam tih ka sawi lo em ni, far khat pawh lem ve lo hian zu rim ka hriat loh ring suh," a ti hmuk hmuk a, a thinrim leh ṭan dawn e.

"Beer chauh emaw ka in ka tia, chuvang a nih chiah ka mut a chhuah em em," tiin ka bag ka hai rak rak a, "Zanriah i la ei lo em ni?" Amah pawh en chuang lovin ka zawt a, "Ei lo, mi dang chuan an ei tawh, inbual vat vat la kan ei dawn nia, ka lo nghak ang che," tiin khumah ṭhu thlain ka phone lukham sira ka theh tawp chu a ban a.

"I nu leh pa i be si lo a, an call tlang thei lo bawk che a, min rawn bia alawm," tiin ka nu min rawn call tumna message lo lut ṭeuh chu min en tîr a. Ka inthiam lo viau.

"An ngaihtuah tehreng che nen nang lahin eng hu-ah i ngai si lo a, an khawngaihthlâk ngawt mai, nu leh pa koh tur nei ve ila ka ngaihsak ngawt ang," a ti sup a.

A ṭawng dan mei nei zet chuan min kher zak.

"Kher a che a, ka muhil tih ka sawi reng kha, nakinah ka be ve mai ang, khawiah nge bathroom a awm?" Tiin ka zawt zui zat a.

Bathroom awmna min kawh hmuh hnuah, "Hmanhmawh lo law law mai rawh, kan tlai ta sa sa, Tlana te bulah ka lo zuk awm ang e, fai takin i ha nawt ang che," a la ti zui. Chhe siah.

A room leh ka riahna tur room inkara bathroom zau zet chu nuam haih haih tak a ni. Bathroom zim deuha inbual hi ka tei thei ṭhak nang, ka thaw a ti ipik.

Ka sam sei ang reng tak chu fai sarin ka su a, Lunglei aiin Lawngtlai lum ka ti zawk tlat.

Fai sersawra ka inbual chuan ka thar vâkin ka hria; Tlanhlua khan zu leh beer a lo pawlh tak tak a nih chuan hau ngei ka tum. Ka in hmasak zawk aiin ama min pêk kha a danglam reng a ni, a rilru chhiat thlâk tlat.

Kanpa hlui khan in turin min ti ṭhin a, mut dawnah; mahse, vawi te khat mah ka in lo, fel hluah lo mah ila zu in tumna rilru ka pu ngai miah lo kha ka fel ve na.

Kurta hring ka taksa rem zaiha ṭhui a bân búl miat leh skin tight dum ka ha a, chapal pan thlarh ka bun bawk. Englai mah hian ka inchei hliau hliau ngai lem lo, ka kut tin leh ke tin pawh nail polish hnawih lovin a fai sar a, make-up ka uar viau lo bawk.

Ka hmelṭha hran lo, u Chhandama'n hmelṭha min ti tih loh chu tu fa mah hmelṭha min titu ka nei pawhin ka hre lo.

Ka inchhuan vena ber chu ka vun hi a ni mai, awm âwl tih takah a mâmin a ngo nung sar a, ser hmuh tur ka nei mang lo, kan unau kan tê chhe hran lo a, 5.5'ft ka tling chiah chiah, a thau mi ka nih loh avangin ka lang sâng ve deuh.

Ka inpeih ve meuh chuan zan dar riat a ri tawh a, Sangzuala kha a rilṭâm tawh ngawtin ka ring, hmanhmawh zetin inhnuaiah ka chhuk ve ta a, a dik a dik chuan Sangzuala nen chauhva inchunga awm kha nuam ka ti lo. A unaute mitmei ven a nâ.

Common room ah an lo ṭhu ṭhap a, Kimkima leh Tlana an ṭawng bawrh bawrh a, Sangzuala leh Mimtein phone an khawih thung. Ka thawm an hriat rualin an rawn hawi ṭhap a, nuam lo ve det.

"U Naom, i va chau awm ve, ka rawn ko che a, i muhil a nih ka ring leh sia," tiin, Mimtein min lo be vat a, "Nia, ka motor chuang ka fuh lo deuh a ni ang, ka lo chhing sek a, a zia lo e," ka ti a.

"Ho lutuk, zin ṭhan loh chuan motor chuan a chauh thlâk, chaw ei nghal r'u aw, auMam," tiin Sangzuala a en a, a lo bu nghut ringawt. Chîk zetin min la en kur zui. 

Mimtei chaw ei siampui ka tum chuan a duh teuh lo, "Ka awl rih ang che," tiin a nui var var a, a hmelṭha reuh hle. A lian vak bik lo a, keiin a hniam zawka mah se a khal reuh. A ngoin a fai veng bawk a, biangsum a la nei zui. An unau an chhe hran lo a nih ber hi.

"Amah kha tih tîr rawh inzirna zel a nih kha," nui kur kur chungin Tlanhlua'n a lo ti a, ka zak ṭep.

Ni e, inngaizawng kan ni tih an hre vek a, nu leh pa mitmei ven tur awm lo ta chu kan zalen phian. Chaw kan ei lai chuan kan inbe mang lo a, ngawi rengin kan ei dun mawlh mawlh.

"Naktukah inchhung hi a zualpui kan ti fai nawn leh ang a, nang leh Mimtei in bazar mai dawn nia, kan inruahman fel hma leh kan hahdam hma a ni mai," a ti a. Mipa nelawm tak ni lo mah se tuna a mizia hi chu a thutak leh zual.

"I tih dan dan a ni mai," ti ringawtin ka chhang a, rin aiin ka ei tui phian.

Chaw kan ei khama kan intih fel fai hnuah Sangzuala leh Tlana dawrah an kal a, Kimkima a room ah a tawm thung.

"U Naom, i lokal thei hi ka lawm, he laiah ṭhian ka nei bik vak lo a.." a room-ah kan awm a, hmeichhe pindan tih takah thil neuh neuh a ngah ve hle, engkim a fai hnum hlarh a, a taima tih hrilh hranpa ka ngai lo.

"Ka lokal lo ṭêp a..." ka tih chuan, "I damlo a nih loh chuan i lokal dawn tih auMama'n a sawi alawm," tia nui hakin, "A thinchhe sia i ning ṭhin em?" A ti leh a.

"Dik tak chuan thu min pe reng a, a inti thu lutuk hi ka hne lek lek zel," ka ti ṭha ve mai.

"Hre thiam hrâm hrâm rawh, a dinhmun hi a khirh ve lutuka keimahni vang hian rilru hah reng rengin a awm ṭhin bawk sia a thinchhe zo vek tawh a nih hi, mahse, a rilru a chhe miah lo a nia." A ti a.

"Nia, eng emaw chenah chuan ka hrethiam ve tho, i u hnenah sawi la, i room ah hian ka lo riak ve daih dawn em maw ni," tiin, ka rilru kam rengtu ka sawi chhuak ta nge nge e.

Mak tih hmel zet hian, "Ui ui, ka duh teuh lo, i lokal dawn tih a sawi aṭangin inchung room khi a ruahman sak sa che a, ka sawi buai ngam teuh lo, midang mitmei veng duh suh, kan hre thiam lutuk tlat," a ti leh siam siam a. Nuam lo ka ti tulh tulh.

"I putea te pawh an lokal ve ang a, midang inlêng neuh neuh in nei bawk ang a, min sawi duh lutuk ang," ka tih chuan, "Ho lutuk, kha lamah kha chuan buai a ngai lo, ka sawi fel thei," a ti awlsam êt.

Min hmuh dan hre kilhkelh lo mah ila, a û tan min iai lem lo tih ka hria, bâkah mi â an ni lo a, a û an zah vang hrim hrim pawhin min be chhe bik lo a nih ka ring.

Sangzuala te an lo haw tâk avangin room aṭangin kan chhuak a, "In zin chau awm bawk sia mu hma ang u aw, Bro, kan chhohsan dawn che a nia," tiin Tlana a siai zauh a.

Ka zak tlat.

"Sangzual, Mimtei nen kan riak dun mai ang chu," ka ti sap a.

"Eng vangin?"

"Ih, inchunga kan pahnih chauha awm te chu a..." tia ka chhan chuan, "Mimte, kan chho aw, zingah inpahnihin bazar a ngai dawn a, thawh hma tur," ka thusawi hre lo ang hmiahin a sawi zawh rualin ka bânah a vuan a, "I sawi kawi leh hmain chho teh ang," a ti vut a, ka la tâwi khawmuang hrâm.

"Nám, naupang chhia i nih loh hi..." tiin step-ah min chhoh pui ta a.

Mimtei a lo nui kar kar.

Inchung kan thleng a, min vawnna a thlah veleh, "I ti zahthlâk thei em mai, midang mitmei ven ve tur.." ka ti a.

"Zu in ai chuan a zah thlâk loh zawk," ti nghutin sofa in hunna lamah a phei a, "I sawi peih," ka ti ringawt.

"Ka la sawi dawn chauh, vawikhat mah zu leh a kaih hnawih lam chi eng mah ti tawh suh ang che, nge, hne rak khawpin ka intîr zawk dawn che em maw ni," ti nghutin sofa-ah ṭhuin tukverh bula ka ding chu min rawn melh run a, a thinrim tawh lo emaw tiha bul a ṭan ṭhat leh chu le.

"Ka in lo phawt mai ang, ka lawm e," ka ti vei ngial a.

"Ka hrai rui hrep mai ang che, zû te zawng ka ngah lutuk," tiin a nui suk a, a fiamthu tih ka hria.

"Ka mu dawn," tih leh kal nghal ka rual a, "A teuh lo, chaw kan ei kham chiaha mut pawh ala hun lo, i mut tam tawh em kha," a ṭhutna aṭanga thovin min rawn pan a, "Min ngai ve miah na nge?" Zawi supa tiin ka kâwngah min kuah a, a biang lum thar thara ka hmai rawn nâwkin, "Ka ngai takzet che," a ti leh a.

Ka lungphu rang ta sauh chu thunun tumin thâwk ka la hak a, "Min ngai ve a ni tih tal sawi la," a mit thim raih chuan min enin nichina a lungawi lo hmel kha hmuh tur a awm tawh lo.

"Ngai lo che ila chuan ka lokal lo ang," ka ti a.

"Ka ring..." tia a sawi zawh ruala rawn kun hniamin min rawn fawp dam thlap a, a kut leh lamin ka kâwngah a la kuah reng thung.

Tumah fawp ngai miah lo ang maiin a nia a duhthawh ni. Keipawh ka ni ve tho, chutah min fawhna thlahin min pawm kang nawlh a, a room min panpui ta a, min la zo em em lehnghal.

A taksa rim fai zet chu ka hîp vang vang a, a khum zau zetah chuan min nghatin, "Kan pahnih khum atana ka siam tîr a ni a, i mu lai ka hmu châk..." zuk ti a.

"Ka mu duh teuh lo..." tia thawh chhuah ka tum chuan, "Shh.. i duh thlanna lo chuan engtia tih che mah ka tum lo, ka khum, ka room, kan inah hian kan lo lawm che Nám," thûm chhaka tiin min fawp leh ngat a, tiang em ema infawh han thiam mai chu(h) a nuam veng veng.

A hmui hnâwng chapa min fawh hun hi ka nghâkhlel tih ka pha thei dawn em ni? A tukkhumah vuanin ka lo chhâng let ve zel a, a kut pawh a awm mai mai lo, ka kawr hâk chhanah ka âwmbâwr a rawn khawih a, lo dang turin thâ ka nei lo. Kawr chhan mah ni se a nuam dangdai tho.

"Sangzual...'

"Yes..."

"Duh tâwk la..." tiin ka kawr hâk hlima kut lawnga min tawh chuan a kut ka lo man bet a, "Ka la ui rih," zuk ti mauh a.

Ni e, mipa thisen lum leh fit zek zawk tân chuan hetia kan awm reng zawngin insûm a harsat tulh tulh ang.

'Ka hmangaih' em ka hre lo. Mahse, ka duh tih hi ka pawm thlap tawh.

B®®
B+>[BeckirafARenthleI]<+®®