10.NAOM [Mizo Love story] -B®®

10.NAOM [Mizo Love Story]

Ziaktu: Becky Rafa Renthlei
B®®
Shadow of the life

Lalchhuankima thu sawi haiderin ka vuan tlat ang nge, a thu sawi zawmin ka kalsan ang. Huis, rilru put dan tur pawh ka hrethiam lo.

Nau te lo pai ta ila, ni lo, ka pâi chu ka ring chiah lo deuh, kan inneih chhung zawng pawhin ka pai si lova tun vawihnih lekah kha chuan ka pai ka ring lo ve ringawt.

Maimitchhing chunga mu Sangzuala hmel chu ka en vang vang a, midang tan hi chuan ka phal lo a ni.

B®® 050721

Tui taka ka mu lai chu eng emaw hian min tiharh a, room chhung a thim deuh ruih a, veranda light bâk êng hmuh tur a awm lo. Sangzuala khumah ka mu tak alawm maw le, a mutna lam hawi turin ka in let a, a lo mu miah lo! Hlauthawng zetin ka ṭhu chhuak hlawl a, he inah hian kan pahnih chiahin kan awm.

Khawiah teh hrep nge maw a kal ni. Hlauthawng ru deuha ka hawi hrek hrek lai chuan inhnuai lamah ṭawng thawm niawm tak ka hria a, tun angah tu nge lo kal ang? Hman zana thil thleng te kha ka ngaihtuah kái a, hlau ru deuh chungin ka tho chhuak ta a, light on ngam lovin phone flash-light ka on ta zawk a.

Dimtein ka tho chhuak a, inhnuai pan thlâkna step bula ka din laiin hmeichhe âw ka hre ta a.

"Sangzual, ka hmangaih che tih vawi engzat nge ka sawi dawn, a hmaa kan awm ang khan awm leh ang, mawh, khawngaih takin," Lawmkimi âw a ni.

Tunah zan dar 11 a ri tawh a, chaw ei kham hnu lawk khan inchungah kan chho ta kha a ni a, ka lo muhil nghal a ni ngei ang, ka muthilh hlanin engtia rei nge an awm tawh ang?

"Ka thlah ang che, a tlai tawh.." Sangzuala'n a tih chuan, "I lo haw hun ka nghâkhlel ve em em a, eng ati nge hetia i awm tâk?" Ṭap lek leka Lawmi'n a tih leh chuan ngaihthlâk zui zel pawh ka duh tawh lo; vawiin ni-a ka thil tawn hi a lutuk lam hret a ni e.

Sangzuala room-ah bawk ka lut leh ta a, zanin hi a kianga ka awm tâwpna ber tur pawh a ni mai thei asin. Lawmi nen an chungchang ka zawh khan 'Ani aiin ka duh zawk che' tiin min chhâng a nih kha. A hmain an lo inkawp tawh tih hrilh hranpa ngai lovin ka hrethiam chiah.

Kimkima pawh khan engkim a hriatpui vek ka ring bawk a, tun ang zana a lo kal danah thil hresa lovin a lokal mâwl tawp lovang, Sangzuala nen chiah kan awm tih hretu chu he in chhungkhura cheng te leh a putea te nupa an ni mai a. Hrilhtu awm lovin Lawmkimi khan a hre nguar ang.

A hmaa ka mut dan ang chiahin ngawi rengin ka mu a, mahni inkhawngaihnain ka khat; tumah dem tur pawh an awm lo a, mi ka ring hma thei lutuk hi ka tihsual liau liau a ni; amah Sangzuala zawt fiah pawh ni ila min chhâng ṭha leh duh chuangin ka ring lo a, tihian ka haw thla ang a, ka be zui tawh miah lo ang. Tiin rilru ka siam ta a.

Ka mut aṭanga rei fê hnuah a rawn lut ve chauh a, ka la meng kar, a lo mut lai pawhin ka che eih lo, thâwk pawh thaw ṭha ngam lo hian ka awm a, ka kâwnga a rawn kuah pawhin ka la che ngam ta chuang lo.

"Nám, i harh tih ka hria a nia," a ti a.

Ka ngawih reng avangin, "Lawmi kha ka koh a ni lo aw, i duh phawt chuan min zâwt fiah thei ang," tiin a lamah min kuah hnai a, rang zetin ka ṭhu chhuak hlawl.

"I ko emaw, ko lo pawh ni la, ka tan awmzia a awm lo," ti hmakin light ka on a.

"Awmze awm turin kan sawi dawn alawm, min rinna chhete tal nei ve la.." tiin khum lu lamah a tawlh chho a.

"Ka rin leh rin loh lam che a ni lo, chhung lamah kawngkhar i kalh a, inchungah kan mu a, eng tin nge inhnuaiah inpahnihin in lo awm dun theih, magic a thiam em ni?" Tiin Ka nui lui hak a.

"Naom..." a ti hluk.

"Eng nge? Ka bulah i mu a, in inah lokal ta pawh nise kawngkhar hawnsak kher a ngai em ni, eng tin nge a lokal tih pawh i hriat zawk, a chhânna chu hotê a nia, phone hmangin in inbe ṭhin tihna," ka lo ti ve zel a.

"Amah chuan min rawn call lo, Kimkima zawkin pawnah a awm tih min hrilh a, thil pawimawh a nih tâkah tiin ka hawnsak alawm," thinrim miah lova tiin a phone ka lamah a rawn theh phei a, "I duh phawt chuan en vek rawh, Nám, naktukah i haw dawn a, inhau ka duh lo," a ti dam thluam.

"Sangzual, ka hmangaih che tih vawi engzat nge ka sawi dawn, a hmaa kan awm ang khan awm leh ang, mawh, khawngaih takin," nichina Lawmi ṭawng dan ang chiah khan ka ṭawng a, ka ner nâng bawk.

"Lalmuanpui, ngawi rawh..." a ti sup a, "Ka hre vek a sawi kha, a hma chuan eng tin nge in lo awm, ka laka i awm ang tho hian vawi hnih in mudun ve em ni, uak..." tiin hmui ka hup a.

"I sual reuh dan hi aw, engtin nge maw ka tih dawn che le,"

"Eng tin mah, ka bulah i mu khât tawh dawn si a, i mut hnuhnun ber tur pawh a ni mai thei," ka sawi zawh rualin ka kawr hnungah a rawn pawt a, "Eng maw i sawi kha? Zanin thil thleng vanga min ṭhen tumna rilru i pu a nih chuan theihnghilh hmiah rawh, theihnghilh vang vang ang che," ti nawn lehin hnung lam aṭang hian min rawn kuah a, tâl chhuah tuma ka chet chuan, "Han che leh vaih teh, i ngam phawt chuan," a ti ta a.

Ka che ngam tawh teuh lo. Ka ngawi kar.

"Ngaihzawng pahnih ka mamawh lo, nupui leh lek phei chu pakhat bâk neih tumna ka nei lo a, hetia inhnialna tur leh thil ho tê têa thinrimna tur i zawn fo dawn chuan palâi ka rawn tir ang," a ti hmiah.

"I ngam leh rawn tir la, a neitu tur berin ka hnial tlat chuan min tîr lui hauh lo ang, min nawr lui ta a nih leh ka tlan bo daih ang," tia ka chhân chuan za zetin a nui a, "Lalmuanpui, nawi lutuk teh suh, khawiah mah khan i tlan bo lo ang e," a ti a.

"Lawmi kha nei rawh, hlawh te a nei a, in ṭangkai pui zawk ang, nuthlawi ni lo mo atan i nauin a duh kha," tia ka sawi zawh rualin ka darah nghet zet hian a hmer a, "Tuna i sawi zawh chiah kha sawi nawn leh rawh, tuin nge nuthlawi mo atan kan duh lo ti, sawi rawh..." tia min vawnna thlahin khum aṭangin a chhuk a,  a thinrim hmel hle.

"Sawi kher ka tum lo, hetiang neuh neuh hi ka peih miah lo a nia, ka lo zin ta hi ka inchhir ta khawp mai, ka sawi lovang ka ti zet naa kan sawi chhuak ta sa sa, zanin aṭangin kan inkâr hi tawp rawh se, ralkhat aṭanga inṭhen ai chuan hmaichhana sawi hi a ṭha zawk," ka ti ve hmak.

Ngawi rengin min melh ngawt ngawt a, chutah thinrim meng dur khup chung hian, "I lakah ka dawh thei viau, kan inkâr ṭhatna turin theihtawp ka chhuah bawk, mi thu sawi leh miin an ti tih mai maia buai rual kan ni em ni? Ka duh chu ka duh a ni mai, nge, nang hian min duhna tak tak nei lovin min ti kual mai mai zawk, Naom, hre rawh, i duh ang angin min chawk kual dawn miah lo a nia," zuk ti zêk a.

"Inṭhen ang," ka ti sap a.

"Aih, a teuh lo. Kan thutiam bawh chhiain a kua kha ka hnawhphui leh zawk dawn em ni, min nawr lui suh," tiin a nui lui hawk a, ka ngei lutuk.

Eng emaw hleka kan mutdun kha min hriat nawn tir zel tum niawm tak hian a ṭawng a, ka huat zawng tak a ni.

"I ṭawng peih, inṭhen hi kan pahnih tân a ṭha zawk, Lawmi khan a hmangaih êm che kha, ani angin ka hmangaih tâwk lo che pawh a ni mahna," inhnît hraih chungin ka ti a.

"Mu rawh, muthilh tum ang che, naktukah i haw dawn miah lo a nia, ti hian ka ru nghal che a ni mai, zingah i nu leh pa ka hrilh ang," a ti hmuk.

"Sangzual, mâwl miah suh.." tiin kawngkhar pana a kal chu ka um zui a, "Nia, ka mâwl, ka la â tel bawk ang," tiin kawngkhar a rawn nam khar bur a, ka phu zawk. 

"Liansangzual..." tia vawi hnih vawi thum ka koh pawhin min chhâng lo hrim hrim, Pawn lamah min la kalh hnan zui. He pa luhlul zia leh tih mawh dan em em hi chu(h)

Kei pawh hi ka kâ a kaw leh lutuk a, eng vanga inṭhen kha sawi thawt thawt nge maw ka nih le. Mawl thlak lutuk mai.

Muhil thei lovin ka let kual sek a, Sangzuala a reh vang vang a, a number hmet chhuakin ka call a, switch off a inti hmak.

In hnuaiah a chhuk nge ka room-ah a riak zawk pawh ka hre lo. Ni e, kei chu mi fel ṭha famkim ka ni lo a, Lawngtlai ka zin aṭang hian thlarau sualin min bei zeuh zeuh lehnghal vei nen tunah pawh Sangzuala vangin eng emaw sual tih duhnain min kher leh nget nget tawh.

Dingngheta nen kan inneih lai khan runluih duhna leh kawhmawh bawl zawnga awm kha ka ti ngai miah lo a, he sipai luhlul pa lakah hi chuan a dang zak. Min hau pawhin ngawi ta mai lo hian ka chhâng ve zel bawk si a, keimah pawh ka inthunun zo ta lo a nih ber hi.

Muhil thei hek lo, ka tho chhuak leh ta nge nge a, Sangzuala room leh ka room luah indaidanna cement bang bulah beng ka va dawh dá a, hma ka sawn teh chiam lo, a reh ṭhiap.

A lukham hnuai ka en a, eng mah a awm lo, keima lukham hnuai zawk ka keu leh a, ka duh tak ka hmu ta. Dim tawkin a wardrobe kalhna ka hawng a, hetiang em em hian thawm ka dim thiam tih pawh ka hriat si loh. Chutah a hnuai bera drawer chu ka hawng leh ta a, huis! Khi var var chungin a chhunga beer leh whisky awm chu ka la chhuak ta a.

'Fatuho ka pe vek' a tia mi kha, fatu ni mah suh ila ka in dawn chiang khawp mai. Dâwt min hrilh âiah; amahin a in ngai lo tih chu ka hre tawh a, tu tana a dah nge tih hre lo mahila ka in tho tho ang.

Pawnlamah min kalh hnan tih hre tho mah ila, chhunglam aṭangin ka'n kalh leh ngeiah, room chhung ka melh kual a, dawhkan bula tui bottle leh no pakhat awm chuan ka mit a la chat a, tui erawh a tam lo hle.

Whisky ûm khat leh beer can khat ka la chhuak a, tui pawh pawlh duh lovin whisky zawk chu no-ah tlemte ka thli chhuak a, beer ka pawlh bawk a, hnar hup chungin ka thâwkkhat hmiah. A thlum deuh sukin ka hria.

Chumi hnu chuan no khat dang ka in leh a, ka lâkna ngaiah chiah whisky ûm chu dah lêt lehin beer erawh ka in zo ta vek a, ka lû a hai nghal chhalh, drawer ka kalh leh thlap a, chahbi pawh a ngaiah ka dah leh bawk. A duh leh min hau se duh leh min ṭhen se pawitihna engmah ka nei miah lo.

Ka nunah mipa hian hmun chang tawh suh se, ka nun an ti chêp vek. Ka nu thu sawi, u Chhanhima te nupa chungchang te kha ka ngaihtuah a, kan hnenah pawh awm se ka in a ni ve tho a, tiin ka ngaihtuah kual a; rûi mahila ka thluakin thil a ngaihtuah kual thei fû.

Khumah zangthalin ka mu diai a, zinglam dar thumah zu ka rui a nia, Naom Lalmuanpuii zu in ngai miah lo leh zu in mi ngaisang lo tu kha a bo tawh, a thi tawh a ni ang, tuna mi hi chu mihrang ang hlauh ka ni.

Chutia ka lo mut der der lai chuan Sangzuala aw ka hre thut a, "Naom, kawngkhar lo hawng teh..." tih pahin a rawn sáwi a, 'Lalpa leh' eng tin nge ka tih dawn?

"Lalmuanpui, Naom..." a vín hler hlur siah, ka hawng lo ngam teuh lo.

Khum aṭanga tho chhuakin ka va hawng ta nge nge a, "Eng nge i lo kalh kher a?" Tiin a rawn lut a, kei ka tlan chhuak thung. Rui chhe lutuk ka ni lo nain ka normal chai lo.

Chutia ka tlan chhuak thut chu a hamhaih deuh nge min um zui miah lo a, ka room-ah lutin nimina ka bag-ah kha ka zen rawk rawk a, shikhar pack thar hawngin ka hmuam nghal vek a, hmui hupin ka khuh khak khak.

"I châk dawn lo khawp mai," tia Sangzuala rawn lut chu hmui hup chungin ka en a, a thinrim hmel ngang mai.

"Nun dan pangngaia i nun theihna tur a nih phawt chuan engtia chêt lâk pawh ka pawisa lo a nia," tiin min rawn hnaih zela kei ka tawlh hnung zel thung.

Room a zau vak si lo a, khumin min lo dang ta a, ka ṭhu thla nghal hnawk. Ka darah vuanin, "Zu in i châk bawk a, ka phalna thlapin i in dawn nia," ti supin min pawt tho lawp a, "Tunah tak hi chuan mi hur rim dik tak i nam leh zual, i kâ a mi kha chhâk rawh," a sawi zawh rualin dustbin a rawn dah hnai a, ka ngawi reng.

"Vawi thum ka chhiar hmaa i chhâk loh chuan,"

Kun hniamin ka chhâk ta vek a, engmah ka sawi lo, "I mizia a lo mak ta hle mai, hnè rak khawpin zû chu i in dawn nia," a sawi zo chiah, ka bânah vuanin a room lamah min pheipui a, ka duh lo tâl vel chu ngaithei lo tih hriat tak hian, "Min hnial suh, eng mah sawi suh," a ti nghut.

A khumah min ṭhut tîrin nichina ka in bâng kha a va la chhuak a, no-ah thliin tui a pawlh nghal vek a, "In rawh, i duh zât zât in ang che," tiin ka kut leh no a hmeh bel a, "Sangzual..." ka ti lawi rât.

"Ṭawng lo khan in rawh, nge, keiman ka in tir dawn che mi?" A thinrim takzet tih a hmai sen awp awp aṭang chuan ka hre thei. Ka harh kâwkin ka hria, ka pum a no nghulh bawk a, rum taka min melh chung hian, "In ta che, Lalmuanpui.." a ti leh a.

Nia, ka in ang, ka in leh ang. Hnar hup chung bawkin ka in zo nghal vek. Ka pum a let but but bawk.

Thinrim inseh ruh ṭeuh chung hian, "Râpthlâk lutuk... " tiin dawhkana whisky ûm chu chhuatah a vawm keh vek a, a baw nuaih a, ka lo râk ṭhat.

"I hmel hmuh pawh hi ka peih rih lo, mu rawh.." a sawi zawh rualin a chhuak nghal daih.

Ka khaw hmuh a fiah lo a, khumah ka let thla tawp.

#

Ka harh leh chuan ka lû a na ut ut a, ka luak lah chu a'n chhuak mai mai khawp a. Ṭhut chhuah tumin ka inbengkang a, ka lu a hai chhulh; nizana ka awm dan kha, room chhung ka melh kual a, a lo fai vek tawh, zu rim hriat tur pawh a awm lo a, keimah hian zu ṭhing rim ka nam tih mai lo chu.

Sana ka en a, zinglam dar 10 a ri tawh. Ehe! Zinga haw tur ka ni asin le.

Tho chhuak tur pawhin thâ ka nei hlawl lo, ka chau ngawih ngawih a ni mai. Room kawngkhar a rawn inhawng a, Mimtei a rawn lut ta a.

"U Naom, i zia deuh em?" Tiin khumah a rawn ṭhu a, ner sak chung hian, "I rim chu leh.." a ti a. Ka inthiam lo ve det.

"Inhau tawh suh u, a hrehawm em mai, kan boruak hrehawm laia nangni pahnih in intih thiam loh phei chuan awm ngaihna ka hre lo," tiin a thaw hak a. Hrehawm ka ti ru lutuk.

"Ka haw duh a, min pui rawh.." ka ti sap a.

Mak tih hmel taka min en chung hian, "Naa, auMama'n i haw tawh dawn lo tih a sawi, u Kimkima a zia tho bawk a, u Tlana pa te in inah palai turin naktuk zanah an kal dawn?" A ti ta a.

"Eng a?" Tiin ka ṭhu chhuak nghal.

"Dan khatna in tlin tawh chuang lo a, nghah leh tur a awm lo, a tia," a la ti tak deuh deuh.

Liansangzuala mai mai chu..

"Khawiah nge i û?" Ka ti a.

"Damdawi inah, Kimkima a chhuak thei tawha a hruai chhuak dawn, kei pawh ka kal ṭep," a ti leh mai a.

"En teh, Mimte, ka haw ngei ngei a ngai.." ka tih chuan, "U Naom, Mama thu hnial ka duh lo," tiin a kal sawn ta a.

Ka thin ava han rim tak.

Ka lu na leh luak chhuak pawh hre chang tawh lovin bathroom-ah ka lut a, hmanhmawh zetin ka inbual puat puat a, Sangzuala ka biak ngei ngei a ngai.

Inhnuaia ka chhukin tumah an awm lo a, eng mah ei châkna ka neih loh avangin tui vawt ka in khawlh khawlh a, ka pum a buai nuai nuai; engtin nge ka haw ang? Ka nu ka phone ta a, "Phone i nei ve reng a, nangmah khan min rawn be ta mai che, Sangzuala zawk zelin min rawn bia a, chanchin sawi nachâng hre bawk si lo," tiin min rawn ânkhum nghal a, kan chungchang leh palai tih vel a sawi loh danah Sangzuala'n eng mah a sawi lang lo a ni ngei ang.

"Ka nuamsam lo deuh a, ka tho chiah," ka ti a.

"Naktukah chuan lo chhuk tum tawh la a ṭha ang, anni lam pawh ngaihtuahawm an nih loh kha," a ti leh a, ka thaw huai.

"Motor a awm chuan chawhnu lamah pawh ka lo haw thut mai thei," ka tih chuan, "Nia, châm reng kha thil mawi a ni lo a, lo haw a ṭha," dam deuh zawka tiin kan inbiakna a ti tawp a.

Sangzuala ka phone a, vawithum ka call pawhin a pick duh ṭhak lo.

Palai chungchang kha chu min sawi ṭhaihna vel mai mai a nih ka ring. Kimkima a lo chhuah dawn phei chuan an lo haw hma ngeia chhuah ka tum bur a, taxi hman ngai mah se ka hmang mai ang.

Ka zin bag nen Sangzuala te veranda-ah ka ding a, kawngkhar pawn lamah Tala in ka kalh a, an ṭhenawm te inah chahbi dah tura ka va kal chuan, an fanu keimah ang rual vel fa pahnih nei tawh hi a lo awm a.

Damdawi ina an kal vek thu leh an lo haw hunah chahbi an lo lam tur thu ka hrilh a.

"Khawiah nge i kal dawn?" Tia min zawh chuan, ka haw dawn thu leh Sumo counter-ah ka kal dawn tih ka hrilh ve mai. Auto driver hmel hriat a neih leh neih loh ka zâwt a, a lo nei mial. Min chahsak ta a.

Auto a lo thleng a, counter panin kan tlan chhuak ta a, ka vawikhat kalna mah nise ka zâm bik teuh lo. An ṭhenawm ami nichina ka biak kha Rinpuii a ni a, a polite viau bawk.

Counter kan thlenin dâr sawmpahnih a ri ṭep tawh a, ka vanneihna a kal tluang hlauh, 12 chhuakah seat khat a la awl a, a hnung ber tlar a ni nain ticket ka cut ta tho. Ṭhulh leh ka tum lo a ni tawp.

Damdawi in aṭanga an chhuah pawhin bill pêk chhung nen chuti maiin an haw hma lo tawp ang. Ka haw tih an hriat chhuah hmaa kan tlân chhuak hman tur hi ka lawm vawng vawng.

Sangzuala'n min rawn phone lêt miah lo a, ka missed call a hmu ngei awm si a, a sual chukchu bawk a, a duh dan ang diak diakin ka awm dawn teuh lo. Inneihna hi palzût mai mai chi a ni hek lo; Lawngtlai kan pelh hnuah whatsapp aṭangin chahbi ka dahna Mimtei ka hrilh a, ka haw tih ka sawi tel bawk a, ka nu phone lehin ka haw thu ka hrilh a, phone ka switch off hmak.

Ka hmel hmu peih lo tu chuan min hmu lo tawp rawh se, nizana ka awm dan kha a mawi lo tih chu ka hria, a zu dah ṭhat ka in ru a, a duh loh dan hlirin ka awm bawk a; a nau nena kan inbiakna leh min tih dan te, Lawmkimi chungchâng thlengin ka ngaihtuah kâi a, Sangzuala tan ka ṭha tawk lo tih ka pawm thlap.

Ka kianga ṭhu te be lovin ka maimitchhing daih a, zunram thiar tur pawhin ka chhuk lo. Ka pum a na raih raih a, ka zu in vang tih ka hria; engmah ka ei bawk si lo nen ka damlo dawna hriatna ka nei.

"Chhuankima vittu kha a patea an tia Sangzuala hian report a tum lo em maw ni?" Tia ka hma ami a ṭawng chuan ka ngawi kar a, an mikhual ka ni tih an hre lo tih ka hre mai.

"Sangzuala te zawng, a pa a chhuna a rilru a tluang purh, thihna êm a thleng lo bawka a ngaidam dawn a ni ang," tiin pakhat hian a lo chhang a, Sangzuala tum ruh zia leh rilru neih zia te an sawi kâi a, "Chhuankima hi chuan a patea a chhun deuh a, a mizia a dang ber, an nula pawh a fel," tiin an sawi zel a, ka ngawi reng.

A nawlpui hmuh danah pawh Chhuankima zia chu a lo dang deuh a ni mahna. A tîra kan inhmuh phat khan fel hmel ka ti a, mahse, Dingngheta chungchang a û a han hrilh thawt thawt danah khan tlemin ka rilru a dang hret. Tunah a rilru put hmang dik tak a tilang chiang bawk a, chuvangin Sangzuala kalsan hi a ṭha berin ka hria.

Amah ka duh ta lo tihna ni lovin ka duhna hi ka thunun a ngai zawk tihna a ni.

Tluang takin Lunglei kan thleng a, hmuaktu nei lovin kan inah ka lût mawl tawp.

Ka nuin min hmuh veleh, "Biak tlang theih hian awm ve la, rilru i ti hah ṭhin em mai, Sangzuala nise a mangang em em a," a lo ti nghal a. Ka pa erawh chuan dam thlap hian "I chau em?" A ti thung.

"Ka phone battery a low alawm," tia ka nu chhângin ka pa bulah ka ṭhu a, "Ka chau deuh, ka luak a chhuak hlui mai," ka ti leh a.

"Sangzuala i lo thlen thu hrilh ang che," ka nuin a la ti ṭâlh.

'Palâi de de dei dei' te an ti vela engmah chutiang a awm tawp si lo a, chhekeh lutuk.

Ka nuin Sangzuala phone turin min ti mah se biak tumna ka nei lo.

Zanriah ei laiin lungphun chungchang leh Kimkima chanchin min zawt a, tâwi fel zetin ka chhâng. U Chhanhima te chungchang an sawi leh a, mumal pawhin ka ngaithla lo, ka taksa a nuam lo ngawih ngawih a, mut vang vang ka duh ber.

Ka nu hian pasal nei leh turin min duh tih ka hria a, Dingngheta lokal chungchang pawh a sawi lang tho tak nain ani kha chu mâkpa atan a ît nawn tawh vak lo a ni ang, a fak khuchûk lo.

Ka intifai thuak thuak a, ka mu hmak, eng mmah ngaihtuah lova muthilh ka châk ngawih ngawih a, Lawngtlai ka kal dawna ka phur tehreng nen ka haw leh meuh chuan rilru natna bâk ka hawpui lo a nih ber hi. Kei mi mâwl hian.

Sangzuala duh loh zawng tih luih chu a zawngchhang thlâk fahran lo, ani ang mipa hi ka la tawng lo a, ka tawng leh pawhin ka ring tawh lo. Nizana a thinrim hmel kha rui mahila hlau tak ka ni, mi zu rûi te chu an pâwngpawrh ṭhin a nia, kei ve ka zûm dûk a, 'Ṭîk' pawh ka ti ngam lo.

A zu min pêk ka'n in lui leh sak kha chu, 'Ṭêkhmuama' dik tak ka hmu nawn lehin ka hria; rui lo hai lovin hmachhawn ta ila min bêng duh mai thei a ni. Tunah pawh hian thinrim insawh ṭeuhva a awm ka ring.

Ka muhil ṭêp tihah ka nu a lo lut a, "Sangzuala'n a be duh che," a rawn ti a, "A muhil ti rawh, ka be dawn lo," ka lo ti.

"Bawihi, a khirh zawng hian awm lo hrâm teh, be ve phawt rawh.." ani leh ni lo angin a ṭawng dam thlap a, eng chu hria ni maw!

"Nu, khawngaih takin ka thu sawi hi min zawmsak hram rawh, Sangzuala nen inbiak ka duh lo," ka ti ve tlat a, "Aniin ka be ngei ngei duh, a nih loh chuan naktuk zingah bike in ka lokal ang a tia, â.. inbuaithlak," tiin ka khumah a ṭhu a.

"Kan boruak a ṭha vak lo a," tiin a nau Kimkima min tih dan kha ka sawi chhuak ta a, ka nu hrilh kher hi ṭûl ka ti lo. Mahse, 'Sangzuala Sangzuala' a tih reng avangin engkim hrilh mai ṭhain ka hre ta zâwk a ni.

"A neitu turin a duh che chuan a tâwk reng alawm, Kimkima te chu a nau a nia, a û vanga tun dinhmun thleng thei a ni a, i luhlul chhuahin hneh tum zawk ta che, Sangzuala'n a nghah chhung che rei zia kha chhut la, hun siamsak rawh, Kimkima vang mai maia Sangzuala rilru tihnatte chu thil ṭha pawh a ni lo, sawi dun ngei ngei ang che u," a la ti zui.

Atu amah hian min hrethiam ve lo a nih hi. Ka nu lah hian a ṭan hlur mai si a.

"Sawipui ka tum lo, a naute a duatzia ka hmuin ka hriaa keimah vanga inrem lova an awm ka duh lo, ti hian tawp rawh se, u Chhanhima te an lo awm huna a hrehawm viau chuan ka indang mai ang, naktuk aṭangin thawh tur ka zawng dawn nia," ka ti ta a.

"Bawihi, ngun takin ngaihtuah rawh, ani aia hmangaihtu che hi i hmu lo ang ka tih kha, i nu ka ni a, i tana ṭha lo turah ka tih luih tîr ngai lo che, ka thu sawi dik zia eng tik ni-ah emaw chuan i la hre chhuak ang, a tlai hma hian bia la, engkim sawi dun rawh u," tiin min rawn kuah a, ka ṭah a chhuak.

"U Chhanhima hian a nupui hi ṭhen daih rawh se, fâ pawh an nei chuang lo a, kei pawhin pasal ka neih kher a ngai lo ang," ṭap lek lekin ka ti ta ringawt a.

"Naupangchhia i ni tawh lo, i û te pahnih hi chu ngaihtuah ngai an ni lo a, zankhat mitchhin tawk ila ngaihtuahawm ber tur i ni tih ka sawi tawh kha, ka thu zawm la i nihlawh ang, nu leh pa thuawih hi damreina leh malsawm dawnna a ni tih theihnghilh ngai suh ang che," a sawi zawh rualin a phone a rawn ri leh a, nichin khan a off ringawt a ni ang.

"Aw, muhil lo e, inbe rawh u.." tiin hnial theih miah loh hian phone min pe a. Ka khumah a ṭhut tlat avangin ka be ta nge nge a.

"Hello..."

"Naom..." a ti sup a.

"Umn, eng nge?"

"A rûka haw ngai khawpin min hua tihna em ni?" A ti ta a.

"Ka haw tum hun kha a nia, zing sumo ka nang si lova chawhnu chhuakah ka kal ta a nih kha, phone i pick thei si lo alawm," ka ti ve tlat.

"Inṭhen ka duh lo a nia, inhau pawh ka duh chuang lo, naktuk zanah palâi an lokal ang," a ti nghet charh.

"I â siah..." ka ti hluai a.

"Nia, nang ka neih theihna tur a nih chuan ka ât belh leh ang, sipai hi chu kan â zauh zauh ṭhin," tiin a nui hawk a, "I phone kha on la, tah zawk khan ka lo call ang," tiin a off daih.

Ka thinrima biak ka tum loh nen a âw ka hriat leh tâkah chuan ka ngai ngawih ngawih. Nizanah tiang khan min chhuahsan mah se ka ngai tho.

Ka nuin zawhna mitmenga min en chuan ka phone-ah a lo call dawn tih ka sawi a, thaw huai chung hian, 'A nau chungchanga i rilru dik tak leh i ngaihdan hrilh tlang vek rawh,' tiin min chhuahsan ta a.

Engtin nge ka sawi ang? A harsa ve êm a ni.

Tun aṭanga thla hnih hnuah Lucknow panin a kal dawn a, tunah palâi rawn tirh a tum bawk si. Eng mah ka hrethiam tawh lo e a, a hmaa a sawi dan kha chuan a lo lêt leh hun nghâk tur khan min ti a, tunah a sawhsawn leh daih bawk si.

Liansangzuala vang hian thâwk lâkna hun pawh ka nei dawn lo. Eng ang pawhin hnial mah ila ṭan chhan tur eng eng emaw hi a nei zel bawk si a, sex kan lo hmang ve kha a hre kur bawk, ka tangkhang vek tawh.

Engkimah min thuhnuai fai vek a tum a, amah control-tu tur nu leh pa an awm si lo a, a thu ber bawk si. Hahthlâk, Kimkima dah ṭhaa ka neih nge nge a ngai dawn a ni e.

Pasal tlâk a ni teh meuh mai; mahse....

B®®
B+>[BeckirafARenthleI]<+®®