11.NAOM [Mizo love story] -B®®

11.NAOM [Mizo Love Story]

Ziaktu: Becky Rafa Renthlei

B®®

Shadow of the life

Tun aṭanga thla hnih hnuah Lucknow panin a kal dawn a, tunah palâi rawn tirh a tum bawk si. Eng mah ka hrethiam tawh lo e a, a hmaa a sawi dan kha chuan a lo lêt leh hun nghâk tur khan min ti a, tunah a sawhsawn leh daih bawk si. 

Liansangzuala vang hian thâwk lâkna hun pawh ka nei dawn lo. Eng ang pawhin hnial mah ila ṭan chhan tur eng eng emaw hi a nei zel bawk si a, sex kan lo hmang ve kha a hre kur bawk, ka tangkhang vek tawh. 

Eng kimah min thuhnuai fai vek a tum a, amah control-tu tur nu leh pa an awm si lo a, a thu ber bawk si. Hahthlâk, Kimkima dah ṭhaa ka neih nge nge a ngai dawn a ni e.

Pasal tlâk a ni teh meuh mai; mahse....

B®® 060721

Phone ka on rualin message a lo lût ṭuk ṭuk a, Sangzuala'n min rawn call zui nghal bawk.

"Nám, sawi dun tur kan nei a nia, off ringawt tawh suh," a engah mah hmain a'n ti nghal a. 

"Sawi tur kan neih awm pawh ka lo hre hleinem, nizanah min hmu peih lo tih i sawi tawh kha, i hmuh peih loh tur nupuia neih tum tlat te chu a," ka lo ti hlak a, "Thinrimna tur rawn zawng rih lo la, nizan chungchang kha chu kan dah ṭha phawt ang," thinrim miah lo hian a ti dam thlup.

"Sangzual, i ngaihtuah chiang lo a nih kha, min duhin min hmangaih pawh a ni thei, inneih hi tih vut vut chi a ni lo a, i naute pahnih râwn ve phawt la, keiin ka chhung te ka lo sawipui ve ang," tia ka chhán chuan, "Ka naute pahnih chu vengthawng duh suh, an remti lutuk ang," awlsam takin a ti puat a.

Tun hi a nau chungchâng sawina hun remchang tak a ni.

"Mimtei kha chuan a hnial lo ang che, Kimkima zâwk tak kha a nia, sawi dun phawt rawh u," tiin damdawi ina an inbiakna ka hriat thu leh Kimkima nena kan sawi dun kha a tlângpui ka hrilh thuak thuak a. 

"I nau duat khan mo atan min ît vak lo a ni mahna, ka vûi lo a, sawi theih ka nei hek lo. Nizana Lawmkimi rawn tîrtu pawh i nau tho a ni tih ka hria, chhungkaw pawmpuina lova nupui pasala inneih hi thil tih chi a ni lo," ka ti ta a.

Min chhâng lawk lo hian a ngawi vang vang a, chutah, "Khatiang vel vang kha a ni maw a rûka i haw daih," a ti sup a.

"Duh lohna hmuna awm reng turah min ngai em ni? Damdawi in aṭangin a lo chhuak dawn a, a hmêl ka hmu peih lo te pawh a ni mahna," ka ti ve ngat.

"Naom..." a ti hlur a, phone aṭangte chuan ka hlau teuh lo, "Eng nge, ani pawhin min hmu peih bik lo ang, 'I lo kal chhan ber lungphun a zo tawh a, châm chhan tur i nei lo' min tia lawm; Sangzual, Lawmkimi vang te, i nau vang te hian kan inneih a rem lo," tiin ka sawi tlang pawp.

Thaw hawk chung hian, "Ka nau chu ka lo bia ang, muttui le," tiin ka chhânna pawh nghak tawh lovin a hmet tawp daih a.

Kei pawh ka thaw huai. 

Kimkima a zâwt ngei ang a, engtin tak lo chhâng ang maw. Dingngheta a hmer tel leh hrâmin a nia ka rin; Sangzuala'n inneih a hmanhmawh thut nachhan hi ka hrethiam lo a, tunhmaa kan inkawmngeihna kha chu thuhranah dah ta ila, hetia kan inhmuh leh tâk hnu leh inngaizawng anga kan awmna hi a kâr a la rei lo. Chu ti vut vuta inneih tum ngawt pawh thil tih chi ninghal lo chuan.

Muhil thei lovin ka let kual sek a, facebook-ah bawk ka lut leh ta a, Sangzuala wall ka check satliaha a khawih khât tih a hriat reng mai, engthil danglam mah hmuh tur a awm lo, chu tia ka thâi kual vel mai mai lai chuan, Sangzuala bawkin min rawn call leh ta a. A tlai tawh ang reng si a, mak ka ti deuh!

"Naom, phone-a sawi sen a ni lo, tunah ka rawn chhuk dawn a nia, i nu leh pa pawh lo hrilh ang che," a rawn ti chhak mai. Zinglam dâr hnih a ri tawha a âtthlâk lutuk.

"Awih awm loh e, lo kal kher pawh a ngai lo, ka haw ve chauh a, mi mitmei vênna châng te hre ve rawh, lo kal miah suh," tiin ka lo hnial a.

"Mi mitmei zawng zawng ka vêng dawn a nih chuan mit nei hlir alawm awm le, nge, mit nei lo hmel hriat i nei zâwk?" Tiin a nui kur kur a. 

"I ho, thil ṭul lo deuh deuh hi rawn sawi suh," ka ti nghat a. 

"Tu mitmei mah veng lovin ka rawn kal ang, a chiang maw?" A ti a, ka thil sawi leh ka lo hnial vena hian kawngro a su tam lo ṭhin ngawt mai.

A lo kal dawn rau rau a nih chuan zinga lo kal zawk turin ka hrilh ta nge nge a, "Ka insiam peih vek tawh a nia, 'Fimkhur takin lo tlan la, ka lo hmuak ang che' te ti ve ta che, zei lo si..," a la ti zui, 

"Ngeiawm suh," tih bâkin ka chhâng lo.

"Tak takin Nám, fimkhur deuhin ka lo tlân dawn nia, min lo ngaihtuah lo la, i mitthlâah te khan min hmu rêng rêng suh aw," tia nui chung hian phone a dah ta a.

A sawi zo chiaha ka'n mitthla nghal ngeia(h) 

Eng ang pawhin hnialin 'dei dei' pawh ti ila, a mizia leh a mah hrim hrim hi ka duh tih phat buai ka tum lo. Innei teh rêng pawh ni ila, min duatin min ngaihsak ang tih ka hria; pension tawh te chu ni se a thlazar hnuaiah awmin Kimkima pawh a palzût theih mai ang a. Mahse, amah ber hmundanga a awm daih dawn avangin ka huphurh a ni ber mai. 

Rei lo tê ka lo chhing sek a ni ang, ka nuin min rawn ko a, "Sangzuala a rawn thleng a nia, eng nge thil awmzia?" tiin min zawt a.

Zan lama kan inbiak dan ka sawi a, "Hmaichhana engkim sawi dun kha a ṭha ber," a ti leh thlap. Sangzuala lo kal chu pawi a ti teh chiam lo a ni mahna.

Mit thip hlurin ka tho chhuak a, common room-ah Sangzuala leh ka pa an lo ṭhu dun a, biak mai dan tur ka hre leh pek lo. 

Ka intihfai chhungin ani a lo inbual ve bawk a, niminah a rûkin ka hawsan ve em em a, dârkâr sawmhnihpali pawh a ral hmain kan awm dun leh a, a duhnaah hi chuan a ṭuan a ṭha a nia, tûkṭhuan kan kîl laiin, ka nu leh pa a en a, "Chaw ei kham hian Naomi ka be fâl lawk thei ang em?" Tiin a dîl hmiah.

Ka pa zawkin, "Niminah a lo haw chauh a, i rawn lang leh nghal bawk si a, a pawimawh hmel khawp mai," tiin a nui a, ka zak ru ve reng. 

"Nia, tlang taka sawi mai hi a ṭha, thla hnih vel chiah chawlh ka nei tawh a, palâi rawn tirh ka tum deuh a," tia a sawi zawh rualin ka khuh kharh a, keimah nen kan sawi dun hmasa zawk dawn emaw ka ti a!

"In pahniha rem tihna a nih te chuan a ṭha reng alawm, i va hmanhmawh leh si ve?" Tia ka pain a zawh chuan, "Nghah leh chuan tur a awm lo, inzui rei hi inneih nghehna pawh a ni lo a, bâkah biak in hawngin kan tlin tawh chuang lo a..." zuk ti a. Rum lutukin Sangzuala ka melh a, ka nu leh pa an hawi phâwk nasâ.

Chaw ka bâr lui thei tawh lo, zah luat vanga thih theih nise tunah hian ka thi nghalin a nia ka rin. Ka tho nalh a, an thu sawi lai pawh ngaihsak lovin kut ka sil sawk sawk a room-ah ka lût daih.

Liansangzuala em em hi, khati teh fawka ka nu leh pa han hrilh! Ka awm ve lai reng lehnghalin.

Thinrim ṭûnin thleng ka sil a, an pathumin room-ah an lût dial. Thil dik lo a awm nge, min ko ve bawk si lo a, a ngaihna ka hre ta miah lo, engvanga Sangzuala hi ring em em nge an nih a, pasal atana min duhpui viau nge an nih tih pawh ka chhût thiam lo. Eng emaw tak dik lo chu a awm a ni.

Tun ṭuma a lo haw pawh hian kan inah a rawn innghat chat a, kei nen inbiak pawhna pakhat mah nei si lovin ka nu leh pa erawhin 'a lo thleng dawn' tih hresa ang maiin an chiai miah lo a, eng kim kha ruahmansa a ang tlat.

Rei ngial an inkhung hnuah an rawn chhuak a, an ṭawng ka lo ngaithla ru lo a ni. 

"Bawihi, lo ṭhu teh.." tia ka pain min koh chuan Sangzuala melh nghek chungin a bulah ka va ṭhu a, "Ti khan lo sawi ula, bike ka'n sil lawk ang e," tiin Sangzuala a ding hluai a, a fâla min biak pawh a tum ta chuang lo a nih hmel. 

A chhuah hnuah ka pain, "In pa hlui hman zanah a lokal a, ngaihdam te min rawn dil a, ani hnaihah khian i awm ka rem ti tawh lo, nupui a la nei lo lehnghal a, hetia nuthlawia i awm reng chuan a beisei zel ang che; a rawn ṭawng duh dan te kha paidam a harsa a nia, ngaihdam dîl inti siin tlâwmna nun pakhat mah a nei hek lo, a fâ titlaah te a puh che a, Mâmbawih kan thâ hi a na riau a nia, chuvangin nangmah hmangaihtu Sangzuala hi nei la, i zahawm zâwk bawk ang, i vânglai a pelh tak tak hma hian kan thu awih rawh," dam thlap, hnial chi ni miah si lo hian a ti ta a.

Sawi ve tur reng reng ka hre lo, kiltin aṭang hian min bei ni maiin ka hria.

"Dingngheta ka be dawn," ka ti hmak a.

"Ngawih theih hi a ṭha, thu dik kan hria a, kan thu awih la, i inchhirin ka ring lo," ka pa bawkin a ti leh a, ka nu a ṭawng ve lo reng reng.

"Dâwta inpuh ka duh miah lo, ka be dawn, a hrim hrimin Sangzuala nei tur pawh chuan min va duh awm ve," tiin a nau Kimkima min ṭawngkhum dan kha sawiin ka âng phiar phiar a; zaidam khuchûk lo mahila awká vinin ka nu leh pa hi ka chhang ngai lo. 

"Lalmuanpui, i tana ṭha i hria a nih chuan kan thu zawm ang che," ka nuin a ti fiak ṭhak.

Kan thâwm a ring deuh a ni ang, Sangzuala a rawn lut a, "Lo kal teh," tiin a kut pawh hru hul lo hian ka bânah vuanin ka room lam min panpui dáwr dáwr a, ka kaw chhung a tâwt up up. Dingngheta lakah ka thinrim a, ka nu leh pa lakah nen Chhuankima a la tel cheu bawk. Â, ka hah hluah hluah.

"Min thlah rawh," vin fahrana ka tih chuan min vawnna a thlah dul hret a, "A harsa zawnga awm tlat tur a ni lo, i nu leh pa khatianga chhan kha thil mawi pawh a ni lo, anni aia hmangaihtu che i hria em ni?" Tia min vawnna thlahin a kal sawn a. 

"Kimkima chungchangah kha chuan eng mah buaina tur a awm lo a nia, chhungkua din ka duh tawh a, a neitu tur ka buai loh chuan engmah sawi theih an nei lo, ka nupui tur min thlansak a ngai lo a, a neitu turin ka thlang ang," a ti hmiah hmiah.

"Mahse...." ka lo ti a.

"Mahse, mahse, tih sawi a ngai lo, ngun taka chhût duh ni la chuan engkim i hrethiam lutuk ang, min rinna tlem tal nei rawh. Dingngheta ka ni lo a, keimah, Liansangzuala, i Sangzuala..." tiin chiang deuh hian min rawn en a. 

"A dik lo zawk ni siin i tlâwm hreh em em a, a rûka i haw hnu pawhin ka la um zui che a nih hi, i pum chhungah khan ka fa tur pawh a awm mai thei, ngun takin ngaihtuah la, mahni hmasial lutuk tur a ni lo," a ti êrh.

"Nangmah alawm le mahni hmasial zawk, min nawr chûk chûk a, ka rilru tur pakhat mahin i dâwn lo, vawikhat ka ti sual tawha tih sual nawn ka tum miah lo," ka tih chuan a thaw hawk a.

"Khatiang khan awm dun lo ila chuan ka nghâk thei ve reng, mahse, Biak in hawngin inneih kan tlin chuang lo a, thla hnih emaw chauh hun ka nei tawh bawk si, Nám, min hriatthiam a ngai," tia lo kal hnaiin khum bula chair-ah chuan a ṭhu a.

"Tunah innei lovin kalsan ta che ila, nau i lo pai phei chuan zahna leh mualphona i hmachhawn ang a, i chhungkuate an zak bawk ang; ka kal hma ngei hian engkim ti fel ila rilru dam deuhin kei pawh ka awm ang a, i rai ta lo a nih pawhin a siam lam chu a awlsam êm kha," tiin a nui suk a, a ngeiawm thei siah.

"Thu tak sawi laiin kha tiang mai mai rawn sawi suh," ka ti nghata.

"Thu tak alawm ka sawi, i nu leh pa thu leh ka thu chiah hi ngaichang la, i hrehawm ngai lo ang, ka nau vanga rilru tih hah pawh a ṭûl lo, nangmahin i zir ngang lo a nih loh chuan a rilru a danglam ve mai ang," a ti leh zel a, hnial dan vak pawh ka hre tawh lo e a. Amah ka duhin chân ka hlau ru deuh tho bawk si, huis! Ka thluak a buai.

"I hmanhmawh lutuka ka buai vek..." ka ti sap a.

"Hmanhmawh loh theih ni hek lo; ropui vul chûka inneihna buatsaih kher kha thil ṭul ber a ni lo a, chawhnu hian Tlana te inah ka phei phawt ang a, zanin lamah palâi ka rawn tîr ang," tia min en vang vangin, "Pathian remruat a nih loh chuan Setana a inrawlh thûk hle a ni ang, kan inkârah hian..." nui ruh ruh chunga tiin khuma ka ṭhu chu min pawt tho a.

Zaninah palâi a rawn tîr dawn a nih chu. Rum rum mai a.

"Nupui hming pu lova kalsan che hi ka tum lo, nupa nunah a nuam vek beisei lo la, Kimkima ṭawng kha hriat reng tum hek suh, ka kiangah awm thei lo pawh ni la, ṭhatnaa i thungrulh phawt chuan hneh hun i la nei ang," ti supin min kuah a.

A thusawi danah eng mah huat tur leh rilru natna tur ka hmu lo va, a nau pawh a ṭan tûk hran lo a, kei pawh min ṭan angin a lang hek lo. Sangzuala finzia ka hre chiang tulh tulh. A hma lawka ka thinrimna te kha ka chhîp lamah an thlâwk chhuak zo vek nimaiin ka hria.

"A hrim hrimin Lawmkimi nen khan in inkârah eng nge awm?" Tiin ka zâwt ta nge nge a.

Khumah min ṭhuttirin ani pawh a ṭhu ve nghal a, "Ka chhân hma loh che chuan min zâwt leh reng dawn tho a, chuvangin tun chiah ka sawi ang, a bâk sawi nawn ka tum lo. A tîrtê aṭangin kan sawi law law ang e," Tia inkuangkuahin min en zauh a, ka lo en lêt ve kar.

"Beisei tur awm lova pasal i neih tâkah khan Lawmi nen hian kan inkawp ve ta a, a hunlai khan ka duh ve viau chuan ka hria; mahse, min kawp tih ka hre ta a, râlkhat aṭangin ka ṭhen hmiah. Mahse, ti hian min beisei chhunzawm ta zel chu a nia, ani aiin ka thlang zawk che, nuthlawi mah ni la.." a ti deuh kher. Mahse, huatah ka la lem lo. 

"Ka awih duh angem aw..." ka tih chuan, a ding hluai a, "Tunah hian dik takin min chhâng rawh, nawr luih che ka tum lo a nia, min neih i duh nge duh lo?" A ti ta khauh mai le.

Ka ngawi rauh rauh a, inneih chu ka duh; mahse, ka hlauthâwng deuh bawk si.

"Naom..?" Tia min en chuan hnuailam ka bih daih a.

"Vawikhat chiah ka zâwt leh ang che, ka kal hmaa inneih chu i duh nge duh lo?" 

"Min kalsan leh daih ang a, Kimkima kha..." ka ti sap a.

"Ka nau vang a nih chuan ka kutah dah la min ring rawh, ka kal leh a nih pawhin discharge ka dil dâwn tih ka sawi tawh kha, min phalsak phawt chuan rei kan awm hrang lo ang," a la ti zel a.

Ni e, ka rin ngam a ngai a ni mai. Chân ka duh bîk si lo. 

"Palai chu rawn tîr ta che, mahse, i nau vanga harsatna ka tâwk emaw rilru natna ka hmuh belh a nih chuan kei aia nasa tur an awm lo tih i hre dawn nia, Kimkima hi a hranpain ka haw lo; mahse, min hmusit hle a, min duh loh thu hmaichhanah chiang takin min hrilh bawk a, ka lawm lutuk bik lo, tunah chuan ka ngawi rih phawt ang," ka ti ve ngat.

"Ka naute ka hmangaihzia i hriat kha, an dik lohnaah ka hau ngam a, ka zilh ngam bawk; tlâwm zawk awm lovin inremna a awm ngai lo, chuvangin tunah hi chuan ka nau thusawi kha theihnghilhin kan chungchang chauh ngaihven la, a bâk chu hunin a la hril ang, an û nupui tur i nih angin zah tlâka nun tum la, intihzahawm lam ka sawi lo, hman zan anga awm phei kha chu sim hlauh ang che, ngaihdamna a awm tawh lovang," nghet charhin a ti ta a.

Ka haw hma zan a sawina tih ka hria, keipawhin kha zan kha chu ka chhuang fahran lo khawp mai. Ka chêt dan kha a ṭhing lulai ve êm a ni.

Chumi hnu chuan ka room aṭangin kan chhuak a, Sangzuala'n ka pa hnena eng eng emaw a sawi laiin dawrah ka kal daih. Pasal neih nawn leh ka tum ta chu a ni a, ka ti sual êm lovang chu maw? Sangzuala ka duhna hi sawi chhuak chhen lo mah ila ka thinlungin a hnar tak tak thei chuang si lo atin ni.

Kan in kawtah ka ding vang vang a, ka chanchin an sawi laia awm ve reng kha thil nuam pawh va ni suh. Dingngheta ka âtchilh ang khan Sangzuala hi ka âtchilh hran lo; ka pasal tur a ni ang tih phei hi chu mumang chhâwng thumnaah pawh ka la mang chhin lo hrim hrim; vawi hnih kha chu kan 'sir' ten min hrem dun a, ka ṭap pur nghe nghe. Kha mi ṭum khan fiamthu thawhin min paw thla ût ût a, ka la hre reng. Tuna a mizia nen hi chuan inpersan tak a ni tawh.

In aṭangin ka nu leh pa an lo chhuak a, ka nu ṭhiannu nu Hmuaki chhúl cancer a chauh deuh thu leh an kal dawn tih min hrilh a, "Hmun danga kal lovin in lo nghâk ang che, Sangzuala kha chawhnu lamah a chhuak dawn a," ka nuin a ti a, chhâng lem lovin ka bu nghat ringawt.

Kan pahnih bawkin kan awm leh dawn ta. An ring tâwk lutuk hi ka ngei lek lek zel.

"Pawna ding reng lo khan lo lût teh," Sangzuala'n veranda aṭangin a rawn ti a. 

Kan in hi kawngpui án a ni a, ka nu pension pawisaa kan sak a ni nghe nghe, nu leh pa zara awm nuam thei chauh ka ni a, ka nuṭate pahnih hian nupui an neih hma kha chuan an hlawh an chhung lut ve ve a, khawsak harsa lutukin kan awm lo. U Chhandama te nupain min rawn ngaihsak em em laiin u Chhanhima te nupa ve thung chuan ṭûl teah lo chuan min be vak ngai lo. 

Inchhungah ka lut a, ka zinna thawmhnaw vel sûk tumin ka la khawm a, Sangzuala'n phone-in tu emaw a bia a, u Chhanhima room hluiah a awm. 

"Mate, a neitu tur ka ni a, Naomi chungchâng hi chu lo ngaihtuah ve vak suh, zaninah palâi an kal ang," a tih ri ka hria. 

Kimkima nen an inbia tih hrilh hranpa ka ngai lo. Chhuankima inrawlh peih lutuk hi ka ngaizam thei dawn em ni? Ka pa sawi ang deuhvin luhlul ka chhuah ta chu a nia, ka hrehawmna a inṭan dawn chauhva hriatna ka nei, ka phûr fahran lo.

"Nám, ka lo sûkpui dawn che mi? Sangzuala bathroom-ah a rawn lut a, machine hi a spin na bâk ka hmang ngai vak lo, Chhehchhawl leh sûk harsa rit sak deuh tih loh chu kutin ka su mai zel.

"Nizanah i rawn tlân chau awm si a, va mu zawk rawh," ṭha tein ka ti a, "Aih, i bula awm ka duh alawm," a ti leh tlat tawh.

Ka rem ti lo chung min in sûkpui ta a, ka kamis hâk ipte aṭanga shikhar a rawn phawrh chuan ner sawk chung hian, "A la âk ṭalh ka ti," a ti hluk a, ka nui ringawt.

"Vai rama call girl ho chuan zu an in zawh hian a rim an nam loh nan shikhar hi an bâr vak zel a, mihur rim nam ka tih phah vek," a tih chuan, "I va hre ve, call girl nen contract in sign em ni?" Tiin ka nui hak.

"Naom, ngeiawm suh.." a ti sup.

"Nang hi i hrât hrawt hrawt ngawt ang, blood test kan nei hmasa dawn em ni?" tiin ka nui duh miah lo a, a thawmhnaw sûk lai bucket-a nem pil bawrh chung hian, "Chimawm suh, test ngai ni ila ka test daih tawh ang, khatiang kha han sawi leh vaih teh.." a ti a.

"A nih Lawmi nen khan in..." ka sawi zawh hma hmain a ding thut a, "I kâ kha..." a sawi zawh ruala rawn kun hniam nghalin min fawp nawk nawk a, a kut huh hluam chuan ka tukkhumah a vuan a, ka lo tâl ve bawka awmzia a nei thui lo. Chutah min thlah leh thutin, "Lawmi nen khan vawihnih sex kan hmang lo..." tiin za zetin a nui a.

"Eng a?" Ka ti vak a.

La nui reng chung hian, "Vanduaithlâk takin kan che sual lo hlauh, hun a awm lo a, heta ṭanga kan haw khan remchang ka lo zawng lo a ni," a la ti zui.

"Liansangzual leh.." 

"Eng nge? Amah zawkin min beisei a, ka duh lo a nia, ka va han fel ngawih ngawih tak." tiin a nui kur kur.

"I zak lo siah, ka inrin loh laiin min fawp thut tawh suh," ka ti a.

"Huh! I inrin leh rin lohin kawngro a su lo, i zei lo si..." a tih chuan ka ding a, "A zei zâwk chu nei mai rawh, kal rawh.." tih pahin a darah ka nem a, "A zei lo zawk kha ka duh miau a," tia nui suk chung hian, "Kan inneih zanah sipai dik tak i hmu ang," bathroom chhuahsan pahin a ti a, a sawi awmzia ka hria, ka lái ringawt.

Kan insûk zawh vek hnuah thingpui kan in a, nichina a nau nen an inbiak dan kha zawh ka châk et et; mahse, ka zâwt ta em bik lo. 

Sofa-ah inngheng rialin kan ṭhu a, a phone-a thlalâk kan en dun a, uniform a inhmeh hle, Shillong vela an awm lai thlalâk te pawh a awm nual, a Album-a hmeichhe thlalâk awm chhun chu a nu leh Mimtei, keimah chiah. Lungphun ni-a kan lâk ho ka neih ve loh te min thawn nghal a, "Le, dp tur.." tih pahin ka darah min kuah a, ka lo la inring chiah si lo nen amah ka en lai takin a hmet ta a. 

"Ka tum dan hmasa ka ṭhulh ta si a, awlsam thei ang berin kan tih mai angai dawn ta a nih hi, tlân koh angin kan ti mai dawn nia, i nu leh pa ka sawipui tawh a, palâi hi chu a hming ve chauh a ni," a tih chuan, "Nia, ka vawi hnih neihna tur a ni tawh si a, a zau lo thei ang ber ka duh," ka lo ti ve mai.

"A rang lama kan chêt loh chuan ka chhuk hun nen a bichilh dawn lutuka kan awm tlâng rei hman lo palh ang, i hriatthiam ka beisei.." a ti dam thluam a, "Min hruai ve daih la, i naute nen chauha awm chu ka hreh ngawih ngawih," ka ti hrâm.

"Puitlin i zir a ngai, bâkah sawi lâwk lovin ka hruai ngawt thei lo che alawm, quarter dil te a ngai hmasa a, chutiang turin hun a awm tawh bawk si lo, ka naute pahnih i uap an ngai zawk a, ka ring tâwk che," a ti leh tlat. 

"Min ring sual ang e.." nui ṭhâ chunga tiin a kâwngah ka kuah a, "Ka rinna tichhe suh ang che, a chhan chu ka ring leh thei dawn si lo che a," a hmaa a mah ka lo tihdan ang chiaha ti vein min kuah a, "A nuamah pawh, a hrehawmah pawh tih chham hun kan la nei ve ngei ang, chumi hma chu i lo tuar ve hrâm hrâm dawn nia," tiin dam thlap hian min fâwp a, a bâk eng mah kan pêl lo.

Tlana te ina min pheisan dawn meuh chuan ka ngai nghal veng veng. Eng eng emaw sawi ngai a awm a tih vangin dar hnih velah chhuak turin a inpeih thlap a, a patea te chungchang pawh sawi ngai a awm tih a sawi bawk. Kimkima kut a thlâk chungchangah khan thu mumal eng mah an la nei lo a, a patea'n ngaihdam dil lo mah se report an tum lo tih a sawi tho. An ngaidam tihna a nih ber chu.

Ka nu leh pa lo haw hmain a chhuak ta a, ka thlah ve thlap.

Zanriah ei dawnah ka nu leh pa an lo haw ta chauh a. An damlo kan a ṭha lo viau tih an sawi.

Zan dâr sarih pelhah Sangzuala palai te an lokal ta a, Tlana pa ka hmuh chuan a fapa nen inang tak an ni. Pakhat zâwk erawh chu Sangzuala pitei te lam hnai a ni a, room-ah ka inthiarfihlim san ta a.

Nuthlawi ka nih hnu hian kohhranah ka inhawlh lawr lo hle a, a hmingin ka inkhâwm ve a ni mai. Ka nu leh pain min hau tamna ber pawh a ni bawk.

Ka online zui char char a, vawiina kan selfie-na kha Sangzuala'n dp-ah a hmang a, "Hmang ve rawh," tiin thlalâk min lo thawn bawk a, ka hmang ve mai bawk a.

"Ka û rilru i hneh pawh a ni maithei, i laka ka rilru put dan a danglam chuang lo," Kimkima message ka hmuh chuan ka ner sawk a, ka reply duh lo.

Engvanga min haw ve em em nge maw a nih! Sangzuala sawi ang ngawt kha chuan thil a awlsam ka ring ta miah lo. Mahse, ka kâ ka âng tawh a, sût leh tumna ka nei miah thung lo, a nupui ka ni dawn lo a, a peih chen chen chu min han do teh se. A duh ang ang chuan min palzam bîk hauh lo ang.

Sangzuala'n min rawn be zuai a, a patea te ina kal a tum thu leh a riak nghal mai thei tih a sawi chuan ka sa zak.

"In lakah khatiang rilru kha a pu a, va kal kher a ngai em ni? Riak miah suh, i muthilh hlanin sual a chhuah leh mai ang," ka ti nghal bawrh bawrh a.

"Hlauthawng suh, ka inngaihtuah thei alawm," a ti a, ka ngaihdan a ni chiah lo deuh. 

"Kal kal pawh a ngai lo," ka ti leh hrâm.

"Nám, lungngai lo la, ka inveng thei lutuk tlat.." a ti dam thlap a, lungawi chiah lo chungin phone ka dah tau. Min lo call nawn miah lo bawk.

Palâite an haw hnuah ka nu leh ka pa room-ah an lo lut a, ka û te pahnih chanchin an hrilh tawh thu leh u Chhandama'n min lawmpui tih an sawi a, "I u Chhanhima chuan in thu thu alawm, atia," ka nuin a ti a. 

"Sangzuala hun neih dan chhutin rei rial chi pawh a ni lo, zirtawp zanah an lokal leh anga tah chuan a hun leh ni kan sawi fel ang," an ti ta a. Duh ai chuang a rang mah mah ka ti.

Kohhran thunun ka tâwk leh dawn ta. Tun ṭum erawh a dan a dang ta deuh. Khawtlâng titi tui ber ka ni leh dawn ta chu a ni a, a ni lo thleng thleng khan a nia an sawi leh dawn ni.

Mahse, tun ṭum chu ka nu leh pa duhpui ngei ka nei dawn ta thung. 

Kan duh phawt chuan kan awm dan zêpin kohhranah phalna kan dil thei a, Mahse, Sangzuala rilrem zawng a ni lo a, fair taka thiltih a duh vang tih ka hria, mihring chu kan bum thei, Pathian erawh kan bum thei lo, a ti ve tlat.

Dingngheta'n a hriat hunah engtin tak chêt la ang maw. A thleng rang mai siah...

B®®

B+>[BeckirafARenthleI]<+®®