12.NAOM [Mizo Love Story] B®®

12.NAOM [Mizo Love Story]

Ziaktu: Becky Rafa Renthlei

B®®

Shadow of the life

Kohhran thunun ka tâwk leh dawn ta. Tun ṭum erawh a dan a dang ta deuh. Khawtlâng titi tui ber ka ni leh dawn ta chu a ni a, a ni lo thleng thleng khan a nia an sawi leh dawn ni.

Mahse, tun ṭum chu ka nu leh pa duhpui ngei ka nei dawn ta thung. 

Kan duh phawt chuan kan awm dan zêpin kohhranah phalna kan dil thei a, Mahse, Sangzuala rilrem zawng a ni lo a, fair taka thil tih a duh vang tih ka hria, mihring chu kan bum thei, Pathian erawh kan bum thei lo, a ti ve tlat.

Dingngheta'n a hriat hunah engtin tak chêt la ang maw. A thleng rang mai siah...

B®® 080721

Hringnunah a nuam vek kan nei thei lo a, a nuam aiin a nuam lo a tam zawk mah. Chutih rualin ka nuna Sangzuala a lo lan leh aṭang hian 'ṭhâwn thut policy' min hman khum ta zauh zauh mai. A dawnsawn dan tâwk ka la thiam chiah lo.

U Chhandama'n min rawn bia a, "Bawihi, i duh ber rawn sawi la, kan lo lei dawn nia, a nih loh pawhin pawisa pawh kan lo thawn thei tho a nia, hlim taka awm hi i phû a ni," dam thluama a tih chuan ka mittui a parawl ṭeuh. Ani hi chuan min ngaihtuah bîk a, upa ber a nihna hi a lang nge nge ṭhin. U Chhanhima te nupa erawh chuan min rawn be ve lem lo. An lak aṭangin eng thil mah ka beisei lo bawk.

Palâi vawi hnih an lo kal hnu khan eng kim an rêl fel duak a, Sangzuala a hmanhmawh si a, sawi nawi theih pawh a ni lo; Mimtei a lawm em em a, "U Naom, ka nui reng a nia, a nuam e..." nui hak hak chunga tiin, "AuMama pawh a khi reng," a la ti zui.

Sangzuala a haw tawh a, thla thar ni li-ah man inhlan tur a ni a, a tûk zingah Lawngtlai panin kan kal dawn ta zawk a ni. Man hlan tlaia Lawngtlai lam pan law law tia an sawi khan ka nuin a remti chiah lo.

"Kan fanu neih chhun i ni a, kohhran hall-ah tal invuan ve ula ka tih nen a rem teh ṭeuh si lo a, nakinah Sangzuala lo chhuah fel tak tak hunah la invuan ve tho ula ka duh; nupa pawmpuina certificate êm pawh hlawh zo lo-a inhruai mawl tawp chu a ṭha lo," a ti a.

Sangzuala khan 'Kohhranin min thunun zawhah certificate kan dil dawn nia' a ti awlsam êt.

Inbuatsaih nân kâr hnih vel chiah hun kan nei a, chhung leh khat tak tak leh man eitu te tân chauh chawhlui buatsaih kan tum a, mi sawm zau kha a tu ve ve mahin kan duh lo. A nu leh pa lungphun a zo fel âwrh a, Kimkima hliam pawh a dam fel hma hmain inneih a ti tlu ta si a; sawi kan hlawh viauin a rinawm.

Chhawm tur lei neuh neuh a ngaia kan buai zui ta phian. Ka pain, "Pasal vawi hnih ṭhen nih tum lo la, Sangzuala bulah awm thei lo mah la, nupui nihna ti hlawhtling turin rilru puitling pu ang che, Chhana (u Chhanhima) te nupa kan hnena an lo awm hmaa i kal tur erawh ka thaw huai," a ti a, ka pa mi ṭawng tlêm leh thil sawi ve mai mai ngai lo pawhin kan monu pakhat zawk hi chu min huphurhpui tih ka hre thiam mai.

Keia mo na ve turah chuan a farnu aiin a unaupa a huphurhawm zawk daih. Kha mi zana message min lo thawn hnu khan vawi hnih dang a rawn thawn leh a.

"Thiam nei bawk si lo, hnathawh tur nei chuang bawk si lo, englai pawha intuai hliau hliau reng ang kha kan inah chuan a rem ve dawn lo a nia, i pasal hmasate anga hausa kan ni ve lo, khatianga i nawmsaknaah pawh khan i mo rei thei lo a nia, keini inah chuan thla khat pawh i awm peih dawn em ni?" Tih vel a ni nawk.

"Mama nupui neih hun tur ka nghakhlel viau ṭhin kha a nia, tunah chuan nei lo mah se pawi tihna ka nei tawh lo, fâ pawh i nei thei dawn em ni? Nuthlawi hi ka ngaisâng lo," tih ang reng. Pakhat mah ka reply lo a, ka seen vek. Ka star mark thlap bawk; a hma kha chuan kei mah vanga an inrem loh ka hlauh vangin inthiarfihlim ka tum kha a ni a, ani vang hian Sangzuala kalsan tumna ka nei tawh miah lo. Luhlul ka chhuah ve zêl tawh ang; mahse, Sangzuala ka lo tiam tawh angin tunah chuan ngawih rih a ṭha.

Ka pawisa khâwl hmanga chhawm tur lei ka tum chuan ka nu leh pain an phal îkhaw lo. "Kan neih ang ang hi i tan kan ui hleinem, i pawisa kha chu ti khan khâwl leh zawk rawh, i duh chuan scooty pawh hi i keng daih dawn nia," an ti a, min hmangaihzia ka hriat thar phah.

Ṭhian neih ve ngei ṭha ka ti si a, kan inneih hmasaka ka ṭhiannu kha chu pasal neiin hmun dangah a awm tawh a, kan inṭhen hnu hian tumah 'ṭhian ṭha' tia sawi fak tur ka nei tawh lo. Ka kawm ngeih ve deuh ber Faktei (Lalfakmawii) ka va be ta a, a lo phur nasa mai; higher kan kal laia ka kawm ṭhin a ni a, inhmu fo lo mahila ka biak tam ber a ni. 

Sangzuala'n ṭhian atan Tlanhlua a hmang dawn a, ka rinsa tho ni mah se midang hmang zâwk se ka tih nen. Min fiam leh zuk zuk tur kha ka peih lo a ni ber. Mimtei a ngaizawng tih ka hria a; an kum a inthlauin an infin hleih si a, a la hneh thuai ka ring. Tlanhlua mi â ni hek lo. A ṭhianpa nau hi a rûkin a duh vet vet êm.

A zualpui kan inpeih tawh a, u Chhandama te chhungkua pawh an lo thleng tawh bawk, kan hlim hle. A fate pahnih hian min ngainaa a nupui u Sawmi pawh ka ngaina viau; ka puan chhawm tur min leipui vek a, "Sangzuala leh i û hi an inkawmngeih riau asin, an inbe fo ṭhin alawm, kan hnena i awm laia ngaihzawng i neih kha a hrilh a, i û ka kamkhat nghe nghe; a lo duh ve êm che a nih dawn hi, i sipai bialpa hian," tiin a nui hak hak a.

Ka û in a lo hrilh vang a nih chiah hi ka chanchin a lo hriat em em, u Sawmi'n 'ka leisak ve hrim hrim ang che' a tih deuh tlat avangin bag-hrui khat nei nalh zet chu ka hnial chung chungin a man a pe lui tlat a, ka va lawm si êm. 

Zantin Sangzuala'n min rawn bia a, 'eng mah rawn chhawm vak suh, a hnawk mai mai' a ti a, chhawm loh chi ninghal lo chuan. Zungbun pawh a order thlap a, 'Chhinchhiahna tel lova awm a rem lo,' a la ti hrâm. Ṭûl ka'n ti lo mai mai khawp a, biak in hawng tur pawh nihlei lo, ka ngai thu tak teh chiam lo. Dingngheta min bun tîr pawh kha ka thehthangna ka hre tawh lo hrim hrim; sâwn min thlâksan khan ka phelh nghal daih a, an in khawi laiah emaw chuan a awm mahna. 

Ka hlauhthawn ang ngeiin Dingngheta a rawn lang ta a, kan in chhunga lo lût ngam tur pawh a ni tawh lo a nia, amah nen kan inbe ngai pawh a ni lo a, a duh hun huna a rawn kal ringawt hi ka ngei riau. 

"Naom, ani khan ka neih loh eng nge a neih, kei aiin sipai lu mûm satliah i thlang zawk hi ka awih thei lo," zu han ti a.

"I neih loh hlir a nei," ka ti nghat a.

"Eng nge ka tih theih i lo en dawn nia, a nau bialnu khi ka cousin a nia, hrilh tur ka ngah khawp ang," ngeiawm zetin a nui sâwng a, ka man thiam deuh uar. Kan ina Dingngheta kal thu Kimkima'n a lo hre daih kha mak ka ti viau a nih kha, hetiang vel vang lek a lo nih mai mai hi.

"I duh duh hrilh rawh, eng atan mah ka ti lo, i sâwn thlâkna nu khan a nei duh lo zâwk che em ni?" Ka ti ve salh a. Thinrim inhum ruh ṭeuh chung hian, "Ngawi hmiah rawh, fâ pawh nei thei hlei lo, in innei rei nge rei lo kan la hria ang chu," tia tho chhuakin, "Sipai pa chu biak ka lo tum ve dawn nia," a ti khera ka chhâng lo.

Dingngheta chhuah hma chiahin ka phone a rawn ri a, Sangzuala'n video call in a la rawn ti zui. Vawiin hian ama room kha an chingfel a, min entîr a tum a nih ka ring. Mahse, Dingngheta awm laia biak ka duh loh avangin ka off ta ringawt a, nakinah ka sawi fiah mai ang.

"I chhâng ngam na nge?" Kawngkhar bula ding chung hian Dingngheta a la ṭawng hrâm, rum zeta melhin, "Haw la, vawikhat mah lokal tawh suh," tiin ka room lamah ka phei san ta daih a, u Sawmi nen an inhnial thawm ka hre zui zat. Ka ngaithla peih lo.

Call pangngaiin Sangzuala ka call nghal a, vawi thum ka call pawhin a la thei lo reng reng, an buai a nih ringin ka inbualsan ta rih a, Dingngheta te chhung lam an ṭawng nasa hle a ni awm e, kum nga kan inṭhen tawh a, amah duhna leh ngaihsakna chhe te mah ka neih tawh loh vang hi nge pasal ka neih dawn meuh chuan an ṭawng tam viau.

Kimkima bialnu chu tu kha nge ni ta ang? Dingngheta cousin te ka hre nual a, atu ber nge hre lo mah ila hriat chhuah ngei ka tum ruh tlat, ka chanchin a chhe lam emaw a ṭha lam pawh nise a lo inrawlh vena tur a awm lo hrim hrim.

Zanriah kan kîl laiin vawiina Dingngheta nen kan inhau chungchang kha u Sawmin a sawi chhuak ta a, ka nuin, "Ka awm lo chu a pawi mang e, an kamchhe tleuhna tur kan ni rêng rêng lo, hei leh chen kan ngawi tawh a, kan inchhung leh zela min rawn ṭawngkhum hi chu ka lawm miah lo." A ti ta a.

Ka pa erawh chuan, "Ngawi mai mai rawh u, Bawihi a awm tawh dawn chuang lo a, an sawi zui rei peih miah lovang, thiamthu sawi zuah zuah hi mi mâwl zia a ni a, loh theih lohva sawi fiah ngai erawh ṭha taka sawi mai tur; Bawihi, mi inchhungkhurah i awm leh dawn ta chu a ni a, nu leh pa an nei tawh lo tih khâ hre reng la, upa ber nupui i ni tawh dawn a, chhungkaw ti darhtu ni lova hûikhâwmtu nih tum tur, chu chu hmeichhe fing tih dan tur a ni," a ti dam dap a. U Chhandama'n a lo tuihnih ve bawk.

Zan dâr kua a rîk pawhin Sangzuala a la reh reng a, ka missed call a hmu ve em emin ka ring; lungawi lohna tur a awm pawh ka hre si lo a, nge, a call ka reject vang khan a titau tih pawh ka hre bîk lo.

"U Naom, vawiinah inpa hlui a lokal em ni?" Mimtei whatsapp message ka chhiar chuan ka phu zawk, Kimkima emaw Sangzuala zâwkin min lo zâwt lova Mimtei'n min rawn zawt daih chu mak ka ti.

"Aw kal e, eng tin nge i hriat a?" Tiin ka zâwt lêt a.

"Dik tak chuan Mama leh Kimkima an inhau hian hrehawm ka ti, an thusawi zawng zawng ka hre vek lo a, mahse, inpa hlui chungchang an sawi," tia min reply chuan ka call ta a.

"Mim, an inhau nasa viau em?" Ka ti sap a, "AuMama a thinrim khawp mai, Kimkima a ngawi duh si lo a, ka room-ah ka lût daih," a rawn ti leh a.

Vawiina Dingngheta min tih dan leh u Sawmi nena an inhau chungchang vel ka hrilh ta vek a. 

"A zak thei lo e, Mama ka lo hrilh dawn nia, Kimkima nungchang hi a mak riau, i haw hnu aṭang phei kha chuan Mama nen an inkhak zauh zauh," a ti leh a, "Keimah vang vek a nih kha, i u Kimkima khan..." tiin engkim ka hrilh ve ta vek, "Dik tak chuan inneih pawh ka châk lo, i u Mama hian min hmangaih tih ka hriaa kei pawhin ka hmangaih bawk, Kimkima min ṭawngkhum danah ka rilru a dam bik lo va; mahse, ka ngawi ta zâwk a nih hi.." ka tih chuan, a thaw halh a, "Hahthlâk e, ngaidam hrâm rawh," a ti reuh a, ka khawngaih ang reng.

Sangzuala room an tihfel chungchang leh ka awm hun a nghahhlelh thu a sawi a, rei vak lo kan inbiak leh hnuah kan dah ta a. Mimtei rilru ṭhat zia ka hriaa nau ang tak takin ka en thei dawn tih ka hrechiang bawk.

Muhil thei lovin ka let kual sek a, Sangzuala a reh vang vang; biak tumna pawh ka nei bik lo a, inneih a hnai telh telh a, neuh neuh a tam tulh tulh. Kimkima'n engkim a lo hriat leh vek danah Dingngheta a ngawi mai mai lo tih a hriat mai; keia pasal nei ve tur hi a hahthlâk ru tlat. 

"Ka ringhlel phal lo che a, rinhlelh che pawh ka duh lo, mahse, i pasal hlui kha i lakah eng vanga ngampa viau nge a nih?" Sangzuala message ka chhiar zo chiaha ka thaw chhuak halh.

"Pasal ka nei tur hi a rilru a nâ te pawh a ni mahna" tiin ka reply a.

"Ka inrawlh ngai suh se," a rawn ti a.

"Ka koh a ni lo a, amaha lo kal a ni, a lokal vang khan ka lawm ta viau tihna lah a ni hek lo, ka missed call i hmu a, min call back lem lo a.." ka ti ve hmak.

"Ka be châk rih lo che a ni ang e," a rawn tih leh chuan ka run lutuk a, "Min be lo tawp rawh," tia chhángin phone ka switch off daih.

Inhau hun pawh a ni tawh lo asin le, kan boruak hahthlâk ru zet hian min ti chau vek.

Naktuk hi man hlan ni a ni tawh a, hmanzana kan inhnial aṭang khan ṭûl tawpah lo chuan Sangzuala nen kan inbe tawh lo; Mimtei zawk zelin min lo bia a, ṭhulh leh duhna thinglung ka pu hial. Mahse, êma ka ti ve deuh si.

Ka thlan sual leh ka tân a ni a, ka thlan fuh pawhin ka tân tho a ni. Rilru erawh a dam zân lo deuh chu a ni e. Sangzuala tak pawh hi ka haw deuh tlat, Dingngheta lo kal chungchangah thiam lohna ka neih ka hre lo, insawifiah chiam mah ila inhauna a tam leh mai mai dawn a, ngawih ka chuh tawp.

Mak ka tih ve êm êm chu, u Chhanhima te nupa lo kal an tum lo hi a ni. A tlawngâwl zawk an ni a, car loan an rulh chhuanlamin chêng khat mah an rawn thawh hek lo. U Chhandama phei chuan, "An rawn biak loh che u chuan biak biak pawh an ngai lo, a farnu neihchhun pasal neih tur ngaipawihmawh lo chu ngaihsak vak a ṭûlna ka hre lo," a ti hmiah.

An sum leh pâi kan ît hran lo a, ka unaupa a nihna anga a lo lan ve kha a tih tur a ni. Chawlh lâk a buaithlâk tia chhuanlam an rawn siam avangin ka nu leh pa an lâwm fahran lova. Ka nu a pension khan insak nan eng emaw zât kan hmang teh meuh mai; mahse, thla tin a pension hlawh a lût a, kan ei a hautak loh bâkah huan thlâiah kan intodelh a, keia pasal neihna tur ringawtah an buai phah lutuk lo.

Rilru na deuh mah se tumahin kan phone ta lo. Faktei a lo thleng phei tawh bawka Sangzuala thlalâk a hmuh rualin, "Awi awi, ka duh chi..." tiin a nui kar kar a, "Ka biak ṭhat a ngai dawn a nih hi, Regiment chhe lo deuh deuh hriat a ngah ngawt ang," a la ti tak deuh deuh a, ka nuih a za hle.

Mokawr hâk tur awm ta lo chu a hmingin kawr inang kan ṭhui tîr ve luklak s, Faktein a lo buaipui vek kha a ni a, ka room-ah khum khatah kan mu dun a, sawi tur a ngah ngang mai. 'Dingngheta âiin Sangzuala ka duhpui fê zawk che, inpa hlui hmel kha ka ten chi' a ti leh pek.

Sangzuala te lam inbuatsaih dan chipchiarin ka hre lo a, mo hruai turte, man hlan tlaiah an lo thleng tel vek dawn a, kan inah thleng dawn lo mah se chaw erawh an ei vek dawn.

Hun a bichilh ngaihtuahin kan inpeih hma angreng phian a, man eitu pawh an tam lo khawp mai. Ṭhenawm khawveng tlêm bâkah kan vuavangte an ni leh mai. 

Tlana te in lamah a tam zâwk an innghat hlawm a, holam taka tih tum pawhin a theih bîk loh. Kâr a hlâ a, rin aiin a hautak ta tho mai. Ka nu leh pain ka mawi loh hlauvin kan phâk tâwka a ṭha ber min chhawm tir an tum a, u Chhandama te nupain Wardrobe min leisak bâkah pawisa fâi chêng singkhat min pe bawk a, min hmangaihna hi engtikah mah ka theihnghilh lovang.

Tluang takin man hlan hun kan hmang zo a, Sangzuala te ṭhian dun chaw ei turin an lo thleng bawk a, kan vaiin mi za bawr vel kan nih ka ring. Zanin chiah kan inah ka awm dawn ta, kan boruak rit ru tak chu Tlana leh Faktei'n an hre ve lo nge an titi bawrh bawrh a, Sangzuala a ngawi ngul. Biak a huphurhawm ngawih ngawih.

A nâwlpuiin chaw an eikham tawh a, ka room-ah kan paliin kan awm a, inbiak pangngaiin Sangzuala nen kan la inbe ta lo fo. Ka rilru a na ru deuh hlek, ka hmêlah a lo lang deuh nge, Tlana leh Faktei chhuanlam siamin an chhuak tharh a, Sangzuala nen chauh kan awm ta a, min biak hmasak loh chuan biak tumna ka nei lo.

Rei fê ngawi renga kan awm hnuah, "Min neih chu i phûr teh chiam lo a ang hle mai," ngaihnobei vak lova tiin tukverh bulah a ding khawng luh a, min hmu tura a lokal ni-a a hmêl ang chiah kha a pu.

"Phûr viau tur ka ni em ni?" Ka ti ve hmak.

"Nia, i hreh ru ngawih ngawih tih ka hai lo a nia, mahse, i man ka pe fel tawh a, rilru i thlâk êm lovang chu," tia nui lui hawkin, "Inpa hlui nena in inneih dawn vel kha i hrechhuak zâwk em ni?" A ti leh kher.

"Liansangzual..." tia vin ṭhatin rum deuh hian ka melh a, hawi sawn miah lovin min en run a, a lang hlauhawm ngawih ngawih.

"Hetiang em ema min neih i hreh chuan kan ṭhulh leh mai dawn em ni? I nuih luihnaah khan i biang a kham vek tawh lo maw?" Tih zawm lehin a kekawr ipte a zen a.

"Ṭhulh i duh phawt chuan kan ṭhulh leh thei reng," tia ka chhân chuan thinrim lutuka phun sup chungin min rawn pan a, ka darah a kut pahniha vuanin min thing nawk a, "Kan ṭhulh lo ang, kan ṭhulh miah lo ang," ti hráwkin khumah min nem ṭhu chawrh a, "Ka ta i ni tih vawi eng zat nge ka sawi dawn, Dingngheta chuan hetiang hian a ti ngai che em?" Tiin dimna tel miah lo hian min fâwp nawk nawk a, ka thin tertek a chhuak ve ta.

"I duh duh danin awm tum suh," tihpahin na zet hian a biangah ka bêng a, a hawi sawk. A hmaa ka thinrimna in up zawng zawng te, thâwk a phita ka pasal hlui hming min sawi chhuah khum chhên te hi ka hnê lutuk.

"Naom..." inseh ruh ṭeuha tiin min vawnna a thlah a. A hmela mak tihna lang chhuak chung hian min en a. En pawh en duh lovin hnuai lam ka bih daih, ka thâ a khûr der der. Tunah kher hi chuan pasal neih tuma rilru ka lo siam ta hi ka inchhir ngawih ngawih. Liansangzuala ka huat dan hi pui tak a ni.

"Min hmangaih vanga min neih tum i nih pawh ka ring nek lo e, ṭhulh ang, ṭhulh vek ang," tiin ka ding hluai a, che map lova min en chung hian, "I ngam phawt chuan han ṭhulh teh, i damchhunga i theihnghilh theih tawh loh turin ka chë ang," a ti zawi sup. 

"Ka ngam khawp mai," tia ka sawi zawh rualin kawngkhar lam ka pan a, min pawt lêt dawrh a.

"Dingngheta fa engvanga ti tla nge i nih?" Tia min zawh chuan mak tih luat vangin ka mengphawk hrâ a, eng zawhna nge ni ngai!?

"Liansangzual, ka thin i tirim tak tak dawn," ka ti a.

"Ka thin a rim lo bîk em ni? Thu dik sawi rawh.." a ti hmuk.

"I duh dan dan khan ngai mai rawh le, sawifiah tumna ka nei lo," ka ti ve tlat.

"Lalmuanpui, ka zâwhna che chhang rawh" tiin ka bân puamah nghet zetin a hmer a, thinrim tih hriat takin a thaw hawk hawk a.

"A hrilhtu che chu tu pawh ni rawh se, kum 32 chhung hian ka pumah vawikhat mah nautê a awm lo, a der pawhin a la awm chhin lo tih kha i sipai thluakah khan vawng reng tawh rawh," ner sak chungin ka ti a, min vawnna phelh tumin ka tâl zui bawk. 

"Kum thum chhung innei siin engvanga râi lo nge i nih? Hei tal hi chu a chhan i hriain ka ring, Dingngheta fa i tihtlâk vanga pai thei lo em ni i nih?" Rum zeta min melh chung hian min zawt leh a.

"I zawhna zawng zawng hi a hma te khan min zâwt thei lo em ni? Nge, i nau duat khan i lo kal hmain a dâwt phuahchawp a hrilh zâwk che," ka ti ve sak sak a.

"Ka nau hmer tel suh.." a ti nghut a.

"E, aw le, i hnenah eng thu pawh sawi se, kei aiin ani i ring zâwk tho tho si a, ka sawifiah lo mai ang, inneih ṭhulh i duh loh chuan kan innei poh a ni ang chu; hei hi i lo hre dawn nia, Lucknow-a i awm chhung zawngin kan inah hian ka awm ang, khitiang Chawngkawr nena chen dun khi ka peih reng reng lo," ka ti nek. Ka insûm peih tawh bîk lo.

"Kan la hria ang chu, i mize dik tak pawh ka hre chho zel turah ngai ang," a ti a, ka chhâng tawh lo.

Tlana leh Faktei lo luh laiin kan la ding reng a, hlim hmel ka hmuh tîr hlei thei lo. Sangzuala erawhin dam thluam hian a lo bia a, an ṭhian duna ka room-an chhuahsan veleh khumah ṭhu hnawkin ka melh ngai ka melh tlawk tlawk a. Faktein ka dara kuah chung hian, "In hnial hun a ni tawh lo, hlim taka awm tum zâwk rawh," a ti sap a.

Hrilh hranpa ngai lovin kan inhau tih a hria a ni ngei ang. Faktei kuah chungin ka insût hraih a, ṭap lo turin ka inseh ruh hle. Tun aṭanga mittui ka ngah lutuk chuan Chhuankima ka hmachhawn thei náng.

Man inhlan zana inhau awm chhun kan ni hial ang. 'Naom Lalmuanpuii' zia dik tak ka la hmuh tîr dawn khawp mai.

Dingngheta leh Chhuankima an inbia a nih ka ring a, ka chungchângah dâwt muhlum eng ang taka tam inhrilh ang maw.

Sangzuala te haw tur kan thlah a, naktuk zing dar sarihah Lawngtlai kan pan dawn ta. Thlarau sual ka dawn zin viau chuan an inchhung khi hremhmunah ka siam lovang tih tu nge sawi thei?

Ṭhulh duhin râk eng ang mahila thihna te a nih ngawt loh chuan an ṭhulh dawn lo tih ka chiang bal. Nge, zanin leh naktuk atan ka damlo der tlat dawn nge ka thi der zâwk ang. 

Zanina a chêt dan leh a ṭawngkam te kha ka haw ngawih ngawih, chu ti maia lungawi ka tum teuh lo. Ramhuai zia te zawng minute rei loteah ka nei ve thei nghal...

Ka thil ngaihtuah avang chuan ka nui hak a, Faktei a lo hawi nghal! 

Hmangaihna dikah chuan inrintawnna a awm ṭhin a, keini inkâr hi eng nge ni ve ta ang?

B®®

B+>[BeckirafARenthleI]<+®®