13.NAOM [Mizo Love Story] -B®®

13.NAOM [Mizo Love Story]

Ziaktu: Becky Rafa Renthlei

B®®

Shadow of the life

Sangzuala te haw tur kan thlah a, naktuk zing dar sarihah Lawngtlai kan pan dawn ta. Thlarau sual ka dawn zin viau chuan an inchhung khi hremhmunah ka siam lovang tih tu nge sawi thei?

Ṭhulh duhin râk eng ang mahila thihna te a nih ngawt loh chuan an ṭhulh dawn lo tih ka chiang bal. Nge, zanin leh naktuk atan ka damlo der tlat dawn nge ka thi der zâwk ang. Huh! 

Zanina a chêt dan leh a ṭawngkam te kha ka haw ngawih ngawih, chu ti maia lungawi ka tum teuh lo. Ramhuai zia te zawng minute rei loteah ka nei thei nghal...

Ka thil ngaihtuah avang chuan ka nui hak a, Faktei a lo hawi nghal! 

Hmangaihna dikah chuan inrin tawnna a awm ṭhin a, keini inkâr hi eng nge ni ve ta ang?

B®® 090721

Zing dâr sarihah Lawngtlai panin kan chhuak ta a, Fel Fel sumo leh Terina sumo an rawn hmang a, Tlana'n ama car khalhin front seat-ah Faktei a ṭhu a; Sangzuala nen a hnungah kan ṭhu thung.

Nizana an haw hnu khan ka nu leh pain an room-ah min ko lûtin thu ṭha min hrilh nghek. U Chhandama te nupain min fuih ve bawk a, ka ngaithla liam vel mai mai. Sangzuala ṭawng dan kha ka rilruah a awm reng a, ka rilru a na lo ka tih chuan dâwt ka sawi tihna. Ka chhungril a na ru ngawih ngawih a, Faktei tui taka a muthilh lai pawhih ka mu meng reng.

Nau ka titla lo va, ka pâi lo hrim hrim, engtia khatiang zawhna min zâwt ngawt nge a nih? Pasal ka neih hmasak khan vawi tam incheck up-in kan kal a, an sum neihin a tlin bawka a hun laia tih theih ang kha chu kan ti ve vekin ka hria; mahse, a tu mah mah sawisel tur awm si lovin nâu ka pai ta chuang lo kha a ni a, a hnu lawkah Dingngheta zawkin midang lakah fa a nei ta si a, a dik lo zâwk ka nih hmel ta viau.

Kum nga chhung kan inṭhen tawh a, Sangzuala lo lan hmain tu mipa mah ka mutpui hek lo. Khatiang dâwtah pawh hremhmun tlâkpui tham tura buru lutuk Dingngheta'n a chhâk chhuak duh kha mak ka ti. Aniin sawi lo se Sangzuala'n min zâwt ngawt lo ang. A lokal hnuhnun ber khan 'Sipai pa chu ka lo bia ang' a tih tak kha. 

Kawng lakah pawh ka ṭawng tam vak lo. Dârkâr thum emaw lek tlan a ni a, tunah phei chuan kawng a ṭha a, kan thleng tlai lo turah ka ngai. Tlana leh Sangzuala erawh an ṭawng bawrh bawrh a, ka phone a rîk lai pawhin atu amahin min ngaihsak lem lo.

Mimtei'n kan thlen chin min rawn zâwt a, "U Naom, u Kimkima vangin rilru ti hrehawm suh, i lamah ka ṭang zel dâwn alawm," a rawn ti a. Thil engkim ka hrilh ve vek zel a, nizan chungchang erawh sawina hun ka nei ta si lo a, remchangah hrilh tho ka tum.

Chawngkawr nen in khatah kan chêng dun dawn a ni a, Sangzuala nupui ka ni tawh a, ka man a pêk rual khan a ta ka ni tih hrilh hranpa ka ngai tawh lo. Ka pasal neih hmasak pawh khan tun ang deuh tho hian inneihna pangngai awm lovin tlân kohin ka kal tawp a; kum nga hnuah a ngai ang chiahin ka awm leh ta. Hmasâwnna ka va nei tlêm tak.

Mahse, Dingngheta nen kan inneihtirh te, an ina ka mo dâwn te kha chuan inngeih leh inrem takin kan awm a, kan hlim dun bawk. Tuna kan boruak nen hi chuan Lei leh Van ang hlauh a ni! Ka chhungril a nui lo a, Sangzuala duhin hmangaih mah ila a nau vang hian ka hlimna a zîktluak thei lo. Kan bul ṭan dan hi a fuh lo vel vek ni maiin ka hria; amaherawh chu, ka nu leh pain amahah rinna an nghat ngam a, nizana a thinrim viau nachhan pawh kha thu dik lo a hriat vang tih ka hria, ṭha taka inzawh theih reng a nih lai a, a thinrim zâwng leh invauna ṭawngkam ang kha ka paidai thei bik lo a ni. Awlsam taka lungawi mai ka tum bîk miah lo.

Thingkah kan thlenin vawikhat min biaa chuti tih lohah phei chuan mimala inbiakna kan nei lo. Kan ṭhiante pahnih titi kârah kan lo ṭawng ve a ni mai a, hresa lo tân chuan inhre ngai lo niawm tak kan ang zawk.

Ka hminga min ko ri leh min sáwi dat dattu an awm vangin ka meng chhuak a, ka lo chhîng sek a ni ngei ang. Sangzuala te in kawtah kan lo awm tawh a, min lo kotu pawh tudang ni lovin amah Sangzuala a lo ni a.

"Kan thleng tawh a nia, nuih luih a ngai leh dawn sia inring rawh le," ka beng bulah a rawn ti sup a, "Teh reng mai, ka thiam zawng tak alawm," tia ka lo chhan chuan, "Naom.." tiin a thaw hawk a, "Min ngaihtuah duh suh, kan inhau tih tumahin an hre lovang," ti nawn leh ngatin car kawngkhar ka hawng a, Tlana leh Faktei erawh an lo chhuak tawh a, Veranda an thleng ṭêp.

Mo hruaia lokal te bâkah an chhung hnaivai tlem an lo awm a, Mimtei rawn chhuakin, "Hey..." tia nui var var chung hian min rawn kuah chung chung a, hlim takin ka nuih lêt ve. 

Sangzuala'n, "Nau-i, an en ṭhup che a nia," tiin Mimtei a en a. "Ho em mai, û hmeichhia ka nei tawh, tih hi hre ve rawh se," tia a chhan chuan kan hnunga ding ka nu leh ka nî an lo nui hak. Min thlah turin an lokal tel ve a, u Sawmi pawh a tel tho. Zan riak lovin zanriah eikhamah an lêt leh dawn a, ka huphurh lâwk hlê.

Sawi tawh ang khan Lunglei leh Lawngtlai inkâr hi dârkâr tam tlan a ni lo a, min thlah tura kal tepawh tumah riak tur an awm lo va. Tlailam dar thumah mo lawmna a hmingin chawhlui an buatsaih a, mi 50 vel bâk an tling lo ang, chumi zawhah ka chhungte ho an haw nghal dawn a, Faktei erawh chu naktuk chawhnuah a haw thung ang. Tlanhlua nena haw rual an tum.

Ka bungrua vel an thiar chhoh chhungin inchhunga lo awm ho te ka chibai kual a, ka thinrimna leh lungawi lohna dah ṭhain ka nui sâng a. A ṭhenin min lo fiam a, "Ka rin aiin in hmanhmawh, tu thar ka nei dawn hnai tihna em ni?" Nui chunga Sangzuala putea'n min fiam chuan ka zak ru hle. 

Kimkima ka hmu lo a, a nî te chhung pawh tumah ka hmu hek lo, a putea te chhungkua leh Thingfâl lama an chhungte, Siaha a mi te an ni hlawm. A patea te chhung pawh tumah hmuh tur an awm chuang lo, Ruatdika hmuh ka inbeisei deuh kha a ni a, an sâwm lo te pawh a ni mahna.

Inchungah kan chho ta hlawm a, Sangzuala room kha an lo sîksawi kual vek tawh a, khum húnna pawh an lo thlâk daih. Ka bungrua an dah lut a, ka nuin, "In room tur chu a nuam dawn hle mai," a ti a, balcony lamah a chhuak phei a, a thinlung takin min lawmpui tih ka hria. 

A hmaa ka riahna room-ah khan Faktei riak se ka tih chuan, Sangzuala'n "In hnuaiah riak rawh se," tia nui sukin Tlana leh Faki a melh a, an lo nui ṭhâ. An rilru te hi a dum siah. Ka nuih pawh a za mai mai lo.

Ka nu nen kan room-ah kan awm a, mi dang zawng inhnuaiah an chhuk tawh.

"Bawihi, i pasal ring ngam la, a nau vang mai mai hian in inkâr tihla suh, Dingngheta chungchangah pawh thiam thu sawi lo la, i pa sawi ang khân ngawih theih hi a ṭha, i tana ṭha lo tur kan ngaihtuah ngai lo tih ring hmiah la, pasal kan neih hian a nuam zawng zawng kan nei bik lo a, keimahniin kan zir tlat chuan tumah an sual rei thei lo tih hi vawng tlat ang che," tiin min kuah vang vang a.

"A harsa ve êm a ni, Mimtei hi chuan min ngainaa Kimkima ber hi a ni, dik tak chuan rilru ka lo siam thawt thawt hi ka inchhir ṭan," ka ti tlang tawp.

"Ka hria alawm, kan thu i awihna rah chhuah hi engtikah emaw chuan i la seng ngei ang, Sangzuala hi mihring ve tho a ni a, a famkim bik lo, dawhtheihte zir a ngai a, tlâwm zawk nih hreh loh tur," tia a bag zen rak rakin, "Hei hi i pain pe tur chein min ti a, a ṭul apiangah i hmang dawn nia, hlawh i nei si lo a.." tiin pawisa ka malchungah a rawn dah a, hnial tumin ka âng zuau hman tihah, "I account ami kha chu khawih loh hram tum la, i û pêk che leh hei hi kawl la, hmang rawh," a ti leh a. A zât pawh a sawi chuang lo a, ka zâwt bik lo.

Ka ṭah a chhuak ut ut. U Chhanhima te nupa kan ina lo awm ngai ta lo se heti tut tuta min tur hmanhmawh hi ka ring lo. Ka nu leh pa an ni miau a, ka tana ṭha lo turah min nawr lui dawn lo tih ka thinlungin a hre ve.

Inhnuaiah midang finin kan chhuk ve ta a, thingpui an lo in mêk. Engmah programme hranpa a awm lo a, kan thlen hlim khan a putea'n thu tawite a sawi a, a ṭawngṭai bawk. 

Chaw eikham dar li velah ka nu te thlah turin pâwnah kan awm a, u Sawmin min kuah vang vang a, "Hlim taka awm tur i nia, i hlim lo tih ka hria, harsatna i neih phawt chuan min lo hrilh dawn nia," a ti a, a mittui a tling pam mai. Ka nu pawh an kal dawn meuh chuan a ṭap lek lek a, ka nî erawh chu a dan pangngaiin a nui leh var var tawh.

Sangzuala'n ka darah a kuah a, ka lo ṭang ṭeuh. 

Ka nu te an tlan liam meuh chuan ka hnuk a ulh titih a. Zanin chauh châm tura ka lo ngen lo kha â ka inti hnuhnawh viau. Mahse, an vaia Sangzuala te ina thlen ṭhup kha an inthlahrun ka hlau deuh a, pazawn ka nei ve tho a, pa Ropuia a ni a, a fel hmel khawp mai, ka nu nen rei fe school khatah an thawk ho a, a pension hnu hian Lawngtlaiah an inbengbel a, "Remchangah in nupain chaw in lo la ei dawn nia," a ti nghe nghe.

Zan dâr riat a rîk meuh chuan ka chauin ka luak a chhuak hlui tawh a. Ka thawmhnaw pakhat mah kan la phawrh darh lo a, Kimkima pawh zanriah ei dawnah a rawn chhuak ve a, zakdawh tiang nen a rawn inhawl chhuaka min melh eih lo. Pawi ka ti lo nasâ. Min be lui ṭâlh ang tih ka hlauh mah nâk alai a.

Tlana a kâi deuh chhak a, a pâwt peih hle. "Zanin chu ka bihthla dawn che u," tih vel mai maiin a râk a, Mimtei'n, "I hmuh châk leh nangmah khan tih tur va zawng rawh," a lo ti hmak a,  ka hriat sual loh chuan Faki pawh hi a kâi ve deuhin ka hria, engtik laiin nge an lo in hman hriat pawh va ni suh. 

Kan thlen hlim khan inbualna hun ka nei si lo a, inbual ka châk takzet.

Tumah in lêng an awm tawh lo a, Tlana leh Faktei an la ṭawng char char a, a hlimawm phian. Kan boruak rit lutuk tur pawh anmahni vang hian a hahdam phah deuh; Kimkima pawh kan zingah a awm ve reng a, Faktei nen an inbe thei viau; min hua ang pawhin a lang chuang lo a, Sangzual zâwk a ṭawng tlêm khawp mai. 

Intihfai chhuanlamin room-ah ka chho ta a, Faki inhnuai room âwlah a riak dawn a, Tlana leh Kimkima room khatah an awm leh ka ring, Mimtei pawh a chau deuh a ni ang, nichin deuh khan mu turin a kal tawh a, Tlana rûiin a fiam nasa êma a ning deuh a nih ka ring.

Ka thawmhnaw inbel tur la chhuakin bathroom-ah ka lût a, zing lamah inbual tho mah ila ka ban chuap bawk nen intleuh zuai ka duh. Khum khata mut dun ka va hreh ngar ngar tak, a rûka zu in lah chu thil tih chi a ni mang bawk si lo, 'ka in tawh miah lovang' tiin ka lo intiam tawh si a, ka ngaihtuah thui duh ta lo law law.

Sangzuala nena kan room inṭâwma ka luh leh chuan khumah a lo ṭhu a, "Ka'n inbual ve lawk ang e, i duh chuan mu rawh," a ti zawi ruih a. Ka ngawi reng.

Ka thawmhnaw vel a ngai ngaia la awm chu naktuk lama tihfel atan ka khêk ta mai. Ka che peih thlâwt tawh lo, ka nu te'n an thlen tawh thu min rawn hrilh a, thil tam tak a sawi leh hmain ka off daih. A pawisa min pêk kha Sangzuala inbual hlanin ka chhiar zuai a, singhnih leh sangnga a lo ni a, ka wardrobe hawngin u Chhandama min pek leh man eitu neuh neuhte min pêk khawm nen ka kalh hnan hmak. Amah hrilh hriat kher pawh ka tum lo. 

Lucknow-a a kal hunah a hlawh min lo thawn ve dawn nge, engtin nge ka khawsak zel ang hriat a ni lo a, Kimkima kuta pawisa vel a dah phei chuan inhlawhfâk te pawh ka ngai mahna. Private-a thawhna tur tal awm se ka va ti tak.

A vawikhat nân hna nei lova awm hrehawm ka ti ve ta. Hmái uanna tur chhete mah ka nei lo a, ka hmanchawp tur takngial pawh ka thawh chhuah loh chuan ka tân kawng a ping hle. Ka khâwlsa hmang dawn pawh ni ila rei ka daih chuang lo ang, eng emaw tak tih ve chu a ngai a ni.

Sangzuala nen kan inhmuh/ kan ina a lokal aṭang khan thla hnih a tling chiah chiah a, kan mut dun aṭangin thla khat tlin nân kâr khat a la ngai thung. Nau pai tih velah kha chuan engmah beiseina ka nei hran lo. Rei lotê chhung emaw tih laiin nî a liam zung zung a, a chawlh a hmang zo ṭêp.

Khum kil têah ka mu a, light erawh ka off lo. A rawn luh laiin bangkil lam ka hawi daih a, a che vel thawm ka ngaithla reng.

"I muhil em?" Tiin khumah a rawn lâwn a, "Aih" ka lo ti vat. Ka muhil lo miau a, chhâng duh lovin ngawi ta ila, min ti harh leh tho ang.

"A ṭhat chu, tho lawk teh," a ti a.

"Eng nge?" Ka lo ti hû.

"Tho tih lemah ṭhu chhuak la a tawk mai," a ti leh sup a, a hmel a nelawm teh chiam lo. 

A ngaihna hre vak lo chungin ka ṭhu ve ta tho a, box te takte a ken chu a hawng a, a chhunga awm ka hre nghal. Zungbun kha.

"I man ka pe fel tawh a, chhinchhiahna i bun thei tawh e," tiin ka kut a la a, zungbun chu min bun tîr nghal a, ka en chiang lem lo. 

"Min bun tîr ka phût hran lo a nia," tia a sawi zawh rualin pakhat zawk chu a bun ve nghal a, thu dang sawi tawh lo hian, "I mu thei," a ti nghut.

Chumi hnu chuan light a off a, khum sir teah a tawlh phei daih! Kan inkâr a âwl duai a, puan erawh kan sin hrang lo. 

Kan inneih zan ve chu leh!

Muhil thei lovin ka meng kar a, ka phone hmet êngin ka en kual a, eng thil thar mah a awm hran lo. Chutia ka thâi kual vel lai chuan Sangzuala a rawn tho thut a, ka phone min lâksakin a lukham hnuaiah a dah daih a, a ṭawng miah lo. Thinrim ru deuh hian ka mu leh ta a, ka chauh teh reng nen ka harh telh telh si.

Khum khata mu dun siin kan inkâr erawh a hla duai a, kan thinlung phei chu a inhlat viau ta ve ang. Dik tak chuan keipawhin hnaih châkna ka nei lo.

"Kan inneih zanah sipai dik tak i hmu ang" tiin a sawi kha a nia, saw tia mut tûm bûr saw sipai zia dik tak chu a nih dawn saw. Nupui neih hlima inlâk hran, tum bûr, ṭawng hmuk hmuk. Haha.. ka thil ngaihtuah avang chuan ka nui ta hak a, hmui ka hup ve naa ka nuih a za tulh tulh.

"Naom, eng nge nuihzat tur awm?" Sangzuala'n a ti sup a, "Engmah," ka lo ti a.

"Bengchheng reng lo khan muhil rawh, ka muhil duh a nia," a ti leh hmuk a, a rawn ṭawng chhuah leh lek phei chuan ka nuih a za zual a, insûm tingtang tawh lovin ka nui ta kar kar a.

"Ka kham hle mai, i muhil dawn lo a nih chuan insawn rawh," tiin a inkhuh a, ka thin a va rim tak. 

"Aw le.." ka ti ve hmak. Ka nuih pawh a za tawh lo.

Khum mawng lam aṭanga chhukin puan chhehchhawl chhuatah ka phah a, an mutbu dahna pawh ka hre bawk si lo.

Thlanglama inhûng rizai leh blanket ka chhawm chu lain puan chhehchhawl chungah rizai ka phah a, puannuam pakhat ka phawrh leh a, lukham pawh a thar ka phawrh law law, mai mai a; mut hran a duh te chuan ka lawmthu tak.

Chhuatah ka mu kawm ngal a, ka inkhuh phui vek bawk, light pawh ka off tawh. A duh emaw duh lo emaw a phal emaw phal lo emaw ka rilru damna tur a sawi chhuah hma chuan chhuatah ka mu ngar ngar ang.

Ka harh leh chuan a la hma hle a, khatia ka inkhuh phui hnu khan ka lo muhil daih a ni ngei ang, khua a vâr ṭan dêt dêt a, mut leh dawnin a laklawh ka hlau deuh si, dimtein ka tho chhuak ta a, Sangzuala a mu tui hle a, kawr ha lova muin boxer a inbel tawp a, puan pawh a sin lo. A bân lehlam khamin sir zawng hian a mu a, a zungbun bunna lam a kut chu a pumah nghatin a thaw sâk sâk a. Hlim taka mu-a inkuah chu kan va hlat tak. 

Tihharh hlau zetin ka chhuak ta  a, bathroom-ah rei ngial ka inkhung a, chumi hnuah inhnuaiah chhuk lehin a lo reh ṭhiap. Kawngkharpui ka hawnga ka chhuak ta a.

Hei hi ka pasal neih tûka ka bul ṭan dan chu a ni, a va ho tak. Mi innei thar hlim te nen chuan tehkhin chi pawh kan ni lo. Sangzuala mizia inthlâk ta daih hi a chhan hre mah suh ila ka ngainat zawng a ni lo va. A lakah lâwmna tur leh lungawi hliah hliahna tur ka hmu lo bawk, ka lo beisei ang inneihna hlimawm kha ka ban phâkah a awm lo a ni mahna.

Thui fê kein ka kal a, phone keng lova chhuak ka nih vangin ka sana bun lai ka bih a, zing lam dar ruk a pêl tawh, an lo thawh hmaa lêt hman tumin in lam ka pan ta a. 

Veranda-a Sangzuala tei vut vut ka hmu hmasaber. Amah chuan min la rawn hmu ve lo a, ka en renga a sana bun lai a bih vung vung a, chu tah lo hawi chhuakin min rawn hmu ta a, kâwng dawm meuha min lo thlir chuan ka zâm chhe lo chauh. A hmêl lah chu 'ṭo' haw tur ang maiin a dur khup a; rum lutukin min la melh zui.

Veranda ka rap kâi chiah tihah ka banrêkah a rawn man a, min pawt nawk. "Lalmuanpui, khawiah tehhrep nge i kal?" Zawi fiah takin a ti ta a.

"Ka hawi khawthawng mai mai," tiin dam thlapin ka chhâng a.

"Bengchheng lovin min rawn zui rawh," tiin kawngkhar a hawng a, ka zui ve dat dat, min vawnna a la thlah chuang lo. Tumah an la tho ve lo nge a reh ṭhiap a, kan room lamah min chhohpuiin eng mah a sawi tawh rih lo. Ka chhuah khan dâr nga vel a ni a, dârkâr khat ka awm bo tihna a nih chu.

"I lung a âwi lo a nih pawhin midang hriattír kher i tum em ni? Pâwnah khan eng nge i tih?"  A ti khur khur a.

"A la hma sia, exer ka la.." ka ti a, thinrim ang pawhin ka lang duh lo.

"Huh! Ka awih ring suh," tiin a nui lui hawk a, "I duh leh awih la, duh leh awih lo la, sawi theih vak ka nei lo," ka tih chuan, "Nia, sawi theih i nei lo, i mize chimawm leh luhlul zet hi kâr khat a ral hmain ka ti bo vek ang, lo ngâi reng rawh, i hre dawn khawp mai," a ti leh nghut nghut a.

"Khatiang nun lem zet kha eng atan mah ka ti bîk lo, min duh ang deuha lan der pawh kha a ngai lo a nia, nang ang lo takin he inneihna hi ka ngaihlu a, chumi a nih rualin i duh ang anga min kawih her tum duh suh," ka ti ve ngat.

"He inchhungkhurah hian buaina ka duh lo a, ka nupui chuan ka thu a awih tur a ni, mikhual i ni tawh lo tih inhria ang che," tia ner sawk chung hian dawhkana tui bottle chu banin a in khawlh khawlh a, "Kimkima nen buaina nei suh ang che u, atu ve ve mah ka ṭan dawn lo che u a nia," zuk ti a!

"Min tih hmasak chuan ka ngawi awm lo e, ka en liam mai mai bîk lo ang, ka diknaah pawh min ṭan ngam dawn lo a nih chuan, ṭantu tur ka zawn a ngai dawn a nih chu.." tiin khumah ka ṭhu a, min en vung vung chung hian, "I diknaah chuan ka ṭan ang che, mahse, ka nupui i nih angin insûm theihna leh dawhtheihna neih tum rawh, eng emaw hlekah naute khin zel loh tur." Dam thluamin a ti lawi a.

"Chhuankima khu ka nau a ni bawk lo.." ka lo ti vak a, makti hmel taka min rawn enin, "Eng maw i sawi?" a ti vin ṭhawt. Min ben a châk hmel khawp mai. 

Zâm map lova en lêt chung hian, "Ka nau a ni lo, ani aiin kum khatin ka naupang zawk a, khawvel tawp thleng pawhin ka nau a ni ngai lo ang," ner nânga tiin tui bottle pakhat ka ban ve nghal a.

"I ṭawngthei sâwt hle mai, i mizia eng zât hi nge hriat belh leh tur la awm," a ti ta a.

"Sawmlehpakhat mah..." ka sawi zawh rualin a phun sup a, eng nge a sawi ka hre lo.

"Kan Chawngkawrpa khu khin deuh a ngai a nih pawhin ka hreh miah lo," ka la ti zui a.

"Lalmuanpui...." tiin min hnaih ruak a, ka ṭhutna aṭanga tho chhuak vatin ka tlân thut a, min man hman lo. Kan room kawngkhar nghengin ka thaw halh a, min man hman se chuan ka chawh ngawt ang. Vanneihthlâk deuhin min ûm zui lo teh tlat! 

Sangzuala bulah Kimkima ka huatna hi thup ka tum lo va, ṭhat der ka thiam hek lo. Ka nihna ang ang hian lang ila ka tân a ṭha zawk.

Ka vanneihna a kal tluang lo nghal pang. In hnuaiah ka chhuk a, ka hmuh hmasak ber chu kan misuala a ni, ka thâwm hriain a rawn hawi chhuak a, nelawm vak lo hian, "Mo chu thawh hma tur, sipai nupui nih phei chuan hma takah thawh tur," ngeiawm zetin a ti a.

"Sipai nupui zinga tho hma ngai lo awm chhun nih ka tum," tiin ka chhâng ve hmak.

"I zak lo ngawt mai, nuthlawi zah hre lo chin i ni bawk a," a ṭawng ring vak lo naa ka hre pha vek tho.

"Eng ang mi pawh ni ila i û in min duh tho chuan a tâwk, ka pasal pawh i ni lo a, i lo buaina tur a awm lo," ti lêt leh sakin ngaipawimawh lo tih hriat zet hian tui lum in tur ka insiam a, a ner nûng chu ka hmu reng.

"I duh duh khan han awm phawt teh le, Mama kal hunah i dinhmun dik tak i la hre dawn alawm," tiin bâi suih suih chung hian a room-ah a phei ta a. 

Min hmu tawh lo nain rum zet hian ka la melh hrâm.

Ni e, he pa nen hian indona kan ṭan chho dâwn chiah. 

'Naom, zâm miah suh' tiin ka infuih ru sauh sauh thung. Nizanah kan mu hrang tih hria se lawm lohvin a nui vur vur ang chu. 

A bialnu lakah khan sual ka chhuah ang nge, Mimtei ka fuihpawrh zâwk dawn?

B®®

B+>[BeckirafARenthleI]<+®®

Ka mood a off hle mai🙃🙃