14.NAOM [Mizo Love Story] -B®®

14.NAOM [Mizo Love Story]

Ziaktu: Becky Rafa Renthlei

B®®

Shadow of the life

"Eng ang mi pawh ni ila i û in min duh tho chuan a tâwk, ka pasal pawh i ni lo a, i lo buaina tur a awm lo," ti lêt leh sakin ngaipawimawh lo tih hriat zet hian tui lum in tur ka insiam a, a ner nûng chu ka hmu reng.

"I duh duh khan han awm phawt teh le, Mama kal hunah i din hmun dik tak i la hre dawn alawm," tiin bâi suih suih chung hian a room-ah a phei ta a. 

Min hmu tawh lo nain rum zet hian ka la melh hrâm.

Ni e, he pa nen hian indona kan ṭan chho dâwn chiah. 

'Naom, zâm miah suh' tiin ka infuih ru sauh sauh thung. Nizanah kan mu hrang tih hria se lawm lohvin a nui vur vur ang chu. 

A bialnu lakah khan sual ka chhuah ang nge, Mimtei ka fuihpawrh zâwk dawn?

B®® 110721

Inneihna ropui leh mi hriat hlawh a ni lo bawk a, inlêng kan nei rei lem lo. A putea te chhungkua an lo lang zeuh zeuh a, Sangzuala te ina ka awmna pawh ni li a pum ve tawh. 

Chhuankima nen boruak danglam kan nei hran lo a, ṭûl tawpah lo chuan kan inbe meuh lo; Tlana leh Faktei an haw tawh a, "U Naom, Tlana hi ka ten tlat, min ngaizawng chiang lutuk," tia Mimtein min hrilh chuan, "Mi sual a ni miah lo a, zu hi in lo se a fel ngawt ang," ka ti liam puat.

"Min duhpui tihna mi?" Tia min zawh chuan, "I duh leh duh loh a ni mai, a sual hran lo ang," ka ti a.

"Ka ten e a," a la ti hrâm. Ka sawi thui pui duh lo.

Ka nu leh pain min ngai viau a, ka nu phei chu ka room-ah a ṭap a ni awm e, pasal nei turin min duh mah se a fanu neihchhun ka ni a, engah nge min ngaih loh tehlul ang, keipawhin ka ngai em em. U Chhandama te nupa Aizawlah an phei leh tawh a, chanchin a chhia a ṭha min lo hrilh zel ang che a ti.

Sangzuala nen kan nupa inkâr a la ṭha fahran lo. Khum khatah kan mu nain kan insi eih lo. Kan room-ah chuan hremhmun sipai dik tak zia ka hmu a, pawnlam leh midang hmuh phâkah erawh min ngaihsak tho a, a naute pahnih awm lai pawhin min duat viau lawi. Phakar thiam a nia.

Min huatna tilang chuang miah lo hian min hlat dû a, mahse, pawi ka ti lo. Inhau hrim hrim ka peih loh avangin ka ngawia ka haider a ni zâwk mah. Kan inneih aṭangin nupa nun kan la hmang lo bawk, ka khua a har ru a, mal riauva inhriatna ka nei; Mimtei awm lo phei se chuan ka hrehawm zual ngawt ang.

Sangzuala leh Mimtei bazar turin an chhuak a, Inrinni zîng a ni nghe nghe; eirawng ka bâwl peih vek tawh a, kan inah khân in chhungkhur enkawltu ka ni a, inchhung chêtah na na na chuan ka taimâk bâkah ka che fel tih ka hria, eng lai mahin inchhung a bâl ngai lo, sûk tur ka dah khâwl ngai hek lo. Chutiang chiah chuan hetah pawh hian ka che a, zingah ka tho tlâi ngai lo, a hmain Sangzuala'n zing dâr ngaah min kâi tho ziah a, ngaiah ka nei tawh.

Mimtei pawh a che fel a, kan pahnihin engkim kan ti dun a ni deuh ber, zing thawh erawh a harsat deuh a, dâr sarih hmain a tho ngai meuh lo. Chhuankima pawh ngei ru viau mahila ka pasal nau a nih tlat avangin tuktin a room ka phiahsak, a awm loh laiin a ni tlângpui; a malpui hliam a dam ṭan tawh a, zakdawh tiang hmang tawh lovin a bâi suih suih a, in lamah a nauin a dressing sak zel avangin a dam har lo turah ngai ang.

Sangzuala te an lo haw har êm avangin ka ril a ṭâm tawh si a, Mimtei ka va phone a, an lo haw har tur thu leh chaw eisan mai turin min rawn hrilh a, dâr 9 a pêl duai tawh.

Chaw ei ka siam a, Chhuankima a room-ah awmin chaw ei turin ka ko a, "I duh leh nangmahin va ei rawh," a ti a. Laptop min bihsan zui hmiah. Ngawirengin ka chhuahsan ta a.

Keimah chauhin chaw ka ei a, eng êm êm nge an tih khawtlai le? Mimtei khan a sawi bawk si lo a, Chhuankima nen chauha awm hi nuam ka tih miah lo, ka ril a ṭâm bawk a, ka ei nual.

Thleng ka sil laiin Kimkima a rawn chhuak a, ka ruala ei duh mang si lovin amahin a insiam lui kher, ka va han ngei tak. 

"I ei nghal dawn tho te chuan ka rual khan ei ve la ṭha tur a nia," ka ti satliah a.

"Ka duh hun hunah ka ei ang chu, kan in alawm," a ti hmuk, "In in a ni lo pawh ka tia mi, ka siamsa tho alawm le i ei dawn," ka tih chuan a tho thut a, "Ka ei lo tawp ang," tiin rum deuha min melhin a tho chhuak a, "I va han sual tak," ka ti vak, ka insûm thei thlâwt tawh lo. Thinrima chhâng pawh ka ni lo, inhau hi a duh hrim hrim a ni ang.

"He ina awm tur hian ka duh lo che tih i hriat kha, i hmêl hian ka luak a ti chhuak," zuk ti kher a.

"Duh lo mah la ka awm tho si a, i luak a chhuak nitin dâwn a nih chu, chutia ka awm i duh loh ngawih ngawih chuan i û hnenah 'indang ang' ka ti mai dawn em ni?" Ka'n ti chiah chu, min thah a châk hmel khawp mai. Hetiang em ema huatna mitmenga min entu hi ka la tawng ngai lo. Ka hlau ru deuh hial.

Rei fê min melh ngawt ngawt a, ka hawisawn duh bik ṭhak nang.

Sangzuala bike ri kan hriat tâk avangin a hawi sawn a, kei pawh pâwnah ka chhuak daih, Mimtei inkhai bâwr lâk chu a bag ka lo laksak vat a, "Damlo kan kan a, kan rei ta vek a nih hi.." tiin inchhungah a lut a, Sangzuala a ṭawng lo.

A hnenah engkim hrilh hi nge ṭha ang, ti hian ka ngawi reng mai dawn, ka hah ru ngawih ngawih.

"Chaw ka eisan tak tak che u a nia," Mimtei hnenah ka ti a, "U Kimkima'n a la ei lo em ni?" Tia min zawh chuan, "Ka rualin a ei duh si lo a, ka ei san.." ka ti hmiah.

Ner sawk chung hian, "Sual a chhuah leh a ni maw, nakinah ka lo hau ang," tiin chaw ei a siam zui nghal a, Kimkima an va koh pawhin a lo chhuak duh lo a, Sangzuala'n chîk zetin min en. An thil lei vel ka rem fel chhungin chaw an ei a, dik tak chuan nuih luih a har ve a ni.

Inrinni a ni bawk a, kan room ti fai turin inchungah ka chho a, Mimtei'n a room a ti fai ve bawk a, Kimkima chaw ei lovin a la inkhung char char. Sangzuala Tv enin common room-ah a awm a, inchunga ka chhoh lai pawhin min ngaihsak lo hrim hrim, an bazar lo haw aṭang khan a hmêl a nelawm loh zual a, min hau hran lo nain thil nuam tak chu a ni lo.

Khum ka siam laiin a rawn lut a, thlanglam balcony chhuah pheina bulah kut hnungsuih hian a ding a, ka mitsirin ka hmu reng, min biak hmasak loh chuan biak ka tum hran lo va. Minute nga dawn chutia a din hnuah chuan zawi sup hian, "Tukinah Kimkima nen eng boruak nge in neih?" Tiin min zâwt ta a.

"A hahthlâk a nih hi, engtikah mah ani hi chuan min mil thei chuang lo ang, kan lo innei ta hi a pawi ka ti," tiin a zawhna tak chhang lo leh thinrim chuang lovin ka ti sap a, ka kham hluah hluah.

"Ni li emaw lek kan inah i awm a, i inchhîr ta mai elaw.." a ti chang fak mai.

"Ni e, ka inchhir," tih pahin khum ka siam zawm zel a, amah pawh ka en lo hrim hrim, "Naom, engvanga min nei nge i nih? Nangmah ngeiin tunlaiah chuan tumahin an duh lo chungin nupui pasal an nei lui tawh ngai lo tih kha i sawi a, ni li chhung lekin i inchhir leh nghal a nia, eng vang nge?" A ti hraâwk a.

"I sawi zawh chiah khi, ka duh lo chunga nei lui che ka ni lo, ka duh vang chea innei kan ni a, mahse, i awm dan hriat thiam har zet leh i nau vang hian rei kan innei pawhin ka ring lo," ka ti ve zel.

A hmaa nupui nei anga a insawi ṭum a, min tihder lai khan, 'tunlaiah tumahin an duh loh pui an nei tawh ngai lo' tih ka sawi a, tuna ka rilru pawh a ni tho. Ka nu leh pa min nawr avanga Sangzuala hi nei ka ni lo a, ka duhthlanna ngei zawk a ni. Zêp lah ka tum hek lo.

"A nih eng ati nge min hlauh hmel deuha i awm reng si?" A la ti zâwk mah.

"Lutuk che hian a, man hlan zana i ṭawng dan te kha, min hmusit ngawih ngawih tih ka hai lo, nge, min neih chhan hi ka hre sual em ni zâwk?" ka ti ve hmiah.

"Chu ti, ka neih chhan che i hriat a ngai a nih chu.." tih pahin min rawn hnaih a.

Tawlh sawn pah hian, "Min hnaih suh.." ka lo ti ṭhat a.

"Ka nupui ka hnaih lohvin ṭhenawmnu em ni ka hnaih ang, huh! A teuh lo.." tiin ka bân puamah a rawn man a, khumah amah ṭhuin a malchungah min pawt ṭhu nghal a, ka ṭang ve naa thâah ka hneh teuh lo, min chelhbet hnehsawh lutuk tlat.

"Ka duh che tih hi vawi eng zat nge sawi ngai a?" tia rawn kûn hniamin min fawh a tum a, ka lo thle sawn ve ngial. Chu chu duh lovin ka biangah a kut pahnihin a vuan a, min fâwp ta tho.

Na zetin min fâwp a, min thlah leh thut a, "Ka nupui fâwp tur hian dikna ka nei," ti supin khumah min hlâng a, a rawn lawn zui zat bawk.

"Ka nghah reng nachhan tur ka hre tawh lo," a sawi zawh rualin min fawp nawn leh sak a. Duh lovin ṭang eng ang mah ila, a sâwt leh dawn chuang lo, thiam leh zei taka min fawhna te, min chûl velna chuan ka kawchhung a fan raih raih. Ni e, ka pasal a ni a, thinrima min sual lui a ni hek lo. Dam thlap leh ngenngawl tak, phût lêt nei rana min tawhna chu ka hnar thei dawn em ni? 

Nupa inkâr chauha hman tur nupa nun dik tak tem turin ka insawrbing ta zawk a. Tuna ka hnial a nih chuan kan inkâr hi a chhe tulh tulh dawn tih ka hre bawk. A nau chu sawi loh amah nen kan inrem tal loh chuan ka hrehawm lutuk dâwn.

A shirt hak lai hlipin chutiang zel chuan a inphelh fâi kelh a, ka thawmhnaw inbel awlsam zeta min hlihsak hnuah sawi buai tur awm miah lovin a ta dik takah min siam ta a, a hmel pa leh ruh ṭalh ka en chuan ka zak deuh. 

Hawi sawn miah lovin min en lêt bawk a, "Ka ta, ka ta chauh i ni," tia thaw hawk chungin ka sirah a rawn mu thla a, inneih zungbun ka bunna lam kut chu la kangin a fâwp vang vang a, "Zaninah ka chhunzawm leh ang," a ti zui sup a.

"Eng a?" Ka lo ti hliai a, nui hawk chung hian, "Kan inneih zan chhiar telin zan li ka off a, chu mi zawng zawng chu naktuk tlai ral hmain ka fill up vek ang," a ti a, a nui ruh ruh bawk.

"Kiri.. tenawm suh..." nui chungin ka ti a.

"Ka tenawm lo a ni ang, nichin lawkah pawh min kuah chungin Sangzual i tih ṭâwk ṭâwk kha," nui chunga tiin min kuah zawm leh zat.

"Kawngkhar ka kalh ang a, kan ṭan leh nghal dawn em ni? Vawi thum kan la bâk," a tih chuan kawngka lam ka melh zauh a, "Tho rawh, i thawmhnaw inbel la..." ka ti a.

"Ti hian rei lo te mu lawk ang," a ti sup ringawt. Mahse, midang an lo kal thut ka hlauh avangin ka tho chhuak lui ta a, min dang bîk lo; chhuata kan thawmhnaw darh phung chu chhar khawmin towel ka bih nghal a, "I pian hi chu a nalh reuh maw le," tia inbengkangin min rawn thlêk vung vung a, "Ṭawng ṭawng lo khan tho rawh.." tiin a lamah towel ka theh phei a, min hnial lovin a tho chhuak ve tlat! 

A saruakna zahpui hauh lovin khumah a ṭhu a, a taksaah tisa chuangtlai hmuh tur a awm lo, a inphut nalh hle. Ka en vang vang a, kan mit a intawng sak.

"Khatia min en reng chuan i duh belh lehah ka ngai dawn a nia," a ti a. Hmanhmawh lutukin ka tlan chhuak nghal. A nui hawk hawk ri ka la hre pha tho..

Bathroom-ah ka insil thuak thuak a, room-a ka luh leh chuan towel veng chung hian khum khuhna a lo pawt mar ve ngei. Ka nui leh hak a, rawn hawi lêtin, "Min nuih elaw.." a ti a, a nui ve tho. A che fel thlup tih hi chu ka hriatna a rei tawh, kan ina a lo riah te, an ina ka mikhual ṭum te leh tun ni li chhung hian ka hre ve thawkhat.

Û mipa pahnih ka nei a, an che fel lem lo. Sangzuala erawh chutiang ni lovin a sulhnu chhui nawn ngai a awm meuh lo, engkim a dahna tur hmunah a dah thlap a, hmuh mawh awmin a awm lo hrim hrim.

"I va fel ve," ka ti a.

"Thu i awih chuan ka fel tulh tulh ang," a ti ṭha mai.

A intih fai chhungin thawmhnaw dahna ka rem fel a, min kalsan hun tur ka va huphurh tak.

"Nám, ka inbel tur lo dah chhuak lawk, a ngai kha chu a bal tawh a," tiin a sam a hru mawlh mawlh a. 'Nám' tia min koh hi chuan a thinrim lo tih ka hrethiam mai.

A inbel tur ka dah chhuak a, "Nichina ka zawhna che kha chhang tawh rawh le, tukinah Kimkima nen eng nge inhnialna inneih?" Tiin min zawt a.

A vaiin ka hrilh ta vek a. Min zâwt lo se chuan hrilh kher pawh ṭul ka ti lo a, mahse, min zâwt ta rau rau bawka dâwt tel lova sawi mai kha a ṭha.

"Ka dinhmun hi a khirh hle mai, i thinrimna pawh âwm ka ti a, mahse, ka sawi tawh ang khan chhâng lêt lovin en liam thei la ka la duh fo, Lawmi hi a ṭhian ṭha tak a ni a, ani nei lova nang ka nei ta che hi a thinrim chhan ber a ni," tia ka bulah lo dingin hnunglam aṭang hian min kuah a, ka nghawng leh a hmai sîk tîrin, "I ngawih reng na na na chuan ziaawm hun a nei mai ang," tiin a thaw lum ham ham a, "A harsa ve em a ni, a ṭawng duh dan a ngeiawm thei si," ka ti a.

"Ka nupui i ni a, en tin mah i ti lêt lo chung pawha sual a chhuah luih tlat chuan, ka inrawlh ang, tunah rih chuan dawh hrâm rawh aw.." a ti a.

A sawi dan kî hi ka man thiam ve reng, mahse, harsa ka la ti fan.

"Ih, Lucknow-ah min hruai ve mai rawh.." tiin ka dîl ta nge nge a.

"Khawngaihin hriat thiam tum hrâm rawh, i natna tur leh hrehawm tuar tir tura nei che ka ni lo, hruai thei che ila chuan ka hruai lutuk ang che, nupui ka nei tih pawh ka la sawi lo a, engkim ka peih fel hun lo nghâk la.." dam thlapa a tih leh tâkah chuan, "I kal hmaa innei lo hian i lo chhuah hun kan lo nghâk zawk lo a ni," ka ti leh hnuhnawh a.

"Tih dan ka hria..." tiin amah en turin alamah min kuai her a, nui suk chung hian, "Kan in bangah hian Lucknow tih ka târ ang a, ka kianga awmah lo inngai mai rawh," a sawi zawh rualin za lutukin a nui a, "I chhia, i sual..." tih pahin ka chum awk a, la nui kur kur chung hian, "Hei aia ruahmanna ṭha i hre bik em ni? Lucknow hnai ber a nia," A la ti zui.

A nuih loh theih loh. 

"I kal dawnah târ nghal ang che," ka ti ve ta tho.

Chumi hnu chuan a wardrobe lian zawk kan chingfel dun a, thingpui in tura Mimtei'n min lo koh lai pawhin Sangzuala fiamthu thawhah ka la nui kar kar.

A nau vanga inrem lo renga awm âi chuan ka bula a awm theih chhung na na na hi chuan hlim taka siam ka duh ve. Kei, a nupui ka ni a, pakhat a nau duat a ni bawk. A tana a harsat dan tur ka hai bîk lo.

Thingpui in turin kan inzui thla ta a, dâr khat a lo pêl duai tawh.

Mimtei'n Kimkima thingpui in turin a ko a, "Min rawn pe mai rawh," tia a lo chhân vangin Sangzuala ngaihdan a ni ta vak lo a ni ang, "Room-a pêk ngai khawpa damlo bet a ni tawh lo, a in duh a nih chuan lo chhuak rawh se," Mimtei bulah a ti hmiah.

A û thusawi chu a hnial ngam lo a ni ang, room aṭangin a rawn chhuak a, ngawi rengin thingpui leh a hmeh a la a, veranda lamah a chhuahpui daih. Sangzuala'n a khak zui lo.

"Nám, bike ka check tîr lawk dawn a, i lo kal ve duh em?" Tia min zawh chuan, ka duh loh thu leh bathroom tih fai ka tum thuin ka lo hnial a, dar san âk chung hian, "Indim la, vawikhatah tih ṭeuh loh tur," dam thluama tiin mitmeng de sar hian min en a, "Zan lama ka chanpual tur ṭha taka i tih theih nan, induat thiam rawh," ka beng bulah a rawn ti sup a.

"Kal mai teh..." hawi zak zak chungin ka ti a, kan ṭawng hre pha tur erawh an awm lo hlauh.

Sangzuala bike nen a chhuak tawh a, inhnuai lam bathroom ka tifai a, Mimtei'n chhuat a nâwt thung. Kimkima veranda-ah a la awm nge a chin ka hre lo, puitling ṭhiau kan ni bawk a, chêtna tur a tam lem lo khawp mai. Ka rilruah hnathawh tur zawn hlir a lang a, heti ringawt chuan thil tih chi a ni lo, Sangzuala titi pui ka tum ta a. A nih loh pawhin Mimtei nen thawmhnaw lam zuar ve ta ila... tlai khawhnuah ka fing ve chauh. Kei mi mâwl rei hi...

Veranda lamah ṭawng sap sap thawm ka hria a, Kimkima'n phone a hmang nge inlêng kan nei dâwn tih pawh ka hriat si loh. Common room tukverh aṭangin ka va dâk a; Lawmi leh Kimkima inhnaih fe-a ṭhu dunin an lo inbe lek chu niin.

An thu sawi hre mah suh ila, midang hriat ve an duh lo tih a lang reng. Amaha rawn lêng ve ngawt chu a ni lo tawp ang, kan nauva sawn a ko a nih ka ring ber. An pahnih hian ṭhian ṭha tak an ni tih Sangzuala khan a sawi a, an tawrhhlelh awm dun ngawtin a nia ka rin.

Mimtei nen eirawng kan bâwl a, chutia inlêng nei ve ta chu Mimtei'n thingpui a va pe a, "In monu thar lum ka in châk asin," tia Lawmi ṭawng ri ka hre pha reng. Huatah ka la duh lem lo; an ṭawng chhuah satliah ka haw zêl dawn a nih chuan lungawina tur eng lai mahin ka nei ngai lo ang.

"Nakinah i la in lutuk ang, i lokal zing tho a, u Naomi a tlan bo dawn pawh nihlei lo," fiamthu ti tak deuha Mimtei'n a chhân chuan ka lo nui sak a. "I û a zui ve dawn lo em ni?" Tiin Mimtei a zâwt a, "Zui lo ang, ka phal lo, auMama'n a hruai luih dawn leh ka kal ve daih tho ang," tiin a nui hak hak a, Lawmi chhânna ka hre zui tawh lo.

Min hruai ve dawn lo tih Mimtei'.n a la hre lo a nih ka ring.

Lawmi leh Kimkima inchhungah an lo lut a, "Mo thar silah dah mai ang," tiin an thingpui inna no ruak chu tui dehnaah sil lohvin a dah a, "Nia, lo dah tawp rawh, nakinah ka lo sil dawn nia, i va fel ve i lo lên a.." dam thlap leh nui sânga ka biak chuan a hamhaih deuh niin ka hria.

Mahse, a hamhaih rei lo khawp mai, "I lo awm hma pawhin ka lo lêng fo alawm.." a ti hmak.

Ngawi duh bîk lovin, "Ka awm pawhin i lo la lêng zel dawn nia," ka ti a, Kimkima a meng no lo khawp mai. A room lamah an inzui lut ta a, an huat thu pawh a chhe dun ṭhak ṭhak e. Sangzuala hmai zah hlê lo ila chuan ka'n ṭim erh tur a nia.

Mimtei'n Lawmi a hne thu a sawi sap sap a, ani hi chu a la nau deuh bawk nen a duh loh zawnga an tih chuan a chhâng fak fak zel. Kimkima tawh sual tawh avang khan Lunglei Serkawna nurse interview tur kha a ṭhulh phah ṭhak a, ka uipui viau. Amah lah chuan, "A la rem rih lo a ni ang e," a ti awlsam êt.

"I û hnenah ka sawi ang a, a phal chuan thawmhnaw dâwr siam ang hmiang," ka ti a.

"Awi awi, sumdâwng chi ka ni lo, ka zeihawi lo lutuk," tiin a nui ar ar a, engkim ka buaipui tur thu ka hrilh a, "AuMama'n a remti awm lo em mai, mahse, sawi ve hrim hrim la," a ti tho.

Chaw ei hmain ka inbual zuai a, Sangzuala pawh a lo haw tawh a, zaninah sawipui ngei ka tum. A remtih hlauh chuan u Sawmi ka bia anga tih dan a awm theiin ka ring, ka account ami hi la chhuakin bul ṭan nan kan hmang ang a, thawmhnaw lam a nih loh chuan thil dang han tih mai tur ka hre rih si lo a ni.

Zanriah kan eikham a, boruak ṭha lo kan nei lem lo, Lawmi haw lai ka hre lo a, a lokal thu tumahin kan sawi chhuak hran lo, sawi pawh ni ila eng tin Sangzuala'n a ti chuang lo ang. Kimkima room-a a luh hnuah Mimtei te nen Tv kan en a, vawiina kan thil sawi chungchang kha ka hrilh ta a.

"I mumang a nih chu, hnathawh tih vel kha chu sawi mawi lo mai teh u, ka châwm thei che u," a ti deuh tlat.

"I â siah..." ka'n ti ngawt a. Mimtei nuih a za hle.

"Inchhungkhur hi fel takin enkawl ula, ka pension hunah sumdawnna lam chu kan la ngaihtuah dawn nia, i hria maw Mimte," tiin a nau a melh a. A lo bu nghat nghat.

"I thawh chhuah ringawt rin ka duh bîk hleinem," ka la ti ve fan a.

"Nám, ka sawi chiang tawkin ka hria," tia tho chhuakin min pawt tho ve nghal a, "Mimte, i û Naom-in hetiang lam sawipui che a tum chuan 'Mama'n' a phal lo ti zel ang che," ka hriat tur kherin zuk ti a, Mimi a nui nasa ngang mai. Ka nuih a za ve meuh lo. Ka thin pawh a rim hran chuang lo.

A nau kan mangṭha hnuah room panin kan chho ta a, a dik tak chuan mu tura inchung pan reng hi ka ning. Ka la tih ṭhan loh vang nge ka tui lo.

Zanriah eikham hian inlêng an awm loh chuan mahni room-ah an insaseng daih a, Sangzuala nen a hnuhnung berah mu turin kan chho ṭhin. Kan ṭhalai ṭheh ṭhawh bawk a, kan thâwm a zawi khawp mai, Kimkima nen kan boruak hetiang hi ni lo se chuan ani kha a ṭawng duhin a nui peih ber a, a nuam deuhvin ka ring. Mahse, kan heti bawk si....

"Kan tih hmabâk kha i la hria maw?" A thawmhnaw inbel hlip mawlh mawlh paha min rawn en chuan ka biang a sa vekin ka hria, a taksa ka hmu ngun tho nain ngaiah ka nei hleithei lo, "Chuan mutkawr tih vel kha kan mamawh lo a nia," a ti sup a.

"Sangzual..." ka lo ti a.

"Eng nge? Mutkawr chhanah chuan ni lul lo e," tia nui suk chungin dressing table hmaa ka ṭhu chu min rawn kuah a, "Zak lo siah.." tih pahin ka sam ka khuih a, "Ka nupui lakah ka zak ang maw, i pasal hmaah nang pawh zak suh, nupa, pumkhat kan ni tawh alawm," thâm ṭüaka tiin min pawm nawlh a, a nghâwngah ka lo kuah lêt chial.

"Zanin chu sipai dik tak ka hmuh tir tawh ang che," tia khumah min nghatin a rawn lâwn ve nghal a, "Kan inneih zana ka sipai hmuh kha chu a titau..." ka lo ti a. 

"Naom..." tiin min en vang vang a, a mitmeng thim raiha min duhna leh duatna lang chhuak chungin min fawp ta a. Ka lo chhawn ṭha kher mai, nupaah ramri kham a awm lo a, a taksa phiar fat te, a bâna thisen zâm pawng ṭalh ṭalh te chuan ka mit a la hle. Nghet takin ka lo kherh chial a, uar leh duhthawh taka hmangaihna kan chen dun zawh meuh chuan mut chhuakin min zem nghal. 

Ka pasal hlui lakah khan hetianga phurna leh zah loh theihna hi ka ti lang ngai eih lo. Sangzuala nen erawh ka rin phâk bâk a ni. Mahse, ka zak miah lo thung, khatia inpawh taka han chêt vel kha ka tân thil thar a ni bawk. Kan inmil hliah hliah a ni ber.

"Sipai pa, ka muthilhsan dawn che.." tia a lam ka hawi chuan, "Muhil rawh, a bâk chu naktuk lamah ka chhunzawm ang?" Nui chungin a la ti cheu; min rawn kuah a, a chau ve thei lo em maw ni, ham bái bái chung hian ka maimitchhing ta a.

Ka harh hlawl a, ka malpui mu churh churh chu dahsawn tumin ka chê a, thil rit deuh delhtu awm ang maiin ka che sawn thei lo. Ka puansin theh hlimin thawh chhuah ka tum leh a, Sangzuala'n min lo khan lek chu niin. Tihharh hlau zet hian dimtein a mal ka nawr sawn a, a rûm ṭuah ṭuah ringawt. 

Zinglam dar nga a ri ṭêp a. Ka zun a chhuak deuh bawk nen ka tho chhuak ta nge nge e, nizana ka thawmhnaw inbel kha lain ka ha sawk sawk a, bathroom lam ka pan a, Sangzuala a la mu tui viauin ka hria.

Ka awmna la rei lo mah se a naute pahnih hian min thawh khalh ngai lo; bathroom-aṭanga chhuakin inhnuaiah ka chhuk a, thawm dim takin tui ka lum a, zingah tui lum ka in ziah avangin hei hi chu ngaiah ka nei tawh. Gas dahna bulah tui so hun nghakin ka ding a, Kimkima room lama thawm ri deuh bur ka hriat chuan ka phu chiang kher mai.

Che ngam lovin ka ding ren rawn a, chutah a aia ring zawkin a ri leh ta. Ka hriat thiam theih dan chuan khum aṭanga tla dawt thawm niin ka hria, Kimkima kha a ke a la dam ṭha si lova a intipalh em mawni dawn le.

Ka ngaihtuahna avang chuan hmanhmawh zetin Kimkima room lam ka pan a, kawngkhar ka nem chhina a inkalh miah lo, tîm ru deuh hian zimtein ka hawng a, ka va bih dâk dâk a, ka thil hmuh chu leh! Hlauthawng zetin hmui ka hup a, Mimtei ka kai tho hmasa ang nge Sangzuala zawk. Â ni lo, ka buaipui loh te chuan...

Chhuata lo mu kawm reng Kimkima lam panin ka phei a, a maimitchhing tlat.

"Kimkim..." tia kovin ka sáwi pah bawk a, chiang vak lova rawn mengin, "Naom.."a ti láwi rût.

"I harh em, nâ i nei em?" Ka ti sawk sawk a, khum lam kâwkin, "Min lo pui lawk," a ti ta a.

Amah a rit ve bawk si a, min chelh chungin a rawn tho chhuak a, a kâwngah ka lo kuah thung. A malpui nâ ti niawm takin a en zuk a, khumah kan inghat thei hram..

"Naom.." tia min ko nawn lehin min pawt thut a, ka lo inring si lo. Amah bawh rawk rawkin khumah kan let thla ta a, Kimkima chungah ka bawk ta rân mai! Fiah zeta rawn mengin, "Eng nâ mah ka nei lo, ka na lo..." a ti hmuk.

Chutia a tih veleh chuan thawh chhuah tumin ka inbengkang a, hepa rilru tenawm zet hi ka lo theihnghilh hman alawm maw le. "Chhuankim, hmêla.." tia thawh ka tum chuan nghet takin min kuah a, ka thâw a sak ṭalh.

A mitmenga min huatna lang chhuak chung hian, "Nuam ti takin he inah hian i awm lo ang,"  a sawi zawh rualin a samah ka kêk a, chu chu duh lovin min kuah nghet tulh tulh, ka ṭanna lamah ka ruh chuktuah a na vek.

"Nám, i thil chhuan hi..." Sangzuala aw ka hriat chuan hlauhthawnnain ka khat nghal. Ka rilru ang chiah Kimkima pawhin a pu ve tih ka hria, "Min thlah rawh, thih i duh loh chuan.." ka ti chang fak a, ka ṭawng ring ṭha ngam si lo. Min kuahna thlah duh chuang lo hian, khum bul dawhkana glass no chu a vai thlaa a keh chuai a.

"Eng thil nge....?" Kimkima room kawngkhar a rawn inhawng ṭhuai a, thei leh thei lo hian ka va melh ṭâwk ṭâwk a, Sangzuala thinrim hmel sen ṭâwn ṭâwn ka hmu vuai.

"Lalchhuankim, Lalmuanpui..." tia a âw hruihrual hlap ri anga fiak ṭhak kan hriat rualin Kimkima'n min kuahna a thlah dul ta a, mit ka chhing sawk. 

"Mama..." tih paha min nam sawn chuan ka tho chhuak nghâl a, Sangzuala in hûm ruh ngat ngat chu ka hmu reng. 

"Eng thil tenawm nge ka hmuh hi!" A aw-a tenna lang chhuak chung hian min melh a, ka hrawk hnawhtu awm ang maia phui ṭup chu tih kian tumin thâwk ka la vak a, "Mama, i nupui hi.." a sawi hmain Sangzuala kut a phe zawk a, Kimkima khumah a let nghal tawp. "Lalmuanpui chhuak rawh, he room aṭang hian chhuak rang rawh," tiin hmel dur khup hian min melh a, ka che sawn thei lawk lo.

Chutah, a nau kawr âwma ṭhâmin, "Sawifiah tur i ngah dawn khawp mai," tiin a thing nawk a, min rawn melh chung hian, "Chhuak rawh tih ka sawi lovem ni?" A ti leh khur khur a.

Kimkima rum lutuka melhin, "Ka ngaidam ngai lo ang che," tiin Sangzuala pawh melh nawn tawh lo hian room ka chhuahsan ta a. Gas a lo in off tawh a, ka tha khur tireh turin tui vawt ka in khawlh khawlh a.

Hetiang em ema mi rilru chhia hi an awm thei dawn em ni? 

Ni e, tum nei râna min beih te chuan eng tin nge ka inven sen ang, a ruahmanna tenawm uchuak tak kha ka ngaihtuah let a, ka thin arim ngei mai. 

Mimtei'n thawm a hre ve lo nge a rawn tho ṭhak lo; ear phone vuah chunga muthilh te hi a chîng a, vawihnih chu ka hau tawh nghe nghe. A hriat loh pawhin ka hrilh dâwn khawp mai.

Kan khumah ka ṭhu a, an unau khan eng tin nge an intih zawm tâk pawh ka hre lo; Sangzuala a la rawn chho lo a, helaiah han tlân tauhna tur leh ka hrehawmna sawi chhuah ngamna tur tumah ka nei lo. Ka pazawn te kha pan ta ila, thil tih chi niin ka hre bawk si lo, a chhan pawh kan inneihna a la rei lo lulai êm a ni. Tin, chhungkaw chanchin midang hnena sawi hi ka rilrem zawng a ni chiah lo, kan boruak a zirin ka nu leh u Sawmi pawh ka hrilh chauh ang.

Eirawng bawl turin lungawi lo ru zetin ka chhuk leh ta hna hna a, a lo reh ṭhiap. Tûk danga ka tih dan angin ngawi reng hian ka che mawlh mawlh a, Mimtei lo thawh lai pawhin ka be tui tam lo. Thinrim vanga eng mah tih duh loh kha a ṭha chuang lo. Tûkṭhuan erawh kîl ka tum lo bur.

Mimtei'n chaw ei a rawt a, ka ei dawn loh thuin ka chhâng a, "I dam ṭha lo em ni?" Tia min zawh chuan, "Ka pum a nuam lo, nakinah ka ei ang," tih leh inchung pan ka rual a, 'Nakinah ka lo chho dawn nia' dam thlapin a ti ve mai. 

Eng mah a hre lo tih a tih a hriat reng.

Sangzuala room-a a lo luh laiin khumah ka la ṭhu reng a, sunday a ni a, biak in dâr ri bal bal ka hre pha reng. 

Min zawh loh chuan tukin chungchangah khan insawifiah ka tum miah lo, a nauin dâwt tam fe a chham khum leh tawh ang chu.

"Nizanah i duh khawp ka pe lo che em ni?" Sangzuala ṭawngkam avang chuan mak tiin ka hawi phâwk hrâ a!

"I duh duh sawi ringawt suh.." ka lo ti a, "Naom, eng rilru nge i put le?" Zawi ruiha min zawhna chuan ka chhungril a ti na zawk. Min rinna chhe tê mah a nei lo tihna em ni?

"Sangzual, min ring em, min ring tâwk em?" Tiin ka ding a, tukverh bulah ani a ding a, nelawmna tel miah lo hian min en run bawk.

"Mit ka nei a, beng ka nei bawk, Kimkima i duh zâwk a nih chuan a kiangah i kal thei ang, kal rawh, ka dang lo ang che," zuk ti a! Ka thin a sa ve phat.

"He khawvelah hian ani chauh khu mipa awm pawh ni se, engtikah mah ka pan lo vang, tenawm lutuk, Rûl a nih khu, Rûl chukna chi.." ka ti nghal táwn táwn a, "I nupui aia i unaupa i ring zawk a nih chuan, kan inneihna hi tâwp rawh se, zahna leh mualphona pawh hmachhawnin tâwk dawn mahila, Chhuankima nen in khata chen dun leh ai chuan inṭhen ka thlang," ka ti leh a.

"Duh tawk rawh..." tia min rawn panin ka darah a vuan a, "Ka mitah chiang takin min en la, tukina thil thlen dan dik tak dâwt tel lovin sawi vek rawh, pakhat ringawt insawi fiahna ngaihthlâk ka tum lo," a ti ta a. 

A thu sawi ka hre sual emaw ka ti hial. Min ring lo niawm tak khan a ṭawng bawk si a, tlem tala min rinna a la nei chu mak ka ti lo thei lo.

Ka sawi ang nge sawi lovang tia ka inngaihtuah hnuah, 'tun bâk sawina hun ka nei tawh lo maithei asin' tiin, thil thlen dan zawng zawng ka hrilh ta vek a, ka sawi zo chiah tihah insûm hman lovin ka ṭap chhuak phawng. Ni e, ka lo insûm ve na te, man hlan zan aṭanga ka rilru natna te leh kan inkâr zawng zawng ka ngaihtuah hian ka ṭah a chhuak ngawih ngawih.

"Nám..." ti supin, min rawn kuah a, a âwm nghengin min kuah bei ta a, ka ṭap uar sauh thung. 

Eng mah a sawi lo a, ka hnungah chûlin, "Ṭap tawh suh le, ka rin dan a dik tih ka hria a nia, inphih fai la, inhnuaiah kan chhuk dawn nia," a ti dam thluam a.

"A teuh lo, Chhuankima hmel ka hmu peih lo," ṭah aw ṭiauin ka ti a, "Thil ka sawi dawn alawm, kan vaia awm kim laiin, min ring rawh... khatianga kan chêt hnu lawkah mipa dang i pan dawn lo tih hi ka thinlungin a hria; ni lo, ka nau ngat phei chu i pan lo tawp ang," a ti leh sup a.

A hmel ka en vat a, min lo en ve chiah bawk. A mitmenga natna thûk tak lo lang chu ka chhiar thiam ve.

"Sangzual..." ka ti a.

"Lokal rawh le, a hlim chhawna sawi fel loh chu a ṭha lo, i kiangah ka awm zel dawn alawm, inti fai rawh le," a ti ta a.

Tukin khan min bêng dawn emaw ka ti hman tawh kha a ni a; mahse, ka rin loh danin thil a thleng dawn tlat, a nau leh a nupui inkâr chinfel hna hi engtin tak thawk ang maw...

'I dikna a nih chuan i lamah ka ṭang zel ang' titu ka pasal Liansangzuala ka rin ngam a ngai...

B®®

B+>[BeckirafARenthleI]<+®®