15.NAOM [Mizo Love Story] -B®®

15.NAOM [Mizo Love Story] -B®®

Ziaktu: Becky Rafa Renthlei
B®®
Shadow of the life

"Lokal rawh le, a hlim chhawna sawi fel loh chu a ṭha lo, i kiangah ka awm zel dawn alawm, inti fai rawh le," a ti ta a.

Tukin khan min bêng dawn emaw ka ti hman tawh kha a ni a; mahse, ka rin loh danin thil a thleng dawn tlat, a nau leh a nupui inkâr chinfel hna hi engtin tak thawk ang maw...

'I dikna a nih chuan i lamah ka ṭang zel ang' titu ka pasal Liansangzuala ka rin ngam a ngai...

B®® 120721

Kan nupain inhnuaiah kan inzui thla a, Sangzuala'n Mimtei kovin, "I û ko rawh, thil sawi ngai a awm," a ti hmuk a, Mimtei a kal vat.

Common room-ah kan ṭhu ṭhap a, ka zâm ru deuh, anni chu chhulkhat chhuak an ni a, mihrang awm chhun ka ni; Kimkima hnuailam bihin a ṭhu ngur a, atu amah min en lo, kan ngawi dâk hlawm a, kan boruak a rit ru viau, Mimtei a ngaihna hre lova hawihai deuh chu ka khawngaih ang reng. Eng mah hrilh fiahna hman a awm ta bawk si lo.

Sangzuala'n a naute pahnih a en a, "Nu leh pa kan nei tawh lo tih hi in thinlung khan hre nawn leh rawh se, chhungkua hlim taka chêngho thei tur kan nih laiin kawh mawh bâwl kan awm leh ṭhin a, chuvang chuan kan inchhung hi hremhmun tênau a ni ringawt tawh," tiin bul a ṭan a.

"A bikin Mimtei leh Kimkima phei chu hrehawm tam tak tuar chunga ka enkawl seilen in ni a, ka hmangaih zia che u pawh a hrechiangtu ber in ni bawk. Vai rama mittui nena in tana ka thawh ṭhinna leh in nawm loh hlaua ka hrehawmna kha hetiang hian em ni min thungrulh dawn Lalchhuankim?"  A tih leh chuan Mimtei ṭawng tumin a âng zuau a, "Eng mah lo sawi suh, Mimte," tiin Sangzuala'n kut vaiin a khap a.

"In û nupui zah lo tu chuan keimah min zah lo tihna a ni, Naomi pawhin dik lohna tam tak a nei ang, tukina khatiang thil a thlen hma aṭang tawhin Kimkima leh Naomi inkar a ṭha lo a, ka haider lui zel a, ka nupui khap betin thu ṭha ka sawi lo em ni, ka nau in ni emaw ka nupui a ni emaw a dik lo zâwk chu ka ṭan chhe te eih dawn lo che u." A ti hmiah hmiah.

"Mama, mahse...i nupui hi..." tia Kimkima a lo ṭawng chuan, "Dâwt min hrilh tam poh leh thu dik ka hâi chhuah belh zel tih hria la, tukina i ruahmanna tenawm tak kha ka hriat loh ring suh," ti leh nghutin, thinrim tih hriat deuh hian a thaw hawk a.

"In duhzawng ang hi nupuiah neih kher ka tum lo, ka hmangaih leh min hmangaihtu, ka naute pahnih min hmangaih pui thei tur hi a ni ka zawn, Lawmkimi vanga kan chhungkua hi a buai zêl dawn chuan ani kha i pan thei ang, ka dang hek lo ang che, chênpui te aia midanga rinna nghattu chu mi ṭha an ni ngai lo; hetianga buaina nei chung hian ka kalsan ngam dawn che u em ni? Ngun takin inngaihtuah ang che u, in duhzawng tak nupui pasal tur in hmuh hun ala awm ang, chutiang a lo thlen hunah chuan keiin in neih phal ta tlat lo ila, in rilru a na dawn lo em ni, mahni chauh inngaihtuah hi sim ṭheuh ila, hlim taka awm tum zawk tur..." tia a sawi zawh chuan min rawn en a.

"Nang pawh, kei min hmangaih a nih chuan ka naute pawh i en hrang tur a ni lo a, an dik lohnaa hautu tur i ni a, khing lêt zel lovin ngaidam theitu i nih ka duh, chu chu mi puitling tih dan tur a ni bawk," tiin min zilh ve nghal a, ka haw hran lo. Thiam lohna chen ka nei ve tho. Kimkima'n ngeiawm a chhuah châng pawhin ka chhâng lêt ve kher zel a, a punlun phah tih ka hria, insiam ṭhat ka ngai.

"Tun hi ka sawi tâwpna ni rawh se, boruak ṭha lo emaw khatiang thil a thleng leh a nih chuan, chhungkua kan chêngho thei tawh lovang, he in chhungkhurah hian mihrang inrawlh tawh suh se, chhungkaw vanram siam tur hian a chhunga chêngte kan pawimawh a, pawnlam mi siam ṭhat theih a ni lo, inhmangaih leh inzahtawn taka kan awm hian chhungkua a zahawmin a nuama a hlu ṭhin," ti dap dapin a ding hluai a.

Kimkima pawh a chuti khati kan ti tak na a, a û a zahnaah hian a fakawm thlâwt. Thiam thu pawh a sawi miah lo a, ka lo rin dan kha chuan kan inchhâng lawk deuh ang a, kan inhnial viau ka ring kha a ni a, a ngawi ve reng tho.

"Kan insiam ṭhat vek a ngai, ka pa unaute ngawih ngawih pawhin min erin kan in hmun neih chhun min chhuhsak an tum tih inhre reng a, ṭangho tur zawk hetia kan inrem loh leh si chuan tuma zah kan kâi lo ang, he inchhungkhur ti hrehawma zah lo tu chu ka mamawh lo," Sangzuala'n tih zawm lehin a chhuak nghal vut.

Kimkima'n min rawn en a, mipa mah ni se a ṭah a chhuah hmel hle. Mimtei a insût hraih a, "U Naom, room-ah lokal teh," tiin a tho nghal a, hnial lovin ka zui ve mai.

A khumah kan ṭhu a, "Khatiang em ema auMama thinrim kha ka la hre ngai lo, tukinah eng thil nge thleng?" Tiin min zawt a.

"En teh, Mim, sawi nawn leh pawh ka châk tawh lo," ka lo ti a.

"Khawngaihin min hrilh rawh, u Kimkima'n eng tin nge a tih leh che," a ti leh tlat tawh.

"Tun bâk ka sawi nawn peih tawh lo a nia," tiin tukina thil thlen dan kha ka hrilh ta a.

"Nimina Lawmi a lokal khan ka ringhlel rêng a ni, an ruahman dun a ni ngei ang, ka u hi a rilru a chhe hran lo, Lawmi nen hian an inkawmna a rei tawh a, a thluak a sûksak vek a nih hi," a ti a.

"Nia, Kimkima bialnu Lunglei a mi kha ka pasal hlui cousin a ni a, eng eng emaw a lo hrilh ṭhin a nih ka ring, anni chhungkuain min haw bawk si a," Ka tih chuan makti zetin, "Masiami kha inpa hlui cousin maw?" A ti a. Ka lo bu nghat.

"Hahthlâk e, u Kimkima pawh ka hau dawn, ka ṭan miah lo a nia, sual a chhuah zel chuan in bulah ka awm daih ang, Mama a thinrim tak tak a nih chuan eng tikah mah kan chêngho leh thei tawh lo ang," a ti ta a.

Ni e, Sangzuala hian a naute a duata a ngaihsak rual hian an dik lo a nih chuan a dîm dawn lo tih ka hrethiam. A luhlul viau bawk, mi rilru nghet tak a ni a, a tih loh chin a thlenin a nawr luih theih miah loh. Mahse, dawhtheihna a ngah thung.

Sunday a ni bawk nen tih tur a awm si lo, Sangzuala chhuak kha a lo la lêt lo a, Mimtei'n 'thlanah kal ang' tia min sâwmna chu lawm takin ka pawm.

A nu leh pa thlan pana kan kal laiin Masiami (Kimkima bialnu) chanchin a hriat ang ang min hrilh a, kei aiin kum hnih laiin a upaa ka sawi lang lem lo. Kimkima ai pawhin a upa zawk tihna a nih chu, Lungleiah cosmetic dawr lian tak an neia a nghâk ṭhin. A sual tia sawina tur eng mah ka hre hran lo. Mahse, ka chanchin a report peih danah mi ṭha tak chu a ni lo maithei.

Thlanlung nghengin Sangzuala a lo ṭhu a, mûk taka inngaihtuah hmel a pu. Min hmuh veleh, "Min rawn zawng em ni?" A ti sup a.

Kan zawn loh thu leh thlan kal hrim hrim a duh tih sawiin Mimtei'n a chhâng a. Kan pathumin a nu leh pa thlanah kan ṭhu a, "AuMam, i awm loh hun tur a huphurhawm hle mai," Mimtei'n a tih chuan, "I awma ka ring tâwk che alawm, i u Naomi thu awih la, Kimkima hi chu ka patea te lam rilru ang chiah a pu tih i hriat kha, unau ni mah ila a zia a dang lutuk hi a buaithlâk a ni," a ti a.

"Lawmi a lokal zing ṭhin si a, ka hau mai dawn em ni?" Naupangchhia zeta a tih chuan, ka lo inrawlh vat a, "I û sawi ang khan, ngawi ila, tilêt ve lo ila, chuta sual a chhuah luih zel chuan i û lo haw hma zawng kan inah kan awm daih dawn nia," ka lo ti a. Sangzuala a nui huk.

"Eng nge i nuih?" Tia ka va melh chuan, "Kan ngaihtuahawm loh ang, tih ai chuan, tlânchhiat inpeih atin in awm a nia, engtikah nge rilru puitling in put ve ang le," a ti ta a.

"Kan puitling reng," ka lo ti hmanhmawh.

"Thinrim vanga chaw ei duh loh te kha sim tur, lungawi loh pawhin chaw thlah kher lova ei nghek zawk tur a nia," tiin a nui suk suk a, tukina ka chaw ei loh chhuanlam kha 'ka pum a nuam lo' tih kha a ni a, min awihsak lem lo tih ka hre mai.

Mimtei nen thil hrang hrang min sawipuiin min fuih bawk.

"I u Naomi kutah engkim ka dah dawn a, i mamawh i lo dîl zel dawn nia, Kimkima account-ah pawisa ka rawn thawn tawh lo ang; ani pawhin mamawh a neih chuan Naomi hnenah sawi zêl rawh se, amah pawh ka hrilh tho ang a, inrem hram hram in lo tum dawn nia," a tih chuan, amah ka en vat a, "Kimkima account-ah thunsak zawk rawh, ka kawl duh lo," tiin ka lo ṭang kawh tlat.

Ka kuta sum leh pai a dah phei chuan min huatna a zual sauh ang, mamawh em em ka nei rih chuang lo a, an kal phung thlâk kher ṭul ka ti lem lo.

"Ka sawi ang kha a ni mai, upa ber kan ni satliah lo a, nu leh pa kan ni tel tih hi theihnghilh suh," a ti hmuk. Mimtei a nui var var a, "Hriatpuitu ka awm hi, aw ti ve mai la," tiin ka kut a vuan a.

"Min huatna tur a tam belh mai mai, Kimkima'n kawlzawk se ka mamawh ka lo dil ve mai ang, a upa zâwk bawk a," ka la ti ṭâlh, "Min hnial reng suh," a ti leh tawp a.

Khua a tlai deuh tâk avangin in lam kan pan ta a, Ke-a kal kan ni bawk a, an hmel hriat te'n, "In nu chu a hmelṭha hle mai, lo lenpui ve rawh," an ti liam liam a, Sangzuala'n a 'um- e' liam satliah. Kei erawh ka lo zak ru viau.

Sunday kan hmang liam a, khatia Sangzuala'n thil a sawi aṭang khan inchhungkhur boruak a zia ta. Mimtei nen a hma aiin kan inpawh zual a, beautician hmelhriat a neih chu kovin facial leh sam cut tih velin thawhṭan kan hmang liam a, Sangzuala erawh Lungleiah a kal zuai. Mahse, riak lovin a lo lêt leh.

Min kalsan hun tur a hnai telh telh a, ka huphurh takzet.

Ka nu leh pa ka be zauh zauh a, u Chhandama te nupain min be zing mah zawk. Dingngheta te lam pawh an ngawi ta a ni ang, eng mah thawm riva a awm lo; Kimkima nen kan inbe tam lo a, min hua angin a lang tawh lem lo, atu amah a be tam lo hrim hrim, a malpui nâ pawh a zia awm tawh a, ngai a awh deuhthaw a ni mai. A duhna hmunah a kal thei vek tawh.

Amah hi lehkha thiam thei over a ni hran lo a, a û in a fuih nasa bawka a inzir peih viau tih Mimtei'n min hrilh. Class 12 a pass hnuah direct-in LLB kum nga a zir a, a pass ve leh mai bawk. Tunah hian Lunglei District court-a practice lai a ni a, 'BAR Exam' a pass leh chuan a Advocate thei tawh dawn a ni. A û ang thova tum ruh a ni bawk.

Ukil atan chuan ani aia ṭha tur an tam vak lo ang, a inthup thiam ropui si.

Mimtei pawh a la naupang tak nain nurse training chhuak kha a ni a, a chhuahna la rei lo mahse Aizawl lamah private-a thawk turin an sawm ve a, a û in a remti rih lo a ni awm e. Serkawna a interview tur lah kha Kimkima vangin a bawhpelh ta si a, ka khawngaih ang reng. Pawiti ang phei chuan a lang lem lo va. Nakum lam hian Lawngtlai Christian hospital-in nurse an la leh dawn a, chuta tan chuan inbuatsaih a tum thu a sawi.

Kei ve chu ka mâwl luatah BA pass ve siin ka tâl mai mai a, private school-ah takngial pawh thawh ka lo dîl lo kha pawi ka ti hnuhnawh. Tunah Sangzuala'n a rem ti leh tawh bawk si lo, ram huan enkawl tih velah ka lâktlâk chai bawk si lo a, sipai nupui niawm reng ka ni.

Zirtawpni zing a ni a, tûk dang ang lo takin ka tho chhuak tur chu ka lu a hai thut a, ka khaw hmuh a phê ruai. Zantin hmangaihna kan la chen dun zel a, ka pasalin min duatna leh min ngaihsakna ka hre tam telh telh. A naute pahnih chungchâng min sawipui bâkah kan tleirawl lai a sawi chhuak fo a, a tawp kharna chu Dingngheta a ni zel. Inṭhen tawh mah ila ala thîk hle tih ka hria.

Sangzuala exer la a lo haw a, choka lama min hmuh loh vangin kan room-ah a lo chho leh tih a sawi a, tûk dangah chuan ka thawhkhalh deuh ziah.

"Nám, i la tho dawn lo mi?" Tiin khumah a rawn ṭhu a.

Ka lu a hai thu leh Mimtei kai tho mai turin ka hrilh a, min ngaihtuah tih hriat deuh hian, "Thil dang nâ i nei em, damdawi inah kal ang aw.." a ti sawk sawk a, "Mimtei kai tho la, ka Bp lo check tir teh," ka ti a.

"Aw le," tiin hmanhmawh tak hian a chhuak nghal a, ka zungkawnga hnai awm tih bak kha chu insawiselna em em ka nei lem lo. Kha pawh kha damdawi ka ei ṭhaa a reh ve leh mai.

An unaua an lo luh hnuah Mimtei'n ka chalah a dek vang vang a, "I khua chu a sik lo," tih pahin ka Bp min check sak zui nghal a, hlauhthawn hmel deuhin khum sirah Sangzuala a ding run a. Ka lu a hai muai muai a, ka meng ṭha ngam lo hial.

"I Bp a hniam ve êm a nih hi, eng lo, a hrim hrimin nau i pâi a ni lo maw?" Tia inthlahrun hmel deuha min zawh chuan, "Awih awm loh loh.." ka lo ti vat a.

"Â, ka zawt ve mai mai che, in chhut la, nangman i hre thiam mai ang," a ti ve mai bawk. "Ti khan mu hahdam la, i ei tur ka lo siam dawn nia," tih zawm lehin a û a melh a, "Test kit va lei la, in test ve rawh se," a la ti hrâm.

"A ngai lo, eng mah a ni lo ang, ka Bp hniam vang a nih chu," ka lo ti zung zung a, kum thum chhung nau ka pai lo a, tuna taka pâi thut nachhan tur a awm lo. Ka inring bawk lo.

"In test a ṭha hrim hrim, pasal nei lai i ni a, thil awm lo pawh a ni hleinem," tia û zâwk niawm taka a ṭawng chuan ka nuih a za ru hle. Sangzuala a chhuak vut.

Mimtei'n min chhuahsan hnuah ka mu kawm ngal a, ka pum a let deuh but but, Sangzuala nen kan mut dun hmasak ber aṭang khan thlakhat chu a tling tawh, mahse, a la pêl thui lo êm a, ka period a insawn zauh zauh ṭhin avangin ka ngai pawimawh hran lo.

Naupai tih vel ka ngaihtuah lo hrim hrim, kha leh chen beiseina nen ka lo in enkawl ve tawh a, a chi thlah thei zawk Dingngheta te chuan a rai pawp mai alawm, a nupui ka hawi hil thung. Pasal nei ve si, indanna hmang chuang bawk si lova kum thum zet tlawngáwl chu a zahthlâkin rilru a na duh ang reng; Dingngheta farnu pawh khan min ṭawng khum zeuh ṭhin. Mahse, fa neih chungchánga kan thu loh zia ka hriat chian phah viau.

Sangzuala a lo lût a, side table-ah a test kit lei chu dahin, "Test rawh le, ka lo kalpui dawn che mi?" Zuk ti a.

"Ka râi chuang lo ang, ka beisei lo tak tak..." zawi raiha ka tih chuan, "I râi lo a nih pawhin a pawi lo, a siam lam te zawng a awl lutuk tih ka sawi tawh kha, intest ve hrim hrim la..." a ti deuh tlat.

"Nakinah aw, ka tho peih rih lo.." tia ka chhân chuan, a bu nghut a, "Fa kan nei emaw nei lo pawh ni ila, i laka ka rilru a pangngai reng ang, kan inneih chhan hi fa vang a ni lo," tiin ka sam hnawk niai chu min chul mâm sak a, "Dingngheta nen in inneih lai khan in pâi lo tawp nge, in chhiat nge, eng thil chiah nge thleng, i ti tla tiin min hrilh a.." tia a sawi zawng pawhin a lawm fahran lo tih a lang reng.

"Kan pâi lo hrim hrim, Aizawlah vawi hnih kan incheck up a, Lungleiah phei chuan kan kal ngun lutuk, ka sawi tawh kha, vawi khat mah a chhin pawhin ka la pâi lo," ka ti ta a.

"Lungngai lo la, Pathian thu thu a lawm, keini sawi ve theih a ni lo," dam thluama tiin, "Ti khan lo mu hahdam rawh, Kimkima nen damdawi inah kan va kal lawk ang e," a ti a.

"Eng nge in tih dawn?" tia ka zawh chuan, "Ka nî fapa Mapuia kha nizanah step-ah a lum a, kan va tlawh ve lawk ang," tiin a thawmhnaw a thlâk nghal a, engmah ka zâwt zui lo. Ani hi chuan a pa unaute lam hi a ngaih thah lo reng reng, a lakah ṭha lo mah se a ngaihven ru reng tih ka hria.

A chhuah dawnin ka chalah a fâwp zauh a, "Kan lo haw har lo ang aw.." a ti sup a, min chhuahsan zui nghal.

Ka lu hai pawh a zia awm tawha inti fai turin bathroom-ah ka lut a, test kit pakhat ka keng lût ve ta tho. Engmah beiseina ka nei hran lo a; mahse, Sangzuala leh Mimtei'n min nawr leh dawn thova ka hriat vangin ka intest ve poh a ni ang chu.

Test kit ka hman zawh veleh 'wash basin' bulah ka dah a, ka hâ nawhsanin hmai ka phih leh a, hringnun hi chu a fair lo ve ngawt mai; ṭhen khat râi duh lovin an indang a, a ṭhenin an ti tla a, nei duh ngawih ngawih an râi thei lo thung a, khawvel hi chu âw...

Ka intih fel fai vek hnuah test kit chu ka en ta chauh. Awi! Ka râk ṭhat a, ka mitvai a nih ringin mit ka nuai nawk nawk a, ka en ṭha leh ngat. Ka hmu sual miah lo. A positive miau alawm!

Hmanhmawh lutukin bathroom ka chhuahsana ka thin a phu dawt dawt, ka luhai pawh ka hrechang lo lek lek a, ka pai dat. Test kit dang la chhuak lehin test ṭhat leh ka tum a, huis, ka zun a chhuak tawh teuh lo. Ka mâwl dan em em hi chu.

Khum bula tui bottle chu banin tui awm zawng zawng ka inzo vek a, test kit ka thukru nghal, vawi hnih tal ka test loh chuan ka ring ngam lo. Tumah pawh ka hrilh dawn rih lo, khuma ka mu te chu ka nui leh rih, â.. ka awih thei lo.

Ka zun lah chu a chhuak leh mai bawk si lo a, ka van ngei tak. Ti hian ka zun chhuah leh hma chu ka nghâk ngat ngat ang.

Mimtei'n thingpui leh biscuit min rawn pe a, "I zia deuh em?" A tih chuan, "Ka ṭha, ka ṭha lutuk," ka lo ti sawk sawk.

"U Naom, thil dik lo a awm em ni? I biang a sen vek a nia, i khua a sik zâwk nge?" A tih leh pawhin 'ka ṭha lutuk' tih bâk ka sawi chuang lo.

"Eirawng ka bâwl laklawh sia ka chhuksan rih ang che," tia min chhuahsan chuan ka biang sa hat hat chu ka dawm nghal vat a, ka helhhawlh vel.

Dârkâr khat hnu daihah ka zun a chhuak leh ta chauh a, chu pawh tui ka in nghek vang kha a nih ka ring, test kit nen toilet lam ka pan a, ka phur ru tho si a, ka hlauthawng tel bawk.

Ni e, a lan danah chuan 'Naom Lalmuanpuii chi hood emaw inti kha' ka râi e. Ka thil ngaihtuah chu leh! Mahse, incheck up leh kher loh chuan ka la ringhlel ru cheu, ka lû lah chu a hai leh muai muai tawh a, khumah ka mu ta hle hle a, chêt pawh ka che ṭha ngam lo.

Sangzuala ka hrilh hunah engtin tak ngai ang maw?

Ka lo chhing leh sek a ni ang, ka harh leh chuan dâr sawm a pêl tawh a, tumahin min kai tho lo a nih ka ring. Sangzuala a lo la haw leh haw loh pawh ka hre lo a,  khum aṭanga tho chhuakin ka pum ka dawm vang vang a, ka beisei loh thil thleng hi dawnsawn dan tur ka thiam lo. Ka lawm a ni tawp mai. Ka ni deuh húih...

Inhnuaiah ka chhuk a, Mimtei'n thleng a lo sil a, min hmuh veleh, "E, i lo tho peih elaw, chaw ei ve nghal rawh u, i muhil tui sia kan kai tho duh lo che a nih kha," a lo ti a, a û awmna ka zawh chuan, pâwn lam kâwkin, "A bike ke a thlâk lawk," a ti a.

Keimahin chaw ka ei a, ka lem thei hlawl lo, ka kâ a tui lo ni berin ka hria. Bawnghnute nokhat ka in ta zawk a.

"Mimte, lokal teh..." tiin ka hui zauh a, "I va han ei tlêm em em," tia ner nângin min rawn pan a, ka kekawr iptea ka thil ah chu phawrhin ka en tîr ta a.

"Awi, awi leh...u Naom.." tia min rawn kuahin a nui hak hak a, "Nang aiin ka lawm zawk.." nui sânga ti lehin, "AuMam, auMam..." ring zetin a û a ko a, ka beng a ngawng lo chauh a lawm le. Ani hi zawng, naupangber tih takah hriat thiam a ngai.

"Eng nge, vak vak zel che hian.." tia Sangzuala rawn lut chuan a nau nena kan ding dun chu min melh a, "Nám, i ṭha tiraw?" A ti sup. Ka lo bu nghauh a.

"Kha, en teh..." tihpahin Mimtei'n a û kutah test kit a pe a, "ih maw... ánî tia min ko tu tur ka nei ve dawn ta..." hlim zeta tiin a û a en a, ka lo nui hak.

Kei aiin Sangzuala'n mak a ti zâwk tih a hmelah a lang reng. A meng phar âwk a, eng mah sawi lo hian min en vang vang a, chutah nui suk chungin, "Sipai ṭha mi ka'n chêt meuh chuan a ri zak mai alawm.." zuk ti a! A nau awm lai lehnghalin, ka zak lutuk. Â thei siah.

"I nghal dan hi..." ka'n ti ngawt a. A nui suk ringawt.

Kimkima a rawn lût ve a, Mimtei'n a lo hrilh ve vat. Nui var var chung hian, "Patea ka ni tawh dawn a ni maw, ka lawmpui che u, Mama," a ti ve mial. Mitmeng nungsara min enin, "Indim rawh aw.." a ti ve ngial. Ani hnen aṭanga hetiang ṭawngkam dawn hi ka inbeisei lo. Mahse, ka lawm hrim hrim.

Mimtei'n incheck up a rawt a, "A rang lama in enkawl hi a ṭha, i Bp a hniam deuh lehnghal a, doctor hmu hmasa ang," a ti zung zung a, Sangzuala'n min hruai a tum chuan, "I ṭangkai nêp awm em mai, keimah nen kan va kal mai ang, Taxi koh tur lo zawng rawh," tiin a hnial, ṭawng ve na hun ka chang lo reng reng. Sawi tur ber pawh ka hre chuang lo.

Kimkima a rawn kal a, "Mama, putea car hman ka dîl a, kan kal vek mai dawn nia, ka va la ang e," a rawn ti a, mak ka ti lutuk!

Sangzuala pawhin a hnial hran lo a, heti em em hian a ni maw 'naute an lo awh' ka ti hial. Kimkima khan fa nei thei lo turah min ngai tih ka hria a, a hrilhtuin eng ang chiahin nge ka chungchâng a sawi tih hre mah suh ila, ka pâi ve miau si a,  mak an ti ve ngawt ang, a bîk takin Dingngheta te chhungin mak an ti zual ang.

Kimkima a rawn thleng a, kal an tum ta vek bawk si a, ka chhehchhawl thawmhnaw leh slipper nen ka kal ve tawp. Anni pawh chu ti tho. Kawng tluanin Mimtei a ṭawng char char a, ka lû a hai leh tawh, Sangzuala'n car khalhin Kimkima nen kan ṭhu dun a, a tlân chak lem lo. Mahse, ka ni nghulh tho.

Car aṭanga ka chhuak chiah chu insûm hman lêk lovin ka uak tuar a, chaw tih tham ka ei bawk si lo nen bawnghnute ka luak chhuak a, ka thlan a sa phat phat. Mimtei a fel a, engkim a ti zung zung a, Sangzuala rinchhanin ka kal a, min pawm a tum a, ka duh bik teuh lo. Kimkima pawh kan hnungah a rawn kal ve zêl a, eng chu hria ni maw. 'Lokal ve lo mai rawh' tia hnar chi ninghal lo chuan.

Doctor-in min check hnuah ka taksa a chak loh thu leh ka Bp a hniam thu te, naupai tur chuan infit ṭhat a ngai a, treatment tlêm azâwng la turin min ti ta a, admit min tum deuh a; mahse, ka duh lo, Mimtei a awm tho a, in lamah inenkawl ka dîl ta zâwk a. Thil ei ṭha turin min chah nawn mawlh mawlh.

Tun aṭanga thla hnih hnuah incheck up leh turin min ti ta bawk a. Damdawi lei ngai vel Mimtei'n a buaipui chhungin car-ah kan lo nghâk a, Sangzuala'n ka nu leh pa a bia a, u Chhandama chanchin a hrilh bawk.

A hmaa kan boruak ṭha lo hre chang lo lêkin kan hlim a, in kan thlen hnuah pawh ka room-ah min khung hmak. "Mimtei nen inchhung kan lo tifai vek ang," Kimkima'n khi suk chunga a tih chuan ka nui nasa hle. Ka chêt peih zia leh bâl ka ngaithei lo tih a hria a ni ngei ang.

Sangzuala ber zawk hi a nuih zatthlâk zual. Min en leh vung vung zel a, Mimtei'n drip min khaisak lai te chuan min din chilh run a, "Námi damloh chhung hi chuan room lehlam saw hmang rih mai la, in kohna a hnai deuh alawm," a ti a.

"Nangmah va riak la, ka lo riahpui mai dawn alawm, zanah eng emaw palh thil awm thei a nia," thu tak zeta Mimtei'n a tih chuan, "A teuh lo," a ti nghut a. Ka lo nui ngat ngat.

"U Naom, engmah hlauhthawn tur a awm lo a nia, naupai haw chi te pawh an awm a, i zia chho mai ang," a ti a, Sangzuala'n, "Ka kalsan hunah phei chuan lo duat hlê ang che u, Mimte i kova tlaah ngai ang che," tiin a la hrilh hrâm.

He pa tak hi chu(h)

Zanriah pawh room-ah ka ei ta a, an vaiin min ngaihsak vek. A putea te chhungkua zan lamah an rawn lêng a, an lâwm ve hle.

"I nu leh pa an ngaihawm hle mai," putea'n a ti a, Mimtei a insût hraih.

Sangzuala hian nu leh pa nih a kawp ka tih tawh kha, a naute tân chuan 'hero' a ni a, amahah an innghat thui hle tih ka hre bawk. A naute pahnihin hlawh an la nei ve lo a, an zirna hautak tur zia ngaihtuah phei chuan Sangzuala nu leh pa khan thil thui tak an dâwn tih a hriat mai; an fate zirna atan an dawr hmun hralhna an lo dah diam te kha an fing ka ti a, nu leh pa rilru nei tak an nei a, an nihlawh ka ti lo thei lo.

Putea te an haw tawh a, Mimtei pawhin a û thu hnial lovin kan room leh lam ruakah khan a mu a, Kimkima chiah inhnuaiah a riak; a sawi ang tak tak khan, Mimtei eirawngbawl a pui vek a ni awm e. Na nei lo angin ani pawh a awm ta vel mai mai a nih ber chu.

Lucknow-ah Sangzuala a kal ang a, Kimkima Lungleiah a awm rih bawk ang a, Mimtei nen chiah in kan nghâk dawn. Ka lo hriat sual vang zawkin Kimkima te nen kan chêngho dawn emaw ka ti a, 'Bar exam' a la hmabâk tih niminah ka hre ve chauh. A châng chânga lo haw zeuh zeuh kha a ni mai.

Zan dâr sawm velah drip khai a zo a, kan in tih fel hnuah kan mu a, "I lawm nge lawm lo?" Tia Sangzuala ka zawh chuan, "Ka hamhaih vek," tiin a nui suk.

"Ka mumang a ang e.." ka ti ve sap a.

"I tân a ṭha hlir ka khâwl a, ruihtheih thilin a pawlh dal bawk si lo a, i ngeih zawng tak a nih kha, sipai chi nung ṭha chi ngat..." tiin a nui nghek a, ka run lutuk.

"I kâ hi a va han kaw ngawih ngawih tak.." ka lo ti a.

"Nia, a kua ka hnawh ṭhat zâr zovin âpa tia min kotu ka nei dawn ta chu a nia," tiin a nui leh ruh ruh a, ka chhâng peih tawh lo.

"Indîm la, i taksa tâna ṭha lo tur eng thil mah seng lût suh ang che," a tih zawm leh chuan, "Yes  sir.." chimawm zetin ka ti ve ngial.

"Kal lo thei ka ni si lo a, ka sawi tawh ang khan kâr leh tuesday hi ka kal hun a ni tawh, ka hmuh phâk lovah awm mah la, hetah hian, i chhinchhiahna pathumah khan ka awm reng tih theihnghilh suh ang che," tiin ka thin zâwnah a kut a rawn dah a, a kut ka lo humsak vat.

"Nang pawhin mi hur rim nam lakah min phatsan lo la, tun aia chi ṭha zâwk, cial ṭhak nen i lo haw hun ka lo nghâk ang," nui chunga ka tih chuan, "I va zak lo reuh e," tihpahin ka chalah min pen kawrh. Mahse, a na lo.

"Nám, ka lawm lutuk hi ka muhil ta lo a nih pawhin min dem suh aw," tiin min kuah hlu hlu a, "Ka muhil thei bik lo mai thei," ka lo ti ve bawk.

Ka nu leh pain min rawn vid call a, ka ṭap lo chauh. Min lawmpui em em a, "Bawihi, chaw pawh kan ei mumal lo, kan lawm êm mai," tiin a mit a hru zauh. An beisei pha bik lo tih ka hria a, u Chhanhima te nupa an dan pangngaiin an reh hmak. Ka nuin a hrilh tih ka hria; keimahni chuan kan be lo thung.

Kan inbiak zawh hnuah, "Nám, hetiang hi a nih si chuan ka chhuk velehah discharge chu ka díl ang a, an phal hlauh chuan Naik Pension-in ka lo chhuak thei ang, amaherawh chu buaipui chhung a rei ve deuh dawn a, Commanding officer (C0) in min duhsak phei chuan thla tam nghah a ngai lo mai thei; ka thawh tawh dan ngaihtuahin min duhsak ve theih ka beisei, kan dinhmun chiang zâwka ka hrilh a ngai dawn a, dik tak chuan min ui vein ka ring a, duhsak pâwl ka ni ve tlat..." tia min hrilh chuan, "Kha lam kha chu i thu thu, nakinah min hruai theih dawn chuan la ṭang rih mah la pawi ka ti lo," ka ti ve tawp.

Thil a sawi tlêm thei si a, a sawi ang ang hi ka hriat chhun a ni mai.

"Muthilh tum rawh le, ka lo vêng rih ang che," tiin sîr zawngin min kuah a, "Dam ṭha la chuan ka'n che leh sak tur a nia," tiin a nui kur kur a.

"Khatiang ringawt kha ngaihtuah suh, i ninawm..." ka lo ti hlak a.

"Min khawngaih lo em ni, nupui ka neih loh lai kha chuan a tawrh dan dan a awm a, tunah te chuan..." tih pahin min fâwp zauh a, "Khatiang ringawt pawh kha ka thlahlel..." a'n ti ngeiah...

"Muhil teh, i chimawm ru tlat..." tia puan sin ṭhat ka tum chuan, "Dam vat vat rawh aw..." ti supin min kuah a, light a off zui ta bawk. Kan ṭawng zawm ta lo.

Kan hlimna hian van tawng mah suh se hei aia hlimna hi ka nunah ka tawng tam lo khawp ang.

Ka nu leh pa thu sawi khâ ka hre chhuak rauh rauh a.

"I tana ṭha tur i hria a nih chuan Liansangzuala hi nei ang che, nu leh pa thuawih hi malsawm dawnna leh damreina a ni" Tia min hrilh ngei kha.

Kan hma lam hun sawi thei lo mahila tuna ka rilruah chuan Liansangzuala tana nupui ṭha tak nih leh a naute pahnih tana innghahna tlâk nih ngei ka tum...

B®®
B+>[BeckirafARenthleI]<+®®