16.NAOM [Mizo Love Story]-B®®

16.NAOM [Mizo Love Story]

Ziaktu: Becky Rafa Renthlei
B®®
Shadow of the life

"Muhil teh, i chimawm ru tlat..." tia puan sin ṭhat ka tum chuan, "Dam vat vat rawh aw..." ti supin min kuah a, light a off zui ta bawk. Kan ṭawng zawm ta lo.

Kan hlimna hian van tawng mah suh se hei aia hlimna hi ka nunah ka tawng tam lo khawp mai.

Ka nu leh pa thu sawi khâ ka hre chhuak rauh rauh a.

"I tana ṭha tur i hria a nih chuan Liansangzuala hi nei ang che, nu leh pa thuawih hi malsawm dawnna leh damreina a ni" Tia min hrilh ngei kha.

Kan hma lam hun sawi thei lo mahila tuna ka rilruah chuan Liansangzuala tana nupui ṭha tak nih leh a naute pahnih tana innghahna tlâk nih ngei ka tum...

B®® 140721

Sangzuala ngei pawhin ka thu awih la, keimahah rinna nghat ngam rawh tia min hrilh lai ka hre chhuak vawng vawng. A tîrah inneih ka duh hmanhmawh lo kha a ni a; amah zawkin khatia kan chêtsual hnu khan, 'Innei lova ka kalsan che chuan nau lo pâi ta la, in chhungkuain zahna leh mualphona an hmachhawn ang' tia min hrilh te kha zâwm lo ta ila, nuthlâwi niin sâwn ka pawm dawn a ni si a.

Ka chapona dah ṭhaa thu ka awihna rah chhuah a lang ṭan mêk. Engmah ni si lova chapo ve ringawt hi a ṭûl ber lem lo; Drip bur li kan khai zawh meuh chuan ka harh kâwk a, luhai pawh ka nei ta rih lo. Mahse, indim tura min hrilh ngun êm avangin a hma anga chêt bawrh bawrh kha chu ka ngam ta chiah lo.

An ruahman hmasak dan kha chuan Sangzuala chawlh lâk chhungin kan room bang pâwn lam, kopang hnaih hi plaster zawh kha an ti a, kan boruakin zir ta hek lo, eng mah an chhunzawm ta lo. Rilru puitling tak pua ka awm a ngai a, pasal te awm loh hriat miah lova inchhungkhur enkawl leh rel fel hi ka kuta awm a ni. Chu chu Sangzuala min beisei dan a ni bawk.

"Nám, inbual rawh le, kan tlai chuan a chi loh ang," tia Sangzuala'n min rawn tur chuan ka thawmhnaw inbel tur zawngin ka la ding khawmuang a, zanin tlai hian a putea te inah chaw kan ei dawn a ni.

"Ka inbel tur lo zawng teh," tiin bathroom lam ka pan a, ka ngaihtuah chian hian ka nuih a za leh thut zel. Khati khawpa inkawm ngeih kha nupa niin khum khatah kan mu a, kan inhmangaih thu kan sawi hluah lem lo, ka naupai kan hriat aṭanga ni thumna a ni a, ni tam a bula awmna hun ka nei tawh lo.

Khuma ka inbel tur thawmhnaw a lo dah chhuah ka hmuh chuan ka nui hak a, 'A hmaa ka hâk kha vaichhe ho kawr' tiin inbel a phal lo kha a ni a, tuna a dah chhuah pawh Kurta tho.

Nui kar kar chung hian, "Vai chheho kawr chu hâk i phal ta a," ka ti a.

Khi suk chungin, "Ka hmuh hmasak ber a nia, a dang zawnna hman a awm tawh lo, inbel phawt mai teh," a ti liam puat.

A putea'n chaw ei tura min sâwm khan Sangzuala'n ka damloh chhuanlamin a hnial deuh a; mahse, a kal hun a hnai tawh bawk nen, 'veng chhung tho a nia' tiin 'âw' a pawh leh ta zawk. Mimtei leh Kimkima an vûi nang nang a, 'Kan vaia min sawm ve mai awm' an ti. Mahse, thu pawimawh an sawi dawn tih Sangzuala'n min hrilh lâwk tawh thung.

Muangchangin a putea te in lam kan pan ta a, half pen dum leh shirt var sar a inbel a, chapal a bun tawp. Eng thawmhnaw pawh inbel se a inhmeh zel, a sâng ṭha a, a pianin a zir bawk, footpath-a kan kal laiin ka kut vawn a tum a, "A zahthlâk, khawlaia invawn reng kher hi ka duh lo," ka ti hlak a, nui suk chung hian, "Ka puak nghal loh che.." tih pahin ka darah min kuah tho.

Putea (putea, pitei tiin ka sawi ve zel tawh ang) te in kan thleng a, pitei'n min lo be sawk sawk a, an fate an fel a, an ina lâwi luh a nuam. An sitting room zau hek hawkah kan ṭhu ṭhap a.

Putea chuan, "Mama, i kal hmain ruahmanna fel fai deuh siam la ka duh em mai, i nupui leh i nau chiah inah an awm dawn si a, a hmâ ang kha a nih chuan Kimkima hi a rawn haw zing thei kher lo ang a, an ngaihtuah awm lo ang maw?" A ti ta a.

"Tih ngaihna dang a vâng ve êm a ni, patea te lam min hlauhthawnpui deuh tihna mi?" Sangzuala'n a tih chuan, "Ni tho a, hmeichhe pahnih ringawt in nghah tir chu a zia vak lo, Mimtei a la naupang ve bawk si a, innu ti hi a ni bawk a," a ti leh a.

"Pathian zarah eng êm kan ti bik lo turah ngai ila, Mimtei nen kan lo awm ve nawk nawk ang a, Kimkima pawh zirtawpni a pianga lo haw turin kan hrilh mai ang a," tia ka lo ṭawng ve chuan Sangzuala'n min melh zauh a, "Nia, a ṭûl a nih leh Bawihpuia te pawhin an riahpui ve mai dawn nia," Sangzuala bawkin a ti leh a, Bawihpuia a tih hi putea fapa naupang zawk a ni.

An sawi dan aṭang hian a patea an ring lo hle tih a hriat reng a, Kimkima khatia a tih hnu khan a reh zui hmiah a, ngaihdam dîl chu sawi loh, biak pawh theihin a awm duh miah lo a, a fapa Ruatdika zawkin ngaihdam a rawn dil a, an report ta lo. "Mihrangin min dova min hua chu nise ka hrethiam a, ka patea'n min do tlat hi chu rilru a na duh khawp mai," Sangzuala'n a ti nghe nghe.

A patea'n tuna an inhmun a chuhpui tlat nachhan hi Sangzuala pain sawrkâr hna a thawk ve lo a, fa û ber ni mah se hlawh nei lo ta chu Sangzuala pian thleng hian a patea te nen an la inawm fin vek a. A hlawh nei zawk a patea hi hna vangin Lungleiah an awm ta a, tuna inpui hi Sangzuala puin a fapa upa ber tan a dah ta a ni. A pu enkawl ngaia a awm lai hian a patea te chhungkua an rawn lang ngai meuh lo a ni awm e. A nupui sual miau hek.

'Min enkawltu leh min dawm hlumtuin he in leh lo hi a chang ang' tia thu a dah vangin Sangzuala pa kutah a tla ta a, fapa naupang zâwk pate Duhsanga hian a ngaithiam thei tlat lo a, a û damlai kha chuan eng buaina mah an tawk hran lo; Lungleiah inhmun nghet an nei tawh bawk a, an hnenah eng emaw chen Sangzuala school kalin a awm bawk a, a nu leh pa an boral tâkah khan a patea hian a tharthawh leh ta niawm tak a ni.

Sangzuala pa Lalduhzuala kha mi â ni hek lo, a damlaiin in hmun lo ram a pa hminga awm ṭhin kha a hmingin a thlâk vek a, rokhâwmtu tur a tan a fapa upa zawk Liansangzuala a lo dah fel vek bawk. A hun laiin Sangzuala ala naupang a, mahse, a putea'n engkim a chinchhuakin a hrilh vek hnuah kum 25 a tlina a lo haw khan a pa hminga in hmun awm hi a hmingin a thlâk ve ta chiah bawk. Chutih rual vêkin a nu leh pa sum dahsak kha a zât ve a khawih ta nghal a, a naute zirna bâkah insak bul ṭanna atan a hmang ta a ni. A bâk zawng chu a loan lâk hmangin a chhunzawm vek thung.

Zanriah ei a hun tâk avangin chhungkaw ṭawngṭaina kan nei a, chumi hnu chuan hlim takin chaw hlui kan kîlho ta a.

Putea hi a rilru a ṭhat bâkah Sangzuala te unau a hmangaih a, anni pawhin an ngaina hle. A nî ve thung kha chu a nuṭa pa lamah a ṭang deuh bur a, an ngaina lutuk lo. Mimtei phei chuan a ngei tûk.

Tute chhungkua pawh hian buaina neuh neuh, tu khawkha hriat loh hian kan nei fir fer a, keini chhungkua pawhin u Chhanhima te nupa vangin neuh neuh kan ngah hle. Mahse, in leh lo ram chuh tih vela buai mi chhungkua eng emaw zât an awm nawk a, thisen zawmpui te ngawih ngawih pawhin duhâm luat vangin chhungkua an ti keh darh a, chhungkua kan inngeih lo fo. 'In îtsîk leh duhâmnaa kan khah chuan englai mahin chhungkua a nuam ngai lo ang' tiin Sangzuala'n min hrilh tawh a, ka ngaihtuahna a ti thui hle.

Zân dar riat velah kan haw ve ta a, tun hnaia ka chaw ei tam ber ṭum a ni hial ang.

In kan thlenin Mimtei leh Kimkima'n common room-ah tu emawni an lo Vid call a, kan luh rualin, "U Naom, Tlanhlua hi be ve teh u, a zah loh dan ém ém hi.." tiin Kimkima phone chu a û lamah a rawn lek phei a, Tlanhlua hmel ka hmu nghal. Nui vur vur chung hian, "Phâwi rang deuh ve, in tenawm dun tlat," a rawn ti a.

"Ti khan min fiam reng reng suh, ṭan ka lâkpui lo tawp mai ang che.." tiin ka nui ve hak hak a, Sangzuala'n eng mah hre ve thiam hek lo. Tlanhlua hnenah, "Ka hriat loh eng thil nge in zêp rûk?" Nui chungin a ti a. "Innu zawt la, Kimkima zawt bawk la, a tawp berah Mimtei," rawn ti duahin phone a off zui daih.

"AuMam, Tlanhlua hi a zak lo si, ka number engah nge i pêk?" Mimtei'n a û hnenah a ti a. Ani lah chuan, "Ka pe reng reng lo, Nám-in a pe a niang," tiin min siai zauh a, ka va ngei e.

Thingpui hâng inin kan ṭhu khawmuang a, Mimtei a ṭhu tum bùr, Tlanhlua'n a fiam leh hrep a nih ka ring, Kimkima'n a nau a en a, "Kan mâkpa tur chu hriatsa a ni bawk a, a nuam dawn mang e, nakinah kan nu tur chaw eiah ka la sawm ve ang, Mimtei a inti thei tlat," tiin a nau a fiam zurh zurh a, kan nui vek. Mimtein a û a chum awk awk a, anni pahnih hi chu inchhang bung an ni bawka an inngam viau.

"AuMam, Tlana kha hau rawh, hau ngei ngei rawh, a lerh si.." Mimtei bawkin a ti leh a.

Sangzuala'n nui chung hian, "Ka ṭhianpa a nia, fel ka lo ti riau asin, inhnuai ber khu a bang ping ve nawk nawk ila, in awm ang chu ka lo ti..." a'n ti chiah chu, Mimtei a ṭê ring ngei mai.

Za lutukin a û te pahnih an nui a, "Sipai nupui i ni ang a, i u Nâmi ang hian inah i awm mai mai dawn alawm, ani pawh BA mâwl a nih hi," Liansangzuala'n a tih chuan a malah ka sik vak a.

"Eng nge, BA mâwl hi an awm tak tak a nia aw.." a la ti hrâm a, "Sipai mâwl an tam ve tho," ka ti hmak. Mahse, ka nuih a za tho.

Titau chunga Mimtei'n room a pan hnuah keini pahnih pawh inchungah kan chho ve ta a, Kimkima'n Tv a la en thung.

"I kal hunah chuan inhnuai room ruak khu ka hmang ve mai ang, inchunga mahni chauha riah chu ka duh lo," tiin khumah ka ṭhu a, "Kha kha chu i thu thu a ni mai," tiin a thawmhnaw inbel a hlîp a, ka lo en reng.

"Inthlâk la, mu ang le," tih pahin khumah a lawn nghal a, zan hnih khat ka nawmsam loh chhung khan min ngaihtuah vut vut viau; eng tih theih nei lo mah se min vil reng a, zanah ni se a harhvang bawk si, a muhil ve miah lo em mawni tih turin ka harh apiangin a lo harh ve hman ziah.

"Hmangaihna chen dun lam te hi.." nui ruh ruh chunga a tih chuan ka ner sak a, "Indim a ngai, i off thei," ka lo ti a.

"Doctor-in a sawi em ni?" Tia min zawh chuan "Aih" tiin ka chhâng a, "Chuti, Mimtei kan zawt ang e, a hre ve tho dawn a," zuk ti a.

"Awihawm loh lutuk, zâwt miah suh," tiin khum aṭanga thawh chhuah a tum chuan a bânah ka pawt tlat a, "Ka nau alawm, engmah zahna tur a awm lo," tia ka vawnna phelh a tum chuan thlah duh lovin ka la pawt ṭâng ṭâng a, "A zahthlâk, zâwt suh aw," ka ti leh a.

"A nih leh le, zaninah chuan ka zâwt lovang; mahse, naktukah ka zâwt tho tho ang," a ti leh hrâm.

"A ho, zawh zawh a ngai lo," tiin ka hawi sawn daih.

"Nupa kan ni a, innei hlim kan ni bawk, zana kan tih tur te zawng hrilh hranpa ngai lovin an mitthla zut zut ang," tiin a nui kur kur a, "Liansangzual, i muhil dawn nge i ṭawng reng dawn?" Ka ti hlak hlak a.

"I zaidam sia, ka ṭawng tawh lo mai ang," tia min rawn kuahin, "Ka fâ i pâi hi ka la awih thei lo," a ti sup a. A nui tawh lêm lo.

"Kei pawh ka awih thei lo," tia ka chhan chuan a ṭhu chhuak hlawl a, "Eng maw i awih loh? Ka fa a nih lohin tu fa nge ni chuang ang?" Tiin min en a, "I fa a ni lo ka tia mi, ka râi hi ka la awih thei lo zawk maw le, a lanchhuah hma chuan ka la awih tak tak ngam lo," ka ti leh a.

"A puar zawt zawt dawn si lo a, i awih har awm; mahse, lungngai suh, a ṭha ber a nia ka pêk che kha, a puar har vak lo maithei," tiin a nui leh a, "Tiang em em hian i ṭawng thei tih ka hre lo," ka ti sap ringawt.

"Ṭawng duh lova ka ngawih reng chuan i buai dawn e, i ṭawng ai tur ka la ṭawng kêp zel che a, ka va han fel tak. Chuti ni lo se chuan zantin ngawi rengin kan mu ang a, kan ti leh tawp bawk ang a, nuam i ti miah lo ang," a tih chuan chhân ngaihna ka hre tawh lo. "Ka chau, muhil ang," ka ti ta zawk a.

Khua a var a, ni a liam a, Sangzuala naktukah Aizawl panin a kal tawh dawn a, ka mood a off vek. Ka huphurh ngawih ngawih lutuka ka nui thei lo a chhâ chu a ni e.

"Nám, tho teh, i hriatthiam a ngai," tiin khum ko tlângah a ṭhu a, chêt pawh ka che duh lo. Kal leh tur a ni tih chu ka hria; a hun a lo thlen dawn meuh chuan amah te hi ka haw hlur a, ka tho duh miah lo a, ka puansin ka bilh phui veka ka inlukhûp tlat.

"Le, tho rawh le, kan dam ang a, hunte chu a kal duak duak mai ang, nangmah chauhvin ka kalsan dawn lo che tih i hriat kha, keimah zâwk asin lungléng dawn, i pum chhunga mi hlut zia kha hria la, ka neih ve loh hi.." tiin a nui hawk a. A rukin ka nui ngat ngat. A thil sawi dan te lah hi a..

Ka inkhuhna ka hlîm ta nge nge a, "Vawiinah tih tur pawimawh kan nei nual a nia, i chêt vat vat a ngai," tiin ka hmuiah a fâwp zauh a, nizan khan duh thawh takin hmangaihna min chenpui a, a lo sawi lâwk tawh angin a nau a zâwt thlap. Mahse, a zawh laiin ka awm lo hlauh. Vawiina a tih tur ruahman hre mah suh ila ka thawh tho tho a ngai.

A naute pahnih pawhin an huphurh tih hrilh hranpa ka ngai lo, an û hi an thlamuanpui a, a awm leh awm loh kâr a hla hle dawn a ni.

Tûkṭhuan kan eikham a, kan chhuah lawk tur thu a naute a hrilh a, eng nge kan tih dawn min zâwt hran lo. "Bike in kan kal mai dawn nia, kal kualna tur a awm nual sia, a pawi êm lovang chu," a ti a.

"Chak deuh deuhin tlân lo la a ṭha a ni mai, rangkachak i phur dawn tih kha inhria la.." ka lo ti a.

"Lutuka a che.." tiin a nui suk.

Amah hi ka chhun zo vek tawh holam deuh deuha ṭawng ka ching a, chu chu amah pawhin a hre ve tho, "Ngaihsan tur dik tak i pasal min ngaisanga ka lawm," a'n ti ngeiah..

Ani pawh hian ka ṭawngkam lâk a ching ve ta zauh zauh. A huat zâwng eng emaw ka sawi chuan, "I chhia, i va chhe tak" te hi min ti ve ta fo. Ka nuih a za thei hle.

Ka doctor a hmaa kan pan kha min hmuh pui hmasa phawt a, amah ngeiin ka hriselna dinhmun hriat a duh vangin doctor a zâwt thlap bawk.

Chumi hnuah bank-ah min hruai leh a, pawisa a la chhuak phawt a, ka account-ah a thun bawk a, a ngai lo tia ka hnial pawhin, "In chhungkhur mamawh leina tur a nih kha, ka naute pawhin an mamawh an díl tawh dawn che tih ka sawi kha, a chin tâwk erawh i thliar thiam dawn nia," hnial theih miah lohin a ti hmiah.

"Min dîl reng ta se..." ka lo ti a.

Nui suk chung hian, "Chu tak chu alawm a chin tâwk thliar thiam rawh ka tih nachhan," a ti leh tlat.

"I â siah, chutiangin ka ti ngawt thei lo ang," tiin ka melh chho hâ a.

"Ka ât poh leh ka hnaih thung che alawm, ziaawm teh, keimah ang thovin ka naute pawh an â ve tho turah ngai rawh, an mamawh dik tak ni lo turah eng mah an dîl lo ang che, mi hausa kan ni lo a, engkim an hrethiam vek," a ti a, ka thaw huai.

Sumo counter-ah min hruai leh a, "I haw rûkna sumo-ah kha chuan ka chuang dawn miah lo a nia, vawi thum ka call pawhin a la duh malêk a, ka haw deuh tlat," a tih chuan, "Chutiang mipain sawi loh tur, a rem remah chuan mai tur," ka ti a, "Chuti a rem lo a nih chu," a ti leh hmuk.

A tum dan chuan naktuk zing chhuak sumo-ah Lunglei a pan ang a, Tlana sâwmin chawhnuah Aizawl an tlang nghal dawn a ni. Aizawlah zankhat an riak dawn tihna a nih chu, u Chhandama a be lâwk vek tawh a, aniin an car-in Lengpui Airport thleng a thlah thung ang.

Lengpuiah hian ka ṭhiannu ka school kalpui ṭhin Rengpuii a awm a, Sangzuala a hmuh châk êm avangin hun an neih chuan tlawh hram turin ka hrilh a, a hrana va kal ngai lovin Airport bul hnaiah an awm tho a, "Inpa chu ka lo châng dawn nia," a ti nghe nghe. An in hmu turah ngai ang. Sangzuala ngainat tur chi tak a ni a, Faktei kha kan boruak dik loh vang kha nge a be tui tam lo viauin ka hria. Amah Faki a sual tihna ni lovin.

Dâr thum rik dawnah AOC petrol pump aṭangin kan chhuak thei ve chiah. A bike tanky full papin petrol a thun a, "Kimkima'n a kawl dawn a, lirthei dang cháng chawpa haw chhen a peih loh takah zirtawpni apianga haw tura inbeisei phei chuan bike a kawl ngei ngei a ngai," a ti a. A dik chiah, boruak ṭha lo pawh kan nei tawh lo a, khulaia mi ina awm reng ai chuan weekend apianga lo haw kha a ṭha zawk.

'Kan in lamah awm mai se' tia ka'n sawi khan a inthlahrung ve deuh bawk si a, a ṭhianpa in luah a fin leh dawn niawm tak a ni. Ani chu a ngaihtuah awm loh turah ka ngai.

In kan thlenin a tlai duai tawh a, common room-a lo ṭhu ka hmuh chuan ka hnual rawih. Lawmi leh a ṭhiannu an lo awm a, Kimkima ka hmu lo. Mimtei erawh chuan eirawng a bawl a.

"Sangzual, zanin chu inthlahna te i siam leh dawn lo mi?" Ngampa taka Lawmi ṭawng chu eng hu-ah ka ngai lo, a chanchin ka hrechiang ve thawkhat tawh a, a duh duh sawi mai mai teh se.

"Min thlah duh te chuan in lokal anga a ni mai alawm, in lo len ve teh tlat," tia Sangzuala'n a chhân chuan, "I kal hmaa hmuh hman loh che kan hlau pawh a ni maithei," tiin a nui sâng a, min rawn en chung hian, "Naom, i naupai chu i ngeih dawn lo a va ang ve i thü tlat," a ti deuh kher.

Ka lo nui ringawt a, chhán tlâk pawh va ni suh. Mahse, Mimtei zâwk a rawn inrawlh a, "Hetiang te hi chu a reh ve mai ṭhin alawm, u Naomi vun hi chu a nalh saa a thü tih pawh a hriat loh zawk; thil a ei ṭha anga a zia tulh tulh mai ang," a lo ti a, Lawmi a ngawi reng. A ṭhiannu zâwk ala ṭawng ve miah lo a, ka vawikhat hmuhna.

Sangzuala'n Kimkima awmna Mimtei a zâwt a, putea te ina a kal thu leh a kalna a rei deuh tawh tih a sawi. Chuti a nih chuan Lawmi te pahnih hian min lo nghâk chhuak ve hrim hrim a nih dawn hi.

Lawmi te lam hawiin, "Ti khan lo ṭhu rawh u aw, Kimkima a lo haw ṭêp ang, kan han inti fel ve lawk ang e," Sangzuala zâwkin a ti ta a, "Nám, hawh le.." tih pahin ka kutah a vuan a, hun dang nise chuan ka duh lo ang; mahse, tun hun a ni tlat. Inkái rialin room lam kan pan chho ta a.

Khuma ṭhu hnawk chung hian, "Ka chau, i bike seat sâng lutuk hi chu ka va ngaina lo ber mai, ka bawp a rawl vek," ka ti nang nang a.

"I pasal hi Zoramthanga fapa ka ni lo atin ni," tiin a nui suk a.

"Kiri..." tia nuiin ka thawmhnaw inbel ka hlîp a, min en vung vung chung hian, "I duh leh mu hahdam rih la, zaninah i muhil dawn si lo a.." nui ruh ruh chunga a tih chuan, "Eng a?" Ka lo ti vak a.

"Sipai chhuṭi kal leh tur ka ni a, i muthilh inbeisei suh, a hmain ka sawi vek tawh kha, kan nautê pawhin min see-off te a duh ve dawn a," a sawi zawh rualin za lutuk hian a nui a, ka ngei thei a nia. Fiamthu mah nise hetiang ṭawngkam tlahawlh zet zet hi sawi a chîng a, ka haw riau. Mahse, ka nuih a za tho.

"Liangsangzual..." ka ti nghek a.

"Yes, my dear Naom..." tia zak map lova min enin, "Ka kalsan tur Rangkachak hlâwm hi a hlut zâwng zaninah ka teh ang, a bûk a rit nge rit lo hriat nân 'up down' turin lo inring ang che," nui kur kur chunga a tih chuan khuma ka kawr dah chu lain ka vawm a, a lo dawng chat, "I bra hâk lai khan min vawm leh la, chuan, a dang zel pawh kha..." tia a sawi zawh rualin kawngkhar lam a pan a, kei ka ding hluai thung.

"I va han chhe chukchu tak..kal rawh.." ka ti a, kawngka aṭanga rawn dâkin, "Ka kal dawn, thinawrh.." a la ti hrâm.

A nui hawk hawk ri ka la hre pha reng, hlim taka a nui ri hi naktuk aṭang chuan ka hre pha leh tawh awm si lo a. Vanduai thil thuah min boralsan ta se, ni lo, chutiang ka ngaihtuah duh teuh lo, thaw halh chung hian khumah ka mu thlawrh a, ka mut a chhuak ngang lo, inbual tumin bathroom ka pan ta zawk a.

Zanriah ei tura min rawn koh chuan ka nu nen kan inbe zo chiah a, Sangzuala awm loh chhungin kan lo zin dawn em ni? Tiin ka sawi dék dék a, 'A ṭûl lo lutuk, nu leh pa ina kal fo te, zin chhen te hi a ṭha ngai lo, a ṭûl tawpah lo chuan lo kal a ngai lo,' a ti deuh tlat. Ka dam ṭhat thu leh ka ngaih thu ka sawi a, 'Kan ngai che alawm, indim la, damtein kan awm anga i nau neih dawnah lo zin kan tum dawn nia' a ti duh lek. A'n sawi hla mai mai khawp a.

Zanriah kan ei kham a, Kimkima'n, "Mama, Naomi leh Mim-i ringawt ina dah chu a tih chi dawn em ni?" A ti a.

"Kan hlau teuh lo, tiraw u Naom," tiin Mimteiṭ'n min rawn en a, ka lo nui ringawt.

Ka hlau hran lo a, a nuam viau pawhin ka ring hran lo.

Mahse, Sangzuala zawkin, "Kâr tawpah haw hram hram i tum dawn nia, Naomi kutah pawisa vel ka dah ang a, in mamawh in dîl dawn nia, an pahnihin han awm chhin se, an theih tâk loh leh Bawihpuia riak turin lo sawm mai rawh se, ka hrilh tawh kha," a ti a.

"Nia, haw zel ka tum ve phawt ang a, in luah man kan intum sem leh dawn a, ka ken nghal a ngai ang aw," Kimkima bawkin a ti leh a, "Kha lam kha chu Naomi kut vek a ni mai, kan dinhmun inhria a, hmabâk kan la ngah si a, inren thiam a pawimawh ang," a ti dam leh thluam.

Thil ṭul dang a sawi leh nual a, bike kawl a phal tih Kimkima a hrilh chuan a lawm ngang mai. A nui deuh reng.

"Ka nupui neih danah in rilru a nâ pawh a ni thei a, in û hi he mi kawngah hi chuan ka entawn tlâk loh khawp mai; nangni pahnih erawh chuan ka hnung zui lovin fimkhur takin nun in hmang dawn nia, Námi hi in kuta awm a ni a, inngeih taka in awm ka beisei, râlkhat aṭanga 'chuti khati' rawn tih reng loh in tum dawn nia, phone a awm a, ka duty dan tlangpui inhre bawk a, chanchin kan inhrilh zel dawn nia," tiin naktuka a kal hun tur leh Aizawlah zankhat a riah tur thu a sawi tel bawk.

"Kan hmaah eng nge awm dawn a, lo thleng tur kan hre lâwk lo a, a chheber dinhmun pawh tâwkin zan khat mitchhin pawh ka lo tawk thei, Naomi leh ka fa hi lo thlahthlam lo ula, in unaunu a ni tih theihnghilh ngai suh ang che u, a bîkin Kimkim, i mawhphurhna a sâng hle tih hrenawn leh la, i farnu te pahnih hi i kuta awm anni tih hrereng ang che," ti nawn lehin min rawn en a, a thil sawi dan hmang hi ka rilrem lo. Min thihsan tum ang maiin alawm le a ṭawng. Ka túm hmak.

Kan room-a kan awm hnuah ka sawi chhuak ta chiah a, ka ṭap lo chauh.

"Thil awm thei ka sawi mai a nia, an la nau deuh a, chipchiar taka hrilh an ngai ṭhin, nang pawh i pawimawh a nia," a ti dam thlap.

"Khatiang thu kha vawikhat mah sawi tawh suh, ka duh miah lo," ka la ti hrâm.

"Ni rawh se, rilru puitling an la pu bîk lo a, sawi ngai lo anga kan ngaih te hi sawi ṭûl châng a awm ṭhin, i dawhtheih a ngai viau dawn a nia aw, eng emaw ho tê tê-ah vûivaina zawng lo la, pawnlam mi bulah kan chhungkaw chanchin emaw midang chanchin sawi loh bawk tur, i zahawmna ti bawrhbâng tur thilah inhnamhnawih lo bawk la, ka hmangaih che a, i tan ka rinawm reng tih hre thar zel ang che," dam thlap leh thutak zeta a sawi zawh chuan ka mitah chiang takin min en a.

"Nám, ka hmangaih che, ka ngai dawn bawk che," zawi supa tiin a kut lum thar thar chuan ka biangah a tawk a.

"Kei pawhin ka hmangaih che.." ka sawi zawh rualin ka insût hraih a, ka ṭah a chhuak.

"Hei, khatiangin awm suh, nangmahah rinna ka nghat ngam a, nangpawhin min ring tih ka hria, khawvel inhmangaihna chuai thei hi chuan rei a daih lo, kan inhmangaihna hi chu Chatuan daih ni rawh se, kan taksa awm hrang mah se kan thinlung a inzawm tlat chuan thihna chauh lo chuan min ṭhen hrang lovang.." nghet charha tiin ka chalah a fâwp a, ka thlâ a muang huai huai.

"Sangzual..." ti sapin a nghawngah ka kuah a, min kuah lêt ve vat. Dim leh duat deuhin a hmuiah ka fawp hmasa ta a.

Ka pasal a ni a, a ta ka nih angin ka ta a ni bawk.

Zak miah lovin ka thawmhnaw inbel lai ka hlip a, min en ngat ngat, hun dang chu nise zah luat vangin ka kimki ngei ang; mahse, a huna zak lo thei turin ka pasal hian min zirtîr miau alawm.

'Up down' turin min phût bawk a, a duhna ti hlawhtling turin chêt ka la hmasa ta a.

Khumah puansin lovin kan mu a, thlanin min leih hnâwng chap a, nawmna tam tak kan inpêk tawn hnuah a âwm ngheng chialin ka mu a, "Nang aia sipai nupui nih tlin tur an awm lo," tiin a nui vei suk a, "Tikhan min fiam ziah suh," ka lo ti hlar.

"I râi no thinchhia hmachhawn lo tura ka kal a ngai hi tlêm chuan ka lawm," nui kur kur chungin a ti a, "Ngawi mai teh, phone aṭangin ka rawn vin tuar tuar tho ang che," ka tih chuan a nui nghawr dat dat a, "Tun hmaa i zaidam ṭhin nen, kum 30 i tlin meuh chuan i ri ṭhak mai alawm," a ti leh a.

A khabe hmulah pawh sakin, "I hun neih dan ka hre ve dawn si lo a, min lo biak hmasak zel a ngai ang," ka ti teh daih a.

"Lutuk e, lungngai lo la, ka hunawlah lo biak zel che ka tum ang, indim êm êm ang che, sawi nawn ngai suh se aw..." a ti a.

'Aw le' tih nan ka fawp zauh.

Zingah thawh hma a ngai dawn si a, muthilh tumin light kan off ta a.

Ka harh leh chuan a lo inpeih diam a, dâr nga a pêl tawh. A hmain a thawmhnaw kan siam fel sa vek tawh a, putea car nizan lamah Kimkima'n a la phei tawh bawk. Ka va huphurh si êm.

"Min thlah lo mai ta che, Kimkima chauh lo kal mai se," a tih chuan ka ṭhu chhuak nghal a, "Aih, ka duh lo," tiin min hnial hman hmain bathroom lam ka pan vat.

Ka intih fel fai chhungin balcony ah a lo ding a, min kalsan a hreh ve takzet tih ka hrethiam. Ka hmâ ka sial lutuk deuh a ni, hlim hmel lan tîr tur zawk ka nih laia hetia ka awm te chuan a ṭha nang.

Kan room kan chhuahsan dawnah min kuah vang vang a, duhthawh em emin kan infawp a, ka pum chûlin, "Ânu nen hlim takin lo awm ula, ânu damlohna tur thlen suh aw.." dam thluamin a ti a, dik tak chuan ka hnuk a ulh. Mahse, ka insûm hrâm hrâm.

"Sangzual..." ka ti lawi rât a. Sawi tur ber pawh ka hre si lo.

"Nám, ka kal a hun e," tiin kan inneih zungbun ka bunna lam kut a fawp zauh a. Kan nupa room vawikhat a en kual leh a, kan chhuak ta a.

A naute pahnih an lo tho ve tawh bawk. An û a kal dawn meuh chuan kaihthawh an ngai bîk lo. Kimkima a kuah hmasa phawt a, chutah Mimtei, "AuMam, in lam chu lo ngaihtuah miah suh.." ṭap lek lekin a ti a.

"Infel a, ka ngaihtuah lo che u, chuan ka thu sawi zawng zawng kha hrereng rawh u aw," tiin dawhkana thingpui leh a hmeh tur Mimtei dah chu a ban a, Kimkima pawh a hnual ruih mai.

In kan chhuahsanin dar ruk a pel hlek a, putea car Kimkima'n khalhin Mimtei a hmaah a ṭhu a, a hnungah Sangzuala nen kan ṭhu thung, ka kut a la thlah lo hrim hrim. Nizan khan putea te nupa an rawn lang zawk a, zinga inthlah a buaithlak tiin an rawn chibai zuai kha a ni a, kan paliin counter kawtah kan ding a, sawi tur a vâng teh e.

Sangzuala motor-ah a lut a, Kimkima'n ka darah a rawn kuah a, "Inah i lo awm mai lo a ni, a hrehawm duh asin," a ti sup a.

Liansangzuala a kal ta, an lan theih chhung ka thlir a, ṭap lo turin hmui ka pet fan fan.

An tlân chhuah dawna a mitmeng dam ruih leh lunglenna niawm tak lo lang kha ka hmuh hmaih lo. Mimtei'n a mittui a hru zauh lai pawh ka hmu reng.

Sipai nupui ka ni a, tawrhchhel ka zir a ngai dawn hle bawk.

Ka lung a va lêng dawn si êm..

B®®

B+>[BeckirafARenthleI]<+®®