17.NAOM[Mizo Love Story]-B®®

17.NAOM [Mizo Love Story]

Ziaktu: Becky Rafa Renthlei

B®®

Shadow of the life

Sangzuala motor ah a lut a, Kimkima'n ka darah a rawn kuah a, "Inah i lo awm mai lo a ni, a hrehawm duh asin," a ti sup. 

Liansangzuala a kal ta, an lan theih chhung ka thlir a, ṭap lo turin hmui ka pet fan fan.

An tlân chhuah dawna a mitmeng dam ruih leh lunglenna niawm tak lo lang kha ka hmuh hmaih lo. Mimtein a mittui a hru zauh lai pawh ka hmu reng.

Sipai nupui ka ni a, tawrh chhel ka zir a ngai dawn hle bawk.

Ka lung a va lêng dawn si êm..

B®® 150721

Sangzuala te'n nizan khan Aizawl an thleng tawh a, Tlanhlua nen u Chhandama te inah riakin, tunah Lêngpui airport-an thleng tawh a, Rengpuii nen an inhmu ta nge nge e.

A awm loh veleha room riah chhuahsan ka hreh a, Kimkima a la awm tho bawk nen kan nupa room-ah keimah tê chauhin ka mu ta kha a ni a, Sangzuala nen rei fê phone-a ṭanga kan inbiak hnuah ka mu ve chauh. Ka nuin min ngaihtuah deuh a, zantirah min rawn be bawk.

Mimtei leh Kimkima pawh an ngui nghiai a, zanriah kan kîl laia Sangzuala ṭhutna ruak ka hmuh ringawt pawhin ka ṭah a chhuak nghal, chaw ka bâr hleithei lo. Kimkima'n, "Nangmah chauh inngaihtuah thei i ni tawh lo a, naute nen hrisel taka in awm theih nan ei luih tum hrâm hrâm rawh," a ti a, Mimtei'n a lo tuihnih ve bawk.

Kimkima hi chuan 'Naom' tiin min ko ve mai a, mahse, min ko khât khawp mai. Min mâwl biak zing zawk, ani aia naupang ni mah ila û zawk nupui ni ta chu min ko hreh tepawh a ni mahna. 

Kârlehah Lunglei a pan ve tawh dawn a, a awm lo tur a huphurh awm ve tho mai, inhnuaia riak ve nghal tura min tihna erawh ka lo hnial ta kha a ni a, Sangzuala tel lo chuan he in chhung hi a ruak huai; a awm loh a hriat ngei mai.

Chaudhary Charan Singh International Airport-an chhuahsan hnuah Sangzuala'n min rawn call ta chauh a, "Nám, kan room-ah i awm em?" Tia min zawh chuan ka awm loh thu ka sawi a, "Kan room balcony thlanglam zawkah khan han kal rawh le, tihian phone ka lo chelh ang," a ti a.

Eng chu hria ni maw?

A sawi ang chuan hmanhmawh angreng takin kan room-ah ka chho a, Mimtei'n zawhna mitmeng nena min enna pawh ka chhâng lo. 

Kan room ka thleng a, thlanglam balcony-ah chhuakin ka ding ta a, "Ka thleng tawh e, eng thil nge a?" Tia Sangzuala ka zawh chuan, "I mutna lam tukverh bul kha en teh," a ti leh a, a bul lawkah ka ding reng bawk si a, tukverh bul banga thil inziak ka hmuh chuan, "Liangsangzual, i châk dâwn lo lutuk.." ring zeta tiin ka nui hak hak a, ka thinrim hran lo, ka nuih a za êm a ni.

"I hmu maw? Ti khan tunah tak khan ka bula awm angah inngai rawh," nui hawk hawk chungin a ti a.

He pa tak hi chu(h)

A sawina lai banga thil inziak chu eng dang ni lovin 'LUCKNOW' tih maw le.

'Ni e, a hma khan kan in bangah Lucknow tih kan târ mai dawn nia' fiamthua tiin min hrilh tawh a, a hma khan ka hmu ngai miah lo a, a kal dawn zingah a ziak chawp a nih ka ring. Ka va nui hnem si êm.

"I ho siah," ka'n ti ngawt a.

"Min ngai a nih mai chu.." tia a nui kur kur ri ka hriat chuan ka ngai veng veng. A sawi ang deuh khan a bula awm angah ka inngai deuh tak tak.

"Nám, ka dah rih ang aw, hunawl ka neih veleh ka lo be leh dawn che nia," tiin phone a off ta rih a. 

Inhnuaia ka chhuk leh hnuin Mimtein ngaih ṭhat loh hmel zet hian min rawn en a, nui kar kar chunga thil awm zia ka sawi chuan kei âi âiin a nui nasa zawk. "In va ho e," a ti nang nang a, Tlanhlua chungchâng sawipui ngial ka tum a, a duh ṭhak náng.

Tluang takin Sangzuala a thleng tawh tih kan hre ta bawka thawven khat chuan ka thawveng; inchhung chêtah Kimkima leh Mimtei'n min âwl vek a, zing leh zan thleng sil bák ka ti meuh lo. Lungphun hmanga ka zin laia ka biak ve kan ṭhenawm nuthlawi tih loh tumah ṭhian thar ka nei lo a, ṭûl tâwpah lo chuan ka chhuak ngai lo.

Kimkima kal hun a lo thleng a, a û in a lo sawi tawh angin bike a keng dawna a hlim hle, in luah man tur leh a mamawh zualpui leina tur min dîl a.

"Eng mah sawi hreh suh aw, mamawh i neih pawhin lo sawi la, he ta ṭanga kan lo thawn thei lo che a nih pawhin kan in awmna i hriat kha, i in angah ngai la, i remchan hun apiangah i lo va tlawh ve dawn nia, ka nu te ka lo hrilh ang," tiin ka chah ve ngei.

"Ka lawm e, remchang hmasaberah tlawh ka lo tum dawn nia, indim rawh aw, eng mah hna hahthlâk thawh tum ve lo la, kan naute tur kha ka hmu châk tawh khawp mai," tiin a nui var var a, hmana ka hriat Kimkima kha a ang leh ta. 

Thawmhnaw ken tam a tum vak lo a, a ṭhen chu Sumo-ah a thawn tawh a, bike chahbi kan drawer a mi ka han la leh tê tê a, racksack nen a in ak chhuak ve ta a, Mimtei nen a tlân liam hma loh kan thlir a, Sangzuala kal tur ai kha chuan kan zia awm deuh, Lunglei mai a ni bawka kâr tâwpah lo haw zel a tum tho a, a zia hrim hrim.

Kâr a liam a, zinglam luak chhuak ka nei ve ṭan, inhnuaiah ka riak thla tawh a, Mimtei'n min ngaihsakin min duat em em a, ka nawmsam loh pawhin chiai buai miah lovin min buaipui zar zar, Sangzuala nen a remchan danin kan inbe ve zel a; ka nawmsam loh thu pawh ka hrilh lêm lo. Min ngaih thu a sawi zing khawp mai.

Discharge chungchang kha a rawn sawi lang ta miah lo a, ka zâwt bîk lo. Min hrilhfiah chiam mah se a mik a mak ka hre ve ngai chuang si lo a, min hrilh lo pawh nise ka thiam tho.

Kimkima chhuk ta khan ka nu leh pa a lo tlawh kâwi ve ngei a, zanriah te pawh a ei a, ka nuin a ngainat thu a lo sawi, ani hi zawng a awm ṭhata sual a chhuah loh chuan mi ngainat a hlawh vat zel. Lawmkimi te pawh an rawn lang ta rih lo.

Mahse, a chhuk aṭanga Zirtawpni hmasa ber a lo thlenin a lo haw theih loh tur thu a sawi a, keimah min phone lovin Mimtei nen an inbiaa an inhnial deuh nge, room aṭangin thinrim tih hriat deuh hian Mimtei a rawn chhuak a, "U Naom, Kimkima kha be ve teh, kan sawi chian tehlul nen Masiami birthday tih vang mai maia rawn haw loh a tum a nia," a ti bawrh bawrh a.

"Keia biakin awmzia a nei lo ang, lo haw loh a tum rau rau chuan nawr lui lo ila inhauna a tam lo zâwk, kârleh lamah a lo haw ve mai ang chu," tia ka chhán chuan, "Kan pahnih chiahin kan awm tih a hrereng a, Mama'n a hrilh vek bawk a, ka ngaihdan a ni lo," a ti leh a, "I û hrilh kher suh ang che, min rawn ngaihtuah anga atan tih theih a awm chuang lo," ka ti ṭha mai.

"Be ve hrim hrim rawh," a tih deuh tlat avangin ka call ta tho.

"Masiami birthday zirtawp zanah lawm an ti si a, ka rawn haw lo mai ang, i zia tho chuan," a rawn ti a.

"Mimtei ngaihdan a ni vak lo a, ka lo call hrim hrim che," tia ka chhân chuan, "Ani te chu a tih dan alawm," a ti leh tawp. Sawi zui vak ngaihna ka hre lo.

Zanah Sangzuala'n min rawn be zuai a, ka hriselna chungchâng min zâwt zo chiah tihin line a in cut daih a, ka call nawn leh pawhin a tlang thei tawh si lo a, eng mah ka sawi lang lo. Mimtei"n a hrilh a nih chuan thuhran ni ta se.

Nunphung pangngai kan zawha inlama tih tur nei chuang silova awm reng a ninawm êm avangin Mimtei nen 'rizai second hand bale' hawn ve kan tum a, mahni hman tur a lo tum tâkah tiin u Sawmi ka va be râwih a, a lo phur nasa mai. 

"Pawisa min rawn thawn ula ka lo buaipui vek dawn nia," a lo ti awlsam êt.

Hmelhriat ka nei ve si lo a, whatsapp group Mimtein a siam a, kan awmna veng bîka a hmelhriat leh ṭhian ṭhate a add a, a phur phurah a ṭang zui. Kan ṭhenawm nuthlawi Rinpuii kha kan hrilh ve bawk a, ani hmelhriat ngah sa a ni a, 'ka lo hrilh darh dawn nia' a ti ve bawk.

Chutiang thil vel kan buaipui avang chuan u Sawmi nen kan inbe zing khawp mai, pawisa kan thawn fel a, ka account ami kan hmang. Lawngtlai sumo-ah a rawn thawn a, Mimtei leh Rinpuii'n an va châng a, Sangzuala eng mah ka la hrilh lo, min hau êm lovang chu.

Thil pakhat ka hriat chhuah tâk chu, nu leh pa uaptu neih loh hian thil sual tiin va tâl hiar lo mah ila, zalen rûkna riau hi a awm, kan inah kha chuan keima thu thua ka awm châng tam mah se, nu leh pain min zilhin min hau fo a, hetah chuan khatiang kha awm hek lo. Mimtei nen ringawt kan ni a, kan inngeih bawk si nen kan duh dan danin kan awm a, hmanzan pawh khan beer nge zu ka hre chiah lo a inin ka hria. Mahse, rûi anga a lan loh avangin ka khak duh ta lo a, a khaktu tur pawh eng ka nih bîk si loh.

 

"Nám, Kimkima a lo haw lo tih eng ati nge min hrilh loh," tia Sangzuala'n min zawh chuan a lawm vak lo tih a ṭawng dan aṭangin ka hre mai.

"Sawina hun a awm lo atin ni, kan inbiak hnuhnun ber khan line a incut daih si a," ka ti a.

"Whatsapp aṭang pawhin min hrilh thei reng alawm, eng vanga lo haw lo nge a nih?" A rawn ti leh a. Ka hrilh ve mai.

"A mah ka lo bia ang, tunlai chu signal kan nei ṭha lo êm a.." dam deuh zawkin a ti a, Second hand chungchang vel kha hrilh ṭhaa ka hriat tâk avangin ka hrilh a, a lawm lo ngei mai.

"Thil ṭul lo a nih kha, inah khan awm hle hle u la, vawikhat mah ti nawn tawh suh ang che u," tia min hau chuan ka ngawi dâk. 

"Ka sawi chu i hria em, Mimtei nen zan dar kua ka duty hmain min rawn vid call ang che u," a tihdan pangngaiin thu pe âw takin a ti leh a, "Yes boss.." ka ti sap.

Râlkhat aṭang pawhin thu nei âw taka min rawn biak hi chuan 'de de dei' kan ti ngam der lo. Kan tana ṭha lo tur a sawi ngai bawk lo a, zawm mai hi a finthlâk.

Zan lamah kan rizai hawn en tura lo kal an awm nual avangin kan ri ve niai niai a, Sangzuala kan call theihnghilh daih, ka hriat chhuaha ka call leh chuan switch off a in tawh bawk si, ka inthiam lo lutuka whatsapp-ah insawi fiahna ka thawn chiam, a hmuh hun hunah min lo call turah ngai ang.

Tui taka ka mu lai chu eng emaw hian min tiharh a, ṭawng bawrh bawrh ri niin ka hria, rang takin ka ṭhu chhuak a, zan dar 11 a ri tawh a; kan mut fel khan dar 10 vel niin ka hria, ka muhil nghal a nih ka ring. Kimkima leh Mimtei inhau thawm lek niin!

Khum aṭanga chhukin ka tlân phei nghal a, common room-a lo ṭhu ka hmuh chuan ka ding dat, Kimkima leh Mimtei an lo indin chilh rân a; zawh nawn ngai lovin Kimkima a rûi tih ka hre bawk. 

"U Naom, Kimkima zah loh zia hi," tiin Káwi sáwi zeta lo ding a û chu a nam sawk a, ani lah lo inring bîk hek suh, kawngkhar a nghêng nghal rawk rawk a, "Zothanzual, ben i duh loh chuan awm sawn rawh," a ti khur khur a. Mimtei bânah kâiin, "Awm sawn rih mai rawh," ka ti sap a.

Sofa nghenchhan nghenga meng duar duar Masiami ka melh nghek hnuah, "Kimkim, eng ti zia nge, i lo haw dawn tih i sawi si lo a," tiin dam thlap hian ka ṭawng a.

"Nupui ru turin an sawi lâwk zuah zuah ngai lo, Zothanzuali nen khan min tibuai lovin va mu rawh u," sehchilh nawk nawka tiin Masiami awmna lam a pan a.

"AuMama ka hrilh dawn khawp mai, i zah loh dan em em hi, nupui châwmna tur i nei em ni? Masiam, nang pawh rûi chungin kan inah i rawn lût ngam a nia," Mimtei'n a tih leh chuan, ngawi rih turin ka hrilh a, a thinrim êm vangin ka thu sawi pawh a ngaithla lo.

Zu rui bula thil sawiin awmzia a nei lo tih ka hriat vangin, "Kimkim, i room-ah lut la, Masiami hi chu inchung room ruakah mu mai rawh se," dam thlap bawkin ka ti leh a, ka sawi zo hman chiah.

"Naom, Masiami nen mut hran kan tum reng reng lo, ka room-ah kan riak ang, kal tawh rawh u," a ti nghut a, chutianga rui chhia a ni miah lo. Zu rim nam mah se Lunglei aṭangin accident miah lovin an rawn inkhalh thleng a, a tider niin ka hre mah zawk.

Eng ang pawhin dan tum mah ila, an mu hrang duh dawn chuang lo tih ka hriat avangin Mimtei bânah ka vuan a, "Kalsan ang, zingah kan sawi ṭha leh zawk dawn nia," tiin a room lam ka panpui a, a ṭang deuh ṭung. Masiami a ṭawng ve miah lo a, ngawi rengin a ṭhu ngat ngat, Kimkima aiin a rûi zawk pawh a ni mahna.

Ka room-ah pawh mu lovin Mimtei nen kan mu tlâng ta ringawt a. Sangzuala hrilh ka huphurh ngei mai, a kal dawnah thu ṭha tin reng a hrilhin a chah mawlh mawlh a, kâr hnih êm pawh a ral hmain tiang hi kan tawng ta si a, a ngaihna ka hrethiam lo. Kimkima hian tumah zah a nei lo ni berin ka hria.

Tunah 'Bar Exam' hma chhawn mai tawh tur a ni a, a û hlawh ringin a la kal ve hram hram a, ka thin a lo rim ve ngawih ngawih. Nupui pasal neih chungchâng thlengin a hrilh chian teh reng nen, ka pasal rilru natna chu ka rilru natna a ni ve tho.

Mimtei pawh muhil thei lovin a meng kar a, a mittui a hru fap fap. Putea te kan ko mai dawn em ni tia ka zawh khan, "Eng tin mah an ti thei chuang lo ang, pate Duhsanga fapa niawm zawk tak a ni, an rilru chhia a kâi tel ve a nih hi," a ti hlak hlak a. 

"Rilru ti hrehawm lutuk suh, khua a vâr anga a zia mai ang," ka ti ta ringawt a. Anni pahnih pawh an reh zui hmak, Kimkima room-ah an inkhung fel ta a nih ka ring.

Muhil thei lova ka leh kual sek hnuah ka lo chhing ve hlek a ni ang, ka harh leh chuan khua a vâr tawh a, zing lam luak chhuak ka la nei ta fo. Vawi thum vel ka uak pap pap a, Mimtei a rawn harh ta bawk a, biscuit leh thingpui min siamsak a, a mit a bûi lâk; nizan khan ani aiin ka muhil hmasa ni ngei tur a ni.

"Mama i be thei tawh em?" Tiin min zawt a, ka biak loh thu leh zing lama kan boruak azira ka biak tur thu ka sawi a, "Eng ti zawng pawhin an ineih ka rem ti rih lo, hei leh chen hi harsa takin auMama'n min enkawl tawh a, thawh chhuah nei lova nupui neih a tum hi ka ngaihdan a ni lo," tiin a âng zui leh ta. Khap pawh ka tum buai lo.

"An pahnihin kan sawipui ve phawt dawn nia, a hrim hrimin kâr tâwp pawh a la ni si lo a, eng tia rawn haw ringawt nge maw a nih le, chawlh an nei nge, eng nge thil awmzia ni ang?" Ka ti a.

"Ka hre tawh bîk lo. Â, Chhuankima hi a â a nih hi.." a'n ti teh tawp a, chhân ngaihna tak pawh ka hre bik lo.

Khumah rei fê kan titi a, room lehlam a mite pawhin thâwm an la nei lo. Tlêma ka zia awm tâk deuh avangin ka tho chhuak ta a, kan rizai bale hawn kha nizanah sawmpathum lai kan hralh a, kan lawm ve teh reng nen, boruak dangin min nangching leh ta si a, ka eng tih thâ mah a tho tawh lo.

Ngawi rengin eirawng kan bâwl a, Mimtei hi a hmingpumin tumahin an ko ngai lo a, nizan khan Kimkima'n vin zetin a ko a, kha ringawt pawh kha ani hian a haw lutuk tlat. Vawi hnih lai a sawi tawh.

Tûkṭhuan ei hunah pawh an rawn tho chhuak lo a, ngawi rengin kan eisan hmak. An duh hun hunah tho teh se. Pâwna ka va chhuahin Bike ka hmu miah lo a, i20 dum kan in kawta lo ding chu Masiami te ta niin ka hria, anni hi chu an khawsak a harsa lo tih ka hresa a, amah Masiamin cosmetic dawr lian a nei a, ama pual niin ka hria.

Sangzuala'n min la call-back lo a, ka message pawh a la seen lo. An duty hun hrechiang bal lo mah ila, a hman hun a pianga min lo call ṭhin avangin a la hman lo a nih ka ring.

Dâr sawm bâwr velah Kimkima te an rawn tho chhuak a, an tûm bûr. Mimtei nen min en hrek hrek ringawt a, anmahniin chaw ei an insiam a; ngawi rengin an ei mial mial.

"Kimkim, eng tia awm nge in tum?" Mimtein a ti ta tawp a. Thinrima bia pawh ni chuang lovin zâwt satliah a ang zâwk mah.

"Eng tin vak nge awm se min tih, nupui ka ru a ni mai, hetah kan awm ang chu, kan in alawm," tia a nau a chhân chuan ka la ngawi reng a.

"Exam hmabâk nei i ni a, i zir zawh hun in nghâk thei lo em ni? Mama a awm bawk si lo va," a ti leh a. "Zothanzual, i û ka ni a, i thu thua awm tur ka ni lo, he in hi Mama ta bîk ni lovin kan in a ni, a naupang ber hian rorêl tum phêt suh," Tia Kimkima a ṭawng leh chuan ka sa ve zak.

"Ni e, kan in a ni, tuma ta bîk ni lovin, nupui neih i duh pawhin dál che kan tum lo, mahse, kan dinhmun i hria a, i û hlawh ringa khawsa kan ni rih a, i zirna i zawh hunah mawihnai zawka tih dan te kan ngaihtuah ang a, i û pawhin a hnial miah lo ang che, tunah rih chuan rilru puitling tak puin inhruai thla rih u la, i û kan hrilh rih lo ang," dam thliama ka tih chuan rum zet hian Masiamin min rawn melh a.

"In duh leh Mama chu hrilh rawh u, ka hlau hleinem, a hlawh tel lo pawhin kan awm thei lutuk ang, ka nu leh pa pawisa min dahsak te kha ka hre lo emaw inti ang e, a ta vek tur a ni lo ania, a nihna dik tak sawi duh phei chuan he in pawh hi fapa naupang zâwk ka nih angin ka chan tur a ni," zuk ti a.

Mimtei chu thinrim lutuka ding chhuakin, "Chhuankim, zak ve la, zahna châng hre rawh, i duh tâwkin nupui chu nei la, Mama pawh i sawi zawng zawng hi ka lo hrilh dawn nia, ramhuai i nih hi.." a ti ta piap piap a, a sawi zo hman ṭâwk tihah a biang a ri thlawrh a, Mimtei a hawi sawk. A û in a bêng chu awih thei lo niawm takin Kimkima a en vang vang a, chutah, "Engtikah mah ka ngaidam lo ang che tih hre rawh," tiin a room-ah ṭap chungin a lût ta a, kut ka lo hûm ruh ngat ngat.

"Kimkim, khatiangin kut thawh zawnga awm loh tur, zah tlâk chu ka ni lo;mahse, buaina siam lo zawnga thil sawi a ṭha ngai, hmeichhia kutthlâk hi thil mâwi a ni lo a, insum hram hram tur," thinrim insûm taka ka tih chuan, "Eng mah lo sawi ve suh, ka nupui neihna tur dâl ngam chuan min han dál chhin ula, eng nge ka tih theih inhre mai ang," tia nui luiin Masiami a lamah a pawt hnai a, "Hrehawm ti suh aw, anni pahnih hi chu ka thunun vat ang," a ti zui leh a. Vawm chawrh lo turin ka insûm hram a ni.

"Khawiah nge i û bike, chahbi min rawn pe rawh," ka ti ve hmak.

"Ka hralh tawh, aman hmuh inbeisei lo la, mithar inrawlh hi ka ngaihthei vak lo," ngeiawm zeta a tih chuan, "A ṭha e, in duh dan danin awm rawh u," tiin Mimtei room-ah ka lut a. 

Tukverh bulah lo dingin a ṭap fap fap a, "Insiam rawh le, putea te inah kal ang," ka ti a, lungchhe taka inhnît chungin min rawn kuah a, ka âwm nghengin a ṭap khur ngat ngat. A tâna a nat dan tur ka hria, a samah chûlin, "Ṭap duh mah ta che, i û kan hrilh ang a, engkim a fel duak mai ang," tiin ka thlamuan a, mahse, beiseina ka nei tlëm lutuk tlat. Râlkhat aṭanga rorêl har zia ka hre ve tho si.

Rei fê min kuah chunga a ṭah hnuah, "U Naom, in inah kal daih ang, kan chêngho thei chuang lo vang," a ti ta a.

"I û kan hrilh phawt loh chuan chêt rum rum a ṭha lo, putea te inah phei phawt ila, thil awmzia kan hrilh hriat a ngai alawm," ka tih chuan bu nghat nghat chungin bathroom-ah inphih fai turin a lût ta a.

In kan chhuahsan hmain kan room inchung ami ka kalh thlap a, Mimtei pawh a room kalh turin ka hrilh bawk a, kan misual pahnih erawh an tawm bo leh daih tawh. Rûl zia hi chu thlâk a harsa a ni ang e.

Putea te in kan pan a, Sangzuala em em pawh hi tun thlengin min la rawn be lo a, a phone a switch off tlat bawk si. Mimtei kawng tluanin a âng phei a. "Masiami fin zia kha, a ṭawng ve duh miah lo a, min hmusitna mitmeng kha ka hmuh hmaih bîk si lo, a fel viau ka lo ring ṭhin kha â ka inti," a ti a.

"Nula senior lung fing chin a ni tawh a, lo inrawlh a tan a mawi lo tih a chhût thiam pha vek ang chu," ka ti ve a.

"AuMama ka khawngaih êm mai, ka zirna âi pawhin Kimkima zirnaah hian a insêng nasa zâwk a, eng tin nge bike te kha a hralh ngam le, râpthlâk lutuk," tiin a kal tau sawk sawk a, ka ûm hlawk hlawk. 

Ka chhân leh hmain putea te in kan thleng ta a, hmanhmawh zetin Mimtei a lût a, a ṭap titih ringawt.

Putean min lo hmuh veleh, "Teh tlat che u chuan, Mimte, i lung ava awi loh hmel ve," a lo ti a, chu tia putea'n a tih veleh chuan ṭap chungin thil awmzia a sawi ta a, ṭawng pawh a ṭawng ṭha thei lo.

Keimah min rawn melhin, "Naom, eng nge thil awmzia chiang zâwkin han sawi teh," tiin min zâwt ta a.

Nizan chungchâng leh Kimkima ṭawng dan ka sawi ta vek a, bike a hralh thu pawh ka sawi tel law law.

Thinrim inseh ruh ṭeuh chung hian, "Lalchhuankima mai mai chu, Sangzuala inbe tawh em?" Tiin min zâwt leh a, kan biak tlang theih loh thuin ka lo chhâng a, pitei a awm lo a, chuktuah huanah a lokal hman tawh tih a sawi a, "Ti khan awm hahdam rih ula nakinah kan phei dawn nia," tiin Mimtei a kuah a.

"Hrehawm ti mah ta che, i u Mama te nupa an awm a, i û in a hriat hunah a ngawi miah lo ang, saw in leh lo saw Sangzuala hminga awm a ni a, chuti ngawtin chuh buai theihna a nei lo, i pain rokhâwm tura a dahna lehkha pawh a copy ka kawl vek alawm," tiin Mimtei a thlamuan a, ka hahdam sawng sawng.

Kimkima chungchang lo sawi ve vak ka tân a rem rih lo a, Sangzuala kutah ka innghat tawp. A lo haw thei dawn rih lo lâi tak hi a buaithlâkna chu a ni. 

Buaina pakhat a fel chauha a dangin min tlâkbuak leh a, ka hah hluah hluah. 

Putea'n ka chhungte pawh eng mah hrilh rih lo turin min ti a, ka nu te takngial pawh ka hrilh ta lo. 

Dâr khat velah ka phone a rawn ri a, Sangzuala a ni ta. 

Rang zetin ka chhâng a.

"Nám, ka hman ve chiah.." a rawn ti a. Ṭawng nachang ka hre lawk lo, sawi hmasak ber tur pawh ka hre hek lo.

"Nám, ka ṭawng i hre thei lo em ni?" A tih leh chuan, "Hre thei e, eng lo, putea te inah Mimtei nen kan kal a, thil pawimawh sawi tur a awm, putea nen inbe lawk rawh u," tiin min chhân hman hmain putea phone ka pe a.

Keimah ngeiin sawi ka duh rualin putea a awm tho si a, inbe zâwk se ṭhain ka hre leh zâwk.

Dam thlapin putea'n thil awm dan a hrilh ta a, loudspeaker-ah a dah a, Mimtei nen kan lo ngaithla ve kar. 

"Pute, ka chhuk chauh si a, ka tân lo haw ngaihna a awm lo a, ṭha i tih angin ro i rêl dawn nia, Matea chu biak ka lo tum ve tho ang a; min chhân dan azirin tih dan a awm mai ang, nupui neih a duh chuan kan dang tur a ni hleinem, kan dam anga tih dan a awm mai ang," a rawn ti nghet charh.

Thinrimin a âng ve deuh turah ka ngai a; a teuh lo. Dam thlapin a sawi mar pât, Sangzuala nge nge. 

Mimtein, a û a be ve leh a, bike chungchang leh Kimkima'n a ben thu te ṭap aw ṭiauin a sawi a, "Mimte, i u Kimkima hi zawng thu ṭha hrilhin awmzia a nei lo a, lo tuar hrâm hrâm rawh u, ngawi zâwka in ṭan chuan a zia mai ang, i û hian engkimah ka tuamhlawm zêl dawn che alawm, Námi nen inngeih ula, inhmangaih ula, Kimkima inhua a nih pawhin insum rih rawh u," a rawn tih chuan ka khawngaih ang reng.

Min biak leh a duh vangin phone min rawn pe a, loudspeaker-ah ka dah tawh lo thung.

"Nám, chhel takin aw, a hrehawm ang tih ka ring, Kimkima ka lo be phawt ang a, kan inbiak dan azirin in awm zel dan tur ka lo sawi dawn nia, min ring la, boruak ṭha lo leh midang hmuhsit turin awm loh hram in lo tum dawn nia, Bike kha a hralh tak tak a nih chuan ka lawm lo viau ang, mahse, a sawi lang a nih loh chuan sawi ri lem suh aw. Upa zawk i nih angin Mimtei kha control i tum dawn nia, rîk phut phut loh tur," a ti dam thlup a.

"Ina haw pawh ka peih lo," ka ti sap a.

"Khatiang kha sawi loh tur, eng tin pawh awm se, in awm dan pangngai rengin awm ula, a bia che u a nih loh chuan biak kher tum duh suh u, an awm awm khan awm tir ula, eng emaw harsatna a awm chuan putea hrilh zel ang che u," tiin a thaw hawk a, dam thlapin ṭawng mah se a rilru a hah tih ka hria. Chuvangin a rilru hahna ti belhchhah tura ka lungawi lohna sawi tel ve kher ka tum lem lo.

'Rei lo tê mut ve lawk ka duh' a tih vangin kan inbiakna a ti tawp a, Mimtei leh putea an ṭawng bawrh bawrh a, eng vak ka sawi ve lo.

Chhungkuaa pakhat lekin ṭhat a chhuah pawhin kan hlim ṭhin a, pakhat vêkin sual a chhuah chuan chhungkua a keh darh ṭhin.

Râlkhat aṭang hian a chhungkua a venghim zo dawn em ni ka pasal hian...

B®®

B+>[BeckirafARenthleI]<+®®