18.NAOM [Mizo Love Story]-B®®

18.NAOM [Mizo Love Story]

Ziaktu: Becky Rafa Renthlei
B®®
Shadow of the life

'Rei lo tê mut ve lawk ka duh' a tih vangin kan inbiakna a ti tawp a, Mimtei leh putea an ṭawng bawrh bawrh a, eng vak ka sawi ve lo.

Chhungkuaa pakhat lekin ṭhat a chhuah pawh kan hlim ṭhin a, pakhat vêkin sual a chhuah chuan chhungkua a keh darh ṭhin.

Râlkhat aṭang hian a chhungkua a venghim zo dawn em ni ka pasal hian...

B®® 160721

Chawhnu lamah putea hovin kan in lam kan pan ta a, pitei pawh a lo haw tawh a, thil awmzia a hriat chuan a thin a ur hle, "Kimkima fuihpawrhtu hi an awm em mawni ka ti hial," a ti nghe nghe. Mahse, kei chuan ka ring lo. A û îtsikna thinlung a pu ni berin ka hria. Hmangaihtu âw hre duh lo tu chuan eng tikniah emaw inchhir hun a la nei ngei ang.

Dingngheta nen kan inzui lai khan ka nu leh pain min zilhin min hau a, MA tal zir chhuak tura min tih khan an thu awih duh lovin ka duh danin ka tâl a, kan inru ta a nih kha; a hunlaiin hlim angin lang mah ila, an thu ka zawm loh man ka têl ṭawk ṭawk mai a nih hi. Chuti ni lo se, mawi hnai leh zahawm takin pasal a chhia a ṭha ka nei ve ang a, hna chhete tal pawh ka vawn ve ka ring. Tunah chuan mahni thawh chhuah hman tur nei lovin mi thlazar hnuaiah ka nung a, Sangzuala felin min hmangaih mah se a naute zilha fuih turin engmah ka ni bîk si lo. Hei tak hi Kimkima pawhin min hmuh hniam phah nan a hmang ka ti lo thei lo.

In kan thleng a, Kimkima leh Masiami hmuh tur an awm lo. Putea'n Kimkima a ko a, a rawn chhuak ve mai, a lo inbual fai vek tawh a, a hmêl pawh a hmuh tlâk ta deuh.

Engtia awm zel nge an tum tih putea'n a zawh chuan, "Ti hian kan inkawl ve rih ang chu, a rang lama inneih kan duh bawk," a ti hmuk a.

"I û nen sawi dun ve phawt ula, nupui neih kan khap vang che ni lovin i zirna a laklawh si a, a thlâwn vek tur hi chuan kan ngai ngam lo a ni, i hma khua kan ngaih vang a ni a, exam te hi han zo fel la, palâi te pawh kan la tîr ve ang chu," dam thlapa putea'n a tih chuan, "Nupui nei chung pawhin ka exam thei reng alawm, ka nu leh pa pawisa min dahsak kha ka chan tur min pe ula, zir zawm nan ka lo hmang ang e," tia a chhân chuan ka lo ner sawk.

"Kan thu i zawm loh chuan engmah i chang lovang, engkim hi i û hming veka awm a ni a, aniin inhrehawm hlau reng rengin tun hi a thlenpui che u a, i duh duh danin i awm dawn lo, Masiam, lokal teh," tiin Kimkima room lam a pan nghal a, keini teh ngawt ái chuan putea chu a hlau deuh zawkin ka hria.

Kimkima room aṭangin Masiami a rawn chhuak a, "In pahnih khan ṭhu teh u," nelawm teh chiam lo hian a ti ta a.

Mimtei nen kan ṭhu duna Kimkima leh Masiami an ṭhu dun bawk a, putea amahin a ṭhu thung. Mimtei nen kan ngawi rán a.

"Masiam, upa zawk leh rilru puitling pu zawk tur i ni a, in inneih hi kan remti lo a ni lo. Mahse, Kimkima zirna a laklawh rih êm a, a hminga hna chhete nei îk lova nupui neih ngawt hi thil âtthlâk a ni, Bar Exam te han zo fel se, chumi hnuah chuan innei ta ula a ṭha zawk lo maw?" Putea'n a tih chuan, "Kimkima thu thu a ni mai, mualpho huamin ka rawn zui ve tawh a, nghah kâwi leh chu a harsat ka ring," a ti ve tlat.

"In dinhmun ka hrethiam alawm, mahse, Sangzuala tel lo chuan thil tih a harsa a, hriatthiam hrâm hrâm tum rawh u," zai dawh takin a ti leh a.

Kimkima a ding hluai a, "Sangzuala Sangzuala, tih reng mai, ani tel lo pawhin kan awm thei, pawisa kha min rawn thawn se, a ta vek tur a ni bîk lo, he in leh lo saknaah hian sum chu a thawh pawh a ni mahna; mahse, ka thâ ka seng hnem lutuk," a ti ta piap piap a, a râwl a ring bawk si, hrehawm ka lo ti lutuk a, Mimtei ṭawng tuma âng zuau chu putea'n mitmeiin a khap vat.

"A ṭha e, i duh dan chuan awm la, i û ka bia ang a, ruahmanna siam turin ka lo hrilh ang e, ṭha taka thil sawi dawng sawng duh lo chu i duh angin han tâl chhin teh le, keini aia hmangaihtu che i hmuh chuan pan rawh, kal ang che," putea'n a ti hmiah.

"Ka kal lovang, he in hi ka ta tur a ni a, ka chhuah atâkah," a la ti ngam nia.

Kimkima pawh chhâng tawh lo hian putea chuan, "Naom, inpa biak lo tum la, thil awm dan i hrilh dawn nia, Chhuankima vanga buai buai hi ka tum tawh lo, zêp awm miah lovin hrilh tlang vek ang che," thinrim taka a tih leh chuan ka lo bu nghat nghat a.

"Pute, in hrang aṭanga ro rawn rel tum tawh lo la, kan puitling ve tawh, kan inngaihtuah thei bawk, Zothanzual, eng ang chiahin nge in va zualko a," a ti leh tún tún a. Ka inrawlh a hun chiah.

"Kan zualko ni lovin helaia chhungte kan neih chhun an ni a, hrilh hriat hi kan tih tur a ni, ka pasalin min kalsan hma khan nangni unau hi ka kutah a dah che u a, ka thu sawi hi i û sawi a ni tih pawm laa zawm tum rawh, Naomi ka ni satliah lo , i û Liansangzuala nupui ka ni, chu chu theihnghilh tawh ngai suh," ka ti ve hmiah.

"Zâwngi leh..." ti nghutin min ben tum niawm tak hian kut a lek uaih a, ka hlau lo nasâ.

"I ngam phawt chuan kut min thlâk dawn nia, ka ngawi mai mai lo ang, hmeichhe chanvo humhalh chungchâng chu i zirlaiah a awm kha," ka ti leh sak sak a.

Engtik lai aṭangin nge hetianga huaisenna rilru leh mahni inrintawkna ka lo neih tâk! A chhan chu ho tê maw le, ka pasal Liansangzuala mize dik tak, huaisenna, tumruhna leh mahni inrintâwkna kha ka entawn mai a ni. Kan diknaah chuan huaisen takin kan ṭang ngam tur a ni.

Putea'n, "Chhuankim, i thil tihah hian inchhir ngai suh ang che," tia a sawi zawh veleh, "Mimte, ka pheisan ang che u aw, anni pahnih kha vengthâwng duh lem suh u, an awm awmin awm tîr rawh u," tiin min chhuahsan ta a. Veranda thleng ka va thlah a, ina kan luh hnu hian Mimtei a la ṭawng lo hrim hrim, Masiami pawh a ngawi leh tlat tawh.

"Naom, he inchhungah hian i thu ber lo tih inhria ang che, hmanni lawka lo awm i ni a, in duh chuan bungraw ṭhenkhat nen in chungah in insawn thei ang, ka bula awm in châk awm si lo a, keiin chhuah ka tum bawk si lo," tia nui luiin min melh rún a, ka chhâng lo.

Mimtei'n min rawn en a, chutah a û en lehin, "Ti hian kan awm ho dial dial ang chu, i in a ni bîk lo a, ka in a ni ve tho, sum thawh ve lo mahila kan sak lai khan thâ ka thawh hnem ve êm mai, ka insawn dawn miah lo a nia," tiin nichina Kimkima ṭawng ang khan a ti ve sak a, a rûkin ka nuih a za deuh.

Kimkima a ṭawng tawh miah lo teh tlat! Masiami nen a room-ah an inzui lût a, keini pawhin peih lo leh phurna tel miah lovin eirawng kan bawl ve ta a, Mimtei a túm bûr. 

Zanriah ei dawnah kan ko lo a,  Mimtei nen kan ei mawlh mawlh laiin Masiami a lo chhuak a, a rûi tih ka hre mai.

"Dinga khan engtin nge a neih peih che le?" Min la rawn ti ngam maw le. Ka chaw thleng nawr sawnin ka ding hliai a, Mimtei'n, "U Naom, ngawihsan mai mai rawh," a lo tih sap avangin chhâng lovin ka ṭhu leh a, chaw ka bâr zawm leh ta zawk a, ka thin a sa phat. Mi zaidam tia sawi tur ka ni ngai lo bawk a, ṭawng tam hluah lo mahila ka duh lohnaah chuan ka kawlh hrâ.

Ka chhân tâk si loh avangin Masiami pawh room-ah a lut ve leh mai bawk.

Woofer-ah ring zetin zâi an play a, min runluih tih a hriat reng mai; thleng vel kan seng lai pawhin an lo la chhuak lo a, chaw chhum kêp loh ngawt thu awm suh, kan siam kêp ve vek tho. Kimkima hian zû a in ngai ka hre lo a, Masiami erawh hi chuan a lem ve zauh zauh ṭhin tih ka hre thung, an neihin a tlin bawka a duh duhin a tâl a ni ber mai.

An bengchheng dun nasa mai si a, inhnuaia awm reng pawh a hrehawm, Mimtei'n, "Ka va khak dawn em ni?" A tih pawhin ngaihsak miah lo turin ka hrilh a, dâr sarih velah rizai en tur nu pathum an lokal lai chuan inthlahrun a na ang reng. Mahse, an fel hlauh a, engmah min zâwt lo.

Kan vannei a, kan rizai bale hawn pawh kan hralh ve nial, Rinpuiin an in lamah a la phei bawk a, tun bâk hi tih tawh loh mai kan tum. Sangzuala'n a phal loh bâkah kan boruakin a zir lo a, ṭhenawm khaw vengte lo lâwi luhna tlâk pawh kan ni rih lo.

Zan dar kua a ri a, putea'n chanchin min rawn zâwt zuai a, "An awm awm khan awm tîr ula, a tâwk chiah," a la ti hrâm. A thin a rim ve ngang a nih ka ring, lungawi lo pawh nise a demawm loh, an naupan lai zawng zawngin an inah an awm a, keh thei dawmin a lo dawm ve bawk a, huat awm deuh tur a ni, zah lo lutuka ṭawng khum ngam tur a ni lo hrim hrim.

Inhnuaiah pawh riah kan tum ta lo law law a, Sangzuala'n min rawn call-in dâr 10 a ri tawh a, "Kimkima'n ka phone a pick duh tlat lo, i phone kha pe la, ka biak duh thu hrilh rawh," a ti a, tlailama a ṭawng dan leh min tih dan vel te, putea a chhan dan vel ka hrilh chuan, "A nih chuan biak a ngai lo a nih chu, engtia awm nge in duh? Loudspeaker-ah dah la, Mimtei khan ka ṭawng lo ngaithla ve rawh se," a tih vangin Mimtei ka ko nghal a.

"Mimte, eng tia awm nge in duh, a hrehawm viau em?" Tiin a nau a zawt a.

"AuMam, awm dan tur pawh ka hre lo, pawisa kha pe la in hi chhuahsan tîr rawh," a ti ta a.

"Chutiang a ni ngai lo, khatia chen tlan reng kha in tân pawh a hrehawmin ka ring a, in thil pawimawh leh in mamawh tur bungrua kha inchungah la chho ula, in bâwl hrang rawh u, gas thuk erawh chu a thar lei ta mai ula, in mamawh chauh tak tak kha in la dawn nia, anmahniin an rawn tih buai loh che u chuan engtin mah tih lêt pawh a ṭûl lo. Nám, ka sawi i hria em?" A rawn ti a.

Ka hriat thuin ka chhâng a.

"In chung leh hnuai in kal pawhna kha hmang tawh lo bawk ula, pawn lam step aṭang khan in lût chhuak zel dawn nia," a tih leh chuan mak ka ti viau. Awm hran a phal loh ka ring deuh kha a ni a, "Pawisa vel eng tin nge ni ang?" Tia ka zawh chuan, "Eng mah pêk a ngai lo, ka tel lova an khawsa thei a nih chuan awm chhin rawh se, bike man pawh a la kawl ang chu," a ti leh sup a. A lung a âwi lo hle tih a hriat.

"AuMam, a chan âi tur chu pe mai la, a sawi peih si.." Mimtei'n a lo ti a, "Ni lo ve, ka lo haw hma loh chuan chêng khat mah ka hnen aṭanga dawn inbeisei suh se," a ti hmiah.

Chumi hnu chuan keimah min be leh zuai a, "I lo awm ve chauh a, hetiang boruak kan nei ta hi a hrehawm khawp mai, mahse, chhel takin min lo nghâk rawh aw," a ti dam thlup.

"Hrehawm ti mah ta che, Mimtei a awm a, ngaihtuahawm kan ni lo a nia,"  ka ti ve a, han sawi vak tur ka hre ngang lo a ni.

Kan inbiak zawh hnuah Mimtei pawh mu turin a kal ta a.

A tûk khua a var a, Kimkima te thawh hmain kan mamawh tur bungrua inchungah kan thiar chho ta nghauh nghauh a, Sangzuala sawi ang khan kan mamawh chin bâk eng mah kan la lo.

Mimtei nen bazarah kalin gas thuk leh ṭul dang kan lei belh a, in chungah hian choka bungrua hrim hrim eng mah a awm lo a, filter leh Fridge erawh chu ka pawisain ka lei hmiah; in hnuaia mi chuhpui dawnin kan intihbuai ka hlau si a, tui vawt in tih vel leh chaw hmeh dah ṭhatna tur fahran pawh neih loh kha ka ngaingam lo a ni ber. Tv tih vel phei chu chuh chi ninghal lo chuan.

Mimtei'n a room ti ruakin inchung room ruakah a indah vek bawk a, Kimkima lo tho chhuakin kan che vel a hmuh chuan mak a ti tih a lang reng.

"Insawn chu intum ta a..." a ti sup a, kan tih tak tak a ring lo te pawh a ni mahna; kan ngawi reng a, kan thil tih kan ṭhulh phah chuang lo.

"Mimte," tiin a nau a ko a, a eih duh ṭhak náng. En pawh a en lo hrim hrim.

Putea kan biaa a fate pahnih nen lo pheiin inhnuai leh in chung kal pawhna a ping hmiah. Sangzuala nen zing lamah an lo inbia a ni awm e. Kan mamawh tur eng kim kan la kim thawkhat chuan ka hria, a ṭûl a nih leh inkalpawhna Tala hi kan hawng anga kan lût ru ve tawh mai ang chu.

Buhfai leh chawhmeh tih vel eng mah kan la lova keimahniin kan lei chawp vek. Gas cylinder erawh chu hmanlai tiam lovin pali an nei a, pahnih kan la chho thung.

Mimtein, "U Naom, i van hausa," nui kar kar chunga a tih chuan, "Lalthanhawla monu hlui ka nia lawm," fiamthua tiin ka nui a, kan thil lei vel Sangzuala kan hrilh hre hran lo.

Engmah zêp chi ni tawh hek lo, ka nu leh pa, u Chhandama te ka hrilh ve a, min khawngaih hle, Sangzuala an lainat thu an sawi bawk. Ka scooty kha kawl ka dîl a, an lo phal nasa mai, Lawngtlai sumo ah an lo thawn dawn tih an sawi a, a phurh man an pêk nghal tur thu min hrilh bawk.

Keiman khalh thei rih lo mahila Mimtei talin zir ve se, 'Auto' châng chawpa chhuah fo kha a buaithlâk ka tih zawng tak a ni.

Kan inlâk chhuah fel aṭangin kâr khat a ral tawh a, in hnuai te nen kan inhmu khât ta pharh mai. Masiami hi a chhungte'n an rawn ngaihsak miah lo hi mak ka lo ti ve deuh a, tlai tin car-in an chhuak deuh ziah a, an la rûi tluang zel.

Ka chhungte'n scooty an rawn thawn thlen ni-ah erawh chuan Kimkima a rawn âng hrep a, "Ka nu leh pa pawisa kha in hmang hêu a nih vaih chuan in châk lo ang," tih vel te, a rui bawk nen a ṭawng nasa lutuka sawi chhâwn dan ber pawh ka thiam tawh lo.

"Kha thil kha sawi ve ziah suh, auMama bike manah khan kan cut ṭhen anga a lo haw hunah a bâk chu a pe dawn che nia," Mimtein a ti ve sak sak.

"Naom, ka û kha lo hrilh ang che, ka chan ai tur min pêk loh chuan ka khing dawn tih hrilh rawh," a ti púng púng a, a ṭawng ka record tih hria se a lawm lo teh ang chu.

"Ê, lungngai suh ka lo hrilh lutuk ang, pawisa kawltu kan ni ve si lo a, pêk nghal tur che kan nei lo alawm le..." dam thlapin ka ti a, min melh rum úl.

Ni e, a sual dan hi a buru êm a, thinrima táwng chi pawh a ni lo. Dam thlapa lo hmachhawn theih hi kan himna a ni mai, ka naupai hian a patea hi chhûn lo hrâm se kan va ti si êm...

Mimtei pawhin ṭhenawm tlangval Duata nen Scooty khalh an zir ṭhin a, rinaiin a ti mi zêk a, a thiam vat ka beisei. Vawikhat chu Masiami a lo lût ve hlawl a, "Naom, i phone ka lo hawh lawk," a rawn ti a, phone a nei ve reng ṭhin sia eng atan nge maw a tih ni.

"Eng atan?" Ka lo ti a.

"Ka phone dahna ka hre lo a, Kimkima awm loh laiin ka lo chho lawk," a ti ṭha ve mai.

Phal loh ngawt chi ni bik hek suh, ka phone chu ka pe ta a, a number dial-in a ngaithla deuh vang vang a, 'switch off a in ti zel' tiin phone min pe lêt a, zu ṭhing rim a nam rum rum. In chhung a melh kual a, "A nawm reuh hi, in lo hausa hle mai," ti nghatin ka chhânna pawh nghâk lovin a chhuak zui hmak.

Mimtei a awm lo hlauh a, awm se chuan an in chhâng lawk leh ngei ang.

Zantin Sangzuala nen kan inbia a, ramri lamah an duty dawn tawh a, inbiak a harsat tur thu a rawn sawi chuan ka hnual deuh rawih. Mahse, ka ti lang lem lo, fimkhur tura hrilh bâk tih theih ka nei lo.

Ka nu leh pain min ngaihtuah em em a, zankhat riaka lo kal an tum a; mahse, ka rem ti ta lo. Boruak ṭha lo hnuaia lo zin kha thil tih chi niin ka hre lo a, an ṭhulh ta rih. Chhel tak leh rilru puitling taka awm turin min fuih sauh sauh a, u Chhandama'n mamawh i neih chuan sawi hreh suh ang che tiin min hrilh bawk.

U Chhanhima te nupa pawh Lungleiah an chhuk tawh a, kan inneih hnu hian vawikhat chiah min la rawn bia, chu pawh ka naupai an hriat tirh khan indim turin min lo hrilh ve a, an reh zui vang vang. Mahse, inhauna leh boruak ṭha lo kan nei hran lo.

Thla thum hnuah.

Nun phung pangngai kan zawh chho tawh a, buainain min kiansan ve mêk, in hnuai te nupa pawhin min tibuai hran lo a, kan inhmu khât khawp mai. Kimkima'n zu a in nasa em em a, Mimtei hi biak ve zauh a ching, kei erawh chu min hmuh pawhin min be ngai lo, a huat em em a û nupui ka ni miau a; min haw ve te pawh a ni mahna.

Ka naupaiin thla li hmel a hmu ve ta a, insawiselna ka nei hran tawh lo. Pathian zara kan dama ka pâi tluang thei a nih chuan thla nga hnuah ka nei ve dawn tihna a nih chu. Vanneihthlâk deuhin Christian hospital-ah Mimtein mi âi kalna tur a hmu ve hlauh mai a, hlawh a tam hran lo naa rilru hrehawm rêng rênga awm ai chuan tiin a kal ve ta a, Sangzuala pawhin a sawisel lo teh tlat.

A hmaa min hrilh tawh ang khan discharge chu a dîl ta ngei a, engtik hunah nge a chhuah dawn sawi chiah lo mah se, beiseina sâng tak ka nei a. Ka nau neih hmaa a lo chhuah theih chuan ka lawm viau ang, Pathian thu thu ni teh se.

In lam a rawn ngaihtuah em em a, tih theih a nei tlêm bawk si, ka account-ah thla tin pawisa a rawn thun a, "A tui ṭha ṭha eiin lo induat ang che u, in check up-a i chhuak a nih loh chuan tei vah tam loh tur," tiin min chah ziah.

"Nám, ka ngai lutuk che hi e, ngaih dan tur ber che pawh ka hre tawh lo, zantin hian style hrang hrang nen ka rawn mitthla ṭhin che," nui hawk hawk chungin a ti a.

"I lo haw meuh chuan ka infit tawh dawn si lo a, engtin nge ni ang," tiin ka lo fiam a.

"Kei ka fit chuan a tâwk, exer la deuh tlauh tlauh ang che," tia nui kur kurin, "Tlanhlua leh Mimtei an inbe ṭhin," a ti teh daih a.

"An inngaizawng tihna mi, Mim-in eng mah min hrilh miah lo," tia ka lo chhân chuan, "A hrilh ngam rih lo ang che, a hma khan Tlana a haw thei si a, a sawi hreh a ni ang, ti hian han inbe ve phawt teh se," a ti ve mial.

Sangzuala nen kan inbiak zawh hnuah Mimtei ka ko a, phone a lo hmang ve mêk. Ti buai duh lovin kan room-ah ka luh san ta rih a, hmeichhia hi chu kan mak khawp a, kan huat deuh leh kan ten viau te pawh hian tihtak zeta min biaka min ngaihsak hliau hliau hi chuan kan ngaina chawp ve mai zel. Hmeichhia zawng zawng kan inang vek lo nain a tlângpui thuin kan ni ve deuh.

'Mimtei leh Tlanhlua' ka ngaihtuah zawng ringawt pawhin ka nuih a za deuh, an kum a inthlau angreng si a, Sangzuala leh Tlana an inrual a nia. Mahse, mipa a upa zâwk an nih hi chuan a zia ka ti tho.

Vawikhat mah Sangzuala'n Kimkima chungchâng min zâwt tawh lo a, Mimtei pawh a zâwt chuang lo. Kan hriat lohva an inbia te a nih ngawt loh chuan. Putea te an lokal châng pawhin an tlawh ngai lo a, in chungah an rawn tlang nghal daih zel.

An inah chaw eiin kan kal ve fo a, an theih tâwkah min ngaihsak viau. Mimtei zana a duty pawhin Bawihpuia'n min riahpui mai zel a, a fel roh khawp mai.

Ni e, ni a ral a, rei lo tê emaw kan tih chhungin kan inneih aṭanga thla ngana kan hmang ve der tawh. Kimkima pawhin ama hmelhriat Lunglei lama mite tîrin Masiami nu leh pa hnenah palâi a tîr a, kan chhungkaw boruak veng chhungin an hre vek tawh bawk. Insuih ṭhat awm lovin man an inhlan tawp a, Masiami dawr Lunglei ami kha ti ralin Lawngtlaiah dawr an khâr chhâwnga an che thei khawp mai. An i20 hlui kha an hralh a, a dang a thar hlak an la tawh bawk.

Mi hrang enin min en ti ila ka sawi sual lovang.

Ka pum a puar ve âk tawh a, ka phâk tawkin exer ka la ve zel bawk a, ka thau vei phian. Sangzuala nen kan in vid call ṭumin, "Naom leh.. I chhe kerh kurh.." a rawn ti a.

"I chhe fê..." ka'n ti ve zat a.

"Khatiang hmel kha ka ngaina lo, ka lo haw hmain i hmêl ngai put tum rawh," zuk ti a. Â thei siah...

"I lu meh dan a ṭhing a nih chu a..." ka tih chuan, "Sipai bâng ka nih hunah i duh danin kan mêt ang," a ti ve ngei. Kan in vid call apiangin ka kawr hâk hlim a ngai ziah a, ka pum uluk fêin a thlêk ṭhin.

"A chi ṭha hlir dawng i ni bawk a, a puar dan pawh a ṭha thawkhat e, next-ah chuan kha aia cial a ni tawh ang," tiin a nui ruh ruh a, ka va ngei thei tak.

"I hur siah..." ka lo ti a.

"Mipa dik tak ka ni a, hur ve hlek.." tiin min chhâng.

Discharge dîlna kan beisei aia a chhuah har avangin zan khat kan inhnial ve deuh a, chuti tih lohah chuan kan inhau khât khawp mai.

Mimtei leh Tlana an la inbe tluang zel a, Sangzuala nen kan inbiak apiangin Mim-i phone a ri zui ve ziah.

Chhuankima awm leh awm loh a hriat ta mang lo. Min ngaihven lova kan ngaihven bik hek lo.

Kan insawn chhoh aṭanga kâr khat chhung vel kha chu Mimtei a ṭap ru ziah tih ka hria; mahse, thlá a'n vei meuh chuan ani pawh a pangngai chho a, a u Sangzuala'n a duat bawk a, Kimkima hming a sawi khât ve ta.

Sunday zan a ni a, Mimtei nen zanriah eikham hlim aṭangin lehkhabu kan chhiar a, Sangzuala leh Tlana an duty avangin betu kan nei dawn lo tih kan hre ve ve.

Chutia ngawi renga kan ṭhut lai chuan in hnuaiah ring zet zeta inhau thawm kan hre ta a, dârthlalang keh ri niawm tak te ka hre bawk. Ka hawi phâwk hrâ a, chuti lutukin inhnuai thâwm hi a hriat vak lo, inkalpawhna kan pin aṭang phei kha chuan ṭawng ring viau pawh nise an thusawi kan hre ṭha thei vak ngai lo a, zanin zet chu kan hre teh tlat.

Mipa ring zeta âu thâwm leh inhrosa ri ni berin ka hria. "U Naom, kan chhuk ve mai dawn em ni?" Mimtein a ti a.

"Ka hlau deuh.." ka lo ti sap a.

"Kimkima te ṭhian hoin chaw an ei khawma an inti buai a ni ang," hlauthawng âw takin a ti a.

"Chhuk loh pawh ka pawi ti lo, eng emaw palh te awm ta se," tiin ka pum ka en zauh a, min hrethiam tak hian, "Ok.." a ti ṭha ve mai.

Minute nga dâwn a reh vang vang hnuah kan kawngkhar tu emawin a rawn sâwi dawt dawt a, 'Naom, Mimte,' tia min ko thawm kan hriat chuan rang takin Mimtei a tho chhuaka kawngkhar a va hawng a, pawna lo ding chu Kimkima leh mipa pakhat an ni a, an hmela hlauhthawnna lo lang chu hai theih ni hek lo. Thil awmzia pawh zâwt lovin kan zui thla ve ta a.

In chhung kan lut a, a lo hnawk nuai, mipakhat hi chhuatah a lo mu a, sofa-ah Masiami a lo mu a, a chatthla nge a muhil zawk, in chhung chu zu rim a nam hum hum bawk. Common room tukverh dârthlalang pahnih a keh a, chu pa chhuata let reng chu Mimtein a pan a, a mar te dekin an en vel a, ka lo thaw dép dép.

"Tu tih nge?" Mimtei âw a chang fak mai.

Kimkima leh a ṭhianpa chu an inmelh a, chaw ei ve dang ho kha an haw tawh nge midang tumah ka hmu lo.

"Mim, a ṭha em? Eng tin nge a awm?" Kimkima'n a ti sawk sawk a, a rûi a reh ṭan a nih hmel.

"Ṭha mai thei, ṭha lo maithei, damdawi inah hruai rawh u, ka lokal kal tel ve ang," a ti ta a.

"A chi loh.." Kimkima leh a ṭhianpain an ti rual ṭhawt a.

"Chhuankim, thih leh dam inkârah chi loh a awm lo, jail tân i duh loh chuan car la chhuak rang rawh," a nauvin khauh fara thu a pêk chuan hnial buai miah lovin chahbi a la nghal a, "U Naom, nangmahin lo awm lawk mai rawh aw, ka kalpui loh chuan," tiin min rawn en a.

"A hlauhthawn awm ang em?" A beng bulah ka ti sap a, "Ka hre chiah lo, a mar a phu zâwi lutuka ka ngaih a ṭha lo a.." a ti a, chumi hnu chuan chhuata mu pa chu hmanhmawh zet hian an zâwn chhuak a, car hnungah mut tîrin a bulah Mimtei a ṭhu a, Kimkima'n car a khalh a, a ṭhianpa front seat-ah a ṭhu thung.

Masiami sofa-a mu chu melh vang vangin dimte hian kawngkhar ka khar sak a, in chungah ka chho ta a.

A nuam emaw ti-a kan ûm ṭhin hi harsatna min thlentu leh kan nun ti hrehawmtu a ni a, Kimkima pawh hetia a tâl reng chuan chêt fuh loh hun a la nei ngei ang. Eng anga sual leh kawh mawh bâwlin awm mah se a unaute'n an hmangaihna a reh chuang si lo. Kei ngei pawh hian haw viau ṭhin mah ila, khawngaihna chen ka la nei tho.

Mimtei pawh chu ti tho bawk. A û mangang hmêl a hmuh rual khan a thinrimna dah ṭhain a tlân dâwr dâwr a nih kha, a tlai chhiat hmaa Chhuankima hi a harh chhuah hrâm ka beisei.

Mimtei lo haw hun nghakin sofa-ah ka ṭhu a, lehkhabu ka chhiar chhunzawm leh ta a...

Kha pa kha a thih vaih chuan a pawi thui khawp ang...

B®®
B+>[BeckirafARenthleI]<+®®