19.NAOM[Mizo Love Story]-B®®

19.NAOM [Mizo Love Story]

Ziaktu: Becky Rafa Renthlei

B®®

Shadow of the life

A nuam emaw ti-a kan ûm ṭhin hi harsatna min thlentu leh kan nun ti hrehawmtu a ni a, Kimkima pawh hetia a tâl reng chuan chêt fuh loh hun a la nei ngei ang. Eng anga sual leh kawh mawh bâwlin awm mah se a unauten an hmangaihna a reh chuang si lo. Kei ngei pawh hian haw viau ṭhin mah ila, khawngaihna chen ka la nei tho.

Mimtei pawh chu ti tho bawk. A û mangang hmêl a hmuh rual khan a thinrimna dah ṭhain a tlân dâwr dâwr a nih kha, a tlai chhiat hmaa Chhuankima hi a harh chhuah hrâm ka beisei.

Mimtei lo haw hun nghakin sofa-ah ka ṭhu a, lehkhabu ka chhiar chhunzawm leh ta a...

Kha pa kha a thih vaih chuan a pawi thui khawp ang...

B®® 180721

Mimtei lo haw laiin ka lo muhil sek a, khumah mu lovin sofa-ah ka lo la mu a, ka lehkhabu chhiar chhuatah a tla bal.

Lehkhabu chhar pahin, "U Naom, khumah insawn la," a ti a.

A lo hawna a la rei loh thu leh Kimkima ṭhianpa an admit nghal tih a sawi mawlh mawlh a, "A ngaihtuah awm ang em?" Tia ka zawh chuan, "Ngaihtuah awm a ni hran lo ang, a zurûi eng emaw kual vel a nih ka ring, Kimkima kha hlauthawng ve rawh se, an rûih vang leh kut an thlâk deuh avangin an hlauthawng leh si a nih kha," nui chunga a tih chuan mak tiin ka en hâ a.

"I va ho e..." ka ti a.

"A harh hma chu tikhan damdawi inah an awmpui ang a, zu an inbelh ngam tawh nâng, doctor-in check ve reng reng rawh se," a ti duh lek.

"I va sual tak.." ka'n ti ngawt a.

"Duty ka hrilh chiang vek alawm, zanin chu ti sawn va inbuaipui ve se la, mu ang.." ngaihsam zeta tiin a room lamah a phei ta a.

Mimtei hi chuan Sangzuala ang êmin min ngaina mah suh se, unau piang hmun ang maiin min en, Tlanhlua chungchang pawh kha a hnuah min hrilh leh vek tho. "A tirah ka ngei sia, ka sawi zak alawm," a ti mai mai. 

Mi âi kal a ni a, a hlawh a tlêm teh reng nen a lâk ve hmasak ber kha a bo a bâng awm lovin min pe thlap a. Sangzuala ka hrilh nghe nghe, ani lah chuan, "In pahnih khan hmang huau huau rawh u," a rawn ti a. Mimtei nen kan nui nghek.

Kan second hand ve kha kan hralh zo titih tawh a, pali lâi a ṭha ṭha kan inlâk a, Rinpuii pawhin min pui nasa ve bawk si a, hlawh kan siam ve. A bâk kan hlêpin Rice cooker kan lei daih.

Ka pasal neih dan hi a leh lamah chuan a nuam ve tho, nu leh pa hrawn tur ka nei lo a, Kimkima sual mah se ti hian kan inla hrang nalh a; û ber nupui ni ta chu min zah der vein ka thu Mimtei pawhin a awih hle, Sangzual'n nise min dah pawimawh thiam em em a, 'Nuthlawi zero emaw inti kha ka pasal zârah ka 'hero' chho mêk' pasal fel leh fel lo kâr hlat zia ka hre chho telh telh.

Dingngheta ka neih lai khan sum lamah min hai vur viau a; mahse, a chhungte lakah ka thlavang hauhna châng a hre lo fo, a hnaa a kal hlan te khan a farnu leh a nu khan min tham lo hle ṭhin. Khâng lai hun khan ka la â ve a, rilru puitling pu pha lo tih takah lung lohah ka la ngai lem lo. Min rinawm loh san ta lo se kan inṭhen kher lo mai thei; pasal ka neih nawn leh hma kha chuan a chhe zawngin ka chanchin an sawi vak ka hre lo a; hetia pasal ka neih tâkah hian min chhuah tuihnai vak lo tih pawh ka hria. Mahse, eng hu-ah ka ngai tawh lem lo.

A hun laiin Dingngheta khan min duh ve viau a, sual duh mi ni ta ila, zan mut hmunah a chhungte rêl zâwngin, "Siap siap siap' ka tih vaih chuan kawngro a su ve khawp ang; mahse, ka nu thu min hrilh, 'Pasal te bula an chhungte rêl chiam chiam hi misual zia a ni a, kan ngaihdan a lo ni lo deuh a nih pawhin ṭha taka hrilh mai tur, in rêl lovin,' tih kha ka zawm ve tlat. Chuvangin a farnu ka ngei viau pawh khan Dingngheta bulah a vûi zawnga sawi loin ka lawm lohna ka hrilh mai ṭhin. Ka hriat loh te pawhin a lo khak ve mahna, hriat va ni suh. 

Tûkṭhuan kan kîl laiin Masiami a rawn lut a, "Kimkima te hi khawiah nge an awm daih le!" Tiin min rawn zâwt heu mai. Nizan khan engmah hre lovin a chatthla tih hrilh hranpa kan ngai lo.

Ka chhân ve hmain Mimtein, "Damdawi inah.." ti hmakin nizan thil thleng vel kha a sawi zuai zuai a, "U Kimkima hi i hmangaih tak tak a nih chuan a zu in nasa lutuk te hi khap ve rawh, â..inzilh tur chuang pawh in awm lo, in duh a thu hmun bawk si, eng emawa han in ve zauh te hi chu ka la ngaithiam thei. Mahse, tlai tin maia ruih hi zawng a ṭha lo a ni," a ti deuh duah a, thinrima sawi pawh a ni lem lo.

"A lo nih tak chu..." ti nghatin Masiami a chhuak daih. A ṭawng tui tam ngai miah lo.

"Henu tak hi chu, kum sawmli a tling dawn tawh a, a puitling lo ve chiang e, kan monu Silver a nih hi..." tiin Mimtei a nui hak hak a, a sawi awmzia ka zawh chuan, "Nangte chu monu Rangkachak i nia lawm, ani kha Silver, Mama hnena i sawi kha ka hre vek," nui ṭhâ chungin a ti leh a, Liansangzuala zeh zuah hi chu(h).

"Ka fiamthu a nih kha..." ka ti ve taknaa ka nuih a za deuh tho.

"U Naom, Kimkima hmaisa kan tawn leh hmain lêng daih ang hmiang putea te inah.." a ti zui leh a.

Chaw kan eikham tawha thlengsil hi chu ka contract deuh tawp. Hmun tifela tei tei ai chuan dinchilh deuh tawp hi ka duh zawk. Mimtei'n ka scooty kha a duty dawn apiangin a keng ve ziah a, vawihnih chu min phur ve tawh; Learner a buaipui ve a, thlaruk hnuah drive test a nei dawn, 'L' a târ kuau. Ka la hmusit ve leh chhawng, a haw thei ropui. Kan incheck up dawn apiangin keiman ka khalh thung a, 'L' ka'n pawtthla deuh ngei a, a run thei lutuka, "Mama hnenah ka report ang che, a hriat vaih chuan a ṭêk ang chu.." a ti a.

Kei lah pek chuan, "I hrilh vaih chuan scooty chahbi ka thukru ang," ka lo ti a, "Phakar zia hi..." tiin a nui ve tawp. 

Inlêng kan nei ngai lo tih theih a ni a, hmelhriat ka la neih belh em em chuang lo. Mimtei hi ka ṭhian, ka unaunu a ni kawp vek. Kimkima te rawn haw hmain pute Biakrema te inah kan lêng ta daih a, ka pazawn te inah khan vawihnih ka lêng ve a, anni nupa pawh rawn luh zeuh an chîng ve; mahse, kan inhlat deuh avangin kan intlawh pawh lutuk lo.

Tlailama chaw ei turin Bawihpuia kan sâwm a, a û âi chuan kan hnenah a tâl tam zawk a, Mimtei duty zana min riahpuitu ber a ni, a hmelṭha roh a, bialnu a nei ve tawh, Electric veng ami a ni nghe nghe.

Putea'n Kimkima chungchâng min zawt a, nizan boruak vel kan hrilh chuan, "Duhsanga hian a fuihpawrh ka tih chuan ni chiahin ka ring si lo a, eng vanga hetia awm tlat nge maw a nih aw, a naupan laia a fel tehlul nen," a ti bawrh bawrh a.

"Pute, Mama lo haw se, a zia ve mai ang, keini ringawt hi chu min zah lo a, a la sual rih mai mai a nih hi.." Mimtei'n a ti a, ka pawmpui ve deuh. Sangzuala awm leh awm loh kâr a hla ve bawk êm a ni.

A táwp a táwpah Sangzuala pawh an unit lamin an thlah fel ta a, a document tihfel chhung a rei bawk si, a duh angin thil a kal zung zung thei bawk si lo a, nupui a neih thu a report ta lo, joint account hawn chawp leh te a ngai dawna thil a khirhkhan riau avangin a nupui neih thu sawi lang lovin, Mimtei nen joint account an lo hawn tawh tho kha a ring zui ta mai niawm tak a ni. Sipaia aṭan a ṭangin kum 17 chiah chiah a ni a, rei hi ka'n ti mai mai khawp a. A hma khan kum 16 hnuah tih kha a sawi ve fahran zel a, a sawi dan ka lo hriat fuh loh vang zawk a ni. 

"Nám, nupui chu nei lo ila discharge ka díl rih lovang," a ti nghe nghe.

Tunah hian ARC Shillong (Assam Regiment Centre, Happy Valley) ah thlakhat vel a awm leh dawn a, document clear tih thuartham vel niawm tak a ni; chumi zawh chuan a lo chhuak ve tak tak tawh ang. Pathian zara kan dam a nih chuan ka nau neih hmain a lo thleng hman turah ka ngai. CO pawhin an ui ve viau niawm tak a ni a. Document buaipui chhung nen record office-ah an la thawn leh tê tê a, thla thum chu sawi loh thla nga deuh dawrh a ni. Chu pawh, Sangzuala a vannei pâwl niin an hotute duhsak zarah mi aia hma a la ni ta fo.

Ni e, kan duh ang diak diakin thil a kal thei lo a, a lo chhuah hun nghâkhlel viau mah ila, tihngaihna dang awm hek lo. Kan nghâk leh poh a ni ang chu.

Putea te inah chhun thingpui kan in nghal ta law law a, 'pitei pawhin min duata nau puan pawh ṭhuisa lei lovin a 'thán' lei rawh u, ka lo ṭhui dawn nia,' a ti thlap. Nu leh pa tlawhpawh phâkah ka awm lo naa ka vanneih zia ka hre thar zel.

U Sawmiṭ'n naute thawmhnaw tesep min rawn thawn nual a, u Chhanhima nupui pawhin pahnih khat a lo thawn ve tho; a lawmawm ve hrim hrim. Ka Bp-in duhthu a sâm lutuk lo a, Mimtei'n a ṭha a tih apiang ka eiin ka ina hma ka sâwn em em lo. Ka thâu zualpui a reh leh deuh tawh a, exer chu ka la ṭha, ka taimâkna lam a ni ve khiah.

Kan ina kan lêt phei leh chuan Kimkima te car a lo awm tawh a, damdawi in aṭangin a lo haw tawh a ni ngei ang. 

Inhnuai leh inchung inkal pawhna kan hman tawh ngai loh avangin pawn lam step kan zawh ziah a, Kimkima Veranda-ah a lo ding vung vung; rûi hmel a pu lo. Rilru hahna lian tak nei niawm takin a tukkhumah kut a suih a, "Naom, lo lût kâwi lawk ula.." zawi supin a ti a. Mimtei ka va mitmei hnuah kan zui lût ve ta a.

Masiamin chhuat a lo nâwt a, in chhung pawh a fel duak tawh. 

"Mimte, nizan chungchang kha khawiah mah sawi lo ula ka duh, nangni pahnih bâkin in hre lo a, vawiin lam hian CT Scan an ti dawna Nunhrila kha a rûi tlu sual angin kan sawi a nia," Tiin min en a.

Mimtei khan a ngaihtuah awm loh tiin a sawi ve si a, eng nge thil awmzia ni ta ang? A ngaihna hre lo deuhin Mim-i ka va en a, mitko san âk chung hian, "Dâwt sawi kher loh tur alawm, a dinhmun a ṭhat loh phei chuan an la chhui zui dawn tho tho che, i zirlai zir zo phawt rawh tia kan hrilh che khá zawm ni la chuan hetiang buainaah hian i lût miah lo ang," tiin a û a hau bawrh bawrh a.

"Hmun dangah sawi lo ula a ni mai," a ti leh a.

Engmah ka sawi ve lo.

"Kimkim, tuna i awm dan ang hi chu a ṭha lo a nia, insiam ṭhat tum rawh a tlai hma hian," Mimtei bawkin a ti leh a, "Ka chan âi tur min pêk hunah le," a ti duh chauh. Thinrima pâwngpawrh phei chu a ni lo.

"Mama a lo haw dawna kan la sawi ṭha dawn nia, chho ang," tih pahin min rawn en a, "Thingpui in ve ta che u," Masiamin a ti ve mial. Mahse, kan in tawh thu sawiin kan chhuak ta a.

Bawihpuia khan min zui phei ve nghal a, mahse, Kimkima te ina lût lo in, inchungah a chho tlang nghal kha a ni a, games a lo khêl leh tawh.

Mimtei a room-ah a lut a, Tv en tur kan nei si lo a, a hma ang khan ka fb ṭha peih tawh lo; tih tur hlawl a awm lo, Sangzuala'n a hma aiin hun thâwl a ngah lo zual a, kan inbe khât ta deuh. Mahse, ka ngaih erawh a ṭha thung.

Mimtei room-ah ka va lut a, CT Scan chungchang vel ka zawh chuan, "Helaiah an ti nghal dawn hleinem, remchangah la ti ve hrim hrim rawh u, doctor khan a ti a, an sawi dan a dawngsawng thiam lo mai mai a nih kha, engmah hlauhthawn tur a awm lo, ka rin dan chuan naktukah a chhuak theiin ka ring, Kimkima a hlauthawnga tuna tih nghal tur emaw a ti teh ngawt a nih kha." A ti a. Ka thaw huai.

Dik tak chuan in hrang chang mahila ka pasal nau a nihna a bo chuang lo a, a buaina chu kan buaina tho a ni, ka ngaihsak dawn lo ti ṭhin mah ila a theih tak tak loh. 

Ka nu nen kan inbiakin Masiami chungchâng a rawn sawi a, Mâkpa atan Kimkima an lo duh hlê a lo ni a, zir zawm lo mah se pawi an ti tehchiam lo a ang khawp mai, an bul ṭanna tur sum pêk pawh an hnial lo tih thlengin a sawi a; mahse, mipa tân a tha nat thlâk tih a sawi tel.

Ka pa hriselna a tlâk hniam thu a sawi tel bawk a, "Hna a thawkrim lutuka i u Chhanhima te nupa an lo awm aṭang phei hi chuan nitin huanah a kal a, upa lam a ni tawh nen a tlin lo a nih hi, thu sawi a zawm duh mang si lo," a ti bawrh bawrh a.

U Diki chungchâng ka zawh chuan, "A ngai reng, a indang tawh lo niawm tak a ni, i û in a lo khak ve deuh a," a ti leh a.

"Engah mah inrawlh ve suh aw, an nupaa sawi fel tîr kha a ṭha, i lo inrawlh ve sek chuan u Diki'n a ngaithei lo ang che," tiin ka hrilh a.

Kan khawsak a harsa em tih min zawt a, kan harsat loh thu leh Mimtei'n mi âi a kal ve tih ka hrilh chuan, "In nula kha a fel em mai, duat la, zah thiam bawk la, i nihlawh a nimai, Dingngheta farnu khan sâwn a pâi a, mi pa lakah a nia," a ti a.

"An inneih hmel em?" Tia ka zawh lêt chuan, "Ka hre lo le, Dingngheta a thinrim viau an tia, i nau pai thu pawh an lo hre ve tawh a ni awm e," tluangtlam taka tiin, "I pa zia deuh se, inpa lo haw hunah kan lo zin ve dawn nia," tiin kan inbiakna a ti tawp ta a.

A hma âi chuan min be khât ta. Mahse, ka vûi lo, u Diki hi a phunchiar ve si a, a vengthawng a nih ka ring.

Eng tin tin emaw ni kan hmang liam a, kâr lovah thlakhat chu a ral ve leh mai. Kimkima pawh a hlauhthawn anga thil a thlen tâk si lovah chuan zû a in leh ṭan tawh a, Nunhrila vang khan kârhnih lai a nghei ve a, Masiami tak hi chuan a in ta rih lo, nupaa zu in zawng a fuh lo êm a ni.

An khawsak a harsa lova nitin dawr nghakin an chhuak ziah a, kan awm ve tih pawh hria angin an awm leh tawh lo; a pawi pawh ka tih si loh, in vêng rana awm âi chuan inhním hnai lo law law ila kan tan a zia zâwk.

Naktuk hian Sangzuala a rawn thleng dawn a, tunah Aizawlah a awm tawh, u Chhandama te inah bawk a in nghat leh a, Lungleiah châm khawmuang lovin a rawn tlang nghal dawn tih a sawi.

Ka naupaiin thla sarih hmel a hmu ve tawh a, chuti luain ka dul a puar lo. Ka ke a vûng nasa hle a, exer lâk pawh a har ṭalh mai. Inchhung dung mai maia ka tei pawhin ka ke a kham ut ut a, ka ṭawi nai nai viau.

"Nám, min lo hmuak thei dawn em?" Tia Sangzuala'n min zawh chuan, ka theih tur thuin ka chhâng a, bungrua a ngah dawn si a, Bawihpuia kan hrilh sa bawka Counter kawtah lo hmuah kan tum. A û lo haw tur thu Kimkima a thâwi pawhin kan hrilh lo; eng boruak nge kan hmachhawn dawn hre mah suh ila ka hlauthâwng rilru viau.

Mimtein awm ngaihna a hre lo, a û lo haw tur hahîpin a sawi a, ṭawng vena hun ka chang lo rêng rêng. Thlaruk pum ṭhak kan inhmu tawh lo a, ka huphurhna leh ka châkna a inzât reng. Thil a chah hnem mai siah, kei pawhin ka chah ve tho. Nui huk huk chung hian, "Ka nupui kha a fit ṭha em?" A rawn ti a.

"I zak lo, lo haw ṭha hle hle la a ni mai," ka lo ti a, min hmu lo mah se ka lái ṭút. Hetiang hian min fiam fo ṭhin a, ngaiah ka nei hleithei lo.

"Ka lo haw ṭha dawn reng alawm le, min hmu châk tawh lutuk tih ka hria a nia, tun ṭum chu chhuṭi ni lovin ex Regiment ka ni tawh a, ka tawrhhlel awm viau dawn a nia, lo in warm up rawh," a la ti hram.

"I chhe zeh zuah, i nau awm lai te khan min fiam leh vak ang e," ka ti a.

"Min hmuh châk ang tho khan kan naute-in a pa a hmuh châk i ring lo em ni?" A tih chuan, "Liangsangzual, i â siah, u Chhandama te khan an hria ang e," ka ti hlak a.

"Mate, kan hre vek, inpa bulah ka ṭhu," u Chhandama'n nui hawk hawk chungin a la ti zui. 

"In va han zak lo, in mâwl dun si," ka ti nghek a, an nui kur kur. Ka va ngei tak.

Kan inbiak zawh hnuah saisirin ka mu a, Sangzuala nen kan intawn nawn leh dan mitthla zut zut chungin ka chhing ve ta a.

Tûk pumin Mim-i a bazar a, ka theih ang angin kan room ka thian fai ve bawk a, Sangzuala'n an thlen chin a khât tawkin min hrilh zel a, ka va nghâkhlel si êm.

An rawn thleng hma dawn lo tih hriatsa a ni a, ka helhhawlh lutuk a, tui ka in nghek nghek a, ka zung sek bawk.

Kan nautê pawh a che ve dat dat zel a, min kalsan lai khan ringhlel reng rengin kan awm a, tunah chuan rinhlelh rual lohvin a puarin a che ve tawh a, ka nau neih hmaa a lo haw hi ka lawm ngawih ngawih. Amaha ka lo innghah zia ka hriat chian phah bawk.

"Nám," zawi supa min kotu ka pasal hlim hmel ka hmuh chuan zawi muangin ka pan a, ngun lutukin min en tih ka hria, "Sangzual," tih pahin ka pan phei a.

"AuMam..." Tiin Mimtein a û a kuah a, Sangzuala'n min la en ngat ngat. Chutah, "Naom, Mimte," ti leh supin kan pahnihin min kuah ta a.

Chumi hnu chuan a bungrua te car-ah Bawihpuia nen an dah lut a, Mimtei'n a lo pui bawk, ka kê a kham bawk si nen ṭhutna tur ka melh kual a, ka kê a vûng nasa zual. A lo haw dawn avangin theih ang angin kan inbuatsaih ve a, ka che nasa deuh nge ka ke in min zo ṭha hlawl lo. 

Ka ke rêk ka hmeh nawk nawk lai chuan, "Nám, i ṭha em?" Tiin ka ṭhutna bulah a rawn phei a, ka lo bu nghat. Ka ke enin, "A va vûng nasa em em ve, eng ati nge?" Tiin a rawn ṭhu hniam nghal a, ka ṭhat thu leh naupai lai chuan a vûng ṭhin tih ka sawi chuan, "Hawh le," tih pahin ka inrin hmain min pawm nawlh a, ka lo ṭê ṭhat. 

"Ka nupui pawm turin dikna ka nei," nui suk chungin a ti a. Ka ngawi hle hle. Car chhungah dimtein min ṭhut tîr a, "Ehem... eh.." Mimtei'n a lo ti a, "Kal mai teh," Lâi zetin ka lo ti a, Sangzuala a nui ruh ruh.

Rinaia an lo thlen tlai avangin zanriah ei lovin kan hmuak ta law law kha a ni a, in kan thleng a, Kimkima te car ala awm lo. An dawr nghak an la haw lo a nih ka ring; a tihzia phian.

A hmaa kan awm khawmna ṭhin veranda-ah Sangzuala a ding vang vang a, Tala in a inkalh a, a rilru a nâ deuh niin ka hria, hlim takin he in aṭang hian min kalsan kha a ni a, "Mimte, an haw tlai ṭhin viau em ni?" Tiin a nau a zawt a.

"An haw hma ngai lo hrim hrim, zingah an kal hma bawk," tiin Mimtei'n a chhâng a, eng mah dang sawi tawh lovin in chung panna step a zawh chho ta a.

A bungrua vel an thiar chhoh vek hnuah, "Naktuk lamah kan singsa fel dawn nia, chaw ei phawt ang u," a tih vangin chaw ei kan siam zui ta a, Bawihpuia pawhin a ei nghal a, kan hlim tlâng hle.

Putea te chhungkua zan lamah an rawn leng a, Sangzuala'n ka che vel min en zui zel avang chuan nuam lo ka ti deuh. Putea te thil tur a hawn nual a, a pe nghal a, Mimtei nen kan ta tur erawh chu naktukah a ti deuh tlat. 

Tlemin a lang chêr deuh a, a thü deuhin ka hre bawk; mahse, a hmelṭha tho.

Kan inneih zungbun a bun miah lo tih chaw ei lai khan ka lo hmu tawh a, zawh ka châk et et. Midang awm laia sawi erawh ka duh lo thung.

Putea te an haw phei tawh a, Kimkima chungchang pawh naktuk lama sawi atan an khêk ta rih a, eng nge an ruahmanna ka hre lo naa Sangzuala a lawm lo hle tih putea nen an inbiak dan a ṭang khan ka hre mai. Mimtei nen kan inrawlh ve lem lo; a û kutah engkim a dah tih ka hrethiam tho.

"Nám, i nuam lo deuh em ni?" Tih pahin towel-in a lu a rawn hru phei nawk nawk a, zan dar 10 a ri tawh a, a inbual zo ve chiah, inlêng kan neih avang khan inti fai lovin a awm char char a.

"Nuam e, ka ke a kham satliah," ka lo ti a. 

"Mimtei'n a hlauhawm loh a ti em ni, a vûn dan kha ka hmu mawh tlat," a'n ti ngawt a.

"Hlauhawm lo e, nakinah a reh ve mai ang, khawiah nge i zungbun?" Tiin ka zâwt ta nge nge a.

"Khulamah khan ka nupui neih ka zêp ta si a, ka phelh daih alawm, khatah khan a awm," tiin dawhkan chunga a wallet chu a kâwk a, "Min bun tir ka phût a nia," a ti sup.

A wallet ami kan inneih zungbun chu phawrhin, "Kha le.." tiin ka ding a, a kut vei lam ka hma zawnah a rawn phar a, "Ka chham kher dawn em?" Fiamthu titak deuha ka tih chuan, "Chham tur i hriat te chuan," a lo ti a.

"A nuamah pawh, a hrehawmah pawh ka pasal i ni tih entîr nan he zungbun hi..." ka sawi zawh hmain a nui huk a, "Lalmuanpui leh..." tiin za zet hian a nui ta hawk hawk a, ka tih tak vei nen, "Eng nge a?" Ka lo ti hû a.

"I hmêl kha..." tiin a nui ta khiah khiah a, a ngaihna ka hre lo tulh tulh.

"I bun dawn nge dawn lo," ti hmakin khumah ka ṭhu a, "Sorry, ka bun dawn, mahse, i inti mitak hmel kha.." tia la nui kur kur chung hian kut a rawn phar ṭha leh a, rang zetin ka bun tîr ta nghal a.

"A chham lam chi chu nakinah ni rawh se, tunah chuan khatiang kha ka zo lo.." nui chungin a la ti hrâm.

"Mu rawh," ka ti nghat a.

"Kan la mu ang chu, nitin nilêng pawhin ka mu hman tawh; mahse, chu âi chuan kha kha ka en chiang duh, ka lo thlen tirh aṭanga ka tih châk ber a ni bawk," tiin ka pum puar âl chu a en a.

A sawi awmzia ka hria. Hrilh nawn ngai lovin ka kawr hâk lai ka phelh a, khuma ka ṭhu chu min pawt thovin, "Nám, kan naute nen hian ka hmangaih che u," tia ṭhu hniamin ka dulah a fawp a, a kut lum thur thurin a chûl zui a, chutah a rawn ding chhuak a, a lamah min pawt hnaiin, "Ka ngai che, ka ngai lutuk che," thâm ṭuaka tiin min rawn fâwp ta a.

Duhthawh takin rei fê kan in fawp a, a lo thlen tirh aṭang khan inlawmna hun mumal pawh kan nei lo a, kan nupa room-a kan awm dun meuh chuan min thlâkhlelhna thup buai a tum tawh lo va, min fawp reng chungin khum lamah min phei pui a, khumah dimtein min nghat ta a.

"I kê a vûng nasa si a, thil dang nâ i nei em?" Tiin min zâwt thut a. Ka nei lo tih nân lû ka thing a, "I kê-a tih tur pawh a ni chuang lo a.." tia a nuih tâkah chuan, "Doctor-in a phal tawh lo," ka ti sap a.

"Eng a?" A ti hluai a.

"Doctor-in nupa nun hman min phalsak lo, naute pian hma chu.." thu tak zetin ka lo ti a.

"A phal loh chuan tih loh mai tur a nih chu, ka insûm thei ang," a ti vei ngial. 

"Ka chau, mu tawh ang," ka ti a, min hnial lovin khumah a lawn kai a, min kuah mu ve nghal bawk.

"Nupa nun hmang lo pawhin ka kuah thei che alawm, ka kuah phâk leh i pangti lum nghenga mut ringawt pawh hi ka thlahlel," tiin ka biangah a rawn nâwk a, ka kut a awm mai mai bík lo.

Nui hak chung hian, "Ka fit leh fit loh i hre duh a ni lawm ni sipai pa, tu nge fit zawk kan en chhin dawn em ni?" Ka ti ta a.

"Lutuk che hian, min thlêm rêng rêng suh, insûm theihna ka la neih lai hian muhil ang," tiin ka kut a man bet a.

"Insûm lo la, sipai dik tak hmuh ka duh," nui var var chunga ka tih chuan, "Naom.." a ti lâwi rût.

"Dâwt var ka sawi a nih kha, eng doctor mahin Liansangzuala sipai bâng hi an khap thiang lo, kan naute hmuh nan minute thum hun i nei," tia ka sawi zawh rualin a thaw hawk a.

"Lalmuanpui, i châk dawn lo..." tih pahin a ṭhu chhuak nghal a.

"Ka châk.." nui hak chunga ka lo tih chuan, "Thlaruk lek chhunga i danglamna hi thil mak a ni, ni e, kan nautê chuan a pa hmêl hmu ngei rawh se," tiin a mit thím raih chuan min chhuk melh a, a va han hmelṭha tak.

Doctor-in min khap miau lo a, a chin tâwk thliar thiam ka pasal Liansangzuala hian min tina hauh lo ang.

"Ka tina lo che tiraw?" Tiin ka sirah a rawn bawk thla a, "Na lo e, min tina dawn lo tih ka hria alawm," tia a lam hawiin a hnungzâng thlan dap chu ka hruk sak a.

"Nám, ka lawm e, i natna thlentu nih ka tum ngai lo ang," tiin a in let a, "Muhil ang, i chau lutuk palh ang e," tiin light a off a, a hmaa hmangaihna kan chendun apiang khan zan a nih chuan light a off ngai miah lo. A êng pup zel.

"Thim thama nupa nun hman ka ngaisang lo, tunge i chunga awm tih leh ka hnuaiah tunge awm tih hriat chian ngei a ṭha," a ti deuh kher. 

Ka hriat laiin zu rim vawi khat mah a nam ngai lo a, ka hriat loha a in a nih chuan thu hran ni ta se, a insûm theihna hrim hrim pawh hi ka ngaisâng. 

Mipa dik tak chuan eng kimah insûm theihna a nei tur a ni. Chumi neitu chu Liansangzuala a ni bawk.

Zinga ka harh leh chuan dâr kua a lo ri tawh. Êm êm a!

Keimah chauhin ka lo mu tawh a, zan dangah chuan zun chhuakin min tiharh fo ṭhin kha a nia, nizan chu vawikhat mah ka harh lo a ni ngei ang, ka pum a che dat dat a, a châng chuan a na lek lek ṭhin. Mipa nge ka neih dawn hmeichhia rin ngaihna ka hre lo a, Mimtei chuan hmeichhia a duh a, keiin mipa ka duh rilru deuh, Piteii'n mipa a nih a ringa putean hmeichhia a ring ve thung. Sangzuala tak hi chuan eng mah a sawi ngai lo; kan pahniha fa chu eng pawh nise ka duh vek, a ti mai.

Ka thawh chhuah ve chuan bungrua vel an lo phawrh darhin an lo dah fel vek tawh a, Mimtein eirawng a lo bâwl zo chiah. "Mama'n kaih thawh che a phal lo a.." nui sânga tiin tuilum in tur min pe a, "A changtupa lo haw chu i ngeih cher cher hle mai," tiin min fiam deuh ngei.

"Tlana lo haw hunah i ngeih ve mai ang," tiin ka fiam lêt a, a nui hak hak. A û awmna ka zawh chuan inhnuaiah a kal tih a sawi a, ka ngaih a ṭha lo nghal; mahse, ka sawi chhuak chuang lo a, Mimtei'n a û thil hawn vel min en tîr a, Jacket, pheikhawk flat pahnih leh thil dang pawh a tam. Eng nge min hawn ve ka la hre lo.

Dar 10 dâwnah Sangzuala a rawn chho a, a hmêl aṭangin a lungawi lo tih ka hre mai.

Chaw ei a rawt a, "Zaninah putea te nupa lo phei se, kan vaiin inhnuaiah thu pawimawh kan sawi ang, inpahnih tân lo ṭawng ve a ngai lo ang a, ka zawh chin chauh min chhâng dawn nia, Kimkima hi thu ṭha hrilha siam ṭhat chi a ni tawh lo a, Mimte, nang chu pasal neih i duh hma chuan kan hnenah i awm zel dawn nia, rilru nei taka kan awm tlân a ngai tih hre nawn leh rawh u aw.." dam thlapin a ti ta a.

Tukinah engtin nge an inbiak tih hre mah suh ila, boruak ṭha a awm dawn lo tih ka hrethiam.

"AuMam, i thutlukna apiang ka pawmpui che a nia, nangni nupa aia min hmangaihtu ka nei hleinem," ṭap aw ṭiaua a tih chuan, Sangzuala'n, "Tlanhlua pawh maw..." a lo ti zauh a.

"I sual, ani te chu..." tiin a ṭah nuih a. 

"Tlanhlua hian a hmangaih che a, hmeichhia chuan inhmangaih hlur aiin nangmahni hmangaihtu tak tak inneih hian in nihlawh a ni mai, a hranpaa in duh lo ngawih ngawih an nih si loh chuan, Námi pawh ka thu awih turin ka hrilh a, ka hmangaihna a hriatthiam chinah chuan, ka tel lova awm a harsat êm hi..." a'n ti ngeiah.

"I chhia, min sawi tel suh.." nui chungin ka lo ti.

Min chhâng tawh lem lo.

Sangzuala thil min lo hawn ka hmuh chuan ka nui hak hak a, mipa ve si thil lei thiam ka tiru hle. Kurta cial deuh deuh hâk li ngawt a lei a, chapal leh purse te, silver ṭhi (tualchher) bâkah shirt pathum, a dang pawh a awm nual. 

"Ka lawm lutuk," nui var var chungin ka ti a, "Ṭhi kha chu ka lei a ni lo a nia, ka ṭhianpa, khuta ka kawm ngeih ve deuhin ka nupui tan min pe a, anmahni chher a nih kha," tiin ṭhî chu min awrh tîra a rit nalh mai. 

Tukverh bulah a ding a, "Thutlûkna siam a harsa a, Nám, Kimkima hian ka hmangaihna a hrethiam thei lo hi ka hlimna ti famkim lo tu a ni," rilru hah hmel takin a ti a.

"Keimah vang vek a ni, min duh lohna chiang taka a ti lang chung pawhin kan innei lui ta si a, in unau buaina thlentu niin ka inhria," zawi sapin ka ti chhuak ta nge nge a. Kan inneih hma te chuan unau inngeih tak an ni a, ka awm ve aṭangin thil a khaw lo chho zel a, Kimkima'n sual a chhuah phah ka ti lo thei lo.

A dinna aṭanga pen sawnin ka ṭhutna bulah a rawn ding hnai a, "Nám, a ni lo zawngin thil ngaihtuah suh, nangmah vanga hetianga awm hi a ni lo, amah hrim hrim hian rilru kâwi a pu a, kei chu a duh tawkin min haw mah se ka la tuar thei, Mimtei a farnu neih chhun a hmu mawh em em hi chu ka palzam dawn lo, keini chu pumkhat kan ni a, kan natna pawh kan la intawrhpui thei, Mimtei hi kan unaunu neih chhun a ni a, he inah hian chanvo a nei bawk. Chu tak chu Kimkima hian duhsak bîkah min ngai a, tukinah pawh a sawi chhuak alawm," a ti ta a.

"Ka naute pahnihah hian duhsak bik ka nei lo, amaherawh chu Mimtei hi chu hmeichhia a ni a, a la naupang bawk, ka kova tla a nih angin ka duata ka hmangaih, Kimkima chu mipa a ni a, a rilru pawh a puitling tawh a, â, eng pawh nise zaninah kan sawi chiang ang," tih zawm lehin min rawn en a, "Nám, a harsa a ni," a ti zawi ruih a.

A thu tlûkna siam ka hriatpui hauh lo. Mahse, ani meuhin a harsa a tih chuan eng emaw tak tih a tum tih ka hrethiam mai.

A kutah vuanin, "I hmangaih zia ka hria a, an tana ṭha lo tur i ngaihtuah ngai lo tih ka hria, a ṭhatna tur ni-a i hriat chu huaisen takin ti la, i lamah ka ṭang zel dawn alawm," ka tih chuan, ka kut a hmer vang vang a, "Ka lawm e, Nám.." tia rawn kun hniamin ka chhipah a khabe a nghat a, a ngawih vang vang hnuah. "Entawn tlâka kan nun a ngai a ni, Pathian kan hnaih lo a, mahni ṭhat ṭhatin kan ṭha a, nupaa kan insiam lai khan ka mihring duhna tilianin Pathian pawi ka sawi a ni. Nám, Pathian a tel loh chuan keini chhungkua hi chu kan la keh darh ang," thâm ṭuakin a ti ta a.

Ka lo ngaihtuah thleng ngai lo.  Ka ṭawngṭai tlêmzia te ka ngaihtuah chhuak a, Sangzuala sawi hi a dik chiah. Û ber nupa kan nihna hi a tâwk zo lo; nu leh pa chan kan chan a ngai a, mihring ṭhatna leh theihna ringawt hi chuan tâwp chin a neia rei a daih ngai lo. Pathian kan ngaihsak a ngai a, Sangzuala ringawt a tâwk zo lo bawk, kei pawh ka tel ve tho.

"I rilru ti hrehawm tawh suh aw, theih tawp kan chhuah dun dawn nia," tiin a nghâwngah ka kuah a, "Chhungkaw vanram siam tur hian, nang leh kei kan pawimawh, tun aṭangin bul kan ṭan dawn nia," ka ti ve ta a.

Chumi hnu chuan hlim leh inpawh takin kan titi dun a, zan hun erawh kan huphurh thu kan sawi ve ve, a chhan chu, Kimkima'n a sawi ngai tho, a pa te sum hnutchhiah kha Sangzuala a dil a, court thlen pawh a pawisa lo tih a sawi vang a ni.

Tlai lamah putea te nupa an lo phei a, zanriah an kîl ve nghal bawk a, a ṭha ber tur hriat a har vangin rei fê putea nen pawh an inhnial phah. 

Sangzuala'n tuna kan awmna in hi an unau hminga ṭhensawm a tum deuh a, putea'n a remti lo. "I nau hi a rilru a kâwi em mai, a chanpual hralh ta se eng tia awm nge i tum?" Tiin a zâwt.

"A in hriat chhuah theihna tur leh ka hmangaiha a ṭhat ka duh tih a hriat phahna tur a nih chuan in leh lo hi chang vek mah se pawi ka ti lo, kei chuan pension ka nei a, eng emaw zât ka chhuahpui ve bawk a, bul ka ṭan ṭha mai ang, Mimtei ka hnenah a awm bawk ang a, ka nu leh pa kha la dam se ka tih ang tho hian an ti ang," a ti ve tlat. 

Engah mah ka inrawlh ve duh lo. Ka pasal ka rin ngam a ngai.

Putea bawkin, "Upa ber i ni a, i retheih pui zia leh he in leh lo dinna atana i sên zawng zawng te i enkawlna leh a zirna zawng zawnga i tuamhlawm chung pawhin lawmna a nei lo a, i bike thlengin a hralh sak che a, zaidam a hun tawh lo; khauh tak, zahawm taka i awm a ngai zawk asin," a tih leh chuan, "A dik khawp mai, nakinah kan chhuk ang a, a lo ṭawng dan a zirin ka tih tur chin a lo lang mai ang," a ti ta a. 

"AuMam, na deuh hleka ṭawng a ngai a nih pawhin hreh suh," Mimtei'n a ti ve leh a, sawi ber tur pawh ka hre ve lo.

Tuna kan awmna in hi Kimkima pêk a tum tihna nge, â, ka hrethiam phâk lo.

Sangzuala thutlûknaa innghat ve tawp chungin inhnuaiah kan chhuk ta a. Putea pawhin sawi vak ngaihna a hre bik lo niin ka hria; nizanah a lo haw chauh a, hetiang boruak a tawng nghal hi Sangzuala a khawngaihthlâk ka ti, tih theih kan nei vak bawk si lo. 

Zan dâr riat a ri tawh a, Kimkima te nupain chaw an lo ei kham ve chiah a, ṭawngkam khat mahin atu amah min be lo. 

Sangzuala zâwkin, "Inpeih fel ula, thil sawiho a ngai," a ti sup a. Nichina a lunghnur hmel kha a bo hmak tawh, inring tawk tih hriat fahran hian sofa hnai berah a ṭhu a, a bulah Mimtei nen kan ṭhu ve a, putea leh pitei kan ep chiahah an ṭhu thung.

"Sawi vak tur a awm em ni, tukinah kan sawi chian tawh kha," Kimkima'n a ti hmuk a. Rûi angin a lang lo naa a lem hlek tih a hriat mai. 

"Sawi ngai awm lo se kan lo chhuk lovang, innupa khan hetah rawn phei rawh u," Sangzuala'n a ti nghut a, a hmel a nelawm loh zual. Discipline hnuaia awm ṭhang tih takah a inthunun hneh hle, nelawm takin a lang duh miah lo te hi a fing ka ti. A nau a haw lo tih ka hre ru kar tho.

Kimkima leh Masiami an rawn ṭhu phei ve ta a. Kan boruak a ṭang at.

"Kimkim, ka nu leh pa pawisa min dahsak kha engzat nge la awma i rin?" Tia Sangzuala'n a nau a zawh thut chuan Kimkima a hawihai deuh a, "Eng nge i sawi awmzia?" A ti hû.

"Ka sawi zawh chauh kha, ka nu leh pain kan unau tana sum min dahsak kha engzat nge kan la neih?" Tiin a zâwt nawn leh ngat. Ama account-ah an dah lo nge, hetiang zawhna te han zawh!

"Nuai riat min dahsak a, kan zirna leh in sak nan nuai li i la chhuak a, a bâng zawng a chanve a la awm ang chu," tia a nauin a chhân chuan, "A dik chiah, unau pathum kan ni a, nuai li chu hmun thumah ṭhen rawh le, chuta hmun khat chu i chanvo tur a ni ang," a ti nghut.

Ka lo thaw dép dép a, putea pawhin mak ati tih ka hre mai.

Amah Sangzuala vêkin, "Ka bike kha engzatin nge i hralh? aman ka la dawng lo bawk," a tih leh chuan, rang zet hian, "Singkuain" Kimkima'n a ti leh a, a hawi buai deuh nak tawh.

"Chuti a nih chuan, nuaili kha hmun thuma kan ṭhen chuan nuaikhat leh singthum sangthum vel bawr ṭheuhin kan insem thei a nih chu, Mimtei, nang leh kei, i chanpual i duh tiraw? I chan tur aṭang khan ka bike man singkua ka cut ang a, a bâng zawng chu i kutah ka rawn dah dawn nia, singli sangthum vel a nih ber chu," ti supin a ding a, a kekawr ipte zenin, "Hemi bîkah hian sawi tur i nei em?" Tiin Kimkima a melh a, ani a ngawi reng. A û chu mak tih hmel takin a en ngawt ngawt ringawt.

"Ka thlazar hnuaia awm duh lovin tal hran i duh bawk a, i kawng ka dal lo vang, he in sakna, i ei leh in, i zir chhung zawng zawnga ka châwmna che kha chu ka nau, ka thisen zawm i nih vangin a man ka bill lo ang che, he in hi ka pain ka hmingin a dah a, min chuh buai duh a nih chuan court ah min khing thei bawk, dan hre mi i ni a, a kal hmang chu keini aiin i hre zâwk turah ka ngai, ka hmangaihna che leh hmangaihtu âwkâ hre duh lo tu chuan he in hi a chhuahsan thei ang, zanin leh naktuk inngaihtuahna hun atan i lo hmang dawn nia," a ti ta hmiah mai le.

Putea a thaw hawk a, hetiang em em hi chu a thlen ka ring lo, eng kim a pe vek dawn emaw tih lai lai a! 

"Liansangzual, duham pa," tia Kimkima chu ding thutin a kut a vai fua a, Sangzuala a che sawn hlek hman, a vai fuh lo hlauh. Sangzuala hnaiha awm ka nih vangin keimah zawk min rawn bawh rawp a, ka inring hman lo rêng rêng. Ka lo ṭhu hmâwr ve kher bawk nen chhuatah kan tla thla dun ta a, ka pumah tak min delh, ka thâw a chham mai dawnin ka hria. 

"U Naom..." Mimtei hlauthawng âw ka hre ruai ruai a, Kimkima'n, "Zâwngi, nang nu vang..." tia a sawi zawh hmain ka bek a ri chawrh a, ka lu a hai nghal chum chum, ka chung aṭanga Kimkima let thla lai leh Sangzuala hmel dur khup ka hmu hman vuai. 

Ka khaw hmuh a fiah lo a, ka mit a phê vek..

"Ka nau chu ni lo la..." Sangzuala aw-a thinrimna vawrtawp rawn ri chhuak ka hriat chuan ka mit men ka tum a, a sak ṭalh...

A ri nuai nuai a, a reh leh duk a, ka lungphu a rang zaih zaih, ka pum a nâ tih chu ka hriat theih chhun a ni ta.

B®®

B+>[BeckirafARenthleI]<+®®