20.NAOM[Mizo Love Story]-B®®

20.NAOM [Mizo Love Story]

Ziaktu: Becky Rafa Renthlei

B®®

Shadow of the life

"U Naom..." Mimtei hlauthawng âw ka hre ruai ruai a, Kimkima'n, "Zâwngi, nang nu vang..." a sawi zawh hmain ka bek a ri chawrh a, ka lu a hai nghal chum chum, ka chung aṭanga Kimkima let thla lai leh Sangzuala hmel dur khup ka hmu hman. 

Ka khaw hmuh a fiah lo a, ka mit a phê vek..

"Ka nau chu ni lo la..." Sangzuala aw-a thinrimna vawrtawp rawn ri chhuak ka hriat chuan ka mit men ka tum a, a sak ṭalh...

A ri nuai nuai a, a reh leh duk a, ka lungphu a rang zaih zaih a, ka pum a nâ tih chu ka hriat theih chhun a ni ta.

B®® 190721

Ka harh leh chuan ceiling vâr ka hmu hmasa ber, khap sak sak chungin hawi kual ka tum a, ka lû a rit lûk.

Thil thlen dan kha ka hre chhuak nghal zut zut a, ka bulah tu nge awm tih hriat tumin sir lam ka melh a, Mimtei ka hmu hmasa ber. Ka pum ka khawih a, a la puar; Kimkima'n ka bianga a hnek kha ka hria a, kha mi hnu khan thâwm bengchheng tak bâk hriat zui ka nei lo.

"Mimte..." ka âw a ri chhuak chang chang. Mahse, a lo hre pha tho.

"U Naom, i lo harh tawh elaw.." hlim taka tiin ka mutna bulah a rawn phei a, tui ka duh thu ka hrilh chuan min lâksak turin a kal nghal a, Sangzuala ka hmu lo.  

Ka hrawk a ro hulh a, Mimtei'n ka lû dimtea chawikângin tui min in tîr ta a, ka harh deuh huaiin ka hria; mahse, ka bek dinglam a na fuk fuk thung.

"Khawiah nge i û?" Tia ka zawh chuan, "I inthlâkna la turin a haw lawk a, bike a nei tawh bawk si lo, putea te car a hawh ringawt a, Mama chungah thinrim suh aw," a ti sap a, ka ngawi reng.

Inthiam lo tih hriat deuh hian ka khum bulah a ṭhu a, ka thin a rim ru et et. Eng vangin nge kei hmeichhia, raipuar lai lehnghal khatia min tih ve ngawt. Min bawh thlûk kha chu tihpalhah pawh ka la ngai thei a; mahse, min hnek zui ta kher kha ka paidam thei dawnin ka hre lo. Tumahin kut min la thlâk ngai lo a, thlâk ngai pawhin ka awm hek lo, ka ngaihtuah lêt leh phei chuan thinrim lutuk vangin ka puak keh thei mai dawn alawm le.

Rei fê ngawi renga kan awm hnuah, naute ṭhat leh ṭhat loh ka zâwt a, "Aw, ṭha e, i BP a hniam sa sia, nihnih khat ngaichang turin doctorin min ti a, a shock êm che atin ni, i thidang bawka i harh lawk si lo nen kan mangang lutuk," a ti leh a.

"Ni e, mangang tur in ni alawm, lo thi ta ila, i unaupa khan nunna pahnih ala tihna a ni dawn a, khua in hawi ngam nâng," ka ti hmak.

Mak tih hmel takin min en a, "Min hua em ni, khawngaih takin thinrim lo hrâm rawh aw.." tia ka kut vawn a tum chuan ka dah sawn hmak.

"Eng tik thleng nge damdawi inah ka awm dawn a, ka phone khawiah nge?" Tia ka zawh chuan, "Naktuk kan awm leh anga i zia deuh chuan kan chhuak ang, mahse, i nau neih hma zawng mut hahdam a ngai dawn thung," tiin ka phone min pe a.

"A ṭhat chu ka nu leh pa ka bia ang a, min lo hruai turin ka hrilh dawn nia, i u Sangzuala pawh hrilh rawh, eng mah nâ ka nei lo va, mut hahdam ringawt a nih chuan Lunglei lamah ka nau neih hma zawng ka awm rih ang," tia ka sawi zawh rualin Mimtei'n min rawn en a, ka phone min chhuhsak nghal daih bawk.

"Motor-a chuang chi i ni lo, i thinrim a nih pawhin ka thiam lutuk che; mahse, engkim i hriat kha.." dam thlapa tiin ka phone a ak daih a, ka dîl nawn ta lo. Kimkima kha eng tin nge  a awm tih vel eng mah ka zawt chuang bawk lo a, a hming hriat hrim hrim ka peih lo a ni tawp.

Fa nei thei lo emaw intiin hun kha leh chen ka awm a, vanneih thil thuin kan ti dawn nge ka pâi ve hlauh a, min thahsak pawh hnial lo tu leh ka dam hlau ngawih ngawiha min hawtu Chhuankima hmel hmuh nawn leh hi ka duh tawh hlawl lo. Him leh ngaih ngam taka ka awm theihna tur hmunah lo chuan awm tumna ka nei lo va, he lai hmun hi ka tân a him lo, in hnuai lawkah min thah châk ngawih ngawihtu a awm tih hre reng chungin eng tin nge thlamuangin ka awm theih ang? Ka invêng séng bawk hek lo ang.

"Mimte, ṭha taka nautê ka neih i duh chuan ka nu leh pa min biaksak la, a nih loh pawhin i û nen kan inah min dah rih mai rawh u, Chhuankima hmuh phâkah awm ka tum tawh lo," ka ti ve tlat.

"U Naom..." a ti sap a. Chutih lai tak chuan ka doctor a rawn lût ta a. 

"I vannei hle mai, nautê pawh a ṭha e, nidangah chuan fimkhur tawh ula, i nau neih hun a thlen hma chuan mu hahdam vang vang ang che, tlema tlemah in inti khaw lo ṭêp alawm, damdawi ṭha taka ei a pawimawh dawn a nia," tiin ka pum a ngaithla vang vang a, nui sak chung hian, "Naktukah in chhuak thei ang, eng emaw in sawiselna i neih chuan rang takin in lo kal leh dawn nia, boruak ṭha hîp tam ang che," tih zawm lehin Mimtei a hûi zauh a, an chhuak ta a.

Tunah zinglam dar sâwm a ri chauh a, ka harh har ang reng; mahse, nautê a ṭha tih ka hriat ringawt pawh hian ka lawm lutuk tlat. Sangzuala hnenah khan keimah vanga an unau inkâr hi buai a ni tiin ka hrilh a,  'a ni lo' tiin min chhâng a nih kha; mahse, nizan thil a thlen aṭang kha chuan Chhuankima huat ber chu Sangzuala ni lovin keimah zâwk a ni. 

A û nupui atana min duh loh thu leh a hmaa min vauna te kha ka hre chhuak uar uar a, message min thawn te pawh Sangzuala hmuh tîr lovin ka ngawih bo pui vek a, ka fa nen him dam taka kan awm theih nan inṭhen nawn leh ngai pawh nise ka pawiti teuh lo. Sangzuala ka huaa ka duhin ka hmangaih ta lo tihna ni lovin an unau inkâr tichhetu nih âi chuan chhungkua hlim tlâng taka an awm theih hi a pawimawh zâwk. 

Mimtei a rawn luh leh laiin lukham ngheng hian ka lo ṭhu a, ka ril a ṭâm em tih min zâwt a, eng mah ka ei châk loh thu ka sawi a, an unau hrim hrim hi tun dinhmunah chuan ka haw ru deuh tlat. Ka va sual si êm. 

"Bawnghnute tal in rawh aw," a ti leh a, "Eng mah ka ei duh lo a, ka in duh lo bawk, keimaha awm ka duh," ka ti hlar. Koki san âka min enin, "Min hua pawh nila a awm reng, unau kan ni tlat si a, Mama'n Kimkima chungchâng chiang zawkin a la hrilh ang che, u Naom, i rilru tur ka hrethiam a nia," tiin dimte hian kawngkhar a hawng a, a chhuak ta rih a, ka thaw huai. 

Ka awmna room hi cabin no.3 a ni a, ward-a ka awm an duh lo te pawh a ni mahna. Nizan khan lo thi ta ila an mualpho dan tur te ka ngaihtuah mai mai a, mihrang kut tuar lo-a an thisen zawm ngeiin khatia min ti kha a ni a, veng chhungah sawi kan hlawh teh ang chu. 

Putea te nupa an lo la kal lo nge, ka harh hma khan an awm reng zawk ka hre lo a, anni nupa sawipui ila kan in lama haw ka duh tak tak. Sangzuala'n a rem ti dawn lo tih ka hria; mahse, sawipuitu ka neih chuan a dan a dang deuh mai thei.

Ka lo muhil leh daih a ni ang, Drip khai an rawn thlâk avangin ka harh a, Sangzuala pawh a lo thleng tawh, ka harh tih a hre lo a ni ngei ang min hnungchhawn zawngin a ding a, kekawr ipte zenin kâk deuh hlek hian a ding a, pawnlam a thlir vung vung. 

Locker-a tui bottle chu banin ka in khawlh khawlh a, ka thawm hriain a rawn hawi ta a. "Nám, i ṭha em?" Ti supin ka mutna lam a rawn pan a, ka bu nghat ringawt.

"Thil eng emaw tal ei ve tawh rawh aw, Mimtei la turin a kal mêk a," tih pahin ka chalah a fâwp zauh a, ka ner sak. 

"Eng mah ka ei peih lo tih ka hrilh kha, ka ei duh hunah ka sawi mai ang," ti nghatin ka in let a, ka pang a kham ut ut, bangkil lam melhin ka mu a, khumah a rawn ṭhu tih dunlop hniam sat aṭang chuan ka hre thei, ka che duh eih tawh lo. 

"Tlem tal i ei a ngai alawm, i ṭhu duh em?" Dam thluama tiin ka dârah a rawn vuan a, ka la che duh chuang lo, an unau hmel hrim hrim hi ka kham rih. Min kalsan aṭangin hlauthawng leh rilru nuam loa ka awm nî a tam zawk; tunah a lo haw a, boruak ṭha lo dangin min nang leh a, ka hah hluah hluah.

"Motor hman tur zawng la, damdawi in ka chhuahsan rual hian kan inah ka haw duh." Ka ti ta a. 

"Eng maw i sawi, inṭhen i duh maw?" A ti hû. Mak a tih hmel kher mai.

"Inṭhen lam ka sawi lo, ka nau neih hma chu kan in lamah ka awm ve rih ang e, helai hmunah hian nautê nen kan him lo," chang fakin ka ti leh a.

"A theih loh," tih chiahin min chhâng, teh tawp a! Ka thin tertek a chhuak thut a, insûm hman tawh hek lo, "Min thah châk ngawih ngawihtu i nau hmel hmuh leh âi chuan inṭhen a ṭul a nih pawhin kan inṭhen mai ang, Chhuankima vanga hlauthâwnga nun reng hi ka peih tawh lo, nautê pawh nei ila thah tumin hun remchâng a zawng lovang tih tu nge sawi thei? Nang chu a haw lo che, keimah hi a ni a huat zâwk chu," thaw chham lek leka ka ṭawng chuan a thaw hawk a.

"Keimah hi awm lo ila, unau in inrem leh zâwk ang," ka ti leh hrâm.

"Naom, duh tawk rawh.." a ti sup ringawt. Ka la duh tâwk awzawng lo, ka la âng dawn chauh. Mai mai a.

"Duh tâwk rawh tih ringawt lam a ni lo, min hmangaih tak tak a nih chuan i nupui leh i fa hi i nau hmuh phâk lohah min dah rawh, ani em em tawh lo, i kal hnu lawkah amah vangin inchungah kan insawna nun ralṭi reng renga awm hi ka thiam lo, ka peih zawng pawh a ni lo," ka ti leh nghek. 

"Ka awm tawh alawm, ka venghim ang che," a ti zawi ruih.

"Min venghim zo lo chu a nih ber hi, chutiang ni lo se damdawi inah ka awm náng, û mipa pahnih ka nei ve a, vawikhat mah kut min thlâk ngai lo, i nau chawngkawr kha ka hua, ani nen in thu hmuna chên leh ai chuan kan monu Diki hrawn pawh ka thlang zawk, ani chuan min thah a tum lo ang.." duh thawh zetin ka ti leh táwn táwn a, keimah leh keimah pawh ka inthunun thei tawh lo, hlauhna hian ka chhungril a fan tlat. Nizana Chhuankima hmela min huatna lang kha ka hmuh hmaih hek lo.

"Nám, inbengdai rawh, i chauh phah vek ang, min ring la.." tiin ka koki-ah a vuan a, "In unau hmêl hrim hrim hi ka hmu kham," ka tih chuan, "Naom.." a ti nghut.

"Thisen zawm vek alawm in nih, kan inneih avanga naute nen kan thih phah ai chuan inṭhena unau inrem taka in awm kha a ṭha zawk," ka ti leh hmiah. Ka sawi ta sa sa, ka lo up bo zawng zawng kha puak chhuak vek teh se. Mimtei lo lut chu koin, "Ka phone kha min lo pe rawh, ka ngawi dawn tawh lo," ka lo ti leh hlawk hlawk a, Sangzuala a thaw hawk a, Mimtei a hawihai thung.

Mimtei'n phone min pe a, Chhuankima message min lo thawn tawhho ka la dah ṭhat kha hmet chhuakin, "Kha en rawh, khatianga min ti chung pawh khan i thu hnial lovin ka nei che a, ka duhthlanna a ni bawk, keimah min huat vanga hetiang thil hi thleng a ni," tiin phone chu ka en tîr a. A chhiar vek hnuah, "Hospital kan chhuahsan hunah kan sawi ṭha ang," tih bâk eng mah zuk sawi lo a.

Khum mawngah inthlahrung dékin Mim-i a ding a, "Mimte, Námi ei tur kha lo siam la, tlem tal ei rawh se," tia a nau a biak chuan ka ter leh at. "Lungleia ka haw rem i tih hma chu eng mah ka ei dawn lo," ka lo ti deuh tlat.

"A harsa zawngin awm suh, i haw dawn chuang lo, nangmaha i ei dawn lo a nih chuan ka barh lui tho ang che, ka rilru hrehawmna ti belh chhah zawngin awm lul suh," tiin soup plate Mim-i ken lai chu a la a, min ei luih tîr a tum hmel khawp mai.

"Ei rawh le, dam vat vat i ngai a nia, damdawi ina awm reng i duh em ni, i nu leh pa thudik tak ka hrilh vek a, ka kianga i awm hian an thlâ a muang tih i hriat kha, kalsan tur che ni lovin i bula awm reng tura lo haw ka ni tih i theihnghilh ta em ni, ka nau chu ka nau a nih angin keiman ka ching fel ang," inring tâwk taka tiin, "Âng rawh le, i thinrimna dah ṭha la, kan naute tan i ei a ngai," dam thluama a tih leh chuan ka âng ve ta nge nge e.

Ninawm siah, ka hnial zîktluak thei lo hi ka inhuatna ber a ni. 

Vawi thum vel min barh hnuah keimahin ka ei ta a, Mimtei nui ru lai ka hmu reng, "Nang kha, min nuih suh," ka ti a, za zeta nui hak hak chung hian, "I nuihzatthlâk em a.." a la ti zui.

"Ngawi mai rawh.." ka tih chuan, "Yes boss," la nui reng chunga tiin Artui chhum a ken lai chu min khehsak a, "Ka duat teh reng che nen, min melh hlum dawn emaw ka ti hman tawh alawm," a ti a, ka nui ve tawp.

Rin aiin ka ei tam phian. Mimtei pawhin ina awm a peih loh vangin damdawi ina riah a tum ve a, a û in a phal lo. "In nghâktu nei lo a awm a ṭha lo, tun dinhmun atan phei chuan thil tih chi loh ber a ni, Bawihpuia sawm la, haw tawh rawh le, zanin bâk riah a ngai dawn chuang lo a, Kimkima te nupain an biak che emaw zawhna an zawh che pawhin eng mah chhâng suh ang che, kan inzawmna a tâwp tawh," a tih chuan makti zetin Sangzuala ka en a, min en duh miah lo lehnghal.

Nizan khan eng tin nge an intih zui tâk tih hriat ka châk leh hnuhnawh.

Mimtei chhuah hnuah Sangzuala ka zâwt ta a, "Nichina i sawi awmzia kha eng nge?" Tiin.

"Ka sawi ang kha a ni mai, ani nen inzawmna kan nei tawh lo, ama duh dan a ni a, Lungleia i haw pawh a ngai lo,  a chanvo tur ka tifel tawh a, thlakhat chhungin tuna an awmna saw an chhuahsan ang, i tân eng mah hlauh thawn tur a awm lo," a ti ta a.

"Khawiah nge an awm ang a?" Ka lo ti a.

"Masiami pain tukin khan min rawn ânkhum chiam a, an bul ṭanna tur leh an awmna tur ka ngaihtuah thei a tia lawm, a thisen zawmpui te aia a thlan zâwk te hnenah chuan han awm chhin phawt teh se, ka nupui natna thlentu chu tu pawh nise hrem lohvin a chhuak lo ang, phuba lâk erawh thil ṭha a ni lo a." A ti lawi si.

"Dik tak chuan ngaihdam hi harsa ka ti, eng ati nge min huat em em mai le aw, nizan khan ka thi dawn emaw ka ti tawh a nia," zawi sapin ka ti a.

"Chutiang sawi suh, ka tan i dam a ngai a, chu chu chunglamin min hriatpui bawk, Nám, nizan ka thinrim zia kha chu e, ka nau ka that lo kha Pathian hnenah lawm thu awm rawh se, ka rêk hlum lo chauh alawm," a tih chuan ka meng buai nasá.

"Eng a? I rêk a maw?" Tia ka zawh chuan, sam tuai puat chung hian, "Khatia a hnek hnu che khan a âwmah ṭhâmin bangah ka nawr bet a, ka rêk alawm, putea'n min pawt sawn lo se chuan ka rêk hlum mai thei, Masiami ṭap ri ka hria a, chu ti ni lo se tual that ka ni mai, Nám, eng nge tih sual ka neih a, hetiang thil kan chunga a thlen tâk mai le," záwi ruihin a ti ta a.

"A rualin nu leh pa ka chân a, harsa takin tun hi kan thleng a, ka patea'n eng lai mahin ka lakah ṭhat a chhuah ngai lova tunah Kimkima a ni leh zel hi chu hriat thiam har ka ti, Mimtei nen ka neih chhun in ni tawh asin," rilru nat hmel taka a tih leh chuan sawi ve tur pawh ka hre lo.

Amah ka khawngaih rualin ka hlauthawng ru ve tho bawk si, unau an ni a, tunah inrem lo mah se eng tikah emaw chuan an la inpawm leh tho ang; tuna kan awm hrang a nih chuan an unau kâr a ṭha mial thei bawk. 

"Hriatthiam a har a ni e, in unau kâr ti chhetu nih hi ka thil duh loh ber a ni a, kei ka awm loh chuan a zia mai thei asin, i unaupa duh zawng tak nei mai rawh, pasal lo ṭhen tawh ka ni a, tunah inṭhen leh pawh ni ila, ka tuar dam thei mai ang, nautê erawh hi chu ka kawl min phalsak thung la, inhau avanga inṭhen ni lovin kan vaia ṭhat tlânna zawk tur ngaihtuah a ngai a ni." Ka ti ve zel.

Ka sawi zo hman ṭâwk tihah, "Lalmuanpui, ka sawi zawng zawng kha i hre thiam lo em ni, nge, i beng a ngawng zawk?" Tia min melh runin nichina a mitmeng dam thlap kha hmuh tur a awm tawh lo. 

"Kan inṭhen avanga fel thei nise ka nei lui hauh lo ang che, nupuia ka neih dawn che khan ka nau rilru hi ka hre lo a ni rêng rêng lo, tupawh nupuiah nei ila a lawm chuang lo ang, nang i ni emaw atu apawh ni rawh se, a chhan chu kan unaua awm khâwm reng kha a duhthusam a ni a, thil theih a ni lo tih i hria ang chu. Lawmkimi kha lo nei ta pawh ni ila a ṭhiannu a ni tak nain rei an inngeih chuang lovang, ka nau hian min hmangaiha min hmangaih dan a dik lo, ani aia midang thlang zâwk anga min hriatna hi thil dik a ni lo hrim hrim, rilru puitling awm tê si hi avaia hrilhfiah zel ngai mai, â lutuk," a ti nek a. 

"Ni e, ka â... ka ât vang alawm duh lohna hmunah ka awma buaina ka tawh zel reng ni, â lo chu nei rawh, kal rawh..." ka ti ve hlak hlak a.

"Bengchheng viau zel suh, hospital a nih hi, sawi sawi mahila i luhlul si a, eng mah i hrethiam dawn chuang lo, muhil rawh," a ti leh hmuk.

"Ka mut a chhuak lo, i duh leh muhil la ti nia," ka lo ti a.

"Muthilhnain ka jection tir ang che, i râk peih lutuk em mai," a la ti zui.

"Liansangzual, han ti vaih teh, i châk lo ang.." cho âr a ka lo tih chuan, "I zia tawh a nih kha, nang nen te chuan eng pawh tih dun ka châk alawm, khawngkhar ka kalh nghal mai dawn asin," nui huk chungin a ti a, ka ngei lutuk.

"I â siah, sawtah sawn va mu rawh, a nih loh leh pawnah awm rawh," vin hlarin ka ti leh a, khum âwl lam ka kâwk vâ bawk. 

Ngaihdan nih loh hmel zet hian, "Ka nupui damlo awmpui tura awm ka ni a, pawnah tih tur ka nei lo, chuan, i lo zia tâk si-ah chuan khum hrana mut pawh ka tum lo, ka nupui bulah ka mu ang, ka mu ngei ngei ang," nghet charha tiin a nui vei suk a, rum deuhin ka'n melh teh ngawt a, engah mah a ngai lo mai nilovin a nui mai mai.

Zanriah tur Bawihpuia'n a rawn dah zuai a, rei awm lovin a lêt leh nghal. 

Ngawi rengin kan ei dun a, soup leh Artui ka lo ei bawk nen ka ei thei lo nai nai khawp mai. Ani erawh chuan tui tih hmel takin a ei a, a eikham fel hnuah min pawm nawlhin bathroom ah min luhpui a, "Lo inti fai la, i thawmhnaw thlâk rawh aw, hnáwmtàm rim i nam tlat," nui hawk chungin a ti a, a sawi awmzia ka hria, ka drip khaiah khan vitamin rimchhe zet an telh a, chumi a sawina chu a ni ngei ang. Tlêm a leak deuh a, ka kawrah a far a, keimah ka inhre rauh rauh.

"Rimchhia min tih leh ka bul hnaiah awm lo la a ni mai," ka ti hmak a.

"Ka awm duh miau avangin i inthlâkna tur ka va la alawm, luhlul i chhuah leh dawn chuan keiman i thawmhnaw kha ka phelh ang, ka châk zawng tak," ti lehin ka chhânna pawh nghak lo hian a chhuak vut. 

He pa hi chu a tih theih loh hulhual. Amah duh lo hrim hrim leh ngaithei lo chu ni ila rei deuh ka thinrim khum tur a nia, mahse, ka duh tho bawk si, ka thlahlel bawk, huis, ka va nêp thei tak.

A sawi ang tak takin ka inthlakna tur a hnuailam inbel tur nen lam a rawn keng vek a,   "Muangchang lo la, keiman ka lo ti zawk dawn em ni?" Tih pahin ka ke vûng pum ál chu a en a, ka chaw ei chhung khan ka lo khâikang rei deuh a nih hmel. 

"Ka ti ve thei alawm," tia ṭha taka ka chhan chuan, thlaruk chhungin ka duat phâk lohah i awm a, ka lo tih sak ang che," tiin ka hnial hman hmain ka kawr hâk lai min hlihsak nghal daih, bra ka hreng lo tih a hmuh chuan, "Phungpuinu hnute ang neih i duh loh chuan hei hi ha rawh," nui kur kur chunga tiin bra chu min hren tîr zui zat. Tisa in îtna lam a lang lo. Pafa kan ang zawk mah. 

"Nui tawh suh," a la nuih reng avangin ka ti nghat a, "I inlâk model ve theih teh reng nen tunah chuan..." a sawi zawh hmain, "Liansangzual, ka kham khawp mai che," tiin din sawn ka tum a, "Eng nge ka sawi tum i hria mi, nge i thinrim ngawt?" A la ti hram.

"I sawi tur ka hria, ka hre vek, kiri..." ner sak chungin ka ti a.

"Ka mitah nang aia mawi leh nalh an awm lo ka tih chuan dâwt ka sawi tihna; mahse, ka hmangaih che," ti supin min kuah hlu hlu a, ka ding khawng at. 

Ka inthlâk fel vek hnuah nurse a rawn lut a, jection neuh neuh leh damdawi ei tur min pe a, "U Sangzual, innu i riahpui dawn em ni?" Tiin a zawt a.

Ani lah chuan a zawhna pawh chhâng lo hian, "Zaninah damdawi ei tur emaw jection tih vel ngai ala awm em?" Tiin a zâwt lêt a, "Na dang a neih hran loh chuan awm tawh lo," tia nurse in a chhân veleh, "A ṭhat chu, ka riak dawn, kawngkhar chhunglamah kan kalh ang," zuk ti a. Ka lo zak ru chem chem.

Nui kar kar chungin, "Ê, kalh mawlh rawh, mamawh in neih leh min lo ko mai dawn nia," tiin min chhuahsan ta a.

"Khatia tih kher a ngai em ni, zahthlâk thei lutuk," ka lo ti a.

"Zak duh suh, nimin piahah ka lo haw ve chiah tih an hre veka min hriatthiam nák laia.." tia nuiin, "I bulah ka mu dawn ka tih kha, nizanah ka mu tawh lo bawk a, i nu leh pa kan biak zawhah kan mu dawn nia," thunei âwkâ zeta tiin a phone ah lai a phawrh zui zat a, ka nu nen an inbe ta a.

"Kha le, a be duh che, ṭap lo la.." a tih chuan, "I chhia, kal sawn rawh," tih pahin phone ka ban a, a nui suk ringawt.

Ka nuin ka ṭhat leh ṭhat loh min zawh bâkah Chhuankima chungchâng a rawn sawi a, Sangzuala a awm ve reng avangin eng vak mah ka sawi thui lo. Min lo hruai mai ula ka tih chuan a ngaihdan a ni lo nasa. 

"Keini aiin i pasal khan i tana ṭha tur leh i himna tur a ngaihtuah zawk, a thu awih la, i nau neih dawnah erawh chuan lokal ka tum ang," a ti daih. Ka pa nen rei vak lo kan inbe leh a, indim thiam turin min chah ve ngei.

"Lungleia kal tih vel kha chu i mumangah pawh hmu suh, i kal dawn chuang lo a nia, a rûka kal duhna thinlung te i lo put hlauh phei chuan theihnghilh hmiah ang che, ka thu awih lova i kal lui a nih chuan ngaihdamna a awm tawh lo ang," Sangzuala'n a ti hmiah. Sual siah.

Ka hnial buai vel peih tawh lo.

A sawi ang tak takin damdawi in khum chêp zetah kan mu ta a, ka dul a puar ve tawh bawk nen a saisir zankhua ṭhak. Min kuah rán a, "Ka nupui thinawrhi kuah chunga mut hi ka thil thlâkhlelh ber a ni," tiin  ka pum a chûl a, kan nautê pawhin a pa kut hria niawm takin a rawn che vei dat dat.

"Kha maw, a nu leh pa mu tlâng lai a hre khât lutuka láwmin a rawn chêt mai kha, thlaruk ka mu lo tih a hriat phei chuan ânu bulah hlir mu rawh, a ti ngei ngei ang," tiin a nui huk a, "I chimawm dan hi a satliah lo," tih bâk chhânna ka nei lo. Thinrim chu sawi loh, za zeta a nuih tawh hi chuan insûm a har, ka nui leh nge nge zel. 

He sipai pa zia hi chu a ngainat awm thlâwt a ni. 

Zankhuain a pangti lum nghengin ka mu ta a, ka thlâ a va muang si êm. Han thinrimin âng deuh buan buan mahila dam thlupa min chhân zel hi chuan thinrim reng theih a ni bîk lo. A nau laka ka lungawi lohna zawng zawng ka phawrh chhuak ta erawh ka thâwl phah hawk lawi si.

Ṭhat lohna dang em em ka nei  hran lo bawk a, doctor ward fan zawhah kan chhuak ve ta a, Mimtei a lokal lo, a û in-in chhuahsan lo tura thú a pêk vang a ni pakhat. 

"I zia deuh hunah Car kan la ve dawn nia, naute kan neih hma ngeiin, eng ang chi nge i duh?" Tia min zawh chuan sawi mai tur ka hre lo a.

"Pi Muanpuii te number neih dan ka lo zawng dawn nia, Hyundai company lamin ka mit a la deuh," a tih zawm leh a, "A to awm em mai," ka ti sap.

"To deuh te, tlâwm deuh te a awm ve ang chu, i scooty khalh saw ka châk fahran lo, hetiang hun atan hian alawm ka lo inkhâwl ve," a ti ta a.

"Car thar kan neih chuan i nau kan ngam lovang, min hmu mawh leh dawn e," ner náng chunga ka tih chuan, "Ani sawi theih a awm lo, ka hlawh a ni a, ka thawh chhuah a ni bawk," a ti nghut. Ka chhâng zawm lem lo.

In kan thleng a, step-a ka chho tur chiah chu, "I na der rei peih meuh lo a ni maw?" common room tukverh aṭanga Chhuankima'n a rawn tih chuan ka ding dat a, ka chhân ve hmain Sangzuala'n, "Ṭawngkam khat pawh i chhâk chhuak leh a nih chuan 'Mama' tia koh tur i nei tawh lo ang, Nám, hawh le.." tiin min pawm a, Chhuankima vawikhat pawh melh nawn tawh lovin step-ah min chhohpui ta a, kei erawh thinrim vangin ka sa vek.

A û chu a la hlau deuh a nih hmel, eng mah a sawi nawn tawh bîk lo.

Kha mihring hmel kha ka haw ngawih ngawih. Ka luak a ti chhuak.

Kan nupa room-ah min pawm lut a, "Ti khan lo awm lawk rawh, ani kha ka zuk be lawk ang e," tia kal a tum chuan a bânah ka lo vuan a, "Ngawihsan rawh, buaina ka duh rih lo, khawngaih takin," ka ti ta thlâwt a. 

Min en vang vang chunga thaw hawkin, "Ni rawh se, ani tel lova hlim tum ila kan nihlawh a ni mai," ti supin ka biangah a rawn tawk a, "I tân ka awm zel ang tih ka sawi kha theihnghilh tawh suh aw," tia ka khabeah dawmin min kuai dâk deuh a, a tih tur ka hria, dam leh duat taka min fawhna chuan ka thinrimna a bengdai sawng sawng.

Ka pasal Liansangzuala hi mipa a ni, mipaah pawh pa tak a ni a, a huna tlâwm hreh lo, hmangaihna leh ngaihdamna ngah tak mihring a ni bawk. 

B®®

B+>[BeckirafARenthleI]<+®®