21.NAOM[Mizo Love Story]-B®®

21.NAOM [Mizo Love Story]

Ziaktu: Becky Rafa Renthlei
B®®
Shadow of the life

Kan nupa room-ah min pawm lut a, "Ti khan lo awm lawk rawh, ani kha ka zuk be lawk ang e," tia kal a tum chuan a bânah ka lo vuan a, "Ngawihsan rawh, buaina ka duh rih lo, khawngaih takin," ka ti ta thlâwt a.

Min en vang vang chunga thaw hawkin, "Ni rawh se, ani tel lova hlim tum ila kan nihlawh a ni mai," ti supin ka biangah a rawn tawk a, "I tân ka awm zel ang tih ka sawi kha theihnghilh tawh suh aw," tia ka khabeah dawmin min kuai dâk deuh a, a tih tur ka hria, dam leh duat taka min fawhna chuan ka thinrimna a bengdai sawng sawng.

Ka pasal Liansangzuala hi mipa a ni, mipaah pawh pa tak a ni a, a huna tlâwm hreh lo, hmangaihna leh ngaihdamna ngah tak mihring a ni bawk.

B®® 200721

Damdawi in kan chhuahsan aṭangin ni a liam leh duak tawh, ka scooty tih loh lirthei kawl kan nei tawh si lo nen Sangzuala a phun leh hluk zel. Mahse, vawilehkhatah thil a tih theih rum rum bawk si lo lai hi a buaithlâk.

Mut hahdam kha ka hna a ni mai a, Mimtei a duty loh chuan amahin min awmpui ngar ngar a, a duty ni-ah Sangzuala'n min awmpui thung a; hlawhfa pahnih ruaiin kan in bang an plaster mêk a, a pui nitin ṭhin. Kei erawh inchhung dung takngialah pawh vei min phalsak lo tih theih a ni.

Lungleia haw ka sawi nawn leh ta lo. "Inṭhen hlen i duh chuan ka dah thla ang che, mahse, naute i kawl lo ang, a châwmna tur hlawh i nei lo a, a châwm thei zâwktu kutah a awm mai ang," a tih ṭumin ka páwr hle a, "Fa pakhat na na na chu ka chawm ve thei, min hmangaih vang nilovin fa i duh vang a nih kha," ka ti a, ka thinrim hle.

"Mi ka hmangaihna hi ka tilang thiam ve lo nge ka hmangaih te'n sual rawng an bâwl tlat hi mak ka ti, ka hmangaihna che hi i hriat fiah tak tak hunah tuna ka sawi kha a dik zia i la hre mai ang, fa nei lovin kum thum pasal i nei a, nangmahah hian risk ka la sâng hle tih hre mai rawh, a ni lo lo sawi chhuah chîng tawh ṭhak suh," a ti erh. A dik deuh roh bawk si.

Khatiang thila kan inhnial hnu aṭang khan phun nawi lovin ka ngawi ta hle hle a, kan inah pawh haw ila a nuam tak tak dawn chuang lo tih ka hresa vek. Mahse, Chhuankima vang zawkin ka duh loh pui pui ka sawi ṭeuh phah, Sangzuala nena inṭhen hlen ka ngaingam bîk teuh lo. Leh lawi si hian.

Ka pasal a ni a, a nupui ka ni, eng ang mi pawh nise pasala kan nei a nih chuan kan zah der thiam tur a ni a, a kip a káwiin an thu awih diak diak thei lo mahila tlâwm zâwk awm lovin nupa a inrem theih hek loh. Hei hi ka vawn reng a ngai, a nau vang tih lohah hi chuan inhnialna kan nei khât viau asin le.

Kimkima chan âi tur an ti fel tawh niawm tak a ni, thu leh awm miah lo turin a nu leh pain sum an dahsak kha hmun thumah ṭhenin Mimtei chan tur pawh a pe nghal a; mahse, a û kutah a pe lêt leh vek tho, "Nangman kawl rawh," a ti tlat. Inhnuai ber khu Mimtei hmingin a dah a, chu erawh amah Mim-i a hrilh rih lo thung.

"In lam lêt duhna thinlung te a pu ve ngai a nih chuan tuna an awmna in hi a hmingin ka dah ang a, tun atan erawh chuan ka hmingin a kal rih ang," tiin min hrilh thlap. A nau a hmangaihzia ka hre chiang leh zual, inrawlh pawh ka tum ve lo.

Damtea kan awm chuan thla tharah nau ka nei ve mai tawh dawn a, a ṭul zualpui kan inlei fel tawh a, Mimtei vekin engkim min tihsak. Tlanhlua nen an la inbe ve zela Kimkima chungchang pawh a hrilh vek a, "Ka nau chu nise ka talh ang," fiamthu deuhvin a lo ti a, Mimtei a lawm lo viau a ni ang, ni thum lai a be duh lo.

Chhuankima te nupa pawh kâr hmasa khan an in la chhuak a, inhnuaiah ka chhuk  ve ta lo, Sangzuala te unau an chhuk thung. Damdawi in kan chhuahsan ni bâk kha a hmel ka hmu nawn tawh lo a, Masiami nu leh pain Sangzuala an dem hle tih ka nuin min hrilh; an khawsa thei bawka an fanu senior-in pasal a hmu hi an lawm viau a ni ang, an tana insenso pawh an huam hle.

"He in chhungkhur bungrua leh engkim hi ka lei vek a ni a, i thawmhnaw leh nangma thil bîk tih loh chu engmah ken chhuah a rem lo ang, Laptop erawh kha chu i birthday present atana ka leisak che a ni a, i keng tel dawn nia," tiin Sangzuala'n a nau a hrilh a, engmah chuh buai lo leh buaina dang siam belh miah lovin an nupain an chhuak ta kha a ni a, khami zan khan Sangzuala a muhil lo reng reng.

Mi han ti hliau hliau chi ka ni lem lo nen hnem dan vak ka thiam lo a, ngawi rengin ka kuah tawp.

A tûk chawhma chhung khan inhnuaiah a inkhung a, eng nge a zuk tih ka hriatpui lo, Mimtei pawh a ṭap zankhua ṭhak a ni awm e, pakhat lekin suahsual rawng a bâwl a, midangin natna tawpkhâwk an tuar thung si. Nu leh pa ka la nei hi vannei ka inti thar hle bawk.

Sangzuala tana a nat dan tur ka chhut thiam pha ve a, ani erawh mipa a nih ang leh mi inthunun thei tak a nih zia a lang ka ti mai. Na hmel a pu duh lo a, a farnu leh a nupui hi hmel hlim lo min hmuh tîr hek lo; ka va chhuang si êm.

A rilrua a vei ber lirthei eng emaw tak lei tih kha a thupui ber a, pi Muanpuii a va phone ta nge nge e, ani hi police niin Lawngtlai khua a ni ṭhin a, tunah chuan a pension tawh avangin Aizawl lamah an pêm tawh. Sangzuala sawi dan hmangah Hyundai company manager nupui a ni awm e.

Lawngtlaiah road-show an nei dawn tih a rawn sawi a, an fapa Lawmsangzela leh a nau te lokal an tum tih a hrilh tel bawk; Aizawla kal kher lova tih fel theih a inbeisei avangin ka thaw a veng huai mai, a tih tawh lam ti tlut mai Liansangzuala hian a sawi peih ngar ngar ṭhin lutuka ka kham a nia, engmah ka hre thiam ve mang bawk si lo.

Pathianni a ni a, kei pawh mu bet reng lovin in chhungah ka tei ve sek a, "Nám, lokal teh, hei hi lo en teh u, Mimte, nang pawh," tiin Sangzuala'n min rawn ko a, sofa-ah ṭhuin uluk zet hian phone a bih a.

Car chi hrang hrang thlalâk leh price list a lo en kual chu niin. "Hemi chinah hian in duh ber thlang rawh u le," a ti ta a.

A man zât ka en a, to ka ti hlawm hle. Mimtei nen Sangzuala phone kan bih dun a, "Kan hrethiam lo, a leitu tur i ni a, ṭha i tih a piang kha a ni mai," kan ti tawp.

"In va nikhua lo e, a ráwngah te khan duhzawng in nei lo em ni, chhungkua kan ni a, kan duh tlan leh pawm tlan theih kha a ṭha, keima duh dan bik chauh ni lovin," a ti a, "A hmunah kan en thei dawn si lo a, a thlalâk min lo thawn ho aṭanga kan thlan mai a ngai dawn a, chuvangin uluk takin en rawh u, tunkâr tawpah an lokal dawn a nia," a ti leh a.

Rei ngial kan en hnuin kan sawi khâwm nak nak a, kan pathuma thutlûknain 'Venue 1.2 S VTVT' kan thlang fel ta a, a man pawh a tlem lo khawp mai. Mahse, Sangzuala'n 'Khawvelah kan kumhlun dawn lo a, kan lei ve tawp a nih loh chuan engtikah mah keini chhungkua hian lei tikni kan nei lo ang,' a ti hmiah. A pension-a a chhuahpui zât chiah ka hre lo a, a tlêm chhe lo ang tih pawh ka hria. Ṭûl a tih hunah min hrilh mai turah ka ngai.

"Scooty ka duh ve e, u Naomi ta hlir ka khalha ka inthlahrung," Mim-in a tih chuan, "Kha zawng zawng khalh tawh hnua inthlahrun thar leh te chu a, Tlanhlua pension hmain i khalh chhe hman lo tawp ang," nui rah rah chungin ka lo ti a, "Naa, Tlana te chu a uikawm awm em mai," a ti zauh a, Sangzuala'n, "U Tlan tiin ko rawh, kan in rual a nia," nui suk chungin a ti a, "A ṭhing em mai, in ü ṭut ṭut" Tia Mimtein a chhân chuan kan nui vek.

Tlanhlua hian Mimtei hi a âtchilh ti ila ka sawi sual lo ang, an kum a inthlau a, amah a zei hrawt hrawt vei nen awlsam tein a rilru a hneh vat a, an inhriat tirh ngaihtuah phei chuan hetiang em ema an in be tam hi thil awihawm pawh va ni suh. Mahse, an hunawl zawng zawng inbiak nan an hmang.

"Tlana hi ka ṭhianpa a ni a, i lakah rilru chhia a pu lo tih ka hriatpui bawk, mahse, mipa a ni a, fimkhur tluk a awm lo, inneih in duh pawhin nangni pahnih tal hi chuan Biak in hawng ve ula ka duh khawp mai, chu mi tur chuan i pawimawh hle a nia," tiin a nau a fuih a, a nachang ka hriat loh hi Sangzuala chuan a hre chat zel, keia fuih ai chuan a û zilhna a pawm zawk dawn tih ka hria. Kei min zah lo tihna ni lovin.

Nui kar kar chung hian, "I ṭhianpa i ṭan ve siah, zu in a sim loh chuan ka nei dawn chuang lo," Mimtei'n a ti ve tlat.

A hmain ka lo sawi tawh a, zu in mi pasal atana kan nei duh lo a nih chuan, inngaihzawn lai aṭanga sim tîr emaw a nih loh pawhin hnimhnaih loh tawp tur tih ka hrilh ve. Inneih hnua simtir tum hi chu a harsa, anmahniin tumna chhete tal an neih loh phei chuan thil buaithlâk a ni a,  Dingngheta aṭang khan ka inzir chhuak tawh.

Sitting room-ah rei fê ka ṭhu ve a, kan titi bawrh bawrh a, Kimkima chungchang vawikhat mah kan sawi tawh ngai lo, ani pawhin atu amah a rawn be ngai lo a ni ang, a unaute pawhin an be pawp bik lo chuan ka hria.

Chhun thingpui kan in zo fel tihah, "Nám, chawl hahdam tawh rawh le, duh aiin i ṭhu rei mah mah," tiin Sangzuala'n min pawt tho a, hnial tuma ka ân zuau laiin, "Min hnial lo la, Mimte, i duh chuan kan room-ah lo phei ve mai rawh, mahni chauha awm âi chuan," tia a nau melhin room lam min panpui a, ani lah chuan, "Rei lo tê ka chhuak lawk dawn, damdawi inah ka charger ka theihnghilh daih a, ka va la lawk ang e," tiin a room lam a pan a.

"Khawiah mah pêng kâwi lovin lo haw leh nghal rawh aw," tiin Sangzuala'n a au zui hram.

Khumah lukham nghengin ka ṭhu a, ani ka sirah bawkkhupin a mu a, "Rei lo te ka muhil lawk ang aw, nang pawh muthilh tum rawh, hahdam i mamawh kha," tih pahin a maimitchhing nghal daih.

Pa ṭawng tam a ni lo hrim hrim a, kei chuti bawk, fiamthu han thawh châng nei ve ṭhin bawk mah se Mimtei a awm loh chuan sawi tur kan ván thei viau zel.

Sangzuala muhil hmel ka en a, a nau vanga a rilru hahna min hrilh duh chiah lo nain a chhungril a hlim lo tih ka hre ru ve reng; sawi chhuaktu nih ka duh bîk si lo a, dik tak chuan Chhuankima ka huat zia hi chu pui tak a ni. Chu chu ani hian min hriatpui bawk.

Ka mut a chhuak ve mang si lova ka phone-ah games ka khêl ta daih a, Sangzuala whatsapp tone a ri reng a, ṭul táwpah lo chuan a phone ka khawih ngai lo tih theih a ni; ani pawhin min khawihsak bîk chuang lo, ka games khelh lai dahin lukham bula a phone dah chu ka en sak ta a, pattern ka hre vek tho.

Check sak ka tum vang pawh ni hran lovin a ri zing si a, amah a muhil tui bawk nen thil pawimawh a awm tâkah tia en ve mai mai ka ni.

"Naomi i neih chhung hi chuan engtikah mah ka hmel i hmu tawh lo ang, ani kha kan unau inkâr tichhetu a nih kha," tia Kimkima message ka chhiar chuan ka lawm lo ngawih ngawih. A dang pawh a tam lutuk, zan tin chuan inbe lo mah se a nau nen whatsapp lam aṭangin an inbe deuh ziah tih theih a ni! Ka chungchâng deuh hlir a la ni zui.

Lawmkimi nena an inbiakna pawh ka hmu nual, ngaih huat tur em em ka hmu hran lo a, ka chhiar chho zel a, Lucknow-a a awm lai te pawh khan vid call in vawi thum lai an inbia tih ka hre ta bawk, nizan hmasa lawkah pawh, "Rinawm taka nghâktu che ka awm tih theihnghilh suh aw," tih vel a ni nawk. Chhuankima pawh eng tih thu loh, Lawmkimi a la tel cheu a nia, ka thin a ur ngei mai.

An unau inbiakna leh Lawmkimi nena an inbiakna zawng zawng whatsapp aṭangin ka inthawn vek a, eng nge ka sawi ang? Ka thin a rim tet tet a, muhil tui hle lo se chuan ka âng hrep ang mawle.

Khum aṭanga tho chhuakin balcony lamah ka va ding a, ka tâwt up up.

Mimtei lo haw lai ka hmu reng a, engkim hrilh ṭhaa ka hriat vangin choka lam panin ka phei ta a, ani pawh a rawn lut ve chiah.

"Lokal lawk teh," tiin a bânah ka vuan a, a room lam ka panpui nghal.

"Ehe! I thin a rim em ni, i scooty ka tlûkpui miah lo a nia," a tih chuan, "Chutiang a ni lo, ka thinrim zia hi," tia thaw halhin khumah ka ṭhu a, "Mimte, i û hi ka ngei lutuk," tiin ka thinrimna ka hrilh ve ta vek a, thaw hak chung hian, "Engkim min hrilh duh avangin ka lawm e, hei vang hi alawm ka ngainat chea ka rin ngam nachhan che chu," ti hmasain ka phone a en a.

"I hnenah lo sawina tur ka nei hleinem ka chhungte hrilh kher tumna ka nei lo a nia, ka lung a âwi hlawl lo," zawi sapin ka ti a.

"Mama bulah i sawi tawh em?" Tia min zawh chuan ka sawi loh thu leh a muhil tih ka hrilh a, "Umn..Mama a dik lo a nih hi, Kimkima pawh a chhuah tîr tawh a, inbiak zui pawh thil ṭul a ni lo, khatianga a tih hnu phei che kha chuan biak châkna pakhat mah ka nei tawh lo a, amah pawhin min be hek lo, auMama nen an lo inbe ṭhin tih ka hre lo rêng rêng, i lamah ka ṭang tlat ang," a ti ta a.

"Lawmkimi pawh hi keiman ka va bia ang e, tunah ka va kal dawn em ni, nupui nei tawh a ni a, a rawn inrawlh pawh a ngai lo," ti lehin a ding uaih a.

"Kal lovang, i û thiam loh vek alawm, nupui nei lai a ni a, Lawmi ka huat zia pawh a hre renga chuti chung chuan a la be lui ngar ngar a, thil pawimawh sawi pawh nihlei lo, â.. inbiak fo kha a ṭha lo hrim hrim, vid call te pawhin vawi thum lai an inbiaa ka ngaihdan a ni miah lo a nia," ka ti leh bawrh bawrh.

"Ka hrethiam lutuk che, i duh tâwkin hau rawh, chumi hnuah ka lo hau ve leh ang, nge, kan be duh miah lo zawk dawn em ni?" A ti a, a û ni mah se a ṭan bîk ṭhak nang. Dâwt sawi ka ni lo a, an inbiakna whatsapp aṭanga ka inthawn kha ka chhiar tîr ve vek.

"Ka ngawi dawn teuh lo, rilru hrehawm rêng rênga pasal neih hi ka peih bík lo, ka hrehawmna zawng zawng min hriatpuitu i nih kha," ka tih chuan a bu nghat nghat a, "Nakinah Lawmi pawh hmaichhanah ka la bia ang," ka tih zawm leh.

"Tunah va kal ang hmiang, Mama pawh kan hau tho ang a, a muthilh lai sawn kal ang, ka hlau reng reng lo a nia, lokal rawh," a ti ta tut tut a, Lawmi te nen hian vengkhat kan ni a, an in awmna a hla lutuk lo, ralkhat aṭang bâkin ka la hmu bik lo.

"A chi loh, va kal chilh em em chu ni lo e, tun dinhmunah phei chuan thui deuh kea kal ka theih loh kha, i va â tak.." ka ti leh rih.

"A ni bawk si, keimahin ka va kal mai ang e," tih leh chhuah a rual a, "Hei, kal suh, va kal miah suh," ka tih lawm lawm pawhin a hre lo der tlat, chahbi dawhkana a dah chu banin a chhuak nghal daih. A va â thei tak. Thinrim viau mahila va kal chilh kher kha ṭul ka ti lem lo.

Kan room-ah túm burin ka lut a, Sangzuala a lo la muhil, hun dang chu nise a muhil thei hi ka lawmpui viau ang; mahse, tunah kher hi chuan kaih thawha chum hrep ka châk, ka muthilh hnu zan rei tak tak thleng a online ṭhin miau a, kei lahin ka hre der si lo. Ka chum harh tak tak dawn a mawni le. Chhe lutuk mai.

Mimtei a rawn lêt ta lawk si lo a, muangchangin eirawng ka bâwl a, eng tin tak va inchapchar ang maw. Rai lo ila chuan Lawmkimi te ang mai mai ka'n hlauh loh vei nen, ka thin a rim ṭha leh dawn. Chhuankima phei chu ngaihtuah pawh ka ngaihtuah peih lo.

Sangzuala inbual zo rawn chhuak chu en pawh ka en peih lo a, "Nám, khawiah nge Mimtei, eng ati nge i lo chêt ve vak?" Tiin ka dinna bulah a lo phei a, ka ngawi reng a, ka chhâng peih lo, ka be peih loh hi a ni tawp.

"Nám...ka biak che hi.." a ti leh a.

"Ka be peih lo che, min bia min be suh," ti nghatin ka hawi sawn daih.

"Lungawi lohna kan nei leh ta em ni? Ka muthilh dawn kha chuan min la be peih chiang a, ka muhil i hua te a nih ngawt loh chuan min biak peih lohna chhan tur ka hre lo," tiin ka darah a rawn vuan a, "Min khawih suh, min tawk hlek suh," ka ti vin hlar.

Chutih lai tak chuan Mimtei a rawn haw a, a tûm bur. A û nen min melh tawn zak zak hnuah, "Lokal teh, thil ka hrilh ang che," tiin a û ennawn tawh miah lo hian ka bânah a vuan a, "Ka hriat loh tur thil pawimawh eng nge sawi tur in neih Mimte?" Tiin a nau a zawt a.

"I hriat loh tur a ni mai, min be suh, ka be peih lo che," tia ner nángin, "U Naom, lokal rawh.." tia a sawi zawh rual chuan a room-ah kan inzui lut ta a, Sangzuala a hawhai hle. "Nang pawh chu.." ti hlukin Mimtei a en a, eng mah a sawi zui lo teh tlat.

"Lawmi nen kan inhau hrep, an inah tak chuan ka va lût lo a, ka ko chhuak alawm, Kimkima nen hian ruahmanna an nei a nih ka ring a, auMama pawh hrilh ila a number block se a ṭha a ni mai, saw nu zah loh dan em em saw chu aw.." thinrim taka tiin "Mama pawh a dik chuang lo, zaninah chaw ei laiin ka sawi ang," a ti leh nghat nghat a, ani pawh hi a ngaihdan a nih loh chuan a kawlh hrâ tho.

"Engmah ka sawi ve lo ang a, zanriah eikhamah i û chu hau ang che, ka ṭawng ve chuan nâ a ti lutuk palh ang e, biak châkna pawh ka nei rih lo," ka ti ve hmak.

Zanriah ei a hun tia Sangzuala'n min rawn koh tâk avangin Mimtei nen ngawi rengin chaw ei kan siam a, kan túm bûr.

"AuMam, chaw eikhamah ka be duh che," Mimtei a ti a, "Ti khan sawi mai la," a lo tih chuan, vin hlar chungin, "Tunah sawi ka tum lo, chaw eikhamah ka tih chu," a ti hmak. Kei erawh ka lung a awi loh êm avangin ka ngawi ngal a, chaw pawh tih tham ka ei lo. Sangzuala'n min en zauh zauh tih ka mitsîrin ka hmu ru reng.

Mimtei te unauin room lam an pan laiin thleng ka sil a, buaina tesep hian min va han tlâkbuak peih tak. Hun dang chu nise thinrimin Sangzuala kha ka ânkhum nek tur a nia; mahse, tun ṭum chu eng mah sawi chhuah châkna pawh ka nei lo reng reng, ka tâwt ru ṭûn a ni mai.

Pasal neih hi tih namai a ni lo a, pasalte inchhungkhur chanchin leh a rêl zawnga nu leh pa hnena thil sawi zung zung thil ṭha a ni bawk si lo. Nupa chu kan inhaua a hnu lawkah kan inrem leh mai ṭhin; chhungte bula lo sawi ve zuah zuah hian kan pasal te an hmu nikhua lo vek thei tih ka hriat vangin tuna ka lungawi lohna pawh ka nu leh u Sawmi takngial pawh ka hrilh ta lo.

Naute puan Mimtei sûk fai sa chu nâwt marin ka thlep ṭha zel bawk a, karleh lam chuan damdawi inah kan luh tawh ka ring. Fa neih te kha ka châk ve viau ṭhin kha a ni a, neuh neuh kan ngah tâk êm avang leh Kimkima vel vang khan ka hlauhthawn rûkna hian min kiansan thei tak tak lo. Keimah min tih nat tum lovin naute chungah pawh a ṭuan lovang tih sawi theih ninghal lo chuan. Sual ropui si.

Sangzuala a rawn lût a, "Ka laka i lungawi lo a nih chuan sawi mai ta che, Mimtei hnena zualko kher lovin.." nelawm vak lova tiin khum bulah a ding a, "Ka be peih lo che, sawi chhuah pawh ka peih lo," ka ti hmak.

"Eng kha nge huat tur awm, ka nau a ni a, a ṭul a nih chuan engtik hunah pawh ka be thei reng, ani pawhin min be thei bawk. Lawmi nena kan inkar pawh ka sawi chiang tâwk," a ti nghut a, ka thin a sa ve phat.

"A lo nih tak chu, i duh tâwkin an pahnih chuan va be rawh, ka sawisel phâk anni hleinem, mahse, hei hi i lo hre ve dawn nia, ka laka eng lai maha ṭha ngai lo leh min tih nat pawh hreh lo tute hi kei chuan ka en liam mai mai thei lovang, nupui nei lai i ni a, i bialnu hlui nena video call neih te kha a va ṭul awm ve, engtin pawh awm ila min sawisel suh ang che," thinrim ṭeuha ka tih chuan, "Naom," a ti nghut ringawt.

"Dingngheta nen kan inṭhen chhan ka sawi tawh kha, mipa rinawm lo hi ka hua, i duh phawt chuan Lawmi chu be zêl rawh, kei nen erawh kan inkâr a hla telh telh ang, Chhuankima chungchâng bikah chuan i sawi dik, i nau a ni a, i thisen zawm a ni bawk, i biain i ngaihsak theia ka dâl lo bawk che, kei nena kan inneih chhung chuan in unau inkâr a ṭha tawh ngai dawn lo tih a sawi chiang bawk a, a hmaa ka sawi tawh ang khan in unau inkâr tichhetu nih ai chuan ka inthiarfihlim zâwk ang e, ka tel lova in inrem leh theih phawt a hnu, chu tluka thil ṭha a awm lo.." ka ti leh hlak hlak a.

"Lalmuanpui, i ṭawng thui mah mah, ngawi tawh rawh.." a ti sup.

"Aw le," tiin, ka ngawi zui hmak, amah pawh en tawh chuang lo hian khumah ka lâwn a, a kianga mut pawh ka châk chhe te eih lo. Ka chhungril a na nget nget a, mahni inkhawngaihnain ka khat. In hniala inhau chiam pawh ka peih chuang lo.

Rei fê a ngawih hnuah, "Matea chungchangah hi chuan i inrawlh ka duh vak lo, eng ang pawhin sualin min kalsan mah se ka nau a ni tho tho a, khawvela ka unaupa neih chhun a ni," a ti hmuk a, ka chhâng lo.

"Puitling i ni tawha thil hrethiam rual i ni bawk, Lawmi nen kan inbia erawh ka thiam loh a ni," a ti leh sup ringawt. 

"I duh angin i awm thei, eng thilah mah ka sawisel tawh lo ang che, ka lungawi lohna leh lawm lohna pawh i nau ka hrilh tawh hek lo ang," dam thlapin ka ti ta a, "Chuan zanin aṭang hi chuan ka mutna ka sawn tawh bawk ang, thinlung inrem chuang lo a mut tlan reng a ṭulna ka hre lo," tih pahin ka tho chhuak a, "Lalmuanpui, ka thin tirim zawngin khawsa suh," a ti vin hlur.

"I thin ka tirim ni lovin ka thin i tirim zawk alawm, kan inneih zanah pawh chhuatah ka mut kha," ka ti ve zel si a, ngaihdan ni lo lutuk tih hriat zet hian min melh rum ul a, eng mah phei chu a sawi tawh bik lo.

Ka sin tur laa room ka chhuahsan lai pawhin a dinna ngaiah a la ding reng a, min dang lo teh tlat. Han phal lo na se chuan ka kawlh fia fia khawp ang. A dik lo zawk a la thinrim a nia, ve lutuk hian.

Mimtei room-ah ka lut a, phone a lo hman avangin ngawirengin ka chhuahsan leh ta a, room chuang dang awm tawh hek lo, Sangzuala nen pindan khata riah ai chuan sofa-ah ka mu zankhua ṭhak mai ang. Ka ṭah a chhuak ru et et.

Light off-in ka mu ta a, a la hma viau; mahse, tih tur dang awm miau hek lo.

Ka pum a puar lian tawh si a, ka mu nuam lem lo khawp mai, phone tak ngial pawh bih peih lovin ka maimitchhing lui ngar ngar a, Sangzuala âw ka hre phut. Ka phu nghal zawk bawk.

Mimtei a ko vin hlur a, a thinrim hmu fo ṭhin mahila hetiang em em hian a nau a la vin ngai lo. Eng thil nge maw ni le! Chutah sitting room light  a rawn on-a meng ṭha thei lovin ka khap sak sak.

Mimtei a rawn chhuak a, a ngaihna hre lo hmel a pu.

"Mimte, Lawmi eng tin nge i va tih a, tu thuin nge i kal?" A ti nghut a, ka rin loh lam daih a ni tlat, Lawmkimi'n Sangzuala a rawn hrilh a ni ngei ang.

"Keima thuin.." tia a nauin a chhân chuan, "Naom, Mimtei i tîr nge tîr lo?" Tiin min melh run a, ka ngawi reng. Ka tirh a ni lo tih sawi kher ka tum lo a, mahse, ka thinrimna ka hrilh avangin keimah vanga kal a ni lawi si.

Thinrim tih hriat ngawih ngawih hian, "Mimte, kan nupa inkâr buainaah inrawlh tum tawh suh ang che, i ching fel vek thei a nih loh chuan, mahni mawng hlîm inni tih inhre rawh u, Lawmi va zawh fiaha ṭawngkam mawi lo va hman khum kher tur pawh a ni lo. Naom, nang pawh, midang hmanruaah hmang tawh lo bawk la, a ṭha lamah inthu rual ni ula ka hnial lo, inngeih leh inhmangaih takin awm ula tih hi ka duh ber a ni a, thil ṭha lo ti turin inthurual tawh suh ang che u.." a ti nek.

"AuMam,..." Mimtei'n a ti sap a.

"Ka sawi kha hre reng ang che, i room-ah kal rawh," a ti nghut.

Min rawn melh zauh a, "U Naom, muttui aw.." a la ti ve hrâm, dam thlapin ka lo mangṭha ve a, Sangzuala chhuat laiah a ding ngur a, "Kha laiah va mut mualpho pawh a ngai lo, min rawn zui rawh," a ti leh hmuk a.

"A teuh lo," ka lo ti hlar.

"Min hnial ṭâwng ṭâwng lo khan lokal ang che, ka sawi nawn tawh dawn lo a nia," khauh fura tiin kan room lam a pan vut a, ka che eih lo thung.

Light ka off a, ka mutna ngaiah bawk ka mu lui leh ngat. Lawmkimi a han ṭan zia te kha, tenawm lutuk mai. Mimtei ka khawngaih letling zawk, a û in thinrimin a vin khât viau si a, a rilru a na ngawtin ka ring.

Dârkâr chanve vel ka mu leh tawh ang tihah Liansangzuala a rawn phei leh a, eng sawi set set lo hian min pawm nawlh; "Nupa chu khum khatah mut tur," a ti zawi ruih.

"Liansangzual..." tih pahin ka kêk nawk nawk a, eng danga min chhâng lovin, "Ka hmingpum hi chu a mawi a nia," a ti duh lek.

Kan khumah dimtein min nghat a, "Eng mah sawi tawh suh ang che, muthilh tum rawh," tiin khumah a rawn lâwn a, a kil lamah ka tawlh vei ngial. Nui huk chung hian, "Chhim tawpah pawh tawlh la, ka hnaih zel tho ang che," tiin a bân sei thlurh chu a rawn phar phei a, "Min dek hlek suh," ka lo ti ṭhat.

"Ka nupui i ni miau a, dei dei ti reng suh," a sawi zo chiah tihah ka pum a rawn chûl a, a kut ka vai sawnsak hmak. Phun hluk chung hian, "Naom, ka dawh theihna che a bo hma hian muhil rawh," tiin a tawlh sawn nghal a, khum sîr te-ah tawlh pheiin puan pawh sin lo hian a va mu ta a, ka lawm thu tak a ni.

Rilru thuhmun pu lova khum khata mut hi thil nuam pawh va ni suh.

A tûk khua a var a, kan boruak han nawm loh zia mai chu(h).

Tûkṭhuan ngawi rengin kan kil a, atu amah ṭawng tum kan awm lo, Mimtei'n a duty tur thu min hrilh a, a û phei chu awm ve lo ang hmiaha ngaiin a melh chhin lo hrim hrim.

Sangzuala a ngawi ngul a, chaw ei khamah a kalna tur pawh sawi lovin a chhuak nulh a, Mimtei a kal tawh bawk si, keimah chauhvin in chhungah ka tei rak rak a, u Sawmi nen rei lote kan inbiak hnuah ka nu nen kan inbe leh a, u Chhanhima nupui u Diki naupai thu leh incheck up turin an kal tih a rawn sawi a, "I nau neih a hnai tawh si a, kar leh lamah lokal hram ka tum dawn nia," a rawn ti a.

U Diki râi no a thinchhiat thu te nui hak hak chungin a sawi a, a rai thu an lo sawi lang lawk lo a ni awm e, tunah thlathumna tur a ni ve tawh a, ka nu te'n an hre ve chauh. Anni nupa hi chu style hran nei kha an ni ve a, an ngawih san ta vel mai mai.

Dingngheta pawhin a fa neihna nu kha neih a tum tih a sawi tel bawk a, a hun leh ni erawh a hre lo. Chhe tê mahin ka rilru zuk na eih lo a; ka thinlungin a thlah fel tawh hi chu a heti tlat zel.

Kimkima te chanchin a hriat leh hriat loh ka zawt a, "Inpain a sawi lo em ni, helamah an awm reng reng lo, Lawngtlaiah tho alawm an indan, a puzawnin in luah tur a zawnsak a, inpa leh Mimtei pawhin an hriat reng kha," a tih chuan mak ka ti ngawih ngawih.

Ka nu nen kan inbiak zawh hnuah balcony lamah ka chhuak phei a, ka lo rin dan chuan Lunglei lamah an awm anga Masiami nu leh pain an pui ni turah ka lo ngai ve ringawt. Lawngtlaiah tho an lo awm reng si a, Mimtei tak ngial pawhin eng mah min hrilh miah lo hi mak ka ti lo thei lo. Amah Sangzuala tak chuan sawi lang lo mah se ka la hrethiam thei deuh. Â.. chu pawh thil dik a ni chuang lo.

Ka hriat lohvin an intlawh pawh ru reng lovang tih tunge sawi thei. Tunah pawh hian ava kal a ni mahna. Zêp chin zawng an nei a ni! Damdawi in ka chhuahsan hnu lawka in la chhuak an ni a, khami ni khan ka chhuk ve lo, an unauvin Kimkima te inah an kal thla kha a ni a, ka hriat lohvin rem an ruat te pawh a ni maithei. Thil awm dan hi a mak tulh tulh, va ngaihven suh se ka tihna lam ni lovin Lungleia awm anga min rin tîr hi a chhan ka hrethiam lo.

Ni e, Chhuankima'n min hrilh chian tawh êm kha. "Keini chu unau thisen zawm kan ni, nang erawh chu mihrang i ni" tiin. Ka la theihnghilh lo hrim hrim.

Ni a ral a, ka boruak hipin hmâ a sawn lo. Sangzuala te unau an inbe leh bawrh bawrh tawh a, kei erawh ṭúl tawpah lo chuan ka ṭawng meuh lo. Kan nupa khum aṭangin ka insawn ta êm lova mahse, kan inbe ngai lo tih theih a ni.

Car thar lâk ni a lo thlen pawhin an unauin an kal a, "Nang chu lokal ve lo mai rawh aw, pawn chhuah loh a him," tih chiah Sangzuala'n a sawi. A pawi pawh ka ti lem lo.

Mimtei'n min biak a tum apiangin ka pehhêl zel a, ani pawh hi a û naute a ni a, kan nupa inkâr thu hrilh tumna ka nei tawh bîk lo, keiin engkim ka hrilh a, min ṭan ṭhin bawk; Kimkima awmna an zêp tih ka hriat aṭang khan ka biak thâ a tho tawh lo va, ka haw ta viau tihna pawh a ni chuang lo.

Dâr hnih velah Sangzuala'n min rawn call a, "Kan lo haw hma lutuk lo ang, i peih leh ei rawng lo bawl la, i peih loh chuan kan lo haw hunah a ni mai," a ti a, "Aw le," tiin phone ka off nghal daih.

Thil hahthlâk lutuk leh ritsak a nih lem loh chuan muangchângin ka che lui ve tho a, mut reng theih ni bik hek suh, ka indim ve viau chuan ka hria.

Doorbell a ri a, inlêng kan neih khât teh reng nen mak ka ti deuh. Dar thum a pel tawh a, putea te chhung leh ṭhenawm hnai bak an lo chuangkai ngai meuh lo.

Kawngkhar ka va hawng a, Masiami nen kan inmelh ta ran a!

"Naom, ka lo lût lawk thei ang em?" A ti a.

A lo luh theih nan ka pen sawn a, ngawi rengin inchhung a melh kual a, chutah min rawn enin, "Mak i ti viau lo maw, ka lokal thut si a," tiin a nui lui hak.

"Sangzuala i be duh a nih chuan a awm lo, Mimtei pawh.." ka ti sap a.

"Ka hria alawm, kan inah an awm, chuvang a nia ka lokal, dawr aṭangin ka rawn tlang tawp a, rei ka awm hman lo," tiin min thlêk vang vang a.

"A va pawimawh awm ve, eng thil nge ni ta?" ka lo ti a.

"Sangzuala i ring tâwk viau pawh a ni ang, Mimtei pawh chuti tho, a nau nen an inbe pawpin kan inah pawh an rawn kal fo tih i lo hre dawn nia, i huat thu rawn sawi tum ka ni lo a, eng mah i hre ve lo tih vawiinah ka hre chiah. Lawngtlaia kan awm thu pawh an hrilh lo che a ni lawm ni? Rilru nei ang che, ka huat vang che a sawi ka ni lo a nia, rilru i lo neih thiam theih nan hrilh ve hrim che hi ka bat a ni, kan monu hlui i lo ni tawh bawk a..." ngeiawm lek leka tiin a ner zui sak a.

"Unau inngeih taka awm hi a ṭha ber alawm, an duh phawt chuan intlawh pawh rawh se, keia lo sawi ve tur a awm lo," tiin dam thlap hian ka chhâng a.

"Tlanhlua leh Kimkima pawh an la inbe reng a nia, nang tih loh chu kan inrem vek," tiin a nui lui sâwng a, ka va ngei tak.

"A ṭhat hlauh chu, nangni tiam lovin keini pawh kan inrem alawm, an lo haw hmain haw ta mai che, Sangzuala'n i lokal tih a hriat i duh awm si lova," ka ti ve ngat.

"I mâwl leh ât man i seng hun tur ka hmu châk khawp mai," tia tho chhuakin intivei zet hian a chhuak ta a, ka thaw huai huai. A perfume rim tak zet te khan ka luak a ti chhuak zawk.

Sangzuala te lo haw tlai chhan chu Kimkima te ina an kal vang. Ṭha takin thil awm dan min hrilh mai se ka hau dawn tawp si lo a, a rûka han kal kher, Mimtei pawh ka dem.

Zanriah ei hunah pawh an rawn haw ta si lova min lo call nawn tawh hek lo, ka call duh bik ṭhak náng. Chaw ka eisan hmiah, Masiami sawi ang khan kei tih loh chu an inrem leh vek tawh; an inrem lohna thlentu-a an ngaih 'Naom Lalmuanpuii' dawhtheihna hian a tlin rei bik hauh lo ang. Inṭhen hi thil ṭha a ni lo va, pasal vawihnih ṭhen nih leh lek phei chu thil zahthlâk tak tur a ni. Rilru ka neih a ngai a, fahrah nun tem ve lo tura ka fa siam turin rilru paukhauh put ka mamawh zawk.

Thihna avanga inṭhen hi chu kan sawi theih a ni lo a, kan thu a ni hek lo. Chuti tih lovah chuan fahrah siam loh ka tum nghet ta bur; zaidam viau leh tlâwm zâwka ṭan rengin thil ṭha a thlen chuan si loh chuan nawr luih theih miah loh tura rilru sak leh nghawhngawl put mai tur. Hmangaihtu dik hriat theihna hmanrua te pawh a lo ni mial maithei asin.

Zân dar sarih a ri a, anni unau pawh an lo haw a, "U Naom, keimahni pualin car kan nei ve ta," tiin Mimtei a nui var var a, eng danga chhang lo hian, "Chaw ka ei tawha in duh leh ei ve nghal rawh u," tia inherin kan room lam ka pan nghauh.

"Nám, lokal rih teh, car thar chu i en ve duh em?" Sangzuala'n a ti a, a âw a dam thluam.

"Enna khua a la tlai hleinem, a tlân bo bîk nang," nui lui hak chunga tiin kan room-ah lutin kawngkhar ka khar ri bur.

Ka lût fel deuh chiah tihah Sangzuala a rawn lang ve nghal zat a, nghet zeta ka dara vuan chung hian, "I awm dan a mawi lo ṭhin hle mai," a ti nghut.

"Awm dan mawi zir ṭhat leh ka lo tum dawn nia, nang pawhin BA mâwl min tih fo kha," thinrim duh miah lova ka tih chuan, "Eng nge i hriat a, ni nga chhung i titau tawha ka en liam zel che beisei suh," tih pahin min vuan nghet sawt.

"Min en liam tih ka lo hre hleinem, car thar i neih vanga lo hlim viau tur ka ni em ni?" Ka tih leh chuan, "Naom, ṭawng fimkhur rawh," a ti chang fak.

Ka thinrimna ka âu chhuahpui hluai dawn nge ka ngawi leh rih zawk dawn. "Chaw va ei rawh u," ka ti ta zâwk a.

"Thil pawimawh sawi tur ka nei a, bibo daih zel suh, lokal rawh," thu pe áw zeta a ṭawng chu ka ngaithei leh pek lo. "A pawimawh viau te chuan lo haw hma tur alawm, mut hahdam ka duh a nia, va kal tawh rawh.." tia pên sawn ka tum chuan, "Inhau reng hi a ninawm a nia," tiin ka banrêkah a man a, choka lam min panpui hmak.

Mimtei'n chaw ei a siam a, nuam ti lo hmêl a pu. Ni e, zêp rûk an ngah lutuka inthiam lo tur chu an ni, Sangzuala erawh a hmelah eng mah a lang ve lo va; mi inthunun thei tak a ni miau a, keini lungawi lo ve te chu kan hmelah a lang nghal vek zel. Tumahin an hai ngai hek lo, hei hi kan inan lohna pakhat a ni.

"He laiah hian ṭhu ve mai rawh," tia chair pawt chhuakin an chaw eina bulah min ṭhut tîr deuh kher.

"Chhungkua, nupa, u leh nau pawh inngeih reng a har a, intihthiam loh châng a awm fo ṭhin, kei pawh ka dik vek bik chuang lo a, kan insiam ṭhat vek a ngai, tih bîk ka nei lo a nia, he tia hmelhriat loh ang maia inbiakloh, tihtauh tih vel boruak hi awm tawh suh se," Sangzuala'n a tih chuan ka ter nghal at.

"Zêp neih ṭhim ṭhem hi chuan inrem a har, Kimkima te nupa Lawngtlaiah an awm tih pawh min hrilh duh lo a, in kal fo ṭhin tih pawh ka hria a nia, ka laka zêp inneih chhung hi chuan engtikah mah a inrem theih tak tak lovang," thinrim sen awp awp chunga tiin ka ding hliai a.

"Nangni chu unau in ni, kei chu mihrang ka ni," ti leh nghatin ka ṭhutna chair ka nawr sawn a, pên khat chiah ka pên hman tihah, Sangzuala'n, "Naom," ti nghut chungin a rawn ding chhuak ve nghal. "I bula thil sawi a har sâwt hle mai, ṭhu leh rawh," tih pah hian min pawt sawk a, ka lo inring hman si lo, ka ke chhep sualin chhuatah ka ṭhu thla hnawk.

"U Naom..." Mimtei hlauthâwng âw ka hriat chuan thawh chhuah ka tum a, Sangzuala zawk a rawn ṭhu hniam vat a, min pawm tho ta a, "A na em, i insawh na em?" a ti zung zung a, ka ngawi ngal.

"Ei chhunzawm rawh u," tiin ka pum dawm chung hian kan room lam ka pan a, an unauin min en reng ringawt.

Khumah ka ṭhu vang vang a, ka lungphu a la pangngai hleithei lo, ka pum a rawn che dat dat a, a na riai riai bawk. Pumna satliah ang deuh niin ka hria, saisira muin ka pum ka chûl hauh hauh a, ka insawh khaw lo êm lovang chu.

Ka lu-ah tu emawni hian min sawi nawk nawk a, "Nám, harh teh, nâ i nei em ni?" Sangzuala aw a ni. Ka pum a na ṭawlh ṭawlh a, ka thaw a sa phat phat.

"Ka pum.." ka ti sap a.

Kan chhut danin ka nau neih nan kâr thum vel ala awm a, karlehah damdawi ina lut tur ka ni. Ka ngaihtuah nghal zung zung a, thil dik lo a awm zâwk em ni? Nichina ka tlukna kha.

Rang taka Sangzuala tho chhuakin Mimtei a ko nghal a,  "Damdawi inah kal ang u, Mama, u Naomi pawm thla la, thil ṭul zual ken tur ka lo siam ang," Mimtei'n a ti zung zung a, ṭawng pawh ka ṭawng peih lo.

Tawrh hrehawm khawpa nâ chu a ni lo a, a nat dan ka sawi thiam chiah lo zawk.

"Pathian zarah eng êm i ti lovang, hlauthawng suh aw, i bulah ka awm tlat dawn alawm.." tiin zo zetin min pawm a, inhnuai lamah min chhukpui ta a, thinrim hmel a pu lo a, ka tum aia hmain car thar pawh ka hmu dawn ta si.

Damdawi in kan pan laiin Mimtei'n min chelh rán a, "Hlauthawng miah suh aw," a ti ve bawk.

Ni e, Pathian zarah eng êm ka ti lo turah ngai ang, ka pum erawh a na sâwt viau a, ka thlan fim a tla bat bat.

Sangzuala'n front mirror aṭangin min rawn melh leh zauh zauh ṭhin a, "Nám, kan thleng ṭep.." a ti sup ringawt.

Damdawi in kawt kan thleng ṭep tihah Mimtei phone a ri a, a chhâng nghal bawk.

"Eng a! Eng tin maw?" Phone a thlauh nghal tawp.

Sangzuala'n "Mimte, eng thil nge, tunge rawn bia che?" tia a zawh chuan, hlauthawng âw khur dat dat chung hian, "Ih..AuMam, Kimkima zurui tukverh aṭangin a tla..." a ti ta a.

Damdawi in kawt kan thleng ve chiah bawk.

B®®
B+>[BeckirafARenthleI]<+®®