22.NAOM[Mizo Love Story]-B®®

22.NAOM [Mizo Love Story]

Ziaktu: Becky Rafa Renthlei

B®®

Shadow of the life

Damdawi in kawt kan thleng ṭep tihah Mimtei phone a ri a, a chhâng nghal bawk.

"Eng a! Eng tin maw?" Phone a thlauh nghal tawp. 

Sangzuala'n "Mimte, eng thil nge, tunge rawn bia che?" tia a zawh chuan, hlauthawng âw khur dat dat chung hian, "Ih..AuMam, Kimkima zurui tukverh aṭangin a tla..." a ti ta a.

Damdawi in kawt kan thleng ve chiah bawk.

B®® 230721

Mimtei'n min rawn en a, ani leh ni lo angin thlaphang hmel a pu, ka pum a nat êm avangin eng mah ka sawi ve lo; "AuMam, eng tin nge ni ang? U Naomi hi ka lo awmpui ang a, nangmah zawk i va kal mai dawn em ni? Helaiah chuan mipa aiin hmeichhia kan ṭangkai zâwk dawn a," a ti a.

Chhâng lovin Sangzuala a ngawi ngul a, car kawngkhar hawngin a chhuak vut. Ka ṭhutna lam kawngkhar a pawt hawng a, "Nám, hawh le.." ti supin dimtê hian min pawm chhuak ta a, Mimtei'n min rawn zui bawk.

"AuMam, Kimkima chu eng tin nge kan tih dawn?" Thaw hlap hlap chung hian a ti leh a. A chhâng duh ṭhak náng. Eng chu hria nimaw!

Nurse-in min lo dawngsawngin min buaipui nghal a, doctor-an ko nghal bawk, Sangzuala enin, "I nau chu va buaipui rawh, kei chu ngaihtuah ka ngai lo a nia, in unauvin va kal rawh u," zawi sap hian ka ti ta a.

"Ni lo e, i dinhmun a ṭha nge ṭha lo tih ka hriat hma chuan khawiah mah kalsawn ka tum lo a nia, ka nau chuan amah buaipuitu tur nupui a nei tawh alawm, keiin ka nupui ka buaipui ang" a ti hmiah.

"Mahse..." Mimtei'n a lo ti a.

"I duh chuan taxi hmang la, va buaipui rawh le, Námi ka lo awmpui ang, a na viaua ngaihtuahawm a nih pawhin helai damdawi in tho hi an rawn pan tur a ni a, nurse i nih angin kei ai chuan accident chu i buaipui thiam zawk turah ka ngai," a nau hnenah a ti a.

"U Naom, min hrethiam rawh aw, ka û a ni tlat si a, ka kal mai ang," tiin a thil khai bawr ṭeuh chu chhuatah a nghat sawk sawk a, a chhuak ta a.

Doctor-in min check uluk hle, Sangzuala'n pawn lamah min nghâk a, ka thlâ a muang huai huai.

Ultrasound-a en nghal tur ka ni a, pawnlamah thi pût leh na dang ka nei hran lo, ka pum a na riai riai reng a; 'nau i vei lo' min ti bawk si. Nau vei awm dan pawh ka hriat si loh.

Minute 45 a liam meuh chuan ka chhûlah thi tlem a tling tih hriat chhuah a ni a, emergency-a zai nghal tur ka ni bawk. Naute pawh tun dinhmunah chuan a ṭha a, kei pawh nikhaw hre lo leh tawrh zawh loh khawpa na nei ka la ni bîk lo. Ka nau neih nan kâr thum lai la awm mah se zai ngei ka ngai dawn tih an confirm tawha an muangchâng eih lo. A chhan chu ka vei hun nghâk leh turin risk an la ngam lo niawm tak a ni. Nau a rit tawh si a, zai mai kha thil finthlâk a ni tiin an sawi bawk.

Nachhawknain min jection a, "Hlauthawng suh aw, kan inbuatsaih chhungin inpa kan lo luh tîr zawk dawn nia, kan ngam dawn lo tlat," nurse-in damdiai hian a ti a. A nui deuhin ka hria.

Sangzuala rawn lût chu ka lo en reng a, a pawr fap mai. Ka mutna khum bulah a rawn ṭhu a, drip an khai lohna lam ka kut vuanin, "Nám, ka thiam loh vek a ni," zawi supin a ti a. Ka khawngaih lutuk.

"Engmah inthiam lohna tur a awm lo, tihpalh te chu a awm thei alawm, mahse, zai ka ngai dawn ta si a, ka lo harh chhuah loh tâkah naute hi a dam a nih phawt chuan ṭha takin lo enkawl rawh aw," tiin chil ka lem khalh a.

"Ni lo, chutiang sawi suh, ka ngaithla duh lo," tia ka kut la kangin a hmui a sîk tîr a, "I awm ve lohna hmuna awm ka duh lo, chuti ni lo se Lucknow ka chhuahsan náng," hniam ruiha tiin min en vang vang a, "Fahrah kan ni a, fahrah dang siam belh hi chunglamin a rem ti miah lo ang, Nám, chhel takin aw, sipai nupui i nih kha," tiin a kiai suk.

"Kimkima kha.." ka lo ti a.

"Ani chu ngaihtuah duh suh, ka hmangaiha a nat ka phal lo; mahse, kan hlutna a hriat theih nan hun harsa a paltlang ve a ngai," a ti ṭha mai. Thil dang ka zawt ta lo. 

Nurse-in chhuah a hun tih a rawn sawi a, ka chalah rawn fâwpin, "Ka tân leh kan fa tan chhel taka i awm a ngai tih theihnghilh suh aw," a ti a. Kan hun paltlang tur hi a huphurh hle tih a hmelah a lang a, ka chhiar thiam ve.

Sangzuala'n ka chhungte chanchin a hrilh tawh turah ka ngai a, nichin khan ka zawt miah lo. A bengvara a hrilh hre turah ngai ang. 

Khatia mawng sawh dawta ka tlûkna chhan kha Sangzuala mawhpuh ngawt theih a ni bik lo a, keimah ka dik lo zâwk mah; ka thinrimna chu eng thil pawh nise naupai lai ka nih angin indim tur ka ni a, ka fimkhur tâwk loh vang a ni pakhat. Kan pahnihin kan thiam lo ve ve tih ka pawm thlap.

Theatre pana min nawr phei laiin Sangzuala a kal ve zel a, min nawr luh dawnah meuh chuan, "Nám..." tih bâk a sawi lo. A mit hnâwng chap pawh ka hmuh hmaih hek lo, 'a unaupa aiin min thlâng zâwk' ti ta ila ṭawng mawi lo tak a ni ang. Mahse, hun harsa tawp tawng ve ve si-ah chuan min hmangaihna thûkzia ka hrechhuak chiang hle.

Nikhua hre loin awm ta ila, Sangzuala rilru puthmang dik tak ka hre thei dawn si lo a, tunah chuan rilru dam thlapin ka awm thei ta. 

Inzaina dawhkana ka mut laiin rilru ṭawngṭaina ka nei a, thi mai tura inngaihna ka nei bawk, nurse pakhat a ṭawngṭai a, min zaitu tur doctor mitmeng dam thlap ka hmuh chuan ka thla a muang huai huai.

Ka ke a mu churh churh a, ka dang a ro huam bawk, chêt ka tuma a sak ṭalh. Zâwi muangin ka meng chhuak ta a, ni e, min zai tak alawm le, ka thi lo chu a ni phawt mai. Ka ke tih chêt ka tum leh a, ka thei teuh lo, lukham ka kham lo a ni ngei ang, ka ke lam ka hmu pha miah lo a; ka nautê kha, Sangzuala pawh khawiah nge?

Thâwm ka nei deuh a ni ngei ang, khum mawng lama min hnungchhawn zawnga ding ka pasal chu a rawn inher a, dam thlapin min en a, "Naom," zawi supa tiin khum lu lam a rawn pan a, a mitin hmundang a en lo, keimah chiah min en.

"Khawiah nge nautê, a ṭha em, mipa nge hmeichhia?" Zawi tein ka zâwt a.

Ka biangah dawmin hnai zetah a rawn kun a, "Kan fanu chu a ṭha e, a nu anga hmelṭha leh duhawm a ni bawk, nakinah i en ve dawn nia, Nám, ka lawm e, ka sawi duah thiam lo," nui suka a tih chuan lawm avangin mit ka chhing sawk a, mahse, kim lo ka la nei. 

"Sangzual, eng lo, ka ke hi khawiah nge?" tia ka zawh chuan nui huk chung hian, "A awm ang chu, an tan lai ka hre lo a, an lo nawr chhuah lai che pawhin ke pahnih i la nei chiang," nui huk chunga tiin ka puansin a keu a, "A la awm reng, Nám, i harh chiang maw, i ṭha em?" Min ngaihtuah tih hriat zetin a ti leh hnuhnawh a, ka ṭhat thu ka sawi a, "Duty ka'n ko lawk ang e," tiin a chhuak zui ta bawk.

Fanu ka nei a nih chu, Sangzuala hlim hmel ka hmuh khan eng mah a ṭha lo lam a thleng lo tih ka hrethiam ve mai. Ka fanu ka va hmu châk si êm. Mahse, Kimkima kha eng tin nge ni ve ta.

Ka harh aṭangin dârkâr nga vel a liam tawh a, ka khum bula mu ka fanu muhil hmel chu ka en ning thei lo, a dik tak chuan naute pianghlim hmelṭha tih ka nei ngai lo, ka fanu pawh hi 'a hmelṭha' tia sawi vul chûk chi ninghal lo chuan. A ngo em em a, a sam a tam phian, ka rila rah ka fa hmel hmu theia ka la dam hi ka lawm a ni mai. 

Ka nu lokal tura ka beisei kha a lokal thei dawn lo tih ka hriat chuan ka hnual vek. Ka pa a dam ṭhat loh bâkah u Diki a nuamsam bik si lo a, chêt chhâwktu awm ta lo ta chu rawn zin ngaihna a awm ta rih lo a ni awm e. Mimtei a lo la lang ve miah lo a, Kimkima chungchâng pawh Sangzuala'n eng mah min hrilh bîk lo a, a ṭha turah ka ngai.

Pitei leh Sangzuala an lo lût a, "Nám, inbual tura haw ve lawk ka tum a, pitei'n a lo awmpui ang che aw," tiin khum sir têah a rawn ṭhu a, "Kan tibuai lutuk ang e," ka tih chuan, "A teuh lo, inpa ai chuan ka ṭangkai zâwk daih ang," tiin pitei a nui kar kar.

"Ka lo lêt leh hunah kan fanu hming tur ka hrilh ang che, i pa phuah a nia," tia nui sukin a fanu muhil a bih vung vung hnuah, "Ka kal, mamawh i neih chuan pitei hrilh la, inthlahrung lovin," tiin a chhuak zui ta a. 

Eng mah ka ei a la rem lo a, rin aiin ka harh phian, naute hnute hnêk tur takngial pawh ka nei lo. 'Nan' an pe rih a, pitei a zeihawi hle. 

"Sangzuala ka khawngaih zia hi chu aw, nupuia a lo nei hman che hi ka lawm tak tak a ni, Duhsanga rilru chhe lutuk pawh ka haw tel," Pitei'n a tih chuan ka ngawi reng a, sawipui ka châk vak lo.

"Chhuankima pawh a duh ang ngawt chuan a tâl thei dawn ta si lo a, i putea phei chuan va tlawh hlek suh min tih avangin ka la hmu bik lo," a ti leh zel.

"Engtin nge Kimkima a awm a?" Ka lo ti a.

"A malpui ruh leh a bân dinglam a tliak a, investigation an la tih chhunzawm zel a, result kimchang ka hre tawh rih lo. Mimtei'n a hria ang, Sangzuala hmuh a duh a, ani lahin a hmu duh der si lova a pawi a nia, a û hmangaihna hre duh lovin sual a chhuah a, a patea nen an la inthurual zui, ka hmangaihna te kha a dai zo ta vekin ka hria," a ti leh bawrh bawrh. 

"Eng nge i sawi awmzia, Sangzuala'n Kimkima a hmu duh lo a maw? Patea te an inrawlh tih eng tin nge in hriat?" Makti takin ka zawt a.

"In an chhuahsan aṭang khan vawikhat mah Sangzuala leh Kimkima hi an inhmu zui hleinem, Kimkima zawkin a rawn be ṭhin niawm tak a ni, a û hrechiang tu ber a ni a, hemi damdawi inah hian a awm ve alawm, tukin i harh hma khan a û hmuh a duhthu a sawi a, mahse, Sangzuala a kal lo, a tlawh lo hrim hrim, kei pawhin ka va tlawh peih lo.." a ti leh a.

Mahse, Masiami khan an inah an kal tiin a sawi bawk sia eng mah ka hrethiam tawh lo e a, Bawihtei a ṭap a, pitei'n a thil sawi lai chhunzawm lovin a buaipui ta rih. Kei pawh ka mut a chhuak lutuk a, ka chhing ve ta a.

Naute ṭap ri bawkin min tiharh leh a, khua a thim vek tawh. Sangzuala'n a fanu a lo pawm a, a lo ṭap chu niin. 

"Sangzual..." tia ka koh chuan ka lam rawn hawiin, "A ṭahbelh reuh tlat, tu emaw naupan lai a chhun a ni ang," tia nui hukin, "I zia deuh tiraw, ka kaitho duh lo che a nih kha," a ti leh a.

Pitei a haw tawh thu leh a fanu pawh hnute a pe tawh tih a sawi a, zawitein ka nui hak. A inhmeh hlawl lo. A lan dan thar sur chu ka en a, a lu a mêt vek tawh a, sipai lumeh a ni ta lo, a chhîp lam zuah bukin a bek a nawr kâwng a, a inhmeh  phian. A fai sar a, hmuh a nuam tak zet.

"Min en reng lo la, i Sangzuala kha ka la ni reng a nia, thih i tum hma thei ropui si," tiin a nui a, ka va ngei tak.

"Lutuka che, i ṭap lo chauh a nih kha aw, Nám..." tiin min nawr luh dawna a ṭawng dan ka zir a, a nui kur kur. 

"I zia deuh a ni ngei ang, i chimawm ṭan, mahse, i sam kha khatiang hreu bembum hmuh reng kha chu a nuam lo," tiin naute a mut a, khum lu lamah rawn kal kualin min zai dawna an phiar kâk ka delh pawr vek chu a rawn phelh ta a, uluk leh dim takin a khuih a, ka chhipah a vial ve ngei.

"Kan fanu hming tur kha ka hrilh tawh ang che," tiin a phone ah lai a phawrh a, ka pa nen an inbiakna a lo record chu min ngaihthlâk tir ta a.

'CHAWNGDINGPUII' tiin kan fanu hming thar a puin a phuahsak a nih chu. Ka pawm thlap, a mawi ka ti, Sangzuala'n, "Chawngi tia koh awih loh aw, Dingpui, tia koh tur," a'n ti deuh kher a. Ka nuih a za.

Kan hlimnain van tawng mah suh se, kan inneih aṭanga ka hlim ve ber ni a ni ngei ang.

Zanah khum áwlah a mu a, a hmain cabin a hauh sa vek tawh a, a ngai lo tia ka lo hnial vena te chu eng atan vak a ti lo, "Mi dang chîm buai loha awm ka duh alawm, kan fanu tan pawh a ṭha hrim hrim," a ti deuh tlat.

Rinai takin Bawihtei a ṭahbelh lo hlauh, hnute pêk dawnah nurse in uluk deuhin tihdan tur min hrilh a, Sangzuala'n a en uluk ngang mai. Ka harh aṭangin Mimtei vawikhat mah a lo la lut lo, mak ka tiru hle; mahse, ka sawi chhuak lem lo.

Zan dar 10 a ri tawh a, Sangzuala leh Mimtei an inbia a, "I awma a nupui a awm bawk alawm, ka nupui leh ka fa hi ka mawhphurhna a ni," a tih chuan ka en vat a, min rawn en ve chiah bawk.

An inbiak zawh hnuah ka lam hawiin, "Muthilh tum rawh aw, Bawihtei chu ka lo vêng ang," a ti sup.

"Eng ati nge Kimkima i tlawh duh loh a?" Tiin ka zâwt ta nge nge a.

"Nám, i dam chian hunah kan sawi zawk dawn nia," a ti hmuk.

"Mimtei pawh a lo la kal lo rêng rêng, thil dik lo a awm em ni?" Ka ti leh hram a, thaw hawk chunga min enin, "Ka awm a, min ring tawk alawm, Kimkima kalsan a hreh a niang," a ti liam puat a, ka sawi ta sa sa ka hriat duh zawh chhuah vek ka tum. Pitei khan min hrilh zo hman bawk si lo a, mawnga hawlh ang maiin ka hre châk zek zek bawk si.

"Nupa kan ni a, thil zêp neih hi ka huat ber a ni bawk, i lungawi lohna te, i lawm lohna leh in unau inkâr thil te pawh min hrilh ve turah ka ngai, a hrim hrimin Lawngtlaiah Kimkima te an awm ve tih pawh in zêp tlat a, Lungleia awm ang hlirin min rin tir a, thudik hriat hi ka phu ve a ni, a rûka in inbiakna ka hmuh te khan ka rilru a na asin, Sangzual, i eng nge ka nih?" Ka ti ve hmiah. 

"Liansangzuala ex regiment nupui duat i nih kha, muthilh tum rawh le, a hunah ka hrilh ang che," tiin a rawn tho chhuak a, "Min hrilh hma chu ka muhil dawn lo," tiin luhlul ka chhuah ve tlat.

"Nám, i tana ṭha lo tur eng thil mah ka ngaihtuah lo, sawi vek dawn chuan hun a duh rei dawn a, i dam ṭhat hunah engkim ka hrilh ang che, tunah chuan ka thu awih phawt rawh," a ti ve tlat bawk si.

Ka ṭang laklawh tawh. Zawh chhuah ngei ka tum a, "A nih eng vangin nge i hmuh duh loh, kan damdawi in awmna a thuhmun reng si a, va kal mai a harsat loh nen i hmangaih tih ka hriat chian em kha..." ka ti leh hrâm.

"A û amah hmangaiha duattu aiin min tihchhiat vek tumtu leh amah vittu ka patea a thurualpui avangin ka va buaipui vakna tur a awm lo, khami zan khan patea kha rui hle lo se la chuan keimah min vit ang, ka nau nen hian kan inang a, kan pumrua pawh a intiat viau, ka sâng zâwk a ni mai a, patea khan keimah emaw tiin a vit a, engkim ka hre vek tawh; in leh lo ram ît vang leh ka nupui naupai lai tih nat hnial lotu chu engah nge ka ngaihsak ang, inchhirna tak tak a neih hma loh chuan ka ngaihsak dawn lo, a dinhmun leh a nat dan engkim ka hria alawm, a hun ka tih hma chu ka tlawh lo ang," a ti hmiah. Mak ka ti hle, dâwt sawi hmel a pu bawk si lo.

"Car in lâk ni pawh khan Mimtei nen in kal a ni lawm ni, Masiami a rawn kal a, a sawi vek," ka lo tih chuan, "Dâwt a sawi a nih chu, min ring rawh, Lawngtlaiah awm mah se vawikhat mah ka tlawh lo, Mimtei pawhin a tlawh hek lo. Mahse, min rawn biak ṭhin avangin ka chhâng ve zel tho, i hriat vek tawh kha," tiin khumah a rawn ṭhu a. 

"Unaute hmangaihna leh nupui hmangaihna a dang tih ka sawi lo em ni?" Tia a sawi zawh rualin kan inneih zungbun ka bunna lam kut a rawn hum a, "Muhil la, naktukah chiang takin ka hrilh zawm ang che, i dilchhût si," a ti zêk.

Hriat chhunzawm châk viau mah ila a sawitu tur berin a duh tawk miau tawh si a, ka maimitchhing ve ta nge nge e.

Phone ri bengchheng zetin min tih harh avangin ka meng chhuak a, Bawihtei mutna ka en hmasa ber, a lo ruak hiau a, Sangzuala pawh ka hmu ta chuang lo, nimin lam âi chuan tlêmin ka taksa pawh a zia ta. Tlêm tlêma chêt zir tura nurse in min hrilh vangin kan inher ve hlek a, ka khawng ṭhûm. Ka kut pahniha inbeng khalhin khum lu lamah ka tawlh hret a, min zaina lai a na ṭawlh ṭawlh mai.

Nurse in Bawihtei a rawn pawm a, an bual fai tawh tih leh hnute pe turin min hrilh a, pawm ve ka dil chuan ka malchungah dimtein a rawn dah ta a. Sangzuala a lo lût ve chiah bawk, "Khawi le, ka lo pawm rih ang, hnute pêk zir ka ngai a nia," nurse awm laia tiin a nui a, nurse pawh a nui ve tho. 

"Sipai ṭha mi ka'n chêt meuh chuan Bawihtei hmai pawh a hlai phuk mai alawm," tia a sawi zawh rualin a nui kur kur a, "Ngawi mai mai rawh," ka ti hlak.

Bawihtei hnute a pêk laiin Mimtei a rawn lût hlawl a, "AuMam, Kimkima'n a lam reng chea vawikhat chauh lo hmu ve lawk rawh," tia min rawn en chung hian, "U Naom, thinrim lo hrâm rawh aw," a tih chuan, "Engmah thinrimna tur a awm hleinem, a ṭha em Kimkima chu?" Dam thlapin ka lo zâwt a.

"Sawi fak a har, nachhâwkna an pe deuh reng a, Masiami a nêp si, nizan te khan zu rim nam chungin a lo kal a, ka haw lutuk.." a ti leh bawrh bawrh.

"Sangzual, va kal ve lawk mai rawh, kan lo awm thei ang, ka zia êm hi.." ka lo ti a.

"Naom, min nawr lui suh, Mimte nang pawh va phei tawh rawh le, ka rilru i hriat kha, i awma ka ring tâwk che, Naomi nen kan inneih chhung chuan a hmêl ka hmuh tawh loh tur thu a sawi chiang tâwk a, hei, i hmuh ang hian kan la inṭhen si lo va, mipa chu a thusawiah a ding nghet tur a ni a, mipa ka ni bawk," a ti hmuk.

"AuMam, ka hrethiam che, mahse, vawikhat chauh te chu  rawn hmu ve lawk mai la, a sawi zing tawh lutuk.." Mimtei'n a la ti ve hrâm. 

"I u Kimkima thu awih la, zah thiam la, duat takin enkawl ang che, i tih chu ka tih a ni mai, sipaiin thu kan tiam tawh chuan kan sût mai mai ngai lo, i u hi sipai dik tak ka ni tih i hria alawm, a ṭûl a nih chuan nâ pawh kan tuar mai tur a ni." 

Hnial chi miah loh leh thupe aw tak a chhâk chhuah tâkah chuan Mimtei a thaw halh a, "Â, in luhlul dun si, in va sual tak," ti nai nai chung hian Bawihtei a en a, "Duatte â nî hian ka duat viau ang che," tiin a biangah a chuk zauh a, "U Naom, Masiami lo thlen veleh ka lokal leh ang," tiin a chhuak ta a. 

Sangzuala a ngawi ngul a, kei pawh sawi tur hre lovin ka ngawi ve rauh rauh.

Rei fê hnuah, "Kimkima hi eng tia nasain nge i huat?" Tiin min zâwt thut a, ka hamhaih hle. Chhân nachang pawh ka hre lawk lo.

"Naom, ka biak che hi.." a ti leh a.

"Huat ngaihna vak pawh ka hre tawh lo e a," ka ti sap ringawt.

A lo bu nghut a, "Mimtei pawh han thinrim viau mah se hmeichhia a nih tlat avangin a rilru a no a, Masiami kuta dah hlawm tawp a duh loh vanga ngaihsak a ni, a u a hmangaih tih ka hria a, ka dang duh lo a nih kha," a ti teh daih. 

"Patea nen engtin nge an inthurual tih i hriat?" Tiin ka zawt a.

"Kimkima zu ruiin a sawi chhuak maw le, in an chhuahsan ni khan tlai lamah a rui a, min rawn phone alawm," lawm lo tih hriat deuhin a ner suk a.

"Ka patea'n tuna kan awmna in hmun hi a duh ka tih tawh kha, engtin nge an inbiak dan hre chiah lo mah ila; nang mah aṭangin bul an ṭan hmasa a, nupui nei lova awm tir min tum ber, an duhthusam chu sipaiah ṭang reng i la, full pension-a ka chhuah hmain he in hmun hi neih hman an tum. Mahse, i lo lan tâkah khan discharge dil ka tum ta si a, an ruahmanna a fail ta hlauh. Inneih rum rum kha chu ka tum dan a ni bik lo a, mahse, lungphun tlai khan patea leh Kimkima inbiakna ka hre ru alawm, a tîr chuan ka awih lo a, mahse, ka ringhlel ta a, ka sawi lang duh lem lo," tiin a ding hluai a.

Kut hnungsuiha vei sek chung hian, "Tlana ka hrilh veka Kimkima room-ah a riak tih i hriat ve vek kha, ani nen a rûkin kan chhui ta a, an inbiakna tam zawk whatsapp ami te pawh kan hmuh belh ta bawk, kan innei dawn tih an hriat khan kei ni lovin nangmahah a rawn ṭuan ta chat a, a chhan chu min tih nat theihna awlsam ber nangmah i ni tih an hriat vang a ni, Nám, ka nauin a rûkin min phiar ru tih hi ka awih thei lo fo ṭhin. LLB a zir dawn khan ka rem ti lo a, mahse, 'ka tuina a nia' a tih tlat vangin ka hnial lui duh ta lo a, thil a hre tam lutuka a dik lo zawngin a rilru a kal sual a nih ber hi.." a tihzawm leh. 

Eng tia hma lâk nge a tum tih ka zawh chuan, "Simna thinlung tak tak a put hma chuan ani nen kan inzawm tawh lo ang, a dinhmun chhiat zia hmu thiama inchhirna tak tak a neih hunah a lokir duh a nih chuan ka ngaidam thei," a ti a.

"Lawngtlaiah an awm tih eng ati nge min hrilh loh?" Tiin ka zâwt leh a.

Ṭha te hian "I laka a chêt danah i lawm lo a, kei pawh ka lawm lo, a awmna hrilh ta che ila i hlau anga nun hahdam i nei thei lo ang, nau i pai bawk si a, eng mah ka sawi lang duh rih lo a ni ber, eng vangin nge ṭul tawpah lo chuan ka chhuah ngai loh tih min zâwt la, a chhan chu i chungah thil ṭha lo a tih nawn tawh lohna turin ka venghim che a ni, inhnuaia an awm pawh ka remti ta lo rêng a, Mimtei tan pawh a hlauhawm tho, a duhnaah tumah tih nat a hnial lo, patea rilru ang a pu tih ka hrilh tawh che kha, ka hrechiang alawm." Tih zawm lehin khum bulah a rawn kal a.

"Kan khawvel hi a chhe tawh a, u leh nau thisen inzawm ngei ngei te pawh kan inhmangaihna a dal tawh, duhâmna leh îtsiknain kan khat a, chu chu Kimkima hian a dâi ve a ni, ka lo enkawlna leh ka hmangaihna âi chuan khawvel nawmsakna a thlang a, a tum ram thleng zo lovin chunglamin hna min thawhsak zawk, ka nau lakah lungawi lo mah ila; kut thlâk emaw na taka siam kher ka tum lo, a inlam lêt hun hunah a û ka ni leh ang," tia thaw huaiin a sam a tuai puat a, chutah min en vang vang chung hian, "Keini chuan chhungkaw thar kan din tawh a, a tichhe zawnga awm loh hrâm hrâm kan tum dawn nia." Tiin a rawn kun hniam a.

"Min hmangaih a nih chuan ka natna turin awm lo la, min ring tâwk bawk tur a ni, Lawmi ka biak nachhan kha chu Kimkima ruahmanna eng emaw zât hriat puitu a ni a, biak ṭhat der a ngai, hrethiam maw, BA thluak thâwl ka tihna chhan che pawh i thluak hi i hmang tlêm lulai lutuk a, i hman ve chhun pawh 'de dei dei' tih nan bâk a ni lo," tiin a nui huk.

"Kiri.. engkim sawi ni la, ka pui thei zawk tur che a nia, Mimtei pawhin Lawmi ava hau kher lo ang," thiam inti zeta ka lo chhan chuan, "Nangni pahnih te hi zawng, thluak fîm hmang hman lo khawp hian in nu but a, in nawi em em reng a, chu zawng chu a ni mai," a ti duh lek.

"Vawikhat mah Kimkima chu kan tlawh dawn lo tihna mi, Masiami hian a hriatpui i ring em?" Ka ti leh a.

"Hriatpui e, i pasal hlui leh Masiami an inbe tam a, Kimkima'n a huat theihna tur chein dâwt an sawi hnem khawp mai; mahse, patea leh Masiami hi chu ka thunun phâk an ni lo. Kimkima siam ṭhat hi ka tum ber a ni, a natna denchhena kan va tlawh fo chuan ngaiah neiin insiam ṭhat a tum chuang lo ang, chu âi chuan a tel lovin kan hlim thei a ni tih hria se, inchhir hun a la nei em em ang, tunah pawh a inchhir ṭan tawhin a nia ka rin, a nupui khawsak dan a hre tam telh telh dawn a, amah hmangaihtu pawh a hriat chian phah ang," ti leh duahin Bawihtei ṭê ṭhat ṭhat chu a ngaihsak chhunzawm ta a.

Bawihtei pawh ngaihsak lovin Sangzuala thil sawi kha ka ngaihtuah zui a, mak ka ti lutuk tlat. A fin zia ka hriat belh leh ta. 

Damdawi in kan chhuahsan dawn a, Mimtei nen kan inkâr pawhin ngai a awh leh ta deuh. Zantin Sangzuala'n min riahpui a, rilru neih a ṭul zia leh  chhungkua aia pawimawh a awm lo tih min hrilh ngun khawp mai.

Ka nu nen kan inbe zauh zauh a, "Bawihi, keini zawng i u Chhanhima te nupa vang hian neuh neuh kan ngah lutuka i pain indan tîr a sawi rum rum mai, i u Chhandama te nupa pawh kan la sawipui ve ang," a tih chuan ka khawngaih hle. Chawngdingpuii thlalâk kan thawn a, a hmuh châk thu a sawi ve bawk. 

Masiamin anpa a ngaihsak lo hle tih kan hria a, Mimtei pawh in lamah haw lovin damdawi inah a tâp chawt a, a hah viau. Sangzuala a thutiamah dingin Kimkima vawikhat mah a tlawh lo a, Mimtei'n a rawn koh hnu pawh khan a û a hmu duh tih vawi thum vel a sawi leh niawm tak a ni. Kan sipai bâng hian a hmu duh ṭhak náng. 

In kan thleng a, pitei a lokal tel ve avangin Bawihtei a pawm haw a, Aizawl aṭanga lo awm nurse training laiin Sangzuala a lo 'Chu e kha' ve deuh tih a sawi a, ka nuih a za hle, ka pasal rinawmna leh min hmangaihna ka hre chiang a, a chhungkua phatsanin ngaihzawng dang a nei dawn lo tih ka thinlung hian a hre ve tlat.

"Nám, hawh le..." tiin min pawm nawlh a, bathroom-ah min luhpui a "Ka nupui bual turin dikna ka nei," a ti sup.

"Bawihtei kha.." ka lo ti a.

"Ngaihtuah suh pitei a awm alawm, zanriah a ei nghal dawn a, i inbual chhung na na na chu a awm tlei lutuk ang, han fai em em phawt mai la a ṭha a ni mai, i rim hi maw.." tia a sawi zawh hmain, "Liansangzual," ka lo ti ṭhat.

Ka lu min sûk sak vek a, keimahin ka inbual thei tih ka sawi pawhin a nui mai mai. Min zaina lai a huh tlang loh nan a bel thlap a, "Pasalin nupui damlo a bual hi thil sual a ni lo a nia, i dam ṭhat te chuan ka bual ngai chuang hleinem che, ka ta chu fai taka enkawl ka duh ṭhin.." a ti leh kher.

"I chhia a nih chu," ka ti nghat. 

"Ka chhe lo, ka chhe lo telh telh bawk ang, nakinah phei chuan ka awm loh hlek pawhin min zawng dûk dûk reng mai ang," tiin chimawm zet hian a meng de sawr sawr a, ka va ngei mai mai tak.

Bathroom aṭanga kan chhuah hnu lawkah pitei a rawn lut a, "Sangzual, Masiami zu rui damdawi inah a âng vak a ni awm e, Mimtei'n i phone-ah a lo call a, ka lo chhâng ringawt, an nupa an inhau a nih hmel," tiin phone a pe a.

"Mimtei chu kan bia ang e, ani hi a lo inrawlh ve vak ang tih ka hlau," a sawi zawh rualin a nau a call nghal a.

"A ṭhat chu, an nupa inkârah inrawlh suh ang che, Kimkima a zia deuh chuan lo haw rawh, hruai i ngai dawn em?" A ti zung zung a, "I û hnenah khan auMama'n lo haw ve tawh rawh a ti, tiin sawi rawh," a ti ta a. Duh ai chuan a khirh maw le, mahse, ka inrawlh duh lo.

An inbiak zawh hnuah, "Damdawi in bill chungchang velah an inhnial a nih chu," a ti hmuk a.

Pitein, "Ka rin dan chiah a nia, Masiami kha mi ṭha ni hek lo," a ti ve nang nang.

Khumah ka mu a, hnute tui tih tlâk ka neih tâk loh avangin 'Nan' kan pe ta zel. A hautak dawn riaua ka hriat avangin ka inthlahrung deuh a, ka sawi chhuak nghe nghe.

"Lungngai lo la, pakhat na na na chu ka chawm thei ve alawm, Pathian zarah kan nghei bik lo ang," tiin a nui suk.

"Tikhan ka chanpual ka humhim tihna a ni mai," tiin a nui leh kur kur a, "Tenawm siah," ka tih chuan, "Han dam ṭha ver vawr la, mipa a chë ang," a la ti hram.

Pitei a chhuak hman hlauha ka va lawm tak. Eng mah sawi hreh a nei mang si lo a ka ngei thei a nia.

Tunah chuan chhungkaw pangngai kan ni ve ta, Chawngdingpuii nu ka ni a, ka chhungkua humhim tur hian theihtawp chhuah ka tum tawh ang. Ka pasal rin tlâk zia ka hria a, a thu awih zel pawh ka tum.

Chawngdingpuii pa chu Liansangzuala a ni. A chiang sih sah ê...

B®®

B+>[BeckirafARenthleI]<+®®