23.NAOM[Mizo Love Story]-B®®

23.NAOM [Mizo Love Story]

Ziaktu: Becky Rafa Renthlei

B®®

Shadow of the life

"Ti khan ka chanpual ka humhim tihna a ni mai," tiin a nui leh kur kur a, "Tenawm siah," ka tih chuan, "Han dam ṭha ver vawr la, mipa a chë ang," a la ti hram.

Pitei a chhuak hman hlauha ka va lawm tak. Eng mah sawi hreh a nei mang si lo a ka ngei thei a nia.

Tunah chuan chhungkaw pangngai kan ni ve ta, Chawngdingpuii nu ka ni a, ka chhungkua humhim tur hian theihtawp chhuah ka tum tawh ang. Ka pasal rin tlâk zia ka hria a, a thu awih zel pawh ka tum.

Chawngdingpuii pa chu Liansangzuala a ni. A chiang sih sah ê...

B®®  230721

Damdawi in kan chhuahsan aṭangin thlakhat a liam tawh a, Sangzuala'n a fanu a âtchilh ti ila ka sawi sual tlêm khawp ang. 

Ka chêt theih loh chhung khan aman a buaipui deuh vek, nau bual a thiam lo a, pitei a lokal ṭhin; anni pawh naupang chumchiap nei lo ta chu Chawngdingpuii awm turin putea nen an lo lawr zing viau. An fapa Bawihpuia kan ina riak ṭhin kha kan hnenah a rawn awm a, class an ṭan dawn avangin niminah a haw ve chauh. Putea te nupain min ngaihsakna leh min hmangaihna hi ka theihnghilh tawh ngaiin ka ring lo.

Mimtei a lo haw khât hle a, indim ngai mah se kan chhungkaw dinhmunin a zir miau loh avangin ka theih ang tâwk tiin ka che chhuak ve tawh. Sangzuala kuta dah hlawm tawp theih loh chin thil tesep khawih tur a tam ve a; mut reng theih ninghal lo chuan. A dik takin Sangzuala a hah hle, zan lamah Bawihtei hnute siamin vawi hnih vawi thum thawh ngei ngei a ngai a, mutmu a tuah ṭha hman meuh lo; nêp ka inti a, tlaw ka inti bawk.

Mahse, vawikhat tê mah a phun nawi ngai lo. 

Kimkima'n damdawi in a la chhuahsan ve thei lo a, a chuapah tui a tling tih hriat chhuah a ni ta bawk. Vawi hnih an siak tawh a, test neuh neuh a la nei reng bawk, TB a nih an ring deuha mahse; a hrik an hmu thei mai lo va, test nawn leh tur an la ti ta fo. Wheelchair nen a awm a, Sangzuala'n a tlawh eih lo.

Nizan hmasaah Mimtei a lo haw zuai a, a inthlahrung hle, "AuMam, awmpui tur pakhat la rih mai ila, Siaha lamah ka lo zawng dawn em ni, inah ka awm ve hman si lo a," a ti a.

Sangzuala'n "In lam chu kan inbuaipui thei, a tir aṭangin i û i buaipui tawh a, a tawp khar ang che, Masiami mitmei reng bawk la, awmpui lâk tih velah buai a ngai lo," a ti hmuk.

"U Naom, ka lakah thinrim suh aw, engah mah ka buaipui ve si lo che a, i scooty pawh ka hman zel rih a ngai bawk sia, ka inthlahrung lutuk," a ti sap a.

"Ka khalh thei rih chuang hleinem, a ṭul apianga hman tur a ni a, damdawi inah i awm a nih pawhin thil ei ṭha la, induat nachang i hre dawn nia," dam thlapin ka ti. Min buaipui lo mah se a û in a hliahkhuh hneh êm mai.

"AuMam, pate Duhsanga chanchin i hre ve tawh em? An lo be mial lo che maw?" Tia Mimtein a û a zawh chuan , "Hria e, niminah Tlana pain min rawn hrilh a, kan buaina tur a nih loh vangin ka sawi lang duh lo a nih kha, Kimkima i hrilh em?" Tiin a zâwt let a.

"Amahin alawm min hrilh, bâkah a ṭawng vak ngai lo, Masiami pawh zan li a lo kal tawh lo va," a ti ta a. Mak ka ti hle.

"I û in a mamawhnaah che awm la, helam kan buai tho nain kan tâl ve nawk nawk thei, Kimkima enkawl ṭha la thil sawipui chiam loh tur aw, kan nupa chungchâng pawh a hnenah eng mah hrilh duh lem suh, inveng ranin awm la, damdawi in a chhuahsan theih veleh i lo haw dawn nia," a ti ta a.

"Sual viau mah se ka khawngaih tlat, i lakah pawh a inthiam lo a, a inchhir lutuk; mahse, ka ring ngam rih lo," a ti ve ngial.

Mimtei kal hnuah Sangzuala ka zawt ta a, pate Duhsanga chungchâng eng nge hriat a neih. Tiin.

"A chaw kawng a cancer a, a pum pawh a sawisel tho, a ṭha vak lo a nih ber chu," a ti sup.

"A van mak em em, lungphun lai khan na nei hmel a pu si lo a," ka lo ti a.

"A insawiselna hi chu a rei tawh, zu a thlah duh lo a, Kimkima a vih aṭang khan a in nasa zual an tia, Ruatdika a khawngaihthlak khawp mai, biak ve a ṭhat rualin anmahni lam an ngawi thei bawka ka inrawlh duh lo law law," tia min rawn enin, "I nu leh pa pawh an rilru a hah khawp mai, i u Chhanhima te nupa an buaithlak tih thu i pain a sawi a," a tih zawm leh a.

"Nia, tih ngaihna a vâng em a ni, indan tir leh mai se ka ti rum rum, upa lam an ni tawha u Chhandama ka la sawipui dawn nia," ka lo ti sap.

"An duh phawt chuan kan hnenah an awm thei tih ka hrilh a, mahse, i pain a duh teuh lo, a ṭang nasa mai," tiin a nui a, kei ai mahin Sangzuala leh ka nu leh pa an inbe tam a, thu chhia a ṭha pawh an hrilh zel tih ka hria. 

Zanriah tur buatsaihin ka buai hle a, anni pafa room-ah an in awm a, Kimkima vangin rilru hrehawm put châng nei mah ila; kan boruak a hrehawm hran lo.

"Naom, Nám..." tia min kovin Bawihtei pawm chung hian room kawngkaah a rawn dâk a, a hmel a buai deuh nak. 

"Inpeih la, Bawihtei hi lo la teh, damdawi ina ka kal a ngai," a tih chuan ka lo hawi â hû. 

Thil awmzia zawtin room-ah kan inzui lût a, a thawmhnaw inbel lai a thlâk sawk sawk a, a hmanhmawh ngang mai.

"Kimkima thiin a luak a, a biak theih loh, Mimtei'n ṭap chungin min rawn call a, ka kal ngei ngei a ngai," a ti sawk sawk a.

"Kal ve a ngai em, Bawihtei hi chu pitei kutah dah ila," ka lo ti ve a, "Damdawi in panin an kal mêk, ti khan lo awm la, chanchin ka lo hrilh ang che, chaw kan bar ve lawk ang e, kan chin tur a hriat si loh," tiin choka lamah a phei leh a, nau pawm chungin ka zui ve zel, hmanhmawh takin chaw a bâr sawk sawk a, "Zán riah ngai ta se nangmahin i lo awm thei ang em?" Min ngaihtuah taka a tih chuan kan awm thei ang tiin ka chhâng.

Eng anga inrem lo leh thinrimna nei pawh nise ka pasal hmangaihna ngah tak hian a unaute a hmangaihzia ka hre miau a, ka dang duh lo, lo dan tumin sual pawh chhuah mah ila ka inthiam dawn chuang lo. 

A hma kha zawng zawngah pawh a thutiamah dingin a tlawh tawh miah lo a; mahse, biak theih loha a awm meuh chuan hmangaihtu tak tak chuan a ensan thei lo.  

Chaw ka eikham a, Bawihtei khumah ka mutpui a, anni lam an reh ṭhiap. Thlakhat aia rei damdawi inah a awm tawh a, a zia chho ve ang chu tih lai laiin, putea te nupa meuh an kal tel a nih chuan a dinhmun a ṭha lo hle tihna a ni mai. Sangzuala ang thova luhlul an ni bawk. A hmain Kimkima an tlawh ngai bik tlat lo.

Ka mu meng renga anmahni lamin min biak hmasak loha lo va call sek ka inthlahrung bawk si, u Chhandama ka be ta zawk a.

"Bawihi, transfer dil ka tum a, ka nu leh pa chu ngaihtuah reng reng suh, i u Chhanhima zawng a nikhua lo êm a, engkim ka lo ngaihtuah vek dawn nia," a rawn ti a, a thlamuan thlak hle. 

"U Chhanhima te chhuak duh lo ta se.." ka lo ti a.

"An chhuah kher a ngai hleinem, inkhatah kan awm ang a, an mizia te pawh a dang ve ang, rálkhat aṭanga in sawi fel tum hi chu a buaithlak a, upa ber nimah ila ka nu leh pa hrehawm taka an awm lai hmuh ka duh lo, an hun tawp lam hlim taka hmang turin ka duh zawk, nang pawh Kimkima lakah rilru ṭha lo pu tawh suh aw, khatiang dinhmunah khan a ding tawh a, hmangaihtu a mamawh, chhungkua hlim tlâng lo leh inrem lova awm hi a hrehawm, i pawimawh hle a nia," a rawn ti duah.

"Dingpuii kan hmu ve châk tawh a, remchangah kan la video call dawn nia," tiin phone a dah ta a, ka û mah nise fel ka tiin puitling ka ti ngawih ngawih. U Chhanhima pawh a sual tihna ni lovin a nupui a fuh lo deuh a, fa te han nei se u Chhandama te chhungkua an awm phei thei a nih chuan an boruak a ṭha mai ang.

Ka phone riin min tiharh a, zing lam dar nga a pel hlek. Sangzuala a lo ni a, Kimkima a zia deuh tih leh Mimtei a lo haw dawn tih a rawn sawi. Putea te nupa leh amah an awm rih dawn a, Mimtei a chau tawngkhawng lutuk tawha a khawngaihthlak. Mi âi a duty ve te pawh Kimkima vangin a chhunzawm thei tawh lo a, a hmaa Serkawna a interview tur ni se Kimkima vang bawkin a bawhpelh a, a nau hi zaha duat ngawih ngawih zawk tur a ni.

Bawihtei khumah ka mut a, tûkṭhuan tur ka buatsaih san ta a, pangti lum a hre lutuk lo zâwka a chêtsan theih phian. Mahse, hnute siam zin a ngai thung.

Mimtei pawr fap leh mit búi lûkin a rawn lut a, "U Naom, ka hah hluah hluah, ka thinrim bawk si," ti nghatin chair-ah a ṭhu hnawk a, thil awmzia ka zawt nghal.

"Nimin tlaiah Masiami nen kan inhau a, Lungleiah a haw thla ta a nih kha, Kimkima tikhan a awm zui ta bawk si a,  Mama ka rawn phone ta ringawt alawm," a ti a.

"Eng ati nge in inhau a, Kimkima pawh a zia riau i ti si a," ka lo ti a.

"Ui ui, mi nasa a nih kha, damdawi in bill a tam tawh a, in lama in enkawl a lo dil a, Kimkima dinhmun enin doctor ten an remti rih lo a, keimah min rawn kovin min sawipui a, chu chu Masiamin a hua maw le, inbuaipui thei a nih chuan buaipui law law ula bill pawh Liansangzuala'n pe rawh se, a ti kher maw le, kan ṭawng zawng zawng Kimkima'n a hre ve si a," a ti ta a.

"A ṭul a nih te chuan i û in a pe mai ang, rilru ti hah duh suh," ka lo tih chuan min en vang vang a, "I entawn tlâk ngawt mai, nangmah ang hi an tam lo," tiin a mit a nuai zauh.

"Naom Lalmuanpuii ka nia lawm," tiin ka nui hak hak a, "Dik tak chuan ka inthlahrung ve reng, Kimkima ka haw thei lo hi a mak ka ti," a ti sap.

"Kei pawh hian ka haw tawh lo a ni ang, hlim takin chhungkua awm leh thei ila ka duh takzet, kan bul ṭan dan fuh lo mah se ngaidamtu thinlung kan pu thei alawm," tiin ka rilru dik tak ka sawi.

"Eng êm a ti lo turah ngai ila, Kimkima pawh helamah kan la phei a nih loh chuan enkawltu a nei dawn si lova i pawm thei tak tak ang maw? I laka a chêt dan a mawi lo si a," Nuam ti vak lo chungin a ti leh.

"Thei ang, sual a chhuah loh te chuan..." ka ti liam puat.

A inbual fai a, chaw kan eikhamah a mu dawn emaw ka tia kan room-ah lutin Bawihtei ava awmpui ta a, a bualfai vek bawk.

Zan lamah pawh a û a lo haw ta lo a, Mimtei te nen khum khatah kan mu ta mai.

Mihring inhmangaihna hi a lo mak khawp mai. Masiami haw ta khan rei pawh rial lovin inṭhen a duh thu a rawn sawi a, Kimkima'n a lo hnial lo. Thil thui tak pawh a sawi chuang hek lo. 

Kârkhat chhung Mimtei leh Sangzuala an inriah chhâwk zak zak a, pitei chhun lamah a awm ve thung. A nî pawh a rawn lang ve a, Sangzuala te unau ṭap pur chungin ngaihdam a dil a ni awm e.

Kei erawh chhuak chi ka nih ve loh avangin Bawihtei nen inah kan in awm nitin a, Mimtei awm theih ni-ah insûk ngai a su vek zel. Kan dinhmunin zir lo mah se indim hram hram turin min hrilh ve fo a, ka lakah a inthlahrung ru hle tih ka hria, a khawngaihthlak ang reng. Tlana nen an la inbe ve zel a, an boruak a ṭha turah ka ngai. 

"Nám, thil sawi dun lawk tur kan neia i hman tawh em?" Sangzuala kan room-ah a rawn lut a, tunlai chu mumal pawhin kan inbe hman lo, mahni buai buaiin kan buai a, kan inkâr a ṭha lo tihna ni chuang lo in.

Khumah ka ṭhu a, Bawihtei hnute ka pe pah bawk. Eng thil nge tia ka zawh chuan, "Kimkima pawh a zia chho ṭan a, karlehah a chhuah theih ka ring deuh a, kan hnena a lo awm mai loh chuan.." a ti sup. Sawi nuam a ti chiah lo niin ka hria.

"I thu thu a ni mai, a hma ang khan inhnuaiah riak leh se hetah room chuang a awm si lova," ka lo ti a.

"Ni e, i rem tih chuan ka lawm ngawt ang, eng emaw chen chu buaipui a la ngai dawn a, a ban tliak hi chu a zia viau, a malpui ruh tliak kha a la dam ṭha lo a, a Tb bawk," tiin a thaw hawk.

"Nangman ruahmanna siam mai rawh, i thu thu a ni mai," ka ti sap a.

"Chuan damdawi ina a awmna bill pawh kan pêk a ngai dawn a.." a tih leh chuan a hmel ka en a, a inthlahrung tih a hriat ngawih ngawih.

"Sangzual, i nau i hmangaih zia ka hria, ṭha i tih dan ang a piang ka pawm vek, Kimkima chungchangah hi chuan," dam thlapin ka ti leh a.

"Eng lo a nia, a buaithlâkna zawk chu ka pension chhuahpui kha a vaiin a lo lut rih lo a, fund dang aṭanga lo lut hmasa kha car lâk nan kan hmang tawh a, thlahnih hnu velah a dang chu a lo luh belh dawn chauh; damdawi ina i awmna manah eng emaw zat kan pe bawk a, tunah thla a náwi tawh si a, Kimkima bill hi a tlem lo khawp mai," rilru hah hmel takin a ti ta a.

"Eng zat nge ni a?" Tia ka zawh chuan "Nuaihnih a tling ṭêp, private hospital a nih bâkah test hrang hrang a nei nasa si a, eng tin nge kan tih ang âw, Mimtei chan tura kan dah bâk kha kawl kan nei tam lo, tunah rih chuan," a ti zawi ruih.

"Hahdam rawh, tih dan tur ka hre mai thei," tiin ka nui sak a.

"I nu dil te kha i lo tum ang e, khatiang kha chu thil tih chi a ni lo," a ti nghut.

"Ka dil dawn hleinem, sipai nupui hian ka thluak kan hmang ve lawk ang e," tih pahin Bawihtei ka mut leh tê tê a, chutah ka wardrobe chahbi lain ka hawng ta a. A phun hluk.

"Nám, fiamthuna chi a ni miah lo a nia, tun aṭanga kan inruahman lâwk loh chuan a chhuah ni-ah kan buai ngei ngei dawn, damdawi eng emaw zat lei ngai a awm bawk ang a, putea te ka va be mai dawn em maw ni?" A tih leh chuan, "I nupui hi min ring miah na nge, lo nghak lawk rawh," tiin ka passbook leh cheque ka phawrh chhuak a.

"Huh! Lalmuanpui, infiam dan chin tawk a awm," a ti hluk. 

"Ka fiam che nge fiam lo che i hre dawn alawm, Bawihtei lo awmpui rawh," ka ti deuh hmak.

Ka chhuak tur chu ka bânah manin, "Khawiah nge i kal dawn, ka lo thleng ve chauha inbual ka duh asin," a ti leh rih.

"Ka lo haw hunah i inbual dawn nia, nge kan pahnihin kan kal zawk dawn?" Ka ti a, nui suk chung hian, "Inah ka lo awm ang e, Mimtei nen va chhuak rawh u, rei lo ula," a ti ve ta a, a mitmenga nuih zatna lang ka hmu reng, min ring chiah lo niin ka hria.

"I nupui hi BA mâwl ka ni pawh a ni mahna; mahse, ka mâwl zîktluak kher lo a nia," tia nui hakin bân ka vai khum zauh a, "Kal mai mai teh," a ti ringawt.

Chumi hnu chuan Mimtei ka kai tho a, a û account number ka zâwt bawk a, tlai lamah pitei thlâk tura damdawi in lama kal a ngaih vangin kan hmanhmawh viau. Eng nge kan tih dawn Mim-in min zawt miah lo. 

Bank kan thleng a, mi an tam lutuk lo, keimahin ka lut a, cheque transfer-in Sangzuala account-ah ka sum lo khâwl ve kha Kimkima khul chhuah nan ka transfer sak ta a, in lama khawsakna tur tlem ka la chhuak bawk, ti ṭha ka va inti si êm. 

"U Naom, ava pawimawh awm ve?" Kan haw lamah Mimtein min zawt a, "Nia," tiin ka hrilh thuak thuak, chhungkuaa thil zêp tih vel hi ṭha ka ti tawh lo. 

"E he, engmah Mama'n a sawi si lova bill kan chawi hnem dawn tih chu ka hre sa tho, ka fak duah peih loh che, ka rilru i hriat kha, i hman ve tur atana i khawl a nia, Kimkima'n rûl thei lo che mah se hlawh ka neih veleh ka rul leh vek ang che," a ti a.

Nui hak hak chung hian, "Min rul tawhah ka ngai mai ang, hna nghet i neih hmain Tlanhlua a lo lang leh si ang a," ka lo ti a.

"I va sual tak, pasal nei lovin in bulah ka awm reng zawk dawn em mawni," a'n ti ve ngeiah.

"Nei vat vat rawh, kan free lo tlat i awm hi chuan.." fiamthuin ka ti leh a, "A'n zah loh reuh zia hi, auMama ka hrilh ngei ngei ang," tiin a nui ar ar a, ka thil sawi kha huatah pawh a la bik lo.

La nui reng chungin inchhungah kan lut a, "Mama ka hrilh dawn i thil sawi kha," a la ti hrâm.

"Han sawi vaih teh, scooty i khalh tawh lo a ni mai," a hmaa ka tih ṭhin danin kan vau deuh ngei a, a nui vak vak.

Kan room-ah ka lut a, khumah Sangzuala lo ṭhuin ngun taka thil ngaihtuah hmel a pu. Ka thawm hriain a rawn dâk vat a, "Khawia mi nge pawisa i neih?" Tiin min zawt chat. Message a dawng tawh tih ka hre mai.

"Ka khâwl a nih kha, hmang phal lovin bank ah ka dah a, a hmain scooty lei nan hman ka tum phawt a, mahse, ka nu leh pain min leisak ta si a, ka khawih ta lo, chuan kan inneih dawnah khan lák chhuah ka tum leh a, chu pawh ka nuin a rem ti lo leh a, tun hun a tan hian a lo ṭangkai thei ta a nih hi.." tiin ka hrilh fiah ta a. 

In chhungkhura hman tur tlem ka lak chu a kutah dahin, "Rilru ti hrehawm tawh suh, chhungkua kan ni a, nupa kan ni bawk, ka ta bîk nilovin kan pahnih ta a ni tih hre reng ang che, inthlahrunna tur a awm lo," tia kun hniamin a hmuiah ka fâwp zauh a. 

"Nám.." ti supin a malchungah min ṭhut tîr a, "I rilru ṭhatna hi ka hmuh vang alawm ka hmangaih che, nuthlawi ni mah la i chhungril nun hmufiahtu keimah Liansangzuala hian ka tisual ngai dawn lo tih ka hria, ka hmangaih che," ti nawn supin duhthawh zet hian min fâwp ta a, ka lo chhawn ṭha kher mai.

"Kawngkhar va kalh rawh," a ti a.

"Tunah maw?" Ka lo ti.

"Yes, tunah ni e, ka nupui neih hnu hian insûm reng rengin hun ka hmang a, sipai insûm thei leh inthunun thei tak hian ka nupui hmangaihna ka chenpui duh, le, va kal rawh le.." Tiin a nui suk.

"Mahse, eng lo, Bawihteii..." ka la ti hrâm.

"A nu leh pa tibuai zawngin a khawsa lo ang, ala meng deré thiam lo," tia nui hukin a fanu a melh a, ka nuih a za hle.

Chumi hnu chuan damdawi in ka chhuahsan aṭanga a vawikhat nan nupa nun uar leh duh thawh takin kan hmang ve ta a. 

Thaw hawk chunga min enin, "Bawihtei hi zai chhuah ngai lo se chuan kum chhirin fa kan nei tur a nia, ex regiment te hi chuan kum tin fa nei del dul mah se tumahin min dem lo ang," tiin a nui kur kur.

"I chhia..." ka ti tak nain ka nui ve tho.

"Nia, ka zei thung, zaninah Mimtei damdawi inah a riak dawn bawk a, vawikhat chuan vawihnih a hring an tih kha, chuan vawihnihin vawithum..zaninah kan tlaivar dawn a nih hmel.." nui hawk hawka tiin a tho chhuak a, chhuata kan thawmhnaw darh phung chhar chung hian, "Zaninah saruak leh inhawng sain aw.." a la ti cheu.

"Liansangzual, i ṭawng peih.." ka lo ti a.

"Eng nge, nupui neih man ava han awm tak.." tia a sawi zawh rualin lukham a thlâwk phei fua a, a lo man chat. 

"Thinawrh, khatianga chêt zawh hnua ṭawngkam hman tur ka la zir tir ang che," tia towel vengin nui kur kur chung hian bathroom lam a pan ta a.

Khum aṭangin ka tho chhuak a, thawmhnaw inbelin Bawihtei bulah ka mu daih, ka mut a chhuak nghal rawih rawih a, Sangzuala lo luh hmaa muthilh tumin ka chhing ta a. Bawihtei pawh a mutui hle.

Zanriah ei dawnah min rawn kai tho a, "Ka duatnu, tho rawh le, pa zawk muhil lovin nu zawk i mu deuh tlat a," tiin a khi suk. 

"Ka mut a chhuak lutuk alawm," ka lo ti ṭha ve mai, "Zaninah i muhil dawn si lo a, ka kai tho duh lo che a nih kha, chaw ei khamah Mimtei ka va dah zawk ang a, ka lo haw har lo ang," tiin min pawt tho a, "A nîin Bawihtei a pawm aw.." a ti leh a. Ka fanu ka bulah a mu lo tih ka hre ve chiah. Ka tlaw zia hi.

A sawi ang Mimtei a va thlah zuai a, a lo lêt leh nghal.

Khumah kan awm a, "Patea a boral chiah," a ti sup.

"Eng a?" Ka lo ti vak a.

"Ka patea tun mai khan a chatthla a nih chu, nizan khan a zual deuh an ti a, Ruatdika'n min rawn bia a.." zawi ruiha tiin min kuah a, "Min hawtu leh min tih nat tumtu ni mah se, a ruang nang tura kal ve ngei ka duh, eng nge i ngaihdan?" Tiin min zawt.

"Ka hrethiam lo.." ka ti ringawt.

"Ka nî te an kal dawn a, a ruang tal ka thlah ve loh chuan ka inthiam thei lovang, an hnenah kum nga lai ka awm a, ka tih ve ngei tur a ni, vui zawhah ka lo haw dawn nia, zing hma deuh hlekah chhuah ka tum a, Bawihtei ngaihtuah lo ila chuan kal ve a rem asin le, in inah i lo awm thung ang a," a ti dam thlup.

"Thla thum êm pawh a la pum si lo a, kan kal ve rih lo mai ang," ka lo ti awlsam êt.

"Kimkima lo chhuah hunah kan la zin ve dawn nia, Mimtei nen in an lo nghâk ang a, i nu leh pain an tunu an hmu ve châk dawn em asin," a ti ta a. Ka sawi ngam loh a rawn sawi hlauh a, ka lawm ru hle.

A tih dan ngaiin Bawihtei a buaipui vek a, a muthilh hnuah, "Naktuk zana ka tih ai tur zaninah ka lo pûk," tiin a nui nghek a. Ka va ngei tak.

"Tiang khan ṭawng mai mai zel suh," ka ti hlak a.

"Lângin ka kal dawn sia ka chauh tâkah ka inhmakhua a ni ve mai a, eng nge pawi vak," la nui reng chunga tiin a âwmah min kuah bei a, "I bula mu reng chunga insum a ngai reng hi ka kham, ka kham teh a nia," a ti hluk.

"Muhil rawh, thawh hma i ngaih kha," ka ti a.

"A teuh lo, ka muhil dawn awzâwng lo, min ngai lo viau zel suh aw," tih pahin ka kawr âwmah a kut a dah lut a, a chêt zawm dan tur hrilh hranpa ka ngai lo.

A mitmeng tisa châknaa khat dam leh ril ruih chuan min en a, "Nám," tia phun supin dam thlap leh ngenngawl zet hian min fawp ta a, a kut pawh a awm mai mai lo, a taksa ruh leh khauh ṭang chuan min kherh chial a, ka pasal a ni a, a duh ka hria, nawmna vawr tawp inpe tawn turin rilru ka sawrbing ve ta.

Dar thum velah Bawihtei hnute siamin ka pe a, Sangzuala a mutui hle, a hmel a lang dam thlap a, hlim taka awm hi a phu ngawih ngawih; mahse, a harsatnain a kiansan bik si lo. Puan ka sin ṭhat tîr hnuah amah kuah chungin ka mu ve leh a. A taksa lum thur thur te a rim fai sar te hi ka thlahlel thar lehzual. 

A thil sawi kha fiamthu deuh tho ni mah se a dik tak tak. A lo hawin ka rai lian tawh ang reng si a, indim a ngai bawk si, chutah zai ka tâwk zui leh a, a insûm thei ngar ngar viau. Vawiin leh zanina a chêt dan kha chu 'sipai chhuṭi lo haw chêt dan' dik tak a ni. Ka thil ngaihtuah avang chuan ka nui sak a, ka mut pawh a chhuak mai mai lo.

Khawvar tirha a thawh lai pawh ka hre reng a, ka kuah tlat avangin dimtein ka bân min dah sawn sak a, ka chalah fâwp zauhin a tho chhuak ta kha a ni a, ka muhil der laklawh si, ka va han meng ru châk tak. 

A insiam vel chhungin ka tho chhuak ve ta nge nge a. "Muhil leh rawh, ala hma lutuk a nia, ka nî te ka rualin an kal ve dawn a, thlah ka ngai lo ang," a ti a. Mahse, ka tho chhuak ta law law.

Thingpui ka siama a in zawh hnuah, "Chanchin ka lo sawi dawn nia, zing chaw in inah kan ei dawn tih i nu te lo hrilh rawh aw," a ti a, ka bu nghat.  Inhnuaiah chhuk lovin veranda aṭangin ka vai liam ta a, ka mu leh nghal daih.

Pate Duhsanga a thi tih Kimkima'n a hriat hunah eng tin tak awm ang maw. Mi pangngai thluak hmang thiam awm té si hi a â ka ti takzet.

Ka nu nen kan inbiaa chanchin ka hrilh ve vek a, Sangzuala te'n chaw an ei dawn tih ka hrilh tel bawk. Masiami chungchâng a rawn sawi teh daih a, Lawngtlaia an dawr kha tiralin Lungleiah dawr a siam leh nghal daih a, an in luaha bungrua pawh ama lei deuh vek a nih vangin a la vek. Kimkima thawmhnaw leh a thil pawimawh erawh Sangzuala'n a lâk phei sak a, inhnuaiah an dahin ka hria.

Damdawi in aṭanga lo chhuak pawh nise a hma ang tho khan inhnuaiah an awm leh dawn a, Mimtei a insawn thla ve tawh ang, tiin Sangzuala'n a sawi a, mahse, ka remti lo. In hnuaiah amahin Kimkima awm se ei leh in chu inchungah a ngai anga kalpui ka duh tih ka sawi ve bawka min hnial ta lo.

A nupui, a û leh nau te aia a thlan zawkin a chhiat ber laiin a kalsan a, rilru a neih ve tawh ngei ka beisei takzet. Ka va ngaina ta hluah tihna ni lovin ka pasal vang zawkin ka ngaidam ni berin ka hria, ngaihdam min dil hran lo a, a hmuh theihin ka awm lo hrim hrim. A lo chhuah hunah eng ang boruak nge a neih dawn kan la hria ang chu.

Sangzuala te an thleng thla tawh a, kan inah ka nî te nupa nen chaw an ei a nih hmel. Ni Thanzuali hi misual a ni hran lo a, patea khan a rilru a sûksak hneh lutuka sual a chhuah ve mai mai a ni, a nihna takah chuan a fate pawhin Sangzuala te unau an ngaina reng a, a nu vangin an pawh ṭha ngam lo mai mai chauh zawk.

Kâr thar kan chuangkai a, Kimkima damdawi in aṭanga a rawn chhuah dawn avangin inhnuai pawh kan singsa fel vek tawh. Hruai chhuak turin Sangzuala te unau an kal a, dik tak chuan ka chhungrilah nuam lo tihna ka nei; a bill a sâng fer fer khawp mai a, a damdawi lei ngai leh in lama in enkawlna tur nen vek phei chuan nuaihnih a pêl hialin a nia ka rin. 

"Dam a hlu a, a accident-na hian nun kawng dik a zawh tîr theih hlauh chuan a man to deuh mah se chu aia hlu a awm lo, chhungkua hlim tlâng taka awm hi a ṭha ber," tiin Sangzuala'n a sawi.

Mimtei'n an damdawi in awmna thil vel a su a, a tifel bawk a, Kimkima pawh inhnuaiah awm rih lovin in chungah a la awm a, eng mah a sawi lo, a ke a la dam ṭhat loh avangin a duhna hmunah a kal zung zung thei lo a, Tb damdawi thla chanve a ei tawh tih Mimtei'n a sawi.

"Mate, zanriah ei khamah law law i room-ah chuan chhuk mai rawh aw, step kal a harsa dawn si a, in hnuai leh chung kal pawhna hi ka'n ṭhiat ang e," tiin Sangzuala a tho chhuak nghal a, Kimkima vawikhat mah ka la be lo, sawi tur pawh ka hre lo a ni ber.

Mimtei a hlim hle a, a nui deuh reng, Bawihtei a ṭah avangin room lamah ka phei a, a pa thil chhut ri a bengchheng lutuka a harh a nih ka ring. Kimkima sitting room-ah a mu a, a chêrin a hmel a dawldáng hle bawk. A tarmit phen aṭangin min en zauh zauh tih ka hmu ru reng a, dik tak chuan a rukin hrehawm ka ti. Ka ṭih ru a ni deuh ber. 

Zanriah ei dawnah Sangzuala'n ṭawngṭaina a hmang a, putea te nupa chaw eiah kan sawm tak nain thil pawimawh tih tur an neih vangin an rawn ei ta lo.

"Kan hun liam tawh avanga inti hrehawm lovin tuna kan hun hman mêk hi a pawimawh ber a, chhungkuaa harsatna leh buaina a lo thlen hian pawnlam miin an siam ṭha thei lo, a siam ṭha tu tur chu a chhunga chêng te vek kan ni a, kan pawimawh tlâng vek tihna a nih chu, Mate, nang pawh i hun liam tawh theihnghilh tum la, nun thara bul ṭan tum ang che, hmangaihtu dik kan hriat theih nan harsatna te kan paltlang a ngai ṭhin," a ti dam thlup. 

Mimtei'n chaw ei a siam laiin Bawihtei a ṭap a, ngaihven turin ka kal vat.

"Nám, kan ei a nia, lo pawm phei mai rawh," tiin Sangzuala'n min rawn ko a, ka hmazawnga awrhin ka pheipui ta a.

"Mama, tunge a hming?" tiin a vawikhat nan Kimkima a rawn ṭawng chhuak a, "Chawngdingpuii, Dingpui tia koh tur," tiin Sangzuala'n a chhâng leh kher. Mimtei nuih a za hle.

Mimtei a eikham thuai a, min rawn lâk chhawk ta a, thla nga hnuah Kimkima nen dawhkan khat kan kîl leh ta, kan boruak a nuam khuchûk lo. Mimal taka inbiakna pawh kan la nei hek lo. Sangzuala a â lova a ṭawng deuh char char.

Sitting room-ah kan ṭhu ṭhap a, "Naom, Dingpuii kha min pawm tîr ve phal em?" Tia Kimkima'n min rawn en chuan  Sangzuala ka va melh a, "A bân a dam deuh tawha a pawm thei ang," a lo ti sup.

Tîm ru deuh hian a malchungah ka va dah a, a en ngun ngang mai. Minute khat dâwn ngawi renga a en hnuah, a in sût hraih a, a mittui a far kauh, chutah, "Bawihte," ṭap ṭeuhin a ti ta a, min hnek lai te, sofa aṭanga min bawh thlak lai te kha ka mitthlâah a lo lang iar iar a, ka inhum ruh ngat ngat. Va chhuhsak daih ka duh hial, ka tho deuh uai a, Sangzuala'n min nem ṭhu vat a, a mitmeiin min khap nghal bawk.

Thlarau sual ava thawk hman teuh ve le.

"Naom, auMam, min ngaidam duh lo mah ula ka dem lovang che u," a ti sup a, ka ngawi reng.

Mimtei a che vat a, Bawihtei chu lain a pawm a, "Kimkim, i room-ah kal ang aw, i chau vek ang," a ti ta a.

"Ngaihdam ngai lo mihring kan awm lova tisual ve ngai lo mihring kan awm hek lo, ka nau ka thisen zawm i nih tlat avangin leh ka hmangaih che avangin eng thil pawi pawh lo ti tawh mah la, kei chuan ka ngaidam thei che, mahse, a lehpek a awm tur a ni lo," Sangzuala'n a ti nghet charh.

A ṭhutna aṭanga tho chhuakin, "Patea khan ka ta tur lehkha a hnutchhiaha damdawi in i chhuah hun ka nghâk char char a, kan awm kim lai hian ka'n chhiar ang e," tiin a kekawr ipte a zen a, envelope a rawn phawrh ta a.

"In tân patea nih ka tling lo a, in laka ka thil tih zawng zawng chhût lêtin ngaihdam tlâk ka ni hek lo. Ka thil tih sualin a nung chungin min ei chhe mêk a; ka unaupa Duhzuala fate laka rilru chhe lutuk ka pu hi Pathian hremna ka tâwk niin ka hria, min ngaidam duh lo a nih pawhin Kimkima tal kha chu lo ngaidam hrâm rawh aw, keima fuih khaw loh vek a ni a, a mawh ka phur ang, Sangzual, tuna i rilru ang kha pu zel ang che, ngaihdamna leh hmangaihna ngah i ni tih ka hria, i patea hian engah mah ka tluk lo che a, ka hun tawpah i hmel ka hmu ngam ngang lova he lehkha hi ka hnutchhiah ta zawk che a ni. Kimkima kha lo ngaidam hram ang che aw, khawngaih takin ka ngen nawn leh a che, Bazar venga kan in pakhat kha i hmingin ka dah a, i lo pawm hram dawn nia. I unaupa Ruatdika'n engkim a buaipui fel tawh a, ka ngaihdam dilna cheah min pawmsak theih chuan ka lawm hle ang." Tia a chhiar zawh hnuah, "A bâk hi chu chhiar kher a ngaiin ka hre lo," tiin lehkha chu a ak ṭha leh daih. Kei misual hian ka va chhiar zo châk e.

Eng emaw chen kan ngawi ṭhap a, "Naom, min ngaidam thei ang em?" Tia Kimkima'n min zawh thut chuan ka phu zuk.

"Ka pasal hi i û a ni a, min hmangaih tih ka hre bawk, ka pasalin a nau a ngaidam thei a nih chuan a nupui amah hmangaihtu hian engvangin nge ka ngaihdam theih loh ang che, ka dik lohna pawh tam tak a awm ve tho a nia," tiin ka nui ta hak a, "Â, ka sawi kual chiam thiam lo, tikhan a ni tawh mai," ka ti ta ringawt a, an nui vek. 

"Ka lawm e, ka lawm tak tak," hnukulh ṭeuha Kimkima a ṭawng chuan Mimtein, "Anni chauh ngaihdam dilin lawmthu i hrilh bîk a, kei ve hi..." tum bárin a lo ti a.

"Nangte chu dil dil i ngai hleinem, min ngaidam lo la min enkawl duh náng, hria maw.." tiin Mimtei a nuih a, kan va hlim si êm..

A naute pahnih inhnuaia an chhuk hnuah Sangzuala room-ah a rawn lût a, "Nichina i thil sawi kha a ṭhat teh reng nen a tâwp lam kha..." tiin a nui huk.

"Kal mai teh.." ka lo ti hlak.

"Kimkima engkim ka hrilh veka pawisa chungcháng leh amah khul chhuah nan i pawisa kan hmang tih a hriat khan a inthlahrung lutuk a," a ti daih a, "A ho tawh em mai, i ta, i pawisa, tih vel hi ka ngei," ka ti a.

"A nih leh ka ta, ka pawisaa ka lei, ka ta aṭanga ka siam chhuah hmelṭha deuh hi..." tiin  Bawihtei a melh a, za zet hian a nui nghek, "Liansangzual," ka ti vin ṭhat.

"Bawihtei hi a ṭha hlang ka pêk che aṭanga lo chhuak a nia, a dang pawh nei leh mah ila an tluk tawh lo ang," a la ti hrâm.

"Vawikhat pawh khatiang kha han sawi leh teh," tiin ka samkhuih ken lai chuan ka tin uaih a, nui huk chung hian, "Vawihnih dang ka sawi leh nghal loh," zuk ti ṭalh a.

Ni e, a ṭawngkam chimawm zet zet hi ngaia ka neih mai a ngai dawn, huat awm viau ni lo mah se ka run tawk a tling ṭhin.

A chângin puitling thlup mah se a mize ho tak, sipai ze ṭhenkhat kha a la paih thei tak tak lo. Sipaia ṭang ka hriat ve te hi ho tak tak an tam ve a, an vaiin ni vek lo mah se an ho deuh tlângpui chu a ni e.

Mahse ka duh tho, min hmangaiha kei pawhin ka hmangaih. Amah vang hian chhungkaw hlutna ka hriat phah nasa, ka zah ru em em bawk.

'Ani hi nei la i tisual lovang, kan thu awih rawh' tia ka nu leh pa sawi te, amah Sangzuala ngeiin, 'I hrehawmna thlentu ka ni lo ang, ka thu awih la i nihlawh a ni mai' tia a sawi te kha a thleng dik ṭan chu a ni e.

B®®

B+>[BeckirafARenthleI]<+®®