24.NAOM[Mizo Love Story]-B®®

24.NAOM [Mizo Love Story]

Ziaktu: Becky Rafa Renthlei

B®®

Shadow of the life

"Vawikhat pawh khatiang kha han sawi leh teh," tiin ka samkhuih ken lai chuan ka tin uaih a, nui huk chung hian, "Vawihnih dang ka sawi leh nghal loh," zuk ti ṭalh a.

Ni e, a ṭawngkam chimawm zet zet hi ngaia ka neih mai a ngai dawn, huat awm viau ni lo mah se ka run tawk a tling ṭhin.

A chângin puitling thlup mah se a mize ho tak, sipai zia a la paih thei tak tak lo. 

Mahse ka duh tho, min hmangaiha kei pawhin ka hmangaih. Amah vang hian chhungkaw hlutna ka hriat phah nasa, ka zah ru em em bawk.

'Ani hi nei la i tisual lovang, kan thu awih rawh' tia ka nu leh pa sawi te, amah Sangzuala ngeiin, 'I hrehawmna thlentu ka ni lo ang, ka thu awih la i nihlawh a ni mai' tia a sawi te kha a thleng dik ṭan chu a ni e.

B®® 260721

Nunphung pangngai kan zawh ṭan a, Chawngdingpuii pawhin thla nga a pum ve ta. Ka nu leh pa zan thum riakin an lo zin ve a, "Mambawih, i fanu hian a nî a chhun hle mai, Mimtei fa niawm tak a ni," a ti nghe nghe. Thla nga chauh a la ni nain a fel reuh hle a; a ṭah tawh vêk vêk chuan kan chhung buai ziah. Hnute tui pangngai hne lova 'Nan' hlir a hnêk vangin zan lamah a tlângpuiin kan mu tlêm, Mimtei'n kum khat a tlin hunah riahpui a tum deuh bur tih a sawi. A duat mai siah.

Pate Duhsanga khan a fapa Ruatdika hnenah engkim a lo hrilh vek tawh avangin Bazar venga an building pakhat kha Sangzuala hmingin an dah ta a, an sak zawhna pawh a la rei lutuk lo a ni awm e; thil mak ve deuh mai chu a nupui fanau ten sawiselna pakhat mah an nei lo hi a ni.

"Sangzual, ka nu leh pa vang hian unau pawh kan inunau hleithei lo a, i nu leh pa damlaia kan awm ang khan chhungkua dik tak niha inzawm leh ka duh, ka nu  pawhin min pawmpui thlap a nia," tiin Ruatdika'n Sangzuala a hrilh a, an unau boruak a dang ta hlawk.

Mimtei pawh a vannei a, nurse Saitei'n a nau neih chawlh a lâk chhunga a âi kal turin a sawm a, a tîrah Sangzuala'n a rem ti lo deuh dawn a; mahse, keimah zawkin Mimtei tana a ṭhat thu leh experience nei tam na na na chu hna hmuh a awlsam bîk, tia ka lo sawi avangin min hnial ta lo. 

"Nám, i buai ka rin vang a nia, inchhung chêt leh neuh neuh tih tur a tam a, Mimtei a awm loh chuan Kimkima enkawl pawh i kutah a tla lo thei dawn lo asin; keimah awm tho mahila mipa leh hmeichhia kan ṭangkai dan a inang lo," a la ti hram a. 

"U Naom, i nau neih buai laiin engah mah ka ṭangkai si lo a, mi âi ka kal leh daih chuan a buaithlâk lutuk ang," Mim-in a ti ve bawk. "Ram hna thawh tur a awm lo a, i û hlawh ringawta khawsa kan ni bawk nen tlêmte i lo thawh chhuah ve pawh a hlu a, kan vaia kan ṭan tlan a ngai zawk," ka tih deuh tlat avangin min hnial zui ngam ta lo a ni ang, thla thar aṭangin a ṭan ve dawn ta.

A dik chiah bawk. Sangzuala hlawh kan ring a, ka khawl sa ve kha a nau khul nan kan hmang tawh bawk a, a pension-a a chhuahpui hi a tlêm chhe hran lo. Chuti a nih rualin puitling ṭhiau awm kan ni a, kan hautak ru ve riau. 

An hmeichhe neih chhun tal hi chuan hna nghet nei ve hram se ka duhpui hrim hrim, nakinah pasal a chhia a ṭha a la duh ve dawn a, keimah anga pasal te ring hlawm tawp turin ka duhsak lo. Kei chu ka vannei êma nu leh pa mitmei ven tur awm lovin ka mo a, mi ina han mo hian thawh chhuah eng emaw tal neih loh chuan inthlahrun a na tih ka hria, thiam bîk thil pakhat tal neih ve hi ka rilrem ta riau.

Kimkima pawh a dam ṭha sâwt viau a, a ṭawng tam lem lo khawp mai, Tb damdawi a ei chhunzawm zel a, kei nen tak hi chuan kan inbe tam lem lo, ka hua tihna ni lovin han ṭawng hluaha biak seuh seuh ang chi kha ka thiam zâwng a nih loh avangin thil ṭul tawpah lo chuan kan inbe lo tih theih a ni.

"Nám, joint account hi hawng ve ila ṭhain ka hria, vawiin lamah i va buaipui teh ang," Sangzuala'n a ti a. 

"Bawihtei tunge awm ang a?" Ka lo ti hû.

"A patea bulah a lo awm ve thei mai ang, thermo flash-ah hnute siamsa dah ila, kan rei dawn hleinem," a ti awlsam mai a, ka rilrem zawng a ni vak lo.

"Ang lo lutuk, engtin nge a buaipui ang, bâkah Kimkima kuta dah teh ngawt ka duh lo.." ka ti nghat a.

Min en vang vang chung hian, "Ring ngam rawh, a tina miah lo ang, kei min rin ang hian i rin ngamna tilang la, tun ai hian in inpawh zawk bawk ang," a ti sup.

"Aih" ka lo ti tlat.

"Ka fanu a ni a, a nat ka phal hleinem, a tina dawn lo tih ka hriat vanga sawi ka ni bawk, ka thu awih la, insiam rawh le," hnial theih miah loh hian a ti nghut a, ka nuih a za lo.

"Join account chu hawng rih lo mai ang, ih, Bawihtei nen inah kan lo awm zâwk ang e," zawi têin ka ti leh a.

A dinna hmun aṭanga pen sawnin, "Vawiinah kan hawn ngei ngei a ngai, i hmakhua ka ngaih vanga ti ka ni tih hria la, inhnial ka duh miah lo a nia, Dingpuii i bualfai chhungin a hnute tur ka lo siam ang," tiin room-ah a lût zui daih.

Mimtei tal chu awm se a zia ang maw le, Kimkima ringawt han rin chu ka ngaihdan a va ni lo tak. Tun ataka joint account hawn han tih ṭhat leh, Liansangzuala tak hi chu(h).

"Kimkima hnenah kan chhuah tur thu leh Bawihtei awm a ngai tih i hrilh dawn nia," tiin min la nawr cheu. Chhân pawh ka chhâng lo.

Phur lo zet hian Bawihtei ka bual a, chumi hnuah hmanhmawhna tel miah lovin ka insiam leh a, Bawihtei vaccine lâk hun leh ka inzaina incheck up tura kan kal tih loh kha ka nau neih hnuah vawikhat mah ka chhuak leh lo. Bazar ngai leh chhuah ṭulah Sangzuala a kal deuh ber a, Mimtei a awm chuan a kal ṭhin bawk. Ka khawhawi a zîm teh a nia.

"Mate, lo chho lawk teh.." tiin Sangzuala'n a nau a ko a.

Kimkima lo chhoh hnuah, keimah zâwkin, "Chhuah lawkna tur kan nei a, Bawihtei lo awmpui la a hnute hnek tur siamsa kan dah hi i lo pe thiam ang tiraw?" Ka ti ta nge nge. Min en vung vung a, chutah, "Thiam ang," ti chauhvin min chhâng a, ka va han duh khawp lo tak.

"Lo haw hma kan tum ang a, a tlei duh loh chuan min lo call vat dawn nia," tiin Bawihtei chu a kutah ka hlan ta a.

"Lo ngaihtuah suh u, a patea hian ka awm tlei lutuk ang," tiin a khi suk a, ka chhâng zui ta lo. A dik a dik chuan ka ngaih a ngam zán lo deuh; Sangzuala ka ngei ru takzet.

Kimkima nen kan inbiak chhung khan ngawi rengin kan bulah a lo ding a, eng emaw tak a sawi ve ka rin nen kan chhuah dawn thleng pawhin ṭawngkam khat mah a chhâk chhuak lo. Luhlul nger ngur si. 

Car-a ka ṭhut luh hnu pawhin ka tum bûr, min en zawk a, nui suk chung hian, "Titau rual pawh i ni tawh lo a nia, inrem angin lang mah ula inboruak ka hai hleinem, chhungkua chu inpawh tlâng taka kan awm loh chuan a nuam zîk tluak ngai lo, a nihna taka sawi duh chuan Bawihtei pawh i pawm tîr phal ṭha lo a, ka hai der mai mai a nih kha," a ti ta a.

"Tukverhah te a lo thlâk thut thei asin, a pawi tawh hnua inchhir ai chuan inven a ṭha," ka ti ve hmak.

"Naom.." a ti hluk.

Ngawi duh bîk lovin, "Hmánah ka hrilh tawh che kha, mi ka ring hmaa ka rin anga an awm loh chuan ka ring leh mai mai thei tawh lo," ka ti ve tlat.

"I pasalin fîm taka ka ngaihtuah hnua a ṭha, a rin tlâk tia ka sawi a nih chuan, awih hmiah rawh, i natna thlentu nih ka tum lo tih ka sawi lo em ni?" A lo ti ve bawk.

"Kan hria ang chu.." tiin pawnlam ka thlir daih. Tb a ni bawk si a, pawm tîr loh hrâm tumin ka peh hêl ngar ngar tih ka hria, Tb ka hnual suat vang nilovin thla nga emaw lek a la ni a, inven a ṭha tih thilah sawi lang lem lovin ka pawm tîr duh lo. Sangzuala'n min lo chîk hle tih ka hriat phah. 

Bank kan thlenga mi an lo tam ang reng. 

A hmelhriat a hmu nual a, Lawmkimi leh mipa pakhat an rawn inzui lut ve a, "Naom ka be lawk thei che ang em?" Tia min rawn din hnaih chuan Sangzuala ka melh zauh a, a lo bu nghut.

Kan ṭhutna chhak lam kawngkhar hnaihah Lawmi nen kan kal hrang ta a, 'Eng thil nge?' Tiin ka zawt a.

Inthlahrung tih hriat ngawih ngawih hian, "Ka chêt dan a mawi lo hle a, min be duh lovin min hua pawh ni la ka dem miah lo che, Kimkima lo kan ve ka duh em em a, mahse amahin min hmu duh tawh si lo a, keima thiam loh vek a ni, min ngaihdam theih chuan ka lawm ngawt ang, kan naupan lai aṭanga inkawm tawh kan ni a, min duh lo tu leh min hmangaih ve miah lo tu Sangzuala ûm zuia sual chhuah tlat kha ka ât vang vek a ni, khawngaih takin min haw suh aw," tiin ka kutah a rawn vuan a, a mita zahna leh inthiam lohna lo lang chu ka hmuh hmaih bik lo.

"A hun lai kha chuan ka hua che, mahse, hun liam tawh a ni a, mi huat kan neih hian mahni kan inti hrehawm tel ṭhin, kan nupa inkâr a ṭhat a, chhungkua kan hlim chuan a tâwk viau mai, mi nupa inkara inrawlh te, mi chhungkuaa  buaina thlentu nih te hi thil ṭha a ni lova, Sangzuala te unau hi i ṭhian ṭha an nih tak tak chuan an ṭahna thlentu nih tum lovin an harsatna leh an lungngaihna thlen ngamna tur nih i tum dawn nia," ka ti dam thlap.

"Ka lawm e, i puitling bik êm mai, Sangzuala'n a hmangaihna chhan che pawh hi i rilru ṭhatna a hmu thiam a nih ka ring, i phal chuan nautê en pahin Kimkima ka lo tlawh ve ang, a hmaa lokal ka tumin, 'Naomi ngaihdam dil hmasa rawh' tiin Kimkima'n min hrilh a, chuan ka thurûk ka la hrilh ve ang che," tia nui var var chung hian min kalsan ta a.

Sangzuala bula ka lêt lehin, "I va bêng êm lo maw?" Tiin a nui huk.

"Eng vangin nge ka ben ngawt ang a?" Ka tih chuan, "I haw ve thei em a, i thîk ber ṭhin kha a ni bawk a," tiin a nui ruh ruh.

"I chhia a nih chu a, i lerh dáwk dáwk em alawm," ka ti nghat.

"Ka lerh loh zia a hrilh tel na che nge, min duh lo chung ka ûm zui a tih ka ring," a la ti zui.

"Ngawi mai mai rawh, i ṭawngthei si.." ka'n tiah. A nui suk ringawt.

Kan in peih fel meuh chuan dâr hnih a ri dawn tawh a, Kimkima phone ka tum a, "Ngaihtuah duh suh, harsatna a neih chuan a rawn phone em em ang che, bazarah kal kual teh ang," a ti leh daih. 

Chu mi hnu chuan inchhungkhur pawimawh leiin kan tei kual hrep a, kei ai pawhin lei tur leh ngaimawh a ngah zawk.

"Joint account hawn ka tihna chhan chu hma hun hriat a ni lo a, ka nau te pahnih aiin ka ring tawk che, ka nupui i ni bawk, Bawihtei a fel ve ṭan tawh a, kan la ṭha lai dun a, eng emaw tak eizawnna bul fûk kan dap ve a ngai, sum lut leh chhuak din hmun i hriat ve vek ka duh vang a ni," a ti ta a.

A hma khan ka mamawh tur min pe tawp a, Lucknow-a a awm chhungin inchhungkhur enkawlna tur a rawn thawn tih loh a sum neih dan leh a chhuahpui zât ka hre lo; Kimkima khul chhuah a ngaih khan a thuphungin min sawipui zuai a, a hnuah eng vak a sawi zui lem lo.

In kan thlenga a lo reh ṭhiap. Mimtei hospital-ah a duty a, zanin a tlang nghal dawn. In chhungah kan lut a, Kimkima te pahnih ka hmu miah lo; kan room ka ena a ruak hiau, hmanhmawh lutukin in hnuaiah ka chhuk nghal a, Sangzuala'n min zui ve bawk. 

A nau rin ngam hi harsa ka ti ru deuh.

Kimkima room kawngkhar ka hawng rawp a, ka thil hmuh chu leh! A kil lamah Bawihtei tui deuh hian a muhil a, amah si deuhthawin a patea a muhil bawk, ka thaw huai huai. 

Tih harh hlau takin dimtein kan chhuak leh ta a, ṭawng ka tum chuan a mitmeiin min khap a, ka dârah vuanin a hmaah min kal tir a, in chung kan thlen veleh, "I pasal hian hun awl remchang ka'n chuh ve lawk ang e," tisupin kan room ami bathrobe pahnih inkhai chu a ban zui zat a, a ngaihna ka hre lo deuh.

"Hawh le, an mut tui lai tak khuan inbual rual ang," zuk ti a.

"I â siah... i ho," ka lo ti vak.

"Kan inbual rual theihna tur a nih te chuan vawithum ka â nawn leh ang," tiin bathroom-panin min nam phei dat dat a, ka lo nui hak.

"Le, hmanhmawh ang, an lo harh hmain," ti leh supin a thawmhnaw inbel a phelh nghal sawk sawk a, "Ka hlihsak kher che i phût chuan ka phur zawng tak," ti lehin a nui kur kur.

Shower hnuaiah kan ding dun a, scrubber-in ka hnung a nâwt hauh hauh a, "Bawihtei kan siamna hmun kha duhthusama ṭha a ni a, a dawt leh tur hi chu ka thlang fimkhur vak tawh lo ang," tia nui hukin a lam hawi turin min kuai her a.

"I zak lo, khatiang khan ṭawng mai mai zel suh," ka lo tih chuan, "Zak teh suh ei, min hrechiang telh telh anga ka zah loh theih dan i hre tam tulh tulh ang, hria maw," tia rawn kun hniamin min rawn fawp ta a, min fawp reng chungin min din sawnpui hlek a, a kut phah hlai hlupa min tawhna chu a hmuiin a chhui zui zat bawk.

Ni e, kan nupa kârah zah theih lohna ni lovin zah loh theihnain hmun a chang fo ṭhin. Ka pasal tan hian eng hunah pawh inpeih tum ila nupui ṭha ka ni mai; ka damlo te a nih ngawt loh chuan, khum laizâwla nupa kan hlimna hian kawngro thui tak a su ṭhin tih ka hrechiang thawkhat tawh.

A tak ram dai thlenga nupa nun kan hman zawh hnuah fai sara inbualin bathrobe min hâk tîr a, "A hmun a awm a, a hun a awm bawk, tun dinhmunah chuan kan khum aiin helai hmun hi a fuh zawk," tia ka bânah vuanin min chhuahpui ta a.

Ei rawng ka bawl laiin a patea'n Bawihtei a rawn pawm chho a, "Naom, ka ril a ṭâm lutuk.." tia min lo biak chuan, "In muhil tui lutuka ka kai tho duh lo che u a nih kha, Bawihtei kha i û pawm tir la, thingpui ka lo siam ang che," nui var var chungin ka ti ve ta.

Tlai lamah ka nu nen kan inbe zuai a, u Chhanhima leh u Diki an inti thiam lova Champhaiah a haw tih a rawn sawi chuan, inṭhen hlen a ṭhat loh thu ka sawi ve a, "A duh chen chen han awm rawh se, ka kham rih, i û in a ti mauh mai si a, inṭhen hlen chu ṭha kan tihpui bik lo," tiin a sawi.

Ka nu nen kan inbe zo chiah tihah u Chhanhima'n min rawn be ve ta tho. "Bawihi, lo zin ve u la, Diki a awm lo," tiin a rawn nui a, kan va han inhrechiang si êm.

Nui kar kar chung hian, "A awm loh laia kan lo zin chuan min rawn ṭim hrep mai ang," ka lo ti a.

"Engmah hi ka hai hleinem, nautê a nei ve ṭêp tawh a, koh ka tum rih lo, inṭhen hlen phei chu ṭha ka ti miah lo nain ngaihsak khuchûk lo ila insiam ṭhat nan te a hman phah hlauh takah a hrim hrimin kan pahnih hian insiam ṭhata awm hran kan mamawh ve ve," a ti ve ngei.

Lo zin zâwk tura ka tih chuan, "Tak takin ka pa entîr pahin u Chhandama te kan va tlawh ang e, helamah an rawn awm phei thut mai thei a, hmaichhanah titipui ka duh, chanchin ka lo hrilh ang che," tiin kan inbiakna a ti tawp a, ka thawveng huai mai.

An inṭhen hlen ka ring chuang lo a; mahse, ka u sawi ang khan insiam ṭhat an mamawh ve ve avangin hetia awm hran rih hi ṭha ka tihpui ve tho.

Sangzuala ka hrilh ve a, ani lah chuan, "I u Chhanhima mi â a ni hleinem, a nupui zia te chu nangni aiin a hrechiang zawk daih dawn a, mipa a che ve a nih chu," a ti duh lek.

"Mipa chêt hun ka lo ngaichang ang," nui chunga ka  lo tih chuan, "Tunah i hmu duh em, nge zan danga kan tih ṭhin dan angin Bawihtei muthilh hun kan nghâk leh rih dawn?" Tiin a nui huk a, ka va ngei tak.

Hepa hi chu e, a ho Chatuan dawn a nih hi..

Zankhat chu inhnuai aṭangin Kimkima a rawn chho a, room-a kan lo awm tawh avangin, "AuMam, Naom, ka lo lut dawn a nia," tiin a vawikhat nan kan nupa room-ah a rawn lut ve hlawl.

"Eng nge ni ta?" Tiin Sangzuala a tho chhuak a, mak a ti ve deuh a nih hmel, ani hi chu kan room-ah a lo lut ngai tlat lo a!

"I bike kha an hmu tawh a nih chu," a ti a.

"Eng a?" Ka lo ti hliai a.

"Eng lo a nia, Mama bike hralh anga ka insawi kha ka hralh lo a, miin min ruksak vang zawk a ni e, Aizawlah Chaltlangah an lo hmu a nih chu," tiin a sawi ta a. Sangzuala a meng buai nak.

"A rutu in hre tawh em?" Tia a zawh chuan, "Aw, Masiami nau Muanawma kha a nia, a rûkin ka chhui tír alawm," a ti leh zel.

"Naktukah hma kan la dawn nia, Námi u Chhandama hi Aizawlah a awm a, ka lo bia ang e, tih dan tur min ruahman pui thei ang," Sangzuala'n a ti zung zung a, "Bâkah Tlanhlua cousin Inspector Rspi pawh a biak theih tho," a tih zawm leh a. 

"Mama, ka tihbuai dan zawng zawng che u ka ngaihtuah hian zahna hlirin ka khat, nang pawh Naom, i chunga ka chêt dan te kha a vaiin ka chhui lêt fo a, ka zak ngawih ngawih asin, ka nu leh pa khan min hmu ve reng awm si a, an rilru a na dawn êm mai, min ngaidam rawh u aw.." tia hmai hupin chhuatah a ṭhu hnawk a, ka khawngaih leh si.

Khum aṭangin ka tho chhuak vat a, Kimkima va pan ka tum lai takin Sangzuala zawkin a kâi tho ta a, "Mate, ka patea'n ngaidam rawh u, a tih vanga ngaidam che kan ni lo, ka nau, ka thisen zawm, hun harsa tak paltlanga ka enkawl i nih vang te, he khawvela ka pianpui unaupa awm chhun i nih vangin ka hmangaih che a, ka ngaidam thei che, ka ngaidam bawk che," tiin Kimkima a kuah ta a, ka ṭah a lo chhuak ve ringawt.

Sangzuala pawh a meng sen râm mai. Mimtei aiin Kimkima hi a hmangaih zawk emaw tih rum rum a awl; mahse, a hmangaih ve ve a, a hmangaih dan erawh a inang lo thung.

"Nám, thingpui lo va chhuang ta che, saw lamah ṭhu phei teh ang u, a la hma tho a, i u Chhandama te chu thil awmzia kan hrilh nghal ang e," Sangzuala'n a ti a, hnial buai miah lovin choka lamah ka phei nghal.

U Chhandama hi 1st Battalion MAP a ni ka tih tawh kha, hmelhriat leh biak theih tur a nei ve nualin ka ring.

"I bike i ui zia ka hria a, sualin in lakah rilru chhia pu mahila hralh duhna thinlung ka pu lo, mahse, ka rinhlelh kha Masiami nau Muanawma a nih tlat avangin hralh angin ka sawi ta zawk a nih kha, khami an hriat vang kha alawm Masiami nu leh pa ka lakah an ṭhat em em, tunah chuan kan boruak a chhe ta sa sa, ka chhui zui ta zel a nih hi, Chaltlanga a ṭhianpa a kawl tîr a," tiin a hming leh address ziahna a û a en tir nghal vek.

"A ṭha e, a la hralh hman loh chuan naktukah a fel duak mai ang, ka bike a ni a, i hralh lo takzet a nih chuan i û hian mawhphurhna ka la ang, hahdam deuhin awm rawh," tiin a nau darah a bêng thak thak. 

"Masiami te lam pawh vengthawng lo la, eng emaw sawi buai an tum a nih pawhin sawi ve tur ka nei ang," a ti leh zel.

"Ka dam ṭhat hunah ka zirlai ka zawm leh min phalsak thei ang em?" Tiin min rawn en a, Sangzuala'n a chhâng dawn emaw ka tia a ngawih tâk daih si-ah chuan, "Ê, i duh phawt chuan i zawm dawn nia, a la tlai hleinem, kan inah pawh i duh chuan i awm thei a nia, 'Bar Exam' i pass hun hunah ka ngaidam fulfill ang che," tiin ka nui ta a.

Sangzuala te unau pawh an nui ṭhá.

Kimkima chhuk hnuah khumah kan titi a, "I phakar thei e," ka ti sap a.

"Eng nge?" Tia min zawh chuan, "I nauvin kan pahniha zawhna min zawh hian i chhâng duh ve ngai lo, keimah min chhan tir zel bik," ka ti ta a.

"A ṭha lam kawng zawh a duh chuan ka hnial lo a, nangma remtihna a pawimawh ve tho avangin power ka pe che a nih kha," tiin a nui nghek.

"Liansangzual..." tiin a malah ka va hmer vak a, "Eng nge, ka nupui hi power pek ve zeuh zeuh a ngai alawm, nichin kha i thu ve lai tak a nih kha, lawm hle rawh," tiin za zet hian a nui leh a, ka chhâng peih tawh lo.

A tûk khua a var a, Mimtei zingah a rawn haw a, tûkṭhuan kil laiin kan kim ṭhap. Bawihtei paw chungin chaw ka bar a, tukin lam a tlei ṭha duh tlat lo.

Sangzuala'n Bike chungchang leh a hmalâk tum dan a sawi zuai zuai a, "Muanawma biak hmasak kher kha thil tih chi a nih loh avangin Ruatdika'n hma min lo lâksak ang a, vawiin tlai lamah thu chiang a hriat ang, Rspi pawh a inhuam thui viau a nia," tiin a sawi.

"Kimkim, a tirah eng ati nge i hralh lo tih i sawi mai loh a?" Tiin Mimtei a zawt a.

Sangzuala zawkin, "Chutianga thar thawh leh a ngai lo, a hma a hma in tih zel chuan Bawihtei pawh a piang náng," a tih tâkah chuan kan nui vek. Mimtei a nui ring ringah a la ṭang zui. 

Chawhma chhung deuhthaw Sangzuala'n phone a hmang a, u Chhandama nen an inbiak bâkah Ruatdika'n a rawn call bawk. Chawhnu lamah Lawmi a rawn leng a, Mimtei a meng dur hle, "Zak lo siah" a ti sap a, a bânah vuanin a room-ah ka pawt lut a, hmannia kan inbiak dan kha ka hrilh ta a, "Ka la be peih chuang lo," a ti deuh tlat. 

Kimkima nen inhnuaiah an inzui thla ta a, Bawihtei pawh rei lo tê ka pawm tîr ve, naute en nân kawr pahnih leh pheikhawk pakhat a lo keng a, a ti ṭha ve reng reng e. 

A thurûk min hrilh tur kha eng tak ni ang maw, zawh hmasak tumna ka nei hran lo. 

Tlai lam dar li velah u Chhandama'n min rawn bia a, Lunglei Thána lamah FIR theh lut turin Sangzuala a hrilh a, a âi awhin Ruatdika a va kal dawn niawm tak a ni. Muanawma ṭhianpa Hruaia kha a lo ṭang na viau a nih hmel.

In hnuaiah Kimkima thawmhnaw sûk fai sa dah thla turin ka chhuk a, common room-ṭhutthlengah Lawmi nen inkuah chial hian an lo ṭhu a, Kimkima'n min hnungchhawn a, an lo infawp lek chu niin. Huiss khawvel han zim zia hi!

Dimtein thawmhnaw pawh dah ta lo chuan inchungah ka chho leh ta a, eng tin emawni ka awm, zawhna chhân sen loh ka inzawt ru mawlh mawlh a, Sangzuala hrilh nge ṭha ang hrilh loh.

Zanriah ei dawn ṭepah Lawmi leh Kimkima an rawn chhuak chho a, chaw ei ve nghal turin ka'n sawm khawmawi ve bawk a, Mimtei a ner náng. 

Mahse, Lawmi mi â ni hek lo, nui var var chungin Mimtei a en a, "Min haw tawh suh aw, ka thiam loh vek a nih kha," kan kim ṭhap laiin a ti a, Mimtei a ngawi reng. Veranda thleng Kimkima'n a va thlah a, "Ka duh leh ka hua ang a, duh leh ka haw lo ang a, ka thu thu," Mimtei'n a ti hmak. Ka chhâng lem lo. A ṭawng mi dangin an hre pha lo hlauh.

Sangzuala bike chungchangah Ruatdika'n FIR a lo theh lut fel tawh a, amah Muanawma pawh thu zawh fiah turin Thána lamah an la tawh a, a bike bera kha Aizawlah a la awm bawk si. Loh theih lohvin Kimkima Lungleia kal a ngai ta si a, amah chauha kal tîr chi ni hek lo; a û nen an kal ta poh a. 

Sangzuala bike kha a thar man phei chu a to viau a ni awm e, mahse, Guwahati lama a sipai ṭanpui ṭhin ta a lei chhawn a ni a, a nauvin a duh rêng vanga a hralh ni lova rûksak a lo ni tih a hriatchhuah tâk si-ah chuan a lawm lo lehzual. Theih tawp chhuah a tum tih a sawi.

Mimtei nen inah kan awm a, Kimkima leh Lawmi chungchang kha atu amah ka hrilh ta lo, hrilhna hun a la awm lo hrim hrim zâwk. Anni pahnih kha an lo inngaizawng ru ve reng ṭhin tihna nge, Sangzuala bialnu hlui a ni bawk si, â.. ka ngaihtuah thui peih lo.

Sangzuala te unau nihnih Lungleiah an châm a, nichin deuh lawk khan an rawn thleng ve chiah, Masiami nau Muanawma pawh a tawp a tawpah chuan a inpuang ta hram! U Chhandama leh Inspector Rspi-in Aizawl lamah theih tawp an lo chhuah ve bawk a, Bike pawh Sangzuala'n a hmu lêt leh dawn ta.

Muanawma erawh chu Kimkima nupui hlui nau a nih vangin Sangzuala'n a ngaidam a, Aizawl aṭanga bike an lo phurh pheina man tur tum ve thung turin an inrem ta niawm tak a ni.

"Mate, tunchinah chuan kan thu zawmin min ngaichang zel tawh ang che, nangmah avanga kan buaina te harsatna leh mualphona kan tawh nawn fo ka duh tawh lo a nia, he inchhungkhur nawmna leh nawm lohna chu nangmahah a innghat thui hle tih hria la, midang hi chu kan inrem vek, nangmah ber i pawimawh," tiin zanriah kil laiin a zilh nawn leh a, a nau pawhin huatah a la bîk lo.

Ni a ral a, Bike lo thlen aṭangin kâr khat dawn a liam leh tawh. Chhungkua kan hlim a, a bîk takin Kimkima a hlim zual, Tb damdawi a ei kha a ngeih bâkah zu a thlah fel veka a hmel hmuh a nuam sâwt viau; Dingpuii patea liau liau a ni mai, a hunawl zawng zawngah a chuh fai vek a, kan pawm chang mang lo. Zan lamah kan mutpui ṭâwk a ni deuh ber, Mimtei zawkin a kuah tlêm a, a duty loh kâr bakin awmna hun a nei si lova a nî aiin a patea a duh zâwk mah. 

"Nám, ruahmanna ka siam chhin a, i rilru lo sawrbing ve ang che," khuma kan mut hnuah Sangzuala'n a ti a.

"ARC Shillong-a thlakhat kan awm lai khan kan pension hnuah eng hna nge kan thawh duh tih min zawt a, chu chu fill up ngei ngei a ngai ṭhin, khatah khan forest guard tih te, bank security leh a dang pawh duh kan thlang thei a, kum 36 pawh ka la pum lova hetia engmah thawk lova awm ringawt hi chu ṭhain ka hre lova, rilru sen ve deuh a ngai a ni," a ti ta a.

"Chuan, eng tia awm nge i tum?" Ka lo ti a.

"A dik taka sawi chuan mi thuhnuaia kun leh hi ka châk teh chiam lo, mahni puala sumdawnna eng emaw tih ka duh zawk a," a ti dam thlup.

"Mahse, chutiang han tih mai tur a vang ê.." ka ti a.

"Chu tak chu kan sawi dun a ngai alawm, motor eizawnna atan la dawn ila driver lâk hran leh a ngai dawn a, a buaithlak deuh ka ti si, peipung lova hetia tâl liam mai mai hi a ṭha ka ti chiah si lo," tiin chal a chuar tap.

"Wholesale dawr siam ka châk, vai ṭawng i thiam em em a, Aizawl dawr lovin Silchar tih vel direct ta ila, a zia phian ka ring asin," ka tih chuan, "Kan ngaihtuah dawn nia, Security, forest guard tih vela ṭan leha awm hran kha ka peih zawng a ni tawh lo, i thil sawi chu ngaihtuahna zau zâwk nen kan la sawi dun dawn nia," a ti ṭha ve mai.

Masiami te lam an ṭawng nasa hle a, Lungleia kan inah te pawh a lo va âng tih ka nuin a sawi a, "Chhuankima khi ka chawmhlawm a nih khi, engmah ṭangkaina nei lo, chapo ve si," tih ang reng te, keimah pawh min chham nual a nih hmel. U Chhanhima'n a lo chhâng deuh hrep bawk.

Sangzuala ka hrilh ve leh a, "An duh duhin lo râk ve mai mai teh se, kan pum a na pha lo em mai," a ti awlsam êt.

Zan khat chu Chawngdingpuii a tlei duh tlat lo, zan tîr aṭangin a ṭap ngat ngat a, ka mangang hle, a pa pawh a phi chûk a, Mimtei duty naah kan va kal chilh tawp, a pum a nâ a nih a rin thu a lo sawi a, "A hnute in siam tak lutuk a nih ka ring," doctor in a lo ti a, a pum a mar deuh ṭung.

Tun lai tê hian ka khawih tam deuh ber a, Kimkima exam hmachhawn tura a inbuatsaih avangin a awm khât a, Sangzuala nise putea te in hnuai siam a pui nitin a, keimah min puh deuh titih. Damdawi in kan chhuahsan laiin a ngawi hmuk, Damdawi min chawh hnuah kan hawpui leh a, kawng lakah pawh eng mah sawi lovin a ngawi ngul a, nuam ka ti viau lo.

Kan room-a kan lût fel chiah tihah, "Fa pakhat chauh kan la nei a, enpui zel loh che chuan nangmahin eng mah i ti fel ṭhin lo, a hahthlâk hle mai," tiin Bawihtei ka puak lai chu, "Khawi, ka lo la ang," a ti nghut.

"Enpui zel ka ngai kher lo, min enpui loh a tam zawk," ka lo ti a, thinrima chhâng ka ni lem lo. 

"A nu i ni a, ani lo fa kan nei hek lo, thil dang zawng zawng aiin Bawihtei hi ngaihsak ṭha ang che, a hnute hnêk siam tak vanga damdawi in pan ngai rum rum te kha thil zahthlâk a ni tih hria la, tun chinah kan fanu aiin eng thil mah dah pawimawh hmasa tawh suh," tiin min ṭawngkhum erh.

"In chhung chêt a ngai a, khawih tur a tam ve bawk nen ka lo siam uluk lo deuh ṭhin a ni ang," zawi sapin ka ti a.

"Mi âi kal tura Mimtei ka duh lohna chhan pawh hei hi a nia, a thawh tur awm tawk chu ala hmu ve em em ang, ka sawi laiin 'kal a ṭha' i ti zung zung a, tunah inchhung chêt i chhuanlam leh lawi si," thinrim taka a tih leh chuan ka sa ve phat.

"I sawi thui tam em mai, ka duhsakna awkâ a ni tih i hre reng, engmah thawk lo se, hna nei lovin awm pawh nise ka tan eng a ni lo, i sawi peih lutuk," tiin ka chhuak daih a, sitting room-ah Kimkima ngawirengin a lo ṭhu a, kan ṭawng zawng zawng kha a hriat ve vek ka ring.

"Naom, inchhungah lo lut rawh, i hritlâng ang e," tia Kimkima ka bula a lo din chuan kut kuangkuahin hmalam ngun takin ka en a, veranda-ah dârkar chanve aia tam ka ding tawh.

Insût hraih chung hian, "Ka rawn lut ang, mu tawh rawh," ka ti sap.

"Mama zia chu i hriat chian kha, thinrim lo zawka ṭan a ngaih châng te a awm ṭhin a nia, a thin thawk thut a nih kha, ani pawh a tidik chuang lo, lokal rawh lut ang le," tiin ka koki-ah a rawn vuan a, ka ngawi reng.

"Nangni pahnih kha Veranda-ah in riak dawn a nih loh chuan rawn lut rawh u, khawngkhar ka kalh dawn a nia," Sangzuala'n a rawn ti hmuk.

"E, i duh phawt chuan kalh rawh, kalh hmiah rawh," ka ti ve ngat. Min chhâng lovin a lut leh daih a ni ang, nge ka ṭawng a hre lo zawk tih pawh ka hre chuang lo.

"Chhâng duh tawh miah suh, lokal rawh lût ang," tia Kimkima'n ka bânah vuanin, "Tikhan ngawi rengin awm la, a thinrim a reh ve mai ang," ti leh supin kawngkhar min panpui ta a, ka lo ṭang ṭeuh, Bawihtei ngaihtuah lo ila chuan ka lût miah lo ang.

Kimkima nen sitting room-ah kan ṭhu a, "Nangni pahnih tal hi chu hlim taka awm in phu, ka chhuksan ang che aw, ka sawi kha hre reng la," a tih chuan ka bu nghat a, min en vang vang hnuah inhnuai panin a chhuk thla ta a, kei erawh ka ṭhutna aṭangin ka chesawn eih lo.

Rei fe ka ṭhut hnuah kan room lam ka pan ve chauh a, an pafain khumah an lo mu a, Bawihtei tak chu a muhilin ka hria, Liansangzuala'n phone a khawih a, chhe te eih pawhin min en lo, ka thawmhnaw pawh thlâk lovin khum mawng lam aṭangin ka lâwn a; ka biak hmasak a tâkah.

Khua han var se putea te inah ka kal loh pawhin ka pazawn pa Ropuia te inah ka kal hrim hrim ang. He laiah chhung leh khat ka nei lo tih a hrereng a, mi han eng emaw hi a châk ni berin ka hria.

Ka thiam chu ka ti vek bik lo. Mahse, inhauna áwm hi a awm ve. Lutuk hian a...

B®®

B+>[BeckirafARenthleI]<+®®