7.NAOM [Mizo Love Story] -B®®

7.NAOM

Ziaktu: Becky Rafa Renthlei
B®®
Shadow of the life

Ka lam a rawn hawi a, "In chhungah lut rawh ka rei dawn lo," ti supin bike a start a, "Aih, kal suh..." ka lo tih chuan, "Lût rawh ka tih chu, vawi khat chauh ka thu sawi hi zawm ve rawh," ti nghutin a tlan chhuak lui ta tho.

Khatiang bâk chuan dan ngaihna ka hre lo a, ka thiam lo bawk.

Ni e, eng kimah ka thiam lo fai vek.

Mimtein veranda aṭangin min lo thlir reng a, a hmai ka zah lutuk.

A û an zah a, an ngaisâng bawk a, an hmuh laia inhau ka duh loh teh reng nen engkim ka ti khaw lo zo ta vek a nih hi.

Insût hraih chungin Mimtei awmna lamah ka phei ve ta a, ka ṭah a chhuak a, ṭah vak vak ka duh ber tun boruakah hi chuan, Sangzuala rilru na hmel kha hmuh hrehawm ka ti. Hrehawm ka ti thlâwt.

B®® 020721

Mimtei pawh be lovin room-ah ka chho tlang a, zawi sapa min kohna kha ka hre reng; mahse, tun dinhmunah chuan tumah ka be châk lo, mahnia awm ka duh ber.

Sangzuala nena kan mut dunna khum chu melhin hman zana kan chêt dan kha ka mitthlâah a rawn lang iar iar a, a mitmeng thûk leh ril ruiha min en lai te, "Ka ta i ni, ka ta chauh i ni," tia duat taka min kuah laite kha tun lawka thil thleng ang maiin ka thinlungah a fiah a; ni e, engkim mai hi 'i thinlung phêkah ziak rawh' tiin min hrilh a, ka ziak lo emaw ka tih laiin leh rei lo tê chhung chauh inkawp ni mah ila ka thinlung a luah fai hneh hle.

Mi dang tân ka phal lo a, dik tak chuan pasal neih leh duhna rilru hi ka put lohna a rei tawh; mahse, Sangzuala ka chân ai chuan rilru ka thlâk leh thei alawm, ani tluka min hre chiangtu mipa ka nunah an awm dâwn em ni? Bâkah a rilru tumtlang leh nghet churh te, sipai thinglung khauh far, thuneihna keng tel hi ka tan a ṭha; tuna ka nun dan min thununa min zilh ngamtu chu Liansangzuala chauh a ni.

Khumah ka ṭhu thla hnak a, mahni inkhawngaih vangin ka mittui a tla fap fap, ka nu leh pa tih loh chu innghahna tlâk ka nei lo a, anni pawh an upa chho ve zela ka nuṭa ten min duatin min ngaihsak fo ṭhin mah se nupui nei an ni tawh a; tun hma kan pha thei tawh tak tak lo.

Eng pawh ni se Ruatdika rual kher lo pawhin chawhnu chhuak Sumo-a haw ka tum mai ang. Hetiang boruak teh hrepah te chuan châm chi pawh va ni suh.

Khum kil lam bang hnaihah ka mu a, rizaiin ka inkhuh vek bawk a, ka mittui a tla leh fap zel, room light ka off vek tawh a, dâr zât pawh ka en lo. Ka duh dan takin tuman min rawn tibuai hek lo.

Kawngkhar kik ri dat dat ka hriat chuan hawnsak tumna ka nei lova, Mimtei pawh ni se Sangzuala pawh ni se atu amah ka be châk rih lo a ni ber.

Beidawng duh hauh lovin tu emaw hian ala kik char char a, a tawpah phei chuan, "U Naom, kei mah, lo hawng teh," Mimtein a rawn ti a.

Ka la tho ta chuang lo. Chêt pawh ka che eih lo.

"Mawh, lo hawng hrâm teh..." a la rawn ti. Ani pawh hi dam thliam angin lang mah se a tih lohnaah chuan a luhlul tho. Kan inang tlâng vel vek.

Ka va hawnsak ta nge nge a. Pawnah ṭi dâka lo dingin, "AuMama a lo la haw lo, ka phone-a a ring ral ṭhak ṭhak," a ti a.

"Puitling a nia lawm, a lo haw ve mai ang," ka ti ringawt, kal lo tura ka hrilh lai khan, 'ka lo haw har lo ang' tiin a sawi a nih kha, mak tak maiin ka ring hmiah. Hlauhthawnna em em ka nei miah lo.

"I mak, pakhat mahin AuMama hi i ngaihtuah ve miah lo em ni, i lo duh tak tak ngai lo a ni maw?" Thinrim áwka vin ṭhaka a tih chuan, "I ngaih dan a dik lo a nih chu, ka rei lo ang a tia, a lo haw ve mai ang," dam thlap hian ka chhâng a.

"Tun thlengin a lo la haw loh hi..." a ti leh a.

"I û hi ka ring tawka nangni unau leh keima rilru hrehawmna turin eng thil pawi mah a ti lo ang, ka lakah a lungawi lo deuh a, chu vang a ni e, a lo haw hunah ṭha takin ka lo titi pui dawn nia," tiin a darah ka vuan a, "U Naom..." tiin min rawn kuah a, û ang tak takin min en tih ka hriatna hian min ti lawm.

Chumi hnu chuan a room lam panin a chhuk ta a. Keipawh khumah ṭhuin Sangzuala phone ka tum a, switch off a inti tlat; Mimtei bulah tiang khan sawi mah ila ka rilru erawh a nuam chiah lo, a chhuah aṭangin dârkâr hnih a liam tawh a, khawiah chuan va kal ni maw.

Mihring rilru put hmang hi a lo mak thei khawp mai. Kan inkawpna a la rei loh avangin inneih nghal rum rum kha harsa ka ti a; Sangzuala erawhin tun hmaa min hriat tawhna leh ka nun hlui hre vek chungin ka lakah beiseina a nei a, hun rei lo tê chhung inkawp ni mah ila, a nupui atan min pawm thlapin inneih a duh nghal. A tîr aṭangin vawi te khat mah rilru a sawh sawn hek lo, a dinna ngaiah dingin nupui atan min sâwm thlap.

Nupa te inkâr chauhva hman tur nupa nun min hmanpui hnu pawhin min hmusit phah lo a, min kalsan lovin a nupui atan min la sawm zawk a ni a, ani ni lovin keimah hi a ni thiam lo zâwk, ka dik lohna ka pawm thlap. Duh reng siin duh lo anga lan phêt ka tum a, ka nih ang ang hian lang ngam ila kan inkâr ṭha lo a fel duak mai tur...

Muthilh tumin mit ka chhing a, Sangzuala hmêl hlir ka mitthláah a lang. Sipai pa hian min va tibuai tak.

"Nám, i muhil em?" Ka mutna khum a hniam sat a, Sangzuala aw ka hriat chuan ka puansin theh sawnin ka ṭhu chhuak nghal a, a lo luh lai ka hre miah lo. Ka khumah a lo ṭhu reng tawh a, Mimtei chhuah hnu khan kawngkhar ka kalh tawh lo tih awlsam taka a lo luh theih dan aṭangin ka hre mai.

"Muhil lo.." ka ti sap a, amah pawh ka en chuang lo.

"Naktuka min hawsan chu i la tum ṭâlh em ni?" Tia zawi supa min zawh chuan, "Ruatdika rual ni lovin chawhnu chhuak tur Sumo-ah ka haw ang," ka ti a.

"Nám, min en teh," tihpahin ka khabeah vuanin amah en turin min kuai dâk a, mit ka khap sak sak. Nichina ka ṭah vang khan ka mit leh hnâr a sen ang tih pawh ka hria; ka ṭah apianga awm ṭhin a nia.

"Kum 30 i tling tawh a, nang aiin kum thumin ka upa zâwk a, puitling taka kan awm hi a hun viau lo maw? Khatiang thil kan tih dun hnu phei kha chuan inṭhen mai mai tur kan ni hleinem," a ti a.

"Eng nge min ngaihsak duh loh, Lawmkimi kha i eng nge a nih a?" Ka ti hmak a.

"I thik em ni?" A ti sup.

"Thik chiang e, nangmah avanga lo zin ka ni a, i naute pawh nang mah avang bawka hria ka ni a, min ngaihsak lova khatia mal taka min awm tir kha ka lawm bik lo," tiin ka ṭhut dan ka siamrem a, tun bâk sawina hun ka neih tawh loh tâkah.

"Ka ngaihsak lohna chhan che i hre duh tak tak em?" Tiin khumah a rawn lawn a.

"Aw, i mikhual ka ni a, i bialnu ka ni bawk, khati chung khan kei aiin Lawmkimi i ngaihvena eng rilru nge i put?" Ka ti ve zel a.

"A dik tak chuan hmeichhe zu in hi eng atan mah ka ti lo, a ruka i in kha ka hre lo emaw i ti em ni? Tu nen nge in in tih lam ai chuan zu in duhna thinlung i pu kha ka hua, pasal ṭhen tawh i ni a, eng emaw hlekah hmingchhiat a awlsam bik a, nula pangngaiin an tih reng kha nuthlawiin a tih ve chuan mi hmuh dan a dik lo ṭhin. Tin, nupui atan ka duh che a, ka sawi chiang bawk; nupui zu in mi neih tumna ka nei lo," chiang fakin a ti ta a.

"Nia, ka thiam miah lo," ka ti a.

"Vawiin nileng pawhin ka mood a off vek, ka nu leh pa lungphun ni-a hlim taka ka awm i beisei thei bîk lovang, nizanah i rui a, biak theihin i awm lo a, eng rilru nge pu se min tih bik? Ka be châk hlawl lo che a ni e," a ti hmiah.

"A nih te chuan Lawmkimi chu nei la ti nia." Ka ti a.

"Lawmkimi duh ila i lo chhoh a ngai lo ang, ani ni lovin nangmah alawm ka duh che, i awm danin zir se a ni ka biak pawh a ngai lo ang, Mim-i nen in indun tih pawh ka hria, mi awm laia hau che u ka duh loh avangin thinrim in up ṭûnin ka inthiar fiihlim tih hria la..." a ṭawng dan aṭang pawhin a lawm lo tih a hriat hliah hliah.

"Ka thiam loh vek, i nau pawh hau kher a ngai lo, ka in tawh lo ang," ka ti a.

"I insiam ṭhat ve hlek hlek a ngai a nia, tuna i awm dan ang hi chu a ṭha lo, i thu i duh si, i luhlulin pawisak i nei bawk si lo a, hmangaihtu tan lo chuan dawhtheih a har viau ang," a tih chuan a hmel ka en vat a, "Min hmangaih tihna mi?" Tia ka zawhna chu nui suk chung hian, "Hmangaih lo che ila chuan nupui ka nei daih tawh ang, nuthlawi chimawm zet i ni chung pawhin ka la beisei zel che a nia, ka â ngawt mai," a ti nghut a.

"Âtna thlarau ṭha mi dawn ve zauh châng te pawh neih tur," ka tih chuan ka chalah a pen kawrh a, "Mi hi chu i tibuai ve ngawt mai, Ruatdika a ni emaw mipa hrim hrim hnaih tawh suh ang che," a ti leh a.

"I va huam zau tîr deuh ve, Kimkima leh Tlana pawh ka be tawh miah lo ang," nui chungin ka ti a.

"Anni ka sawi tel lo, chimawm suh, i hre thiam reng," a ti hluk.

"Mipa an ni ve tho alawm," tia ka chhân chuan, "Naom.." tia min kuahin, "Ka thinrim ber lai pawhin ka duhna che a kiam chuang lo; mahse, zu i in leh chuan na dawn mah ila ka kalsan ang che," a ti ta a.

"Ka in tawh lo ang ti na na na a.."

"I in leh chuan ka ti reng alawm le," tiin ka lamah lo kûnin ka hmui a fawp zauh a, rei a ni lo.

"Ngaihdamna paruk ka neih zinga pakhat ka hmang leh dawn ta chu a nia, min fawh hmasak ngei ka phût bawk," a sawi zawh rualin ka hmai bulah a rawn kûn deuh kher a, ka va ngei tak.

"Sangzual, sual suh..." tihpahin nawr sawn tumin a kokiah ka vuan a, a che duh ṭhak nang.

"Ka sual lo tih i hriat vang alawm min runluih reng, tun aṭang chuan ka khauh far far tawh khawp ang," a sawi zawh rualin min rawn fâwp a, îhê lovin ka lo fâwp lêt ve nghal. A taksa lumna ka tem theih nan min kuah nghet sauh a, engtik laiin nge a bula ka mut tih ka'n hriat miah lo chu le.

Pasal neiin nupa nun vawi tam lo hmang tawh tu ka ni a, Sangzuala bula ka awm ang hian vawi khat mah ka la awm ngai lo, duh thawh taka min fawh ngat phei chuan a bâk duh belhna ka nei zel hi ka thiam loh nge ama thiam loh.

Ni e, vawikhat mut dun tawh chuan a lehpek a hring a, inngaizawng lai leh inthlahlel ngawih ngawih; tuma chim buai loh leh dîp dal tu awm lo ta chuan Seol kan dai thleng leh nge nge e.

Hmangaihna chen dun kawngah duhthusama zei leh pa a ni, hei ringawt pawh hi thlâkhlelh tham a ni e, rui lo hai lova ti kan ni bawk a, a hun laiin zak lo angin lang mah ila, thaw hawk chunga ka sira a rawn mut thlâk meuh chuan zah avangin ka sa chhuak vek.

"I ta ka ni a, ka ta i ni bawk tih hi sawi nawn ngai tawh suh se, ka hmangaih ang che hian engtikni-ah emaw chuan min la hmangaih ve ngei ka beisei," a tih chuan, "Ka hmangaih che alawm," ka lo ti a.

"Dâwt sawi kher loh tur, min duh tih ka hria, min hmangaih tur erawh chuan hun i duh rei ve deuh ang, a chhan chu maw, mipaah rinna i nghat ngam lo, mahse, ka nghâk thei che," dik zeta a tih chuan sawi ber tur pawh ka hriat si loh.

"Ka hmangaih che tih ka sawi a, i awih leh bawk si lo," a âwmah beiin ka kuah chial a, nui hawk chung hian, "Khatiang tih zawh hnuah te chuan ka hmangaih lo che in tih chi a nia mi?" Zuk ti a!

"I chhia..." ka ti a.

"Ka chhe lo a ni ang, Sangzual kal suh, tia min koh ṭâwk ṭâwk kha," a ti leh kher.

"Muhil ang," chhan ngaihna ka hriat tawh loh vangin ka in let zui thak a, a nui huk.

"I tlâwm ve teh tlat, khatiang khan ni zel rawh se," tiin puan min sin ṭhat tîr a, ka mut a chhuah tawh êm avangin ka chhâng zui ta lo.

Ka harh leh chuan Sangzuala'n min lo la kuah reng a, a la mu tui khawp mai, a hmai fang dik zet chu ka en vang vang a, amahin min kalsan hmasa a nih loh chuan kalsan tumna ka nei ta bîk lo.

Inngaihzawnna kawngah hian mi rilru nghet tak ka ni a, mipa 'ka duh' tia ka zui a nih chuan rinawm taka awm mai hi ka tih dan a ni. Chutiang chiah chuan an lakah beiseina ka nei a, ka beisei anga an awm lo a nih erawh chuan engtikah mah ka ring leh tawh ngai lo.

Nizan khan Sangzuala kalna ka zawt miah lo a, Ruatdika kha a lova hau hrep ang tih ka hlau deuh. Sana ka en a, zing lam dar nga a ri ṭep.

Muthilh leh dawnin a laklawh tawh si, thawh chhuah ka tum ta a, dimtê hian min kherhna a malpui dah sawn sak ka tum chuan, "I harh a, i men ve dêk dêk tawh hi chuan inring renga awm a ngai," ti supin min kuah mu leh daih.

"I harh rengte chuan tho ve mai ta che, Mimtei'n min lo kai tho mai thei a nia," ka tih chuan, "Min rawn kai tho turin ka zuk phone dawn em ni, hetia kan mu dun lai hi min hmu se, insawi thiamna tur nei lovin kan inru nghal tihna a ni mai," tho phang tih pawh hriat miah lohvin a nui kur kur a, ka ngei tâwk a tling thei.

"Liansangzual..."

"Eih, eng tikah nge duat deuh hian min koh ve ang le, a mak fawl fawl thei e," thinrim tawh lovin a ti a, a malah tlawhin, "I kâ hi a va kaw ngawih ngawih tak," ka'n ti ngawt a.

"Nang chu i kâ lo pawh a kua, a hnawhna tur ṭha deuh ka hre bawk," nui hawk hawk chunga a tih chuan a chungah pakaiin a samah ka kêk nawk nawk a, thinrima ti ka ni lo bawk a, eng tin mah min ti lêt lo hian, "I kawlh ngaiin i la kawlh reng a, mahse, i zei vak lo," a la ti hrâm.

"I chhe lutuk, i chhe siah," tiin a inrin hman hma chuan a hmuiah ka fawhsak ta a, a makti hmel ka hmu hman vuai. Chutah uar zeta fawp nawn leh ngatin, a boxer hâk kâwngah ka chelh a, 'ka phelhsak ang nge phelhsak lovang' tia ka inngaihtuah lai takin, "I thinlungin a duh ang khân che rawh," hawisawn pahin a ti a.

Ni e, zak leh tur chuang ka awm tawh lo, ka duh anga che chhuak ngam turin puitling ka ni bawk.

Duhthawh taka ka âwmbâwr a ṭhâm nawk nawk lai chuan thaw halh chung leh sawi buai tur awm miah lovin Sangzuala ta ka ni nawn leh ta, tun ṭum erawh pe chhuaktu-ah ka ṭang a, "Khà zet kha chu professional chêt dan dik tak a ni, Nám, ka lawm e," a mit menga phûrna la lang reng chung hian a ti a, ka va hlim si êm.

"Va intifai hmasa la, ka room lamah ka va intifai ve ang e, nupa tak tak kan nih hunah kan inbual dun tawh ang," tiin a saruakna zahpui hauh lo hian a tho chhuak a, ka en zui vung vung ringawt.

"Hnunglamah mit ka nei lo, mahse, min thlîr reng tih ka hria a nia," rawn hawi lêt chuang miah lovin a ti a, ka va zak tak.

Min chhuahsan hnuah intifai turin bathroom lam ka pan ve nghal a, kan awm dan a ṭha lo tih chu ka hria; mahse, ka hnar thei chuang si lo lai hi a ni, ṭha takin nakinah ka la sawipui ang.

Ka dara min kuah chungin inhnuaiah kan chhuk dun a, nizan kan boruak nen chuan inpersan tak a ni.

Mimtei leh Tlana an lo tho tawh a, kan pahniha min hmuh dun ve leh, "Ṭhenkhat te an haw leh dawn tâk si lohah chuan kei pawh ka châm mai ang," Tlanhlua'n nui vur vur chunga a tih chuan, "Mipa reng reng biak phalsak ka ni ta si lo a, Mimte, kan pahnih hlirin inkawm ang aw," ka ti ve kher a, Sangzuala a nui ruh ruh.

"AuMam, nizanah khan khawiah nge i kal daih a?" Ka zawh tum tak a nauin a zâwt hlauh a.

"Khawiah vak kal lo e, Thlanmualah ka ṭhu," a ti liam puat a.

"A ni maw, u Ruatdika i va kal chilh ta emaw ka ti," Mimtei bawkin a tih leh chuan, "Mai mai a, Ruatdika a thiam lo a nih chuan Naomi pawh a tel ve tho tihna a ni a, inngaihzawnnaah hian pakhat chauh dem tur an ni lo a, pakhat ringawt puh loh tur, Ruatdika va zawh mualpho ai chuan ka bialnu Naomi zawh mai kha a ṭha zawk," ka rin loh deuhin a ti ta daih a. Ka ring sual leh ta.

Kei ni ta ila, Lawmkimi kha ka va hau duh mai ang, Sangzuala erawh chutiang ni lovin midang laka intih mualpho ai chuan duh min thlan tîr hmiah kha a nia, ka ngaisang sawt.

Nimin lam sulhnu chhui tur a tam avangin kan buai chhunzawm ta a, fatuho pawh an rawn lang leh a, chawhmeh bâng a tam bawk si, chaw ei leh vek turin Sangzuala'n a sawm a, nula lam pawh an lokal bawk a. Lawmkimi hmel ka hmuh rualin ka down lek lek.

Sangzuala kalna apiangah a zui a, Mimtei lah chuan, "U Naom, meinei deuhvin ka va ti dawn em ni?" a ti leh pek a, "Ho lutuk, amah sawn i û nena an inkâr a hrechiang ber a, a zah loh phawt chuan chhim tawp thleng pawhin zui ang hmiang," nui var var chunga ka chhân chuan, "I mak ve thlâwt, kei ni ila ka titau tawh ang," a ti sap a.

"Ka titau peih lo, i û nen kan sawi fel tawh alawm, induh tawn ni se, sawtiang sawn a zuiin a tlawn peih lo ang, Sangzuala'n a duh lo tih a hriaa a rilru hneh tumin ṭan a la a nih saw, en liam mai mai rawh," tiin ka nui sak a. Ka rilru dik tak a ni bawk; min duh ngawih ngawihtu mipa hi kan zui cheng cheng ngai lo. Kan duh deuhin min duh vak loh hian an laka tlâktlum tumin kan hnaih zawk ṭhin tih ka hre kar.

Huis, mahse, ka thîk ru tho, Lawmi anga huaisen saw ni ila chuan Sangzuala taksaah ka bet reng ang, chutiang khawp chuan kan sipai pa hi ka'n duh tawh a nih chu, thil mak a ni.

"Ngaihzawng ka neih ve hunah i style ka copy loh atâkah," kalsawn paha Mimtei'n a tih chuan, "Tlana saw inzir nan hmang rawh," ka'n ti zauh pek a.

"Ka ten chi," a la rawn ti hrâm.

Nimin tlai ang lo takin Sangzuala'n min ngaihsak em em a, tukṭhuan pawh kan kil dun leh ta.

Lawmkimi erawh a meng thîp ram a, min huatna a thup hleithei lo a ni deuh ber. Sangzuala erawh chuan eng hu-ah a ngai lo a ni ang, min ngaihsak a ṭhulh chuang lo, "Nàm, nakinah thlanah kal leh lawk a ngai aw, bike in kan kal tawh dawn nia," a rawn tih leh phei chuan Lawmi a hawi tau hmak. 

Thlengsilna tur tui lum inhnuai ami bucket in ka la a, ka hnungah Lawmkimi'n a rawn khai ve bawk a, "Nuthlawi angaihna hre chin chu kan tluk lo deuh a ni e," a rawn ti kher a, chhân loh ka tum zet naa ka ṭhulh leh, "Chuti nuthlawi hmasa phawt la, hma i sawn deuh mahna," tia ka sawi zawh rualin ka hnungah tu emaw a rawn nui huk a, hre lo derin ka kal daih.

Silpaulin zar an hlih chhungin Sangzuala nen bike-in Thlanmual lam kan pan ve ta a, a hma kha chuan huphurh tak tein bike chuan ka huphurh a, tunah chuan a dan a dang ta. A taksà si thlapin a hnungah ka ṭhu a, ka confi sawt.

A nî te in bula kan tlan laiin Ruatdika a rawn hawi vung vung a, bân ka'n vai khum hram kha.

Ka runluih vang ni lovin a rualin ka haw dawn ta lo tih ka hrilhnaah ka ngai, kan inrem leh miau alawm.

Zanin chiah a kiangah ka awm thei ta, ka lung a lêng lawk.

Hetiang ka nih si chuan Lucknow-a min kalsan hunah ka awm thei dawn em ni?

B®®
B+>[BeckirafARenthleI]<+®®