8.NAOM [Mizo Love Story] -B®®

8.NAOM [Mizo Love Story]

Ziaktu: Becky Rafa Renthlei
-B®®
Shadow of the life

Silpaulin zar an hlih chhungin Sangzuala nen bike-in Thlanmual lam kan pan ve ta a, a hma kha chuan huphurh tak tein bike chuan ka huphurh a, tunah chuan a dan dang ta. A taksà si thlapin a hnungah ka ṭhu a, ka confi sawt.

A nî te in bula kan tlan laiin Ruatdika a rawn hawi vung vung a, bân ka'n vai khum hram kha.

Ka runluih vang ni lovin a rualin ka haw dawn ta lo tih ka hrilhnaah ka ngai, kan inrem leh miau alawm.

Zanin chiah a kiangah ka awm thei ta, ka lung a lêng lawk.

Hetiang ka nih si chuan Lucknow-a min kalsan hunah ka awm thei dawn em ni?

B®® 030721

Thlanmual bul kan thleng a, bike a luh theih loh avangin a pêngah bike a hnut chhiah a, "Bike chuan pawh i hnehsawh tawh khawp mai, ka pension hunah car kan la lei ve dawn nia, tunah chuan ti hian han chuang ve láwp láwp phawt mai la," tiin ka bânah a vuana thlanmual lam min pan pui ta a, eng nge kan tih dawn hriat pawh va ni suh.

"Lirthei tih velah ka buai lo, i neih ang ang kha a ṭha a ni mai," ka'n ti khawmawi ve bawk a, scooty nei mah ila ka khalh ṭha peih chuang lo, lirthei hrim hrim hi ka ngaina lo ti ila ka sawi sual lovang, tuna Sangzuala bike ang chi phei hi chu a zahpuiawm lo hrim hrim a. Mahse, amah zâwk a inthlahrung niin ka hria.

"Dingngheta anga hausa ka ni lo a, i duh duh nei theiin a siam che a, in inneih lai khan sum leh pâi tlâkchham i nei lo tih pawh ka hria, khatiang ang kha ka ni ve dawn lo a, rinawmna leh hmangaihna dik erawh ka pe thei thung ang che," a nu leh pa thlanlung hmaa ṭhu pahin a ti a, min vawnna thlah chuang lovin a sirah min pawt ṭhu ve nghal a; "Ni e, ka rinna ti chhe turin eng thil mah ti suh ang che, chu ti lo chu ka ring leh thei tawh dawn si lo che a," ka lo ti ve a.

"Helai hmuna ka hruai lehna chhan che hi min zâwt dawn lo em ni?" Tiin ka darah a kuah a, "Sawi la, niminah kan kal tho bawk si a," ka tih chuan, "Nám, i kianga awm reng duh mah ila tunah chuan ka la thei rih si lo a, kan awm tawh dan kha sawi nawn ngai lovin kan hre ve ve a, khatiang thil kan ti kha tumah dem tur an awm lova kan pahnih duh thlanna liau liau a ni," tiin a khuh kharh a.

"Ka sawi tum tak zâwk chu, tisa thil a ni emaw thinlung lam pawh nise engkim kan ti dunin kan sawi dun vek tawh a, ka ring tâwk bawk che; mahse, Pathian duh loh zâwng tih hrereng chungin kan tisual a, hre reng chunga tisual ka ni, Nám, i lakah ka insum zo lo a, khatiang thil ka tihpui che kha ka inchhir tihna nilovin Pathian pawi ka sawi a ni, chuvangin nupa kan nih hma chuan insûm ka tum tawh ang, mihring chu kan bum thei, Pathian erawh kan bum thei si lo a, ka nu leh pa hming chhalin ka sawi e," tiin ka kut a rawn hmer vang vang a.

"I thiam loh bîk a ni hleinem, ka sawi tum tak i rawn sawi chhuak hlauh a," ka lo ti ve a.

Chumi hnu chuan nupa kan nih hma loh chuan khatiang thil nupa te inkâr chauhva hman tur kha ti tawh lo turin kan intiam ta a.

"Tlana rualin kan chhuk ang a, bike ken pawh ka tum lo, kan chhuk lehna tur buaipui a ngaih bâkah Mimtei khan interview a nei dawn a, hruai a ngai tho tho bawk a, kan chhuk ho vek dawn nia, thla hnih vel chawlh ka la nei a; mahse, inchung ber hi ka awm laia khawih zawh hman ka duh si a," a ti leh a.

An in chung bang chhak lam zawng hi an la plaster zo lo a, chumi a sawina chu a nih ka ring.

"Kei chu ngaihtuah ka ngai lo a nia, min ngaihtuah duh suh, chanchin kan inhrilh thei reng tho alawm," tia tho chhuakin ka pawt tho ve nghal a, i chawlh neih chhung hian i tih tur ti fel thei la ka duh ber," ka ti a.

"Rei nghah ka ngai tawh dawn lo alawm, tuna ka chhuk hunah hian nupui neih ka tum tih ka sawi ang a, ka rawn chhuak leh ang, discharge ka dîl dawn a, a hun ve tho tawh bawk, chumi chhung chu rinawm taka i lo awm ka beisei," thu tak zetin a ti a.

"Naa, i hmanhmawh lutuk a nih kha, discharge dil kher a ngai em ni? Nang Lucknow-a i awm chhungin, kei in inah Lawngtlaiah ka lo awm ang a, i lo haw zeuh zeuh thung ang a," nui chunga ka tih chuan, "Chutiang a theih loh, kan innei a nih chuan ka bulah ka kiangah zel i awm ang, duh chuan quarter pawh a dil theih tho a, chhungkuaa kan awm duh te chuan..." a ti a.

A lo ngaihtuah lâwk vek tawh tih ka hrethiam mai, a sawi dan takah inngaihzawn rei ai chuan hmangaihna dik a pawimawh zâwk tih ka man thiam ve ṭan. A rei leh rei loah hmangaihna a awm kher lo tih ka tawng tawh tlat.

"Lucknow-ah awm la, in inah ka lo awm mai dawn nia," ka ti ṭâlh a, nui kur kur chung hian, "I rilru ka hria a nia," a ti a, a thinrim chuang lo.

"Eng nge, sipai nupui ni tur chuan fit a ngai dawn em mai, i hrisel ropui si, awm tlâng lova i lo haw zeuh zeuh erawh chuan ka lo inla fit leh hman zel ang," nui kar kar chunga ka chhân chuan, "Ngawi mai mai rawh, mi hi ngai khaw lo viau suh," a ti a, a nui ve tho.

Kawngpui kan chhuak phei a, Tlana car a rawn thleng ve chiah a, Kimkima, Mimtei leh Tlana an rawn kal ve chu niin.

"Inphakar thei siah, in kal dawn tih sawi ve ta che u, a rûk hian in bo leh daih zel," khi suk chungin Tlana'n a ti a, "In zui duah duah rual pawh kan ni tawh hleinem, haw kan tum tawh a," Sangzuala'n a ti a.

"AuMam, putea ten inpahnihin chaw eiah an sâwm che u a, in ei dawn chuan hrilh mai rawh aw," tiin Mimtein min en a, "An chhungkuain rawn ei zawk rawh se, patea te pawh an la haw loh chuan kan sawm tel dawn nia," Sangzuala'n tiin bike-ah a lawn a, "Kan lo va haw hmasa ang e, putea te inah kal kawi kan duh, lokal rawh le," tiin min melh zauh a, Kimkima'n, "Mama, patea te kha chu sawm lo mai rawh," a rawn ti a, ani hi a ṭawng tam lo khawp mai.

Sangzuala'n, "An châm ve lai a nia, kan sawm ve phawt anga an lo ei duh ta lo a nih leh an thu a nia," a ti ṭha mai. Atu amahin an hnial lui ta bik lo.

A putea te inah min hruaia anmahni in lama chaw ei turin a sawm ta zawk a, thingpui te kan in zawh hnuah a nî te inah min kalpui leh tê tê a, a pate Duhsanga te an lo la haw lo, an vaiin a nî te chhungkua nen chaw ei turin a sawm a, "Aw le" an tih ve kha, rei pawh awm lovin kan chhuak leh ta a.

An lakah a patea te hi ṭha lo mah se Sangzuala hi chuan a en hrang chuang lo tih ka hre mai. Ruatdika ka hmu miah lo thung, a haw nge haw lo tih Sangzuala ka zawh chuan, "Ani ngaihven duh suh, a pa tel lovin a haw lo ang," a ti deuh hmuk.

Thîk angin lang duh lo mah se a rûkin a thîk ka ring tho. Chuti ni lo se kha ti teh hmuk khan min chhang lo vang.

"Lawmkimi khan a ngaizawng chiang che," tiin in kan thlen hnuah ka zâwt a.

"I hre dik, ani lo pawhin min ngaizâwng.." tiin a nui suk a.

"Eng ati nge i duh loh, Lunglei aṭang pawhin i rualin a haw a, â, inni ve tawh chiang" ka tih chuan, "Midangah buai lo la, thîkthu chu neih tur mahse, thîk tûk loh tur, ani aiin ka duh zawk che," nui ruh ruh chunga tiin a insawi fiah duh ṭhak náng.

"I duh tak tak loh turah beiseina siam lo la, an zuam theih turin awm kher suh, in awm tlan hlek chuan a zui kual reng chea hmuh inhrehawm," ka ti leh ṭalh.

Thil danga min chhang lovin, "Kan thikthu a chhe ṭan tihna a va ni awm ve," a ti mai mai a, ka ngei tâwk a tling leh pek.

"Khatiang khan mipa dangin min zui kual reng se, i lawm bik dawn em ni, i thik loh a tâkah.." ka ti zel a, "Thík dawn chiang e, nimina Ruatdika nen in awm tlan lai pawh khan ka thîk; mahse, ka ring tâwk tho che," a ti leh lawi si.

Chokaah kan awm a, Mimtei te an la rawn haw loh avangin Sangzuala'n, "Chaw ei tur kan nei sia eirawng lo bâwl lâwk ang," a tih vangin kan pahnihin eirawng kan bâwl a, ti ṭhang tih hriat takin a che zung zung a, ka en leh zauh zel.

"Zu i in ngai miah lo em ni, beer pawh," tiin ka rilru kam reng tu ka zâwt ta nge nge a.

"Ka in i ring em?" Tiin min zawt khauh.

"Ka hre lova ka zâwt rêng che alawm le."

"Class 12 ka pass khan ka in ve a, ka in hmasak ber leh a hnuhnung ber a ni bawk, a ṭangkai tam lo em mai," a ti satliah.

"A nih leh i room-a i dah ṭhat kha tu tân nge i tih a, i in ngai si loh chuan," tiin dîl chhût zet hian ka zawt leh a.

Vawksa rêp chhum tur siam mawlh mawlh pah hian, "Fatuho khan min chah a, ka pe vek tawh, ka quata pawh midang ka kian zel ṭhin, a in duh chuan in se ka sawisel phâk a awm lo a, ka in a tan erawh ka duh lo, ka nupui tur ngat phei chuan a in tur a ni lo bur," a'n ti deuh kher a.

Sawi belh tur rêng rêng ka hre lo, in regular ni lo mah se a chang changa a in ve tho ka lo ring kha a ni a; mahse, dâwt sawi hmel a pu si lo.

"Lunglei kan thlen hunah inhualna zungbun kan en dawn nia, a ṭul ber lo nain chhinchhiahna eng emaw ka dah loh che chuan buaina kan nei palh ang, a thun chi lah kha result kan la hre har dawn sia," fiamthua tiin a nui hawk hawk a, ka va ngei tak.

"Ngawi mai teh," ka ti tak nain ka nuih a za lutuk a, a sawi awmzia kan hre ve ve.

"Dâwt ka sawi hleinem, kan tih zawh chiah khan han puar nghal deuh pawp se ka ngaih a ṭha ang maw le," a la ti tak deuh deuh a, "Sangzual..." ti ṭhatin ka fian ken lai chuan ka tin uaih a, a nui nasa tulh tulh.

"Mi bulah te min fiam ang e, sawi awm leh awm loh hre ve rawh," ka ti nghat a.

"I nu leh pa bulah, Naomi hi in lo chîk deuh dawn nia, ka kalsan rih dawn si a, a râi leh rai loh min lo ngaihven sak r'u aw, ka ti ang," tia a sawi zawh rualin ka fian ken lai a thlâwk phei nghal a, a lo thle sawn zauh, "I thin chhiat dan a ṭang khan a insiam ṭan a ni ngei ngei ang," a la ti cheu.

Hepa han chimawm dan em em hi, chhân pawh chhâng tawh lovin ka tûm hmak a, ka bulah rawn kal hnaiin, "Ka duat i nih kha, titau lo la, induat hun chhung kan neih tlêm tawh em hi.." la nui reng chunga tiin ka kâwngah a rawn kuah a, ka biang leh a biang sîk tîr chung hian, "Nám, ka ngai ngawt ang che," a ti sup a. A thu tak hmel ta deuh.

"Vawi khat mah khatiang khan min fiam tawh suh, a zahthlâk a nia," ka la ti hrâm. "Ka fiam che tih i hre chung pawhin i thinrim tho a, i Sangzuala hi ka zei viau lo nge ka zei mah mah.." tia rawn kûn hniamin ka hmuiah a fâwp zauh a, kawngka pui aṭanga khuh kharh ri kan hriat chuan kan inthlah chiang teh e.

Ka ṭawng ve hmain Mimtei a rawn lut a, nui var var chung hian, "In haw hma chhan ka hria a nia aw u Naom," a ti a.

Zak lo ang taka lan tumin, "Ngawi mai teh," ka ti sap a. Sangzuala a nui ruh ruh.

"Ka hnawksak tâkah naktuka ka ken tur thawmhnaw ka han siam ve lawk ang e, AuMam, u Naomi te inah ka thleng mai ang," a ti leh a, "Leh ngawt ngawt a che, kan la sawi ṭha dawn nia," Sangzuala'n tiin Mimtei a room-lama phei chu a en zui vung vung a, "In zu in rûk ka hau lo che u kha lâwm hle rawh u, a lehpek a awm a nih chuan ka ngawi tawh lo ang, Mim-i hrilh ang che," a ti teh daih.

Ni e, mipa insûm thei tak a ni a, a thinrimna pawh vawilehkhatah a âu chhuah pui ngai lo tih ka hre tawh. Thu pe âw in ṭawng ṭhin mah se pa zaidam leh thil hrethiam tak a ni. A naute pahnih a enkawl danah sawiselna tur ka hre lo a, a bîkin Kimkima phei hi chuan a zah leh zual; Mimtei hi chu tlêmin a nau deuh a, a û zah tho mah se a fiam bawrh bawrh ngam.

Tlana leh Kimkima lo haw laiin chaw chhum tur ka lo siam a, Mimtei leh Sangzuala an inbual a, Ruatdika te pafa, a nî te chhungkua bâkah a putea te nupa an rawn ei dawn chuan chêt vat vat kan ngai.

A putea hming hi Biakrema a ni a, annu erawh Maliani tih bâkin ka hre lo; an fate an nula tlangval tawha nupui pasal nei an la awm bîk lo. Zanin tlaiah erawh chuan chaw an rawn ei ve dawn lo niawm tak a ni.

Mimtei a rawn inpeih tawh avangin inbual turin in chungah ka chho ve ta a, ka thawmhnaw nizan lama ka siam fel vek tawh avangin duh hun huna chhuak mai thei turin ka inpeih. Tlana motor-ah kan chuang vek dawn a, Sangzualate khawiah nge an innghah dawn ka zâwt miah lo, nichin khan Mimtei'n sawi lo phei se chuan zawh nachang ka hre leh pek dawn lo. Ka tlaw ṭhin teh e.

Sangzuala a room-ah a zai rût rût a, a inbual zo tawh a nih ka ring, a patea te inah an thleng duh chiahin ka ring lo a, Tlana te inah innghah an tum a nih ka ring ve ringawt, nakinah ka la zâwt chiang ang.

Fai ser sawra ka inbual hnuah ka room ka phiat zuai zuai a, keimah tih loh tumah an la riah tîr lo a nih hmel. Hman ṭhan a ang lo êm mai.

"Nám, i hman dawn tawh em?" Room pawn lam aṭangin Sangzuala'n min rawn ko a, ka la hman loh thu ka hrilh hnuah min chhuksan ta a, englai pawha inzui reng kha nu leh pa awm lo mah se thil mâwi pawh va ni suh.

Zanriah ei a hun a, kan kim thawkhat viau. A nî te chhungkua pawh an lokal vek a, an fanu naupang ber chuan min en leh vung vung zel. Ruatdika te pafa an lokal ve tho a, a putea te nupa an ṭawng bawrh bawrh laiin midang erawh an ngawi dâk.

Zanriah ei hmain Sangzuala'n thu a sawi a, "Ka châm theih chhung a rei si lo a, chhungkua inhmuh khawm a harsat avangin zanin tlai hian hlim takin zanriah ei i la, ka nu leh pa awm tawh lo mah se putea te chhung leh patea te chhung kan la nei che u a, kan vannei hle a ni. Nangni awm lo ula chuan keini unau hi heti ve mai kan ni a, nangmahni vanga tun hi thleng thei kan ni," a ti dap dap a.

Thu dik tak hretu ṭheuh kan ni a, a patea te a la fak thei hi a fakawm thlâwt.

"Inhmel hriattîrna mumal pawh kan nei mang si lova, ani hi," tia min rawn melhin, "Naomi a ni a, Pathianin rem a tih chuan kan innei ve thuaiin ka ring, chhungkua vek kan ni a, thil zep ṭît ṭêt a ṭul ber lo a, kan hma hun tur sawi thei lo mah ila, mihringte'n ruahmanna kan siam lo thei si lova, nupui neih hun ka ni ve tawh..." tiin a nui deuh a, Mimtei'n min lo melh deuh ngei.

Chhungkaw tana hriat tur eng eng emaw a sawi hnuah a pute Biakrema ṭawngṭaina hmang turin a sawm ta a.

Kei hi ka hnâr a fing riau a, zu rim a nam leh huk zelin ka hria. A tu berin nge in tih ka hre lo nain Tlanhlua ka ringhlel deuh ber.

Zanriah kan ei laiin Sangzuala patea nen kan ṭhu duna ṭawngkam khat mahin min be lo, Ruatdika leh Mimtei teho hmun khatah an ei thung a, nichina zu rim ka hriat kha tu dang nilovin Sangzuala patea hi a ni, a lo luh aṭangin an biak loh chuan vawikhat mah a ṭawng lo a, en chian deuh phei chuan a rui tih ka hre mai.

Ṭawng thawm kârah ka ei kham thuai a, ka puar leh puar loh pawh ka hre lo; a chhungte hriata a nupui tur anga min sawi vang kha nge a nî pawhin min be miah lo a, nimina Ruatdika nen kan kal lai khan nelawm takin min biaa tunah chuan min en hrek hrek ringawt.

A putea te nupa erawh an dan pangngain an polite-in an fel hle. "Naom, lo zin leh ngei ngei ang che," an ti a, an rilru hre mah suh ila a lawmawm ve hrim hrim.

Chutia kan rîk laih laih lai chuan Veranda lamah thâwm a rawn awm a, Mimtei âw a ni. "Ka pate, eng thil..." tia a sawi zawh hmain a ri bur a, hmanhmawh lutukin ka tlân chhuak nghal a, ka thil hmuh chu leh!

Veranda chhuatah Kimkima a lo let reng a, na tuar tih hriat takin a hmui a pet ruh tlat bawk. A bulah Mimtei hlauthâwng tih hriat lutukin a ṭhu bawk a, Kimkima malpui aṭang chuan thisen lo chhuakin Mimtein a hup bet a, "AuMam..AuMâm.." tiin Sangzuala a ko tuar tuar a. Chêt mai nachang ka hre lo.

Sangzuala patea erawh chemte kawihthleh theih chi keng chung hian a ding khur dur dur a, thil awmzia ka hre thiam uar!

Sangzuala leh Tlanhlua, Ruatdika nen an rawn tlan chhuak a, Ruatdika'n a pa chemte ken chhuhsakin thinrim zet hian, "Zu in ve tlâk i ni lo, eng thil pawi nge i tih i hria em?" Sangzual, engtin pawh ka pa hi ti la, demna che ka nei lo ang," a ti hmiah. A sawi zawh rualin a pa chu a pawt nawk a, a nîin a zui ve bawk.

Mimtei erawh chu nurse tih takah a hlim chhawna a tâl buai deuh tih lohah chuan a pangngai leh nghal vek a. Kimkima in chhungah an zawn lût a, khur dar dar chungin an bulah ngawi rengin ka ding mawl tawp.

Ka va han lâktlâk loh tak.

"Mim, Tlana nen damdawi inah Kimkima hi lo va hruai ula chanchin min rawn hrilh dawn nia, khawiah mah sawi chhuak suh ang che u, an lo zawh hlauh che u chuan amah intipalh angin in sawi dawn nia, an zawh loh che u chuan eng mah sawi a ngai lo," Sangzuala'n a tih chuan, "AuMam, ka ngawi dawn tawh lo," Thinrim mitmeng alh phâtin Mimtei'n a ti a.

"Ka sawi ang chuan ti ang che u," Sangzuala'n a ti hmiah. Eng rilru nge a put ka hrethiam phâk lo e.

Mimtei te zui ve ka tum a, kawngka ka thleng hman tihah, "I kal ve a ngai lo aw, inah lo awm la, midangho hi khawiah mah sawi chhuak lo turin lo hrilh rawh, ka patea te kha ka'n umzui lawk ang e," tia bike chahbi lain ka chhânna pawh nghak lo hian a chhuak nghal a, rei vak lovah chak zeta a tlân chhuak thawm ka hre nghal.

Khatia kan buai nuai nuai lai khan Sangzuala putea te nupa ka hmu ta miah lo a, damdawi inah an kal bawk si lo, Ruatdika te pafa kha an zui ve a nih ka ring teh ngawt.

In chhungah Sangzuala nî fate an la awm a, an ngawi dâk hlawm. Min en duh deuhtu an fanu lam hawiin, "I u Sangzuala'n khawiah mah sawi chhuah loh tur a ti a, mi hrangin an hriat chuan chhungkaw mualphona a thleng thei a nia," tia ka sawi chuan tumah an ṭawng lo, hlauthawng hmel an pu vek a, an khawngaihthlâk ang reng.

Kei ni ila police hnenah ka report hmak ang, hetiang em ema thisen zawm ve si rilru chhia hi hrem tlâk a ni.

Sangzuala nî fate zinga upa ber Mapuia chuan, "U Naom, u Kimkima kha a thi lo ang tiraw?" A ti a, "Ka sawi thei lo, Pathian thu thu a ni e, in inah haw phei ula, ka sawi ang khan tu bulah mah sawi loh tur," ka ti leh hrâm.

Ka thu sawi zawmin an haw ta hnak hnak a, zanin tlai chhungkaw chaw eikhawm boruak zet chu ka rin phâk bâk a ni.

Ka nu phone-in thil thlen dan tlângpui ka hrilh a, khawiah mah sawi chhuak lo tur leh ka û te pawh hrilh lo turin ka ti a, "Duha te chu pa ṭha a ni ngai rêng rêng lo, zû a duh si, eirûk vanga hausa a nia, a tih awm tâwk lek a nih chu," a rawn ti zêk.

"Vak vak a che, a ruih vang a nih kha," ka ti a, "An boruak a zirin i châmin i châm dawn lo nia, Sangzuala a khawngaihthlâk em mai," a ti a, kan inbiakna ka tih tawp hnuah keimahin in chhungah ka tei rak rak a, Mimtei phone ka tum ûk a, an buai deuh ka rin avangin ka ṭhulh leh.

Engvanga han vit ringawt nge maw a nih le? Kimkima'n mi pawi a sawi loh teh lul nen a patea ka haw takzet. Police-ah report dawn se chhungkua an mualpho pherh érh dawn a, Sangzuala te unau ka khawngaih hle.

A tu amah an rawn lêt lawk si lo a, Tlana ka call ta nge nge a.

"A malpuiah a lo vit a, a ruh a khawih pawi lo hlauh e, nachhawknain an jection nghal a, a chemte hman kha a hriam êm a, an ṭhui mêk, ngaihtuahawm lutuk a ni lo turah ngai ang," a ti a.

"Mimtei a ṭha maw?" Ka ti a.

"Aw, ani pawh ka bengdai tawh e, khapa ka hnek hman lo kha chu aw..." a ti nang nang a, ka hriat thiampui lutuk. Sangzuala ṭhian nimah se Kimkima nen room khata riak dun an ni a, an inzui chawt bawk.

Sangzuala chanchin an hrilh tawh leh tawh loh ka zawh chuan phone a pick thei lo tiin a sawi a.

A patea te nen eng tin tak inbia ang maw? Kut a thlâk êm chu ka ring lo ve tawp, ka ngaihtuah zawng ringawt pawhin ka thâ a la khur thei. Mi hrang kut tuar chu ni se thuhran; a pa unaupa ngawih ngawihin a vit duh a nia, ka râp hluah hluah.

"Zaninah chuan tih theih a awm chuang lo a, zingah in lokal mai dawn nia, Mimtei nen kan riahpui phawt ang, Sangzuala kha lo enkawl ṭha rawh aw.." a tih leh hnuah kan phone a dah ta rih a.

Sangzuala chhuah aṭangin dârkâr hnih dawn a liam tawh a, mahni chauhva awm pawh a nuam chuang lo. Chanchin tal hrilh ṭhaa ka hriat avangin ka phone ta a, vawihnih a ring zo ṭêp tihah, a la ve hrâm, "Ka lo haw dawn," tiin phone a off nghal daih.

Naktukah pawh ka haw theih loh hmel, Sangzuala sawipui phawt loh chuan an boruak tihi a ni si a, châm ve reng dawn ila mitmei ven a nâ ka ti deuh bawk si; ka kal chhan ber lungphun a zo tawh a, ṭhenawm khaw vengte mitmei a ven loh theih bîk loh.

A bike ri ka hriat rualin ka ṭhut dan ka siamrem vat a, engtia lo hmachhawn tur nge pawh ka hrethiam lo.

Pawr fap chung hian a rawn lut a, chauh hmel zetin sofa-ah a ṭhu hnawk a, min en lo hrim hrim, vanvadâkin ceiling lam a melh reng a, ka pawh mai ngam rih lo a.

Chutah ka lam a rawn hawi a, "Khawvel hi chu a hrehawm ngawt mai, engtikah nge buaina leh harsatna hian min kiansan ang le, kan hlim ve dawn chauh a, zahna leh mualphona bawk kan hmachhawn leh dawn a nih hi," tia thaw chhuak hawkin a hmai a hup a, ka khawngaih lutuk.

A bulah kal hnaiin a dârah ka kuah a, "Sangzual..." ka ti sap a, ka hnuk a ti ulh.

"Nàm, a harsa a ni, ka patea chu ni lo se chuan..." ti supin a inseh ruh a, a rilru tur ka hrethiam, mipa a ni a, keh thei dawma a dawm a nau duat em em, nu leh pa tel lova a lo enkawl Kimkima tina tu hi sawisa hrep mah se tumahin an dem lo ang.

"Mipa i ni a, pa takin le, hei leh chen hi an lakah ṭhat chhuahin zanin tlai thleng khan inrem tumin hma i la a, i rilru na mah se ngaidamtu thinglung i put a ngai a nia, heti taka in laka rilru chhia a pu hi i patea chuan engtik niah emaw intih ve ngai miah lovin chunglam hian ro a relsak ka ring tlat, chuvangin pachang taka i awm a ṭûl zawk asin," ka tih chuan a hmai hupna a kut chu a la sawn a, a mit hnâwng chap chuan min rawn enin, "Ka ngaidam thei kei chuan, Kimkima leh Mimtei hian an ngaidam thei dawn em ni?" A ti sup a.

"I nau te hian an zah em em che a, i thu a kâwi a ngîlin an zâwma ṭha taka i sawi chuan an rilru a hmin em em ang, damdawi ina kal i duh em?" Tiin Tlana nena kan inbiakna kha ka hrilh a, "Zaninah chuan kal lo ang, engmah tih theih kan nei chuang lo a, zingkâr inkan theih hunah kan kal dawn nia," dam thluam hian a ti a.

Thingpui ka lum sak chhungin kan inbe ta rih lo. Ngun taka thil ngaihtuah hmel a pu.

"Lungleia lo kal pawh intan a buaithlâk dawn si a, eng tin nge ni ta ang?" Tia ka zawh chuan, "Kal ngaihna a awm rih lo tunah chuan, i nu leh pa chanchin i hrilh tawh em?" Tiin min zâwt lêt a, ka hrilh tawh thu leh ka nu nena kan inbiakna kha ka hrilh thuak thuak a.

"I thu thu a ni mai, kei chuan la châm rih la, ka kiangah awm reng la tih hi ka duh; mahse, i duhthlanna ni rawh se," tia thovin tui dehna lamah a phei a, a hmai a va phih bawrh bawrh hnuah, "Kimkima hi lawyer a ni a, naupang a ni tawh bik si lo a, ka dang thei ang em ka hre lo," ti lehin thingpui a in khalh a.

"Mimtei pawh a ni tho, chu zawng zawng ai chuan ka putea te nupa an zahawm lutuk, an remti lo chungin lungphunnaa min telpui turin patea te ka sâwm lui kha a ni a, min dem khawp ang," rilru hah hmel takin a ti a.

"I thiam loh a ni lo, i patea a ni a, sâwm lo ta la dem i hlawh tho ang, a thiltih tur hre lâwk ni la, i sawm dawn em ni? A dam zawngin thlir la, khua han var se boruak a dang daih mai ang," tia ka hnem chuan min en vang vang a, "Awm lo la chuan engtin nge ka chêt ang pawh ka hre thiam phâk lo e a, Nám, hlim taka awm ve tawh ka duh asin," a ti leh a.

"Hahdam tum la, thil ngaihtuah vak vak rih suh," tia ka sawi zawh rualin ka lamah ka kuah hnai a, ani pawhin min kuah lêt ve a, kan lungphu inthum rawn dat dat chu a ring kher mai.

Ka hmangaih a, ka duh bawk a, a natna chu ka natna a ni, thlamuanna pe theitu ni lo mah ila, ka kianga awm a duha min thlamuanpui a nih phawt chuan a tan ka awm zel ang. Hei hi ka thutlûkna chu a ni e.

Minute tam fe ngawi renga kan inkuah hnuah, "Zanin chu sofa-ah mu mai ang aw, chanchin ngaichang pahin," a ti a, ka lo bu nghat.

Tuna kan awm danah hi chuan tisa thil a tel lo.

Khawngaihna leh lainatna thûk tak ka neih hi amah ka hmangaihna aṭanga lo piang chhuak a ni tih ka hre thiam chiah.

B®®
B+>[BeckirafARenthleI]<+®®