9.NAOM [Mizo Love Story] -B®®

9.NAOM [Mizo Love Story]

Ziaktu: Becky Rafa Renthlei

B®® Shadow of the life

Ka hmangaih a, ka duh bawk a, a natna chu ka natna a ni, thlamuanna pe theitu ni lo mah ila, ka kianga awm a duha min thlamuanpui a nih phawt chuan a tan ka awm zel ang. Hei hi ka thutlûkna chu a ni e.

Minute tam fe ngawi renga kan inkuah hnuah, "Zanin chu sofa-ah mu mai ang aw, chanchin ngaichang pahin," a ti a, ka lo bu nghat.

Tuna kan awm danah hi chuan tisa thil a tel lo.

Khawngaihna leh lainatna thûk tak ka neih hi amah ka hmangaihna aṭanga lo piang chhuak a ni tih ka hre thiam chiah.

B®® 040721

Damdawi in lam aṭangin chanchin eng mah kan hre zui tawh lo a, zan dâr sawmpakhat a ri tawh a, Sangzuala'n phone a hmang a, a putea a bia niin ka hria.

A pute Biakrema hi ka hmuh ve dan chuan pa ṭha tak leh rilru tluang zet niin, a nupui nu Maliani pawh chuti tho. Sangzuala nu nuṭa neih chhun a ni a; a fate pawh a enkawl puitling viau, zanin thu hlaah hi chuan chuti maiin a rilru a dam dawn lo a nih hmel, Sangzuala ṭawng dan hmangah a hriat mai.

Tun hmaa an buaina kha a chipchiarin hre lo mah ila, khalai hun aṭang daih tawha inṭan chho a nih vangin leh kut thawh meuha pu Duhsanga a chêt tâk si-ah chuan pu Biakrema pawhin a tû te thlavang hauh lova en liam a tum hmêl ta loh khawp mai.

Mimtei te, Kimkima te pawh zaidam angin lang mah se an duh loh naah chuan chuti maiin an vau zâm theih bikin ka ring lo. Sangzuala kha khatiang khan fuihin hrilh mah ila, boruak a rit chho telh telhin ka ring. Amah Sangzuala tak hi chu ka rin phâk bâkin a puitlingin a rilru a zau a, inti zahawm ni lovin a nungchang leh a ṭawngkam chhuak hrim hrim a zahawm bawk.

Sofa-ah ṭhuin Sangzuala phone hmang ka nghâk a, an inbe rei ta angreng si a, tihtur hre hek lo; inchungah ka chho a, hman zana shikhar ka lei kha ka han hmuam teh ngawt. A tui ka tih em em vang pawh ni lovin ka ninhlei hmuam ni berin ka hria, Sangzuala'n min koh avangin rang takin ka chhuk leh nghal a, an inbe zo tawh a nih hmel.

A bula ṭhutna awlah chuan ka ṭhu thla ve a, "Putea naktuk zingah damdawi ina kal ve a duh a, Kimkima a biak hnuah thutlûkna ka siam chauh ang ati a, keima thu thua thu tihtlûk pawh a fuh tawh bik lo," tiin a sam a hui thuak a, a rilru a hrehawm hmel hle.

"A dik chiah, i putea te nen chuan sawiho ṭha leh ula, a ṭha zawk tur a lo chhuak mai ang," tia ka chhan chuan ka lam a rawn hawi a, "Eng rim nge chu chu?" a ti sup a.

"Eng rim maw?" Tia ka zawh chuan, "Nám, eng nge i ei, Shikhar i ei a ni maw? Va chhâk vek la, i kam ṭhuah ang che," a tih chuan a ngaihna ka hre lo viau.

"I ho lutuk, eng nge ka ei ve a ni mai a," ka lo ti a.

"Khatiang mi hur rim nam kha vawi khat mah ei tawh suh," a tih chuan ka thil hmuam ka phuh chhuak lo chauh, "Mi hur rim nam maw?" Ka ti a. Ka nuih a za lutuk.

"Aw, mi hur rim a nam ka ti, le, i kam ṭhuah la, i neihsa pawh paih vek rawh aw, khatiang kher kha chu ka ngaina hlawl lo," a ti a, kei erawh nuihzat luat vangin ka la khi ṭhâ.

'A rim chhia' ti se chuan ka hrethiam thei mai a, a sawi dan kher kha a nih duh hmel, vai rim a nam deuh lehnghal. Thuawih deuhin ka va chhâk ta vek a, fai taka kam ka ṭhuah hnuah, "Ti khan mi hur rim chu ala nam em?" Tia zawtin a hmai bulah ka va kun a, nui suk chung hian, "Nam deuh; mahse, a zia deuh tawh e," a ti ve mai.

Chumi hnu chuan sofa-ah chêp zetin kan inhnawh a, 'A dangah ka va mu mai ang' ka tih pawhin a phal ṭhak náng. A sîr zawkah ka mu a, ani a kil lamah muin insi chêt hian sîr zawng ve vein inhawi tawn lovin kan mu a; ka tukkhumah a hmai a rawn phum a, min be zui tawh lo.

Ka pangkham lutukin min tiharh a, ka kâwng a kham ṭhûm. Puan sin lo khan kan mu si a, tunah lem kan sin vek tawh, Sangzuala a tho leh a nih ka ring, tunah tak chuan tui takin a muhil a, tih harh hlau zetin ka tho chhuak a, mutna ka sawn loh chuan ka taksa a na vek dawn, ka tilui thei ngang tawh lo.

Thawm dim taka thovin Mimtei room-ami puan sin tur ka va la a, sofa dangah ka insawn ta a, a thinrim loh ka beisei. Nizan kan thil tawn vang khan a muthilh theih pawh ka ring lo a nia; tui taka a muhil thei hi ka lo lawm ve ringawt.

"Nám, tho tawh rawh le, kha tui lum hi in la.." ka mutna bulah lokalin min rawn kai tho a, dâr nga leh a chan ve chauh ala ri sia min kai tho hma ka ti. Mut ka kham hlawl lo.

"Rei lo tê ka mu leh lawk ang aw," tia inkhuh ṭhat ka tum chuan, "Damdawi ina kal ve i duh chuan tho la, i kal dawn loh chuan i duh chen chen i mu thei tho, i thu thu a ni mai," dam thluama tiin side table-ah a no ken chu a dah a, thawh loh theih ninghal lo chuan, damdawi ina kal ka duh alawm.

Ka tho chhuak ta nge nge a, "Ka bula mut a hrehawm viau a ni ang, i lo insawn daih a," nui chunga tiin thingpui no a keng a, chutiang vang a nih loh thu leh a chêp lutuka ka insawn tih ka sawi chuan, nui deuh chung hian, "Ka hria alawm, i insawn khan ka mu tui sawt, kei pawh ka pang a kham vek," a ti leh lawi si.

Damdawi in lam a biak tawh thu leh Kimkima a ngaihtuahawm lo tih a sawi a, Mimtei pawh nizan lam ai chuan biak a nuam deuhva a rin thu a sawi bawk. A nau te ni mah se an thu a ngaicháng thiam viau hi Sangzuala ṭhat ve na a ni.

A putea te nupa an rawn thlen laiin kan lo insiam peih tawh a, dâr ruk leh a chanve aṭangin a in kan theih a, car an lo ken avangin Sangzuala'n bike ken a tum lo thung, "Mama, nangman khalh mai rawh," chahbi pe paha a putea'n a tih chuan mak ka lo ti deuh. Sangzualan motor a khalh thiam tih pawh ka hriat si loh!

Nu Maliani nen a hnungah kan ṭhu a, "Mama, dik tak chuan Kimkima hmuh pawh ka huphurh riau a nia, i patea nen inhnial thiam lohna an nei pawh a ni lo a, i pa nau ni kher lo se chuan nizan khan police kutah ka hlan tawh ang; a eng pawi hi nge kan sawi a, hetiang rilru chhe lutuk a la put reng mai le aw.." tia Sangzuala biain a chek tlak tlak a.

"Ka nu leh pa boral hlima a thu ngai tho kha maw le, kan in hmun hi a ît a, hei hian a ti â zo tawh a nih hi. Ka pa hming kha ka hmingin kan thlâk tawh tih ala hre lo a ni mai thei, dik taka sawi duh chuan Kimkima tih nat a tum vang ni lovin keimah zawk hi min huaa min tih nat a châk a, hun remchang ka siam si lo kha Kimkima chungah a ṭuan a ni ber; ka nau te natna chu ka natna a ni tih a hre bawk," Sangzuala'n a ti hmiah.

Nu Maliani'n ka châm chin tur min zawh chuan 'Kimkima awm dan a zirin ka hawin ka haw lo ang' tia ka chhán laiin Sangzuala'n front mirror aṭangin min lo thlêk zauh a, eng mah phei chu a sawi lo.

Damdawi in kan thleng a, Kimkima awmna cabin-ah kan kal nghal a, nizan khan Mimtei'n cabin-ah awm zawk tura a duh vangin an sawn niawm tak a ni.

An chhungkaw bila sawi an duh ka rin vangin Sangzuala hnenah, "Ti khan lo sawi ula, pawnah ka lo va awm ang aw.." ka ti a. Tlana pawh a rawn ding chhuak ve nghal a, "Naom, Tlana, chhuah a ngai chuang hleinem, tikhan awm ve rawh u," a putea zawkin a ti a, Sangzuala mitmeiin ka va râwn a, 'awm rawh u' a ti sup.

Ka rinâi takin Kimkima a harh ṭha a, zanin a riak leh anga naktukah a chhuak thei dawn tih Mimtei'n a sawi, in lamah dressing vel pawh Mimteiin a ti thei vek tho a, senso a tam mai mai an ti deuh a ni.

"Pute, dik tak chuan ka rilru a na a, ngaihdam min dîl chu sawi loh, u Ruatdika zawkin ngaihdam min dil daih a, patea hi chu engtin emaw tak kan tih ve a ngai a ni," Kimkima'n rilru nâ tih hriat takin a ti a.

"A dik alawm, kei pawh ka rilru a dam lo, Pathian zah hle lo ila chuan leh i pa nau ni lo se chuan nizan khan ka report ang; mahse, vawilehkhata thutlûkna siam rum rum hi thil ṭha a ni lo a, ngun zawka ngaihtuah a ṭha, i û nen pawh kan lo sawi dun nual tawh," dam thlapin pu Biakrema'n a chhang a.

Mimtei erawh a ngawi reng, nizan khan a thinrim hle kha a ni a, Tlana'n a lo bengdai tawh a ni mahna.

Kimkima khum bulah Sangzuala a ding a, a nau melh vang vang chung hian, "Mate, i rilru tur ka hrethiam a, ngun takin ngaihtuah la, patea hi report ta ila a mualpho tur chu keimahni kan ni, a chhan chu mi hrang a ni lo a, ka pa nau dik tak, thisena inzawm kan ni bawk, chuvangin hetia ngawih mai hi ṭha ka ti a, va ti lêtin va khing ta pawh ni ila a nih tur a ni zo vek tawh; aniin rilru ṭha lo pu mah se kan put ve kher a ngai hleinem, chunglamin kan thawh âi min thawhsak hun a la awm ngei ang," nghet charh hian a ti a.

"I tih ka ring rêng a, lungphunnaah sâwm lo turin kan ti che a, i sawm ṭâlh a, nimin tlaiah pawh chaw eia sawm lo turin ka hrilh leh chea i tilui ṭâlh a, tun ṭum chu i thu ka zawm thei lovang tih ka hlau ngawt mai auMam," Kimkima'n a ti ve tlat.

An han sawi khâwm nak nak a, nu Maliani a rawn ṭawng ve ta khauh, kei leh Tlana kan inrawlh miah lo thung.

"Ka ngaih ve danin tuna kan ngawih phawt chuan remchâng a la zawng leh thovin ka ring, Sangzual, i awm loh hunah thlamuangin i naute hi an awm thei dawn em ni? Keini pawh upa lam kan ni tawh a, in hrangah an awm tawh bawk si," a tih chuan dik ka ti lawi si.

Sangzuala a mal ṭan titih a, midang zawngin pu Duhsanga laka eng emaw tal tih ve an duh ṭheuh. Mimtei pawh a bâng chuang lo.

"He khawvelah hian ani lo patea kan nei lo a, ka pa kha la dam se a ngaidamin ka ring, chuvang chuan kan tih lêt ve kher hi a ṭûlna ka hre lo; ka awm leh awm loh chungchang kha chuan kawngro a su vak lo a nia, ka awm lai pawhin khatiang thil kha a thleng a, a ti nawn duhin ka ring lo, tunah te hian inthiam lo takin a awm reng zawk ang," Sangzuala'n a ti ve tlat bawk si. A tu ve ve pawh an ṭannaah an dik vekin ka hre mai.

In kan theih hun chhung a tâwp tâkah chuan Kimkima chhuah huna sawi ṭha leh turin thu an titlu ta zawk a, a hrim hrimin pu Duhsanga pawh ngaihdam tal rawn dil ve awm; Ruatdika'n a pa âi awhin dil mah se thil lawmawm tak a ni lem lo.

Tlana leh Mimtei an haw a, Sangzuala leh kei kan awm thung. Tlaiah chaw ei sain an rawn kal ang a, an pahnih bawkin an riak leh dawn niawm tak a ni, tûkṭhuan ei lova kal kan nih avangin Kimkima'n chaw a eikham hnuah inhnawh puarna lei turin Sangzuala a chhuak a, Kimkima ka lo awm pui thung.

"U Naom, ka u nen innei tawh ula," Kimkima'n a ti a.

"Eng ati maw?" Tia ka zawh chuan, "Nupui a neih te chuan chhungkua kan zahawmin kan phuisui ve deuh tawh ang a, amah pawhin discharge-a chhuah te a rawn dil theih ka beisei, Mimtei nen ringawt hi chuan kan zahawm tâwk lo," a ti  a.

A hmaa Sangzuala sawi kha ka ngaihtuah rauh rauh a, discharge chungchang chu a sawi ngei tak kha maw le. Mahse, a nau bulah hian sawi ka tum lem lo.

"Pathian zarah kan dam ang a, inneih hun te pawh kan la nei ve ang chu," dam thlapin ka ti ta zâwk a.

"Keimahni vang hian a rethei rei tawh lutuka hlim hi a phû ve tawh, a rilru i tih nat sak loh hram ka beisei," a ti a, ka chhân ve hmain Sangzuala a rawn lut ta a.

Eng eng emaw a rawn lei nual a, zing chaw ei lo vin kan inhnawh puar ta mai mai, Kimkima rilru hneh tumin a patea chungchang a sawipui leh a, kei erawh damdawi in corridor-ah ka lo tei kual thung a, chhungkua tak tak kan la nih loh avangin a kip a káwia hriat vek kher tumna ka nei lem lo.

Mimtein min lo phone a, a û a biak tlang theih loh thu leh biak a duh thu a sawi vangin cabin lamah ka lêt a, Kimkima ṭawng ri ka hriat chuan ka pên tawp chawt. Mi thusawi ngaihthlâk rûk hi thil mawi a ni miah lo; mahse, ka hming a sawi miau avangin ka ngaithla lo thei lo.

"Nula pangngai i hmu ve reng si a, u Lawmkimi pawhin a duh ngawih ngawih che a, u Naomi a sual tihna ni lovin nuthlawi ai chuan nula pangngai, mahni inchawm thei ka duhpui zawk che, ka û i ni a, i thu ka hnial ngai lo; mahse, in la inneih dawn loh rau rau chuan inngaihtuah ṭha leh rawh, nakinah a pasal hlui te kha rawn lang leh ta se eng tin nge i tih ang?" Kimkima'n a tih chuan ka thâ a na zawk.

"A pasal hlui chungchang eng nge hriat i neih?" Tiin Sangzuala'n a zawt a.

"I rin aia tam ka hria ang, Lawngtlaia a lokal ni pawh khan an pa hlui an inah a kal, Mam, rilru naa i awm ka duh loh vangin ka sawi mai a nia," a ti leh zel a.

"Kan la hria ang chu..." ti chauhvin Sangzuala'n a chhâng.

Nichinah kan inneih duh viau angin a ṭawng a, tunah ti khan a sawi leh si a, mi ṭawngkâ aṭanga hria ni ila, ka awih lo ang; mahse, ka beng ngeiin a hriaa ka hre sual lo bawk. Kei aiin Lawmkimi a duhpui zâwk tih ka hria. Eng tia dawnsawn tur nge hrethiam chiah lo mahila ka lawm lutuk lo.

Âw thian kharh pahin Cabin kawngkhar ka hawng a, ka pen lut ta a, Sangzuala hnenah Mimtei'n a biak duh thu leh a call tlang thei lo tih ka sawi a, Kimkima ka en lo hrim hrim; a hmel ka en vaih chuan a lakah ka lawm lo tih a hrethiam dawn sa.

Ka laka khatiang rilru a pu a nih chuan 'Inneih chuti khati' tih te kha sawi malêk loh tur a nia, leh lama awrdum leh lama awrsen tih vel hi ka ngaisang lo nasâ. Innei pawh ni ila ani nen hian kan inmil lo tawp ang. Lawyer tih takah hmel hmaia lang miah lovin a rilru ni lo pui a sawi thei a nia, ka ngei reuh tlat.

Sangzuala leh Mimtei inbiak laiin phone ka kheuh ngar ngar a, kan ina Dingngheta kal te kha engtin nge a lo hriat zâwk, min lo chhui ru reng em ni ang? Ka dik lohna lai chângin a û hrilh a tum pawh a ni mahna, tunge hria?

Ni e, hna ka nei lo teh meuh mai; mahse, thiam nei lo tlawktlaw zet ka ni tihna a ni chuang lo. Hna nei kher a duh leh amahin nei se ti nia, ve lutuk a. Ka mood a off vek.

"Nám, Mimtei te an rawn tlai deuh dawn a, Kimkima hi lo awmpui lawk mai ta che, ka putea nen eng emaw sawi dun ngai kan nei a, nizan chungchangah khan ṭhenawm te an lo ṭawng deuh niawm tak a ni, Auto-in ka lo va haw ang a, ka rawn hruai leh mai dawn che nia." Sangzuala'n a tih chuan ka hreh ru hle.

"Kan haw hunah a theih mai loh em ni?" Ka ti sap a.

"A pawimawh a ni ang, Mimtei bulah a lo sawi a, ka kal ang e," tiin ka chhanna pawh nghâk tawh lo hian, "Mate, Nàmi nen lo awm rih mai ula, ka lo lêt leh hunah chanchin ka lo hrilh dawn che nia," tiin a chhuak zui ta a.

Kimkima nen rei fê ngawi rengin kan awm a, nurse-in nachhawknaa a lo jection chuan, "I vannei ngawt mai, hei ai hian thûk deuh se chuan i tan a pawi dawn a," a rawn ti a.

Nurse chhuah hnuah pawh ka la ṭawng ta chuang lo. A hmaa ka ngainatna kha a bo nghal vek; Sangzuala hmai zah lo ila chuan ka hawsan ve daih ang, chutianga ngaihtuahawm pawh a ni chuang lo bawka Kimkima ai hian kum khatin ka naupang zawk a, mahse, 'u Naom' tiin min ko tho. A û nen kan inrualah a ngai te pawh a ni mahna.

Nichina an unau inbiakna kha ka sawi ang nge sawi lovang tih ka ngaihtuah reng a, nuthlawi âi chuan nula mo atan a duh zâwk tih a sawi lang chiang tâwk khawp mai.

"I û tana min duh loh te chuan ṭha takin min hrilh mai la, i duh phawt chuan inthiarfihlim tur pawhin min hrilh thei, i rilru ang lo puia lan kha a hreawm ngawt ang," ka ti chhuak ta nge nge a.

Mak tih hmel deuha min enin, "U Naom.." a ti zawi ruih a.

"In inbiakna kha ka hria alawm, Lawmi i duhpui tih ka hre bawk, inhlim tlânna tur a nih chuan ka lo inthiarfihlim dawn nia..." ka ti ta a, ka ti tak tak bawk.

Pasal vawi hnih ṭhen ka tum reng reng lo, amah Sangzuala'n min duhin min hmangaih mah se a nau hian thinlung taka min pawm loh chuan neuh neuh a tam mai mai. Tin, sawi chhuak lovin ngawi reng ta ila ka rilru a nuam chuang lo ang.

"I ngaihdan a dik lo a nih chu, kan inhmuh hmasak ber ni-ah pawh inpa hluiin a lo la ngaihven che a, heta i lo zin hlan pawhin in inah a lokal bawk a, ka û hi i duh tak tak lo a i tikual mai mai niin ka hria," mitmeng thîp râmin min en a. Ka lo en lêt ve kar.

"Insawifiah tumna ka nei lo a nia, kan pa hlui chungchangah chuan thil i hre thei bawk a, thudik i la hre thuai tho ang," tia tho chhuakin tukverh bulah ka va ding a, "I û hnenah min duh loh thu tlang takin hrilh ta che, hetiang boruak hi ni lo se chuan vawiin hi ka haw tum hun a ni a, naktukah ka haw ang," ka ti leh zel.

"Nia, i lokal chhan ber lungphun a zo tawh bawk a, i châm reng a ṭul hran lo, i inthiarfihlim theih chuan a lawmawm ngawt ang," zâm miah lovin zuk ti a.

"I sawi vang pawh ni chuang lovin ka lo inngaihtuah dawn nia," ka ti ve ngat a.

"Inngaihtuah i ngai chuang em ni, nuthlawi fing chin leh bright tak i ni a, he tia tikual ti kual lo hian inpa hlui kha nei leh zawk rawh, i zahawm zâwk daih ang," a tih chuan rum deuh hian ka melh a, "Kanpa hlui kha rawn sawi ziah duh suh, thil hrechiang lova sawi tawp hi a ṭha lo a nia," ka ti a.

"I tan Mama hi a ṭha lutuk, hmangaih tak tak ni la i lo nghak em em ang, pasal i neihsan daih danah khan i rilru a hriat vek," ngeiawm zetin a ti leh a, a hmaa Mimtei thil sawi kha ka hre chhuak; mahse, hepa bulah hian sawi chhuah kher tumna ka nei lo. Insawi fiah eng ang mah ila a awih chuang lo ang.

An ina ka awm chhung zawng khan min be tam lo tih chu ka hria, min hua angin lang hran lo mah se min pehhêl zar zar a, hetiang rilru hi a lo put vang lek a nih hi. Sangzuala hnenah hrilh ta ila kei aiin a nau a ṭan zawk ang. Awih pawh a awih duh lo mai thei; rilru put dan tur pawh ka hre nek lo e.

"I û hi chu nang ang lo takin a rilru a ṭhaa hriat thiamna pawh a ngah, kan chungchangah inrawlh tum lo la, a neitu tur a thu ber; mahse, vawikhat pasal ka lo nei tawha tihsual nawn ka tum miah lo a nia," ka ti ve ngat a.

Ner sawk chung hian, "Mi â i nih loh chuan ka thu sawi i hriat thiam ka ring, Mimtei pawh i rilru dik tak ka hrilh chuan tun ang hian a be ṭha tawp lo ang che, a chhan chu unau kan ni tlat, nang chu mi hrang i ni?" Chal delh taka tiin min ei lo tih hriat deuh hian ka chhîp aṭanga ka ke hmawr thlengin min en chhuak dap a. Chu tah nui lui tih hriat zet hian, "Han duh ngawih ngawihna chhan tur che hi ka hmu ve lo, Mama zawk hi a â tawh a ni ang," a la tizui hrâm.

"Lalchhuankim...." ka ti ṭhat a.

"Nang aiin ka upa zawk Naom," a ti nghut. He pa hi lawyer ṭha tak a nih ka beisei. A û hriat laiin min han 'û' der vel a, a nihna tak hi ka lo hre har mah mah a ni, helaia ka awm ve rengna chhan tur pawh a awm hrep lo.

"Mama bula zualko dan tur i ngaihtuah em ni? Eng ang pawhin hrilh mah la, ka sawi tih a awih chuang lo ang, tum duh tingtang suh," a la ti cheu.

Ka ngei lutuka a malpui na lai tak saw hlap sak a nia ka châk. A ṭawngtlem te kha ka lo ti rilru a, a teuh loh zia hi, mipa ngeiawm leh ṭawngthei tak a ni. A rilru a chhe tel bawk.

"Lungngai suh, i u eng mah ka hrilh lo ang; mahse, tuna i sawi zawng zawng kha eng tik ni-ah emaw chuan 'ka lo sawi ta a ni' tiin inchhir suh ang che," ka ti ve hmiah.

Min chhâng tawh lovin a maimitchhing daih a, mi hi en ang ngawt an nih loh zia amah aṭang hian ka hriat chhuah phah. Zanin chiah ka awm ang, Sangzuala bulah erawh eng mah sawi ka tum lo tak tak a, tuna innei nghal tur pawh kan ni lo a, hunin a la hril ang chu.

Nupui pasal inneihnaah hian a innei turte induh tawnna ringawt hi a tâwk zo tawh lo a, chhungkua induh tawn leh inhriat thiamna zau tak a tel loh chuan neuh neuh a tam duh. Tunah innei ve ngawt pawh ni ila, Lucknow-a min hruai theih loh phei chuan Chhuankima nen tuktin kan inhmu ang a, tûk zan ṭha kan nei ngût lo ang.

Inbe lovin kan awm ta ngat ngat a, ka nuin min lo call chuan naktuka ka haw tur thu ka hrilh a, Kimkima chungchang min zawt a, 'a ṭha' ka ti liam puat. A hmel pawh saw ka hmu hnê.

Sangzuala te unau leh Tlanhlua an rawn thleng a, kei misual hi ka nui lui peih lo. Mimtei'n amahin a riahpui thei tih a sawi chuan, "Ka riak ve dawn tho, min ning viau suh," Tlana'n a ti a, Kimkima a ngawi reng. A û nen chauhva kan awm tur pawh a hmu mawh ngawtin a nia ka rin.

Zanriah ei saa lo kal an nih avangin Sangzuala'n haw a rawt vat a, ka lo thaw huai. Minute sawm lek Chhuankima hmel hmuh pawh hi ka peih tawh lo, phakar ropui si. Mi dang awm lai chuan engmah a ti lang duh ṭhak nang.

"I lo ning em?" Pawna kan chhuah hnuin Sangzuala'n min zawt a, "Ning e, sawi tur ka hre bawk si lo a," ka ti hmak.

"Ka putea khan ngaihdam mai a ṭhain a hria a, vantlâng lakah kan hmingchhe lutuk ang, Pathian ringtu kan ni a nih chuan ngaihdamna thinlung kan nei tel tur a ni, a ti ta zawk a, amah ka patea tak chu a lokal lo a, ka nî zawkin ngaihdam min rawn dil a; mahse, Kimkima lo chhuah hunah kan la sawi nawn leh ang chu," tiin min hrilh a.

"I nau hian a ngaihdam ka ring mai mai lo e a," nelawm vak loh hian ka ti a.

"Eng nge i sawi awm zia?" A rawn ti ta chiah.

"Ka sawi ang kha a ni mai."

A bike dahna kan thlen tak avangin eng mah a sawi zui tawh lo.

Kawng lakah engmah kan sawi chhunzawm lo bawk. In kan thleng a, "Chaw ei ve nghal ila," a ti a.

"Aw le," tiin ka pheikhawk ka tlawhphelh a, ka thawmhnaw pawh thlâk lovin kut ka sil hnuah chaw ei ka siam nghal a, min lo pui ve bawk a, a lakah thinrimna nei lo mah ila, ka hnual vek.

Chaw kan ei chhung zawngin a ṭawng miah lo a, biak pawh ka tum chuang bik lo. Kan ei mawp mawp a ni deuh ber.

"Vawiinah Kimkima nen eng nge in sawi?" Kekawr ipte zen chungin ka thleng silna bulah a rawn ding a. "Eng vak mah," ngaipawimawh lo thei ang bera lan tum hian ka sil zawm mawlh mawlh a.

"Cabin-a ka lo luh khan i hmel ka hmu alawm, thu dik sawi rawh," a ti leh tlat.

"Eng vak mah kan sawi lo, naktuk ka haw dan tur vel maw le," ka ti a, hrilh ka tum teuh lo. An unau inkâr keimah avanga a chhiat ka duh hek lo.

"Naktukah haw i tum a, tunah ka hre ve chauh bawk a," ngaihdan ni lo lutuk tih hriat tak hian min melh a, "Sawina hun awm hek lo, Kimkima awm dan a zirin tih ka sawi kha, ngaihtuahawm lutuk a ni lo bawk a, haw ka tum mai chauh a ni," dam thlapin ka chhâng a.

"Tlana châm a la tum si a, Sumo kan biak a ngai dawn a nih chu, zing chhuak nge i duh chawhnu chhuaka haw?" Min hnial buai miah lovin a ti a, ka hrilhhai letling zawk.

Zing chhuak ka duh thu leh thlen tlai ka peih loh thu ka hrilh chuan phone hmang turin a kal sawn ta a. Kei inbual turin inchungah ka chho thung.

"Haw rih lo mai rawh" tia min chelh ka ring deuh kha a ni a, ka ring sual chiang hle. Ka la châm duh tihna nilovin awlsam te-a a rem ti mai kha mak ka ti deuh.

Ka rilru dik takah chuan a naute tana Sangzuala pawimawh zia ka hria a, an rem tihna thlap leh an pawmpuina lova neih tumna ka nei miah lo. Ka duh ta lo tihna a ni lo a, pasal ṭhen tawh ka nih angin neuh neuh awm chunga pasal neih nawn leh ka zuam lo.

Ka inpeih fel hnuin inhnuaiah ka chhuk leh a, "Nám, dâr ruk chhuakah ka hauh sak tawh che a, kan tum danin kan awm thei ta si lova Mimtei nise interview a ṭhulh ṭhak bawk a, Kimkima dam chian hma chuan kan lo kal theiin ka ring lo, ka ngai ngawt ang che," tiin a ṭhutna bula ṭhu ve turin min mitmei a, ka ṭhu ve mai.

"Ka hrethiam alawm, châm reng theih a ni si lo a, chanchin kan inhrilh thei tho a.." ka lo ti a.

"Ka nau nen eng mah insawi dun lo tak tak maw, eng emaw tal in sawi em?" Ngun deuhva min en chung hian a ti leh ṭâlh a, "Eng tikah nge kan inneih dawn? Tih min zawt a, ka sawi thei rih lo tiin ka chhâng," satliah deuhvin ka ti a, a ngaih a ṭhat vak loh hmel.

Ka dara kuah chung hian, "I haw hunah pawh Dingngheta hnaih miah suh ang che, ani kher lo mipa dang hrim hrim hnaihah awm lo bawk la," intitatu deuh hian min kuah a, "Tlana lo haw rualin lokal hram ka tum ang," ti supin ka biangah a rawn fawp zauh a, "Lungngai lo la.." tih chiah ka sawi.

Kimkima chungchang bawk a sawi leh a, ka ngaithla liam vel mai mai a. Engmah ka sawi belh lo, an buaina chin fel kawngah tih theih ka nei lo a, inrawlh pawh ka tum buai lo law law.

"Ka lokal hunah i nu leh pa titi pui ka lo tum ang a, hun rei nghah kha a ṭul ber lo, a rang lamin inneih kan tum dawn nia," a ti leh a, "I rawn haw leh hunah ti zawk ila, thla hnih vel bak chawlh i nei tawh si lo a," ka tih chuan, "Chuvang tak chuan alawm ka chhuk hmaa sawi fel a ngaih," a ti leh bawk si.

"Â, a hun lo thleng phawt rawh se.." ka ti ta ringawt a, vawiin ka thil tawn vang kha nge, eng mah phurna ka nei lo.

"Nám, thil dik lo a awm a nih chuan min hrilh rawh," a ti leh a, a ṭhut dan siam remin chîk zet hian min en bawk a, ka chhungril zawng zawng a hmu tlang vek ni berin ka hria.

"Eng mah dik lo a awm lo, ka ṭhu nilêng lutuka ka chau deuh mai a nia," ka ti ve tlat a.

"A nih te chuan mu ila a ni mai alawm," tia a sawi zawh rualin a tho nghal a, kawngkhar a kalh a, tukverh a check fel hnuah, "Lo kal rawh le, tuman min ti buai lo ang, a hâwkdâk tur ber leh thil hriat châk ber ṭhenawmnu a lêng chhuak tawh a, chîmbuaitu kan nei dawn lo," tia ka lam rawn panin, min pawm nawlh a, ka lo ṭê ṭhat.

"Zanin chu i bulah ka mu dawn a nia, fair takin..." tih pahin step-ah a pen chho pâwk pâwk a, a bân bul sek ṭalh chuan ka mit a la hle. Min zo lâwp lâwp khawp mai.

"Nizanah pawh i mu reng alawm le," ka ti a.

"Nizan te kha chu a, mu-ah pawh ka inngai lo, i insawn daih kha," tiin a nui a. "Zanin chu ka khumah kan mu ang," tiin a room kawngkhar a nêk hawng a, ka hnial peih lo. A sâwt dawn chuang lo bawk.

Ni e, thu kan tiam vek tawh a, engtin mah min ti dawn lo tih ka hrechiang. A thutiama ding tlat ṭhin sipai kha a ni miau alawm.

A khumah min nghat a, "Mimtei kan be lawk ang e," tiin a kal sawn nghal a, a naute hi eng lai pawhin a dah hmasa ṭhin tih ka hria a, ka û Chhandama min ti hre chhuak zawk. Ani pawh khan min ngaihsakin min duat viau ṭhin, nupui a nei tawh chung pawhin min ngaihsak reng tho. Mimtei tan pawh Sangzuala hi chu a thlamuanpui awm ngawih ngawih ang.

"Sipai chhuṭi lo haw mut danin nge ka mut ang, chhuṭi zo haw leh tawh mut danin?" Tia min zawh chuan makti zetin ka en a, a sawi awmzia ka hriat leh pek loh avangin, "I sawi awmzia ka hre lo," ka ti a.

Za tak hian a nui a, "Ngaihtuah ngun mai rawh, nakinah i hriat a ngai dawn a nia, ka la zawt fo dawn che," tiin a la nui reng.

A thu sawi awmzia hriat tumin ngun deuhin ka ngaihtuah a, ka bo tulh tulh, chutah, "Han sawi fiah chhin la," ka ti a.

"Mizorama kan lo haw hlim hi chuan kan fit zak a, kan mu ṭha hle hle thei lo, kan kal dawnah meuh hi chuan chu mi let ling hlauh chu.." tia nui ruh ruh chung hian, "A eng zawk mutin nge mu se min tih?" a ti leh a.

"Ka tlin lo ve ve, tun atan chuan.." nui chungin ka lo ti a, "Hei hi chu i tlin ang," tihpahin khumah a rawn lawn a, a kut pahnihin ka dar leh lam leh lamah a vuan a, meng de sar chung hian ka hmuiah a rawn fawp ta a, a hmui hnâwng chapa min fawhna chu a ril râih. A uar hle bawk.

Duhthawh taka ka lo fawh lêtna chuan phurna a pe tih hriat tak hian a thaw hawk a, chutah min fawhna thlahin ka mitah min en a, "Eng ang zawng pawhin lo haw ila emaw kal dawn pawh ni ila, kan inhîp tawnna hi chu a pangngai reng, Naom, exer lo la ṭha hle ang che," tia nui sukin khumah a mu zangthal a, a âwm nghenga min kuah chung hian, "Ka ta i ni tih hi theihnghilh ngai suh ang che," a ti ta a.

A nauin khatiang khan min ti bawk si. Keimah vanga an unau inkâr a chhiat ka duh si lo, a hmel ka en a, ka khawngaih tlat.

Lalchhuankima thu sawi haiderin ka vuan tlat ang nge, a thu sawi zawmin ka kalsan ang. Huiham... rilru put dan tur pawh ka hrethiam lo.

Nau te lo pai ta ila, ni lo, ka pâi chu ka ring chiah lo deuh, kan inneih chhung zawng pawhin ka pai si lova tun vawihnih lekah kha chuan ka pai ka ring lo ve ringawt.

Maimitchhing chunga mu Sangzuala hmel chu ka en vang vang a, midang tan hi chuan ka phal lo a ni.

B®®
B+>[BeckirafARenthleI]<+®®