6.NAOM [Mizo Love Story] -B®®

6.NAOM

Ziaktu: Becky Rafa Renthlei

B®®

Shadow of the life

Sangzuala tak hi chu(h) a ngaihna a awm lo, tuman kan nawr lui thei lo a nih ber hi.

A khum zau zeta min mut tîr lai chuan ka meng ṭâwk ṭâwk a ni ber.

"Naom leh.. i rui a nih kha..." a ti hluk ri chu ka mang hriat ruai ruai.

Ni e, ka rui, ka ruih dan hi a la nuam em em zui....

B®® 010721

Tui taka ka muhil lai chu ka harh hlawl a, ka luak a chhuak nghal ut ut. Ka khumah ka lo mu fel ât a, Sangzuala'n min pawm chhoh lai leh khuma min muttîr lai kha ka hre ruai ruai, khawiah nge a awm daih le? 

Kei mah tê chauhvin ka mu bawk si a, thawh tumin ka inbengkâng a, ka pum a let nghal but but; chutah insûmna hman pawh awm lovin khum bula dustbin-ah chuan ka luak puat a, zu leh beer rim a nam nghal rum rum, châwl miah lovin ka luak ngat ngat a, tuirîl hlir a la ni zui.

Ka room kawngkhar a rawn inhawnga Sangzuala a rawn lut a, "I zia meuh nange?" Tiin khumah a rawn ṭhu thla a, ka sam hnawk nuai chu hui mâm thuak thuakin, "I luak a la chhuak em?" Zawi sup hian a ti a. Ka bu nghat ringawt. Ṭawng pawh ka ṭawng peih lo.

Dustbin-a ka luak chu a melh zuk a, "Ka va paih ang e," tia tho nghalin dustbin nen a chhuak ta a, ka va'n zak tak.

Khum bul dawhkana tui bottle chu banin ka inkhawlh khawlh a, ka harh ta huai mai. Ka luhai pawh a zia ta, Sangzuala a rawn lut leh ta a, dustbin leh garbage bag-a rawn keng bawk a, ngawi rengin a che mial mial a, khum thawhsan ka tum chuan, "Khawiah nge i kal dawn?" A ti sup a.

"Bathroom-ah..." tia ka chhân rualin khum aṭanga chhukin bathroom lam ka pan a, ka pai deuh dat. Min rawn zui lova min ngaihsak awm pawhin a awm lo, khum chungah ṭhuin ngun taka thil ngaihtuah hmel a pu, nuam ka ti viau lo. Inthiam lohna hlirin ka khat a ni ber.

Ka hmaite phihin hâ ka nâwt nghal a, ka harh chiang ta khawp mai. Ka sam hnawk zet chu hui mâm thuak thuakin ka chhîpah ka vingvial a, ka luak hrep vang kha nge ka hmai a dâng deuh lap.

Room-a ka luh leh chuan a ṭhut dan ngai renga ṭhuin Sangzuala a lo la awm a, biak mai dan tur ka hre lo. Zinglam dâr thum a pêl tawh a, "I zia deuh a nih hmel, ka mutsan ang che," tia rawn tho chhuakin min en miah lo hian a chhuak zui nghal daih a, min hau miah lo kha a mak zawk!

Thinrimin min hau chiam se ka tân a nuam zawk tur a nia, khatia mikhual satliah leh hmel hriat pangngai ang maia min bia kha nâ ka ti deuh tlat. Min ngaihsak khuchûk turin ka beisei lo; mahse, tuna a awm dan kha chu a hawihhawm mah mah.

Khumah ka mu meng kar a, Mimtei kha engtin nge a awm ve ang le? Sangzuala kha thinrim awm angin a lang hran lova a lâwm tihna lah a ni hek lo; a nau nen naktukah a rualin min hau dawn a ni ang, ka huphurh lâwk hle.

Ka lo muhil leh daih a, ka harh leh chuan zing lam dâr sarih a la ri lo deuh, dârkâr li deuh thaw ka muhil leh tihna a nih chu, zan lama eng mah thleng lo ang maiin ka harh vâk a, ka tho chhuak nghal daih.

Mikhual neuh neuh an tam tawh dawn si a, inbual nghal law law ka tum ta a, ka sam a ro har thei si a, midang thawh hmaa lo intih fel ka duh.

Rei ngial ka inbual a, zu ṭhing rim ka nam lo turah ngai ang. Sangzuala thâwm riva hriat tur a awm lo a, a reh ṭhiap; a la tho lo zawk nge, a tho tawh tih pawh ka hre chuang lo a.

Inhnuaia ka chhukin Mimtei a lo awm a, min hmuh veleh nui sâng chung hian, "Kaihthawh che ka lo tum chiah a," tiin tui lum in tur min pe a.

"Nizanah engtin nge i awm?" Zawi tea ka zawh chuan, "Ka muhil, eng ati nge?" A ti a.

Ka awm dan leh ka luak tih ka hrilh chuan, "Awi leh, AuMama'n min hau dawn a nih chu," hlauhthawn hmel fein a ti a, "A la tho lo mi?" Tiin ka zawt a.

"In hnuaiah fatuho nen an awm, Vawk pawh an talh vek tawh alawm, tuilum kha in zo la, thingpui pêk an ngai dawn a nia, thingpui lum tura kan sâwm te kha chu chaw eikham lamah chauh an lokal dawn a, zingkarah chuan kan pahniha kan chêt rih a ngai ang, fatuhovin inhnuaiah tûkṭhuan an buatsaih dawn a, helamah thingpui kan lum thung ang," a ti leh zung zung a.

Chumi hnu chuan kan buai chhunzawm ta nghal a, keiin thingpui ka siam a, a niin salad leh hmarcha vel a lo buaipui thung a, hmeichhe dang fatu tura an sâwm te pawh in hnuai lamah an awm vek a nih hmel.

An inhnuai ber an la sak zawh lohah khan ei an siam dawn a, 'ṭhenawm te tibuai lo zawnga chêt a ṭha,' Sangzuala'n a tih vang a ni, an in kawtah Silpoulin an zâr vek tawh a, ṭhutthleng an rem diam tawh bawk. An tho hma awm hlawm hle mai.

Sangzuala teh reng pawh hi min kaihthawh ve mai tur a nia, a hun lo lo-ah room-ah a rawn lut a, a hunah a bo leh daih a, misual chukchu hlawm lian a ni.

Tuna kan awmna hi chaw eikham lamah chauh ṭhutna dah luh an ti deuh khan ka hria a, hunserh hmanna leh zaiho tih ang reng te a ni dawn a, programme details pawh ka la en lo reng reng. 

Fatuho thingpui pe turin Mimtei nen in hnuaiah kan chhuk a, an lo phe buai nasa. Mipa sawm hnih vel leh hmeichhia paruk vel niin ka hria; a tu amah hriat ka nei lo a, Sangzuala bula ding hmeichhia erawh ka hmuh hnu a ni, Lunglei aṭanga a haw rualpui Lawmi kha niin ka hria.

Thingpui kan sem a, mipahoin min fiam nak nak laiin hmeichhe lo awm ve te erawh chuan min en duh hle thung, Lawmkimi leh Sangzuala ding dun chu ka va melh zauh a, eng nge an sawi hriat mang si loh hian an phun sep sep a, ka run ang reng.

Inhnuaia kan awm chhung zawngin vawi khat mah Sangzuala'n min be lo. Min hre awm ang pawhin a lang lo a, ngawi rengin thingpui no a bana Lawmkimi bawk a ngaihsak leh daih. Tlana zawkin ka mut ṭhat leh ṭhat loh min zâwt a, chuti ni lo se chuan ka hawihai viau ang.

"U Naom, Mama nen in inhau em ni?" Tiin Mimtein min zâwt a.

Kan inhauh loh thu leh nizana min buaipui dan vel kha ka sawi a, chek tlak tlak chung hian, "A thinrim a nih chiah chu, min mawh puh vek mai dawn nia," a ti ta ringawt a.

"A ho lutuk, ka duhthlanna a nia, midang puh kher a ngai hleinem, rilru nuam deuh khan awm rawh aw, nakinah kan inrem leh mai ang," nui lui hak chungin ka ti a, ka chhungril erawh a nui lo hrim hrim, in runluih niawm taka kha tia awm kâwi vel kha ka rilrem zawng pawh ninghal lo chuan; puitling inti ve si, nêp sazu lutuk.

Mahni buai buaiin kan buai hlawm a, tûkṭhuan pawh kan ei rual tawh lo, inhnuai lamah midangin an ei vek a, Mimtei nen in chungah kan ei daih; fatu tur atana an sawm ni lo, anmahni rawn puitu an chhung hnaivai te pawh an haw hlawm tawh a, kei pawh Mimtei room-ah awmin ka sam min roll sak a.

"Mikhual lo lawmtu tur pawh in awm nange?" Mipa aw thûm deuh hian a rawn ti a, insiam tura room lam kan pan vek avangin choka lam leh sitting room-ah tumah an awm lo a nih ka ring.

Mimtei a chhuak vat a, ka chhuak ve lo.

"Ehe, pate, in chhungkuain em ni in lo kal? Lo ṭhu rawh," Mimtei ṭawng dan aṭangin a patea Lunglei ami kha a ni tih ka hre thiam mai.

"Ni teh suh ei, i lo nula tawh hle mai, i nu i chhun a nih kha," a patea bawk chuan a ti leh a. 

"Ti khan lo ṭhu rawh aw, kan insiam laklawh lutuka AuMama a lo chhuk ṭêp ang," tia Mimtein a chhán chuan a patea chu a nui huk a, "Ka rawn dâk lût satliah, nakinah ka rawn kal leh dawn nia," a ti a.

Ner nâng chunga Mimtei lo lût chu enin, "A kal leh daih elaw?" Ka lo ti a.

"Aw, a hmela min hmuhsitna lang kha ka ngei, buaina an rawn siam vaih chuan ka ngawi tawh lo chiang khawp ang," a ti tán tán a.

"Theihnghilh daih rawh, engtin mah a ti ngam lo tawp ang che u, vawiin ni angah ngat phei hi chuan," ka lo ti a.

Ka sam a roll zawh hnuah eng mah sawi tawh lovin inthlâk turin ka room lam ka pan ta a. A patea te chuan lungphun an rawn hmanpui dawn tihna a ni ngei ang.

Ka inbel tur thawmhnaw la chhuakin ka inthlâk nghal a, Sangzuala nen tun thlengin kan la inbe lo, nizan vang khan a thinrim tih ka hria a, min pehhêl ngar ngar tih pawh ka hria; mahse, a tidik lo tu zâwk ka nih avangin ka ngawi renga biak hmasak tumna pawh ka nei bîk chuang lo, a lungawi ve leh mai ang chu.

Ka insiam zo chiah tihah ka room kawngkhar tu emawin a rawn kik a, lut tura ka hrilh chuan Mimtei inchei peih thlapin a lo pên lut ta a, "Mi an lokal nual tawha i inpeih dawn tawh em?" Tiin ka inchei dan chu uluk zetin a thlêk a.

"Peih a ni mai, chhuk ila..." 

"En teh, u Naom, AuMama ka la hmu lo reng reng, Kimkima phone turin ka hrilha phone a pick thei bawk si lo, chhungkaw aiawha thu sawi tur a ni si a, a room-ah a awm bawk si lo," hlauthâwng tih hriat takin a thaw hlap hlap a, "Khawiah emaw a kal lawk a ni ang, a bike a awm em?" Ka tih chuan, "Awm lo," a ti leh ringawt.

Hmanhmawh takin inhnuaiah kan chhuk a, mi an lo ṭhu ṭhup tawh, ṭhutna âwl tlêmte bâk a awm tawh lo a, Kimkima leh Tlana, a putea te chhungkua nen hmun khatah an ṭhu a, an kohhran hruaitu hunserh hmang tura an sawm pawh a ṭhu tawh. Sangzuala tih loh an chhungkhat an kim a nih hmel.

A kalna sawi lova chu chen chen han thang bo, a ti awihawm loh ṭhin hi ka tia. Va zawnga chhuak turin thil tih chi a ni tawh hek lo; rilru pangkhing zetin Mimtei nen ṭhutna âwlah kan ṭhu ve ta phawt a, khawiah chuan va kal ni maw.

Hla pali vel kan sak zawh hnuah Chairman a rawn ding chhuak a, ṭanna te neiin leh vawiina kan punkhawmna chhan sawiin thuchah tâwi a sawi a, chu tih lai tak chuan kawngkhar pui lamah thâwm a rawn awm a, Sangzuala leh a patea te pafa, a nî nen an rawn lût ta a, mipui an thüm hak mai. 

Mi zawng zawngin hre mah suh se, tun hmaa an chhungkaw boruak hria an awm nual a, hetia an rawn inzui lût hi mak ti awm reng pawh an ni.

"Ka patea te ava hruai a nih dawn saw, sawi ve tal tur a nia," Mimtei'n a ti sap a, ka ngawi reng.

Chumi hnu chuan programme an duansa angin an kal zui par par a, pawn lamah mi zahnih aia tlem lo an awm ka ring bawk. In chhungah erawh a neitu chanchang deuh leh khual khua aṭanga lo kal te an ṭhu hlawm a, tu khawkhain min ngaihsakin min en chuang lo, atu amah hriat pawh ka nei bik hek lo.

Chhungkaw aiawha thu sawi turin Sangzuala a rawn ding chhuak a, a putea zawk ding lova amah a ding chu mak ka ti deuh.

Kamis dum body fit hain kekawr dum tho a inbel a, a sâng ṭha zuai zuai bawka a inhmeh thlup. 

A nu leh pa thih dan leh an chhungkaw dinhmunin a zir loh avanga lung an phun lawk theih loh thu te, duh anga ṭhenrual an huikim loh thuah thupha châwiin an unau chanchin tlêm a sawi a. Tumah inthlahrung lo tur leh tlai lama chawhlui kil pui vek turin a sawm bawk.

Rei thu sawi lo mah se inbuatsaihna ṭha tak a nei tih a thu sawi dan fel fai thlup aṭang chuan ka hre mai. Ni e, ka hre chiang tulh tulh a, a chanchin chhe lam aiin ṭha lam hriat tur a tam a, ka lawm hrim hrim.

A patea te pafa leh a nî te chhungkua erawh kil khatah chapo tih hriat taka hawi sâng vah chungin an ṭhu a, an mizia hi mak ka ti lo thei lo; pa chan changa engkim rêl feltu tur zawk si, kum tam tak liam hnuah pawh an la ngêng tlat a nih hmel.

Thu sawi tur zualpuiin an sawi zo a, thingpui in laiin, Sangzuala kan bulah a rawn kal a, "A nawlpui an zaiho lai hian thlân lamah kan va kal ve lawk dawn em ni? Ruaiṭheh zawh meuh chuan mikhualte vai liam a ngai dawn a, hun a awm tawh lo ang," a rawn ti a.

Tun angah te a kal chhuah chi dawn em ni? Mahse, hnialna hun pawh awm lovin amah a chhuak ta nulh si a, zui loh theih ni bîk hek suh. Ka zui ve ta tho.

Pawn lamah mi sawmhnih bâwr vel hi an lo ding khawm a, "Kal ang u le," tia Sangzuala'n a sawm chuan chungho nen chuan kan kal ta a.

Kan pahnih chauhvin kan ni lova a lawmawm viau. Mahse, mak takin ka lunghnur deuh tlat nia, ṭûl tawpah lo chuan min be lo tih theih a ni.

A nu leh pa thlan Granite-a an siam chu a nalhin a common lo khawp mai. Thla te lain, midang hote nen pawh kan inbe bawrh bawrh a, amah Sangzuala ber a ṭawng mang lo; a rilru a thar deuh te pawh a ni mahna. A kianga awma hnem ka duh; mahse, chu zawng thil tih chi a ni si lo, kan pahnih chauhva kal te chu ni ila ka ngam mahna.

Thlanmual chhak lama midanghoin thlâ an lâk lai chuan, "Nám, lokal teh ka nu leh pa ka hmelhriat tîr ang che," a ti a, a sawi zawh rualin ka bânah a vuana thlanlung hmaah chuan min dinpuiin ka kutah nghet zet hian a hmer a.

"Nu, pa, Námi ka lo hruai a nia," tiin a ngawi deuh vang vang a.

"In tel lovin tun hi ka thleng ve ta, in beisei ang pha lo mah ila in fapa Liansangzuala hian ṭha takin ka naute ka lo enkawl zel ang, ani hi ka unaute tih lohva ka mi rin ber a ni a, Naom Lalmuanpuii a nih hi, in damlaiin a chanchin ka sawi fo kha, in awmna aṭang khan min lo thlir ula, ani nen hian chhungkaw din min phalsak rawh u aw," zawi thâm supa a tih chuan ka hnuk a ulh ringawt, ka ṭah a chhuak titih.

Sawi ve tur hre lovin ka ding ngawi reng a, ka mittui tla tur chu duh lovin ka khap sak sak a, hetiang em em hian a ni maw Sangzuala hian min lo duh. Kei lahin ka ruih kâwi khum mai mai a, a nu leh pa, a lei Pathian te awm tawh lo mah se an thlanah min hruaiin an phalna a la dîl cheu a nia. Ka in haw ngawih ngawih, nizante khan rilru hrehawm takin a nu leh pa ngaihtuah chungin a mu awm si a, ka inthiam lo hle.

"I chanchin hi ka nu leh pa ka hrilh fo ṭhin, an hmu ve châk em em che a; mahse, i hmel hmu lovin an liam ta a nih hi, la dam se chuan tuna ka thutlûkna pawh hi min zahsak ngei ang, Nám, i pasal atan min duh em, min nei duh ang em?" Tia min zawh chuan chhân mai nachang hre lovin ka ngawi rauh rauh a.

"Naom...?" A ti leh a.

"Ih, eng lo... kan inngaihzawnna a la rei si lo a..." bah deuh naka ka tih chuan, "Aw nge Aih tih kha a ni mai, inngaihzawn rei leh rei loh thu-ah ka buai lo," a ti hmuk a.

"Hun rei lo tê min pe rawh, khawngaihin.." ka ti a, ka nei duh lo tihna ni lovin min zâwt teh thut a, ka inring hman lo a ni ber.

"A ṭha alawm, ni rawh se, kan hun hman tawh dan chhût let la, ka nawr lui hauh lovang che, ka ta i ni a, nih chhunzawm zel i duh chuan Lawngtlai i chhuahsan hmain chhânna min pe ang che, ka lo beisei ang," lungawi chiah lo hian a ti a.

"Aw le..." tia kal sawn ka tum chuan a kut a phar zauh a, "Rina, Naomi nen hian thlâ min lo lâksak lawk hman em?" Tiin kan chhak lawka ding mi pakhat chu a bia a, nichin khan kan lâk tam tawh teh reng nen a va ho mai mai tak.

'Rina' tia a koh pa chu rawn chhukin kan phone ve ve a pe a, a nu leh pa thlanlung langin vawi li lai thlâ kan la leh. Kei thlalâk lawm lo hian ka hmeh dêt ve tâk chiam kha.

Thlanmual aṭanga kan hawin naupang lamin chaw an lo ei ṭan tawh a, amah lo biaa lo zâwt a piang hnenah, "Ka ṭhiannu Naomi.." tiin a hrilh zel bawk.

Ka sâng ve riau a nia, Sangzuala beng pawh ka thleng pha lo. A taksa inkhaithli thlurh te vawiina a thawmhnaw inbel nen hian ka hmu hmelṭha zual. Nui hmel nena ṭhenrual ṭhate a biak lai phei chuan ka lo chhuang ru ve ngawt a; Kimkima leh Mimtei pawh an bâng chuang lo, an unau hian zahawm rûkna riau an nei.

A nâwlpuiin chaw an ei tawh a, kei erawh tih ve tur em em hre lovin an veranda-ah ka ṭhu a, mi che vel ka lo thlir mai mai.

"Ka hmuh hnu i ang lutuk a, ka hmuhna che ka hre tawh bawk si lo," tia min lo betu chu Sangzuala cousin niin ka hria. A patea fapa Lunglei a mi kha, nichin khan an chhungkawho ṭhutnaah khan a ṭhu ve tlat a, Sangzuala nen in anna lai an nei a, hai theih an ni lo.

"Ka va'n hre lo che..." ka ti lui deuh ngat a.

"Hre lo ang, Lungleiah kan awm a, Ruatdika ka ni e, i hriat theih dan tur chuan Sangzuala patea fapa ka nia," a ti ṭha ve mai a.

"A nih chu, tumah hi ka hre ve lem lo a, Naom, tiin min ko mai dawn nia," dam thlapin ka chhâng a, an chhungkaw hnih chungchang hresa lo ila chuan ka ngainat tur chi tak a nia; mahse, a pa vang khan ka hmu dik lo ve ringawt, kei misual hian.

Kan awmna te min zâwtin Sangzuala ṭhian nge ka nih Mimtei ṭhian zawk, tih min zawt a, Sangzuala ṭhian ka nih thu tlang takin ka hrilh hmiah.

Chaw ei tura min rawn koh tâk avangin Ruatdika nen chuan kan chhuk thla ve ta a, mi an tam vak tawh lo. Sangzuala leh Mimtei ka zawng ru deuh a, ka hmu mai si lo, hreh ru deuh chungin Ruatdika bulah ka kal ve a; Tlana leh Kimkima'n chaw an lo ei mêk a, "Naom, zuk dawh ve nghal mai rawh u, kan bulah rawn incháwi chho ula.." Tlana'n ati zung zung a.

Duh thlan tur nei chuang hek lo î, Ruatdika nen chaw kan dawh ve ta poh a; a pa leh a nî te kha ka hmu zawm tawh lova ruai an ṭheh ve lo pawh a ni mai thei.

"Naom, lokal rawh helamah hian.." tia Ruatdika'n min koh chuan veranda thlanglama ṭhutna an siam lam ka pan phei ve a, Sangzuala leh Lawmkimi'n chaw an lo ei mêk.

Thlan aṭanga kan haw hnu khan mikhual neuh neuhin an lo biak avangin ka kalsan ta kha a ni a, nichin aṭangin ka zawng ru reng a, amah behchhana zin ka ni a, chaw ei tura min sawm ve bawk awm; a la ei lo emaw tiin ka lo nghâk ve ngat ngat a, Mimtei ni se a ṭhian te bulah a awm ve bawk si a, helaiah Lawmkimi nen an lo ei daih vang a nih hi. Ka ngei lutuka an pahnih chuan hmu lo derin Ruatdika bulah ṭhuthmun ka rem ve ta a.

Ka thin a rim tet tet.

Kan chaw ei chhung zawngin vawikhat mah ka hawi chhuak lo a, Ruatdika'n min biakna pawh a rul tawk lek lekin ka chhâng a, ka mood a off vek.

Nichin lawkah nupui atan min sâwm a, dârkâr tam a ral hma hauhvin min ngaihsakna pawh nei lovin nula dang chaw a ei pui leh thei a nia. Tenawm chhekeh siah..

Thîk thu chhe lutuk ka lo ni lo hlauh hi ka va lawm si êm. Chuti ni lo se, an pahnih hian satui sa zet hian ka leih ang maw le, ka thil ngaihtuah avang chuan ka nui hak a; Ruatdika'n min lo en hû.

"Naom, eng tikah nge i haw ang," tia Ruatdika min zawhna chu chhân loh ka tum ûk a, Sangzuala'n min lo en reng tih ka hriat avangin, "Zanin hi ral se, ka hrilh dawn che nia," ka ti deuh kher.

Lawmkimi'n min melh ralh ralh a, a tê ve ropui si, Sangzuala koki a chen pha ngawr ngawr a; Varak nghâwng sei ang nei lo phei se chuan zakzeh tham lek a ni. Â, kei hian ka thîk chiang, zêp thu a awm lo, an pahniha ka hmuh dun a piangin ka kawchhungah 'Nghelh' a awm ziah.

"Ruata, in puar maw?" Sangzuala'n kei min en lovin Ruatdika a bia a. 

"Puar e, Naomi bula ka ei vang a ni ang, chaw ei a tui tlat," nui suk suk chungin a chhâng a.

"A lawmawm, zanin chu kan in lamah rawn riak ula..." tia Sangzuala'n Ruatdika a sawm lai chuan ka inthiar fihlim daih; an inbe khawmuang nghah reng kha ka tih tur pawh a ni lo. Ka lo zin ta kher kher hi ka inchhir ṭêp.

Sangzuala te in aṭanga hla vak loah hian nepnawi dawr a awm a, tumah kawm tur nei ve bawk si lo chu, dawra kal tumin ka insiam a, ka thawmhnaw inbel hmasa kha hlipin kekawr leh shirt ka inbel a, inchungah tumah an awm ve lo, kei tih chauh loh chu.

Inhnuaia ka chhuk thlâk pawhin inlêng neuh neuh an awm a, tih ve tur ka hre chuang lo; thingpui lum tur an awm tho bawk si. Mimtei ka hmu leh tawh miah lo a, a buai viau a nih ka ring. 

"Naom..." Dawr ka thleng ṭep tihah Ruatdika'n min lo ko a, dawr sir deuhah dingin a bulah R15 V3 ka hmu tel bawk, a bike a nih ka ring ve ringawt.

"I kal daih a, ka zawng nasa lutuk che alawm," tiin a nui var var a, Sangzuala nen an nuih zawngin an inang leh zual.

"Nia, inthlâk ka duh sia bâkah an buai hlawm êm a, ka inthiarfihlim a nih kha," ṭha tein ka ti a.

"In lei fel la, ka nî te inah kan kal dawn nia, kei pawh kawm tur ka nei lo," tiin dawrah min zui lut a, Shikhar ka'n lei ngei a(h) Thil dang engmah ka tih loh avangin Shikhar hmuam ka ching ve ṭhin a, regular phei chuan ka ti lo. Ka chhuanlam ve mai mai a ni.

Ruatdika min sâwmna chu lawm takin ka pawm hmak. Sawlaia kawm tur mumal awm lo leh Sangzuala te pahnih hmuh dun reng ai chuan a nî te ina kal ka thlang fê.

Chumi hnu chuan a bike-in a nî te in lam kan pan ta a.

Inchhunga lo awm te chuan min lo be sawk sawk a, Ruatdika pa hi Duhsanga (Sangzuala patea) a ni a, a nî hi Thanzuali a ni. 

Ruatdika'n Lunglei khua ka nih thu leh Sangzuala ṭhiannu ka ni tih a sawi a, ka hming a hrilh nghal bawk.

Pu Duhsanga chu a tawhkhirh hmel hle a, ka ngaina lo nghal pang, a nî erawh a ṭawng duhin a zaidam hmel viau a, Mimtei nen an inang lek lek. Sangzuala nen kan inhriat dan te min zawtin ka haw hun tur min zawt bawk a, dik takin ka chhâng.

"I duh chuan ka rualin haw la, i thawmhnaw ka pa te kan hawn tir ang a, bike-in kan haw dawn nia, nuam i ti ngawt ang," Ruatdika'n a ti a. Ka nui ringawt.

Bike ka ngainat loh zia hria se min sâwm tawp lo ang. Thingpui hâng kan in laiin ka phone a ri a, Sangzuala a nih vangin ka reject daih. Vawi thum lai a rawn call pawhin ka la duh lo a, a hnu lawkah Mimtei'n a rawn call leh a, chu erawh ka chhâng ta.

"U Naom, khawiah nge i kal?" A rawn ti a. Dawra ka kal thu leh ka haw ṭêp tih ka hrilh chuan, "In leng an awm vak tawh lo, ka lo hruai dawn che mi," a rawn ti a.

"A ngai lo ang, ka lo haw..." tiin kan inbiakna ka ti tawp a.

Ruatdika hnenah ka haw duh tih sawiin a pa leh a nî ka mangṭha a, muang khawtlai lovin kan chhuak ta a.

"I phone number ka duh a nia, Sangzuala nen in inṭhen thut tâkah ka lo châng ang che," fiamthu titak deuh hian a ti a, "I number sawi zawk rawh," ka lo ti ve thung.

Misual tak a ni lo tih ka hria a, fiamthu a duh hle bawk.

Sangzuala te in kawtah bike ti dingin, "Ka lo lût tawh lo mai ang, Lawngtlaia ka bialnu rîm ka duh," tiin a nui a, "Va rim rawh, naktukah kan inbe dawn nia," tih pahin ka chhuk nghal a, a tlân liam hma ka thlir a, kan ina haw ka châk phah vek. Helai hi nuam pawh ka ti tawh mai mai lo.

Shikhar hmuam pahin zawi muang hian in lam ka pan a, Mimtei leh Tlana veranda-a an lo ṭhu ka hmuh chuan an bulah ka tawi khawmuang ve nghal.

"U Naom, min ngei em, ka ngaihsak ṭha hman si lo che a," inthlahrung takin Mimtein min lo bia a. Ruatdika chungchang min zawh ka hlau ropui.

"A ho lutuk, hetiang niah te chuan inngaihsak reng a theih hleihnem, ka hre thiam lutuk che," tiin an bulah ka ṭhu a, Tlana'n min be lo ve teh tlat.

"AuMama nen in inbe leh tawh em?" a rawn ti sap a, 'Aih' tih nan lû ka thing a.

"Nang tal chu thinrim suh aw, Lawmkimi kha ka ngei a nia, a zak lo si," a ti nghat a.

"A ho em mai, nupa pawh kan ni lo a, kei aia a duh zawk te chuan sawi theih ka nei hleinem, chuan naktukah haw ka tum ta mai..." ka tih chuan phâwk zetin min en a.

"Eng a, awihawm loh lutuk, naktuk tal chu la châm rih rawh," tiin min kuah a, Tlana ala ngawi reng, he pa hian eng nge a hriat a, min biak duh loh ve ngawt. Ho sihsah em mai.

"Ka awm reng thei dawn chuang lo a, naktuka haw mai kha a ṭha, nakinah kan sawi ṭha dawn nia, ka thawmhnaw ka han siam ang e," tiin ka tho ta a. 

Mimtei a tho ve tharh a, "I haw chuan ka thinrim ngawt ang, bâkah i haw tum hun pawh a ni lo a, AuMama ka hau dawn," a'n ti ngawt a, ka nui chhuak teuh kher mai. Ani hi chu a ri phawng phawng zel.

Ka room-ah kan inzui chho a, sitting room-ah khan nu leh pa ṭhenkhat leh Lawmkimi, Sangzuala pawh tiamin an awm a, kan lût tih hre hmel an pu lo. Ka thin a rim tûk tawh a, "Rum deuhin melh ila, nge runluih nân ka'n in leh keuh dawn em ni?, chahbi dahna kan hriat kha.." Mimtei a ti a.

"Ka in leh lovang tih pawh ka sawi thei lo," ka'n ti ve ngei ah.

Ka thawmhnaw ka thleh chhungin khumah a lo ṭhu a, haw lo turin min thlêm ngat ngat. Mimtei vanga kal ka ni lo a, Sangzuala vang chauh a kal ka ni. Min ngaihsak lo bawka haw ngei ka tum nghet ta.

A nupui atân a kâin min sawm a, a chêtzia erawh a dang daih thung. Engtin nge a sawi kha? 'Lawngtlai i chhuahsan hmain chhânna min pe ang che' a ti a. Ka pe khawp ang.

"I inpeih hunah lo chhuk rawh aw, ka room-ah ka lo nghâk ang che," tiin Mimtei a chhuak ta a. A rilru a nâ tih ka hrethiam. Mahse, rilru sawhsawn ka tum miah lo, tisa thilah Sangzuala nen inzawm mah ila, tuna min tih dan hi thil lawmawm pawh va ni suh, a tlai chhiat hmaa rilru siam fel hi ka tih tur a ni.

Dingngheta kha chu kan inngaihzawn laiin a rinawm tal a, kan Sangzuala ve erawh a kâ a kaw em em ringawt, a lerh tel cheu bawk.

Thawmhnaw ka ken tam loh avangin ka insiam chhung a rei lo, bathroom-a ka thil dahho ka la khawm leh a, chumi hnuah Ruatdika call tumin a number ka dial a, vawi hnih a ring ral ṭhak. Nakinah ka phone leh mai ang.

Rei lo te mah ni se ka room thawveng leh nuam reuh riau hi ka ngai dawn tlat. An in hrim hrim hi a hmun a rem a, a luhkâ a nawm bakah an sak danin a zir bawk nen ka ngaina ru riau. 

Zinga ka bun tur sneaker ka tihfai lai chuan ka room kawngkhar a rawn in hawnga Sangzuala a lo lut a. En pawh en duh lovin ka pheikhawk ka tih fai chhunzawm zel.

"I va in tifai zan ve khawiah nge i kal dawn?" Tiin khumah a ṭhu a, room kawngkhar kalhna châng ka hre lo hi ka mâwlna.

Chhâng lova ka ngawih reng avangin, "Naom, ka zawhna che chu..." a ti leh a, ka la chhâng ta chuang lo.

"A thinrim zawkah ṭang miah suh.." ti nghutin ka sneaker ken lai a phihthla lawp a, kawngkhar bulah a theh sawn daih. Chuti chung pawh chuan ṭawng duh lovin ka pheikhawk chhar turin kawngkhar lam ka pan a, ngawi renga chharin ka dah fel a, a hmel pawh ka la en ta chuang lo.

"Nám..." dam deuh zawka tiin ka darah a rawn vuan a, ka ding khawng at.

Chutih lai tak chuan ka phone a rawn ri a, ka bulah Sangzuala ding ve reng mah se ka pick tho.

"Min lo call lai khan phone ka charge daih a..." Ruatdika'n a tih chuan, "Naktukah i ruala haw ka tum aw, dâr..." ka sawi zawh hmain Sangzuala'n ka phone min chhuhsakin a off nghal hmak.

"Eng nge i hriat a?" Thinrim lutuka tiin phone chhuhsak ka tum a.

"Ka thintirim zawngin awm tawh suh, naktukah i haw dawn lo, i nu leh pain châm tura an tih chen kha i châm ang, nge, mipa dang nen haw rual in tum tiin ka hrilh zawk dawn, Lalmuanpui, pakhata lungawi hi a har viau em ni?" Zuk ti a. Zak thei lo lutuk.

"I chhia a nih chu, ka duh hun hunah ka haw ang," ka ti nghauh a.

"Kan hre dawn alawm, a dik lo zawk si hi a pawr pawrah i ṭang a, ka dawhtheihna fiah tum suh, kei aia Ruatdika i duh zawk chuan i kal dawn nia, ka dang lo ang che," tiin ka phone min pe a.

"Aw le, tunah ka kal nghal ang, ka kal khawp ang," tia ka sawi zawh rualin ka bag dawhkan chunga ka dah chu lain nichina sneaker ka tih fai kha bag chhungah ka khung nghal bawk a, anmahni in a nih avanga hetia intih kher. Riahna tur nei lova vâkvai turin min beisei zâwk nge.

Kawngkhar lam pana ka kal chu min phih lêt dawrh a, khumah min nem ṭhu hnawk a, ka che hman eih lo.

"Kei aiin Ruatdika i duh zâwk maw?" Thinrim inseh ruh ṭeuha tiin ka tukkhum samah a vuan a, ka chhâng lo.

"Sawi rawh, ṭha taka ka zawh lai che hian min chhâng rawh..." a ti leh khur khur a, a thinrim hle tih hrilh hranpa ka ngai lo.

"Kei aiin Lawmkimi i duh zawk alawm, engvangin nge i neih mai loh vang, pasal neih leh ka châk viau ring duh suh, châkna chhe te mah ka nei lo; chuan vawiina min zawhna kha ka chhâng tawh ang che, neih che hi ka tum lo, Lawngtlai ka chhuahsan hmaa sawi turin min ti a, i zawhna ka chhâng chiah e," tia ka sawi zawh rualin min vawnna a thlah ruai ruai a, ka mittui tla tur chu duh lovin hnuai lam ka bih zui nghal daih.

Ṭawngkam khat mah a chhâk chhuak lo a, a che sawn hek lo. A dinna ngaiah dingin a thaw hawk a, chutah inher thutin bang a hnek nghal dawp. Ka hawi chhuak vat a, thinrim inhum ruh ṭeuh chung hian a ding a, a khür deuh em maw ni.

"Sangzual..." ngaih ṭha vak lo chunga ka koh chuan min rawn en a, a mit a sen vek. 

"Hmangaihtu dik pawh hre duh lo tu chu kal rawh se..." rilru ná tih hriat takin a mit a nuai zauh a, hrehawm ka ti leh si. Biak zui mai dan tur ka hre bawk si lo...

"Hlim takin awm ang che, nau i pai hlauh a nih chuan min rawn hrilh dawn nia," tiin ka chhânna pawh nghak lo hian a chhuak ta a.

Ka hamhaih lutuka chelh din nachang pawh ka hre lo; ani khan min hmangaih tihna a ni ngei ang, ka va han mâwl em em ve maw le.

Harh chhuak thutin ka um zui nghal a, a room-ah ka en phawt a, a awm lo.

Hmanhmawh lutukin inhnuaiah ka tlân thla leh a, a awm chuang lo. Kawngkapui inhawngsaah chuan ka chhuak a, Sangzuala bike-a a lawn tur ka hmuh chuan zah pawh dâwn lovin, "Sangzual," tiin ka ko vak a.

A hre lo a ni ngei ang, a aia ringin, "Liansangzual..'' tia ko leh vakin a awmna lamah ka tlân phei a, bike chungah ṭhuin a la tlan chhuak bik lo..

Ka lam a rawn hawi a, "Inchhungah lut rawh ka rei dawn lo," ti supin bike a start a, "Aih, kal suh..." ka lo tih chuan, "Lût rawh ka tih chu, vawi khat chauh ka thu sawi hi zawm ve rawh," ti nghutin a tlan chhuak lui ta tho.

Khatiang bâk chuan dan ngaihna ka hre lo a, ka thiam lo bawk. 

Ni e, eng kimah ka thiam lo fai vek. 

Mimtei'n veranda aṭangin min lo thlir reng a, a hmai ka zah lutuk tlat.

A û an zah a, an ngaisâng bawk a, an hmuh laia inhau ka duh loh teh reng nen engkim ka ti khaw lo zo ta vek a nih hi.

Insût hraih chungin Mimtei awmna lamah ka phei ve ta a, ka ṭah a chhuak a, ṭah vak vak ka duh ber tun boruakah hi chuan, Sangzuala rilru na hmel kha hmuh hrehawm ka ti. Hrehawm ka ti thlâwt.

B®®

B+>[BeckirafARenthleI]<+®®