1.KA CHAN PUAL : -B®® Story

1.KA CHAN PUAL

Shadow of the life

Ziaktu: Becky Rafa Renthlei
-B®®

"Ka pi, nupui nei rual ka ni ve tawh tho a, a châwmna tur hlawh pawh ka nei a, min neih tîr mai rawh u," titu ka bialpa neih ve hmasak ber kei aia kum kuaa upa chuan ngenngawl zetin ka nu a dîl a.

"Â, a la naupang fahran lutuk êm mai, pâwl sawmpahnih tal pass ve phawt sela chumi hnuah chuan kan ngaihtuah ṭha leh dawn nia," tiin ka nu'n a chhâng dam thlap a, engmah sawi lovin ka lo ngawi reng.

Lehkha thiam thei tak ka nih loh avangin pawl sawmpahnih kum hnih ka bei nawn a, kum 19 ka pum awrh. Ngaihzawng ka vawikhat neihna a ni a, chu pawh ka mâwl luat vangin ka û te inlêng zinga mi pakhatin min bêm ve a, ka û te'n 'a fel lutuk nei ve chhin hrim hrim rawh' an tih deuh tlat avangin ka lo 'yes' ve pawp.

A sâng ṭha roh hle a, a vun a ngo em em hran lo nain háng chhia chu a ni lem lo. Irrigation-ah Executive Engineer (EE) a ni a, Aizawl khua niin Lungleiah kum chanve a rawn awmna chiah a ni, amahin in a luah a, û hmeichhia pali lai ka neia an rawn rîm ṭhin avanga amah hi hria ka ni bawk.

"Kan inneih hnuah a zir zawm leh mai dawn alawm," tiin ka nu a la dîl fan a, ka nu lah chu a nui mai mai a, "Kum hnih khat han nghâk leh phawt la, Pathianin rem a tih chuan in la innei em em ang," Tiin a chhâng dam thlap.

Hetih hun lai hian ka mâwl ka tih tawh kha, vawikhat mah a fâla inhmuh pawh ka duh lo a, ka bialpa a ni nachungin ka hlau ru deuh tlat, a koki ka chen pha ngawr ngawr a, ani erawh tlangval puitling rilru nei tak a ni thung. Kan upa ber nen hian miin an dem ṭhin a, an inngaizawng tihna ni lovin zan tina lo lêng ve ta chu AuMami bialpa zâwk emaw an ti daih.

Zan khat a lo lêng chu thil pawimawh sawi tur a nei a, inlêng dang kan ngah bawk si nen ka nu hnenah a dîl chawt a, ani lah chuan a lo phal ve mai bawk a; kan inzui chhuak ve ta. A bike dahna lam min panpuia ka ṭang deuh ṭung. Mahse, "Kan kal hla dawn hleinem, eng mah hlauhthawn tur a awm lo," tiin min thlamuan a, ka awih ve mai bawk.

Chumi hnu chuan kan venga a ṭhian kawm ve ṭhin, Ruata te inah min hruai ta a, anni hi nupa chauha awm an ni a, an fate hostel-ah an dah ve ve a, hemi zanah hian u Ruata a lo hrilh lâwk vek avangin an nupain an lo awm lo, chahbi dahna an hrilh sa a ni ngei ang, kawngkhar hawngin kan lut ta a.

Dik tak chuan ka tîm ru dêk.

"Náno, inru mai ang, Lungleiah hian ka awm rei dawn lo a, ka pain transfer min dilsak mêk a, ka duh lo tia ka hnial chung pawhin a tilui deuh tlat si a.." tiin ka kutah a rawn vuan a.

"Inrûk ka duh teuh lo, Class 12 pass phawt ka duh," ka lo ti a.

"I thiam thei lo bawk si, i pass hun ka nghah chuan kan innghâk kumkhua thei ang," a ti hmuk a.

"Ka duh chuang lo, ka nuin a hrilh vek tawh che kha, ka la naupang si, â.. inṭhen mai ang, ngaihzawng neih nuam pawh ka ti lo," ka tih leh chuan min vawnna a thlah thut a.

"I la naupang tih ka hria, mahse, ka duh chea zah pawh dâwn lovin ka umzui zel che a nih hi, min duh tak tak lo a nih te chuan engah nge 'aw' min pawh si?" Thinrim insûm tih hriat deuh hian a ti zawi ruih a.

"AuMami te'n nihpui ve chhin rawh min tih vang alawm, ka haw dawn, min hrethiam mai rawh," ti sapin ka ding chhuak a, kawngkhar lam ka pan ta a.

Rang zetin min pawt lêt a, "I duh duh danin i awm dawn lo, zaninah hian i haw miah lovang," tia min man betin amah hnaih zet hian min kuah bet a, tâl chhuah tumin ka ṭang ve tak naa ka kut pahnih a hmer kawp a, ka che ṭha hleithei lo.

"U Mapui, hetiang hian min ti suh," ka ti vín ve hlar.

"Inṭhen sawi tawh hlek suh ang che, kei lo mipa dang an awm chuan i duh emaw duh lo emaw ka ru khawp ang che," tih paha rawn kun hniamin min fawp ta a. Tun hi a vawikhat min fawhna, a hma zawng kha chuan kan inah a lo lêng tawp a, hetiang tihna hun kan nei ngai lo.

Mipa ka vawikhat fawhna a ni bawk a, ka thiam lo mai nilovin ka hrilhhai letling zâwk. 

Rei pawh min fâwp lo hian ṭhutthlengah a rualin min pawt ṭhu ve nghal a, duat deuhva min kuahin, "Kei aiin kum kuain i naupang zawk a, hriatthiam che pawh ka tum, i inpeih hma chuan ka nghâk ang che, school-a i rualpui emaw mipa dang hrim hrim hnaih suh ang che aw, ṭha takin lehkha zir la, i zirna tibuai zawnga chêt loh ka tum dawn nia," dam thluam hian a ti ta zawk a.

"AuMami te vang vek.." zâwitein ka ti a, a nui huk.

"Tuna i thil sawi kha ka haw lo mai ang, ka naute duat i ni a, i û te vang ni mah se ka nghâk thei che," tiin ka biangah a rawn tawk a, ka lo phu zuk.

Kei hi Zomuanzuali ka ni a, 'Náno' tiin min ko ṭhin. U Mapuia hmingpum hi Lalrinkima a ni a, an unau zinga upa ber niin a nauah hmeichhia pahnih leh mipa pakhat an awm a, a nu leh pa an la dam tih zawng hi a chanchin ka hriat chhun a ni mai.

U Ruata te in kan chhuahsanin zan dar kua a ri tawh a, kan in thleng min thlah thlap. Ka u te an lo nui ṭhâ a, ka biang a sa hat hat. A rûk tak chuan ka inchhir a; transfer daih se ka ti. Ka nu leh pain an ring tâwk bawka an phalna thlapa chhuak kan nih angin min hau lova min fiam zuk zuk.

Bialpa nei ka ni ve ta reng mai, miin an hriat ka hlau em em a, min dem fiam pawhin "AuMami bialpa asin" tiin ka chhâng zel.

Lehkha hi ka zir peih lo a ni lo a, nasa taka ka bei ṭáng ṭáng chung pawhin ka hlawhchham lo chauh zêl, ka rilru a chak lo em em a, nasa taka ka inzir chung pawhin pâwl sawm ka pass ngawr ngawr kha a ni a, ka tui hlawl lo. Puanṭhui zir daih te ka duh rum rum a; mahse, pâwl 12 pass ve hrâm tura min fuihtu ka chhungte vangin ka kal ve ngawr ngawr a ni deuh ber.

Zan lamah theihtawpin u Mapuia'n ka zirlai min bihpui a, hma ka sâwn ve hret chuan ka hria. A bialnu nimah ila ka zirlai na na na chuan a strict ṭhak ṭhak thei a nia; "I fail leh chuan kan innei tawp tawh ang, i pass pawhin kan innei tho ang," tiin a nui ruh ruh a, ka lo zak ringawt.

Hun a kal a, thlathum kan inzui tling ve ta, mi hmuha 'in chu e kha' lo ta chu tumahin ka bialpa angin an hre lo a, auMami'n min hliahkhuh hneh hle.

Term exam kan nei a, ani pawh a rawn lêng khât deuh. Hna thilah Buarpuiah a zin dawn a, kan exam lai a nih avangin kan school thleng bike-in min thlah a, amah han thlâkhlelhna leh han duh huamna ang kha ka nei lo hrim hrim; mahse, a chhe lo chu ka ti.

Buarpui aṭanga a lo haw hian Malaria vangin a khua a sik nasa êm êm a, ka nu leh pa ka pi te khuaa an zin hlan a ni a, ka u te'n an khawngaiha kan inah an hruai chho ta a; a khawsik a tlun nasa thei si a, auMami'n a buaipui char char a, damdawi in kal a duh miau si lova nithum tál tawp kan inah a khawsa ve a, mikhual room a hmang mai.

"Náno, lokal teh.." tiin u Mapuia'n min rawn ko a, a mutna piaha dawhkan chungah lehkha zirin ka inchhawp hnawk nuai a.

"Eng nge?" Tia ka va pan chuan, "In ina awm reng thei ka ni lo a, i chhungte ka dîl anga ka damloh chhung min awmpui ta che, engtin mah ka ti lo ang che," dam thluam hian a ti a.

"I duh leh dîl chhin la.." ka lo ti ṭha mai a. Ka khawngaih ve reuh lutuka a damloh chhung awmpui rih kha ka hnial bik lo.

Ka nu leh pa hnenah a dil ta a, anni lah chuan, "Ê, a ṭha ngawt ang, a û ten inlêng an ngah thei si a, lehkha zir a tan a harsa ṭhin bawk nen awmpui hlauh rawh," an lo ti sam êt.

Chumi hnu chuan ka thawmhnaw tlêm nen u Mapuia kiangah ka insawn ve ta a, vantlâng ngaihah chuan a damloh chhung chhawmdawl rih tur angin min sawi. Ka la naupang ve fahran bawk a, tumahin ngaih loh lamah an ngai lo. Tin, ka û bialpa angah an ngai ve hrim hrim bawk.

A in luahah kan pahnihin kan awm dun ve ta rak rak a, a khawsik pawhin ziaawm lam a pan ve zela buaipui ngai lutukin a awm hran lo.

Zanriah kan kîl laiin, "Ka bulah mu rawh aw.." a ti a.

"Aih, a teuh lo.." ka ti hlar.

"Engtin mah ka ti lo ang che, min ring rawh," a ti leh a.

"Ka duh chuang lo.." tia ka chhân chuan, "Zanah ka khua te sik ta se tuin nge min buaipui ang, min hlau mah ta che," tiin min en vang vang a, dik ka ti lawi si.

Amah buaipui tura a hnena awm ka ni a, room hran daiha ka mut chuan ka ngaihven thei dawn miah lo. Bu nghat nghat chungin, "Aw le, mahse, eng tin mah min ti lo ang tiraw?" Ka ti hehaw a, nui suk chung hian, "Ka naute duat i ni a, ka nupui i nih hma chuan ka insûm ang," a ti hmiah.

Zanriah kan eikham a, thleng ka sil zawh hnuah lehkha zir tur ka chhawp chhuak a, u Mapuia ka bulah a ṭhu ve kur bawk nen rilru ka pe hleithei lo. Nidangah chuan ka chhungte awm laiin min zirtîr ṭhin a, tunah erawh tumah chutiang awm hek lo, a nuam lo vel vek.

"Náno, pass ta la i zir zawm leh ang em?" Tiin min zâwt thut a, "Ka hre lo, eng ati nge?" tia ka zawh lêt chuan, "Ka chawm thei che, zir zawm tawh lo mai rawh aw," tiin a hmai a tuai puat a, rilru hahna lian tak a nei nge a mitmeng a dik vak lovin ka hria.

"Min lo nghâk hram hram la, ka pass hunah kan sawi dun leh dawn nia," ka ti ve ta a.

Min chhâng zui lem lo.

Ka zir tur chin bithliah ka tih zawh hnuah mu turin ka inthlak ve ta a, u Mapuia a muhil nge a maimitchhing tlat a, tihharh hlau zet hian dim têin ka inthlak a, a bulah ka mu ang nge mu lovang tia ka ngaihtuah leh fê hnuah a khumah ka lawn ve ta a, a che eih lo.

Puan sin hrangin a kiangah ka mu ve ta a, nuam lo ka va'n ti tak. Mahse, kan inkârah âwl a la zau tal a, ka ngaih a ngam deuh.

Tui taka ka muhil lai chu eng emaw ni hian min ti harh a ni teh chék ang, ka ṭhu chhuak hlawl a, u Mapuia mutna lam ka melh vat a, thlanin a lo bual hnâwng vek! A puan sin a lo tlawh hlím vek bawk a, a khûr dar dar a.

"U Mapui..." tia kovin ka sawi nawk nawk a, fiah mang lova rawn mengin, "Tui.." a ti thâm chhalh.

Rang taka tho chhuakin tui la tur chuan ka phei nghal a, a pang a sa vur bawk si a, ka hlauthawng ru zek zek. AuMami ka call mai dawn em ni ang? Â, phone pawh ka nei tawp si lo a, ka thin ava han rim tak.

Pâwl sawmpahnih ka pass phawt loh chuan phone min lei sak duh lo a, vawi li vel ka awt chhe tawh, ka sawi ri leh ngai tawh lo. Chuvangin pass ka tum bur.

Tui bottle nen a mutna lamah ka pheia a mut dan ngaiin a la mu reng bawk, "Kha le," ka tih chuan rawn meng chhuakin ṭhut chhuah a tuma ka lo pui vat. A bân te pawh a sa vur mai.

"Náno, kha laia damdawi kha min lo lâk rawh le.." tiin side table-a damdawi in chhawp rum chu a káwk a, a eng ber nge lâk tur ka hre ve bawk si lo.

"Eng ber?" Ka lo ti a.

Min chhâng lovin amah zawk chuan rawn banin a la a, a ei nghal bawk.

"Mu leh tawh rawh ka zia mai ang," ti supin a mu ṭha nghal a, khum sirah ka ding zum reng, a damlo awmpui tura riak ni ve siin ka va ṭangkai lo ber mai. Thuawih deuh hian ka mutna ngai khum sir teah ka mu leh ta a, a lam hawi pawhin ka inlet ngam lo.

Minute sawm dawn ngawi renga ka mut hnuah khum a che dat a, ka kawngah min kuahtu an awm, hrilh hranpa ngai lovin amah a ni tih ka hre mai, ka ṭang nghal ṭeuh a, ka thaw chhuak halh.

"Hey, eng nge i hriat a?" Tih pahin min kuahna a bân dahsawn sak ka tum a, a nghet churh.

"Ṭha deuh khan mu rawh, eng tin mah ka ti dawn lo che," thâm ṭuaka tiin a rawn tawlh hnai sauhva; ka phu leh zawk a.

"U Mapui... ih..min englo..ih tih min... tum vaih," ka ti chhuak phawng a, a nui nghal huk.

"Zomuanzual, i â siah.." tih pahin a nui leh kur kur a, ka va ngei tak.

"Tih tham i la ni lo, i nih hun ka nghâk mêk alawm, ṭawng loh lohvin ṭawng ṭhin suh," ṭha deuha tiin min kuah nghet sauh a, ka ṭang kikawi kual ta bîk lo. Amah hnungchhawn zawnga mu ka ni tak naa ka zak leh tawh.

"Min nghâk duh suh, i tar hman tawh ang," a lam hawia in let thakin ka chhâng a, "Putar pasalah i nei anga a ni mai alawm," a lo ti mai mai.

"Le, muthilh tum rawh le, zingah lehkha tlem tal zir ang che aw, ka nupui tur hian class 12 a pass ve duh sia," kiai suk chung hian a ti leh a, ka chalah fâwp zauhin a âwmah min kuah bei ta a, ka la inthlahdul hleithei lo.

U Mapuia tui taka a muthilh lai pawhin ka meng kar a, a taksa lumna chuan min ur ham ham a, nupuia min neih a tum ve em em a, kei hian ka lo duh tak tak em? Ka duh zâwng mipa chu a ni ngei mai a; mahse, ngaihngam lohna eng emaw hian ka chhungril a fan tlat. Ka sawi chhuak thiam bawk si lo.

Ka harh leh meuh chuan ní a lo chhuak uar tawh a, u Mapuia a tho tawh a ni ang, keimah chiahin ka lo mu. Chi loh lutuk.

Choka lamah ṭawng thâwm a awm a, phone-ah mi a be zawk em maw ni?

"Transfer ka duh lo, helai hmun hi nuam ka ti a, puitling ka ni tawh, engkimah min thunun tum fai vek suh," thinrim insûm taka u Mapuia a ṭawng chuan ngawi rengin ka va kal phei a, min hnungchhawn zawnga ding a nih avangin a ṭawng ka ngaithla tih a hre lo.

"Nupui thlansak ngai khawpa mamawh ka ni lo a, ka duh hunah chuan ka nei ve mai ang," a ti leh hmuk hmuk a, a aw a ring hran lo a; mahse, a thinrim hle tih ka hre mai.

Tu nge a biak ka hre lo, a nu emaw a pa pawh a ni mai thei. A sawi dan hmangah nupui nei turin an nawr a nih hmel a, nei daih se ka va'n ti tak. Min dîp, min dál, min ti zalen lo riau hian ka hriaa chuvangin inṭhen hi pawi ka ti teh chiam lo, a puitling kher khur si.

Thinrim tih hriat taka phone a off hmak danah a lawm lo ngang a nih ka ring. Min rawn en a, "Ka ṭawng eng zata tam nge i hriat?" Tiin min zawt a.

"Eng vak mah, ka lo tho chhuak ve chauh," tia ka chhân chuan min melh vang vang chung hian, "Rang takin Aizawlah ka haw a ngai a, lehkha lo zir ṭha ang che, phone i nei bawk si lo, hahthlâk teh e.." a ti nghut.

"I dam ṭha si lova motor i khalh thei dawn em ni, i dam deuh hunah kal zawk la," ka lo ti ve a, cooker la chhuakin chaw chhum ka siam zui a, ani tukverh bulah a ding thung.

"Kal ngei ngei a ngai, i nu leh pa zah hle lo ila chuan ka hruai tel ang che, Náno, ka hmangaih che tih i hria tiraw?" Dam thlap hian a ti ta a.

"Ih, hre lo, nupui i nei dawn em ni?" Ka ti ve ringawt a, a meng rum sawt.

"Nang i nih loh chuan tu hmeichhia mah nupui atan ka nei lovang, chu chu hrereng ang che," tiin a rawn kal hnai a, tui dehna hmuna ding ka ni a, hnunglam aṭangin ka kawngah a rawn kuah a, ka chhipah a khabe nghatin a thaw chhuak hawk hawk a.

"Eng anga rei pawh nghah ngai mah la, ka thi a nih loh chuan i tan ka awm reng ang," zawi leh fiah taka a ṭawng chhuah chuan ka chhâng ve lo.

Chumi hnu chuan kan pahnihin eirawng kan bawl a, lehkha pawh ka zir ta lo. A zinna tur thawmhnaw a siam chhungin kan in lamah ka chho zuai a, an inbiakna ka hria tih sawi lan ka tum bik lo a, a damloh avanga chawlh la a ni a, nizan maiah pawh a khua a la sik a nia, thil pawimawh leh ṭul tak a nih loh chuan a hawin ka ring lo ve ringawt.

Ka nu leh pa hnenah thil awmzia ka sawi a, phone-a an inbiakna ka hriat erawh ka sawi ta êm lo. A dik tak chuan ngaihzawng neih hi nuam ka ti hlawl lo a ni ber, ka rualpui deuh chu nise a zia mai thei, a puitling leh lutuka hlauh rûkna ka nei tlat.

Chaw ei dawn hnaihah ka chhuk leh ta chauh a, ani pawh a lo inpeih ap tawh. Mahni in lama haw tur a ni bawka eng teh ual a keng lo a ni ang.

"Chaw ei ila ka chhuah mai a ngai dawn, i nu leh pa lo hrilh mai rawh aw," a ti a, "Aw le," ti chauhvin ka chhâng.

"Eng nge ka lo hawn ang che?" Tia min zawh chuan, sawi mai tur ka hriat loh avangin ka nui ringawt.

"Ka nu leh pain nupui nei turin min duh a, amah hi vawihnih chu ka hmu tawh nghe nghe, ka phei vat a nih loh chuan palâi an lo tîr duh mai ang, min ring la, nang lo chu tumah neih ka tum lo, Náno, ka tan i awm reng ang tih min tiam rawh," a tih chuan hnuai lam ka biha chhân dan tur ka hre hlawl lo.

"Náno...."

"U Mapui, nupui chu nei mai rawh, ih..kei chu ngaihzawng neih hi nuam ka ti lo," ti sapin ka ngawi zui daih.

"Ka hmangaih loh chu engvangin nge ka neih kher ang? I la naupanga i zâm a nih kha min ring tawp rawh, ka haw phei hunah engkim ka chingfel ang a, i zir lai chauh ngaihsak ang che," ti hmukin a tho chhuak nghal a, hetianga a ṭawng hmuk hmuk te hian min tihlau zual.

Kan eina vel ka tih fel zawh hnuah room-ah min kai lut a, engmah sawi lovin min fâwp ringawt, ka thiam ang angin ka lo chhâng lêt ve a, chu chuan a tiphur sawt a ni ngei ang, ka kawr hâk chhanah ka âwmbâwr a rawn hrawm nawk nawk a, ka phu zawk. A thaw a rang sauh bawk. Ka hlau a ni tawp mai.

"U Mapui..." tia inlâk hran ka tum chuan nghet zetin min kuah a, "Ka ngai dawn che, ka ngai ngawt ang che," ti lehin ka chalah a fawp zauh a, min thlah ve hrâm.

Ka zei hlawl lova a tih ang angin ka awm ve tawp nimaiin ka hria. Ani erawhin duatna mitmeng nen min melh a, ka chhiar thiam ve.

A car fai zeta a luh lai pawhin ṭawng lovin ka thlir reng a, "Ka in chahbi hi lo kawl rawh aw, i nu phone aṭangin ka rawn be dawn che nia," ti supin a tlan chhuak ta a, a tlân liam hma loh ka thlir reng a, ka khua a ti har ve deuh.  

Hun a kala ni a ral a, kum tawp exam a hnaih tawh avangin hostel-ah min dah lut ta a.

Mak deuh mai chu khatia u Mapuia haw ta kha a inluahna neitute'n a tûk lawkah chahbi min rawn dil a, ka pe ve mai bawk.

A intiam angin ka nu a rawn be lo a, kâr a liam a, hostel-a ka luh dawn thleng pawhin a chanchin engmah hriat ka nei tawh lo, be hmasa turin ka huaisen tawk lo ka ti mai.

Ka chhungte pawhin a chanchin an sawi lang ngai miah lova khati khawpa kan ina tál tam si, auMami takngial pawhin vawikhat mah min zawtin a sawi lang lo hi mak ka ti ve. Ka zâwt ngam der si lo.

Exam kan zova hostel ka chhuahsan ta bawk a, tûk khat chu u Mapuia in luahah ka zuk kal chhin a, pawn lamah a lo inkalh ṭhap.

Khatia a haw hnu aṭang khan thla thum a liam tawh a, eng emaw thil dik lo awm ang tlata hriatna ka nei a, in neitute zawh ngei ṭhaa ka hriat vangin an inah ka lut ve ta tawp a.

"Ehe, Náno, i dam maw?" Tiin an nu ber nu Malawmi'n min lo bia a, ka dam thu leh hostel-a ka awm thu te ka hrilh ve a.

"I u Mapuia lah chu a pain a hriat lohvin a lo transfer fel diam mai a, tunah Aizawlah a awm a nih hmel, thla hmasa khan a farnu te pahnih leh a pain a in luah an rawn ti ruak a lawm," a ti ta mai, an che rang ka ti hle.

"Engmah i hre miah lo a ni maw? I u Mami'n a sawi lo em ni?" A la ti tak deuh deuh a, engmah ka hriat loh thu leh an sawi ngai miah lo tih dik takin ka hrilh.

"Mapuia pa kha Irrigation-a an hotupa ber hi a ni a, thil a ti thei alawm, amah lehkha thiam a nih bâkah a hnaah a tui a, a pa a pension dawn tâk si-ah chuan hma an la rum rum a ni awm e, fa û ber a ni a, an kiang hnaia awm turin an duh tih te pawh a sawi nual, nupui nei tur ang deuh te khan an sawi a, tak tak a ni em ka hre lo," a ti leh bawrh bawrh a, kei erawh ka chhungrilah thinrimna sawi fiah thiam loh hian min ṭham.

Nu Malawmi te in ka chhuahsan lai pawhin ngun deuh hian ka inngaihtuah a, u Mapuia puitling ka tih ṭhin nen va duh huam lo mah ila, an chanchin a chhia a ṭha min hrilh ve turah ka ngai asin le. Min hmangaih angin a insawi a, min duh viau ang khan a lang bawk a, a lo tider mai mai zawk a nih ka ring ta ber.

AuMami erawh hi chuan engkim a hriat ka ring tlat a, zâwt hmasatu nih ka duh loh avangin ka ngawi ral mai a ni ang chu.

KUM THUM HNUAH

Hringnun a kal ngai rengin a kal a, kei pawh nula pangngai tia chhál theih ka ni ve tawh a, kum 22 ka pum ve ta a, lehkha zir lamah ka lâktlâk hlawl loh ṭhin kha a ni a, ka vanneih vang nge ka zir tam hrim hrim avangin B.com ka zir ve ta hial.

Ngaihzawng neih tih velah ka buai lo a, ka thinlungah u Mapuia kha a awm reng ṭhin. Ka ngaihzawng neih hmasak ber a ni a, a hunlaiin eng mah sawi lang ve ngam lo mahila inṭhenna fel fai tak kan neih loh avangin amah ka nghâk ni berin ka hria.

A chanchin vawikhat mah atu amahin an sawi lang ngai lo a, phone ka neih ve tâk hnu khan auMami a number ka dil a, "Ka delete tawh" tiin min chhâng hmak. Ka dil nawn ta lo.

Aizawl ka zin ve châng pawhin hmuh mai ka inbeisei ṭhin a; mahse, a teuh lo. An veng takngial pawh ka lo hre si lo a, a pa hming pawh ka hre chuang lo, kum thum kal taah khan ka lo mâwl hle tih ka hriat chhuah phah zawk.

Kan inzui chhung kha a rei lo a, ka zirna kawngah min pui nasaa min fuihtu ber a ni tih erawh ka chiang bal.

Zan khat chu u Ruata nupui u Kimtei'n min lo call teh tlat a, mak ka ti hle. Ani hi hmâna u Mapuia nena kan inhmuhna in neitunu kha a ni a, min hmuh fuh cháng hian min en duh viau ṭhin. Mahse, eng zawhna mah min zawt ngai lo a, ka be bik lem lo bawk.

"Náno, i lokal lawk hman em?" Tiin min rawn bia a.

"Eng thil nge, a va pawimawh awm ve?" Tia ka zawh chuan, "Lokal phawt la, ka hrilh ang che," a tih deuh tlat avangin an ina kal turin ka insiam a, ka nu hnenah a chipchiara sawi lovin ka chhuah lawk tur thu hrilhin an in lam ka pan ta a, eng thil chu ni maw!?

U Kimtei te in leh kan in inkâr hi minute 10 vel kein kal a ngai a, hlau ru deuh chungin ka kal lui ve ta tho.

An in chhunga lo ṭhu ka hmuh meuh chuan zâm luat vangin ka thâ a khur a, ka dang a ro vek.

Ngawirenga min kal bo santu Lalrinkima ngei kha a lo ṭhu a, chiang lutuka min enin a nui suk. Ka nuih erawh a za ve miah lo, mak ka tih êm avangin ka hminga min koh pawh chuan chhân mai nachang ka hre lova ka ding zum reng ringawt.

"Tikhan lo inkawm ula kan va lêng chhuak ang e, Náno, eng mah inthlahrunna tur a awm lo a nia," u Kimtei'n a ti sawk sawk a, kei pawh ka hamhaih zualpui a reh tawh.

"Ani nen eng mah sawi tur kan nei tawh lo, ka haw zawk ang e," ka ti ve hmak a, ka sawi zawh rualin kawngkhar lam ka pan nghal a; "Zomuanzual, naupangchhia i ni tawh lo," u Mapuia'n a ti chang fak a, ka ding chat.

U Ruata te nupa chhuak tur chu ûm zui ve tumin ka pên a, "Náno..." tia min koh leh tâkah chuan inherin amah nen kan inhmachhawn ta rán a.

"Eng mah sawi tur ka nei lo.." zawi sapa ka tih chuan ka bânpuamah hmerin, "Keiin ka nei alawm, nangmah hmu tura lokal ka ni," a ti dam thlup.

"Min hmuhna chhan tur a awm miau si lova.." ka lo ti a.

"Kan la inṭhen lo, kan inbiak loh leh kan inhmuh loh avang khan ka kalsan ta che tihna a ni hek lo.." tih pahin a hmaa a lo ṭhutnaah khan min hruai pheiin a bulah min pawt ṭhu ve nghal a, ka ṭang leh ṭung tawh.

Ni e, a hmêl a la danglam lova a hma âi mah khan a ṭha tawh zawk, a mitmeng dum tak ṭha tak chuan ngun zetin min en a, a taksa pawh a inphut mâwi tâwk. A lakah hian ka lang tê chem chem. Kan inlen hleih nasa mai si a, a mi uap a na ngei mai, a hma pawh khan ka hlau ru deuh a nia, tunah leh lek phei chuan ka zâm takzet a ni.

"Ka thutiamah khan ka la ding reng a, ka bialnu i la ni reng bawk, kum thum kal taa i chhuanlam hman ber i pass tawh bawk a, tunah chuan dáltu kan nei ta lo," fiah taka a ṭawng chuan chhân tumin ka lo âng zuau a; mahse, ka ngawi leh daih.

"Ka kal bo chungchangah insawifiah ka tum lo a, ngaihzawng dang ka nei tiin chhuanlam siam tum bawk suh ang che, a chhan chu i nei lo tih ka hrechiang," a tih zawm leh a.

"I zak lo e a..." ka lo ti ringawt.

"Kum thum ka nghâk chein ka thlah zalén tawh chea min duh lo a ni tih leh inneih i duh lo takzet a nih chuan ka mitah min en la thudik sawi ang che," a ti leh hmuk.

A ṭawngkam chhuak nelawmna rêng rêng nei lo chu hmânah khan lo dawng ṭhin ta ila ka tlânchhe rum rum tawh ang maw le, mahse, tunah chuan a hma ang em ema zakzum leh nêp ka ni bîk tawh lo tih hmuh tir ngei ka tum ve tlat.

"Eng mah sawi lova min kalsantu leh ngawi bo hmasatu chu kei nilovin nangmah i ni alawm, puitling zawk leh mipa zawk i ngawia i titawp a, duh hun huna zawm leh theih a ni lo," ka ti ve hmak.

"I nu leh i u Mami'n engkim an hria a, an hrilh bawk che, i zirlai zo tura ka duh vang chea ngawi ka ni, tunah chuan i zo tawh, eng chhuanlam mah i nei lo," a tih chuan rang zet hian, "Dâwt dâwt sawi lo mai rawh, ka chhungte hnenah eng mah sawi i nei lo, min bum tum suh," tiin ka ter ve at.

Mak tih hmel takin a mengphar ãwk a, chutah, "I u leh i nu zâwt ang che, ka tiam tawh chea ka nghâk rei tawh mah mah che," a la ti ṭâlh.

"A tawp vek tawh, kum thum chhung inbe lo leh inhmu lovin kan awm a, a tawp tawh tih kan hre ve ve, khanglai hunah pawh khan ka u te vanga nihpui ve mai mai che ka ni a, ka rilru a danglam tawh," tia ka sawi zo hman ṭâwk tihah thinrim tih hriat deuh hian, "I u te avanga min ngaizawng i nih chuan chutiang tel miah lova inzawmna kan neih a ngai a nih chu," tih pahin min rawn ban a, tawlhsawn tumin ṭan ka lo khawh ve thung.

Mit khap kâr lekah amah si chêtin min kuah a, uar leh duh thawh taka min fawh zui tâkah chuan chêt pawh ka che ṭha ngam lo, mak takin eng emaw nuam tihna riau ka nei tlat pek!

"Ka ta i ni..." ti supin a kut dinglam chuan ka taksa lâwng chûlin min fawp zui leh zat a, ka taksa a sa chhuak vekin ka hria.

Duhthawh taka min fawhna leh min chûl velna chuan keimahah danglamna rawn siamin ka lo chhâng let ve nghal a, ka lo thlâkhlelh zia ka hre chhuak bawk.

Thaw hawk chungin, "Náno..." a ti zui sup a, mahni invenna châng rêng ka hre ta lo. A mitmeng phurnaa khat hian min âikaih ni berin ka hria.

Rem lutuk loa kan taksa a inzawm tâkah chuan ka phu zawka ka mit a hnâwng nghal chap. A thleng rang lutuka sawi fiah dan pawh ka thiam lo, ka âwmah a hmai phumin a thaw hawk hawk a, 'Awi' eng thil pawi nge ka tih tâk!

Minute10 vel lek chhungin eng kim a thleng zo vek. Râpthlak ka inti, ka thianghlimna ka hlohna hmun leh min lâksaktu hmel ka en a, mit ka chhing sawk.

A tih tur, a lokal chhan leh a tum ber ti ta niawm takin a tho a, a insiam ṭhat vel lai pawhin ka la che eih lo.

"Tho rawh le, tihpalh tih sawi ka tum lo a nia, ka tihpalh a ni tlat lo," zawi ruiha tiin min pawt tho a, ka thawmhnaw min siam ṭhatsak hnuah ka mit hnâwng chap chu a rawn fawp zauh a, "Ti kha chuan i û leh nau te vang nilovin, keimah Lakrinkima nen tisaah pawh kan inzawm tih theihnghilh suh ang che, ka ta i ni a, tumahin min chuhpuiin min lâksak thiang lo," nelawm vak lo hian a ti leh a, a thinrim zawkah a ṭang em maw ni.

Min vawnna a thlah tawh a, ṭawngkam khat mah ka la chhâkchhuak ve lo. Ka chhungril a tâwt up up a, zahnain min tuam hlup hlup; engtin nge khatiang khan ka awmpui rîkngawt, tenawm ka intih êm avangin ka tho chhuak thut a, min vawn beh hmain rang lutukin ka tlan chhuahsan ta a.

Ka rilru put hmang pawh ka hrethiam tawh lo. Tum nei rana lo kal a ni tih erawh ka chiang lawi si.

Ka hnunglamah min ûmtu an awm tih ka hria a, kan inkâr a hla vak lo. Min ko ring ṭha ngam chiah si lo hian, "Náno, lo ding teh, lo ding lawk teh," a rawn ti lawm lawm a, ka beng chhu ngawng luiin ka tlân chak sauh, ka châwl a nih vaih chuan min ûmpha anga min hruai lui duh maiin ka ring.

Thaw hlawp hlawp chungin kan veranda ka rap kâi ta a, ka khûp a záwi vek. Ka hnung lawkah u Mapuia hah hmel takin a lo lang zui bawk a, "Min biak tum tawh suh, engkim a tawp vek tawh," ka ti a, "Náno, la lut rih teh suh, khawngaihin," a ti thâm ṭuak a, a thusawi ngai pawimawh duh lovin ka lût lui ta a.

Common room-ah ka chhungte an lo ṭhu ṭhap a, "I va hah hmel ve engtizia nge?" Tia ka nuin min zawhna ka chhâng dawn chiah tihah kan kawngkhar a rawn inhawng a, u Mapuia a lo pên lut ve ta nghal a. Hei chu ka rin phâk bâk a ni, min zui luh ngam ka ring lo kha a ni a, ka tisual hle.

"Náno, eng nge thil awmzia?" Tia auMami'n min zawh chuan chhan ngaihna ka hre lo, insawifiah dan tur ka hre teuh lo, inthlahrung zetin ka ding zum reng ringawt.

"Mapui, nang pawh nupui nei mai tawh tur i ni a, helaiah hmuh che kan inbeisei lo," ka nu áw a chang fak mai.

"Zomuanzual, i room ah lut rawh," khauh fara ka nu thupêk chu hnial lovin ka room lam ka pan nghal hmak.

"Ka pi, Nánoi hi min neih tîr tawh mai rawh u, eng chena rei nge min nghah tîr in tum?" Tia u Mapuia ṭawng ri chu ka hre pha reng.

"Ṭhu phawt teh," tiin ka nu'n a chhâng a, eng nge an sawi hriat ngei tumin beng ka chhi kar.

"Mapui, hriatthiam tum rawh, kan duh loh vang che a ni lo a, i pain nupui a thlansak che tih min hrilh vek tawh, hetia kan fanu naupangtê ûma zui kâwi zui kâwi lo hian i pa thlansak che kha nei la i tân a ṭha zawk, Mami'n engkim a sawi chian tawh kha, nu leh pa thuawih hi a ṭha a, i duh danin kan fanu hi nei lui mah la i pain a pawm chuang lovang, tihian a awm ang ang hian awm tir mai rawh, thlah zalen tawh rawh.." ka nuin a ti ta sak sak a.

"Ka thei lo..." zawi supa u Mapuia ṭawng chu ka hre pha chang chang.

Ka chhungrilah khawngaihna leh lainatna a awm; mahse, eng emaw takin min mawlh si. U Mapuia pa pawh chu misual tak a ni, a fapa duh lo chung chung nupui neih tîr tum ṭalh mai, a sual thlâk mah mah.

Khuh kharh chung hian ka nu bawkin, "Hna nghet i nei a, i ngaihtuahawm loh; tin, kum thum lai i ngawi bo tawh bawka tuna taka rawn thar thawh leh keini pawhin kan remti tawh lo, a kum a la nau a, pasal neia mi ina lâwi turin a la puitling tawk lo, zanin hi in tâwpna ni rawh se, i pa thu awih ang che," hnial theih miah loh hian a ti ta a.

"Puitling ka ni a, ka nupui duh zawng thlang thei tura puitling ka ni tawh bawk, rei lotê amah min biak tîr rawh u," tiin a ngen leh ta a. Ka lo inhum ruh ngat ngat.

"A theih loh, in kum pawh a inthlau a, i pa ṭawngkam chhe tleuhna nih nawn fo kan duh lo," ka nuin a ti ta khawl khawl a, ka hriat ve loh eng thil tak lo sawi dun hlawm ang maw.

"A ṭha e, ni rawh se, Zomuanzual, inchhir suh ang che..." thinrim lutuka u Mapuia ṭawng chu a ring ṭha ngang mai.

Chumi hnu chuan boruak a reh tlawk tlawk a, a chhuak ta a ni ngei ang. Ka khumah ṭhuin ka insût faih faih a, lo râi palh ta ila, ni lo; chutiang a thleng lovang tiin ka inhnem chawp leh a, zanina ka lo chhuak ta kher kher chu pawi ka ti vawng vawng.

Ka nu leh ka û room-ah an lo lut a, "Ani nen khan eng mah inzawmna inneih kan remti dawn lo, theihnghilh tum ang che, a pa saw misual mi tawrawt a nia, an zinga tâl ve chi i ni lo, mihur vâk rawlai ang maiin in lo inhmu a bansan hmak ang che," tiin min ṭim erh.

"I mak ve ngawt mai, inkawp lo ang hmakin i lang a, engtin nge a lo zin tih te i lo hriat hmanhmawh ni, i va tenawm ve," tiin auMami'n min hau ve bawk a, insawifiah ṭul ka ti lem lo. An awih dawn tlat loh avangin.

"Lalrinkima nen in inbia emaw inzawmna in la nei tih ka hriat chuan i châk lo khawp ang," ka nuin a tih leh hnuah min chhuahsan ta a.

Ka thiamthu sawi ka tum deuh kha a ni a, ka ṭhulh fel hmak.

Bathroom-ah lutin ka inbuala nichin maia kan tih zawh tâk a sulhnu kha tih reh tum sateh mahila awmzia a awm der si lo.

Zan dâr 12 a pelh pawhin ka la mu meng kar a, ka whatsapp message tone a rik chuan ka en ve hram, number láwng a ni a, "Náno, i lakah rilru chhia ka pu lo, ka hmangaih chea i tan ka awm reng ang, eng anga rei nghah ngai mah la ka nghâk zel ang che," tih a lo ni a, u Mapuia number a ni tih hrilh hranpa ka ngai lo.

Ka chhungril chuan a khawngaih; mahse, ka dawihzep a ni, kei hi ka nêp thlâwt, a chan chhe zawk leh tuartu tur zawk ni siin ka tlanchhe zel zawk si.

"Min kalsan rawh, ka tihpalh," tiin ka reply ve ta tho.

"Ka thei lo, ka thei dawn chuang lo," a ti leh bur. Chhâng tawh lovin phone ka switchoff ta a, ka number u Kimtei'n a pe a nih ka ring ve tawp.

A mah ka duh. Mahse, ka hlauthawng si a ni, ani pawh kei aiin kum kua laiin upa mah se, nu leh pa thuhnuaia la awm tho a ni a, khaw hmuna awm kan ni lo bawk nen thil a khirh vek, zanin khan tum loh deuha va hmu ni mahila a duh ka tih puiltinsak tho si, ka va nêp si ve.

A number erawh chu ka saved ve ta tho a, kum thum liam taah khan ka chhungte nen eng boruak nge an neih ka hriatpui lova, khati tehhrepa min ânkhum danah boruak ṭha lo tak chu a awm ang tih ka ring thiam.

Kan inkawp tirhah pawh nu leh pa unaute hriatpui thlap kha a ni ve a, amah an duh lohna an lan tîr ngai loh mai bâkah a in luahah pawh ngaihngam takin min riah tîr kha a ni si a, ka ngaihtuah thui poh leh ka buai tulh tulh.

Khua a var a, mut ka hmuh ṭhat loh avangin ka meng búi chûk mai, choka lama ṭawng thawm leh ka hming an lam rîk ka hriat vangin dimtea tho chhuakin an ṭawng hriat ka tum ta a.

"Amahin hre lo mah se a pain engkim a hriatpui a, eng ang pawhin hlawh tam mah se Nánoi hi neih tîr ka tum chuang lo, rei loteah a thihsan anga naupangtein a hmeithai dawn asin, chutiang chu ka thlen tîr ngai lo ang," tia ka nu ṭawng ri chuan beng a verh zar mai.

Ngun zawka hriat tumin ka insawn hnai hret a, ka nu leh auMami, ka pa pawh tiamin an lo ṭhu ṭhap.

"Mapuia hi chuan a hmangaih alawm; mahse, atan chuan a pa thlansak doctor hi a ṭha, nakin zelah pawh a enkawl theitu tur a ni a, Mapuia hian a hriat chhuah hunah a la lawm zawk ang," ka pain a ti ve chuar chuar bawk.

Thurûk, kei leh u Mapuia hriat loh hi a awm ngei a ni.

Ka nu leh pa meuhin u Mapuia'n min hmangaih tih an sawi thei a; mahse, eng ati nge nizanah khatiang khan an ṭawng si. A pa pu Zoliana hian  a fapa chungchângah eng nge zêp rûk a neih?

Rang takin u Mapuia ka hmuh a ngai, nizanah khatiang khan tlânsan mahila thudik ka hriat hma loh chuan tlân chhiat ka tum ta miah lo.

An la ṭawng mawlh mawlh laiin thawm ka va nei ta a, an ngawi zui hmak, min en hrek hrek a, chutah ka nu chuan, "Náno, nula i ni ve tawh a, zan lama chhuah leh thil ṭul lova teivah ka remti tawh miah lo a nia, class i kal duh a nih pawhin i û in a hruai tawh ang che," a la ti zui.

"Aw le, vawiinah pawh ka kal dawna min hruai nghal thei a nih chu," ka ti ve mai a.

Engtin chuan min ti zui bik lo.

Zêp lohah chuan u Mapuia hi ka duh, ka duhna ka tilang thiam lo mai chauh a ni. A puitlin êm avangin ka zah a, keimah ka inringtawk lo zâwk a ni ber.

Class kal turin ka insiam a, ka phone ka on hnuah eng message mah u Mapuia hnen aṭangin ka dawng lo. Mahse, biak ngei ka duh si avangin ka call ta a, vawi thum a ring ral ṭhak.

"Ka be duh che" tih message ka hnutchhiah ve ta tawp.

Ka nuin tukin lama a lo sawi tawh angin u Ropuia'n min thlah ta a, ani hi chuan min duata min hau khât khawp mai, kei pawhin ka ngaina bawk.

"Mate, ka nu leh pa thu hnial rawh ka ti miah lo, mahse, Mapuia hmuh tum la, in inkâr hi ching fel rawh u, engmah a zîktluakin ka hre ve lo naa tunah hian u Ruata te inah a thlenga class kal lovin ka va dah ang che anga tlaiah ka lo hruai leh dawn che nia, amah zawt chhuak vek ang che. Nizanah min rawn bia a," a tih takah chuan lawm lutuk vangin ka âu chhuak lo chauh.

Class kal lovin u Ruata te in kawtah min drop ta a, "Mapuia hian a hmangaih che tih ka hria, eng harsatna nge a neih hriat tum ngei ngei rawh aw," tiin a tlân liam dawn thlengin min la chah a, ka û vang pawhin hriat ngei ka tum dawn lovem ni?

Mahse, ka nu te sawi danah kha chuan amah pawhin a hre lo, a pain engkim a hria tih kha a sawi dan a ni a, â.. ka thluak a chawmawlh vek.

Zam ru deuhin u Ruata te kawngkhar ka kik ta a, min lo hawnsaktu pawh tudang ni lovin amah u Mapuia ngei a ni.

"I lo thleng ta maw?" Dam leh zawi ruihin a ti a, min beisei sa a ang zawk mah.

Inchhunga ka luh theih nan kawng min kian a, min zui lut nghal bawk. Nizana kan awm dan kha ka mitthlâah a rawn lang a, ka va zak ru tak.

Tumah midang hmuh tur an awm lo a, ka mitmenga zawhna lo lang chu a man thiam a ni ang, "An chhuak tawh, i û in a lo hruai dawn che tih ka hrilh a," a ti ṭha ve mai.

Pehhêl kual miah lovin eng vangin nge a pain nupui thlansaka neih tir kher tum nge a nih tih ka zâwt ta a, ka zawhna teh thut chu mak a ti deuh a ni ang a meng buai nak mai.

"Náno, eng ang pawhin min thlansakin min neih tîr pawh tum se, nang i awma pasal min neih san hma chuan tu hmeichhia mah ka nei dawn lo, Aizawla ka lêt leh hma pawhin ka nupui tur te chu a hual saa tun thlengin ka neih loh hi, ka nghâk che tih ka sawi tawh kha," nghet charhin a ti a.

"A nih, i nupui tura a thlan chu eng ang mi nge?" Tia ka zawh chuan, "Doctor a nia kei aiin kum khatin a upa.." a ti leh a.

"Eng doctor nge?" Tiin ka zawt leh a, "A ho, ani chungchâng sawi a ngai lo, inru mai ang," a ti leh tawp.

"Eng doctor nge tih tal min hrilh rawh," ka ti leh ṭâlh a, kei leh kei lo angin ka puitlin ve hmel tawp.

"Medicine super specialist.." a ti tawi tuk.

"Chuti a nih chuan thil chhui zau kan ngai a nih chu," tiin hnuailam ka bih a, ka kut nuai nawk nawk chung hian, tukina ka nu leh pa thusawi ka hriat ang ang kha ka hrilh chhâwng ve ta a, mak a ti tih ka hre mai. A chal a chuar leh zauh ṭhin a, chutah, "Ka pa ka lo zâwt dawn nia, ngaih ṭha deuhin lo awm rawh aw.." a ti sup.

"Nizan avang khan tihpalh aw, a thleng nawn tawh lo ang, ka nupui i nih hma chuan," dam thluama tiin ka biang tawn tawnah a vuan a, "Ka hmuh tirh phat che aṭangin ka duh che, tun thleng pawhin i laka ka rilru vawikhat mah ka la sawhsawn lo, min ring rawh," tiin ka hmuiah a fawp zeuh a, "Nang pawhin min duh tih ka hria, kei angin i sawi chhuak ngam lo mai mai a ni, a dik tiraw?" Tiin a nui vei suk a, ka lo bu nghat nghat.

"Ka duh che a, mahse, i upa bîk si.." ka lo tih chuan nui huk chung hian, "Aia upa neih hi a ṭha asin, nakinah i la hrethiam mai ang," a ti duh lek.

"Ih, phone ka nei tawha i haw hunah pawh chanchin min hrilh ve zel rawh aw, ngawi char char tawh suh, engtikah nge haw i tum?" Tiin ka zawt zui nghal a.

Zanin tlaia chhuah a tum thu leh a pa a biak zawh hnuah chanchin min rawn hrilh ang tih a sawi a, "I nu leh pa chu ka hmin thei turah ka ngai, ka tan lo rinawm ang che," tia min kuahin min fawp vang vang a, "Kum thum chhung kha a rei êm a ni, ka nghâk rei dawn tawh lo che," tih pahin duat tih hriat ngawih ngawihin min en a, a mitmeng a hlim sarh. Kei pawh ka hlim.

Mitmei ven tur awm ta lo chu kan infawp sek a, induat nan hun kan hmang a ni deuh mai, tlaiah daih ka haw dawn a, chu pawh ka u in min lo hruai thlap dawn, a va nuam dangdai tak.

Ka thil hriat chhuah tum thurûk deuh reuh kha kan sawi lang nawn ta lo. A pa a biak phawt tur thu a sawi avangin chutah chuan ka innghat ve tawp a, amah lah chuan eng hu-ah a ngaih hmel loh ropui si. Chuti em emin ka rilru a kam ta bîk lo.

Tlailam dâr hnih a ri a, ani pawh zan tlan tur a nih vangin chhuah hma a duh thu a sawi a, a ruala kal ve turin min sawm nasa viau mah se, class kal ka chhuanlam a, a nui ṭha duh mang hlek lo.

"Náno, i nu leh pa bulah eng mah lo sawi suh aw, ka phei phawt ang a, kan inkâr a tawp angin anni chuan ngai rih rawh se, i u Ropuia chiah ring ang che," tiin min chah nawn leh a, chutia a ṭawng mawlh mawlh lai chuan thâwk leh khatah a hmêl a rawn dâng sâwp sâwp a, thâwk harsa tih hmel takin min rawn melh a, ka tâlbuai vek.

"U Mapui...." tia ka kohna chu hre awm pawhin a lang lo a, chunglam melhin a thaw kâwk kâwk ringawt.

Lalpa eng tin nge ka tih dawn? Ni lo, min puitu tur ka zawn a ngai, khur dar dar chungin ka phone ka ban a, u Kimtei number ka hmet chhuak a, ka call nghal.

"Kan lo haw nghal ang, lo ko char char rawh," tiin phone a dah zui nghal a.

Ṭhenawm te ko tur takngial pawhin ka chhuahsan ngam lo. A hmêl a dik hlawl lo a, a thâw a rangin boruak khamkhawp lo a ang bawk si, mittui tling pam chungin a kutah ka nuaia ka ko pah bawk a, ka hlauhthâwn êm avangin ka thidang mai ang tih ka hlau zawk.

"U Mapui... u Mapui.." tiin ka ko nawn mawlh mawlh a, min en reng naa min hmu angin a awm lo.

"Lalpa a chungah eng thil ṭha lo mah thlen tîr suh aw.." tiin ka ṭawngṭai tawp.

Amahah hian eng emaw dik lo chu a awm a ni, eng nge a nih hriat ka tum ruh hle bawk....

-B®®
Shadow of the life

B+>[BeckirafARenthleI]<+®®