KA CHAN PUAL [A story by -B®®]

2.KA CHAN PUAL

Shadow of the life

Ziaktu: Becky Rafa Renthlei

-B®®

[Recap]

A hmêl a dik hlawl lo a, a thâw a rangin boruak khamkhawp lo a ang bawk si, mittui tling pam chungin a kutah ka nuaia ka ko pah bawk a, ka hlauhthâwn êm avangin ka thidang mai ang tih ka hlau zawk.

"U Mapui... u Mapui.." tiin ka ko nawn mawlh mawlh a, min en reng naa min hmu angin a awm lo.

"Lalpa a chungah eng thil ṭha lo mah thlen tîr suh aw.." tiin ka ṭawngṭai tawp.

Amahah hian eng emaw dik lo chu a awm a ni, eng nge a nih hriat ka tum ruh hle bawk....

*****

Chutia mangang taka kan inbuaipui lai chuan u Kimtei leh u Ruata hmanhmawh lutuk tak maiin an lo tlan lût a, chhuata ka ṭhu sawp nuai leh u Mapuia ka malchunga lu nghata thaw kâwk kâwk an hmuh chuan rang takin an che nghal vat.

Kâr lovah Lunglei Civil Hospital Casualty kan thleng a, u Ropuia chanchin ka hrilh ve vek a, min lo phat sak a tum thu a sawi a, ka thlâ a muang deuh. 

Oxygen an pêk hnu aṭang chuan a thâwk dan pangngai chhovin a hmel hmuh pawh a nuam ta, a la biak theih loh nain ka ngaih erawh a ngam ve deuh. Investigation engmah tih theih a ni rih lova a chhungte lam u Ruata'n chanchin a hrilh tain ka hria; natna eng emaw amah pawhin a hriat miah loh a vei  tihna a ni thei a, engvangin nge a pa hian a zêp kher. Enkawlna ṭha a dawn vat loh chuan a thi mai dawn asin, sual thlâk lutuk.

Tlailam dâr nga a ri a, kan rin loh dan deuhin thil a kal ta tlat mai! 

Pu Zoliana chuan Lungleia an chhungte leh a thawhpui ṭhian ṭhate damdawi in lamah a rawn tîr chho a, u Mapuia chu Aizawl lam panpui an tum ta rum rum mai a, kei leh u Kimtei'n lo hnial sateh mahila a pa thupêk a nih miau avangin leh an neihin a tlin bawk a, engkim rang takin an buatsaih zung zung bawk si. Ka ṭah a chhuak hluah hluah, hei aia puitling leh thil tithei ni ve ila chuan ka thusawi an bengkhawn dawn si a, chutiang ti thei dinhmunah ka ding ve lo lai hi nâ ka ti ber. Chutah chhungte hriatpuina tel lovin ka la buaipui zui.

Zan dâr sarih velah Ambulance-in Aizawl an panpui ta a, zui ve ka tum a; mahse, u Ropuia'n a rem ti ta tlat lo. "Helaiah i theihtawpin i buaipuia a pa rilru kan hriat vek kha, amah biak theih nise chuan zui ve a pawi lo, mahse,  i hmuh ang khan min mamawh lo em mai heng ho hian, i haw phawt teh ang," a ti ta a.

Heta min mamawh lo a tih nachhan hi Casualty khuma a muta kan ṭhutpui lai khan an chhungte leh tutute emaw lokal khan min be eih lo, chanchin engmah min zâwtin min râwn der hek lo a, anmahni ngaihdan leh pu Zoliana thu angin doctor an bia a, Aizawl an panpui tawp. Lawmthu sawina ka phût miah lo nain ṭawngkam khat pawha a awmdan leh damdawi in kan panpui chungchâng min zawt miah lo kha mak ka ti ve.

U Ruata te nupa leh ka u nen kan haw ta a, ka nu leh pain engkim an hre vek tih ka hre bawk. Pawi pawh ka tih tawh lo.

U Mapuia awm dan teh thut kha ka ngaihtuah lêtin mak ka la ti reng, khatiang khan a awm fo ṭhin nge, a vawikhat awm na ni ang. Â.. ngaihtuah tur a tam lutuk a, ka khawngaih a ni tawp mai.

A mitmeng fim kâk ṭhin buai ta vek te, boruak hîp tuma a thaw kâwk kâwk lai te kha ka mitthlâah a lang zut zut a, a taksa lang theiah ṭhat lohna nei ang pawhin a lang si lo.

"Zomuanzual, Lalrinkima nunah vawikhat mah inrawlh tum tawh suh ang che, kan thu i awih dawn lova min pal lui dâwn a nih chuan va ûm rawh, pan la va luhkhung rawh, i tâna ṭha lo tur kan sawi ngai em ni?" In chhung ka lût fel chiah tihin ka nu a âng nghâl hlawk hlawk a, ka ngawi reng.

"Nu, ka lo hruai haw tawh hi, khatianga Nánoi tih vak vak kha awmzia a awm lo a nia, natna te chu tupawhin kan tâwk theia helaiah a lo awm remchânga a buaipui ve a ni mai, sawi fo a ṭul lem lo," tiin u Ropuia kan û ber mipa chuan ka thlavang a lo hauh ve a, ani hi kan mipa neihchhun a ni a, a nupuiin a uiresan avangin kan inpuiah a lo lêt leh a, vanneihthlâk kan ti dawn nge vanduaithlâk takin fâ an nei hman lo hlauh. 

"Ramropui, i farnu hian mualphona tawk se a mawh i phur ngam dawn em ni? Rinkima te chhungkua nena inhnimhnaih ka duh bau lo," tiin a âng leh hmuar hmuara ka nu tak hi chu(h).

Zanriah kan kîl laiin eng mah an sawi lang lo teh tlat. Chaw tih tham ka ei lo a, ka rilruah u Mapuia bâk a awm lo, helai aṭanga zui tute zingah khan hmelhriat pakhat mah ka nei lo a, amah a harha min biak theih hma chu ka nghâk ngat ngat mai a ni ang chu. Dam taka an thlen theih nan vawi eng zât nge ka ṭawngṭai pawh ka hre sêng tawh lo.

Zinglam dâr thumah ka phone a rawn ri a, number ka hriat ngai loh a ni. U Mapuia chhungte lam annih ka rin vangin ka pic-kup a, ka ring dik chiah bawk.

"Náno, Mapuia nau Atei ka ni a, tluang takin an lo thleng e, khalamah i lo buaipuia kan lawm lutuk aw, ngaihṭha deuh khan lo awm la a zia mai ang, ani hi chu nat zeuh zeuh a ching ṭhin a," tiin dam thliamin a rawn ṭawng a, "Tunah amah a harh em?" Tia ka zawh chuan, "Harh e, hei ka awmpuia be tur chein min ti a," a ti leh mai a.

"Pathian zarah eng êm a ti lo ang, ka lo ṭawngṭaipui reng dawn nia, chanchin min lo hrilha ka lawm lutuk," ka ti ve luam.

Ka ngaih a ṭha ta huai.

Mahse, Aizawla an phurh phei aṭangin kâr khat a liama kei pawh nitin class kalin ka chhuak ve bawk a, vawi tam ka call chung pawhin chhânna reng reng ka dawng ngai lo. A nau Atei pawhin min rawn be nawn tawh lo a, ka call pawhin a la ngai lo reng renga min call-back hek lo.

U Kimtei ka va zâwt ta tawp a, ani lah chuan, "Náno, Mapuia chungchâng eng mah hriat ka nei bîk lo, u Ruata ka zawh lahin 'a ṭha, ngaihtuahawm a ni lo, a hna a zawm ṭep' tih bâk eng mah a sawi lo," a lo ti ve bawk si.

Lungawi vak lo chungin ka insawh tau a, khatia a na tuar hmel ka hmuh khan ka lo duh zia leh min kalsan tura ka duh loh zia ka hriat chian phah hle. Aizawla zina chanchin va ngaihven ka duh rum rum hial; mahse, ka nu leh pate'n an remti dawn teuh si lo. 

Kum tawp kan hnaiha September kan chuangkâi ṭan tihah ka thlatin hunbi ka zawh lo tih ka hre ta a, u Mapuia nen kan awm dun dan ka hrechhuak zui nghal, râi tur êmah ka indah phal lo a, khatiang vawikhat lekah te chuan vannei fê kan nih loh chuan naupai ka inbeisei miah lo. Mahse, intest ve ngei ṭhaa ka hriat avangin u Kimtei te inah pheiin thil awmzia ka va sawi ta a, ani hi engkim ka sawi ngamna awm chhun a ni.

U Mapuia biak pawh ngaihna ka hre lo a, a number ka neih ve chhun lah switch off a inti char char bawk si, ka beidawng lutuka lungngaih ngaihna pawh ka hre lo a ni ber, ka chhungte'n min veng run lo mah se, zan lamah ka chhuak thei ṭhak lo a, keimaha danglamna awm pawh an hmuh kân rih a nih ka ring.

Chawhma chauh class ka neih avangin u Kimtei te in lamah ka pêng kawia test kit min leisak chu a rawn phawrh nghal vat; kum naupang tê nimahila ka hun tawngin a zir miau loh avangin zah loh theih a ngai a, u Mapuia lakah eng beiseina mah ka nei lo, ka duh tawh lo tihna ni lovin a dam ṭhaa office a kal leh tawh tih u Ruata'n a sawi tlat a, kei chu khatianga tih kâwi mai mai atan bâk min duh lo ni berin ka hria. Chuvangin, biak nawn leh tumna ka nei ta bîk lo.

Ka nâ a, ka zak a, mualpho ka intih bâkah bum ka awlsam lutuk kha ka inhaw ber.

Ni e, Test kit-a rïn pahnih ka hmuh rualin nau ka pâi tih hrilh leh chuan ka ngai lo. U Mapuia biaka hrilh ve ngei erawh ka tum bur. 

U Kimtei nen biak pawh dan tur kan dap ta a, a zawna zawnga beidawng duh ta lo ta chu a number thar kan nei thei ta hlauh, chu pawh helaia a thawh laia a kawm ve ṭhin Hlupuia kan dil tawp a, a lo nei hlauh.

Keimah ngeiin ka va call ta a.

'Hello' a tih rualin, "U Mapui, keimah Nánoi, phone kha off suh ang che," ka ti nghal a, ka inringtawk lutuk chu thil mak a ni, a ngawi zui vang vang a, phone erawh a dah ta êm bik lo.

"Kum thum liamtaah khan kan inkâr titawp lovin min kalsan a, i chanchin eng mah hriat ka nei lo, tunah kum thum a ral a, i rawn lang leh tawp a, kan inkâr a la ṭhat thu leh kan la inkawp reng a ni tih i sawi bawk a, tunah hian eng nge kan inkârah la awm hriat ka duh," tiin ka sawi tlang pawp.

"Náno, a pawi ka ti khawp mai, nang leh kei hi chu inkawp tur kan ni lo a ni ang e, tihian tunah hian tawp rawh se aw. Nupui pawh ka nei vatin ka ring a, i nu leh pa thu lo awih ang che," a ti chang fak.

"Khatianga min awmpui hnuah tawp rawh se tiin awlsam takin i sawi leh thei a ni a, ka lo ring ta che kha pawi ka ti fê zawk, puitling emaw i nih ka lo ti a, eng mah i ni lo, êk tluk i ni," thinrim lutuka ka ṭawng chuan a nui huk a, engah vak a ngaih loh hmel.

"Naupang bum nuam tak i ni, ka hmangaih che emaw ka lo ti kha ka âtna a ni, chuti ni lo se hman hmânah nupui ka nei ang, Zomuanzual, ka lo â takzet.." a ti leh hmuk hmuk a, a fa ka pâi tih sawi ka tum ta lo, "I chawh a nih chu, inchhir suh ang che, inchhir miah suh," tiin kan inbiakna ka titawp ta a, ka ṭap nghal hlawp hlawp a, ka kianga ṭhu u Kimtei'n ka dârah a rawn vuan a, "Chhel taka awm tum rawh, Lalrinkima lamah ka ṭang miah lo a nia," tiin ka samah a chûl a, ka ṭah a chhuak zual sauh.

Engtin nge khawvel ka hmachhawn ang, hlawh ka nei lo a, ka chhungte huat rawn leh duh loh ngawih ngawih fâ ka pâi a nia, ka hmabâk a thim khup nimaiin ka hria; u Ropuia tal ka hrilh loh chuan ka tân kawng a awm lo. 

Ka naupaiin thla hnih hmel a hmu ve ta a, ka vannei letling; eng mah huat nei lovin ka la tâl ve nawk nawk a, a rûkin u Kimtei'n Serkawn hospital-ah min hruai a, ka mamawh engkim min tumsak vek bawk a, a lakah bat ka ngah hle. U Mapuia ka hrilh hre ta lo erawh a lawm chiah lo a, min hau nghe nghe.

Ka chhungte lamin engah mah min ringhlel lo a ni tehchék ang chu class pawh keimahin ka kal ve leh ta a, u Ropuia a rukin chanchin ka hrilh vek, 'Titla mai rawh' a tih ka ring deuh kha a ni a, a teuh lo. "Nupui nei reng chungin fa ka nei lo a, i vanneihna tur pawh a ni thei asin, keiman ka enkawlpui ang che, a ṭul ka tih hunah ka nu leh pa pawh ka hrilh ang," a ti hlauh. Ka lawm êm avangin ka kuah a, ka hnuk a ulh titih. Kum 22 lek niin sâwn ka pawm dawn chu a ni si a, ka hmabâk a êng teh chiam lo.

U Mapuia number erawh ka saved ve ta tho a, a status up pawh ka view sak ziah. Block lova paldarh theih ka duh êm avangin na chung chungin ka en lui a ni deuh ber.

"Náno, Aizawlah i lo phei thei ang em?" Tih whatsapp aṭanga ka dawnna number chu u Atei a ni tlat, mak ka ti lutuk a, "Eng thil nge ni a?" Tiin ka reply ve tho.

"Lokal tum phawt mai rawh, pasal nei tawh ka ni a, kan inah i lo thleng dawn nia, thil pawimawh tak sawipui tur che ka nei, phone aṭanga sawi chi a ni lo." A ti bawk si.

"U Mapuia chungchâng a nih chuan kan inṭhen tawh, min ṭhen tawh," ka tinawn ve ngat a, "Chuvang tak chuan alawm lokal tura ka duh che, Náno, vawikhat tal amah hmu turin lo kal hrâm ang che, i kal man leh senso ka lo tum vek ang," a la ti zel a, ka lo inngaihtuah tur thu ka hrilh ta zawk a.

A tûkah u Ropuia hrilhin Aizawl kal dan tur kan ruahman dun ta a, chhuanlam tur a vang ngat ngat mai si. Ani pawh a ngaih a ṭha chiah lo deuh a ni ang, "Mate, thil dik lo awm a awm a ni, tuna i kal loh chuan i damchhunga inchhirna tur thil a thlen palh ka hlau, khati khawpa hmangaihtu che khan râlkhat aṭangin a rawn ṭhen che hi ka ring thei miah lo," a ti ve tlat.

Kan buaina ber chu ka kal chhan tur khâ a ni. 

Zanriah kan kîl laiin u Ropuia'n tihian a sawi ta a, "Nánoi tan hna eng emaw ka dap sak ve a, Aizawlah interview an lo ti si a, ani pawh kum tharah a pass chuan B.com a chhuak tawh mai dawn a, tuna lo inhmakhua hi a ṭha, duh leh ka va hruai lawk mai ang," tiin a sawi ta a, ka lo thaw dêp dêp.

"In va sawi lang ngai si lo ve, chutia û berin i tih te chuan amaha kal lovin va hruai la a ṭha mai alawm," ka pain a tih tâkah chuan ka thaw huai. Eng hna nge min dilsak tih an zawt a, "Accountant lam a nia, ka ṭhianpa min kawh hmuh," a ti leh zel, ka û nge nge, auMami a phur nasa mai. 

Tichuan, awihawm loh khawpa rangin ka ka zin thei dawn ta. U Ropuia nen kan ni dawn a, mahse pawi tihna ka nei lo, ka naupai pawh min hriatpuia 'Aizawlah i incheck up dawn nia' a la ti zel.

U Atei ka va hrilh nghal a, ka u nen kan ni dawn tih leh kan chhuanlam zawng zawng pawh ka hrilh tel vek. 

"Hmanhmawh thei ang berin aw, in rawn tlai hlauh ang e," a tih chuan a sawi awmzia ka hre lo viau; zawh thui theih miah loh hian, "A rang lamin ka tihna a nih chu," a ti ṭha leh mai a, ngaih erawh a ṭha zân lo.

AuMami'n thil min chah kur nguai a, min ringhlel chhete eih lo hi a mak zawk. 

Kan Car ken an la phal leh zel vei nen nuam singkhaw hi a ni ringawt, kan kal chhan tur hria se an phal îkhaw dawn si lo.

U Kimtei ka va hrilh ve a, "Mapuia i hmuh chuan engkim hrilh tlang vek tho rawh, i fa pa a nih vangin zêp duh lem suh," tiin min chah a, ka pawm zawng tak.

A tâwi zawngin; Aizawl kan thleng a, u Atei'n min lo hmuak a, an inah kan unaua innghat turin min ti naa u Ropuia'n a duh lo, "Nánoi hi chu duh leh in inah thleng se, kei chu ka ṭhiante inah ka thleng ang, Mate, thil ṭul lei ngai te naktukah keimahin ka buaipui vek ang a, hun kan nei rei lo tih hria la, zin leh kan harsat tawh dawn si, hun thawl ka pe ang che," tiin a ṭhiante in lam Kulikawn lamah min tlan liamsan ta a. 

U Atei te in kan thleng a, tu vak mah an awm lo, an fanu kum 7 mi leh anpa nen chauh an lo ni a, an pa phei chu hna thilah a zin bo lai a la ni zui, mitmei ven tur a tlêm a, ka lawm takzet.

U Mapuia nen an inang hle a, a hmelṭhain a hleitling zuah vei nen ka inhmu tê rawih rawih. A felin a bengvar si a, ka ngaina nghal mai.

"Lo zin tura ka chah chûk chûkna chhan che hi mak pawh i ti mai thei, ka u in a hmangaih zia che ka hria a..." a tih mêk laiin ṭawng tumin kâ ka âng zuau a; mahse, min lo dang chatin, "Náno, phone aṭanga sawi ka duh loh chhan pawh hei hi a ni, ka û in nang aia hmangaih leh duh a nei lo, a nau ka nih vanga sawi ka ni lo a, in inkawp tirhte aṭang khan chhungkuain kan hre vek, a duhzawng nei turin dikna a nei a, i kum a la nau deuh si a nghâk rih turin kan hrilh a nih kha," a ti leh a.

"Mahse, tunah te chuan kan inkâr a ti tâwp vek tawh alawm," tiin nau ka pâi thu leh amah pawh ka hrilh lo tih ka sawi ta vek a, ka ṭawng chhung zawngin ngun takin a ngaithlâ a, u Ropuia nen chhuanlam kan siam thute "Ka û hian u Mapuia a ring tlat a, i inchhir loh nan tiin tunah hian ka nu leh pa te lakah chhuanlam min siamsak a ni, u Ate, ka tan a zahthlâkin a tlâwm thlâk a, mahse, ka pum chhung ami vang hian i thu ka hnial duh lo a nih hi..." ka tih zawm leh a. 

"Naute chungchang eng mah ka hre lo, rin ngaihna pawh ka hre lo, tunah inbual la, in peih vat rawh, in puiah kan chho dawn nia," ati sawk sawk a, "Â, tunah te chuan..." ka ti dêk dêk a, "Hmanhmawh ang, i chau viau a nih loh chuan," tiin min tur leh a, ka hnial ta lo.

Aizawl kan thlen khan chawhnu dâr khat vel a ni a, office a kal daih awm si a, chu erawh ka sawi chhuak ta bîk lo.

Ka inbual faia ka inpeih thlap hnuah an inpui lam panin kan chho dun ta a, minute tam pawh kan kal lo. Kan hmaa building lian zet, kawtzawl zau nuam tak awmna zawnah u Atei chu a ding ta a.

"Hei hi kan inpui chu a ni a, ka nu leh pa an awm rih lo a, i sawi tur engkim sawi vek la, ka û thusawi pawh dawhthei takin i ngaihthlâksak dawn nia," tiin thaw a la hap. Boruak a uap churh nimaiin ka hria.

In chhung nuam leh changkâng tak a ni, an hausa tih a hriat hliah hliah a, ngawi rengin u Atei ka zui mâwl ve tawp, in chungah min chhohpuiin kawngkhar hnûm hlurh thinga siam záwnah chuan a pên tawp chat a. 

"Mama.." tia kovin kawngkhar a kik a, vawi hnih a koh hnuah mipa aw thâm chhalh hian, "Lo lut rawh," tiin a rawn chhawn a, tu âw nge ka hre teuh lo.

Dimtein kawngkhar a hawng a, room chhung fai zetah chuan kan inzui lut ta a, khuma mipa lo ṭhu chuan ka mit a la nghal zar. Min hnungchhawn zawnga ṭhu a ni a, tukverh lam a hawi nghe nghe. Kan thawm a hriat pawhin a che duh map lova a ṭawng miah lo bawk.

"Mama, i ṭha em? Tunge ka lo hruai le..." tiin u Atei a nui hak a, chutah chupa chu lo inherin min rawn en ta a, a mitmeng dul ruih leh thim mäk te, a taksa cher dawldang ru zet ka hmuh meuh chuan mak tih luat vangin ka meng phâwk nasa!

"Náno!" Tiin a phun sup a, ka pan hnai ruak.

"Tikhan lo inkawm ula, nakinah ka lo kal leh ang," u Atei'n a ti zung zung a, atu mah mah kan ṭawng lo. Ngawi rengin min en tlawk tlawk a, nui hmel a pu hek lo, a nelawm hlawl loh a ni ber e.

U Atei chhuah hnuah rei fê inbe lovin kan awm a, ka kum ngaihtuah phei chuan zâm ngawih ngawih tur ka ni. Mahse, helai hmun ka thleng tawh a, tlânchhiat ka tum miah thung lo, kan inhmuh tawpna tur pawh a ni thei asin. Tu nge hria?

"U Mapui, eng vanga min ṭhen nge i nih?" Zawi sapin ka zawt ta a, khuma ṭhu a ni a, kei a ep chiah single sofa inhûngah ka ṭhu khawng at.

Min chhâng lova a ngawih reng avangin, "Min duh lo ngawih ngawihtu pan hi ka tum lo a, i duh lo chung nawr luih che pawh ka tum lo, ka lakah hian eng nge zêp i neih?" Ka ti leh a, ka mitah chiang taka min enin, "Zomuanzual, helaia lo kal tur hi i ni lo," a ti hmuk.

"Lo kal tur dik tak ka lo kal zawk a ni, i duh huna min ṭhena i duh huna i kawp mai mai tur ka ni lo a nia, ka la naupan vangin min zuam miah suh; tunah hian ka hmaichhanah ka mitah en chungin min duh lo a ni tih leh min lo hmangaih ngai rêng reng lo a ni tih sawi la, ka kalsan ang che," ka ti ve tlat.

A rúm nghut a, a hmai tuai puat chung hian, "Chhuak phawt mai teh, chhuak rang rawh," a ti khur khur a, a ṭawng a sehchilh nawk bawk. A hmel ka en hian natna thûk tak a nei tih ka hriaa min hrilh a tum miah lo tih ka hre bawk, he a natna avang hian min ṭhen a nih ka ring ber.

"Awm reng thei ka ni lo, ka kal dawn alawm, mahse, hei hi lo hria la, tunah hian i fa ka pai mêk, min kalsan hun lai kha chhut la, a thla zât chu i hria ang, kan pahnih fa ka pâi mek a ni, i hnen rawn thleng tur hian dâwt tam tak ka sawi asin, u Ropuia'n min puih avang chauhin i hmaa awma ding thei ka ni, u Mapui, min nei turin ka ngen lo che a, mahse, min kalsan chhan hi hriat ka phu ve lo em ni?" ṭap lek lekin ka ti ta a.

"Náno.. Mate, ka naute duat..." tiin a phun sup a, a ṭhutna aṭanga rawn ding chhuakin nghet vak lova pên chung hian ka lam a rawn pan a, a han din tâkah chuan chuti em ema chêr chhia phei chu a ni lo, mahse, ka hmuh hnuhnun ber ngaihtuah chuan chêr tak chu a ni tho.

"Tunah khan nau i pâi maw?" Thâm ṭuaka tiin min pawt tho nghal a, amah si chêta min kuahin ka âwmah a hmai a rawn phûm a, a khûr tih a taksa che dar dar aṭang chuan ka hre thei. A ṭap a ang zâwk mah.

"Eng phur rit nge ka hnutchhiah tâk che le, Pathian hi a awm lo em ni zâwk kan tan hian?" Tiin a rawn dâk chhuak a, a mit a hnâwng chap.

"U Mapui, chutiang..." ka sawi zawh hmain, "Lokal teh.." tiin khum lam min panpui a, a bulah min ṭhut tîrin, "Tunah hian Cancer natna ka vei mêk a ni." Hniam ruihin a ti ta a.

"Eng a?" Ka lo ti vak.

"Kum thum kal ta aṭanga inṭan tawh kha a ni a," tiin a thaw hawk a.

"Ka awih lo," ka lo ti hmanhmawh.

"Vawikhat tal dâwt ka hrilh tawh ngai che em? Kei pawhin ka awih lo a, ka pawm ngam lova ka nu leh pain ka lakah an lo zêp rei lutuk hi ka huain ka lung a dam thei lo. Nangmah hmu tura ka lokal hma khan eng mah ka la hre bik lo; khatia thichhawnga min phurh phei tâkah khan treatment lâk a ngaih vangin an zêp thei ta lo a, ka hre ve chauh." A ti leh a.

Chil ka lem khalh a, kei chuan ka awihin ka ring hmak. Khatia a awm thut nachhan te kha a lo Cancer daih tawh vang a ni tih ka hriat chuan a pa Zoliana ka dem hluah hluah.

"I eng lai ber nge Cancer?" tiin pehhêl miah lovin ka zawt pawp.

"Ka Chuap.." a ti bung vut.

"Cancer i nih vang chuan maw min ṭhen, kum 19 lek ka nih lai khan ka tana i awm reng tur thu i sawi a, a hun laiin ngaihtuah thiam lo mahila ka ring che asin, kum thum chhung min be lova i bo vang vang pawh khan vawikhat mah rilru dang puin mipa ka ngaihsak lo, chutah i lo lêt a, kan inṭhen lo tih sawiin khatiang khan min awmpuia ka la ring zel che; u Mapui, ka pum chhunga nautê vang pawh hian kan fight a ngai," thaw chham lek leka ka ṭawng lai chuan a ngawi reng a, hla tak thlirin a kut a kuangkuah thún bawk.

"Ka fa enkawl nan khan sum engzat nge i mamawh? Retheiin in awm hauh lovang, i duh zât sawi la, ka lo buaipui tîr dawn nia," a ti teh daih a, ka thin a sa zak.

"Inhlawhfâk chawp ngai mah se, ka fa enkawlna tur hian eng mah thawh hreh ka nei lo, pa koh tur a mamawha chu chu ka duh ber, u Mapui, ka hmangaih che asin.." ka ti sap a.

"Ka hria alawm.." a ti leh lawi si.

"I hriat reng te chuan engah nge min ṭhen si, mawh? I natna kha chhuanlamah hmang hlek suh, ka pawm dawn lo," ka ti hlak hlak a, "Náno, hriatthiam tum rawh, hun rei ka nei dawn tawh lo, i mamawh tur engkim ka ruahman ang, tunah hetah hian kan inkâr hi tâwp rawh se," a ti leh a.

"Aih..." ka lo ti tlat.

"Hriatthiam tum rawh..." a ti leh tawp a.

"Ka hrethiam dawn chuang lo, mipa i nih chuan chhel takin hmachhawn la, i tân ka awm zel dawn alawm, min nawr lui miah suh," tiin dimte hian a dârah ka vuan a, "Cancer natna vei zawng zawng an thi kher lo, kan thih hun tur tumahin kan hre hek lo, kei pawh hian i natna ang kha ka nei ve kher lo a ni thei; mahse, raicheh pawhin ka thi ve thei tho, nang aiin ka thi hmasa maithei asin," ka ti deuh duah a, "Zomuanzual, â viau suh," a ti vin ṭhak.

"Ka kum aiin ka puiltling daih tawh a nia aw, i tan ka awm ang, ka haw tawh dawn miah lo." Tiin ka ṭhu ṭha sauh sauh a, min en tawp.

An nulain ei tur min rawn chhawp laiin kan ngawi renga min en duh hle.

"Diki, Atei phone la, ka inlêng hian haw a duh tih hrilh rawh," zuk ti a.

"Rinkim leh..ka haw dawn chuang lo, kum thum a thlawnin ka nghâk tawh chea tunah i hnen ka lo thleng tawh, keiman ka enkawl dawn che," ka tih chuan a nui huk a, chutah, za lutuka nui zawm lehin, "I va inla nula tawh ve.." a ti sup a, a la nui reng.

"I chhia nih chu a.." ka tia, a nui nasa zual sauh.

"Nupui nei thei ka ni lo a, nang leh ka fa erawh chu ka dam chhungin in rethei lo ang, in tan theihtawp ka chhuah dawn tih i lo hre dawn nia; mahse, chu chuan inneihna a keng tel dawn lo," a ti ta a. 

"Nautê avang hian inneih kher ka duh tihna a ni lo a, khatiang dinhmuna i ding chung khan kalsan chea phatsan che ka tum lo a nia, ngaihzawng ka neih hmasak ber i ni, a hnuhnung ber i ni bawk ang," inring tâwk taka ka ṭawng lai chuan u Atei a lo lut ta a, "Náno, in lamah kan chhuk rih dawn em ni? Motor i rawn chuang thui si a, rei lote tal hahdam ve lawk rawh, naute tan khan a ṭha lo palh ang," a rawn ti a.

"Aw le, helai hmuna min hruai avang hian ka lawm takzet, i û hi mipa emaw ka lo ti ṭhin a, a lo ni lo tawp a nih hi, min koh chhan, ka lo zin chhan ka hmu ta bawka naktukah kan haw ang," ka ti ve hmak.

"Eng nge i sawi awmzia?" U Atei'n a tih chuan ka signal zauh a, a lo man rang ngei mai.

"Keiin engkim ka huam laiin ani chuan a huam lo, chuvangin ka puma naute hian pa a nei lo, a pa hmingah Zomuanzuali, a nu hming pawh Zomuanzuali, tih vek tur a nih chu.." nui lui chungin ka ti nghat nghat a, rang lutukin u Mapuia a ding zawk a, "A teuh lo, a pa ka ni a, kei lo pa a nei lo tih i hria..." a ti chang fuk.

"A pa i nih chuan i mawhphurhna hlen ang che, i tan ka awm reng ang, zaninah lo inngaihtuah la, rei kan châm thei dawn lo a nia," tiin ka kar ve tlat. Ka va zak lo tak. Mahse, duhthlan tur ka nei tlem êm a ni, a natna ṭawmpuia tawrhpui tur leh enkawl tur hian kawng khat chauh thlan tur ka nei, chu chu eng pawh huama ka neih a ngai tih hi. A chhiat lai bera kalsantu nih ka duh lo hulhual.

"Mama, thutlûkna dik tak siam ang che, a naupang zawk pawhin a huam a, nu leh pa thlauhthlain a rawn pan ngam che chuan engah i tlânchhiat duh lem ang, i natna inhneh tîr suh ang che, nangmah hmangaihtu leh i fa lo piang tur i ngaihtuah a ngai," dam thlapin u Atei'n a ti a, ani erawh a ngawi hmuk.

U Mapuia'n eng mah a sawi duh tâk si lovah chuan ka thin a thawk thut a, "Kal ang, ka u ka lo bia ang a, a inpeih hman chuan kan haw phei mai ang, ṭha takin lo in enkawl la, i lak aṭangin eng thil mah dawn ka duh lo a nia, class kal chhunzawm tawh lovin hna ka zawng ang, dam tea ka pâi puitling thei a nih chuan thla sarih hnuah nautê ka nei dawn a, ka nu leh pa rilru hrechiangtu ber i ni bawk," ti hmak hmakin ka ding chhuak a, "U Ate, hawh le.." tiin u Mapuia pawh en duh map lo hian ka kalsawn ta a.

Kawngkhar kan thleng ṭêp tihah, "Náno..." tia min koh chuan, "Hun kal taa i thu min tiam kha eng mah lo mai a ni, sawi tur ka nei tawh lo," ka lo ti leh hmawk hmawk a, "Ka thutiam che kha a la ngai reng..." tih chiah a sawi.

"A nih chu..." ka lo ti a, u Atei a hawihai nasa. Nakinah ka hrilh fiah mai ang.

An inpui kan chhuahsan tawh a, rilru nghet tak ka pu hmiah, fâ pakhat mai mai te chu Pathian zarah ka enkawl huphurh lo. Mahse, ka hmangaih leh min hmangaihtu na tuara ka enkawl phâk lova a awm âi chuan a hun tawp thleng raka amah ngaihsaka enkawl turin rilru ka siam fel hmiah; ka kum a la nau a, ka la râi zui. Chuti nimah se atan eng pawh hmachhawn ka huam a ni tawp mai, a hmuh phâk loh leh ka hmuh phâk lova awm turin ka duh lo. 

Lalrinkima, u Mapuia hi ka enkawl tur, ka Chanpual liau liau a ni tih chunglamin min hriat tîrnaah ka pawm.

Engkim huamin a duh emaw duh lo emaw ka luhkhung tawp mai ang. Chhuanlam tur ṭha tak, a hnar theih miah loh tur ka pum chhungah hian a awm miau a lawm.

'Zomuanzual, chhel takin aw..' tiin ka infuih ru sauh sauh a.

-B®®

Shadow of the life

B+>[BeckirafARenthleI]<+®®