2.A Becky Rafa Renthlei Story

 

2. A MAK!

Ziaktu: Becky Rafa Renthlei 

-B®®

Shadow of the life

[Recap]

Ngawi rengin a che mial mial a, no khat a thli chhuak a, a thâwkkhat pawp a, no khat dang min pein, "Ka in ang khan in ve rawh, ka khawngaih vang che a nih hi..." a'n tiah. In duhsakna ṭha lo ber a ni. A vawikhat inna a ni lo tih ka hre nghal vek.

A sawi anga ka in hnu chuan ka uak lo chauh. Tih luihna nen takmeuha in ka ni a, a tui lem lo nen tui ka in zawm nghal khawlh khawlh a, min en reng ringawt.

No hnih ve ve kan in hnuah a hnung seat-ah ka insawn chho ta nge nge a, ani pawh a rawn ṭhu chho a, light a off leh vek tawh avangin a thim mup.

Insi miah lovin kan ṭhu a, ka thaw a sa phat phat a, ka lû a hai chum chum. Mut chhuakin min zem ṭan a, Zobiakmuana lamah ka âwn phei riai riai tih chu ka thil hriat hnuhnung ber a ni a.

&&&#

Min sâwi nawk nawktu an awm vangin peih lo zet hian ka meng dere a, ka hmai bul sétah mipakhat a rawn thaw lum ham ham a, ka meng nghal kâwk!

"Chawngdingpui, harh teh, harh vat rawh." A aw a nêm fahran lova hlauthâwng âw a ang deuh.

"Vak vak a che," ti chhuak sapin ka ṭhut dan siamrem ka tum a, kan chuanna Car nghîng dawt avang chuan ka hawi tang hrâ! Zobiakmuana pawhin a hre ve a ni ngei ang, min kuah pah hian, "Hlauthawng miah suh, ka venghim ang che, tumahin an tihnat che ka phal lo," ati dam thlup a. Ka hlauhna erawh a kiam phah tehchiam lo. Ka la rûi deuh phût zui.

"Eng thil nge? Tu nge a?" hlau chung chunga tiin min kuahna pawh ka ngai haw duh lêm lo. "Kan awmna lai hi a him lo, lokal rawh Car aṭang hian chhuak phawt teh ang," tiin hmanhmawh takin a che zui nghal a, min kuahna pawh a thlah tawh. Mahse, a kawrah ka la pawt hrâm a, "Misual an awm em ni?" tia ka zawh chuan Car kawngkhar a hawng fel hman der tawh thung, ka thâ a khûr der dera hlauh namên lovin ka hlau.

"Lokal rawh le," tinawn lehin ka kut nghet tak hian a hum a, khawiah nge min kalpui dawn pawh ka hre lo. Zawhna inzawh hman a ni lo hrim hrim, a tih ang angin ka awm ve tawp mai, vawilehkhatah Sihal a û ruah ruah a, râl lehlam amiin a lo chhâwn zui bawk a, a ri ta chuah chuah mai. "Zobiak," tiin ka hnaih nghal rawk rawk.

Min tlanpui êm lo mah se a phone flash light-on in kan bul vel a chhun kual zung zung a, a kut ka hmer nghet ngei mai. "Tu nge, tu nge i nih?" Hriam hrâka tiin kopang leh kawng thlangte chu a en kual pah zel a, Sihal û ri pawh a la reh chuang lo. Râpthlâk rawng a kái ka ti. Thin phu dawt dawt chung hian ka lo zui ve dat dat bawk a.

Ruah a rawn tla leh ta nghal a, thlí a thaw ṭan bawk nen Van lam ka hawi chho a, chhûm dum inzial tup tup leh kan chung zâwn thim mup chuan ka ngaih ṭhat lohna a ti zual. Chutia Car leh a chhehvela kan teikual lai chuan a hma âiin ruah a rawn tla tam a, tawm hulna kan zawng a nih loh chuan kan huh vek ngei ang. Car chhung lo chu tawmna tur a awm miah lo tih ka ngaihtuah thleng pha vek.

"Car chhungah lo va lut la, pawnlam aṭangin ka lo vêng ang che, helai hmunah hian atu a pawh min tihbuai tumin lokal se ka chhuah dawn miah lo," a ti thum chhak a. 

"Ka duh teuh lo, keimahin ka awm ngam lo," ṭap âw lek leka ka tih chuan Car hnung kawngkhar a hawng a, min luh tîr a, a hawikual leh fê hnuah a rawn ṭhu lût ve ta a. Kan hnawm chuap a, inthlâkna tur pakhat chu ka nei ve tih ka hre rauh rauh. Chu pawh nimin lama ka hâk tawh hnu kha a ni a, a bâl hran lo vang.

"I huh vek a nia," ka ti sap a.

"A ho lutuk, inthlâkna i nei em?" Tiin min zâwt daih. Hlau leh thlabâr angin a awm miah loa a nghet charh reng mai chu mak ka tiin huaisen ka ti. Kei ve eng emaw hlekah ka phu zawk zawk a, ka kal ta hi ka inchhir ngawih ngawih tawh.

Inthlâkna tur ka neih thu leh ka hlauh thu bawk chu ka sawi chhuak leh a, ngawi reng hian ka Bag seat hnuai ami bawk chu phawrhin ka malchungah a rawn dah a, rang taka hawngin inthlâkna tur ka phawrh chhuak vat a, ani erawh a ngawi ngul. A huh ve tho chuan ka hria.

"Kan zu in chu a thawk ṭha lo hle mai," tiin a nui hul hak a, fiamthu a thawh ve tihna nge, ka rilru lâkpen a tum tih pawh hriat ninghal lo chuan; ka hlauh dan a ngai renga nichina ka luhai leh ti deuh chhulh kha engtik laiin nge a reh hman ka hre reng reng lo. Hlauh luat vang a nih ka ring ber.

Sihal thâwm a reh a, ruah erawh a baw tlawrh tlawrh a, thim vek mah se Zobiaka hmuh laia inthlâk ka hreh lutuk. Thaw hak chung hian, "Lehlam hawi rawh, ka inthlâk duh," ka'n ti ve ngial a.

"Ka hawi kual nasa lutuk tawha ka peih tawh hleinem," nui huk chunga tiin a hawisawn ve tho chuan ka hria. Chiang takin kan inhmu thei lo hrim hrim, a chhungte an lokal hma emaw Rinkimi leh ka chhungte an inbe pawp a nih loh chuan keini pahnih hi helai hmunah hian kan tâng reng dawn a nih hmel. A reng reng thuah lirthei pawh hi Bike pakhat tih loh kha eng mah a rawn tlan îk lo. Mak ka ti ngawt mai.

Kekawr ka ha fel tawh a, inthlahrung duh lem lo hian a bulah ka che rawk rawk a, ka kawr hâk lai hlipa a dang inbel ka tum leh lâi tak chuan ka ṭhutna tukverh zawnah hmai lian zet a rawn lang ta mai! Min bih dûk dûk a, âu ṭhawt chungin Zobiaka ka hnaih nghal ruak a, "Apui..." tiin min kuah nghal thlawp. 

"Ih...ka duh lo... mi ka hmu.." sawi pawh ka sawi ṭha hlei thei lo. 

Ni lo, kha hmel kha tukverha lo dâk kha ka hmuh hnu a ni, nung dam hmel pu lo mah se a hmaitlâng leh awm dan kha ka hrechiang lutuk, ka thidang thei mai dawn hian ka hria.

"Apui, Apui... Chawngdingpui...intiharh rawh.." tia min ko mawlh mawlhtu áw a manganna ri chhuak hre mah ila ka ṭawng chhuak thei miah lova ka khá a chih tlat. Ni e, kha hmel kha, ka hria alawm, engvangin nge ka hriat loh teh lul ang!?

"Tu nge i nih? Zobiakmuana hmaah hian i rawn inlan ngam nange?" tukverhah dâkin a âu ṭhawt ṭhawt a, ruahsur ri mai lo chu a reh tlawk tlawk. 

A thinrim inhrosa thawm leh kei min ngaihtuah bawk si avang chuan a thaw hawk hawk a, Mipa dik tak a ni. Hlauhna leh zâmna âw ka hre lova; tin, amahin a hmu ve bawk si lo lai tak hi a ni. 

"Zobiak, haw ang...min hruai haw rawh, helai hmunah hian ka awm duh tawh lo.." ka ṭawng chhuah theih hmasak berah ka ti a. 

"Kan haw ngawt thei lo tih i hria alawm, le, min en teh..eng nge i hmuha khatia i awmna chhan?" tiin a âwmah min kuah hle hle a, ka taksa lawngin a thawmhnaw hnawm chup ka deh tâkah chuan inlâk hran tumin ka che nghal a, min kuah nghet sauh.

A mipa rim fai tak leh a bân lum thur thura min kuahna te chuan chawplehchilhin thlamuanna min pe a, a zawhna chhâng lova rei fê ka ngawih hnuah, "Helai hmuna rawn tîrtu che hi tu chiah nge min hrilh rawh?" Tiin ka zâwt lêt daih.

"Chutiang tunah sawi a hun lo, nakinah ka hrilh ang che," ati deuh tlat. Mahse, luhlul chhuahin ka zâwt nawn leh ngat a, min chhânna pawh a ngai tho. 

Beidawnga thaw halh chung hian, "Eng tin nge a nih theih, ka hmu sual niin ka hre si lo.." zawi sap hian ka ti a, ka ṭawng a lo hre reng a ni ang chu, "Eng maw i hmuh sual loh?" A ti vat a. 

Hlau hle mah ila ka sawi dawn lo, ka sawi dawn lo a ni tawp. Inti paukhauh luiin, "Min thlah tawh rawh le, ka hmu sual a ni zawk ang," dam thliama chhãngin ka kawr ken lai chu ka inthawlh sawk sawk a, min dang bik lo.

Ka kawchhung a tâwt up up a, ka luak a chhuak ngawih ngawih bawk nen thim thama inlâkhran ka tum chuan Zobiaka a che hrut a, "Apui, i thil hmuh kha i sawi hma loh chuan ka thlah dawn miah lo che a nia, i hlau tih pawh ka hria, eng vanga zêp tlat nge i nih?" Chang fal hian min zawt leh a, ka ngawi reng. 

"A tâwp nan vawikhat chiah ka zawt ang che, tu hmel nge i hmuh sawi rawh, helai hmuna thlabâra min siamtu hi ka chhuah dawn lo," thinrim hachang ṭhial rap rapin Zobiakmuana a ṭawng a, kan pahnih chauha awm kan nih avang leh min thlamuana min hnêmtu a nih vangin hrilh mai chu ṭhain ka hre leh ta zâwk a.  

Ṭawng tuma ka âng chiah tihah a hnung dârthlalang chhanah chuan hmêl râpawm zet mipa leh hmeichhia tih hai theih miah loh hian min ṭhen khum chiama ṭawng chhuak thei ziazâng ka ni ta lo.

Ka awm danah Zobiaka'n a lo man thiam nge hnunglam a lehhawi vat a, a hmu ve ngei chuan ka hria. "Tenawm lutuk..in ngam chuan rawn kal ta che u.." tih leh chhuah a rual a, ka dang hman lo, che chhuak turin thâ a lawi ka nei lo hrim hrim; ka thluak a fîm kar a, Zobiaka âu khâwk rum rum chuan ka beng a luh ngut ngut. Ka la thidang lo fô hi thil mak a ni!

Car chhung a ti êng pup tawh a, a kut a hûm ruh tlat tih ka hmu. 

Ni e, a ṭhianpa hmel kha a hmu a nih chuan engah nge a hriat loh bîk ang? A hmu tih ka hre thiam vek. Mahse, engvanga 'tenawm lutuk' tih ṭawngkam kha chhâkchhuak kher nge a nih ka hrethiam lo.

Lalnunhlua hmel chiah chiah a ni nichina ka hmuh kha, a lan dan dang deuh mah se a hmel hai rual lohvin a hriat a, hmeichhia erawh tunge tih ka hre lo, thlahráng nge, mi nung nge, ramhuai? 

"Apui... a mak a ni tiraw?" Ka mitah tak min en run a, "A mak a ni," a ti leh sup.

Nia, a mak!

Ka bialpa in lama lo awm, zan khat lek ka kal bo san kha zing hma tak maiah min lo hruai turin ka hrilh a, ka message a hmu tih ka hria a, min chhâng lova ka call a chhâng lo bawk. Mahse, kei min hruai turin a ṭhianpa ka la hmuh ngai loh leh hriat ngai miah loh a rawn tîr a; khaw kâr kawngah kan tâng dun ta a ni a. Nimahsela, a mah minung nge mitthi tih pawh hriat loh kan hnaihah a rawn lang leh si. Tu fain nge mak ti lovang! 

Chu mai a la ni nâng, rei tak a bialnu lo ni tawh Chawngdingpuii hi min ti thlabârin hlauhlawpin min siam a, ka ngaih a ṭhat loh rualin ka thin a rim hluah hluah.

"Ka mitah min en la, i sîr lam emaw i hnung lam pawh melh hlek suh, keimah Zobiakmuana chiah hi min en la, i thil hmuh leh hriat theihnghilh tîr tur chein ka pui ang che," tia a sawi zawh rualin ka biangah a kut pahnihin a vuan a, a kut phah hlai leh lum vung vung chu ka hre rang kher mai. Thin phu dawt dawt chung hian ka maimitchhing tlat a, hawisawn emaw pawh ka tum bîk lo.

"Meng la, ka mitah tak min en rawh le," ti supin a hmai si lo chauh hian min kuai hnai a, a thinphu dap dap ka hre pha hial. Zawi muanga meng chhuakin a mit fiah kâk chu ka en ta a. A thûkin a hriam hraih a, a mitmu rawng uk buang deuh pawh ka hmu, Car chhung a êng tawh miau alawm; ani pawhin ka mitah tak min en lêt a, ka zâm teh e.

Minute hnih khat kan in en ngar ngar hnuah tawlh sawn ka tum a, mahse, a phal teuh lo. Ka hlauhna, mak tihna leh chu zan nuam lo tak min theihnghilh tîr tumtu mipa chu ka chhoh melh a; rawn kûn hniamin ka hmui khur der derah chuan dam thlap hian a rawn fâwp ta a. A hmui nêl thep leh hnâwng deuh chu ka hre rang kher mai. 

Tisa châkna lam ni lovin min thunun tum tak hian min fâwp mial mial a, a tirah ka ṭang deuh naa second tam lovah ka fâwp let ve ta. Uar leh duh thawh taka kan infawh lai chuan kan sir lamah te hnung lam leh hmalamah thâwm a awm reng a; mahse, min chelhtu hian ka hawisawn a phal lo mai nilovin amah pawh a hawisawn eih lo.

Thâwm a ring tial tial a, râk nawk nawk ri leh thaw huam huam ri hre mahila Zobiakmuana chiah ka ngaihtuah lui ṭâng ṭâng a, thil harsa tak a ni. Chutia eng dang mah ngaihsak lova kan awm lai chuan ka hminga min ko thawm ka hria a, 'Zobiak, Zobiak' ti ri kan hriat zawm tâkah chuan kan inṭhen phawk.

"Min hruaitu tur an lo thleng ta a nih chu.." a hmui tawk zauh chungin a ti a, ka zak ringawt.

Khua a lo vâr ṭan reng tawh zawk, mipahnih hi kan lam panin an rawn phei a, Zobiaka hmelhriat te an ni ngei e, ani pawh Car aṭanga chhukin an inbe mawlh mawlh a, chumi hnu lawkah Rinkimi leh mipa pali vel an rawn thleng bawk a, min hmuh veleh min kuah a, ka mittui a tling pam mai.

Ei tur min lo ken sak te chu ngawi rengin ka ei mial mial a, ṭawng ka châk hlawl lo. 

"Keimah vang vek a ni, ani sawn a ti nâ che em?" Tih pahin Zobiaka lam a hawi a, 'Aih' ti ringawtin ka lo chhang.

Zobiaka ka va melh a, 'eng mah sawi suh' tih melhin min melh. Eng tin nge ka sawi ngam reng ang ni, Rinkimi chuan ka chhungte'n amah an biak thu leh an mangan ziate a sawi a, "Lokala lo hruai che an tuma mahse, keimahin ka lo ngaihven dawn che tih ka sawi vangin ka kutah an dah ta a nih kha," tiin a sawi.

Kan ti nek nek a, zing dar riat velah JCB a rawn thleng a, kawng chu awlsam tein a thian fai ta a. Zobiaka nen kan inbe nawn tawh lo hrim hrim. Zan lama kan thil tawn kan sawi chhuak lo ve ve bawk a, an mipa rawn hruai ṭhenkhatte khan inngaizawng emaw min ti niin ka hria. 

Rinkimi hnenah Zu chungchâng ka sawi chuan, "A ho lutuk, ka lo hrilh fiah vek dawn nia, tikhan hawn daih rawh, mamawhna i la nei maithei asin," tiin a nui var var a. Kei erawh chuan hawn kher ka duh loh thu leh a awm ang ang hi an kutah ka hlan ang tiin ka hrilh a, min hnial ta lo.

Leiminin min danna hmun kan chhuahsan fel a, a ngaite bawkin Zobiaka Car-ah ka chuang leh ta a, hmelhriat loh ang maiin a ngawi leh ngul tawh. Khatia min fawh hnu khan mak takin eng tin emawni hian ka awm a, ka lai hû. Khatianga thûk leh ril khan tu mipa mahin min la fawp ngai lo, ka hmui ka khawih zeuh a, Zobiaka'n min lo en ve chiah bawk. Ka va zak mai mai tak.

Thenzawl kan pêl fel a, thingpui in ka duh leh duh lo min zawt a, ka duh loh thua ka chhân chuan engmah sawi lovin kan tlân tlang ta a. Nunhlua chungchâng leh a lokal chhan ka la hre ta lo fô. Min rawn buaipuitute khan Bike an keng a lo ni a, kan hma feah an tlan daih tawh bawk.

A hnuah phei chuan zâi a play a, mutchhuakin min zem chiai chiai bawk nen ka maimitchhing ta daih a.

"Chawngdingpui, kan thleng a nia," ka darah min sawi dat dat a, ka meng ve chauh. Thenzawl leh Lunglei inkâr ka muthlu tluan zak a ni e. Ka inthiam chawp tawp.

Venglaiah min drop tura ka tih tlat avangin min hnial deuh dawn a, ka ṭang kawh mar pât. Rinkimi chhungte thil min thawn chhuanlamin pêk a ngai ka ti a, min en vung vung hnuah, "Kan inhmu leh dawn nia, eng pawh hria la, miin eng thu pawh sawi se ka sawi a nih loh chuan eng mah awih suh ang che," a ti nghut. A sawi awmzia pawh ka hriat si loh!

"Lawmthu sawi ngaihna ka hre lova min ngaihtuahna leh min dawhtheihnaah lawmthu ka sawi takmeuh, chuan min lo hruai vang pawhin," tia ka ṭawng chuan, "Kan la inhmu leh dawn, lungngai lo la," zuk ti daih a, Confi mai siah. Ka chhâng thui duh ta lo. 

A tlan liam hnu daihah Rinkimi chhungte min lo chânna hmun ka pan a, kan inpêk fel hnuah Mizofed kawtah ka chhuka Auto lo ding hnai ber chu biain ka chuang lût nghal a, kan in lam ka pan nal nal.

Engmah ka ngaihtuah hah duh lova kan thil tawn maksak zet kha hriat chhuah pawh ka duh tawh mai mai lo. Mahse, min mawlhtu leh min tibuaitu a awm tlata chu chu Nunhlua chungchâng kha a ni. An inah ka pêng mai dawn em mawni ka ti rum rum a; mahse, chu zawng ka ti ta êm lo. A hmêl hmuh pawh ka châk hlawl lo.

Kan in ka thleng a, ka nau mipain min hmuh veleh min kuah thlawp a, a awm dan chu mak ka ti hle. "Mate, i biak tlang theih si lohva kan mangan zia chu, i chauh viau loh chuan inbual la kan kal ve nghal dawn nia, ka lo nghâk reng che," a tih leh phei chuan mak ka van ti tak.

"Khawiah maw kan kal dawn?" Tiin ka lo zâwt lêt hû.

"Ṭhu hahdam phawt la, ka hrilh ang che, i na dawn tih kan hria mahse, i hriat dawn tho avangin ka sawi ngei a ngai," a ti leh bawrh bawrh a. Keiin ka phone thim vek tawh chu ka charge a, a thusawi dan kal hmang hi engmah ka hre thiam mai mai lo.

Sofa-ah ka ṭhu hnawka ka chau hluah hluah, "Mate, Nunhlua chanchin eng mah i la hre miah lo maw?" Tiin min be leh a.

"Hre lo, eng mah ka hre lo," ka lo ti hmawk hmawk a. Ka huat zia hi hria se a hming a sawi hmasa hauh lovang.

"Chuti chu ka sawi ngei a ngai a nih chu," a la tih zel avangin ka va melh hraw a, ṭhen sak chung hian, "Nunhlua kha in zin zan dar 5 vel khan Thenzawl daiah an accident a, a hmeichhe phurh nen..." tia a sawi zawh hma hmain, "Eng a?" Ka lo ti vak.

"A hmeichhe phurh nen a hmunah an boral nghal a nih an ring, an lum thui deuh avangin chuti maia lâk chhuah kha thil awlâi a ni si lo va, nimin chawhma lamah khan a hmeichhia zawk an la chhuak hmasa a, Nunhlua phei chu a vawrh thui deuh nge an zawng rei viau lehnghal a, ruang pahnih post-mortem ngai a nih vangin leh an pahniha accident an nih vang khan pakhat zawk hawpui kha a fel chiah lo an ti deuhin ka hria; an zawh fel vek hnuah chauh a ruala hawpui an ni a, a hmeichhia zawk inah Nunhlua ruang pawh an la phei a," tih a sawi lai chuan milim ang maiin ka ṭhu khawng tlat a, a va mak ngai ve le.

"Mate...." tia ka nauvin min koh chuan ka phu zuk a, ka mittui far khat tê mah a far lo. Ka zin dâwn tûkah kan inhmu a, min thlah hman loh tur thu a sawi vangin ka phût lui lo. Mahse, kan hma lawkah an lo tlân ve reng tihna a ni a, a kal tur thu min hrilh loh mai bâkah tu hmeichhia nge a phurh reng reng ni! Nizana ka thil tawn zawng zawng te kha amah a lo thih vang lek a nih hi, bâkah kei hi bum ka ni. Lalnunhlua hian min bum tih chiang takin ka thinlung hian a hria. 

Rinkimi te khua kan pan laia Thenzawl dâia accident an sawi kha anmahni hi lo ni rengin! Eng vanga min bum nge a nih? Ka tho chhuak thuta ka phone ka'n on chiah mai chu missed call a tam ngei mai. Whatsapp message nise a lut zut zut a, ka en thuak thuak chuan min tawrhpuina leh khawngaihna thu ṭhahnem fê hmuh tur a awm.

Mak ka la ti renga ka awih lo ngam lo. A chhan pawh nizan ka thil tawn vang bawk kha a ni. A thlâin min tihbuai a tum emaw min tih ṭhaih a tum tihnaah ka ngai hmak. Ka tuar lo ka tih chuan dâwt chiangbal ka sawi a ni, ka âwm chhung a na ngut ngut a, mualpho intihna leh zahna hmachhawn tura a ruang va hmuh pawh ka châk hrep lo e.

Mi â ang maiin bathroom-ah ka lut a, ka nau min biakna eng mah ka chhâng tawh lo. 'Nunhlua a thi, a hmeichhe phurh nen' tih ringawt ka bengah a ri tlut tlut. Ka inbual laite chuan hlauh enah ka en tawh lo a, hlau tur ka ni em ni?

Huaisen tak ni lo mahila ka bialpa thlâ chu hlauh loh ka tum ngar ngar. Ka hmu leh ang em? Hmu lo mahila pawi pawh ka ti lo, ka rilru awm dan pawh ka hrethiam neinuai tawh lo.

Bathrobe ka inbel laiin thil ka hre chhuak thut a, kan zin tlaia an accident si chuan Zobiakmuana khan engtin nge min lo hruai theih? Nunhlua bâk min hruai tura koh ka nei lo a, ani khan a phone rangkachak keng lovin Thenzawl thleng thleng a kal lo tawp ang. Zobiakmuana ka biak ngei ngei a ngai.

Rang takin bathroom ka chhuahsan a, lumen tawh a nih vangin an phûm nghal dawn tih ka nauvin a lo sawi leh a, ka nau hi Mama tiin ka ko mai ṭhin a, a hming tak chu Khawngaihsanga a ni.

"Mám, lo insiam rawh le, pangpar emaw puan emaw tal  ka dah ve loh te chuan.." ka ti sap a. Nizanah mittui ka ngah vei nen tunah lem a hul hlauh.

"Khati tur kha a ni, Bike keng ang aw.." a lo ti ṭha ve mai a, ka nu leh pa hi ka pa hna avangin Siaha lamah an awm a, thla li chhung zet chu kan unau hnihin kan awm tawh. Khawzawl khua ka pa farnu fa College kal lai mipa pakhat kan awmpui bawk.

Nunhlua phone kha tuin nge kawl ta ang? Zobiaka ti dawn ila a nih ka ring chiah si lo. Mahse, kawl lovin eng tin nge min lo hruai theih tih ka ngaihtuah tel a ngai bawk si. 

Zawhna ka neihho chhânna zawng zawng hi Zobiaka chiahin a chhâng thei, amah ka hmuh ngei ngei a ngai a, a phone number pawh ka nei hek lo. Nunhlua ṭhianpa a nih chuan zingkara lo chhuak a ni a, a thi tih a hresa ngei tur a ni. Zan lamah message ka hnutchhiah tlat lova zinglam dar ngaa ka thawn a ni a, Nunhlua te accident hun hi zan tîr a ni daih tawh si. Ka thluak a buai. A buai takzet.

Mama nen Nunhlua te in lam kan pan ta a, minute 10 vel Bike-a tlan ngai a ni. Pangpar pawh kawngah kan lei chawp a, an in kan thleng a, a thi ngei tih a chiang lutuk. Mipui tam tak an ṭhu hmur a, mi mit ka chungah a fu ṭhup. 

Kan inkawp hria an awm nual avangin min en duh hle a, ruang an dahna hmun ka thleng a, vuina hunserh an la hmang lo deuh a ni ngei ang, chhungkaw aiawhin thu a lo sawi mêk a, a nu leh a farnuin ka hmel an han hmu chiah chu an ṭap ring ngei mai, ka ṭap thei der si lo. 

Kuang chhunga a hmel ka hmuh chiah chuan ka ṭim sawk. A da var lup a, pem leh hliam a hmaiah a awm meuh lo, a khabe a pilh hlek chauh a ni. 

Pangpar ka dah a, ṭhutna tur min ken an tum chuan hmai hup chungin ka tlan chhuak titih. Ka râp ngawih ngawih a ni ber, kawngka zawn ka thleng a, rawn lut ve tur nen kan insu chawrh a, a rim chu ka hriat hnu. Zawimuangin ka dâk chhuak a, ka zawhna chhânna neitu Zobiakmuana nen kan inmelh chiang teh e.

"Chawngdingpui... nang maw!?" A ti sup.

"Min lo zui rawh.." zawitein ka ti nghat a, mi mitmei ka veng lo hrim hrim, zah pawh ka dâwn lo, hepa hi ka biak a ngai.

"Zobiak?" a hming ka lam zo chiaha ka kutah vuanin min chhuahpui ta dawr dawr a...

151122 -B®®

B+>[BeckirafARenthleI]<+®®