1.A MAK! A Becky Rafa Renthlei Story

 1. A MAK!

Ziaktu: Becky Rafa Renthlei 

-B®®

Shadow of the life

# Bazar kal turin ka chhuak a, kan awmna hmunah hian Taxi phar din mai tur a awm meuh lo, chutih rualin Auto Rickshaw erawh duhthusamin a tam thung. Mahse, hemi ni hian mak deuh maiin Auto veivâk hmuh tur a vang pharh mai; ka hmuh chhunah pawh passenger an khat ṭhap zel a, minute eng zât nge ka din tawh pawh ka hre lo.

Tun hmaa ka hman ve ṭhin ka hmelhriat ṭha ve lah chu damlohna thilah hmundangah a awm daih si a, midang biak tur ka hre îkhaw lo mai.

Chutia ka din vung vung lai chuan Auto pakhat hi ka dinna piah lawkah hian a rawn ding a, a chhunga chuang ka hmuh theih loh avang chuan 'Ka leng ve mial mahna' tiin ka pan hnai a, driver biain, "Ka la leng ve em?" Tia ka zawh chuan min en lem lo hian, "Nangmah chiah i nih chuan lo chuang la," a ti a. A ṭawng zawi sepsup bawk si. Inthlahrung ru deuh hian ka va bih dêk dêk a, mi pahnih an lo ṭhu sa.

Tichuan ka hmuh chhunah chuan lungawi takin ka chuang ve ta poh a, ka hmelhriat an nih miau loh avangin ka chuanpui leh driver pawh en lem lovin phone ka bihsan daih a, minute tam kan la tlan hman lo, kan chuanna Auto chu a ding thut a, driver a chhuk nghal a, eng nge thil awmzia hriat fiah tumin ka dâk chhuak a, ka chuanpuite pahnih pawh an lo chhuk fel der tawh.

"A ke hma lam hi thlâk a ngai tlat mai, i duh chuan a dang lo châng mai rawh," tiin driver chuan keimah min melh a, ka chuanpuite pahnih an ngawi reng thung, "A vâng êm mai ka lo nghak ang che," rang takin ka ti vat a, min melh chiang teh e, ka hawisawn vat thung.

Ka chuanpui pahnihte nen chuan kan nghâk ta a, mahni maia thlâk chi ninghal lo chuan, tih bîk pawh nei lo hian, "Min lo dawmpui lawk dawn em ni ang, hetia ka chawi kân lai hian a ke Spare hi in lo vuah mai dawn nia," dam thlap hian a ti a, midang an chêt chhuah tâk si lovah chuan a bulah ṭhu hnaiin ka pui ve ta a, thil harsa vak ni lo ta chu awlsam tein a vuaha kan inpeih chu a ni der.

Kan driver hmel ka hmu chiang lo, mask a vuah tlat a, Assam Regiment ṭang lai a nih duh hmel. A mitmeng erawh a hriam hraih a, pa zaidam tak a nih loh hmel.

A ngo fai vang a, 'palian' tia sawi tur a ni lem lo naa tê chhia pawh a ni chuang lo. A ṭawngkam a fel faiin a nghet charh a, a awrâwl a ring teh chiam bawk lo. 

Inbe zui tawh lem lo hian kan tlân chhuak leh ta a. Ka kalna tur hmun ka thleng a, ka chhuk dawnah, "I number min pe la, ka haw dawnah ka lo be leh dawn che nia, Auto a vâng êm mai," ka ti ve ngei a, ani pawh chuan min pe ve mai bawk a. 

Bazarah chhukin ka mamawh zualpui ka lei zung zung a, ka rin aiin ka inpeih hma. Mahse, ka driver chhar thar kha ka be zui ta lem lo, 'a mâwiah' tia dîl ve mai kha ka ni a, ka hre chhunzawm tawh lo ti ila ka sawi sual lo zawk ang.

02 ah te chuan Taxi aiin Auto a tam fê zawk a, hman sen loh a awm vei nen kei mi nikhua lo hian atu number mah ka nei lo mai ni lovin, hmelhriat tia sawi tur tumah ka nei ve ngai lo. Ka tuallîm lo em em a, rual ka pawl hlawl lo a ni ber. Tin, ka awm nghehna a la rei lo bawk a, dem vak theih pawh ka ni bik chuang lo.

Ka ṭhiannu ka damchhung ṭhian tia ka chhâl ve fô Rinkimin Scooty a la thar a, amah ringawta an khuaa haw a hreh bâkah mi dawihzep chi a lo ni ve bawk nen min thlah thla rawh a ti deuh tlat a, an khua hi kan awmna aṭangin 80km bawr vel a nih ka ring. Ka chhungte hnenah ka sawia an lo phal ve mial! Ka tei chhuah tam loh vangin 'intih thawven nan a ṭha e' tia min phalsak ve kha an ni a, phur zetin ka ṭhiani nen chuan an khaw lam panin kan chhuak ve ta a.

Lunglei kan chhuahsanin tlailam dâr thum a pêl tawh.

An khaw kawng lah chu zunkawng ṭhalo nei tan chuan kal tam chi pawh a ni lo! A chhiat dan a namai lo lulai êm a ni.

Kan chhuak tlai bawk nen khaw thim dawnah Thenzawl Petrol pump kan thleng dêk dêk chauh a ni. "Petrol thun ve lawk ang," tiin ka ṭhiannu chuan Scooty a hung rem nghal a, khalh chhawk chu khawilamah vawt tiin ka inkuah khawr hlan a, ani petrol dawh chhungin phone ka phawrh ve zat. Whatsapp ka check hmasa ber a, pa Malsawma message ka hmuh chuan rang takin ka hawng a. 

"In ni mial em?" Tih ringawt a lo ni a.

Eng nge thil awmzia hriat fiah tumin ka call nghal a, "Apui, Scooty accident a awm a, Thenzawl dâiah khan an mahni pawh an la hmu zo lo, Scooty chhe sâwp vekin an hmu zawk a," tih pahin a thaw huai a, "Kan nih loh tawp hi.." tia ka lo nuih tâkah chuan, "Ka lo call a, a tlang thei si lova i chhungte ka zawt hman ṭêp alawm," a rawn ti leh a, kan chhuah tlai thu leh Thenzawl Petrol pump-a kan awm thu ka sawi chuan, "Fimkhur takin kal ang che u" tiin kan inbiakna a ti tawp ta a.

Tute nge accident tih hriat chian tumna pawh ka nei chuang lo. Pa Malsawma nen hian kan innêl a, ka ngam tlâk êm êm bawk; hetia ka ṭhiannu thlah tura ka kal dawn pawh hian an inah pêngin ka hrilh zuai zuai a, min ngaihtuah deuh a ni maithei.

Ka ṭhiannu Rinkimi pawh a inpeih a, kei aiin kum 8 zetin a upa naa kan inkawmngeih ém avangin ka û duh bik ṭhak nang. Accident an awm thu leh keimahni emaw tia min rawn zâwt an nih thu te ka sawi mawlh mawlh a, "Tute nge le?" Ti nang nang chung hian kan tlânchhuak leh ta a, khua a thim tak tak tawh.

Inkawm ngeih tih takah ṭawng kan inchuh phei leh char char a, a nihna takah chuan ani hi mi ṭawngtam a ni lova kei erawh eng lai pawha ṭawng reng thei ang kha ka ni ve thung. Thenzawl kan pêl fel a, an khaw lam kawng erawh rin ai takin a lo ṭha teh tlat a, Thenzawl leh Lunglei inkâr kha a chhiat êm avangin khatiang turah ka ngai deuh tawp. Mahse, duhthusama kawng a lo ṭhat tâk si-ah chuan kan tlan muang viau lo.

A khât tawkin ka chhungte kan thlen chin ka hrilh zêl a, Km 3 dan te teah titi dang ka vawrh zel a, tuna ka ngaihzawng kawp lai chungchang te pawh ka sawi leh bawrh bawrh tawh. 

Nia, kum 30 chuang ka ni tawh a, ka hna vangin Mamitah kum thum zet ka awm hnuah Lungleiah kumin kum laihawl khan min sawn a, Lunglei khaw nghet ka ni a, ka bialpa Nunhlua pawh Lunglei khua tho a ni. Kei aiin kum hnihin a naupang zawk a, kum thum lai kan inzui ve tawh. 

"Apui, boruak awm dan hi a mak tawp," tiin Rinkimi a rawn ṭawng a, Scooty hnung aṭangin ka lo hawi valh valh a, October thla a ni tawh a, ruah sur tur angin a tla sep sep a, chumi tih loh boruak danglam em em pawh ka hre ve hlei lo a; "A vawt deuh tih mai loh chu eng tin vak a awm pawh ka hre lo, i hlau em ni?" tia ka zawh chuan a ngawi zui mai.

Chutia ngawi renga kan tlan lai chuan vawilehkhatah ka khuh bawrh bawrh a, ka hrawk chu thîp namen lo hian a thîp nghal hlur bawk! Ruah a sí seng seng vei nen ka hnawm lek lek, "Ka ding rih mai dawn em ni, tui in lawk la," tia Rinkimi min lo biakna pawh chhâng thei lovin ka la khuh ngat ngat a; ka thi mai dawn alawm le, êm êm hian! Chil hâk pawh niin ka inhre lo. Tui pawh ka in ta chuang lo.

Tlêma ka zia deuh hnuah ka hawi chhuak a, Rinkimi lah hlauthawng tih hriat takin a tlân muang viau bawk, din êm chu a la ding lo. Chutia ka hawi kual lai chuan boruak a uap churh a, a hmaa vawt ti-a inkuah khawr deuh tlat kha lum tih luat vangin ka thaw a sa phat phat. Thlifîm dawn tumin sir lam ka hawi a, ka thil hmuh chu leh! 

Kawng sîr hmawr te-ah hian mipakhat a lo ding a, min hnungchhawn zawnga ding a nih vangin a hmel ka hmuh loh mai bâkah mipa nge hmeichhia a nih ka hre thei lo. Ka rilru tê têin, "Tun ang huna helaia han din, a peih e," tiin ka ngaihtuah a, ka ṭhiannu pawh ka kawh hmuh chuang lo a; ani lah chu a ngawi ta daih a, a speed han muan zia chu hmalam ka zu thlêk vaka speed meter ka bih nghal a, 17-18 velin zuk tlan a! Ani leh ni lo angin muang tak a ni ringawt. 

Nichina ka mi hmuh vang khan khawchhung kan hnaih tawh a nih ka ring teh ngawt a, zan thilah kan tlan chin hriat pawh va ni suh. Ka vawikhat kalna a la ni zui.

"I va han tlan muang êm êm, ka lo khalh chhâwk dawn che em ni?" Tiin a darah ka vuan a, "Ka tlan muang lo aw.." tiin a ṭang ve tlat.

"Awi awi, speed meter kha han en teh, ke-a kal nen danglamna a awm lo," tia ka nuih hak hak chuan a rawn nui ve a, "A nih mai mai hi a, a va han mak em em!" A la ti zâwk mah. A tlan muan leh chak pawh han hriat loh te chu awihawm loh thei e.

Kan thlen hun turte ka zawt a, khua a hnai tawh tiin min chhâng satliah a, an khaw pana kan kal tirhah kan hlim tehreng nen kan kal rei tulh tulha kan zawiawi telh telh a, zan dar kua a lo pêl daih tawh bawk.

Rinkimi nen hian inkawmngeih viau mahila an chhungkaw khawsak ka hre lo hrim hrim a, ama'n hna a nei tih leh fanu pakhat pa tel lovin a enkawl seilian tih ka hre bel hlur. A fá pa chungchang ka zawt ngai miah lo a, ani pawhin min hrilh chuang lo.

Dì in niawm tak tak pathum lo din tlarnaah chuan min dinpui a, tunlai khawvelah hetiang in a lo la awm tih ka hre ve chiah. Mombati niawm tak an chhi alh teng teng a, chumi tih loh Scooty headlight chu êng awm chhun a ni mai.

Kan din chhan ka zawh chuan, "Ka pa ta tur Sahdah nuaina ka lam dawn," ati awlsam êt a, helaiah eng sahdah nuaina tur mah va awm suh. Mahse, a hnungah ka zui ve ta tho a, putar pakhat hi a va be ru sep a, an sawi ka hre phâk lova rei vak lo hnuah chu putar chuan zu ûm pathum lai a rawn rêk chhuak a, ka hawi phâwk teh e. Zawhna mitmengin Rinikimi ka melh a, nui var var chung hian, "A vawt si a, khaw hnih tlanpelh tur a la awm, kan in keuh dawn nia," ngaihsam lutuk hian a ti a, mak ka van ti tak! Zu a in ṭhin tih ka vawikhat hriatna.

A seat hnuaiah ûm hnih a thuk ru a, ûm khat chu ka bag-ah laiah a hnawh lut mawlh mawlh a, a man a pek fel thlap hnuah kan tlan chhuak leh ta a, ka ṭhiannu awm dan hi a mak tawp, a hmaa ka hriat ṭhin kha a ang ta lo riauvin ka hria.

Muangchâng lovin kan tlan leh ta a, kan inbe tawh lo hrim hrim. Sahdah nuaina ringawt atan chuan a tam mah mah ka ti a, ka hriat loh hian zu a lo heh ru viau zawk em ni? Tihte ka ngaihtuah leh hnuhnawh.

Dârkar chanve dawn kan tlan leh hnuah a ding leh ta a, a dinna hmunah lah chuan Thlâm ram tawh kawngsira lo ding tih bak in dang a awm lo, a thim phei mup a, "Tinge kan din a?" Ka ti chhuak sap. 

Dik tak chuan mi pakhat min hnungchhawn zawnga ding ka hmuh aṭang khan ka chhungrilah hlauhna sawi fiah thiam chiah si loh hian min ṭham er er a, an khua kan thleng hnai turah ka lo ngai ve tawp kha a ni a, 'A teuh lo' a la hla lutuk zâwk.

Amah a chhuk hmaka ka bag- ah min lâksakin zu chu a phawrh a, "In ang le, tun bâk inna chance i nei lo aw..." tiin a nui a, ka hamhaih teh e.

"Ka in peih lo," tia ka chhân chuan, "Apui, in mai mai rawh, in tam a ngai lo a nia, kei pawh ka in tam dawn lo, kan in chhungkhur boruak a nuam chiah lo ṭhin a, boruak tih hot nan lem sek ila a ṭha, ka haw tih pawh ka hrilh lo," inthlahrung tih hriat takin a ti sap a, mak tiin ka en tawp.

"Nakinah ka hrilh fiah ang che," tiin a zu thlit sa chu min pe a, ka in hreh ngar ngar lutuk. "Ka thu awih rawh, a vawt si i lum nghal vek mai ang," tiin a in a, "Ka duh lo," tih sawi chhên chungin ka in zo vek. A va ho mai mai tak.

Chumi hnu chuan dârkâr tam kan tlân tawh lo. An in niawm tak kawtah chuan a ding chat a,  no khat bâk ka in lo a, ka ruih leh ruih loh ka hrethiam lo hrim hrim, ani khan a in em ka hre chiang lo, vawihnih khat chu a chhâk pharh pharh chuan ka hria.

An in chhungah kan lut a, atu amahin min lo be lo. Amah Rinkimi chuan a room-ah min hruai tlang nghal a, inthlahrun a na duh ngei mai.

Zu rim kan nam ang tih ka hlau ru ngawih ngawih a, zanin bâk riah ka tum chuang lova a awm dan ang ang chuan ka awm ve tawp. Chaw kan bâr sawk sawk a, kan intihfai hnuah a room-ah bawk kan lut leh ta a, a fanu hi Aizawlah zirna avangin a la awm a, a nu leh pa, a û mipa leh an nula tih loh midang tumah ka hmu miah lo. A mâwiah a nu leh pa ka be ve a, han biak takah chuan ṭha takin min chhâng a, an û mipa pawh ka biak ve luam kha.

A tûka ka haw chhohna tur Sumo ticket kan buaipui leh a  vanduai thlâk takin seat a lo full vek. Mahse, châm thei ka ni lova haw ngei ngei ka tum ru tlat a, amah felin inngai mahila ka chhungte bulah zankhat riak tur chauha sawi ka nih vangin pal luih chi an ni bîk lo.

Zan dâr khat velah Rinkimi muhil thei lo a thaw hak a, "Apui, i khuh vak vakna hmunah khan mipakhat ka hmu a, i hlauh ka rin vangin ka sawi duh lo a nih kha," a rawn ti chhuak phawng.

Kei pawhin ka hmuh thu ka sawi ve tâkah chuan mak tih hmel tak hian ka lam hawiin a rawn inlet a, "Mipa nge hmeichhia a nih ka hre lo a, khua kan lut dawn tawhah ngaiin ka hrilh duh lo che a ni kha," ka lo tih ve tâkah chuan; "Ka hlauhzia chu khalai hmunah khan ka ṭhiante pawhin hmeichhe pakhat an hmu tawh," tiin a sawi leh a, "A ho em mai, engtin mah pawh min tih loh kha muhil ang, zû i inṭhin tih ka lo hre miah lo!" Tia puan sin ṭhain Ceiling ka melh vang vang a.

"Ka in ngai lo reng reng, ka hlau lutuka ka awm nawm nan ka in ve tawp a nih kha, ka chhâk leh vek alawm lem hnih vel chu ka lem mai thei," a tih tâkah chuan a lam ka hawi vat a, "I va han phakar tak keiin no khat ka in zo vek a ni a," lungawi lo ru takin ka ti a, a nui mai mai.

Kan mi hmuh pa chanchin pawh sawi zui tawh lovin an chhungkaw chungchâng ka zawt ta zawk a, a sawi ṭha duh vak lo. 

Ka harh leh chuan zinglam dar nga a lo ri tawh a, Nunhlua tal min hruai tura ka biak loh chuan helaiah ka châm ngawt duh lo. La hma viau mah se ka call lui ta tho a, a ring ral ṭhak. Beidawng zetin ka mu leh ta a.

Ka lo muhil leh a ni ngei ang, tûkṭhuan ei tura min lo kaihthawh chuan nuam ka ti viau lo. Inthlahrung ru takin dawhkan ka kîl ve a, chaw ka duh belh pawhin ka sawi miah lovang ka ti rilru râna mahse; Rinkimi a fel hlauha ka bâr zawh dawnah a thleng ami min lo pe vat. Ka rilru a hria tepawh a ni mahna.

A chhungte chu ka pawhin ka nêl tehchiam lo, 'an sual e' tihna pawh a ni lo-a, mi ṭawngtam leh mi han be bawrh bawrh mi an ni lo a nih ka ring. Tin, Rinkimi pawh a inthlahrun hmel dûk mai. Tûkṭhuan kan ei khama ka hawna tur motor hire turin kan chhuak ta a, a vâng ngei mai. Thingtlâng ta ngang chu lirthei hman hawh chi alawi a awm lo a ni ber.

Nunhlua'n min call-back miah lo chu mak ka ti a, titau rilru chungin ka call nawn duh bîk ṭhak nâng. Mahse, whatsapp lamah hawnna tur ka neih loh thu leh min hruai tura lokal turin zinglamah khan ka hrilh a, a hmu renga min reply chuang miah lo.

Chutia ka hawna tur buaipuia kan zawn lai chuan Rinkimi te in kawtah Car pâwl hi a rawn ding a, tukverh aṭanga driver rawn dâk chhuakin keini ṭhiandun chu chiang mangkheng hian min rawn melh a, a mitmeng chu ka hmuh hnu a ang, a hriamin a thûk raih a; mask a vuah tho si avang leh lukhum hmathlâwk a khum bawk avang chuan ka hmelhriat a ni pawhin ka hre leh si lo.

"Tuzawk nge Chawngdingpuii?" A rawn ti a, a awki a hniam viau. A âw chu ka hriat tawh hnu a ang tho!

"Keimah..." tih pahin bân ka vai zauh a.

"Lo chuang rawh le, ka rawn thlen tlai deuh avangin min lo hrethiam dawn nia," a la ti tak deuh deuh a, ka bangbo ngei mai. Rinkimi tak pawh a hawi â nasâ.

"Min lo hrethiam la, ka ko miah lo che, kan inhria em ni?" Ka ti hehaw a.

"Lo chuang phawt rawh, bungrua i nei em?" Tia lo chhuk a tum chuan, "Nei lo, nei lo, eng mah ka nei lo, min hre sual a nih ka ring," ka ti ve ta a. Rinkimi ber mai chu ṭawng nachang hre lovin a ding ngawi renga keini pahnih inbiak dan chu mak a tih hmel hle.

"Ka hre sual lo che a nia, Nunhlua Sakawr i ni lo em ni?" Ngeiawm zeta tiin a nui lui zui kher a, ka va han ngei tak.

"Nunhlua'n a rawn tîr che tih sawi miah suh," tiin ka melh rum tehngawt a, "Ka rualin Lungleiah i haw dawn nge ka hawnsan zawk dawn che, ka ding reng hman lo a nia," ti zawi ruihin a ṭhut dan a siamrem a, ka bân dinglam bih zauhin dâr zât ka en a, chawhma lam a zo titih tawh alawm maw le. Kan va han teirei awm ve le.

"Apui, haw mai rawh, châm thei i ni si lo a, a ruala chhoh kha a ṭha zawk ang," Rinkimi a rawn ṭawng chhuah chuan ka nuih a za miah lo.

"Hmanhmawh la, nilêngin ka nghâk hman lo che a nia," chu pa bawk chu a lo ṭawng chhuak leh a, ka rilru a insual nasa hle.

A tawp a tawpah duhthlan tur nei chuang hek lo le, hreh zetin chu pa Car-ah chuan ka chuang ve ta a. Rinkimi'n 'khawdâi thleng ka lo thlah ang che u, tuikhurah Scooty silfai ka duh tho a," a tih chuan ka hnial lo chiang a nia.

"I hming tal sawi la, eng tin nge  min hruai tura i lo kal theih?" Tiin ka zawt leh hrâm a, nin hmel zet hian, "Zobiakmuana, Nunhlua ṭhianpa ka nia, ama âiah ka rawn kal a nih hi ngaihṭha tak khan awm phawt mai rawh," tih chiah a sawi.

Awih loh chi pawh a ni lo. Hruai ka ngai tih Nunhlua bâk tumah ka hrilh lo a, ka chhungte chuan Sumo-a haw turah min ngaiin ka ring. Chanchin ka la hrilh miah lo tih ka hre chhuak chawpchilh a, whatsapp aṭangin ka nau mipa ka hrilh ta ringawt a. A dik a dik chuan signal a chhe ve lulai lutuka phone hman a peihawm loh.

Kan hnungah Rinkimi'n min zui a, kan tlan chak leh a rawn tlân chak ve mai bawk a, Scooty khalh na nâ na hi chu a hneh sawh viau a nia.

Khawdâi kan thleng a, a Scooty seat-hnuai hawngin nizana a thil lâk ûm khat kha min han pe ngei a, "Venglaiah ka nuteiin a lo châng ang che i lo pe dawn nia, Sahdah nuaina tur atana ka pa a chah a nih kha," tiin min kuah a, "Saw pa saw ka ngaina hran lo a mahse, haw luih ṭâlh i tum tâk-ah chuan fimkhur la, be tuitam miah suh, tunlaiah tumah rin loh tur, khaw kâr kawngah in a tam si lova signal awmna apiangah chanchin rawn sawi ang che," ati duah a, 'Aw le, aw le, ka rawn be vat ang che," tiin Car chhungah phûr fahran lovin ka ṭhu lût leh ta a.

Zobiakmuana chuan min en lovin ka zu ûm ken a melh vung vung ringawt. Kan ṭawng kha a hriat leh hriat loh ka hre lo nain insawifiah ka tum hran lo.

Inbe miah lova eng emaw chen kan tlân hnuah, "Nangmah a rawn tirhna chhan che hi ka la ngaihtuah reng," ka ti sap a.

"Ngaihtuah hah duh suh, a kal tur dik tak ka lokalah ngai la hahdam rawh," ati ṭha thluam.

Rinkimi te khua kan chhuahsan fel khan chawhnu dâr hnih vel a ni a, dârkâr khat âia rei kan tlan tawh a, kan inbe miah lo a, tluangtea kan tlan chuan zan dar ruk emaw dâr sarih velah kan in  ka thleng hmanin ka ring; a khalh chak lutuk lo naa muang lutuk pawh a ni lo.

Nunhlua ṭhianpaah Zobiakmuana tih hming an awm ka hre lo reng reng, kum thum lai inzui tawh kan ni a, a ṭhian hnaivai leh a chhungte pawh ka hre ve nial. Nge, min hrilh kim lo zawk?

"Chawngdingpui, Nunhlua hi i hmangaih viau em?" Tia min rawn zawh thut chuan ka phu zuk a, chutah chhâng ṭha ta mai lovin, "Eng atan nge i tih?" Tiin ka zâwt lêt a.

"Eng atan mah ka ti lo, sawi tur a vang êma ka zawt mai mai che," dâr san zauh paha tiin kawng lam chauh a en a, chîk deuh zawka ka en tâkah chuan ka hmuh hnu a ang telh telh. A vun ngo leh a pianphung hi khawiah emaw tak chuan hmuh tawhna ka nei a ni. Ka ngaihtuah rauh rauha khawiah nge ka hmuh ka hre chhuak zo tawh si lo. A mak mang e.

Ka lo chhîng sek a ni ang, thil ri dawt leh thawm eng emaw vang chuan ka meng chhuak nghal a, kan hmaah tak chuan Lei a rawn tla hül hül a, hrilh hranpa ngai lovin Lei a min tih ka hre mai. Rang takin Zobiakmuana lam ka hawi phei vat a, side glass en pahin a lo back a, "Eng tia rawn min ringawt nge maw a nih le, ka hmanhmawh tawh nen," a ti sup.

Leimin chuan kawng a hnawh khat titih a, Two wheeler erawh an tlân tlang thei mai thei, chu pawh huaisen deuh an nih a ngai ang. Lei ṭhîl a la rawn tla er er bawk a, ka hlau viau. 

Kâr hmasa lamah ruah a sûr nasa a, tunkâr chho erawh Lei timin tur khawpa tam a sûr ka hre miah lo. Helamah a sûr pawh a ni mai thei.

"Chawngdingpui, signal a awm miah lo mai, keini pahnih hian engtikah mah kan thianfai dawn miah lo a nia, rawn chhuk la signal awmna hmun pan teh ang, Car ka lock dawn," nelawm fahran lo hian a rawn ṭawng a, ka hmingpum vawi thum a sawina a ni tawh.

Thuawih deuhin ka chhuk ve mai a, tlailam dâr li a pel a, khua a hnîm ruih tawh. Mak deuh maiin lirthei teivâk a awm miah lo a, kan kal lam pawh khan kan tâwk meuh lo. Zobiakmuana nen chiah helaia han khawmuan chu thih hrehin ka hreh. Chak zetin a pên pâwk pâwk a, a hnungah ka ûm titih a, min nghâk turin ka ko duh hran lo. Ka luhlul ve tlat.

Kan tlânpelh tawhna lamah thui fê kan lêt pawhin Signal a la awm chuang lo a, ka beidawng takzet. "Signal chu i nei tawh em, kei chu ka la nei lo," tiin a bulah ka va ding a, ka mâwl biak tawp; Jeans dum leh shirt vâr a inbel a, Nike running shoe a bun tih leh a bân veilamah Sana hrawl deuh a bun tih ka hmu kim e.

Mask pawh a la vuah ta reng a, "Jio phei chu a bo vek, Airtel-ah a rawn awm dêt dêt a, hman kan tum chhin ang e," tiin min chhang ṭha ve mial. Kei aia naupang a ni nge a upa zawk tih pawh rin dan ka nei thiam lo.

Phone call a hmang a, a ṭawng an hre thei lo a ni ngei ang, vín zet hian, "Kan awmna lai tak hi ka hre lo, Leiminin min dang," tiin a biak lai mêk chu a vin dawt dawt a, chu thu ringawt pawh chu vawi li vel a sawi nawn hman.

Lalnunhlua ka haw hluah hluaha amah a lokal thei lo a nih pawhin chanchin rawn sawia âi-kal a rawn tîr tih tal sawi awm, khir lutuk mai. A ṭhianpa pawh ni se hetiang nelawm loh leh thinchhe lutuk bula awm hi ka châk hlawl lo. Mi zaidam ni lo mah ila ani âi thlâwt chuan ka zia zawk fê.

"Ti rawh le, Car awmna lamah lêt phawt ang, khua a thim dawn tlat," a ti sup a, min nghah pawh tum chuang lo hian a kal zui hmiah.

Khua a thim ta a, ruah a tla ṭan bawk nen ka chhungte chanchin ka hrilh thei si lo, ka mang a ang lutuk chu ka thaw chhuak halh a, Bike pakhatin min rawn tlanpêl a, keini pahnih inhlat fe-a kal chu min thlêk zui ṭâwk ṭâwk a, min be lem lo. Leiminna lai kan thleng a, awlsam tein Bike chu a tlan tlang daih. An va han polite lo tak! Kan tâng tih an hre ve reng awm si a.

"Car chhungah hian va ṭhu rawh, ka chhungte khan ka ṭawng an hre thei a nih chuan midang punin an lokal mai ang,"  dam thluam hian a ti ve teh tlat a, Car chhungah a lut a, a mask a phelh ve ta. Chiang lo ruaiin a hmel ka hmu a, mahse, ka hmuh hnu a ni lo. Ka hmelhriat mihring a ni lo hrim hrim.

Ka pum a ri rawk rawk a, tûk ṭhuan bâk eng mah ka ei loh vangin ka ril a ṭâm hle. "Dash-board-ah khan eng emaw ei tur a awm ang, ei rawh," tiin ka lam a rawn hawi a, "I ril a ṭâm ve lo em ni"? Tia ka zawh  lêt chuan, a nui sukin ka hria.

Rinkimi'n min ngaihtuah dawn si a, ka chhungte lam pawhin an zuk be pawp tawhin ka ring. Che lova ka ṭhut tâk rengah chuan amah bawkin dash board a hawng rawk rawk a, Lays leh Kurkure pack lian ka malchungah a rawn dah a, "Tui i duh chuan hei heta hi a awm," tiin a ṭhutna seat bul a kâwk zauh a; ka lo bu nghauh. 

Zah pawh dâwn lovin ka ei ri hmarh hmarh a, ka kawmngeih deuh ni se chuan a nuam letling phian ang. Mahse, chu zawng engtikah mah a thleng nguar ang, a nelawm loh êma ngainat har tak tur mipa a ni.

A ei ve duh leh duh loh ka zâwt leh a, a duh loh thuin min chhâng a, "A va ho tak êm, naktukah Aizawl kal tur ka ni asin maw le," thaw huai chunga tiin steering a bawh a, nuam lo ka ti ve det.

"Min lo hruai duh kher a nih kha, Nunhlua thu thua awm te chu a.." ka lo ti salh.

"Ngawi hmak la, ei mial mial rawh, min bia min be suh," zuk ti thlâwt a!

Ka ngawi nghal hmiah, zan dâr 10 thleng rak inbe lovin kan ṭhu ngawt ngawt a, Steering a la bawh ta renga a muhil daih em maw ni? 

Ka mawng kham lutuk leh ka bân mu churh churh vangin ka ṭhut dan siamrem ka tum a, tukverh záwna thil dum phe zeuh ka hmuh chuan ka ṭê chhuak ṭhawt. Chutah, inrinlâwk hman miah lovin sâwitu awm ang mai hian Car chu a nghîng lawih lawih a, ka va hlau si êm!

"Zobiak, Zobiakmuan?" Tiin ka ko a, ani pawh a ṭhu ngîl awt mai.

"Apui...." a ti sup a.

"Zobiakmuan, ka hlau a nia..." ka ṭawng lai reng pawhin Car a la che dawt dawt a, head-light a chhi nghal vat. Êng a awm rualin engkim a ngaiin a awm nghal vek! Kha hun reilotê kha hlauh taktêin ka hlau a, ngam leh ngam lova Zobiaka lam ka hawi chuan pawnlama chhuah tumin Handle a lo vuan chiah, "Kal suh, min kalsan suh.." ka ti sap a, min rawn en ta nge nge e.

"Ka va en fiah dawn alawm, tikhan lo ṭhu tlat la, engmah hlauh tur a awm lo," zaidam fahran lova tiin a chhuak lui tho. 

A phone flash-light nen Car leh a bul vel a en kual thuak thuak a, huai ka va'n ti tak. Rannung hrâm thâwm îk pawh awm lovin a reh hmiah a, thli thaw pawh a awm chuang lo. Ka tiril a khûr der der a, ka khabe a inkhâwng lo chauh.

Eng mah hmuh a nei lo nge a rawn lût leh ta a, Car chhung ati êng nghal pup a, meng ṭha thei lovin ka khap sak sak thung.

"Kan ṭhu tlaivar dawn a ang riau mai, a hnung seat-ah han mu la, ka lo vêng ang che," a ti sup a.

"Aih, ka duh lo..." tiin rang lutukin ka lo chhâng a, "Zan a la rei dawn asin tlem tal mut tum rawh, ka veng tlat dawn che alawm," a tih leh pawhin ka duh lo fithla ṭhak. Hahthlâk leh ninawm min tih hmel zet hian, "Dâwih si, luhlul si, thu duh bawk si," tiin a ner zui sawk a, huat enah pawh ka en lo.

"Engmah i va hmu lo em ni?" Ṭap lek leka ka zawh chuan, "Eng mah awm lo pui chu eng thil nge hmu se min tih, ka sawi angin awm la, muthilh tum rawh," a ti leh hmuk.

"Ka duh lo.." tih pahin ka kûn nghal daih a, "I zu pâi kha in la, i hlauhna a reh sawt mai ang," zuk ti a! A sawi zawh rualin a nui kur kur a, ka ngei belhchhah sauh.

"I duh leh in la ti nia," ka lo ti a.

"Khawi, ka lo in anga ka muhil hmak mai dawn alawm," awlsam tein a ti leh a, "I zak lo.."   tiin khûp ka tawm zui daih a, inkhâr phui vek mahila a vawt ṭan. "Chawngdingpui, kan tlaivar a ngai tak tak a nia, min rawn zawng a nih pawhin zinglam dar thum hma chuan an lo thleng lovang, hlau chung chunga khatia meng renga hawi kual zek zek lo khan zû in la muhil rawh," tiin ka ṭhutna hnuaia ka bag dah a rawn ban zui zat. 

"Mi ta tur a nih kha, a chi loh a nia.." tia ka hnialna chu engah mah ngai lovin bag chhung a zen a, zu ûm a phawrh ta nghal a, chhuhsak ka tum buai peih ta lo law law. A sawi ang hian in ta ila ka hlauhna tepawh a reh mial maithei asin. A nih loh pawhin ka muthilh theih tãk mialah. A kianga muthilh ka hreh miah lo chu mak ka inti hnuhnawh.

Ngawi rengin a che mial mial a, no khat a thli chhuak a, a thâwkkhat pawp a, no khat dang min pein, "Ka in ang khan in ve rawh, ka khawngaih vang che a nih hi..." a'n tiah. In duhsakna ṭha lo ber a ni. A vawikhat inna a ni lo tih ka hre nghal vek.

A sawi anga ka in hnu chuan ka uak lo chauh. Tih luihna nen takmeuha in ka ni a, a tui lem lo nen tui ka in zawm nghal khawlh khawlh a, min en reng ringawt.

No hnih ve ve kan in hnuah a hnung seat-ah ka insawn chho ta nge nge a, ani pawh a rawn ṭhu chho a, light a off leh vek tawh avangin a thim mup.

Insi miah lovin kan ṭhu a, ka thaw a sa phat phat a, ka lû a hai chum chum. Mut chhuakin min zem ṭan a, Zobiakmuana lamah ka âwn phei riai riai tih chu ka thil hriat hnuhnung ber a ni ta.

141122 -B®®

B+>[BeckirafARenthleI]<+®®