3.A MAK! A Becky Rafa Renthlei Story

3.A MAK!

Ziaktu: Becky Rafa Renthlei 

-B®®

Shadow of the life

[Recap]

Pangpar ka dah a, ṭhutna tur min ken an tum chuan hmai hup chungin ka tlan chhuak titih. Ka râp ngawih ngawih a ni ber, kawngka zawn ka thleng a, rawn lut ve tur nen kan insu chawrh a, a rim chu ka hriat hnu. Zawimuangin ka dâk chhuak a, ka zawhna chhânna neitu Zobiakmuana nen kan inmelh chiang teh e.

"Chawngdingpui... nang maw!?" A ti sup.

"Min lo zui rawh.." zawitein ka ti nghat a, mi mitmei ka veng lo hrim hrim, zah pawh ka dâwn lo, hepa hi ka biak a ngai.

"Zobiak?" a hming ka lam zo chiaha ka kutah vuanin min chhuahpui ta dawr dawr a...

&&&*

Khawiah nge min hruai dawn tih lam ngaihtuah hman ka ni tawh lo, ka thinlunga zawhna awm hi ka hriat fiah hma loh chuan thin thiin ka mu thei dawn lova ka hahdam thei dawn bawk lo. Ṭhalai pawndum sina ṭhu te leh a ṭhen tei suau suau kârah chuan min penpui pâwk pâwk a; Nunhlua te in lan phâk lohna field sîrah a Car-a lo inhûng a, "Lût rawh.." a ti hmuk.

"Hmun danga kal hman ka ni lo biak che ka duha chu zawng chu a ni mai," ka lo ti vat a.

"Khawiah mah kan kal dawn lo, a chhungah hian kan inbe dawn nia, mi nâwlpui hmuha inbiak âi chuan a ṭha zawk." ṭha tein a ti ve mai bawk a.

Car chhungah chuan ka ṭhu lut ta nge nge a, ani pawh a rawn ṭhu ve nghal a, "I zawhna neih zawng zawng chhâng hman che ka ni lo nain i hriat tur chin chauh chu sawi ka tum ang," a ti leh nghut a, ava han ngainatawm loh ngawih ngawih tak.

"Engtin nge ka zinna hmunah khan min lo hruai theih? Tuin nge hruai tura tîr che, Nunhlua ka call a, a pick lova whatsapp message ka hnutchhiah a, a seen vek. Mahse, min reply lo, tichuan nang hi i rawn kal ta a, ani lo tumah min hruai tura koh ka nei miah lova sawifiah phawt teh, a thî tih i hre sa nge hresa lo...?" Thaw chham lek leka tiin ka melh kar a, ani erawh chuan steering a kutzungṭanga tlirin a dâr a ti che nawk a, chutah ka lam a rawn hawi ta a.

"Ngun takin ngaithla ang che tun bâk ka sawi nawn dawn tawh lo a nia, tin, i tana hriat nuam lo deuh a awm a nih pawhin ka thusawi lai min lo dangchat suh ang che, a chhan chu ka sawi nawn dawn tawh lo ka tih kha," tia insiamremin a sîr zawng hian a ṭhu a.

"Aw le, sawi rawh, sawi vek rawh," ka lo ti hmawk hmawk.

"Nunhlua nen hian Delhi aṭanga inhre tawh kan ni a, University khata kal dun kan ni, ani Lunglei khua niin kei Mamit khua ka ni a, kan khua inang lo mah se ṭhian inkawm ngeih tak kan nih vangin kan haw rual tlangpui ṭhin, kan zirna kan zawh hnuah pawh mahni-a hna neiin kan inhmu khât a, nang nen in inkawp thu min hrilh a, i thlalâk pawh ka hmu diam tawh," a sawi laklawh laiin Sana a bih zeuh a, ka lo ngawi reng thung.

"Min hriat ve loh danah ka chungchang i hnenah a sawi ve ngai lo tih ka hre mai, tichuan ka hna vangin tunah hian ka rawn zin a, Ka thawhpuite inah ka innghat tih a hriatin i zin ni khan an ina innghat turin min sâwm a, mahse, ka hnial a, inhmuh hrim hrim a duh tlat avangin ka thlennaah a rawn chho ta kha a ni a, a nihna dik takah chuan nang lo pawh ngaihzawng nghet Ramdini a nei reng, tuna a chêtsualpui hi a ni nghe nghe a, engkim ka hriatpui vek," tia a sawi zawh rualin, "Eng a?" Ka lo ti vak a.

Ngawi rih tura min tih nan kut a rawn phar zauh a, ka lo ngawi ve mai.

"Ramdini khan i bialpa fa thlahnih mi a paia amah kha Thenzawl khua niin, Lungleiah hna a nei ve tho, engkim min hrilh ṭhin avangin a lokal pawh khan a rilru hah thu a sawi nasa a, nang erawh chu i ṭhiannu te khuaah zan khat riakin i kal dawn tih pawh min hrilh.

Ka hau nasa a, siam ṭhat theih engmah a awm bawk si lo, Ramdini nen an inti thiam lo lehzel nen ani kha Scooty in Thenzawlah haw a tum ta a, Nunhlua tih ngaihna hre lo khan a thlah ta a nih kha, a kawp che kha thiam a inti lo, mahse, a dinhmun a khirh ve tho tih i hriat a ngai," a ti leh tawp a.

"Engtin nge min lo hruai tih lai tak kha..?" Tia ka lo zawh chuan, "Ka room-ah a phone a theihnghilh a, Thenzawl pana an kal tawh si avangin Ramdini phone aṭangin min lo call a, a phone lo kawl ṭha tura min hrilhin rawn lêt leh nghal a tum tih a sawi nghe nghe, tichuan, an chêt sual thu ka hre thuai a, a hmunah ka kal ve nghe nghe bawk, an lumna a thuia lâk chhuah mai theih an nih tak lovah khan Thenzawlah ka awm ve ta reng a, zing lama i lo call kha chu ka pick hman lova message ka en khan inngaihtuah chiang lovin ka rawn hruai ta ngawt che a ni e. Ka lokal lai khan a ruang an la la chhuak lo. An beirei khawp mai, bâkah an zawn chhung a rei a," Tiin a sawi ta a. Mak teh nuai ve le.

"Tenawm lutuk.." ka lo ti sap a.

"Hnem dan che ka hre lo, a pawi tih bâk chu sawi theih pawh ka nei lo aw, a thih thu hrilh hmasa ta che ila i tâlbuai vek ka hlaua ka zêp ta a nih kha, min hrethiam dawn nia," a ti sup a, a inthiam loh hmel ve viau.

"Ka lakah zêp in nei ve vea in thiam lo hulhual, ka kal ang e," ti sapin Car kawngkhar hawn ka tum a, min rawn chelh rang ngei mai. "Kan chhuk rual dawn nia, i thinrimna leh i lungawi lohna dah ṭhain a hun tawp tal hi chu ṭha takin khar sak hrâm rawh, a thlarau a chawlh hahdam theih nan, a bâk chu nizanah i hmuh vek tawh kha..." a ti zawi ruih a, min vawnna pawh a la thlah chuang lo. 

Ka zak ngawih ngawih a, kei tih loh chuan a bialnu pakhat zawk nen an accident tih an hre fur ang, min lo en duh viau te kha mak ka ti ta lo. A zahthlâk dan a thuahhnih êm a ni, "Lalnunhlu, i va ti mak ve, min ti zak lutuk.." tiin ka ṭap chhuak ta phawng a.

Ni e, ka mualpho a ni kei hi ka mualpho, ka mittui a tla zung zunga ka âwm tâwt leh pik lutuk avang chuan ka hnang thei mai dawn hian ka hria. 

Ka nu leh pa, ka nau ka ngaihtuaha an zak dawn mang e. Mi mâwl ang maia bum kual theih ka lo ni reng a nih ber hi. Ka ṭah tlawk tlawk laiin vawilehkhatah Zobiaka'n min kuah thut a, ka inring hman lo mai ni lovin ka beisei loh ber thil a ni. 

Rem leh rem lo hian a âwmah min kuah beiin ka sam a zût hliau hliau a, chu chuan ka ṭah a ti chhuak zual. Rinkimi tih loh ṭhian ṭha pakhat dang ka la nei a, chu lah chu a awmna a hla ropui si; hnêmtu leh min hrethiamtu inbunruahna tur tumah ka nei lo. Ka inngaihtuah lungpuama ka ṭah a chhuak telh telh, Zobiaka lah chuan dawhthei takin a âwm min nghen tîr a, a hmaa ka lo neih ang chiah thlamuanna, hahdam rûkna riau kha ka nei leh tawh.

"Le, duh tawk tawh la.." ti supin min nawr hla hlek a, amah en tura ka chhoh melh chuan chiang zetin ka mitah a lo en a, mittui tling pam leh meng hnuai raih chung hian ka lo en lêt a, "Shh...ṭap tawh suh.. i hmelchhe vek dawn a nia.." tih pahin a kut min kuah lohna lam zawk chu a rawn phar chho a, ka khabeah dawmin, "I rilru a na dawn tih ka hria, mahse, ka hnaihah awm la i dam ang," zuk ti daih a. 

Chutia a tih veleh chuan ka'n inlahrang leh hnuhnawh a, a va buaithlâk tak. Min en reng tih hre mahila ka hre lo der ve ngial a, ka hmai chûl thuak thuakin ka sam ka vingvial chho a, ka ṭah avangin ka hnar a thîp hlur. 

"A hun tawp hi ṭha takin thlah ila, châwl hahdam rawh se, a laka i thinrim vang khan a lo nung leh dawn lo a, ngaihdamna rilru puin Chawngdingpuii i nih zia târlang ang che," khauh fura tiin Car aṭang chuan a chhuak a. 

Ka puan bih siam ṭha pah hian, "A sawi chu a awlsam, mahse, a taka tawngtu tan ngaihdam harsa khawpa thil lian tham a ni." Ka ti ve hmak.

"Ka kiangah zel awm ang che," tia min lo vawn a tum chuan, "A teuh lo, ka haw dawn, ka chau, mut ka duh," ti hlarin ka tawlh hlatsan a. A ner suk.

"Ka sawi anga i awm loh chuan i duh loh dan deuh emaw i tum loh deuhin i hmu leh ang e aw, thlamuana chhanhim tur chein i bulah ka awm tawh dawn miah lo a nia," tiin min la sawi ṭhaih zui. Ka va han ngei tak.

"Khatiang khan sawi hlek suh.." vín fêa ka lo ṭawng chuan, "Ka ti tak tak, i lakah sawifiah tur a ngah êma chuti maiin a kal bo hlen lovang," a la ti tak deuh deuh a. 

Chumi hnu chuan Nunhlua te in lam panin kan inzui thla leh ta a, thlâ an lo la mêk a, ka hmêlah ṭap zo hlim tih a hriat tehchêk a ni ang chu min la en duh tluang zel.

'A ṭhiante' tia thlalâk hun an puanah chuan Zobiakmuana'n min kâi pheia ka ṭang ṭung. Ka beng bulah, "A bialnu tia lâkpui i duh em ni, mi ngaiha mawi te pawh hi zawn ve tho tur aw," a ti zawi sup a, ka zui ve leh tâk kha.

Thlalâk hun a zova thlanmual thleng Zobiaka nen kan kal ve zela ka nau pawh kan sîrah kal vein Zobiaka a en ngun ang reng. Mahse, ka hrilhfiah ta lem lo, thlankhura an thlâk dawn meuh chuan ka mittui dan rual lohvin a far zung zung a, chu erawh kan inkawp chhung zawng zawnga min duatna, min thlahthlam ngai lotu leh min hrethiamtu a nihna ka hriat chhuah vang a ni. Eng ang pawhin min kawpin midang lakah min rinawm loh san mah sela, ka tana a lo hlut tawhna ṭhin kha ka hrechhuak lo thei lo.

Awrâwl chhuah meuhin ka ṭap ve leh ta a, ka koki-a min kuahtu kut chu dahsawn pawh ka tum lo. Tunge a nih ka hria alawm, mak takin ka hnaiha a awm hian ka thla a muang ru tlat zel.

"Apui, zanin i kal ang em?" tia Zobiaka'n min zawh chuan ka kal dawn loh thu leh mut hahdam ka mamawh thuin ka chhânga eng mah a sawi zawm lem lo.

Kan in kan thleng a, zanriah ei hun a pelh daih tawh avangin Mama nen kan bár ve sawk sawk a, ani pawh kal a tum bik chuang lo. Duh leh naktukah ka kal leh mai ang tiin ka sawi a, min hrethiam viau.

Mama sawi dan tak phei chuan, "A ruang ina a lo thlen khan vui nghal tur a ni dawn si a, mahse, a nu leh pain an fapa neihchhun tlaivarpui lohva kal tîr an ngaingam ngang si lo nen post-mortem dawn khan zan khat tal ina kawl an duh thu an hrilh a, ruahmanna an lo siam a nih hmel, a kawchhung pawh an paih vek an ti, a hriate chuan, miin an sawi sep sep, vawiinah khan," tiin a sawi a, min râp ngawih ngawih. Hmun hla taka boral te an paihsak hi chu ka hrethiam. A chhungte pawh anti mak ka ti ve.

Mizoramah ruang dah ṭhat leh vawnhimna kan nei ṭha lem lo a, a ruang bula ka kûn khan ka lo chîk vak lo bawk nen rim danglam chu ka hre miah lo. Midang ṭhu reiho khan an hria ang chu.

Ka room-ah ka lut a, ka nu nen rei fê kan inbe leh a, chumi hnuah Rinkimi ka call ve nghal a, thil awmzia ka sawi zawh meuh chuan, "Awi awi, ka ngei lutuk, kal pawh i va kal duh mai mai a nih chu, tenawm e.." a lo ti a, ka nuih ve leh tak hi. Ani hi zawng mi ṭawngtam lo ni mah se a duh loh zawng leh a ngaihdan ni lovah hi chuan a ri leh pawp zel.

"I va ṭap vel em?" A ti leh a.

Ka ṭah thu te, Zobiaka nen kan inhmuh dan leh a thil sawi ṭhenkhat ka hrilh chhawng ve a, "Kha pa kha Mipa a nih kha, Bêm la, nihpui daih rawh.." tiin a rawn fiamthu zâwrh zâwrh a, ka lungngaihna hre lêk lovin ka awm theih phah. Kan infawh thu ka la sawi lo mah mah. 

Rei ngial kan inbiaa mu tura ka inthlâk zawh hnu lawkah Mama a rawn lut a, "Mate, vawiina i bula mipa kha ka hria," a rawn ti a. Ka lo en haw.

"Eng tin nge i hriat?" Tia ka lo zawh chuan, "National Highway-in a laih tur kawngpui zauh en dik tute zinga mi a nih kha, Department-a an hotuber a nih ber chu," a ti ta a, ka lo meng phar nasa mai. A inhmeh ngel ngul mang e.

Zobiakmuana mitthla loh ṭalh tumin ka maimitchhinga mahse, a teuh lo; a hmel ngêng leh luhlul tih hriat fahran te, a mitmeng thûk ruiha huaisenna rawn lang chhuak te kha ka mitthla zut zut. A sâng viau lo nain Mizo mipaah chuan a vantlâng kan tih ang vel a ni a, a vun a ngo phian. A lu meh dan thlengin ka chhinchhiah kar. Min hruai tura a lokal khan ka hmuh hnu ang tlata hriatna ka nei kha a ni a, mask a'n phelh kha chuan ka hmelhriat a ni pawhin ka hre leh lawi si lo.

Lalnunhlua ka ngaihtuah kâi leh dawn a, kan hlim lai mitthla ka tum pawhin chhe taka ka hmuhna hlir kha a lo lang zel. Khaw kâr kawnga ka hmuh dan phei kha chu ngaihtuah pawh ka duh tawh reng reng lo. Min bum rei ngar ngar viau chuan ka hria, a laka sihhnip zawnga awm lo leh a râi lo zawk ka ni hi vannei ka inti ngawih ngawih tawh.

Mak tak maiin khawvar hma zawng tui takin ka mu a ni ngei ang ka harh leh chuan khua a êng ut tawh a, nî a rawn lang ṭan dêt dêt. Ka rilruah Nunhlua bawk a rawn lang leha vawiin hi thlan nghah ni/ ṭhut ni a ni a, ka va lang ve leh ang chu. Mi min en dan leh min sawi sep sepna ka paltlang hma poh leh ka tân a ṭha a ni mai.

Ramdini kha ka ngaihtuah zui rauh rauh a, Nunhlua'n a kawp tih a hre ve a ngem le, nge hre reng chungin a lo nihpui zawk tih mai maiin ka rilru a luah a, ngaihtuah thui pawh ka duh lo e a. 

Muangchânga thovin eirawng ka bâwl a; Mama te pahnih an la tho ve lo, vawiin thleng hi chawlh ka la a, naktuk aṭang chuan hna ka zawm a ngaih leh dawn avangin ka huphurh lâwk hle. Sericulture Department-ah ka thawk ve a, mahni puala hlawh neih hi thil nuam ve tak a ni.

Zobiakmuana number ka la nei ta lo a, neih a ṭulna pawh ka hre chuang lo. Ani erawh chuan Nunhlua phone aṭang khan a duh chuan ka number a nei thei a, min biak miah loh danah min be peih bîk lo tepawh a ni mahna. Kha pa mize han mak zia kha aw, nelawmna nei lo Milim û a nih ber kha.

Túkṭhuan kan eikhama muangchangin ka insiam a, vawiin bâk hi an inah kal leh tumna ka nei tawh lo a, puitling ṭhankin tawh ka nih vangin ka chunga thilthleng te leh Nunhlua'n min phatsan dan hi ka haider lui mai zawk a ni. Mitthi tawh na na na huat hlur hi thil ṭul ber ninghal lo chuan. Mahse, ka nâ a ni.

Mama te pahnih an chhuak tawh a, lirthei kawl ka neih ve loh avangin Auto phar din tur ka châng a, kan in hi kawngpui ân a nih vangin a hranpaa kal a ngai lo hlauh. 

Dârkâr chanve dawn Veranda-a ka awm hnuah chuanna tur ka hmu leh pek lo. An khat ṭhap ṭhap zel a, ka ṭhulh mai dawn em mawni tia ka ngaihtuah lai takin nimin piah lawka ka Auto hman kha ka hrechhuak zawk. 

Nia kha pa kha a polite hmel phian a, a number tepawh ka lâk ve kha, rang takin ka hmetchhuak nghal a, vawi hnih ka call hnuah a rawn chhâng ve hrâm. A âw lah chu a'n zàwi mai mai khawp a! 

Kan awmna lai te hrilhin Auto hman tur a vân thu leh kal ngei ngeina tur ka neih thu ka sawi zung zung a, "Ka lo hruai dawn che nia, ka rei lovang," a rawn ti a, a âw chu leh.. ka hriat tawh hnu a ni. Â..ka hriat loh ten maw le, kan inbiak tawh tak kha, ka va mawl mai mai e.

A hmel awm dan ka hre lo a, a Auto number pawh ka hre chuang miah lo. Mask vuah chunga hmu kha ka ni a, ka hai bîk lo turah ngai ang. Kawngkhar ka kalh sawk sawk a, ka nau hnenah chahbi ka ken thu phone-in ka hrilh leh zet hnuah Veranda-ah ka lo nghâk leh ta a. 

Fel ka va han inti tak. Kalpui pakhat tal nei ila a nuam deuh tur a ni a. Minute sawm dâwn ka nghah hnuah ka kawr hâk a lum tâk deuh avangin kawngkhar kalhna hawng lehin inchhungah ka lut leh rih a, October thla tawp ni mah se chuti viauin a vawt lo. Ka kawr hâk ka thlâk fel vel chiah tihah kan in kawtah 'horn' a rawn ri tuar tuar a, rang taka tlan chhuakin kawngkhar ka kalh a, ka chuanna tur a lo thleng tawh tih ka hrethiam mai.

Mahse, eng nge ka hmuh hi!?

Ka hmaa Bolero lo ding reng ka hmuh chuan mak tih vangin ka meng phâwk vak a, a khalhtu ka hmuh leh lek phei chuan ka nui tâwp chiang kher mai. Zobiakmuana bawk!

"I lo chuang dawn lo em ni? Ka rawn sâwm che a.." zaidam deuh hian a ti a.

"Khawia kal turin maw min rawn sawm?" Ka lo ti a.

"I bialpa te inah maw le, i va lang ngam dawn na nge?" Min han ti kher a nih chu... a ṭawng dan a ngeiawm takzet.

"Zobiak, khatia min ṭawngkhum kher lo pawh khan ka dam thei a nia, ka kalna leh zel hrilh che a ṭûlna ka hre lo," ka ti hmak hmak a, ka ner kawisawi kual vel bawk.

"Kalna tur a vâng dawn a nia, Auto-ho lah chu inthlan an neia an kal deuh vek, tlemtê bâk an service lo," inti hre takin a ti leh a.

"Lo va kal rawh, min lo hruai tur ka ko tawha a lo thleng har lovang," thei inti âwká zet hian ka ṭawng a, ani lah chu a nui suk duh chauh.

Ka hmuh ṭhin dan ang lo takin a rawn inchei a, ka hmuh phâk chinah Kamis dum leh sen ṭial a inbel a, a kamis bân a kiu thlengin a thlep bawk a, Shirt mai mai nen chuan a awm ta lo khawp mai.

"Rawn hruaitu tur che chu call leh chhin la, a lo thlen har dawn loh chuan ka kalsan che anga a rei deuh dawn leh ka rualin i lokal thung dawn nia," dam thluam hian a ti a, kei pawhin ka hnial bîk lo.

Nichina ka koh pa chu call leh tumin phone ka phawrh chhuak a, ka call leh ta a, mak zetin Bolero dinna lamah Zobiaka phone a ri ve chiah! Eng nge a awm zia?

Rawn dâk chhuak chung hian, "Ka pick kher lo mai ang aw Chawngdingpui.." tiin a nui kur kur nia maw le. Eng thil mak dangdai nge ni leh ta! He pa hi kha Auto driver kha maw? Nge midang phone a kawl leh zawk. Â.. ka â dawn. Huis..

Chutia hawihai zeta ka din ngawih reng lai chuan ka phone a rawn ri leh a, ka en ve mai bawk a, Zobiaka ka melh pah zeuh a, "pick rawh" zu han ti a. 

Phone chu ka en reng laiin a hmet tawp leh a, "Min ringhlel lo khan rawn chuang rawh, inhre ngai lo pawh kan ni tawh lo a, ka hrilh fiah dawn che nia," a ti ve teh mial.

Phur lo zetin ka pan hnaia kawngkhar min lo hawnsak thlap a, ka ṭhut luh hnuah. "Auto driver smart tak ka nih hi," tiin a nui leh kur kur a, kei erawh ka ngawi rauh rauh.

Hmannia ka chuanna number ngei kha chu a ni si a, a hming ka save dan pawh 'Auto Driver 1' tih bâk a ni lo. Mahse, Zobiakmuana number a lo ni daih hi ka tan chuan hriatthiam a har ve bawk êm alawm. A mak tih loh chu sawi theih ka nei lo.

Chutah a lam hawi thutin, "Tu phone nge i kawl leh tâk? A neitu kha a thi ve em ni?" Tiin ka zawt a, ner nawk chung hian, "Chawngdingpui, ṭawng fimkhur rawh, ka phone a ni a, ka number a ni bawk a, ka la thih loh hi.." vin hluk chunga tiin min melh rum ûl a, a mitmeng pangngai pawh hriam tih tawh nâk laia min han melh rum leh phei chu nelawm loh tak a ni.

"Ka awih chuang lo," ka'n tiah.

"I awih leh awih loh khan kawngro a su lo, hmannia ka Auto khalh ke hmalam thlâk a ngaih pawhin i phûr êm kha," a tih tâkah chuan amah ka en vat a, min lo en ve reng bawk.

"Eng ati nge i khalh ve rikngawt i ta em ni?" Tiin zawhna mawlmang zet ka zawt a.

Nelawm vak loh hian, "Kan thawhpuinu te ta a ni a, an driver a dam loh vangin an kal duhna hmunah ka hruai a nih kha, khami ni-a i chuanpuite pahnih kha unau an ni a, an Auto Rickshaw-ah i chuang aw, a chiang em? Nangmah zawkin Driver emaw min tih vangin ka number i la ringawt a, ka hming min zâwt si lo a nih kha maw le," tia a sawifiah tâkah ka hrethiam kuar.

"A nih chu... a nih tak chu.." ka ti sap a, ka zak nawn leh ta. 

Ka hmuh hnu anga ka ngaih tlat chhan te, a âw pawh hre tawh ang tlata inhriatna ka neih kha ka lo tidik chiah. Amah zawk hian min hresa renga min hre lo der mai mai zawk ni lek chuan. Min hriat sa vanga min phur a nih ka ring bawk.

"Ka kal leh dawn lo, ka chhuk aw.." tiin handle ka vuan nghal a, pawr fe hian, "Nêp viau suh," tih pahin Motor a start a, ka ṭawng leh hmain 'Ṭîk' pawh tih hman loh khawp hian a tlan chhuak nghal daih.

"Ding vat rawh Zobiakmuan.." tiin ka vin ṭha ngei mai.

"Ka thu thu, i duh leh Auto driver-ah min ngai la," tiin a kiai zui suk a, hepa hnaihah hian tinge ka awm zel le. A sunglass a vuah ṭha sauh sauh a, Nunhlua te in lama tlân ta lo chuan Serkawn lamah a tlan chho ta daih a, ka va ṭê ring tak. 

"Ka chhuk duh.." thinrim zetin ka va melh a.

"Chhuk lovang, tun ang hunah ṭhalai an kal ngai vak lo, thingpui i lum dawn te a nih si loh chuan zanah kan kal zawk dawn nia," inring tawk zeta tiin a khalh muang ta deuh a, "Kan kal dawn lo a nih pawhin ka chhuk duh, inah ka haw duh," naupangchhia taka tiin ka vin hrep a.

Ka ṭawng engah vak ngai lo tih hriat deuh hian, "Râk râk suh, a ninawm," a ti hluk.

"I chhia a nih chu.." ka lo ti teh ngawt.

"Ka ṭha, ka hmelṭha aw.. Chawngdingpui, ṭha min ti.." zâm lo zeta tih pahin a nui huk a, ka ngei a nia. A hmelṭhat pawh ka hre mai mai lo. A rum ûl ringawt.

Rei fê ka ngawih hnuah kan dinna hmun ka en ve ta chauh a, Kawmzawl kan lo thleng der tawh, "Chhuk rawh le..." a tih hnuah ka la ṭhu lui tlat a, amah zawk chhukin ka ṭhutna lam a rawn hêl kual a, kawngkhar a hawng zui zat bawk. "Ka kuah leh dawn che em? I lungphu te kha ka ngaithla leh dawn em?" Tia a sawi zawh rualin min hnaih ruak a, ka lo tawlh dawrh.

"Ka pawm thlâk i duh lo chuan lo chhuk la inbe teh ang, kan inbiak a ngai," a ti a, a la ding sawn chuang lo.

"Aih..." ka lo ti hmak.

"Luhlul a chhuah leh dawn e," tiin a Sana bun a bih zauh a, "A tlai zel a nia, lo chhuk rawh ka tih chu,'' vin lek leka a tih takah chuan, "Awm sawn la ka rawn chhuk ang," ka ti a, ngaihdan nih loh hmel zeta min enin ka inrin hman hma chuan min pawm nawlh a, phúl sâng zet zet ṭona lamah min kalpui nghal daih.

"Luhlul lutuk tur a ni lo, hmeichhia chu hmeichhia anga awm mai tur, Nunhlua ang khan ka en liam ve mai mai dawn lo che a nia," a tih chuan chhuk tumin ṭan kan khawh ṭha leh a, min chhuk tîr ve mial. 

"Tinge min tihbuai reng le?" Ka ti ta thlâwt a.

"Nangmahin alawm min lo call a, hruai tur chea min ko, ka lo kal tê tê-a ka ruala kal duh leh mang si lo," nui chunga a tih chuan vawm ṭawlh ka châk zia mai chu.

"Ka koh chhan che i hria," tichungin a hnungah ka kal ve zel a, a din thut avangin ka va su dawt a, min chelh rang teh e.

Chiang taka ka mitah enin, "Ka tihbuai reng chhan che chu ka ṭhianpa bialnu ni ṭhin hi kei hian ka duh ve maw le, min hmakhalhtu a boral ta si a, chhuah ka tum miah lo," thutak lutuka a tih chuan tawlh sawn san ka tum a, min vuan nghet sauh.

"Eng maw i sawi kha?" Ka lo ti vak a.

"Chawngdingpuii hi kum li liam ta khan ka hmeichhe duhzawng a ni tih a thlalâk ka hmuh aṭangin ka hria. Mahse, ka ṭhianpain min hmakhalh miau si a, tunah chuan amah a awm tawh lo..." tia a sawi zawh hma hmain a biang a ri sawk a, ka bêng tih ka inhre chhuak chiah. Zak lo lutuk.

"Chawngdingpui...." tia ka hming puma min koh rualin amah hnaih lutuk hian min pawt sawk a, a âwm ka va si chawrh. Chutah, tilui tih hriat deuh hian a ṭhen sak a, a rawn kûn hniam nghal bawk. Ka thle sawn tur chu duh lovin a kutphah hlai zet chuan ka biangah a vuan tlat a, a thil tum ka hre chiang si. 

"Min ben hian man a nei a nia a to viau bawk," a sawi zawh rualin na zetin min rawn fawp ta a, a thîp tâwkin ka hria.

Tâl chhuah tuma ṭan ka lo khawh ve avang chuan a duh ang takin a che thei lo a ni mahna, min vawnna a thlah dul deuh a, chutih lai tak chuan a ngal chârah chhuih zawtin ka tlân chhe ta a, ka puanbihah a man hman hrâm. Mahse, ka tlan lui tho a, a hnuaia kekawrbul tawitê ka hâk nen tlan zui zel chi a ni lo tih ka hriat chhuah chuan ka ding ta ringawt.

"Tlanchhe ta che.. kal i duh chuan kal rawh.." thinrim miah lo hian a rawn ti a, ka ding ngawi reng.

Ani erawh chuan ka puan chu thlep ṭhain Bolero lam a pan nulh a, chêt chhuahna châng hre lova ka din reng lai chuan Bolero chhungah a lut hmak. Vawikhat mah a rawn hawi lêt lo. 

Kei hi engtin nge ka awm dawn? Ni lo, heti ringawt hian ka awm thei lo...

"Zobiakmuan.." tiin ka ko vak a...

161122 -B®®

B+>[BeckirafARenthleI]<+®®