4.A MAK! A Becky Rafa Renthlei Story

4. A MAK!

Ziaktu: Becky Rafa Renthlei 

-B®®

Shadow of the life

[Recap]

"Min ben hian man a nei a nia  a to viau bawk," a sawi zawh rualin na zetin min rawn fawp ta a, a thîp tâwkin ka hria.

Tâl chhuah tuma ṭan ka lo khawh ve avang chuan a duh ang takin a che thei lo a ni mahna, min vawnna a thlah dul deuh a, chutih lai tak chuan a ngal chârah chhuih zawtin ka tlân chhe ta a, ka puanbihah a man hman hrâm. Mahse, ka tlan lui tho a, a hnuaia kekawrbul tawitê ka hâk nen tlan zui zel chi a ni lo tih ka hriat chhuah chuan ka ding ta ringawt.

"Tlanchhe ta che.. kal i duh chuan kal rawh.." thinrim miah lo hian a rawn ti a, ka ding ngawi reng.

Ani erawh chuan ka puan chu thlep ṭhain Bolero lam a pan nulh a, chêt chhuahna châng hre lova ka din reng lai chuan Bolero chhungah a lut hmak. Vawikhat mah a rawn hawi lêt lo. 

Kei hi engtin nge ka awm dawn? Ni lo, heti ringawt hian ka awm thei lo...

"Zobiakmuan.." ring takin ka ko vak a...

&&&**

Chutia ka din reng lai chuan min ngaihven ringin ka che chhuak duh lawk lo a, minute 5 dawn ka din hnuah pawh min ngaihven ve îk lo. Feet 20 vela hlaah a Motor chhungah a ṭhu daih a, ka luhlulna avang chauhin phúlah ka ṭhu thla ta ringawt a, ama min hruai a ni a, min ngaihsak pawh a tih tur a ni. Tih rilru ka pu deuh tlat.

"Chawngdingpui..." tia min ko ri ka hriat ve leh ka hawi chhuak nghal a, Zobiakmuana min kohna emaw ka ti hman kha a ni a, ani tezawngin ka lam pawh a rawn hawi lo hrim hrim, mahse; min kotu an awm ngei a ni. Tu nge ka hmingpum hriaa helaia min ko theitu tur awm ang. Saw misual pa saw a nih si loh chuan.

Ngaihṭhat loh rûkna ka nei leh dâwn dâwn a.

Phúla ka ṭhut vang nge ka malpui leh chawn vel a thak sup sup tawh a, ka hlau ru deuh bawk nen Zobiaka awmna lamah ka phei ta nge nge e. Driver seat-ah ṭhuin a maimitchhing daih, "Min ko em ni?" Tia ka biak pawhin min chhâng lo hrim hrim, a muhil em mawni zawk le!?

"Zobiak..." tia ka koh leh chuan a rawn meng siar siar a, min hmuh veleh, "Motor chhungah lut rawh," a rawn ti hmuk.

Thuawih deuh hian ka lut ve maia ka malpui lah chu a sen vual vek a, a thak thîp ṭhak.

"Ka puan kha khawiah nge?" Tia zawtin, passenger seat-ah ka ṭhu fel tawh a, min la en chuang lo, "I duh loa i tlansan tawh alawm, tikhan awm hle hle rawh," tiin a maimitchhing zui leh daih a, kei mi zaidam lo tak thin hian a tuar leh ta lo. 

"En teh, helai hmunah hian min hruaia ka hun i khawhral hnem tawh zia hi i hria em?" Ti hlak hlakin ka mal leh châwn vel ka zût thuak thuak a, ka insil emaw ka inbual lo a nih chuan a hrehawm lutuk tawh.

"I duh chuan i haw thei reng, i thinchhe lutuk leh i luhlul lutuk hi ka ngaithei lo, ka kham," a la ti fô.

Zah pawh dawn lo leh a thusawi pawh ngai haw duh lo hian, "Ka thak vual vek tawh a nia, inah min hruai haw rawh," zawi fiah takah ka ṭawng chuan a rawn hawi ve chauh a, ka chhip aṭanga hnuailam thlengin uluk deuh hian a thlêk kual vel a; chutah ka mal vual leh sen tût chu a hmu a ni ngei ang, "A na em?" A ti sup.

"A thîp thak, inbual emaw insil emaw ka ngai," ka lo ti sawk sawk a, ka lama rawn kun pheiin ka malah a rawn tawk a, "Khawih kher a ngai lo," tia tawlh det chung hian ka inhup vat a, Sanitizer rawn phawrhin min pe a, "Kha, spray rawh," a ti leh tawp.

A sawi anga ka tih hnuah tlem chuan a zia ta deuh, min be lova min en hek lo. Ngawi rengin ka puan a rawn la a, min pe leh tawp bawk a, Motor a tinung nghal hlarh hlarh a, chawhnu dar hnih a pel vel chiah.

Thil ṭul lo lutukah helai Kawmzawlah hian min hruai a, eng tak tak pawh kan sawiin kan tikaw hlei lova ka hlêp chu thinrim khum, thâk leh vual, hei zawng hi vawiin ni atana ka hlawh chhuah a nih hi, thinrim ṭûnin ka ngawi kar a, ani pawh Lungtum ang chiah, a ngawi hmuk.

Kan in lam pana kan tlân tâk lovah chuan rang takin Zobiaka ka melh a, kawng chiah enin a tûm bur, a bianga ka ben vang khan tlêm chuan inthiam lohna ka nei ve det. Mahse, ka tilang duh chuang lo.

"Hmun dangah min penkawi pui tawh suh, ka haw duh a nia," ka ti a.

"I nau kha call la, i haw dawn loh thu leh chaw eina tur i nei tih hrilh ang che, zan lamah Nunhlua te inah kal nghal turin insawi bawk la," nelawm fahran lo leh thupe lutuk âw a chhâk chhuah vang chuan ka ngeina a zual sauh.

"A teuh lo, i rual hian khawiah mah kal ka tum miah tawh lo, min zah lo a nih pawhin min ngaihpawimawhna tlem tal nei ve rawh," thinrim chunga ka ṭawng zawt zawt chuan a Motor khalh a tichak sauh. 

"Zobiak, ka ti tak tak a nia, ka thak nasa lutuk tawh, ka khua te a sik mai dawnin ka hria a nia, thak ka haw teh a nia aw," zaidam deuh zawka ka ṭawng pawhin min melh chhete eih lo.

In pakhat tlema fâl ve deuh kawtah Bolero a tiding dawt a, a chhuk zui nghal a, kei erawh ka chesawn lo hrim hrim, ka mal leh chawn thîp ṭhuam ṭhuam chu haider lui hrâm hrâmin hmalam ka en ngar a, ka thin a rim ve takzet. A hmel leh a mitmeng enin mi tihmawh leh luhlul a ni tih a hriat renga mahse, hetiang êm êm hi chu a nih ka beisei lo. Mipa ngo deuh hi an zaidam duh tih mai mai te hi chu thuvaêkthlâwk a ni, a thinchhe rumrût.

"Rawn chhuk rawh le," tih pahin kawngkhar pawnlam aṭangin a hawng zui nghal a, ka ṭhut ngawih reng vang chuan a ngaithei lo a ni ngei ang, "Ka thin tihrim belhchhah tawh suh, Chawngdingpui, ka pian tirh ata kut min thlâk hmasaber tu i nih hi, ka ngaihdam che ring miah suh," a rawn ti leh a. Ka va hlau ta ve. 

Muangchangin ka chhuk ta hnak hnak a, ni e, nuṭa pakhat ka nei ve a, ka nu leh pain min hrilh ṭhin angin ka nau zawk ni mah se a thinrim laia chhâng zawt zawt lo tur leh ngawi rih turin min hrilh ṭhin. Chuvangin tunah pawh hian Zobiaka lakah lungawi lo mahila ka ngawih rih a ngai, kut thlâk hmasabertu ka lo nih tak tak phei chuan ka tân a nuam miah lo. Thil ṭûl lo tak ka ti a ni.

In chhungah a lut hmasa a, a nuam reuh hle, a zau fahran lo nain bungrua ka hmuh phâk chinah a kim ve biai a, a fai em em bawk. "Ka nî fanu Hmingsangi te in a nih hi, an pa te khua Champhaiah zan thum riak turin an kal a, in min nghah sak tura min ngen avangin tukin zing khan ka chho a," ka zawh pawh ngai lovin a sawi fiah ve teh tlat.

"A nih chu, min thlah haw hman loh pawhin a pawi lo, Mama ka inhruai tîr mai ang," thinrim miah lo anga langin ka chhâng a.

"Ka thak i ti a ni lawm ni, va inbual rawh, insil i duh zawk pawhin a theih reng," ti nghut chung hian room-ah a lut a, a rawn chhuak leh vat. Towel min hmehbel chawt chawt a, "A ngai lo, ka haw duh zawk," ka tih pawhin, "A ninawm zawngin khawsa miah tawh suh," tiin bathroom awmna lamah min nawr kal dawt dawt a, ka va han ning tak. 

"Zobiak, i mak lutuk em mai, naupangchhia kan ni tawh loa hetia innawr luiha in palzam lutuk hi ka duh lo," tiin Towel ka koki-a a bán chu ṭhutthlengah ka thehsawn daih a, ka thaka ka hrehawm ngei mai. Inthlâkna tur eng mah ka nei chuang lova haw ka duh a ni tawp.

Thinrim ru deuh tak hian ka bag-a phone chu phawrhin ka nau number ka dial a, a rawn chhan veleh, "Mam, min lo hruai hman ang..." ka sawi zawh hma hmain phone min rawn chhuhsak a, "Mama, keimah Zobiaka, Nunhlua ṭhianpa ka nia, i u hi zanah ka rawn dah mai ang, amah chuan tuna haw a duha a inthlahrung deuh a nih hi," tiin lehlam ṭawng a ngaithla leh vang vang a, chhuhsak pawh ka tum buai peih tawh lo.

"Aw le, aw le, lo ngaihtuah suh aw, khawhar in kal banah ka lo thlah dawn nia," tiin an inbiakna a ti tawp a, a nui suk. 

Phone min pêk lêt pah hian, "A ninawm zawngin awm tawh suh, ka sawi fel tawh, hetah chaw kan ei anga chumi zawhah Nunhlua te in lamah kan chhuk dawn nia," a ti a.

Ka ngawi reng.

"Chawngdingpui, ka thin a rim hma hian va intifai rawh, kal rawh.. chuti lo chu.." a rawn ti vin ṭhawk a, ka phu dâwrh.

"I zak si lova maw, i zak lo a ni tawp.." tiin Towel chu ka ban a, "Zahna chhan vak tur ka hre lo, dâr thum a ri tawh a, ei rawng ka lo bâwl ang, chaw kan ei vat dawn nia," a ti leh zung zung a, "E, leh lawk, Chanmari-ah ka kal lawk a ngai, chawhmeh tlem azawng ka han lam anga i lo awm hreh em?" Dam deuh zawk hian a ṭawng a.

"Min râwn der kher a ngai lo, i duhdanin i awm vek zel tho," ka lo ti hmak.

"Ok.. ka rei lovang, lo inbual la i mamawh tur pawh bathroom-ah a awm vek ang aw," tiin dawhkana Motor chahbi chu a ban zui zat a, a chhuak lai ka en tawh lo. 

Bathroom-ah lut ta mai lo chuan ka phone ka phawrh chhuak a, Rinkimi ka be ta rih a, a duty-na hmunah a lo la awm a, rei ngial kan inbiak leh tâk kha. Ka nau pawh ka va hrilh fiah duh tawh bîk lo a, Nunhlua te ina awm angah min ngai tih ka hre mai.

Sanitizer ka hman vang nge ka thak zualpui pawh a reh huai tawh a, mahse, a la sen vual tût. 

Hmanhmawh lo law law a inbual ka tum ta a, kum 32 ka ni ve tawha ka lian lem lo khawp mai, ka taksaah hian eng nge i chhuan ber tih min zawt ta se, ka vun hi a ni ang, ka ngo viau a, ngo var hlung an tih ang hi chu ka ni leh miah lo, ka sam a sîna a kir kawi deuh, hei vang hian ka thlah khât a, ka vial bo daih zel. 

Bathroom-ah lutin tui ka herh haw nghal a, ka lu pawh sûk law law ka tum. Zobiaka ei rawngbawlpui ai chuan tihian ka inkhung char char anga a ni mai.

Ka pa hi High School zirtirtu a ni a, Siaha-ah daih an transfer avangin an la awm a, ka nuin eng mah a thawk lo thung. Unau pahnih kan ni a, ka nau Mama kha Mahindra company-ah a Manager ve a, kan hausa khuchûk lo nain kan tâl ve nawk nawk mai. Ngaihzawng sawi tham ka nei lo, Nunhlua tiam lovin pahnih chiah ka nei a, ka lerh em emin ka inhre lo bawk.

Chutia lu sûk paha ka inngaihtuah lai chuan ka tui herh a liam zawih zawih a, ka off hnuah muangmarin ka taksa ka leih leh a, a vawt var mai. Saruak tangkâwnga ka inbual mai loh chuan inthlâkna tur dang pawh nei nghal lo chuan.

Thil dang ngaihtuah tawh lova ka zâi rât rât laiin Ventilation lam a ri hrâwk a, rang lutukin ka dâk chhuak a, tumah ka hmu lo a, a inhawng lo bawk. Ka ngaihbel pawh a ni maithei. Ka intleuh laiin Choka lamah a ri leh rawk rawk a, Zobiaka a lo haw tawh a nih ringin ka hmanhmawh phah leh ta lo. Mahse, ka rilru chu a nuam lo deuh, ani hian Ventilation aṭang te hian min lo bihthla a ni ang a. Â.. chu zawng, a nihna nen a inrem lo, ka puhchhe deuh mah mah. Chutiang mipa a ni lovang.

Ngaihngam zân tawh lo hian ka intleuh sawk sawk a, thawm ka ngaichâng reng bawk. Mahse, a reh ṭhiap a, Zobiaka chu ni se min ko tawh ang. Ka ngaih a ṭha lo zual sawt.

"Zobiak, nangmah em ni? I lo haw tawh mi" Ka ti ve ringawt a. Chhânna ka dawng lo, ka lû ka hrûk mawlh mawlh lai chuan 'Tap' aṭangin tui a rawn haw tur tur a, ka va han phu nasa teh reng êm, ka off chiang lutuk tih ka hre bawk si.

Rang lutukin ka va off a, Towel-a ka intuam hnuah ka thil hmanho ka rem ṭhat sawk sawk lai chuan Ventilation lamah thâwm a rawn awm leh a, a inkhâr ṭhuai ni berin ka hria. Ka hawi chho nghal vat a, 'Ka duh thei lo, awi...' keima âw ngei pawh chu a ri chhuak chang chang a, Ventilation aṭang chuan hmeichhe pakhat hian thinrim hmêl deuhin min rawn bih kur a, a hmel awm dan ka sawi fak thei lo. A hnarkua a vang hûk a, a mitmu a pâwng pùr bawk, inbual zo e ti lo chuan ka thlan fîm a tla bat bat!

Ka thawmhnaw inkhâi pawh ka ban hman tawh lo, ka ke khur dawt dawt chu ka la chhep sual zui bawk a, ka ṭê chhuak ṭhawt. "Chawngdingpui thi rawh," min ti ang tlatin ka hria, Bathroom kawngkhar ka hawng turte chu ka thâ a khurh nasat êm avangin ka ti hleithei lo. Bucket ka paltlu rem rum a, min nuihsawhtu âw chu ka bengah a inthûm rawn tlut tlut.

Ni lo, kei hi ka thidang thiang lo, mittui parawl ṭeuhin kawngkhar ka pawt hrâwk a, pawnlam aṭanga nemtu awm ang mai hian a sak ṭulh! 

"Lalpa, min pui rawh..." ka ti khur hlak hlak a, ka towel bih lai ka kut veilamin ka hmerkhawm a, dinglamin kawngkhar handle ka vuan bawk a, "Zobiak, Zobiakmuan..." tia ka râk tuar tuar lai chuan kawngkhar a rawn ri pawp a, bathroom chhuatah ka thal chiang hle. 

"Apui, harh teh, harh rawh..." tia ka bianga min bêng thek thektu âw ni ngei tur chu hla tak aṭanga lo ri chhuak angin ka hria. Ka meng ngam lo, ni lo; ka meng thei lo zawk. Ka mit vun a chhah lûk a, ka tiril a khur der der.

"Apui.. keimah Zobiaka.." tih paha kut lum thar tharin ka biang a rawn tawh leh tâkah chuan hlau chung chungin ka meng chhuak ta riai riai a.

Zobiaka mitmenga manganna leh hlauhthawnna inpawlh nuai chu ka hmu hmasa ber. "I harh tiraw, i harh tawh ti raw," a rawn ti mawlh mawlh a, a meng buai nak chu ka hmu fiah telh telh.

"Zobiak..?" zâwi sapa tiin ka mittui a luang nghal zung zung a, ka hlau êm a ni.

"Hahdam rawh, ka thiam loh a ni, keima thiam loh vek a ni. kalsan lo tur che ka ni asin," A ti sup sup a, a malchungah naute pawm ang deuh hian min lo pawm a, ka hawi kual leh hlek chuan bathroom kilah kan lo awm reng chu niin! Ka towel bih a tawm tún a, ka mal leh âwm vel pawh a ngai ngaiin a lang vek. Mahse, chutiang lam ngaihtuah hmel pawh pu lo hian, "Ka tihpalh aw, ka tihpalh," inthiam lo lutuk tih hriat taka a rawn ṭawng chhuah leh chuan ka harh ṭha pangngai ta deuh.

"Engtin nge ka awm?" Tiin ka lo zawt hû a.

"Thawmhnaw inbel phawt rawh," a rawn ti daih. Nia, nia, ka lan dan mawi lo lutuk pawh ka ngaipawimawh tawh hleinem maw le, min kuah tho a, bathroom kan chhuahsan lai pawhin ka dik thei lo achhâ chu a ni e. 

A tih ang ang chuan ka awm tawp a, khua a lo thim lek lek tawh lehnghal! "Room-ah i inthlâk duh zawk em?" Tia min zawh pawh chuan, rang zetin, "Aih.." ka lo ti a. Keimaha awm ka duh tawh lo hrim hrim.

Paper bag pahnih a rawn dah hnai a, "Khatah khan i thawmhnaw tur a awm aw," tiin min hnungchhawn nghal a, min kalsan a tum lo tih ka hrethiam ve mai, min en se chu ka ti hauh lo. Mahse, chutia lehlam a hawi chhung ringawt pawh chu nuam tihna ka nei lo hulhual.

Bag chu ka hai rak rak a, underwear leh bra, kawrlum dum leh shirt pakhat, boxer pawlduk raih, a vara ṭial hi a lo awm a, khawia mi nge tih zawt buai lovin ka inbel nghal mawlh mawlh a, mak deuh maiin ka taksa nen a inrem thlap. Hun dang nise a thil pek ka lâk loh dawn nen, sawi buai nei miah lovin ka inbel pawp pawp a ni ber.

"Puan dawr a lo inkhar tawh si a, Hmingi puan bih hawh mai rawh, amah ka be vek tawh aw, ka va laksak ang che," tia min kalsan a tum chuan rang takin a kutah ka vuan a, a lo hûm vat, ka kut nghet taka vuanin Bed room lamah min hruai ta a.

Kelawngin ka la awm a, ka flat shoe awmna pawh ka hriat si loh! Zobiaka hnungah ka kal ve zel a, Hmingi puan dahna chu hawngin, "I duh ber la mai rawh," a ti a, ka la che chuang lo. Amah bawkin puan inthlep chu keu lawr dan danin Sathin rawng a 'plane' a rawn phawrh chhuak a, lawm takin ka la a, ka bih nghal sawk sawk.

Bed room kan chhuahsan hnuah Sofa hnai berah min ṭhut tîrin, "Le, eng nge i hmuh sawi rawh le," tiin min zawt ta a, ka pheikhawk min bun tîr pah bawk a, ka ngawi reng.

"Apui, sawi rawh le, eng nge i hmuh?" Ka bula rawn ṭhut ve pahin min zawt nawn leh a, ka sawi ang nge sawi lovang tia ka inngaihtuah hnuah sawi vek ila min hriatpui se ka duh tâk avangin bath-room a thil thleng zawng zawng chu ka hriat ang ang ka hrilh ta vek a, ka sawi laiin a ṭawng miah lo a, ka sawi chhung zawngin ka hawisawn hek lo.

"Ka lo haw laiin i reh hmak si a, ka duh aia ka thang rei tâk avangin ka ko che a, thawm eng mah i neih loh lai khan ka hlauthawng takzet. I nau i inhruai tîr ta emaw ka ti hman tawh a, mahse, i bag leh pheikhawk ka hmuh leh tâk si ah chuan i inbual a nih ringin ka ko che a, vawi thum ka koh hnuah che pawh i hawn tak si lovah chuan kawngkhar ka sâwi nghek a, chhunglamah a inkalh tlat bawk si, saw en la, ka tihchhiat vek saw.." tiin bathroom kawngkhar thlawn hlawk chu a kâwk a, ka hmu ve chiah.

"Apui, keini pahnih hian tibuaitu kan neih zel avangin kan fimkhur a ngai a, hemi chungchang hi sawi ka duh vang a nia vawiinah pawh Kawmzawl lama ka hruai nachhan che, ka ruahman anga eng mah a kal tâk si lohah chuan Hmingi te inah ka hruai ta ringawt che a nih hi, hmeichhia i ni a, i hlau dawn tih pawh ka hria. Mahse, i kiangah ka awm zel ang tih ka sawi tawh kha," a sawi zawh rualin min kuah a, ka ṭang eih lo.

"Chaw ei lova awm ngawt a fuh si lo a, i thawmhnaw hâk tur ka zawng rei deuha min hrethiam a ni ang chu," tia thawk la hawkin, "Lokal rawh eng emaw tal ei tur siam ang aw..." a tih chuan ka ṭhu ngawt ngawt a, ka la pangngai hleithei lo a ni ber.

"Apui..." a hmaa min koh ang chiahin a âw a thâm sap a, ka biangah a kut pahniha vuan chung hian, "Thin thi-a i awm hma loh chuan ka mitah chiah en ang che," hnuailam melh ka tum pawhin min chelh hneh lutuk. Amah en turin min ti tlat a; a mitah ngam leh ngam lo hian ka en ve ta a, min duatna, min ngaihsakna, min duhna, engkim ka chhiar thiam vek.

Min thlamuan tum tak hian hnai takah min si chêtin a rawn tawlh a, dam leh duat taka min rawn fawhna chuan ka kawchhung a fan raih raih. Khaw kâr kawnga min hnem tuma min fawhna ang tho khan thlamuanna, hahdamna ka neih phah chiang alawm. Thil mak a thleng leh ta; khati khawpa hlauhlawpa awm si kha, amah ka hnaih hian ka hahdamin ka hlauhna a reh si ṭhin.

Zobiakmuana hi mipa mak tak a ni. A nelawm êm êm pawh a ni lo, a ṭawng mawh nen nen ka tan erawh chuan thlamuantu ṭha tak a ni.

Dam leh duat lutuka min fawhna chuan thildang ka rilru lapêngtu chu a tireh tial tial a, duhthawh takin ka lo chhâng lêt ve mial mial bawk. Ka hmaia khawih tawh lovin ka kâwngah a rawn kuaha kan taksa a inhnaih viau. A kut erawh a hlei miah lova mipa dang chu nise min khawih kual an tum ngei ang. Hei tak hi Zobiaka danglamna chu a ni.

Thaw chham dâwna kan infawh hnuah thaw hawk chung hian a inlahrang a, "Ka ta chauh ni ang che, ka venhim tur i nih hi.." a ti sup.

Chumi hnu chuan kan ei tur a siam a, a kawr hnungah chelhin ka zui kual zela amah pawh a nui tawp. Eng tin mah min ti lo hian a tih tur a ti mawp mawp a, zan dar ruk leh a chanve rik hmain zanriah kan kîl dun ve rân a, ka phone a rawn ri a, ka phu leh nasa mai. Mahse, Zobiaka zawkin a va la a, hmui phunin, 'I nau' a rawn ti a. Phone min pe nghal bawk.

"Hello..." ka ti hman ṭawk.

"Mate, Motor thar a rawn thleng dawn a, zanin hi kan tlaivar ka ring a, eng tin nge ni ang, Ṭanpuia lah hi a ṭhianpa thihnaah tlaivar a tum ve si a," a rawn ti lawng lawng a, Ṭanpuia a tih hi ka nî fapa kan ina awm kha a ni. 

"Keimahin ka awm duh teuh lo, kal lo mai rawh," ka lo ti hlar. Chuveleh, "A theih loh tih i hriat vek kha, ka hna chân ka duh miah lo aw...i bulah u Zobiaka a awm em?" A rawn ti daih a, a awm tih ka sawi veleh "Ka lo bia ang e, phone pe la.." a tih chuan ka ner nasa ngei mai.

Zobiaka phone ka pe a, a ngaihthlâk vang vang hnuah, "Hreh lo e, lo ngaihtuah miah suh u, ka lo awmpui dawn nia," dam thluamin a chhang a, rei lotê an inbiak leh hnu chuan a dah ta a.

Eng mah sawi lovin chaw a bâr zui mial mial a, tui ti lo zetin ka ei ve tâk kha.

"In inah kan phei dawn nia, hmanhmawh vak pawh a ngai chuang lo a, eng mah hlau suh aw, i nau khan min ring ngam a, a rin ang ngeia awm pawh ka duha ka tum," a ti nghet charh. "Ka thawhpuinu Liani te inah ka riak mai ang," ka lo ti a.

"A teuh lo, ka awmpui ang che tih ka sawi lovem ni, luhlul chhuah tlat zel suh. Mahse, Nunhlua te inah reilote kan lan ve loh chuan a mawi lo," a ti leh a.

"Ka kal duh mai mai lo," ka lo ti hmak a, ka thlénga ei tur awm ka chawk let lai chu melh zauhin, "I ei châk hlawl lo a nih kha, in inah i ei ṭha leh mai dawn nia, i boruak a la rit em mai," ngaihthlâk nuam zeta ṭawngin min ngaihsakna âwka a ri chhuak tel bawk. 

Engkim ama'n a ti fel leh vek a, a hma ang chiahin ka zui kual zel thung. Bathroom-a ka thawmhnawho paper bag-ah a khung sawk sawk a, "Puan kha chu naktukah ka dah lêt mai dawn nia, hahdam tum rawh, min ring la.." ti supin ka lam a rawn hawi a.

"Apui, ka duh che ka tih kha dâwt a ni lo a nia, in inah engkim a chin chhuakin ka hrilh ang che, ka ṭhianpa theihnghilh rawh ka ti lo. Mahse, i hriatrengna hnuhnungah kei hi awm ila thlamuanna leh hahdamna keimahah hian nei la ka ti, i nei mêk bawk," a ti duah a, a thutak hle bawk.

"Ngaihzawng neih tumna ka nei tawh lo,"tiin ka chhâng lêt tlawng a. A ngaihdan a nih loh hmel ngei mai. Thinrim phei chu a thinrim lovin ka hria.

"Ka nghâk zel tho ang che," a'n tiah. A nui duh ṭhak nâng.

"Kan la hria ang chu," ka lo ti ve mai.

"Ka inbual ve lawk anga nangmahin i lo awm hreh em?" A tih chuan, rang tâwkin, "Inbual lovang," ka ti a. Ka chhâng rang lutuk chu mak a tih hmel hle.

"A va buaithlâk e, Apui... ka inbual ve loh te chuan.." tia nui hawk hawk chungin min rawn melh a, "Eng lo, inthlâkna keng la, kan inah inbual mai rawh," ka lo ti awlsam êt a, min en leh vang vang hnuin, "Okay, Chawngdingpuii te inah ka inbual ang," a ti ve ta a. Ka lo thaw huai. He inah hian ka thlâ a muang thei tawh hlawl lo.

Hmingi te in kan chhuahsan a, Bolero bawk chuan Nunhlua te in lam kan pan ta a; mahse, a chhungah ṭhutna mai tur a awm tawh loh avangin pâwna ṭhut ka zuam si lova kan in panin kan haw ta nge nge e. Bâkah thlabâra min siam hreptu leh natna leh zahna min thlentu ina kal fo pawh hi ka châk hrep lo e.

Kâr lovah kan in kan thleng thuai a, a inthlakna tur leh ka thawmhnaw kha ka kutah hmehbelin, "Motor hi kan hung ṭha nghal daih ang e, i naute lo haw hunah a hnawksak palh ang, lo va lut rawh," a ti a.

"Aih," ka lo ti leh tlat tawh.

"Hmelṭha nu, dangdai nu.." tihpahin ka hmuiah a rawn fawp zeuh a, a insûm hman lo a nih ka ring. Ka tan pawh duh lova ṭan lo khawhna hman a awm lo reng reng. 

Motor a dah fel thlap hnuah kan chhuk ta chauh a, chahbi ka pe a, amahin a hawng vek. Vawiin zet zawng ka dik lo tluan chhuak parh chu a nih hi!

In chhung kan lut chiah chu hnara hlît phawi ang huai ka ni e, Zobiaka erawh chuan engkim hriat chian tum ang maiin a melh uluk kher mai, kan chhungkaw thlalâk intâr thlék vung vung chung hian, "I nu leh pa chu an hmelṭha hle mai a," a ti ta a.

"Hria se an lawm ngawt ang?" Ka lo ti ve mai a.

"I nu leh pa i chhun kawp a nih hi, kei chu nu leh pa ka nei tawh lova ka û hmeichhia hi Delhi-ah an nupain an awm a, amah nurse niin an pa Doctor a ni thung,'' tia ngawi leh datin, "Keimah chiahin ka awm a, keimah leh keimah hi ka inbuaipui fai vek bawk," rilru nat hmel deuha atih tâkah chuan ka lainat ang reng.

A bulah ka va kal hnai a, "Hna ṭha tak i nei a, mipa i ni bawk a, nupui ṭha deuh i la nei mai ang, chhungkua te din tum rang zawk la," dam thlapin ka lo ti a.

"Min nei rawh.." zu han ti a.

"Eng maw i sawi?" Ka ti vin ṭhak a. Ka insûm hman thlâwt lo.

"Min nei rawh, min nei la, i duhthusam mipa kha a takah ka chantîr ang," inring tâwk lutuka tiin a kekawr hâk lai ipte a zen a, chutah min rawn en a, "I natna leh zahna, mualpho i intihna zawng zawng kha Zobiakmuana hian a hliahkhuh ang," a ti thüm chhak.

'I zak lo' tih ka tum ûk a, mahse, ka ngawi daih.

"Ka duh zawng mipa niin i inhria em ni?" tiin ka zâwt lêt hlauh.

Nghet charh hian, "Min duh a, ka kiangah i hahdam ṭhin. Min ngaina lo ang khan lan phêt tum duh suh, i nihna angin lang chhuak la, i kum milin khawsak tum tawh la, dawihzep nun leh tlânchhe nun kha bansan rawh," a ti zui hmiah hmiah.

Sawi ve tur reng reng ka hre lo. A sawi zawng zawng khi a lo ni tak tak em maw ni le? Kei mi mâwl hian ka hre leh pek tlat lo.

"Vawi khat chiah aw," tih pahin min hnaih ruak a, ka khabeah dawmin muangchâng hauh lo hian min fawp leh sak. Ka hamhaih teh e...

Min thlah leh vat tho a, "Ka inbual dawn, min rawn zui leh dawn em?" Nui ruh ruh chung hian a ti a, ka nui ve tawp.

Nia, a mizia leh a khawsak phung hrim hrim hi a mak dangdai ve êm a ni. Mipa mak tak chu a lo ni e, mi hneh theihna leh thunun theih riauna a nei bawk.

"Bathroom kawngkhar kalh lovin inbual rawh, ka en miah lovang che," ka lo tih chuan a nui nasa zual sauh a, "Dawih lutuk mai," tiin min pen keuh. Ka ngai haw miah lo..

A inbual chhungin bathroom kawngkhar sîrah ka lo ṭhu tak tak a, a thawmhnaw a phelh laiin ka en ru dêk dêk. A pian nalh leh inphut ru zet chu mâwi ka lo ti. Mahse, ka en tih a hriat ka duh loh vangin ka hawisawn leh daih.

Zobiakmuana ka mipa hriatchian loh leh min hnaih tum êm êmtu mipa hi ka hnaih ve dawn ava ang si ve... 

171122 -B®®

B+>[BeckirafARenthleI]<+®®