5.A MAK! A Becky Rafa Renthlei Story

5. A MAK!

Ziaktu: Becky Rafa Renthlei 

-B®®

Shadow of the life

[Recap]

"Vawi khat chiah aw," tih pahin min hnaih ruak a, ka khabeah dawmin muangchâng hauh lo hian min fawp leh sak. Ka hamhaih teh e...

Min thlah leh vat tho a, "Ka inbual dawn, min rawn zui leh dawn em?" Nui ruh ruh chung hian a ti a, ka nui ve tawp.

Nia, a mizia leh a khawsak phung hrim hrim hi a mak dangdai ve êm a ni. Mipa mak tak chu a lo ni e, mi hneh theihna leh thunun theih riauna a nei bawk.

"Bathroom kawngkhar kalh lovin inbual rawh, ka en miah lovang che," ka lo tih chuan a nui nasa zual sauh a, "Dawih lutuk mai," tiin min pen keuh. Ka ngai haw miah lo..

A inbual chhungin bathroom kawngkhar sîrah ka lo ṭhu tak tak a, a thawmhnaw a phelh laiin ka en ru dêk dêk. A pian nalh leh inphut ru zet chu mâwi ka lo ti. Mahse, ka en tih a hriat ka duh loh vangin ka hawisawn leh daih.

Zobiakmuana ka mipa hriatchian loh leh min hnaih tum êm êmtu mipa hi ka hnaih ve dawn ava ang si ve... 

&&&*

Mipa ve si a va han inbual rei tak, a ṭawng tlem teh reng nen bathroom chhung aṭangin a rawn ṭawng ve char char a, ka hlauh a ring a ni mahna.

"Nang chu ni ve la, min lo en miah suh, i ti lehnghal ringawt mai ang," tiin towel veng chung hian a lo chhuak a, tuna a lan dan kher hi chu a duhawm thlâwt, a fai hmel si, a pian leh hmelin a zir bawk nen a sam huh hlap dum ṭha tak te chu en loh a har.

"Hey, ka sawi i hre miah lo a nia," tih pahin a lu hrûkna zawk Towel chu min pe a, ka lo la ve mai, eng nge a sawi ka hre lo tak tak nia.

"Eng maw i sawi?" Mawl hmel tak hian ka zawt lêt hû a, "I inbual laiin tiang khan kawngkhar kalh lovin pawnlamah lo awm ve ta ila, min en miah suh i ti leh hrim hrim ang, ka fel zia kha, min en ruk pawhin ka hau miah lo che a nia," tiin a nui vur vur.

"Ka en lo bawk che..." ka lo ti vat, "A'n daw mai mai, dârthlalang aṭangin ka hmu reng che alawm le, Chawngding.." thinrim pawh ni chuang lo hian a ti a, ka va zak mai mai e. Dâwt a sawi lo tih ka hre thei tlat. A dinna zâwnah khan dârthlalang awm miau hek.

Mikhual room-ah inthlâk turin a lut a, Mama hnenah khan min awmpui dawn tih a hrilh ngei a; mahse, a lo riak dawn tihna nge, mut dawnah a haw leh dawn tih pawh ka zâwt lo. Min hawnsan êm lo turah ngai ang. 

Mahni in nge nge, ka hlauhna te pawh a kiam duak tawh a, eng vanga kha hmeichhia kha rawn lang ve ngawt nge a nih! A hun laiin hlauin râk chhe viau ṭhin mahila, Zobiaka a awm tawh hi chuan ka ngaihtuahna a la pênga ka hlauhna a reh chawpchilh mai zel.

Eng emaw ka hre chhuak ta chiah. Ramdini kha a ni thei mai ang em le? Lalnunhlua'n min phatsanna nu ngei kha, a hmêl awm dan ka hre lo a, a thlalâk tal hmu ila chuan ka hre thei ang. Zobiaka khan Nunhlua phone kha a la kawl mai thei asin.

Ka thil ngaihtuah chhuah avang chuan mikhual room-ah ka tlan lut nghal a, "Zobiak..." tia ka koh rualin a rawn dâk chhuak a, mak min tih hmel hle, thawmhnaw a lo la inbel kim lo a, boxer hain khumah a lo ṭhu a, "Apui, eng nge, eng thil nge i hmuh leh?" A'n ti nghal ringawt a. Hlauthawng hmêl ka puin a hre rêng rêng em maw ni!

"Ih, eng lo, chutiang lam pawh a ni chiah lo," inthiam vak lo chunga tiin, "Inthlâk fel phawt la ka lo va chhuak ang e," tih leh pen sawn ka rual a, ka bânpuamah a rawn man chat.

"Hmanhmawh taka i lo luhna chhan kha sawi phawt rawh," a ti leh deuh tlat. 

"Ah..nakinah i hman hunah a nimai," tia kal luih ka tum chuan ka hmaah tak a rawn ding a, "Tlanchhe nun hi nei tawh suh ka tih kha, eng nge ka hriat tur atana i duh chu sawi rawh le," a tih tâk tlatah chuan, "Nunhlua phone kha i la kawl em?" Tiin ka zâwt ta nge nge a. 

Mit zim san chung hian min en a, "Kawl e, nakinah a nu leh pa ka pe ang, tunah chuan thil hriat duh ka neia ka la pe rih lo," nelawm vak lo hian a ti sup a. Min en lehin, "Eng atan nge i tih?" a rawn ti a.

"Ramdini thlalâk a awm em tih ka en duh," ka lo ti ṭha ve mai.

"Chutiang mai mai ngaihtuah a ngai lo, a bialnu, a fâ hial pâitu a ni a, mi pangngai tan te chuan a thlalâk pakhat tal chu kawl ve awm tak, i thîk em ni?" Ti-el aw lek lek hian a ti a.

"Zobiakmuan..." tiin ka lo vin ṭhak.

"Thîk duh suh, mitthi tawh thík khan awmzia a nei lo a nia, kei pawh hian i bialpa hlui hi thîk loh hrâm ka tum ang," thutak zeta tiin min chhuk melh a, thinrim te pawh a ang dâwn dâwn alawm le.

"Ka thîk kher lo a, chutiang bawkin nang pawhin i thîk a ngai lovang, a chhan chu ka tan eng mah i ni lo tih i hria," ka ti ve ngat a. 

"I tan eng mah ka ni lo maw?" tiin a mitmeng hriam zet chuan min melh rún a, ka bânpuam ve veah hmerin, "Nangmah inbumin i eng mah ka nih loh thu vawikhat mah sawi leh tawh suh ang che, 'min duh e' chu ka ti lo, mahse, ka fawh che leh i taksa ka tawh hian keimah ang chiahin danglamna i nei ve, dâwt sawia pha kual mai mai rual pawh i nih tawh loh hi," tiin min hrilh lêt zêk.

"I eng mah ka ni lo," ti nawn leh ngatin min vawnna thinthlâk ka tum nghal a, min chelh nghet sauh.

"Ngawi reng rawh, i ṭawng leh chuan.." tih pahin khumah min pawt ṭhu a, thaw huai chung hian, "Eng ati nge ka duh tlat mai che le, min duh lo tu induh tîr tum tlat hi thil âtthlâk tak a ni, kal rawh, rawn lût tawh miah suh ang che," ti leh lawi siin min nam sawn a, ka hrilh a va hai si ve.

"Zobiak.." ka ti sap a.

"Chhuak rawh, chhuak rang rawh.." a ti vin ṭhawt. Ka phu zawk a, khum thawhsanin kawngka bulah ka ding a, hnuailam a bih tlat. Chutia a awm lai ka hmuh tâkah chuan ka khawngaih leh si.

Chhuak ta mai lo chuan a bulah ka va kal hnai a, "Nunhlua phone chu remchangah min en tîr la vawiina ka mi hmuh kha a bialnu a ni em tih hriat ka duh, eng vanga min tibuai reng nge a nih, a pawi ka sawi awm ka hre lo," ka tih tâkah chuan, "Chawngdingpui, chhuak rang mai rawh," ti nawn leh supin rum fahran hian min melh leh a, ka ṭawng zawm ngam tawh lo, ngawi rengin ka chhuak ta a.

Khati teh thuta a awmna chhan kha ka hre thiam lo. A sawi ang khan ani hian min lo duh tak tak tihna em ni ang. Ngaihtuah thui duh lovin kitchen-ah ka phei a, zanriah tih tham ka ei loh vang khan ka ril a ṭâm a, ei tur ka dap kual ta daih a.

Mama'n min rawn bia a, Zobiaka nen kan awm thu leh a lo haw hun tur ka zawt a, "Chawhnu lam daihah ka lo haw ang, eirawng min bawl kêp lo mai dawn nia," a la ti tak deuh deuh a, Ṭanpuia ka nî fapa erawh a lo haw har a rin loh thu a sawi thung. 

Zan dâr sawm a rik chuan inthlahrung ru takin Zobiaka awmna room kawngkhar ka kik a, min chhâng duh der lo. Mikhual pindanah hian khum siam sa vek mahila sin tur kan dah chhuak ngai lem lo a, chu chu pêk ka tum vang a nia.

Min chhan duh miau loh avangin kawngkhar ka kalh fel a, tukverh vel ka check ṭhat vek hnuah ka room panin ka lut ve ta a, ka nuin min lo call a, Zobiaka chungchang ka sawi ri ta lo. Mama'n a duh leh nidangah hrilh mai rawh se.

Ka khumah ka mu meng kar a, ka online ve nghal bawk a, Rinkimi message a lo tlar thla dal a, ka reply vek. Mahse, a seen tawh lo.

Zobiaka number kha Auto driver ang khan ka saved si a, a hming pangngaiin ka save ta a, a lo online vû mai. Ka kohin min chhâng duh miah lova a va han sual mai mai tak. Puan sin lovin mu se a ni mai.

Ka dang ro huam avangin ka harh hlawl a, ka âwmah ka phone khawih lai a lo let bal a, puan pawh ka lo sin reng reng hleinem maw le. Khum bula tui bottle banin ka in khawlh khawlh a, dâr khat a lo pel hret. Dârkâr hnih aia tam ka lo muhil hman.

Mut ṭhat tumin puan sin tur ka pawt pharh a, ka hma zawn tukverh kawmthlanglam hnaih ber parda inzar chu a phe hlep hlep tih ka va hmu. Light ka la off loh avangin ka hmu sual lo bawk.

Mi huaisen tak ni lo mahila kan in, ka room-ah na na na hi chuan ka hlau lutuk hran lo. Lehlam room-ah Zobiaka a awm thova ka ngaih a ṭha ve ringawt.

Light off lo bawkin ka mu leh ta a, Nunhlua leh a bialnu lam ngaihtuah loh hram hram ka tum. A ruang ni-a ka kal bâk kha ka lang nawn ta rih lo a, a chhungte'n a chungchang engkim an hriat vek ring lo mahila; mi ṭawngkam vel aṭanga an hriat tawh tho chu ka ring. Bâkah an accident-na hmun daih daih leh hmeichhia nen an nih kher avangin rinhhlelh loh theih pawh an ni bik lo.

Muhil leh lawk thei lovin ka let kual sek a, ka room tukverh lam ka melh zeuh zeuh a, eng mah phei chu ka hmu tawh lem lo. Ngaihbel tur zawn ṭâlh thu awm suh.

Mama room lamah thâwm a ri sat sat a, pheikhawk brush ri nimaiin ka hria. Ngun zâwkin ka ngaithla a, na deuh deuha pheikhawk brush tâwk tâwk ang mai hian a ri a, ka ṭhu leh hlawl. A lo haw ka ring chiah si lo; va en turin ka huaisen tawk lo a ni ber. Ka room piah chiah hi mikhual room a ni a, ding lamah Mama room a awm. Inchungah ka nu leh pate room a awm thung a, store room hnaih berah Ṭanpuia room kan extend thar a awm thung.

Ngaihngam lo zetin ka la awm. 

Zobiaka min riahpui ve hian ṭangkaina pakhat mah a nei lo. Mahnia awm ang tho ka ni, ka thawm hriat lah chu a ring telh telh a, bengngawng tân lo chuan haider theih pawh a ni tawh lo. Chutia nuam lo ti deuha ka men kar lai chuan pen thawm a rawn awm a, ka room-kawngkhar zawnah a tawp chat. Chutah zet zawng vawiin lama ka thil tawn nen hlauhnain ka thâuah a man a, ka hmulthi a ding sang sang. 

Tlawm leh zah pawh dawn lovin Zobiaka ka call ta a, vawi hnih ka call pawhin a pick thei ṭhak lo. Ka hlau bawk si, ka thin a rim bawk si nen ka ṭah a chhuak ut ut. Heti ringawt hi chuan ka awm thei tawh lo, hmanhmawh takin ka tho a, kawngkhar hawngin ka bih dêk dêk a, tumah ka hmu lo.

Hlau chung chung hian Zobiaka mutna lam ka pan ta a, "Zobiak," tia kovin min chhân loh avang chuan a aia ringin ka ko leh a, min la chhâng ta chuang lo. 

Kawngkhar ka hawng rawk a, ka lut ta a, khumah puan pawh sin lo hian a bawkkhup zawngin a lo mu a, ka sâwi nghal nawk nawk ringawt, chutah a rawn rûm ṭuah ṭuaha inlet thawk chung hian, "A ninawm leh dawn e," a rawn ti sup.

"Zobiak, thawm ka hria a nia, keimahin ka mu ngam lo, lo tho teh," ka ti a.

"I mut ngam loh leh a kil lamah khian han mu rawh," maimitchhing reng chungin zu han ti a.

"Lo tho phawt la, Mama room lamah a nia," zawitea ka tih leh chuan, "Eng mah chutiang thawm ka hre lo, dawihzep lutuk mai," nelawm loh tak hian a ti nghut.

"Tho la va en lawk mai rawh chuti lo chu ka mu ngam tawh lo," ka ti ve ṭâng ṭâng a, min ning tih hriat ngawih ngawih hian a rawn tho a, en pawh min en lo hian a chhuak nghal a, a hnungah ka zui ve bawk a, "Khawi lai hi nge i nau room chu?" A hnungah ka kal tih a hria a ni ang min zawt a. Ka sawi hnuah Mama room lam panin a phei ta a, ka zui ve zel.

Hlauhna leh zâmna nei miah lo hian Mama room-ah a lut a, a hnung aṭangin ka lo bih ve dâk dâk a, eng mah ka hmu lo hrim hrim, pindan chhung a en kual a, a reh ṭhiap. Ka lût ve lo naa thawm leh hnuhma eng mah a awm lo, "Dâwih lutuk mai, êm êm a, thâwm hriat ṭâlh tum khan awm lo mai ta che," ti supin tukverh leh ventilation kalhna a check a, a ngaih a ṭhat hmel viau.

Filter-a tui a in khawlh khawlh a, min la en lo hrim hrim, kei erawh chuan ka zui zêl a, ngawi rengin a bulah ka ding ve tawp.

"I room-ah kal tawh rawh, engmah hlauh tur a awm lo," tih pahin min kalsan a tum nghal ringawt.

Rang zet hian "Aih, ka duh lo," ka lo ti vat.

"Ka bula awm kha i duh lo niin ka hria, i engmah ni lo chu i hnaih peih em ni?" A ti ta sak a. Nuam lo ka va han ti tak.

"I ngaih ang kha a ni lo, ka sawi awm zia chu..." zawitea tiin ka kut ka elh nauh nauh a.

"I sawi chiang tâwk alawm, ka ngaihdan lam a pawimawh ber lo, i nau room-ah engmah a awm lo a, hlauh tur pawh a awm hek lo, va mu leh tawh rawh, ka mu duh.." zawi fiah taka tiin mikhual pindan lam a pan a, a kutah ka lo vuan chat.

"Ka lo mu ve thei ang em?" Ka ti ta thlâwt a, Rinkimi te khuaa ka kal aṭang khan thil mak tak tak ka tawng reng a, mahnia awm pawh thih hrehin ka hreh tawh. Hmingi te in kan chhuahsan lai kha chuan kan inkâr boruak a nuam pangngaia ka thil sawi ṭûl lo lutuk vangin kan inhlat dâwrh.

"Ka kianga awm duh lo tu leh min hnaih hreh ngawih ngawihtu chu engvangin nge ka ngaihsak bîk lem ang, i nau hnenah awmpui turin lo intiam hman lo ila chuan ka kalsan vang vang ang che. I mamawh lai chauha i kianga awm tura min duhna kha ka hriat loh ring reng reng suh," chiang fek fawkin a ti ta a. 

"Ka tihpalh, ka room-ah min awmpui tal rawh khawngaih takin..." inthlahrung lutuka ka tih chuan, "Ka mu duh a nia, nangmah vang bawka tlaivar  leh ka peih tawh lo ni rawh se," luhlul takin a ti hmuk hmuk a, ka bei a va dawng tak, mahnia mut ka zuam tawh si lo. 

"Aw le, ka hrethiam e, ka tihbuai che avangin min hrethiam dawn nia," tiin mittui tling pam chung hian ka chhuak ta hna hna a, eng ati nge a sual êm êm mai le. Ka ṭhiannu Liani te ina ka lo riak lui ta lo kha ka inchhir ngawih ngawih.

Ka khumah hreh zetin ka láwn ve leh ta a, ka va han ṭap châk tak. Hmeichhe dang nise ka tawn ang hi tawng bawk se, kei âiin an dawih lo bîk dawn em ni? Khum kilah mut pawh mu lovin ka ṭhu ta ringawt a. Ka huaisen zâwk ngawtin ka hria.

Ka ṭhu tawm chaih a, ka khûpah khabe ka nghat a, ka inhnît fap fap a, ka ṭap ring ngam lo, thlarau sual hovin min tibuai leh ang tih mawlh ka hlau tawh a, ka chhungril hi a hliam thûk lutuk a, Nunhlua thihna hi tuar lo angin lang mahila ka natzia tumahin an hrethiam lo ang. Ka laka a chêt dan avang khan ka hua. Mahse, chumi avang chuan ka tuarin ka na lo tihna a ni bîk rêng rêng lo.

Ka mittui tih tlâk loh ka tum pawhin a tla zêla ka inkhawngaih laklawh. Ka kut hnunglamin ka mittui ka hru tâwk a, ka inhnît faih faih a, ka âwm chhung chu hnawhtu awm ang mai hian a tâwt ṭup a; vanduai ka inti.

"Apui..." Zobiaka lo luh lai ka hre miah lo a, ka khumah rawn ṭhuin min en vung vung a, ka ṭah a chhuak zual sauh. 

"Ṭah khan awmzia a nei lo a nia, lo tawlh hnai teh.." a ti sup.

Ka ṭhut ngaiin ka la ṭhu renga amah zawk khumah a lo lâwn a, "A tlai tawh mu ang, mu hahdam la ka lo veng ang che," tiin min pawm nawlh a, khum sîr lamah min mut ṭhat tîrin a kil lamah ani a mu a; min kuah nghal vat chung hian, "Ṭap tawh suh, i ṭah hian hrehawm ka ti," ka la insût faih faih avangin a ti leh a, min hnem tum takin ka hnungah a chûl a, kan inhawi tawn lo naa a taksa lumna ka tem pha vek.

"I sual hle mai," tih paha inlâk hran ka tum chuan min si chêtin a rawn tawlh a, "Ka duh che a, kalsan che hi ka tum lo, i tân a harsat dan tur ka lo chhût tel lo a ni, min duhin min nei nghal rawh ka ti lo che a, hun min siam rawh, i natna te ṭawmpuia ka ta chauh ni turin ka duh che a ni, Apui, ka ṭawng i ngaithla em?" A ti leh rih a.

"Umn.." ka lo ti dat.

"Ka ṭhianpa a awm tawh lo a, ka ṭhian ṭha tak ni mah se, i laka a chêt dan hi a fair lo, amah la dam se chuan sawi fel tur tam tak in nei ngei ang. Mahse, a thi tawha a awm tawh loa ngaidamin rilru thar put tum hrâm ang che, Ramdini pawh ngaidam rawh aw..." a ti leh a.

"Ka thei lo, ka theih ka ring lo," tia ka lo chhân chuan thaw huai chung hian, "Ngaidam lo la engtin nge i tih chuan ang a, phubâ i la thei dawn em ni, mitthi tawh khing tura nêp ni lo hrâm rawh," a ti hmuk.

Ka ngawih reng avangin, "I phuba lâkna tur hmanraw ṭha ber chu, amah theihnghilh a, hlim taka awm tum hi a ni zawk," a tih leh chuan dik ka ti. Mahse, a har dâwn.

Min kuahin eng eng emaw a sawi a, ka thlalâk Nunhlua'n a en tîr hmasak ber aṭanga a hmeichhe duh zawng ka nih a rin thu te, hmaichhana min hmuh a châk thu te a sawi ve luam a, "Auto i lo chân khan phurh che ka tum sa reng," nui chunga a tih tâkah chuan ka nui ve thei ta. He pa hian kum li liam ta aṭanga min duh tawh tih a sawi hian mak ka ti miah lo. Ka awih tlat nia.

A mi uap a na a, thawmhnaw inbel vek mahila mipa a nihna hi ka hre ṭan. Ani pawh ka bula a lo mut tirh ang ngawt kha chu a ni ta miah lo, a thaw hawk a, "Ka lam lo hawi teh," hniam ruiha tiin a sawi ang chuan ka inlet ve thak a, thu ka va awih sâwt si êm.

"Ka kuah phâk leh ka thlamuan phâkah awm la, ka ngaih a ṭha a ni mai," tia a sawi zawh rualin a inbengkâng a, min en chiang lutuk tlat.

"Min nawr tet tet lo la.." ka ti ve mai. "Nawr lovang, ka nghâk thei che.." tia rawn kun hniamin min fâwp zui zat a, a hmaa min fawhna ang thovin ka dawnsawng ṭha a, dik tak chuan ani hi ka duh tih ka hria, Nunhlua vangin ka inkharkhip mai mai tih pawh ka inhrechiang bal.

Mipa a ni a, hmeichhia ka ni bawk a, zei taka min fawhna chuan ka taksaah danglamna a thlen thuai a, a kut pawh a awm mai mai ta lo. Ka mut kawr chhungah zenin a kut lâwnga ka taksa a chûl tâkah chuan ka thaw chhuak hak a, "A hun hmaa chêt tumna ka nei lo a nia, ka inthunun a ngai," a hmui a laksawn ruala tiin a kut pawh a dah chhuak nghal a, ka va ui ru e.. tenawm hian!

"Ka nghâk ang che ka tih vang khan rei tak nghah ka tum kher lo a nia, puitling i ni tawh a, i rilru put hmang hrethiam ber tur chu nangmah i ni, Apui.. ka hna hi kan zo ṭêp a, ka haw a ngai thuai tawh dawna chumi hma chuan i rilru siam fel ang che," dam thlap, ngenngawl tih hriat takin a ṭawng a, kei pawhin, "Aw le, Nunhlua a nu leh pa hmaah inlan ngei ka ngai a, chumi zawh lamah chuan ka hrilh ang che," ka ti ve ta a. Tlânchhiat ka tum bîk awzawng lo.

Inkuah reng chungin kan mu a, hremhmun tlâkpuina tham sual erawh kan ti miah lo. A va ho e...!

Chutia inrem leh induat ber niawma kan mut lai chuan current a rawn thim thut a, inverter kan direct loh avangin 'on' turin Zobiaka a tho chhuak a, vawilehkhatah  min rawn bawh rawk rawk a, a rûm nghut. 'Mai mai chuan le' tiin min pawt tho ve nghal a, "Apui, hlau hlek suh ang che, Lalnunhlu..ka ṭhian i ni lawm ni!" Vín fahrana a tih chuan thil awmzia ka man uar.

Inverter a la êng thei lo zui. 

"Apui, lokal rawh," tiin thim thamah kawngkhar lam min panpui a, boruak a reh duk. Ka thâ a khur dar dar a, Zobiaka kut nghet takin ka chelh rân bawk a, Phone flash light a on hnuah mikhual pindan lam panin min hruai phei ta a, vawikhat mah a ṭawng lo.

Thâwm danglam hriat tur a awm lo va, Zobiaka khumah a ṭhu a, a malchungah min ṭhut tîrin, "Hlau miah suh, min ti na thei lo a nia, a dik lo zawk an nih vangin an thlarau a châwl hahdam thei lo a nih ber kha," min thlamuan tum takin a ṭawng a, ka hlauhna pawh a kiang duak.

"Kan lakah eng nge an duh?" Ka lo ti a.

"Min thîk a niang," tiin a nui huk a, ka va awih lo tak.

"Mitthite hi an thih dan a pangngai loh chuan eng emaw neuh neuh sawi tur a awm ṭhin. An dam laia sawi zawh hman loh emaw tih hlawhtlin loh an neih te, siam ṭhat an duh ngawih ngawih thiltih tur an neih te hian an thlarau a châwl hahdam thei lo, tia an sawi ka hre tawh," A ti a. Ka hlauh phah leh deuh.

A chhan pawh Nunhlua khan ka lakah thiamthu sawi tur a ngah dawn êm asin. A nih loh pawhin eng emaw min hrilh a tum a ni ang, "Eng chen nge an hlimthlâ hian min la tihbuai ang le?" Tiin ka zawt ta tawp a.

"Ka hre lo le, naktuk hian thil pawimawh tak tih tur ka nei a, nang pawh Nunhlua te inah kal ang che, ka va dah dawn che nia," tih pahin ka chhipah a khabe a nghat vang vang a, "Eng thil nge i tih dawn?" tia ka zawh chuan, "Ka tih fel vek hunah ka hrilh ang che aw." Zawh nawn leh chi miah loh hian min chhâng daih.

Khawvar thlengin Zobiaka khumah ka mu ve ta a, vawikhat mah kan muhil lo. A khât tawkin min fâwp zeuh zeuh a, a aia thui pawh a kal chuang lo a, min fawh kâr lakah ngun taka thil ngaihtuah tih hriat deuhin a mûk viau zel. Kan ṭawng meuh lo a ni ber.

Ni e, an chawlh hahdam theih lohna chhan leh keini pahnih atana mi pawimawhte min tibuai tlat hi a chhan a awm ngei tur a ni. Hlau miah lova hmachhawn theih ka va châk si êm...

24-11-22 -B®®

B+>[BeckirafARenthleI]<+®®