10. A MAK! A Becky Rafa Renthlei Story

10.A MAK!

Ziaktu: Becky Rafa Renthlei
-B®®
Shadow of the life

[Recap]

"Ka pe lo phawt mai ang," tih leh off a rual a, ka va haw mai mai ve le. Ka call nawn leh ngat a, vawi thum zet ka call pawhin chhânna ka dawng lo.

A tawk. Ka call nawn tawh nguar ang.

Lungawi lo zetin Mizofed kawta Auto Rickshaw dinna lamah ka chhuk ta daih a, ka hmuah a ṭulna ka hre hrep lo e...

Kha nu kha atu a pawh lo ni se, ka lungawina turin Zobiakmuana a insawi fiah ve fê chu a ngai tawh ang...

&&&*

Titau chung hian kan in lamah ka lêt leh ta daih a, ka thin a rim lutuk, Fellowship ṭhulh ṭhakin ka chhuak ve a ni a, kohhranah inhmang vul chûk lo mah ila, inhmang lo hulhual ka ni bîk lo. Mamita ka awm lâi kha chuan Bial zaipawlah te ka tel ve a, Lungleiah erawh ka awm nghehna a la rei loh avangin ka tel tam lutuk lo.

Ka naute pahnihin Zobiaka chanchin min zawh pawhin chhânna mumal ka pe thei lo a, "Hmuak tura kal ve si, eng nge in awmzia?" tia Ṭanpuia'n min zawh pawhin ka nui lui ngial a, "An lo thleng har dawn si a, ka nghâk leh peih lo," tiin dâwt ka hrilh tawp.

"I va han ti ho e, ka lo hruai ta kher kher che a ni" a ti zui nang nang.

Zanriah kan eikhama an pahnihin inkhawm turin an chhuak a, hna thil tlêm khawih tur ka neih vangin ka kal ve ta lo, Zobiaka lam ngaihtuah duh lo luiin hna ka thawk malh malh a, ani pawhin min call-back lo a, a lo thleng tawh nge thleng lo pawh ka hre tawh bîk lo.

Beisei nei deuh beisei ngam chiah si lo leh alaka titau chungin ka meng kar a, a va hrehawm mai mai e. Ka lo duh tawh zia ka hrechiang telh telh; zankhuain min rawn be ta miah lo a, ka hriat loh laiin kei pawh ka lo muhil ve daih.

Ka harh ruala ka ngaihtuah hmasak ber pawh Zobiaka tho. Lungleiah a lo haw ta nge, eng nge a chanchin eng mah ka hre ta lo phawt chu a nia, biak hmasak tumna rilru ka pu tawh lo, eng ang pawhin duhin ngai mah ila, min tih dan a fair lo em mai.

Office ka thleng fel deuh chiah tihah Zobiaka hnen aṭangin call ka dawnga ka pick duh bîk ṭhak náng. Thawhṭanni a ni a, mood off nâk alaia vawi 16 zet min call meuh chuan phone ka switch off hmak a, ka luhlul a chhuak laklawh tawh.

Lunch break laiin kan puin min rawn ko teh tlat a, nizan lama ka hnathawhah sawisel a nei a nih ka ring deuh ringawt a, inthlahrung ru deuhin ka va lut ta a.

"Apui, chawhnu lam zawng leh naktuk nilêng chawlh i nei aw," tiin a nui sun sun a, a ngaihna ka hre lo hmêl a hmuh chuan thutak deuh zawk hian, "I nau Khawngaihsanga khan min rawn biaa inchhungte damlo buaipui ngai an awm thu leh tunlai chawlh i lâk zin avanga i inthlahrun thu a sawi a," a ti ta a.

"Mama'n a lo bia che a maw?" Ka lo ti sap a.

"Nia, min rawn bia a, inthlahrunna tur pakhat mah a awm lo a nia, dam leh thihah thu kan nei hleinem, i chawl dawn nia, i phone-ah a call tlang thei si lo chea min rawn bia a nih kha, rilru dam deuh khan awm rawh aw," a ti leh zung zung a, kei erawh ka bangbo ang reng.

Tu nge kan chhungte damlo buaipui ngai chutiang tumah hriat ka nei miah lo a, Zobiaka'n min rawn call zin êm avang khan phone ka switch off daih tak alawm maw le. Ka va â mai mai tak.

Hmanhmawh takin ka thil vel ka khâwm sawk sawk a, Auto châng turin ka chhuak ta a. Rei pawh ka la ding hman lo tihah Mama bike a rawn thleng zui zat a, thil awmzia ka zawh thui hmain bike-a chuang turin min hrilh a, ka chuang ve mai bawk.

Serkawn Hospital lam pana kan tlan chhoh tâkah chuan tunge damlo awm tiin ka zawt a, "Kan thlen hunah i hre mai ang, i phone a chhia nge biak tlang theih reng reng loh mai," a ti hluk. Ani leh ni lo angin a hmanhmawh hmel viau a, "Tunge damlo chu, ka nu te em ni, nge, Ṭanpuia?" Ka ti leh hmawk hmawk a.

"Kan thleng ṭep," ti chiahin min han chhâng a, ani pawh hi a luhlul ve nger ngur tho.

Hospital kan thleng a, Cabin lam panin hmanhmawh takin min kâi chho a, "Mama, Ṭanpuia a damlo em ni, sawi vat ta che maw le," ka ti vin hlar tawh.

Chutah, min en chuang lo hian, "I luhlul êma u Zobiaka damloh thu pawh i hre tawp nang," a ti ta a, mak ka va ti mai mai tak.

Nimin Sunday zingah khan lo haw thuai thuai a duh thu leh zan khat lek pawh Tlabungah riah a tum tawh lo tih a sawi a, min ngaih thu pawh a sawi ngei; mahse, a damloh thu a sawi lang miah lo a, engtin nge ka hriat rêng ang ni.

Cabin chhungah min hruai lut a, khuma Zobiaka muhil hmel ka hmuh chuan ka inthiam lo takzet. Thlakhat chuang min awm lohsana kan inhmu tawh lo kha a ni a, a chêr ve deuhin ka hria. Tui takin a muhila khum bula ṭhutnaah chuan hmeichhe pakhat a lo ṭhu bawka Mama nen min hmuh veleh, "Ka rin aiin in rei lo, a muhil ve deuh chiah," zawi sapin a ti a.

"Zawmi, hei hi ka û chu aw.." chuan "Mate, Zawmi a nih hi, ka sawi fo ṭhin kha," zak deuh niawm takin an tiah. Mama bialnu Zawmi lo ni lekin Zobiaka hnuaiah a thawk tih ka hria a, nimina Zobiaka phone lo chhângtu kha chu a ni lo tih pawh ka hre mai, an âw a inang lo hrim hrim.

"Mate, zanin chu i riahpui a ngai ang aw, nizan zankhuain Zawmi hi a awm tawh a, a chau ve ang," ka nauin a tih chuan Zawmi lam ka hawi a, ani pawhin min lo en ve kar, kei ai chuan a naupang tih a hriat a, a fel hmel ang reng.

"Engtin nge a awm a?" Tiin ka zawt a, khum bulah ka la ding reng.

"Tlabunga kan awm lai khan khawsik leh luak a nei zauh zauh a, in entîr tura kan nawr pawhin a duh lo zel a, nimin khan haw a tilui tlat a, kawnglakah kan rawn buai chho ta a lawm, u Zobiaka hi chu a buaithlak thei a nia, a luhlul si. Bâkah, dam ṭha lo chung chunga thui tak lirtheia chuan kha a ṭha lo," tiin khum lam a melh zauh a.

"Tlabung khua Sumo driver kan phur chho tel hlauha ani khan a rawn khalh chhâwk ta a nih kha, Sangpuii lah a rui kawng tluana a hneawm a nia, zu rim hrim hrim vang pawh khan ka pum a la let," ner nânga a tih chuan thil awmzia ka hrethiam mai. Nimina Zobiaka phone lo pick tu kha Sangpuii a tih hi a ni ngei ang.

Nurse a rawn lut a, Zobiaka puan sin rawn keuin a Venflon-ah damdawi a rawn thun a, 'eng damdawi nge?' tia ka lo zawh chuan "Luak danna a nih kha, dârkâr riat danah pêk a ngai a, a khawsik pawh a awm tawh lo a nia, hlauthawng suh u," dam diai hian a ti a.

Zawmi leh Mama nen kan pathumin kan awm ta rán a, Mama'n Ṭanpuia a call a, thil awmzia hrilhin, "Matei chu a riak dawn a, a inthlâkna tur lain ka lo haw zuai ang, ei rawngbawl i kutah a awm aw.." tiin a hrilh zung zung.

Khawngaihsanga leh ringawt ṭhin hi a, Zobiaka riahpui ka hreh tihna ni lovin inthlak tura haw phawt ka duh asin le, inbual tepawh ka duh a.

"Zawmi hi lo awm leh lawk se, inah min hawnpui la, inbual leh chaw eisain kan chho mai dawn alawm," ka la ti hrâm.

"Zawmi a chau tawh, bâkah i bialpa a nia ngaihsak ve deuh rawh," nui kur kur chunga a tih chuan ka nuih a za ve lo. Zawmi Zawmi ti reng ringawt mai, a ninawm.

"A nih chuan tunah haw thla rawh u, tiffin min rawn ken ula, Zawmi, eirawng bawl velah i lo pui thei ang em? Damdawi in chaw ei ringawt chu a hautak," tlângnêl takin ka ti ve ta a.

"Thei ang, nimin nilêngin motor ka chuang a, nizan ka mu ṭha bawk si lova chuvang a nia, naktukah ka lo chhâwk leh ang che, helaiah chhungte a nei si lo a.." a tih chuan, "Kan la sawi ṭha dawn nia haw phawt rawh u," tiin ka hrilh a.

Zobiaka erawh a la mutui hle a, pawn thleng ka naute ka thlah a, ka charger rawn keng turin ka hrilh bawk a, an tlan liam tâk kha.

Cabin chhunga ka luh leh hnuah ngawi rengin minute eng emaw zât ka ṭhu tawh a, Zobiaka phone a rawn ri a, ka la ang nge la lovang tih ka ngaihtuaha mahse, thil pawimawh a lo nih tâkah tiin ka pick sak a, 'Mami' tiin a lo saved a.

"Hello" ka tih chuan a reh deuh vang vang a, "Tunge ka biak aw.." a rawn ti a, a âw a dam thlap.

"Apuii ka nia, Zobiaka a muhil rih a..."

"E, Apui, nangmah maw, ka nau chu tunah eng nge a an? A ṭha em?" A rawn ti sawk sawk a. Zobiaka u Remruati Delhi ami kha a ni tih ka hre ve mai.

Ka thlenna a la rei loh thu leh ka riahpui tur thu te, a ngaihtuahawm lo tih ka hrilh a, "Kan lo chho thei rih si loa ka khawngaih ṭhin êm mai, hna a thawk rim lutuka thusawi a awih duh tlat ṭhin lo, lo hau ve teh, u Mam, tiin min ko mai rawh aw, nang chu ka hre tawh che," nelawm taka tiin a nui hak hak a, "Lo ngaihtuah reng reng suh aw, kan awma kan lo buaipui vek ang," ka lo ti ve a.

Rei vak lo kan inbiak leh hnuah "A harh hunah min lo hrilh dawn nia, kan ngaihtuah lutuk a" tiin kan inbiakna a titawp ta a.

Zobiaka nen an mizia a inpersan hmel ngei mai. Ani kha zawng a polite lawr lak. A biak a nuam bawk.

Dar li rîk hma deuhin Zobiaka a rawn harh a, "Apui" tia thawh chhuah a'n tum nghal ngawt a, "Nâ i nei em?" Ka lo ti vat.

"Nei lo e, lokal hnai teh.." tiin a saisir zawngin a mu a, ani leh ni lo angin a chauh hmel riau. Thuawih deuh hian ka va pan hnaia a chal leh nghawng vel ka dap nghal that that a; a pang a sa vur a, a khua a sik tih hrilh hranpa ka ngai lo. "Nurse kan ko lawk ang e," tih leh tlan chhuah ka rual a.

Nurse duty nen hmanhmawh takin kan lut a, a khawsik san lam a en a, a jection leh nghal bawk a, Bp a check zawh hnuah, "A bp hi a hniam lam hret a ni, thil eng emaw tal ei rawh se aw, a drip khai laiah Vitamin kan pawlh tho a, mahse, chaw tlem tal ei tîr i tum dawn nia," tiin min hrilh pah mawlh mawlh a, Zobiaka erawh a ngawi renga a maimitchhing leh daih tawh.

"Zobiak," tiin zawitein ka ko a, a rawn meng a, "Rei lote ka muhil leh lawk anga min hawnsan suh aw, ka meng thei ngang lo," a ti sup a, ka van khawngaih tak.

Nimina ka lungawi lohna leh ka thinrimna zawng zawng kha a reh vek. Min ngaih êm avangin damlo chung chungin a rawn haw a, helaiah chhungte leh ngaihsaktu tur a nei em em lo, Nunhlua nu leh pa te lah beisei ngam chi an ni dawn si lo a, a cousin Hmingsangi te khan a damloh thu an hria te a nih ngawt loh chuan a mal lutuk. Ka inthiam lo ru ngawih ngawih a, vawiina min lo call te khan lo chhâng ṭha hle hle tur ka ni asin le.

Mama lo thlen laiin ala muhil cheu a, chaw min rawn kensak bakah ka mamawh tur a kengkim viau. Zawmi erawh a lokal ve lo a, ka ei tur min siam hmasa phawt a ni awm e, nula fel tak chu a ni phawt ang.

"Mate, i lungawi lohna te dah ṭhain u Zobiaka hi enkawl rawh aw, a duhin a hmangaih êm che hi," Mama'n a ti a.

"A thi lovang tiraw?" Ka ti chhuak phawng.

"Pathian zarah eng êm ati nang, Lungleia rawn chhoh a duh luatah a thawkrima a taksain a tlin lo a nih hi, Zawmi pawh khan zan te hi a mu ngai mang lo a tia," tiin a ṭawng leh mawlh mawlh a, ka inthiam lo tulh tulh.

Mama awm chhungin Cabin bathroom-ah ka lu su lovin ka intleuh thuak thuak a, ka chaw ei pawh min nghâk vek a, Zobiaka ta tur a hranin an rawn dah bawk a, chu erawh a harh hun atan tiin ka dah ṭha ta rih a.

"Zanah eng emaw harsatna in neih chuan min lo call dawn nia, Zawmi a lo riak dawn," zak deuh niawm tak hian a ti a. "Riak mah se a pawi lo, mahse, fimkhur la mipa zawk i ni a, chêtsual kher te tum loh tur, i û hi entawn tlâk ka nih hi.." ka'n ti ve ngei a, "Ka hria, ka hria," a ti zung zung.

Zobiaka nen chiah kan awm leh ta a, nurse a rawn lût zeuh zeuh a, Zobiaka a ngaihsak hle. Kei erawh khum bula mipakhat mut theihna ang chi an húnah chuan ka bawkphek thlar a, Rinkimi nen kan intext char char.

"Apui...," Zobiaka'n min lo koh chuan rang takin ka tho nghal a, a drip khai lai a zawh tawh avangin ṭhut chhuah tumin a puansin a theh hlim a, "Eng nge tih i tum?" Tia ka zawh chuan, "Ka zung dawn maw le" a ti hniam ruih. "Ka lo hruai ang che," ka ti a.

"Ka kal thei alawm, hruai ka ngai lo," tih pahin a ding chhuak nghal a, a pai deuh khat a, rang takin ka lo vuan nghal. A lu a hai a nih ka ring.

"Ka kal thei," ti leh supin a pên a, a tluk palh tâkah tiin a kawr hnungah ka pawt a, "Ka ṭha, ka kal thei," a ti ve tlat.

Mahse, a thusawi zawm duh lovin Toilet kawngkhar thleng ka hruai a, kawngkhar bula ka din takah chuan, "I duh leh rawn lut la," tia nui suk chung hian a lut ta a, "Ka zui nghal loh che," nui chungin ka lo ti ve.

A khawsik pawh a ziaawm tawh a, chaw tlem tal ei tura ka tih pawhin a duh lo hlawm tawl. "Ka luak leh ang," tih ṭanin a ṭang a! A va buaithlak tak.

Ka nawr ngial hnuah tlem a ei ve a, Dîl Sangha chhum tui hâng erawh a hâwp ve nual.

"I damlo tih eng ati nge i sawi loh?" Khuma mut ṭhat tîr paha ka zawh chuan, "Min ngaihtuah dawn asin, chu lovah lo haw thuai thuai ka duh alawm," ngaihsam zetin a ti a.

Nimina hmuah ka tum thu leh a phone midangin an pick a, ka titaua ka haw leh daih tih ka sawi chuan, za vak lova nui chungin, "Liansangpuii a nih mai mai chu, a ninawm a nia, zu hi a duha pawisak a nei vak lo, ka phone a lo pick ve ringawt chu hau tur a nih chu," a ti a.

"A ho, a sawi pawh a hre tawh tawp nang, dam vat vat la, a ṭha a ni mai," ka ti sep a.

"Min riahpui char char chuan ka dam vat ang, tunah pawh ka ṭhat sâwt êm hi," tiin a phone lukham bula ka dah chu a ban a, "Mami nen in inbia elaw?" Tiin min zawt a.

Kan inbiak thu leh kan inbiak dan ka hrilh a, "Ka'n bia ang e, a lo hlauthawng leh chung ang," a sawi zawh rualin a û a call nghal a, an inbiak chhungin a thil eina vel ka lo sil fel thung a, "Apuii a awma min lo ngaihtuah suh, in lo chhoh tum hun pangngai sawn kher a ngai lo a nia," tia a sawi ri ka hriat chuan ka nui sak.

Ka intih fel hnua ka va chhuah chuan nin hmel zetin chunglam a melh a, "Naktukah chhuah dîl ila a ṭha ang, a ninawm si," a ti ta chiah.

"Chhuak lo e a, i dam ṭhat hma chu i awm reng ang, in lamah enkawltu i neih loh kha," ka ti a.

"I awm alawm, Mamitah ka hruai dawn che, ka hmuh phâk lova awm tîr che ka tum tawh miah lo a nia," a ti zawi ruih a, ka lam rawn hawiin, "Innei tawh mai ang, engmah nghah leh chuan tur kan nei lo, i nu leh pa ka biak ngei a ngai tawh a ni." A ti hmiah.

"I â siah, i duh duh sawi ringawt zel suh aw, a hmingin hna chhete ka nei vea Khawngaihsanga'n chawlh min dilsak lo phei se chuan ka awmpui thei dawn miah lo che a nia, Nunhlua vel vang khan ka châwl rei tawha ka tan a hrehawm," ka lo ti zawt zawt.

"Nunhlua sawi teivet suh ka ning, ani vanga chawlh i lâk theih tawh loh chuan i hna chhetê chu bansan ang che, ka châwm thei bawk che, i rethei lo ang," lungawi lo awkâ zeta tiin min en run a, damlo hmel pawh a pu hleinem le.

"Muhil rawh, i harh chuan inhnialna a tam," ka ti bak hlar.

"Kawngkhar va kalh la ka bulah lo mu rawh," a ti leh daih.

"Aih, a chi loh.."

"Ka bula i mut loh chuan zanin hian chhuah ka dil ang, ka thei lo emaw i ti ang e," vau titih hian a ti a, ka va ngei tak.

"I damlova i na chung pawh hian i luhlul êm êm reng ringawt, mu ṭha hle hle rawh," dam thlapa chhangin ka tho chhuak ta tho a, a bân veilam dahna khum sirah ka phone ka dah a, kawngkhar ka kalh zo ka lêt phei lehin ka phone a lo en mial mial.

"Khawi.." tia chhuhsak ka tum chuan a phal lo nasa! "I duh leh ka phone kha en mai rawh," an tiah. A dam ṭha tawh a nih hi, a chimawm leh tawh em mai.

"Nunhlua kha i hmangaih em?" tiin min zawt leh thut a, a hma pawhin min zawt tawh.

"A hun lai kha chuan hmangaih angin ka inhria a mahse, tunah chuan ka rilru put hmang ka hrethiam tawh lo," dik takin ka chhâng a, min en vang vang chung hian, "A nih leh pasala min nei tur khawpin min duh em?" A rawn ti leh a, tinge zawhna min zawh chhén mai le, a ninawm.

"Ka hre lo, dik tak chuan pasal neih châkna pakhat mah ka nei tawh lo," ka ti tawp, hnuailam ka bih nghal daih a, "Min duh ve em, min duhna chhetê tal i nei ve em?" A ti nawn sek.

"Duh lo che ila i bul hnaiah ka awm tawh lovang," pehhêl deuh taka ka tih chuan, "Min duh chuan a tawk, min la hmangaih thei thuai ang," inringtawk taka tiin phone chu ka kutah a rawn hmehbel a, "Nurse duty va bia la, zanin atan treatment lâk tur ka la nei em tih va zawt rawh, ka neih tawh loh chuan ka bulah i mu ang," a ti zung zung a.

Khum a chêp thu leh pahnih mut nan a zau tawk lo tih ka sawi a, "A ho em mai, a chêp poh leh kan inhnaih ting a ni mai, cabin-a awm man a nih hi," a ti leh tlat. Hepa hi chu a dangdai ve thlâwt. Han chhângin hnial ve zut zut ṭhin mah ila, a tawpah a thu ka awih leh duam zel. Hmm..ka va nêp si ve.

Nurse-in a rawn en a, zinglam dâr rukah injection a neih thu a sawi a, thil danglam a thleng a nih loh chuan zanin atan a tâwk tih a sawi bawk. Zobiaka a khi suk.

Chumi hnu chuan damdawi in khum zau fahran lovah chuan kan mu dun leh ta nge nge a, a Venflon vuah lohna lamin min kuah a, "Fâwp châk viau che mah ila zanin atan chuan ka insûm ang, muhil ang le," a ti dam thluam a, a pumah kuahin ka saisir zui nghal a, "Zingah ka tho hma ngai si lova kan mu dun lai an hmuh ka duh miah lo a nia; Alarm set ang," ka lo ti a.

"Ho lutuk, kawngkhar tichhe khawpa an lo sâwi a nih loh chuan ka harh hman daih ang," ngaihsam fe-a tiin a maimitchhing zui a, a khabe leh bek vela hmul rawn ṭo ṭan siar siar chu ka en a, a lan dan a dang daih.

Zobiakmuana ka hriat ṭhin kha a ang lo, Vai film a misualpa hmel a pû. Ka thil ngaihtuah avang chuan ka nui hak a, "Muhil rawh, chuti lo chu...organ kha.." tiin a'n sawi zawm duh lo ngei. Ka hrethiam vek.

"I over, muhil rawh.." ka lo ti a, "Ka nupui la ni mai tur bulah ka mu a, mipa ka'n che lo tur hi ka ui," nui nghawr dawt chunga a tih chuan ka run lutuk. "Nangmaha mut i duh niin ka hria," ti hmakin ka tho uaih a, rang tak hian, "Titau lo teh, thlêm tur chein thâ ka nei lo," nui chunga tiin min kuai mu leh ta a. Ka lungawi chawpchilh.

Hospital-ah ni thum lâi a awm hnuah a chhuak ve ta a, kan ina awm rih turin ka nauvin a sâwm naa, a duh ṭhak lo. A thlenna pangngai Tourist Lodge Zotlang lamah a chho ta zawk a, Hospital-ah kha chuan chhun lamah Zawmi a awm a, zan lamah kei ka riak thung. Kan inhau ngai lova kan nunah tibuaitu leh tihnawktu kan nei hran lo.

Liansangpuii pawh kha a kamkhat nghe nghe a, ṭúl ka va'n ti lo tak. Mahse, "Min hmuah ṭhulh ṭhak khawpa siamtu che a nia, a phû tâwk chiah," a ti hmiah.

Ka tel ve tawhnaah chuan a intatu êm êm zel a, ka nu leh pa zaninah an lo haw dawn tih ka hrilh chuan phur tak hian, "Ka lo lêng dawn nia, ka âiawh tur chhungte tirh leh kalpui tur tumah an awm lova hmaichhanah engkim ka hrilh ang," a ti leh tawp.

Krismas a hnai a, Mamit lama a haw hun tur kâr hnih chiahin a dang tawh a, huphurh taktêin ka huphurh. Nunhlua leh Ramdini tih velin buaina min thlen tawh lo a, a hna thil Lunglei lamah zawh loh tlêm an la neih vanga châm khawmuang mai mai a ni tawh.

"Apui, in in kawtah ka awm a nia," tiin min rawn call a, ka nu leh pa hmaichhana biak ṭâlh a duh vangin zanin hian a rawn kal ta chu a ni a. Engtin tak sawi ang maw.

"Rawn lut tawp rawh.." ka lo ti a. A inthlahrung ve deuh a ni mahna, a va inhmeh lo tak.

A hnu rei vak lovah a rawn lût ve mai bawk a, ka nu leh pa nen ka inhmelhriat tîr a, ka pain a en chîk khawp mai.

"Zu i in ngai em, Nunhlua ṭhianpa maw i nih a, engtin nge Apuii nen in inhriat?" Vawikhatah zawhna tam tak a zawt nghal a, Zobiaka pawhin thudik takin a chhâng ve zel.

"Nu leh pa i la nei em? Ûnau engzat nge in nih?" Eng kim hriat kilhkelh tumin a zawt zel a, ka va han ning mai mai e, ani lah chuan dam thlup hian ṭha takin a chhâng ve zel bawk a, a dawhthei phian.

"Kan fanu neih chhun a ni a, a kum tam lam thuah buaina kan nei lo va; mahse, chhungkaw bùl lutuk leh mahnia tâl ṭhang mipa kuta han dah chu a ṭha chiah lo deuhin ka hria, tin, Nunhlua kha kan ring em em a, hetiang rilru chhe lutuk hi Matei chungah a put kan beisei lo, hnathawh san leh hniam lamah chuan eng mah sawi buai theih kan nei lo a, huat thu lovah in inzuina a la rei lova chuti tut tuta hmanhmawh ṭulin ka hre lo," ka pain a tih chuan Zobiaka ka va melh a, a lungawi loh hmel kher mai. Ka ṭawng ve a mawi chiah si lo.

"Ka pu, inzui rei leh rei loh âi chuan a neitu tur te thinlung hi a pawimawh zawk," a lo ti ve khauh. "Nunhlua kha ka ṭhianpa chu a ni tehmeuh mai, ani nena tehkhin nih erawh ka duh lo hulhual," a ti leh hmuk.

Ka nu zawkin, "Eng pawh nise hun te han liam deuh se, Nunhlua nu leh pa hmai êng zahte pawh a na ve alawm, han inhrechiang ve deuh phawt rawh u, a ṭhianpa i lo ni leh zel nen nangmah kan huat vang che a ni miah lo a nia, " thiam takin a lo ti ve bawk. Ka nu leh pa hi chu engkimah an inthlâwp ṭha ziah.

Thil tam sawi tur a awm lo. Ka nu leh pa hian Zobiaka an pawm lutuk lo tih ka man thiam ve mai.

Rei pawh lêng lovin a haw ta vat a, Veranda thlenga thlah ka tum teh reng nen, ka pain, "Mate, Kawngkhar pêl lovin aw.." a ti kher a, ka pal lui ngam ta lo.

Zobiaka ka khawngaih. Mama leh Ṭanpuia an awm lo hlauh a, awm ve se chuan ka nu leh pa thusawi kha an pawm viauin ka ring lo. Remchângah ka la sawipui tho ang.

Nunhlua nupui ni êm lo mah ila, vantlâng hriata ka bialpa kumhlun a nih miau avangin a ṭhianpa nena lo 'in chu e kha' kha thil mawi tak chu a ni rih lo. Thlakhat a liam awrh chauh a, ka nu leh pa rilru tur dâwnin thil dik chu a ni ve tho.

Zobiaka'n min lo call a, a thlen tawh thu min rawn hrilh a, "Apui, mi â ka ni lo a, i nu leh pa thil sawi dan aṭang khan an mâkpa atan min awt chiah lo deuh chu a nih kha, chhungkua sawi tur ka nei lo hi ka thiam loh a ni lo aw, kan inkarah hian nangmah i pawimawh ber, kei chuan eng harsatna pawh tâwk dawn ila kalsan che hi ka tum lo, i nu leh pa rilru kha i hneh a ngai," duhthawh takin a rawn ṭawng a.

"Dik tak chuan a la rei lo lulai êm a ni, ka nu leh pa dem theih pawh an ni bik lo, kum thar lamah te sawi dun zawk ila," dam thliamin ka lo chhâng a, vin deuh hluk hian, "Nanga pawh chu.." a rawn ti a, a ngaihdan a nih loh hmel khawp mai.

"Chuti maia ngawiha bansan che ka tum lo aw, vawikhat dang i nu leh pa ka be leh dawn,'' tum ruh tih hriat takin a ti ram hmurh.

"I hahthlâk..." ka lo ti tawp.

Ani lah chuan awlsam fe hian, "Ka hahthlâk tulh tulh dawn, nang ka neih theihna tur che a nih chuan midang tan pawh ninawm khawpin chêt ka la ang, Chawngdingpuii nei tur hian hahthlâk ka hre ve lo e.." zu ti mauh a. Ka nui ru ver ver.

Eng nge? A nuam êm alawm mipa chhe lo leh class zetin min neih a tum bur a, ka intithei a ni. Nuam ka ti.

Nunphung pangngai kan zawh chho a, December ni 20 thleng office kal tur a ni a, ka kal leh ṭauh ṭauh tawh. Zobiaka kan inah a rawn lang ngai miah lova mahse, ka office kal tur kan in kâwiah min nghak ziah. A tîr chuan ṭha ka ti lo viaua ka nu leh pain an hriat chhuah ka hlauh vang a ni pakhat.

Engkim a chin chhuakin Mama ka sawipui a, "I huaisen ve deuh a ngai a nih kha, u Zobiaka aia hmangaiha duhtu che hi i tawng tawh lovang, a chhan chu mipa ka ni a, a khawsak phung engkim hre vek lo mah ila, ka man thiam thung, i inchhîr ngai lovang," tia min hrilh zân aṭang khan huaisenna ka neih phah, ka nu leh pain min khak lo mah se Zobiaka an ngaina lo tih an ṭawngkam meinei deuh deuh aṭangin ka hrethiam. Amah a lokal ngai lova alangah min khak lo mai chauh a ni. An duh loh chhan a ho si.

"Dingpui, inah i awm em?" Tia min lo betu chu ka rin loh lam daihin Nunhlua pa a ni a, phone-a kan vawikhat inbiakna a ni nghe nghe. Ina ka awm thu leh ka nu leh pa an awm tih ka sawi tel hrâm a, zan lamah lokal an tum thu a sawi. Eng thil tak ni ang maw?

Min biak zawh hnuin Zobiaka ka hrilh ve nghal a, "Thu pawimawh sawi tur an nei a nih dawn chu, engkim hriat tum vek ang che," a ti daih.

Zán a ni a, ka nu leh pa, kei leh Mama kan ṭhu ṭhap a, Nunhlua nu leh pa lokal tur thu ka sawi tawh vanga lo nghâk kan ni ber. Dâr 7 pelh hlekah an lo thleng a, ka pain ṭha tak hian a lo chhawn a, ka nu pawh chuti tho.

"Ropui, nangmah rawn biak che ka tum a, i number ka lo nei tlat tawh lo a, eng lo a nia," tiin a ṭhut dan a siam rem a, "Kan fapa boral chungchângah neuh neuh a tam hle a, Dingpuii nen an inkâr pawh hriat sa a ni. Ka fapa kan lo chhuan teh lul nen in fanu laka a chêt dan a tenawmin nangni a nu leh pa tan pawh paidam harsa tak tur a ni a, chuvangin, kan fapa âiawha ngaihdam dîl hi kan tih tur a ni," tiin bul a ṭan a, pi Lawmi a ngawi reng.

Ka pa ve thung chuan thinrim miah lovin, "Ê, kan zak a, kan rilru a hrehawm teh meuh mai; mahse, amah a awm tawh lo bawk a, thar thawh emaw a mualpho zawnga thil sawi hi kan duh miah lo a, Dingpuii tan a zahthlâk ang tho hian keini pawhin hawi ngaihna kan hre lo a ni ber. Eng pawh nise rilru dam tak khan awm ula, keini lam chu min lo vengthawng reng reng suh u," a ti thluam.

Pi Lawmi zawk a rawn ṭawng chhuak ve ta a, "Apui, ka fapa i ngaidam thei lo a nih pawhin ka dem lo che aw, a pawi ber zawk chu a nu leh pa hian thil kan lo hre lo lutuk hi a ni, Delhi-a an awm lai khan Ramdini leh Bawiha kha nupa ang deuhin an lo khawsa a, fâ pawh pakhat an nei, chu chu tunah hian Delhi-a an vai ṭhianpain a lo enkawl a, kum ruk a ni tawh," a'n ti chiah chu ka ṭhutna aṭangin ka tho chhuak zawk.

A mak ka tih êm avangin ka hawi â hu.

Keimah ang thovin ka chhungte pawhin mak an lo ti ve a, Court-ah dan ang thlapa nupa an nih tawh thu an sawi leh lek phei chuan ka chawmawlh vek. Thil mak lutuk hian min ṭhâwngin min dêng dawt dawt a ni ber.

Chu âia la mak chu Zobiaka ngei pawhin 'a hriatpui' tia an sawi hi a ni.

"Apui, Zobiaka nen ka hmuh dun hmasak ber ṭum che khan engkim ka hrechhuak vek tawh a, i tân mipa ṭha a ni lo, ka fapa dik lohna hliahkhuhtu mipa hian i taksa bâk a duh lo," pi Lawmi'n a ti leh bawrh bawrh a. Min hmusit hmel a pu bawk.

Mama a rawn ding chhuak hluai a, "Thu lawilo mai mai sawi turin kan inchhung hi vawikhat mah rawn rap tawh suh u, Nunhlua a thi tawh, Ramdini pawh a thi tawh bawk, ka û nen eng inzawmna mah an nei lova chuvangin kan ngaihdam in ngai lo ve," a ti ta khawl khawl mai.

"Khawngaihsang, khatiang kha aia upa te biak dan tur a ni em ni? I room-ah lut rawh," ka nuin a ti chang fak.

"A teuh lo, u Zobiaka hmer tel lo khan ngaihdam an dîl duh a nih chuan dîl rawh se, ka pawm, a ṭhianpa hliahkhuha a thlâ nen lama tibuaitu Nunhlua leh Ramdini hi Zobiaka tan ngaihdam an har zâwk ngawt ang," a ti leh a, hetiang êm êma ka nau thinrim hi ka la hmu ngai lo.

Ka nu leh pain kan unaua room-a insaseng tura min hrilh sek avangin kan kalsawn ta nge nge a, vawikhat mah ka ṭawng chhuak lo.

Zobiaka ka call nghal a, rang takin a rawn pick a, "In inbulah ka awm," a rawn ti thum dút.

"Lo awm rawh, ka rawn chhuak dawn," ka ti nghal a.

Hmanhmawh takin ka room aṭangin ka chhuak ta a, min lo en ṭhap.

"Ka hawi khawthawng lawk dawn," ka ti sap a, atu amahin min hnial lo. Bâkah ka thawmhnaw inbel dan aṭangin ka kal hlat an ring lo tepawh a ni mah na.

Zobiaka min lo nghahna hmun ka thleng a, Car kawngkhar min lo hawnsak thlap a, ka ṭhut fel hma hmain, "Nunhlua leh Ramdini kha nupa an ni tih i hresa em?" Tiin ka zawt nghal tawp.

"Apui..." a ti zuai ruih a.

"I hre sa nge hre sa lo," vin lutuka ka tih leh chuan, "Ka hre sa loa mahse, a phone ka check khan ka hria, i nat lutuk ka hlauh vangin ka sawi duh lo a nih kha.." a ti ta a.

Ka thinrim dan hi sawiin a siak lo.

"Zobiakmuan, eng anga tam hi nge ka lakah thup i la neih, sawi rawh, sawi vek rawh.." ka ti zui táwn táwn a, dam dup hian, "Kha bâk zêp dang ka nei tawh lo, min ring rawh," a ti a, "Rin che maw, ka ring chatuan lovang che, khatiang thu lian tham lutuk kha i zêp a, chuti chung chuan ring tur chein min la ti a nia, awi awi, zak rawh. Nunhlua nen inremsiamin kei hi min neih i tum em ni, sawi rawh," tiin a bânpuamah ka va chúm dawt a.

"Chutiang eng mah a awm lo, inbengdai la, sawi ṭha ang," thinrim miah lo hian a ti a, ka mittui a parawl ṭeuh.

"Ka ring leh tawh ngai chein ka ring lo, nangni ṭhian dun lak aṭang hian ka kut ka sil e," tih pahin a inrin hman hma chuan ka chhuak vut a, min ko lawm lawm chung pawhin ka hawikir tawh eih lo.

Chawngdingpuii'n a tawk ka tih chuan a tawk a ni mai.

Ka khumah ka bawk thlawp a, bum nih reng hi tu hmeichhiain nge hrethiam thei ang, ka ṭah erawh a chhuak lo chiang teh e.

Zobiaka nena kan inbiak pawh theihna tur zawng zawng ka titawp nghal vek a, ka nunah hmun chan tîr ka tum tawh lo. 'Nunhlua'n fapa a nei, kum ruk a ni tawh' chu thu chuan ka beng a luh ngut ngut a, Court-ah an la innei zui.

A der nuna nung reng chungin kei kha engtin nge min kawp theih zâwk.

A mak a ni, a mak! Damlai mihring, mi pangngai tân chuan thil tih chi a ni lo mai nilovin a nunrawn thlâk lutuk deuh a ni. Pakhat lahin a la zêp zui. An pawi eng eng ka sawi le?

A tûkah mit bûi chûkin ka tho a, "Mate, Zobiaka lamah i ṭang tawh lo ang chu tiraw, ka hmuh tirh phat aṭang khan ka mipa rin zâwng a ni lo rêng a ni." Tûkṭhuan kan kîl laiin ka pain a ti a, Mama a kham hmak.

"Khawngaihsang, ṭhu leh rawh.." ka pain a ti vin ṭhak a, Mama lah a duai bîk lo, "Ka chaw bâr a tawp, u Zobiaka lamah ka ṭang," a ti ngat.

Ka nu a thaw hawk.

"Zobiakmuana chungchâng leh a hming kan inchhungah a ri chhuak tawh tur a ni lo a, Nunhlua nu leh pa kan ngaidam fel tawh bawk, Apui, pasal neih i duh a nih chuan nangma duh zâwng thlang lovin, i nu leh pain kan thlang ang, ka thu tawp aw.." a ti ta rup mai le.

"Nunhlua leh a kaihnawih reng reng nen inhnimhnai ṭhak tawh suh ang che, kan hmangaih vang che a ni tih hria la, a nihna takah chuan mi pasal duh lai kawpa ngaizawngtu i ni, i hmingchhiatna a zau hmain Siaha lamah kan hnenah i awm ang a, i hna bansan ang che," a ti leh zel.

"Chu êm êm zawng ni lo e, ka hna ka chân duh lo, a bâk zawng chu inthu ka zawm ang," ka ti ve a, ka na ru ngawih ngawih.

Hemi tûk aṭang hian kan chhungkaw boruak a nuam lo ṭan a, ṭul fe-ah lo chuan kan inbe mang lo. Mama a lo haw lo zeuh zeuh a, office-ah riah a chîng ṭan a, ka thiam loh vek a ni bawk.

Zobiaka nen kan inbiak lohna pawh kâr khat lai a ni tawh a, a biak theih turin ka awm lo ti ila ka sawi sual lo ang. Office lamah min kal chilh loh vang a ni pakhat. Min lo kal chilh se chuan kan inhmu thei tho chuan ka ring.

A reh hian a reh vang vang a, ka nau pawh titipui theih turin a awm lo. Min hua emaw ka ti hial zawk.

Krismas thlen nan ni thum chiah a awm tawh a, kei pawh bazarah kalin ka inkhaibâwr viau. Chutih lai tak chuan ka bulah bike a rawn ding dat a, en lem lova kalsan ka tum chuan, "Mate, ka lo thlah ang che," tia min lo betu chu ka nau Khawngaihsanga a ni.

Mahni naute na na na chu keiin ka hua pawh a ni lo a, ka chuang ve mai bawk a.

Zawmi te inah min penkawi pui zuai a, "Thingpui in ve rih rawh u," a tih chuan Mama ka mitmei a, "In lawk ila a ni mai alawm," a ti ṭha mai.

Zawmi thingpui siam chhungin Rinkimi nen kan inbia a, kumthar an khuaa hmang turin min lo sawm leh ngat ngat tawh, Veranda thlang lamah dingin Zawmi te plant khawi ka en kual pah a, "Mate, a in theih a nia," tia min lo koh chuan kan inbiakna titawpin thingpui in turin ka lut a.

Paratha kan min lo chhawp tel a, pahnih lai ka ei tel bawk. A thingpui siam ka kham lo lam det a ni e.

Mahse, kâr lovah ka khaw hmuh a fiah lo a, ka mit sulh sulh a, ṭawng chhuah ka tum pawhin a sak ṭalh.

Eng thil nge ka chungah thleng ta? Chiang lo ruaiin Mama leh Zawmi ka hmu.

##

Ka dang a ro huam a, ka lû a rit churh bawk. Ka awmna lai en tumin ka hawi a, Car hnung seatah blanket sin chungin ka lo mu fel thân. Mak ka ti ngei mai.

Rang takin ka ṭhu chhuak a, Car lah chu a insâwi nawk nawk nimaiin ka hria, a khalh tu lam ka en vat a, eng nge ka hmuh hi!?

Zobiakmuana'n uluk fahranin car a lo khalh par par a, mak ka ti tulh tulh. Ka thawm hriain a rawn lehhawi a, "Rin aiin i harh har daih" a rawn ti a.

"Eng nge thil awmzia? Ding teh, ding vat rawh," ka ti nawk nawk a, ka lei a chhah mup a, ṭawng a va har e.

"Lungngai lo la, Mamit kan thleng ṭêp.." a'n ti chiah chu ka thlâwk lo chauh!

"Mamit a?" Ka lo ti vin vak.

"Aw, Mamit ni e, ka in, ka chênna hmunah Chawngdingpuii ka hruai dawn tih ka sawi lo em ni? Zobiakmuana hi min la hrechiang lo deuh chu a ni e," a ti hniam ruih.

"Ding mai rawh, ding la a ni mai, Chhekhir lutuk," ka ti táwn táwn a. Khua lah a thim nasa mai si.

Car a tiding dat a, "I zun a chhuak em ni?" a la ti zui.

"Ka haw duh  khawiah nge ka phone?" Ka ti chûl a.

"Haw lo e a, i nau phalna thlap, a remruatna thlapin helai hmunah hian i awm aw.. i nu leh pa ngaihah chuan pasal ûm i ni. Ka ru che a nih ber hi. I nuṭapa hriatpuinain ka ru che," ngeiawm lutuka tiin a khi suk.

"Tenawm lutuk.." ka ti sap.

Sawi ber tur pawh hre lovin ka ngawi vang vang a, Khawngaihsanga, ka nau ruahmannain maw Zobiaka hian min rûk!

Mahse, ka awih thlap.

A chhan chu ka nau leh Zawmi ka hmuh hnuhnun ber an ni tlat alawm.

Ka thingpui in turah mut duhna an pawlh tih hriat reng reng.

Ka nau ngei chu a ni si a, rilru nat luat vangin ka ṭap khur ngat ngat. Min thlêm lova a ṭawng hek lo.

Car a tih nuna a tlanchhuah leh pawhin ka ṭawng tawh miah lo a, ka nu leh pa rilru tur ka ngaihtuah ngam lo. Krismas ka hman ve dan tur chu leh...

'Khawngaihsang, eng thil nge i û chungah hian i tih tâk mai le" ka ti rilru vawng vawng..

Chawngdingpuii, nula virgin hian ka duh thlanna tel miah lovin pasal ka ûm a nih chu..!

291122 -B®®

B+>[BeckirafARenthleI]<+®®