10. KA CHANPUAL [A Becky Rafa Story]

10. KA CHAN PUAL

Ziaktu: Becky Rafa Renthlei

-B®®

(Recap)

"Mam, innu hi i ṭan ve sia e, a thinchhe bawrlawk ve e..." Thlamuana'n a tih lai takin, "Ehem" tia hrawk thian pahin ka lut lui ve ngat. 

An ngawi nghal hmak.

Kha kha a ni mai. Zomuanzuali hi ka chimawm thiam ve tho tih an unau hian hre rawh se...

Coffee chu an pahnihin ka pe a, an hamhaih deuh a ni ang, ṭawng nachang an hre lo.

An ṭawng kha ka hre hman nge hman lo an ngaihtuahte pawh a ni mahna.

&&&

Chutia an ṭawng laklawh laia ka va lût thut chu u Mapuia a hamhaih rei lo hlauh. "Coffee lam turin i rintlâk ve tawha a lawmawm hle mai," nui chungin a lo ti a. 

"Min tîr miau sia lawm, Coffee lei tur mai mai te chuan Hindi thiam thui vak a ngai lo aw," nui var var chungin ka'n ti ve ngei a. 

Thlamuana lam hawiin, "Thlate, Nanovi hi ka bulah mu se la, nang extra bed-ah khan mu ta la, vil run reng ka ngai lo a nia, mamawh ka neih pawhin ka ko harh mai dawn che u alawm," thu tak deuh zawka u Mapuia a ṭawng chuan khumah ka lawn a, "Keimah chauh pawhin ka riahpui thei tho che a nia," ka lo ti hrâm.

"Zomuan, sawi buai tur hi nei reng lo la, a naupang ber i ni a, rorêl zet zet loh tur," Thlamuana'n a ti chang fak. 

Kei lah inhnial peih at-in ka lo awm ve bawk nen, "Naupang ber ni mahila i û nupui ka ni tho tho," ka ti ve tlat a, an unau zinga upa ber nupui ka ni miau alawm. 

U Mapuia'n, "In pahnih hian insiam ṭhat inngai a nia, a dik lo zawk chu ka hau zêl ang che u, in pahnihah ṭan bik ka nei lo, pakhat ka nau, pakhat ka nupui, inhnial leh inngeih lo renga awm te hi hrehawm inti ve lo em ni?" thinrim ni miah si lova u Mapuia a ṭawng chuan ka ngawi reng a, zahawm ka ti thar hle. Thlamuana pawh ngaithei lo viau mahila ka pasal awm lai chuan insum ve deuh ka tum ta zawk a.

Thlamuana Coffee no kengin a chhuak zui daih a, a titau a ni ang. A rilru te hi a tê ve siah.

"Nano, Thlatea rilru hi a sual hran lo a nia, a naupang ber a nih angin hriatthiamna chin kan neih ve a ngai a, nang aiin upa mah se, puitlin lohna tam tak a la nei ve bawk a, nang pawhin en liam chin i neih ve a ngai, kei heti hi ka ni a, ka nu leh pain upat lam an pan ve zêl a, nakinah hrehawm i ti lutuk palh ang e," tia min hrilh chuan, "Awm lo tur ang mai hian ṭawng ṭhin suh, Pathian zarah eng êm i ti lo ang, Bawngkawna i inah khan kan awm daih dawn nia, upa ber i ni a, in dang mah la tumahin an dem lo ang che," tiin dam thlapin ka chhâng a.

"Zan khat mitchhin lo tâwk ta ila engtin nge i awm ang, dik takin min han chhâng teh?" Tia min zawh chuan, "A ho em mai chutiang, ka ngaihtuah thui peih lo," ka ti deuh tlat a, "Nano, mihring chin hriat a ni lo a nia, engtia awm nge i rilrûk, i nu leh pa in i chhuahsan tawh bawk si a," zawi ruiha a tih leh tâkah chuan ka ngâwi ta rauh rauh a.

Ni e, u Mapuia dinhmun hetiang hi a ni tih ka hriat zan aṭang khan ka rilru luah bertu a ni. Min dampui rei lo ta se, kei hi engtin nge ka awm ve tâk ang? U Ropuia kutah awm dawn ila in puiah a la chêng si a, keimahin in hrang chang dawn ila nau pawm chung leh thawh chhuah mumal nei lo hian khawiah mah in dan ngaihna a awm lo, u Mapuia hi boral ta se, an inah hian ka chêng zui zel thei ang em, a nu leh pa, Thlamuana te rilru a hriat veka eng lai mahin mo atan min pawm ngai hek lo, ngun lutuka ka ngaihtuah châng hi chuan ka thaw a ipik rêng a ni. 

"Nano, ka zawhna che chu.." tia min nawr tâk sekah chuan, a mitah pawh en ṭha ngam lo hian, "I awm loh chuan naute nen kan chhuak ang, u Atei leh Atuni bâkin min pawm ve si lo a, nang ber i awm loh chuan in inah ka chenzui ka ring lo," tiin ka rilru dik tak ka sawi chhuak ta a. Ka sawi zawng ringawt pawhin ka rilru a na sa.

Insût hraih chung hian, "Inneihna mumal pawh kan nei thei ta si lo a, ka man dawngtu tur takngial pawh an awm lo, chuvangin nangma kutah kei leh naute hi chu kan innghat a, ṭawngkaa ka hmangaih thu che sawi fo âi chuan hetia i kianga i natna te ṭawmpui tura awm hi i tana ka tih theih tawk a ni. Thiam ka nei tlem si, ka nêp ve bawk si a, nangmah enkawl tura hetia ka awm ve thei hi ka hmangaihna che tilangtu a ni," tiin mittui ka khapper sak a, hetiang lam sawi hi chuan ka ṭap dawn zel.

"Hey, ka lam lo hawi teh, ṭah i tum elaw?" Tiin rem lo zet hian min kuah a, a lam hawi turin ka insiamrem ve nghal a, "Ka dam emaw ka thi emaw, ka tana i inpekna leh i tawrhna te hi a thlawn dawn lo, in nufain hrehawm ka tawrh tîr hauh lo ang che u, ka hmangaih che," nghet charha tiin ka sam a chûl hliau hliau a, kei aiin kum tam fea upa a ni bawka a lakah hi chuan nautê ang chauh ka ni. Tin, engkimah ka thlamuanpui em em bawk.

"Kei pawhin ka hmangaih che, treatment la zo thuai thuai la, Mizorama haw tawh ka châk," tiin a khaberuh kual ka zut hauh hauh a, "Nangmah nen kan nih chuan khawi hmun pawh a nuam vek, ka lo rîm tirh lai che khan i la â ve si a, ka thin a rim lek lek zel," tiin thudangah a pakai ta a.

"Tinge khalai hunah khan min duh tlat le?" Kan ti ṭha leh vel a.

"Khalai hunah chauh nilovin tunah pawh ka la duh reng che alawm, i chhungte'n phal se chuan Biak in hawng ngeia neih che ka duh tehreng nen; engkim a harsa zo ta vek a nih hi," tihpahin a thaw huai a, nurse a rawn luh tâk avangin kan ngawi zui ta rih.

A Bp te an check leh rih a, eng mah insawiselna êm êm a nei lo bawk a, min chhuahsan leh ta thuai a, zan dar 11 a pêl tawha Thlamuana pawh a rawn lut ve leh ta bawka nichin âimah khan a hmel hmuh a hrehawm, a meng sen rûm a, zû a in leh pawh a ni maithei. 

Keini pahnih khuma mu chu min melh eih lo hian khum âwlah a lawn a, a phone phawrhin ear phone a vuah nghal hmak bawk a, u Mapuia pawhin a be lumlam hran lo.

Zing lam dâr hnihah zun chhuakin min tiharh a, damdawi in khum hi a sâng ṭhin si a, chêt vel a nuam viau lo. U Mapuia tui takin a muhil a, a thâwk dan pawh a pangngai viau chuan ka hria, tun nihnih khat chhung hian thawhah eng mah nei lovin a awm a, damdawi a thlah chuang lo bawka ka ngaih a ṭha thawkhat. 

Toilet lam panin ka phei chhat chhat a, Thlamuana a lo la meng kur, hna a lo thawk mawlh mawlh a, a lo haw lai khan a rui emaw ka ti kha a nia; mahse, Laptop inchhawpin tarmit vuah chung hian a lo type mial mial a, min en lo hrim hrim. Ka va be buai duh ta bîk lo a, ka zun zawh hnuah khum lam ka pan leh a, Thlamuana'n min lo be hmasa teh tlat, "Coffee ka in dawna i duh ve em?" Tiin.

"Duh lo mai, ka zung zing thei lutuka ka ning," ka lo ti ṭha ve mai a, "Rêk ping rawh," nui huk chunga tiin min kalpel a, eng emaw titaka min ṭawngkhum leh kha ka rindan a nia, ka ring sual lo e. Mahse, ka ngai haw hran lo.

Pathian zarah kan chhungkua hi kan hrisel phian a, Cancer tih vel kan hnaivaiah an awm ka hre lo. Chuvangin, ka bangbo leh zual a, tunah pawh hian u Mapuia enkawl chungchângah hian ka bil lutuk tlat. Mahse, Dr.Ibrahima hi a fel êm a, ka hriat duh ang ka zawh pawhin ṭha tein min hrilh fiah mai zel. 

Khawvar hma deuh hlek hian u Mapuia luak a chhuah tâk avangin min kai harh a, "Nurse va ko lawk mai ta che, ka luak a chhuak êm mai, i kal hlanin Thlatea nen Toilet-ah kan lo kal ang e," a ti a, Thlamuana khum lam ka va melh a, zangthal zawngin a mu a, a meng lo hrim hrim.

"Thlamuan, tho teh.." tiin ka sawi nawk nawk a, a rawn meng nghal a, "U Mapuia lo ngaihven la, nurse kan ko ang e," tih leh kalsawn ka rual a, Cabin-a awm te hi chu harsatna kan nei a nih lem loh chuan min rawn tlawh khât deuh a ni mai thei. Chemo nise drip khai ang satliah a nih loh avang leh tuna u Mapuia khai lai hi chu a far muang êm êm a, a block te a nih ngawt loh chuan a hranpaa vil chawt ngai ni in a lang lo. Bâkah, dârkar 24 chhung atan a ni a, an set fel vek te pawh a ni mahna. Ka hre ve sise lo.

Cabin-ah nurse pahnihin min zui lût a, u Mapuia te unau an lo indinchilh a.

Nurse pakhat zawk chuan u Mapuia te pahnih a melh tawn sek hnuah, "Luak danna hian ka jection anga eng mah hlauhthawn tur a ni lo aw," tiin, duty pakhat zawk a mitmei a, u Mapuia mutna bulah ka lo ding thung.

"Zomuan, ka mutnaah sawn va mu hahdam la, Mama hi chu ka lo awmpui mai ang, muthilh i tum dawn nia," tia Thlamuana'n min biak chuan, "Â, ka muhil tam tawh lutuk nangmah mu zawk rawh, i la mu ve miah lo a ni lawm ni?" Tiin ka lo hnial a, ngaihno bei vak lo hian, "Tlangval ṭhalai tan zankhat tlaivar te mai mai thil harsa a ni lo, naupai lai pawh ka nih siloh..." a ti nghut a.

U Mapuia zawkin, "Duatnu, thu-awih la va mu hahdam rawh le, engtin mah ka awm dawn hleinem," a lo tih si avangin extra bed-lam panin ka phei ve ta nge nge a, Thlamuana'n ka puansin tur a rawn keng phei a, khumah dahin, "Chhun lamah hna a kal ka ngai dawna mutna hun i nei vak lo ang, i duh chen chen tikhan mu hahdam rawh," a ti vei ngial a, Laptop vel a senghawi pah a, "Engtin emaw a awm chuan min kai tho vat rawh aw," ka lo ti a, a bu nghut ringawt.

Atuni nui hawk hawk riin min tiharh a, "Ka nuin min lo call a, Chemo khai hun chhung a rei dawn si a, Nanovi kha rawn haw rih se a ṭha ang, a ti a nih chu," tia u Mapuia a hrilh thawm ka hria a, harh tawh tho mahila ka muhil der rih.

"Haw lo e a, ka tel lovin a haw ka remti lo," u Mapuia'n a ti hmuk a, ka va lawm tak. 

"Atun, ka nu chu bia la, helam rawn ngaihtuah lo turin hrilh rawh," a ti leh a. Kei pawh ka ṭhu chhuak a, "I lo harh tawh elaw, intifai la, chaw ei rawh u aw, Mama pawh a zia êm hi.." Atuni'n a ti zung zung a, u Mapuia mutna lamah pheiin, "I ning tawh em, ka muthilh san daih che sia," ka ti a.

"Damna tur a nih te chuan kan mu ngat ngat mai a ni ang chu," tiin nui suk chung hian min chhang a, "Le, va intifai la inhnawhpuar ang aw, Thlatea pawh eng mah ei lovin a chhuak teh ngawt a," a ti zui leh a.

Chumi hnu chuan Atuni Tiffin lo ken chu kan nupain kan ei a, ka rin âi takin kan ei ṭha phian. 

A tawi zawngin. 

Tluang takin Chemo vawikhatna kan zo fel ta a, u Mapuia pawh a chau hran lo, an sum dinhmunin a zir bawk a, food Suplement ṭha ṭha Atuni'n a ngaihtuahsak zel thei a, a ei dan tur hunbi chat chatah keiin ka pe bawk a, rin aiin takin a zia phian.

Thlamuana a hna thilah Gujarat-ah a zin daih bawk si a, Atuni, kei leh u Mapuia kan awm a, ka nin ber leh a mi uap na ber a awm ta lo bawk a, nuam ka ti ve viau.

Chemo kan khâi zawh aṭanga kâr khat hnuah Atuni'n an company-ah min hruai ve a, nuam ka'n ti mai mai khawp a. 

U Mapuia nen kan intih thiam loh zana a pawisa min pek kha hemi ni hian Atuni'n ka Account-ah min deposit sak daih a, "Mama pek let a ngai lo, hmeichhia i ni a, mamawh te pawh i nei thei, indil reng te a hrehawm ve a, nakinah remchangah keiman ka u chu ka hrilh fiah dawn nia," a tih deuh tlat avangin ka sawi nawi ta lo. A dikna chen a awm ve bawk.

U Ropuia nen kan la inbe zeuh zeuh a, a thil rawn sawi chuan ka beng a verh zar mai. AuMami kha a chhûlah bâwk a awm leh a, a hmain vawikhat an zai tawh kha a ni a, hetia a awm nawn leh tâkah hian a kum a lo tam ve ṭan bawk nen; a chhul paih mai a ngai dawn niin an sawi a, rilru a ti hrehawm ve det. 

"Mate, i u Mami pawh a ṭap char char a, a khawngaihthlak khawp mai," tia u Ropuia'n min hrilh chuan ka ngaihtuahna a ti thui hle.

Zanah Atuni leh u Mapuia ka hrilh ve leh chhawng a, anni pawhin an khawngaih viau, "Nano, haw ta lem lo la, i u Mami hi chu a tluang lo ang, a rilru a chhe em mai," Atuni'n a ti leh tawp. Ani hi chu thu khuh thiam lo chi a ni ve a, anih ang angin a lang pawp zel tih ka hre ve tawha a thu sawi pawh ka ngai haw duh lem lo.

Delhi-ah Thlakhat kan cham tling ve ta a, a boruak pawh ngaiah ka nei ṭan der. 

Ka pum pawh a puar lian ve sawt tawh a, u Mapuia ngaihtuah rêng rênga hun hmang ka ni bawk a, in check up hun ka theihnghilh zauh zauh. Mahse, Atuni bawk a fel, min ngaihtuah êm êm a, Thlamuana nen kan inhmu khâtin a zin a lo haw hnu khan chhun lamah hnaah a kal a, zan lamah kan mut hnuah a lo haw chauh zel bawk a, mumala kan inbiak lohna chin ka hre tawh lo. Zingah kan thawh hmain a chhuak leh daih bawk si a, eng chu hria nimaw!

Chemo vawi hnih kan kháinaah erawh chuan Atuni nen kan awm dun a, u Mapuia pawh a felin hmuh a nuam sâwt viau, u Atei nen kan la inbe ve zel a, "Nano, in ngaihawm tawh em mai, kei aiin Atuni a fel ka tih kha aw.." tiin a rawn nui a, a sawi awmzia kan hre ve ve.

Zan khat chu khuma kan mut tawh hnuah ka pum a rawn che dat dat a, u Mapuia phei chu a muhil tui hle, a damdawi ei hian a hneh ve deuh a, a mu ṭha ṭhin khawp mai. 

Nau ka pai hnua ka vawikhat hriatna a nih vangin ka ṭhu chhuak hlawl. U Mapuia pawh ko harh chuang lo hian Atuni room-ah pum dawm chungin ka tlan phei a, a dan pangngaiin Beer a lo in leh tawh. Min hmuh chuan mak tih hmel takin, "Nâ i nei em ni?" A lo ti thuai a.

"Aih, teuh lo, en teh ka pum hi... a rawn che det det a," tiin nichina naute rawn chêtna lai kha ka dawm tir a, a che leh tawh rih bawk si lo.

"Nangnu hi chu aw..a ché ve bawk ang chu, a dam ṭha tihna a nih kha, doctor tepawhin an hrilh ve em em lo che mi?" Tiin a nui ṭhâ a.

"Hrilh lo a ni ang, hetiang lam hi engmah hriat ka nei lo, inchhiar zau tur pawhin u Mapuia hlirin ka rilru a luaha ka pâi ve mawp mawp a ni ber; ka nu leh auMami kha chu awm se..." ka tih mek laiin ka ṭawng sual tih ka inhriaa ka ngawi zui daih. Mahse, ka sawi tum a lo man thiam a ni ngei ang, "Keima thiam loh a ni, ka nu leh pate'n an ngaihsak lo che tih ka hria a, Atei nise a awmna a hla si, i bula awm ber hian duh aiin ka ngaihthah deuh che a ni," tiin min kuah a.

"I â lutuk, khatiang kha ka sawi tum a ni lo a nia, doctor pawhin min hrilh mai thei, an sawi zawng zawng ka hriatthiam ṭhin loh vang a ni pakhat a, inthiam lo duh reng reng suh aw, nangte chu hna nei i ni a, i buai ve êm hi," ka lo ti zung zung a.

Min la kuah reng chung hian, "Mama hlir i buaipui a, keini pawh kan ni ve tho, naute kan lo hrechang lo deuh atin ni, ultrasound tih leh hunah ka hruai dawn che nia," nui var var chunga tiin Beer a'n khiat leh keuh a. Duh ve malh malh tak a ni. Tu pawi erawh a sawi miah si lo.

"Nano, Beer i in ve elaw?" U Mapuia aw ka hriat rualin ka inher zawk a, kawngka biang nghenga dingin kan pahnihin min melh tawn sek.

"In lo ve, eng mah ka in lo," ka ti thuai thuai a.

"Tun ang hunah Atuni room-ah eng nge i tih si, dar zât khi en ta che," a ti deuh hmuk.

"Eng lo..." tia ka sawi zawm leh hmain, Atuni zawkin, "Nautê a chea min lo hrilh a nih hi, i muhil tui si a, a vawikhatna a nih vangin min rawn hrilh ve a," tiin min lo chhan khalh a, ner sawk chung hian, "A ni em? Thu dik a ni em?" Tih pahin min rawn pan hnai a, "A rawn che thut a, ka vawikhat hriatna a ni a, Atuni ka hrilh ve châk alawm," ka lo ti ve mai. 

"Lokal rawh a tlai tawh, Atun, nang pawh mu tawh rawh, Beer in hun pawh a ni tawh lo, Nanovi hi i lo pe ve ngawt ang e aw, ka remti miah lo a nia," ti leh hmuk hmukin ka bânah min chelh a, "Mama tak hi chu, engmah ka pe lo tih tih pawh a, min puh chhe viau zel suh," Atuni'n a tih mêk laiin min kal sawnpui daih.

Thlamuana a lo la haw lo cheu.

Khuma ka ṭhut hnuah, "Khawi maw i pum ka lo en," an tiah.

Thuawih deuhin ka kawr hâk lai ka hlim a, "In ṭawng kha ka lo hria alawm, keimah vangin i tâlbuai hah ve ṭhin si a. Naute, ânu hi ka duat a ngai a nih hi," ti supin ka pumah a fawp zeuh a, chutia a kun lai chuan a chhip sam tla kawlh ṭan chu ka hmu ta a, ka meng phâwk hlê. Tam phei chu a ni lo nain a Chemo khai hian a sam a titla kawlh ve dawn a ni ngei ang, amah ka hrilh ang nge hrilh lovang tih ka ngaihtuah laiin hrilh loh ṭha zawkin ka hre ta a.

"Mu dawn ang aw, a tlai tawh êm mai.." tih pahin a Sana bun lai a bih zauh a, keiin banga Sana intâr ka lo melh ve thung a, a tlai tawh viau.

"Tun lai Thlatea awm dan hi i lo chîk ve em? Inah a awm tlêm si a, ka hriat lohvin in lo inbakkaih leh tawh em ni?" Tiin, ṭawngkam pangngai tak hian min zâwt a.

Engmah inhauna kan neih loh thu leh kan inbiak ngai loh thu ṭha takin ka hrilh a, "A hna thilah a buai a niang ka lo ti ve tawp," ka tih chuan, "Highway chungchanga kan hna chu kan zo thawkhat tawh a, Gujarat-a a zin aṭang khan a zia hi a dang riau a," tihpahin min kuah a, ka lo kuah let vat.

"Ngaihtuah hah duh suh, tlangval a ni a, a bialnu nen an intithiam lo tepawh a ni ve mai thei asin, a nih loh pawhin keimah ang hian a bialnu a râi ve a niang a," nui kar kar chungin ka ti a, ka chalah min pen kawrhin, "Zomuanzual, râk loh loh hian râk ṭhin suh, eng emaw rilru hahna a nei a nih ka ring deuh alawm, remchangah ka la bia ang, hetiang hian a awm khât ve êm asin," ati ta a.

Nia, Lalthlamuana mizia dang ta lutuk hi kei pawhin ka hria; hundangah chuan min ti-elin min khak fak fak zel a, tun hnai aṭang khan inah hmuh tur awm lovin tukṭhuan leh zanriah kan rualin a kîl ve ngai ta lo. Biak turin a awm lo ti ila ka sawi sual awm lo ve. Kei phei chu min pehhêl char char nimaiin ka hria.

Kan mut a chhuak lo laklawh a, eng eng emaw sawiin kan meng reng a, "Ka natna avang leh naupai i nih vang hian ka'n insûm ve deuh a nia, zanin chu ka nupui i nihna lantîr a va hun ve," nui suk chunga tiin, ka hmai bul chêtah a rawn thaw lum ham ham a, thinrim chunga nupa nun min hmanpui bâk kha vawikhat mah khatiang lam hawi zawngin kan awm leh tawh lo. Treatment la lai a nih vangin tih enah kan en lo a ni ber. Mahse, zanin chu kan muhil lo laklawh a, nupa dik tak kan nihna nemnghehin a awm dawn ngei e.

A kut phah hlai ṭha tak leh lum thar thar chuan ka biangah dawmin a rawn kun hniam a, nui chung hian, "Keiman aw.." kan ti ve ngei a. 

Chutah, a taksa chungah ka pakai nalh a, nia, engkim huam leh kalsan nei chunga ka thlan, Lalrinkima hlimna tur a nih phawt chuan zak thei lo ni lovin zak lo thei leh mi tum ruh Zomuanzuali hi ka chêt a ngai miau alawm.

A hnu leh lama thil thleng chu ka sawi peih lo. A ho sihsah êm mai. Khum laizawl thil a ni.

Zinglam dar thumah lû su lovin ka intleuh zuai a, u Mapuia ka thawhsan khan a mu nghet tawh hle a, ani zawng dem theih a ni lo a, phût lêt neia chêtpui chi lah a ni hek lo. Hmangaihna nena ena dawhtheih hi a laka ka tih theih sang ber a ni. 

Bathroom aṭangin ka chhuak a, kan khum bula lo ding Thlamuana chuan ka pasal tui taka muhil chu ngun lutuk hian a lo thlir a, a chal leh biang a lo dek a, ka thawm a hriat veleh a rawn dâk chhuak a, a mitmeng thim leh thûk ruih chuan chiang takin min rawn en ta a.

Kei lah thawmhnaw mumal ka lo inbel hman si lo. Tun ang hunah ani hi ka beisei lo ve chiang êm a ni.

Ka mut kawr tawngchham zet inbelin kekawr ka la ha lova; a chhan pawh lotion inhnawih ka tum vang a ni a. 

Thlamuana mitin khawdang hawi lêk lova min melh lai chuan chêt sawn nachang hre lovin ka din ngaiin ka ding reng a, ani tan pawh a hrilhhai thlâk ve tho ang. Ṭawng nachang hre lova kan inmelh reng lai chuan u Mapuia a rawn inlet thawk a, a harh emaw ka ti hman. Mahse, che zui lova a muthilh leh takah chuan Thlamuana zawk a chesawn ta a. Ṭawngkam khat mah chhâk chhuak lo mah se, a nuam lo hi a ni tawp mai; ka chhîp aṭanga ke hmawr thlengin hmaih nei miah lo hian min en chhuak dap nimaiin ka hria.

Kei hi ka â a nih loh pawhin, âtna thlarau sual ka dawng a ni chiang mai. Thlamuana chhuah hnuah pawh chêtsawn nachang hre lovin ka la ding reng a, a mak a ni. Ka mâwl huih mai.

Ka pasal kiangah ka mu a, a hmel dam thlap chu thlir reng mah ila; nichina Thlamuana mitmenga tawrhna leh natna niawm tak lo lang kha ka mitthlâah zuk châm tlat a.

Ani khan harsatna a tâwk em ni ang? Khatiang ang hmelpu khan ka hmu ngai lo a, mipa chapo leh induh tawk tak a ni a, nichina a landan erawh tihnat awl tak tur mipa angin ka hmu. Â, ka ngaituah buai peih lo.

Ka harh leh hnuah pawh u Mapuia a la tho chhuak lo teh tlat a, tûk dangah chuan min thawhkhalhin a theih ang tawk tawk hian exer a la ve ṭhin a, tukin erawh chu min kuah chungin a la mu ve mial.

Nui suk suk chung hian, "I mutui bawk a ni ang, kan nautê pawhin a tlawh harh zo lo che a nia," tiin ka mut kawr chhanah ka pum a chul a, ka pum dinglamah a rawn puar deuh zawt zawt lehnghal. Phur zet hian, "Duatnu, i lo hria em, ka ṭawng a hre thei chiang mai," tihpahin ka pum a zût kuala ka lo nui var var.

"Tukin chu ultrasound ti turin kal ang aw, vawikhat mah ka la hruai ve lo che a," tiin phur zet hian a ṭawng a.

"I peih phawt chuan kan kal dawn nia, kan pan ṭhin doctor number kha ka nei alawm," ka lo ti a.

"Nano, duatnu..." ti supin ka chalah a rawn fawp a, "Hey, tho la intifai rawh, damdawi ei i ngaih kha," tiin a âwmah ka lo nam dat a, "Ka damdawi chak ber i nih hi.." tiin ka puansin lai min thehsawn sak a, a lama min kuah hnai chung hian, "Nizanah khan Nanovi nilovin Zomuanzuali dik tak, mahni inringtawk tak ka hmu," tiin a khi suk a, "Ngawi mai mai rawh, sawi nawn tawh miah suh," ka ti a, za lutuk tih hriat tak hian a nui kur kur a, ka thawhsan daih.

"Lokal rih teh..." tia min kohna haiderin choka lamah ka chhuak phei ta a.

Ṭhutkhawmna pindan Sofa-ah Thlamuana a lo mu a, Atuni a la tho lo a nih ka ring. 

Puan pawh sin lo leh kawr pawh ha lovin Boxer nen a mu kûng a, a hnungzâng sei thlurh leh a ban bul sek ṭâlh te chu ka hmu kim vek. Whisky bottle a inchhawp a, shot glass pakhat a awm bal bawk.  

A bawkkhup zawnga mu a nih vangin ka thlir reng a, eng vanga hetia awm tlat hi nge a nih ang, tu khawkha hriat chi va ni suh.

U Mapuia'n min lo koh tâk avangin filter-a tui dawhin kan room lamah ka lêt phei leh ta a, zing dâr sarihah u Mapuia hian ngei ngeia ei tur damdawi a neih vangin kan tho tlai ngai vak tawh lo.

Khumah a lo ṭhu a, damdawi tam tham zet inchhawpin, "Nizana ka sen ral zat cover a ngai aw.." tia nui sâng chung hian damdawi chu a ei a, a taksa chêr deuh mah se, a hlim hmel hian min ti nui leh ṭhin.

"Ei mai mai rawh, nizan lam thil kha chu theihnghilh tawh la," tiin thawmhnaw pangngai ka inbel mawlh mawlh a.

"Thlatea a awm em?" Tiin min zawt thut a, a la mut thu ka hrilh a, "Atuni kai tho la, ei rawngbawl rawh se, ultrasound ti turin i kal teh ang," a ti leh ta tu tu e.

"Chhunah kal zawk ila" ka ti ve bawk a, "Tunah kal ang, insiam vak a ngai lo," ngaihsam zetin a ti liam puat a, eng tak chu hria ni maw. Tukin hi a harhvangin tukdang zawng aiin a tho dam tlat.

Insiam peih apin room kan chhuahsan a, Atuni pawh kai thovin kan chhuak dawn tih ka hrilh a. A tho ve nghal maiin ka ring.

"Thlate, Nanovi nen kan chhuak dawn a, vawiin chu lo haw hma i tum dawn nia inbiak kan ngai," Tiin, Thlamuana mutna bulah u Mapuia a ding a, a nau lah a che duh dêr lo.

"A muhil rih a nih kha, inbiakna khua a tlai hleinem kal phawt ang," tihpahin a bânah ka vuan a, "Tunlai a awm dan hi a ṭha lo, en ta che, zu ûm nen a mut leh tawh hi, ka nau hi ka hrechianga hetianga awm tîrtu leh a awmna chhan hi hriat chhuah ngei ka tum," ti nghutin min kalsawn pui ta a.

A hmel ka en a, lungawi lo hmêl a pu. Mahse, eng mah sawipui ka tum lo, a nau chungchâng bîkah hi chuan.

Ultrasound kan tih laiin u Mapuia a phur hle a, zawhna lah a ngah si. Ka doctor nen nui hawk hawkin an infiam a, mipa nge hmeichhia tih erawh hriat lâwk tumna kan nei lo. Him dam taka naute a awm hian kan ngaih a ṭha tâwk tiin doctor a hrilh hmiah.

A chemo khai hun a hnai leh tawh a, pawnlamah breakfast ei a rawt deuh tlat bawk nen ka hnial duh ta lo. 

Thil pakhat chiang taka ka hriat chhuah tâk chu, khum laizawla nupa kan hlim hian engkimah kan nun a zangkhaiin kan inrem hma bîk tih hi a ni. 

Thawmhhnaw hâk tur ka nei lo a ti deuh nge a thar pathum min thlansak ve ngei a, "I thinrim laia pawisa min pek kha ka account-ah kan dah vek, Atuni'n min dah sak a," tia ka hrilh chuan, "A ṭhat chu, tikhan awm sela a ṭul hun atana i hman tur a ni mai, sawi chhuah awih tawh loh aw," a lo ti fel thân.

Khua a lum chho ta bawk a, Taxi-in kan in luah lam panin kan haw leh ta a, tukin zing zet zawng, u Mapuia hnen ka thlen tirh aṭanga ka hlim ve ber ṭum a ni hial ang. Ka chhungte'n min tuithlâr tih pawh ka hrechang tawh meuh lo a, ka kianga ding mipa inringtawk tak hi Cancer natna avanga kan enkawl lai a ni tih pawh ka theihnghilh lo chauh maw le.

Inkai rialin inchhungah kan lut ta a. Mahse, eng nge kan hmuh hi...

Sofa-ah Thlamuana leh hmeichhe pakhat ka la hmuh ngai miah loh an lo infawp ngawr ngawr a, kan kalsan lai kha chuan a muhil ngei khan ka hria a, engtik laiin nge henu hi a lo luh hman? A hmel chiang takin hmu lo mahila; a pian hmangah a chhiat loh hmel.

U Mapuia a khuh kharh a, Thlamuana te pahnih an inṭhen phawk. 

Harhfîm lo tih hriat ngawih ngawih hian Thlamuana a meng phi chiai a, a hmeichhia pawh chuti tho.

"Mama, kan laklawh, room-ah lut rawh u," inthlahrunna nei map lo hian Thlamuana a ṭawng a, hmeichhia zawk chu insiam ṭhain min rawn melh zawk a, a hmelṭha thlâwt.

"Nano...room ah phei ang," tia ka pasalin min biak chuan ka phu zuk a, Thlamuana te pahnih melh zeuh chung hian u Mapuia ka zui ve ta a.

Mak deuhin engtin emawni ka awm. Thlamuana mitmeng dul ruiha hlim lohna lo lang kha ka chhiar thiamin ka hmu thiam ve tlat.

Khatianga hmeichhia a lo awmpui khan min ṭhâwng lutuk nge, ka dik lo vekin ka hria. Inthing nak chung hian kan room-ah ka pen lut ve ta a.

100123

-B®®

Shadow of the life

B+>[BeckirafARenthleI]<+®®