12.KA CHANPUAL [A Becky Rafa Story]

12. KA CHAN PUAL

Ziaktu: Becky Rafa Renthlei

-B®®

(Recap)

Ni e, a tîra ka hlauhthawn ang aiin ka hmu ṭha a, ka thaw huai huai. Ka ke a vûng ṭan a, a kham leh ut ut tawh. Mahse, kei aia ngaihtuahawm leh ka innghahna mipa damdawi in khuma mu bal chu ka en vawng vawng a, a hmel ka hmu chul rap mai. Ka ngaihbel nge a vun te pawh ka hmu dâng deuhin ka hria.

Mihring kan nih chhungin kan la heti zel dawn chu a ni si a, dam ṭha emaw kan intih laiin kan thih hun nitin kan hnaih si. 

Chuvangin, Thlamuana nen pawh inrem taka awm hrâm hrâm ka duh tawh. Vawiin anga a fel zel phei chuan ka la ngaina thuaiin a nia ka rin ni.

Unau anga inngainat ka duh.

&&&

Zân dâr 11 a hnai kuar tawh a, zanriah pawh kan bâr ve luklak kha a ni a. Kei phei chuan tih tham ka ei lo, Atuni pawhin Beer a in lo teh tlat nia! A û vang te pawh a ni mahna. U Atei nen kan inbia a, u Mapuia a rawn ngaihtuah hle a, "Naupangho hi ka nu te kutah ka dah ang a, ka lo chhuk ve dawn em maw ni," a ti hial.

Mahse, chu êm zawng a ngai lo turah ngaiin ka hnial ta rih a.

U Mapuia a la harh ta lo fo a. Thisen an pêk tur zât bithliah a zo tawh a, drip leh Vitamin lam a kal reng thung a, a Bp pawh a zia ṭan viau tih nurse in a sawi. Oxygen an la pe reng bawk a, tui taka muhil a ang ber ka ti. Khum chuangah mu hahdam turin Atuni'n min ti nain ka ṭang ve tlat a, Thlamuana leh doctor an inbe mêk a, a la rawn lêt phei lo thung. Atuni nen chiah kan awm a, phone a hman reng avangin kan inbe hman meuh lo a ni ber e.

U Ropuia chanchin hrilh ve hrâm ka duh avangin tlai tawh deuh mah se, ka call ta tho a.

"Mate, Mapuia a ṭha lo deuh em ni?" Tiin min rawn zâwt chat a, ani pawh mi â ni hek lo, tun ang hunah ka bia a nih chuan a pawimawh hle tih a man thiam mai. Damdawi ina kan awm thu ka hrilh a, "I naupai khan a tuar thei tih hria la intih hahdam hrâm tum rawh aw, ka nuin i chanchin min zawt ve teh mial a, ka hriat loh thuin ka chhâng," a'n ti ve ngei a.

Ka nu chuan a rukin min lo ngaihven viau nge, ka chanchin hriat a tum ve hrim hrim hriat va ni suh.

AuMami chanchin ka zawt a, thla hnih hnuah a fit ṭhat chuan Serkawn Hospital-ah a chhûl an paihsak dawn tih a rawn sawi a, ka chhungril takin ka lainat. Nula hmelchhia pawh ni lo, fing var ve tâwk tak kha a ni a, mahni rila-rah fâ nei thei lova a han awm tur chu ka lainat lo thei lo.

"Mate, pawisa lamah harsatna te i nei em?" Tia min zawh chuan, "Pawisa hmanna tur êm êm ka nei hleinem, u Mapuia naute hi an fel a, ka mamawh min ngaihtuah sak vek," ka ti ṭha mai a, "Thlamuana eng nge a an? I lakah a la sual em?" Tiin min zawt leh a, min ngaihtuah hle tih ka hriat vangin fimkhur tak leh ṭawng sual hlau ru takin, "Ani pawh a fel, vawiinah ka insúk âi turte min suksak vek a, chhuat a nawt vek bawk," ka lo ti a. Nui hawk hawk chung hian, "Dâwt min hrilh ngai loh avangin ka awih mai ang e," a ti a, a awih ngam chiah lo tepawh a ni mahna.

"Awih hmak rawh, dâwt ka sawi miah lo a nia, auMami chanchin a chhia a ṭha min lo hrilh ve zêl dawn nia," tiin kan inbiakna ka titawp ta rih a. Ka nuṭa neihchhun hi ka tân a hlu êm a, a thu awiha zah hliah hliah tur ka ni.

Khum âwlah ka ṭhu a, ka ke a vung pum âl a, a na miah lo nain a rit churh. 

U Mapuia pain min rawn be ve teh tlat a; mahse, ka phone-ah ni lovin Atuni phone aṭang zawkin a ni a, "Zomuan, i hriselna te a ṭha em?" A rawn ti a, ka ṭhat thu ka hrilh a, "Ṭhenawm leh mi hrang hrang hian inchungchâng an sawi nasa a, kohhran lamah thunun tîr tur che-u-in min ti bawk a, eng nge i ngaihdan?" Tiin min zawt ta a.

"In tih dan dan a ni mai," ka ti ringawt.

"Nia, ka fapa dinhmun khati kha a ni a, helamah in awm lo bawk a, inthunun nan khua a la tlai hleinem tiraw, tikhan awm naw naw rih mai teh u, mi thusawi zawng zawng zawm pawh a ṭha ber lo a nia," a ti leh lawi si.

"Nia, a nih tur ang kan ni zo tawh a, amah han dam ṭha deuh se la.." ka lo ti ve mai.

"Ka fapa enkawl tura kal i nih angin a tân i theihtawp chhuah ang che aw, invanduai a nih ber hi," a ti teh tawp a, sawi belh tur a vang ṭhin.

"Atuni ka lo be leh lawk ang e," a tih tâk avangin, "A be leh duh che," tiin Atuni kutah phone ka pe a. 

Kohhran thununna lam ka lo ngaihtuah pha lo rêng rêng. Nia, Mizote hi chu insawi neuh neuh peih tak tak kan tam a, pu Zoliana te nupa pawh kohhran leh khawtlânga mi langsar an nihnaah sawi tam tak a awm teh meuh ang. 

Amaherawhchu, u Mapuia hetiang dinhmuna a awm laia lo thunun leh rih kha a ṭul berin a lang lo. A mualphothlâk tam mai mai ka ti ve deuh, nakinah kan dam anga hun a la awm turah ngai ang.

Khuma mu ka pasal ka en a, kan hun liam tawh zawng zawng ka chhui kîr zut zut a, Lungleia a lo awm lai te, kan ina a lo len ṭhin laite leh u Kimtei te ina kan inhmuh ṭum te mitthlâah a lang iar iar a, tleirawl ka nih laia thlah miah lova min vuan tlattu a nihna te hi ka tana a hlutna tizualtu a ni. Cancer natna vanga hetia a'n awm ta mai hi chu lungawi a har ve thlâwt a ni e.

Drip kal lai pakhat a zawh rualin Thlamuana a rawn lut a, thisen a pek hnu aṭang khan mumalin kan la inbe lova; a u mutna khum bulah dingin ngawireng hian a en vung vung a, chutah min rawn en leh a, "Khawvar hma chuan a harhin ka ring lo, mutsan la ka lo vil ang e, Atuni pawh haw phei sela heta kan awm vek chuan in lam a ngaihtuahawm," a ti a, dik tak chuan mut hahdam ka châk ve ngawih ngawih a, ka hnungzâng a kham bawk si, Thlamuana a men tlang theih dawn tho chuan tiin mut mai ka tum ta a.

"Atun, inah haw phei la, zanin chu Nanovi nen kan lo awm ang a, chhun lamah i chawl thei a nih leh min rawn thlâk dawn nia," a ti leh zung zung a, a duh hi chuan a felin a puitling maw le. Mahse, a rui nawi ve thei êm a ni.

Atuni ka bulah a rawn kal a, "Mamawh i neih chuan min lo hrilh mai dawn nia, ehe! I ke kha a va vûng nasa em em ve," tiin ka ke a en a, a ni lah taka nichin ai pawh khan a vung nasa tawh zawk.

"Naupai laite chuan tihian a vûng ṭhin alawm," tiin satliah zet hian ka lo chhâng a, Thlamuana'n, "Mu phawt mai teh, awm hahdam i ngai a nih kha," a ti ve ngial a, ka nui tawp. 

Atuni pawh Thlamuana thu angin a haw ta rih a, kei pawh thuawih deuh hian ka mu a, kâr lovah mut chhuakin min zem ta chiai chiai a.

Naute pawm chung hian Veranda-ah ka lo ding a, u Mapuia pawh a hna aṭangin a rawn bâng chiah a, kan awmna lam pana a lokal lai takin Car chak zet hi a rawn tlan a, u Mapuia lokal phei mêk chu a su lêng ta lawp a, "U Mapui" tia kovin ka lo ṭê ṭhat. 

Thisenin a hmai a bual vek a, che map lova a mu chu ṭap chung hian ka ko vak vak a, chhângtu an awm lo. Ṭanpuitu tur zawnga ka hawikual ruai lai chuan ka naute pawm chu mipakhat hian min chhuhsak tumin a rawn pawt sawk a, a tlanpui ta daih a, "U Mapui, tho rawh kan naute an ru a nia," tiin ka pasal leia let reng chu ka sawi nawk nawk a, chutia mangang taka ka awm lai chuan, "Nano, Novi," tia min ko ri ka hria a, muangchângin ka dâk chhuak ta a.

Hlauhthawnnaa khat mitmeng hian Thlamuana'n min lo en a, "I ṭha em, i harh em," tih pahin ka chal leh biang a tawk a, "I khua asik a nih hi, doctor kan ko ang e, i mumangah eng nge i hmuh a?" a tih chuan ka harh chiang kher mai.

Thlamuana pawh chhâng ta lo chuan, banga Sana intâr ka en daih a, zinglam dar thum a lo ri tawh, vawt ka tih êm avangin ka puansin pantê chu ka nghâwng thlengin ka pawt chho a, ka mutna piaha u Mapuia mu ka hmuh chuan ka harh chiang ta vâk mai. 

Oxygen híp tawh lovin an lo phawisak diam tawh a, a hmel hmu chiang turin saisir zawngin ka mu ta a, nichina ka thil tawn kha ka mumang a ni tih ka hre chawpchilh nghal. Mak ka ti hle bawk, ka naute pawm kha mipa nge a nih hmeichhia ka hre miah lo lehnghal, rang takin ka pum ka dap vat a, a la puar reng.

Thlamuana leh hmeichhe pakhat an rawn inzui lut a, chu nu chu ka vawikhat hmuhna. 

Hindi hian rang takin a ṭawng zung zung a, Thlamuana'n a lo chhâng ve bawk a, amik amak ka hre der si lo. Chu nu chuan Stethoscope hmangin ka pum a ngaithla vang vang a, ka kawr chhanah ka pum a dap dan dan a, chumi zawhah eng emaw Thlamuana a hrilh leh hnuin, nui sâng chung hian a chhuak ta a.

"Indim i ngai takzet a nia, thu awih hram rawh, Mama nen inpahniha indamloh chuan a buaithlâk dawn teh mai a nia, nakinah nurse-in i Bp a lo check leh ang aw, i damdawi ei tur ka va lam lawk ang e," dam thluam hian a ti a, a meng dul ruih bawk.

"Ka ṭha reng alawm, ka pang a lum mai mai a nih hi," ka lo ti sap a.

"I khua asik ve hlek a, Mama awmpui ve i duh chuan ka thu awih ang che, damdawi chu ka va lam lawk ang e," tih leh chhuah a rual a, ka chhânna pawh a ngaichâng tawh lo. 

Nimin aṭang khan a zia a inthlâk hlawk a, min ngaituah ta viau bawk si a, a ngaihna ka hre lo, thlarau ṭha mi a dawng ve mial a ni ang. A nih loh pawhin a inhmuchhuak thar te pawh a ni mahna. Ka thil ngaihtuah avang chuan ka nui ta hak a.

A sawi ang tak takin nurse pakhat a rawn lut a, ka Bp a check a, a lo hniam ve det. Mahse, hniam chhia a ni hran lova u Mapuia Bp pawh an check ve nghal a, "A harh ṭep tawh ang, damdawi dang pêk a hun dawn a," tiin a Heart-rate a en leh a, an ngaih a ṭhat hmel viau. 

Thermo-Flash khai chungin Thlamuana a rawn lut leh ta a, Paper bag a la khai tel cheu.

Khum thawhsana ka lo ding a hmuh chuan a ner nawk a, "Khumah sawn i mu mai mai thei lo em ni, i luhlul lutuk hi chu aw, engtia han tih chi nge maw i nih le, Mama tan hian i hahthlak ve ṭhin ngawt ang," a ti hluk hluk a.

"En teh, ka zun a chhuak a, khuma mu chungin ka zung dawn tihna mi, i â siah.." ka lo ti ve thung.

"Ka awih sêng mai mai lo e a, i zun a chhuak tak tak lovang," a'n tiah.

"Nupui i neih ve hunah i la hrethiam mai ang, rai lai chuan zun a chhuak zing lutuka a châng phei chuan ka muhil ṭha hman ngai lo," tiin ṭha takin ka hrilh ta zawk a, koki san áwk chung hian, "Umn..va zung ta poh che, sawi thui thei si," tihpahin dawhkanah a thil ken a dah a, kei pawh toilet panin ka kal ve ta a.

Khua a var titih tawh a, Thlamuana a tlaivar ṭhak tihna. A u ngaihtuah lo leh a chhiatna tur ngaihtuaha sual ru riau ang te khan ka lo ngaihtuah hman kha a ni a, natna khuma a mut meuh chuan pelhê hauh lovin a ṭul apiang a buaipui char char a, ka rin dan a dik lo tih ka hre ṭan. A pawnlam landan ang aiin a rilru a ṭha tepawh a ni maithei. Kei nen erawh inrem angin lang mah ila, ka la nêl thei tak tak chuang lo.

Cabin chhunga ka luh leh chuan Bowl-ah eng emaw chawk chung hian Thlamuana a lo buai hle a, u Mapuia ei tur a siam ti dawn ila; pakhat lah a la muhil bawk si, a chevel ngawi renga ka thlir lai chuan, "Khatia ding reng lo khan khumah ṭhu la, hei hi ei zo vek ang che," nelawm fahran lo hian a ti a.

A bowl ken lai chu min pein, Bawnghnute a thli zui leh zat a, nichina Thermo flash a rawn khai luh khan bawnghnute a lo va lam lek niin. Ama tiha mawi lo hi a ti leh nulh zel a nih hi.

"Damdawi kha mum khat ei tur aw, doctor chawh che a nia, naute tan a hlauhawm loh bawk, chuan.. kha.." tiin ka kut veilamah damdawi a rawn hmehbel chawt chawt a, ka ei hun a nghâk nge khum sîrah a ding run a, ka va ning tak.

Ner sak sak chungin ka ei ve ta tho a, a thil siam min pek chu a tui phian a, ka ei zawh vek tâk kha.

"Ka thu i awih chuan i thau tûng tûng mai ang, ka nupui i ni lo nain nangmah duata enkawltu tur Mama a damlo miau si a, atih âi ka ti a nih hi," a'n ti ve ngei a, a sawi zawh rualin fel intih hmel zet hian a khi suk a.

"Ka lawm e," ka lo ti sap.

Bawnghnute ka in laiin u Mapuia mutna lam aṭangin thawm a rawn awm a, rang takin Thlamuana a phei nghal a, "Mama, i harh em?" Keimah Thlatea.." a ti sup a. 

Ka thil in lai pawh in zo lo hian khum aṭangin ka chhuk a, u Mapuia mutna lam ka pan ve a, fiah taka rawn mengin, "Nano..Thlate.." thâm ṭuaka tiin min melh tawn a, "I ṭha tiraw?" Ka lo ti sawk sawk a. Ka thin a phu dup dup thei nia, a rawn meng tih ka hriatna ringawt pawh hian ka lungphu a ti danglam si.

"Tui ka lo in lawk ang aw," tirh bîk pawh nei lo hian a ti a, Thlamuana a che thuai a, keimah min rawn enin, "Duatnu, i chau tawh em?" Tiin min zawt a, a harh ve chhunah pawh ka ṭhat leh ṭhat loh min zâwt hmasa a nia, min duatna mitmeng ka chhiar thiam vek. Min ngaihtuah ngawih ngawih tih ka hria a, ka khawngaih tak tak a ni.

Nautê nen kan ṭhat thu ka hrilh chuan, a lawm tih a mitmengah a hriat hliah hliah, a nau tui pêk chu a inkhawlh khawlh a, "Nano, tikhan lo awmpui la, doctor kan ko ang e," tiin Thlamuana a chhuak zui daih. 

"Tinge khatia i awm ringawt le, nâ i nei em, a mak e tiraw?" tih pahin khum sîr têah ka ṭhu a, a kutphah hlai hlup chu ka chelh a, ka kut lo hûm lêt vat. 

"Ka hre bik nâng, ka natna i hria alawm," a ti leh mai a, rin ai takin a harh ṭha riauva hriatna ka nei a, a rilṭam leh ṭam loh te, thil a ei duh leh duh loh ka zawt nghal mawlh mawlh a, engmah a ei châk loh thuin min chhâng a, "Ka ngai che," a ti teh daih a, kan thusawi a va inpersan tak.

Kun hniamin a hmuiah ka fawp zauh a, a chalsam rawn tla thla huikiansak pah hian, "Naute, i papa a lo harh tawh a nia," tiin a kut chu ka pum záwnah lakángin ka nghat vang vang a, u Mapuia mita tawrhna niawm tak lo lang chu ka hmu vuai. A rei lo êm a, ka hmu sual pawh a ni maithei.

"Kan naute hmel ka hmu hman dawn lo emaw ka ti hman tawh alawm," a tih chuan, "A bul aṭangin a ṭan leh dawn e, khatiang kha ka hriat laiin sawi tawh miah suh, ka ngaithla peih lo," ka ti nghat a, nui suk chung hian, "Ka muthilh hlanin i lo zaidam ve tawh ang chu tih nâk laia a ngai te bawkin maw.." tia nui suk suk chung hian ka pum a chûl a, "Ânu thin hi a chhe ve ngawt mai," a ti zui leh hrâm. 

"Lalrinkim, i damloh leh vaih.." nui chunga ka tih laiin Thlamuana leh doctor an rawn lut ta a, kan ngawi ta rih.

Doctor-in kan awm ve a remti ta chiah si lo a, pawnlamah Thlamuana nen kan inzui chhuak a, a kal hmasa zawk a, a hnungah ka  zui ve hnak hnak a.

"A lo harh tawh tho si a, in lamah haw ta mai che, nizan i tlaivar ṭhak bawk nen i chau lutuk ang," tia Thlamuana ka biak chuan a ding chut a, a Jeans kekawr hâk ipte zen chung hian ka lam a rawn hawi a, "Mama hi engtianga nasain nge i hmangaih?" Tih min zawt daih.

Thaw halh chung hian, "I sawi awmzia ka hre lo," ka ti sap a.

"Mama hian hniam lam a pan zel a, chemo pawh hi a chhunzawm thei tawh lo maithei, test report-a a landanah chuan a Thin a kâi ṭan tawh a, zêp buai ṭúla ka hriat loh avangin ka hrilh che a nih hi, rilru i lo siam theih nan," zawi ruiha a tih chuan ka ngawi ta rauh rauh a. Eng nge ka sawi ang, min huat vanga sawi a ni lo a, zêp nei lova min hrilh ve duh hi ka lawm hrim hrim. 

Cabin bang nghengin a ding a, kei pawh a kiangah ka ding ve bawk a; "Mizoramah kan haw dawn tihna mi?" Ka lo ti a, "Doctor saw rawn chhuak phawt se, vawiin chawhnuah kan awm zel dan tur chu a hriat ang," a ti ta a.

"Nano, thil pakhat chiah ka zawt ang che, ka u hi awm ta lo se kan inah hian i chêng zel ang em?" Tiin min zawt leh ta a, a hmain u Mapuia'n min zawt tawha tunah amahin min zawt leh a, a tih dan takah zep awm lova sawi tlang mai hi a ṭha zawk, "Ka awm ka ring lo, ka chhuak ang," ka ti hmiah.

A ngawi ta vung vung a. Zawhna dang engmah min zawh belh lo a, en pawh min en tawh lo hian kan piaha hmeichhe pakhat dinna lamah a kal daih a, ka thusawi kha a ngai hua pawh a ni maithei. Mahse, min zawta thudikin ka chhânga a tawk nimaiin ka hria.

Atuni rawn thlen hnuah u Mapuia nen khumah kan awm a, "Tunkar hi ka awm dam anga doctor-in chawlh lailâwk min pe aw.." tiin ka pasal a nui var var a, a sawi awmzia ka man leh lo. Amah melh hâ chung hian, "Eng chawlh maw?" Tiin ka zawt a.

"Chemo kha vawi li khai a la ngai a, mahse, thlakhat hnuah ka fit chuan kan khai thei chauh ang, tun atan chuan kan chawl rih dawn an ti a nih chu," hlim takin a ti a, Thlamuana khan min hrilh lâwk lo se chuan ka nui thei mahna. Mahse, ka nuih a za hlawl si lo chu a nih hi. 

A langah erawh chuan, "Kan haw daih anga in lamah ka duat dawn che nia," ka ti liam  puat a. A nat dan leh a nihna dik tak amah hrilh chi ni tawh hek lo, inthiam lo ru takin kan zêp ngat ngat dawn chu a ni si a, a va hrehawm ṭhin tak êm.

"Lutuk e, Bawngkawna kan in pawh ka hmuhpui dawn che nia," a la ti tak deuh deuh a, ka 'umn e" liam ta vel mai mai, ka chhungril a tâwt ṭún a ni ber.

Ni hnih leh zan thum Hospital-ah kan awm a, hritlâng tur inṭham ang deuh hian ka awm deuh reng a, ka nun a nuam vak lo.

Hospital-a kan awm chhungin ka riak kuit ṭhak a, a chhan pawh u Mapuia'n haw a phal miau si lo a, a hma lawk kha chuan chawl hahdama indim turin min hrilh chamchí a; mahse, a rilru a thlâk daih. Chhun leh zanah ka awm tlang parh a, Atunin chawlh lâk a tum pawhin ṭûl ka ti ta lo. Rin ai taka u Mapuia a ṭhat tâk si avangin Thlamuana pawh a rawn riak tawh lo a, kan nupain kan awma kan hlim vei phian. 

Dr.Ibrahima pawh hmaichhanah ka be leh thei ta a, ka bia tih midangin an hre lova Thlamuana hnena sawi lo turin ka ngen ve tlat a, hrilh hre lo turin a insawi ve tâk kha.

"Kan Cancer patient te reng reng hi kan dah pawimawha an duhthlanna kan zahsak fo ṭhin. Mapuia hian Chemo a beisei a, a beisei ang kan tihsak hian a ṭha a ni mai, khai leh khai lohah danglamna êm êm a awm hran tawh lo, a ṭâi darh zel tur venna chikhat a ni mai a, Chemo chak lutuk kha an zo lo ve thei tho bawk, tuna a dinhmunah hi chuan thisen a nei tlem a, a thisen var pawhin duhthu a sâm lo, chuvangin haw thei dinhmuna in din hunah Mizoram lam pan ula a ṭhain ka hria, inbiak pawh a awlsam tawh a, a condition a zirin thlakhat hnuah lokal leh in tum dawn nia, Mîtliam te a neih palh ka hlau viau," tiin dam thlapin min hrilh.

"Ei leh in lamah ṭan in lo la deuh dawn nia, taksa chakna tur kha a pawimawh hle bawk aw," tiin min chah a. Ka pawm zawng tak.

Hospital aṭangin Thlamuana'n min hruai chhuak a, hmanni lawka kan boruak ziaawm ve deuh kha a bo hmak. A ṭúl tawpah lo chuan min be lo a, a û erawh a ngaihsakin a buaipui zar zar tho. Hna chungchâng te hial an sawi dun leh thei tawh a, Atuni pawh hna lamah an buai avangin a rawn haw tlai thei hle, kan nupain kan awm dun tam a, Mizorama haw pawh kan hnaih ve hret hret.

Damdawi in kan chhuahsan aṭangin kâr khat a liam leh tawh a, inchhung chêt engkim ka kovah a tla a, mahse; Atuni leh Thlamuana an awm khát bakah pawnlamah an ei chhuak zinga chêt hautakna tur a awm hran lo.

Sunday a ni a, inah kan tawm ṭhap a, u Mapuia'n Atuni hnenah, "Vawiin chu Nanovi hi chhuah harhpui ve la, Thlatea nen in kan lo nghâk ang e," a ti teh tlat a.

Atuni lah a lo phur nasa mai.

"Kal chhuah kher pawh ka peih em em lo," tiin ka lo hnial ve a, Atuni ngaihdan a ni ta lo. "Mama buaipui reng rengin hun i hmang a, naute tan a boring lutuk, insiam ang," a ti zung zung a, "Naute thawmhnaw tur en te i duh lo em ni?" Tia min thlêm tâkah chuan phur takin ka insiam ve ta zawk a, naute thawmhnaw eng mah lei nachang pawh ka hre lo hrim hrim. Ka ngaihtuahna han tlemzia hi chu aw.

"Kha le, kan naute mamawh lei nan in mamawh ang, Atuni nen induh zawng rawn lei bawk ula," tiin a Card min pe a, "Ka nei ve reng, min pek hmasak pawh kha ka la hmang lo," ka tih chuan, "Sawi chhuah tawh awih loh kan tih kha, min hnial lovin la rawh le," a ti leh tlat a, ka la ta nge nge e.

In kan chhuahsan lai hian Thlamuana'n pâwnah Car a tifai a, min melh zuk chungin, "Atun, Whisky ûm khat rawn hawn teh aw.." a'n tiah. Leh tawp mai a.

Pakhat lahin, "I rui nawi thei em mai, ka hawn peih lo." A lo ti ve bawk.

"Min rawn hawn loh chuan i châk dawn lo a nia," Thlamuana'n a ti leh a, an unau inbiak dan ka ngaithla a, eng mah phei chu ka sawi ve lo. Anni pahnih hi chu an chengdun rei tawha an inngeih leh zual, an inngam bawk. Thlamuana hian u Atei aiin Atuni hi a hlau lo zawkin ka hria. 

Bazar ṭan hma hmain, "Beer vawt tak in hmasak a ngai," a'n ti ṭan phawt a, a va ropui lo ṭhin tak.

Hmun hrang hrang min fan kualpui a, dâr hnih velah bazar nan pawisa kan la chhuak ve chauh a. Naute thawmhnaw tur eng emaw zât a thlang a, pawisa hmanna a hre hle; ka lo ui ru khawp mai a, "Mama tezawng a uikawm teuh lo, Thlatea hi alawm uikawm chu.." a ti a, Beer Can engzat nge a in tawh ka hre lo, rûi ang pawhin a lang duh ṭhak náng. Hetiang em ema in thei hi an awm ve pawh ka ring lo hial. 'A duh' tih hian a sawifiah zo lo a ni tawp mai.

"Atun, Ngaihzawng i nei ve ngai lo em ni?" Tia ka zawh chuan, nui kar kar chung hian, "Nei ve ṭhin tho e, mahse, ka nei rei peih lo ka hne zel," ngaihsam zetin a ti leh puat a, ka lo nui tawp.

Thlamuana'n Whisky a chah kha a la hre reng a niang, ûm khat a lei sak tak tak nia. U Ropuia hian min chah ve ta se ka lei lo nasâ ang. Mahse, anni nun dan leh keini khawsak phung te chu inmil hek lo le. 

U Mapuia tan lukhum ka leisak a, Thlamuana pawh ka lei kêp ve tho a, a duh emaw duh lo emaw pakhat chauh pêk bik kha thil mawi ninghal lo chuan. Atuni nen Kurta inang kan lei a, u Atei pawh bag ka leisak ve bawk. Ka nu leh pa (U Mapuia nu leh pa) a hmingin eng emaw hawn ve hrim hrim ṭhaa ka hriat vangin ka lei kêp bawk.

"Hetiang hmeichhia i lo nih vang a nih hi Mama'n a duha a hmangaih che, i kum ang rual ka nih lai kha ka ngaihtuah let a, ka tluk lo hle mai che," Atuni'n a ti ve ngial.

"I ho, ngawi mai mai teh, nang pawh auMami aiin ka ngaina daih tawh che, hrethiam maw?" nui chungin ka lo ti ve a.

"I u Mami'n a tih ang che khan Atei hian mi ti ve ta se kan insual nasa ngawt ang, nang chu i zaidama i rilru a lo ṭha êm a nih hi," a ti duah a. Min fak venaah ka ngai mai ang.

"Tun ṭum in haw tur chu ka thlah thei dawn lo che u a, Thlatea hovin in chhoh a ngai dawn a nia, i nau neih dawnah chawlh lâk ka lo tum ang," a ti a.

"Awi awi, Thlamuana te nen ringawta haw chhoh ka duh teuh lo, zankhat lek châm tur tala i haw ve lohin," ka ti a. Nui ṭhâ chung hian, "Thlatea hi duat la i nuam a ni mai, Mama pawh hian a hna zawng zawng a khawih tîr tawh dawn a, chuvang alawm vawiinah hian min tirh bo.." tia a sawi tâkah chuan a nih ngei pawh ka ring. 

U Mapuia hi hna han thawk chi a ni tawh lova Thlamuana nen sawi dun ngai thil an neih vangin min tîr bo chiang. Phakar siah.

"I u Mama thluak hi chu ka pha ngang lo a nih hi.." nui var var chunga tiin haw ka rawt ta a, a lo 'Aw' ve mai bawk a.

In kan thleng a, a tlai tawh deuh avangin zanriah tur Thlamuana'n a lo buatsaih a nih chu. Mumang ava ang zâwk ve.

Arsa fry rim a nam ram ram a, kan thawm a hriat ruala rawn dâk chhuakin, "Atun, min lo hawn em?" A'n ti nghal tawp a. 

"Eirawng i bawl zawh hma chu ka pe dawn lo che," tih pahin kan thil leiho a phawrh mawlh mawlh a, han zah der ṭîtṭêt pawh awm lo hian, "Zu duh deuh nau ka nei a, ka la retheihpui dawn che a nih hmel," Thlamuana hnena a tih chuan, "Beer heh lutuk û ka nei hi ka inchhuang lo teh a nia," a nauin a lo ti ve zat a.

An inbiak buai laiin kan room-ah ka lut ta a. Khum lu lam nghengin u Mapuia a lo mu awn duai a, ka va hmu phut chu ka phu zawk alawm le. A sam dum chhah ṭha tak ṭhin kha a lo kawlh vek a, ka mengphâwk vak.

"Hei, Ramhuai ka ni lo aw.." tiin a nui ruh ruh a.

"Naa, i nawr kawlh dawn tih sawi hmasak tur alawm," tiin khumah ka lawn a, a lu kawlh mâm pal chu ka chûl a, a inhmeh phian. A lang thau deuh bawk.

"I ngainat zawng a ni dawn em, ka inhmeh lo em?" Tia min zawh chuan, "The Mummy Return-Movie a misualpa kha i ang," ka lo ti a, a nui nasa ngei mai. Pum dawm meuha la nui chung hian, "Zomuanzuali tak hi chu..." tiin a lamah min pawt hnai a, ka hmuiah a fawp ta vawng vawng a.

Ka thiam ang tawkin ka lo chhâng lêt ve a, hetianga kan infawh lohna chin hi a rei ta hle mai. 

"Sorry...." tia mipa aw hniam ruih ri kan hriat rual rualin kan inthlah nghal vat a.

Kawngkhar bulah Thlamuana a lo ding a, a hmel landan buai nak chu a thup hman bîk lo a niang, nuam lo ti hmêl a pu a.

"Chhunzawm leh rawh u," ti nghut chung hian kan ṭawng ve hmain a chhuak daih.

"Thlate...Thlaa.." tia u Mapuia'n a koh lawm lawm pawhin zuk 'eih' duh ṭhak lo a.

"Va umzui lawk teh, thil pawimawh sawi tur a nei a ni ang," a ti ta a. Ka lo ner nasa mai.

Ka ûmzui hreh êm avangin, "A lokal leh tho ang.." tiin ka lo hnial a.

"Le, ka sawi angin aw..." hnial theih hauh lova min tirh ṭâlh avangin ka kal ta nge nge a. Ka ning chiang e, u Mapuia'n a koh khan lo lêt ve mai tur a nia, a sual a chhuak leh tawh a ni ang.

Choka lamah ka pheia ka va hmu mai si lo. Atuni room-ah ka va en a, ka ko pah bawk a, "Nano, eng nge ni vak vak," tiin bathroom aṭangin Atuni'n min lo chhâng a, "Thlamuana khawnge?" tia ka zawh chuan, "Ka inbual daih a, a awmna ka hre lo," a rawn ti bawk si.

"Aw le, aw le," tih leh chhuah ka rual a, khawiah nge a kal hman le.

Pawnah chhuakin ka hawi kual a, ka hmu mai bawk si lo. Chutah, Garage lam ka zuk bih dâk dâk a, a Car chhungah a lo ṭhu a, ka kal ang nge kal lovang tia ka inngaihtuah leh tê tê hnuah, u Mapuia vang zawkin ka zuk pan ta a.

Min hmuh veleh, "Eng nge hetah i lo tih dawn?" A ti hmuk a.

"I u in a ko che a," ka ti sap a.

"Thil pawimawh eng mah sawi tur ka nei hran lo, lêt leh rawh," tiin Sana a bih zauh a, "Chaw ei a hun tawh hrim hrim alawm, chhuak tawh lo mai rawh," ka ti ve tawp a, rum lutuka min melh chung hian, "Û te, kal mai teh, zû ka in dawn," tiin min chhâng sak a, ka run lutuk.

"In rawh, i duh zât zât in rawh..." ti ve hmakin ka inher nghauh a, "Eng maw i sawi?" Vin lutuka tiin car kawngkhar a hawng rawp a, ka lo phu dâwrh.

A ṭawng ka hre tho naa chhâng duh tawh lovin ka pen sawn a, rang lutuk hian ka bân puamah a rawn hmer a, "Zomuanzual, ka nunah hian sawi tur i nei lo, ka zu in chungchangah rawn inrawlh hlek suh," a ti khur khur a, ka va han hlau tak.

"Ka bân i hmer na a nia," ka lo ti thung.

Min thlah thut a, ka pai dat. Ka tlu dawn emaw tiin min rawn kuah a, ka pum puarah tak chuan a kut a nghat a, "Hey, eng nge i hriat a?" Ka lo ti hlar. 

"Eng mah ka hre lo, i eng mah hi hriat ka duh lo, kal rawh.." tih pahin a bân a la sawn a, amah hi ka hlauh rûk deuh avangin sawi buai miah tawh lo hian ka kal nghal nal nal. A han sual zia em em hi. Setana nau dik tak niin ka hria. Zawitein, "Thlamuansuala" ka ti chhuak sap.

"Zomuanzual, engtin maw min koh a?" Ka hnung lawk aṭanga a rawn ṭawng leh avang chuan ka phu leh vak a. A va hahthlak e aw, ka hawi lêt rualin min rawn su dawt a. Mahse, a tawlhsawn leh nghal tho. 

"Engtin mah ka ko lo che.." tiin dâwt chiang lutuk ka'n sawia(h. )

"Ka hre pha vek aw." A ti leh a, thinrim lutuk angin a lang tawh bik lo chuan ka hria. 

"I hriat phâk reng te chuan eng nge min zawh kher?" Ka ti ve hrâm a, "I va han ṭawng thei tak..." tiin min kalpel a, in chhungah a lut nghal daih. Ka chhuah khan kawngkhar ka lo khar lo a nih pek hi, a lo inhawng sa vek alawm.

Kan nupa room-ah Thlamuana a lut tlang nghal a, ka lut ve ta lo. 

Eirawng te a lo bawl ve bawk sia tiin a thil siam ka en lâwr dan dan a, chaw tih loh a lo siam kim ve biai. Dangdai thei siah!

Kan Lalthlamuana vang hian lungphu ṭha lo ka nei lovang tih tu'nge sawi thei?

130123

-B®®

Shadow of the life

B+>[BeckirafARenthleI]<+®®