13.KA CHANPUAL [A Becky Rafa Renthlei Story]

13. KA CHAN PUAL

Ziaktu: Becky Rafa Renthlei

-B®®

(Recap)

Kan nupa room-ah Thlamuana a lut tlang nghal a, ka lut ve ta lo. 

Eirawng te a lo bawl ve bawk sia tiin a thil siam ka en lâwr dan dan a, chaw tih loh a lo siam kim ve biai. Dangdai thei siah!

Kan Lalthlamuana vang hian lungphu ṭha lo ka nei lovang tih tunge sawi thei?

©©©

Mizoramah kan lêt leh ta.

Delhi aṭanga kan hawna pawh kâr a tling leh hial tawh a. Khatia Sunday tlaia Thlamuana kan nupa mutna room-a a lut tlang kha ka zui lût ve lo ka tih tawh kha.

An unauva an inbiak chhung zawngin Atuni room-ah kan awm a, an ṭawng ring mang bawk si lo a, mi thusawi hriat tuma beng va dawh thu awm suh. Zanriah kîl tlai rak khawpin an inbia a, eng em em nge an sawi ang ni!

Thinrim hmel dur khupa Thlamuana a lo chhuah hnu lawkah u Mapuia pawh a rawn lang ve nghal a, an inhau a nih loh pawhin lungawi lohna lian tak u Mapuia hian a nei tih a hmel landan aṭangin ka chhiar thiam.

Zanriah ngawi rengin kan kîl a, Thlamuana'n zu a in leh tih hrilh hranpa kan ngai lo.

Kâr tawp lama haw tum chauh kha kan ni a, "Eng mah insawiselna ka nei rih lo a, Tuesday-ah kan haw ang," hnial theih miah lohvin u Mapuia'n a ti a. Kan ngawi ṭhap.

Atuni'n a lo sawi lâwk tawh ang khan min thlah thei dawn ta lo ngei a, Thlamuana pawhin chhuanlam a siam a, "Anni tel lo pawhin kan haw thei lutuk tlat, Duatnu, i rilru ti hrehawm duh suh," tia u Mapuia min hnemna chuan ka thlâ a ti muang suai suai.

Thlawhnaa kan chuan laiin a chau thut ang tih ka hlauh vang a ni pakhat a, keimah ringawta buaipui ka inzuam lo a ni ber. Mahse, vanneihthlâk takin engmah buaina leh harsatna kan tawk lova, Lengpui Airport-ah u Atei te nupain min lo hmuak diam a, kan va lawm si êm.

Mahse, in kan thleng a, u Mapuia a chau titih. Damdawi ina luh a duh tlat si lova ka nuin Cancer doctor MSCI ami a be ta ringawt a, aniin min rawn ngaihven rang ta zawk a, tunah chuan kan zia leh ta deuh. A thawhah a chhuah hian kan buai ziah lehnghal.

Ka pasal nu leh pa te pawhin min duat khuchûk lo naa a hma âi thlâwt chuan ṭhat an chhuah tawh a, a chhan ber pawh Atuni aṭanga min fakna ri an hriat tam vang a ni tih ka hria. Kan nula Diki pawh a fel angreng a, u Atei a dan pangngaiin ka lakah a ṭha viau a, Delhi kan pan hma ai ngawt chuan inchhungkhur boruak pawh a nuam tawh zawk.

Mahse, u Mapuia leh Thlamuana an inbe hleithei ta meuh lo. An inkâr thil hre vek mah suh ila; hna chungchângah tih loh chuan inbe khât tak an ni.

Zemabawk Cancer hospital-a blood test kan neih ṭumin, "Bawngkawna ka in sak en ang aw," tiin kan nupain kan pêng kawi a, pui rem rem tak a ni. U Mapuia pain a lo awt ru ngawih ngawih leh kan indan an hlauh viau nachhan kha a lang chiang thawkhatin ka hria. Hospital tur atana duan ni lo mah se, a hmunhma a remin a sa ṭha thlâwt. 

"I laka ka nu leh pa an la sual fo chuan he inah hian kan insawn ang" a ti hmiah a, ka lo nui kar kar. A damlohna hi inhneh tîr a tum lo a, chauvin chak lo fo ṭhin mah se, Pathian zarah a zia ve leh mai bawk a, a sam pawh a rawn ṭo leh ṭan tawh a; "A hma ang kha ka pha thei tawh chuang lo ang, thisen a heh bawk si," a tih vangin kan nawr kawlh leh ta daih a, mutnaah tih loh chuan lukhum a khum deuh reng mai.

Hetia ka sawi thui duah nachhan pawh u Mapuia hian nitin hniam lam a pan zel a, a chêr sâwtin ei tur ṭha leh in lam chi nen kan ṭang kawp viau chung pawh hian a ti hleithei meuh lo.

Zankhat chu ka phone a rawn ri a, Atuni leh Atei, u Ropuia leh u Kimtei tih loh mihrang aṭang hian phone call ka dawng khât ve lutuk a. Dr.Ibrahima nen kan inbiak leh zeuh bâk hi chu chuti hlauh. Social media in kan nupaah hmun a chang lo a, thil dang ngaihven hman hian kan khawsa lo a ni ber e.

Min rawn call tu number chu ka neihsa a ni lo a, pick loh ka tum zet tawh na a, a rawn rik leh tâk avangin, "Hello" ka ti sap a, u Mapuia muhil tihharh hlau takin Balcony ah ka chhuak a, "Novi.." a rawn ti thum dat a, tu aw nge ka hai lo. Tun ang hunah Thlamuana'n eng atan nge min biak a duh tih ka ngaihtuah zawk.

"Eng nge ni ta?" Ka lo ti a.

"I ṭha em?" A rawn ti teh ngawt a, ka ṭhat thu ka hrilh ve mai bawk a, "Mama a ṭha em?" Tiin min zawt leh a, "A ṭha a nimai, thil ei a harsat deuh a," tia ka chhân chuan, "Duat takin i enkawla ka lawm e aw," a rawn ti ngial a. A rui em mawni zawk ni.

"Amah enkawl ka duh vang alawm helaiah ka awm," ka lo ti hmak.

"Nia, ka hria, ka hre mah mah.." a ti leh a, "Min rawn call nachhan chu sawi ta che, i û ṭhat leh ṭhat loh i hriat duh chuan amah bia la, thinrim khum lovin, hetiang hi a dinhmun a ni tawh a, a laka i lungawi lohna kha dah bo rawh," ka lo ti ve zawt zawt a, thaw hawk chung hian, "Engmah i hre lo, i hriat pawh ka duh lo," ti leh lawi siin, polite lo zetin phone a off daih. Ka va ngei mai mai e.

Ka mut hnuah pawh Thlamuana ka ngaihtuah zui rauh rauh a, ngaihzawng te hi a nei ve ngai lo nge, mi hrang hrang a kawp zawk? Angela lah kha a ngai serious lo ropui mai si a, a mak ve ngawt chuan ka hria, hetia kawp mumal nei lova a la awm tlat chhan hi a lerh lutuk vang a nih ka ring ta ber. Â... ani chungchang ngaihven hman pawh ka ni rih lo.

Ka naupaiin thla sarih hmel a hmu ve tawh a; keimah pawh a hma aiin ka fit lo ve det. Aizawla kan haw hnu hian ka nuin damdawi min ngaihtuah sak nual a, u Mapuia enkawltu ber ka nih vang hian leh an tû tur pâi ka nih angin ka lakah ṭhat an chhuah ve viau a, Atuni thu thuin ka nu hi chu a awm ka ti mai.

Tûk khat chu zan lam kan mut ṭhat loh avangin ka tho tlai hle a, u Mapuia damdawi ei hun zing lam dâr sarih pawh nang lovin ka awm pek a, ka lo mutui ve bawk nen ani min kai tho hreh leh inthlahrung ve deuh si khan amahin damdawi a lo ei a, ka nuin a lo hmu pek chu niin.

Ka mutnaah a rawn kal a, "Zomuan, tho teh.." a rawn ti a, phak chualin ka ṭhu chhuak a, "Eng nge ni ta!" Ka lo ti hû a, "Mapuia enkawl turin hetah hian i awm a, a damdawi pek hunah pawh i tho thei tawh lo chu a nia, i inthlahdah sâwt hle mai, i laka ṭhat kan chhuah vang hian eng emaw riauah inngai miah suh, ka fapa vang chauh a ni tih hria ang che," a ti ta khawl khawl a, ka thin a rim ve takzet.

"En teh, zan lamah kan mu ṭha bawk si lo a, thawh ka hai palh a ni e," lungawi chiah lo hian ka lo ti ve a.

"Damlo enkawl lai i ni a, nuamsa taka awm inbeisei mah ta che, hetianga damdawi ei hun i ngaihthah fo dawn chuan Mama pawh inhnuaiah riak turin ka hrilh anga keiman ka buaipui ang," a ti hmarh hmarh a, thawh hlima dawnsawn atan chuan a ṭawngkam a ngeiawm hle mai. Keilah mahni tawkah ka hahin ka buai ve si a, ka zaidam fahran bik lo.

"Ê, i duh phawt chuan hruai thla rawh," tih bâk ka sawi lo.

"Lo en reng ang che, ka fapa nen hian eng chen nge in awm dun dawn, kan inah hian rei i awm ngût lovang," duhthawh taka tiin a chhuak ta a. Biakliani hi a pianthar pawh ka ring mai mai lo, kohhran kâwra hmang, mahni inhmu ṭha hluah hluah ang kha niin ka hria, keima nu tak tak nise chuti bawk. Pa Zoliana sawi 'In vanduai a nih hi' a tih kha a lo dik tepawh a ni ang.

Ka tûkchhuak a fuh lo zo vek a, u Mapuia rawn luh laiin khumah ka ṭhu túm bur a, Diki'n chaw ei tura min rawn koh pawhin ka che duh map náng.

U Mapuia ka bulah a rawn ṭhu a, "Nano, i nuam lo deuh em ni?" Tia min zawh pawhin ka ngawi reng a, ka rilru a na thar leh tlat.

"Duatnu..." a ti leh sup a.

"Min be sek suh, chaw ka ei dawn lo a nia," ka ti vin hlar.

"Engtizia nge, naute ril a ṭâm anga sin," dam thluama tiin, ka hma zawnah a rawn ṭhingṭhi hniam a, "Ka lakah lungawi lohna i nei em ni, sawi la," a tih chuan, ka mittui a tling pam a; "Tukina i damdawi ei huna ka harh loh avang leh nangmaha i inbuaipui avangin ka nu a lawm lo a, kan room-ah a rawn kal a.." ka ti ve ta nge nge a.

"Mai mai ṭhin a, ani lo sawi tur a awm hleinem, zan lamah i mu tlem tih ka hriat vangin ka kâi tho duh lo che a nih kha, hawh le, chaw ei phawt ang," tia min kaih thawh a tum chuan ka ṭang ṭung a, ka lung ala âwi thei tlat lo. Titau ngam tur ka ni lo tih ka inhria; mahse, mihring ve tho ka ni a, ka famkim loh zia a lang a ni ve mai.

"I hnen ka rawn thlen ni aṭangin lawm ka hlawh lova, eng lai mahin ka lakah ṭhat an chhuah ngai hek lo, i lakah vawikhat pawh ka lungawi lohna ka thlen bawk lo a, a bík takin i nu leh pa, Thlamuana hi an sual zual, ka la naupan avang leh ka chhungte'n min ngaihsak tâk loh avang hian min hmusit a, min tham lo êm a ni," ka ti ve ta ngat a. Ka ṭap lo teh tlat.

"Engkim hi ka hmuin ka hria alawm, ka nu leh pa pawh ka lo bia ang e, chaw ei loh ngawt chu a ṭha lo, anni avanga kan nautê nen rilṭâma in awm ka phal miah lo a nia, ka dam chhung hi chuan hrehawma i awm ka phal ngai lovang," zaidam taka tiin ka kutah a vuan a, "Bawngkawnah chuan kan awm tak tak mai dawn em ni?" A'n ti leh rih a.

"Ni lo e, hau kher pawh a ngai lo a, a thuphungin ka sawi a ni e, ka nuin inhnuaia riak turin a duh che a, aman a enkawl tawh dawn che a nih hmel," tia ka hrilh veleh; ner sawk chung hian, "A ve ringawt a, ani enkawl ka duh rêng rêng lo, nupui min hmangaihtu leh min duattu ka nei a, ka tana i tih tawh zozai hi ka rûl seng dawn lo che, anni thinrim phun mai mai ka hlau hleinem," a ti hmiah.

Chumi hnu chuan inhnuaiah kan inzui thla ta a, Dining table an lo kîl ṭhap tawh a, min hmuh veleh ka nu bawkin, "Diki'n a rawn koh che khan lo chhuk ve mai tur alawm, han zilh deuh che ila, ka titau e i tia, i buaithlâk ru tlat," min lo tih khum leh.

"Ka nu, duh tawk rawh, thil ei dawna inhau te, inhnial te hi a malsâwm lo a nia, bâkah Nanovi i hmuh mawh viau chuan a hmain ka sawi tawh kha aw, kan chhuak thei reng," tih pahin ka ṭhutna tur Chair a pawt chhuak a, "Mate, tam deuh ei tur aw.." a ti zui sak. 

"Awi awi, Lalrinkim, i nu hi tiang khan min han runluih vel a, in dang tlâk pawh in ni lo, nikhat pawh in va khawsa lo ang e," a tih leh chuan ka pa a rawn ṭawng a, "Mama, Biaki, duhtawk rawh u, Zomuani pawh a naupan ngaihtuah chuan a fel viau a nia, hetiang dinhmun kan ni chunga in dan lo sawi sek pawh a ṭha ngai lo e," dam deuhin a ti ta a. Kei erawh ka lo ngawi reng thung.

"Nanovi û Mami kha a chhûl paih a ngai a, Lunglei lamah zan hnih khat riakin kan kal ve dawn em maw ni?" U Mapuia'n a tih chuan ka hawi phâwk ngei mai. AuMami lam reng reng ka lo hrechang tawh lo a, engtin nge ani hian a lo hriat bîk le.

"Mama, Zomuan, ngaihtuah chiang rawh u, nangniin in ngaihsaka in duhsak ang khan an rilru a awm ve kher lo thei a, va kal pawh ni ula boruak ṭha inneih ka ring lo, chuvangin khalam kha chu sawi zui vak ṭul pawhin ka hre lo a, i hriselna khati kha a ni bawk a, kal lo mai rawh u," dam thlapa ka pa a ṭawng chuan zahawm ka tiin ka pawm zawng tak a ni. 

"Nano, kal chu i duh reng em?" Tia u Mapuia'n min zawh chuan, rang fahranin "Aih" ka lo ti a, a nui suk. 

Kan nupa room-a kan awm leh hnuah, "AuMami an zai dawn tih engtin nge i hriat?" Tiin ka zawt a, "I u Mami'n msg min lo thawn," zuk ti a.

"A chhe mai mai e a, a zak lo siah," ka lo ti a, nui ruh ruh chung hian, "Min hmangaih êm alawm," a'n tiah.

"Lalrinkim, hmêla, i duh leh Lungleiah chuan va kal rawh..Kiri.." ka lo ti hlar.

A nui kur kur a, la nui reng chungin, "I rilru ka en chhin a nih kha, ka kal ring mah ta che, nang pawh i kal lo ang, an duh tawh lo che a, keiin ka duh che a, inhuat kher a ṭul lo nain be hmasaa pan hmasatu nih ka tum lo," a ti leh lawi si. 

Khumah kan tâl nilêng a ni mai. Nupa nun hman lam nilovin kan titi a, a châng leh kan inhnial bawk a, Diki'n thingpui leh a hmeh tur a rawn dah a, khuma kan mu chu min enin, "Nano, naute i neih hunah ka awmpui ang che aw, pi dîl la.." a ti a.

Ṭhut chhuah pah hian, "Ka díl ngam teuh lo mai, min vin hrep loh pawhin a âng leh duai duai mai ang," ka lo ti a, u Mapuia nen an nui tawp. Nia, ka dil vaih chuan ka sawi ang khi a thlen loh atâkah.

Diki chhuah hnuah thingpui kan in a, kan inbual dun leh a, chímbuaitu kan neih loh hi chuan kan inhau khât lutuk tlat. Inhnial châng leh ngaihdan inan loh châng awm ṭhin mah se, thinrim engphiara inhau kan nei ngai lo. 

Zanriah ei hmâ aṭangin ka pum a nuam lo riai riai a, ka sawi mai lo. Mahse, ka tâi zawn a na telh telh a, u Mapuia a awm lo a, a Bolero sil tîrin a chhuak daih a, a lo la haw lo bawk nen khumah ka vial ka vial a, thil ei sual ka nei em mawni ka ti hial.

Chutia thlan tla bat bata ka lo awm lai chuan ka nu a rawn lut a, "Zomuan, Mapuia hi a va rei ve ka phone-a a la thei bawk si lo, biak han tum ve chhin teh," a rawn ti lût mawlh mawlh a. Mahse, ka hmel a hmu chiah chu, "Ehe! Ekhai aw.." tiin khuma ka mu chu min rawn hnaih a, "I awm dan a dik lo, i tho thei ang em?" A ti nawk nawk a. A chiâi ngei mai.

Room aṭanga tlan chhuakin, Diki a ko vak vak a, "Atei kha phone teh, Zomuani awm dan hi a dik lo a nia," a ti chúl a, ṭhut chhuah tumin ka lo insiam rem ve mek. Nau ka chhiat dawn nge, ka awm dan pawh ka hrethiam tawh lo. Ka pum a nâ a ni tawp mai.

Ka nu a rawn lut leh a, "Atei a rawn chho dawn a, damdawi inah kal rawh u aw, nau vei i ang tlat, Thlatea pawh thlasarihah alawm ka neih," tiin, awihawm loh khawpa zaidam hian min bia a, ka sam pawr phang chu chûlin a huimâm thuak thuak a, "An va rei ve maw le, Lalrinkima lah phone chhâng thei reng reng lo," tih pahin, naute thil tur kan lei sa dahna chu a hai rawk rawk a, dik tak chuan naupuan tur pawh kan la lei lo hrim hrim. 

Keimah aiin u Mapuia ka ngaihsak zawk zel avang leh ka neih hun tur pangngaia kan chhûtin thlahnih ala awm a, Atuni'n naute thawmhnaw tur Delhi kan zin laia a lei bâk kha eng mah a awm lo.

"Awi, nau puan pawh in nei nange?" A ti a, a thaw chhuak halh a, "Â, keima thiam loh a nih hi..." a tih mek laiin u Atei leh Diki an rawn lût a, "Kan pa a rawn chho ang a, Durtlang Hospital-ah kan kal mai dawn nia, Nano, a na viau em?" Tiin min rawn hnaih a, nui lui chung hian, "Tlem chuan a zia leh deuh," ka lo ti sap.

Ka nuin naupuan kan la neih loh thu a sawi a, u Atei a inthiam lo hle. 

Naupuan ṭhuisa lei turin Diki a tîr a, chutih lai chuan u Atei pasal Chhandama a rawn chho thleng ve chiah bawk.

"Ate, Zomuani kha in nupain lo han chhohpui hmasa ula, Diki lo haw hunah Mapuia te nen kan lo kal ve mai ang, naupuan pakhat pawh nei lovin thlasarih chhung zuk awm thei a," a ti leh hrâm. Ka chhâng buai peih mai mai lo, mi mah nâ tih naklai a.

Muang khawtlai lovin u Chhandama'n Car thleng min kuah a, a hnung seat-ah u Atei nen kan ṭhu a, nichina na deuh ang kha chu a reh ta rih. Mahse, a nuam ta tihna a ni chuang lo.

Atuni pawh u Atein a call a, u Mapuia pawh an be tlang thei tawh tih a sawi. Tunlai tê hian a dam ṭha ve deuh a, chuvanga motor sil tura chhuak thei a ni.

Damdawi in kan thleng a, rang takin min lo buaipui nghal a.

Nia, rin loh lutuk leh beisei loh lutukin nau ka vei chu a ni dêr. 

Zai lova min neih tîr hram an tum a nih hmel. Hetiang êm êma nâ hi ka pian leh tun inkârah natna ka tâwk lo va, ka mittui a parawl ṭeuh. Mahse, u Atein min fuih char char a, min thlamuan bawk.

Ka nu, keima nu tak tak ka ngai ngei mai.

U Mapuia te lo thlen lai pawhin ka lo be peih tawh lo. Nei mai thei tur angin ka la awm lo naa ka pum a na châwl lo a, "Duatnu..tihpalh lutuk..ka tihpalh.." a ti sup a.

Zan dâr 11  velah a nâ a reh leh lawi si a, doctor-in min rawn check leh a. Tutute nge lokal pawh ka hre lo, u Atei te unau chauh ka hmu a, rilru hah hmel taka u Mapuia vei nghauh nghauh ka hmuh chuan ka khawngaih. Mipa luh an phal tawh si lo a, a rilru a hrehawm dawn êm asin.

Dârkâr 5 hnuah.

Naute ṭap ri ka hriat rualin ka nui sak a, 'Lalpa ka lawm e' tih bâk chham tur ka nei lo.

Ka pasal Cancer a ni a, a fâ hmel hmu hman lova min kalsan ka hlauh zia te kha, tunah chuan a fapa hmêl a hmu ve thei dawn ta. 

Ni e, Zomuanzuali leh Lalrinkima te hian fapa kan nei miau alawm. Engvangin nge ka lawm loh teh lul ang.

Zinglam dâr ruk bawr vel niin ka hria Cabin-ah min nawr lut ta a. 

U Atei leh u Mapuia chiah an lo awm tawh a, ka nu leh Diki, u Chhandama an haw tawh tih min hrilh a.

"Nano..ka lawm zia hi.." tiin Atei a nui var var a, naute erawh dârkâr 24 an up rih dawn tih a sawi a.

"Mama hi haw rih turin ka ti a, a duh tlat lova," a tih mek laiin u Mapuia a rawn lut ve ta a, lukhum phiar dum a khum a, jacket dum leh kekawr dum a inbel bawk a, a hmel pawr fap mah se, a hlim tih a hriat ngawih ngawih.

"Ka tuarchhel viau emaw ka ti a, kei aiin ka nupui tereuhte hi a lo fei zâwk a nih hi," tih pahin ka khum bulah a rawn ding a, ka hmui ro halhah chuan dimtein a fawp zauh a, "Ka lawm e, fapa min pek avangin, mahse, i na tawrh laia ka awm ve thei lo erawh nêp ka inti." A ti ta a.

Zawi sap hian, "I ho.. lo ngawi mai mai rawh, naute i hmu tawh em?" Ka lo ti a.

"Hmu e, min en tîr alawm, Atei nen kan en khalh che.." nui chungin a ti a, neih pangngai thlapa ka nei thei chu a lawm hle tih min hrilh bawk.

"A hmelṭha em?" Tia ka zawh chuan, "Hmelṭha min ti em?" Tiin nui chung hian min zâwt let hlauh a, "I chhia, sawi ṭha mai mai teh.." tiin thei leh thei lo hian ka nui ve a, "Hmelṭha min tih chuan kan fapa hi hmelṭha i ti ang, chhia min tih erawh chuan a hmelchhia i ti thung ang, a chhan chu ka fapa hian ka hmel a chhun miau alawm, a nu pawh a chhún tel tho a, a ngo êm êm bawk," a'n tiah.

"Ka hmu ve châk tawh," ka tih chuan u Atein a phone ami min en tîr ta a, a thlalak a lo nei diam tawh chu niin, a lian vak lo tih a hriat a, mahse, a hmel landan ka sawi thiam chiah lo. Thlalâk en ringawt chuan, 'Hmelṭha' tia sawi vul chûk chi ninghal lo chuan.

Rin ai taka ka zia avangin leh zinglam dâr sariha damdawi ei ngai a neih vangin u Mapuia ka tîr haw lui a, a hreh ngar ngar khawp mai.

"Atuni leh Thlatea vawiin dar 12 ah an lo thlâwk chho dawn a, naupang zan riahsan leh kha ka tân a buaithlâk si a, Mama phei chu rawn kal tawh rih lo se tiraw, damdawi in boruak hîp fo kha a tan a pawi palh thei a, i hriatthiam ka beisei, Atuni'n awmpui che a tum ruh êm kha maw," tia u Atei a ṭawng mawlh mawlh laiin ka phone a ri a, keiman chhâng lovin u Atei zawkin a pick a, u Ropuia hnen aṭangin a ni.

Atuni lo haw tur chu pawi tihna ka nei lo. Mahse, Thlamuana a tel ve kher dawn a, ka peih lo sa. A number pawh ka save sak peih lo kha a ni a, u Mapuia nen an boruak a ṭha vak lo nen lo haw rih lo pawh nise ka pawiti teh chiam lo asin le.

Thlamuana hi eng ati nge ka ngainat theih miah loh tih zawhna hi ka inzâwt fo ṭhin a, ka laka a fel viau pawhin ka ngaina thei chuang meuh lo chu a ni e, a mak ve ngawt mai!

A hmelṭha ver vawr lutuka ka ngei, chuan a mizia ngêng lutuk leh chapo lutuk hi ka ngainat zawng a ni lo a ni tawp mai ni. 

140123

-B®®

Shadow of the life

B+>[BeckirafARenthleI]<+®®