14. KA CHANPUAL [A Becky Rafa Story]

14. KA CHAN PUAL

Ziaktu: Becky Rafa Renthlei

-B®®

(Recap)

Atuni lo haw tur chu pawi tihna ka nei lo. Mahse, Thlamuana a tel ve kher dawn a, ka peih lo sa. A number pawh ka save sak peih lo kha a ni a, u Mapuia nen an boruak a ṭha vak lo rih bawk nen lo haw rih lo pawh nise ka pawiti teh chiam lo asin le.

Thlamuana hi eng ati nge ka ngainat theih miah loh tih zawhna hi ka inzâwt fo ṭhin a, ka laka a fel viau pawhin ka ngaina thei chuang meuh lo chu a ni e, a mak ve ngawt mai!

A hmelṭha ver vawr lutuka ka ngei, chuan a mizia ngêng lutuk leh chapo lutuk hi ka ngainat zawng a ni lo a ni tawp mai ni. 

-B®®

Hospital aṭangin u Atei a haw thla tawh a, u Mapuia a rawn thleng chho rang ngei mai, "Kal lo tura hrilhin awmzia a nei lo, a tum lui tlat tho," u Atei khan a ti nang nang a. 

"Duatnu, i lo ṭha em?" Nui var var chunga tiin ka mutna khum bulah a rawn ding a.

"Nang chu lokal tawh rih lo la, damdawi in boruak hi a hrisel lo a nia, i nat zual phah ang," ka lo tih chuan, ka sam pawr fap a rawn huikiang hmasa tê tê a, "I awm ve lohna hmun hi nuam ka ti lo, i kianga awm zel ka duh," a ti ta a. Ka lo nui hak.

"Zan khat lek ka awm lohsan che a tiang khan i ṭawng a nia," ka lo ti a.

"Nizan han hrehawm zia kha, khatiang anga hrehawm tuar leh tur kha chuan naupai tawh lovang che aw.." a ti ta a.

"Pakhat kan nei dêk dêk a, i duhtawk mai dawn elaw?" Tiin ka lo fiam ve a, "Ve ngei che chuan, Nano, i hrethiam lo a nih kha, khatianga i awm ka hmuh khan ka lo na ve vek," zuk ti a!

Naute en ka châk ve tawh si, ka inhliam nasat deuh avangin indim turin nurse-in min hrilh ngun khawp mai. U Mapuia'n min awmpui nileng ta ṭhak a, zan lam erawh chu a awm ka remti lo bur a, "Ka damlo min awmpui char char a, ka awm ve i phal si lo," tiin a phun nghe nghe.

Mak ve mai mai chu ka nu leh pa an rawn kal miah lo a, an tu hmasaber te chu an hmuh châk ka ring ve a nia. An reh hmak. Nge, an la up vang hian lokal ngai an ti rih lo tepawh a ni mahna.

Atuni te unau an rawn thleng tawh a, zan lamah min riahpui dawn a, thil buaithlak deuh a la awm, hnute tui ka nei miah lo hi a ni. Ka fapa pawh 'Nan' an pe ringawt a, u Mapuia bulah ka inthlahrun thu ka sawi chuan, "A ho êm mai, nang leh ka fapa mamawh leina tur tezawng ka nei lutuk tlat," a ti duh lek.

Kan fapain hming a la nei lo a, a pate Thlamuana'n phuah a hauh tlur. Kan hnial duh ta lo kha a ni a, eng tak phuah chhuak ang maw. U Mapuia'n phuah se ka ti deuh a nia; mahse, Thlamuana a kian ta a nih kha.

Zanriah eikhamah u Mapuia pawh a haw thla ve ta a, damdawi ina riah a tum leh ringawt a, ka phal ta lo. Ani zawng indim a ngai zual a, dam ṭha pangngaite tih ang tih ve zel a rem tawh lo. Amah lah hi a luhlul ve phian lehnghal.

Atuni a rawn thleng chho ta bawk a, min han hmu chiah chu, "Awi awi, i va han khawngaihthlak tak, naupuan pakhat pawh nei lovin i lo awm a nia, ka nu leh Atei ka hau hrep alawm, Mama an enkawlpui che pawh a ni lo a, nêp hlawm lutuk mai," a ti hluk hluk a, ka lo nui tawp.

Keima thiam loh zâwk a nih thuin ka lo chhâng ve a, a nihna chen a awm ve tho. Thlasarih a han tling chho kha naupuan lam rêng rêng ka lo mangnghilh bâkah min fin chhuahtu tur tumah ka nei lo chu thuhran ni se, ka pasal damlo tûktin damdawi pek leh vil a ngai a, naute lamin ka rilru a luah lo ti ila ka sawi sual lovang. U Mapuia a thi ang tih mawlh kha ka hlau a, ka nêp hle a ni.

"Thlatea pawhin a hna a bansan fel tawh a, Mama hna hi a chhunzawm dawn ta e, i hre tawh em?" Tiin min zâwt a. Ka hriat loh thuin ka lo chhâng a, "Mizoram lam pawh a khawih tel vek tawh dawn a, Delhi nen a kartawn ang, dik tak chuan Thlatea nen kan lo awmdun rei tawha a awm loh hun ka huphurh," a ti leh mawlh mawlh a.

"U Mapuia'n eng mah min hrilh si loa ka tân hriat ngaihna a awm lo alawm, a hrim hrimin hetah inpuiah hian a awm tawh dawn tihna em ni?" Tia ka zawh lêt chuan, "Aw, helamah a awm tawh rih dawn a, i zia deuh hunah keimahin Delhi-ah ka lêt ang," tia hawisawnin nurse lokal chu a en vung vung a, "Naute an rawn dah chhuah hunah in lama haw kan dil daih dawn nia, i indim thei zawkin ka ring," dam thlapa tiin naupuan a thlep ṭha mawlh mawlh a, a rawn lei tam leh mai mai asin. Blanket te taktê tê cute deuh deuh a rawn lei nual bawk. 

Ka phone a rawn rîk tâk avangin chulam chu ka ngaihven san ta rih a, U Ropuia a lo ni a, "Mate, lo zin ka tum deuh a." A rawn ti a, "An phal dawn em ni?" Tia ka zawh chuan, "Phal lo mah se puitling ka ni ve tawha sual rawngbawl tur pawh ni hlei lo, ka farnu duat leh kan naute thar hmu tura kal ka tum a ni mai a, sawi nawi vak lo se a ṭha a ni mai," a ti hmiah. Mipa na na na chuan a pal lui ngam deuh ang chu.

"I lokal theih chuan ka lawm viau ang, Atuni hi ka tihpui ang che," nui kar kar chungin ka lo ti a, "I â mai mai em mai, anni nena inzawm leh tezawng Vana rah ang a ni," a ti a. 

Chutih lai tak chuan Atuni ka bulah a rawn kun hniam a, "Ropui, lo zin tak tak rawh, Beer ka ngah teh mai a nia," a'n lo ti pek a, u Ropuia pawh a nui tawp.

Anni pahnih hi an lo inbe ṭhin tak tak a nih ka ring ta. An inngam em mai. Inbe ṭhang an ang tlat.

AuMami chanchin zawh ka duh viau naa Atuni hmai ka zah ve deuh avangin ka zâwt ta rih lo. U Ropui hi chu mipa awm chhun tih takah an zah ve deuh a, a ṭawng tam loh êm avang hian a lang nelawm loh ve a. Amaherawhchu, keimah nen hi chuan kan innêlin kan inpawh ber.

Zanriah eikham hnuah ka fapa an rawn dah chhuak ve ta a. Min pawm tîr lai te chuan ka thâ a khur lek lek, kan naute hmel ka hmuh chiah hian keimahah engtin emaw ni a awm. A ngo êm êm a, a pa sam ang lo takin a kir bep reuh a, sawi nawn ngai lovin a pate Thlamuana sam a chhun tih hriat reng reng. A pa sam dum hlap leh ngil siau chhun zawk se ka tih vei nen. Â..Thlamuana sam ang ber kher a pu hi ka ngei deuh tlat. A va buaithlâk e.

Hnute tui ka neih miau loh avangin Atuni'n Nan a siam sak a, a zei lo ve lehchhawng. Ani ai hian ka lãktlãk bik vakin ka ring chuang lo.

Ka ṭawngṭai chhânna pakhat chu a hlawhtling ta a, u Mapuia'n a fapa hmel a hmu ta hi a ni. Kan hmalam hun sawi thei lo mahila, ka thinlung a hlim ve takmeuh. A thim zawngin eng mah ka ngaihtuah duh lo lui tlat a, nu tak tak ka ni ve ta a, u Mapuia pawhin pa dinhmun a luah ta bawk a, kan ṭha tlangah ngai ang. 

Duh ang thâla ka chêt theih loh avangin leh nautein ka hnutetui a ring chuang lo bawk nen, Atuni'n a mutpui daih a, a phûr êm êm si a, ka hnial duh ta lo, rei tak min awmpui thei dawn chuang lova tiin a châm chhung hi chuan han buaipui ve lâwp lâwp teh se.

Lunglei lama ka chhungte pawh ka hrechhuak lo thei bik lova an fanu duat ni ṭhin Zomuanzuali'n fapa ka nei tih an hre tawh ang em, an hnena ka awm lohna leh ka biak lohna chin pawh thla tam a tling ve ta a, hmeichhia hi kan tuarchhelin kan lo puitling hma khawp mai. Ka pasalin min duatin min hmangaih a, ka chhungte laka ka hrehawmna leh natna tur tam tak hi chu min chhâwk zangkhai chiang alawm.

U Kimtei te nupa erawh chu u Mapuia'n a lo va be diam tawh a, min lawmpui hle tih a sawi.

A tâwi zawngin kan sawi leh mai ang.

Ka inhliamna tih loh ṭhat lohna dang vak ka nei lo bawk nen ni hnih leh zan thum Durtlâng hospital-a kan awm hnuah kan inla chhuak ve ta a, indím turin min chah ngun hle, Bawihpuia pawh pawm thawlén an rem ti lo bur a, thla kim lova piang a nih vangin dimdawih turin min chah mawlh mawlh.

In lamah chhungkaw chaw eikhawm an lo buatsaih chu niin! 

U Mapuia a phurin a hlim hle a, naute thar lawmna atan tiin Kél pum a lo lei hmiah. A va ṭul ber lo e; mahse, tumahin an sawisel sak lo a, Thlamuana ṭhiante pahnih Chanmari lama mi leh Atuni ṭhiannu Dingi an sawm tel bawk a; u Atei te chhungkua kan ni leh tawp. Ṭhenawm hnaivai tak kan nei lo nain ka nu Biakliani kawm ve ṭhin leh pa Zoliana thawhpui hlui te pahnih an sawm tel bawk.

"Nano, ka lo bual dawn che em ni ang," nui ruh ruh chungin kan room-ah u Mapuia a lo lut a, "A ve lutuka che, nangmah kha inbual fai rawh," ka lo ti a.

"Inbual rual ila.." nui chunga tiin ka mitah tak min en a, min thlahlel ngawih ngawih hmel a pu.

"A chi nang, Atuni a awm rih si lova naute mutpui a ngai a lawm, va inbual hmasa la, ka inbual chhungin Bawihpuia i lo awmpui ve zawk dawn nia," ka lo ti a.

A dik a dik chuan, hnute pêk dan thlengin kan inzir chawp tak meuh meuh a, u Mapuia tak hi chuan a thiam mai, Atuni pawh a ngaihtuahawm lohva keimah ber hi ka zei lo ve chiang alawm. Tihpalh ka hlauh lutukna lamah ka hah vek zel.

U Atei'n a rawn bual thung a, fa pahnih nei tawh a ni bawka a zeihawi viau. Ka nuin, "Tupa kan han nei ta chu a nia, Mama fapa hmel kan hmu thei hi ka lawm hrim hrim," a tih ve ngial kha. Ka pa pawhin a la pawm lo naa a hmelah a lawm ve hle tih a hriat.

Thlamuana pawhin naute hming atan, "Lalnunfîma" a phuah ta a. A ṭha vek e. "Manun" tia koh tur. A ti leh deuh kher. Ka sawisel ngam ta lo; hetia a lo haw leh hnu hian inbiak pangngaiin kan la inbe miah lo a, naute hming phuah tura kan room a lo lût tih loh vawikhat mah a rawn lang lo bawk. Damdawi inah nise a lokal chuang lo a, a pawi pawh ka ti lo. Ani nen hi chuan kan in 'chu e kha' thei ngang lo a ni ber e.

Pathian hnena lawmthu sawina hun te neiin chhungkua hlim takin chaw kan eikhawm ta a. He in chhunga ka awm aṭanga ka nuih tam ni ber a ni ta ve ang.

Kan room-a dah tur Couch pakhat Thlamuana'n a rawn lei teh ngawt a, "Inlêng te pawh in nei ve thei a, bâkah riahpuitu tan pawha mut nghal theih pakhat tal awm ve rawh se, Mama leh Bawihpuia buaipui kawp hi Zomuani tan thil buaithlâk a ni ve thei a, a remchang apiangin kan riahpui theih nan awm rawh se," a ti nghut nghut, a sawi lai hian Atuni a melh deuh kher bawk a, ani lah chuan, "Kârkhat bâk chawlh ka nei thei dawn si lova nangmah riak keuh rawh," nui chungin a lo ti a, kan nui ve vek, Thlamuana berkher hian naute a buaipui lul lovang e.

Kârkhat lai inah kan awm tawh a, u Ropuia zan hnih riakin a lo zin ta ngei a. Ka hnuk a ulh lo thei lo. Ka hmuh veleh ka kuah chûk chûk a, a hmelṭhat ngaiin a la ṭha reng; mahse, ka hmu chêr ve deuh.

"Mate, hringnun hi chhel taka i hmachhawn a ngai a nia, Mami pawh tluang takin an zai zo tawh a, a tawh a khirh sawt, i hming rêng rêng kan inah lam rîk phal a ni lo tih lo hre ve mai mai la aw, chhungkaw ṭha tak, pasal nangmah hmangaihtu i nei a, zâm reng reng suh ang che, nakinah hun te han kal deuh se, i man pawh keiman ka la dawng dawn nia," a ti thlap a, ka va lawm si êm.

Kan room-ah mu ve tura ka ngenna erawh a hnial a, ka nu leh pa pawhin an hmu mawh viau lo a ni ang, an be ṭha ve phian. Amah Lalthlamuana bawk hian a lo be leh pek lova, "Ani thusawi hi chu ménah thlâk rawh, en liam tawp la a ṭha a nimai," ka ti a, "Mipa leh mipa kan ni a, sawi vul chûk tur a vâng ve atin ni," a tih ve tâk kha.

Atuni nen an inkawm thei viau a, a lo thlen tlaiah pawh, u Atei te inah chaw an ei chhuak daih a, atu amahin an sawisel lo. U Mapuia hian a ngaina a, engkimah, "Ropui" a ti zel a, an contract thilah pawh a tel ve theihna tur ang dappui a tum tih a sawi. Ka pasal nge nge a ngaihtuah kim ṭhin e.

Zan lamah Atuni kan room ah a lo riak a, ni hnih hnuah Delhi pan a tum tawh avangin ka huphurh hle. Diki hi chu phût enah ka en lo hrim hrim a, inchhungah chêtna tur a tam ve bawk si, a duh angin Bawihpuia pawh a lawm ṭha hman meuh lo. Ka nu nise a mâwiah a lo lang ve chauh a, vawikhat tê pawh nau a la bual lo. Min duh lo tu kha a ni miau a, a fapa vanga min be ṭha der ve pawh a lawmawm reng reng e.

U Mapuia ber hi ka buai rûkna a ni a, chaw a ei tlêm êm êm a, food suplement lam pawh a ti hleithei chuang lo. Zanah a mu ṭha lo thei bawk si a, ka rilru a ti nuam lo hle a ni. 

Nizan lawkah pawh rei fê bathroom-ah a inkhung a, 'i nuam lo deuh em ni' tia ka zawh lahin, 'Duatnu, min ngaihtuah lutuk lo teh, ka ṭha reng a nia,' a ti zel si.

Tukin lam hian Cancer hospital-ah blood test nei turin Thlamuana nen an chhuak tawh a, an kal tur a han insiam te kha a muang ruih a, kan nufain min lo thlir leh veng veng zel. Tur nawn sek lo ila chuan a kal leh duh tawp náng. A awm dan hian ka ngaih a ti ṭha fahran lo va. An kal hlanin kan nufain leh Atuni room-ah kan awm a.

"Nano, thil ka hrilh ang che anga sawi chhuak miah suh," tih pahin khumah a rawn ṭhu a, Bawihpuia a pawm a, keiin a hnute hnek tur ka lo siam thung a, "Eng lam nge?" Tia ka lo zawh chuan, min en vang vang a, "Thlatea leh Mama hian hmanniah i chungchang an sawi a, Bawngkawna a in te leh sum chungchâng an sawi ri ka hria a, an inhau deuh alawm; an sawi zawng zawng ka hre lo nain eng emaw tak chu ka nu leh pa hriat lohvin intiamkamna an neiin ka hria, Mama hian a hmangaih zia che kan hria a, i tan ruahmanna a lo nei ru reng pawh a ni maithei," a ti ta a. Mak ka ti hle.

A chhan chu hetiang lam hi u Mapuia'n min sawipui ngai lo a, bâkah min hrilh a nih loh chuan engmah dilchhûtin ka zawt ngai lo. A tlachawpin ka awm a nih ber hi.

"Thlamuana hi i nau pawh ni mah se, a zia a dang bîk lutuka ka ngaina thei lo," ka ti tawl a, min en vang vang chung hian, "Thlatea hian a ngaihven chein a ngaihsak che ka ti. A tilang thiam lo mai mai a nih hi," a ti ta a, ka awih lo nasa e.

"I ngaihdan mai mai a nih chu, nang leh Atei hi sawiselna tur che u ka hre lo. Mahse, i nu leh pa, Thlamuana te hi chu ka lakah an ṭha lo ve thlâwt," pehhêl nei miah lovin ka sawi tlang tawp a, nau awi chung hian, "Nia, ka nu leh pa hi chuan sum bâk an âtchilh lo, an duhâm a nia, ka hlawh pawh hi a chanve an la hûi zar zar, pasal neih ve daih te hi ka duh rum rum," tia a sawi pahin a thaw huai a, "Atei hi a vannei letling, ka nu leh pa thuhnuaiah a awm tawh lova a pasal a fel si, ngun taka ka ngaihtuah hi chuan ka inkhawngaih deuh ṭhin. Thlatea leh Mama hian min duatin min ngaihsak êm zawk a, thlatin an hlawh aṭangin min pe ve ziah zel a, ka nu phei chu ka hrilh duh ṭhak náng," tih te a sawi a, ani pawh hi thawveng ang taka a lan phenah a nun a lo nuam bik vak lo a ni tih ka hriat phah ta bawk.

Chutia eng eng emaw kan lo sawi lai chuan, "Lalthanpui, insiam rang rawh, Zomuani leh Diki inah lo awm sela, eng nge in tiha koh reng reng hre thei lo mai," ka nuin a rawn ti vin hluk hluk a.

"Au vak vak zel suh, Bawihpuia ka timu zo chiah a nia," tiin Atuni'n a chhâng a.

"I u Mama thisen unit li pek a ngai dawn a nia, Zomuan, Ropuia kha biak lo tum la, Cancer hospital-ah kal tel ve teh se," a tih leh chuan ka phu zawk a, ka ding hluai. Mit khap fak fak chung hian, "Tunge rawn hrilh che?" Ka ti vak a.

"Thlatea'n a rawn phone a, in biak tlang theih loh a ti a nih kha, an admit tawh a, thisen petu tur kan zawn a ngai, amahin unit khat chu a pe thei dawn a, blood bank ami kan hmang a nih pawhin hnawhkhah tho tho a ngai si a, Chhandama hian tihdan a hria ang em Atei kan call ang e," phili zetin a ti leh a.

Atuni'n Bawihpuia a mut fel a, in hnuai lamah kan inzui thla ta a. Ka tan kal ve a rem lo tih ka hre tho nain ka zui mawl ve tawp. 

Nia, u Mapuia awm dan hi hriatthiam a har ṭhin rêng a ni. Thil a ei chhia ka tih tawh kha, a natna pangngai Thawhah ang khan a awm vak tawh lo va, a chêr sâwt si, tih vak ngaihna ka hriat bîk loh avang leh Bawihpuia a awm ve bawk si avangin ka ngaihsak lutuk thei bik lo a, nizan hmasaah pawh khan a luak hrep a, a chhan ka zawhin, "Eng mah nâ ka nei lo a nia, ka pum a let mai mai," a ti tlat zel bawk si. 

U Ropuia ka call ve nghal a, chanchin ka hrilh hnuah, "Zarkawtah ka awma ka kal tlang nghal mai ang, i lo hlauthawng lutuk ang e, chanchin ka rawn sawi dawn nia," a ti dam ruih.

Chumi hnu chuan kei leh Diki, u Atei tih lo MSCI Zemabawkah an kal ta dial a, u Chhandama duty lai an ko haw tawp bawk. A dinhmun a ṭha viau lo nge an phili ve hrim hrim tih hriat va ni suh.

Kan room-ah chanchin ngaichângin kan awm ṭhap a, ka fapa tui taka muhil hmel ka hmuh chuan ka ṭah a chhuak ru ngawih ngawih, kâr khat leh ni hnih chauha upa a la ni a, "Lalnunfîm, i pa dam theih nan ṭawngṭai chiah tih theih kan nei a nia aw," tiin a sam kir chiat chu ka chûl a, eng mah hrethiam lo mah se, ka fapa hi ka inbunruahna tur a la ni dawn chauh tih ka hria.

Diki'n thingpui a rawn dah chho a, "Nano, i kal ve duh em, i duh chuan zan lamah naute hi chu ka lo awmpui mai dawn alawm, rilru hrehawm deuha nghah tlawk tlawk âi chuan," a ti a, min khawngaih hle tih a mitmengah a lang reng.

U Atei pawhin, "Nia, nangmah i inhuam chuan kan lo awm ang a, riak kher lo pawhin i kal duh phawt chuan kal tawp mai rawh," a lo ti ve bawk.

Ka phone a rawn ri a, number lawng a ni tho nain rang takin ka lo pick a, "Novi...Atei i bulah a awm em?" Tia Thlamuana a rawn ṭawng chuan ka thaw halh a, a awm thu leh chanchin kan ngaichâng tih ka hrilh a.

"Thisen kan pe mek aw, a mîtliam a lo nasa deuh hlek a, Bawihpuia kha Diki kutah dah rih mai ula, Atei nen lokal rawh u," a tih tâkah chuan hlauhthawn luat vangin ka khûr lo chauh.

"Amah a harh em?" Tiin ka lo zawt a.

A harh loh thu leh a thaw a hah hle tih a rawn sawi tlang hmiah a, thu a khuh lo ve ṭhin si a, "Thih tîr miah suh, kan lokal ang," ka ti nghet charh. A thaw hulh a, "Chhel takin le, Mama hian vawi hnih i hming a lama a ṭawngvai zauh zauh a," a ti leh a, "Khawi maw, Atei kha ka lo be lawk teh ang," a tih mêk laiin, "Mapui... Rinkim.." tia ka u Ropuia ṭawng ri ka hre pha viai viai.

Hrilh hranpa ngai lovin a dinhmun a ṭha lo hle tih ka hrethiam mai. U Atei phone ka pe a, indim tih velin ka nunah hmun a chang tawh lo, Diki hnenah thil awmzia ka hrilh mawlh mawlh a, "Taxi koh tur lo zawng rawh aw.." tih pahin ka thawmhnaw hmuh hmasak ang ang ka inbel sawk sawk a, ani pawh a che chhuak nghal vat a. U Atei leh Thlamuana an la inbe thung.

Bawihpuia biangah fâwp zeuhin, "Âpa hnenah ka kal ve lawk dawn a, thu lo awih rawh aw," tiin u Atei nen kan chhuahsan ta a, a dik a dik chuan ka la khawr ṭût. Tun hi damdawi in kan chhuahsan aṭanga ka vawikhat chhuahna tur chauh a ni a, ka huphurh angreng.

Cancer Hospital Main Gate-ah u Ropuia'n min lo nghâk a, building tharah an awm thu leh lut nghal turin min lo hrilh a, damlo bulah pathum aia tam awm an phal lo tih a sawi vangin, ka nu leh pa, Atuni an lo chhuak a, ka pasal hmel ka hmuh rualin ka mittui a far fap.

"A hriatna a chawl miah lo a nia, ṭap suh aw.." ka bengbulah Thlamuana'n a ti sup a, rang takin ka mittui ka hru sawk sawk a, khum bula ṭhutnaah ṭhuin a kutah ka vuan a, tukina an kal tur hmel leh tuna a landan chu inthlau tawh tak a ni.

Blood bank ami thisen unit thum an hman thu leh thisen var an khai zawm leh dawn tih Thlamuana'n a sawi a, ka ngaithla mumal lo. Ni e, ka beisei ang leh duhdanin eng mah hi a thleng dawn lo tih ka hmu thiam ve a, a hun tawp a hnaih hret hret tih ka hria. Mahse, mihring ka nih angin beiseina ka nei lo thei si lo a nih hi. Ka hah. 

"Kan vaia hetia awm ṭhup ṭhup hi thil ṭûl ber a ni lo a nia, Atei leh Ropuia haw se, Bawihpuia pawh a ngaihtuahawm lutuk, nau nen Dikin eirawng a bawl thei dawn miah lo a nia," ka nuin a lo ti leh tawh.

"Ka pa nen khan haw u la, in lam chu in kutah awm rawh se, Zomuani nen zanriah ei turin kan rawn haw anga kan inthlâk kual dawn nia," hnial theih miah lovin Thlamuana'n a ti a, ka kokiah Atuni'n min kuah rán a, "Mama âi hian ka khawngaih zawk che," a'n tiah. Henu leh rih ṭhin hi aw...

Mahse, a thusawi hi a ril ru riau thung si.

Diki ka va call zuai a, Bawihpuia a la mu ṭha tih a rawn sawi tal alawm. Kei leh Atuni, Atei nen u Mapuia bulah kan awm ṭhap a, Thlamuana'n engkim a rêlin a ngaihtuah vek. 

U Chhandama leh u Ropuia pawh tiamin pawn lamah an ṭhu thung a, "Mama ka khawngaih dan em em hi chu aw, a vanglai leh ṭhat lai hun pawh natna nen a hmang a, a fel leh ṭha ṭha tihian an awm ṭhin hi ka run a nia," Atuni'n a ti sap sap a, u Atei ve thung chuan, "Nanovi nen hmanah khan innei daih se ṭha tur a nia, ka nu leh pa hi ka dem lo thei lo," a lo ti ve bawk. Kei erawh ka lo ngawi reng a, sawi ve tur ka ván êm a ni.

"Bawihpuia pawh a ngaihtuahawm si a, engtin nge ni ang le," tiin thil dang daih ka sawi ta a.

"Thlatea nen zanriah ei tura in haw chhungin kan lo awm ang a, ka nu leh Diki'n an lo awmpui ve thei tho ang chu, hnute pangngai a hne lo te hi alawmawm zawk a nih hi," u Atei'n a ti bawrh bawrh a.

Tlailam dâr 5 velah u Mapuia chiang lo ruaiin a rawn harh a, min hria ang pawhin a lang lo. Hmui phunin ka hming a lam a, a chhîng zui leh daih. Midangin min hmuh hlau deuh hian ka mittui ka hru ka hru a, a hrehawm hi a ni tawp mai. 'Cancer ni kher lo se' tih te ka ngaihtuah thul, awmzia a awm chuang der si lo a.

Dr.Cindy leh Thlamuana an inbiak laiin zunram thiar tumin ka chhuak ve ta a, u Ropuia'n min lo zui chhuak vat a, ka zun zawh hnuah, "Mate, mi â i ni lova Mapuia awm dan heti hi a nih tâk thut si-ah chuan ka haw lo mai ang aw, a chhe ber thleng thei kan ni tawh a, intipaukhauh la, fîm taka awm hram hram tum ang che, eng emaw ho teah indem te a awl ṭhin a, a enkawltu ber i nih angin Mapuia nu hian sawi nawi tur a hre riau lehnghal a, ngawih chuh a ṭha a nia," tiin, midang hmuh loh laiin min hrilh a, ka pawm zawng leh rilrem zawng tak a ni. 

Ka tih nimiah si lo leh ka inrawlh lohnaah pawh ka pasal nu hian min ṭawngkhum zeuh zeuh a chîng tih ka hriat tawh hnu vek a ni a, ka û hian a hai bík miah lo tih a lang reng.

Ward-a kan awm ve avangin damlo na tak tak, beiseiawm loh fe fe ka hmu nawk a, Thenzawl khua ka hmelhriat pawh ni lo pakhat phei chu Thisen Cancer a ni a, a mar chiah an en tawh a, ka va lainat tak. An fapa kum 14 mi a ṭap kerh kerh a, ka fapa Nunfîma ka mitthla rauh rauh. Ka lung a chhe ru ngawih ngawih a, ṭah a hun si lo, ka taksa a la nuam lo zui êm êm a, period tur inṭham ang maiin ka awm sek lehnghal. 

"Zomuan, thisen an pêk chhung hian in lamah kan haw ve lawk dawn em ni ang, midang lo awm se la, Mama Motor hi Ropuia'n lo kawl rih ta mai se, kan lêt leh hunah anni an haw ve thung ang a," tia Thlamuana'n min lo biak chuan insût hraih chung hian, "Atuni leh u Atei hawpui la, ka lo awm rih zâwk ang e," ka ti zawi raih a.

Hnial theih miah loh leh khauh fek fawk hian, "Eng mah tih theih a awm chuang lo a, i fapa i ngaihtuah chuan ka rualin rawn haw phawt mai rawh," a ti hmuk a. Midangin an lo pawmpui ve bawk si avangin Thlamuana nen kan haw rih phawt a ni ang chu. 

U Ropuia a ṭangkai viau mai a, damdawi lam ngai a awm pawhin a tlan zung zunga ka lawm tak tak a ni. Atuni te unau pawh an mittui a tla fap fap reng a, an tan chuan u Mapuia hi a hlu rêng a ni. A farnute pahnih a duat êm asin.

Midang mitmei veng duh eih lo hian u Mapuia biangah ka chûl a, "Ka lo lêt leh hunah chuan min lo be tawh rawh aw, hetianga i awm lai hi hmuh ka duh lo," ti sapin a chalah ka fawp zauh a, a pang a dai dak mai!

Thlamuana nen in lam panin kan haw ta a. Biak huphurhawm takin a ngawi ngul a, Bawngkawna u Mapuia in sak zâwnah a ding dat a, "A thawhrim tehlul nen tihian a awm leh si a," a ti sup. 

"A dam leh dawn alawm, a hma pawhin tiang hian a awm tho a, thisen a dawn zawh hnuah te chuan a lo harh ve mai kha..." ka lo ti a, Steering nghet taka vuanin, "Ka beisei, i beisei ang kha thleng dik mawlh teh se," tih chiah a sawi.

In kan thleng a, a lo reh ruih. 

Kan nupa pindan lam aṭangin Bawhpuia ṭap ri ngâk ngâk bâk thawm dang hriat tur a awm lo, rang takin chulam pan chuan Step-ah ka pen hlawk hlawk a, ka hnungah Thlamuana'n min zui bawk a, room chhungah ka nuin Bawihpuia a lo áwia a ṭap nasa ngei mai.

"Eng tizia nge, a va ṭap nasa em em ve," ka'n ti dêk dêk a, "Nau no pawm nih hi chuan rei deuh deuh chhuah loh a ṭha, damdawi inah eng mah tih theih i nei chuang em ni?" Tia min lo ṭawngkhum hluk hluk avangin ka ding chawt a, "Tih theih ka nei lem lo, mahse, ka kalna tur dik takah ka kal.. khawi, ka lo la ang e..." ka lo ti ve hmak.

"Mi hi i chhâng ang fak fak lehnghal a," a tih leh lai takin, "Ka nu, a tawk, Diki hrilh la chaw ei lo siam rawh se, ṭawng thui vak a ngai lo," Thlamuana'n a ti vin ṭhak a, ka nu a meng kal rawlh rawlh a, a sual hmel ngawih ngawih. 

Bawihpuia pawm chungin a hnute hnêk tur ka buaipui a, ka zei viau lo. 

"Ka lo pawm rih ang e," tih leh ka nau pawm lai min laksak a rual a, ka hnial hman îk lo. Thlamuana'n a vawikhat nan a û Mama nena kan fapa a pawm ve mial a, flash-ah tuilum tih tham a lo awm tawh si lova Hotpot-ah ka lum leh rih. Ka chê reng reng a khawr ru ṭût a, ani lah chuan, "Tlangval an ṭap ngai lo aw," tih pahin room chhungah Bawihpuia a veipui nghauh nghauh a, a palian si, a va inhmeh lo tak. 

Hnute pêk tumin ka va ban a,  Lalnunfima a lo muhil hman dér! 

"Ka nu ṭawng satliah hi chu haider mai mai rawh, chuan..a mut chhuak lutuk suakbâk a nih hi..." ti leh daihin, Bawihpuia a la pawm reng a, "A ṭawng dan hi a ngeiawm thei êm alawm," ka lo ti ve nghauh.

Diki'n chaw a ei theih tih a rawn sawi lai pawhin kan khumah naute pawm chung hian Thlamuana a la ṭhu ngur a, keiin flash-ah tui so ka lo thun thung a, "Novi...zuk ei hmasa la, tihian ka lo awm ang," a'n ti ve ngei a. 

"Ei hmasa zawk rawh, ka ril pawh a ṭâm lo," tia ka lo hnial chuan, Diki lam hawi chung hian, "Lo awmpui lawk mai rawh aw, kan zuk bâr luklak ang a, damdawi in kal lehnghal a ngai si a.." tia a sawi zawh rualin dimtê hian khumah Bawihpuia a mut a, a va zeihawi si ve! 

Kei leh Thlamuana min melh tawn zak zak chung hian Diki a nui hak a, "U Thlate, Bawihpuia hian a chhun che a nih hi, ka hre ve chiah," a'n tiah. Mâwl hiuheu mang e, sawi hun pawh ni nghal lo chuan. Thlamuana erawh a kiai suk duh chauh.

Dining table kîlin kan ṭhu dun a, kan inbe zawm leh tawh lo. Ka nu a rawn lut phei a, "Thlate, invaiin em ni in awm leh ang, Mama chu a zia deuh em?" Zaidam deuh hian a ti a.

"A ngai reng a ni mai, Zomuani hi chu damdawi inah awm rih mah se a pawi lo a nia, a pasal a ni a, Atuni rawn haw turin ka hrilh tawh kha, Bawihpuia lo awmpui se a ni mai," a tih tâkah chuan Thlamuana ka melh vat a, min en ve duh miah lo. 

"Zomuan, kal leh i tum amaw?" Ka nu bawkin a lo ti leh a, "Nau awm tur an awm chuan kal leh ka duh," ka ti ṭha ve mai.

"Kei chuan ka awm thei lo ang aw, nau ka khawih lohna a rei tawha tunlai mi ho hnute siam chawp ang te hi ka ngaina lo, a thiam pawh ka thiam lo, inlâk changkanna emaw hi in tia maw ni," zuk ti hrâm a, ka chaw ei thleng chawiin ka tho hluai a, ka ei lui thei ngang tawh lo. 

"Ṭhu la, tlem tal ei tum leh rawh, khatiang lek i ei te chuan i tlaivar thei nâng," dam thluamin Thlamuana'n a ti a, ka ṭhu thla leh ta riai riai. A sawi dik chiah a, eng tham mah ka la ei lo ve bawk atin ni.

A nu en chung hian, "Mama damlo enkawl a ngai a, i phun reng hi ka kham a nia, ngawi ve mai mai ṭhin rawh, a hahthlâk," a ti hluk a, ka nuin a chhâng miah lo. Ner sawk chungin a kal kiang ta a. Ka lo thaw huai. 

Atuni leh u Ropuia lo thlen laiin inchungah kan awm tawh a, "Thlate, hmanhmawh khuchûk duh lem suh u, a awm dan a la ngai renga inbual tepawh i duh lo'm ni? Atei te nupa an awm tho alawm," Atuni'n a ti zung zung a, intleuh ve zuai chu ka duh takzet.

"Zanin chu Zomuani nen kan tlaivar ang a, Bawihpuia lo awmpui i inhuam em?" Tiin Atuni a zawt a, a inhuam thu a lo sawi ve thuai a. U Ropuia erawh chu kan rualin a kal leh thung ang.

Mahse, kan kal dawn a ruaiah Bawihpuia a ṭap leh ta ngat ngat a, a va buaithlak ṭhin ê.. hnute ka pek pawhin a bâng duh der si lo, a la tê ve bawk si a, Thlamuana'n, "I kal a rem lo a ni ang e, inah awm mai rawh aw..." a ti ta a, ka hnial ta bîk lo. 

Chanchin a chhia a ṭha inhrilh tura kan inchah hnuah an kal leh ta a, rilru a nuam viau lo chu a ni e. 

Kan nufain khumah kan mu bal a, phone a rik hlekin ka phu zawk zawk zel bawk a, ka lungphu a pangngai thei lo a ni ber, u Mapuia hian min kalsan dawn tak taka hriatna ka nei a, ka hlauthawng ru ngawih ngawih tawh.

In hnuai lamah inhnial thawm a rawn awm a, a ring vak lo nain thâwm a reh êm vang zawka hre pha mai mai chauh ka ni a, dimtea tho chhuakin kan room kawngkhar zawnah ka ding a, ka hre sual lo ve.

"Lalthlamuana nen engkim an sawi dun tih a hriat vek alawm, ka hlauh ang ngei ngeiin a thleng dik dawn a nih hi. Lalrinkima thluak hi Zomuanzuali hian a ei zawh sak a nih ber tâk hi," tia nu ber a ṭawng chuan ka ding khawng at. Ka hming an lam ri leh ta.

"Mapuia hi thi se ka ti lo, ka fa hming koh a ni a, a natna hi a na êm a, a tuar rei tawh bawk a, a tan dam chhan a tlem êm a ni, mahse, Zomuani kutah engkim a dah vaih chuan a pawi khawp ang," tiin a sawi zawm leh a, ka ngaithla peih tawh lo hrim hrim. Hria ang pawha lan ka duh hek lo.

An fapa thichháwngin damdawi inah a let reng a, anni nupa ve hi an fapa rosumah an lo buai a nia, tenawm lutuk. 

"U Mapui, i dam a ngai asin, kei leh i fapa tan i dam a ngai takzet," ka ti rilru nauh nauh a, ka mittui a hnai leh kuar tawh.

Nunna aia hlu khawvelah hian a awm thei dawn em ni? Thlamuana leh u Mapuia hian eng ruahmanna nge an siam hriat pawh va ni suh, a hunah engkim a lo lang chhuak turah ngai ang aw...

170123

Shadow of the life

B+>[BeckirafARenthleI]<+®®